Category: खेल प्रेस

काठमाडौं । मुख्य प्रशिक्षक रोबर्टो मान्सिनीको नेतृत्वको इटालियन टोली युरो २०२० का नकआउटमा स्थान सुरक्षित गर्ने पहिलो टोली बन्यो । र, ‘इनफर्म’ ‘अज्जुरी’को यो नतिजा कुनै अप्रत्याशित सफलता भने होइन । अन्तिम पटक गोल खाए यता ३० गोल गरिसकेको इटालीले बुधबार राति स्वीटजरल्यान्डलाई पराजित गरेसँगै लगातार १० खेलमा जित निकालेको छ ।

त्यति मात्र होइन, उत्कृष्ट लयमा रहेको इटालीले पछिल्ला १९ खेलमा ५९ गोल ठोकेको छ भने तीन गोल मात्रै खाएको छ । अहिले इटाली पछिल्ला २९ खेलमा अपराजित छ भने ती खेलमा ८० गोल ठोकिसकेको छ । र, उपाधिका लागि उनीहरूको भोक स्वभाविक छ । सबै ‘स्ट्याट्स’ उनीहरूको पक्षमा भए पनि प्रतियोगिता अगाडि बढ्दै जाँदा रोबर्टो मान्सिनिको टोली कहाँसम्म पुग्छ भन्ने सवाल पैदा भएको छ ।

‘अज्जुरी ‘विनिङ मेसिन’ हुन्’

युरो २०१२ को फाइनलमा पराजित भए यता विश्व फुटबलका ठूला प्रतियोगितामा खासै प्रभाव पार्न नसकेको इटालीले पहिलो पटक युरोपियन च्याम्पियनसिपका सुरुआती दुई खेलमा ३-०, ३-० को जित निकाल्न सफल भयो । युरोको उद्घाटन खेलमा टर्कीविरुद्ध शानदार सुरुआत गरेका इटालीले दोस्रो खेमला स्वीटजरल्यान्डविरुद्ध पनि सोही नतिजा दोहोर्‍याएको थियो ।

लगातार दुई खेलमा शानदार सुरुआत गरेको इटालीले प्रतियोगिता अगाडि नै पाएको उपाधि दाबेदारको उपमालाई आत्मसातसमेत गरेको छ ।

‘उनीहरूले खेलको सुरुआतदेखि अन्त्यसम्म खेल नियन्त्रणमा लिइरहेका छन्,’ एभर्टनका पूर्व मिडिफिल्डर लियोन ओस्मानले भने, ‘उनीहरू बल पोसेसन नहुँदा के गर्छन् भन्ने विषयमा ठूला देशहरू छक्क पर्छन् । तर, आक्रामक पक्षमा भने उनीहरू एकदमै राम्रो टोली छन् ।’

‘उनीहरू ‘विनिङ मेसिन’ हुन् । तर, उनीहरूलाई यथार्थ रूपमा जाँच्नका लागि इटालीले साँच्चै बलिया टोलीसँग खेलेको छैन । यदि तपाई इटालीलाई प्रतियोगिताको सम्बन्धलाई लिएर मुल्याङ्कन गर्नुहुन्छ भने उनीहरूको परीक्षण हुन बाँकी छ । ठूला टोलीसँग अज्जुरीले कस्तो खेल्छन्, त्यो हेर्न बाँकी छ ।’

यस्तै म्यानचेस्टर युनाइटेड तथा आयरल्यान्डका मिडफिल्डर रोए किनले इटालियन टोलीको प्रशंसा गरेका छन् ।

‘यो टोलीको बारेमा सबैभन्दा मलाई मन परेको पक्ष भनेको उनीहरूको अगाडि बढेर आक्रमण गर्ने शैली हो । तर, बल पोसेसन बिना उनीहरू जे गरिरहेका छन् र टोली पछाडि झरेर खेलिरहेका छन्, त्यो इच्छाशक्तिको नमुना हो,’ किनले भने, ‘जब उत्ृकष्ट खेलाडीहरू टोलीमा हुन्छन्, भोक र तिव्र इच्छा हुन्छ, गन्तव्यमा पुग्नु पर्ने ठाउँमा पुगिन्छ ।’

इटालीबाट युरो २००० को फाइनलसम्म पुगेका जियानलुका जाम्ब्रोटा भन्छन्, ‘स्वीटजरल्यान्डविरुद्धको खेलअघि टोलीबाट धेरै अपेक्षा थिए । तर, अब झन् धेरै अपेक्षा बढेका छन् । गाइज! यही ‘एटिच्युड’सहित खेलेर हाम्रो सपना पूरा गरिदेऊ ।’

‘उनीहरू आनन्द लिइरहेका छन् र जोखिम पनि मोलिरहेका छन्’

सहजतापूर्वक समूह ‘ए’ शीर्ष स्थान कब्जा गरेको इटालीका प्रशिक्षक मान्सिनीले आफ्नो टोलीको प्रदर्शनप्रति सकारात्मक टिप्पणी गर्दै अगाडि अझ कठिन चुनौतीको सामना गर्नुपर्ने बताएका छन् ।

‘युरोपियन च्याम्पियनसिपमा फ्रान्स, पोर्चुगल, बेल्जियम जस्ता टोली छन् । तीमध्ये एक टोली विश्वकप विजेता हो र अर्को युरोपियन च्याम्पियन,’ उनले भने, ‘र, अर्को टोली विश्व बरियताकै शीर्ष स्थानमा छ । यी टोलीहरू वर्षौँ लगाएर बनेका छन्, र उनीहरू हामीभन्दा अझै अगाडि छन् । तर, यो फुटबल हो, यहाँ जे पनि हुनसक्छ । केही कुरा पनि निश्चित हुन सकिँदैन ।’

‘सबै खेल चुनौतीपूर्ण छन् । फिल्डमा गएर खेल्नैपर्छ । म यो मानेमा भाग्यशाली छु कि मेरो टोलीमा धेरै राम्रा खेलाडी छन् । उनीहरू खेल्न रुचाउँछन्, उनीहरू आनन्द लिन्छन् र जोखिम मोल्ने हिम्मत राख्छन्,’ मान्सिनी भन्छन्, ‘यी सबै कुराको श्रेय खेलाडीलाई जान्छ । मैले मेरो सोचाई र प्रक्रिया उनीहरूलाई बुझाउने कोसिस गरेँ र अगाडि अझै लामो बाटो बाँकी छ ।’

सबै योजना अनुसार भइरहेको छ ?

नकआउटमा पनि इटालीसँग त्यस्तै आक्रामक क्षमता बाँकी रहन्छ ? त्यो समयले बताउने छ तर एउटा सानो कुरा मान्सिनीको टोलीको विरुद्धमा देखिएको थियो ।

सिरो इम्मोबिलेले इटालीबाट खेलेका पछिल्ला तीनै खेलमा लगातार गोल गरेका छन् । र, उनले प्रतियोगिताअघि उनको अन्तर्राष्ट्रिय स्तरमा गोल स्कोरिङ रेकर्डलाई लिएर उठेका सबै सवाल बन्द गरिदिएका छन् । त्यस्तै, भरपर्दा मिडफिल्डर मार्को भेराटी चोटग्रस्त भएपछि मान्सिनीलाई टाउको दुखाइको विषय बनेको थियो । तर, भेराटीको स्थानमा मौका पाएका म्यानुएल लोकाटेली स्वीटजरल्यान्डविरुद्धको खेलमा दुई गोलसहित ‘स्टार अफ दी शो’ साबित भए ।

‘डोमिनेन्ट’ इटालियन टोलीका लागि एउटा मात्रै दुःखद् पक्ष रह्यो, कप्तान जर्जियो केलिनीको इन्जुरी र फोस्र्ड सब्स्टिच्युसन रह्यो । केलिनीले स्वीटजरल्यान्डविरुद्धको खेलमा २४ मिनेट बिताएर सम्भावित ‘ह्यास्ट्रिङ’ इन्जुरीका कारण मैदानबाट बाहिरिनु परेको थियो ।

‘यो एकदम चिन्ताको विषय हो । आशा गरौं उनलाई जटिल समस्या देखिएको होइन । तर, ३६ वर्षको उमेरमा चोटिल भएर मैदानबाट बाहिरिनु समग्र प्रतियोगिताका लागि राम्रो कुरा होइन,’ फ्रान्सका पूर्वमिडफिल्डर प्याट्रिक भिएराले भने ।

बिबिसीबाट

एजेन्सी । कोपा अमेरिकामा समूह बी बाट लगातार दोस्रो जित हासिल गर्ने क्रममा साविक विजेता ब्राजिलले पेरुमाथि ४–० गोलको प्रभावशाली विजय हासिल गरेको छ । दुई जितसँगै ब्राजिल क्वाटरफाइनलमा प्रवेश गरेको छ ।

अघिल्लो संस्करणमा फाइनलिस्ट टोलीबीचको प्रतिस्पर्धामा घरेलु टोली ब्राजिलले एकपक्षीय खेल प्रदर्शन गरेको थियो । खेलको १२ औं मिनेटमै गाव्रियल जेससको पासमा एलेक्स सान्द्रोले ब्राजिललाई अग्रता दिलाएका थिए ।

बाँकी तीनै गोल दोस्रो हाफमा सम्भव भएको थियो । ६८ औं मिनेटमा नेइमारले बक्स बाहिरबाट आकर्षक गोल गरी अग्रता दोब्बर पारेका थिए । उनलाई फ्रेडले बल उपलब्ध गराएका थिए ।

८९ औं मिनेटमा एभर्टन रिबेरोले गोल गरी ३–० को अग्रता दिलाउँदा अप्रत्यक्ष रुपमा नेइमारको संग्लग्नता रह्यो । नेइमारले निकालिदिएको चलाखीपूर्ण पासमार्फत रिचर्डलिसनले गोल असिस्ट गरेका थिए ।

त्यसको तीन मिनेटपछि उनै रिचर्डलिसनले गोल गरी ४–० को जित निश्चित गरे । यसअघि उद्घाटन खेलमा ब्राजिलले भेनेजुएलामाथि ३–० को विजय पाएको थियो ।

काठमाडौं । विश्व नम्बर तीन राफेल नाडालले वर्षको तेस्रो ग्रान्डस्लाम- विम्बल्डन र टोकियो ओलम्पिक नखेल्ने घोषणा गरेका छन् ।

२० पटकका ग्रान्डस्लाम च्याम्पियन नाडालले ट्वीट गर्दै आफूले यो शरीरको अवस्था र टीमसँगको छलफलपछि यो एक कठिन निर्णय लिएको बताएका छन् ।

‘मैले यस पटकको विम्बल्डन र ओलम्पिकमा भाग नलिने निर्णय लिएको छु’, उनले लेखेका छन्, ‘यो सजिलो निर्णय दिएन । तर, मैले मेरो शरीरको अवस्था बुझेर आफ्नो टीमसँग सल्लाह गरेर यो निर्णय लिएको हुँ । मलाई विश्वास छ मेरो टीमलाई के उचित निर्णय हो भन्ने थाहा छ ।’

एजेन्सी । सर्जियो रामोसले रियल मड्रिड छाड्ने निश्चित भएको छ । क्लबले लामो समयदेखिको कप्तानको विदाई पत्रकार सम्मेलन विहीबार आह्वान गरेको छ ।

सन् २००५ मा सेभियाबाट अनुबन्धित भएयता ३५ वर्षीय रामोसले रियलमा ५ ला लिगा, ४ च्याम्पियन्स लिग उपाधि जितेका छन् । उनले रियलका लागि ६ सय ७१ खेलमा १ सय १ गोलसमेत गरेका छन् । सेन्टर डिफेण्डरका रुपमा उनी सर्बाधिक गोल गर्ने खेलाडीसमेत हुन् ।

क्लबले आफ्नो विधानअनुसार सम्मान र विलाईका लागि पत्रकार सम्मेलनको आयोजना गरेको बताएको छ । रामोसको रियलसँगको सम्झौता जुनको अन्तिममा सकिँदैछ ।

सेभियाबाट करिअर सुरु गर्न थालेका यी स्पेनिस डिफेण्डरलाई फ्लोरेन्टिनो पेरेजले पहिलोपल्ट रियलको अध्यक्षता संहालेपछि कीर्तिमानी रकममा अनुबन्ध गराएका थिए । त्यसपछि उनी आफ्नो समयको महान सेन्टर डिफेण्डर बने । रामोसले सान्टियागो बर्नबाउमा रहेर २२ उपाधि जिते ।

सन् २०१४ को च्याम्पियन्स लिग फाइनलमा चीर प्रतिद्वन्द्वी एट्लेटिको मड्रिडविरुद्ध ९३ औं मिनेटमा गरेको बराबरी गोलका लागि रामोसलाई सबैभन्दा धेरै सम्झिइन्छ । रियलले दशौंपल्ट च्याम्पियन्स लिग जित्ने क्रममा अतिरिक्त समयमा ४–१ को जित पाएको थियो ।

रियलको प्रस्तावमा सहमत नभएपछि फ्री ट्रान्सफरमार्फत रामोस बाहिरिन लागेका हुन् । उनी कुन क्लबबाट खेल्नेछन् भन्ने नश्चित भएको छैन ।

रामोसलाई फिटनेसको कारण देखाउँदै लुइस इनरिकेले युरो २०२० का लागि स्पेनिस टिममा राख्न अस्वीकार गरिदिएका थिए । यी डिफेण्डरले स्पेनका लागि पनि १ सय ८० खेल खेलेका छन् र सन् २००८ र २०१२ को युरो तथा सन् २०१० को विश्वकप उपाधि जितेका छन् ।

काठमाडौं । राष्ट्रिय महिला भलिबल टोलीको प्रशिक्षण मंगलबारदेखि सुरु हुँदैछ । कोरोना महामारीका कारण गत जेठ २१ गतेदेखि सुरु हुनुपर्ने प्रशिक्षण स्थगन गरिएको थियो ।

प्रशिक्षणका लागि टोलीका अधिककांश खेलाडी काठमाडौँ आइसकेको नेपाल भलिबल संघका महासचिव जितेन्द्रबहादुर चन्दले जानकारी दिए । बन्द प्रशिक्षणका लागि टोलीमा परेका केही खेलाडी काठमाडौँ आउने क्रममा छन् । संघले गत चैतमा सम्पन्न एनभीए क्लब भलिबल लिगबाट ३० खेलाडी छनोट गरी प्रशिक्षणमा सहभागी गराउने निर्णय गरेको थियो ।

जेठ १४ गते बसेको संघको बैठकले जगदीशप्रसाद भट्टलाई प्रशिक्षणको जिम्मेवारी सुम्पेको हो । संघका उपाध्यक्ष निरोज मास्के, प्रशिक्षक भट्ट र प्रज्वलबहादुर सिंह सम्मिलित छनोट समितिले खेलाडी छनोट गरेको हो । आगामी भदौ १३ देखि २० गतेसम्म फिलिपिन्समा आयोजना हुने एसियन महिला भलिबल च्याम्पियनसिपका लागि बन्द प्रशिक्षण थालिएको हो ।

बन्द प्रशिक्षणका लागि नेपाली सेनाको त्रिभुवन आर्मी क्लबबाट ८, नेपाल प्रहरीको पुलिस क्लब, सशस्त्र प्रहरी बलको एपीएफ क्लब र न्यू डायमण्ड क्लबबाट ७-७ तथा भरतपुर मेट्रोबाट एउटा खेलाडी छनोटमा परेका छ ।

आर्मीबाट सुनिता खड्का, सोफिया पुन, शान्ति थारु, जानकी भण्डारी, सरस्वती जैसी, कृपा अधिकारी, संगम महतो र सृष्टि खड्का, पुलिसबाट कमला पुन, उषा भण्डारी, पुनम चन्द, कामना बिष्ट, लक्ष्मी चन्द, मनिषा चौधरी र शान्तिकला तामाङ, एपीएफबाट सरस्वती चौधरी, निरुता ठगुन्ना, हिरा केसी, उषाकुमारी बिष्ट, पुजा चौधरी, रेश्मा भण्डारी र कविता भट्ट, न्यू डायमण्ड स्पोर्ट्स क्लबबाट प्रतिभा माली, अरुणा शाही, सलिन श्रेष्ठ, वाल्मिका आचार्य, झरना श्रेष्ठ, रिया कुँवर र रिमा कुवँर तथा भरतपुरबाट सरस्वती कट्टेललाई छनोट गरिएको छ ।

यस्तै वैकल्पिक खेलाडीका रूपमा भरतपुरका आरती सुवेदी र निशा चौधरी, डायमण्डकी प्रगति नाथ, ढोरपाटनकी पुष्पा शाही र पुलिसकी पुष्पा चौधरी रहेका छन् । संघले महिला टोलीका व्यवस्थापकमा उपाध्यक्ष मास्केलाई चयन गरेको छ । टोलीको ट्रेनरको जिम्मेवारी अञ्जु श्रेष्ठले पाएकी छिन् ।

-रासस

एजेन्सी । कोपा अमेरिका अन्तर्गत समूह ए को खेलमा १० खेलाडीमा समेटिएको बोलिभियामाथि पाराग्वेले ३–१ गेलअन्तरको प्रभावशाली जितसहित विजयी सुरुआत गरेको छ ।

ब्राजिलमा जारी प्रतियोगिताको केहिबेर अघि सम्पन्न खेलमा बोलिभियाले खेलको दशौं मिनेटमै इरभिन सावेद्राको पेनाल्टी गोलमार्फत अग्रता बनाएको थियो ।

अग्रतासहित पाराग्वेलाई दवावमा राखेको बोलिभिया पहिलो हाफको अन्त्यतिर १० खेलाडीमा समेटियो । उसका स्ट्राइकर जुमी मेन्डोजा १० मिनेटको अन्तरमा दुई पहेँलो कार्ड खाँदै मैदान बाहिरिनुपरेपछि बोलिभियाको कठिन समय सुरु भयो ।

६२औं मिनेटमा अलेजान्द्रो रोमेरोले बराबरी गोल गरेको तीन मिनेटपछि एंगेल रोमेरोले पाराग्वेलाई अग्रता दिलाए । ८० औं मिनेटमा एंगेलले नै व्यक्तिगत दोस्रो गोल गर्दा पाराग्वे सहज जितसहित समूह ए को शीर्ष स्थानमा पुग्यो ।

एजेन्सी । कोपा अमेरिका अन्तर्गत चिलीसँग १–१ को बराबरीमा रोकिएको खेलमा अर्जेन्टिनी सुपरस्टार लियोनल मेस्सीले शानदार फ्रिकिक गोलमार्फत आफ्ना लिजेन्ड डिएगो म्याराडोनाको सम्मान र स्मरण गरेका छन् ।

समूह ए को सुरुआती खेलमा मेस्सीले पहिलो हाफमा उत्कृष्ट फ्रिकिक गोल गरे । ३३ औं मिनेटमा गरेको गोलले पहिलो हाफमा अर्जेन्टिनालाई अग्रता दिलाएको थियो । उनले आफ्नो अन्तर्राष्ट्रिय गोलसंख्या ७३ पुर्‍याए ।

तर दोस्रो हाफको सुरुमै इडोउरो भार्गासले बराबरी गोल फर्काए । ५७ औं मिनेटमा पेनाल्टी अवसर पाएपछि अटूरो भिडालको पेनाल्टी प्रहार अर्जेन्टिनाका गोलरक्षकले रोकिदिए । रिबाउण्ड बललाई नै भार्गासले सदुपयोग गर्न भ्याए ।

खेल सुरु हुनुअघि लाइट र इफेक्टको प्रयोगद्वारा विश्व फुटबलकै सर्वकालीन महान खेलाडी अर्जेन्टाइन डिएगो म्याराडोनाको स्मरण गरिएको थियो ।

सन् १९८६ को विश्वकप जित्दाको म्याराडोनाको प्रदर्शनको भिडियो क्लिपहरु इफेक्टमार्फत मैदानमा देखाइएको थियो । महान फुटबलर म्याराडोनाको गत नोभेम्बरमा ६० वर्षको उमेरमा निधन भएको थियो ।

महादेशीय प्रतियोगितामा अर्जेन्टिनाका लागि चिली टाउको दुखाइ बनेको धेरै भइसकेको छ । सन् २०१५ र २०१६ मा आयोजित कोपा अमेरिकाको फाइनलमा चिली नै अर्जेन्टिनाको बाधक बनेको थियो । गत सातामात्र विश्वकप छनोट अन्तर्गतको खेलमा पनि चिलीले अर्जेन्टिनालाई बराबरीमै रोकेको थियो ।

काठमाडौं । कोपा अमेरिकाको समूह ‘ए’ अन्तर्गत सोमबार राति हुने खेलमा अर्जेन्टिनाले चिलीको सामना गर्दैछ । स्टाडियो ओलिम्पिको निटोत सान्तोषमा हुने खेलमा दुवै टोली जितसहित प्रतियोगिताको सुरुआत गर्न चाहन्छन् ।

२०१५ र २०१६ मा अर्जेन्टिनालाई पराजित गर्दै दुई पटकको च्याम्पियन बनेको चिली यो संस्करणमा पनि अर्जेन्टिनालाई हराउँदै यात्रा सुरु गर्न चाहन्छ । यस्तै, चिलीविरुद्धको बदल लिँदै प्रतियोगिताको सुरुआत गर्ने लक्ष्यसहित लियोनेल मेसीको अर्जेन्टिना मैदानमा उत्रिने छ । नेपाली समयअनुसार यो खेल राति २:४५ बजे सुरु हुनेछ ।

यस्तै समूह ‘ए’ कै अर्को खेलमा पाराग्वेले बोलिभियाको सामना गर्नेछ । नेपाली समयअनुसार बिहान ५:४५ बजे हुने खेलमा दुवै टोली जितसहित प्रतियोगिताको सुरुआत गर्ने लक्ष्यमा हुनेछन् ।

काठमाडौं । कतार विश्वकप छनोट र एसियन कप छनोटका क्रममा नेपाली फुटबल टिमले कुवेत भ्रमण गरेर आइतबार साँझ स्वदेश फर्किएको छ । अघिल्ला भ्रमणभन्दा यो पटकको भ्रमण उपलब्धिमूलक रहेको टोलीका कप्तान किरण चेम्जोङले बताएका छन् । सधै रक्षात्मक रणनीति अपनाउने नेपालले यो भ्रमणमा आक्रामक खेल्न सक्छ भन्ने उदाहरण दिएको कप्तान चेम्जोङले उल्लेख गरे ।

नेपाल समूह तालिकाको चौंथो स्थानमा रहँदै कतार विश्वकप छनोट यात्रा समाप्त हुँदा २०२३ सालमा चीनमा एसियन कपको झिनो आशा प्लेअफ मात्रै बाँकी छ । तटस्थ स्थल कुवेत भ्रमण गरेको नेपालले कोरोना महामारी नेपालमा नभएको भए कुवेतमा खेलेका खेल त्रिपुरेश्वरस्थित दशरथ रंगशालामा खेल्ने थियो ।

कुवेतका प्रशिक्षक अबदुल्लाह अलमुताइरीले राष्ट्रिय टोली सम्हालेपछि नेपालको शैली विगतकोभन्दा फरक देखियो । प्रशिक्षक अलमुताइरीले नेपाली टोली बलिया टोलीसँग पनि भिड्न सक्छ भन्ने मानिसिकता थपिदिएका छन् ।

नेपाल फर्किएपछि कप्तान चेम्जोङसँग गरिएको कुराकानीः

कुवेत भ्रमण समग्रमा कस्तो रह्यो ?

कुवेतको तीनवटै खेल हेर्दा, टिमले धेरै सकारात्मक खेलेको छ । धेरै कुरा सुधारिएको छ ।

चाइनिज ताइपेइसँगको खेलमा हामीले विगतको नतिजालाई निरन्तरता दिन सक्यौं । जोर्डन र अस्ट्रेलियासँगको खेलमा भने क्रमभंग गर्ने लक्ष्य पूरा हुन सकेन । नसक्नुमा हामी कहाँ चुक्यौं ?

कुवेत जानुअघि इराक भ्रमण गरेर प्राप्त उपलब्धिले हाम्रो मनोबल बढ्यो । पहिलो खेल चाइनिज ताइपेइसँग थियो । ताइपेइको घरेलु मैदानमा खेल्न जाँदा टोली निकै बलियो थियो । दोस्रो लेगमा पनि सुखद नतिजा निकाल्न हामी पूर्णरुपमा तयार थियौं ।

तयारी राम्रो भएकाले नतिजालाई निरन्तर दिन सक्यौं । भ्रमणमा रहेका कोच र एसिस्टेन्ट कोचले हाम्रो खेललाई राम्रोसँग नियाल्नु भएको थियो । उनीहरुको खेललाई पनि । जित्नुको विकल्प हामीसँग थिएन । सोहीअनुसार कोचले दिएको निर्देशनलाई खेल अवधिभर पालाना गर्‍यौं ।

पेनाल्टीबाट अग्रता लिएसँगै खेलाडीमा हौसला मिल्यो । पछि दोस्रो गोल पनि निस्कियो । बलमा पकड जमाउँदै दबाब दिएर खेल्यौं । राम्रो खेल्यौं ।

दोस्रो खेल जोर्डनविरुद्ध उसैको मैदानमा खेलेका थियौ । टफ म्याच थियो । पहिलो खेलमा गोलको मार्जिन धेरै थियो । त्यसबेला पेनाल्टीबाट हामी पछि परेका थियो । दोस्रो लेगमा पनि सोही अवस्था भयो । नचाहँदा नचाहँदै गल्ती भयो । मानवीय त्रुटि फुटबलको पाटो हो ।

जोर्डनसँगको खेलमा पनि पुरानो गल्ती भयो । सामान्य गल्तीले खेल गुमाउन पुग्यौं । सुधारको प्रयास गरे पनि अलमलमा पर्‍यौं । जोर्डनसँगका कमजोर पक्ष केलाउँदै खेल्ने प्रयास गरे पनि सफल हुन सकेनौं । अंक खोस्ने लक्ष्यका साथ मैदानमा उत्रिएका थियौं । ३-० ले नै हार्ने सोचेका थियौं । तर खेलमा सोही नतिजा दोहोरियो ।

एसियाली पावर हावस र विश्वकपको अनुभव लिएको अस्ट्रेलियासँगको खेललाई कसरी नियाल्नु भयो त ?

अस्ट्रेलियासँग पहिलो लेग नै टप टोली र खेलाडीसँग खेल्न पाउनु हाम्रोलागि राम्रो मौका रह्यो । पहिलोभन्दा दोस्रो लेग फरक थियो । पहिलो लेगमा फिल्ड सेयर गर्न पाउनु हामीलाई उपलब्धिमूलक थियो । दोस्रो लेगमा प्रतिस्पर्धात्मक फुटबल खेल्ने लक्ष्य राखेका थियौं । सोहीअनुसार तयारी पनि गरेका थियौं ।

पहिलो हाफमै १० खेलाडीमा सिमित भए पनि समग्र टोली एक बनेर बनेर खेल्न सफल भयौं । वान म्यान डाउनमा पनि हामीले बलियो अस्ट्रेलियालाई रोक्यौं । अस्ट्रेलियासँगको खेलमा टिममेट्सले गरेको प्रदर्शनमा निकै सन्तुष्ट छु । तारिफ गर्न चाहन्छु । देशका लागि मरेर खेलेका थिए ।

आउँदा दिनमा अब एसियाका अन्य पावरहाउससँग खेल्नु पर्छ र खेल्नपाउँ भन्ने हाम्रो अपेक्षा छ । कोरिया, जापान, इरानजस्ता टोलीसँग खेल्न पाउँ । नतिजा जे होला केही फरक पर्दैन । पहिलो खेल गुमाए पनि दोस्रो खेलमा सुधारको अवसर पाउँछौं । यसरी आउँदा दिनमा बलियो टोलीसँग खेल्न पाउँदा नेपाली फुटबलको स्तर सुधारिन्छ भन्ने मेरो विश्वास छ ।

जितका लागि खेल्नुभन्दा पनि अनुभव महत्वपूर्ण हो । हार्ने आँकलन भए पनि नेपालले पनि प्रतिस्पर्धात्मक फुटबल खेल्न सक्छ भन्ने सन्देश विश्वभर जान्छ । ठूलो अन्तरले हारेको भए पनि दोस्रोपटक आमनेसामने हुने अवसर पाउँदा सुधारिएको खेल देखाएका छौं ।

अस्ट्रेलियाको प्रशिक्षकले पनि हाम्रो खेलको तारिफ गरेका छन् । अब यस्तै बलियो अस्ट्रेलियासँग आउँदा दिनमा पनि खेल्न पाए स्कोर गर्न सकिन्छ भन्ने विश्वास छ । समग्रमा अन्तिम खेल पनि राम्रो मान्छु ।

छोटो समय टोलीलाई सम्हालेका प्रशिक्षक अल्मुताइरीको रणनीति भ्रमणमा सफल भएको हो ? अनि यस्तो सम्भव कसरी भयो ?

कोचले मात्र सम्भव हुँदैन । टोलीले एकजुट भएर खेल्दा नतिजा निक्लने हो । कोचको निर्देशनले धेरै अर्थ राख्छ । नयाँ कोचले बाटो देखाउने हो ।

नेपाली टोलीलाई सम्हाल्नुभएका नयाँ प्रशिक्षक अब्दुल्लाहले सबै खेलाडीको माइन्डमा ‘वि क्यान प्ले फुटबल’ भरिदिनुभएको छ । यस्तो वातावरण सबै खेलाडीको दिमागमा राख्दिनु भएको छ । जति बलियो प्रतिद्वन्द्वी भए पनि हामीले फुटबल खेल्न सक्छौं भन्ने मानसिकता भरिदिनु भएको छ ।

उहाँको प्रेरणाले नयाँ खेलाडीमा प्रतिस्पर्धात्मक खेल खेल्न सक्छौ भन्ने मानसिकता विकास भएको छ । अन पिच, अफ पिचमा सबै खेलाडीलाई मोटिभेसन दिनु भएको छ । नयाँ खेलाडीमा फाइटिङ स्पिरिट विकास भएको छ ।

तर प्रशिक्षकको मात्र भन्दा पनि समग्र टिमको प्रदर्शन रह्यो । प्रशिक्षकको फुटबललाई एक स्टेप माथि लग्ने लक्ष्य रहेको छ । सोही अनुसार उहाँले परीक्षण गर्नु भएको छ । त्यसका लागि हामीले उहाँलाई साथ दिएका छौं । सोहीअनुसार हामीले पालना गरेका छौ ।

नेपालले एट्याकिङ फुटबल खेलेको छ । युवा र पाका खेलाडी पनि टोलीमा रहेका छन् । आउँदा दिनमा नेपाली टोलीले कुवेत भ्रमणमा गरेको प्रदर्शनलाई निरन्तरता दिन कस्तो किसिमको योजना आवश्यक छ ?

खेलाडीहरु वर्षभरि नै व्यस्त हुनु पर्‍यो । व्यस्त तालिका पनि हुनु पर्छ । शीर्ष डिभिजनका लिगहरु निरन्तर हुनु पर्‍यो । पहिलोपटक फ्रेन्चाईज फुटबल प्रतियोगिता सम्पन्न भएको छ । एनएसलले खेलाडीमा राम्रो सन्देश दिएको छ । खेलाडीलाई एनएसएल राम्रो भएको छ ।

यस्ता प्रतियोगिताले नेपाली खेलाडीलाई व्यस्त रहन र अवसर खोज्नका लागि निकै मद्दत गर्छ । लिगहरु लामो समयसम्म हुनु पर्छ । व्यावसायीक हिसाबले लिगहरु सञ्चालन हुनुपर्छ । राष्ट्रिय खेलाडीलाई अन्तर्राष्ट्रिय भ्रमण गराएर व्यस्त गराउनु पर्छ । फुटबल खेलाडीलाई फुटबलमा नै व्यस्त बनाउनु पर्छ ।

हामीभन्दा माथिल्लो र तल्लो स्तरका देशहरुसँग बारम्बार मैत्रिपूर्ण खेल धेरैभन्दा धेरै मिलाएर खेलाडीलाई धेरै अनुभव दिनु पर्छ । सबैभन्दा ठूलो कुरा खेलाडीलाई व्यस्त राख्नु पर्छ । खेलाडीलाई फुर्सद हुने किसिमको वातारण भन्दा पनि व्यस्त बनाउँदै फुटबल मात्र सोच्न वातावरण जरुरी छ । यसले गर्दा नेपाली फुटबलको नतिजा राम्रो हुन्छ । खेलाडीका लागि पनि यस्ता योजनाले हौसला मिल्छ । ठूलो टोलीसँगको पटक-पटक खेल्न पायौं भने अवश्य नै हामीले सुधारिएको खेल देखाउन सक्छौं । कमी-कमजोरीहरुलाई नियाल्न सक्छौ ।

नेपालको तुलनामा विदेशतिर लामो समयसम्म लिग सञ्चालन हुन्छ । एन्फा र नेपाल सरकारले खेलाडीलाई व्यस्त बनाइराख्ने तालिका बनाउनु पर्छ । बलियो टोलीसँग पटक-पटक मैत्रिपूर्ण खेल खेल्दै कमी कमजोरी सुधार्दै समग्र खेल सुधारको बाटो अंगाल्न सकिन्छ ।

काठमाडौं । साउथ एसिया च्याम्पियनशिप पब्जी मोबाइल प्रो लिगमा ‘द रियल सोल्जर्स’ (डीआरएस) गेमिङ्गले १८ हजार अमेरिकी डलर पुरस्कार प्राप्त गरेको छ ।

डीआरएसले पब्जी मोबाइल प्रो लिग (पीएमपीएल) मा तेस्रो स्थान हात पार्दै १८ हजार अमेरिकी डलर अर्थात करिब २१ लाख राशीको पुरस्कार प्राप्त गरेको हाे ।

कोरोना महामारीका कारण यस वर्षको साउथ एसिया च्याम्पियनशिप पब्जी मोबाइल प्रो लिग भर्चुअल माध्यमबाटै आयोजना गरिएको थियो ।
प्रतिस्पर्धामा डीआरएसले ८८ किलसहित कुल २२३ अंक हात पारेको थियो ।

लिगमा प्रथम स्थान हासिल गरेको मंगोलियन स्क्वाड अस्त्र एकेडेमी (२ए) ले ट्रफीसँगै ४०,००० अमेरिकी डलर अर्थात ४६ लाख ६५ हजार रुपैयाँ नगद पुरस्कार प्राप्त गरेको छ ।

लिगमा प्रथम स्थान हासिल गरेको मंगोलियन स्क्वाड अस्त्र एकेडेमी (२ए) ले ट्रफीसँगै ४०,००० अमेरिकी डलर अर्थात ४६ लाख ६५ हजार रुपैयाँ र दोस्रो स्थानमा रहेको ज्युजले २८ हजार अमेरिकी डलर अर्थात ३२ लाख ६५ हजार रुपैयाँ नगद पुरस्कार प्राप्त गरेको छ।

टिममा हाल युगेन लामा (माफिया निन्जा), अजय श्रेष्ठ (एजें), निमा तामाङ् (निमा), पेम्बा ग्याल्जेन लामा (ग्याल्जेन), अञ्जन राई (एमआरबोरो) रहेका छन् । टोलीको व्यवस्थापकको भूमिकामा सङ्गीन भट्टराई रहेका छन्।

पछिल्लो समय ठुला प्रतियोगिताहरुमा पहिलो ,दोस्रो र तेस्रो स्थान हासिल गर्दै आईरहेको डीआरएस गेमिङ्गको प्रदर्शन हेरेर अन्य प्रतियोगिताहरुको समेत निमन्त्रणा आइरहेको डीआरएस गेमिङ्गका प्रमुख कार्यकारी अधिकृत भिक्टर पौडेलले बताए ।

एजेन्सी । दक्षिण अमेरिकी महादेशीय फुटब प्रतियोगिता कोपा अमेरिकाको आफ्नो पहिलो खेलमा कोलम्बियाले इक्वेडरलाई पराजित गरेको छ ।

केहिबेरअघि सम्पन्न खेलमा कोलम्बियाले पहिलो हाफमा गरेको गोल नै निर्णायक बन्यो । कमजोर इक्वेडरमाथि पहिलो हाफको अन्त्यतिर इडविन कार्डोनाले गोल गरेका थिए ।

अर्जेन्टिनी क्लब बोका जुनियर्सका २८ वर्षीय मिडफिल्डर कार्डोनाले मिगुल बोर्जाको पास सदुपयोग गरेका हुन् ।

एक जितसँगै समूह ए बाट कोलम्बिया र ब्राजिल क्वाटरफाइनलमा पुग्ने सम्भावना प्रवल छ । १० टोली रहेको कोपा अमेरिकामा दुई समूहबाट चार/चार टोलीले क्वाटरफाइनलमा स्थान बनाउँछन् ।

एजेन्सी । कोरोना प्रभावित भेनेजुएलामागि ३–० गोलअन्तरको सहज जितसँगै आयोजक राष्ट्र ब्राजिलले कोपा अमेरिकामा विजयी सुरुआत गरेको छ ।

समूह बी अन्तर्गतको उद्घाटन खेलको एक दिनअघि भेनेजुएलाका खेलाडी र अफिसियल गरी १२ जनामा कोरोना संक्रमण देखिएको थियो ।

सुपरस्टार स्ट्राइकर नेइमारले एक गोल र अर्को गोलका लागि सहयोग गरेपछि ब्राजिलले सहज जित भेट्टाएको हो ।

पेरिस सेन्ट जर्मेइन (पीएसजी)का स्टार नेइमारले दोस्रो हाफमा पेनाल्टीमार्फत गोल गरेका थिए भने खेलको अन्तिम मिनेटमा गाव्रियल बार्बोसाको गोलका लागि बल उपलब्ध गराएका थिए ।

त्यसअघि खेल सुरु भएको २३ औं मिनेटमै घरेलु टोली ब्राजिलले अग्रता बनाएको थियो । पीएसजीकै डिफेण्डर माक्र्वीनोस बोन्डलेडले गोल गरेका हुन् । भेनेजुएलाले क्लियर गर्न नसकेको कर्नरलाई उनले सदुपयोग गरेका हुन् ।

ब्राजिलले पहिलो हाफमै गोलका अन्य दुई अवसर खेर फालेको थियो । एभर्टनका स्ट्राइकर रिचर्डलिसनले गरेको गोल भिडियो असिस्टेन्ट रेफ्रीले मान्यता दिएन भने नेइमारले क्लोज रेन्जबाट गोलको एउटा उत्कृष्ट अवसर खेर फाले ।

भेनेजुएलाका योहान क्युमानाले ड्यानिलोलाई फल गरेपछि पाएको पेनाल्टी उपयोग गर्दै नेइमारले आफ्नो अन्तर्राष्ट्रिय गोलसंख्या ६७ पु¥याएका छन् । उनी पेलेको ७७ गोलको कीर्तिमान नजिक पुगेका छन् ।

४७ औं संस्करणको कोपा अमेरिका कोरोना महामारीका कारण १ वर्ष ढिलामात्र भएन पूर्व निर्धारित आयोजक कोलम्बिया र अर्जेन्टिना भए पनि उनीहरुले हात उठाएपछि अन्तिम समयमा ब्राजिल सारिएको हो ।

काठमाडौं । विश्व नम्बर एक नोभाक जोकोभिचले करियरको १९औं ग्रान्डस्लाम जितेका छन् । आइतबार भएको फ्रेन्च ओपनको फाइनलमा ग्रीक खेलाडी स्टेफानो सित्सिपसलाई ६-७ (६-८), २-६, ६-३, ६-२, ६-४ को नतिजामा पराजित गरेसँगै ३४ वर्षीय जोकोभिचले करियरको १९औं ग्रान्डस्लाम उपाधि सुनिश्चित गरेका हुन् ।

सेमिफाइनलमा १३ पटकका च्याम्पियन राफेल नाडाललाई पराजित गरेका जोकोभिच दोस्रो पटक रोलान्ड गारोस च्याम्पियन बनेका हुन् ।

यसअघि उनले २०१६ मा पहिलो पटक फ्रेन्च ओपनको उपाधि उचालेका थिए । जोकोभिचले २ पटक फ्रेन्च ओपन, ९ पटक अस्ट्रेलियन ओपन, ५ पटक विम्बल्डन र २ पटक युएस ओपन जितेका छन् ।

काठमाडौं । कोपा अमेरिकाका लागि ब्राजिल पुगेका भेनेजुएलाका १२ जना खेलाडी तथा अफिसियललाई कोरोना भाइरसको संक्रमण पुष्टि भएको छ । आइतबार आयोजक ब्राजिलले दिएको जानकारीअनुसार १२ जनामा संक्रमण पुष्टि भएको हो ।

भेनेजुएलाले आज राति २: ४५ बजे आयोजक ब्राजिलसँग उद्घाटन खेल खेल्ने तालिका छ । ब्रासिलियाका स्वास्थ्य सेक्रेटरीले जारी गरेको वक्तव्यमा ‘भेनेजुएलाका ब्याकरूम स्टाफ, खेलाडी र सदस्य गरी १२ जनामा कोरोना संक्रमण पुष्टि भएको’ बताएको छ ।

भेनेजुएलाको टोली शुक्रबार राति ब्राजिल आइपुगेसँगै दक्षिण अमेरिकी फुटबल महासंघले उनीहरूको परीक्षण गरेको थियो ।

काठमाडौं । आइतबार रातिदेखि कोपा अमेरिकाको २७औं संस्करण सुरु हुँदैछ । कोलम्बिया-अर्जेन्टिना-अर्जेन्टिना हुँदै ब्राजिल पुगेको कोपा अमेरिका २०२१ को पहिलो खेलमा घरेलु टोलीले उत्तरी छिमेकी मुलुक भेनेजुएलाको सामना गर्नेछ ।

सन् २०१९ मा १२ वर्षपछि नवौं पटक च्याम्पियन बनेको ब्राजिल आजको खेलमा जित हासिल गर्दै उपाधि रक्षा अभियान सुरु गर्नेछ । दक्षिण अमेरिकी फुटबलमा पछिल्लो साता अचम्मको कुरा त के भयो भने: दक्षिण अमेरिकी फुटबल महासंघले अन्तिम क्षणमा ब्राजिललाई आयोजनाको जिम्मेवारी दियो । कोलम्बियामा आन्दोलन चर्किने र अर्जेन्टिनामा कोरोना भाइरसको संक्रमण ह्वात्तै बढेपछि त्यहाँ नहुने निश्चित भएको थियो ।

परिणाम स्वरूप ब्राजिल पुगेको कोपा अमेरिकाको विरुद्धमा नेइमार र क्यासिमिरोले खुलेर आलोचना गरेका थिए । कोरोना भाइरसको महामारी बेला फुटबल प्रतियोगिताको आयोजना भन्दा प्राथमिकताको विषय स्वास्थ्य हुनुपर्ने बताएका थिए । तर, यी विभिन्न परिस्थितिका बाबजुद पनि आज राति देखि प्रतियोगिताको सुरुआत हुँदैछ ।

पछिल्ला ६ खेलको नतिजा हेर्ने हो भने ब्राजिलले सतप्रतिशत जित निकालेको छ । अर्का तिर भेनेजुएलालले ४ खेलमा हार र एक जित-एक बराबरीको नतिजा निकालेको छ । 11vs11 को डेटाअनुसार ब्राजिलविरुद्ध भने २२ पटक खेलेको भेनेजुएलाले ३ खेलमा बराबरी र २ खेलमा जित निकालेको छ । ब्राजिलले भने १७ खेलमा जित हासिल गरेको छ ।

भेनेजुएलाले २००८ मा भएको मैत्रीपूर्ण खेलमा ब्राजिलविरुद्ध अन्तिम पटक २-० को जित निकालेको थियो । त्यस्तै २०१२ को कोपा अमेरिकामा भने गोलरहित बराबरी खेलेको थियो । यी दुई टोलीबीच २०२० मा भएको विश्वकप छनोटमा ब्राजिलले १-० को जित निकालेको थियो ।

उत्कृष्ट फर्ममा रहेको ब्राजिलविरुद्ध आज अंक हासिल गर्नु भेनेजुएलाका लागि निकै कठिने हुने निश्चित छ ।

काठमाडौं । दुई वर्षअघि कोपा अमेरिकाको तयारी गरिरहँदाभन्दा अहिले ब्राजिलका प्रशिक्षक टिटेको जागिर सुरक्षित छ । घरेलु मैदानमा भएको कोपा अमेरिका जिताएका टिटेले ब्राजिलियन फ्यानले खेपेको १२ वर्षे उपाधि खडेरीमा पूर्णविराम लगाइदिए र सेलिब्रेसनको मौका दिए ।

आज रातिदेखि घुमिफिरी फेरि ब्राजिल आइपुगेको कोपा अमेरिकाको ४७औं संस्करण सुरु हुँदैछ । अहिलेसम्म ९ पटक च्याम्पियन बनिसकेको ब्राजिल यसपटक पनि बाजी मार्दै उपाधि घरैमा राख्ने योजनमा छ । र, ब्राजिलको उपाधि रक्षा यात्रा आज राति २:४५ बजे हुने भेनेजुएलाविरुद्धको खेलबाट सुरु हुनेछ ।

यसपटकको कोपा अमेरिका कोलम्बिया र अर्जेन्टिनामा हुने तय भएको थियो । तर, कोलम्बियामा आन्दोलन चर्किँदै गएपछि अर्जेन्टिनामा हुने भनिएको थियो ।

त्यहाँ पनि कोरोना भाइरसको संक्रमण ह्वात्तै बढेपछि अन्तिम अवस्थामा आएर प्रतियोगिता हुने कि नहुने नै अन्योल सिर्जना भएको थियो । तर, दक्षिण अमेरिकी फुटबल महास‌ंघले ब्राजिलमा गर्ने निर्णय गरेसँगै प्रतियोगिता आज रातिबाट सुरु हुँदैछ ।

यद्यपि, ब्राजिल भने यी दुवै समस्याबाट गुज्रिरहेको देश हो । ब्राजिलमा हालसम्म कोरोना भाइरसको संक्रमणबाट ४ लाख ८० हजार जनाले ज्यान गुमाइसकेका छन् । करिब सोही संख्यामा अन्य मानिसहरू महामारीमा उचित तरिकाले नेतृत्व गर्न राष्ट्रपति जेर बोल्सोनारो असफल भएको विरोध गर्न सडकमा उत्रिएका छन् ।

टिटे र उनका खेलाडीहरू कोपा अमेरिका ब्राजिलमा सरेकोमा सन्तुष्ट छैनन् । कप्तान क्यासिमिरो तथा नेइमारले देशमा स्वास्थ्य संकट आइपरेका बेला प्रतियोगिता आयोजना हुनु सान्दर्भिक नहुने प्रतिक्रिया दिएका थिए ।

काठमाडौं । ग्रीक खेलाडी स्टेफानो सित्सिपस वर्षको दोस्रो ग्रान्डस्लाम- फ्रेन्च ओपन टेनिसको फाइनलमा प्रवेश गरेका छन् । शुक्रबार भएको सेमिफाइनलमा जर्मनीका अलेकजेन्डर जेर्रेभलाई ३-६, ३-६, ६-४, ६-४, ३-६ को नतिजामा पराजित गर्दै २२ वर्षीय सित्सिपस फाइनलमा पुगेका हुन् ।

उनले शुक्रबार राति नै हुने दोस्रो सेमिफाइनलमा राफेल नाडाल र नोभाक जोकोभिचबीचको विजेतासँग उपाधिका लागि प्रतिस्पर्धा गर्नेछन् ।

क्वार्टरफाइनलमा रुसी खेलाडी ड्यानियल मेड्भेडेभलाई पराजित गरेका सित्सिपसले ग्रान्डस्लाम टेनिसमा पहिलो पटक फाइनल यात्रा तय गरेका हुन् । विश्व बरियताको पाँचौं स्थानमा रहेका सित्सिपस गत वर्ष रोलान्ड गारोसको सेमिफाइनलबाट बाहिरिएका थिए ।

उनले फाइनलमा तत्कालीन टेनिसका दुईमध्ये एक बादशाहको सामना गर्नुपर्नेछ ।

काठमाडौं । विश्वकप तथा एएफसी एसियन कपको संयुक्त छनोटमा अस्ट्रेलियाविरुद्ध पराजित नेपाली राष्ट्रिय टोलीका मुख्य प्रशिक्षक अब्दुल्लाह अलेमुताइरीले आफ्नो टोलीले डर बिना खेलेको बताएका छन् ।

यसअघिका ६ खेलमा सतप्रतिशत नजतिा निकालेको अस्ट्रेलियाविरुद्ध नेपाल ३-० ले पराजित भएको थियो । फिफा बरियतामा आफूभन्दा १३० स्थानमाथिको अस्ट्रेलियाविरुद्ध पहिलो हाफको अन्त्यमा १० जना खेलाडीमा सीमित भएको नेपालले दोस्रो हाफमा राम्रो प्रदर्शन गरेको थियो ।

३८औं मिनेटमा २-० ले पछि परेको नेपालले दोसरो हाफमा एक गोल मात्र खाएको थियो । आफूभन्दा धेरै माथिल्लो स्तरको अस्ट्रेलियासँग आधा समय १० जनामा सीमित भएर पनि धेरै गोल नखाएको नेपाली टोलीको प्रदर्शनसँग खुशी रहेको प्रतिक्रिया दिँदै प्रशिक्षक अब्दुल्लाहले खेलाडीलाई हिरो भएको बताए ।

‘आजको खेल धेरै कठिन थियो, र मेरा खेलाडीहरूले एकदमै राम्रो खेले, म उनीहरूलाई धन्यवाद दिन्छु,’ उनले भने, ‘पहिलो हाफको सुरुआतमै गोल खाए पनि खेलाडीले हार्डवर्कलाई निरन्तरता दिए ।’

नेपालले डिफेन्सिभ नभइ मिडफिल्डमा पकड बनाउने रणनीतिसहित आजको खेल खेलेको बताए । आक्रमणका लागि प्रयास गरे पनि अस्ट्रेलियन खेलाडीको शारिरीक बनोट बाधक बनेको उनको भनाइ थियो ।

यस्तै अस्ट्रेलियाका प्रशिक्षक ग्रहाम आर्नोल्डले नेपालले ९० मिनेटसम्म खेलमा फाइट गरेको प्रतिक्रिया दिए ।

‘हामी नेपालको सम्मान गर्छौं, आज नेपालले ९० मिनेटसम्म फाइट गर्‍यो,’ उनले भने, ‘नेपालमा धेरै युवा खेलाडी छन् र राम्रो खेल शैली पनि देखियो ।’

काठमाडौं । विश्वकप तथा एसियन कपको छनोटको अन्तिम खेलमा नेपालले हेभिवेट अस्ट्रेलियाविरुद्ध ३-० को हार बेहोरेको छ । कोरोना भाइरसका कारण सेन्ट्रल भेन्यू कुवेतमा भएको खेलको दोस्रो हाफमा नेपालले १० जनामा सीमित भएर खेलेको थियो ।

कुवेतको जाबेर अल-अहमद रंगशालामा छैठौं मिनेटमा नेपालले पहिलो गोल खाएको थियो । अस्ट्रेलियाका म्याथ्यु लेकीले गोल गर्दै नेपालविरुद्ध अग्रता दिलाएका थिए ।

पहिलो हाफको खेलसकिन ७ मिनेट बाँकी रहँदा फ्रान काराचिचले पुन: गोल गर्दै अस्ट्रेलियाको अग्रता दोब्बर पारे । विपक्षी खेलाडीलाई गोल गर्ने स्पष्ट मौकामा फाउल गरेसँगै अनुभवी डिफेन्डर रोहित चन्द पहिलो हाफको इन्जुरी समयमा रातो कार्डको सामना गर्दै मैदानबाट बाहिरिए ।

आफूभन्दा १३० स्थान माथि रहेको टोली अस्ट्रेलियाविरुद्ध नेपालले १० जनामा सीमित भएर पनि पछिल्लो ४५ मिनेट राम्रो डिफेन्सिभ खेल प्रस्तुत गर्‍यो ।

अस्ट्रेलियाले गरेको लगातार प्रहारमा नेपालका कप्तान तथा गोलकिपर किरण चेम्जोङले धेरै गोल बचाएका थिए । नेपालका लागि पहिलो पटक टोलीमा समावेश भएका आयुष घलान, सुरज जेउ ठकुरी र कमल थापाले डेब्यु गरे ।

काठमाडौं । विश्वकप तथा एसियन कपको छनोटअन्तर्गत कुवेतमा जारी अस्ट्रेलियाविरुद्धको खेलमा नेपालले पहिलो हाफमा २ गोल खाएको छ ।

कुवेतको जाबेर अल-अहमद रंगशालामा जारी खेलको छैठौं मिनेटमा नेपालले पहिलो गोल खाएको थियो । अस्ट्रेलियाका म्याथ्यु लेकीले गोल गर्दै नेपालविरुद्ध अग्रता दिलाएका थिए ।

पहिलो हाफको खेलसकिन ७ मिनेट बाँकी रहँदा फ्रान काराचिचले पुन: गोल गर्दै अस्ट्रेलियाको अग्रता दोब्बर पारे । विपक्षी खेलाडीलाई गोल गर्ने स्पष्ट मौकामा फाउल गरेसँगै अनुभवी डिफेन्डर रोहित चन्द पहिलो हाफको इन्जुरी समयमा रातो कार्डको सामना गर्दै मैदानबाट बाहिरिएका छन् ।

आफूभन्दा १३० स्थान माथि रहेको टोली अस्ट्रेलियाविरुद्ध नेपालले बाँकी ४५ मिनेट १० जनामा सीमित भएर खेल्नु पर्नेछ ।

काठमाडौं । पछिल्लो २४ घण्टामा मुलुकमा ३,७५० जना कोभिड बिरामी थपिएका हुन् । ९,५९८ नमुना पीसीआर र ५,५८४ एन्टीजेन परीक्षण गर्दा शुक्रबार ती संक्रमित थपिएका हुन् ।

पछिल्लो २४ घण्टामा ६७ जनाको मृत्यु भएको छ । मृत्यु हुने दर १.६ प्रतिशत छ । कूल मृत्यु संख्या ८,३०५ पुगेको छ ।

थप ५,२२५ जना निको भएका छन् । निको हुने दर ८६.२ प्रतिशत छ । ५ लाख २० हजार ८१६ जना कूल निको भएका छन् ।

सक्रिय संक्रमित संख्या ७५ हजार २७५ छ । सक्रिय संक्रमित दर १२.४५ प्रतिशत छ ।

काठमाडौं । विश्वकप तथा एसियन कप छनोट अन्तर्गत दोस्रो चरणको आफ्नो अन्तिम खेलमा आज नेपालले एसियाली पावरहाउस अस्ट्रेलियाको सामना गर्दैछ ।

पाँचपल्ट विश्वकप खेलिरहेको अस्ट्रेलियाका लागि आजको खेल जितेसँगै समूहको शीर्ष स्थानमा रहेर विश्वकप छनोटको तेस्रो चरणमा स्थान सुरक्षित हुनेछ ।

फिफा वरियतामा ४१ नम्बरमा रहेको अस्ट्रेलिया नै नेपालले अहिलेसम्म सामना गरेको बरियताका आधारमा सबैभन्दा ठूलो टोली हो । यसअघि २०१९ को अक्टोबर १० मा खेलिएको पहिलो लेगमा नेपाल ५–० ले पराजित रहेको थियो ।

कुवेतको जावेर अल हमाद अनतर्राष्ट्रिय रंगशालामा यो खेल नेपाली समयअनुसार राती पौने १० बजेदेखि सुरु हुनेछ ।

दुई सातादेखि मध्यपूर्वमा रहेको नेपालले इराकसँग मैत्रीपूर्ण खेल खेलेको थियो भने विश्वकप छनोट अन्तर्गत नै चाइनिज ताइपेईसँग र जोर्डनसँग खेलिसकेको छ । सबैकुरा सामान्य भइदिएको भए यी तीनै खेल नेपालले आफ्नै मैदानमा खेल्न पाउने थियो ।

खेलअघिको पत्रकार सम्मेलनमा नेपाली प्रशिक्षक अब्दुल्लाह अल्मुताइरीले नेपालले आफ्नो खेल्ने शैली परिवर्तन गरेको र यसले समर्थकलाई खुसी दिएको बताएका थिए । ‘म अस्ट्रेलियासँग नेपाल टिमको अर्को एउटा सकारात्मक प्रदर्शनको आशा गर्छु । हाम्रो खेल्ने शैली सुधारिएको छ र यसले हाम्रा समर्थकलाई खुसी दिएको छ,’ उनले भने।

कुवेतका प्रो लाइसेन्सधारी प्रशिक्षक अल्मुताइरीले आफ्नो टिममा रहेका डेब्यू गर्न बाँकी युवा खेलाडीलाई अस्ट्रेलियासँगको खेलमा अवसर दिने संकेतसमेत गरेका छन् । ‘मलाई थाहा छ अस्ट्रेलियासँगको खेल कठिन हुनेछ तर उनीहरुले खेल्न पाउनु पनि त्यत्तिकै महत्वपूर्ण रहनेछ,’ अल्मुताइरीले भने । नेपाली टोलीमा परेर कुवेत उडेका गोलरक्षकबाहेक सुरज ज्यू ठकुरी, आयुश घलान र कमल थापाले डेब्यू गर्न बाँकी छ ।

अस्ट्रेलियाका मुख्य प्रशिक्षक ग्राहम आर्नोल्डले नेपाली टोली मिहिनेती भएको र उनीहरुसँग खेल्न उत्साहित रहेको प्रतिक्रिया दिए । ‘उनीहरु फरक शैलीमा खेल्छन् । उनीहरुका प्रशिक्षकले राम्रो काम गरिरहेका छन् । हामी नेपाली टिमको सम्मान गर्छौं, उनीहरु मिहिनेती छन्,’ आर्नोल्डले पत्रकार सम्मेलनमा भने ।

काठमाडौं । विश्वकप २०२२ तथा एएफसी एसियन कप २०२३ को संयुक्त छनोटमा शुक्रबार नेपालले अस्ट्रेलियाको सामना गर्दैछ । समूह ‘बी’ मा यसअघिका सबै खेलमा सतप्रतिशत जित निकालेको अस्ट्रेलियाविरुद्ध नेपालको कठिन परीक्षा निश्चित छ ।

कोरोना भाइरसका कारण प्रभावित बनेको छनोटका खेलहरू अहिले सेन्ट्रल भेन्यू कुवेतको जाबेर अल-अहमद रंगशालामा भइरहेका छन् । जसअनुसार नेपालले भोलि नेपाली समयअनुसार ९:४५ बजे फिफा बरियताको ४१औं स्थानको अस्ट्रेलियाको सामना गर्दैछ ।

यसअघिको खेलमा नेपाल जोर्डनसँग ३-० को नतिजामा पराजित भएको थियो भने अस्ट्रेलियाले चाइनिज ताइपेइविरुद्ध ५-१ को शानदार जित हासिल गरेको थियो । उत्कृष्ट फर्ममा रहेको र विश्वकप खेलिसकेको अस्ट्रेलियाविरुद्ध फिफा बरियताको १७१औं स्थानमा भएको नेपालले नतिजा भन्दा पनि प्रदर्शनका लागि खेल्ने प्रशिक्षक अब्दुल्लाह अल्मुताइरी बताउँछन् ।

संयुक्त छनोटको अन्तिम खेलअघिको पत्रकार सम्मेलनमा नेपाली राष्ट्रिय टोलीका मुख्य प्रशिक्षक अल्मुताइरीले नेपालले नतिजाभन्दा पनि राम्रो फुटबल खेल्ने आफ्नो टोलीको लक्ष्य हुने बताए ।

‘नतिजाभन्दा पनि राम्रो खेल खेल्ने नेपालको लक्ष्य छ,’ उनले भने, ‘नेपालले पहिले लामो पासकमा फुटबल खेल्थ्यो, अहिले त्यसमा परिवर्तन भएको छ । हामीले शैलीमा फेरबदल गरेका थियौं, त्यो प्रदर्शनमा देखिँदैछ ।’

खेलमा नतिजा पनि महत्त्वपूर्ण हुने बताउँदै प्रशिक्षक अल्मुताइरीले नेपाली समर्थकलाई खुशी पार्न सकेको र आगामी दिनमा अझै सकारात्मक नतिजा ल्याउनेछौं
।

यसअघि जोर्डनविरुद्धको खेलमा रेफ्रीको निर्णय चित्तबुझ्दो नभएको बताउँदै अब्दुल्लाहले भने, ‘गोलरक्षकलाई रातो कार्ड दिएको भए सायद खेलको नतिजा पनि परिवर्तन हुन सक्थ्यो ।’

केही समयअघि प्रशिक्षक अल्मुताइरीले युरोपेली फुटबलबाट प्रेरित भएको संकेत दिँदै दी वर्ल्ड गेमसँग भनेका थिए- ‘यदि नर्थ मेसिडोनियाले जर्मनीलाई हराउन सक्छ भने नेपालले पनि अस्ट्रेलियामाथि आक्रामण गर्न सक्छ ।

नेपालको विश्वकप छनोटको तेस्रो चरण पुग्ने सम्भावना समाप्त भइसकेको छ भने एसियनकपको आशा बाँकी छ । भोलिको खेलमा पराजित भए नेपालले प्लेअफ खेल्नुपर्नेछ ।

नेपालले पहिलो लेगमा २०१९ मा अस्ट्रेलियासँग क्यानेरामा ५-० को पराजय बेहोरेको थियो । उक्त खेलमा अस्ट्रेलियाका लागि जेमी म्याक्लारेनले ह्याट्रिक तथा ह्यारी साउटरले १ गोल गरेका थिए । एक गोल नेपालकै खेलाडी दिनेश राजवंशीले आत्मघाति गोल गरेका थिए ।

एजेन्सी । विश्व नम्बर एक नोभाक जोकोभिचले इटलीका माट्टेको बोरेट्टिनीलाई पराजित गरी वर्षको दोस्रो ग्राण्डस्लाम टेनिस फ्रेन्च ओपनको सेमिफानलमा रफायल नाडालसँगको भेट पक्का गरेका छन् । पेरिसमा रातको ११ बजेदेखि कर्फ्यू सुरु हुने भएकाले समर्थकले यो खेल पूरा हेर्न पाएनन् ।

बर्सियाली जोकोभिचले सुरुआती दुई सेट सजिलै जितेका थिए । रात्रीकालीन खेलमा ५ हजार समर्थक राख्ने अनुमति भएअनुसार उपस्थित समर्थकहरुले खेलको नतिजा हेर्न पाउने अनुमान थियो । तर तेस्रो सेट बेरेट्टिनीले टाइब्रेकमा जित्न सफल भए, जुन ७४ मिनेटसम्म चलेको थियो ।

पुनरागमनका साथ जोकोभिचले ६–३, ६–२, ६–७ र ७–५ को सेटमा खेल जिते । सुरुआती चरणमा निकै भिड देखिए पनि खेलको अन्तिम सेट एकदमै शान्त र सन्नाटाका बीच खेलिएको थियो ।

यो जितपछि जोकोभिचले सेमिफाइनलमा आफ्नो पुरानो प्रतिस्पर्धीको सामना गर्नुपर्नेछ । तेस्रो वरियताका स्पेनिस सुपरस्टार नाडाल पनि सेमिफनइनलमा पुगेका छन् र कीर्तिमान विस्तार गर्ने गरी १४ औंपल्ट फ्रेन्च ओपनको उपाधि लक्ष्यमा छन् ।

यी दुईले आफ्नो करिअरमा ५८औंल्ट आपसमा भिड्दैछन् । यो खेलको विजेताले पाँचौं वरियताका ग्रिक खेलाडी स्टेफानोस सितसिपास र छैटौं वरियताका जर्मन खेलाडी अलेक्जान्दर भेरेभबीच हुने खेलको विजेतासँग उपाधिका लागि प्रतिस्पर्धा गर्नेछ ।