काठमाडौं । नेपाल क्रिकेट संघ (क्यान) ले नेपाल प्रिमियर लिग (एनपीएल) को दोस्रो संस्करणका लागि तयारी सुरु गरिसकेको छ । आगामी अगस्टमा हुने मिनि अक्सनका लागि खेलाडी दर्ता खुला गर्दै क्यानले तयारीलाई तीव्रता दिएको हो ।
फ्रेन्चाइज टोलीबाट रिलिज भएका खेलाडी तथा नयाँ खेलाडीले नियमबमोजिम १ हजार रुपैयाँ शुल्क तिरेर आफ्नो नाम दर्ता गर्न सक्नेछन् । दर्ता गर्ने म्याद साउन ६ गतेसम्म तोकिएको छ । अक्सन अगष्टमा हुने क्यालेन्डर भए पनि मिति भने क्यानले सार्वजनिक गरिसकेको छैन ।
एनपीएलका सबै फ्रेन्चाइज टोलीले खेलाडीको रिटेन र रिलिज गरिसकेका छन् । ७ वटै फ्रेन्चाइज टोलीमा मार्की खेलाडी परिवर्तन गरिएको छैन भने ६ देखि ७ खेलाडी रिटेन गरिएको छ ।
कुल ५१ खेलाडी रिटेन भएका छन् भने ४५ खेलाडी रिलिज भएका छन् । अहिले रिलिज भएका खेलाडीहरु ‘मिनि अक्सन’ मा सातवटै टिमका लागि उपलब्ध हुनेछन् । उनीहरुसहित नयाँ खेलाडीहरुको नाममा नयाँ बोलकबोल हुनेछ ।
रिलिज हुने सुचीमा थुप्रै अनुभवि र चर्चित खेलाडीहरु पनि रहेका छन् । पहिलो संस्करणमा गरेको प्रदर्शन र टिमको आवश्यकताका आधारमा उनीहरु रिटेन हुन नसकेका हुन् । त्यसो त उनीहरुलाई रिटेन नहुँदा आर्थिकरुपमा फाइदा हुन पनि सक्छ । मिनी अक्सनमा पहिलेभन्दा बढी मूल्यमा बिक्न सक्ने अवसर छ । त्यसो त नबिक्ने जोखिम पनि छ ।
नेपाली राष्ट्रिय टिमबाट लामो समय योगदान दिएका अनुभवि ब्याटर शरद भेषावकरलाई चितवन राइनोजले रिलिज गर्यो । पहिलो संस्करणका लागि भएको अक्सनमा शरद ‘ए’ क्याटेगोरीमा थिए । तर अक्सनको पहिलो चरणमा उनी अनसोल्ड रहे ।
त्यसपछि दोस्रो चरणमा उनलाई न्यूनतम मूल्य १० लाखमा चितवन राइनोजले खरिद गर्यो । उनले एनपीएलमा ४ वटा म्याच खेल्दा एकपटक पनि आउट भएनन् । तर विष्फोटक इनिङ पनि खेल्न चुके । उनी क्रमशः ११, ११ ६ र १० रन बनाएर हरेक खेलमा अविजित रहेका थिए ।
भेषावकर अहिले ३६ वर्षका भए । उनका समकालिन अधिकांस खेलाडीहरुले क्रिकेटबाट सन्न्यास लिइसकेका छन् । भेषवाकरले राष्ट्रिय टिमबाट नखेलेको पनि धेरै भइसकेको छ । यो एनपीएलमा नाम दर्ता गर्ने वा नगर्ने विषयमा उनले अहिलेसम्म केही बताएका छैनन् ।
यस्तै, राष्ट्रिय टिमको अनुभवप्राप्त उदियमान ब्याट्सम्यान देव खनाल र उमेर समुहबाट उत्कृष्ट ब्याटिङ गर्दै आएका अर्जुन कुमालले पनि आफ्नो स्थान जोगाउन सकेनन् ।
देवलाई कर्णाली याक्सले र अर्जुनलाई सुदुरपश्चिम रोयल्सले रिलिज गरिदिएका हुन् । अघिल्लो संस्करणमा देवले ९ म्याच खेल्दा एक अर्धसतकसहित ११६ रन मात्रै जोड्न सकेका थिए ।
देवमाथि उच्च अपेक्षा राखेर कर्णाली याक्सले १० लाख रुपैयाँमा खरिद गरेको थियो । अपेक्षा बमोजिम प्रदर्शन नभएपछि उनी रिलिज गरिएका हुन् । अब हुने मिनि अक्सनमा अन्य फ्रेन्चाइजले उनीमाथि आँखा लगाउन सक्छन् ।
अर्जुन कुमालले भने अघिल्लो संस्करणमा एउटा खेलमा पनि मौका पाएनन् । सुदुरपश्चिम रोयल्सले कुमाललाई ७ लाख ५० हजार रुपैयाँमा खरिद गरेको थियो । तर टिमसँग प्रशस्त स्वदेशी र विदेशी स्टार ब्याट्सम्यानहरु भएकाले कुमालले प्लेइङ ११ मा स्थान बनाउन सकेनन् ।
राष्ट्रिय टिमको अनुभव प्राप्त विकेट किपर ब्याट्सम्यान अर्जुन साउद पनि दोस्रो संस्करणको मिनि अक्सनमा जानुपर्ने भएको छ । नेपालका बैकल्पिक ओपनर तथा विकेटकिपरका रुपमा हेरिएका अर्जुनलाई लुम्बिनी लायन्सले रिलिज गरिदिएको हो ।
लुम्बिनीले उनीसँगै प्रतिभाशाली युवा स्पिनर सुर्य तामाङ र ओपनिङ ब्याट्सम्यान आशुतोष घिरैयालाई पनि रिटेन गर्न चाहेन । उनीहरु तीनैजना अघिल्लो संस्करणमा फ्लप भएका थिए । अर्जुन साउदले ६ म्याच खेल्दा ६८ रन मात्रै जोड्न सके । आशुतोषको प्रदर्शन झनै दयनीय थियो ।
उनले ६ म्याचमा जम्मा ४४ रन जोडेका थिए, जसमा उच्च स्कोर १६ रन थियो । सुर्य तामाङले ४ खेलमा १४.५ ओभर बलिङ गर्दा १११ रन खर्चेर एक विकेट मात्रै हात पार्न सकेका थिए ।
रिटेन हुन नसकेका अर्का चर्चित खेलाडी राजेश पुलामी । बिराटनगर किङ्सबाट खेलेका उनी अघिल्लो संस्करणको सुरुवातका ३ खेलमा फ्लप हुँदा ट्रोलको सिकार भएका थिए भने पछिल्ला दुई म्याचमा ठीकठाक प्रदर्शन गरे ।
पाँच खेलमा मौका पाएका उनले कुल ७८ रन जोडे, जसमा उच्च स्कोर ३३ रन थियो । चितवन राइनोज विरुद्धको म्याचमा उनले २२ बलमा ३३ रन हान्दै आफू टि २० खेल्न सक्ने छनक दिएका थिए ।
आशालाग्दा युवा खेलाडीहरु मयन यादव, आकाश त्रिपाठी र हेमन्त धामीलाई जनकपुर बोल्ट्सले एकसाथ रिलिज गरिदिएको छ । उनीहरु तीनैजना नेपालको यु १९ टिममा उत्कृष्ट प्रदर्शन गरेका खेलाडी हुन् । मयन यादव नेपाली राष्ट्रिय टिमका भविष्यको ओपनरका रुपमा समेत हेरिएको छ । दोस्रो संस्करणको अक्सनमा यी तीनैजनालाई फ्रेन्चाइजहरुले राम्ै मूल्य हाल्न सक्छन् ।
यस्तै राष्ट्रिय टिमबाट यदाकदा अवसर पाएका स्पिनर मौसम ढकालाई कणाली याक्सले रिलिज गरेको छ । उनी पनि मिनि अक्सनमा जानेछन् ।
रिलिज भएका खेलाडीहरुको सूची यसप्रकार छः
विराटनगर किंग्सः दिपक बोहोरा, मिर्नाल गुरुङ, राजेश पुलामी मगर, जितेन्द्र मुखिया र अनिल खरेल
जनकपुर बोल्ट्सः आकाश त्रिपाटी, मायन यादव, विशाल शुस्लिङ्ग, हेमन्त धामी, अरनिको यादव र शेर मल्ल
काठमाडौं गुखार्जः सुमित महर्जन, विवेक केसी, शंकर राना, राजु रिजाल र कृष्ण कार्की
चितवन राइनोजः शरद भेषावकर, दिपेश श्रेष्ठ, विपिन रावल, सन्तोष कार्की र रञ्जित कुमार
पोखरा एभेन्जर्सः नारायण जोशी, दिलिप नाथ, सुनाम गौतम र अमृत गुरुङ
लुम्बिनी लायन्सः सूर्य तामाङ, अर्जुन साउद, दुर्गेश गुप्ता, आशुतोष घिरैया र विकाश अग्री
कर्णाली याक्सः मौसम ढकाल, देव खनाल, रित गौतम, भुवन कार्की र दिपक डुम्रे
सुदूरपश्चिम रोयल्सः अर्जुन कुमाल, नरेश बुढाएर, खडकबहादुर बोहरा, भोजराज भट्ट र अमित श्रेष्ठ
