Category: खेल प्रेस

एजेन्सी । बार्सिलोनाले २–० को अग्रता जोगाउन नसक्दा गएराति ला लिगामा लेभान्टेसँग ३–३ गोलको बराबरी खेलेको छ । यो बराबरीले सिजनको अन्त्यतिर लिगको उपाधि जित्ने बार्सिलोनाको लक्ष्यमा गम्भीर धक्का लागेको छ ।

लियोनल मेस्सीले लो भलीमार्फ अग्रता दिलाएका थिए । मेस्सीले जारी सिजन सबै प्रतियोगितामा गरी ३७ औं गोल गरेका हुन् । ओस्मान डेम्बेलेको क्रसमा पेड्रीले अर्को गोल गरी पहिलो हाफमा बार्सिलानालाई दोहोरो अग्रता दिलाएका थिए ।

तर दोस्रो हाफमा सानदार प्रदर्शन गरेको लेभान्टेका लागि गोन्जालो मेलेरो र जोसे लुइस मोरालेसले गोल गरेपछि खेल २–२ को बराबरीमा आयो ।

डेम्बेलेको शक्तिशाली प्रहारमार्फत बार्सिलोनाले पुनः अग्रता बनाए पनि अन्तिम समयमा सर्जियो लियोनले लेभान्टेका लागि बराबरी गोल फर्काए ।

यो जितले बार्सिलोनाले दोस्रो स्थानमा त उक्लिएको छ भर शीर्षमा पुग्ने अवसर गुमाएको छ । बार्सिलोनाको ३६ खेलबाट ७६ अंक छ । एक खेल कम खेलेको शीर्ष स्थानको एट्लेटिको मड्रिडको ७७ र रियल मड्रिडको ७५ अंक छ ।

एजेन्सी । लिसेस्टर सिटीले म्यानचेस्टर युनाइटेडलाई उसकै मैदानमा २-१ गोलअन्तरले पराजित गरेपछि म्यानचेस्टर सिटी चार वर्षको अन्तरमा तेस्रोपल्ट इंग्लिस प्रिमियर लिगको च्याम्पियन बनेको छ ।

ओल्ड ट्राफोडमा सन् १९९८ पछि पहिलोपल्ट युनाइटेडलाई पराजित गरेको लिसेस्टरले यो सिजन च्याम्पियन्स लिग छनोटको लक्ष्यमा महत्वपूर्ण सफलता हासिल गरेको छ ।

युनाइटेडको यो हारले तीन खेल बाँकी रहँदा सिटीसँग उसको अंक अन्तर १० भएको छ । समान ३५ खेलबाट युनाइटेडको ७० र सिटीको ८० अंक छ । ६६ अंकसहित लिसेस्टर तेस्रो स्थानमा उक्लिएको छ ।

क्याग्लर सोयुन्कुले दोस्रो हाफमा गरेको निर्णायक हेड गोलले लिसेस्टरका प्रशिक्षक ब्रेन्डन रोजर्सको मुहारमा हासो मात्र ल्याएन सिटीका प्रशिक्षक पेप ग्वार्डिओलालाई पनि फुरुंग बनाइदियो ।

१९ वर्षीय लुक थोमसले १० औं मिनेटमै गोल गरेपछि पाहुना टोलीले अग्रता लिएको थियो । तर मासोन ग्रिनउडले पाँच मिनेटपछि नै बराबरी गोल फर्काउन सफल रहे ।

सिटीले इंग्लिस फुटबलको शीर्ष डिभिजनको उपाधि जितेको यो समग्रमा सातौंपल्ट हो भने पछिल्लो ९ वर्षमा पाँचौंपल्ट हो । ‘यो सिजन र प्रिमियर लिगको उपाधि अरुका लागि थिएन,’ सिटीका प्रशिक्षक ग्वार्डिओलाले भने, ‘यो निकै कठिन सफलता हो । हामीले सिजनभर कसरी खेल्यौं र कसरी जित्यौं भन्ने कुरा सधैं सम्झिनेछौं । म्यानेजरको नाताले म मेरा खेलाडीको समूहप्रति गर्व गर्छु ।’

‘म स्पेनिस लिगमा पनि रहेँ, जर्मन लिगमा पनि रहेँ र त्यसैले यसअघिदेखि नै बारम्बर भनिरहेको छु– प्रिमियर लिग विश्वकै सबैभन्दा कठिन लिग हो । त्यसैले यसको छुट्टै महत्व छ,’ ग्वार्डिओलाले थपे ।

५० वर्षीय प्रशिक्षक ग्वार्डिओलाले सन् २०१६ मा सिटीको जिम्मेबारी संहालेयता ८ घरेलु उपाधि जितेका छन् । सिटीले गत शनिबार नै घरेलु मैदानमा उपाधि जित्ने अवसर पाएको थियो । तर त्यस खेलमा चेल्सीसँग २–१ ले पराजित रह्यो ।

प्रिमियर लिगको उपाधि ओल्ड ट्राफोटमा निर्णायक भएको यो छैटौंपल्ट हो । र, अन्य कुनै रंगशालामा भन्दा धेरै हो ।

सिटीले दुई साताको बीचमा दुई उपाधि जितेको छ । यसअघि उसले टोटनह्यामलाई हराएर लिग कपको उपाधि जितेको थियो । मे २९ मा सिटीले चेल्सीसँग च्याम्पियन्स लिग फाइनल खेल्दैछ ।

सन् २००८ को सेप्टेम्बरमा आबुधावी समूहले सिटीको स्वामित्व किनेयता १२ उपाधि जितेको । उनीहरुले मे २३ मा एभर्टनसँग हुने लिगको अन्तिम खेलमा प्रिमियर लिग उपाधि उचाल्नेछन् । त्यस खेलमा १० हजार समर्थकले प्रवेश पाउनेछन् ।

एजेन्सी । बर्नलीसँग पराजित भएपछि फुलह्याम प्रिमियर लिगबाट यस सिजन रेलिगेसनमा पर्ने तेस्रो तथा अन्तिम टोली बनेको छ । वेष्टव्रुम र शेफिल्ड युनाइटेड यसअघि नै रेलिगेसनमा पर्ने निश्चित भइसकेको छ ।

जितपछि बर्नलीले भने कम्तिमा अर्को सिजनसम्म प्रिमियर लिगमै रहन निश्चित गरेको छ । प्रिमियर लिगको आधुनिक युग सुरु भएपछि पहिलोपल्ट सिजनको तीन खेल अगावै रेलिगेसनमा पर्ने तीनवटै टोलीको टुंगो लागेको हो । रेलिगेसनमा पर्नेहरुले इंग्लयाण्डको दोस्रो डिभिजनको लिग– च्याम्पियनसिप खेल्नेछन् ।

पहिलो हाफको अन्तिम १० मिनेटभित्र २–० ले पछि परेपछि नै फुलह्यामको रेलिसेगनको सम्भावना प्रवल बनिसकेको थियो । बर्नलीका लागि एस्ले वेष्टउड र क्रिस उडले गोल गरेका हुन् ।

तीन खेल बाँकी रहँदा फुटलह्याम १७ औं स्थानको साउथह्याम्प्टनभन्दा १० अंकले पछाडि छ । फुलह्याम यसै सिजन प्रिमियर लिगमा बढुवा भएको थियो ।

काठमाडौं । नेपाल सुपर लिग एनएसएलको पहिलो क्वालिफायरका रुपमा फाइनल प्रवेशका लागि शीर्ष स्थानमा रहेर लिग चरण टुंग्याएको काठमाडौं रेजर्स र दोस्रो स्थानको धनगढी एफसीबीच प्रतिस्पर्धा हुँदैछ ।

त्रिपुरेश्वरस्थित दशरथ रंगशालामा हुने खेल साँझ साढे ५ बजेदेखि सुरु हुनेछ । यो खेलको विजेताले सिधै फाइनल खेल्नेछ भने पराजित हुने टोलीले दोस्रो क्वालिफायरको विजेतासँग इलिमिनेटर खेल खेल्नेछ । यसको अर्थ आजको खेलमा पराजित भए पनि फाइनल प्रवेशका लागि दोस्रो अवसर हुनेछ ।

लिग चरणमा ४ जित, १ बरारबरी र १ हारसँगै १३ अंकका साथ शीर्ष स्थानमा रहेको काठमाडौं उच्च लयमा छ । विकेश कुथु मार्की खेलाडी तथा राष्ट्रिय टोलीको प्रशिक्षक हुँदाहुँदै जिम्मेबारी संहालेका बालगोलपाल महर्जनको चतूर रणनीतिले काठमाडौंलाई एकपछि अर्को खेलमा सफल बनाउँदै लगेको छ ।

काठमाडौंका विदेशी स्ट्राइकर मेसोउके ओलोमोउ उच्च लयमा छन् । प्रतियोगितामा उनले ह्याट्रिकसहित सर्बाधिक ५ गोल गरेका छन् । लिगका पछिल्ला २ खेल काठमाडौंको उच्च लयको सूचक रह्यो ।

जहाँ उसले विराटनगरलाई २–० ले पछि परेको स्थितिबाट पुनरागमन गरी ५–४ गोलअन्तरको जित हासिल ग¥यो । अन्तिम खेलमा मार्की तथा गोलरक्षक विकेशसहित अधिकांश पहिलो रोजाइका खेलाडीलाई आराम दिएर पनि चितवनलाई २–१ ले हरायो ।

लिगको आफ्नो पहिलो खेलमा विराटनगर सिटी एफसीसँग ३–० गोलले पराजित भएयता लगातार सुधारिएको प्रदर्शनसहित धनगढी पनि काठमाडौंजस्तै लिगको एक खेल अगावै प्लेअफमा स्थान सुरक्षित गर्ने टोली हो ।

धनगढीले ३ जित, १ बराबरी र २ हारको नतिजाले १० अंक जोडेर लिग चरणमा दोस्रो स्थानमा रह्यो । लिगको अन्तिम खेलमा अधिकांश दोस्रो रोजाईका खेलाडी उतारेको उसले बुटवल लुम्बिनीसँग १–० को पराजय ब्यहोरेको थियो ।

राष्ट्रिय टोलीका कप्तानसमेत रहेका गोलरक्षक किरण चेम्जोङ प्रेरित धनगढीले अग्रपंक्तिमा ओलावाले अफिजको प्रदर्शनमा निर्भर देखिएको छ ।

काठमाडौं । राष्ट्रिय खेलकुद परिषद् (राखेप)ले नेपाल खेलकूद पत्रकार मञ्च (एनएसजेएफ)लाई सहयोगस्वरुप आज स्वास्थ्य सामग्री प्रदान गरेको छ ।

कोभिड-१९को जोखिम नियन्त्रण र रोकथामका लागि गरिएको निषेधाज्ञामा पनि सञ्चारकर्मीले अग्रपङ्क्तिमा रहेर काम गर्नुपर्ने अवस्थालाई ध्यानमा राखी राखेपले स्वास्थ्य सामग्री सहयोगस्वरुप प्रदान गरेको हो ।

राखेपका सदस्य-सचिव रमेशकुमार सिलवालले एनएसजेएफका पूर्वअध्यक्ष निरञ्जन राजवंशीलाई १ सय थान सेनिटाइजर र २०० थान सर्जिकल मास्क हस्तान्तरण गरे ।

यसअघि २०७६ साल चैतमा गरिएको लकडाउन अवधिमा पनि राष्ट्रिय खेलुकुद परिषद्ले एनएसजेएफलाई स्वास्थ्य सामग्री उपलब्ध गराएको थियो ।

काठमाडौं । ब्राजिलियन फुटबलर नेइमार जुनियर पेरिस सेन्ट जर्मेन क्लबमा थप चार वर्षको लागि अनुबन्धित भएका छन् ।

सन् २०२५ को जुन ३० सम्म नेइमार अनुबन्धित भएको क्लबले जनाएको छ । सम्झौताबारे घोषणा गर्न पाउँदा क्लबले खुशि व्यक्त गरेको छ ।

थप तीन सिजनका लागि नेइमार अनुबन्धित भएका हुन् ।

काठमाडौं । नेपाल सुपर लिग (एनएसएल)मा आज अंकतालिकाको पुछारमा रहेका दुई टिम पोखरा थन्डर्स र एफसी चितवनबीच प्रतिस्पर्धा हुँदैछ । दशरथ रंगशालामा साँझ साढे ५ बजे सुरु हुने खेलमा दुवै टोलीलाई जितको दबाब छ ।

राष्ट्रिय टोली र त्रिभुवन आर्मी क्लबका टिममेट नवयुग श्रेष्ठको कप्तानीमा रहेको पोखरा र भरत खवासको कप्तानीमा रहेको चितवन एनएसएलमा राम्रो लय भेट्टाउन संघर्षरत छन् । चितवनको ४ खेलबाट २ अंक छ भने पोखराले ५ खेलबाट ५ अंकमात्र जोडेको छ ।

आजको खेल बराबरी वा पराजित भएको अवस्थामा दुवै टोलीको प्लेअफ प्रवेशको सम्भावना सकिनेछ । यसैले आजको खेल दुवै टोलीका लागि गर या मरको अवस्थामा हुनेछ । चितवनले त आजको खेल जितेको अवस्थामा पनि प्लेअफ प्रवेशका लागि अन्य टोलीको नतिजामा भर पर्नुपर्ने हुन्छ ।

यसअघि हिजो भएका खेलमा ललितपुर सिटी एफसी र काठमाडौं रेजर्सले आआफ्नो खेलमा जित हासिल गरेका थिए । दशरथ रंगशालामा भएका दुवै खेलमा ललितपुरले बुटवल लुम्बिनी एफसीलाई १-० तथा काठमाडौंले विराटनगर सीटी एफसीलाई ५-४ गोलअन्तरले पराजित गरे ।

प्रतियोगितामा पहिलो जीतपछि ललितपुरले प्लेअफमा पुग्ने सम्भावनालाई कायमै राखेको छ । लगातार खराव प्रदर्शनपछि प्रशिक्षक प्रदीप हुमागाईंलाई बर्खास्त गरेपछिको पहिलो खेलमा ललितपुरको प्रदर्शन उच्च रह्यो ।

बुटवलले अन्तिम चारमा स्थान बनाउन एक खेल जित्नुपर्ने छ । बुटवलले अरु टोलीको खेलका नतिजामा समेत भर पर्नुपर्नेछ । काठमाडौं प्लेअफमा प्रवेश गरेको छ ।

ललितपुरका लागि खेलको छैटौं मिनेटमा विदेशी नुर्लान जाहिदले निर्णायक गोल गर्नुभयो । खेलको २२औं मिनेटमा बुटवलका आशिष लामाको प्रहार गलत सावित भयो । पहिलो हाफको इञ्जुरी समयमा बुटवलका सुमन लामाको प्रहार गोलमा परिणत हुन सकेन ।

मध्यान्तरपछिको खेलमा पनि ललितपुरले गोलको राम्रो प्रयास गरेको थियो । खेलको ६५ औं मिनेटमा डोना थापाले प्रहार गरेको बल गोल पोष्ट बाहिर गयो । खेलको ७३ औंँ मिनेटमा ललितपुरकै कमल श्रेष्ठले हानेको बल गोल पोष्टमा पस्न सकेन ।

ललितपुरले प्रतियोगितामा पाँच खेलमा ६ अंक जोडेको छ । बुटवलले पाँच खेलमा पाँच अंक छ ।

अर्को खेलमा काठमाडौंँ रेजर्सका लागि विदेशी मेसुकेले ह्याट्रिक गरे । जारी प्रतियोगितामा ह्याट्रिक गर्ने उनी पहिलो खेलाडी बने। विराटनगरले खेलको छैटौं मिनेटमा नै पहिलो गोल गरेको थियो ।

उक्त गोल विदेशी एडिलाजाले गरेका हुन । खेलको २५ औं मिनेटमा सुनिल बलको प्रहार काठमाडौंका गोलकिपर विकेश कुथुले बचाए । खेलको ३४ औं मिनेटमा विराटनगरका लागि विदेशी पेड्रो माञ्जीले गोल गरे ।

खेलको ३५ औं मिनेटमा काठमाडौंका लागि विदेशी मेसुकेले पहिलो गोल गरे । लगत्तै उनले नै दोस्रो गोल गरे । खेलको ४१ औं मिनेटमा काठमाडौंका लागि स्टेफेन विनोङले तेस्रो गोल गरे ।

मध्यान्तरपछिको खेलमा काठमाडौंका लागि ६७ औं मिनेटमा मेसुकेले व्यक्तिगत तेस्रो गोल गरे। खेलको ७९ औं मिनेटमा विराटनगरका लागि रजिन धिमालले गोल गरे ।

यस्तै खेलको ८२ औं मिनेटमा काठमाडौंका लागि छिरिङ गुरुङले पाँचौ गोल गरे । खेलको इञ्जुरी समयमा माञ्जीले व्यक्तिगत दोस्रो गोल गर्दै विराटनगरलाई ५-४ गोलको अवस्थामा पुर्‍याए । जीतसँगै काठमाडौं पाँच खेलमा १० अंक जोड्दै लिगको दोस्रो स्थानमा उक्लिएको छ ।

एजेन्सी । दोस्रो लेगमा इटालियन प्रतिस्पर्धी रोमासँग ३–२ गोलअन्तरले पराजित भए पनि म्यानचेस्टर युनाइटेडले युरोपा लिगको फाइनलमा प्रवेश गरेको छ । युनाइटेडले पहिलो लेग घरेलु मैदानमा ६–१ ले जितेको थियो । समग्रमा उसले ९–४ को जित निकाल्यो ।

अर्को सेमिफाइनलमा आर्सनलले घरेलु मैदानमा स्पेनिस प्रतिद्वन्द्वी भिल्लारियलसँग गोलरहित बराबरी खेलेपछि फाइनलमा पुग्न असफल रह्यो । पहिलो लेगमा भिल्लारियल आफ्नो मैदानमा २–१ गोलअन्तरले विजयी थियो ।

इडिन्सन काभानीले ३९ औं मिनेटमा गोल गरी पहिलो हाफमा युनाइटेडलाई अग्रता दिलाएका थिए । तर दोस्रो हाफमा रोमाले कडा टक्कर दियो । इडेन जेकोले ५७ र बर्यान क्रिष्टान्टले ६० औं मिनेटमा गोल गरेपछि रोमाले अग्रता बनायो ।

६८ औं मिनेटमा बुर्नो फर्नान्डेजले सानदार हेड गोलमार्फत खेल बराबरीमा ल्याए । खेलको अन्त्यतिर एउटा उपहार गोलका कारण युनाइटेड पराजित हुनुपरेको हो । निकोला जालेस्क्वीको प्रहार डिफ्लेक्ट हुँदा एलेक्स टेल्लेसले आफ्नै पोष्टमा गोल गर्न पुगेका थिए ।

आर्सनलले इमिरेट्स रंगशालामा कमजोर फुटबल खेल्दा यस सिजन युरोपेली प्रतियोगिताको फाइनलमा पुग्ने अवसर गुमायो । यो आर्सनलका लागि निकै घाटाको कुरा किन पनि हो भने यस सिजन प्रिमियर लिगमा उसले युरोपाका लागि छनोट हुने सम्भावना छैन । यस्तोमा साविक विजेताका रुपमा युरोपा खेल्ने सम्भावना पनि सकियो ।

यदि आर्सनलले जितेको भए यस सिजन युरोपेली क्लब प्रतियोगितामा चारै फाइनलिष्ट प्रिमियर लिगबाट हुने थिए । चेल्सी र म्यानचेस्टर युनाइटेड यसअघि नै च्याम्पियन्स लिगको फाइनलमा पुगिसकेका छन् ।

काठमाडौं । नेपाली युवा क्रिकेट खेलाडी कुशल भुर्तेल अन्तर्राष्ट्रिय क्रिकेट परिषद् (आईसीसी) को महिनाको उत्कृष्ट खेलाडीको पुरस्कारका लागि मनोनयनमा परेका छन् । आइसीसीले अप्रिलको उत्कृष्ट खेलाडीका लागि उनलाई मनोनयन गरेको हो ।

पहिलो पटक नेपाली क्रिकेट खेलाडी सो पुरस्कारको मनोनयनमा परेका हुन् । भुर्तेलसँगै पाकिस्तानका फखर जमान र बाबर आजमलाई सो पुरस्कारका लागि मनोनयन गरिएको आइसीसीले जनाएको छ । यही वैशाख पहिलो साता नेपालमा भएको त्रिदेशीय टी-२० सिरिजमा नेपालका लागि २४ वर्षीय भुर्तेलले उत्कृष्ट खेल प्रदर्शन गरेका थिए ।

नेपाल, मलेसिया र नेदरल्याण्डस सम्मिलित सो सिरिजको उपाधि नेपालले जितेको थियो । सिरिज जिताउनमा उनको ठूलो योगदान थियो । भुर्तेलले टी २० क्रिकेटको डेब्यू खेलमै लगातार तीन अर्धशतक बनाउने विश्व कीर्तिमानसमेत बनाएका थिए ।

उनले सो प्रतियोगिताभर ५ अर्धशतकसहित सर्वाधिक २७८ रन बनाएका थिए । भुर्तेल प्लेअर अफ दी सिरिज घोषित भएका थिए । उनले नेदरल्याण्डसविरुद्धको पहिलो खेलमा ६२, मलेसियाविरुद्धको खेलमा ६१, नेदरल्याण्डसविरुद्धको दोस्रो खेलमा ६२ तथा नेदरल्याण्डससितको फाइनल खेलमा ७७ रन बनाएका थिए ।

सिरिजमा गरिएको प्रदर्शनका आधारमा उनी पहिलो पटक आइसीसीको टी–२० वरियतामा ९३ औँ स्थानमा पर्न सफल भएका थिए । आइसीसीले जारी गरेको अर्को वरियतामा भुर्तेल ६१औँ स्थानमा उक्लेका थिए। यसैगरी पुरस्कारका लागि मनोनीत पाकिस्तानका जमानले दक्षिण अफ्रिकाविरुद्धको एकदिवसीय सिरिजमा ३०२ रन बनाएका थिए ।

सोक्रममा उनले दुई शतकसमेत बनाएका थिए । मनोनयनमा परेका आजमले दक्षिण अफ्रिकाविरुद्ध सोही एकदिवसीय सिरिजमा २२८ रन बनाएका थिए । पुरस्कारको घोषणा यही वैशाख २७ गते गरिने छ ।

सोल । कलाकार सीताराम कट्टेल र कुञ्जना घिमिरेको सक्रियतामा जनस्तरबाट निर्माण भइरहेको गौतम बुद्ध अन्तर्राष्ट्रिय क्रिकेट रङ्गशाला निर्माणका लागि दक्षिण कोरियाबाट चार लाख ५२ हजार ६३० रुपैयाँ सहयोग गरिएको छ ।

यहाँ रहेका नेपालीहरूबाट ‘एक घण्टाको कमाइ, गौतमबुद्ध अन्तर्राष्ट्रिय क्रिकेट रङ्गशालालाई’ भन्ने सहयोग अभियान सञ्चालन गरी पहिलो चरणमा सङ्कलित उक्त रकम धुर्मुस सुन्तली फाउन्डेशनलाई प्रदान गरिएको हो ।

उक्त रकम कोरियामा रहेका १०७ नेपालीको सहभागितामा जम्मा भएको थियो । रकम फाउन्डेसनको खातामा प्राप्त भएको धुर्मुस सुन्तली फाउन्डेशनले सामाजिक सञ्जाल फेसबुकमार्फत जानकारी गराएको छ ।

पहिलो चरणको उक्त रकम पठाए पनि सहयोग अभियान भने निरन्तर रहने र रकम जम्मा गरी पुनः पठाउने जानकारी यहाँका अभियानकर्मीहरूले बताएका छन् । अभियानकर्मीहरूले कोरियाबासी सम्पूर्ण खेलप्रेमी दाजुभाइ तथा दिदीबहिनीमा सहयोगको अपिलसमेत गरेका छन् ।

क्रिकेट रङ्गशाला निर्माणमा विविध अवरोधहरू देखिए पनि नेपालमा अन्तर्राष्ट्रिय क्रिकेट रङ्गशाला निर्माण सम्पन्न गराई छाड्ने अठोट लिएर अगाडि बढिरहेको धुर्मुस सुन्तली फाउन्डेसनलाई सहयोग गर्नुपर्ने कुरामा एकजुट हुन आह्वान समेत गरिएको छ ।।

एजेन्सी । स्टाम्फोर्ड ब्रिजमा स्पेनिस महारथी रियल मड्रिडमाथि  २-० को सहज जितका साथ समग्रमा ३-१ काे नतिजा निकाल्दै चेल्सीले यस सिजनको च्याम्पियन्स लिग फाइनलमा इंग्लिस प्रिमियर लिगमा आफ्नो प्रतिद्वन्द्वी म्यानचेस्टर सिटीको सामना गर्ने भएको छ । फाइनल मे २९ मा टर्कीको इस्तानबुलमा हुनेछ ।

थोमस टचेलको आगमनसँगै चामत्कारिक परिवर्तन देखिएको चेल्सीका लागि गोलरक्षक एडोवार्ड मेण्डीको प्रदर्शन शानदार रह्यो । पहिलो हाफमा उनले करिम बेन्जेमाको शशक्त दुई प्रहारलाई रोकेका थिए ।

अघिल्लो साता सान्टियागो वर्नबाउमा १-१ को बारबरी खेलेको चेल्सीले २८ औं मिनेटमा टिमो वेर्नरको गोलबाट अग्रता बनायो । काई हाभेर्टजले गरेको प्रहार बारमा लागेर फर्किएपछि वेर्नरले लगभग गोललाइनबाट हेड गोल गरेका थिए ।

दोस्रो हाफ पूर्णतः चेल्सीको नियन्त्रणमा थियो । उसले आफ्ना पूर्व गोलरक्षक थियावट कोर्टवालाई पछि पार्न कठिन भइरहेको थियो । हाभेर्टज्, एनगोलो कान्टे लगायतको प्रहार कोर्टवाले रोकेका थिए ।

८५ औं मिनेटमा मासोन माउन्टले गोल गरेपछि चेल्सीको फाइनल यात्रा निश्चित बन्यो । चेल्सी सन् २०१२ पछि पहिलोपल्ट च्याम्पियन्स लिगको फाइनलमा पुगेको हो ।

जनवरीमा क्लबका लिजेन्ड फ्र्यांक लाम्पार्डलाई बर्खास्त गरिएपछि आएका थोमस टचेलले क्लबमा उल्लेख्य परिवर्तन गरेका छन् । उनले लगातार दोस्रोपल्ट च्याम्पियन्स लिगको फाइनलमा पुग्ने अवसरसमेत पाएका छन् । अघिल्लो सिजन पेरिस सेन्ट जर्मेइन (पीएसजी)मा रहँदा उनको टोली फाइनलमा बायर्न म्यूनिखसँग पराजित रहेको थियो ।

एजेन्सी  । इंग्लिस प्रिमियर लिग क्लब म्यानचेस्टर सिटी आफ्नो इतिहासमा पहिलोपल्ट युरोपेली क्लब प्रतियोगिता च्याम्पियन्स लिगको फाइनलमा प्रवेश गरेको छ ।

ऐतिहासिक फाइनल प्रवेश निश्चित गर्नका लागि घरेलु मैदान इथिहाड रंगशालामा सिटीले फ्रान्सेली च्याम्पियन पेरिस सेन्ट जर्मेइन् (पीएसजी)लाई २–० ले हरायो । पहिलो लेगमा २–१ को जित हासिल गरेको सिटी समग्रमा ४–१ ले विजयी भयो ।

बेमौसमी हिउँले प्रभावित खेलको सुरुमै गोलरक्षक एडर्सनले ६० यार्ड परदेखि दिएको पास सदुपयोग गरी रियल मेहेरेजले शानदार गोल गरी पहिलो लेगको अग्रतालाई बढाएका थिए ।

पीएसजीलाई खेल सुरु हुनुभन्दा अगाडि नै एउटा ठूलो झड्का लागेको थियो । उसका विश्वस्तरीय स्ट्राइकर केलियन एम्बाप्पे चोटका कारण बेन्चमै सीमित हुन पुगेका थिए ।

यद्यपी अलेक्जान्दर जिनचेन्कोले बक्सभित्र ह्याण्ड गरेपछि पेनाल्टी दिने रेफ्रीको निर्णय भिडियो अडियो असिस्टेन्ट रेफ्री (भार)ले उल्टाउनुअघिको समयमा पीएसजीले शानदार फुटबल खेलेको थियो र कडा टक्कर दिएको थियो ।

तर ६३ औं मिनेटमा मेहेरेजले सिटीलाई २–० को अग्रता दिलाउन फिल फोडेनको क्रसलाई उपयोग गरी व्यक्तिगत दोस्रो गोल गरे ।

त्यसपछि पीएसजीले खेल शैली त्यस्तै हुन थल्यो जुन कारण पहिलो लेगमा इद्रिस गुयेले रातो कार्ड पाएका थिए । फर्नान्डिन्होमाथिको अनावश्यक फलका कारण एंगेल डी मारियाले रातोकार्ड पाए ।

२९ मे मा इस्तानबुलमा हुने फाइनलमा सिटीले चेल्सी र रियल मड्रिडबीचको विजेतासँग खेल्नेछ । यो खेल आज राती हुनेछ । पहिलो लेगमा चेल्सीले घरेलु मैदानमा रियलसँग १–१ गोलको बराबरी खेलेको थियो ।

दिल्ली । भारतीय क्रिकेटको नियामक निकाय बीसीसीआइले जारी इन्डियन प्रिमियर लिग (आइपीएल)लाई रोक लगाउने निर्णय गरेको छ ।

कोरोना महामारीको कारण आइपीएलको २०२१ संस्करण अनिश्चितकालका लागि स्थगित भएको इएसपीएनले उल्लेख गरेको छ ।

भारतमा पछिल्लो समय लगातार १३ औं दिन पनि ३ लाखभन्दा बढी संक्रमित भेटिएका छन् । कोरोनाको कारण कतिपय खेलाडीले खेल नै छाडिरहेका छन् ।

काठमाडौं । एफसी चितवनमाथि रोमाञ्चक जित निकाल्दै विराटनर सिटी फुटबल क्लब राजधानीमा जारी नेपाल सुपर लिग (एनएसएल)को शीर्ष स्थानमा उक्लिएको छ ।

त्रिपुरेश्वर स्थित दशरथ रंगशालामा सम्पन्न खेलमा विराटनगर सिटीले चितवनमाथि २–० को जित निकाल्दै तालिकाको शीर्ष स्थानमा उक्लिएको हो ।

पहिलो हाफमा गोल रहित बराबरी खेलेको विराटनगरले दोस्रो हाफमा आक्राम खेल पस्किएको थियो । काउन्टर गर्दै चितवनलाई दबाब दिएको विराटनगरका लागि पेड्रो मान्जी क्रुजले ७३ औं मिनेटमा गोल गर्दै टोलीको अग्रता निकालेका थियो ।

त्यसपछि ८९ औं मिनेटमा सन्तोष तामाङले गोल गर्दै टोलीको जितको निश्चित गरे । १० मिनेट इन्जुरी समयमा चितवन खेलमा फर्किन प्रयास गरे पनि सफल हुन सकेन ।

पहिलो हाफमा विराटनगरलाई दबाबमा राखेको चितवनले केही राम्रा अवसर पाएको थियो । तर चितवनको अग्रपंत्तिले अवसरलाई सदुपयोग गर्न असफल रहेको थियो । दोस्रो हाफमा भने विराटनगर हावी हुँदै चितवनलाई दबाब दिएर खेल पस्किँदा जित निकाल्न सफल भएको थियो ।

जितबाट शीर्ष स्थानमा उक्लिएको विराटनगरले ४ खेलबाट ७ अंक जोडेको छ । गोल अन्तरका आधारमा विराटनगरले धनगढी फुटबल क्लबलाई पछि पार्र्दै शीर्षता कायम गरेको हो । उता अंक गुमाएको चितवनले चार खेलबाट मात्र २ अंक जोडेको छ ।

दुई खेलमा बराबरी र दुई खेलमा अंक गुमाएको चितवनले जारी लिगमा जित विहिन छ । यस्तै ललितपुर सिटी पनि जारी लिगमा जितविहिन टोली हो ।

प्रतियोगितामा मंगलबार बुटवल लुम्बिनी फुटबल क्लब र काठमाडौं रेजर्सबीच खेल हुनेछ । बुटवलले तीन खेलबाट ५ अंक जोडेको छ भने काठमाडौं रेजर्सको समान तीन खेलबाट ४ अंक छ । मंगलबार हुने खेलमा दुबै टोली अघिल्लो चरण प्रवेश गर्न स्पष्ट जितका लागि प्रतिस्पर्धा गर्नेछन् ।

काठमाडौँ  । नेपाल ट्वान्टी-२० क्रिकेटको अन्तराष्ट्रिय वरीयतामा एक स्थान माथि उक्लिएको छ । अन्तराष्ट्रिय क्रिकेट काउन्सिल (आइसीसी)ले सार्वजनिक गरेको नयाँ वरियतामा नेपालले आफ्नो स्थानमा सुधार गर्दै १३ औं स्थान उक्लिएको हो ।

आइसिसीले सोमबार सार्वजनिक गरेको नयाँ वरियतामा नेपाल माथि उक्लिएको हो । यसअघि नेपाल १४औँ स्थानमा रहेको थियो। बैशाखमा नेपालले घरेलु मैदानमा त्रिकोणात्मक टी-ट्वान्टी सिरिजको उपाधिसमेत जितेको थियो।

टी-ट्वान्टीको नयाँ वरियताको पहिलो स्थानमा इङग्ल्यान्ड छ भने दोस्रोमा भारत तथा तेस्रो स्थानमा न्युजिल्यान्ड छ। त्यसैगरी चौथो स्थानमा पाकिस्तान छ भने पाँचौँ स्थानमा अष्ट्रेलिया छ।

नेपालले एक दिवसीय वरियतामा समेत सुधार गरेको छ। एकदिवसीय वरियतामा नेपाल १६औँ स्थानमा छ। एक दिवसीयको नयाँ वरियतामा न्युजिल्यान्ड शीर्ष स्थानमा छ भने अष्ट्रेलिया दोस्रो तथा भारत तेस्रो स्थानमा छ।

एजेन्सी । लियोनल मेस्सी पेनाल्टीमा चुके पनि उनैको २ गोलको सहयोगमा भ्यालेन्सियालाई हराउँदै बार्सिलोनाले शीर्ष स्थाको एट्लेटिको मड्रिडसँगको दूरी छोट्याएको छ ।

बार्सिलोनाले पछि परेको स्थितिबाट पुनरागमन गरेको हो । गाव्रियल पुलिस्टाको हेड गोलमार्फत भ्यालेन्सियाले ५० औं मिनेटमा अग्रता बनाएको थियो । पहिलो हाफ गोलरहित बराबरी रह्यो ।

तर ५७ औं मिनेटमै मेस्सीले बराबरी गोल फर्काए । पेनाल्टीमा असफल भए पनि रिबाउण्डमा उनैले गोल गरेपछि खेल बराबरीमा आएको हो । त्यसपछिको १२ मिनेटभित्र बार्सिलोनाले थप २ गोल गर्‍यो ।

६३ औं मिनेटमा एन्टोइन ग्रिजम्यानले गोल गरे । ६९ औं मिनेटमा मेस्सीलेनै फ्रिकिकमार्फत शानदार गोल गरी ३–१ को अग्रता दिलाए । ८३ औं मिनेटमा भ्यालेन्सियाका कार्लोस सोलरले एक गोल फर्काए पनि पर्याप्त बनेन ।

अर्को साता बार्सिलोनाले लिग लिडर एट्लेटिको मड्रिडलाई नोउ क्याम्पमा आतिथ्य गर्नेछ । यो खेल ला लिगाको उपाधि होडमा निर्णायक बन्न सक्छ । अहिले समान ३४ खेलमा एट्लेटिको ७६ तथा रियल मड्रिड र बार्सिलोनाको समान ७४ अंक छ ।

एजेन्सी । किरोन पोलार्डले ३४ बलमा विष्फोटक ८७ रनको अविजित इनिङ खेलेपछि मुम्बई इण्डियन्सले चेन्नाई सुपर किंग्समाथि २ सय १९ को लक्ष्य अन्तिम ओभरमा भेट्टाएको छ ।

पाँचौं नम्बरमा पोलार्ड ब्याटिङमा आउँला मुम्बईलाई जितका लागि ६२ बलमा १ सय ३८ रनको आवश्यकता थियो । यस्तोमा उनले ८ छक्का र ६ चौका प्रहार गरी टिमलाई ४ विकेटको जित दिलाए ।

मुम्बईलाई अन्तिम ओभरमा १६ रन आवश्यक थियो । पोलार्डले दुई चौका र एक छक्का प्रहार गरे । अन्तिम बलमा २ रन लिँदै टिमलाई सनसनी जित दिलाए । यो आईपीएल इतिहासमै दोस्रो सर्बाधिक रनचेज हो ।

यसअघि इंग्ल्याण्डका अनराउण्डर मोइल अलीले ३६ बलमा ५८ तथा अम्बाती रायडुले २७ बलमा ७२ रको विफोटक इनिङ्स खेलेपछि प्रतियोगिताको शीर्ष स्थानमा रहेको चेन्नाईले २१८-४ को योगफल खडा गरेको थियो ।

‘यो मैले अहिलेसम्म देखेको ट्वान्टी–२० खेलमध्येको उत्कृष्ट हो,’ मुम्बईका कप्तान रोहित शर्माले भने, ‘मैले यसरी लक्ष्य पछ्याएको देखेको छैन । पोलार्कका लागि पनि यो करिअरकै उत्कृष्टमध्येको एक इनिङ हुनुपर्छ ।’

यो जितपछि साविक विजेता मुम्बई ७ खेलबाट ४ जितका साथ चौथो स्थानमा उक्लिएको छ । शीर्ष तीन स्थानमा रहेका क्रमसः चेन्नाई, दिल्ली क्यापिटल्स र रोयल च्यालेन्जर्स बैंग्लोरको समान १० अंक छ ।

एजेन्सी । बुर्नो फर्नान्डेज र इडिन्सन काभानीले २-२ गोल गरेपछि पछि परेकोको स्थितिबाट पुनरागमन गरी म्यानचेस्टर युनाइटेडले अर्को महिना हुने युरोपा लिग फाइनलका लागि स्थान लगभग सुरक्षित गरेको छ ।

घरेलु मैदान ओल्ड ट्राफोटमा युनाइटेड पहिलो हाफमा २–१ ले पछि थियो । तर दोस्रो हाफमा एकतर्फी प्रदर्शन गरेको उसले ६–२ को फराकिलो जित हासिल गरेको हो । अर्को साता हुने दोस्रो लेगमा यो फराकिलो गोलअन्तरलाई उल्ट्याउनु रोमाका लागि लगभग असम्भवजस्तै छ ।

फर्नो फर्नान्डेजले नवौं मिनेटमै घरेलु टोलीलाई अग्रता दिलाए पनि लोरेन्जो पेलेग्रिनीले पेनाल्टीमा गोल गरेपछि खेल बराबरीमा आयो । पाउल पोग्वाले बक्सभित्र ह्याण्ड गरेपछि रोमाले पेनाल्टी पाएको थियो । ३३ औं मिनेटमा बोस्नियाका स्ट्राइकर इडेन जेकोले गोल गरी पहिलो हाफमा २–१ को अग्रता बनाएका थिए ।

तर दोस्रो हाफमा युनाइटेड सुधारियो । ४८ औं मिनेटमै काभानीले गोल गरी खेल बराबरीमा ल्याए । ६४ औं मिनेटमा काभानीले व्यक्तिगत दोस्रो गोल गर्दा ७१ औं मिनेटमा फर्नान्डेजले पेनाल्टीमार्फत व्यक्तिगत दोस्रो गोल गरे । ७५ औं मिनेटमा पोग्वा र ८६ औं मिनेटमा काभानीको पासमा ग्रिनउडले गोल गरी ६–२ को जित निश्चित गरे ।

युरोपेली स्तरको सेमिफाइनल खेलमा सन् १९६४ पछि पहिलोपल्ट ६ गोल सम्भव भएको हो । यसअघि रियल मड्रिडले तत्कालीन युरोपियन कपमा ६ गोल गरेको थियो ।

आर्सनल पराजित

अर्को सेमिफाइनल पहिलो लेगमा इंग्लिस टोली आर्सनलले स्पेनको भिल्लारियलसँग २–१ को पराजय ब्यहोरेको छ । खेलमा दुवै टोली १० खेलाडीमा समेटिएका थिए ।

भिल्लारियलले घरेलु मैदानमा प्रभावशाली प्रदर्शन गरेको थियो । खेलको अन्त्यतिर निकोलास पेपेले पेनाल्टीमार्फत महत्वपूर्ण अवे गोल गरेपछि आर्सनलको आशा फर्केको छ । उनीहरुलाई लागेको छ कि दोस्रो लेगमा पुनरागमन गर्न सकिनेछ ।

ट्रिगुरोस मुनोजले पाँचौं र अविडोलले २९ औं मिनेटमा गोल गरेपछि पहिलो हाफमै भिल्लारियल २–० ले अगाडि थियो । ड्यानी सेबालोसले दोहोरो पहेँलो कार्ड पाएपछि ५७ औं मिनेटमै आर्सनल १० खेलाडीमा समेटिएको थियो ।

तर ७३ औं मिनेटमा भिल्लारियलका डिफेण्डरले बुकायो साकालाई बक्सभित्र फल गरेपछि पाएको पेनाल्टीमा पेपेले गोल गरेका हुन् । दोस्रो लेग इमिरेट्स रंगशालामा अर्को साता हुनेछ ।

एजेन्सी । पछि परेको स्थितिबाट पुनरागमन गदै इंग्लिस टोली म्यानचेस्टर सिटीले च्याम्पियन्स लिगको फाइनलमा पुग्ने सम्भावना बलियो पारेको छ । सेमिफाइनल पहिलो लेगमा सिटीले फ्रान्सेली च्याम्पियन पेरिस सेन्ट जर्मेइन (पीएसजी)लाई उसकै मैदानमा २–१ गोलले हरायो ।

पेप ग्वार्डिओला प्रशिक्षित म्यानचेस्टर सिटी खेल सुरु भएको १५ औं मिनेटमै पछि परेको थियो । एंगेल डी मारियाको कर्नरमा माक्वीनोजले हेडमार्फत अग्रता दिएका थिए । पूरा पहिलो हाफमै पीएसजीले खेल पूर्ण नियन्त्रणमा राखेको थियो ।

दोस्रो हाफको सुरुमै फिल फोडेनेले शानदार अवसर गुमाउँदा बराबरी गर्न चुकेको सिटीले निरन्तर आक्रमणहरु कायमै राख्यो । ६४ औं मिनेटमा केभिन डी ब्रुयेनले पेनाल्टी एरियाबाट गरेको प्रहारमा पीएसजीका गोलरक्षक केलर नाभास हलचल गर्नै भ्याएनन् ।

त्यसको ७ मिनेटपछि सिटीका लागि रियाद मेहेरेजले फ्रिकिकमार्फत अर्को गोल गरे । यो महत्वपूर्ण २ अवे गोल म्यानचेस्टर सिटीका लागि कीर्तिमानी सफलताको सुत्र बन्न सक्छ ।

म्यानचेस्टर सिटी अहिलेसम्म च्याम्पियन्स लिगको फाइनलमा पुग्न सकेको छैन । यसपल्ट दोस्रो लेगमा २ अवे गोलको अग्रतासहित उसले पीएसजीलाई इथिहाड रंगशालामा स्वागत गर्नेछ ।

७७ औं मिनेटमा इद्रिसा गुये रातो कार्ड पाउँदै मैदान छाडेपछि अन्तिम १३ मिनेछ पीएसजी १० खेलाडीमा समेटिएको थियो । इलके गुण्डोगानलाई डरलाग्दो फल गरेपछि उनले सिधै रातो कार्ड पाएका थिए ।

काठमाडौं । हालै भएको त्रिकोणात्मक सिरिजमा शानदार प्रदर्शन गरेका युवा ब्याट्सम्यान कुशल भुर्तेलले आइसीसीको टि–२० वरियतामा उच्च सुधार गरेका छन् । आइसीसीले सार्वजनिक गरेको पछिल्लो वरियताक्रमअनुसार उनी ६१ औं स्थानमा उक्लेका हुन् ।

नेपाल, नेदरल्यानड्स र मलेसिया सहभागी त्रिकोणात्मक सिरिजमा कुशलले सर्वाधिक स्कोर गर्दै म्यान अफ दि सिरिज बनेका थिए । ५ म्याचमा २ सय ७८ रन बनाएका उनले चार अर्धसतक प्रहार गरेका थिए । सोही प्रदर्शनले उनलाई आइसीसी वरियतामा माथि उकालेको हो ।

अघिल्लो सुचीमा पहिलोपटक टप १०० भित्र अटाएका कुशल ९३ औं स्थानमा थिए । तर, नयाँ सूचीमा उनले ३२ स्थान सुधार गरेका छन् । उनले अष्ट्रेलियाका स्टिभ स्मिथ, भारतका रिसभ पन्त, न्यूजिल्यान्डका रोज टेलर, ईंग्यान्डका जोय रुट जस्ता ब्याट्सम्यानहरुभन्दा उनी अगाडि छन् ।

टप १०० मा कुशलसहित नेपालका तीन ब्याट्सम्यान छन् । पूर्व कप्तान पारस खड्का ८८ स्थानमा रहँदा हालका कप्तान ज्ञानेन्द्र्र मल्लको ९४ औं स्थान छ ।

दिपेन्द्रको पनि फड्को

त्रिकोणात्मक सिरिजमा उच्च प्रदर्शन गरेका ब्याट्सम्यान दिपेन्द्रसिंह ऐरीले पनि बरियतामा निकै प्रगति गरेका छन् । एक सय ६४ आंै स्थानबाट फड्को मार्दै उनी एक सय ८ औं स्थानमा उक्लेका हुन् ।

बलिङतर्फ नेपालका सन्दिप लामिछाने मात्रै टप १०० भित्र परेका छन् । उनी ७७ औ स्थानमा छन् ।

एजेन्सी । चेल्सीले रियल मड्रिडबिरुद्ध च्याम्पियन्स लिग सेमिफाइनलको पहिलो लेगमा आशाजनक नतिजा हासिल गरेको छ । रियलसँग उसकै मैदान सान्टियागो बर्नबाउमा १–१ गोलको बराबरी खेल्नु चेल्सीका लागि अवे गोल निर्णायक बन्न सक्छ ।

थोमस टचेल प्रशिक्षित चेल्सी टिम रियल मड्रिडबिरुद्ध सबै पक्षमा सवल थियो । अर्को साता स्टाम्फोर्ड ब्रिजमा चेल्सीलाई गोलरहित बराबरी नै काफी हुनेछ । मे २९ मा हुने फाइनलमा यसको विजेता र म्यानचेस्टर सिटी तथा पेरिस सेन्ज जर्मेइनबीचको दोस्रो सेमिफाइनलको विजेताबीच प्रतिस्पर्धा हुनेछ ।

खेलको सुरुआतदेखि नै चेल्सीले माथिल्लोस्तरको प्रदर्शन गरेको थियो । उसले टिमो वेर्नरको गोलमार्फत अग्रता लिने अवसर गुमाएको थियो । वेर्नरले ६ यार्ड बक्सभित्रबाट गरेको प्रहार रियलका गोलरक्षक थियावट कोर्टवाले रोकेका थिए । तर १४ औं मिनेटमा क्रिष्टियन पुलिसिचको गोलमार्फत उसले अग्रता बनायो ।

घरेलु मैदानमा पछि परेपछि दवावमा आएको रियल मड्रिडका लागि सदावहार खेलाडी करिम बेन्जिमा संकटमोचक बनेर निस्किए । अरिकरको ७१ औं च्याम्पियन्स लिग गोल गर्दै उनले २९ औं मिनेटमा खेल बराबरीमा ल्याए ।

चेल्सीले दोस्रो हाफमा अझै राम्रो प्रदर्शन गरेको थियो तर अवसरलाई सदुपयोग गर्न सकेन । प्रशिक्षक टचेल टिमको प्रदर्शनबाट पूर्ण सन्तुष्ट देखिएका छन् ।

एजेन्सी । इंग्लिस प्रिमियर लिगमा क्रिष्टल प्यालेसमाथि पुनरागमन जितसँगै लिसेस्टर सिटीले च्याम्पियन्स लिगमा छनोट हुने सम्भावना उच्च पारेको छ ।

१२ औं मिनेटमै प्यालेसका लागि विल्फ्राइड जाहाले गोल गरेसँगै घरेलु मैदानमा लिसेस्टर पछि परेको थियो । टिमका लागि पहिलो गोल गरेका जाहाले इबेरेची इजेको पासलाई उपयोग गरेका थिए ।

तर दोस्रो हाफ सुरु भएको पाँचौं मिनेटमा तिमोथी क्यासेनले बराबरी गोल फर्काए । ८० औं मिनेटमा हेनाचोले लिसेस्टरका लागि विजयी गोल गरे । उच्च लयमा देखिएका उनले नौ खेलमा १२ गोल पूरा गरे ।

यो नतिजाले लिसेस्टरलाई तेस्रो स्थानमा चार अंकको अग्रता दिएको छ । समान ३३ खेलबाट लिसेस्टरको ६२ र चौथो स्थानको चेल्सीको ५८ अंक छ । प्रिमियर लिगका शीर्ष चार टोलीले स्वतः च्याम्पियन्स लिग खेल्न पाउँछन् । त्यसबाहेक पाँचौं हुने टोलीले पनि प्लेअफ खेल्न पाउँछ ।

लिसेस्टर सन् १९६९ यता पहिलोपल्ट एफए कप फाइनल पनि खेल्दैछ । यसअघि सन् २०१६/१७ को सिजनमा उसले च्याम्पियन्स लिगको क्वाटरफाइनलसम्म पुगेको थियो । त्यो भन्दा अघिल्लो सिजन उनीहरुले ऐतिहासिक प्रिमियर लिगको उपाधि उचालेका थिए ।

एजेन्सी । भारतमा कोरोना महामारीको दोस्रो लहर उत्कर्षमा पुगेपछि जारी इन्डियन प्रिमियर लिग (आइपीएल) मा प्रभाव पर्न थालेको छ । केही खलाडीहरुले आइपीएल बीचमै छोडेर घर फर्किने निर्णय लिएका छन् ।

अहिलेसम्म तीन अष्ट्रेलियन र एक भारतीय खेलाडीले खेल छोडेर घर फर्किने निर्णय लिएको बीबीसीले जनाएको छ ।

अष्ट्रेलियाका खेलाडीहरु एडम जाम्पा, केन रिचार्डसन र एन्ड्रू टाइका साथमा भारतीय खेलाडी रविचन्द्र आश्विनले आइपीएलका आगामी म्याचहरु खेल्ने छैनन् ।

राजस्थान रोयल्सका खेलाडी टाइ आइतबार भारतबाट सिड्नी प्रस्थान गरे । यसअघि रोयल च्यालेन्जर्स बैंगलोरका लग स्पिनर जाम्पा र फास्ट बलर रिचार्डसनले व्यक्तिगत कारण देखाउँदै आइपील छोडेको क्लवले जनाएको छ ।

अष्ट्रेलियाका स्टिभन स्मिथ, डभिड वार्नर र प्याट कुमिन्सजस्ता खेलाडीहरु भने भारतमै छन् । कोराना महामारीले देश आक्रान्त भए पनि आइपीएल स्थगित भएको छैन । दर्शकविहिनरुपमा आइपीएलका खेलहरु भइरहेका छन् ।

एजेन्सी । टोटनह्यामलाई पराजित गरी म्यानचेस्टर सिटीले इंग्लिस नकआउट फुटबल प्रतियोगिता लिग कपको उपाधि लगातार चौथोपल्ट जितेको छ ।

गएराति वेम्बली राष्ट्रिय रंगशालामा भएको फाइनलमा म्यानचेस्टर सिटीले १–० गोलअन्तरको जित हासिल गरेको हो । सिटीका लागि निर्णायक गोल ८२ औं मिनेटमा डिफेण्डर एमरिक लापोर्टेले गरेका हुन् ।

केभिन डी ब्रुएनको फ्रिकीकमा पेनाल्टी एरिया नजिकैबाट टोटनह्यामका सब्स्टिच्युड स्ट्राइकर मोउसा सिसिकोभन्दा माथि चढेर लापोर्टाले गरेको हेडिङ विश्वविजेता फ्रान्सेली गोलरक्षक ह्युगो लोरिसले पत्तै पाउन सकेनन् ।

खेल अवधिभर सिटीले धेरै अवसर सृजना गरेको थियो । गएको सोमबारमात्र प्रशिक्षक जोसे माउरिन्होलाई बर्खास्त गरेको टोटनह्यामका खेलाडीहरुले सकारात्मक मानसिकताका साथ खेलेको देखिएन । माउरिन्होलाई र्यान मासोनले प्रतिस्थापन गरेका छन् ।

फाइनल खेल ८ हजार दर्शकसामू खेलाइएको थियो । ती मध्ये दुवै टोलीका २/२ हजार समर्थकले वेम्बलीमा गएर हेर्ने सौभाग्य पाएका थिए । वेम्बलीमा होहल्लाका लागि ती दुई हजार नै काफी रहे ।

सिटीले पहिल्ला चार सिजन लिग कपको उपाधि जितेर लिभरपुलको कीर्तिमान बराबरी गरेको छ । लिभरपुलले सन् १९८०/८१ देखि सन् १९८३/८४ मा लगातार चार सिजन लिग कप जितेको थियो । सिटीको यो समग्रमा आठौं लिगकप उपाधि हो ।

काठमाडौं । त्रिवि क्रिकेट मैदानमा पछिल्लो साता रनको वर्षात् भयो । तीन देश सहभागी टी-२० सिरिजमा नेपालका ब्याट्सम्यानहरूले अभुतपूर्व ब्याटीङको प्रदर्शन गर्दै किर्तिमानमाथि कीर्तिमान राखे ।

ब्याट्सम्यानहरू चम्किएको प्रतियोगितामा बलरहरूले भने खासै चर्चा पाएनन् । खासमा त्रिविको पीच यसपाली ब्याट्सम्यानको लागि स्वर्ग र बलरका लागि मरुभूमि बराबर थियो । थारो भैंसी दुहुनजस्तै कठिन थियो यो पीचमा बलिङ गरेर विकेट निकाल्न ।

तर, यस्तो ‘मरुभूमि’मा पनि नेपालका स्बलरहरूले आफ्नो उत्कृष्टता देखाउन चुकेनन् । नेदरल्यान्ड्स र मलेसियाका बलरहरूको तुलनामा नेपालका बलरहरूको अर्कै स्तर देखियो । प्रतियोगिताभर सर्वाधिक विकेट लिने बलरहरूको सूचीमा नेपालका बलरहरू हावी छन् ।

नेपालका सुपरस्टार बलर सन्दीप लामिछानेले प्रतियोगितामा कीर्तिमानी बलिङ गरे । पाँच खेलमा उनले १३ विकेट लिन सफल भए, जुन कुनै पनि टी-२० अन्तर्राष्ट्रिय सिरिजमा नेपाली बलरको उच्च प्रदर्शन हो । प्रतियोगितामा सर्वाधिक विकेट लिने बलर बनेका छन् उनी ।

सन्दीपले कुल १९.५ ओभर बलिङ गर्दा ८.२१ को इकोनोमीमा १६३ रन खर्चिए । उनी केही महंगा अवश्य भएका हुन् । तर, आफ्नो ‘विकेट टेकर’ छविलाई कायम राख्न उनी सफल भए । उनले १२.५३ को औसत कायम गरेका छन् ।

विकेट लिनमा सन्दीप अगाडि भए पनि इकोनोमीमा नेपालका फास्ट बलरहरू अगाडि छन् । सामान्यतया स्पिनरभन्दा धेरै रन खाने गरेका फास्ट बलरहरूले यो प्रतियोगितामा निकै कसिलो बलिङ गरे । अग्रपंतिका दुई बलर सोमपाल कामी र करण केसीले विपक्षी ब्याट्सम्यानहरूलाई खुलेर खेल्न दिएनन् । करण फाइनलमा म्यान अफ दी म्याचसमेत बनेका थिए ।

सर्वाधिक विकेट लिनेमा दोस्रो स्थानमा रहेका करणले ७ विकेट आफ्नो पोल्टामा पारे । उनले ६.५७ को इकोनोमी तथा १६.४२ को औसतमा बलिङ गरेका छन् ।

नेपालका प्रमुख फास्ट बलर सोमपाल कामीको प्रदर्शन पनि उल्लेख्य रह्यो । विकेट संख्या कम भए पनि उनले मितव्ययी बलिङ गरेका थिए । पाँच म्याचमा उनले पाँचै विकेट लिए । उनको इकोनोमी ५.३१ र औसत १७ छ ।

यही प्रतियोगिताबाट डेब्यू गरेका नेपाली बलर कमलसिंह ऐरीले पनि छाप छोड्न सफल भए । उनको डेब्यू स्मरणीय बनेको छ । अन्तिम दुईवटा म्याचमा मात्रै मौका पाए पनि उनले आफ्नो क्षमता देखाउन सफल भए ।

कमलले आफ्नो डेब्यू खेलमै ३ विकेट लिएका थिए । डेब्यू टी-२० म्याचमा सर्वाधिक विकेट लिने राष्ट्रिय कीर्तिमान उनले बताएका छन् । फाइनलमा पनि २ विकेट लिएर उनले आफ्नो विकेट संख्या ५ पुर्‍याए ।

कमलको इकोनोमी र औसत दुवै उत्कृष्ट छ । उनले ५.३० को इकोनोमी र ७.६० को औसतमा बलिङ गरेका थिए ।

नेपालका अन्य दुई बलर अविनाश बोहोरा र सहाब आलम भने अपेक्षित सफल हुन सकेनन् । ३ म्याच खेलेका साहब र ४ म्याच खेलेका अविनाशले २-२ विकेट लिएका थिए ।

नेपालका बलरको तुलनामा अन्य दुई देशका बलरको आँकडा नाजुक छ । अरु कुन पनि देशका बलरले एउटा म्याचमा दुईभन्दा बढी विकेट लिन सकेनन् । सर्वाधिक विकेट लिने पाँच बलरको सूचीमा नेदरल्यान्ड्सका थोमस सेबास्यिान ब्राट मात्रै छन् । ५ विकेट लिएका उनी पाँचौ स्थानमा छन् । तर, उनले ११.५० को इकोनोमीमा खर्चिलो बलिङ गरेका थिए ।

काठमाडौं । इन्डियन प्रिमियर लिगमा चेन्नइ सुपर किङ्सका भारतीय ब्याट्सम्यान रवीन्द्र जडेजाले एकै ओभरमा ३७ रन बनाएका छन् ।

रोयल च्यालेन्जर्स बैंगलोरविरुद्ध उनले अन्तिम ओभरमा ५ छक्का र एक चौका प्रहार गरेका थिए ।

वेस्ट इन्डिजका ब्याट्सम्यान क्रिस गेलले बनाएको किर्तिमानसँग जडेजाले बराबरी गरेका छन् । गेलले २०११ मा भएको खेलमा एक ओभरमा ३७ रन बनाएका थिए । टि-२० क्रिकेटमा एक ओभरमा ३८ रनसम्म बनेको छ ।

जडेजाले पहिलो दुई बलमा लगातार छक्का हानेका थिए । तेस्रो बल नो बल भएको थियो र त्यसमा पनि जडेजाले छक्का प्रहार गरे । फेरि फ्याकिएको तेस्रो बल पनि छक्का नै भयो ।

चौंथो बलमा जडेजाको क्याच ड्रप भयो, जसमा ब्याट्सम्यानले दुई रन लिए । पाचौं बल फेरि छक्का र छैटौं बल चौका भयो ।

चेन्नइ सुपरकिङ्सका मध्यक्रमका ब्याट्सम्यान जडेजाले २८ बलमा ६२ रन जोड्न सफल भएपछि चेन्नइले १९१ रनको स्कोर खडा गरेको छ । जवाफमा आरसीवीले कमजोर ब्याटिङ गरेर ठूलो हारको नजिक पुगेको छ ।

काठमाडौं । युवा पुस्ताका बक्सर अविरल घिमिरेले ‘अन्तरराष्ट्रिय प्रोफेशनल किक बक्सिङ हिट ४८’ को उपाधि चुमेका छन् ।

जापानको नागोया शहरमा अवस्थित नागोया कङ्ग्रेस हलमा आज आयोजित भिडन्तमा हिमालयन चितुवाले पहिलो राउण्डमा नै जापानी खेलाडी योसिदा यइजीलाई परास्त गर्दै ऐतिहासिक जीत हात पारेको हो ।

विश्वका भेट्रान बक्सरलाई मात्र सो प्रतियोगितामा खेलाइने आयोजकले जनाएको छ ।

आकर्षक भिडन्तमा सोे प्रतियोगिता जित्ने अविरल कम उमेरका पहिलो बक्सर बनेको छ ।

घिमिरेले गत चैत १५ गते ‘के वान फेस्टिबल २०२१’ को उपाधि चुमेको थियो । जापानको टोकियो शहरमा सम्पन्न सो अन्तरराष्ट्रिय प्रतियोगितामा उनले जापानी बक्सर खोतेजुलाई पहिलो राउण्डमा परास्त गर्दै नेपालका लागि ऐतिहासिक जीत दिलाएको थियो ।

विश्वका चर्चित बक्सरलाई मात्र सो महोत्सवमा खेलाइएको थियो ।

सो प्रतियोगिताको पदक आफ्नो पक्षमा ल्याएसँगै उनी कम उमेरका पदक हात पार्ने पहिलो नेपाली युवा खेलाडीसमेत बनेका छन् ।

दश हजारभन्दा बढी जापानीले विश्वचर्चित सो भिडन्त हलमा हेरेका थिए भने आबेमा युट्युब च्यानलमार्फत विश्वभर प्रत्यक्ष प्रसारण गरिएको थियो । अन्तरराष्ट्रिय बक्सिङ खेलाडी एवं प्रशिक्षक देवकुमार घिमिरेका छोरो अविरलले बुबाकै विशेष प्रशिक्षणमा महोत्सवको तयारी गरेका थिए ।

काठमाडौं । नेपालका युवा ब्याट्सम्यान कुशल मल्ल ट्वान्टी-२० अन्तर्राष्ट्रियमा अर्धशतक प्रहार गर्ने विश्वकै कान्छा ब्याट्सम्यान बनेका छन् । हिजो भएको त्रिकोणात्मक सिरिजको फाइनलमा नेदरल्यान्ड्सविरुद्ध अर्धशतक प्रहार गर्दै उनले विश्वकीर्तिमान बनाएका हुन् ।

बायाँ हाते ब्याट्सम्यानले २४ बलमा अर्धशतक बनाएको दिन उनको उमेर १७ वर्ष र ५० दिन थियो । यसअघि युगाण्डाका ब्याट्सम्यान फ्रान्क अकान्कवासाको नाममा यो रेकर्ड थियो । उनले १७ वर्ष ५२ दिनको हुँदा कतारविरुद्ध अर्धसतक प्रहार गरेका थिए । केवल २ दिनले कुशलले उनलाई पछि पारेका हुन् ।

कान्छा ब्याट्सम्यानको सूचीमा नेपालकै सन्दिप जोरा तेस्रो नम्बरमा छन् । सन्दिपले १७ वर्ष १०३ दिनको छँदा अर्धशतक हानेका थिए । उनले ३१ जनवरी २०१९ मा यूएइविरुद्ध अर्धशतक हानेर कान्छा ब्याट्सम्यानको कीर्तिमानलाई युगण्डाका ब्याट्सम्यानले गत वर्षको फेब्रुअरीमा तोडेका थिए ।

एकदिवशीय क्रिकेटमा अर्धशतक प्रहार गर्ने विश्वका कान्छा व्याट्सम्यानको रेकर्ड पनि कुशलकै नाममा छ । उनले विश्वकप लिग-२ अन्तर्गत अमेरिकाविरुद्धको खेलमा सो रेकर्ड राखेका थिए । नेपालकै रोहितकुमार पौडेलको रेकर्ड उनले तोडेका थिए । गत वर्षको फेब्रुअरीमा कुशलले सो अर्धशतक हान्दा उनको उमेर १५ वर्ष ३४० दिन थियो ।

एजेन्सी । भारतका अस्पतालहरुले अक्सिजनको अभावकै कारण आफ्ना विमारीहरु मरिरहेको बताएका छन् । किनभने कोरोना संक्रमित र मृतकको आँकडाले दिनदिनै नयाँ कीर्तिमान बनाइरहेका छन् ।

भारतमा पछिल्लो तीन दिनको बीचमा करिव १० लाख मानिस संक्रमित भएका छन् । शनिबार २४ घण्टाको अवधिमा ३ लाख ३६ हजार ७८६ नयाँ संक्रमित फेला परेका छन् ।

दिल्लीको जयपुर गोल्डेन अस्पतालमा शनिबार राती अक्सिजन नपाएर २० जना संक्रमितको निधन भएको अस्पताल प्रशासनले जानकारी दिएको छ । भारत सरकारले भने रेल सेवा र भारतीय वायु सेनालाई आवश्यक उपकरण आपूर्तिका लागि तैनाथ राखिएको बताएको छ ।

शनिबार २४ घण्टाको अवधिमा भारतभर २६ सय २४ जनाको मृत्यु भएको छ । शुक्रबार यो संख्या २२ सय ६३ थियो । विश्व स्वास्थ्य संगठन (डब्लूएचओ)ले भारतको अहिलेको स्थितिलाई ‘महाविनाशकारी अवस्था’को रुपमा चित्रण गरी कोरोनाले कतिसम्म क्षति गर्छ भन्ने उदाहरण बनेको बताएको छ ।

सन् २०२१ को सुरुआतमा भारतले कोरोनालाई परास्त गरेको ठानेको थियो । फेब्रुअरीको मध्यतिर सवा अर्ब जनसंख्या रहेको भारतमा ११ हजार नयाँ संक्रमित देखिएका थिए । भारतले खोप उत्पादन गरी निर्यातसमेत गर्न थालेको थियो । मार्चमा त्यहाँका स्वास्थ्यमन्त्रीले कोरोनाबिरुद्धको लडाईं अन्त्यतिर पुगेको बताएका थिए ।

तर त्यतिबेलै देखि नयाँ कोरोना संक्रमित फेला पर्न थालेका थिए । नयाँ भेरिएन्टको प्रवेश भइसकेपछि पनि त्यहाँ सार्वजनिक समारोह, कुम्भमेला लगायतका गतिविधि रोकिएन । यही महिनाको सुरुआतमा हरिद्वारमा आयोजित कुम्भमेलामा लाखौं तीर्थयात्री सहभागी थिए ।

राजधानी दिल्लीका अस्पतालहरुले आफ्नो सामर्थ्यको अन्तिम अवस्थामा रहेको चेतावनी दिएका छन् । होली फ्यामिली अस्पतालले आईसीयूसहित आफ्ना सबै बेडहरु भरिभराउ रहेको जनाएको छ ।

‘लगभग सबै अस्पताल अन्तिम स्थितिमा छन् । अक्सिजन पाइएन भने हामीले कुनै पनि रोगका विरामीको उपचार गर्नै सक्दैनौं,’ दिल्लीका एक चिकित्सकले बीबीसीसँग भने, ‘अक्सिजन नपाएको अवस्थामा १ मिनेटभित्र ती बिरामीको मृत्यु हुन्छ । भेन्टिलेटरमा रहेका बिरामीलाई उच्च प्रवाहको अक्सिजन जरुरी हुन्छ । उनीहरुले त्यो सुविधा पाएनन् भने अधिकांशले मृत्युवरण गर्न बाध्य हुनेछन् ।’

एजेन्सी । सिजनको अन्त्यतिरका निर्णायकमध्येको खेलमा रियल बेटिससँग गोलरहित बराबरीमा रोकिएपछि रियल मड्रिडको स्पेनिस ला लिगा जित्ने आशामा धक्का पुगेको छ ।

रियल मड्रिड यो बराबरीपछि शीर्ष स्थानको एट्लटिको मड्रिडभन्दा २ अंकले पछाडि छ भने तेस्रो स्थानको बार्सिलोनाभन्दा ३ अंकले अगाडि छ । तर बार्सिलोनाले २ खेल कम खेलेको छ ।

रोड्रिगोको एउटा प्रहार क्रसबारमा लागेपछि साविक विजेता रियलले अग्रता बनाउन चुकेको थियो । म्यानुअल पेलेग्रिनीद्वारा प्रशिक्षित रियल बेटिसले यस सिजन उत्कृष्ट प्रदर्शन गरिरहेको छ र उसको युरोपा छनोट हुने सम्भावना प्रवल छ ।

बेटिसका लागि गुइडो रोड्रिग्वेजले सृजना गरेको एउटा शानदार अवसरलाई रियलका गोलरक्षक थियावट कोर्टवाले असफल पारिदिएका थिए ।