Category: भिडियो

दमक । राष्ट्रिय प्रजातन्त्र पार्टीका नेता राम थापा २०३९ सालमा दमक गाउँ विकास समितिबाट नगरपालिका बनेदेखि नै यहाँको मेयर बन्ने सपना देखेका थिए । जसअनुसार उनले पहिलो पटक मेयरमा चुनाव लडेकै २४ वर्ष बितिसक्यो । त्यसअघि उनी वडा अध्यक्षमा निर्वाचित भएका थिए । २०३५÷०३६ सालमा भद्रपुरको मेची बहुमुखी क्याम्पसबाट थापाले राजावादी विद्यार्थी नेताको रूपमा राजनीति सुरू गरेका थिए । त्यसयता उनी उही विचार र सपनामा एकाग्रह छन् । अहिले उनी राप्रपाको प्रदेश नम्बर १ का अध्यक्ष छन् । लामो राजनीतिक निरन्तरताका कारण दमकमा राम थापा धेरैका लागि ‘राम दाइ’ का नामले परिचित छन् । राजनीतिक विचार मिल्ने र नमिल्ने सबैको साथमा उनी आसन्न स्थानीय तह निर्वाचनबाट मेयर निर्वाचित हुन चाहन्छन् । पूर्वराजा ज्ञानेन्द्रको प्रत्यक्ष शासनकालमा उनी दमकको मनोनीत मेयर बनेका थिए । २०७४ सालको स्थानीय निर्वाचनमा थापा दोस्रो भएका थिए ।
एमाले अध्यक्ष केपी शर्मा ओलीको गृहनगरमा यसपालि एमाले भर्सेस महागठबन्धन बनेको छ । एमालेविरुद्ध कांग्रेस, माओवादी केन्द्र र राप्रपा एक ठाउँ उभिएका छन् । यहीं महागठबन्धनबाट मेयर उम्मेदवार बनेका ‘राम दाइ’ दमकको नेतृत्व हत्याउने योजनामा छन् । उनै राम दाइ अर्थात राम थापासँग स्थानीय तह निर्वाचनमा केन्द्रित रहेर नेपालप्रेसकर्मी ध्रुव भट्टराईले गरेको कुराकानी नेपाल टकमा ।

– दमकवासीलाई तपाईं आफूलाई कसरी चिनाउन चाहनुहुन्छ ?

म २०१३ सालमा जन्मिएको मानिस । २०२६ सालदेखि दमकमा पढाइको सिलसिलामा आएर बसेको हो । २०३० सालमा एसएलसी गरेर मैले राजनीतिशास्त्रमा स्नातक उत्तीर्ण गरेको छु । २०३९ सालदेखि अनवरत रुपमा १२ वर्ष तत्कालीन दमक वडा नं १२ को वडा अध्यक्ष भएँ । एक अवधि तत्कालीन युवा संगठनको नगर सभापति भएँ । विभिन्न सामाजिक संघसंस्था, दमक क्याम्पस, दमक खानेपानीलगायतमा पनि अनवरत रुपमा काम गरिरहेको छु । दमकको विकास र निर्माणमा निःस्वास्र्थ रुपमा काम गर्ने मेरो दृढ निश्चय भएकाले आसन्न स्थानीय तह चुनावमा संयुक्त गठबन्धनबाट मेयर उम्मेदवारको रुपमा प्रस्तुत भएको छु ।

– केपी ओलीको गृहनगर भएकाले राष्ट्रिय चर्चा र दबाब छ । गठबन्धनले समर्थन गर्नु भनेको तपाईंलाई जिताउनुभन्दा पनि एमालेलाई हराउने सन्देश दिन खोजेको देखिन्छ । के तपाई त्यसको मतियार बन्नुभएको हो ?

त्यस्तो होइन । खासगरी म योभन्दा अघिल्लो दुई पटक राष्ट्रिय प्रजातन्त्र पार्टीबाट नगर प्रमुखमा उम्मेदवार भएको थिएँ । म दोस्रो भइरहेँ । जीवनमा एकचोटि नगर प्रमुख निर्वाचित भएर सेवा गर्ने मेरो व्यक्तिगत इन्छा, पार्टीको पनि उम्मेदवार बनाउने लक्ष्य, सत्ता गठबन्धनले मात्र एमालेलाई परास्त गर्न नसक्ने र यो पाटोमा मेरोसमेत उपस्थिति पनि आवश्यब परेकाले हामीहरु संयुक्त भएर दमकको विकास र निर्माणलाई गतिशील बनाउने उद्देश्यले हामी गठबन्धन र तालमेल गरेर अघि बढेको सत्य हो । एमालेलाई परास्त गर्न होइन ।

– दमकमा हिजो राप्रपा एक्लै लड्दा पनि एमाले पछिको दोस्रो शक्ति थियो । आज एमालेबाहेक अरु दलको समर्थन लिन तपाई कसरी सफल हुनुभयो ?

सही कुरा के हो भने उहाँहरुको उपस्थिति र मेरो पनि नगर प्रमुख बनेर सेवा गर्ने, यी दुबै कुरा र हामी सबै एक–अर्काको परस्पर मित्र बन्नुपर्ने समयको माग भएकाले एमाले हराउनेभन्दा पनि आफ्नो उपस्थिति र विजयका लागि हामी एक–अर्काका पूरक बनेका हौं । खासगरी हाम्रो उद्देश्य एमाले हराउनेमात्र होइन, दमकमा गएको नेतृत्वले धेरै काम गरेन । नगरवासीको सामाजिक न्यायमा पहुँच, सुशासन, विकास गर्ने उद्देश्यले हाम्रो तालमेल भएको हो ।

– राम थापा दमकमा आफै पनि एउटा फिगर हो । तपाईं २०४३ सालदेखि मेयर बन्ने रेसमा हुनुहुन्छ । तपाईंका पहिले र अहिलेका प्रतिस्पर्धीबारे के भन्नुहुन्छ ?

तत्कालीन नगर पञ्चायत हुँदा उहाँ (एमालेकी मेयर उम्मेदवार गीता अधिकारी) को काका ससुरासँग कम मतले मैले पराजय भोगेको सत्य हो । उहाँ पहिला उपमेयर हुनुहुन्थ्यो, अहिले मेयरका प्रत्याशी हुनुहुन्छ । उहाँसँग के कस्तो साइनो सम्बन्ध मेरो रहेन । मेरो एउटा अभिलाषा नगरपालिकाको शुभचिन्तक र विपक्षी साथीहरुको गतिलो समर्थन रहेकाले पनि मैले उपस्थिति देखाएर नगर प्रमुखको उम्मेदवार हुनुपर्ने एउटा परिस्थितिको उपजमात्र हो । हामी एमालेलाई हराउन र निस्तेज गर्नमात्रै हाम्रो उद्देश्य होइन । नगरपालिकालाई शासन गर्ने होइन सेवा गर्ने थलो बनाउने हाम्रो प्रमुख लक्ष्य हो ।

– एउटा महिला प्रतिस्पर्धीलाई हराउन सबै शक्ति किन मिल्न पर्‍यो ?

महिलाविरुद्ध हाम्रो यो उपस्थिति होइन । उहाँलाई हराउन हामी सबैको अनिवार्य उपस्थिति पनि बिल्कुल होइन । उहाँहरुले नगरपालिकामा सन्तोषजनक काम गर्नुभएन । राजनीतिमा या परस्पर शक्तिहरु मिलेर एउटा सशक्त समूह बनाएर परिणाममुखी नतिजा ल्याउन हाम्रो यो गतिलो उपस्थिति हो । एउटा महिलालाई हराउनेमात्र हाम्रो उद्देश्य बिल्कुल होइन । उहाँहरुले राम्रो काम गरेको भए त जितिहाल्नु हुन्छ नि !

– के के चुनावी एजेण्डा लिएर नगरवासीबीच गइरहनुभएको छ ?

हामीले मूलतः दुईतीन वटा कुरालाई सशक्त रुपमा अघि बढाइरहेका छौं । पहिलो, नगरपालिका शासन गर्ने थलो होइन सेवा गर्ने ठाउँ हो । त्यहाँ गएर कर्मचारीले जस्तो तलबभत्ता नलिने र हामीले पाउने तलबभत्ता न्यून आय भएको लक्षित समुदायका मानिसको अर्थोपार्जनमा सहयोग गर्ने, शिक्षा र स्वास्थ्यबाट बञ्चित मानिसका लागि खर्चनेछौं ।

दोस्रो, दमकमा समुचित विकास भएन । उहाँहरुले दमकमा यस्तो उदाहरणीय काम गरेका छौ भन्ने देखाउने गरी काम गर्न सक्नुभएन । शिक्षामा कुनै गुणात्मक उपलब्धि हुने गरी काम गर्नेतर्फ खासै चासो राख्नुभएन । उहाँहरुले सरकारी विद्यालयहरुमा आफ्नो मान्छेलाई सरुवा–बढुवा गर्ने, नियुक्ति दिने, प्रअ बनाउने काममात्र गर्नुभयो । हामी त्योभन्दा फरक काम गर्नेछौं ।

हामी आगामी पाँच वर्षभित्र १२ कक्षसम्म निःशुल्क शिक्षा प्रदान गर्ने र त्यहाँका समस्याहरु निराकरण गर्ने र निम्न आय भएका गरिब विद्यार्थीहरुलाई यथोचित पठनपाठनको व्यवस्था गर्नेछौं । खासगरी विपन परिवारले न्यायोचित स्वास्थ्योपचार पाएका छैनन् । उनीहरुलाई व्यवस्थित रुपमा उपचार व्यवस्था मिलाउने, निम्न आय भएका परिवारलाई खाद्यान्नको व्यवस्था गर्ने, करको दायरालाई फराकिलो बनाउने, सवारी पटके कर खारेज गर्ने र अनधिकृत रुपमा रहेको अव्यवहारिक करलाई परिमार्जन गरी करलाई नीतिगत रुपमा परिवर्तन गर्ने हाम्रो उद्देश्य छ । दमक नगरपालिका भएर पनि समुन्त नगर हुन सकेको छैन । हामी समुचित रुपमा स्वास्थ्य, शिक्षा, व्यवसाय र आयआर्जनको पाटोमा पनि व्यवस्थित योजना बनाएर समृद्ध दमकको कल्पना गरेका छौं । समुन्नत दमक बनाउन म समर्पित छु ।

– दमकमा केपी शर्मा ओलीले अर्बौं लगानी खनाए, अनावश्यक भ्यू टावर बनाए भनेर आलोचना हुँदै आएको छ । यसबारे तपाई के भन्नुहुन्छ ?

भ्यूटावर पनि विकासको एउटा आधार स्तम्भ हो । यसको म धेरै चर्चा गर्न चाहन्न । सबै मानिसको टिका–टिप्पणी के छ भने एउटा मेडिकल कलेज बनाइदिएको भए लाखौं मान्छेले स्वास्थ्योपचार पाउने थिए । तर, भ्यूटावर पनि दमकको सकारात्मक विकासको एउटा पक्ष मान्न सकिन्छ । म त्यसको आलोचना गर्न चाहन्न । भई गयो, त्यसलाई व्यवस्थित गरेर सबै नगरवासीले आयआर्जन गर्ने र निष्पक्ष रुपमा फल पाउनुपर्छ भन्ने मेरो धारणा छ ।

– एमालेबाट मेयरका प्रत्याशी गीता अधिकारीको लागि भोट माग्न केपी शर्मा ओली आउने हल्ला छ । तपाईंको लागि कोही आउँदै हुनुहुन्छ ?

त्यो उहाँहरुको पार्टीको कुरा र नीति हो । त्यसले केही फरक पर्दैन । केपी ओलीले पैसा लिएर आउनुहोला, भोट बोरामा लिएर आउनु हुन्न । यसपालि त्यो बोराका पैसाले काम लाग्नेवाला छैन । नगरबासीले परिवर्तनका लागि दृढ संकल्प र निश्चय बोकिसकेका छन् । अब त्यसले खास केही फरक पर्ने अवस्था छैन ।

– मतदाताका लागि तपाईंका योजनाहरु के के छन् ?

म ठूल्ठूला कल्पना गरेर नगरवासीलाई विकासको सपना बाँड्न चाहन्न । म कुनै पार्टी, जाति, समुदायलाई समान व्यवहार गर्ने गरी काम गर्ने प्रतिबद्धता जनाउँछु । मेरो स्वभावसँग सबै नगरवासी परिचित हुनुहुन्छ । म उहाँहरुको निर्वाचित प्रतिनिधि भएर सेवा गर्ने मेरो विद्यार्थीकालदेखिकै सपना छ । राप्रपालाई अब राष्ट्रिय पार्टी बन्न कसैले रोक्दैन । आउने संघीय निर्वाचनमा समानुपातिकबाट मेरो पहिलो नाम जान सक्थ्यो । तर, मैले त्यो बाटो रोजिनँ ।

अन्य पार्टीहरुले अवसर पाएर पनि नगरवासीको निःस्वार्थ सेवा गर्न सक्नुभएन । सुकुम्बासीलाई धनी पुर्जा दिन सक्नुभएन । केपी शर्मा ओली प्रधानमन्त्री भएर पनि एउटा सुकुम्बासी आयोय गठन गरेर उपमेयरले तलब भत्ता ३० महिना बिताउनु भयो, तलबभत्ता मासिक २२ हजार खाएर पनि केही काम गर्न सक्नुभएन । एउटा धनी पुर्जा दिन नसक्ने प्रधानमन्त्री र पार्टीले के मुख देखाएर फेरि भोट माग्नुहुन्छ ? यस्ता कैयौं समस्याहरु नगरवासीले भन्न नसकेका समस्याहरु छन् । त्यो समस्याको समाधान ममार्फत खोज्न निष्पक्ष रहने मतदाता, समुदाय जसले मलाई आजसम्म सहयोग गरे, उहाँहरु आतुर हुनुहुन्छ ।

केपी ओलीको उपस्थितिले उहाँ दह्रो हुनु होला । म चुनावमा त्योबारेमा केही भन्न चाहन्न । अब फलनालाई मेयर, तिलानालाई उपमेयर दे भनेर केपी शर्मा ओलीले भनेको भरमा अब नगरवासीहरु त्यता लाग्छन् जस्तो मलाई लाग्दैन ।

– तपाईको जितको आधार के के हुन् ?

मेरो जितको आधार भनेको गएको स्थानीय तह चुनावमा दोस्रो भइयो, अहिले हामी दोस्रो, तेस्रो र चौथो शक्ति र एकीकृत समाजवादी पार्टी पनि मलाई मेयरमा सहयोग गर्न प्रतिबद्ध हुनुहुन्छ । यो कारणले हाम्रो जित निश्चित छ । विगतको तथ्याङ्कले पनि हाम्रो जित निश्चित छ । हामी त्यो निश्चितलाई सुनिश्चित गर्न लागेका छौं । अब कुनै पनि शक्तिले हामीलाई रोक्न सक्दैन । अहिलेको जनलहरले पनि ममात्र होइन, गठबन्धनका उपमेयर र गठबन्धनको समूह हामी सबै ठाउँमा निश्चित जित्छौं, ढुक्क रहे हुन्छ ।

भरतपुर । नेपाली कांग्रेसका सभापति शेरबहादुर देउवाले भरतपुर महानगरपालिकामा विकासकै कारण जग्गाको भाउ बढेको बताएका छन् ।

चुनावी सभामा बोल्दै प्रधानमन्त्री समेत रहेका कांग्रेस सभापति देउवाले माओवादी नेतृ रेनु दाहालको कार्यकालमा भरतपुरका सबै गल्ली पिच भएर जग्गाको भाउ बढेको बताए ।

‘गल्ली गल्लीमा पिच भएको छ । यहाँको जग्गाको भाउ बढेको छ । काठमाडौंमा भन्दा जग्गाको मूल्य बढिसक्यो । यो रेनु दाहालले बनाउनुभएको हो’, देउवाले भने ।

भरतपुरमा अन्तर्राष्ट्रिय खेल मैदान र सम्मेलन केन्द्र बन्दै गरेको भन्दै देउवाले आगामि दिनमा अन्तर्राष्ट्रिय विमानस्थल समेत बन्ने बताए ।

‘उहाँले अन्तर्राष्ट्रिय खेल क्रिकेट मैदान बनाउँदै हुनुहुन्छ, अन्तर्राष्ट्रिय सभा हल बनाउँदै हुनुहुन्छ । त्यसपछि अन्तर्राष्ट्रिय विमानस्थल पनि बन्छ । यो चानचुने कुरा होइन’, उनले भने ।

भरतपुर । नेकपा माओवादी केन्द्रका अध्यक्ष पुष्पकमल दाहाल प्रचण्डले चितवनमा गठबन्धनले नजिते देश दुर्घटनामा जाने बताएका छन् ।

भरतपुरमा गठबन्धनको चुनावी सभालाई सम्बोधन गर्दै अध्यक्ष प्रचण्डले भरतपुरमा जिते मात्रै गठबन्धनलाई दीर्घकालसम्म लैजान उत्साह मिल्ने बताए ।

सभामा बोल्ने केही कांग्रेस नेताहरूले गठबन्धनको निरन्तरताका बारेमा राखेको चासोमा जवाफ दिदैं प्रचण्डले कांग्रेसका नेता कार्यकर्ताहरूले हँसिया हतौडामा भोट हाल्न गाह्रो मान्न नहुने बताए ।

‘तपाईँहरूले हँसिया हतौडामा भोट नहाल्ने हो भने देश दुर्घटनामा जान्छ । भरतपुरमा रेनु र चित्र सेनको टिमले जित्यो भने म उत्साही हुनेछु । १०–१५–२० वर्ष गठबन्धन लैजान प्रयास गर्नेछु । तपाईँहरूले नजरअन्दाज गर्नुभयो भने देश दुर्घटनामा जान सक्छ’, प्रचण्डले भने ।

भरतपुरमा स्वतन्त्र उम्मेदवारलाई नेकपा एमालेका अध्यक्ष केपी शर्मा ओलीले अन्तिममा ‘भोट खन्याइदिने’ आश्वासन दिएको दाबी गरेका छन् ।

‘केपीले स्वतन्त्र उम्मेदवारलाई अडिनुस् है भनेका छन् रे । अन्तिममा एमालेको सबै भोट खन्याइदिउँला भनेका छन् रे । केपीका भनाइको भर नपर्नुहोला’, उनले भने ।

प्रचण्डले आफूलाई शंका नगर्न आग्रह गर्दै सबैको साथ भए गठबन्धनलाई दीर्घकालसम्म लैजाने बताए ।

‘ममाथि शंका नगर्नुस् । युद्धलाई शान्तिमा, शान्तिलाई संविधानसभामा र संविधानसभालाई लोकतान्त्रिक गणतन्त्रमा लैजाने पात्र मै हो । हामीले यो गठबन्धन सोचे विचार गरेरै बनाएका छौँ । यसलाई जोगाएर जानुको विकल्प छैन’, प्रचण्डले भने ।

उनले विगतमा आफूले कांग्रेसलाई धोका नदिएको समेत बताए ।

भरतपुरको निर्वाचनलाई दुनियाँले हेरेको भन्दै भरतपुरमा गठबन्धनले अभूतपूर्व जित हासिल गर्नुपर्ने बताए ।

आफू विरुद्ध राष्ट्रिय अन्तर्राष्ट्रिय शक्तिहरूको षड्यन्त्र जारी रहे पनि जनताले उचित फैसला दिने प्रचण्डको भनाई छ ।

‘एमालेका केही नेताहरू मिलौँ भन्न आएका छन् तर गल्ती दोहोर्‍याउँदिन भनेको छु । म जनताको फैसला हेर्न चाहन्छु’, उनले भने ।

भरतपुर महानगरपालिकाले विकास र सुशासनमा रेकर्ड कायम गरेको भन्दै उनले रेनु दाहालको कामबाट सबैले गर्व गरेको बताए ।

काठमाडौँ । नेकपा (एमाले) का तर्फका काठमाडौँ महानगरपालिकाका मेयर पदका उम्मेदवार केशव स्थापितले गणेशमानको नाम लिएर राजनीति नगर्न विपक्षीलाई आग्रह गरेका छन् ।

काठमाडौँ महानगरपालिका वडा–१० का मतदातासँगको अन्तरक्रियामा बोल्दै स्थापितले भने- ‘गणेशमानजीको लामो इतिहास छ । उहाँको नाम लिएर राजनीति गरेर हुँदैन । उहाँप्रति सम्मान प्रकट गर्नुपर्छ ।’

स्थापितले अहिले नेपाली काँग्रेसले गणेशमानको नाममा राजनीति गरेको तर सम्मान गर्न नसकेको बताए ।

उनले भने- ‘सिर्जना (नेपाली काँग्रेसका तर्फबाट काठमाडौँ महानगरपालिकाकी मेयर पदकी उम्मेदवार) जी अझ गणेशमान सिंहको परिवारका लागि जे गर्नु पर्ने हो लेखेर दिनुहोस् म पूरा गर्न तयार छु,’ तर गणेशमानको नाममा राजनीति गर्ने सम्मान भने नगर्ने कुरा हुन्न ।

आफू मेयर हुँदा गणेशमानप्रति सम्मान गरेको भन्दै स्थापितले आफू निर्वाचित भएपछि तिलगंगा नजिक रहेको र अहिले स्वीजरल्याण्ड पार्कले परिचित स्थानमा गणेशमान सिहंको सम्झनामा गणेशमान पार्क निर्माण गर्ने बताए ।

उनले भने–ग णेशमानसिंहका युवापनदेखि जेल परेको सम्मको इतिहास समेटेर संग्राहलय बनाउने कामको जिम्मा महानगरपालिकाले लिन्छ । यो प्रस्ताव लिएर आउनु पर्‍यो नि ।

काठमाडौं । इन्टनरनेट सेवा प्रदायक कम्पनीले इन्टरनेट सेवा बन्द हुने भनेर दिएको अभिव्यक्तिप्रति निर्वाचन आयोगले आफ्नो गम्भीर ध्यानाकर्षण भएको जनाएको छ ।

निर्वाचनको पूर्वसन्ध्यामा बन्द हुने अवस्था नल्याउन पहलका लागि आयोगले सरकारलाई निर्देशन दिएको छ । आयोगले सोमबार गरेको नियमित पत्रकार सम्मेलनमा मुलुकभर एकैपटक निर्वाचन गर्ने तयारी भएको अवस्थामा निर्वाचनमा इन्टरनेट सेवा बन्द भए गम्भीर असर पर्ने भन्दै सञ्चार तथा सूचना प्रविधि मन्त्रालयलाई यो अवस्था आउन नदिन निर्देशन दिएको आयोगका सहायक प्रवक्तासमेत रहेका उपसचिव सूर्यप्रसाद अर्यालले जानकारी दिए ।

केही दिनअघि मात्रै इन्टरनेट सेवा प्रदायक संस्थाको छाता संस्था आइस्पानले इन्टरनेट सेवा बन्द हुने अवस्था आएको बताएको थियो ।

काठमाडौं । निर्वाचन आयोगले राजनीतिक दल, उम्मेदवार र निर्वाचन प्रतिनिधिलाई आचारसंहिता विपरीत पोष्टर, भित्ते लेखन, तुल, ब्यानर, डिजिटल डिस्प्ले जस्ता प्रचारात्मक सामग्री प्रयोग नगर्न आदेश दिएको छ ।

केही स्थानमा यस्ता प्रचारात्मक सामाग्रीको प्रयोग भएको सूचना आएपछि आयोगले सोमबार एक विज्ञप्ति जारी गर्दै उक्त आदेश दिएको हो ।

‘कतिपय स्थानमा कानूनले वर्जित गरेका यस्ता कार्य भैरहेको भन्ने आयोगको जानकारीमा आएको हुँदा राजनीतिक दल, उम्मेदवार, निर्वाचन प्रतिनिधि वा कुनै व्यक्तिले आचार संहिता विपरीत पोष्टर, भित्ते लेखन, तुल, ब्यानर, डिजिटल डिस्प्ले जस्ता प्रचारात्मक सामग्री प्रयोग गरेको पाइएमा तत्काल हटाउने वा हटाउन लगाउने र त्यस्तो स्थानलाई दुरुस्त बनाई राख्न आदेश गरिएको छ,’ आयोगले विज्ञप्तिमा भनेको छ ।

वैशाख ३० गते सम्पन्न हुने स्थानीय तह निर्वाचनलाई स्वच्छ, निष्पक्ष, पारदर्शी र भयमुक्त बनाउन आयोगले मिति गत चैत २५ गतेदेखि निर्वाचन आचारसंहिता, २०७८ लागू गरेको छ ।

आचारसंहितामा २०७८ अनुसार सार्वजनिक भवन, सार्वजनिक उद्यान, सार्वजनिक सडकका पोल वा कुनै पनि सार्वजनिक स्थानमा दलको झण्डा, दल वा उम्मेदवारको निर्वाचन चिन्ह राख्न वा टाँस्न नहुने उल्लेख छ ।

यस्तै कुनै पनि उम्मेदवारले आफ्नो कार्यालय बाहेकका स्थानमा झण्डा, दल वा उम्मेदवारको चुनाव चिन्ह, कुनै किसिमको डिजिटल बोर्ड, फ्लेक्स र ग्लुसाइन बोर्ड राख्न तथा श्रव्य सामग्री बजाउन र श्रव्यदृश्य सामग्रीहरु प्रदर्शन गर्न नहुने प्रावधान पनि आचारसंहितमा राखिएको छ ।

‘त्यस्तो सामग्री जुन स्थानमा राखिएको छ सोही स्थानीय तहको उम्मेदवारले राखेको ठहर गरी सोही दल वा उम्मेदवारबाटै हटाउन आदेश दिई आदेशको वर्खिलाफ गर्ने राजनीतिक दल, उम्मेदवार, व्यक्ति, संस्था, पदाधिकारी वा निकायलाई आयोगले एक लाख रुपैयासम्म जरिवाना गर्ने,’ आयोगले विज्ञप्तिमा भनेको छ ।

कुनै उम्मेदवारले आयोगले बनाएको आचार संहिताको उल्लङ्घन गरेको कारणबाट निर्वाचन स्वतन्त्र, स्वच्छ र धाँधलीरहित तवरबाट हुन नसक्ने कुरामा आयोग विश्वस्त भएमा त्यसको स्पष्ट आधार र कारण खोली आयोगले त्यस्तो उम्मेदवारको उम्मेदवारी रद्द समेत गर्ने विज्ञप्तिमा स्मरण गराइएको छ ।

जनकपुरधाम । धनुषाको लागि निर्वाचन आयोगले सार्वजनिक गरेको नमूना मतपत्रमा त्रुटि भेटिएको छ ।

जनकपुरधाम उपमहानगरपालिका मेयरको स्वतन्त्र उम्मेदवार मनोज साहलाई निर्वाचन अधिकृतको कार्यालयले ‘घण्टाघर’ चुनाव चिन्ह प्रदान गरेको हो । तर, आयोगले सार्वजनिक गरेको धनुषाको नमूना मतपत्रमा ‘घण्टाघर’ चुनाव चिन्ह नै समाविष्ट छैन् ।

आफ्नो चुनाव चिन्ह नै मतपत्रमा नराखेपछि स्वतन्त्र उम्मेदवार साह आन्दोलित भएका छन् । उम्मेदवार साह समर्थक सहित जनकपुरधामस्थित निर्वाचन अधिकृतको कार्यालयमा धर्ना बसेका हुन् ।

उम्मेदवार साहले जनकपुरधाममा मेयर २८ जना उम्मेदवार रहेको र आफूसहित ११ उम्मेदवारको चुनाव चिन्ह नमूना मतपत्रमा नरहेको बताए । उनले चुनाव चिन्ह नै मतपत्रमा नराखेर राजनीतिक षड्यन्त्र गरेको आरोप लगाए ।

उनले भने, ‘नमूना मतपत्र सच्याउन आयोग र निर्वाचन अधिकृतलाई हिजैदेखि पटक-पटक आग्रह गरेको छु । २४ घण्टा भयो तर नसच्याएपछि बाध्य भएर धर्ना बसेका छौं ।’ मतपत्र नसच्याएपछि धर्ना जारी राख्ने उनको भनाई छ ।

सत्ता गठबन्धनको भागबन्डामा जनकपुरधामको मेयर जसपाको भागमा परेपछि आक्रोशित बनेका साह कांग्रेस नगर सभापतिबाट राजीनामा दिएर स्वतन्त्र उम्मेदवार बनेका छन् ।

काठमाडौं । काठमाडौं महानगरमा नेकपा एमालेका मेयर उम्मेदवार केशव स्थापितले नेपाली कांग्रेसकी प्रत्याशी सिर्जना सिंहसँग काठमाडौंको नेतृत्व गर्न योग्यता नभएको टिप्पणी गरेका छन् ।

सार्वजनिक मञ्चमा बोल्न समेत अरूको सहारा लिनुपर्ने व्यक्तिले काठमाडौं हाँक्न नसक्ने उनले बताए ।

आज आयोजित पार्टी प्रवेश कार्यक्रममा बोल्दै स्थापितले कांग्रेस उम्मेदवार सिंहसँग कुनै नीति र दर्शन नभएको टिप्पणी गरे ।

उनले भने, ‘नीति–कार्यक्रम केही पनि छैन । काठमाडौं कस्तो छ, यसलाई कसरी रूपान्तरण गर्ने भुतिभाङ केही थाहा छैन । अनि भन्छ भने पहिले भान्सा सम्हालेँ, अब काठमाडौं सम्हाल्छु । यस्तो पनि नारा हुन्छ रु यस्तो पनि कार्यक्रम हुन्छ ?’

स्थापितले सिर्जनालाई सार्वजनिक मञ्चमा उभिएर बोल्न चुनौती दिए ।

‘सिर्जना सिंह उम्मेदवार हो भने एउटा मञ्चमा आउने तागत देखाउनु परेन ? त्यति तागत नभएको महिलाले सहर हाँक्छु भन्ने ? सिंगै बहिष्कार गर्नुपर्छ । एक भोट पनि हाल्नु हुँदैन ।’

आफूले १०० वटा इन्टरभ्यू दिइसक्दा सिंहले एउटा पनि दिन नसकेको स्थापितको भनाइ थियो ।

‘उसले बोल्न सक्दैन अनि कसले बोल्छ भन्दा गगन थापा बोल्न आउँछ । त्यसो भए उ आफैँ उम्मेदवार भएर आउनुपर्थ्यो नि मेयर हुन । मैले खसी खोइ भनेपछि सकियो । हिसाब बुझाउन आउँदैन,’ स्थापितले भने ।
उनले सिर्जनालाई भाषण गर्न समेत गगनले सिकाउने गरेको आरोप लगाए ।

‘पछाडि बस्ने सिर्जना सिंह, यता बस्ने उ । नाटकमा नाटकमा डाइलग बिर्सिन्छ कि भनेर यताबाट कराइरहेको हुन्छ नि । हो, त्यस्तै । यस्तो मान्छेले कसरी मुलुक बनाउँछ ?’

काठमाडौं । काठमाडौं महानगरमा एमालेका मेयर उम्मेदवार केशव स्थापितले स्वतन्त्र उम्मेदवार बालेन शाहलाई अन्तर्राष्ट्रिय ठगको संज्ञा दिएका छन् । बालेनले आफूलाई मधेसको नभई काठमाडौंको भनेर झुक्क्याइरहेको उनले दाबी गरे ।

आज आयोजित पार्टी प्रवेश कार्यक्रममा स्थापितले सो टिप्पणी गरेका हुन् ।

उनले भने, ‘एउटा फुच्चे बालेन शाह भन्ने रहेछ । त्यो त अन्तर्राष्ट्रिय ठग रहेछ । युवाहरूले सुनौँ है । म सित परिचय गर्दा पनि म काठमाडौंमा जन्मेको पहाडिया ठकुरी भनेको थियो । तर, हिजो टिकटक हेरेको त मधेसतिरको साह रहेछ । सुरुवातमै ठग कुरा गर्ने ? दर्तावाल ठग रहेछ । यसरी सबै काठमाडौंवासीलाई ठग्न पाइन्छ ? मधेसको मान्छे भनेर आउने आँट गर्नुपर्दैन ?’

बलेनले जनतासँग आँखा जुधाउन नसकेर सधैँ चस्मा लगाउने गरेको दाबीसमेत स्थापितले गरे ।

उनले भने, ‘कहिले पनि चस्मा किन खोल्दैन भनेको त जनतासँग आँखा जुधाएर हेर्ने आँट रहेनछ । यस्तो मान्छेको पछि लागेर हुन्छ ? युवाहरूसँग फेस टु फेस हेरेर कुरा गर्नुपर्‍यो नि ।’

बलेनसँग काठमाडौंका जनताको विवरण समेत नभएको उनले बताए ।

‘काठमाडौँमा महानगरको उम्मेदवारले काठमाडौंमा ८० लाख जनसंख्या छ भन्छ । कति जना मान्छे भन्ने पनि थाहा छैन उसलाई । सिंगो उपत्यकामा बनेपासम्म ४० लाख मान्छे छन् । उसले पहिल्यै ८० लाख भनेपछि योजना भताभुङ्ग भएन रु कहाँ पुर्‍याउँछन् यस्तोले ?’

काठमाडौ । नेकपा एमालेका काठमाडौं महानगरपालिका मेयर उम्मेदवार केशव स्थापितले आफू निर्वाचित भए कांग्रेसका एजेण्डा पनि पूरा गर्ने बताएका छन् ।

अन्तर्राष्ट्रिय श्रमिक दिवसका अवसरमा जिफन्टले काठमाडौंमा आयोजना गरेको कार्यक्रमलाई सम्बोधन गर्दै उम्मेदवार स्थापितले यस्तो बताएका हुन् ।

‘दुई महिनापछि नेपाली कांग्रेसलाई यति लामो चिठ्ठी लेख्ने, त्यत्तिकै आउँदैन क्या, नेपाली कांग्रेसले त्यो थान्का पठाउँछ नि’, उनले भने, ‘नेपाली कांग्रेसले ल्याएको जम्मै एजेण्डा पास गरेपछि महानगरपालिकाको थप आलोचना हुँदैन । अनि सहज रुपमा काम गर्न पाइन्छ भन्ने मलाई लाग्छ ।’

यसरी आधारभूत कुरा सकिएपछि प्रशासनिक सुधारको काम सुरू हुने उनले बताए । त्यसमा महानगरका कर्मचारीहरूलाई सँगै राखेर जनताका कुरा सुन्ने र त्यसअनुसार काम गर्ने उम्मेदवार स्थापितले बताए ।

‘मेरो पछाडि सबै अफिसर राख्ने, जुनियरलााई पनि राख्ने, सिनियरलाई पनि राख्ने’, उनले भने, ‘को-को आउने हो तपाईंहरू आएर मेरो कुनै अफिर र जुनियरले नक्सा पाास गर्दा कमिसन खाएको भन्ने आयो भने त्यहीनेर छाप लाउने, निलम्बन गर्ने, सक्यो ।’

काठमाडौं । नेकपा एमालेका अध्यक्ष केपी शर्मा ओलीले काठमाडौं महानगरपालिका हाँक्न आफूले अनुभवी र सक्षम मेयर तथा युवा उपमेयरसहितको उत्कृष्ट टिम जनतामाझ पठाएको दाबी गरेको छन् ।

मे दिवसको अवसरमा आइतबार काठमाडौंमा आयोजित जिफन्टको कार्यक्रममा अध्यक्ष ओलीले काठमाडौं बुझेको र विकासको अनुभव तथा भिजन भएको मेयर केशव स्थापित र महानगरको संस्कृति,सभ्यता बुझेकी भूमि पुत्री सुनिता डंगोल उपमेयर भएर काठमाडौं हाँक्ने बताए ।

उनले भने–काठमाडौंका सडक चौडा बनाउने,माइतीघर मण्डल बनाउने, धोबिखाला कोरिडोर, बागमती कोरिडोर अघि बढाउने व्यक्तिलाई एमालेले अघि बढाएको छ ।

केशव स्थापित काठमाडौं बुझेको र प्रशासन बुझेको, परिवर्तनको सोच र संकल्प भएको अनुभवी तथा नयाँ जोस जाँगरको सम्मिलन एमालेको टिम हो ।

आफूले अन्य दलका उम्मेदवारबारे टिप्पणी नगर्ने भन्दै अध्यक्ष ओलीले प्रतिस्पर्धा गर्ने सबैप्रति सम्मान रहेको तर विजय एमालेको निश्चित भइसकेकाले दाबी ओलीले गरे ।

ओलीले स्थापित र डंगोल समुदाय काठमाडौंका परम्परागत श्रमिक भएकाले श्रमिकको सम्मान गर्दै एमालेले उम्मेदवार बनाएको समेत बताए ।

 

तस्बिरहरु : गौरव पौडेल ।