Category: खेल प्रेस

काठमाडौं । सन् १९९२ देखि ओलम्पिक गेम्समा यु-२३ फुटबल टोलीले खेल्न थालेको हो । जुनसुकै टोलीमा पनि बढीमा तीन जना खेलाडी मात्रै २३ वर्षभन्दा माथिका समावेश गर्न पाइने नियम छ ।

ओलम्पिक फुटबलको इतिहासका सर्वाधिक सफल टोली- हंगेरी र संयुक्त अधिराज्य हुन् । ओलम्पिकको पुरुष फुटबलतर्फ दुवै देशले तीन/तीन पटक स्वर्ण जितेका छन् । हंगेरीले दुई रजत र एक कास्यसमेत जितेको छ ।

विश्व फुटबलको ‘ट्र्याडिसनल जायन्ट’ अर्जेन्टिनाले पनि दुई पटक स्वर्ण पदक जितेको छ । अर्जेन्टिनाको चरम प्रतिद्वन्दी तथा पाँच पटकको विश्वकप विजेता ब्राजिलले एक पटक मात्र (२०१६)मा स्वर्ण पदक जितेको छ ।

डेनमार्कका सोफुस नेलसन र हंगेरीका अन्तल दुनाई ओलम्पिकमा पुरुष फुटबलका सर्वकालीन सर्वाधिक गोलकर्ता हुन् । यी दुवै खेलाडीले आफ्नो देशको प्रतिनिधित्व गर्दै ओलम्पिकमा १३/१३ गोल गरेका छन् ।

अर्जेन्टिनाका कार्लोस टेभेज र ब्राजिलका बेबेटोले समान ८ गोल गरेका छन् । यस्तै, दक्षिण अमेरिकी सुपर पावर- ब्राजिलकै नेइमार र रोमारियोले ७/७ गोल गरेका छन् ।

ओलम्पिकको इतिहासकै सबैभन्दा छिटो गोल भने नेइमारको नाममा छ । २०१६ मा घरेलु मैदानमा भएको रियो ओलम्पिकमा ब्राजिलले स्वर्ण जित्दा नेइमारले होन्डुरसविरुद्ध १६ सेकेन्डमै गोल गरेका थिए ।

१६ सेकेन्डमै नेइमारको कीर्तिमानी गोलसँगै अग्रता लिएको ब्राजिलले त्यो खेलमा ६-० को सहज जित निकालेको थियो ।

ओलम्पिकमा पुरुष फुटबलतर्फ सर्वाधिक गोलकर्ताको सूची यस्तो छ:

एजेन्सी । ३२ औं ग्रिष्मकालीन ओलम्पिकमा छैटौं दिनको समाप्तीसम्म पदक तालिकामा चीनको अग्रता भएको छ । सुरुआती अग्रतापछि जापान अगाडी आए पनि विहीबार चीनले ३ स्वर्ण थप्दा जापानले २ स्वर्णमात्र जित्यो ।

पछिल्लो पदकतालिका अनुसार चीन र जापानको समान १५ स्वर्ण भए पनि चीनको ४ रजत र १० कांस्य छ भने जापानले ४ रजत र ६ कांस्य जितेको छ । तेस्रो स्थानमा रहेको अमेरिकाले १४ स्वर्ण, १४ रजत र १० कांस्य जितेको छ । पदकको हिसावमा अमेरिका अगाडि छ ।

यी बाहेक रुश ओलम्पिक कमिटी र अस्ट्रेलियाले ८–८ स्वर्ण जितेका छन् । संयुक्त अधिराज्यले ५ र दक्षिण कोरियालले ४ तथा फ्रान्स, जर्मनी र क्यानडाले ३–३ स्वर्ण जितेका छन् । सात राष्ट्रले २–२ स्वर्ण जितेको छ भने २३ देशले एक एक स्वर्ण जितेका छन् । अहिलेसम्म १ सय १५ स्वर्ण पदकको छिनोफानो भएको छ ।

यसैगरी ओलम्पिकमा आज शुक्रबार १३ खेलका २१ स्पर्धाको फाइनल हुँदैछ । आर्चरीको महिला एकल, एथलेटिक्सको पुरुष १० हजार मिटर, ब्याडमिन्टनको मिक्स्ड डवल्स, क्यानोई स्लालोमको पुरुष टिम, साइक्लिङको महिला र पुरुष बीएमएक्स रेसिङ, फेन्सिङको पुरुष टिम ईपी तथा जुडोको महिला ७८ केजीमाथि र पुरुष १ सय केजीमाथि स्पर्धाको फाइनल हुँदैछ ।

त्यस्तै रोइङको महिला र पुरुष एकल, महिला र पुरुषको आठजनाको टिमबीचको फाइनल हुनेछ । शुटिङमा महिलातर्फ २५ मिटर पेस्तोल, पौडीको महिला २ सय मिटर ब्रेष्टस्ट्रोक, पुरुष २ सय मिटर ब्याकस्ट्रोक, महिला १ सय मिटर फ्रिस्टाइल र पुरुष २ सय मिटर मिड्लेको फाइनल खेल हुनेछ । टेवलटेनिसमा पुरुष एकल, टेनिसमा पुरुष युगल र ट्राम्पोललाईनमा महिलातर्फको फाइनल खेल आज हुनेछ ।

काठमाडाैं । टोकियो ओलम्पिक अन्तर्गत आजबाट सुरु भएको एथलेटिक्सको १ सय मिटर स्पर्धामा नेपाली धाविका सरस्वती चौधरी पहिलो चरणबाटै बाहिरिएकी छन् । योसँगै ओलम्पिकका खेल्ने अवसर पाएका नेपालका पाँचै खेलाडीको खेल सकिएको छ ।

आज विहान भएको प्रतिस्पर्धामा दोस्रो हिटमा परेकी सरस्वतीले १ सय मिटर दूरी पूरा गर्न १२.९१ सेकेण्ड लगाइन् । ९ खेलाडी सम्मिलित त्यो चरणमा उनी आठौं भइन् । म्याराथनका लागि छनोट गरिएका गोपी चन्द्र पार्कीले अन्तिम समयमा खेल्न नपाएपछि सो स्थानमा सरस्वतीलाई पठाइएको हो ।

मुस्किलले २ साताको तयारीमा उनी टोकियो उडेकी थिइन् । सायद त्यही कारण उनले आफ्नो लक्ष्यअनुसार राष्ट्रिय कीर्तिमान कायम गर्न सकिनन् ।

यसअघि शुटिङकी कल्पना परियारले १० मिटर एयर राइफलमा राष्ट्रिय कीर्तिमान बनाएकी थिइन् । जुडोकी सोनिया भट्ट पहिलो खेलमै पराजित भएकी थिइन् । पौडीतर्फ १ सय मिटर फ्रिस्टाइलमा गौरिका सिंह र एलेक्स शाह दुवैले आफ्नो कीर्तिमान सुधार गरेका थिए । पाँचै जना खेलाडी पहिलो चरणबाट माथि उक्लन सकेनन् ।

काठमाडौं । नेपालमा आएदेखि फुटबल समर्थकहरुबाट माया र समर्थन पाइरहेका प्रशिक्षक अब्दुल्लाह अल्मुताइरीबारे केही दिनअघि एउटा अनलाइनले आलोचनात्मक समाचार छाप्यो । ‘मेरो खेल डटकम’ मा प्रकाशित समाचारमा भनिएको थियो– प्रशिक्षक अल्मुताइरीद्वारा पत्रकारमाथि दु वहार ।

समाचारमा दावी गरिएअनुसार सोही अनलाइनका दुई पत्रकार बिभा थापा र बिभु श्रेष्ठमाथि अब्दुल्लाहले अपशब्दसमेत प्रयोग गर्दै दुव्र्यवहार गरेका थिए । घटना गत साउन ८ गतेको हो । आज प्रशिक्षक अब्दुल्लाहले एन्फामा दिएको निवेदनमा दुई पत्रकारमाथि छानविन गर्न गरेको माग सोही घटनासँग जोडिएको छ ।

घटनाविवरण अनुसार त्यस दिन एन्फा कम्प्लेक्समा प्रशिक्षण चलिरहेको थियो । त्यसैबीचमा प्रशिक्षक अब्दुल्लाह एन्फा कम्प्लेक्स बाहिर आएर सडकमा धुम्रपान गर्न थाले । बाहिर प्रशिक्षकले चुरोट पिइरहेको सूचना पाएर कम्प्लेक्सभित्र रहेका दुई पत्रकारहरु क्यामरासहित बाहिर आएका थिए ।

मेरो खेलको समाचारमा जनाइएअनुसार विभाले प्रशिक्षकलाई ‘सार्वजनिक स्थलमा धुम्रपान गर्न पाइन्छ ?’ भन्दै प्रश्न गरेकी थिइन् । यसबाट आक्रोशित भएर प्रशिक्षकले अपशब्दसहित अंग्रेजीमा गाली गरेको दावी पत्रकारद्वयले गरेका छन् ।

‘हु दी ब्लडी हेल आर यु टु क्वेस्चन मि’ भन्दै बिभामाथि जाइलाग्ने प्रयास गरेको उनीहरुले बताएका छन् । बिभुले भिडियो बनाउन लाग्दा प्रशिक्षकले क्यामेरा खोस्ने प्रयत्न गरेको र कुस्ती खेल्ने हो ? भन्दै थर्काएको समेत समाचारमा उल्लेख गरिएको छ । यद्यपि, यस विषयमा प्रशिक्षकका तर्फबाट कुनै बयान सार्वजनिक भएको छैन ।

नेपाल खेलकुद पत्रकार मञ्च तथा नेपाल पत्रकार महासंघले त्यस सम्बन्धमा छानविन गरी दोषीलाई कारबाही गर्न एन्फासमक्ष माग गरेका थिए । यो स्क्यान्डल साम्य हुन नपाउँदै गत आइतबार अब्दुल्लाहले एन्फा वरिष्ठ उपाध्यक्ष पंकजविक्रम नेम्बाङमाथि दोषारोपण गर्दै प्रशिक्षक पदबाट राजीनामा दिने घोषणा सामाजिक सञ्जालमार्फत गरे । यद्यपि, उनले अहिलेसम्म लिखित राजीनामा बुझाएका छैनन् । बरु एन्फामा निवेदन दिएर वरिष्ठ उपाध्यक्ष नेम्वाङ र ती दुई पत्रकारमाथि छानविनको माग राखेका छन् ।

एन्फाका प्रवक्ता किरण राईका अनुसार यो विषयमा भोलि (शुक्रबार) बस्ने कार्य समिति बैठकमा छलफल हुनेछ । प्रशिक्षकको राजीनामाबारे पनि सोही वैठकले टुंगो लगाउनेछ । उपाध्यक्ष नेम्बाङले आफू दोषी ठहरिए तुरुन्तै पदबाट राजीनामा दिने बताइसकेका छन् ।

नेपाली राष्ट्रिय फुटबल टोलीका मुख्य प्रशिक्षकका रुपमा करिब पाँच महिनाअघि नियुक्त भएका अल्मुताइरीले त्यसयता फुटबल समर्थकहरुबीच निकै लोकप्रियता कमाइसकेका थिए । यसबीचमा राष्ट्रिय टिम छनोटका क्रममा लिएको बोल्ड निर्णय, एनएसएल च्याम्पियन काठमाडौं रेजर्जका खेलाडी टोलीमा नपर्नु, मैदानमा नेपालको आक्रामक शैलीजस्ता कुराले अब्दुल्लाललाई बारम्बार चर्चामा ल्याइरह्यो ।

स्पष्ट रणनीति, बोल्ड निर्णय र सामाजिक सञ्जालमा सक्रिय अब्दुल्लाहको प्रभाव नेपाली राष्ट्रिय टोलीमा पनि सकारात्मक नै छ । इराकविरुद्धको मैत्रीपूर्ण खेल र विश्वकप तथा एएफसी एसिया कपको संयुक्त छनोट गरी नेपालले उनको नेतृत्वमा चार खेल खेलेको छ । ती चार खेलका लागि ‘मिडिल–इस्ट’ भ्रमणमा जाने नेपाली टोलीमा ६ नयाँ अनुहार समेटेका अब्दुल्लाहले अप्रिलमा दशरथ रंगशालामा थ्री नेसन्स कप जितेका १३ खेलाडी परिवर्तन गरेका थिए ।

सामाजिक सञ्जालमा सक्रिय अब्दुल्लाहले ‘वान् टिम–जय नेपाल’ स्लोगनलाई नेपाली फुटबल जमातमा स्थापित गरेका छन् । समर्थक तथा आममानिससँग पनि अन्तरक्रिया गर्न रुचाउने उनी आफ्नो पोस्टमा आएका कमेन्टमा रिप्लाइ गर्न समेत समय निकाल्छन् । फ्यान ग्रुपमा पसेर पोस्टसमेत गर्छन् ।

अहिले नेपाली राष्ट्रिय टोली साफ च्याम्पियनसिप र एसिया कप छनोटका लागि निरन्तर अभ्यासमा छ । प्रशिक्षकले छाडेर हिँडेको खण्डमा नेपाली टिमको तयारी प्रभावित हुन सक्छ ।

काठमाडौं । चेल्सी फुटबल क्लबले २०२१/२२ सिजनका लागि पहेँलो रङको ‘अवे किट’ सार्वजानिक गरेको छ । बिहीबार सार्वजनिक भएको पहेँलो किटले चेल्सीको इतिहास बोकेको छ । र, नाइकले आगामी सिजनका लागि यसलाई पुन: तयार गरेको छ ।

पहेँलो रङले विगतका किटहरूको स्मरण गराउँछ । तर, त्यसमा मिसिएको कालो रङले चेल्सीमा युवा शक्तिले भरिएको नयाँ युगको प्रतिनिधित्व गर्छ ।

चेल्सीका मिडफिल्डर म्यासन माउन्टले भने, ‘हामीले वषौँ देखिको इतिहासलाई हेर्दा पनि पँहेलो किटमा पूर्व खेलाडीहरूको राम्रो प्रभाव छ । हामीले पनि नयाँ किटमा त्यस्तै विशेष पलहरू सृजना गर्न सक्छौँ भन्ने आस गरेको छु ।’

काठमाडौं । नेपाली राष्ट्रिय पुरुष फुटबल टोलीका मुख्य प्रशिक्षक अब्दुल्लाह अल्मुताइरीले अखिल नेपाल फुटबल संघ (एन्फा)का वरिष्ठ उपाध्यक्ष पंकजविक्रम नेम्बाङ र दुई पत्रकारमाथि छानविन गर्न निवेदन दिएका छन् ।

नेम्वाङले आफूलाई राजीनामा दिन बाध्य पारेको उल्लेख गर्दै प्रशिक्षक अब्दुल्लाहले मंगलबार सामाजिक सञ्जाल फेसबुकमा लेखेका थिए । त्यसपछि एन्फा मुख्यालय पुगेका प्रशिक्षक अब्दुल्लाले राजीनामा भने दिएका छैनन् ।

त्यसअघि एक अनलाइनका दुई पत्रकारले प्रशिक्षकले सार्वजनिक स्थलमा धुम्रपान गरिरहेको विषयमा प्रश्न गर्दा भएको विवादले पनि सामाजिक सञ्जाल तातिएको थियो ।

यीनै दुई प्रकरणमा आफूसँग जोडिएका दुई पत्रकार र उपाध्यक्ष नेम्वाङमाथि छानविन गर्न माग गर्दै एन्फामा विहीबार निवदेन दिएका छन् ।

‘यसअघि नै पत्रकार र उपाध्यक्षले पनि प्रशिक्षकमाथि छानविन गर्नका लागि निवेदन आइसकेको थियो,’ एन्फाका प्रवक्ता किरण राईले नेपाल प्रेससँग भने, ‘भोलि हाम्रो (कार्य समिति) मिटिङ छ । त्यसमा कुरा हुन्छ ।’

काठमाडौं । अमेरिकन स्वीमर सेलेब ड्रेसलले १०० मिटर फ्रि-स्टाइलमा ओलम्पिक कीर्तिमान बनाएका छन् ।

उनले निर्धारित दूरी ४७.०२ सेकेन्डमा निर्धारित दूरी पार गर्दै टोकियो ओलम्पिकमा दोस्रो स्वर्ण जितेका हुन् । ड्रेसल १०० मिटर फ्रिस्टाइलका विश्व च्याम्पियनसमेत हुन् ।

उनले ४ सय मिटर रिलेमा सोमबार पहिलो स्वर्ण जितेका थिए । ड्रेसल व्यक्तिगत खेलमा सबैभन्दा सफल खेलाडी बनेका छन् ।

एजेन्सी । ३२ औं ग्रिष्मकालीन ओलम्पिकको छैटौं दिन आज १७ स्वर्ण पदकको छिनोफानो हुँदैछ । विभिन्न ८ खेलका १७ स्पर्धाको फाइनल बाहेक अन्य खेलका प्रतिस्पर्धा पनि जारी रहनेछन् ।

आज विहीकार समग्रमा २४ खेलमा स्पर्धाहरु हुनेछन् । अन्य खेलहरुको समूह चरण वा नकआउट चरणका प्रतिस्पर्धाहरु भइरहेका छन् ।

आज आर्टिस्टिक जिम्न्यास्टिकको महिला अलअराउण्ड, क्यानोइ स्लालोमको महिला टिम, फेन्सिङमा महिला टिम फोइल, जुडोमा महिला ७८ केजीमूनि र पुरुष १०० केजीमूनि, रोइङमा पुरुष डवल, महिला डवल, पुरुष लाइटवेट डवल र महिला लाइटवेट डवल विधाको फाइनल हुँदैछ ।

त्यस्तै शुटिङमा महिला ट्र्याप, पुरुष ट्र्याक तथा टेवलटेनिसमा महिला एकलको स्वर्ण छिनोफानो हुनेछ । पौडीतर्फ आज एकै दिन पाँच स्पर्धाको फाइनल हुनेछ । पुरुष ८ सय मिटर फ्रिस्टाइल, पुरुष २ सय मिटर ब्रेष्टस्ट्रोक, महिला २ सय मिटर बटरफ्लाई, पुरुष १ सय मिटर फ्रिस्टाइल र महिला ४ गुणा २ सय मिटर फ्रिस्टाइल रिलेमा स्वर्णका लागि प्रतिस्पर्धा हुनेछ ।

छैटौं दिनसम्म पदक तालिकामा जापानले अग्रता बनाइरहेको छ । पावरहाउस टोलीहरु चीन र अमेरिकालाई पछि पर्दै जापानले पदक तालिकामा अग्रता बनाएको छ । उसले अहिलेसम्म १३ स्वर्ण, ४ रजत र ५ कांस्य जितेको छ । चीनले १२ स्वर्णसहित २७ पदक जितेको छ भने तेस्रो स्थानको अमेरिकाले ११ स्वर्णसहित सर्बाधिक ३१ पदक जितेको छ ।

रुस ओलम्पिक कमिटीले ७, अष्ट्रेलियाले ६, बेलायतले ५, दक्षिण कोरियाले ४, जर्मनी र फ्रान्सले ३–३ स्वर्ण पदक जितेका छन् । नेदरल्याण्ड्स, क्यानडा, हंगेरी, स्लोभेनिया, क्रोएसिया र कोसोभो गरी ६ देशले २–२ स्वर्ण जितेका छन् । एकमात्र स्वर्ण जित्ने देशको संख्या २२ छ । अहिलेसम्म ९८ स्वर्णको छिनोफानो भएको छ ।

काठमाडौं । विश्व फुटबलका सर्वकालिन महान् खेलाडीमध्ये एक- लियोनेल मेसीले यसै महिना पहिलो अन्तर्राष्ट्रिय ट्रफी जिते । सन् २०१४ विश्वकप तथा कोपा अमेरिका २०१५ र २०१६ को फाइनलमा पुगेर पनि पराजित भएको अर्जेन्टिनाले जुलाई ११ मा घरेलु टोली ब्राजिललाई १-० को नतिजामा पराजित गर्दै २८ वर्षपछि कोपा अमेरिकाको उपाधि जित्यो ।

पटक-पटक असफल सावित भइरहेका मेसीले वर्षौदेखिको अन्तर्राष्ट्रिय उपाधि जित्ने इच्छा यो वर्ष पूरा गरे । यसबाट विश्वभरका फुटबल समर्थक खुशी छन् ।

यस्तै, अर्जेन्टिनाका पूर्व खेलाडी तथा प्रशिक्षक केसार लुइस मेनोट्टीले गत वर्ष निधन भएका अर्जेन्टिनी पूर्व खेलाडी डिएगो म्याराडोना पनि मेसीको सफलताको साक्षी बन्न पाए खुशी हुने बताएका छन् ।

‘यदि म्याराडोना जिवित थिए भने मेसी र अर्जेन्टिनी फुटबल टोलीका लागि धेरै खुशी हुने थिए,’ उनले भने ।

कोपा अमेरिका मेसीको खेल जीवनको पहिलो अन्तर्राष्ट्रिय उपाधि हो । यद्यपि, उनले २००८ मा भएको बेइजिङ ओलम्पिकमा भने अर्जेन्टिनाको प्रतिनिधित्व गर्दै स्वर्ण पदक जितेका थिए ।

सन् १९८६ का विश्वकप विजेता तथा महान् अर्जेन्टिनी फुटबलर म्याराडोनाको नोभेम्बर २०२० मा मृत्यु भएको थियो ।

उनको सम्झना गर्दै मेनोट्टीले भने- ‘यदि म्याराडोना जिवितै थिए । र, अर्जेन्टिनाले कोपा अमेरिका २०२१ को उपाधि चुमेको देखेको भए गर्भान्वित हुन्थे र मेसीसँगै रूने थिए ।’

मेसी खेल सक्रिय खेल जीवनको अन्त्यतिर छन् । र, ३३ वर्षको उमेरमा जितेको उपाधिसँगै असाध्यै खुसी पनि छन् ।

मेसीको उपस्थितिले टोलीमा छुट्टै ऊर्जा दिन्छ । र, आफ्नो टोलीलाई जिताउन उनको महत्त्वपूर्ण भूमिका रहन्छ । शारिरीक र मानसिक रूपमा तयार रहन्छन् ।

‘मेसी सबै पक्षमा उत्कृष्ट छन्,’मेनोट्टीले थपे ।

मेनेट्टी अर्जेन्टिना यू-२० को प्रशिक्षक थिए । उनको प्रशिक्षणमा अर्जेन्टिनाले जापानमा सन् १९७९को विश्व यूथ च्यापियनसिपको उपाधि जितेको थियो । अर्जेन्टिना फुटबल टोलीले सन् १९७८ मा नेदरल्यान्डलाई ३-१ गोलको नतिजामा पराजित गरेर विश्व कपको उपाधि जित्दा पनि मेनोट्टी अर्जेन्टिनाका प्रशिक्षक थिए ।

कोपा अमेरिका २०२१मा कस्तो रह्यो मेसीको प्रदर्शन ?

मेसीले कोपा अमेरिकामा ४ गोल र ५ असिस्ट गरे । अर्जेन्टिनाले प्रतियोगितामा गरेको १३ गोलमध्ये ९ गोलमा मेसीको प्रत्यक्ष योगदान थियो । प्रतियोगिताको उत्कृष्ट खेलाडीको उपाधि पनि उनै मेसीले जिते ।

अर्जेन्टिनालाई च्याम्पियन बनाउन आधार स्तम्भ बनेका मेसीले पूर्व कप्तान जाभिएर म्यास्चेरानोको कीर्तिमान तोड्दै राष्ट्रिय टोलीका लागि सर्वाधिक खेल खेल्ने खेलाडी बने ।

काठमाडौं । स्पेनिस हेभिवेट रियाल मड्रिडका खेलाडी डेभिड अलाबालाई कोरोना भाइरसको संक्रमण पुष्टि भएको छ ।

यसै सिजन जर्मन च्याम्पियन बायर्न म्युनिखबाट मड्रिड आएका अलाबालाई कोभिड-१९ को संक्रमण पुष्टि भएको क्लबले जानकारी दिएको छ ।

अस्ट्रियाका २९ वर्षीय कप्तान अलाबा बायर्नमा ११ वर्ष बिताएर गत सिजनको समाप्तिसँगै फ्रि-एजेन्ट भएका थिए । यसै महिना सम्पन्न युरो २०२० मा अस्ट्रियालाई प्रि-क्‍वार्टरफाइनलसम्म पुर्‍याएका अलाबा त्यसपछि मड्रिड पुगेका थिए ।

रियालले बुधबार क्लबको वेबसाइटमार्फत् उनलाई कोरोना संक्रमण भएको जानकारी दिएको छ । ‘हाम्रा खेलाडी डेभिड अलाबाको कोभिड-१९ परीक्षणको रिपोर्ट पोजिटिभ आएको छ,’ वेबसाइटमा भनिएको छ ।

काठमाडौं । दुई पटकको स्वर्ण पदक विजेता ब्राजिलले ओलम्पिकमा पुरुष फुटबलमा साउदी अरबलाई ३-१ गोलको नतिजामा पराजित गरेको छ ।

समूह डीअन्तर्गत बुधबार भएको खेलमा ब्राजिलका लागि रिचार्लिसनले दुई तथा म्याथ्युज कुन्हाले एक गोल गरे ।

टोकियोस्थित साइतामा स्टेडियममा भएको खेलको १४औं मिनेटमा कुन्हाको गोलसँगै ब्राजिलले अग्रता लिएको थियो । अब्दुलाह अल अमरीले २७औं मिनेटमा गरेको गोलसँगै बराबरीमा फर्किएको साउदी अरबले दोस्रो हाफमा थप दुई गोल खायो ।

रिचार्लिसनले ७६औं मिनेटमा व्यक्तिगत पहिलो गोल गर्दै ब्राजिललाई पुन: अग्रता दिलाएका थिए ।

जित नजिक पुगिसकेको ब्राजिलका लागि इन्जुरी समयमा रिचार्लिसनले थप एक गोल गर्दै ३-१ को सहज नतिजा सुनिश्चित गरे ।

काठमाडौं । अस्ट्रेलियन स्वीमर इम्मा म्याकियोनले ओलम्पिकमा स्विमिङको १०० मिटर फ्रि-स्टाइलमा कीर्तिमान बनाएकी छन् ।

बुधबार भएको साताौं हिटमा निर्धारित दूरी ५२.१३ समयमा पार गरेकी उनले स्वीस खेलाडी सारा स्योस्ट्रोमको ५२.६२ को कीर्तिमान तोडेकी हुन् ।

इम्माले रियो ओलम्पिक २०१६ मा २ स्वर्णसहित ६ स्वर्ण पदक जितेकी थिइन् ।

यो इभेन्टको विश्व कीर्तिमान भने अझै साराको नाममा छ । उनले निर्धारित १०० मिटरको दूरी ५१:१३ मा पार गर्दै विश्व कीर्तिमान बनाएकी थिइन् ।

त्यो विश्व कीर्तिमान भने अझै कायम छ । यही इभेन्टमा नेपालको प्रतिनिधित्व गरेकी गौरिका सिंहले पहिलो हिटमा राष्ट्रिय कीर्तिमान बनाएकी थिइन् ।

उनले २०१९ मा आफैँले बनाएको कीर्तिमानमा सयम सुधार गरेकी हुन् । पुरुषतर्फ पनि १०० मिटर फ्रि-स्टाइलमा मंगलबार एलेक्स साहले राष्ट्रिय कीर्तिमान बनाएका थिए ।

काठमाडौं । तीन ग्रान्डस्लाम जितिसकेका विश्व नम्बर एक टेनिस स्टार नोभाक जोकोभिच टोकियो ओलम्पिकको क्वार्टरफाइनलमा पुगेका छन् ।

अस्ट्रेलियन ओपन, फ्रेन्च ओपन र विम्बल्डन जितिसकेका जोकोभिच ओलम्पिकमा पनि सर्बियाका लागि स्वर्ण जित्ने तयारीमा छन् ।

बुधबार भएको तेस्रो चरणको खेलमा स्पेनिस डेभिडोभिच फोकिनालाई ६-३, ६-१ को सोझो सेटमा पराजित गर्दै जोकोभिच अन्तिम आठमा पुगेका हुन् ।

काठमाडौं । स्वीस टेनिस खेलाडी बेलिन्डा बेन्सिच रुसी खेलाडी एनेस्तेसिया पाव्लुचेन्कोभालाई २-१ सेटको नतिजामा पराजित गर्दै टोकियो ओलम्पिक- टेनिसको महिला सिङ्गलतर्फ सेमिफाइनलमा पुगेकी छन् ।

बुधबार दिउँसो भएको क्वार्टरफाइनलमा पहिलो सेट ६-० ले जितेकी बेन्सिचले एनेस्तेसियाविरुद्धको दोस्रो सेट ३-६ ले गुमाएकी थिइन् ।

निर्णायक तेस्रो सेटमा ६-३ कै जित निकालेसँगै २४ वर्षीया बेन्चिचले अन्तिम चारमा स्थान सुरक्षित गरिन् ।

काठमाडौं । अर्जेन्टिनी फेन्सर मारिया बेलेन प्रेज मौरिसले टोकियो ओलम्पिकमा सोमबार खेलमा पराजित भइन्, पदक गुमाइन् । तर उनले जीवनको अमूल्य स्वर्ण जितिन् ।

३६ वर्षीया मारियाका १७ वर्षदेखिका प्रेमी तथा प्रशिक्षकको ‘सरप्राइज’ विवाह प्रस्ताव स्वीकारेसँगै उनले जापानबाट मेडल नभए पनि ‘इनगेजमेन्ट-रिङ’ लिएर फर्किनेछिन् ।

हंगेरीकी आना मार्टोनसँग महिला एकल साबेरमा १५-१२ को नतिजामा पराजित भएपछि मौरिस पोस्ट म्याच कन्फरेन्समा थिइन् । त्यतिबेला उनका प्रशिक्षक तथा प्रेमी लुकास ग्युलिरमो साउकेडोले लेखेको लामो पत्र उनीसामु थियो । स्पेनिस भाषामा लेखिएको पत्रमा ‘के तिमी मसँग विवाह गर्न चाहन्छौ ?’

अनलाइनमा सार्वजानिक भएका दृष्यमा लुकासले प्रस्ताव गरेपछि उनी रनभुल्लमा परेर एक वरीपरी घुमेकी थिइन् । र, प्रस्ताव स्वीकार गर्नु अगाडि चिच्याएकी थिइन् ।

‘मिडिया पर्सन’ले मलाई वरीपरी हेर्नु भन्नुभयो । मैले उनको चिठ्ठी देखेँ, त्यो देखेर म छक्क परेँ । र, सबै कुरा बिर्सिए’ मौरिसले रिपोर्टरसँग भनिन् ।

‘हामी एकदमै खुशी छौँ, अवस्य पनि हामी एक अर्कासँग झगडा गर्छौं । तर, हामी हाम्रो जीवनसँगै बिताउन चाहान्छौँ ।’

प्रेज मौरिसले सन् २०१४ को प्यान अमेरिकन च्याम्पियनसिपमा स्वर्ण जितेकी थिइन् । ग्युलिरमो साउकेडोले पहिले २०१० को विश्व फेन्सिङ् च्याम्पियनसिप पछि पेरिसमा विवाहका लागि प्रस्ताव गरेका थिए । तर, मौरिसले कम उमेरका कारण अस्वीकार गरेको बताए ।

उनले भने- ‘म उनलाई माया गर्छु, जब मौरिसले खेल हारिन्, त्यतिबेला धेरै दु:खी थिइन् । त्यो समयमा उनको ध्यान फेन्सिङमा भोगेको पराजयबाट ध्यान मोड्नका लागि तुरुन्तै चिठ्ठी लेखेँ । मोरिसले यो खेल जितेको भए, म केही समय कुर्ने थिएँ ।’

एजेन्सी । ओलम्पिकको पाँचौं दिन आज थप २३ स्वर्ण पदकको छिनोफानो हुँदैछ । अर्थात्, ११ खेलका २३ स्पर्धाको फाइनल खेल आज दिनभरमा हुनेछ ।

त्यसबाहेक अन्य खेलका फाइनलअघिका प्रतिस्पर्धाहरु पनि जारी रहनेछन् । आज २७ खेलका स्पर्धाहरु भइरहेका छन् ।

बुधबार आर्टिस्टिक जिम्न्यास्टिकको पुरुष टिम, बास्केटबलमा महिला र पुरुष थ्र अन थ्री, साइक्लिङमा पुरुष र महिला टाइम ट्रायल, डाइभिङको पुरुष ३ मिटर स्यान्च्रो, घोडचढीमा एकल ड्रेसेज, फेन्सिङमा पुरुष टिम, जुडोमा महिला ७० केजीमूनि र पुरुष ९० केजीमूनि, रोइङमा महिला र पुरुष डवल्स स्कल्स, महिला र पुरुष फोर तथा महिला र पुरुष क्वार्डुपल स्कल्स स्पर्धाको फाइनल खेल हुनेछ ।

रग्वी सेभेनतर्फ पुरुषको फाइनल खेल आज हुनेछ । पौडीमा महिला २ सय मिटर फ्रिस्टाइल, २ सय मिटर इण्डिभिज्युअm मिड्ले र १५ मिटर फ्रिस्टाइलको फाइनल हुनेछ भने पुरुषतर्फ २ सय मिटर बलरफ्लाई र ४ गुणा २ सय मिटर रिलेमा स्वर्ण पदकको छिनोफानो हुनेछ । भारोत्तोलनमा पुरुष ७३ केजीको फाइनल हुनेछ ।

पदक तालिकामा अहिलेसम्म घरेलु टोली जापानले अग्रता बनाइरहेको छ भने अमेरिका र चीन उसलाई पछ्याइरहेका छन् । जपानले १० स्वर्ण जितेको छ । अमेरिका र चीनले समान ९–९ जितेका छन् भने रुस ओलम्पिक कमिटीले ७ स्वर्ण जितेको छ । अस्ष्ट्रेलिया र संयुक्त अधिराज्यले ४–४, दक्षिण कोरिया र फ्रान्सले ३–३ तथा क्यानडा, जर्मनी र कोसोभोले २–२ स्वर्ण जितेका छन् । अन्य २० देशले १–१ स्वर्ण जितेका छन् ।

काठमाडाैं । टोकियो ओलम्पिकमा आज पौडीतर्फ नेपाली खेलाडी गौरिका सिंहको खेल परेको छ । १ सय मिटर फ्रिस्टाइलको हिट वानमै परेकी उनको खेल नेपाली समयअनुसार पौने चार बजे हुनेछ ।

गैरिका यो स्पर्धामा दक्षिण एसियाली च्याम्पियन हुन् । उनले दुई वर्षअघि नेपालमै भएको १३ औं दक्षिण एसियाली खेलकुदमा नयाँ राष्ट्रिय कीर्तिमानसहित स्वर्ण जितेकी थिइन् ।

एनको उत्कृष्ट टाइमिङ ५८.१३ सेकेण्डको हो । तर त्यो २५ मिटरको सर्ट कोर्षमा खेलिएको थियो । टोकियो आटिकको ५० मिटर लङ कोर्षमा उनले टाइमिङ सुधार गर्ने अपेक्षा गरिएको छ । महिलाको १ सय मिटर फ्रिस्टाइलमा ५२.६२ सेकेण्डको ओलम्पिक कीर्तिमान छ ।

हिट वानमा गौरिकासँगै नाइजेरिया, मोन्टेनेग्रो र गुआमका खेलाडीहरु छन् ।

पौडी खेलाडी अजेक्जेन्डर शाहले हिजो १ सय मिटर फ्रिस्टाइलमै राष्ट्रिय कीर्तिमान बनाएका थिए । हिट चरणमा शीर्ष स्थानमा रहे पनि उनको टाइमिङ अर्को चरणका लागि पर्याप्त भएन ।

शुटिङकी कल्पना परियार र जुडोकी सोनिया भट्टको खेल यसअघि नै सकिसकेको छ भने शुक्रबार एथलेटिक्सकी सरस्वती चौधरीको खेल हुन बाँकी छ । यसपल्ट ओलम्पिकमा नेपालबाट ४ खेलका ५ खेलाडी समावेश थिए ।

काठमाडौं । मारिया सक्कारीमाथि २-१ सेटको जित निकाल्दै विश्व नम्बर चार एलिना स्भितोलिना टोकियो ओलम्पिक २०२० को टेनिस- महिला सिङ्गलतर्फ क्वार्टरफाइनलमा पुगेकी छन् ।

विश्व बरियताको १४औं स्थानकी सक्कारीले पहिलो सेटमा ५-७ को जित निकालेकी थिइन् । त्यसपछिका प्रतिस्पर्धात्मक दुई सेटमा भने स्भितोलिनाले ६-३, ६-४ को जित निलकाल्दै लगातार दोस्रो पटक ओलम्पिकमा क्‍वार्टरफाइनल यात्रा तय गरिन् ।

युक्रेनकी २६ वर्षीया स्भितोलिना २०१६ रियो ओलम्पिकमा पनि क्वार्टरफाइनल सम्म पुगेकी थिइन् ।

काठमाडौं । फिलिपिन्सले भारत्तोलन खेलमा ओलम्पिक इतिहासमै पहिलो पटक स्वर्ण जितेको छ ।

सोमबार फिलिपिन्सकी ३० वर्षीया हिडिल्यान डाइजले महिला ५५ किलोग्राम भारत्तोलनमा विश्व प्रख्यात चीनको खेलाडी लिआओ क्युयुन लाई हराउँदै स्वर्ण बिजेता बनेकी हुन् ।

फिलिपिन्सले सन् १९२४ देखि ग्रिष्मकालिन खेलमा सहभागिता जनाउँदै आइरहेको छ । भने सन् १९२८ मा पहिलो ओलम्पिक पदक जितेको थियो । टोफिलो एल्डेफोन्सोले बे्रस्टस्ट्रोकमा काँस्य जितेका थिए ।

फेदरवेछ बक्सर एन्थोनि भिल्लान्योभाले सन् १९६४ मा पहिलो रजत पदक जितेका थिए ।

काठमाडौं । विश्व बरियताको दोस्रो स्थानकी नाओमी ओसाका टोकियो ओलम्पिक २०२० को तेस्रो चरणबाट बाहिरिएकी छन् । मंगलबार बिहान भएको तेस्रो चरणको खेलमा चेक रिपब्लिककी मार्केटा भोन्ड्रोसोभासँग ६-१, ६-४ सेटको नतिजामा पराजित हुँदै ओसाका टेनिस महिला सिङ्गल्सबाट बाहिरिएकी हुन् ।

मानसिक रूपमा तयार नभएको बताउँदै ओसाकाले फ्रेन्च ओपनबीचैमा छाडेकी थिइन् । त्यस्तै विम्बल्डनबाट पनि नाम फिर्ता लिएकी ओसाकाले २०१९ मा अस्ट्रेलियनको उपाधि जितेकी थिइन् ।

ओसाकाले वर्षको पहिलो ग्रान्डस्लाम अस्ट्रेलियन ओपन जितेकी थिइन् ।

काठमाडौं । टोकियो ओलम्पिकमा पौडीबाट प्रतिस्पर्धा गर्न छनोट भएका नेपाली खेलाडी एलेक्स गडेगार्ड शाहको खेल आज छ । १ सय मिटर फ्रिस्टाइलको हिट वानमै परेका एलेक्सको खेल दिउँसाे पौने ४ बजे हुनेछ ।

पौडीमा विभिन्न हिच चरण पार गरी अन्तिम चरणसम्म पुग्नुपर्ने हुन्छ । हिट चरणमा आठ खेलाडी हुनेछन् । शीर्ष एउटा खेलाडी दोस्रो चरणमा प्रवेश गर्नेछ ।

अहिलेसम्म नेपालका कुनै पनि खेलाडीले पहिलो हिट नै पार गर्न सकेका छैनन् । यसपल्छ पनि एलेक्सले राष्ट्रिय कीर्तिमान सुधार्ने लक्ष्य लिएका छन् । हिट वानमा उनीसँगै भुटान, कोसोभो, माल्दिभ्स, सोलोमोन आइल्याण्ड, गुयना र प्यालेस्टिाइनका खेलाडी छन् ।

पौडीबाट प्रतिस्पर्धा गर्ने अर्की नेपाली खेलाडी गौरिका सिंहको खेल भने बुधबार छ । यसअघि शुटिङकी कल्पना परियार र जुडोकी सोनिया भट्ट आफ्नो सुरुआती चरणबाटै बाहिरिएका थिए । कल्पनाले भने राष्ट्रिय कीर्तिमान बनाउन सकिन् ।

एथलेटिक्सबाट प्रतिस्पर्धा गर्न लगेकी सरस्वती चौधरीको खेल भने शुक्रबार परेको छ । नेपालबाट टोकियो ओलम्पिकमा ४ खेलका ५ खेलाडीले प्रतिस्पर्धा गर्ने अवसर पाएका थिए ।

काठमाडौं । नेपाली राष्ट्रिय फुटबल टिमका प्रमुख प्रशिक्षक अब्दुल्लाह अल्मुताइरीले हिजो फेसबुकमार्फत राजीनामाको घोषणा गरे । वरिष्ठ उपाध्यक्ष पंकज नेम्वाङलाई आरोपित गर्दै राजीनामा घोषणा गरेका अल्मुताइरीले अखिल नेपाल फुटबल संघ एन्फामा अहिलेसम्म राजीनामा बुझाएका भने छैनन् ।

एन्फाका प्रवक्ता किरण राईले प्रशिक्षकबाट राजीनामा नआइसकेको बताए । सामाजिक सञ्जालमार्फत राजीनामा घोषणा भएपछि अल्मुताइरीसँग एन्फाको संवाद भइरहेको उनले जानकारी दिए । प्रशिक्षकको असन्तुष्टिका विषयहरुबारे भने उनले बताउन चाहेनन् ।

राईले भने, ‘अहिले सबै भनेर साध्य हुँदैन । छलफल भइरहेको छ । अध्यक्ष बाहिर हुनुहुन्छ । उहाँ आएपछि निस्कर्षमा पुग्छौं ।’

प्रवक्ता राईका अनुसार प्रशिक्षकको राजीनामा मात्र नभएर ‘सबै विषयको समाधान खोज्ने गरी’ छलफल भइरहेको छ । अरु विषय के हुन् भन्ने उनले जानकारी दिन चाहेनन् ।

उनले भने, ‘राजीनामा फिर्ताको कुरा आफ्नो ठाउँमा छ । तर अरु पनि विषयहरु छन् । राजीनामा फिर्ताले मात्रै सबै हल हुँदैन । सबै विषयको अध्ययन र छलफलपछि टुंगोमा पुग्ने कुरा आउँछ ।’

प्रशिक्षक अल्मुताइरीले उपाध्यक्ष नेम्वाङबाट आफूलाई असहयोग भएको संकेत गरेका छन् । नेम्वाङले भने आफूबाट गलत भएको भए कारवाही भोग्न तयार रहेको बताउँदै आएका छन् ।

एन्फा अध्यक्ष कर्मा छिरिङि शेर्पा भने पोखरामा छन् । उनी भोली काठमाडौं आउने प्रवक्ता राईले जानकारी दिए ।

काठमाडौं । ग्रेट ब्रिटेनका आडम पिर्टिले पुरुषतर्फ १०० मिटर ब्रेस्टस्ट्रोकमा स्वर्ण जित्दै इतिहास रचेका छन् । उनी ओलम्पिकामा स्वर्ण जित्ने पहिलो ब्रिटिस स्विमर हुन् ।

पिर्टिले ५७.३७ सेकेन्डमा दूरि पूरा गर्दै ग्रेट ब्रिटेनको नाममा स्वर्णको खाता खोलेका थिए । नेदरल्यानड्सका अर्नो किमिनगाले रजत र इटालीका निकोलो मार्टिनेगिले कांस्य हात पारे ।

काठमाडौं । ट्युनिसियन युवा स्वीमर अहमदले आइतबार बिहान ४०० मिटर फ्रि-स्टाइलमा स्वर्ण जित्दै टोकियो ओलम्पिकमा सनसनी मच्चाए । स्वीमिङका खेल भएको पहिलो दिनमै स्वर्ण चुमेका अहमद आठाैं स्थानमा रहँदै फाइनलका लागि छनोट भएका थिए ।

हिट चरणमा आठाैं स्थानमा रहेर फाइनल चरण पुगेका अहमदले आफ्नो देशका लागि पाँचौं स्वर्ण पदक जितेका हुन् । लन्डन ओलम्पिक २०१२ पछि ट्युनिसियाले ओलम्पिकमा जितेको यो पहिलो स्वर्ण हो । १८ वर्षीय ओलम्पिक गोल्ड मेडलिस्ट अहमदसम्बन्धी पाँच तथ्यः

१. युथ ओलम्पिक ग्राजुएट

अहमद ट्युनिसियाको राष्ट्रिय स्वीमिङ प्रोग्रामसँग १२ वर्षमा जोडिएका थिए । उनले २०१८ मा अर्जेन्टिनामा भएको युथ ओलम्पिकको २०० मिटर, ४०० मिटर र ८०० मिटरमा प्रतिस्पर्धा गरेका थिए । जसमध्ये ८०० मिटरमा आठौं र ४०० मिटरमा सातौं भएका थिए ।

२. ओलम्पिक फाइनलका अन्डरडग

अहमदले ३ मिनेट ४५.६८ मा ४०० मिटरको दूरी पार गर्दै आठौं स्थानमा रहेर ४०० मिटरको फाइनलमा स्थान सुरक्षित गरेका थिए ।

र फाइनलमा उनले सोही दूरी ३ मिनेट ४३.३६ मा पार गर्दै अस्ट्रेलियन ज्याक म्याकलोघ्लिनलाई दोस्रो तथा अमेरिकन केइरन स्मिथलाई तेस्रो स्थानमा सीमित राखिदिए ।

२०१९ मा अहमदले ट्युनिसियन आउटलेट ला प्रेस्सासँग २०२० ओलम्पिकमा ८०० मिटरमा स्वर्ण जित्न चाहेको प्रतिक्रिया दिएका थिए ।

३. ट्युनिसियाली इतिहास निर्माता

अहमदका आइडल आफ्नै देशका लामो दूरीका स्वीमर ओस्सामा मेलोउली हुन् । ओस्सामाले बेइजिङ ओलम्पिक २००८ मा र १० किलो मिटर म्याराथन स्विमिङ २०१२ लन्डन ओलम्पिकमा स्वर्ण जितेका थिए ।

ट्युनिसियाबाट स्वीमिङमा स्वर्ण जित्ने दोस्रो खेलाडी बनेका अहमद ४०० मिटर फ्रि-स्टाइलमा भने पहिलो स्वर्णधारी खेलाडी हुन् ।

४. ओलम्पिकमा ट्युनिसिया

उत्तर अमेरिकी देश ट्युनिसियाले हालसम्म ओलम्पिकमा पाँच स्वर्ण पदक जितेको छ । सन् १९६८ मा मेक्सिको सिटीमा मोहम्मद गामाउदीले ५ हजार मिटर दौडमा स्वर्ण जितेका थिए । त्यस्तै, हबिबा घिर्बीले २०१२ लन्डन अ‍ोलम्पिकमा ३ हजार मिटर दौडमा पनि स्वर्ण जितेकी थिइन् ।

५. स्पोर्टिङ पारिवारिक पृष्ठभूमी

अहमद परिवारका एक मात्रै एथलिट होइनन् । किशोर ओलम्पिक गोल्डमेडलिस्ट अहमद पूर्व राष्ट्रिय बास्केटबल खेलाडी मोहम्मद हफ्नाउलका छोरा हुन् ।

एजेन्सी । टोकियोमा जारी ३२ औं ग्रिष्मकालीन ओलम्पिकमा आज थप २१ स्वर्ण पदकको छिनोफानो हुँदैछ । अन्य खेलको प्रतिस्पर्धा जारी रहँदा १३ खेलका २१ स्पर्धा भने आज सकिन लागेका हुन् ।

आज आर्चरीको पुरुष टिम, आर्टिस्टिक जिम्न्यास्टिकको पुरुष टिम, क्यानोई स्लालोमको पुरुष टिम, साइक्लिङको क्रस कन्ट्री माउन्टेन बाइक, डाइभिङको पुरुष १० मिटर स्यान्च्रो, फेन्सिङको महिला साब्रे र पुरुष फोइल विधाका फाइनल खेलहरु हुनेछन् ।

त्यस्तै जुडोको महिला ५७ केजीमूनि र पुरुष ७३ केजीमूनि, शुटिङको पुरुष र महिला स्कीट, स्केटबोर्डिङको महिला स्ट्रिट, पौडीको महिला १०० मिटर फ्लाई, पुरुष १०० मिटर ब्रेष्टस्ट्रोक, महिला ४ सय मिटर फ्रिस्टाइल र पुरुष ४ गुण ४ सय मिटर फ्रिस्टाइल रिलेमा स्वर्णको छिनोफानो हुनेछ । टेवलटेनिसको मिक्स डवल्र, तेक्वान्दोको महिला ६७ केजीमूनि र पुरुष ८० केजीमूनि तौलसमूह, भारोत्तोलनको महिला ५५ केजी तौलसमूह र ट्रायथोलनको पुरुषतर्फको फाइनल खेलहरु आजै हुनेछन् ।

शुक्रबार उद्घाटन भएको प्रतियोगितामा शनिबारदेखि स्वर्ण पदकका प्रतिस्पर्धा सुरु भएका थिए । सुरुआती स्वर्ण जितेयता चीनले पदक तालिकामा अग्रता बनाइरहेको छ ।

आइतबारसम्मको पदकतालिकामा चीनले ६ स्वर्ण १ रजत र ४ कांस्य गरी ११ पदक जितेको छ ।

आयोजक जापानले ५ स्वर्ण र १ रजत गरी ६ पदक तथा अमेरिकाले ४ स्वर्ण २ रजत र ४ कांस्य गरी ११ पदम जितेको छ ।

दक्षिण कोरियाले २ स्वर्ण र ३ कांस्य जितेको छ । अहिलेसम्म ११ देशका खेलाडीले स्वर्ण जितेका छन् । अहिलेसम्म ३० स्वर्णको छिनोफानो भएको छ ।

काठमाडौं । आउँदो अक्टोबरमा हुने साफ च्याम्पियनसिप आयोजना गर्न अखिल नेपाल फुटबल संघ (एन्फा) लाई दक्षिण एसियाली फुटबल महासंघ (साफ) ले औपचारिक रूपमा प्रस्ताव गरेको छ ।

एन्फाले दिएको जानकारी अनुसार साफ महासचिव अनवरुल हकले च्याम्पियनसिप आयोजना गर्न प्रस्ताव गर्दै एन्फा महासचिव इन्द्रमान तुलाधरलाई पत्र पठाएका छन् । तुलाधरले भने, ‘अब हामी च्याम्पियनसिपको विस्तृत प्रस्ताव तयार गर्छौं र स्वीकृतिका लागि साफ पठाउनेछौँ ।’

स्वीकृतिको अन्तिम निर्णय एन्फाको प्रस्ताव समीक्षा गरेपछि साफ अध्यक्ष र कार्यकारी समितिले लिनेछ ।

बंगलादेश फुटबल महासंघले देशमा बढ्दो कोरोना भाइरस संक्रमणका कारण आयोजना नगर्ने भएपछि सदस्य देशहरूबीच २३ जुलाइमा आयोजक देशको बारेमा बैठक भएको थियो । नेपालमा यसभन्दा पहिले सन् १९९७ र दोस्रो २०१३ मा दुईपटक साफ च्याम्पियनसिप आयोजना भइसकेको छ ।

२०१३ मा नेपाल अफगानिस्तानसँग सेमिफाइनलमा पराजित भएको थियो । भारत अहिलेसम्म सातपटक उपाधि जितेर च्याम्पियनसिपको सबैभन्दा सफल देश भएको छ भने नेपाल अझै फाइनल पुग्न सकेको छैन ।