विराटनगर । यतिवेला सिंगै देश चुनावी माहोलमा रंगिएको छ । तर, मोरङको क्षेत्र नम्बर ३ को माहोल भने अन्यत्रभन्दा अलिक बेग्लै छ । अभिनेत्री रेखा थापाको उम्मेदवारीका कारण यहाँको चुनावी परिदृश्य फरक बनेको हो ।
नेपाली फिल्म क्षेत्रकी ‘हिम्मतवाली’ हिरोइन रेखा थापा पहिलो पटक प्रत्यक्ष चुनाव लड्दैछिन् । उनी यस क्षेत्रका स्थानीयवासीका लागि स्वतः ‘आकर्षण’ बनेकी छन् । पछि मतपत्रमा प्रतिविम्बित होला, नहोला, तर अहिले भीड जुटाउन चाहिँ रेखालाई कठिन छैन । पार्टीका हस्ती नेताहरुभन्दा रेखा उपस्थित कार्यक्रममा सहजै भीड जुट्छ ।
थापाको चुनावी कार्यक्रम र घरदैलो छ भन्ने सुनेपछि गर्दागर्दैको काम छाडेर उनीसामु पुग्ने गर्छन् । धान थन्क्याउन खेत र खलिहानमा भएकाहरु पनि रेखा हेर्न मरिहत्ते गर्छन् । जसले यस क्षेत्रको चुनावी सरगर्मीलाई रमाइलो बनाएको छ ।
आफूलाई हेर्न र सुन्न आएका मतदाता र सर्वसाधारणसँग रेखा आफ्ना कुरामात्रै भन्दिनन्, अंगालो हाल्दै सेल्फी पनि खिच्न भ्याउँछिन् । यस क्षेत्रका चोक–चोकमा हुने कोणसभामा नाचेर पनि मनोरञ्जन गराइदिन्छिन् । उनीसँगै मतदाता पनि छमछमी नाच्ने गर्छन् । उनको कार्यक्रममा ज्येष्ठ नागरिक र युवाको विशेष सहभागिता रहने गरेको छ ।
रेखाले मनोनयन दर्ता गर्ने मितिभन्दा दुई साताअघि नै यस क्षेत्रमा उम्मेदवार बन्ने घोषणा गरेकी थिइन् । अहिले चुनावी मैदानमै रहेकी रेखाको पार्टी राष्ट्रिय प्रजातन्त्र पार्टीको यहाँ सांगठनिक मत भने कम छ ।
स्थानीय तह निर्वाचनमा वडा तहमा राप्रपालाई २ हजार १२१ मत आएको छ । तर, रेखाको चुनावी चर्चा र चहलपहल भने ३७ हजार ४१० मत आएको एमाले र ३६ हजार ९१६ मत आएको कांग्रेसको भन्दा कम छैन ।
यस क्षेत्रमा सत्ता गठबन्धनका सुनिल शर्मा र एमालेका भानुभक्त ढकाल चुनावी प्रतिस्पर्धामा छन् । २०७४ को निर्वाचनमा पनि यी दुई मुख्य प्रतिस्पर्धी थिए ।
अहिलेकै अवस्था र माहोल रेखाले निर्वाचनको दिनसम्म कायम राख्ने हो भने १ लाख ४९ हजार ८३३ मतदाता रहेको यस क्षेत्रमा त्रिपक्षीय प्रतिस्पर्धा हुने देखिन्छ ।
उम्मेदवारमाझ घरदैलोमा रहेका तीनै जनाले आफूले नै जित्ने दाबी गरिरहेका छन् । पूर्वमन्त्री एमालेका ढकालले आफूले गरेको कामका कारण पुनः निर्वाचन जित्ने दाबी गरेका छन् ।
उनी २०७४ को निर्वाचनमा कांग्रेसका शर्मालाई हराएर सांसद भएका थिए । उनले आफू यस क्षेत्रबाट निर्वाचन जितेपछि विकास निर्माणको काम गरेको मतदातासमक्ष बताउँदै आएका छन् । ढकालले अघिल्लो निर्वाचनमा सुकुमबासी समस्या समाधान गर्ने वचन दिएका थिए ।
यस पटक पनि चुनावी प्रचारमा जाँदा उनी एमाले सरकारले भूमिसम्बन्धी समस्या समाधान गर्न आयोग बनाएको र त्यही आयोगले गरेको कामका कारण सुकुमबासी समस्या समाधानतर्फ गएको सुनाउँदै आएका छन् ।
उनले भने, ‘पार्टीले सुकुमबासी समस्या समाधान आयोग गठन गरेर काम सुरु भएको छ । केहीले जग्गा धनीपुर्जा नै पाइसक्नुभयो ।’
तर, उनको सुकुमबासी समस्या समाधान गर्ने वचन नै उनका लागि चुनौती बनेको छ । सुकुमबासी समस्या समाधान नभएको भन्दै मतदाता रिसाएको स्थानीय भीम राई बताँउछन् । यो क्षेत्रमा ३० हजार बढी सुकुमबासी रहेको अनुमान छ ।
सत्ता गठबन्धनका उम्मेदवार शर्मा विराटनगरको नोवेल मेडिकल कलेजका सञ्चालक हुन् । शर्मा २०७४ मा निर्वाचन हारेपछि पनि निरन्तर यही क्षेत्रमा छन् । यस क्षेत्रका नागरिकको स्वास्थ्य उपचारमा विशेष ख्याल राखेका शर्मा निर्वाचनमा यही जस लिन लागिरहेका छन् ।
क्षेत्र नम्बर ३ का मतदाताको उपचारमा नोवेल अस्पतालले विशेष छुटसहित सेवा दिँदै आएको छ । शर्मा भन्छन्, ‘मैले यस क्षेत्रमा गरेको कामका कारण यस पटक मैले जित्ने हो ।’
उनले यस क्षेत्रका नागरिकको उपचारमा नोवेल अस्पतालमा ५० प्रतिशतसम्म छुटको व्यवस्था गरेका छन् । बितेका ५ वर्षमा शर्माले विभिन्न स्वास्थ्य शिविरहरु यस क्षेत्रमा गराएका छन् । यही कामका कारण निर्वाचन जित्ने बेलबारीका कांग्रेस कार्यकर्ता सञ्जय बस्नेत दाबी गर्छन् ।
भावनात्मक कुरा गर्दै मत माग्दै
ढकाल र शर्माले आफूले गरेका कामको जस लिन खोजे पनि थापाले भने आफू यही माटोमा जन्मिएको भन्दै मत माग्न थालेकी छन् । अघिल्ला चुनावमा जितेका सांसदले काम नगरेपछि आफू जन्मभूमि फर्किएर उम्मेदवार बनेको थापाले बताउँदै आएकी छन् ।
‘हाम्रा दाजुभाइ किन खाडी र मलेशिया गए ? तपाईं चेलीबेटीहरुले किन एक्लै घाँस दाउरा गर्नुपर्ने भयो ?’ माझीटारमा भएको चुनावी सभामा बोल्दै रेखाले भनेकी थिइन्, ‘कांग्रेस र एमालेले काम र रोजगारी दिएनन् ? स्कुल र अस्पताल खोलेनन् । हामीले विकास पाएनौं ।’
उनले स्वरोजगारको मुद्दालाई चुनावी एजेण्डा बनाएकी छन् । बक्राहा, चिसाङ, डाँस खोलालगायतको कटान समस्या समाधान गर्ने बताउने गरेकी छन् ।
यस्तो छ विगत
मोरङ क्षेत्र नम्बर ३ लाई वामपन्थीहरुको आधार इलाकाका रुपमा लिइन्छ । यस क्षेत्रमा एमालेले निर्वाचन जित्दै आएको छ ।
निर्वाचन क्षेत्र फरक परेको भए पनि यो भूगोलबाट २०४८ सालदेखि २०७४ सम्म वामपन्थी उम्मेदवारले निर्वाचन जित्दै आएका छन् ।
यसअघि यो निर्वाचन क्षेत्रबाट भरतमोहन अधिकारी, लालबाबु पण्डित, गोपी अछामी, लालबहादुर मगर विजयी भएका थिए ।
२०७४ सालको निर्वाचनमा वाम गठबन्धनबाट उम्मेदवार भएका भानुभक्तले ४२ हजार ४१३ मत ल्याएका थिए । कांग्रेसका सुनिलले ४० हजार ५०६ मत ल्याएका थिए । तर, यस पटक राजनीतिक समीकरण फेरिएको छ । अघिल्लो निर्वाचनमा भानुभक्तसँग रहेको माओवादी मत यस पटक सुनिलको पक्षमा छ ।
यस्तै एमाले विभाजन भई एकीकृत समाजवादी हुँदा एमालेको मत पनि सत्ता गठबन्धनलाई नै थपिने छ । यस क्षेत्रमा दलका ९ र ६ स्वतन्त्र गरी १५ जना उम्मेदवार प्रतिनिधिसभा सदस्यका लागि चुनावी प्रतिस्पर्धामा छन् ।
यो निर्वाचन क्षेत्रमा पथरी शनिश्चरे नगरपालिकाको वडा १, २, ३, ४, ७, ८, ९ र १० वडा पर्छन् । बेलबारी नगरपालिकाको वडा १, २, ३, ४, ८, ९, १० र ११ वडा यसै क्षेत्र पर्छ ।
सुन्दरहरैंचा नगरपालिकाको वडा १, ८, ९, १०, ११ र १२ वडा यसै निर्वाचन क्षेत्रमा पर्दछ । कानेपोखरी गाउँपालिकाको ४, ५, ६ र ७ गरी यो निर्वाचन क्षेत्रमा २६ वटा वडा छन् ।
स्थानीय तहमा वडमा आएको मत हेर्दा सत्तापक्षीय गठबन्धन अगाडि छ । यो निर्वाचन क्षेत्रमा स्थानीय तहको वडागत मतअनुसार जसपा-एमाले गठबन्धनको ३७ हजार ८७३ पुग्छ । सत्ता गठबन्धनको मत ४६ हजार १४१ देखिन्छ ।
सुनिललाई बागीको पीर
मोरङ क्षेत्र नम्बर ३ मा कांग्रेसका जयराम संयोग लिम्बू कांग्रेसका बागी उम्मेदवार छन् । उनी नेपाली कांग्रेसका महाधिवेशन प्रतिनिधि हुन् । उनलाई पार्टीले कारबाही गरिसकेको छ । उनी विजय गच्छदार निकट नेता मानिन्छन् ।
यहाँका अर्का प्रभावशाली नेता राजकुमार लिम्बूसमेत कांग्रेसलाई चुनौती हुन सक्छन् । उनी प्रदेशसभामा उम्मेदवार बन्न नपाएपछि असन्तुष्ट बन्दै पार्टीबाट राजिनामा दिएर बसेका छन् । उनी बेलबारी नगरपालिकामा समेत मेयरका आकांक्षी थिए ।
