Category: राष्ट्रिय स्वतन्त्र पार्टी

काठमाडौं । राष्ट्रिय स्वतन्त्र पार्टीले संविधान दिवसका अवसरमा सरकारको सिफारिसमा राष्ट्रपतिबाट छ सय ७० कैदीबन्दीको भुक्तान हुन बाँकी कैद मिनाहा भएको विषयमा सरकारको जवाफ माग गर्ने निर्णय गरेको छ ।

पार्टी केन्द्रीय कार्यालय बालाजुमा आज बसेको केन्द्रीय समिति र संसदीय दलको बैठकले सदनबाट यस सम्बन्धमा सरकारसँग जवाफ माग्ने र सदनमा सङ्कल्प प्रस्ताव दर्ता गर्ने निर्णय गरेको महामन्त्री एवं प्रवक्ता डा मुकुल ढकालले जानकारी दिए ।

बैठकले कैद माफी मिनाहासम्बन्धी विषयमा राष्ट्रपति रामचन्द्र पौडेललाई संविधान र कानुनको संरक्षण र पालना गर्ने विषयमा ध्यानाकर्षण पत्र बुझाउने निर्णय गरेको छ ।

‘विशेष अवस्थामा कैद माफी दिन सकिने प्रावधानको गलत प्रयोग गर्दै सरकारले संविधान दिवसका दिन थुप्रै कैदीको कैद मिनाहाका लागि सिफारिस गरेको तथा कानुनका बर्खिलाप हुने गरी जघन्य अपराधमा मुछिएका व्यक्तिलाई सरकारको सिफारिसमा राष्ट्रपतिबाट कैद मिनाहा भएको विषयमा बैठकले भर्त्सना गरेको छ’, उनले भने ।

राष्ट्रपति पौडेलले संविधान दिवसका अवसरमा भीमबहादुर खवाससमेतका चार सय ९७, हर्कबहादुर लिम्बुसमेतका एक सय ७० र ज्येष्ठ नागरिक समदिन मियाँसमेतका तीन गरी कूल छ सय ७० कैदीको भुक्तान हुन बाँकी कैद कट्टा गरी सजाय माफी गरेका थिए ।

गत भदौ २९ गतेको मन्त्रिपरिषद् बैठकले ती कैदीको कैद कट्टा गरी सजाय माफी गर्न राष्ट्रपतिसमक्ष आग्रह गरेको थियो । सरकारको सिफारिसमा राष्ट्रपतिले कारागारमा बस्दा आचरण सुध्रिएका, ५० प्रतिशत कैद भुक्तान गरेका र निश्चित उमेर कटेका कैदीको कैद मिनाहा गर्ने व्यवस्था छ ।

बैठकले सरकारले प्रारम्भमा भ्रष्टाचारको नियन्त्रण तथा सुशासन प्रवर्द्धनमा सकारात्मक सुरुआतको सङ्केत गरेपनि पछिल्ला गतिविधिले संशय पैदा गरेको निष्कर्ष निकालेको छ ।

‘ललिता निवास, नक्कली भुटानी शरणार्थी र सुन काण्डको अनुसन्धान र अभियोजनप्रति जनस्तरमा प्रश्न उठ्न थालेको छ, घटनामा संलग्नप्रति सरकारले नरम नीति लिएको विषयले त्यसको पुष्टि गरेको छ’, प्रवक्ता ढकालले भने ।

रास्वपाले त्रिभुवन अन्तर्राष्ट्रिय विमानस्थलबाट अवैध रूपमा सुन तस्करी भएको घटनाको छानबिन गर्न राष्ट्रिय मान्यता प्राप्त दलहरुबीच यही असोज ५ गते उच्चस्तरीय छानबिन समिति गठन गर्ने सहमति भएकामा सरकारले समिति गठन नगरेर सहमति उल्लङ्घन गरेको ठहर गरेको छ ।

‘भदौ ६ गतेको सहमतिअनुसार समिति गठन गरी कार्यादेश तोक्नुपर्नेमा सत्ता र प्रमुख प्रतिपक्ष नै आरोप प्रत्यारोपमा उत्रिदा सो सहमति कार्यान्वयन नहुने हो कि भन्ने आशङ्का उब्जिएको छ’, उनले भने, ‘बैठकले सो सहमतिअनुसार अगाडि बढ्न दलहरुलाई आग्रह गर्दै तत्काल उच्चस्तरीय समिति गठन गरी कार्यादेश तोक्न माग गरेको छ ।’

पछिल्ला दिनमा उपचारका क्रममा लापरबाही भएको भन्दै चिकित्सक तथा स्वास्थ्यकर्मीमाथि भइरहेको आक्रमणको निन्दा गर्दै बैठकले चिकित्सकमाथि आक्रमण गर्ने कानुनअनुसार तत्काल कारबाही गर्न पनि माग गरेको छ । सरकारले सदनमा पेश गरेको विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयक, २०८० प्रति असहमति रहेको जनाउँदै बैठकले उक्त असहमतिलाई संसदीय प्रक्रियामा दर्ता गराउने निर्णय गरेको प्रवक्ता ढकालले जानकारी दिए ।

बैठकले मुलुकका विभिन्न स्थानमा धार्मिक, जातीय तथा साम्प्रदायिक सुसम्बन्ध खलल पुर्‍याउन स्वार्थ समूह सक्रिय रहेको निष्कर्ष निकाल्दै सामाजिक सद्भावमा खलल पुग्ने गतिविधि नगर्न र अल्पसङ्ख्यकको पहिचानको सम्मान गर्न सबैमा अपिल गरेको छ । रास्वपाले जुनसुकै धर्मावलम्बी तथा समुदायलाई लक्षित गरी जुनसकै आवरणमा सामाजिक सद्भाव बिथोल्न खोज्ने गतिविधि तत्काल नियन्त्रण गर्न सरकारसँग माग गरेको छ ।

नेपालीका ठूला चाडपर्व नजिकिएको समयमा बजार थप अनियन्त्रित भएको ठहर गर्दै बैठकले कालोबजारी गर्ने, कृत्रिम अभाव सिर्जना गर्नेमाथि कडा कारबाही गर्न र देशभरका उपभोक्तालाई राहत दिन सहुलियतपूर्ण बजार सञ्चालन गर्न सरकारसँग माग गरेको छ । बैठकले पार्टीका तर्फबाट निर्वाचित भएको सबै सांसदलाई आआफ्नो निर्वाचन क्षेत्रका मतदातासँग सार्वजनिक सुनुवाई कार्यक्रम गर्न निर्देशन दिएको प्रवक्ता ढकालले जानकारी दिए ।

काठमाडौं । राष्ट्रिय स्वतन्त्र पार्टीले विद्यालय शिक्षासम्बन्धी कानूनलाई संशोधन र एकीकरण गर्न बनेको विधेयक २०८० माथि संशोधन प्रस्ताव दर्ता गर्ने भएको छ ।

विधेयकको विरुद्धमा शिक्षकहरु आन्दोलित भएपछि रास्वपा प्रवक्ता डा. मुकुल ढकालले नेपालका सम्पूर्ण सार्वजनिक विद्यालयको गुणस्तर उकास्न आवश्यक भएको बताएका छन् ।

ढकालले जारी गरेको विज्ञप्तिमा भनिएको छ, ‘निश्चय नै शिक्षक जस्तो मर्यादित र अति सम्मानित पेशालाई सरकारबाट कहिल्यै उचित व्यवहार भएन । समयमै विद्यालयका लागि आवश्यक दरबन्दी नखुलाउने, लाइसेन्सको परीक्षा नलिने तथा सबैलाई खुला पनि नगर्ने, लिएको परीक्षाको नतिजा वर्षौंसम्म ननिकाल्ने जस्ता कुराले शिक्षक हुन चाहेकाहरुलाई अन्योलमा राखिँदै आएको पाइन्छ । रास्वपाले शिक्षकको तलब सुविधा सबैभन्दा धेरै हुनुपर्छ भनी स्थापनाकालदेखि नै पटक पटक आवाज उठाउँदै आएको छ ।’

विद्यार्थीहरुको उज्ज्वल भविष्य सुनिश्चित गर्न पनि शिक्षकहरुको हकहित सुनिश्चित हुनुपर्ने उल्लेख गर्दै उनले शिक्षकहरुले आफ्नो पेशागत हकहितका लागि एकजुट हुने नाममा राजनीतिक दलको भ्रातृ संगठनका रुपमा रहन नहुने पार्टीको नीति रहेको बताए ।

‘शिक्षकहरुको पेशागत विकासका मागहरुमा हामी एकै ठाउँमा उभिन तयार छौं, साथै शिक्षकहरुले आफ्ना मागहरु सरकारसमक्ष राख्न पाउने वैकल्पिक विधिहरु हुँदाहुँदै विद्यार्थीहरुको पढ्न पाउने अधिकारलाई कुण्ठित नगर्न सम्पूर्ण शिक्षक संगठनहरुप्रति हार्दिक अनुरोध गर्दछौं’, रास्वपाले भनेको छ ।

काठमाडौं । राष्ट्रिय स्वतन्त्र पार्टीका सभापति रवि लामिछानेले जनताले राजनीतिक नेतृत्वले धोका दिएको महसुस गरेको टिप्पणी गरेका छन् । संविधान दिवसको अवसरमा शुभकामना दिँदै मुलुकको बागडोर सम्हालेको प्रमुख नेतृत्व व्यवस्था परिवर्तनमा सफल भए पनि जनताको अवस्था परिवर्तनमा चुकेको बताएका छन् ।

उनले भनेका छन्, ‘जननिर्वाचित संविधानसभाद्वारा संविधान बनाइनु ऐतिहासिक थियो । जनताले हदै सम्मको सङ्घर्ष गरेर नयाँ संविधान बनाएको ८ वर्ष पुगिसकेको छ । तर, मुलुकको बागडोर सम्हालेको अहिलेको सम्पूर्ण प्रमुख नेतृत्व व्यवस्था परिवर्तनमा सफल भए पनि जनताको अवस्था परिवर्तनमा चुकेको छ ।’

उनले अहिले आफू विगत ३ दशकको राजनीतिक उतार चढावमा सबैभन्दा पीडा भोगेको रोल्पा रहेको बताएका छन् ।

उनले भनेका छन्, ‘जनताले राजनीतिक नेतृत्वले धोका दिएको महसुस गरेका छन् । जनताले समृद्धिको ढोका खोजिरहेका छन् । उनीहरूले बुझेका छन् संविधान साधन हो, साध्य होइन । संविधान आफैँमा गतिशील दस्तावेज हो । हाम्रो संविधानमा धेरै सबल र उन्नत लोकतान्त्रिक पक्षहरू भए पनि केही संरचनागत व्यवस्थाहरूले राज्यलाई बोझिलो बनाएको छ ।’

संविधान स्वयंले नै लोकतान्त्रिक प्रक्रियाद्वारा संशोधनको बाटो खुला राखेको उनको भनाइ छ । लोकतान्त्रिक व्यवस्थाको सदुपयोग गर्दै संविधान देश र जनतालाई समृद्धिको बाटोमा अगाडि लैजाने साधन बन्नुपर्ने बताएका छन् ।

काठमाडौं । राष्ट्रिय स्वतन्त्र पार्टीबाट निष्कासित डा. ढाकाकुमार श्रेष्ठले पार्टी र पार्टीका एक केन्द्रीय सदस्यको नाम जोडेर दिएको अभिव्यक्तिप्रति आपत्ति जनाएको छ । प्रवक्ता डा. मुकुल ढकालले एक विज्ञप्ति निकाल्दै मन्त्री बनाउन ३ करोड रूपैयाँ माग गरेका थिए भनी विभिन्न सञ्चारमाध्यममा सार्वजनिक अभिव्यक्ति दिएकोप्रति ध्यानाकर्षण भएको जनाए ।

विज्ञप्तिमा भनिएको छ, ‘विनाआधार, विनाप्रमाण पार्टीको छविमा आँच पुर्‍याउने कलुषित मनसायले आम जनसमुदायमाझ पार्टीका सम्बन्धमा फैलाइएका सूचनाबाट भ्रममा नपर्न सम्बन्धित सबैलाई अनुरोध गरिन्छ ।’

राष्ट्रिय स्वतन्त्र पार्टी पारदर्शिता, जवाफदेहिता र भ्रष्टाचारप्रति शून्य सहनशीलताको नीति अनुसरण गर्ने पार्टी भएकाले यस प्रकरणमा अझै पनि पार्टीका कुनै पनि तहको पदाधिकारी वा केन्द्रीय सदस्यले पार्टीको नाम प्रयोग गरी कसैसँग पैसा मागेको ठोस प्रमाण लिएर डा. श्रेष्ठ वा जोकोही आएको अवस्थामा पार्टीले त्यस्ता सदस्य जोकोही भए पनि प्रमाण पेश भएको ७२ घण्टाभित्र कारबाही गरिने समेत उल्लेख गरेका छन् ।

डोटी । राष्ट्रिय स्वतन्त्र पार्टी (रास्वपा) डोटीले राजनीतिक दलका भ्रातृ संगठनहरुलाई विद्यालयमा संगठन निर्माण गर्ने काम बन्द गर्न माग गरेको छ ।

रास्वपा डोटीले शुक्रबार प्रमुख जिल्ला अधिकारी गोपालप्रसाद अर्याललाई विद्यालयमा राजनीति बन्द गर्न ध्यानाकर्षण गराएको हो ।

‘राजनीतिक दल र तिनका विद्यार्थी संगठनहरुले विद्यालयमा राजनीतिक गतिविधि गर्ने, झण्डा प्रदर्शन गर्ने, विद्यार्थीहरुको राजनीतिक संगठन निर्माण गर्ने क्रियाकलापले कानूनी शासनको धज्जी उडाएकोप्रति हाम्रो गम्भीर ध्यानाकर्षण भएको छ’, ध्यानाकर्षण पत्रमा उल्लेख छ ।

ध्यानाकर्षणपत्रमा यस्ता राजनीतिक संगठन निर्माण भएका विद्यालयका शिक्षकहरुलाई कारबाही गर्न माग गरिएको छ ।

काठमाडौं । राष्ट्रिय स्वतन्त्र पार्टीका सभापति रवि लामिछाने र नेपालका लागि अमेरिकी राजदूत डिन आर। थम्पसनबीच भेटवार्ता भएको छ।

बुधवार सभापति लामिछाने भेट्न राजदूत थम्पसन पार्टी कार्यालय वनस्थली पुगेर भेट गरेका हुन्।

भेटमा प्रतिनिधि सभा सदस्य तथा पार्टीको अन्तर्राष्ट्रिय सम्बन्ध विभाग प्रमुख शिशिर खनाल, केन्द्रीय सदस्य प्रतिभा रावललगायतको सहभागी थिए।

भेटघाटमा मुख्यतया नेपालको आर्थिक विकास र सुशासनका विषयहरूमा छलफल भएको जनाएको छ। भेटमा नेपालीले दिनहुँ भोगिरहेका भिसा सम्बन्धी समस्याबारे आफू जानकार रहेको र त्यसको समाधान राजदूतावासको उच्च प्राथमिकतामा रहेको महामहिम थम्पसनले जानकारी समेत गराए।

काठमाडौं । राष्ट्रिय स्वतन्त्र पार्टीका सभापति रवि लामिछानेले राष्ट्रपति रामचन्द्र पौडेललाई भेटेर संसदको गतिरोधको अन्त्यका लागि सहजीकरण गर्न आग्रह गरेका छन् ।

आज साँझ राष्ट्रपति निवासमा पुगेर लामिछानेले राष्ट्रपति पौडेलसँग भेटवार्ता गरेका हुन् ।

उनले अबिलम्ब सदन सूचारू गरी जन सरोकारका मुद्दाहरूमा बहस तथा नीति निर्माणका माध्यमबाट सम्बोधन गर्ने कार्यलाई अगाडि बढाउने कार्यमा सहजीकरणका लागि अनुरोध गरेका थिए । भेटमा लामिछानेले समसामयिक राजनीतिक विषयहरूमा विशेष ध्यानाकर्षण समेत गराएका थिए ।

काठमाडौं । राष्ट्रिय स्वतन्त्र पार्टीका सभापति रवि लामिछानेले आफ्नो आलोचकलाई आगामी निर्वाचनबाट जनताले जवाफ दिने बताएका छन् । इलाममा आयोजित पार्टीको कार्यक्रमलाई सम्बोधन गर्दै उनले क्विन्टल सुन एयरपोर्टबाट बाहिरिँदा पनि सरकारले केही गर्न नसकेको बताए ।

उनले भने, ‘यहाँ मलाई ढोका खोल्दियो भनेर पनि विवाद गरिएको छ । नेपालको एयरपोर्टमा तस्करहरुलाई क्विन्टलका क्विन्टल सुन छिराउन ढोका खोल्नेहरुको विरोध गर्नुस् । अरु ढोकाको विरोध गर्न अहिले जरुरी छैन । तीनको विरोधमा हामी उत्रिएका छौं । एयरपोर्टबाट क्विन्टलका क्विन्टल सुन छिरेको छ ।’

उनले अहिले कारवाही आएका ललिता निवास, नक्कली शरणार्थी प्रकरण र सुन प्रकरणको सत्यतथ्य छानबिन गरे औंलामा गन्ने नेतामात्रै बाँकी रहने बताए । उनले इमानदारपूर्वक छानबिन गर्न सरकारलाई आग्रह गरे ।

उनले आगामी निर्वाचनसम्म पार्टी संगठनलाई बलियो बनाएर पहिलो पार्टी बनेर देशको फोहोर सफा गर्ने बताए । जनताको मुद्दा बोल्न नसक्नेले राजनीतिबाट बिदा हुन आग्रह गरे ।

पोखरा । राष्ट्रिय स्वतन्त्र पार्टी केन्द्रीय उपाध्यक्ष डीपी अर्यालले सांसदको निहित स्वार्थमा सदन अवरुद्ध गर्न नमिल्ने बताएका छन् ।

रास्वपा गण्डकी प्रदेशस्तरीय प्रशिक्षण कार्यक्रमको पत्रकार सम्मलेनमा प्रतिनिधिसभा सदस्यसमेत रहेका अर्यालले सदनलाई बन्धक बनाएर सेवा, सुविधा लिनु जायज नहुने बताए ।

‘जे जे विषयवस्तु छन्, सदनमै छलफल गरौं । करिब तीन करोड नेपालीका प्रतिनिधि हामी सांसदको निहित स्वार्थमा सदन अवरुद्ध गर्न मिल्दैन’, उनले भने, ‘सदनलाई बन्धक बनाएर सेवा, सुविधा लिनु जायज हुँदैन ।’

संसद अवरुद्ध नगर्न र सबै एजेन्डामा संसदमै छलफल गर्न उपाध्यक्ष अर्यालले आग्रह गरे । सांसदहरुलाई बोलाएर दिनभर पर्खाउने र शीर्ष नेताहरुको छलफलमा निष्कर्ष ननिस्केको भन्दै सदन स्थगित गरिनु दुर्भाग्य भएको उनले बताए ।

२०८४ सालको निर्वाचनबाट एकल बहुमतसहितको सरकार बनाएर जनताका समस्या समाधान गर्दै मुलुकको कायापलट गर्ने उपाध्यक्ष अर्यालले दाबी गरे ।

‘अहिलेको प्रदेश संरचना कामकाजी भएको छैन । त्यसको मोडेलमा परिमार्जन जरुरी छ । आगामी आमनिर्वाचनअघि नै प्रदेश संरचनाको नयाँ मोडल तयार गरी जनतामा जाने योजना छ’, उनले भने, ‘अरु दलका राम्रा कुरा सिक्ने र नराम्रा पक्ष त्याग्दै वडादेखि केन्द्रसम्मै पार्टी संगठन बनाउने अभियानमा छौं ।’

उपाध्यक्ष अर्याल शुक्रबार र शनिबार हुने प्रदेशस्तरीय प्रशिक्षणमा सहभागी हुन पोखरा आएका छन् । प्रशिक्षणमा प्रदेश कमिटी सदस्य, विभागका सदस्य, पालिका पदाधिकारी, जिल्ला प्रदाधिकारी गरी २५० जना सहभागी रहेको रास्वपा गण्डकी प्रदेश सभापति राजन गौतमले जानकारी दिए ।

काठमाडौं । सुन प्रकरणमा उच्चस्तरीय छानबिन समितिको माग गर्दै प्रमुख प्रतिपक्ष दल नेकपा एमालेले सदन अवरोध गरेपछि राष्ट्रिय स्वतन्त्र पार्टी संसद भवन बाहिरै संसदको अभ्यास गरेको छ ।

एमालेले संसदमा निरन्तर अवरोध गरेपछि सभामुखले शुक्रबारसम्मका लागि संसद स्थगित गरेका हुन् ।

लामो संघर्षबाट प्राप्त व्यवस्थामा दलहरुले लामो समयदेखि प्रहार गर्दै आइरहेको प्रमख सचेतक सन्तोष परियारले बताए ।

उनले भने, ‘संसदको तेस्रो दिन पनि संसद चल्न सकेन । हामीले जनताको मुद्दा लिएर आएको थियौं । बाढीपहिरो, लम्पी स्किनको विषयमा राजनीतिक दलहरुको स्वार्थको कारणले आज पनि संसद चलेन। त्यसमा हाम्रो विमति छ । हामीले सभामुखलाई पनि भन्यौैं । उहाँले पनि सदन चलाउने प्रयास गर्नुभयो ।’

लामो सययदेखि राजनीतिमा रजाइ गर्ने पार्टीीहरुको कारणले संसद चल्न नसकेको आरोप लगाए ।

उनले भने, ‘जनमतको कदर नगर्ने पार्टीहरुले इतिहासमा मुल्य चुकाउनुपर्छ । हामीले हाम्रो कुुरा संसदमा राख्न पाएनौं । त्यसैले हामीले संसदको अगाडि सभामुखलाई सम्बोधन गरेर आफ्नो कुरा राख्न आएका छौं । ठूला दलको रबैयाले व्यवस्थामाथि नै प्रहार गरिरहेको छ ।’

सुन प्रकरणमा छानबिन समिति गठन गर्ने वा नगर्ने भन्ने विषयमा ठूला दलहरुबीच सहमति हुन नसक्दा संसद बन्धक बनिरहेको छ । सभामुखको पहलमा प्रधानमन्त्री पुष्पकमल दाहाल प्रचण्डसहित तीन दलका शीर्ष नेताहरुबीच छलफल हुँदा पनि कुरा मिलेको छैन ।

सरकारले सिआईबीले छानविन गरिरहेकाले अर्को समिति गठन नगर्ने पक्षमा छ । सिआईबीको अनुसन्धानमा शंका लागे पछि अर्को समिति बनाएर जानसक्ने मंगलबार सदनमा गृहमन्त्रीले बताएका थिए । तर, सरकारमै संलग्न व्यक्तिहरुको तस्करीमा संलग्न भएकाले छानविन समिति गठन गर्नुपर्ने एमालेको अडान छ ।

यस्तै, सदनबाहिर सभामुखलाई सम्बोधन गर्दै रास्वपा सभापति रवि लामिछानेले पनि सुन प्रकरणमा ठूला व्यक्तिहरुको संलग्नता भएको दाबी गरे । गृहमन्त्रीले सिआइबीलाई ३५ दिन कुरौं भनेर समय मागेकोमा हेर्न सकिने बताए ।

तर, सिआइबीको छानबिनमा पनि पूर्ण विश्वस्त हुने ठाउँ नरहेको बताए । सभापति लामिछानेपछि संसदमा झैं अन्य सांसदहरुले पनि धारणा राखेका थिए ।

काठमाडौं । राष्ट्रिय स्वतन्त्र पार्टीले नागरिकका समस्या समाधान र सहजीकरणका लागि खटिनुअघि स्थानीय निकाय र सरोकारवालासँग समन्वय र अनुमति लिन पार्टी पंक्तिलाई निर्देशन दिएको छ ।

नारायणगढ-मुग्लिन सडक खण्डमा परिचालन गरेको स्वयंसेवक टीम (आरएटी) हटाउन चितवनका सीडीओले सार्वजनिक सूचनामार्फत ध्यानाकर्षण गराएलगत्तै रास्वपाले निर्देशन जारी गरेको हो ।

रास्वपाले हिजोदेखि ५० जनाको टोली उक्त सडक खण्ड व्यवस्थापन गर्न भन्दै खटाएको थियो ।

रास्वपा महामन्त्री तथा प्रवक्ता मुकुल ढकालले जनताका दैनिक जीवनमा आइपर्ने कठिनाइहरूलाई समाधानमा साथ दिन तथा नागरिकका समस्या सहजीकरणका विशुद्ध समाज हितका हेतुले उक्त टीम बनाएको प्रष्टिकरण दिएका छन् ।

‘अविरल वर्षाका कारण बाढी पहिरोले जनजीवन प्रभावित भएको परिप्रेक्ष्यमा पार्टीका अन्य संयन्त्र र RAT जनजीविकाका समस्या सहजीकरणका लागि खटिनु अपरिहार्य छ । अतः नागरिकका समस्या समाधान गर्न सहजीकरणका लागि खटिनु अघि स्थानीय निकाय र सरोकारवाला निकायहरुसँग आवश्यक समन्वय र अनुमतिमा मात्र खटिनका लागि निर्देशानुसार RAT, पार्टी पंक्ति तथा सम्बन्धित सबैमा सूचित गराइएको जानकारी गराइन्छ ।’

काठमाडौं । राष्ट्रिय स्वतन्त्र पार्टीका सभापति रवि लामिछानेले संसदमा बार्गेनिङ मात्रै चलिरहेको टिप्पणी गरेका छन् । सत्तापक्ष र प्रतिपक्षको लडाईको कारणले पटक पटक संसद बैठक बस्दै नबसी स्थगित भएपछि उनले यस्तो टिप्पणी गरेका हुन् ।

उनले फेशबुकमा लेखेका छन्, ‘वर्षौंदेखि देशलाई कसरी प्यारलाइज्ड गरिएको रहेछ भन्ने राम्ररी बुझ्दैछौं । कयौं कानुन बनाउनु पर्ने छ, कयौं कानुनमा संशोधन छ्न् । जन सरोकारका कयौं मुद्दामा छलफल र निर्णय गर्नु छ । तर संसद चल्दैन, बार्गेनिङ चल्छ, मात्र बार्गेनिङ । दुःखद..।’

कानून बनाउने, कानूनमा संशोधन गर्ने जन सरोकारका कयौं मुद्दामा छलफल र निर्णय गर्ने ठाउँमा बार्गेनिङ मात्रै चलेको बताए । सुन प्रकरणमा उच्चस्तरीय छानबिन समितिको माग गर्दै एमालेले निरन्तर संसद अवरुद्व गर्दै आइरहेको छ । अवरोध हटाउन अहिले तीन दलका शीर्ष नेताहरु छलफलमा छन् । तर, प्रधानमन्त्री छानविनको लागि समिति गठन गर्ने पक्षमा छैनन् ।

काठमाडौं । राष्ट्रिय स्वतन्त्र पार्टीका सभापति रवि लामिछानेले चितवनमा मोबाइल क्लिनिकका लागि प्रयोग गरेको एम्बुलेन्स पुरानो मेडिकल कलेज भरतपुरले फिर्ता लिने भएको छ ।

पुरानो भएर थन्किएको एम्बुलेन्स रास्वपालाई प्रयोग गर्न दिए पनि यसमाथि विभिन्न प्रश्न उठेकाले अस्पतालले फिर्ता मागेको हो ।

लामिछानेका प्रमुख कार्यकारी अधिकृत हेमन्त बरालले अस्पताललाई सो एम्बुलेन्स फिर्ता गरेर आजै अर्को एम्बुलेन्स भाडामा लिइ सेवालाई निरन्तरता दिइएको बताए ।

उनले भने, ‘पुरानो भएर नवीकरण समेत नगरी थन्काइएको एम्बुलेन्सलाई हामीले मोबाइल क्लिनिक सञ्चालन गर्न मागेका थियौँ । तर, जति पुरानो भए पनि एम्बुलेन्सलाई यसरी सञ्चालन गर्न नपाइने भनेर सरकारी निकायबाट पत्र आएको जानकारी अस्पतालले गराएको छ । त्यसैले आजै फिर्ता गर्दैछौं ।’

रास्वपाले सो एम्बुलेन्स नवीकरण गराएर निलो रंग लगाइ ‘मोबाइल क्लिनिक’ का रूपमा दौडाइरहेको थियो । लामिछानेले आफू निर्वाचित भएको १०० दिन पूरा भएको अवसरमा यो सेवा सुरु गरेका हुन् । तर, रंग परिवर्तन गरिएकोमा समेत प्रश्न उठेको थियो ।
बरालले पुरानै रंगमा अस्पताललाई फिर्ता दिइने बताए ।

‘हामीले निलो रंग हटाएर पुरानै रंगमा राख्न दिइसकेका छौँ,’ उनले भने ।

मोबाइल सेवा भने एक दिन पनि अवरुद्ध हुन नदिएको उनको भनाइ छ । बरालका अनुसार ५ दिनका लागि भनेर एउटा एम्बुलेन्स भाडामा लिएर पठाइएको छ । यो एम्बुलेन्समा भने कुनै पनि छेडखानी गरिएको छैन ।

पार्टीले दीर्घकालका लागि अर्को गाडी ल्याउने सोच बनाएकाले तत्कालका लागि यो व्यवस्था गरिएको उनले जानकारी दिए ।

एम्बुलेन्समा एकजना डाक्टर र एकजना नर्स रहन्छन् । रविको सचिवालयले दैनिक सेड्यूल बनाएर मोबाइल क्लिनिकलाई विभिन्न वडाहरूमा पठाउने गरेको छ । यसले ६५ वर्षमाथिका वृद्ध वृद्धालाई निशुल्क सेवा दिन्छ ।

काठमाडौं । राष्ट्रिय स्वतन्त्र पार्टीका सभापति रवि लामिछानेले सुन तस्करी प्रकरणमा पूर्वप्रधानमन्त्रीहरुलाई अनुसन्धानको दायरामा ल्याउनु पर्ने बताएका छन् ।

उनले यस प्रकरणको अनुसन्धान फराकिलो पार्नुपर्ने भन्दै यस्तो बताए ।

शुक्रबार राज्य व्यवस्था तथा सुशासन समितिको बैठकमा बोल्दै सभापति लामिछानेले सुन तस्करी प्रकरणको छानबिन राजश्व अनुसन्धान विभागले गरेर मात्रै नपुग्ने बताएका हुन् ।

उनले यस प्रकरणमा संगठित अपराध, नागरिकता, पासपोर्ट किर्ते, अन्तरदेशीय अपराध लगायतका विषय पनि जोडिएको भन्दै सो विषयमा पनि अनुसन्धान हुनुपर्ने बताए । यहाँले यी विषयहरुमा यतिका दिनसम्म अनुसन्धान हुन नसक्ने गम्भिर विषय भएको बताए । उनले यस प्रकरणलाई छानबिन गर्न आयोगको आवश्यकता रहेको पनि बताए ।

सभापति लामिछानेले ललिता निवास जग्गा प्रकरणमा दुई पूर्वप्रधानमन्त्री माधवकुमार नेपाल र डा. बाबुराम भट्टराईलाई पनि छानबिन गर्नुपर्ने बताए । उनले कर्मचारीलाई छानबिन गरिएको तर मन्त्रिपरिषद्बाट नीतिगत निर्णय गराउने तत्कालीन प्रधानमन्त्रीहरुलाई छानबिन नगरिएको भन्दै पूर्वप्रधानमन्त्रीहरुलाई उन्मुक्ति दिने प्रावधान छ कि भन्ने प्रश्न गरे ।

उनले भने, ‘निर्णय गर्ने मन्त्रिपरिषद् बैठकको अध्यक्षता गर्नुहुने प्रधानमन्त्रीद्वयलाई चाहिँ छानबिन गर्नुपर्ने हो कि होइन ? प्रधानमन्त्री भइसकेका मान्छेलाई प्रधानमन्त्री भएका आधारमा छानबिनमै सहभागि नहुनुपर्ने त्यस्तो उन्मुक्तिको पनि काहीँ प्रावधान छ कि ? एकदम स्पष्ट रुपमा मैले यो कुरा राख्न चाहेँ ।’

उनले आगामी निर्वाचनमा विदेशमा रहेका नेपाली नागरिकलाई मतदानको व्यवस्था गर्नुपर्ने र ‘नो भोट’ को व्यवस्था पनि लागू गर्नुपर्ने बताए ।

उनले भेपमा सुन तस्करी प्रकरणमा नेकपा(माओवादी केन्द्र)का उपाध्यक्ष कृष्णबहादुर महराको नाम समेत जोडिएको भएपनि प्रहरीले सामान्य सोधपुछ गर्न समेत आँट नदेखाएको बताए । प्रहरीले मिडिया ट्रायल गरिरहेको उनको भनाई छ ।

‘उहाँ निर्दोष हो भने उहाँलाई पनि त आफू निर्दोष हुँ भन्ने ग्राउण्ड त अनुसन्धानले नै देला । मोबाइल उहाँको होइन भन्दिएपछि यदी त्यो मोबाइल उहाँको हो रहेछ भने त त्यो मोबाइलमा भएका कुराकानी, सयौँ पटक भएको कम्युनिकेशन, कुराकानीको स्वामित्व त फोन जसको हो उसले त लिनुपर्ला’, लामिछानेले भने, ‘मैले चलाएको मेरो टेलिफोन नम्बर मेरो हो कि होइन भन्ने कुराको अनुसन्धान गर्न पनि यतिधेरै टाउको दुखाउनुपर्छ र ? अनुसन्धान कसले गर्ने ? अहिले समस्या के भइरहेको छ भने प्रहरीलाई गाह्रो भयो प्रहरीले मिडिया ट्रायल गरिदिएको छ । सामान्य सोधपुछ समेत गर्नसक्ने आँट देखिँदैन । यो त उहाँलाई पनि निर्दोष प्रमाणित हुने अवसर त दिनुपर्ला नि जो माथि आरोप लागेको छ ।’

काठमाडौं । राष्ट्रिय स्वतन्त्र पार्टी (रास्वपा) ले केन्द्रीय विभागको सदस्य र प्रदेश विभागको प्रमुख हुन मास्टर्स डिग्री अध्ययन गरेको हुनुपर्ने व्यवस्था गरेको छ । रास्वपाको संगठात्मक ढाँचामा केन्द्रीय समिति, प्रदेश समिति, पालिका समिति र वडा समिति रहने व्यवस्था गर्न लागेको हो ।

यस्तै, विभागको सदस्य र प्रदेश विभागको प्रमुख हुनको लागि मास्टर्स डिग्री नभएकाको हकममा सम्बन्धित क्षेत्रमा १० वर्ष अनुभव वा मास्टर्स डिग्री नभए र अनुभव पनि नभए सम्बन्धित क्षेत्रमा असाधारण सफलता हासिल गरेको हुनपर्ने प्रवक्ता मुकुल ढकालले बताए ।

उनले भने, ‘समितिको सदस्य हुन चाहिने मापदण्ड भनेको भेला वा अधिवेशनबाट निर्वाचित हुनु हो । यसमा पार्टी सदस्यबाहेक अन्य मापदण्ड तोकिएको छैन । त्यस्तै केन्द्रीय समितिअन्तर्गत रहने गरी केन्द्रीय विभागहरू, प्रदेश समितिअन्तर्गत रहने गरी प्रदेश विभागहरू र पालिका समिति अन्तर्गत रहने गरी पालिका विभागहरू हुनेछन् ।’

पार्टीलाई आवश्यक विज्ञताका लागि ३६ वटा विभागहरूको व्यवस्था गरेको ढकालले जानकारी दिए । अर्थ नीति विभाग, शिक्षा विभाग, स्वास्थ्य विभाग, कृषि विभागलगायत विभागको व्यवस्था गरिएको उनको भनाइ छ ।

उनले प्रदेश विभागको सदस्य र पालिका विभाग प्रमुख हुनका लागि स्नातक (डिग्री) वा ५ वर्ष अनुभव वा असाधारण सफलता हासिल गरेको हुनपर्ने बताए ।

पालिका विभाग सदस्यका लागि १२ पास वा २ वर्ष अनुभव वा असाधारण सफलता हासिल गरेको हुनुपर्ने मापदण्ड रास्वपाको छ ।

काठमाडौं । राष्ट्रिय स्वतन्त्र पार्टीले सुन तस्करीको विषयलाई लिएर संसदमा सार्वजनिक महत्वको प्रस्ताव दर्ता गरेको छ । नेपाल सुन तस्करीको हब बन्दै गएकोमा सरकारको जवाफ माग्दै प्रस्ताव दर्ता गरिएको हो ।

रास्वपाका तर्फबाट सभापति रवि लामिछानेसहित पार्टीका सांसदहरुले हस्ताक्षर गरेका छन् । उक्त प्रस्तावमा सुन तस्करीको विषयलाई लिएर सरकार जवाफदेही बन्नुपर्ने र संसदमा गृहमन्त्रीले जवाफ दिनुपर्ने माग गरिएको छ ।

रास्वपका उपसभापति डीपी अर्यालले सुन तस्करीको विषयमा सरकारलाई संवेदनशील बन्नका लागि घच्घच्याउन खोजिएको बताए ।

‘हामीले संसद अवरोध गर्नुभन्दा संसदीय प्रक्रियाबाटै सरकारलाई जिम्मेवार बनाउन चाहेका हौं,’ उनले भने ।

प्रमुख प्रतिपक्षी दल नेकपा एमालेले सुन तस्करीकै विषयलाई लिएर संसदमा गृहमन्त्री नारायणकाजी श्रेष्ठको राजीनामा माग गर्ने तयारी गरिरहँदा रास्वपाले फरक बाटो अपनाएको हो ।

रास्वपा महामन्त्री डा. मुकुल ढकालले अहिले आफ्ना सांसदहरूले गृहमन्त्रीको राजीनमा नमाग्ने बताए ।

‘हामीले गृहमन्त्रीको राजीनमा माग्दैनौं । तस्करीबारे वृहद अनुसन्धान हुनुपर्छ भन्ने हो । भोलि गृहमन्त्री दोषी देखिएमा अर्कै कुरा हुन्छ,’ उनले भने ।

एक सय क्वीन्टल सुन तस्करीको घटनाले त्रिभुवन अन्तर्राष्ट्रिय विमानस्थल भन्सारको प्रभावकारितामाथि प्रश्न उठाएको प्रस्तावमा उल्लेख छ ।

‘यति ठूलो मात्राको सुन कसरी पत्ता नलागी भन्सार जाँचपास गर्यो ? यसले नेपालको सुरक्षा प्रणालीलाई कमजोर तुल्याएको छ,’ प्रस्तावमा भनिएको छ ।

रास्वपाले यति ठूलो मात्राको सुन कसरी पत्ता नलागी भन्सार जाँचपास भयो भन्ने विषयमा अनुसन्धान गर्न माग गरेको छ । बरामद भएका सुनको प्रयोग के-कसरी गर्ने सोचेको छ ? भन्ने सरकारबाट स्पष्ट खाका माग गरेको छ ।