Category: राष्ट्रिय स्वतन्त्र पार्टी

काठमाडौं । निर्वाचन आयोगले अन्ततः राष्ट्रिय स्वतन्त्र पार्टीको विवरण अद्यावधिक गरेको छ । पूर्वमहामन्त्री मुकुल ढकालले सर्वोच्च अदालतमा हालेको रिट खारेज भएलगत्तै आयोगले रास्वपाको विवरण अद्यावधिक गरेको हो ।

ढकाललाई कारवाहीलगत्तै गत वर्ष असारमा नै रास्वपाले विवरण अद्यावधिक गर्न निवेदन दिएको थियो । तर, विभिन्न बहानामा आयोगले झुलाइरहेकोमा रास्वपा सन्तुष्ट थिए । आज आयोगले राजनीतिक दलसम्वन्धी ऐन २०७३ को दफा ५१ र राजनीतिक दल सम्वन्धी नियमावली २०७४ को नियम २५ बमोजिम रास्वपाका केन्द्रीय समिति पदाधिकारी तथा सदस्यहरुको हेरफेर भएको अद्यावधिक विवरण अभिलेखिकरण गर्ने र सोको जानकारी पार्टीलाई उपलब्ध गराउने निर्णय गरेको छ ।

अद्यावधिक विवरण अनुसार रास्वपाको केन्द्रीय समितिमा ६२ जना रहेका छ । रास्वपाले उपलब्ध गराएको सुचीअनुसार महामन्त्री डा. मुकुल ढकाललाई कारवाही गरेर हटाइएपश्चात कविन्द्र बुर्लाकोटी महामन्त्री बनेको विवरण पहिल्यै अद्यावधिक भइसकेको देखिन्छ । मनिष झालाई सह प्रवक्ताबाट प्रवक्तामा गरिएको पदोन्नति भने भर्खर अद्यावधिक भएको छ ।

अर्को महत्वपूर्ण परिवर्तन भनेको सहकोषाध्यक्षमा दिपक बोहोराको नाम नयाँ विवरणमा छैन । रास्वपामा बसुमाया तामाङ र बोहोरा दुई सहकोषाध्यक्ष थिए । तर, पार्टीले हालै मात्र एकजना मात्रै सहकोषाध्यक्ष राख्ने निर्णय लिएपछि बाेहाेराले राजीनामा दिएका थिए । हाल बसुमायामात्रै सहकाेषाध्यक्ष छिन् । अद्यावधिक विवरणमा बोहोरा केन्द्रीय सदस्यको हैसियतमा छन् ।

उनको नाम रास्वपामा सहमहामन्त्रीका लागि प्रस्तावित भएको छ । सुमना श्रेष्ठले छोडेपछि खाली रहेको पदमा बोहोरालाई प्रस्ताव गरिएको हो । यसमा निर्णय भइसकेको छैन । यस्तै, सुमना श्रेष्ठको नाम सहमहामन्त्रीबाट भर्खरै मात्र हटेको छ ।

काठमाडौं । राष्ट्रिय स्वतन्त्र पार्टीका सभापति रवि लामिछानेकी पत्नी निकिता पौडेलले गृहमन्त्री रमेश लेखकप्रति कडा आक्रोश पोखेकी छन् । आफ्नो श्रीमानलाई फँसाउन न्यायालयलाई प्रभावमा पारेकोदेखि थुप्रै आरोपहरु उनले गृहमन्त्रीमाथि लगाएकी छन् ।

आज सामाजिक सञ्जालमा लामो स्टाटस लेख्दै निकिताले गृहमन्त्रीलाई आरोपित गरेकी हुन् । थुनुवाले पाउने अड्डासारको सुविधा अदालतले आदेश गर्दा पनि गृहमन्त्रीको निर्देशनमा रोकिएको उनको दावी छ । मुद्दो पेशी चढिसकेपछि गृहमन्त्रीकै निर्देशनमा न्याय परिषदमा उजुरी परेको र गृहमन्त्रीकै कार्यकक्षमा उजुरीको ड्राप्mट भएको दावी पनि निकिताले गरेकी छन् ।

‘उजुरीको ड्राफ्ट आफ्नै कोठामा तयार गरेर त्यस्तो समाचारको लिङ्क आफ्नो सचिवालयलाई सम्बन्धित सबैका मोबाइल मोबाइलमा पठाउन आदेश दिँदै न्यायाधीश तर्साउन नाङ्गिएर लाग्नुहुन्छ किन रु’ उनको प्रश्न छ, ‘मुद्दाको पेशी चढेकै दिन न्यायपरिषदमा उजुरी पुगेपछि तपाईँहरू जस्ताको मुठ्ठीमा रहेको वर्तमान संरचनामा रहेका कुन न्यायमूर्तिले आफ्नो करियरलाई दाउमा राखेर सही फैसला गर्ने आँट गर्ला ?’

रुपन्देही कारागारमा श्रीमान भेट्न घरबाट निस्किएपछि आफ्नो पछि–पछि गृहमन्त्रीले आफ्नो संगठन र संरचना खटाएको आरोप पनि निकिताले लगाएकी छन् ।

‘रुपन्देही कारागारमा श्रीमान भेट्न घरबाट निस्किएपछि मेरो पछि पछि किन र के का डरले लगाउनुहुन्छ तपाईँका संगठन र संरचना रु’ उनले लेखेकी छन् ।

निकिताले प्रधानन्यायाधीशलाई पनि सम्वोधन गर्दै केही असन्तुष्टि पोखेकी छन् । ‘अब म जिल्ला अदालतको आदेश विरुद्ध उच्च अदालतमा अपिल गर्न जाउँ कि नजाउँ ?’ उनको प्रश्न छ, ‘हाम्रो मुद्दाको हरेक बहसमा सरकारी पक्ष नाजवाफ हुन्छ । तर फैसला कहिल्यै हाम्रो पक्षमा आउँदैन । दुई तिहाइको सरकार छ, एउटा विपक्षी दलको नेतामाथि भइरहेको यो खुल्लमखुल्ला अन्याय विरुद्ध म कहाँ जाउँ ?’

रूपन्देही । राष्ट्रिय मानव अधिकार आयोगको टोली रूपन्देही कारागार आएको छ ।

आयोग सदस्य लिली थापा, लुम्बिनी प्रदेश प्रमुख हरि ज्ञवाली, इन्सेक प्रतिनिधि रिमा बिसीसहितको टोली कारागारको अनुगमनमा आएको हो ।

कारागारको ब्लक नम्बर ४ मा रहेका रास्वपा सभापति एवं पूर्वगृहमन्त्री रवि लामिछानेको सुविधा र बसाइ व्यवस्थापनको विषयमा केही दिनयता विभिन्न समाचार आइरहेको बेला आयोगको टोली कारागार आएको हो ।

टोलीसँग पुगेका पत्रकारलाई भने सुरक्षाकर्मीले प्रवेशमा रोक लगाए ।

रुपन्देही । रुपन्देही कारागारमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले आफूलाई रिहा गर्न माग गर्दै जिल्ला अदालत रुपन्देहीमा दिएको निवेदनको पेसी आजको लागि तोकिएको छ।

१० नम्बर इजलासमा न्यायाधीश नारायण सापकोटाको इजलासमा परेको छ । चैत २५ गतेदेखि उनी बुटवलको सुप्रिम सहकारी ठगी अभियोगमा पुर्पक्षका लागि थुनामा रहेका छन् ।

चैत २२ गते उच्च अदालत तुलसीपुर बुटवल इजलासले उनलाई थुनामा पठाउने आदेश दिएको थियो । त्यसअघि रुपन्देही जिल्ला अदालतबाट १ करोड धरौटीमा छुटेका थिए ।

लामिछानेले आफ्नो भागको बिगो बराबरको जमानत लिएर रिहा गर्न माग गर्दै जिल्ला अदालत रुपन्देहीमा यही साउन १९ गते निवेदन दिएका थिए।

उनको निवेदनमा सुनुवाइका लागि आज पेसी तोकिएको अदालत प्रशासनले जनाएको छ। लामिछाने बिगोबापतको २ करोड ७४ लाख ८४ हजार दाखिला गरिदिएको बताएका छन्।

साउन १९ पछि लगातार दुई दिन पेशी तोकिए पनि लामिछानेकै कानुन व्यवसायीले स्थगित गराएका थिए ।

रुपन्देही । राष्ट्रिय स्वतन्त्र पार्टीले रुपन्देही ३ को उपचुनावमा पार्टीको तर्फबाट उम्मेदवार हुन निवेदन दिएका आवेदकहरुसँग काठमाण्डौमा सामुहिक छलफल गरेको छ ।

पार्टी केन्द्रीय कार्यालयमा उनीहरुसँग दिउँसो १ बजेदेखि चलेको छलफल अझै सकिएको छैन । छलफलको सहजीकरण सहमहामन्त्री तथा लुम्बिनी प्रदेश इन्चार्ज बिपिन कुमार आचार्यले गरेका छन् भने छलफलको प्रवेक्षण केन्द्रीय कोषाध्यक्ष लिमा अधिकारी र लुम्बिनी प्रदेश सभापति देवराज पाठक गरेक छन् ।

‘छलफल अझै जारी रहेको छ, आपसमा आकांंक्षीहरुबीच समस्या नहोस् भन्ने मुख्य योजना हो’ प्रदेश अध्यक्ष पाठकले भने, ‘सकेसम्म उहाँहरुबाटै एकले अर्कोलाइृ समर्थन गरेर एकल उम्मेदार बनाउने विषयमा छलफल केन्द्रीत भएको हो, यसका लागि हामीले कुनै दवाव दिँदैनौं, उम्मेदारका बीचमा सौहार्दता राखेर आकांक्षी बीच यो कार्यक्रम गरिएको हो, टुंगो नलागे आन्तरिक लोकतन्त्रबाट अघि जान्छ । ’ उनका अनुसार यो छलफल आज नै सकिने छ ।

रास्वपाको उम्मेदवार बन्न सुलभ खरेल, पार्थिवेन्द्र उपाध्याय, लेखजंग थापा, ज्ञानु पौडेल, जितबहादुर गुप्ता, कुसुम महर्जन, रचना क्षेत्री, पुनम कुमारी अग्रवाल र मधुप्रसाद अर्यालले आवेदन दिएका छन्। आजको बैठकमा बोल्ने सबै आकांक्षीहरुले पार्टीको योजनाअनुसार नै अघि बढ्ने र जसरी पनि निर्वाचन आफ्नो पक्षमा पार्नेगरी योजना बनाउने प्रतिवद्धता गरेको प्रदेश अध्यक्ष पाठकले बताए ।

रुपन्देही । राष्ट्रिय स्वतन्त्र पार्टीले रुपन्देही- ३ मा हुने उपनिर्वाचनका लागि सर्वसम्मत उम्मेदवार खोजी गर्न प्रयास सुरु गरेको छ । उम्मेदवारीका लागि आवेदन दिएका ९ जनामध्येबाट एक साझा उम्मेदवार तय गर्न पार्टीले कसरत गरेको हो ।

रास्वपाले सबै आवेदकहरूलाई छलफलका लागि आज काठमाडौं बोलाएको छ । दिउँसो १ बजेदेखि ५ बजेसम्म केन्द्रीय कार्यालय वनस्थलीमा उनीहरूसँग छलफल गर्न लागिएको सहमहामन्त्री तथा लुम्बिनी प्रदेश इन्चार्ज विपीन आचार्यले बताए । त्यसका लागि सबैजना काठमाडौं पुगिसकेको उनले जानकारी दिए ।

छलफलको सहजीकरण आचार्यले नै गर्नेछन् भने पार्टीका केही पदाधिकारीसहित लुम्बिनी प्रदेश सभापति देवराज पाठकको पनि उपस्थिति रहनेछ । करिब ४-५ घन्टा उम्मेदवारका आकांक्षीसहित छलफलपछि आजै पत्रकार भेटघाट गर्ने कार्यक्रम छ ।

‘केही निर्देशन दिने र केही आकांक्षीका कुराहरू सुन्ने आजको कार्यक्रमको मुख्य उद्देश्य हो,’ पाठकले नेपाल प्रेससँग भने ।

रास्वपाले प्राइमरी इलेक्सनका लागि साउन ७ गतेदेखि २१ गतेसम्म आवदेन माग गरेको थियो । उम्मेदवार हुन इच्छुकका लागि २५ हजार शुल्क तोकेको थियो । साउन २३ गते ९ जना आवेदकको सूची सार्वजनिक गरियो । बुटवलका सुलभ खरेल र मधुप्रसाद अर्याल तथा भैरहवाका पार्थिवेन्द्र उपाध्याय, डा. लेखजंग थापा, ज्ञानु पौडेल, जीतबहादुर गुप्ता, कुसुम महर्जन, रचना क्षेत्री, पुनम कुमारी अग्रवालले आवेदन दिएका छन् ।

राप्रपा स्रोतका अनुसार आजको छलफलमा एउटा साझा नाम तय गर्नका लागि पार्टीका तर्फबाट आग्रह गरिनेछ । तर, फलानो नै हुनुपर्ने भनेर पार्टीले दबाब नदिने स्रोतले बतायो ।

‘सकेसम्म सर्वसम्मत उम्मेदवार खडा गर्ने प्रयास हुनेछ, त्यो सम्भव नभए प्रतिस्पर्धाको विकल्प छँदैछ,’ स्रोतले भन्यो ।

काठमाडौं । राष्ट्रिय स्वतन्त्र पार्टी (रास्वपा)ले ईश्रा मुल्ला मियालाई केन्द्रीय सदस्यको जिम्मेवारी पुनः दिएको छ।

आज बसेको केन्द्रीय समिति बैठकले मियालाई पुनः जिम्मेवारी दिने निर्णय गरेको प्रवक्ता मनिष झाले बताए।

पार्टीको संस्थापक केन्द्रीय सदस्य रहेका मियाले हज कमिटीको अध्यक्षमा नियुक्ति भएपनि पार्टीको केन्द्रीय सदस्यबाट राजीनामा दिएका थिए।

काठमाडौं । राष्ट्रिय स्वतन्त्र पार्टी (रास्वपा)ले केन्द्रीय समिति बैठक बोलाएको छ । पार्टी केन्द्रीय कार्यालय वनस्थलीमा दिउँसो १ बजे बैठक बस्नेछ ।

बैठकमा समसामयिक राजनैतिक, पार्टी गतिविधि, केन्द्रीय विभागको प्रगति रिपोर्ट, संसदीय दलको रुपन्देही बैठक अपडेट, रुपन्देही उपनिर्वाचन अपडेट लगायतका विषयमा छलफल हुने छ ।

यस्तै, रुपन्देही संगठन अपडेट, कुलिङ अफ पिरियडमा भएको गडबडी छानबिन प्रतिवेदन, प्रदेश इन्चार्जको प्रदेश रणनीतिको रिपोर्टहरू पनि प्रस्तुत हुने बताइएको छ ।

त्यस्तै बैठकमा केन्द्रीय सदस्यहरूले रिपोर्टिङ गर्नेछन् । सदस्यहरूलाई २ मिनेटको समय दिइएको छ ।

बैठकले पार्टी सचिवालय बैठकका निर्णयहरूमा छलफल गर्दै अनुमोदन गर्ने, विधानको व्याख्या अनुमोदन र केन्द्रीय विभागको प्रमुख मनोनयनको निर्णय पनि गर्नेछ ।

यसैगरी पूर्वकेन्द्रीय सदस्यहरूलाई पुनः जिम्मेवारी दिने, पार्टीको निर्वाचन आयोगमा मनोनयन गर्ने र रणनीतिक समूह गठनका विषयमा पछि छलफल र निर्णय हुने बताइएको छ ।

त्यसैगरी संगठन सबलीकरणका लागि केन्द्रीय समिति, केन्द्रीय विभागलाई थप जिम्मेवारी दिने, विदेशमा रहेका नेपाली नागरिकहरूलाई मताधिकारको व्यवस्था गर्न सरकार र सम्बन्धित निकायको ध्यानाकर्षण गराउने, सभापति रवि लामिछानेमाथि भएको राजनीतिक प्रतिशोधविरुद्ध जनताको हस्ताक्षर बारे प्रगति रिपोर्ट र अभियान थप प्रभावकारी बनाउने विषय पनि बैठकको एजेन्डा रहेको छ ।

यस्तै, अधिवेशन प्रतिनिधि समय विन्दु (केन्द्रीय विभाग, प्रदेश विभागको नयाँ नियुक्ति), मधेश प्रदेश सहमहामन्त्री सिफारिस, पार्टी सचिवालयबाट अनुमोदन भएको पार्टी केन्द्रीय कार्यालयको अनुमानित बजेट प्रस्तुत र सांसदहरूको लेवि लगायतका विषय पनि बैठकको एजेन्डामा समावेश छन् ।

रूपन्देही । राष्ट्रिय स्वतन्त्र पार्टी (रास्वपा) बाट रूपन्देही क्षेत्र-३ को उपनिर्वाचनमा उम्मेदवार बन्न अनलाइनमार्फत आवेदन दिने म्याद हिजो सकिएको छ । रास्वपाले उम्मेदवार बन्न चाहनेहरूलाई साउन ७ गतेदेखि २१ गतेभित्र दरखास्त हाल्न आह्वान गरेको थियो ।

तोकिएको म्यादभित्र कतिजनाले र क-कसले आवेदन दिए भन्ने पार्टीले औपचारिक रूपमा खुलाइसकेको छैन । रास्वपा स्रोतले नेपाल प्रेसलाई दिएको जानकारी अनुसार ८ जनाले तोकिएको समयभित्र अनलाइनमा आवेदन गरेका छन् भने थप दुईजनाले आफ्नो नाम प्रविष्ट नभएको भनेर पार्टीलाई सूचित गरेका छन् ।

केन्द्रीय सदस्य कुशुम महर्जन, रूपन्देही क्षेत्र नं ३ का सभापति मधु अर्याल, प्रदेश सदस्य तथा ०७९ का उम्मेदार जेबी गुप्ता (शेखर), भैरहवाका डा. लेखजंग थापा, महिला नेतृ ज्ञानु पौडेलले आवेदन दिएको स्रोतले पुष्टि गर्यो । त्यसैगरी बुधबार अमेरिकाबाट निर्वाचनकै लागि आएका बुटवल सेमलारका शुलभ खरेल, प्रदेश सदस्य प्रकाश ज्ञवाली, पार्टीको जिल्ला कोषाध्यक्ष रहेकी भैरहवाकै रचना क्षेत्रीले पनि आवेदन दिएको खुलेको छ ।

रास्वपा सहमहामन्त्री तथा प्रदेश इन्चार्ज विपीन आचार्यले नाम र संख्याको रुजु नभइसकेको बताए । उनले भने, ‘यो सफ्टवेयर प्राविधिक टोलीले खोल्ने हो, खोलेपछि सार्वजनिक गर्नेछौं ।’

आवेदन दिएकामध्ये ४ जना मुख्य प्रतिस्पर्धामा देखिएका छन् । जिल्ला नेताहरूका अनुसार मधु अर्याल, ज्ञानु पौडेल, कुसुम महर्जन, सुलभ खरेल र डा. लेखजंग थापा प्रतिस्पर्धाको अग्रपंतिमा आउन सक्नेछन् ।

‘मुख्य दावेदारी ४-५ जनाको देखिन्छ, तर आन्तरिक निर्वाचन भएमा फिल्डमै धेरै समय काम गर्न नसक्नुभएका नेताहरूले भाग नलिन सक्नुहुन्छ,’ एक नेताले भने, ‘सदस्यहरूबाट निर्वाचन भएर जाने विधि पूर्णरूपमा लागू भए भूगोल बाहिर काम गरेकालाई समस्या हुनेरहेछ ।’

क्षेत्री सभापति अर्याल शिक्षा पेशामा आवद्ध छन् । तिलोत्तमाका उनी विद्यालय सञ्चालक हुन् । उनले साउथ एसियन युनिभर्सिटीबाट अटिज्ममा पीएचडी गरेका थिए । ज्ञानु पौडेल सहकारी अभियन्ता हुन् । यस्तै, डा. लेखजंग थापा न्युरोसर्जन हुन् । केन्द्रिय सदस्य महर्जन रूपन्देहीकै रास्वपा नेतृ हुन् । उनी २०७९ सालको आमनिर्वाचनमा पार्टीको तर्फबाट समानुपातिक सुचीमा थिइन् । उक्त सुचीबाट नाम फिर्तार उनी उम्मेदवारीको दौडमा सामेल भएकी हुन् ।

अमेरिकाबाट निर्वाचनकै लागि आएका खरेलको दाबी पनि सशक्त छ । उनी सभापति रवि लामिछाने र उपसभापति डा. स्वर्णिम वाग्लेसँग निकट छन् । प्रदेश सदस्य रहेका तिलोत्तमाका प्रकाश ज्ञवाली र यसअघि सोही क्षेत्रबाट उम्मेदार बनेका भैरहवाका जेबी गुप्ता (शेखर) पनि दौडमा छन् । त्यसैगरी भैरहवाकै पार्टीको जिल्ला कोषाध्यक्ष रचना क्षेत्री, डा. लेखजंग थापा पनि स्थानीयको हिसाबले बलिया प्रतिस्पर्धी हुन् ।

यसअघि रास्वपाले यस क्षेत्रमा राप्रपाका दिवंगत नेता दिपक बोहराका पुत्र गौरब बोहरालाई अघि सार्ने कसरत गरेको थियो । गौरव स्वयंले पनि ग्रीन सिग्नल दिएका थिए । उनले सभापति रवि लामिछानेसँग हिरासतमा भेटेर छलफलसमेत गरेका थिए । तर, अहिको उनको च्याप्टर क्लोज भएको छ । पार्टी स्रोतका अनुसार हाल फ्रान्समा रहेका गौरवले उम्मेदवारीका लागि दरखास्त हालेका छैनन् ।

भूगोलमा कम काम गरेको र अरु जिम्मेवारीमा भएकाले आन्तरिक निर्वाचन भए कार्यकर्ताको रोजाईमा पर्न नसकिने त्रासले सबै मैदानमा नजान पनि सक्ने नेताहरूको आंकलन छ । अहिले रूपन्देही-३ उपचुनावलाई संगठन विस्तार र पुनः जनमत निर्माणको अवसरका रूपमा लिएको नेताहरूले बताएका छन् ।

पार्टीका अनुसार उम्मेदवार बन्नका लागि पार्टीले तय गरेको प्रक्रिया अनिवार्य हुनेछ । प्रदेश अध्यक्ष पाठकले भने, ‘जोसुकै व्यक्ति प्रक्रियाभित्र आउनुभयो र योग्य देखिनुभयो भने उम्मेदवार बन्न सक्नुहुन्छ । बाहिरबाट आउँदा मात्र उम्मेदवार बन्न पाइँदैन । यसले भूगोलमा काम गर्नेलाई बलियो बनाउने छ र जनताप्रति अपनत्व बढाउने छ ।’

सहमहामन्त्री तथा लुम्बिनी प्रदेश इन्चार्ज विपीन आचार्यले भदौ १२ र १३ मा आन्तरिक निर्वाचनबाट टुंगो लगाएर १५ गते उम्मेदारको घोषण गरिने जानकारी दिए ।

२०७९ को आमनिर्वाचनमा रूपन्देही-३ मा रास्वपाले समानुपातिकतर्फ १४ हजार मत ल्याउँदै तेस्रो स्थान हासिल गरेको थियो । प्रत्यक्षतर्फ रास्वपाका उम्मेदवार जीतबहादुर गुप्ताले ५,७९६ मत ल्याएका थिए । त्यो निर्वाचनमा एमाले र राप्रपाको तालमेलबाट राप्रपाका दीपक बोहरा निर्वाचित भएका थिए । तत्कालीन गृहमन्त्री तथा कांग्रेस नेता बालकृष्ण खाँण पराजित भएका थिए । करिब १ लाख ३० हजार मतदाता रहेको यस क्षेत्रमा करिब ९० हजार मत खसेको थियो । समानुपातिक र स्थानीय तहको मतका आधारमा कांग्रेस यस क्षेत्रमा पहिलो दल देखिन्छ ।

चैत महिनादेखि रास्वपा सभापति रवि लामिछाने रूपन्देही कारागारमा रहेका छन् । यो यही निर्वाचन क्षेत्रमै रहेको छ । लामिछानेलाई भेट्न आउने नेता तथा कार्यकर्तासमेतले यहाँ रास्वपाको चहलपहल बढाएको छ भने यहाँ रहेका सबै वडालाई केन्द्रित गरेर शीर्ष नेताहरूले चुनाव लक्षित कार्यक्रम गरिरहेका छन् ।

नेताहरूलाई भेट्दा पनि लामिछानेले यो उपनिर्वाचनलाई जसरी पनि आफ्नो पक्षमा पार्नेगरी अगाडि बढ्न निर्देशन गरिरहेका छन् । कारागारबाटै उनले पार्टीका सबै कमिटीलाई योजना दिइरहेका छन् । लामिछानेको योजनाअनुसार रास्वपाले संसदीय दलको बैठकसमेत यहीँ क्षेत्रमै राखेको थियो ।

रुपन्देही । सहकारी ठगीको अभियोगमा पुर्पक्षका लागि थुनामा रहेका राष्ट्रिय स्वतन्त्र पार्टी (रास्वपा)का सभापति तथा पूर्व गृहमन्त्री रवि लामिछानेले बैंक जमानतमा रिहाइको माग गर्दै अदालतमा निवेदन दर्ता गरेका छन्।

लामिछानेले साउन १९ गते रुपन्देही जिल्ला अदालतमा निवेदन दर्ता गराएका थिए । अदालतमा अन्य मुद्दाभन्दा निवेदन नै अघि हुने भएकाले मङ्गलवार र बुधवार नै निवेदन पेशीमा चढे पनि लामिछानेकै कानुन व्यवसायीले यसलाई रोकेका छन् ।

निवेदनमा मुलुकी फौजदारी कार्यविधि संहिता, २०७४ को दफा ६८ अनुसार बैंक जमानत लिई र दफा ७१ बमोजिम थुनामुक्त गराउन आदेश माग गरिएको छ । दफा ६८ मा अदालतले अभियुक्तसँग धरौटी वा बैंक जमानत लिएर रिहा गर्नसक्ने प्रावधान छ। त्यस्तै, दफा ७१ मा मुद्दाको कारबाही जुनसुकै अवस्थामा पुगे पनि अभियुक्तलाई थुनामा वा जमानतमा राख्न सकिने व्यवस्था गरिएको छ। दफा ७१ (१)मा भनिएको छ, ‘मुद्दाको कारबाही जुनसुकै अवस्थामा पुगेको भए तापनि अदालतले प्रमाण बुझ्दै जाँदा अभियुक्तलाई अवस्था अनुसार दफा ६७ बमोजिम थुनामा राख्न वा दफा ६८ बमोजिम निजसँग धरौटी, जमानत वा बैंक जमानत माग्न सक्नेछ।’

लामिछानेको पक्षमा बहस गर्न तयार भएका कानून व्यवसायी राजेन्द्र थापाले मङ्गलवार र बुधवार स्थगित भएको जनाएका छन् । उनले निवेदन १९ गते दिएको र २० र २१ मा पेशी भए पनि प्राविधिक कारणले स्थगित गरेको बताए ।

त्यसैगरी, उपदफा ९२० मा उल्लेख छ, ‘६७ वा ६८ बमोजिम थुनामा परेको कुनै अभियुक्त कसुरदार होइन भन्ने प्रमाणित हुन सक्ने कुनै मनासिव आधार प्राप्त भएमा अदालतले थुनामुक्त गर्ने आदेश दिन सक्नेछ।

सुप्रिम सहकारी ठगी प्रकरणमा रवि लामिछानेसहितका प्रतिवादीहरूमाथि एकमुष्ट १० करोड ९९ लाख रुपैयाँ बिगो कायम गरिएको छ। लामिछानेले आफ्नो भागमा पर्ने बिगो बराबरको रकम बैंक जमानतमा राखेर रिहा हुन पाउने व्यवस्था गर्न माग गरेका हुन्।

उक्त निवेदनमा मङ्गलवार र बुधवारका लागि पेसी तोकिएको थियो। तर बुधवार लामिछानेका कानुन व्यवसायीले निवेदन दिएर पेसी स्थगित गराएका छन्।

बुधवार न्यायाधीश दीपेन्द्र थापा मगरको इजलासमा दोस्रो नम्बरमा पेसी तोकिएको थियो भने मङ्गलवार न्यायाधीश प्रह्लादकुमार योगीको इजलासमा पनि मुद्दा पेशीमा चढाइएको थियो।

जिल्ला अदालत रुपन्देहीले माघ १३ गते रविलाई एक करोड रुपैयाँ धरौटीमा रिहा गर्न आदेश दिएको थियो। सोही दिन उनले धरौटी बुझाएर रिहा भएका थिए। तर सो आदेशविरुद्ध सरकार उच्च अदालत गएको थियो। सरकार पक्षले रविलाई थुनामै राख्न माग गर्दै उच्च अदालतमा पुनरावलोकन गराएको थियो।

त्यसपछि रविले पनि धरौटी रकम बढी भएको भन्दै साधारण तारेखमा पुर्पक्ष गर्न माग गर्दै पुनरावेदन दिएका थिए। २०८१ चैत २२ गते उच्च अदालत तुलसीपुरको बुटवल इजलासले जिल्ला अदालतको आदेश बदर गर्दै लामिछानेलाई थुनामा पठाउने आदेश दिएको थियो। न्यायाधीशद्वय रमेश ढकाल र स्वीकृति पराजुलीको संयुक्त इजलासबाट उक्त आदेश जारी गरिएको हो।

आदेशपछि रविलाई काठमाडौँस्थित निवासबाट सोही दिन पक्राउ गरी रुपन्देही ल्याइएको थियो। तर दुई दिनपछि मात्रै उनलाई कारागार चलान गरिएको थियो। लामिछानेले त्यसविरुद्ध सर्वोच्च अदालतमा पनि निवेदन दिएका थिए। तर सर्वोच्च अदालतले पनि उनलाई थुनामै राख्ने उच्च अदालतको आदेश सदर गरिदिएको थियो। चैत २५ देखि अहिलेसम्म लामिछाने रुपन्देही कारागारमै रहेका छन् । कानून व्यवसायी थापाले आजका लागि अदालत पुग्दै गरेको बताए ।

काठमाडौं । राष्ट्रिय स्वतन्त्र पार्टी (रास्वपा) का कार्यवाहक सभापति डिपी अर्यालसहित चार जना सांसदले सभापति रवि लामिछानेसँग भेटेका छन् । पार्टी संसदीय दल बैठक बस्नुअघि उनीहरूले रविसँग भैरहवा कारागारमा पुगेर रविलाई भेटेका हुन् ।

बैठकअघि कार्यवाहक सभापति अर्याल तथा सांसदहरू असिम साह, डा. चन्दा र शोविता गौतमले रविलाई भेटेका हुन् । रास्वपा संसदीय दल बैठक अहिले भैरहवामा सुरु भएको छ ।

भेटघाटका क्रममा लामिछानेले पार्टीले चलाएको हस्ताक्षर अभियानमा उत्साहजनक बनेको भन्दै खुसी व्यक्त गरेका थिए । यसलाई थप जनमानसमा पुर्‍याउन र आफूमाथि भएको राजनीतिक प्रतिशोधबारे जनतालाई घरघरमा गएर बुझाउन नेताहरूलाई आग्रह गरे ।

यस्तै, रास्वपाका सांसदहरूलाई लामिछानेले ‘नेताको दम्भ नदेखाउन र भुईंमान्छे बनेर जनताको कुरा सुन्न अनि मद्दत गर्न’ सुझाव दिएका छन् ।

लामिछानेसँग भेटेका सांसद साहले उनको भनाइ उद्धृत गर्दै भने, ‘यदि अहिले कतै १० जनाको भिड छ भने त्यसमा ६ जना रास्वपाका समर्थक वा कार्यकर्ता हुन्छन् ।’

साहले सभापतिलाई पहिलेभन्दा अझै फुर्तिलो र आत्मविश्वासले भरिपूर्ण पाएको नेपाल प्रेससँग बताए ।

काठमाडौं । राष्ट्रिय स्वतन्त्र पार्टी (रास्वपा) को संसदीय दलको बैठक आज भैरहवामा बस्ने भएको छ । पार्टी सभापति रवि लामिछाने थुनिएको भैरहवा कारागार नजिकैको एक होटलमा बैठक राखिएको हो ।

आज अपराह्न १ बजेदेखि ४ बजेसम्म संसदीय दलको बैठक आह्वान गरिएको पार्टीका प्रवक्ता मनिष झाले जानकारी दिएका छन् । उनले जारी गरेको सूचनामा बैठक कसले आह्वान गरेको भन्ने उल्लेख छैन ।

रास्वपा अहिले संसदीय दलको नेताविहीन छ । सभापति रवि लामिछानेको सांसद पद निलम्बित भएपछि अर्को संसदीय दलको नेता चयन गरिएको छैन भने कसैलाई कार्यवाहक पनि दिइएको छैन । संसदीय दलभित्रको संयोजन भने उपनेता विराजभक्त श्रेष्ठले गर्दै आएका छन् ।

बैठकका लागि रास्वपाका अधिकांश सांसदहरू हिजै भैरहवा पुगिसकेका छन् । भैरहवाको रमादा होटलमा बैठक बस्ने छ, जुन सभापति लामिछाने रहेको कारागारबाट १०–१५ मिनेटको मात्र दुरीमा छ । बैठकले संसदमा पार्टीको आगामी रणनीति तय गर्ने सांसद गणेश पराजुलीले जानकारी दिए ।

रास्वपाले लामो समयदेखि भिजिट भिसा प्रकरणमा अनुसन्धानको माग गर्दै संसद अवरोध गर्दै आएको छ । पार्टीले गर्दै आएको संसदको अवरोधको विषयमा पनि समीक्षा हुने बुझिएको छ ।

काठमाडौं । राष्ट्रिय स्वतन्त्र पार्टी (रास्वपा) को संसदीय दलको बैठक रुपन्देहीमा बस्ने भएको छ । पार्टीका सबै संसदहरु रुपन्देही हानिएका छन् ।

पार्टी सभापति रवि लामिछाने थुनिएकै जिल्लामा पार्टीको बैठक बस्न लागेको हो । रुपन्देही ३ मा आउँदो कात्तिक २७ गते उपनिर्वाचन हुँदैछ । सोही उपनिर्वाचनको लागि माहोल बनाउने र सभापति लामिछानेसँग प्रत्यक्ष भेटघाट पनि गर्ने उद्देश्यले रुपन्देहीमा बैठक आयोजना गरिएको पार्टी स्रोतले बतायो ।

रास्वपाले रुपन्देही ३ मा उम्मेदवार चयन प्रक्रिया सुरु गरिसकेको छ । पार्टीको विधान अनुसार उम्मेदवारीका लागि गत ५ साउनमा दरखास्त आह्वान गरिएको थियो । दरखास्त हाल्ने म्याद २१ साउनसम्म रहेको छ । सकेसम्म सम्वन्धित निर्वाचन क्षेत्रकै उम्मेदवार खडा गर्ने रास्वपाको रणनीति रहेको छ ।

रुपन्देहीमा रास्वपा सांसदहरुले दुई–तीन दिन बिताउने छन् । रुपन्देही ३ का मतदाताहरुसँग भेटेर चुनावी अभियानको अनौपचारिक थालनीसमेत गरिनेछ । यस्तै, भैरहवाको कारागारमा रहेका सभापति रवि लामिछानेलाई सांसदहरुले भेट्नेछन् ।

काठमाडौं । राष्ट्रिय स्वतन्त्र पार्टी (रास्वपा) महामन्त्री कविन्द्र बुर्लाकोटी पार्टीको विवरण अद्यावधिक नभएको विषयमा छलफल गर्न निर्वाचन आयोग पुगेका छन् । उनी केही कानून व्यवसायीहरूसमेत लिएर आयोग गएका हुन् ।

रास्वपाले एक वर्षअघि नै पार्टीको विवरण अद्यावधिक गर्न निवेदन दिए पनि आयोगले अहिलेसम्म कार्यान्वयन गरेको छैन । यही विषयमा कुराकानी गर्न आएको बुर्लाकोटीले नेपाल प्रेसलाई बताए ।

‘हामीले सबै कागजात पेश गरिसकेका छौं । अदालतले पनि कुनै स्टे अडर दिएको छैन । तर, पनि आयोगले विवरण अद्यावधिक नगरेपछि छलफलका लागि आएका हौं,’ उनले भने ।

रास्वपा निस्कासित महामन्त्री डा. मुकुल ढकालले आफूमाथि गरिएको कारबाहीविरुद्ध अदालतमा हालेको मुद्दा विचाराधिन छ । तर, मुद्दा पर्नासाथ अद्यावधिक गर्ने प्रक्रिया नै रोक्नुपर्ने कुनै कारण नरहेको बुर्लाकोटी बताउँछन् ।

‘मुद्दामा अदालतले अन्तरिम आदेश नदिएकाले विवरण अद्यावधिक गर्न आयोगलाई कुनै पनि वाधा छैन,’ बुर्लाकोटीले भने ।

काठमाडौं । राष्ट्रिय स्वतन्त्र पार्टी (रास्वपा) का प्रवक्ता मनीष झाले आफ्नो पार्टी प्रदेशसभा खारेज गर्ने पक्षमा रहेको बताएका छन्। काठमाडौंमा आयोजित एक कार्यक्रममा बोल्दै प्रदेश राख्ने तर प्रदेशसभा खारेज गर्ने पक्षमा आफ्नो पार्टी रहेको बताए।

उनले संघीय सरकारको पनि २१ वटा मन्त्रालयबाट १५ मा झार्न चाहेको बताए। उनले भने, ‘प्रदेश रहन्छ, प्रदेश सभा खारेज गर्न चाहन्छौँ । त्यो प्रदेशको सभामा पुग्ने त्यही प्रदेशको स्थानीय तह । कोसीमा १३७, मधेशमा १३६ पालिकाहरूको प्रतिनिधि पुगेर सभा गर्छ। त्यसपछि प्रदेश र स्थानीयको तादम्यता एक अर्काको कोर्डिनेशन झनै प्रभावकारी हुन्छ। अहिले त एक अर्काले चिन्ने चाहँदैन, बुझ्नै चाहँदैन। यसरी हामीले हाम्रो योजना र नीतिहरूको व्याख्या गर्न सक्नुपर्छ।’

उनले लगभग ११२ वटा आयोग नियोगहरू रहेको भन्दै त्यसको कुनै काम नभएको जिकिर गरे। काम नै नभएका आयोग र नियोगहरू बन्द गर्नासाथ ठूलो खर्च बच्ने उनको भनाइ छ।

उनले थपे, ‘विभिन्न कालखण्डमा बनाइएको आयोग र नियोगहरू छन्, अहिले पनि त्यसको गाडी चल्ने पदाधिकारी, कर्मचारी, अफिस खर्च छ। तर त्यसको काम छैन। ११२ वटा बन्द गरिदिने बित्तिकै हाम्रो वार्षिक दुई चार अर्ब बचिहाल्छ। त्यो कुन कुन हटाउने यसरी हामीले तर्क र तयारीहरू गर्नुपर्छ।’

काठमाडौं । काठमाडौं महानगरपालिकाको नगरसभा बैठकमा अहिले बजेट तथा नीति कार्यक्रममाथि छलफल जारी रहेको छ । नगरसभा सदस्यहरुले बजेटमा समावेश गर्नका लागि विभिन्न सल्लाह-सुझावहरू प्रस्तुत गरिरहेका छन् ।

महानगरका प्रमुख बालेन्द्र साहको अध्यक्षतामा बैठक बसेको हो । मञ्चमा साहसँगै उपमेयर सुनीता डंगोल र प्रमुख प्रशासकीय अधिकृत सरोज गुरागाईं बसेका छन् । सँगै बसे पनि नगर प्रमुख साहले प्रशासकीय अधिकृत गुरागाईंसँग बोलचाल गरेका छैनन् । उनले बैठक सुरु गर्दा पनि प्रशासकीय अधिकृतको नाम लिएनन् ।

बैठकमा बोलिरहेका अधिकांश नगरसभा सदस्यहरूले प्रमुख प्रशासकीय अधिकृत गुरागाईंलाई सम्वोधन गरेका छन् । तर, रास्वपाबाट निर्वाचित १६ नम्बरकी वडाध्यक्ष रोजिना श्रेष्ठले भने उनलाई सम्बोधन गरिनन् । उनले ‘आजको १७ औं नगरसभाका सभाध्यक्ष बालेन्द्र साह ज्यू, उपप्रमुख सुनीता डंगोलज्यू, सम्पूर्ण कर्मचारीहरुज्यू, ३२ वटै वडाका वडाध्यक्षज्यू र सम्पूर्ण वडाका सदस्यज्यू लगायत सबै महानुभावमा न्यानो अभिभावदन !’ भन्दै सम्बोधन गरेकी थिइन् ।

काठमाडौंका वडाध्यक्ष श्रेष्ठ मेयर बालेन समर्थित मानिन्छिन् । प्रमुख प्रशासकीय अधिकृतलाई जनप्रतिनिधि र कर्मचारी मिलेर जबर्जस्ती कार्यालय प्रवेश गराइँदा श्रेष्ठ अनुपस्थित बनेकी थिइन् ।

श्रेष्ठले आफ्नो वडाका केही समस्या र मागहरु अघि सारिन् । उनले बालाजु बाइसधारा पार्कको डीपीआरसहितको योजना बजेटमा समावेश गर्न आग्रह गरेकी छन् । साथै, पार्कभित्रको सेतो घर भुम्कपले जिर्ण भएको हुँदा पुनर्निमाणको योजनाका लागि उनको प्रस्ताव छ ।

श्रेष्ठले नयाँ बजारमा रहेको सोसल ग्राउन्डमा फुटबल ग्राउन्ड निर्माण गर्नुपर्ने भएकाले बजेट छुट्याउन माग गरिन् । यस्तै १६ नम्बरमै रहेको पञ्चकुमारी मार्गमा रहेको सार्वजनिक जग्गामा पार्क बनाउन डीपीआरसहितको योजना पनि माग गरिन् । पकनाजोलस्थित नेपाल युवक माविको शिक्षालयको पुरानो भवन जीर्ण भएको भन्दै पुननिर्माण गर्नुपर्ने बताइन् ।

वडाध्यक्ष श्रेष्ठले सिस्डोलमा फोहोर फाल्ने गाडीहरुले फोहोर लग्दा ककनी पुगेपछि बाटोमा फोहोर चुहिएर स्थानीयलाई भइरहेको समस्याबारे पनि आवाज उठाएकी थिइन् ।