Category: खेल प्रेस

धनगढी । नेपाल क्रिकेट संघ (क्यान) का अध्यक्ष चतुरबहादुर चन्दले कोभिडका कारण रोकिएको क्रिकेट खेलले विस्तारै गति लिने बताएका छन् ।
लामो समयदेखि क्रिकेटका कुनैपनि खेल हुन नसकेको अवस्थामा अब भने क्यानले नेपाल प्रिमियर लिग सहित विभिन्न घरेलु खेलहरुको आयोजना छिट्टै गर्न लागेको बताए ।

शनिवार धनगढीमा पत्रकारहरूसँग कुराकानी गर्दै अध्यक्ष चन्दले नेपालको क्रिकेटलाई विश्वस्तरीय बनाउन धेरै सुधार गर्नुपर्ने र क्यानले त्यसतर्फ ध्यान दिएको पनि प्रष्ट पारे ।

विश्वभर चर्चा पाउने गरी एनपिएल आयोजना गरिने पनि अध्यक्ष चन्दले बताए । यस्तै नेपाली राष्ट्रिय क्रिकेट टोलीको मुख्य प्रशिक्षकमा नियुक्त भएका डेभ वाटमोरको कारण क्रिकेट विकासमा टेवा पुग्ने अध्यक्ष चन्दले बताए ।

क्यानलाई पारदर्शी बनाउने र विभिन्न उमेर समूहका खेलाडीहरूको छनौट गर्दा उनीहरूको क्षमतालाई मुख्य प्राथमिकता दिने समेत अध्यक्ष चन्दले बताए ।

यस्तै निजी स्तरमा सञ्चालन भइरहेका लिगहरूलाई पनि कानूनी दायरामा ल्याउने बताए । सरकारले नेपालको क्रिकेट विकासमा ध्यान दिन नसक्दा नेपाली क्रिकेटले लक्ष्य अनुसार फड्को मार्न नसकेको पनि अध्यक्ष चन्दले बताए ।

अष्ट्रेलियामा जारी टेस्ट क्रिकेटमा भारतले लज्जास्पद पराजय ब्यहोरेको छ । घरेलु टीम अष्ट्रेलियाले पाहुना टोली भारतलाई ३६ रनमै सीमित पारिदियो । भारतले अष्ट्रेलियासामु ९० रनको लक्ष्य राखेको थियो जसलाई घरेलु टोलीले सजिलै पछ्यायो ।

अष्ट्रेलियाले २१ ओभरमा ९३ रन बटुल्दै भारतविरुद्ध १–० को अग्रता लियो । यो लज्जास्पद पराजयपछि विराट कोहली नेतृत्वको भारतीय टीमले आलोचना खेपिरहेको छ । इतिहासमा पहिलोपटक भारत ३६ रनमा सीमित भएको हो ।

जोस हाजेलउड र प्याट्रिक कुमिन्सको प्रभावशाली प्रदर्शनपछि अष्ट्रेलियाले भारतलाई सजिलै हरायो । यसअघि सन् १९७४ मा इङ्ग्ल्यान्डविरुद्धको खेलमा भारतले ४२ रनको स्कोर बनाएको थियो ।

यसवर्षको पल्सर स्पोर्ट्स अवार्ड विभिन्न १० विधामा खेलाडी र खेलकर्मीलाई प्रदान गरिने भएको छ । आयोजक संस्था नेपाल खेलकुद पत्रकार मञ्चले विज्ञप्ती जारी गर्दै पुस २८ गते अवार्ड प्रदान गर्ने जनाएको हो ।

पुरुष र महिलातर्फ वर्षकै उत्कृष्ट खेलाडी, युवा तथा उत्कृष्ट प्रशिक्षक विधाको मनोनयन भने केही दिनमा सार्वजनिक गरिने भएको छ । दीर्घसाधना सम्मान, पारा एथलिट, स्पेसल अवार्ड र टीम अफ दी इयर अवार्ड २८ गते नै घोषणा गरिने भएको छ ।

उत्कृष्ट पुरुष तथा महिला, पिपुल च्वाइस र प्रशिक्षक विधाका विजेतालाई पल्सर मोटरसाइकल प्रदान गरिने भएको छ । यसपटक एकजना अन्तराष्ट्रिय खेल पत्रकारलाई पनि सम्मान गरिने भएको छ । अन्य विधाका विजेतालाई ५० हजार रुपैयाँले पुरस्कृत गरिनेछ ।

यसपटक अवार्डको मुख्य प्रायोजकमा हंशराज हुलासचन्द्र एन्ड कम्पनी प्रालि रहेको छ । मंचले डिजिटल पेमेन्ट पार्टनरको रुपमा इ–सेवासँग सहकार्य गरेको छ । अवार्डमा इ–सेवा भोटिङ ५० प्रतिशत रहने भएको छ ।

पल्सर स्पोर्ट्स अवार्डअन्तर्गत पिपुल्स च्वाइस विधातर्फ पौडीकी गौरिका सिंह, भालिबलकी अरुणा शाही, कराँतेका मन्डेकाजी श्रेष्ठ, बास्केटबलकी सदिना श्रेष्ठ र फुटबलकी सावित्रा भण्डारी मनोनयन भएका छन् । भोटिङको आधारमा यो विधामा विजेता घोषणा गरिनेछ ।

प्रिमियर लिगमा शेफिल्ड युनाइटेडमाथि ३–२ गोलको पुनरागमन जितका साथ तालिकाको छैटौं स्थानमा उक्लिएपछि म्यानचेस्टर युनाइटेडका प्रशिक्षक ओले गनर सोल्सायरले उनको टोलीले ‘शानदार फुटबल’ खेलेको भन्दै टिमको प्रशंसा गरेका छन् ।

निकै नै खराव सुरुआत गरे पनि मार्कस रासफोर्डले २ गोल गरेपछि युनाइटेडले अवे खेलमा आफ्नो उत्कृष्ट नतिजालाई कायम राख्न सकेको हो ।

खेलको पाँचौं मिनेटमै म्याकगोल्डरिचको गोलमार्फत घरेलु टोली शेफिल्डले अग्रता बनाए पनि २६ औं मिनेटमा रासफोर्ड र ३३ औं मिनेटमा एन्थोनी मार्सलले गोल गरेपछि पहिलो हाफमा युनाइटेडले अग्रता बनाएको थिउो ।

५१ औं मिनेटमा रासफोर्डले व्यक्तिगत दोस्रो गोल गर्दा युनाइटेड ३–१ ले अघि बढ्यो । म्याकगोल्डरिचले नै ८७ औं मिनेटमा अर्को गोल गरे पनि जितका लागि पर्याप्त बनेन ।

जारी सिजन अपेक्षाकृत प्रदर्शन गर्न नसकिरहेको युनाइटेड १२ खेलबाट २३ अंकसहित तालिकाको छैटौं स्थानमा पुगेको छ । १ खेल बढी खेलेको शीर्ष स्थानको लिभरपुलभन्दा ५ अंकले पछाडि छ ।

‘शेफिल्डको पहिलो र दोस्रो गोलको बीचमा हामीले केहि समय शानदार फुटबल खेल्यौं । खेलको अन्त्य मैले सोचेभन्दा थोरै असहज भयो,’ म्यानचेस्टर युनाइटेडका प्रशिक्षक सोल्सायरले भने ।

एजेन्सी । गत वर्षका विजेता लियोनल मेस्सी र क्रिष्टियानो रोनाल्डोलाई पनि पार्दै बायर्न म्युनिखका स्ट्राइकर रोवर्ट लेवान्डोस्कीले यो वर्षको ‘बेष्ट फिफा फुटबल अवार्ड’मा पुरुषतर्फ उत्कृष्ट घोषित भएका छन् ।

पोल्यान्डका ३२ वर्षीय सुपरस्टार लेवान्डोस्कीले सन् २०१९-२० को सिजनमा ४७ खेलमा ५५ गोल गरेका थिए । बायर्नलाई तीन मुख्य उपाधि दिलाउन उनको निर्णायक योगदान थियो । उनी च्याम्पियन्स लिग र लिग कपका सर्वाधिक गोलकर्ता पनि बनेका थिए ।

फिफाले हरेक वर्ष ९ विधामा अवार्ड प्रदान गर्ने गर्छ । यसवर्ष म्यानचेस्टर सिटीकी डिफेन्डर लुसी ब्रोन्ज महिलातर्फ उत्कृष्ट बनिन् ।

विजेताको घोषणा राष्ट्रिय टोलीका कप्तान र मुख्य प्रशिक्षक, समर्थकबाट आउने अनलाइन मत र विश्वभरबाट २ सय जना खेलकुद पत्रकारबाट आउने मतका आधारमा गरिन्छ । यस्तोमा लेवान्डोस्कीले ५२ अंक पाएका थिए भने रोनाल्डोले ३८ र मेस्सीले ३५ अंक पाएका थिए ।

लेवान्डोस्कीले यो अवार्ड जितेको पहिलोपल्ट हो । यसअघिका सिजनहरुमा बार्सिलोनाका मेस्सी र युभेन्टसका रोनाल्डोले नै यो अवार्ड जितिरहेका हुन्थे । यो सिजन पनि लेवान्डोस्की १४ खेलबाट १६ गोलसहित अग्रस्थानमै छन् ।

‘यदि तपाईं मेस्सी र रोनाल्डोको बीचमा रहेर यस्तो अवार्ड जित्न पाउनुहुन्छ भने त्यो अविश्वसनीय हुन्छ । मेरा लागि यसले धेरै ठूलो महत्व राख्छ,’ अवार्ड लिएपछि लेवान्डोस्कीले भने, ‘मलाई थाहा छ कि केहि समय अगाडि यस्तै उत्कृष्ट गर्नका लागि छटपटिएको थिएँ । र अहिले त्यो समयमा आइपुगेको छु । म यस्तो खाले पुरस्कार अरु धेरै जित्न सकुँ ।’

नेपाली राष्ट्रिय क्रिकेटको प्रशिक्षकमा देभ वाटमोर नियुक्त भएका छन् । नेपाल क्रिकेट संघले विहिबार विज्ञप्ती जारी गर्दै अष्ट्रेलियाली नागरिक वाटमोरलाई नियुक्त गरिएको जनाएको हो ।

प्रशिक्षकका लागि नब्बेजना भन्दा बढी प्रतिस्पर्धामा थिए । उनको मासिक तलब १० हजार अमेरिकी डलर वरपर हुने जनाइएको छ । क्यानको महाप्रबन्धकमा रौनक मल्ल र क्रिकेट म्यानेजरमा विनोद दास नियुक्त भएका छन् ।

तीनैजनाको नियुक्ति जनवरी १, २०२१ देखि सुरु हुनेछ ।

खेलाडी जीवनबाट १९८८/८९ मा सन्यास लिएका वाटमोर श्रीलंकाले १९९६ मा विश्वकप जित्दा वाटमोर प्रशिक्षक थिए । २०२० फेव्रुअरीदेखि वाटमोर सिंगापुर क्रिकेट टीमको प्रशिक्षक थिए ।

पोखरा । राष्ट्रिय खेलकूद परिषद्का सदस्यसचिव रमेशकुमार सिलवालले आगामी फागुन २० देखि गण्डकी प्रदेशमा तय गरिएको नवौँ राष्ट्रिय खेलकूद प्रतियोगिता सञ्चालनको अवस्था नरहेको बताएका छन् ।

मदन भण्डारी स्पोर्टस् एकेडेमी गण्डकी प्रदेशले आज पोखरा रङ्गशालामा आयोजना गरेको खेलाडी सम्मान कार्यक्रममा उनले खेलकूदले माहोल सिर्जना गर्नुपर्नेमा यस वर्ष कोभिड–१९ का कारण अप्ठ्यारो अवस्था रहेकाले राष्ट्रिय खेलकूद सञ्चालन गर्ने अवस्था नरहेको स्पष्ट पारे ।

उनले भने, “नवौँ राष्ट्रिय खेलकूद फागुन २० देखि गण्डकीमा गर्दछौँ भनेर घोषणा गरेका थियौँ तर अहिले तोकिएको मितिमा सञ्चालन गर्ने अवस्था छैन, अब विसं २०७८ भित्र प्रतियोगिता सञ्चालन गर्न सक्छौँ ।”

सदस्य सचिव सिलवालले स्थानीय, जिल्ला र प्रदेशमा प्रतियोगिता आयोजना गरेर राष्ट्रिय प्रतियोगिता सञ्चालन हुने र राम्रो खेलाडी उत्पादन गर्ने गरी राष्ट्रिय खेलकूदको तयारी गरिनेसमेत स्पष्ट पारे ।

स्वर्ण विजेता खेलाडी सम्मान तथा आर्थिक सहयोग प्रदान

मदन भण्डारी स्पोर्टस् एकेडेमीले नेपालमा गत वर्ष सम्पन्न १३औँ दक्षिण एशियाली खेलकूद ९साग०मा बक्सिङतर्फ स्वर्ण पदक विजेता खेलाडीसहित साग सफल पार्न सहयोग गर्ने व्यक्ति तथा सङ्घसंस्थालाई नगदसहित सम्मान गरेको छ ।

सो अवसरमा राखेपका सदस्यसचिव सिलवालले बक्सिङतर्फ सागमा स्वर्ण पदक विजेता नेपाल पुलिसका भूपेन्द्र थापामगर तथा नेपाल आर्मीका मीनु गुरुङ र सुनिल शाहीलाई जनही रु ५१ हजार ५०० सहित सम्मान गरेका थिए ।

एकेडेमीले सागमा पोखरामा सञ्चालन भएका आठ वटा खेललाई सफल बनाउन भूमिका खेल्ने खेल सङ्घ, सागका १३ विषयगत समिति र खेलकूदका कर्मचारीलाई प्रशंसापत्र तथा नगदले सम्मान गरेको थियो ।

यसैगरी पत्रकार महासङ्घ गण्डकी प्रदेश, कास्की शाखा र खेलकूद पत्रकार मञ्चलाई पनि २१ हजारका दरले नगद तथा सम्मानपत्रद्वारा सम्मान गरिएको थियो । वल्र्ड पावर लिफ्टिङ च्याम्पियनसीपमा पदक जित्ने खेलाडी तथा खेल पत्रकारलाई समेत नगदसहित सम्मान गरिएको थियो ।

यसैगरी प्याराग्लाइडिङ दुर्घटनामा निधन भएका पाइलट तथा कराते खेलाडी राजु गैरे नेपालीका परिवारलाई रएक लाख एक हजार १११, टेनिस खेलाडी स्व सुरज नगरकोटीको परिवारलाई  ५० हजार ५५० आर्थिक सहयोग प्रदान गरिएको थियो ।

पूर्व भलिवल खेलाडी तथा प्रशिक्षकसमेत रहेका जीवन चौधरीलाई रु ७० हजार ७७०, राष्ट्रिय महिला भलिवल खेलाडी लक्ष्मी कुमाललाई  २१ हजार १११ र क्रिकेट खेलाडी सन्तोष न्यौपानेलाई ३० हजार ३३० आर्थिक सहयोग प्रदान गरिएको एकेडेमीका सचिव कृष्ण तिमिल्सिनाले जानकारी दिए ।

एजेन्सी । टोटनह्यामलाई २–१ गोलले पराजित गरी लिभरपुल इंग्लिस प्रिमियर लिगको शीर्ष स्थानमा उक्लिएको छ ।

घरेलु मैदान एनफिल्डमा लिभरपुललाई जित दिलाउन खेलको अन्तिम मिनेटमा ब्राजिलियन स्टार रोवर्टो फिर्मिनोले निर्णायक गोल गरे । उनले एन्ड्र्यु रोबर्टसनको पासलाई सदुपयोग गरेका हुन् ।

जितपछि १३ खेलबाट लिभरपुलको २८ अंक भएको छ । टोटनह्याम समान खेलबाट ३ अंकले पछि परेको छ ।

यसअघि खेलको पहिलो हाफ १–१ गोलको बराबरीमा सकिएको थियो । २६ औं मिनेटमा मोहम्मद सलाहले लिभरपुललाई अग्रता दिलाए पनि ३३ औं मिनेटमा कोरियन स्टार सन ह्युङ मिनले बराबरी गोल फर्काएका थिए ।

गएराति नै भएका खेलमा साउथह्याम्प्टनले आर्सनललाई १–१ गोलको बराबरीमा रोकेको छ भने एभर्टनले लेस्टर सिटीलाई २–१ ले पराजित गरेको छ ।

एजेन्सी । स्पेनिस ला लिगामा बार्सिलोनाले शीर्ष स्थानको रियल सोसिडाडबिरुद्ध २–१ गोलको पुनरागमन जित हासिल गरेको छ । यो जितले सोसिसाडलाई दोस्रो स्थानमा झारेको छ ।

पोर्टुले पास दिएको बल सदुपयोग गरी विलियम डा शिल्भाले पाहुना टोली सोसिडाडका लागि गोल गरेका थिए । तर तीन मिनेटपछि नै जोर्डी अल्बाले बराबरी गोल फर्काए ।

पहिलो हाफको २ मिनेटअघि फ्रेन्की डीजोङले गोल गरेपछि बार्सिलोनाले अग्रता बनायो । दोस्रो हाफमा गोल हुन सकेन ।

यो जितले बार्सिलोना १२ खेलबाट २० अंकसहित पाँचौं स्थानमा उक्लिएको छ । एट्लेटिको मड्रिड र रियल मड्रिडसँग समान २६ अंक भए पनि सोसिडाड गोलअन्तरमा पछि पर्दै दोस्रो स्थानमा पुगेको हो । एट्लेटिको र रियल क्रमसः पहिलो र तेस्रो स्थानमा छन् ।

एजेन्सी । विश्व वरियतामा ९४ औं स्थानमा रहेकी ए लिम किमले करिअरको पहिलो ठूलो उपाधिका रुपमा युएस ओपन गल्फको महिलातर्फ च्याम्पियन बनेकी छन् ।

२५ वर्षीय किमले शीर्ष स्थानकी हिनाको शिवुनोभन्दा पाँच स्ट्रोक पछाडिबाट सुरुआत गरेकी थिइन् । तर लगातार तीन बर्डीजका साग फोर अन्डर ६७ बाट थ्री अन्डर ओभरअलको प्रदर्शनसहित उनी च्याम्पियन बनिन् ।

दक्षिण कोरियाली किमले युएस ओपनमा डेब्यू गरेकी हुन् । यो उनको व्यावसायिक करिअरको मात्र तेस्रो जित हो ।

विश्व नम्बर एक को जिन योङ र अमेरिकी एमी ओल्सोन संयुक्त रुपमा दोस्रो स्थानमा रहे । जापानकी शिवुनो चौथो भइन् ।

यो प्रतियोगिता आइतबार नै सकिनुपर्ने थियो । तर वर्षाका कारण एक दिन ढिला भएको हो । किमले युएस ओपन महिलातर्फको इतिहासमा अन्तिम चरणमा उत्कृष्ट पुनरागमनको कीर्तिमान पनि बराबर गरेकी छन् । तर सन् १९९५ यता पाँच स्ट्रोकले पछि परेको स्थितिबाट पुनरागमन गरेको भने पहिलोपल्ट हो ।