Category: माओवादी केन्द्र

पोखरा । नेकपा माओवादी केन्द्रको गण्डकी प्रदेश कमिटीलाई पूर्णता दिन मतदान हुने भएको छ ।

सर्वसम्मतमा कमिटी चयन गर्ने प्रयास गरिए पनि सफल हुन नसकेपछि मतदान हुन लागेको हो । तीन महिनाअघि अध्यक्ष मात्रै चयन गरेर स्थगित भएको अधिवेशन अध्यक्ष पुष्पकमल दाहाल प्रचण्डको निर्देशनपछि बुधबार सुरु भएको हो ।

कमिटीको उपाध्यक्षमा सात जनाको उम्मेदवारी परेको छ । तीन सिटका लागि नवलपुरबाट मित्रशरण शर्मा, पर्वतका गुणखर बस्याल, गोरखाका लोकप्रसाद बन्जारा, बागलुङका ज्ञानमान गैह्रे, कास्कीका गंगा पोखरेल र केशव पौडेल तथा तनहुँकी गीता शाहीले उम्मेदवारी दर्ता गराएका हुन् ।

यस्तै, एक जना सचिवका लागि दुई जनाको मनोनयन छ । गोरखाका जगन्नाथ खनाल र विष्णु भट्टले मनोनयन दर्ता गरेको निर्वाचन कमिटीले जनाएको छ ।

तीन सहसचिव पदमा ६ जनाले उम्मेदवारी दिए भने कोषाध्यक्षमा तीन जनाको दावेदारी परेको छ । सहसचिवमा कास्कीका जीवन खाती, राजकुमार दुलाल, लमजुङका मेखबहादुर भण्डारी, स्याङजाका कल्पना अर्याल, तनहुँका अतिन्द्र केशरी न्यौपाने र म्याग्दीका टेकबहादुर विकले उम्मेदवारी दिएका छन् ।

कोषाध्यक्षमा कास्कीका मेखबहादुर विक र भीमबहादुर विक तथा स्याङजाका तारा भुसालको उम्मेदवारी परेको छ ।

जनकपुरधाम । नेकपा माओवादी केन्द्र मधेस प्रदेशमा बढेको असन्तुष्टि सतहमै देखिएको छ ।

जनकपुरधाममा आज आयोजित प्रदेशस्तरीय प्रशिक्षण कार्यक्रममा मधेसका प्रभावशाली नेता एवं स्थायी समिति सदस्य मात्रिका यादव उपस्थित भएनन् ।

नेता यादव कार्यक्रममा नआउँदा दु:ख लागेको प्रचण्डले बताए । उनले भने, ‘असन्तुष्ट रहेपनि उहाँ कार्यक्रममा आउनुपर्थ्यो । तर, आउनु भएन । यो दु:खको कुरा हो ।’

मधेस प्रदेशभित्र युद्ध लडेका र पूर्वजनमोर्चाका नेता-कार्यकर्ताबीच माओवादीमा दुई गुट छ । भूमिगतकालदेखिका माओवादीको नेतृत्व यादवले गर्दै आएका छन् । गिरिराजमणी पोखरेल र विश्वनाथ शाहले पूर्वजनमोर्चा धारको लिड गर्छन् । गुटबन्दीकै कारण माओवादी अहिलेसम्म प्रदेश कमिटी समेत बनाउन सकेका छैन ।

अध्यक्ष प्रचण्डले असन्तुष्टि र गुट-उपगुट त्यागेर स्थानीय तह निर्वाचनमा लाग्न नेता कार्यकर्तालाई निर्देशन दिए । गठबन्धनको विषय टुंगो नलागेको र गठबन्धन नभए पनि चुनाव जित्नेगरी लाग्नुको विकल्प नरहेको उनको भनाइ थियो ।

जनकपुरधाम । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले एमालेका कारण मधेसका जनताले न्याय पाउन नसकेको भन्दै फेरि पनि केपी ओली मधेसमा आफ्नो प्रभाव विस्तारमा लागेको टिप्पणी गरेका छन् ।

मधेस प्रदेशको कार्यकर्ता प्रशिक्षणलाई सम्बोधन गर्दै अध्यक्ष प्रचण्डले एमालेको कारण नागरिकता विधेयक अड्किएको आरोपसमेत लगाए । एमालेले बिनाकारण संसद चल्न नदिएको भन्दै प्रचण्डले ओली अझै प्रतिगमनकै बाटोमा रहेको बताए ।

प्रचण्डले भने, ‘म प्रधानमन्त्री हुँदा दुईपटक मधेसी जनताको भावनाअनुसार संविधान संशोधन प्रस्ताव दर्ता गरेँ । तर, एमालेले त्यसलाई असफल बनायो । एमालेले नै मधेसी जनताको अधिकारमाथि खेलबाड गरेको छ ।’

अध्यक्ष प्रचण्डले अबको दुई महिना आक्रमक ढंगले लागेर चुनाव जित्नपर्ने भन्दै जाली फटाहा र विरोधीलाई तह लगाउनेगरी ब्याटलमा उत्रिन युवाहरूलाई निर्देशनसमेत दिए ।

जनकपुरधाम । नेकपा माओवादी केन्द्रले जनकपुरधामस्थित तिरहुतिया गाछीमा आयोजना गरेको मधेस प्रदेशस्तरीय प्रशिक्षण कार्यक्रम ‘महंगो’ तर लथालिंग देखिएको छ । अध्यक्ष प्रचण्डबाट प्रशिक्षण लिन कार्यकर्ताले २ सय देखि २ हजार शुल्क तिरेका छन् ।

प्रदेशदेखि पालिकास्तरसम्मका नेता र जनप्रतिनिधिलाई प्रशिक्षण दिन प्रचण्ड नेता नारायणकाजी श्रेष्ठलाई लिएर काठमाडौंबाट आएका हुन् । मध्यान्ह १२ बजेबाट सुरू हुने भनिएको कार्यक्रम २ घण्टा ढिलो गरी सुरू भएको थियो ।

प्रशिक्षणमा सहभागी हुने नेता/कार्यकर्ताबाट व्यवस्थापन शुल्क भन्दै २ सय र जनप्रतिनिधिलाई २ हजार रूपैयाँ उठाइएको छ । उक्त शुल्क तिर्नेहरूले मात्रै प्रवेश कार्ड प्राप्त गर्छन् । प्रवेश कार्डबिना भित्र छिर्न पाइँदैन । प्रशिक्षणमा करिब २ हजारभन्दा बढी नेता/जनप्रतिनिधि सशुल्क सहभागी भएका छन् ।

कार्यक्रमस्थल भने सानो टेण्टभित्र राखिएको छ । भित्र बस्ने ठाउँ साँघुरो छ । स्थान अभावले धेरै नेता चर्को घाममै उभिन बाध्य छन् । केही भुइँमै बसेका छन् । कार्यक्रमस्थलमा खानेपानीको समेत व्यवस्था छैन ।

फितलो व्यवस्थापनका कारण चर्को घाममा उभिनुपर्दा बेहोस हुने अवस्था देखिएको प्रशिक्षणमा सहभागी एक नेताले गुनासो गरे ।

झापा । आफ्नो घर स्याहार्न राखिएका जेल जीवनका सहकर्मी दम्पत्तीलाई मरणासन्न हुनेगरि कुटपिट गराएर पूर्व राज्यमन्त्री तथा माओवादी केन्द्रकी सांसद धर्मशीला चापागाईँ सुटुक्क काठमाडौंतिर लागेपछि झापा माओवादी पंक्तिमा खैलाबैला मच्चिएको छ ।

घटना सोमबार बिहानको हो। माओवादी केन्द्रको झापा जिल्ला इन्चार्ज तथा सांसद धर्मशिला चापागाईँको अर्जुनधारा नगरपालिका वडा न. १, साधुटार–सिस्नेस्थित घरमा काम गर्न राखिएका एक दम्पती मरणासन्न अवस्थामा पुग्ने गरी कुटिए ।

कुटपिट गर्ने व्यक्ति थिए, सांसद चापागाईँका सौतेनी भाइ बुहारी र सौतेनी बहिनी । अनि कुटाई खाने दम्पती हुन्, धर्मशिलासँगै जेल जीवन बिताएका माओवादी कार्यकर्ता चन्द्र सापकोटा र जमुना सापकोटा ।

अहिले धर्मशिलाको आदेशमा उनकै सौतेनी बुहारी र बहिनीबाट कुटाई खाएर घाइते भई बिर्ता सिटी अस्पताल, बिर्तामोडमा उपचाररत जमुनाले नै धर्मशिलाको प्रहरीको कुटाइबाट थिलथिलो भएको शरीरको जेलमा स्याहार गरेकी थिइन् ।

पारिवारिक स्रोतका अनुसार जमुना र चन्द्रसँग धर्मशिलाका जेल जीवनका ती सूचना र जानकारी छन् जसलाई उनी सधैँ लुकाउन चाहन्छिन्। त्यसैले आफ्ना ती पुराना सहकर्मी आफ्नो छेउछाउ रहेको उनलाई निको लाग्दैन ।

तर, साइनोले भान्जा र भान्जे बुहारी समेत पर्ने भएकाले धर्मशिलाकी आमाले चन्द्र दम्पतिको दुख देख्न नसकेर उनीहरूलाई साथ दिने निर्णय गरिन्। भएको जग्गा जमिन जोतभोग गर्न दिइन् ।

आमाको सो कदम ठिक नलागेको भए पनि सिधै विरोध गर्ने कुनै तर्क धर्मशिलासंग थिएन। त्यसैले आफ्नो मृत्यु पछि मात्र छोरीहरूले भोग गर्न पाउने सर्तमा धर्मशिला र अन्य चार बहिनी छोरीको नाममा अंश पास गरिदिएको जग्गामध्ये आफ्नो नाममा रहेको जग्गाको भोग धर्मशिलाले खोसिन्। र, तिनै सौतेनी बुहारीलाई भोग गर्न दिइन् ।

यसरी लाक्षणिक रूपमा चन्द्रको परिवारलाई लखेट्ने प्रयास सफल नभएपछि उनी ४ दिन अगाडी सिस्ने गएर सौतेनी बुहारी र बैनीलाई ‘चन्द्रको परिबार कुटेर लखेट्नु, परेको म बेहोर्छु’ भन्ने आदेश दिएर फर्किएको स्थानीयवासीको भनाई छ ।

उनीहरूको त्यो भनाइलाई प्रमाणित गर्ने भिडियो र अडियो अहिले त्यो भेगमा सबैको मोबाइलमा व्याप्त छ। चन्द्र र जमुनालाई हातपात गर्दै गर्दा र त्यसपछि समेत पीडकहरूले ‘दिदीले भकुर्नु म त्यसपछि हेरौला भन्नुभएको छ’ भनेको स्थानीयवासी बताउँछन् ।

आफ्नै घरमा काम गर्न राखिएका पुर्वसहकर्मीलाई हातपात गर्न लगाएर आफू पानी माथि ओभानो बन्न धर्मशीला भने छोरी लिएर काठमाडौँतर्फ लागेकी छिन्। पार्टीले स्थानीय स्तरमा नै खट्न निर्देशन दिएको भए पनि उनी भने बिना कुनै काम काठमाडौँ गएको झापा माओवादीका एक जिम्मेवार नेता बताउँछन् ।

आफ्नो नेताले चुनाएको मुखमा यस्तो उपद्रो गरेको भन्दै माओवादीका स्थानीय नेता÷कार्यकर्ता भने उनीसँग रुष्ट बनेका छन् ।

एक स्थानीय नेताले भने, ’हामीलाई गाह्रो छ, उहाँ अरूको कुरा सुन्नु नै हुन्न। सम्हाल्नु पर्ने बेला सबै लथालिङ्ग पारिदिनु भो ।’

धर्मशिलाले चुनाएको मुखमा यसरी आफ्नै खुट्टामा बन्चरो हानेको भन्दै एमाले, कांग्रेस लगायत दलका स्थानीय नेता भने मक्ख छन् । उता धर्मशिलाले भने स्थानीय प्रहरीलाई घटना अघि नबढाउन र सामसुम पार्न दबाब दिएको बताइन्छ ।

शनिश्चरे प्रहरी कार्यालयका प्रहरी नायव निरीक्षक रवि राईले भने सांसद चापागाईँले घटनाको बारेमा राम्रोसँग छानबिन गर्न भनेको बताए ।

उनले बुधवार दुवै पक्षलाई बोलाएर छलफल गर्ने र दुवै पक्ष पारिवारिक नातेदार भएकाले उपचार खर्च दिलाएर मिलाउने प्रयास भइरहेको बताए । घटनाबारे जानकारी लिन पटक पटक फोन गर्दा सांसद चापागाईँ भने सम्पर्कमा आउन चाहिनन् ।

सुर्खेत । माओवादी केन्द्रका सांसद ठम्मर विष्टको राजीनामा स्वीकृत भएको छ ।

माओवादी प्रमुख सचेतकसमेत रहेका विष्टले फागुन २७ गते पार्टी तथा प्रदेश सभा सदस्य पदबाट राजीनामा दिएका थिए ।

चैत ४ गते प्रदेश सभामा सनाखत गराइएका उनको राजीनामा स्वीकृत गरिएको सभामुख राजबहादुर शाहीले प्रदेशसभा बैठकमा जानकारी गराएका छन् ।

उनको राजीनामासँगै कर्णालीमा नेकपा माओवादीमा ११ जना सांसद छन् । विष्ट हिजो मात्रै एमालेमा प्रवेश गरेका थिए ।

सिन्धुली । सत्तारुढ नेकपा (माओवादी केन्द्र) का अध्यक्ष पुष्पकमल दाहाल प्रचण्डले लगातार सदन अवरुद्ध गरेर फेरि विघटन चाहने केपी ओली प्रवृत्ति अहिले पनि कायमै रहेको भन्दै सत्ता गठबन्धनमा आबद्ध दलहरूले रिल्याक्स गर्ने स्थिति नरहेको बताएका छन् ।

सिन्धुलीमा शनिवार माओवादी पार्टी कार्यालय भवनको उद्घाटनपछि आयोजित सभालाई सम्बोधन गर्दै अध्यक्ष प्रचण्डले एमालेलाई केन्द्रदेखि प्रदेशका सरकारबाट हटाउनु ठुलो सफलता भए पनि प्रतिगमन फर्किने खतरा कायमै रहेको बताए ।

प्रचण्डले भने–लगातार सदन अवरुद्ध गरेर फेरि विघटन चाहने प्रवृत्ति अहिले पनि कायम छ । अझै पनि रिल्याक्स गर्ने स्थिति छैन । पोहोर साल पहिलो संसद् विघटन बदर भएपछि रिल्याक्स मुडमा बसियो,दोस्रो पटक फेरि विघटन आयो । जितियो भनेर रिल्याक्स गरियो भने फेरि कुनै पनि बेला प्रतिगमन फर्किन सक्छ ।

आफूले पटक पटक बुढानिलण्ठ गएर शेरबहादुर देउवालाई प्रधानमन्त्री बनिदिनुस् भनेर गठबन्धन बनाएको स्मरण गर्दै प्रचण्डले अबको चुनाव माओवादीले आफ्नो बलमा जित्न ध्यान दिनुपर्ने बताए । उनले अबको २ महिना युद्धकालीन शैलीमा काम गर्न कार्यकर्तालाई निर्देशन दिए । उनले जसरी पनि चुनाव जित्नुपर्ने बताए ।

उनले भने– जसले परिवर्तन ल्याएको त्यसले हार्ने, अनि जो परिवर्तन विरोधी हो त्यसले जित्ने पनि चुनाव हुन्छ रु गुण्डागर्दी धाँधली र षडयन्त्र गरेर जित्न खोज्नेलाई परास्त गर्नु छ । भिलेन राम्रो भएन भने हिरो पनि राम्रो हुँदैन । अहिले केपी ओली जस्तो गतिलो भिलेनका कारण हामी जनतामा जान पाएका छौँ,नकारात्मक रूपमा भने पनि ओलीलाई धन्यवाद भन्ने गरेको छु ।

आफूले देशको रक्षाका लागि पटक पटक लचिलो बनेको भन्दै गिरिजाप्रसाद कोइरालालाई राष्ट्रपति नबनाउनु ऐतिहासिक भूल भएको बताए ।

उनले माओवादीका लागि यो निर्वाचन हारजितको मात्र कुरा नभएर जनयुद्धका उपलब्धि जोगाउने लडाइँ समेत भएको बताए । उनले माओवादीले हारेमा जनयुद्धका उपलब्धि हार्ने दाबी गरे ।

चितवन । नेकपा माओवादी केन्द्रका अध्यक्ष पुष्पकमल दाहाल प्रचण्ड आसन्न तीनवटै तहको निर्वाचनमा सत्तारुढ गठबन्धनबीच चुनावी तालमेल हुनुपर्ने पक्षमा छन् ।

प्रमुख सत्तारुढ घटक नेपाली कांग्रेसलाई चुनावी तालमेलको पक्षमा उभिन प्रचण्डले दवाव बढाउँदै लगेका छन् । ‘कांग्रेस तालमेलका लागि तयार नभए एमालेसँग संवाद गर्ने’ अभिव्यक्तिमार्फत उनले कांग्रेसलाई मनोवैज्ञानिक दवाव बढाएकै छन् ।

अघिल्लो संसदीय निर्वाचनमा वाम गठबन्धनको उम्मेदवारका रुपमा नेकपा एमालेको साथ लिएर चितवन क्षेत्र नम्बर ३ बाट प्रचण्ड प्रतिनिधिसभा सदस्यमा निर्वाचित भएका थिए । अहिले सोही क्षेत्रबाट संघीय निर्वाचन लड्न प्रचण्डले कम्मर कसेका छन् तर चुनावी तालमेल नभएमा प्रचण्डलाई निर्वाचन जित्न निकै कठिन हुने देखिन्छ ।

प्रचण्डको वडामा कांग्रेसको बाहुल्य

प्रचण्ड चितवनको भरतपुर महानगरपालिका वडा नम्बर १४ का मतदाता हुन् र सो वडामा नेपाली कांग्रेसले अध्यक्षसहित सबै सदस्य जितेको थियो । अघिल्लो स्थानीय निर्वाचनमा भरतपुर महानगरपालिकामा मेयर माओवादीले र उपमेयर कांग्रेसले लिएपनि वडा तहमा चुनावी तालमेल भएको थिएन । यहीकारण प्रचण्डको वडामा कांग्रेस उम्मेदवार ओमप्रकाश पोखरेल १ हजार ५ सय ५२ मत ल्याएर अध्यक्षमा निर्वाचित भएका थिए ।

प्रचण्डको वडामा माओवादी उम्मेदवार खिमलाल भट्टले १ हजार १ सय १६ मत ल्याएपनि ४ सय ३६ मतले पराजित भएका थिए । तेस्रो बनेका एमाले उम्मेदवार हरिकृष्ण गुरुङले माओवादी उम्मेदवारभन्दा ११ मत कम अर्थात १ हजार १ सय ५ मत ल्याएका थिए ।

अघिल्लो निर्वाचनको परिणाम हेर्दा प्रचण्डको वडामा कांग्रेस सबैभन्दा बलियो शक्तिका रुपमा रहेको छ । आफ्नै वडामा दोस्रो हैसियतामा रहेका प्रचण्ड चुनावी तालमेलमार्फत संसदीय निर्वाचन जित्न चाहन्छन् तर त्यसका लागि कांग्रेसका स्थानीय नेता कार्यकर्ताहरु तयार छैनन् ।

कांग्रेस कार्यकर्ताले भने– रुखबाहेक अन्त भोट दिदैंनौ

कांग्रेस यतिबेला घरघर जाऔं कांग्रेस जिताऔं अभियानमा सक्रिय रहेको छ । अभियान अन्तर्गत प्रचण्डको वडामै कांग्रेसले टोल समितिहरु गठनलाई तीव्रता दिएको छ । भरतपुर महानगर १४ का कांग्रेस वडा सभापति राजेन्द्र साँखीका अनुसार वडाभित्र २५ वटासम्म टोल समिति बनाउने कांग्रेसको योजना छ । हालसम्म शिवनगर, शिवकाली र नमस्ते टोलमा कांग्रेसले समिति बनाएको छ । अभियान लिएर टोल–टोल पुगेका कांग्रेस नेताहरुलाई मतदाताले ‘फेरी पनि हसियाँ हथौडामै हाल्दिनुपर्ने होकि रुखमै भोट हाल्न पाइन्छ ?’ भनी प्रश्न गरेका छन् ।

कांग्रेसका वडा सभापति साँखी शुभचिन्तकहरुले कांग्रेसलाई निरन्तर प्रश्नको घेरामा राखेको बताउँछन् । ‘हामी टोलमा जुनसुकै कार्यक्रम लिएर गएपनि वडाबासीको एउटै प्रश्न छ, रुखमा भोट हाल्न दिन्छौ कि दिदैनौ ? यसको अर्थ कांग्रेसको ग्राउण्ड चुनावी तालमेलको पक्षमा छैन भन्ने नै हो’, साँखीले नेपाल प्रेससँग भने ।

सो वडाका कांग्रेस कार्यकर्ताहरुले गत स्थानीय निर्वाचनमा भरतरपुरको मेयरका लागि माओवादीको चुनाव चिन्ह गोलाकारभित्रको हसियाँ हथौडामा भोट हाल्न बाध्य भएका थिए ।

त्यस्तै संसदीय निर्वाचनमा माओवादीले एमालेसँग तालमेल गर्दा कांग्रेसले राप्रपा प्रजातान्त्रिकका विक्रम पाण्डेलाई समर्थन जनाएको थियो । सोही कारण कांग्रेस कार्यकर्ताहरु संघीय निर्वाचनमा आयातकार भित्रको हलोमा भोट हाल्न बाध्य भए । यसपटक भने रुख बाहेक अन्यत्र भोट नहाल्ने कांग्रेस कार्यकर्ताहरुको अडान छ ।

‘राष्ट्रिय राजनीतिमा चुनावी तालमेलको आवश्यकता हुनसक्छ तर यसपटक चितवन क्षेत्र नम्बर ३ का जनताले रुखमै भोट हाल्न पाउनुपर्छ भन्ने सबैजसोको भनाई छ ।

यसबारे नेतृत्वले सोचोस्’, सभापति साँखी बताउँछन् । चितवनमा हालै सम्पन्न कांग्रेस जिल्ला अधिवेशनका दौरान सबैजसो उम्मेदवारले चुनावी तालमेलका नाममा रुखबाहेक अन्यत्र भोट हाल्नुपर्ने अवस्था अन्त्य गर्ने बताएका थिए ।

के प्रचण्डलाई जिताउन देउवा तयार छन् ?

हालै प्रधानमन्त्रीसमेत रहेका कांग्रेस सभापति शेरबहादुर देउवाले गठबन्धनविरुद्ध अभिव्यक्ति नदिन पार्टीका नेताहरुलाई निर्देशन दिएका थिए ।

सत्ता गठबन्धनमा समस्या आउन नदिन र पुनः वाम गठबन्धन हुन नदिन माओवादीसँग सहकार्य गरेरै जाने देउवाको नीति छ । आफ्ना निकटस्थहरुसँग देउवाले गठबन्धन जोगाएर लैजानुपर्ने बाध्यता रहेको बताउने गरेका छन् ।

‘गठबन्धनलाई चुनावसम्म नजोगाउने हो भने फेरी वामगठबन्धन बन्ने र कांग्रेस हार्ने डर सभापतिजीलाई छ । गठबन्धन गरेरै भएपनि एकपटक कांग्रेसलाई पहिलो बनाउने चाहनाका कारण कुनै न कुनै प्रकारको तालमेलका लागि उहाँ तयार हुनुुहुन्छ’, सभापति देउवा निकट एक नेताको भनाई छ ।

चितवनमा चुनावी तालमेलविरुद्ध कांग्रेस कार्यकर्ताको बढ्दो आक्रोश समाधानका लागि उपायहरुको खोजी पनि जारी छ ।

गठबन्धन पक्षधर कांग्रेस-माओवादी नेताहरुले स्थानीय निर्वाचनमा भरतपुर महानगरपालिकाको मेयर कांग्रेसलाई दिएर संघीय निर्वाचनमा क्षेत्र नम्बर ३ मा प्रचण्डलाई कांग्रेसले सघाउनेबारे छलफल भइरहेको बताउँछन् ।

‘भरतपुरको मेयरमा कांग्रेसलाई जिताएर कांग्रेस कार्यकर्तालाई सफ्ट बनाएपछि संसदीय चुनावसम्म आफ्नो लागि माहोल बनाउन सकिन्छ भन्ने प्रचण्डको बुझाई छ’, स्थानीय माओवादी नेताको भनाई छ ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले केपी ओलीलाई प्रधानमन्त्री दिएर भने पनि एमसीसी रोक्न आफूले खोजेको खुलासा गरेका छन् ।

काठमाडौंको प्रज्ञा भवनमा पार्टी प्रशिक्षण कार्यक्रममा एमसीसीको सकसबारे कार्यकर्तालाई बुझाउँदै प्रचण्डले एमसीसी अनुमोदन हुन नदिने सबै प्रयास असफल भएपछि गठबन्धन जोगाउन व्याख्यात्मक टिप्पणीको बाटो लिएको बताएका हुन् ।

प्रचण्डको भनाइ उदृत गर्दै प्रशिक्षण भेलाका एक सहभागीले भने, ‘केपीलाई प्रधानमन्त्री दिएर पनि एमसीसी रोक्न सकिन्छ कि भनेर गएका हौं । तर, पूरै अपमान गरेपछि सर्प पनि मर्ने, लाठी पनि नभाँचिने लाइनमा गइयो ।’

आफूहरु ओलीसँग कुरा गर्न जाँदा सभामुखले राजीनामा दिनुपर्ने, नेकपा एसका १४ सांसदको पदमुक्तिको सूचना टाँस्नुपर्ने र नेकपाकालमा आफूहरूले ओलीमाथि लगाएको १९ बुँदे अभियोगपत्र फिर्ता लिनुपर्ने शर्त राखेपछि बेकार आइएछ भनेर हिँडेको प्रचण्डले बताए ।

काठमाडौं । नेकपा (माओवादी केन्द्र) का अध्यक्ष पुष्पकमल दाहाल प्रचण्डले केपी ओलीसँगको सहकार्य सम्झिँदा कहिलेकहिँ दिक्क लाग्ने गरेको सुनाएका छन् ।

माओवादीको गैर भौगोलिक प्रादेशिक कमिटीको प्रशिक्षण कार्यक्रममा अध्यक्ष प्रचण्डले संसद विघटनसम्म पुग्दा ओली जत्तिको खराब व्यक्तिसँगको सहकार्यप्रति घृणा लागेको बताए ।

अध्यक्ष प्रचण्डले प्रतिनिधिसभा विघटन ओलीको एकल निर्णय नभएर देशभित्रका प्रतिक्रियावादी र अन्तर्राष्ट्रिय शक्तिहरुको समेत डिजाइनमा भएको बताए ।

आफ्नो नेतृत्वमा भएको देशब्यापी प्रतिगमन विरोधी आन्दोलनको बलमा अदालतबाट संसद पुनस्र्थापना गराउनु सफलता भएको बताए ।

एमसीसी अनुमोदन नहुँदा प्रतिगामी ओली फेरि शक्तिमा आउने,कांग्रेस एमाले गठबन्धन हुने र आफूहरुमाथि झन् ठूलो संकट आउने भएकाले व्याख्यात्मक घोषणाबाट बाटोमा गएको प्रचण्डको भनाइ थियो ।

रूपन्देही । अधिवेशन सकिएको करिब ४ महिनापछि नेकपा माओवादीको लुम्बिनी प्रदेशमा पदाधिकारी टुंगिएको छ ।

प्रदेश समितिको पहिलो बैठकले सुदर्शन बरालको अध्यक्षतामा पदाधिकारी चयन गरेको हो । बराललाई यसअघि नै अध्यक्ष बनाउने सहमति भएको थियो । उपाध्यक्षमा दुर्गा थारु, लुमाकान्त न्यौपाने र बहादुर खत्री चयन भएका छन् भने सचिवमा कृष्ण अधिकारी, सहसचिवमा अकलबहादुर बम, पार्वती विक, काशिराम यादव र कोषाध्यक्षमा निर्दोष वली आएका छन् ।

कार्यालय सचिवमा रामानन्द यादवलाई जिम्मेवारी दिइएको छ ।

माओवादी लुम्बिनी प्रदेश कमीटीको अधिवेशन मंसिर २५-२६ मा दाङको भालुबाङमा अधिवेशन सम्पन्न गरेको थियो । सम्मेलनले २ सय १७ सदस्यीय कमिटी चयन गरेको थियो । पदाधिकारी भने टुंगिएको थिएन ।

कैलाली । माओवादी केन्द्रका अध्यक्ष पुष्पकमल दाहाल प्रचण्डले आगामी निर्वाचन आफ्नै तागतमा एक्लै होमिन पनि सक्ने बताएका छन् । पार्टी प्रशिक्षणका लागि सुदूरपश्चिम आएका उनले आज बिहान धनगढीमा पत्रकारहरूसँग पहिलो प्राथमिकता एक्लै निर्वाचनमा जाने रहेको बताए ।

‘आफ्नै खुट्टामा उभिएर आफ्नै तागतमा निर्वाचन लड्ने हाम्रो नीति हो । तालमेल हुने अवस्थामा गठबन्धनमा रहेका दलहरूसँगको तालमेललाई प्राथमिकता दिएर जान सक्छौँ ’ उनले भने, ‘तर पहिलो जोड आफ्नै तागतमा निर्वाचन जित्ने गरी लड्ने हो नभए सहायकरूपमा अन्य दलहरूसँग तालमेल गर्ने हो । ’

गठबन्धनका दलहरूबीच अहिले सुमधुर सम्बन्ध रहेको प्रचण्डको भनाइ छ । निर्वाचनभन्दा अघि कुनै पनि अवस्थामा पनि गठबन्धन नधरमराउने उनको भनाइ थियो ।

‘अहिले गठबन्धनलाई लिएर अघि लैजाने कुरामा द्विविधा छैन । मूल नेतृत्व यसलाई अगाडि बढाउने कुरामा एकमत छन् ’ उनले भने ‘प्रधानमन्त्रीले आफ्नै पार्टीका नेता कार्यकर्ताहरूलाई पनि गठबन्धनलाई असर पर्ने कुरा नबोल्न निर्देशन दिइसक्नु भएको छ । ’

माओवादी अध्यक्ष दाहालले संसदमा एमाले अवरोधको कुनै अर्थ रहेको टिप्पणी गरे । ‘त्यो विघटन सही थियो र फेरि पनि विघटन गर्नु पर्छ भन्ने बनाउन यस्तो गरिएको हो’ उनले भने ।

उनले एमालेले उठाएका १४ सांसदको कारबाहीको र सभामुखको भूमिकाको विषय अर्थहीन नरहेको बताए ।

‘१४ सांसदको विषय अदालतमा छ । अदालतमा रहेको विषयलाई लिएर संसद् अवरुद्ध गर्नु ठीक होइन । सभामुखले १५ दिनभित्र गर्न पाउने काम १३ दिनभित्र गर्नु भएको छ यी दुवै विषय अर्थहीन हुन्’, प्रचण्डको भनाइ थियो ।

संसद अवरुद्ध भइरहेको अवस्थामा निर्वाचन गौं भन्ने छलफल भएको प्रचण्डले स्वीकारे । अर्लिइलेक्सनको सम्भावना भने नरहेको उनको प्रष्टक्ति थियो ।

‘संसद सुचारु हुँदैन भने संघको चुनाव गरौँ भन्नेमा सैद्धान्तिक सहमति भएको हो तर चुनाव सार्ने भ्रम छर्न थालियो । हामी निर्वाचनबाट भाग्न खाजेका होइनौँ ’ उनले भने, ‘ अहिले अर्लिइलेक्सनको सम्भावना छैन । ’

एमसीसी पारित गरेर संकट टारेको भन्दै प्रचण्डले भने, ‘केही समय अगाडिसम्म एमसीसीको कारणले देशका राजनैतिक दल/समाज विभाजन हुने स्थिति थियो । त्यसलाई १२ बुँदे व्याख्यात्मक घोषणासहित अनुमोदन गरेपछि अहिले सबै राजनैतिक दलहरू निर्वाचनकेन्द्रित अभियान सुरु गर्न थालेका छन् ।’

एमसीसीको विषयमा पार्टीभित्र भएका विवादहरू पनि अहिले सकिएको उनको भनाइ थियो । ‘पार्टीभित्र भएका विवाद समाधान गरेर चुनावमा एक भएर जाने कुरामा हामी एक छौँ । एमसीसीका विषयमा मतभेद कायमै छ । तर, पार्टीले गरेको निर्णय कार्यान्वयन हुन्छ । मतभेदलाई निर्वाचनपछि बहस गर्ने भनेका छौँ ’, प्रचण्डले भने ।

सुदूरपश्चिम सरकारमा नेपाली कांग्रेसलाई पनि सहभागी गराउनु पर्ने बताएका प्रचण्डले सरकारको नेतृत्व भने माओवादी केन्द्रले नै गर्ने दाबी गरे ।