Category: खेल प्रेस

पोखरा । एभरेस्ट महिला भलिबल लिग (इडब्लुभी) मा लुम्बिनी लाभाजले पहिलो जित निकालेको छ । पोखरा रंगशालास्थित बहुउद्देश्यीय कभर्डहलमा आइतबार भएको दोस्रो खेलमा घरेलु टोली पोखरा निन्जाजलाई ३–२ को सेटले पराजित गर्दै लुम्बिनीले पहिलो जित दर्ता गरेको हो ।

पहिलो सेट १३–२५ ले गुमाएको पोखराले दोस्रो र तेस्रो सेटमा उत्कृष्ट पुनरागमन गर्दै खेलमा पकड जमाएको थियो पोखराले दोस्रो सेट २५–२३ र तेस्रो सेट २५–१० ले आफ्नो पक्षमा पा¥यो । तर, निकै प्रतिष्पर्धात्मक भएको चौथो सेटमा २८–२६ ले लुम्बिनीले जित निकाल्दा खेल पाँचौं सेटमा धकेलिएको थियो ।

पाँचौ सेटमा सुरुआतबाटै अग्रता बढाउँदै लुम्बिनीले १५–१० को सहज जित दर्ता गर्यो । पहिलो जितसँगै लुम्बिनीले २ अंक जोडेको छ । ३ खेलमा जितविहीर रहेको पोखराले एक अंक जोडेको छ ।

लुम्बिनी पहिलो खेलमा कर्णाली यशविशसँग ३–१ को सेटमा पराजित भएको थियो । पोखराले भने लगातार तेस्रो हार बेहोरेको छ ।

पोखरा पहिलो खेलमा कर्णाली यशविश र दोस्रो खेलमा मधेश युनाइटेडसँग पराजित भएको थियो । यसअघि आजै भएको पहिलो खेलमा काठमाडौं स्पाईकर्सले मधेश युनाइटेडलाई ३–१ को सेटले पराजित गरेको थियो ।

लिगको चौथो दिन सोमबार दुई खेल हुनेछन् । पहिलो खेल कर्णाली यसविश र काठमाडौं स्पाईकर्सबिच हुनेछ । उक्त खेल दिउँसो २ बजेबाट सुरु हुनेछ ।

त्यसपछि भोलिको दोस्रो तथा अन्तिम खेल ललितपुर क्विन्स र लुम्बिनी लाभाजबिच हुनेछ । इन्फिनिटी ड्रिम्स प्रालिको आयोजनामा जारी लिग २८ भदौसम्म चल्नेछ ।

काठमाडौं । नेपाल र बंगलादेशबीचको पहिलो अन्तर्राष्ट्रिय मैत्रीपूर्ण खेल गोल रहित बराबरीमा सकिएको छ । दशरथ रंगशालामा शनिबार भएको खेलमा दुवैतर्फबाट कुनै पनि गोल हुन सकेन ।

खेलका क्रममा दुवै टोलीले गोल गर्ने अवसर पाएपनि गोल गर्न सकेनन् । यी दुई टोलीबिचको दोस्रो मैत्रीपुर्ण खेल मंगलबार हुनेछ ।

पोखरा । एभरेष्ट महिला भलिबल लिग (इडब्लुभी) मा मधेश युनाइटेडले पोखरा निन्जाजमाथि सहज जित निकालेको छ । पोखरा रंगशालास्थित बहुउद्देश्यीय कभर्डहलमा शनिबार भएको तेस्रो खेलमा मधेशले पोखरालाई ३-० को सोझो सेटमा पराजित गर्‍यो । मधेशले पहिलो र दोस्रो सेट समान २५-१९ र तेस्रो सेट २५-२३ ले जित निकाल्यो । मधेशको यो पहिलो जित हो भने पोखराको दोस्रो हार हो ।

आजै भएको पहिलो खेलमा ललितपर क्विन्सले काठमाडौं स्पाईकर्सलाई ३–० सोझो सेटमा पराजित गरेको थियो । आजको दोस्रो खेलमा कर्णाली यशविशले लुम्बिनी लाभाजलाई ३–१ को सेटले हराएको थियो ।

लिगको तेस्रो दिन आइतबार दुई खेल हुनेछ । पहिलो खेल मधेश युनाइटेड र काठमाडौं स्पाईकर्सबिच दिउँसो २ बजेबाट सुरु हुनेछ । भोलिको दोस्रो खेल पोखरा निन्जाज र लुम्बिनी लाभाजबिचको खेल ४ बजेबाट सुरु हुनेछ । इन्फनिटी ड्रिम्स प्रालिको आयोजनामा जारी लिग भदौं २८ गतेसम्म चल्नेछ ।

काठमाडौं । नेपाल प्रिमियर लिग ( एनपीएल ) को दोस्रो संस्करणको ट्रफी टुर शनिबारदेखि हुने भएको छ । ट्रफी पुर्वको विराटनगरदेखि सुदूरपश्चिमसम्म लगिनेछ ।

ट्रफी विराटनगर, जनकपुर, चितवन, काठमाडौं, पोखरा,लुम्बिनी, कर्णाली र सुदूरपश्चिममा पुर्‍याइनेछ ।

दोस्रो संस्करणको एनपिएल आगामी पुस १ देखि २७ गतेसम्म काठमाडौंमा हुनेछ ।

पोखरा । दोस्रो संस्करणको एभरेष्ट महिला भलिबल लिगमा ललितपुर क्विन्सले विजयी सुरुआत गरेको छ । इन्फनिटी ड्रिम्स प्रालिको आयोजनामा पोखरा रंगशालास्थित बहुउद्देशीय कभर्डहलमा आजबाट सुरु भएको लिगमा ललितपुरले मधेश युनाइटेढलाई ३–० को सहज जित निकालेको हो ।

पहिलो सेट २५–१७ ले आफ्नो पक्षमा पारेको ललितपुरले दोस्रो सेट २५–१३ र तेस्रो सेट २५–१९ ले जित निकाल्यो ।

आजै भएको पहिलो खेलमा साविक विजेता कर्णालीयशविसले पोखरा निन्जाजमाथि ३–० को सोझो सेटमा जित निकालेको थियो । कर्णालीले पहिलो सेट २५–२१ ले जित्यो । दोस्रो सेटमा २५–२० को जित निकालेको कर्णाली तेस्रो सेटमा झनै लयमा देखियो । उसले तेस्रो सेट २५–१४ अंकले जितेर सिजनको लिगमा उत्कृष्ट सुरूवात गरेको हो ।

लिगको दोस्रो दिन तिन खेल हुनेछन् । पहिलो खेल ललितपुर क्विन्स र काठमाडौं स्पाइकर्सबिच दिउँसो एक बजे हुनेछ । दोस्रो खेल कर्णाली यशविस र लुम्बिनी लाभाजबिचको खेल दिउँसो ३ बजेबाट सुरु हुनेछ । भोलिको अन्तिम खेल पोखरा निन्जाज र मधेश युनाइटेडबिच हुनेछ । उक्त खेल अपरान्ह ५ बजेबाट सुरु हुने तालिका छ ।

भदौ २८ गतेसम्म चल्ने लिगमा ६ फ्रेन्चाइज टिमले प्रतिस्पर्धा गर्नेछन् । सहभागी टोलीले सिंगल राउण्ड रोविनका आधारमा एकआपसमा खेलेपछि शीर्ष दुई टोलीले भदौ २८ गते फाइनलमा प्रतिष्पर्धा गर्नेछन् । दोस्रो संस्करणमा ११ देशबाट १८ विदेशी खेलाडी पोखरा आएका हुन् ।

पाेखरा । आजबाट सुरू भएकाे दाेस्राे संस्करणकाे वात्सल्य एभेरेष्ट महिला भलिबल लिग (इडब्लुभिएल) को उद्घाटन खेलमा कर्णाली यशविस र पोखरा निन्जाज आमने-सामने भएका छन्।

उद्घाटन खेल पाेखराकाे बहुउद्देश्यीय कभर्डहलमा दिउँसाे २ बजेबाट सुरू भएकाे हाे ।

उद्घाटन खेलमा कर्णाली यशविसद्वारा पोखरा निन्जाज ३-० काे सोझो सेटमा पराजित भएकाे छ।

पहिलाे सेटमा २५-२१, दाेस्राे सेटमा २५-२० र तेस्राे सेटमा २५-१४ ले पराजित भएकाे हाे।

खेलकाे प्लेयर अफ द म्याच कर्णाली यशविस जर्सी नम्वर ५ की एभानजेलिया छन्तावा घाेषित भइन्।

पाेखराले आफ्नाे दाेस्राे खेल भाेली मधेस युनाइटेड सङ्ग बेलुका ५ बजे खेल्ने छ।

त्यस्तै, आजको दोस्रो खेल ललितपुर क्विन्स र मधेश यूनाइटेड बिच जारी छ ।

कुल ६ टोलीले प्रतिस्पर्धा गर्ने यसफप्रतियोगिताकाे फाइनल खेल भने २८ गते हुनेछ।

काठमाडौं । अष्ट्रेलियाका ब्याटर क्रिस लिनले सुदूरपश्चिम रोयल्सबाट नेपाल प्रिमियर लिग (एनपीएल) को दोस्रो संस्करण खेल्ने पक्का भएको छ ।

सुदूरपश्चिम शुक्रवार सामाजिक सञ्जालमार्फत विदेशी खेलाडीको रूपमा क्रिसलाई भित्राएको जानकारी दिएको हो ।

सन् २०१४ देखि २०१८ सम्म अष्ट्रेलियाका लागि खेलेको क्रिसले १८ खेलको १६ इनिङमा २९१ रन बनाएका छन् ।

उनीसँग विविएलसहित इन्डियन प्रिमियर लिग, पाकिस्तान सुपर लिगसहितका विश्वका चर्चित लिग खेलेको अनुभव छ । पहिलो संस्करणमा सुदूरपश्चिम रोयल्स उपविजेता बनेको थियो ।

काठमाडौं । एएफसी यू-२३ एसियन कप छनोट प्रतियोगिताअन्तर्गतको पहिलो खेलमा नेपाल पराजित भएको छ ।

ताजकिस्तानको दुसान्बेस्थित पामिर रङ्गशालामा गए राति भएको समूह ‘के’ को पहिलो खेलमा ताजकिस्तानसँग नेपाल ४–० गोलले पराजित भएको हो ।

ताजकिस्तानका लागि अजिजबोएभ मुहम्मादालीले दुई तथा रहमात्सोह रमात्जोदा र देलर सारिपोभले समान एक एक गोल गरेका अन्तरराष्ट्रिय सञ्चारमाध्यमहरुले जनाएका छन् ।

आगामी शनिबार अर्को खेल नेपाल र सिरियाबीच हुनेछ । बुधबारको खेलमा सिरियाले फिलिपिन्सलाई २–१ गोलअन्तरले पाखा लगाएको थियो ।

काठमाडौं । आइसिसीको टी–२०आई वरियतामा नेपाली क्रिकेटर दीपेन्द्रसिंह ऐरी स्थान खस्किएको छ ।

अन्तर्राष्ट्रिय क्रिकेट काउन्सिल (आइसिसी) ले सार्वजनिक गरेको नयाँ वरियतामा दीपेन्द्र अलराउन्डरतर्फ एक स्थान तल झर्दै तेस्रो स्थानमा झरेका हुन् । उनी यसअघि दोस्रो स्थानमा थिए ।

अलराउन्डरतर्फ भारतका हार्दिक पान्ड्या शीर्ष स्थानमा कायमै छन्। अफगानिस्तानका मोहम्मद नाबी दोस्रो स्थानमा उक्लिएका छन्।

पोखरा । दोस्रो संस्करणको एभरेस्ट महिला भलिबल लिगको ट्रफी पोखरामा अनावरण गरिएको छ । शुक्रबारदेखि पोखरामा सुरु हुने लिगको ट्रफी बुधबार फेवा ताल किनारमा पोखरा महानगरपालिकाका मेयर धनराज आचार्यले गरे ।

उक्त कार्यक्रममा प्रमुख अतिथि मेयर आर्यलले पोखरामा भलिबलको विकास र महिला सशक्तीकरणमा यसले उल्लेखनीय योगदान पुर्याउने विश्वास व्यक्त गरे । उनले खेलले केवल मनोरञ्जन होइन, पहिचान, आत्मनिर्भरता र सामाजिक परिवर्तन ल्याउने समेत बताए ।

ट्रफीलाई तालबाराही मन्दिरमा लगेर पुजा पनि गरिएको छ । इन्फनिटी ड्रीम्स प्रालिको आयोजनामा पोखरा रंगशालास्थित बहुउद्देश्यीय कभर्डहलमा हुने लिग भदौं २८ गतेसम्म चल्नेछ ।

लिगको पहिलो खेल साविक विजेता कर्णाली यशविस र पोखरा निन्जाजबीच हुनेछ । उक्त खेल २० गते दिउँसो २ बजेबाट सुरु हुनेछ । सोही दिन दोस्रो खेल ललितपुर क्विन्स र मधेश युनाइटेडबिचको खेल दिउँसो ४ बजेबाट सुरु हुनेछ ।

भदौ २६ गतेसम्म दैनिक दुई खेल हुनेछ । लिगमा ६ फ्रेन्चाइज टोली सहभागी छन् । सबै टोलीले एकअर्कासंग खेल्नेछन् । शीर्ष दुईमा हुने टोलीले भदौ २८ गते उपाधिका लागि भिड्नेछन् ।

काठमाडौं । नेपालले घरेलु टोली ताजकिस्तानसँग खेल्दै एएफसी यु–२३ एसियन कप छनोट प्रतियोगिताको उद्घाटन गर्दैछ । ताजकिस्तानको राजधानी डुसान्बेस्थित पामीर रङ्गशालामा हुने उक्त खेलम नेपाली समयअनुसार आज राति ८ः१५ बजे हुनेछ । उक्त प्रतियोगितामा नेपाल समूह ‘के’ मा परेको छ । नेपालको समूहमा ताजिकिस्तानसँगै फिलिपिन्स र सिरिया रहेका छन् ।

नेपालले आफ्नो दोस्रो खेल यही भदौ २१ गते सिरियासँग खेल्नेछ भने तेस्रो खेल भदौ २४ गते फिलिपिन्सँग खेल्नेछ । आजै हुने पहिलो खेलमा भने सिरिया र फिलिपिन्सबीच प्रतिस्पर्धा हुनेछ ।

सिङ्गल राउन्ड रोविन पद्धतिको आधारमा हुने उक्त प्रतियोगितामा समूहको शीर्ष स्थानमा रहने टोलीले आगामी वर्ष साउदी अरेबियामा हुने एसियन कपमा स्थान बनाउनेछ । कूल ११ समूहबाट चार उत्कृष्ट उपविजेता टोलीले पनि साउदी अरेबियाका लागि छनोट हुने प्रावधान रहेको छ ।

नेपाली टोलीको गोलकिपरमा कृशल मोक्तान, अमित टमाटा र विशाल केसी छन्भने डिफेन्डरमा विवेक गुरुङ, बिशाल नेपाली, लाहन सुब्बा, निग्मा लामा, राम थापा, शङ्कर थारु र सेमान्ता थापा छन् ।

त्यसैगरी मिडपिल्डरमा अभिषेक स्याङ्तान, आयुष घलान, एरोन थापा, निराज कार्की, दीपेश गुरुङ, कृतिश रत्न चुन्जु, पुजन थापा, सञ्जीव लामा, सन्तोष खत्री, सुजन मगर र सुमित श्रेष्ठ छन् । फरवार्डमा रोहन खड्गी र निराजन धामी छन् ।

काठमाडौं । काठमाडौं स्पाईकर्सबाट दोस्रो संस्करणको एभरेष्ट महिला भलिबल लिग खेल्न तीन विदेशी खेलाडी नेपाल आइपुगेका छन् । काठमाडौंबाट खेल्न थाईल्याण्डका दुई र बुल्गेरियाका एक खेलाडी मंगलबार नेपाल आइपुगेका हुन् ।

थाईल्याण्डका अपोजिट हिटर अपिन्या प्रथाबिमसोङ र आउटसाईड हिटर कन्चना सिसाईकाएओ तथा बुल्गेरसयनकी सेटर पोलिना नेकोभालाई काठमाडौंले टोलीमा अनुबन्ध गरेको थियो ।

काठमाडौंकी मार्की प्लेयर नेपाली राष्ट्रिय महिला भलिबल टिमकी मुख्य स्पाइकर उषा भण्डारी छिन् । नेपाली खेलाडीको रुपमा मनिषा चौधरी, यमुना रसाइँली, रिमा कुँवर, बाल्मिका आचार्य, कमला पुन, आशिका क्षेत्री र भुवनेश्वरी चन्द छन् । लिग भदौ २० देखि २८ सम्म पोखरामा हुँदैछ ।

काठमाडौं । भारतको गुवाहाटीमा आसाम टिमविरुद्ध भएको ५ खेलको टी–२० सिरिज नेपाल ‘ए’ टिमले ३–२ ले आफ्नो पक्षमा पार्यो । उक्त सिरिजमा प्रभावशाली प्रदर्शन गर्दै केही खेलाडीले राष्ट्रिय टोलीको ढोकासमेत ढकढक्याएका छन् ।

कुनै पनि देशको ‘ए’ टिमलाई राष्ट्रिय टिमको ब्याकअपका रुपमा पनि हेरिन्छ । त्यस हिसाबले यो सिरिजबाट नेपाली टिमको ब्याकअप वा बेन्च स्ट्रेन्थ बलियो भएको छ । केही खेलाडीले आफूहरु राष्ट्रिय टिमका लागि योग्य रहेको छनक दिएका छन् । जसमध्ये एक हुन् अलराउन्डर आदिल अन्सारी ।

यो सिरिजमा नेपालका समर्थकहरुको आदिलप्रति विशेष नजर थियो । कारण उनले लामो समयको ग्यापपछि अन्तर्राष्ट्रिय क्रिकेटमा कमब्याक गर्दै थिए । फिक्सिङको आरोपमा क्रिकेट संघले निलम्बन गरेपश्चात धरापमा परेको उनको करिअर फेरि पुनःजागृत भएको छ ।

र, यो सिरिजमा आलमले आफूलाई प्रमाणित गरेर देखाए । समर्थकहरुको अपेक्षा अनुसारकै प्रदर्शन गरे । बलिङमा त्यति नचले पनि ब्याटिङमा उनले आफ्नो छाप छोडेका छन् ।

नेपाली राष्ट्रिय टोलीबाट खेलिसकेका आदिल पुनरागमन गर्ने पर्खाइमा छन् । विश्वकप छनोटका लागि तयार गरिएको ३२ खेलाडीको सूचीमा उनी अटाएका थिए । आदिलले अन्तिम स्क्वाडमा अटाउनका लागि भारतमा आत्मविश्वासी प्रदर्शन गरे । ४ खेलमा उनले कुल ८५ रन बनाए ।

यो ठूलो अंक होइन । विशेष चाहिँ उनको स्ट्राइक रेट हो । आदिलले २ सयभन्दा बढीको स्ट्राइक रेटमा ब्याटिङ गरे, जुन टि २० मा विशेष मानिन्छ । प्रत्येक खेलमा उनको ब्याटिङ छोटो तर प्रभावशाली रहयो । विशेषतः उनी एउटा पावरफुल सिक्स हिटरका रुपमा देखा परे ।

पहिलो खेलमा ब्याटिङ गर्ने पालो नपाएका आदिल दोस्रो खेलमा ८ बलमा १४ रन बनाएर आउट भए । त्यति छोटो इनिङमा उनले २ छक्का प्रहार गर्न भ्याएका थिए । तेस्रो खेलमा छैटौं नम्बरमा ब्याटिङ गर्न आएका आदिलले १६ बलमा ३५ रन ठोके । २१८ को स्ट्राइक रेटमा ब्याटिङ गर्दै उनले एक चौका र ४ छक्का प्रहार गरेका थिए ।

चौथो खेलमा ७ बलमा ११ रन बनाएका आदिल पाँचौं तथा अन्तिम खेलमा ११ बलमा २५ रन बनाएर अविजित रहे । उक्त खेलमा उनले ३ छक्का प्रहार गरे । ४ खेलमा उनले १० छक्का र २ चौंका प्रहार गरेका छन् । रन धेरै नहाने पनि उनले अन्तिम समयमा आएर टोलीको रनरेट उकास्न महत्वपूर्ण भूमिका खेले ।

क्रिजमा आउनेवित्तिकै आक्रमण गरिहाल्न जतिसुकै विष्फोटक ब्याट्सम्यानका लागि पनि चुनौति हुन्छ । आदिलले त्यो आत्मविश्वास र कौशल देखाएका छन् । उनले आफ्नो सिग्नेचर हेलिकोप्टर सट हानेर फ्यानहरुलाई खुशी दिए ।

२०७९ मा भएको नेपाल टी–२० लिगमा ‘स्पट फिक्सिङ’ को आरोप लागेका आदिलले २०८१ मा सफाइ पाएका थिए । राष्ट्रिय टीमबाट खेल्न थालेको छोटो समयमै आदिल प्रतिवन्धमा परेका थिए । त्यसपछि उनको करिअर लथालिंग भयो । प्रतिवन्धमा पर्नुअघि उनलाई खासगरि टि–२० मा आशालाग्दा अलराउन्डरको रुपमा हर्न थालिएको थियो ।

मध्यक्रममा आएर आक्रमक ब्याटिङ गर्ने उनी मध्यम गतिको बलिङ पनि गर्छन् । उनको बलिङ भने यो प्रतियोगितामा त्यति जमेन ।

आदिलले कम समय राष्ट्रिय टोलीबाट खेले पनि आफ्नो छाप छोड्न सफल भएका थिए । २०७८ को अन्तिमतिर टीयू क्रिकेट मैदानमा भएको त्रिकोणात्मक टी–२०आई सिरिजअन्तर्गत पीएनजीविरुद्ध उनले डेब्यू गरेका थिए । डेब्यू खेलमै आदिलले उत्कृष्ट प्रदर्शन गरे । पाँचौं नम्बरमा ब्याटिङ गर्न आएका उनले विष्फोटक शैलीमा खेल्दै ११ बलमा ३१ रन बनाए । उनले एक चौका र ३ छक्का प्रहार गरेका थिए । यही म्याचमा उनले प्रहार गरेको ‘हेलिकोप्टर सट’ अहिलेसम्म उनको पहिचान बनिरहेको छ ।

काठमाडौं । युएईमा हुने नेपाल र बेष्ट इन्डिजबिचको टी-२० आई सिरिजको मिति परिवर्तन गरिएको छ । एसिया कपको फाइनलका कारण सिरिजको मिति परिवर्तन गरिएको नेपाल क्रिकेट संघ क्यानका प्रवक्ता छुम्बी लामाले जानकारी दिए ।

अब नेपाल र बेष्ट इन्डिजबीचको सिरिजका खेल सेप्टेम्बर २७, २९ र ३० मा हुनेछ । यसअघि सेप्टेम्बर २७, २८ र ३० तय गरिएको थियो । एसिया कपको फाइनल सेप्टेम्बर २८ मा हुनेछ ।

पोखरा । दोस्रो संस्करणको एभरेष्ट महिला भलिबल लिगको खेल तालिका सार्वजनिक भएको छ । आयोजक इन्फनिटी ड्रीम्स प्रालिले भदौ २० देखि २८ गतेसम्म पोखरामा हुने लिगको खेल तालिका सार्वजनिक गरेको हो ।

सार्वजनिक तालिकाअनुसार पहिलो खेल साविक विजेता कर्णाली यशविस र पोखरा निन्जाजबीच हुनेछ । उक्त खेल २० गते दिउँसो २ बजेबाट सुरु हुनेछ । सोही दिन दोस्रो खेल ललितपुर क्विन्स र मधेश युनाइटेडबिचको खेल दिउँसो ४ बजेबाट सुरु हुनेछ ।

भदौ २६ गतेसम्म दैनिक दुई खेल हुनेछ । लिगमा ६ फ्रेन्चाइज टोली सहभागी छन् । सबै टोलीले एकअर्कासंग खेल्नेछन् । शीर्ष दुईमा हुने टोलीले भदौ २८ गते उपाधिका लागि भिड्नेछन् ।

काठमाडौं । कीर्तिपुरस्थित त्रिवि क्रिकेट मैदानमा फ्लडलाइड जडान कार्य धमाधम भइरहेको छ ।

मैदानको वरिपरि ६ वटा फ्लडलाइड जडान कार्यको पहिलो चरणको कार्य फ्लडलाइडको पोल जडान कार्य धमाधम भइरहेको हो ।

जस अन्तर्गत ४ वटा पोलहरु जडान गरी सकिएको छ भने अब २ वटा पोल जडान गर्न बाँकी रहेको र सो काम पनि आज र भोलिमा सकिने छ ।
त्यस पश्चात् पोल इन्स्टलेसन गरी तिहारभित्र लाइट बाल्ने निर्माण कम्पनीको योजना रहेको छ ।

फ्लडलाइड जडान का लागि २७ करोड ४० लाख रुपैयाँमा विशाण–ईश्वरी जोइन्ट भेन्चर ठेक्का लिएको हो ।

तस्बिर: नेपाल फोटो लाइब्रेरी ।

काठमाडौं । भारतको आसामविरुद्ध ५ खेलको टी–२० सिरिज नेपालले ‘ए’ टिमले जितेको छ ।

भारतको गुवाहाटीमा भएको पाचौं तथा अन्तिम खेलमा आसामलाई ४४ रनले पराजित गर्दे नेपाल ‘ए’ टिमले सिरिज आफ्नो पक्षमा पारेको हो ।

अन्तिम तथा निर्णायक खेलमा नेपालले दिएको २०९ रनको लक्ष्य पछ्याएको आसामले २० ओभरमा ९ विकेट गुमाएर १६४ रन मात्रै बनाउन सक्यो ।

आसामका लागि भार्गव लहकरले सर्वाधिक २९ रनको योगदान दिए । बलिङमा नेपालका पवन सर्राफ, शेर मल्ल र आकाश चन्दले समान २ विकेट लिँदा बसिर अहमदले १ विकेट हात पारे ।

त्यसअघि पहिला पहिला ब्याटिङ गरेको नेपाल ‘ए’ ले निर्धारित २० ओभरमा ५ विकेट गुमाएर २०८ रन खडा गरेको थियो ।

नेपालका लागि सन्दीप जोराले सर्वाधिक ६४ रन बनाए । आदिल अन्सारीले ११ बलमा अविजित २५ रन जोडे । शुभ कंसाकारले ४१ र इशान पाण्डेले ३२ रनको योगदान दिए ।

काठमाडौं । नेपालको ‘ए’ टीमले निर्णायक खेलमा भारतको आसाम टीमसामु २०९ रनको विशाल लक्ष्य प्रस्तुत गरेको छ ।

भारतको गुवाहाटीमा पहिला ब्याटिङ गरेको नेपाल ‘ए’ ले निर्धारित २० ओभरमा ५ विकेट गुमाएर २०८ रन खडा गर्‍यो ।

नेपालका लागि सन्दीप जोराले सर्वाधिक ६४ रन बनाए । आदिल अन्सारीले ११ बलमा अविजित २५ रन जोडे । शुभ कंसाकारले ४१ र इशान पाण्डेले ३२ रनको योगदान दिए ।

यो खेलमा जित निकाल्ने टोलीले सिरिज आफ्नो पक्षमा पार्नेछ ।

काठमाडौँ । ग्रिसकी राष्ट्रिय महिला भलिबल खेलाडी इभान्जेलिया चान्टाभा नेपाल आइपुगेकी छन् ।

आगामी भदौ २० गतेदेखि २८ गतेसम्म पोखरामा आयोजना हुने ‘एभरेस्ट महिला भलिबल लिग’मा सहभागी हुन चान्टाभा नेपाल आएकी हुन् । उनी कर्णाली यशभिसबाट खेल्नेछिन् ।

सन् २००५ देखि व्यवसायिक खेल जीवन सुरु गरेकी चान्टाभाले ग्रिसका अलवा इटली, टर्की, थाइल्याण्ड, रोमानिया, ब्राजिल, इण्डोनेसिया, जापान लगायतका देशको विभिन्न क्लबमा आबद्ध भएर खेलिसकेकी छन् । खेल जीवनमा उनको टिम दर्जनौ पटक विजेता बनेको छ भने दर्जनौ अवार्ड समेत पाइसकेकी छन् । आउटसाइट हिटर चान्टाभाका लागि नेपाली क्लब र मैदान पहिलो हो ।

त्रिभुवन अन्तरराष्ट्रिय विमानस्थलमा पत्रकार भेटघाट कार्यक्रममा बोल्दै चान्टाभाले नेपालमा आएर भलिबल खेल्न पाउँदा खुसी लागेको प्रतिक्रिया दिइन् । उनले आफू आबद्ध कर्णाली यशभिसलाई दोस्रो पटक च्याम्पियन बनाउने गरी खेल्ने बताइन् ।

कर्णाली यशभिसले ब्राजिलियन दुई खेलाडी आना फ्लाभिया र मायरा भिटोरियालाई पनि अनुबन्ध गरेको छ । उनीहरु सोमबार साँझ नेपाल आइपुग्ने जनाइएको छ ।

महानायक राजेश हमाललाई ब्रान्ड एम्बेसडर बनाएको कर्णाली यशभिसले प्रशिक्षकको रूपमा कुमार राई र मार्की खेलाडी सुमित्रा रेग्मीलाई यो वर्ष पनि निरन्तरता दिदै लिगको अन्तिम तयारी गरिरहेको छ ।

पोखरा । पोखरा महानगरपालिकाका मेयर धनराज आचार्य र अभिनेता राजेश हमालको टीमबिच मैत्रीपूर्ण भलिबल खेल हुने भएको छ । भदौ १९ गते पोखरा हल्लनचोकमा धनराज र राजेशको टिमबिच मैत्रीपूर्ण खेल हुन लागेको हो ।

दोस्रो संस्करणमा एभरेष्ट महिला भलिबल लिग सुरु हुनुअघि उक्त खेल हुन लागेको हो । खेलमा चर्चित कलाकार, विदेशी खेलाडी र फ्रेन्चाइज टीमका प्रमुख खेलाडीहरू सहभागी हुनेछन् ।

प्रत्येक टीममा १२ खेलाडी रहनेछन्, जसमा फ्रेन्चाइज टीका टीम एम्बासेडर, प्रमुख खेलाडी, विदेशी खेलाडी, पोखरा आधारित स्थानीय इन्फ्लुएन्सरहरू र पोखरामा भलिबलसँग सम्बन्धित व्यक्तिहरू समावेश हुनेछन् ।

यो प्रदर्शनी खेलले मनोरञ्जन, प्रतिस्पर्धा र स्टार पावर को मिश्रण प्रस्तुत गर्दै दर्शकलाई लिगको उत्साह र प्रतिभाको पूर्वावलोकन दिने आयोजकको विश्वास छ ।

कलाकार आना शर्मा, सनीषा भट्टराई र आदिती बुढाथोकी सहभागी हुनेछन् । अरुणा शाही, प्रगति नाथ, सलीना श्रेष्ठ, निरुता ठगुन्ना, सुमित्रा रेग्मी, उषा भण्डारीसँगै टीका विदेशी खेलाडीहरू पनि सहभागी हुनेछन् ।

एभरेष्ट महिला भलिबल लिग भदौ २० देखि २८ गतेसम्म पोखराको बहुउद्देशीय कभर्ड हलमा हुँदैछ ।

काठमाडौं । नेपालको ‘ए’ टिमले भारतको आसाम टिमसँग पाचौं तथा अन्तिम टी–२० खेल खेल्दैछ । उक्त खेल भारतको गुवाहाटीमा साँझ ५ बजेबाट सुरु हुनेछ ।

उक्त खेल सिरिजको निर्णायक खेल हो । यो खेलमा जित निकाल्ने टोलीले सिरिज आफ्नो पक्षमा पार्नेछ । दुवै टोलीले अघिल्लो दुई दुई खेलमा जित निकालेका छन् । पहिलो खेलमा आसामले नेपाललाई डीएलएस पद्धतिबाट १५ रनले पराजित गरेको थियो ।

नेपालले दोस्रो खेलमा ९६ र तेस्रो खेलमा ९ रनले विजयी भएको थियो। चौथो खेलमा आसाम १८ रनले विजयी भएको थियो । नेपालको ‘ए’ टिमले भारतको आसाम टिमसँग ५ खेलको टी–२० सिरिज खेलेको छ ।

काठमाडौं । एएफसी महिला च्याम्पियन्स लिगमा नेपालकी प्रीति राईले एक गोल गरेकी छन् ।

जोर्डनको इतिहाद क्लबबाट खेलिरहेकी प्रीतिले मलेसियाको केलान युनाइटेडविरुद्ध गोल गरेकी हुन् ।

समूह चरणको अन्तिम खेलको ६८औँ मिनेटमा प्रीतिले गोल गरिन् । सिडालिया कुटाले दिएको क्रसलाई प्रीतिले पोस्टको दिशा दिएकी थिइन् । इतिहादबाट उनले पहिलो गोल गरेकी हुन् ।

उक्त खेलमा इतिहादले केलान युनाइटेडलाई ४-० ले पराजित गर्‍यो ।

काठमाडौं । ‘के वान वल्र्ड म्याक्स–२०२५ टुर्नामेन्ट’मा पहिलोपटक नेपाली युवा बक्सर अविरल घिमिरे (हिमालयन चितुवा) रिङमा उत्रने भएका छन् । विश्वप्रसिद्ध क्लब के वान ग्रुपद्वारा यही भदौ २२ (७ सेप्टेम्बर २०२५) गते जापानको टोकियो सहरमा सो अन्तरराष्ट्रिय प्रतियोगिता आयोजना हुँदैछ ।

‘हिमालयन चितुवा’का नामले विश्व परिचित बक्सर घिमिरेसहित चीन, बुलगेरिया, नेदरल्याण्ड्स, सेनेगल, ब्राजिल, पोल्याण्ड, आरमेनिया, अमेरिका, फ्रान्स, जर्मनी, रुस, माल्डोभाका चर्चित बक्सरले प्रतियोगितामा कडा प्रतिष्पर्धा गर्दैछन् ।

नेपालको किक बक्सिङ खेल इतिहासमा नयाँनयाँ विश्व कीर्तिमान कायम गरिसेका बक्सर घिमिरे प्रतियोगिताको पहिलो दिन फ्रान्सका प्रतिद्वन्द्वी आइमेरिक लेजीजीसँग आमनेसामने हुने तालिका के वान क्लबले सार्वजनिक गरेको छ । उसो त घिमिरेले सोही के वान खेलबाट नेपालको प्रतिनिधित्व गर्दै आफ्नो किक बक्सिङको अद्भूत प्रतिभालाई विश्वसामु प्रदर्शन गर्दै आएका छन् ।

घिमिरेले पहिलो खेल जितेमा पुनः यही कात्तिक २९ (नोभेम्बर १५, २०२५) मा एकैदिन तीन खेल खेल्नुपर्ने हुन्छ । उक्त तीन खेल खेल्दा विजय हासिल गरेमा किकबक्सिङ इतिहासमै विश्वको नम्बर वान खेलाडीको उपाधि हात पार्दै विश्व जगत्मा इतिहास रच्न सक्ने भाग्यमानी नेपाली खेलाडी बन्नेछन् ।

‘के वान वल्र्ड म्याक्स टुर्नामेन्ट’लाई किक बक्सिङ खेल क्षेत्रको सर्वोच्च प्रतियोगिता मानिन्छ । ‘के वान वल्र्ड म्याक्स–२०२५ टुर्नामेन्ट’का लागि बक्सर घिमिरेले तयारीलाई तीव्र बनाएका छन् । आफ्नै खर्चमा बक्सर घिमिरेले थाइल्याण्ड्सको फुकेट सहरस्थित टाइगर मोथाई क्लबबाट विशेष प्रशिक्षण लिएर हालैमात्र जापान फर्किएका थिए । जापानमा आफ्ना पिता पूर्वअन्तरराष्ट्रिय किक बक्सिङ खेलाडी देव घिमिरेकै विशेष प्रशिक्षणमा अविरलले सो अन्तरराष्ट्रिय प्रतियोगिताका लागि अभ्यास गरिरहेको जनाइएको छ ।

अहिले प्रतियोगिता हुने टोकियो, सिवुआलगायत सहरका सार्वजनिकस्थलका होडिङबोर्डमा नेपाली झण्डासहित ‘हिमालयन चितुवा’का तस्बिरलाई प्रदर्शन एवं प्रचार प्रसार गरिएका छन् । ती विद्युतीय बोर्डमा घिमिरेले रिङमा भिडेका प्रतिस्पर्धालाई देखाइएको छ ।

राजदूत डा सुवेदीद्वारा शुभकामना

जापानस्थित नेपाली राजदूत डा दुर्गाबहादुर सुवेदीले ‘के वान वल्र्ड म्याक्स–२०२५ टुर्नामेन्ट’मा प्रतिस्पर्धा गर्ने नेपाली खेलाडी युवा किक बक्सर घिमिरेको सफलताका कामना गरेका छन् । शुभकामना सन्देश जारी गर्दै उनले ‘के वान वल्र्ड म्याक्स–२०२५ टुर्नामेन्ट’मा नेपाली बक्सर घिमिरेले भाग लिन पाउनु आफैँमा ऐतिहासिक सफलता भएको जनाएका छन् ।

यस्तो छ ‘हिमचितुवा’को इतिहास

बक्सर अबिरलले हालसम्म हिट किकबक्सिङ तीनपटक ‘टाइटल डिफेन्स’ गर्दै चारपटक ‘हिट किकबक्सिङ टाइटल म्याच’, अन्तरराष्ट्रिय किक बक्सिङ एशोसिएसन ‘टाइटल’ र ‘केवान क्रस–१७५ टाइटल’ जित हासिल गरिसकेका अविरलले हालसम्म २५ अन्तरराष्ट्रिय प्रतियोगितामा भाग लिँदै १९ जित निकाल्ने क्रममा १८ नकआउट गरी जित निकालेका छन् ।

गत जेठ ४ गते जापानको ओसाका सहरमा सम्पन्न ‘के वन क्रस १७५’को उपाधि चुम्दै बक्सर अविरलले पहिलोपटक तीनवटा अन्तरराष्ट्रिय ‘किक बक्सिङ उपाधि’ हात पारेर अदम्य साहस तथा असाधारण उपलब्धि हासिल गरेका थिए । अत्यन्त प्रतिस्पर्धात्मक प्रतियोगितामा उहाँले जापानी किक बक्सिङ ‘च्याम्पियन’ ओडा जिन्कलाई दोस्रो राउण्डमा परास्त गर्दै के वान क्रस ‘विश्व च्याम्पियन’बनेका थिए ।

‘च्याम्पियन’ जिन्कलाई रिङमा नकआउट गर्ने किक बक्सर अविरल पहिलो खेलाडी बनेका कोच अविरलका पिता एवं पूर्वअन्तरराष्ट्रिय किक बक्सर तथा फुलकन्ट्याक कराते खेलाडी देवले जानकारी दिए ।

उनका अनुसार ‘के वन क्रस १७५’ लाई किक बक्सिङ खेलका क्षेत्रमा अन्त्यन्त प्रतिष्ठित प्रतियोगिता मानिन्छ । ‘इन्टरनेसनल किक बक्सिङ एशोसिएसन’ (इस्का) र ‘हिट’ प्रतियोगिताको टाइटल बेल्ट जित्ने बक्सर अविरल पहिलो नेपाली खेलाडी हुन् । बक्सर अविरल आफ्ना पिता देवका साथमा जापानको नागोया सहरमा बस्दै आएका छन् । पूर्व फुलकन्ट्याक्ट कराते खेलाडी देव सन् २००४ मा कोरियाको सोलमा सम्पन्न ‘के वान प्राफेसलन किक बक्सिङ प्रतियोगिता’मा सहभागी हुने पहिलो दक्षिण एसियाली खेलाडी हुन् । चन्द्रागिरि नगरपालिका–१२ गुर्जुधारा बलम्बूका बासिन्दा अविरलको परिवार हाल जापानको नागोया सहरमा बसोबास गर्दै आइरहेको छ ।

काठमाडौं । अष्ट्रेलिया भ्रमणमा रहेको नेपाली राष्ट्रिय क्रिकेट टीमले एक दिवसीय अभ्यास म्याचमा साउथ अष्ट्रेलियालाई हराएको छ ।

नेपाललाई २ विकेटको रोमाञ्चक जित दिलाउन कप्तान रोहित पौडेलले उत्कृष्ट शतक प्रहार गरे ।

काठमाडौं । नेपाल क्रिकेट संघ (क्यान) ले वर्षको उत्कृष्ट राष्ट्रिय खेल संघको उपाधि प्राप्त गरेको छ । खेल क्षेत्रको नियामक निकाय राष्ट्रिय खेलकुद परिषद (राखेप) ले आफ्नो ६२ औं वार्षिकोत्सवका अवसरमा क्यानलाई सो पुरस्कार दिएको हो ।

आज आयोजित एक कार्यक्रममा क्यान अध्यक्ष चतुरबहादुर चन्द र सचिव पारस खड्काले खेलकुदमन्त्री तेजुलाल चौधरीबाट अवार्ड ग्रहण गरे । सामाजिक सञ्जालमा पारसले राखपप्रति अभार प्रकट गरेका छन् । उनले क्रिकेट संघलाई गतिशील र प्रभावकारी बनाउँदै देशको उदाहरणीय संघ बनाउन सहयोग पुर्याउने सबैलाई धन्यवाद ज्ञापन गरेका छन् ।

आगामी दिनहरुमा समेत नेपाली क्रिकेटको निरन्तर विकास र विस्तारमा नेपाल क्रिकेट संघ अहोरात्र लागि परिरहने प्रतिवद्धता उनले व्यक्त गरेका छन् ।

काठमाडौं । भारतका गुवाहिटीमा जारी टि- २० श्रृंखलामा नेपाल ‘ए’ ले आसाम क्रिकेट एसोसिएसन टिमलाई हराएको छ ।

नेपालले टस जितेर पहिले ब्याटिङ गर्दै ७ विकेट क्षतिमा १७३ रनको प्रतिस्पर्धात्मक स्कोर बनाएको थियो । जवाफी ब्याटिङमा आसाम १५.२ ओभरमा ७७ रनमा अलआउट भएको छ ।

आसामलाई सस्तैमा समेट्न स्पिनर युवराज खत्रीले चार विकेट लिए । उनले उत्कृष्ट बलिङ गर्दै ३.२ ओभरमा १५ रन मात्रै खर्चिएका थिए ।

काठमाडौं । दक्षिण एसियाली फुटबल महासङ्घ (साफ) १७ वर्षमुनिका महिला सम्मिलित प्रतियोगिता (यु–१७) च्याम्पियनसिपअन्तर्गत आज नेपाल र भारतबीच प्रतिस्पर्धा हुँदैछ ।

नेपाली समयअनुसार खेल आज अपराह्न ६ः०० बजे हुने अखिल नेपाल फुटबल सङ्घले जनाएको छ । डबल राउन्ड रोबिन लिगमा जारी प्रतियोगितामा भारत १२ अङ्कका साथ पहिलो स्थानमा छभने तीन अङ्कका साथ नेपाल तेस्रो स्थानमा छ ।

घरेलु मैदानमा कुनै जित ननिकालेको भुटान चौथो स्थानमा छ । नौ अङ्कका साथ बङ्गलादेश दोस्रो स्थानमा छ । प्रतियोगितामा यिनै चार देश सहभागी छन् ।

खेल तालिकाअनुसार यही भदौ १५ गते भुटानसँग नेपाल भिड्ने छ । उपाधि जित्ने होडबाट नेपाल बाहिरिएको छ ।

काठमाडौं । नेपाली क्रिकेट टीमले आज एकै दिन तीन हार व्यहोर्नु परेको छ। अष्ट्रेलियामा रहेको राष्ट्रिय टिम दुई म्याचमा पराजित हुँदा भारतमा रहेको ‘ए’ टीमले पनि सुखद सुरुवात गर्न सकेन ।

असामको टीमविरुद्ध नेपालको ए टीम डर्क वर्थ नियम अनुसार १५ रनले पराजित भएको हो । यससँगै पाँच खेलको सिरिजमा असामले अग्रता लिएको छ । असामले १९० रनको बलियो स्कोर खडा गरेको थियो । नेपालले डेथ ओभरमा कमजोर बलिङ गर्दा असाम बलियो स्कोरमा पुग्न सफल भयो ।

अन्तिम दुई ओभरमा मात्रै असामका पुछारका छक्का चौकाको वर्षा गर्दै ब्याट्सम्यानले ५२ रन जोडेका थिए । नेपालका लागि आकाश चन्दले ३ विकेट लिए भने विवेक यादव र कमल सिंह ऐरीले २–२ विकेट लिए ।

जवाफी ब्याटिङमा नेपालले खराब सुरुवात गर्दै १ रनमा ओपनर इशान पाण्डेलाई गुमायो । आक्रामक ब्याटिङ गर्न खोजेका कप्तान अनिल साह १३ बलमा २० रन बनाएर पेभिलियन फर्किए । यस्तै पवन सर्राफ पनि चलेनन् । उनले ९ बलमा ६ रन मात्रै जोड्न सके ।

अर्को इन्डबाट शुभ कंसाकारले भने राम्रो खेलिरहेका थिए । तर नेपाल ३ विकेट गुमाएर ६४ रनको अवस्थामा छँदा पानीले खेल विथोल्यो । खेल रोकिँदा कंसाकारले २१ बलमा ३३ रन बनाइसकेका थिए । थप खेल हुन नसकेपछि असामलाई डीएल मेथडका आधारमा विजयी घोषित गरिएको छ।

आज अष्ट्रेलियामा भएका दुई खेलमा नेपालको राष्ट्रिय टीमले हार व्यहोरेको थियो । साउथ अष्ट्रेलियासँग भएको पहिलो खेलमा तीन विकेटले र दोस्रोमा ३ रनले नेपाल पराजित भएको हो ।