Category: नेकपा एस

घोराही । नेकपा एकीकृत समाजवादीका सम्मानित नेता झलनाथ खनालले एमाले अध्यक्ष केपी शर्मा ओलीले अध्यक्षबाट राजीनामा दिएपछि मात्रै एकता सम्भव हुने बताएका छन् ।

दाङमा जिल्ला स्तरीय कार्यकर्ता प्रशिक्षणमा बोल्दै उनले स्थानीय तह निर्वाचनमा एमाले पराजित भएपछि ओलीले राजीनामा दिने र त्यसपछि मात्रै एकता हुने बताए ।

उनले भने, ‘स्थानीय तहको चुनावमा चारैतिरबाट हारेपछि एमाले अध्यक्ष ओलीले राजीनामा दिन्छन् र ओलीले राजीनामा दिएपछि एमालेसहितका वामपन्थी दलबिच पार्टी एकता हुन्छ ।’

स्थानीय निर्वाचनमा एमालेलाई देशभरिबाटै बढार्नुपर्ने उल्लेख गर्दै खनालले संविधान च्यात्ने र संसद् विघटन गर्ने केपी ओली र उनको समूहलाई स्थानीय चुनावको बाकस खालि गराएर जनताले सजाय दिनुपर्छ भने ।

उनले एमालेलाई औपचारिक र अनौपचारिक रूपमा दक्षिणपन्थीहरूसँग मिलेर साँठगाँठ र तालमेल गर्न खोजेको आरोप पनि लगाए ।

एमालेले राप्रपाका दाहिने र देब्रे समुहसंग चुनावी तालमेल गरेर दरबारियाहरुसँग मिलेर जनताको अभिमतविरुद्ध जाने खोजेको उल्लेख गर्दै खनालले लोसपा र सिके राउतसँगको समूहसँग चुनावी तालमेल गर्न ओलीले वार्ता टोली नै बनाएको बताए ।

धनगढी । नेकपा एकीकृत समाजवादीका अध्यक्ष माधवकुमार नेपालले सुदूरपश्चिम प्रदेश सरकारको नेतृत्वमा आफ्नो पार्टीको दाबी हुनु स्वाभाविक रहेको बताएका छन् ।

धनगढीमा बिहान आयोजित पत्रकार सम्मेलनमा उनले भने, ‘सबभन्दा ठूलो दल हामी यहाँ छौं । प्रदेशसभाको सदस्य संख्याको हिसाबले प्रदेश सरकारको मुख्यमन्त्री हामीले दाबी गर्नु स्वाभाविक हो । त्यो हाम्रो दावा छदैछ, सबैमा प्याकेजमै हुन्छ ।’

नेपाली कांग्रेस सुदूरपश्चिमका सभापति वीरबहादुर बलायरले कांग्रेस एक्लै चुनाव लड्ने भनेर सार्वजनिक मन्तव्य दिइरहेको विषयलाई उनले ‘व्यक्तिको बोली’ भनेर टारिदिए ।

यसमा सांकेतिकरूपमा एमाले अध्यक्ष केपी शर्मा ओलीको जस्तो दम्भ र अहंकार देखाए आफैंलाई क्षति पुग्ने भनेर घुमाउरो जवाफ दिएका थिए ।

धनगढी । नेकपा एकीकृत समाजवादीका अध्यक्ष माधवकुमार नेपालले पाँच दलबीच चुनावी तालमेल हुने भएपछि जनतामा उत्साह थपिएको बताएका छन् । नेकपा एमालेतर्फ लक्षित गर्दै उनले त्यसले जनविरोधी शक्तिहरू छट्पटाउन थालेको दाबी गरे ।

‘वामपन्थी र लोकतान्त्रिक शक्तिहरू मिलेर चुनावमा जाने सहमति भएको छ । यसले जनतामा उत्साह थपेको छ,’ धनगढीमा आयोजित पत्रकार सम्मेलनमा बोल्दै अध्यक्ष नेपालले भने, ‘यसले जनविरोधीहरूको मुख चाउरिएको छ । निद्रा हराम भएको छ । दिमाग बिग्रेको छ । बेहोस हुन बेर छैन ।’

नेता नेपालले चुनावी तालमेलको निर्णयले उनीहरू जे पायो त्यही बोलेर बर्बराउन थालेको टिप्पणी गरे ।

‘अब उनीहरूको काम बर्बराउने हो उनीहरूको काम भनेको जथाभावी बोल्ने हो । हामी अगाडि बढ्छौं । अब हात्ती हिँड्दै गर्छ । अरु कल्ले भुक्ने हो, भुक्ने काम जति भुक्छ चिन्ता नगर्नुस्,’ उनले थपे ।

नेपालले भने, ‘समयको प्रवाह हाम्रो पक्षमा छ । यो प्रवाहले हामीलाई अगाडि बढ्न उप्रेरित गरिरहेको छ ।’ त्यसको कारण आफूहरूले लिएको सही विचार, सही नीति, सही मूल्य र मान्यता र सही संस्कार रहेको उनले बताए ।

त्यसको ठीक उल्टो प्रतिगामी शक्तिहको ध्वंस गर्ने प्रवृत्ति छताछुल्ल भएकाले कमजोर हुन पुगेको उनको भनाइ छ ।

नाम नलिए पनि एमाले अध्यक्ष केपी शर्मा ओलीतर्फ ईंगित गर्दै उनले ‘दिमाग खुस्केको’ भन्नसम्म भ्याए । उनले भने, ‘दिमाग खुस्के जस्तै जे मुखमा आयो त्यहीँ बोलेको छ । बकबक गर्‍या छ । हामी त्यस्तो बाटो लिँदैनौँ । त्यस्तो प्रवृत्तिबाट सिक्दैनौँ । हामी सुसंस्कार दिन्छौ । त्यसैबाट उत्प्रेरित गर्छौं ।’

गलत ट्रयाकमा गएको राजनीतिलाई ठीक ट्रयाकमा ल्याउनका नेकपा एसले नै पहल गरेको नेपालको जिकिर थियो ।

काठमाडौं । नेकपा (एकीकृत समाजवादी) ले मुखपत्रको रूपमा ‘कलमन्यूज डटकम डट एनपी’ नामक समाचार पोर्टल सुरू गरेको छ । पार्टीनिकट पत्रकारको संगठन समाजवादी प्रेस संगठनले आधिकारिक पोर्टलस्वरूप डिजिट प्रकाशनको रूपमा उक्त अनलाइन सञ्चालनमा ल्याएको हो ।

नेकपा (एस) को निर्वाचन चिन्ह ‘कलम’ को नामबाट ल्याइएको पोर्टलको उद्घाटन समाजवादी प्रेस संठगनको विस्तारित बैठकबीच अध्यक्ष माधवकुमार नेपालले गरे ।

पोर्टलबाट निरन्तर समाचार सामाग्रीहरू अपडेट गरिने समाजवादी प्रेस संगठनले जनाएको छ ।

यस्तै प्रत्येक १५/१५ दिनमा छापा संस्करण पनि प्रकाशन गर्ने संगठनले जानकारी दिएको छ ।

रुपन्देही । नेकपा एकीकृत समाजवादीका अध्यक्ष माधवकुमार नेपालले गठबन्धन तीनै तहको निर्वाचनसम्म कायम रहने बताएका छन् ।

गठबन्धन कायम नै रहने उल्लेख गर्दै पूर्व प्रधानमन्त्री समेत रहेका अध्यक्ष नेपालले गठबन्धनबाट नै एमाले नराम्रोसँग पछारिने बताए ।

नेकपा एमालेमा सूर्य ग्रहण लागिसकेको बताउँदै नेता नेपालले एमालेभित्रका अहङ्कारी नेताहरूकै कारण अहिलेको अवस्था आएको तर्क गरेका छन् ।

आज गुल्मीको तम्घासमा एकीकृत समाजवादी पार्टीको जिल्ला स्तरीय अगुवा कार्यकर्ता भेलालाई सम्बोधन गर्दै उनले एमाले अध्यक्ष केपी ओलीको अहङ्कारी सोचका कारण पार्टीमा सूर्य ग्रहण लागेको बताएका हुन् ।

ओलीले नेतृत्व गरेको पार्टीमा विचार, सिद्धान्त केही नभई ओलीका आसेपासेहरू मात्र रहेको आरोप लगाउँदै उनले एमाले कहिल्यै पनि जनताको पार्टी बन्न नसक्ने जिकिर गरे । हुँदा खादाको झन्डै दुई तिहाइको सरकारमा हुँदा व्यक्तिवादी सोचका कारण सत्ताबाट बाहिर रहनुपरेको बताउँदै एमाले अब धुलोमा मिल्ने समेत उनले दाबी गरे ।

नेता नेपालले नेकपा एमाले पार्टी आफूले निर्माण गरेको दाबी गर्दै अहिले ओलीले कब्जा जमाएको समेत बताए । पार्टी निर्माणमा आफ्नो भूमिका रहेको भन्दै तानाशाही तवरले पार्टी चलाउन खोजेकाले आफूहरू नयाँ पार्टी निर्माणमा लागेको समेत उनले दाबी गरे ।

ओलीको व्यक्तिवादी र अतिवादी सोचका कारण नै सिंहदरबारबाट बालकोट जानुपरेको, सरकारमा रहँदा सत्ता र शक्तिको समेत दुरुपयोग गरी भ्रष्टाचारमा लिप्त रहेको उनले आरोप लगाए ।

सम्बोधनकै क्रममा नेता नेपालले गुल्मेली जनताले जिताएर पठाएका नेता गफाडी भएको आरोप लगाएका छन् ।

कसैको नाम नलिई अध्यक्ष नेपालले गुल्मीबाट संसद्मा प्रतिनिधित्व गर्ने नेकपा एमालेका नेताहरू प्रदीपकुमार ज्ञवाली र गोकर्ण विष्टप्रति लक्षित गर्दै भने, ‘अहिले जितेर गएका नेताहरू केबल जनतालाई झुट्टा आश्वासन मात्रै दिने नेता भएका छन् ।’

‘म गुल्मी आएपछि यहाँबाट जितेर गएका नेताको बारेमा सोधेँ, तिनीहरू त आफैले पढेको स्कुल भवन जीर्ण हुँदासमेत बजेट माग नगर्ने,चुनावको समयमा झुटा आश्वासन दिने नेता पो रहेछन्’, उनले भने ।

काठमाडौं । नेकपा एकीकृत समाजवादीका सम्मानित नेता झलनाथ खनालले केपी ओली नेतृत्वको नेकपा एमाले उत्प्रेषणको आदेशबाट बनेको गुट भन्दै आफूहरुले बनाएको एमाले नेकपा एकतासँगै विघटन भइसकेको बताएका छन् ।

नेकपा एस निकट समाजवादी प्रेस संगठनको विस्तारित बैठकलाई शनिबार काठमाडौंमा सम्बोधन गर्दै नेता खनालले एमालेहरुले अहिले देशभरी आफूहरु पूरानै एमाले भएका भनेर भ्रम छरिरहेको बताए ।

खनालले भने– त्यो गुटले देशभरी भ्रम छरिरहेको छ, एमाले भनेर । त्यो एमाले त नेकपा एकीकरणसँगै विघटन भइसकेको हो । यो त सर्वोच्च अदालतको उत्प्रेषणको आदेशबाट जन्मिएको गुट हो । तर त्यसभित्र हामीले तन्त्रमन्त्र गरेका र शिक्षित गरेका थुप्रै साथीहरु त्यहाँभित्र हुनुहुन्छ । उहाँहरु भ्रममुक्त भएर आउनुपर्छ ।

काठमाडौं । नेकपा एकीकृत समाजवादीले पार्टीका विभिन्न केन्द्रीय विभाग र प्रदेश कमिटीहरूलाई पूर्णता दिएको छ ।

नेकपा एसका महासचिव डा. बेदुराम भुसालले शुक्रबार प्रेस विज्ञप्ति जारी गर्दै विभाग र प्रदेश कमिटीमा रहने पदाधिकारी तथा सदस्यहरूको नामावली सार्वजनिक गरेका हुन् ।

केन्द्रीय सचिवालयका विभिन्न बैठकबाट भएका पार्टीका केन्द्रीय विभागहरू र प्रदेश कमिटीहरू गठनका निर्णयहरूलाई हालै काठमाडौंमा सम्पन्न पार्टी केन्द्रीय कमिटीको तेस्रो पूर्णबैठकले अनुमोदन गरेको भुसालले जनाएका छन् ।

काठमाडौं । सत्तारुढ नेकपा एकीकृत समाजवादीले स्थानीय चुनावमा सत्ता गठबन्धन हुँदा काठमाडौं महानगरपालिकाको मेयर दाबी गर्ने भएको छ । सत्ता गठबन्धनमा रहेका पाँच दलमध्ये काठमाडौं महानगरमा कांग्रेसपछि आफ्नो शक्ति दोस्रो स्थानमा रहेको नेकपा एसको ठम्याइ छ ।

नेकपा एसका काठमाडौं जिल्ला अध्यक्ष कुसुम कार्कीले गठबन्धनको निर्णय शीर्ष तहबाटै हुने भएकाले अहिले नै काठमाडौंका कतिवटा स्थानीय तह दाबी गर्ने भन्ने टुंगो नलागेको बताए । तर, काठमाडौं महानगरपालिकामा आफूहरुको दावी हुने उनले नेपाल प्रेसलाई बताए ।

अध्यक्ष कार्कीले भने, ‘पार्टीले शीर्ष तहमा कुन महानगर लिने भन्ने टुंगो लाग्ला । तर, हामीले काठमाडौं महानगरपालिकामा सशक्त दाबी गरेका छौं । यहाँ एमालेले जितेको हो । एमालेको जनमत हामीले भत्काइसकेका छौं र हाम्रो पक्षमा लहर बढिरहेको छ । समग्रमै काठमाडौंमा नेकपा एसको पक्षमा मान्छेहरुको आकर्षण बढेको छ ।’

नेकपा एसले गठबन्धनबाट काठमाडौंको मेयर पाएमा प्रतिनिधिसभा सदस्य जीवनराम श्रेष्ठलाई उम्मेदवार बनाउने तयारी रहेको छ । श्रेष्ठ २०७४ मा पनि मेयरको दाबेदार थिए । उनी २०४९ मा काठमाडौं महानगरपालिका वडा नम्बर १५ को वडाध्यक्ष थिए ।

गठबन्धन भएमा श्रेष्ठ मेयर उठ्ने र नहुँदा उनी अर्को मन्त्रिपरिषद् हेरफेरमा मन्त्री बन्ने लगभग निश्चित छ । नेपाल ओलम्पिक कमिटीका अध्यक्ष समेत रहेका श्रेष्ठलाई मेयरमा अघि सार्दा खेलाडीहरू र नेवार समुदाय पनि परिचालित हुने र जित सहज हुने आँकलन नेकपा एसको छ ।

यदि गठबन्धन हुँदा मेयर नेकपा एसले नपाएको खण्डमा उपमेयरमा ईश्वर डंगोललाई अघि सार्ने तयारी पार्टीको छ । डंगोल हाल वडा नम्बर १५ का वडाध्यक्ष हुन् । महानगरपालिकाका १८ वडा एमालेले जितेको वडा नम्बर ७ का शुद्ध डंगोल र १५ का इश्वर डंगोल नेकपा एसमा छन् ।

काठमाडौंका ११ नगरपालिकामध्ये नेकपा एसले गठबन्धन हुँदा महानगरसहित कम्तिमा तीनवटामा मेयर दाबी गर्ने भएको छ । नेकपा एसले हालसम्मको अभियानबाट शंखरापुर, कागेश्वरी मनहरा, कीर्तिपुर र बूढानीलकण्ठ नगरपालिकामा आफ्नो शक्ति मजबुत भएको निष्कर्ष निकालेको छ ।

काठमाडौं । नेकपा एकीकृत समाजवादीका अध्यक्ष माधवकुमार नेपालले एमाले अध्यक्ष केपी ओलीले जस्तै दाउपेच गरेर पार्टी गठन गर्न सफल भएको बताएका छन् ।

उनले ओलीलाई धेरै फुर्ती नदेखाउन चेतावनी दिँदै चुनावमा एमालेलाई धुलिसात पार्न सकिने दाबी गरे । आज एक कार्यक्रममा बोल्ने क्रममा नेपाल ओलीमाथि आक्रामक बनेका हुन् ।

उनले भने, ‘केपी ओलीको विचारमा क्रान्तिकारी ओज छैन । सिद्धान्तप्रति निष्ठा छैन । उनी दक्षिणपन्थिहरुसँगको साँठगाँठ र विदेशीको आडमा फुरफुर गरिरहेका छन् ।’

नेपालले अगाडि थपे, ‘४० प्रतिशत,४० प्रतिशत भनेर कुरेर बसिरहेका थिए । हामीले पनि घटाएर २० प्रतिशतमा झारिदियौँ । उनले मात्रै जानेका छन् दाउपेच ? हामीले पनि दाउपेच गर्‍यौँ । (पार्टी फुटाउने संख्या) २० प्रतिशतमा झारेर, अध्यादेश ल्याएर कानून बमोजिम निर्वाचन आयोगमा दर्ता गरेर यो पार्टी बनायौँ । साना दुखले आर्ज्या यो पार्टी होइन ।’

उनले आगामी निर्वाचनमा केपी ओलीको पार्टीलाई धुलिसात पार्न सकिने बताए ।

‘हामी सबै मिलेर अगाडि बढ्ने हो भने ओलीको पार्टीलाई धुलिसात पार्न सक्छौं । ओलीको घमन्ड चकनाचुर पार्नुपर्छ भने कांग्रेसमा त्यो भावना चाहिन्छ,’ उनले भने ।

काठमाडौं । स्थानीय तह निर्वाचनमा सत्ता गठबन्धन कायम हुनुपर्ने विषयलाई हकका रूपमा व्याख्या गरिरहेको सत्तारुढ नेकपा एकीकृत समाजवादीले कम्तीमा पनि महानगर र उपमहानगरपालिकामा केन्द्रबाटै तालमेलको निर्णय गराउन पहल थालेको छ ।

पछिल्लोपटक बालुवाटारमा भएको शीर्ष बैठकमा अध्यक्ष माधवकुमार नेपालले प्रधानमन्त्री तथा कांग्रेस सभापति शेरबहादुर देउवासँग केन्द्रबाटै तालमेलको निर्णय गर्न प्रस्ताव राखेका छन् । कांग्रेसका केही नेता गठबन्धन भत्काउने प्रयासमा रहे पनि तालमेल गर्न देउवा सकारात्मक रहेको नेपालले शनिबार धादिङमा बताएका थिए ।

धुनिबेँसीमा आयोजित कार्यक्रममा नेपालले भने, ‘कांग्रेसभित्रका केही नेताहरू गठबन्धन भत्काउन लागिरहेका छन् । तर, प्रधानमन्त्री देउवाजी गठबन्धनको पक्षमा हुनुहुन्छ । उहाँले ती नेताहरूलाई गठबन्धनविरुद्ध नबोल्न चेतावनी पनि दिनुभएको छ । हामी एकचरण हाम्रो शक्ति हेरेर कहाँ एक्लै जितिन्छ, कहाँ गठबन्धन गर्नुपर्छ भन्ने आधारमा छलफल गर्छौं ।’

गठबन्धनमा औपचारिकरूपमा कसरी तालमेल गर्ने भन्नेबारे छलफल नभएको नेताहरूले बताएका छन् । कांग्रेसले बेवास्ता गरे नेकपा माओवादी केन्द्र, नेकपा एस र जसपाबीच तालमेलको प्रयास पनि भइरहेको छ । तर, गठबन्धनका नेताहरूसँगको अनौपचारिक छलफलमा नेकपा एसले काठमाडौं वा पोखरामध्ये एउटा महानगरपालिकाको मेयर आफूले पाउनुपर्ने दाबी गरेको छ ।

विगतमा एमालेले जितेका महानगर र उपमहानगरमा स्वाभाविकरूपमा नेकपा एसको दाबी रहे पनि यसबारेमा छलफल नै भइरहेको नेताहरूको भनाइ छ । नेकपा एसका प्रवक्ता जगन्नाथ खतिवडाले अहिले कुन-कुन स्थानीय तह कुन दलले पाउने भन्ने तहमा छलफल नभएको बताए ।

नेकपा एसका गण्डकी इन्चार्ज केशवलाल श्रेष्ठले पोखरा महानगरपालिकाको मेयरमा आफूहरूको दाबी रहेको र गण्डकीका गठबन्धका नेताहरूसँग छलफल पनि भइरहेको बताएका छन् । कास्कीका सबै स्थानीय तहमा पाँच दलीय गठबन्धन गर्ने सहमति यसअघि नै जिल्लास्तरमा भइसकेको छ ।

पोखरामा एमालेले पाँच वर्षअघि २० हजार बढीको फराकिलो मतान्तरमा कांग्रेस-माओवादी गठबन्धनलाई पराजित गरेको थियो । उक्त चुनावमा एमालेका मानबहादुर जिसी ६० हजार ११८ मतका साथ विजयी हुँदा नेपाली कांग्रेसका रामजी कुँवरले ४६ हजार ४१६मत पाएका थिए । उनलाई माओवादीको समर्थन थियो ।

पोखराको मेयरमा नेकपा एसले जिल्ला अध्यक्ष धनराज आचार्यलाई अघि बढाउन खोजेको छ । पोखरामा निर्वाचित जनप्रतिनिधि भने नेकपा एसमा सामेल भएका छैनन् ।

काठमाडौंमा भने एमालेले १८ वडाध्यक्ष जितेकोमा वडा नम्बर ७ का शुद्ध डंगोल र वडा नम्बर १५ का ईश्वरमान डंगोलले नेकपा एस रोजेका छन् । नेकपा एसले काठमाडौंको मेयरमा ईश्वरमान डंगोलले अघि सारेको छ ।

त्यस्तै नेकपा एसले धरान र इटहरीमध्ये एउटा उपमहानगरमा आफ्नो नेतृत्व दाबी गर्दैछ भने हेटौंडा उपहानगरपालिकामा पनि एसको दाबी छ । त्यसबाहेक धनगढी वा घोराहीमध्ये एउटा उपमहानगरमा आफूहरूको दाबी रहने नेकपा एसका नेता मेटमणी चौधरीले बताए ।