Category: भिडियो

काठमाडौं । राप्रपाका अध्यक्ष राजेन्द्र लिङ्देनले राजा राखेरै देश समृद्ध बनाउन सकिने बताएका छन् ।

मंगलबार काठमाडौंमा आयोजित पार्टी प्रवेश कार्यक्रममा लिङ्देनले राजा चाहिन्छ भन्दा कोही डराउनु नपर्ने भन्दै राजा राखेरै देश समृद्ध बनाउन सकिने बताएका हुन् । यसका लागि मुलुकको वर्तमान शासन व्यवस्था नै परिवर्तन गर्नुपर्ने उनको भनाइ छ ।

उनले देशमा पूर्ण समानुपातिक संसद, प्रत्यक्ष निर्वाचित प्रधानमन्त्रीका साथै अभिभावकीय भूमिकामा राजा रहनुपर्ने दोहोर्‍याए । देशको बोझको रुपमा रहेको प्रदेशको संरचना खारेज गर्ने, भ्रष्ट नेताहरुलाई छानबिनको दायरामा ल्याएर कारबाही गर्नुपर्ने अध्यक्ष लिङ्देनको भनाइ छ ।

उनले स्वतन्त्रताको नाममा अभिभावकविहीन ढंगले कुनै काम गरे दुर्घटनामात्र हुने तर्क गरे ।

काठमाडौं । अंगीकृत नागरिकलाई तत्काल नागरिकता उपलब्ध गराउने व्यवस्थाप्रति राष्ट्रियसभा सदस्य वामदेव गौतमले स्वागत गरेका छन् ।

राष्ट्रियसभामा नागरिकता विधेयकमाथि छलफलमा भाग लिँदै उनले कोही पनि अनागरिक भएर बस्न नहुने र अनागरिक बनाउन नहुने तर्क पेस गरे ।

गौतमले भने, ‘२०४७ सालको संविधानमा नागरिकता परित्याग गरेपछि वैवाहिक अंगीकृत नागरिकता प्राप्त गर्ने व्यवस्था थियो । र, त्यसबेलाको कानूनमा पनि त्यो व्यवस्था थियो । त्यसबेलाको संविधानअनुसार त्यो वैवाहिक अंगीकृत नागरिकताको सम्बन्धमा जटिल समस्या कहिल्यै पनि उत्पन्न हुन दिएनौं ।’

गौतमले थपे, ‘जुन व्यक्ति तराईमा गएको छ, त्यहाँ बसोबास गरेको छ । त्यसलाई थाहा हुन्छ, कि हाम्रो देशको जस्तो समस्या, के-के समस्या छन् भन्ने कुरा जटिल समस्या छन् । तर, समाधान गर्नैपर्छ । किनभने तराईमा आधा महिला भारततिरै गएर विवाह गर्छन् । आधा पुरुष भारततिरबाट विवाह गरेर बुहारी ल्याएर आउँछन् । १४ वर्षसम्म नागरिकता नदिने व्यवस्थाले आमाले जन्माएको छोरा जन्मसिद्ध नागरिक बन्छ । १४ वर्षसम्म अमा अनागरिक भएर बसिरहनुपर्छ । अनागरिक भएर कोही पनि मान्छे बस्न हुदैन र अनागरिक बनाइनु पनि पाइँदैन ।’

गौतमले अंगीकृत नागरिकता प्राप्त गर्नका लागि अहिले विधेयकमा ल्याइएको व्यवस्था नै ठीक भएको बताउदैँ बाहिरबाट विवाह गरेर आएको महिलाले उक्त देशको नागरिकता परित्याग गर्ने प्रक्रिया सुरू गरेको प्रमाण पेस गर्ने व्यवस्था भने गरिनुपर्ने बताए ।

काठमाडौं । राष्ट्रियसभा सदस्य विमला राईले नागरिकता विधेयक संसदमा पेस गर्दा गठबन्धन दलका शीर्ष नेताले बलमिचाइँ गरेको टिप्पणी गरेकी छन् ।

सोमबारको बैठकमा उनले प्रक्रियामाथि प्रश्न उठाउँदै नागरिकताजस्तो संवेदनशील विषयमा संसदको अवमूल्यन गरेको र सांसदको स्वविवेक निर्णय गर्ने अधिकारको पनि अवमुल्यन गरेको आरोप लगाइन् ।

उनले भनिन्, ‘जुन तरिकाले प्रतिनिधिसभाबाट हाम्रो सभामा आएको छ, त्यो प्रक्रियामा मेरो असमति छ । यो विधेयक पहिलेको सरकारले प्रतिनिधिसभामा पेस गरेर २२ महिना प्रतिनिधिसभाको राज्य व्यवस्था तथा सुशासन समितिमा छलफल भएर एउटा निचोडको अवस्थामा आएर एउटा प्रतिवेदन आइसकेपछि अहिलेको सरकारले त्यही प्रतिवेदनमा केही सच्याउनैपर्ने प्रावधान भए प्रतिवेदनमा संशोधन गर्न लगाएर समितिबाट फिर्ता ल्याउन सक्थ्यो । त्यो नगरेरै एकदमै अनाहक रूपमा यो विधेयकलाई फिर्ता लगेर कसको दबाब, कसको चाहना, कसको चालमा के भइरहेको छ, थाहा छैन ।’

विधेयकमा केही राम्रा प्रावधान पनि भएकाले फिर्ता गर्न पनि नसकिने उनले बताइन् ।

उनले भनिन्, ‘साढे ६ लाखभन्दा बढी युवायुवती अहिले नागरिकताविहीन छन् । तिनले नागरिकता पाउनुपर्छ । यो कुरा हामीले पहिले पनि उठाएको हो । विशेषगरी एकल आमाका सन्तानलाई जुन नागरिकता दिइने प्रावधान आएको छ, त्यो एकदमै सही छ । त्यो सही भएका कारणले पनि हामीले यो विधेयक फिर्ता गर्न अप्ठ्यारो परिरहेको छ ।’

सांसद राईले विधेयकमा विवाह गरी आएको महिलाले अंगीकृत नागरिकता प्राप्त गर्नका लागि एक दिन पनि कुर्नु नपर्ने प्रावधान डरलाग्दो भएको बताइन् ।

‘सार्क मुलुकमा हेर्ने हो भने भारत, अफगानस्थान र श्रीलंकामा वैवाहिक अंगीकृत नागरिकता ७ वर्षमा पाइन्छ । पाकिस्तानमा ५ वर्ष, माल्दिभ्समा १२ वर्ष पर्खिनुपर्छ । बंगलादेशमा २ वर्ष । नेपालमा आएको भोलिपल्ट । किन यस्तो प्रावधान राखियो ? ७ वर्ष भनेर भन्दाभन्दै यो सरकारले किन यसरी बलमिचाइँ गर्‍यो ?’

नागरिकता विधेयकमा लैंगिक र पितृसत्ताको बलमिचाइँ प्रष्ट देखिएको उनको भनाइ छ ।

काठमाडौं । नेकपा एकीकृत समाजवादीका अध्यक्ष माधवकुमार नेपालले एमाले र कांग्रेस मिलेर झण्डै एमसीसी एथास्थितिमा पारित गरेको टिप्पणी गरेका छन् ।

आफूहरुले व्याख्यात्मक टिप्पणीको अस्त्र अघि सारेर देशको खड्को टारेको उनको दाबी छ ।

आज आयोजित विश्वको भूराजनीति तनाव र नेपालको स्थितिका विषयक अन्तरक्रियामा बोल्दै नेपालले कम्युनिष्ट पार्टीकै नेता प्रधानमन्त्री भएका बेला नेपालमा एमसीसी भित्र्याइएको बताए ।

उनले भने, ‘एमसीसी मात्र होइन, आइपीएसमा नै नेपाल जोडिने स्थिति आएको थियो । कम्युनिष्ट भनिएको एमाले र दक्षिण तथा पश्चिमी शक्तिको प्रभावमा रहेको नेपाली कांग्रेस मिलेर झण्डै यथास्थितिमा एमसीसी पारित गरेका थिए । तर, हामीले व्याख्यात्मक टिप्पणीबिना पारित गर्नु हुँदैन भनेर अडान लियौं ।’

अन्तर्राष्ट्रिय अभ्यासलाई समेत ध्यानमा राखेर आफूहरुले व्याख्यात्मक टिप्पणीको उपाय अघि सारेको नेपालले बताए ।

उनले थपे, ‘हामी कुनै पनि सैन्य गठवन्धन मान्दनौं भनेर हामी व्याख्यात्मक टिप्पणीमा घोषणा गरेका छौं । ३० दिनको सूचना दिनर कुनै पनि बेला नेपालले सम्झौताबाट ब्याक हुन सक्ने पनि उल्लेख भएको छ । यसले देशलाई ठूलो ढाडस दियो । जनताको भावना व्याख्यात्मक टिप्पणीमा प्रतिबिम्बित भएको छ ।’

नेपालले कम्युनिष्ट पार्टीकै सरकारको पालामा एसपीपी सम्झौता पनि गर्न खोजिएको नेपालको भनाइ छ ।

‘सरकारको स्वीकृति लिएर सेनाले चिठी पठाएको रहेछ । त्यो पनि कम्युनिष्ट सरकारको पालामा । त्यस्तो चिठी सेनाले पठाउनै हुँदैनथ्यो । त्यो अवस्थामा हामीले शेरबहादुर देउवालाई दवाव दियौं र सरकारले निर्णय लियो ।’

नेपालले भर्खरै पनि आफू र प्रचण्डले देउवालाई एसपीपीमा सहभागी नहुने भनेर अमेरिकालाई पत्र लेख्न भनेको उल्लेख गरे ।

काठमाडौं । सत्तारुढ दल निकट संयुक्त विद्यार्थी संगठनले नेपाल राष्ट्र बैंकका गभर्नर महाप्रसाद अधिकारीको राजीनामा माग गर्दै सांसदहरुलाई एसएमएस पठाएका छन् ।

शनिबार आर. आर. क्याम्पस अगाडि भेला भएर विद्यार्थीहरुले प्रधानमन्त्री शेरबहादुर देउवा, सुजता कोइराला तथा गगन थापासहितका सांसदहरुलाई एसएमएस पठाएका हुन् ।

सत्तारुढ नेपाल कांग्रेस निकट नेवि संघ, नेकपा माओवादी केन्द्र निकट अनेरास्ववियु क्रान्तिकारी र एकीकृत समाजवादीकाे अनेरास्ववियुले सांसदहरुलाई एसएमएस पठाएका हुन् । उनीहरुले गभर्नर अवैध भएको दावी गर्दै अधिकारीको राजीनामाका लागि दबाब दिएका हुन् ।

देउवालाई पठाइएको एसएमएसमा लेखिएको छ, ‘नेपाल राष्ट्र बैंक ऐन, २०५८ को दफा २१ को उपदफा (क) मा गभर्नर, डेपुटी गभर्नर तथा सञ्चालक पदमा नियुक्त व्यक्ति ‘राजनैतिक दलको सदस्य वा पदाधिकारी’ भएमा नियुक्त हुन अयोग्य हुने छ । भन्ने व्यवस्थाअनुसार नेकपा (एमालेका) अर्थ तथा योजना विभाग सदस्य महाप्रसाद अधिकारी अवैध रुपमा गभर्नर पदमा आसीन छन् । उहाँलाई अहिलेसम्मको सेवा सुविधा फिर्ता गरी तुरुन्तै बर्खास्तीको लागि निर्णायक पहल लिन माननीयज्युलाई संयुक्त विधार्थी संगठन हार्दिक अपिल गर्दछ ।’

यसअघि साउन ५ मा पनि विद्यार्थीहरुले माइतीघर मण्डला तथा राष्ट्र बैंक परिसरमा विभिन्न कार्टुन बनाएर गभर्नर अधिकारीको राजीनमा माग गर्दै प्रदर्शन गरेका थिए ।

नेकपा एमालेको अर्थ तथा योजना विभागमा एम अधिकारी नाम उल्लेख भएपछि गभर्नर विवादमा तानिएका हुन् । विभागमा लेखिएकाे एम अधिकारी गभर्नर नै भएकाे भन्दै सत्तारुढ दलले विरोध जनाउँदै आएका छन् । यद्यपि गभर्नर अधिकारीले त्यो व्यक्ति आफू नभएको जनाइसकेका छन् भने एमालेले पनि विभागमा रहेका एम अधिकारी गभर्नर नभइ अरु कोही भएको स्पष्ट पारिसकेको छ ।

तस्वीरहरुः गौरव पौडेल

पोखरा । राष्ट्रिय स्वतन्त्र पार्टीका सभापति रवि लामिछानेले आफूहरुलाई मंसिरको चुनावको तीब्र प्रतीक्षा रहेको भन्दै प्रधानमन्त्री शेरबहादुर देउवाले ज्योतिष हेराएर तोक्ने चुनावको मितिले जनताको भाग्य खोल्ने दाबी गरेका छन् ।

पोखरामा आयोजित गण्डकी प्रदेशस्तरीय भेलालाई सम्बोधन गर्दै लामिछानेले आफू देश बदल्न र अहिलेका नेताहरुलाई जेल हाल्न राजनीतिमा आएको बताए । उनले अख्तियारमा लुकाएर राखिएका फाइल टक्टक्याउन आफू राजनीतिमा आएको भन्दै मंसिरको चुनाव अधैर्यसाथ पर्खिएको बताए ।

लामिछानेले भने, ‘तिम्रा ज्योतिष देखाएर मिति तोक । ज्योतिषा तिम्रो हुनेछ, भाग्य हाम्रो खुल्नेछ । ज्योतिषले मिति तोक्नेछन्, जनताले भाग्यको फैसला गर्नेछन् । सबै ग्रहले हाम्रो लागि काम गर्नेछन् । यो देश बदलिनेछ । म मंसिरको चुनावको तीब्र प्रतीक्षामा छु । तिम्रा ज्योतिषले चुनावको मिति तोक्नेछन्, भाग्य हाम्रो चम्किनेछ ।’

भेलामा पार्टीका प्रवक्ता डा मुकुल ढकाल, जीता बराललगायत विभिन्न जिल्लाका सहभागीले स्वतन्त्र पार्टी अभियानको बारेमा धारणा राखेका थिए ।

काठमाडौं । प्रदेश संरचना खारेजीलगायतको माग राख्दै राप्रपा नेपालले शुक्रबार काठमाडौंमा विरोध प्रदर्शन गरेको छ ।

शुक्रबार काठमाडौंको नयाँ बानेश्वरमा प्रदेश संरचना खारेज हुनुपर्ने, धर्म निरपेक्षता खारेज गरी सनातन हिन्दूराष्ट्रको पहिचान कायम हुनुपर्ने, भ्रष्टाचारको अन्त्य गरी भ्रष्टाचारीलाई कारवाही गरिनुपर्ने माग राख्दै राप्रपा नेपालले प्रदर्शन गरेकाे हाे ।

उनीहरुले महंगी र कालोबजारी नियन्त्रण गरिनुपर्ने, वैदेशिक हस्तक्षेप अन्त्य हुनुपर्ने माग गर्दै माइतीघरबाट बानेश्वरसम्म प्रदर्शन गरेका थिए ।

प्रदर्शनपछि आयोजित सभामा राप्रपा नेपालका अध्यक्ष कमल थापाले ठूला दल भन्नेहरुले मुलुकमा ब्रह्मलुट मच्चाई राखेको र ठूला–ठूला भ्रष्टाचार लुकाइएको आरोप लगाए ।

मुलुक अस्तव्यस्त हुँदा पनि दलका नेताहरु चिर निन्द्रामा रहेको उनको भनाई छ । त्यस्तै उनले चार वर्षसम्म सदनमा छलफल भएको नागरिकता विधेयक फिर्ता लिएर नागरिकको हित विपरितको विधेयक ल्याउने षडयन्त्र भइरहेको आरोप लगाए ।

उनले जनताको जनजीविकाका विषयमा सरकार गम्भीर नभएसम्म विरोधका कार्यक्रम जारी राख्ने स्पष्ट पारे ।

काठमाडौं । पूर्वअर्थमन्त्री जनार्दन शर्मामाथि छानबिनका लागि गठित संसदीय विशेष समितिको बैठक आज पनि बसेको छ । सुरूको १० दिनको म्याद सकिएपछि हिजोको संसद बैठकले समितिलाई थप ७ दिनको समय दिएको थियो ।

सिंहदरबारमा शुक्रबार बसेको समिति बैठकमा थप गरिएको समयसीमाभित्रै छानबिनका बाँकी काम सक्ने गरी तयारी गर्न छलफल भएको समिति सचिव सुरेन्द्र अर्यालले जानकारी दिए ।

उनका अनुसार बुधबार र बिहीबार बयान लिइएका पत्रकार र अर्थमन्त्री जनार्दन शर्माको भनाइका बारेमा आजको बैठकमा छलफल भएको थियो ।

‘समितिलाई आगामी दिनमा कसरी व्यवस्थित गर्ने र समयमै कसरी काम सक्ने भन्ने सन्दर्भमा माननीयज्यूहरूले आ-आफ्नो धारणा राख्नुभो । थप छलफल गर्नुपर्ने र आज सदन पनि १ बजे भएकोले समय अपुग भयो । आइतबार थप छलफल गर्नेगरी बैठक बस्नेगरी आजलाई बैठक स्थगित भयो’, अर्यालले भने ।

बजेट निर्माणको क्रममा अनधिकृत व्यक्तिको घुसपैठ गराई करको दायरा हेरफेर गरेको आरोपपछि संसदीय छानबिन समिति बनाइएको थियो ।
अहिलेसम्मको छानबिनबाट ठोस प्रमाण फेला परेको छैन । यथेस्ट प्रमाण फेला नपरेपछि कसरी अघि बढ्ने भन्ने अन्योल भइरहेको एक सदस्यले नेपाल प्रेसलाई बताए ।

अर्थमन्त्रालयले सीसीटीभी फुटेज डिलिट भएको जवाफपछि हार्डडिस्क फरेन्सिक परीक्षणको लागि ल्याबमा पठाइएको छ ।

काठमाडौं । तत्कालीन अर्थमन्त्री जनार्दन शर्मामाथि छानबिनका लागि गठन गरिएको संसदीय विशेष समितिलाई दिइएको म्याद आज सकिँदैछ । तर, समिति अहिलेसम्म कुनै निष्कर्षमा पुग्न सकेको छैन ।

समितिले आज पूर्वअर्थमन्त्री शर्मालाई बोलाएर ३ घन्टा लामो बयान लिएको थियो । बयानमा अर्थमन्त्रीले आफूमाथि लागेको आरोप अस्वीकार गरे । बजेट भाषणको अघिल्लो रात अर्थ मन्त्रालयमा कोही पनि अनाधिकृत व्यक्तिको प्रवेश नभएको उनको जिकिर थियो ।

बैठकपछि पत्रकारहरूलाई प्रतिक्रिया दिँदै समितिका सदस्य सचिव सुरेन्द्र अर्यालले शर्माले यसअघि संसदमा बोलेका कुराहरुलाई नै बल पुग्ने गरी बयान दिएको बताए । अहिलेसम्म कसैले पनि बजेट निर्माण प्रक्रियामा अनाधिकृत हस्तक्षेप स्वीकार नगरेको उनको भनाइ छ ।

अर्यालले भने, ‘हामीले बजेट निर्माणमा संलग्न सबैको बयान लियौं । अहिलेसम्म कसैले पनि अनधिकृत व्यक्ति प्रवेश गरेको हो भनेर भन्नुभएको छैन ।’

समितिमा बयान दिनेहरूको कुरा बाझिएको छ कि छैन भन्ने प्रश्नमा उनले जवाफ दिए, ‘त्यस्तो हामीले पाएका छैनौं ।’

करका दरको हेरफेर गर्नुपर्ने आवश्यकता र सान्दर्भिकताबारे सबैले आफ्नो धारणा राखेको काफ्ले बताए । सबैको बयान सकिएर सीसीटीभी फुटेजको रिपोर्ट पनि आइसकेपछि समितिले धारणा बनाउने उनको भनाइ छ ।

‘सीसीटीभी फुटेजको रिकभरिका लागि प्रहरीको फरेन्सिक ल्याबमा पठाइएको छ । त्यसको रिपोर्ट आएपछि निष्कर्षमा पुग्न सहज हुन्छ । अहिलेसम्म समितिले आफ्नो धारणा बनाएको छैन,’ उनले भने ।

समितिको काम नसकिने भएपछि म्याद थपका लागि सभामुखसमक्ष लिखित आग्रह गरिएको काफ्लेले जानकारी दिए ।

उनले भने, ‘अब कति समय लाग्ने हो भन्न सकिँदैन । त्यसैले यति दिन उति दिन नभनिकन हामीले आवश्यकता अनुसार समय थप गर्न माग राखेका छौं । आज संसद बैठक पनि छ । कति दिन म्याद थप हुन्छ, अहिले भन्न सक्दिनँ ।’

काठमाडौं । पूर्वअर्थमन्त्री जनार्दन शर्मामाथि छानबिनका लागि गठित संसदीय विशेष समितिले आज शर्मासँग बयान लिएको छ । बयान झण्डै ३ घण्टासम्म चलेको थियो ।

बाहिरिने क्रममा उनले सोधेका प्रश्नको उत्तर दिएको पत्रकारलाई संक्षिप्त प्रतिक्रिया दिए । ‘मैले उहाँहरूले सोधेका सबै कुराको जवाफ दिएको छु ।’

समितिसमक्ष बयान दिँदै उनले अर्थमन्त्रालयमा बजेट बनाउने क्रममा कोही बाहिरी मान्छे नआएको दाबी गरे ।

उनले भने,‘त्यहाँ को भित्र आयो को गयो भन्ने कुरा सजिलै थाहा हुनसक्छ । सुरक्षाकर्मीहरू हुन्छन् अरु मर्यादापलकहरू हुन्छन । बाहिरको मान्छे पस्ने कुनै सम्भावना छैन । पसेको भए थाहा भइहाल्थ्यो ।’

सिसीटीभी फुटेज कहिलेसम्म रहन्छ भन्ने जानकारी मन्त्रीलाई नहुने उनले बताए । उनले भने, ‘भिडिओ कहिलेसम्म रहन्छ के हुन्छ त्योबारे मलाई केहि जानकारी थिएन ।’

बजेट निर्माणको क्रममा अनधिकृत व्यक्ति घुसपैठ गरेर करको दायरा हेरफेर गरेको आरोपपछि शर्मामाथि छानबिनका लागि समिति बनाइएको थियो । शर्माले अर्थमन्त्रीबाट राजीनामा दिइसकेका छन् । समितिले अहिले बजेट निर्माणसँग सम्बद्ध सरोकारवालासँग बयान लिने क्रममा आज शर्मासँग बयान पनि बयान लिएको हो ।