काठमाडौं । जय ट्रफी एलिट कपअन्तर्गत आज भएका दुई खेलमा दुई विभागीय टीम हावी भएका छन् । बाग्मती प्रदेशमाथि त्रिभुवन आर्मी क्लबले र मधेश प्रदेशमाथि नेपाल पुलिस क्लबले पहिलो दिन दबदबा बनाएका हुन् ।
वीरगञ्जको नारायणी क्रिकेट क्लबमा भएको खेलमा पुलिस क्लबले टस जितेर पहिले फिल्डिङ रोज्यो । पुलिसको धारिलो बलिङमा मधेशको ब्याटिङ टिक्न सकेन । मधेशको ब्याटिङ फेरि एक पटक मयन यादवमै निर्भर रहन पुग्यो । उनले ५९ रन बनाउँदै टीमलाई १२९ रनको स्कोरसम्म पुर्याउन मद्दत गरे । निरज यादवले २९ रन र अभिषेक तिवारीले अविजित १७ रन जोडे । अन्य ब्याटरले दोहोरो अंकमा रन बनाउन सकेनन् ।
पुलिस क्लबका गुल्शन झा बलिङमा आज चम्किए । मधेश प्रदेशका पाँच जना ब्याटर गुल्शनको मिडियम पेसको शिकार बने । गुल्शनले १३ ओभरमा ४० रन खर्चेर पाँच विकेट लिए । मयन यादवको निर्णायक विकेट उनैले चट्काएका थिए । अघिल्लो खेलमा घातक देखिएका पुलिसका स्पिनर ललित राजवंशीले आज कसिलो बलिङ गरे पनि एक विकेटमात्र लिन सके ।
जवाफी ब्याटिङमा पुलिस क्लबले सुदृढ सुरुवात गर्यो । पहिलो विकेटका लागि दिलीप नाथ र कुशल भुर्तेलबीच ९६ रनको साझेदारी भएको थियो । कुशल ६८ बलमा ६३ रन बनाएर आउट भए भने दिलीप नाथले ७९ बलमा ४० रन जोडे ।
चौथो नम्बरमा ब्याटिङ गर्न आएका गुल्शन झाले छोटो केमियो इनिङ खेल्दै २० रन बनाए । केवल १४ बलको सामना गरेका उनले ३ छक्का प्रहार गरेका थिए । पुलिसका अमित श्रेष्ठ ३४ रन र कप्तान आरिफ शेख २४ रनमा अविजित रहेका छन् । र, भोलि बिहान यही स्कोरबाट टीमलाई अगाडि बढाउनेछन् ।
राष्ट्रिय खेलाडीहरुले भरिपूर्ण पुलिसको ब्याटिङविरुद्ध मधेशको बलिङ फितलो सावित भयो । कप्तान हरिशंकर साहबाहेक अरुले खासै प्रभाव छोड्न सकेनन् । हरिशंकरले ९ ओभरमा २५ रन खर्चेर २ विकेट लिएका थिए ।
जनकपुरको राम जानकी बहुउद्देश्यीय रंगशालामा भएको अर्को खेलमा बाग्मतीले टस जितेर पहिले फिल्डिङ नै रोज्यो । आर्मीले बाग्मतीको शक्तिशाली बलिङविरुद्ध सुदृढ सुरुवात गरेको थियो । आर्मीका इमरान सेख र त्रितराज दासले पहिलो विकेटका लागि १०३ रनको साझेदारी गरेका थिए ।
प्रतियोगितमा कुनै पनि विकेटका लागि भएको यो पहिलो शतकीय साझेदारी हो । इमरान ७३ रन र त्रितराज ४४ रन बनाएर आउट भएका छन् ।
एक विकेट गुमाउँदा १५७ रनको मबजुत स्थितिमा पुगेको थियो आर्मी । तेस्रो नम्बरमा आएका भीम सार्कीले ३२ रनको योगदान दिए । विनोद भण्डारी र सोमपाल कामी छिट्टै आउट हुँदा आर्मी २०७ रनमा पाँच विकेटमा खस्कियो, तर त्यसपछि फेरि बसिर अहमद र कुशल मल्लबीच मजबुत साझेदारी भयो । उनीहरुले टीमलाई २७६ रनमा पुर्याएपछि आर्मीले इनिङ समाप्तिको घोषणा गरेको थियो ।
जवाफी ब्याटिङमा बाग्मतीले औसत सुरुवात गर्यो । ओपनिङ जोडी रित गौतम र आशुतोष घिरैयाबीच ४.१ ओभरमा ३२ रनको साझेदारी भयो, तर त्यसपछि भटाभट विकेट खस्न थाल्यो । दिनको समाप्तिमा बाग्मतीले ५ विकेट क्षतिमा १२२ रन जोडेको छ ।
भोलि सुचारु हुने दुवै खेलमा विभागीय टीमहरु जितको खोजीमा हुनेछन् । बाग्मती र मधेश हार टार्न प्रयासरत रहनेछन् । दुई दिनको मात्रै खेल भएकाले नतिजा निकाल्न सजिलो भने छैन ।
कुशल भुर्तेलको फर्म फिर्ता
पुलिस क्लबका लागि खुशीको खबर भनेको ओपनिङ ब्याटर कुशल भुर्तेल आफ्नो लयमा फर्किनु हो । यसअघि नेपाल प्रिमियर लिग (एनपीएल)मा खराब प्रदर्शनको कारण उनको क्षमतामाथि नै प्रश्न उठ्न थालेको थियो, तर आज उनले खराब फर्मबाट बाहिर निस्किएर शानदार ब्याटिङ गरे ।
कुशलले ६८ बलमा ६३ रन बटुल्दा १० वटा सुन्दर चौका प्रहार गरेका थिए । कुशलको इनिङमा कहिले पनि महसुस भएन कि उनी आउट अफ फर्म छन् । धैर्य अपनाउने नाममा उनी अधिक डिफेन्सिभ भएनन् । बलको मेरिटअनुसार व्यवहार गरे । यद्यपि उनी अझै लामो इनिङ खेल्न चाहन्थे । फ्यानहरुले उनको शतक हेर्न चाहेका थिए । त्यो चाहिँ पूरा भएन ।
कुशलको ब्याटिङ फर्म नेपाली राष्ट्रिय टीमका लागि पनि सुखद समाचार हो । उनी टीमका एक महत्वपूर्ण सदस्य हुन् । सुरुमै आक्रामक सटहरु खेलेर टीमलाई राम्रो सुरुवात गराउने क्षमता राख्छन्, तर उनको प्रदर्शनमा एकरुपता नहुने समस्या छ ।
धेरै पटक खराब सट खेलेर आउट हुने गर्छन् ।
अहिले प्रतिभावान युवा ब्याटरहरुको उदय भइरहेको अवस्थामा कुशलको राष्ट्रिय टीममा स्थान खोसिने हो कि भन्ने चिन्ता उनका समर्थकहरुलाई छ । आजको प्रदर्शनबाट कुशलका फ्यानहरुले अलिकति सन्तोषको सास फेरेका छन् ।
सन्दीप लामिछानेको मिडियम पेस
त्रिभुवन आर्मी र बाग्मती प्रदेशबीचको खेलमा एउटा दुर्लभ दृश्य देखियो । ११औं ओभरमा जब बाग्मतीका कप्तान सन्दीप लामिछानेले बलिङ सुरु गरे, दर्शकदेखि कमेन्टेटरसम्म अचम्ममा परे ।
सन्दीप बलिङमा उत्रिनु अचम्म पक्कै थिएन, तर जब उनले विकेटकिपरलाई पछाडि धकेलेर लामो रनअप लिए, त्यो चाहिँ अनौठो थियो । स्पिनरले विकेटकिपरलाई स्टम्पको नजिकै राख्ने गर्छन् र बलिङमा लामो रनअप लिँदैनन्, तर सन्दीपले स्पिन होइन, भटाभट मिडियम पेस बल फ्याँकिरहेका थिए । हो, सम्भवतः पहिलो पटक उनले यसरी मिडियम पेस बलिङ गरेको देखियो ।
सन्दीपले लगातार पाँच ओभरसम्म मिडियम पेसमा बल फ्याँके । उनको बलिङ अनुशासित नै थियो, तर स्पिनर जस्तो धारिलो भने थिएन । उनको टीममा फास्ट बलरको कमी छैन । प्रतिश जिसी, रिजन ढकाल र नन्दन यादव जस्ता स्तरीय फास्ट बलर सन्दीपसँग छन् । उनीहरु तीनै जनालाई सन्दीपले बल दिइसकेका थिए, तर विकेट आएको थिएन । अन्ततः उनी आफैं फास्ट बलिङमा उत्रिए ।
सन्दीपले किन फास्ट बलिङ गरे त ? कमेन्टेटरहरुको अनुमानमा मैदानमा धेरै हावा चलिरहेको हुँदा त्यसको फाइदा उठाउन खोजेका हुन सक्छन् । उनले फास्ट बलिङमा धेरै प्रयोग गरेनन् । लगातार लेग स्टम्पमा बल फ्याकेर ब्याटरलाई एलबीडब्ल्यू धरापमा पार्ने कोसिस गरे । दुईऔतीन पटक एलबीडब्ल्यूको कडा अपिल पनि गरे, तर अम्पायरले दिएनन् ।
सन्दीप फास्ट बलमै विकेट लिएर आफूलाई प्रुफ गर्न चाहन्थे, तर त्यसमा सफल भएनन् । उनले अन्ततः आफ्नो छैटौं ओभरमा लेग स्पिनमा फर्किए र तत्कालै ब्रेक थ्रु पनि मिल्यो ।
सन्दीपको आजको प्रदर्शन चित्तबुझ्दो भने भएन । उनले २२ ओभर बलिङ गर्दा २ विकेटमात्र लिन सके । अघिल्लो म्याचमा उनले प्रत्येक इनिङमा ५-५ विकेट लिएका थिए । कप्तानीमा पनि केही स्वार्थिपना देखाउँदै सन्दीपले आज आफूलाई नै अत्यधिक बलिङ गराए । फास्ट बलरहरुलाई उनले पर्याप्त बल नै दिएनन् । कसिलो बलिङ गरिरहेका रिजन ढकालले ५ ओभर मात्रै फ्याक्न पाए । प्रतिश जिसीको भागमा ४ ओभर र नन्दन यादवको भागमा ९ ओभर पर्यो । स्पिनर विपीन आचार्यले १३ ओभर बलिङ गर्दै सर्वाधिक ३ विकेट लिए ।
