Category: राप्रपा

रूपन्देही । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले गौतमबुद्ध अन्तर्राष्ट्रिय विमानस्थल पूर्ण रुपमा सञ्चालन गर्नका लागि सरकारलाई बाध्य बनाउनुपर्ने बताएका छन् । उनले विमानस्थल सञ्चालन सरकारको प्राथमिकतामा नपरेको दावी गरे ।

सिद्धार्थ उद्योग वाणिज्य संघ रुपन्देहीले भैरहवामा आयोजना गरेको गौतमबुद्ध अन्तर्राष्ट्रिय विमानस्थल पूर्ण रुपमा सञ्चालनका लागि छलफल कार्यक्रममा अध्यक्ष लिङ्देनले यस्तो बताएका हुन् ।

‘यो विमानस्थल नचल्नुपर्ने कुनै कारण छैन । तपाईहरुको अभियानमा हाम्रो पूर्ण साथ र समर्थन रहनेछ, ’उनले भने–‘यो विमानस्थल सञ्चालन गर्नका लागि हाम्रो महत्वपूर्ण भूमिका रहन्छ ।’

उनले सरकारले धार्मिक पर्यटनमा जोड दिनुपर्नेमा बताए । उनले लुम्बिनी आउने पर्यटकलाई फोकस गर्नुपर्ने धारणा राखे । लिङ्देनले पैसा खानकै लागि नेपालमा योजनाहरु बनेको भन्ने बुझ्नुपर्ने बताए ।

‘ठूलो योजना ल्याएपछि ठूलो कमिसन एकैपटक खान पाइन्छ । अन्तर्राष्ट्रिय विमानस्थल बन्ने भएपछि मान्छे पनि खुसी हुन्छन् र विरोध गर्दैनन् भन्ने बुझाइ छ’उनले भने–‘भैरहवा विमानस्थलमा ४ सय विगाह जग्गा किन्नुपर्नेमा किन ८ सय किनियो ?’

उनले भैरहवा र पोखरा विमानस्थलबारे पटकपटक संसदमा कुरा उठाएको बताए । विमानस्थल निर्माणमा भएका भ्रष्टाचारमा संलग्न व्यक्तिहरुलाई कारवाही र विमानस्थल सञ्चालन हुनुपर्ने उनको भनाइ थियो । यो सरकारको लगानी होइन हाम्रो टाउकोमा ऋण बोकाएर ४१ ऋर्ब खर्च गरेर किन नचल्ने एअरपोर्ट बनाइयो, उनले प्रश्न गरे ।

निजी क्षेत्रको विकास बिना देशको अर्थतन्त्र मजबुत र देशको विकासको कल्पना गर्न नसकिने उनले बताए । सार्वजनिक लेखा समितिका सदस्य समेत रहेका लिङदेनले अहिले सबैभन्दा प्रताडित निजी क्षेत्र रहेको बताए ।

उनले कर तिर्न पनि घुस खुवाउनुपर्ने अवस्था रहेको बताए । निजी क्षेत्रलाई बलियो नबनाएसम्म देश बलियो हुन नसक्ने उनले जिकिर गरे । अहिलेको व्यवस्था र प्रणालीमा सुधार नल्याएसम्म देश र जनताको अवस्थामा सुधार आउन नसक्ने उनको भनाइ थियो ।

त्यस्तै नेपाल उद्योग वाणिज्य महासंघ लुम्बिनी प्रदेशका सभापति कृष्ण प्रसाद शर्माले पटकपटक विमानस्थल सञ्चालन हुनुपर्ने माग राखे पनि सुनुवाइ नभएको बताए । ‘स्वर्गीय दीपक बोहराको पनि एअरपोर्ट सञ्चालन होस् भन्ने सपना थियो, ’उनले भने ।

काठमाडौं विमानस्थलमा चाप हुँदा भैरहवामा भने सुनसान रहेको उनले बताए । सबै राजनीतिक दलको चासो हो भने विमानस्थल सञ्चालन हुनुपर्ने उनले बताए ।

राप्रपाकी केन्द्रीय सदस्य स्वाती थापाले गौतमबुद्ध अन्तर्राष्ट्रिय विमानस्थल उद्घाटन भएको ३ वर्ष बितिसक्दा पनि पूर्ण र नियमित रुपमा सञ्चालन हुन नसकेको बताइन् । ‘विमानस्थल सञ्चालन नहुँदा उद्योगी–व्यवसायी संकटमा परेका छन्’उनले भनिन्–‘विमानस्थल सञ्चालन राजनीतिक मुद्दा भन्दा पनि विकासको मुद्दा हो ।’ के कुराले विमानस्थल सञ्चालन भएन भनेर पत्ता लगाउनुपर्ने उनले बताइन् । केन्द्रीय सदस्य थापाले विकासका मुद्दामा एकजुट भएर अघि बढ्नुपर्नेमा जोड दिइन् ।

‘स्वर्गीय दीपक बोहराले विमानस्थल निर्माणका लागि पहल गर्नुभएको थियो । राप्रपा अध्यक्ष राजेन्द्र लिङ्देनले पटकपटक विमानस्थलबारे आवाज उठाउनुभएको छ, ’उनले भनिन् उनले सिद्धार्थनगर नगरपालिकाले डण्डा नदीमा फोहोर फालिरहेको भन्दै विमानस्थल नजिकै रहेको क्षेत्रमा फोहोर फाल्दा धेरै जोखिम रहेको बताइन् । फोहोरमैला व्यवस्थापन विमानस्थल भन्दा टाढा गर्नुपर्ने उनको भनाइ थियो ।

सिद्धार्थ उद्योग वाणिज्य संघ, रुपन्देहीका अध्यक्ष नेत्र प्रसाद आचार्यले राज्यले अरबौं लगानी गरेर निर्माण गरेको विमानस्थल र पछि निजी क्षेत्रले पनि सरकारले गरेको भन्दा दोब्बर लगानी गरेको बताए । उनले व्यवसाय झुण्डिने अवस्थामा पुगे पनि सरकार कानमा तेल हालेर बसेको बताए ।

संघका निवर्तमान अध्यक्ष ठाकुर कुमार श्रेष्ठले विमानस्थल सञ्चालनका लागि विशेष रुपमा पहल गर्न आग्रह गरे । उनले विमानस्थल नचल्दा अत्यन्तै पीडादायी अवस्था सिर्जना भएको बताए ।

नेपाल उद्योग वाणिज्य महासंघ लुम्बिनी प्रदेशका उपाध्यक्ष कूल प्रसाद न्यौपानेले विमानस्थल सञ्चालनप्रति यहाँहरुको महत्व कम हो कि भन्दै प्रश्न गरे । नेपाल उद्योग वाणिज्य महासंघका पूर्व केन्द्रीय सदस्य महेन्द्र कुमार श्रेष्ठले सरकारले विमानस्थल सञ्चालन गर्न नसक्ने भए अन्तर्राष्ट्रिय संस्थालाई दिनुपर्ने बताए ।

सिद्धार्थ उद्योग वाणिज्य संघका पूर्वअध्यक्ष विष्णु प्रसाद शर्माले अन्तर्राष्ट्रिय विमानस्थललाई आवश्यक पर्ने भिषा सेन्टर, श्रम कार्यालय, स्वास्थ्य परीक्षण केन्द्र, मेनपावर लगायतका पूर्वाधारहरु बन्नुपर्ने बताए ।

उद्योगी चन्द्रमान श्रेष्ठले विमानस्थल सञ्चालनका लागि सरकारले तदारुकता नदेखाएको बताए । किराना तथा प्लाष्टिक व्यवसायी संघ भैरहवाका महासचिव झबिन्द्र प्रसाद बेल्बासेले बोलीले मात्र नभइ कामले देखाउनुपर्ने बताए ।

चेम्बर अफ कमर्स (उद्योग व्यापार संगठन, रुपन्देही) का वरिष्ठ उपाध्यक्ष सचिन रोक्काले विमानस्थल सञ्चालनका लागि निजी क्षेत्र बाटोमा आउनुपर्ने बिडम्बना रहेको बताए । सिद्धार्थ उद्योग वाणिज्य संघका सचिव मंगल भण्डारीले भ्रष्टाचार गर्नका लागि मात्र विमानस्थल बनेको हो भन्दै प्रश्न गरे । संघका सल्लाहकार गोपाल भण्डारीले मुलुकमा नीतिगत भ्रष्टाचार हुँदा राज्य मौन भएको बताए ।

व्यवसायी चन्द्र रोक्काले यो विमानस्थल सञ्चालनका लागि पहल गर्नुपर्नेमा जोड दिए ।पर्यटन व्यवसायी आशा गुरुङले एअरपोर्ट सञ्चालनका लागि पनि समिति बनाउनुपर्ने र राप्रपाले पहल गर्नुपर्ने बताए ।

सिद्धार्थ होटल संघ, नेपालका अध्यक्ष चन्द्रप्रकाश श्रेष्ठले विमानस्थलका बारेमा धेरैपटक छलफल भएको बताए । प्याब्सनका पूर्व केन्द्रीय उपाध्यक्ष विष्णु प्रसाद पन्थीले राज्यले आश्वासन मात्र नदिइ नीतिगत निर्णय गर्नुपर्ने बताए ।

काठमाडौं । राजावादी शक्तिहरूले राजसंस्था पुन:स्थापनाका लागि अनिश्चितकालीन संयुक्त जनआन्दोलनको घोषणा गरेका छन् । आउँदो जेठ १५ गतेबाट जनआन्दोलन सुरू गर्ने तथा राजसंस्था र हिन्दू राष्ट्र स्थापन नभएसम्म नटुंगिने उनीहरूको निर्णय छ ।

नवराज सुवेदी नेतृत्वको संयुक्त जनआन्दोलन समितिले आज एक कार्यक्रम गरी संयुक्त आन्दोलनको घोषणा गरेको हो । यो आन्दोलनमा राप्रपा र राप्रपा नेपालसहित अन्य राजावादी शक्तिहरू पनि सामेल रहनेछन् ।

यो आन्दोलनमा बाह्य शक्तिहरुको संलग्नता नरहने सुबेदीले जारी गरेको विज्ञप्तिमा जनाइएको छ । जेठ १५ गतेदेखि देशका विभिन्न भागहरुमा स्वतस्फुर्त जुलुस धर्ना लगायत जनप्रदर्शनहरु गर्न उनले अपिल गरेका छन् । आन्दोलनलाई सफल तुल्याउन प्रत्येक जिल्ला, पालिका तथा वडाहरुमा संयुक्त जनआन्दोलन समिति गठन गर्न उनको प्रस्ताव छ ।

‘यो आन्दोलन नेपाली जनताका लागि नेपाली जनताद्वारा गरिने नेपाली जनताको राष्ट्रवादी आन्दोलन हुने छ,’ विज्ञप्तिमा भनिएको छ ।

राजावादीले संवैधानिक राजसंस्थासहितको प्रजातन्त्र स्थापना, सनातन हिन्दू राष्ट्रको स्थापना र संघीयता खारेजीका तीन प्रतिवद्धता व्यक्त गरेका छन् ।

ललितपुर । रवीन्द्र मिश्रलगायत आस्थाका बन्दीहरुको विनासर्त रिहाइ माग गर्दै जारी रिले अनसनमा संयुक्त जनआन्दोलन समितिका संयोजक नवराज सुवेदीले ऐक्यबद्धता जनाएका छन् ।

रिले अनसनप्रति समर्थन जनाउन संयोजक सुवेदी शनिबार जावलाखेल पुगेका हुन् । ललितपुरवासीले आयोजना गरेको रिले अनसनका सहभागीलाई सुवेदीले भेटेर आस्थाका बन्दीहरुको रिहाइ हुनुपर्ने र मानव अधिकारको सम्मान र प्रत्याभूति हुनुपर्नेमा ऐक्यबद्धता जनाए ।

अनसनकारीहरुले आस्थाका बन्दी रिहाइ गर्नुपर्ने, मानव अधिकारको सम्मान गर्नुपर्ने, हिन्दू अधिराज्य कायम गर्नुपर्ने र राजसंस्था पुनःस्थापना गर्नुपर्ने माग गरेका छन् ।

यसैगरी अनसनमा तीनकुने घटनामा मारिएका सुरेश रजक र सविन महर्जनप्रति हार्दिक श्रद्धाञ्जली तथा परिवारमा समवेदना प्रकट गरिएको छ ।

रिले अनसन दोस्रो दिनमा प्रवेश गरेको छ । आयोजकले जनाएअनुसार सरकारले झूटा मुद्दामा थुनामा राखेको आस्थाका बन्दी नछुटेसम्म अनसन जारी रहनेछ ।

झूटा मुद्दामा सरकारले राप्रपाका वरिष्ठ उपाध्यक्ष मिश्रलगायतलाई फसाउन खोजेको अनसनकारीको भनाइ छ ।

काठमाडौं । राप्रपाको वरिष्ठ उपाध्यक्ष रविन्द्र मिश्रलगायतका रिहाइको माग गर्दै रिले अनशन सुरु भएको छ।

राष्ट्रवादी देशभक्त जनताको आयोजनामा मिश्रको रिहाइ माग गर्दै आजदेखि ललितपुरको जावलाखेलमा रिले अनशन सुरु गरेको हो ।

उनीहरुले मिश्रको रिहाइसँगै४ बुँदे माग पनि राखेका छन् ।

मिश्रमाथि लगाइएको झुटा मुद्दा खारेज गर्नुपर्ने, रविन्द्र मिश्रलगायत सबै राष्ट्रवादी साथीहरुलाई रिहाइ गर्नुपर्ने, विधिको सुशासन कायम गर्नुपर्ने र नागरिक स्वतन्त्रता हकसहितको सम्मान गर्नुपर्नेलगायतको उनीहरुको ४ बुँदे माग छ ।

मिश्रसहितका केही राप्रपा नेताहरु गत चैत  १५ गते राजावादी प्रदर्शनमा  पक्राउ परेका थिए ।

काठमाडौं । राष्ट्रिय प्रजातन्त्र पार्टी नेपालका अध्यक्ष कमल थापाले सबै राजसंस्था पक्षधर शक्तिहरू एक ढिक्का भएर अगाडि बढ्न अपिल गरेका छन् । व्यक्ति र पात्रलाई नहेरी एजेन्डाका आधारमा हेरेर एक ठाउँमा आउनुपर्ने उनको भनाइ छ ।

आज राप्रपा नेपालले आयोजना गरेको कार्यक्रममा बोल्दै थापाले सबै राजावादीहरू मिलेको खण्डमा केही हप्ता वा केही महिनाभित्रैमा हिन्दू राष्ट्र र राजसंस्थासहितको प्रजातन्त्र स्थापना गर्न सकिने दाबी गरे ।

उनले भने, ‘हामी सबै एक ढिक्का भएर अगाडि बढ्ने संकल्प गरौं । केही हप्ता, केही महिनाभित्रैमा हिन्दू राष्ट्र र राजसंस्था पुन:स्थापना गर्न सकिन्छ । एकपटक सबै प्रकारका स्वार्थभन्दा माथि उठेर अगाडि बढौं । हामी एक ठाउँमा उभियौं भने गणतन्त्र पक्षधर नेताहरूले सोच्न बाध्य हुनेछन् ।’

उनले राप्रपाका अध्यक्ष राजेन्द्र लिङदेनलाई सम्बोधन गर्दै आन्दोलनको नेतृत्व लिन समेत आग्रह गरे ।

‘मलाई सार्वजनिकरूपमा भन्दा कत्ति पनि आपत्ति हुँदैन, राप्रपाका अध्यक्ष राजेन्द्र लिङदेन मेरो अत्यन्त प्रिय भाइ हुनुहुन्छ, हिजो राजनीतिक आरोह अवरोमा विभिन्न घटना-दुर्घटना भए होला, अहिलेको घडीले उहाँको सक्रिय सहभागीता र नेतृत्वको आवश्यकता महसुस गरिरहेको छ,’ थापाले भने ।

उनले अहिले राजसंस्था पुन:स्थापनाका लागि एकदमै अनुकूल वातावरण बनेको दाबी गरे । यो अवस्थामा पनि एक ठाउँमा उभिन नसके इतिहासले सराप्ने उनको भनाइ थियो ।

‘आदरणीय नेताहरूलाई आह्वान गर्न चाहन्छु, कमसेकम केही समयको निमित्त भए पनि एक ढिक्का भएर अगाडि बढौं,’ उनले भने, ‘नवराज सुवेदी कुनै स्वार्थ नभएर राजनीतिक जीवनको अन्तिम चरणमा पुग्नुभएको व्यक्ति यो अभियानलाई संयोजन गर्न अग्रसर भएर आउनुभएको छ । जे-जस्तो भए पनि एउटा विशिष्ट परिस्थितिमा संयोजक भएर आउनुभएको छ । मेरो आग्रह छ । आवश्यक प्रवन्ध मिलाएर हामी सबै एकजुट होउँ ।’

काठमाडौं । लामाे समयदेखि दुरीमा रहेका राप्रपा अध्यक्ष राजेन्द्र लिङदेन र राप्रपा नेपालका अध्यक्ष कमल थापाबीच नयाँ ‘ब्रेक थ्रू’ भएको छ । थापाको निम्तो मान्दै लिङ्देन आज राप्रपा नेपालको विरोधसभामा सहभागी हुने भएका छन् ।

एउटै लक्ष्य र गन्तव्य बोकेर हिँडिरहे पनि राजावादी हस्ति नेताहरू एक ठाउँमा उभिन सकिरहेका थिएनन् । लिङदेन र थापाबीच त झन् पानी बाराबारकै अवस्था थिए । राप्रपालाई नै फुटाएर थापाले राप्रपा नेपाल गठन गरेको हुँदा यी दुई पार्टीबीच तिक्तताको अवस्था कायम थियो । राजावादी दुई प्रमुख शक्ति नै मिल्न नसक्दा समग्र राजसंस्था पक्षधरहरुको एकता गाँठो परिरहेको थियो ।

राप्रपा प्रवक्ता मोहन श्रेष्ठले राप्रपा नेपालको कार्यक्रममा अध्यक्ष लिङदेन उपस्थित हुने पुष्टि गरे ।

‘राजसंस्थाको पक्षमा हुने कुनै पनि आन्दोलन र अभियानलाई साथ समर्थन दिने हाम्रो पार्टीको घोषित नीति नै हो । आज राप्रपा नेपालबाट अध्यक्षज्यूलाई निम्ता आएको छ र उहाँ सहभागी हुनुहुन्छ,’ श्रेष्ठले भने ।

आज राप्रपा कमल थापाको निम्तोमा लिङ्देनसहित संयुक्त जनआन्दोलन समितिका संयोजक नवराज सुबेदी र राष्ट्रिय शक्ति नेपालका अध्यक्ष केशरबहादुर बिष्टसमेत कार्यक्रममा उपस्थित हुने छन् । राप्रपा नेपालका अध्यक्ष थापाले आफूहरु चारजना पहिलोपटक एउटै मञ्चमा देखिन लागेको भन्दै फेसबुकमा पोस्ट गरेका छन् ।

अहिलेका प्रमुख चार हस्ति नेताहरु एक ठाउँमा उभिने भएपछि राजावादी पंतिमा उत्साह छाएको छ । आजको कार्यक्रमले सबै राजसंस्था पक्षधर शक्तिलाई एक ठाउँमा ल्याएर संयुक्त आन्दोलनको श्रीगणेश हुन सक्ने आशा राजावादीहरुले पालेका छन् ।

अध्यक्ष लिङ्देनको सहभागिता निश्चित रहे पनि राप्रपाले औपचारिकरुपमा राप्रपा नेपालको कार्यक्रमलाई सघाउने बारे कुनै निर्णय गरेको छैन । प्रवक्ता श्रेष्ठ हरेकपटक विज्ञप्ति निकालेर समर्थन गरिरहनु नपर्ने बताउँछन् ।

उनले भने, ‘हामीले पहिल्यै भनिसकेको भएर विज्ञप्ति निकालिएन । राप्रपा नेपालको कार्यक्रमलाई पनि राप्रपाको नैतिक समर्थन रहन्छ ।’

आजको कार्यक्रममा राप्रपा नेपालले पार्टीको झण्डा प्रयोग नगर्ने भएको छ । सबै राजावादी शक्तिहरुलाई समेट्ने हेतुले राष्ट्रिय झण्डा मात्रै बोक्ने रणनीति बनाइएको हो ।

राप्रपा नेपालका प्रवक्ता राजाराम बर्तौलाको अनुसार आजको सभा करिब डेढ घन्टाको हुने छ । चार जना प्रमुख वक्तासहित अरु दुई-तीन जना थपिन सक्ने उनले बताए ।

बर्तौलाका अनुसार दुर्गा प्रसाईंको नागरिक बचाउ महाअभियान, शिवसेना नेपाल र वीपी कांग्रेसलाई पनि निम्ताइएको छ । उनीहरुबाट पनि एक एक जनाले भाषण गर्न सक्ने छन् ।

कार्यक्रम स्थल भने अन्तिम समयमा परिवर्तन गरियो । यसअघि भृकुटी मण्डपमा गर्ने भनिएकोमा रत्नपार्कमा हुने भएको छ ।

काठमाडौं । राप्रपाका वरिष्ठ उपाध्यक्ष रवीन्द्र मिश्रमाथि अनुसन्धान गर्न फेरि थप ७ दिनको म्याद थप भएको छ ।

काठमाडौं जिल्ला अदालतले उनीमाथिकाे अनुसन्धानका लागि आइतबार पाचौंपटक म्याद थपेकाे हाे । उनले बहसका क्रममा आफूलाई राजनीतिक पूर्वाग्रहका आधारमा विनाकारण एक महिनादेखि हिरासतमा राखिएको बताएका थिए ।

मिश्रले केही समय लिएर बोल्दै न्यायका लागि न्यायाधीशसमक्ष याचना गरेका थिए । राज्यले गरेको गल्तीलाई न्यायालयले मात्रै सच्याउन सक्ने भन्दै आफूलाई आजै रिहा गर्न उनले माग गरे ।

गत चैत १५ गते भएकाे राजावादीहरुकाे हिंसात्मक आन्दाेलनकाे जिम्मेवार भन्दै मिश्रसहितका नेताहरु पक्राउ परेका थिए ।

काठमाडौं । राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्रले तीनकुनेको आन्दोलनमा भएको हिंसात्मक घटनाहरुमा आफ्नो संलग्नता फेरि अस्वीकार गरेका छन् ।

आज अदालतमा पाचौंपटक म्याद थपका लागि लैजाने क्रममा उनले आफूलाई राजनीतिक पूर्वाग्रहका आधारमा विनाकारण एक महिनादेखि हिरासतमा राखिएको बताए ।

मिश्रले केही समय लिएर बोल्दै न्यायका लागि न्यायाधीशसमक्ष याचना गरेका थिए । राज्यले गरेको गल्तिलाई न्यायालयले मात्रै सच्याउन सक्ने भन्दै आफूलाई आजै रिहा गर्न उनले माग गरे ।
‘गत १० गतेको बेन्चले गरेको आदेशलाई शिरोपर गर्दै आज मलाई रिहा गरियोस र मैले आफ्नी ८२ वर्षीया आमाको मुख हेर्न पाउँ’, मिश्रले भने ।

मिश्रका एक कानून व्यवसायीका अनुसार उनले अदालतमा बोलेका कुराहरुको सार यस्तो थियोः

राज्यका अन्य सबै अंगहरु क्षयीकृत हुँदा पनि न्यायालय अटल, विवेकशील र निष्पक्ष भयो भने सिंगो राज्यलाई थेग्न सक्छ भन्ने विश्वासका आधारमा केही कुरा राख्न चाहन्छु ।

म अलिकति कन्फ्युज्ड भइरहेको छु श्रीमान । यो राज्य, राज्य भनेर मैले राजनीतिक नेतृत्वलाई भन्न खोजेको, प्रहरी–प्रशासन, न्यायाधीवक्ता कार्यालय लगायतलाई होइन, राज्यले चाह्यो भने एउटा नागरिकलाई जेरी घुमाएजस्तो घुमाइदिन्छ ।

त्यो घुमाइएको गाँठो फुकाउन सक्ने भनेको एउटा न्यायालय मात्र हो । मेरो हकमा भन्नुपर्दा बयान सकियो । ११ दिनपछि तेस्रो बहसमा ममाथि अनुसन्धान गर्न जति दिन चाहिन्छ एकैचोटि थप्नुस भनेँ । १५ दिन थपियो । १५ दिनको बीचमा गत चैत ३१ र वैशाख २ गते गरी मेरो बयान क्लोज भयो । १० गते फेरि यहाँ आइयो ।

१० गते आउँदा छुट्छु होला, मुक्ति पाउँछु होला भन्ने लागेको थियो । तर, त्यो दिन पनि छोडिएन । मविरुद्ध अरु कुरा कहीँ केही छैन । नाकै अगाडि अश्रुग्यास खसेपछि आँखाबाट आँशु तरतर झारेर नवराज सुबेदीलाई बचाएर फर्किएपछि म अलिकति आवेगमा आएकै हो ।

आमसभामा गएको व्यक्ति ध्यान गरेर त बस्दैन नि, अवश्य बोलिन्छ । सबैजना छरिएको देखेँ । एक ठाउँ आउनुस, अगाडि बढ्नुस भनेँ । अगाडि बढ्नुस भन्नुको अर्थ मैले प्रहरीमाथि जाइलाग भनेको हो ? संसदमा आगो लगाउँ भनेको हो ? घरमा ढुंगा हान भनेको हो ?

आन्दोलनमा आएको नेता बोल्छ । सहभागीको मनोबल बढाउन मैले अगाडि आउनुस भनेँ । त्यति भनेको भरमा एक महिनाभन्दा बढी हिरासतमा राख्ने ? यो न्याय भएन भन्ने अनुभूति हो श्रीमान । म यो देशमा केही गर्छु भनेर लागेको मान्छे हो । आजसम्म इमानको धरातलमा टेकेर कयौं प्रतिकुल अवस्थामा पनि नाक ठाडो पारेर हिँडेको छु । ५९ वर्षको भएँ । कति वर्ष बाँच्छु थाहा छैन । बाँकी जीवन नाक काटेर मन चाहन्न ।

यो मैले अघि भन्याजस्तै राज्य र राजनीतिक तह नै दोषि छ । जसले सरकारको प्रतिनिधित्व गर्छ, उहाँहरुमा पनि अलिकति विवेक त हुन्छ होला । एउटा निर्दोष मान्छेलाई हिरासतमा राखेर उहाँहरुलाई राति निद्रा लाग्छ ?

श्रीमान यो दुर्भाग्यपूर्ण भयो । सबै घटनालाई एउटै बास्केटमा राखेर फैसला गर्नु न्याय हुन्छ जस्तो मलाई लाग्दैन । पञ्चायतकालमा अराष्ट्रिय तत्व भनेर जेलमा राख्नु र यो गणतन्त्रकालमा आस्थाको बन्दी बनाएर यसरी राख्नुमा केही फरक छैन ।

अन्त्यमा म अघिल्लो बेन्चमा बोलेको कुरा दोहोर्याउँछु । मेरो ८२ वर्षको गम्भीर बिरामी आमा, जो डिमेन्सीया रोगबाट ग्रस्त हुनुहुन् छर मलाई कहिले चिन्नुहुन्छ कहिले चिन्नुहुन्न, उहाँको कसम खाएर भन्छु मैले राज्य विरुद्धको कसुर हुने, संगठित अपराध हुने कुनै काम गरेको छैन । आज आमाको मुख हेर्न दिन हा । १० गतेको बेन्चको आदेश अनुशरण गएर आज मलाई मुक्ति दिइन्छ र आमाको मुख हेर्न पाउँछु भन्ने विश्वास लिएको छु श्रीमान ।

काठमाडौं । राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रमाथि प्रहरीले अपमानजनक व्यवहार गरेको छ । आज म्याद थपका लागि जिल्ला अदालत काठमाडौं लैजाने क्रममा उनलाई दुवै हातमा हत्कडी लगाइएको थियो ।

प्रहरीले थुनुवाको पोशाकमा गाडीबाट ओर्लेर हत्कडी सहित अदालत लैजाँदै गर्दा प्रहरीले उनलाई धकेलेको भिडिओ सार्वजनिक भएको छ । मिश्रले हत्कडीसहितको हात उठाएर अदालततर्फ ‘नमस्कार’ गर्न खोजे । तर, प्रहरीले उनको हातमै समातेर रोके ।

प्रहरीले राेक्दै गर्दा मिश्रले भनेका थिए,`अदालतलाई नमस्कार गर्नुपरेन ?

घटनास्थलमा रहेका राप्रपा केन्द्रीय सदस्य रञ्जन कार्कीले प्रहरीबाट ज्यादतिपूर्ण व्यवहार देखाइएको बताए ।

‘राजनीतिक आन्दोलनमा सहभागी भएकै कारण एउटा प्रमुख दलको वरिष्ठ उपाध्यक्षलाई यो किसिमको व्यवहार गरिनु भत्र्सनापूर्ण छ’, उनले भने ।

यसअघि पनि मिश्रलाई अदालत ल्याउँदा हत्कडी लगाउने गरिएको थियो । तर, गाडीबाट ओराल्ने बेलामा हत्कडी खोल्ने गरिन्थ्यो । तर, आज भने गाडीबाट ओर्लिँदा पनि हत्कडी फुकालिएन ।

भिडिओ:

काठमाडौं । राष्ट्रिय प्रजातन्त्र पार्टी नेपालले भोलि आयोजना गर्ने विरोध सभामा चार जना लिजेन्ड राजावादीहरु ‘पहिलोपटक’ एकैमञ्चमा देखा पर्ने सम्भावना बढेको छ ।

राप्रपा नेपालका अध्यक्ष कमल थापाको निम्तोमा राप्रपा अध्यक्ष राजेन्द्र लिङ्देन, संयुक्त जनआन्दोलन समितिका संयोजक नवराज सुबेदी र राष्ट्रिय शक्ति नेपालका अध्यक्ष केशरबहादुर बिष्टसमेत उपस्थिति हुने दावी गरिएको छ ।
तीनै जना नेताहरुलाई औपचारिक पत्राचारका साथै अध्यक्ष कमल थापा आफैंले फोन गरेर निम्त्याएको राप्रपा नेपालका प्रवक्ता राजाराम बर्ताैलाले बताए ।

उनले नेपाल प्रेससँग भने, ‘अध्यक्षज्यूले फोन गर्दा सबैजनाले आउने निधो गर्नुभएको बताउनुभएको छ । हामी विश्वस्त छौं ।’

राप्रपा नेपालले चार नेताहरुको अनुहार राखेर पोस्टर समेत बनाइसकेको छ । अध्यक्षले सबैसँग कुराकानी गरेपछि नै पोस्टर बनाइएको बर्तौलाले बताए ।

राप्रपा स्रोतले भने अध्यक्ष लिङ्देन राप्रपा नेपालको कार्यक्रममा जाने विषयमा अनभिज्ञता प्रकट गर्यो ।
‘उहाँले अहिलेसम्म केही भन्नुभएको छैन’, स्रोतले भन्यो ।

नवराज सुबेदीले यसअघि नै थापाको आन्दोलनलाई संयुक्त जनआन्दोलन समितिले साथ र समर्थन गर्ने घोषणा गरिसकेका छन् । राप्रपाले भने अहिलेसम्म उक्त राप्रपा नेपालको आन्दोलनप्रति औपचारिक धारणा बनाएको छैन । यद्यपी, जुनसुकै समूहले राजसंस्था र हिन्दू राष्ट्र पुनस्र्थापना एवं संघीयता खारेजीका लागि गर्ने आन्दोलनमा नैतिक समर्थन गर्ने राप्रपाको सैद्धान्तिक निर्णय हो ।

राप्रपाबाट निस्किएर कमल थापाले राप्रपा नेपालको गठन गरेका थिए । राप्रपा र राप्रपा नेपालबीच सम्वन्ध सुमधुर छैन । कमल थापा एकता र सहकार्यका लागि आतुर भए पनि लिङदेनले अहिलेसम्म रुची राखेका छैनन् ।

यदि भोलि उनी राप्रपा नेपालको कार्यक्रममा गए दुई नेताबीचको सम्वन्धमा नयाँ ट्विस्ट आउने छ । राजावादी मिल्दैनन् भन्ने भाष्यलाई तोड्न पनि लिङदेनले थापासँग दुरी घटाउनुपर्ने दवाव छ ।

सबैलाई समेट्नका लागि प्रदर्शनमा पार्टीको झण्डा नभइ राष्ट्रिय झण्डा मात्रै प्रदर्शन गरिने भएको छ । राप्रपा नेपालले तीनकुने घटनामा पक्राउ परेकाहरुको तत्काल रिहाई तथा राजसंस्था र धर्मनिरपेक्षताको बिरोधमा बन्देज बनाउने कानुन निर्माण हुन लागेको भन्दै त्यसलाई रोक्ने मागसहित भोलि प्रदर्शन गर्न लागेको हो ।

काठमाडौंको प्रदर्शनीमार्गमा हुन लागेको जनप्रदर्शनको तयारी अन्तिम चरणमा पुगेको राप्रपा नेपालका महामन्त्री राजाराम बर्तौलाले जानकारी बताए ।

‘पार्टीको झण्डामा नभई कार्यक्रम राष्ट्रिय झण्डामा आयोजना हुनेछ, समान बिचार भएका दल, समूह, अभियान, संघ–संस्था र ब्यक्तिहरुलाई सकृय सहभागिताको लागि पत्राचार गरेका छौं, सबैको साथ, सहयोगको प्रतिबद्धता पाएर हामी उत्साहित छौं’, उनले भने ।

राप्रपा नेपालले राष्ट्र बचाउ अभियान, नेपाली काङ्ग्रेस (बिपि), शिव सेना नेपाल लगायत विभिन्न संघ ,सस्थाहरुसंग पनि समन्वय र निमन्त्रणा गरेको बर्ताैलाले जानकारी दिए । पार्टीको सम्पुर्ण संयन्त्र यसमा परिचालन भएको तथा अनाबश्यक घुसपैठ नहोस् भनेर स्वयंसेवकको ब्यबस्था गरिएको छ पनि उनले बताए ।

काठमाडौं । राजसंस्था पुनःस्थापनाका लागि जनआन्दोलन समितिका संयोजक नवराज सुवेदी र राप्रपाका अध्यक्ष राजेन्द्र लिङदेनबीच भेटवार्ता भएको छ । अध्यक्ष लिङदेन र प्रवक्ता मोहन श्रेष्ठले सुवेदीको निवासमै पुगेर भेट गरेका हुन् ।

सुवेदीमात्रै होइन, लिङदेनले अर्का राजनीतिज्ञ बालाराम घर्तीमगरलाई पनि उनको पनि निवासमै पुगेर भेट गरेका छन् ।

भेटका क्रममा दुई अग्रज नेताहरुसँग लामो राजनीतिक अनुभव सुन्ने, राजसंस्था पुनःस्थापना आन्दोलनको आगामी कार्यदिशा र समसामयिक राजनीतिबारे विमर्श गर्ने, विगत र वर्तमानका बारेमा कुराकानी भएको प्रवक्ता श्रेष्ठले बताए ।

अध्यक्ष लिङदेनले सुवेदीसँग छुट्टै छलफलसमेत गरेको प्रवक्ता श्रेष्ठले बताए । सुवेदीले चैत १५ गतेको तीनकुने घटना र २४ दिन नजरबन्दमा बस्दाको नालीबेली सुनाएको उनले बताए ।

काठमाडौं । राष्ट्रिय प्रजातन्त्र पार्टीले शनिवार काठमाडौंस्थित पाकिस्तानी दूतावासबाहिर राप्रपाको ब्यानरमा गरिएको प्रदर्शनमा पार्टीको संलग्नता नरहेको प्रष्ट पारेको छ ।

राप्रपाका प्रवक्ता मोहन कुमार श्रेष्ठले पाकिस्तानी दूतावासबाहिर आज राप्रपाको ब्यानरमा भएको प्रदर्शन पार्टीको नभएको प्रष्ट पारेका हुन् ।

उनले नेपाल प्रेससँग कुरा गर्दै भने–त्यो आजको कार्यक्रम हाम्रो पार्टीको होइन र त्यस्तो प्रदर्शन गर्ने नीति पनि हाम्रो छैन । कसैले हाम्रो पार्टीको नामको दुरुपयोग गरेका हुनसक्छन् ।

उनले राप्रपाको नामको कसैले दुरुपयोग गरेको हुनसक्ने बताए । गाई चिन्ह अंकित झण्डामा राप्रपा लेखिएको ब्यानरमा प्रदर्शनकारीले जम्मु कश्मिरको पहलगाममा भएको आतंकी हमलामा प्रधानमन्त्री केपी शर्मा ओली दोषी रहेको भन्दै ओलीविरुद्ध नाराबाजी समेत गरेका थिए ।

काठमाडौं । जम्मु कश्मिरको पहलगाममा एक नेपालीसहित २८ जनाको हत्या भएको आतंकी हमलामा नेपालको मुस्लिम आयोगले केही नबोलेको भन्दै स्वतन्त्र युवाको नाममा एक समूहले २४ घण्टाको अल्टिमेटम दिएको छ ।

सोही समूहले महाराजगन्जस्थित पाकिस्तानी दूतावासबाहिर प्रदर्शन समेत गरेको छ । पहलगाम आतंकी हमलामा पाकिस्तानको हात रहेको भारतीय आरोप सही रहेको भन्दै सो समूहले ब्यानर र प्लेकार्डसहित मुख्य सडकमा केहीबेर प्रदर्शन गरेको हो ।

उनीहरुले पाकिस्तानी सेनाविरुद्ध समेत पोस्टर प्रदर्शन गरेका थिए । स्वतन्त्र युवा समूहको प्रदर्शन चलिरहेकै बेला केही व्यक्ति राप्रपाको ब्यानरमा सोही स्थानमा पुगेका थिए ।

उनीहरुले पहलगाम घटनाको निन्दा गर्दै प्रधानमन्त्री केपी शर्मा ओलीको हात रहेको आरोप लगाएर ओलीविरुद्ध नाराबाजी गरेका थिए ।

पाकिस्तानी दूतावास अगाडिको प्रदर्शनमा आतंकी हमलालाई लिएर प्रधानमन्त्रीविरुद्ध नाराबाजी हुन थालेपछि स्वतन्त्र युवा समूहका प्रदर्शनकारी भने त्यहाँबाट तितरवितर भएका थिए । यसैबीच नेविसंघले समेत पाकिस्तानी दूतावास बाहिर प्रदर्शन गर्ने भने पनि अन्तिममा रद्द भएको जानकारी दिइयो ।

काठमाडौं । अध्यक्ष सहित नेताहरु पक्राउपछि राष्ट्रिय प्रजातन्त्र पार्टी (राप्रपा) को आकस्मिक बैठक बस्न लागेको छ । पार्टी कार्यालयमा केन्द्रीय कार्यसम्पादन समितिको अनौपचारिक वैठक बोलाइएको प्रवक्ता मोहन श्रेष्ठले जानकारी दिए ।

बैठकमा आजको जनप्रदर्शनको समिक्षा र आगामी रणनीतिबारे छलफल हुने बताइएको छ । आज सिंहदरबारभित्रै प्रदर्शन गरेका राप्रपा अध्यक्ष राजेन्द्र लिङदेनसहितका नेताहरुलाई प्रहरीले पक्राउ गरेको थियो ।

उनीहरुलाई प्रहरी परिसर भद्रकालीमा राखिएको छ ।

काठमाडौं । राष्ट्रिय प्रजातन्त्र पार्टीले अध्यक्ष राजेन्द्र लिङ्देनलगायत नेताहरूलाई तत्काल रिहा गर्न माग गरेको छ ।

सिंहदरबारस्थित संसदीय दलको कार्यालयबाट पार्टीको आन्तरिक बैठक सकेर कार्यक्रमस्थल बिजुली बजारतर्फ पैदल जाने क्रममा प्रशासनले अध्यक्ष लिङ्देनसहित नेताहरूलाई प्रहरीले गरफ्तार गरेको प्रवक्ता मोहन श्रेष्ठले बताए ।

उनका अनुसार प्रहरीले अध्यक्ष लिङ्देनसहित वरिष्ठ नेता उपाध्यक्ष बुद्धिमान तामाङ र प्रवक्ता ज्ञानेन्द्र शाहीलाई सिंहदरबारबाट गिरफ्तार गरेको छ ।

शान्तिपूर्ण प्रदर्शनमा सहभागी हुन कार्यक्रमस्थलतर्फ जाँदै गर्दा पक्राउ गरेका राप्रपाका अध्यक्ष र नेताहरूलाई अविलम्ब रिहा गर्न उनले माग गरे ।

साथै नेताहरू रिहा नहुञ्जेल लगातार विरोध प्रदर्शन गर्ने राप्रपाले जनाएको छ ।

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङदेन सिंहदरबारस्थित संसदीय दलको कार्यालयमा पुगेका छन् । कार्यालय अगाडि प्रहरी तैनाथ गरिएको अवस्थामा उनी पुगेका हुन् ।

राप्रपाका केही सांसदहरू संसदीय दलको कार्यालयभित्र छलफल गरिरहँदा अचानक प्रहरीको गाडीहरू आएर बाहिर राखिएका थिए र आफूहरूलाई बाहिर निस्किन नदिएर बन्धक बनाइएको राप्रपाका प्रमुख सचेतक ज्ञानेन्द्र शाहीले बताएका छन् । प्रहरीले भने सुरक्षा दिन आएको दाबी गरेको छ ।

शाहीले आफू पनि जनताबाट जितेर आएको भन्दै कार्यालयमा घेरा नहाल्न प्रहरीलाई भनेका छन् ।

उनले भने, ‘घेरा हाल्नुभएन नि त हो । संसदको कार्यालयमा त घेरा हाल्नुभए नि हामीलाई हामी पनि जनताबाट चुनावै लडेर आएको हो नि ! दलको कार्यालयमा आउनु भएन नि हो । यसो नगरौँ न है । घेरा हाल्नु भएन नि ।’

काठमाडौं । राजसंस्था पुनर्स्थापना र चैत १५ मा पक्राउ परेका नेता रिहाइको दबाबसहित आन्दोलनमा होमिएको राप्रपाले बानेश्वरमा प्रदर्शन सुरू गरेको छ । निषेधित क्षेत्र तोड्ने पूर्वघोषित कार्यक्रमअनुसार राप्रपाका कार्यकर्ता सडकमा आएका हुन् । अहिलेसम्म नेताहरू भने बानेश्वरमा देखिएका छैनन् । केही सांसदहरू सिंहदरबारस्थित संसदीय दलको कार्यालयमा छन् । प्रमुख सचेतक ज्ञानेन्द्र शाहीले आफूहरूलाई प्रहरीले दलको कार्यालयमै बन्धक बनाएको दाबी गरेका छन् ।

राप्रपा कार्यकर्ता र राजावादी समर्थकहरू बिजुलीबजार भेला भएर बानेश्वरतर्फ आएका छन् । उनीहरू बानेश्वरको आकाशे पुलनजिकैको प्रहरीको ब्यारिगेट तोड्ने प्रयासमा छन् । प्रहरीले भने माइकिङ गरेर उनीहरूलाई पछाडि हट्न आग्रह गरिरहेको छ ।

यसअघि राप्रपाले गत चैत २५ गते बल्खुमा प्रदर्शन गरेको थियो ।

राप्रपाले निषेधित क्षेत्र तोड्ने तयारी गरेपछि सरकारी पक्षले सैह्य नहुने चेतावनी दिइसकेको छ । अध्यक्ष राजेन्द्र लिङदेनले आन्दोलन शान्तिपूर्ण हुने बताएका छन् ।

प्रदर्शनको पूर्वसन्ध्यामा राप्रपाका नेताहरूलाई बोलाएर पूर्वराजा ज्ञानेन्द्र शाहले निर्मल निवासमा ‘लञ्च मिटिङ’ गरेका थिए ।

काठमाडौं । राष्ट्रिय प्रजातन्त्र पार्टीका सांसदहरूले सिंहदरबारस्थित संसदीय दलको कार्यालयबाट आफूहरूलाई निस्किन नदिएको बताएका छन् ।

बानेश्वर क्षेत्रमा निषेधित क्षेत्र तोड्ने तयारीसम्बन्धी भइरहेको छलफलको क्रममा थिए ।

राप्रपा प्रमुख सचेतक ज्ञानेन्द्र शाहीले आफूहरूलाई सिंहदरबारको संसद दलको कार्यालयमा डीएसपीको कमाण्डमा बन्धक बनाइएको नेपाल प्रेसलाई बताए ।

बिना जैवाल माननीय दीपक सिंहलगायतका सांसदहरू दलको कार्यालयमा रहेको उनले सुनाए ।

काठमाडौं । राप्रपाले राजसंस्था पुनर्स्थापनाको मागसहित आज गर्न लागेको आन्दोलनको रणनीति परिवर्तन गरेको छ। यसअघि तीन ठाउँबाट शक्ति प्रदर्शन निकाल्ने तयारी गरेको थियो।

तर, अहिले बसेको नेताहरूको अनौपचारिक बैठकले बिजुलीबजारमा मात्रै केन्द्रित हुने निर्णय गरेको राप्रपाका उपाध्यक्ष बुद्धिमान तामाङले बताए। उनका अनुसार अब बालुवाटार र भद्रकालीबाट र्‍याली निस्कँदैन।

सशक्त आन्दोलनमा होमिएको राप्रपाले पहिलो दिनमै निषेधित क्षेत्र तोड्ने तयारी गरेको छ । प्रदर्शनका लागि राप्रपा नेता कार्यकर्ता तथा राजसंस्थाका समर्थकहरू अहिले बिजुलीबजारमा भेला हुन थालेका छन्। त्यहाँबाट अध्यक्ष राजेन्द्र लिङदेनले नेतृत्व सम्हाल्नेछन् ।

र्‍याली बिजुलीबजारबाट बानेश्वरतिर आएर निषेधित क्षेत्र तोड्ने तयारी गरेको तामाङले बताए। उनले सामूहिक गिरफ्तारीबारे अहिले कुनै निर्णय नभएको र आन्दोलनको परिस्थिति हेरेर त्यही हुने बताए।

यसअघि राप्रपाले गत चैत २५ गते बल्खुमा शान्तिपूर्ण जनप्रदर्शन गरेको थियो। उक्त जनप्रदर्शन सोचेजस्तो प्रभावकारी हुन नसके पनि राप्रपाले आन्दोलनलाई निरन्तरता दिँदैछ।

राप्रपाले निषेधित क्षेत्र तोड्ने तयारी गरेपछि सरकारी पक्ष सैह्य नहुने चेतावनी दिइसकेको छ ।

काठमाडौं । राष्ट्रिय प्रजातन्त्र पार्टीले आजको जनप्रदर्शनमा प्रहरीसँग मुठभेड नगर्ने रणनीति लिएको छ । निषेधित क्षेत्र तोड्ने योजना भए पनि त्यो शान्तिपूर्ण हुने नेताहरूले बताएका छन् ।

एक नेताका अनुसार मुख्य प्रदर्शन बिजुली बजारमा हुनेछ । त्यहाँबाट सीमित संख्यामा नेताहरू पार्टीको झण्डा बोकेर निषेधित क्षेत्रमा प्रवेशको प्रयास गर्ने छन् । तर प्रहरीले रोकेको खण्डमा धेरै घम्साघम्सी नगर्ने बताइएको छ ।

‘प्रहरीले सुरूमै अनावश्यक बल प्रयोग गर्‍यो भने बेग्लै कुरा नत्र हाम्रो तर्फबाट मुठभेड हुँदैन,’ ती नेताले भने ।

प्रहरीले धरपकड गर्न खोजे सामूहिक गिरफ्तारी दिने उनले बताए ।

निषेधित क्षेत्रमा ठुलो जुलुस नलैजाने राप्रपाले जनाएको छ । अध्यक्ष राजेन्द्र लिङदेनले सामाजिक सञ्जालमार्फत यसको जनाउ दिएका छन् । आजको जनप्रदर्शन निरंकुशताविरूद्धको प्रतिकात्मक मात्रै हुने भन्दै उनले सत्ताधारीहरूलाई नडराउन आग्रह गरेका छन् ।