काठमाडौं । नेपालले आइसीसी विश्वकप क्रिकेट लिग २ अन्तरगतको त्रिकोणात्मक सिरिजमा अविस्मरणीय सुरूवात गर्दै स्कटल्यान्डलाई उसकै भूमिमा मात दिएको छ । स्कटल्यान्डविरुद्ध १ विकेटको रोमाञ्चक जित निकाल्दा करण केसीले प्रेरणादायी अलराउन्ड प्रदर्शन गरे ।
नेपालका एक प्रमुख बलर हुन् करण, जसले ब्याटिङमा प्राय ९-१० नम्बरमा मात्र पालो पाउँछन् । तर, यसको अर्थ उनी ‘टेल इन्डर’ भने होइनन् । उनी एक पावर हिटरका रूपमा चिनिन्छन्, जोसित ठूला-ठूला छक्काहरू प्रहार गर्ने क्षमता छ । यदि करणको ब्याट चल्यो भने टीमलाई हारको मुखबाट निकालेर एक्लैले जितसम्म पुर्याउने ल्याकत राख्छन् । हिजो उनले त्यही गरे ।
नेपालले १९२ रनमा ७ विकेट गुमाएपछि करण नवौं ब्याटरका रूपमा क्रिजमा आएका थिए, जतिबेला जित नेपालको हातबाट फुत्किइसकेको प्रतीत हुन्थ्यो । अर्को इन्डमा थिए युवा अलराउन्डर गुल्शन झा । तीन विकेटमात्र हातमा हुँदा नेपालले ७० बलमा १०५ रन जोड्नुपर्ने थियो, जुन लगभग असम्भव प्रतीत हुन्थ्यो । तर, पनि गुल्शन क्रिजमा हुँदासम्म उनले कुनै चमत्कार गरिहाल्छन् कि भन्ने झिनो आशामा बसेका थिए दर्शक ।
गुल्शनले पनि निराश बनाएनन् । आफ्नो शैलीअनुसार काउन्टर अट्याक गर्दै उनले एकतर्फी बनिरहेको खेलमा रोमाञ्चकता भरिदिए । गुल्शन र करणबीच आठौं विकेटका लागि ६० रनको आक्रामक साझेदारी भयो, केवल ४२ बलमा । यो साझेदारीले नेपाललाई खेलमा फर्कायो । तर, ४५.२ ओभरमा गुल्शन आउट भएसँगै नेपाल फेरि धर्मरायो । आउट हुनुअघि उनले ३० बलमा ३ छक्का र तीन चौकासहित ४२ रन बनाएका थिए । नेपालले अझै जितका लागि २८ बलमा ४५ रन जोड्नुपर्ने थियो भने हातमा थिए दुई विकेट । त्यसपछि करणले निकाले आफ्नो ‘सुपरपावर’ ।
करणलाई साथ दिन आए स्पिनर सन्दीप लामिछाने । यो जोडी क्रिजमा रहँदा दर्शकहरूलाई सम्झना भइरहेको थियो, ८ वर्षअघिको एउटा खेलको । विश्व क्रिकेट लिग डिभिजन २ अन्तर्गतको खेलमा नेपालले क्यानाडालाई एक विकेटले हराउँदा करण यसैगरि नायक बनेका थिए, र उनलाई क्रिजमा साथ दिएका थिए सन्दीपले । यो जित नेपाली क्रिकेटकै एउटा कोशेढुंगा मानिन्छ, जसले नेपाललाई विश्वकप छनोटमा पुर्याउनका साथै ओडीआई मान्यता दिलाउन महत्वपूर्ण भूमिका खेलेको थियो ।
त्यस म्याचलाई सम्झिनुपर्दा १४४ रनमा नवौं गुकेट गुमाएर लगभग हार स्वीकार गरिरहेको अवस्थामा थियो नेपाल । १९५ रनको लक्ष्य थियो । अन्तिम जोडी करण र सन्दीप दुवैजना ब्याटिङका लागि चिनिँदैनथे त्यसबेला । उनीहरूले ४७ बलमा ५२ रन जोडेर नेपाललाई जित दिलाउने कल्पनै थिएन । तर, करणले ‘असम्भव’लाई सम्भव बनाइदिएका थिए ।
करण र सन्दीपबीचको अविजित साझेदारीमा नेपालले सेलिब्रेसन गर्न ठिक्क परेको क्यानडालाई स्तब्ध तुल्यायो र विश्वकप छनोटमा स्थान बनायो । करणले ३१ बलमा ४ छक्का र तीन चौकासहित ३८ रन बनाएका थिए भने सन्दीपले अन्तिमसम्म क्रिज ओगटेर ५ रन बनाउँदै उनलाई साथ दिएका थिए । यही म्याचपछि करणले बलरबाट बलिङ अलराउन्डरको छवि बनाएका हुन् ।
हिजो पनि यो जोडीले त्यही म्याचको झल्को दियो । स्कटल्यान्डविरुद्ध नवौं विकेटका लागि करण र सन्दीपले ३८ रनको बहुमूल्य साझेदारी गरे, जहाँ अधिकांश स्ट्राइक करणले आफ्नो हातमा राखेका थिए । ४९ ओभरसम्म पुग्दा नेपालले २९० रन जोडिसकेको थियो । अन्तिम ओभरमा ७ रन मात्रै चाहिएको अवस्थामा नेपाल जितको नजिकै देखियो । तर, अन्तिम ओभरको पहिलो बलमै सन्दीप आउट भएपछि नेपाललाई झट्का लाग्यो । एक रन लिएर करणलाई स्ट्राइकमा तान्ने प्रयास गर्दा उनी प्वाइन्ट फिल्डरबाट समातिएका थिए ।
अन्तिम विकेटका लागि आए रिजन ढकाल, जो वास्तविक ‘टेल इन्डर’ हुन् । करण स्ट्राइकमा थिएनन् । स्कटल्यान्डका स्पिनर मार्क वाटले पहिलो बल वाइड फ्याँके । दोस्रो बलमा रिजन ढकालले रन लिन सकेनन् । तेस्रो बलमा उनी एक रनका लागि दौडिन सफल भए । अब अन्तिम तीन बलमा ५ रन जोड्नुपर्ने सामान्य चुनौती करणसामु आयो । अर्थात्, नेपाललाई उनको एउटा ठूलो सट काफी थियो ।
करणले योभन्दा अगाडि ४ वटा छक्का प्रहार गरिसकेका थिए । अन्तिम ओभरको चौथो बलमा उनले स्ट्रेट सिक्स हान्ने प्रयास गरे । तर, सफल भएनन् । बाउन्ड्री नजिक बल खस्यो र उनले दुई रन लिन भ्याए । अर्को बललाई स्वीप गर्दै करणले फेरि दुई रन निकाले र स्कोर भयो टाइ ।
अन्तिम बल नाटकीय भयो । नेपाललाई एक रन चाहिएको थियो । बलरले लेग स्टम्पबाहिर हानेको बललाई करणले सर्ट फाइन लेगतर्फ फ्लीक गर्ने प्रयास गरे । बल ब्याटमा लागेन तर स्वभाविकरूपमा ब्याटरहरू रनका लागि दौडिए ।स्कटिस विकेटकिपरले एकैपटकमा बल समात्न सकेनन् । सुरुमा ड्रप गरे । त्यसपछि समातेर स्टम्प ढाले जतिबेलासम्म ब्याटरहरुले रन पूरा गरेका थिएनन्। स्कटिस खेलाडीहरू रन आउट गरेकाे भन्दै सेलिब्रेसन गर्न थाले । खेल बराबरीमा रोकिएको र सुपरओभरबाट निर्णय हुने ठानेर उनीहरूले खुशी मनाएका थिए ।
तर, नन स्ट्राइततिर रहेका अम्पायर मरीमरी वाइड इशारा गरिरहेका थिए । पछाडि हेर्दै दौडिरहेका करणले पनि सुरूमा रन आउट नै सोचे । जब अगाडि हेरे, अम्पायरले दुवै हात फैलाइरहेको देखे । त्यसपछि भने बल्ल उनले ब्याट उठाएर जितको सेलिब्रेसन गरे । यद्यपि अतिरिक्त उमंग देखाएनन् । उनी शान्त नै थिए । मैदानबाहिरबाट दर्शकहरू धुइरिएर उनीतिर आए र प्रेम दर्शाउन थाले । नदर्शाउन् पनि किन, जसले नेपाललाई हारबाट जोगाएर एउटा मीठो जितको स्वाद चखाएका थिए ।
यो जित नेपालका लागि धेरै अर्थमा महत्वपूर्ण छ । यसलाई ऐतिहासिक, रोमाञ्चक, अविस्मरणीय जे नाम दिँदा पनि हुन्छ । नेपालले विदेशी भूमिमा अहिलेसम्मकै सबैभन्दा ठूलो स्कोर चेज गर्यो । तर, यो जितको आयाम यतिमा मात्र सीमित छैन ।
लिग २ मा नेपाल कठिन स्थितिमा छ । योभन्दा अघि १२ खेल खेल्दा नेपालले दुईवटा मात्रै जित निकाल्न सकेको थियो । ओडीआई मान्यता समेत धरापमा पर्न लागेको स्थितिमा यो सिरिजले नेपालको भाग्य निर्धारण गर्न सक्छ । सम्भवत: लिग २ मै सर्वाधिक कठिन श्रृंखला पनि हो यो नेपालका लागि । किनकी स्कटल्यान्ड र नेदरल्यान्ड्स दुवै नेपालभन्दा बलिया प्रतिस्पर्धी हुन् ।
विदेशी भूमिमा नेपालले गतिलो ब्याटिङ गर्न नसक्ने आरोप लाग्दै आएको छ विगतदेखि नै । खासगरी फास्ट बलरलाई सहयोग गर्ने ‘स्वीङ एन्ड बाउन्स’ भएको पीचमा नेपाली ब्याटरहरू बारम्बार लड्खडाउने गर्छन् । स्कटल्यान्डको पीचमा पनि यही क्याटेगोरीमा पर्छ । तर, नेपाली ब्याटरहरूले देखाइदिए कि अब उनीहरू जस्तोसुकै कन्डिसनका लागि पनि तयार छन् । यद्यपि, स्कटल्यान्डको टिममा केही प्रमुख खेलाडी अनुपस्थित रहेकाले पनि नेपाललाई फाइदा मिलेको पक्कै हो ।
२९६ रनको चुनौती पछ्याउने क्रममा नेपालले सुरूबाटै ‘इन्टेन्ट’ देखाएको थियो । ओपनर कुशल भुर्तेलले ११ चौका हान्दै आफ्नो आक्रामकता प्रस्तुत गरे । उनले ४४ बलमा ५३ रनको अर्धसतकीय पारी खेल्दै नेपाललाई उत्कृष्ट सुरूवात दिलाएका थिए । यद्यपि, सिंगल-डबलमा पनि ध्यान दिएको भए उनको स्ट्राइक रेट अझै राम्रो हुन सक्थ्यो । अर्को इन्डबाट ‘स्लो’ ब्याटिङ गर्दै आसिफ शेखले ३३ बलमा २० रन जोडे ।
कुशल र आसिफ आउट भएपछि भीम सार्की र कप्तान रोहितकुमार पौडेलले आफ्नै गर्दै नेपाललाई डोहोर्याए । उनी क्रिजमा हुँदासम्म नेपाल बलियो स्थितिमा थियो । तर, मध्यक्रमका आरिफ शेख र उपकप्तान दिपेन्द्र सिंह ऐरी नचल्दा नेपाल दबाबमा पर्यो । उनीहरू दुवैले संयुक्तरूपमा ३८ बल खपत गर्दा १५ रनमात्रै जोड्न सके ।
आठौं नम्बरमा आएका सोमपाल कामी पनि फ्लप भएपछि नेपाल १९२ रनमा सात विकेटको दयनीय अवस्थामा खस्कियो । लगभग हारको संघारमा देखियो । तर, करण आएपछि फेरि खेलले अर्को मोड लियो, जुन माथि नै वर्णन गरियो । गुल्शन र करणले नेपाललाई जोगाए । अन्तिममा ‘हिरो’ करण भए । उनले ४१ बलमा ६५ रनको अविजित इनिङ खेले, जसमा ४ छक्का र तीन चौका सामेल थियो । यो उनको जीवनकै अर्को अविस्मरणीय म्याच हुनेछ ।
सायद हिजो करणको दिन थियो । उनी ब्याटिङमा मात्र नभएर बलिङमा पनि चम्किए । उनले १० ओभरमा ४३ रन खर्चेर दुई विकेट लिएपछि स्कटल्यान्ड विशाल लक्ष्य बनाउन चुकेको थियो । करणसँगै अन्य दुई फास्ट बलर रिजन ढकाल र सोमपाल कामीले पनि दुई-दुई विकेट बाँडे । यद्यपि, उनीहरू केही महंगा बनेका थिए । स्पिनर सन्दीप लामिछानेले किफायति बलिङ गर्दै १० ओभरमा ४४ रन खर्चेर एक विकेट लिए । स्पिनरलाई खासै सहयोग नरहेको पिचमा उनको यो प्रदर्शनलाई पनि सन्तोषजनक प्रदर्शन नै मान्नुपर्छ ।
अब लिग २ को चर्चा गरौं, जहाँ नेपाल अलिकति अप्ठेरो स्थितिमा छ । ८ देश सहभागी रहेको श्रृंखलामा पुछरबाट दोस्रो स्थानमा छ नेपाल । यसअघि १२ खेल खेल्दा नेपालले केबल दुई जित निकाल्न सकेको थियो भने ८ हार व्यहोरेको थियो । दुई खेल नतिजाविहीन बनेका थिए । आफ्नै घरेलु मैदानमा समेत राम्रो नतिजा निकाल्न नसकेकाले नेपाल बढी दबाबमा परेको हो ।
लिग २ को यात्रामा स्कटल्यान्डविरुद्धको जित नेपालका लागि एउटा टर्निङ प्वाइन्ट बन्न सक्ने आशा गरिएको छ । भोलि नेपालले अर्को बलियो प्रतिद्वन्द्वी नेदरल्यान्ड्ससँग खेल्दैछ । अहिले अंकतालिकामा अमेरिकापछि दोस्रो स्थानमा रहेको नेदरल्यान्डसँग नेपालले उच्च मनोबलका साथ पेश हुने छ । यद्यपि, नेपालले केही कमीकमजोरी सुधार्नुपर्ने स्थिति छ ।
नेपालको फास्ट बलिङ अझै पनि धारिलो हुन सकिरहेको छैन । हिजोको म्याचमा अनुभवी सोमपाल कामी र उदियमान रिजन ढकाल महंगा बने । उनीहरूले क्रमशः १० ओभर बलिङ कोटा पूरा गर्दा ६६ र ७८ रन खर्चिएका थिए । फास्ट बलिङलाई सहयोग गर्ने पिचमा उनीहरूले अझै उत्कृष्टता देखाउनुपर्ने छ । यद्यपि, नेदरल्यान्डविरुद्धको खेलमा नेपालले रिजनको ठाउँमा नन्दन यादवलाई स्थान दिन पनि सक्छ ।
नेपालको अर्को चिन्ताको विषय भनेको उपकप्तान दिपेन्द्रको ओडीआई फर्म हो । हिजो उनको ब्याटिङ बिर्सनलायक नै थियो । झण्डै तीन सयको रन पछ्याउनुपर्ने म्याचमा उनले २३ को दयनीय स्ट्राइक रेटमा ब्याटिङ गर्दै २३ बलमा ८ रन जोडेर आउट भए । दीपेन्द्रको क्षमतामा शंका होइन, उनी नेपालका एक प्रमुख ब्याटर हुन्, तर अहिले फर्म कमजोर छ ।
त्यसैले एक-दुई खेलमा उनलाई रेस्ट दिएर बसिर अहमदलाई प्लेइङ ११ मा इन्ट्री गराउने अप्सन नेपालसँग छ । बसिर पछिल्लो समय मध्यक्रमका उत्कृष्ट ब्याटरका रूपमा उदाइरहेका छन् र उनलाई आगामी खेलमा मौका दिइनैपर्छ । बरु आरिफ शेखलाई बाहिर राख्न सकिन्छ । साथै, ओपनिङमा अहिले आसिफ शेखभन्दा अनिल साहलाई राख्दा राम्रो हो । किनकी पछिल्लो समय आसिफले खासै कन्फिडेन्सका साथ ब्याटिङ गर्न सकिरहेका छैनन् ।
