Category: माओवादी केन्द्र

काठमाडौं । नेकपा (माओवादी केन्द्र)को स्थायी कमिटी बैठक शुरु भएको छ । पार्टी कार्यालय पेरिसडाँडामा बिहान साढे ८ बजेबाट बैठक सुरु भएको हो ।

बैठकमा पोलिटब्युरोको चयनलाई निष्कर्षमा पुर्‍याउने र पार्टीको संगठनात्मक कामलाई कसरी अघि बढाउने बारे छलफल हुने एक स्थायी कमिटी सदस्यले जानकारी दिए ।

पोलिटब्यूरो र पदाधिकारीको टुंगो नलगाई पार्टी अध्यक्ष पुष्पकमल दाहाल प्रचण्ड भारत भ्रमणमा गएका थिए ।उनी भारत भ्रमण सकाएर फर्किएपछि बैठक बस्न लागेको हो ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले आगामी निर्वाचनमा नेकपा एमालेसँग तालमेल वा गठबन्धन हुन नसक्ने भन्दै कांग्रेसको विकल्प नखोजिने प्रष्ट पारेका छन् ।

बिहीबार आयोजित स्थायी कमिटी बैठकमा राजनीतिक परिस्थितिको ब्रिफिङ गर्दै अध्यक्ष प्रचण्डले कांग्रेससँगै चुनावी सहकार्य हुने र त्यसबाट दायाँ बायाँ सोच्न आवश्यक नरहेको बताएका हुन् ।

उनले कांग्रेससँगै गठबन्धनभित्र रहेर एमालेबाहेकका वामपन्थीहरुको समाजवादी मोर्चा बनाउँन सकिनेबारे छलफल भइरहेको बताए ।

काठमाडौं । भूमि, व्यवस्था तथा सहकारी मन्त्री शशी श्रेष्ठले प्रक्रिया मिचेर आफ्नै नन्दलाई सरकारी नियुक्ति दिलाएकी छिन् ।

मन्त्रालय अन्तर्गतको साझा स्वास्थ सेवा सहकारीको सञ्चालक समिति सदस्यमा आफ्नै नातामा नन्द पर्ने उर्मिला पोखरेललाई मन्त्री स्तरीय निर्णय गरेर नियुक्ति दिलाएकी हुन् ।

सरकारी सेवाबाट दुई वर्ष अघि मात्र सेवा अवकास पाएकी उर्मिलालाई मन्त्री श्रेष्ठले सहोदर दाइ श्याम श्रेष्ठ सल्लाहकार रहेको विकल्प सहकारी संस्थाबाट ‘नक्कली’ अनुभवपत्र बनाउन लगाएर नियुक्त गरेपछि उनको आलोचना भएको छ ।

मन्त्री श्रेष्ठले यसअघि पनि नक्कली प्रमाणपत्र भएका भनिएका माधवप्रसाद तिमिल्सिनालाई सहकारी बोर्डको सदस्यमा नियुक्ति गरेपछि प्रहरीको केन्द्रीय अनुसन्धान ब्युरोले छानबिन गरी मुद्दा चलाएको थियो ।

काठमाडौं । नेकपा माओवादी केन्द्रका अध्यक्ष पुष्पकमल दाहालले पैसा नहुने र अनेक खालका तिकदम गर्न नजाने चुनाव जित्न नसकिने बताएका छन् ।

नेपाल कम्युनिष्ट पार्टीका संस्थापक नरबहादुर कर्माचार्यको ९ औं स्मृति दिवसको अवसरमा श्रद्धाञ्जली अर्पण गर्दै अध्यक्ष प्रचण्डले  चुनावमा खर्च गर्न नसक्नेले र अनेक खालका तिक्रदम गर्न नजानेले चुनाव नजित्ने बताएका हुन् ।

उनले २०६४ को चुनावमा माओवादीबाट जो उठेपनि जित्ने अवस्था रहेको बताउँदै अब त्यस्तो अवस्था नरहेको बताए ।

उनले भने, ‘निर्वाचन प्रणाली  सुरुमा त क्रान्तिको रापताप हुँदाखेरि जो उठेपनि जित्ने जस्तो भएको थियो २०६४ को चुनावमा माओवादी भनेर उठाइदिएपछि जितिहाल्ने जस्तो भएको थियो । अहिले त्यस्तो छैन । अब धेरै पैसा खर्च गर्न सकेन भने अनेक खालका तिकदम गर्न जानेन भने चुनाव जितेर आउन धेरै नै गाह्रो छ ।’

उनले चुनावमा खर्च गरेको पैसा मन्त्री भएपछि असुल्ने गरेको समेत खुलाए । उनले भने,‘सांसद हुने बेला करोडौं खर्च गरेर सांसद किन हुन्छन् त मान्छे सांसद नभई मन्त्री प्रधानमन्त्री हुन पाउँदैन । मन्त्री र प्रधानमन्त्री हुन करोडौं खर्च गर्न पर्ने भयो । सांसद भइसकेपछि मन्त्री हुन त्यहाँ पनि अनेक खालका खेलहरु खेल्नुपर्यो मन्त्री भएपछि लगानी उठाउनुपर्यो त्यत्रो लगानी गरिसकेको छ । अनि त्यहाँ भ्रष्टचार संस्थागत हुन्छ । ’

उनले निर्वाचन प्रणाली गहिरो भुमरीमा फस्न लागेको भन्दै चिन्ता व्यक्त गरे ।

‘गाउँपालिकाको चुनावमा १० करोड खर्च गरेर जितेर आउनुभएको देखिएको छ । एउटा गाउँपालिकाको अध्यक्षले १० करोड खर्च गर्ने भनेपछि संघ र प्रदेशको चुनावमा त उनीहरुले ५० औं करोड अरबौं खर्च गर्ने भए श्रमजीवि जनताले चुनाव जितेर आउने भनेको त सपना जस्तो हुने भयो । दलाल पूँजीपतिहरु आउने खतरा दिनप्रतिदिन बढ्दो छ । यसलाई गहिरो गरी राजनीतिक दलसँग छलफल गर्नुपर्यो । हामीले ल्याएको निर्वाचन प्रणाली खतरामा पर्यो भनेर जनतालाई सडकमा ल्याउनुपर्यो ठूलोठूलो आन्दोलन गर्नुपर्यो नत्र त यो निर्वाचन प्रणालीले देशलाई कहाँ लैजान्छ । भन्न सकिदैन’ उनले भने ।

काठमाडौं । नेकपा माआवादी केन्द्रका वरिष्ठ नेता नारायणकाजी श्रेष्ठले गठबन्धनका नाममा राष्ट्रिय हितका मुद्दामा पार्टीले एकपछि अर्को सम्झौता गर्दै गएको भन्दै असन्तुष्टि व्यक्त गरेका छन् ।

शुक्रबार प्रतिनिधिसभाबाट पारित नागरिकतासम्बन्धी विधेयकमा वैवाहित अंगीकृत नागरिकको हकमा विदेशबाट बिहे गरेर आएलगत्तै नागरिकता पाउने गरी भएको व्यवस्थाप्रति श्रेष्ठले असहमति जनाएका छन् ।

सो विधेयकबारे लामो धारणा सार्वजनिक गर्दै श्रेष्ठले विगतमा संसदीय समितिमा लामो छलफल र बहसपछि राखिएको प्रावधान हटाएर सरकारले फरक विधेयक ल्याई कांग्रेसको बलफजफ्तीमा गठबन्धन बन्धक बनेको टिप्पणी गरेका छन् ।

श्रेष्ठले एमसीसी र एसपीपीमा जस्तै नागरिकता विधेयकमा पनि माओवादी पार्टी बाध्यात्मक समर्थन गर्ने अवस्थामा कहिलेसम्म रहने भने प्रश्न उठाएका छन् । उनले गठबन्धनको नाममा कांग्रेसले निरन्तर बलजफ्ती गरिरहेको भन्दै अब स्वीकार्य नहुने बताएका छन् ।

श्रेष्ठले भनेका छन्, ‘हाम्रो पार्टीले एमसीसीलाई राष्ट्रिय हितअनुरुप ठान्दैन । तर, गठबन्धन सरकारको कारणले पार्टीभित्र मतभेदको बीचमा बाध्यात्मक रुपमा १२ बुँदे ब्याख्यात्मक घोषणासहित अनुमोदन गर्यो । अहिले फेरि नागरिकताको विषयमा समितिको धारणा नै हाम्रो धारणा हुँदाहुँदै पनि सरकारको विधेयकलाई पारित गर्ने निर्णय भयो । एसपीपीको बारेमा अस्वीकारको पत्र सरकारले पठाएको छैन । के हामी गठबन्धनको नाममा पत्र नपठाउने कार्य सरकारले गरिरह्यो भने त्यसलाई पनि बाध्यात्मक समर्थन गर्न सक्छौं त ?’

‘नेपाली कांग्रेसले गठबन्धनको नाममा निरन्तरको बलजफ्ती हामीलाई सधैं स्वीकार्य हुन सक्दैन भन्ने कुरा समयमै बुझोस् । हाम्रो पार्टीले गठबन्धन सरकारको नाममा सबै राष्ट्रिय मुद्दाहरुमा सम्झौता गर्न सक्तैन भनेर गम्भीरतापूर्वक सोच्नैपर्ने भएको छ । गठबन्धन सरकार र भोट हाम्रो साध्य होइन’, उनले थप भनेका छन् ।

नेता श्रेष्ठकाे भनाइ जस्ताकाे तस्तै

हिजो प्रतिनिधिसभाले नागरिकता ऐन संशोधन विधेयक पारित गर्यो । संविधान जारी भएको ७ वर्षपछि नागरिकता विधेयक पारित भएको छ । यो ऐनको रुपमा अघि बढेपछि नेपाली नागरिक बाबुआमाका सन्तानहरुले संविधानअनुसार नागरिकताको प्रमाणपत्र प्राप्त गरी नागरिकताविहीन हुनुको पीडाबाट मुक्ति पाउनेछन् । यो व्यवस्था छिट्टै हुनुपर्थ्यो । अब हुने भएको छ । यो सकारात्मक छ ।

तर, यो विधेयक पारित गर्दा जुन प्रक्रिया अपनाइयो र वैवाहिक अङ्गीकृत नागरिकताको हकमा जे व्यवस्था गरियो, त्यो दुबै कोणबाट गलत छ । नागरिकता विधेयक प्रतिनिधिसभाले राज्य व्यवस्था समितिमा पठाएको थियो । समितिले समितिभित्र र बाहिर पनि गम्भीर एवं व्यापक बहस गर्यो । त्यसमा सहमति हुन नसकेपछि बहुमतले वैवाहिक अङ्गीकृत नागरिकता महिलाको हकमा ७ वर्षपछि दिने र तत्कालै सबै व्यवहारिक काममा कुनै समस्या नपर्ने गरी परिचयपत्र दिने प्रावधान राख्यो । ७ वर्षको प्रावधान हाम्रा नेपाली महिला छोरी, दिदीबहिनीहरुले विदेशी पुरुषसँग विवाह गरेका छिमेकी देशहरुले ७ वर्षपछि मात्र अङ्गीकृत नागरिकता दिने गरेको व्यवस्थासमेतलाई ध्यान दिएर राखिएको थियो । नेपाली नागरिक महिलाले विदेशी पुरुषसँग विवाह गरेकोमा सम्बन्धित पुरुषलाई भने बैबाहिक अङ्गीकृत नागरिकता दिने व्यवस्था नै गरिएको छैन । यो अलग्गै विषय हो ।

नागरिकता जस्तो संवेदनशील विषय सकभर राष्ट्रिय सहमतिको आधारमा निर्णय होस् भन्ने मनसायले तत्काल प्रतिनिधिसभामा प्रक्रियामा लगिएको थिएन । यो ऐन निर्माणमा ढिला भएको कारणबाट छिटो प्रक्रिया अघि बढाउन पर्ने स्थिति नै थियो । त्यसका निम्ति सरकारले या त संसदभित्र सहमति कायम गरेर त्यसको आधारमा अघि बढाउनुपर्थ्यो या सम्बन्धित समितिले २ वर्ष लगाएर पठाएको प्रतिवेदन नै छलफल एवं निर्णय प्रक्रियामा लैजानुपर्दथ्यो । त्यसो नगरी सरकारले बहुमतको निर्णयसहित पठाइएको प्रतिवेदन तथा विधेयकलाई फिर्ता लिएर अल्पमतको विचार लागू गर्ने गरी कानुनी व्यवस्था गर्न नयाँ विधेयक अघि बढायो ।

अन्तर्वस्तुको कोणबाट अहिलेको प्रावधान उपयुक्त छैन भन्ने समितिको निष्कर्षको पक्षमा भएको राष्ट्रिय बहस त छँदैछ, लोकतान्त्रिक एवं संसदीय मूल्य तथा परिपाटीको कोणबाट पनि यो कार्य नितान्त गलत छ । सत्तारुढ गठबन्धनको बैठकमा कानुनी व्यवस्थाअनुसार मिल्ने भएमा समितिमा मतभेद रहेको वैवाहिक अङ्गीकृत नागरिकतासम्बन्धी विषयलाई तत्काल केही समयका लागि थाती राखी अहिले समस्याको रुपमा रहेको नेपाली नागरिक बाबुआमाको सन्तानले नागरिकता पाउने व्यवस्थाको लागि विधेयक अघि बढाउनुपर्थ्यो । अन्यथा समितिको प्रतिवेदनलाई नै प्रक्रियामा अघि बढाउनुको विकल्प थिएन ।

कुनै समितिले बहुमतले पारित गरेको विषय सरकारलाई मन परेन भने सरकारले उक्त विधेयक संसदबाट फिर्ता लिएर अल्पमतमा रहेको आफ्नो विचारअनुसारको विधेयक अघि बढाउने प्रवृत्ति हावी भए लोकतन्त्र र संसदको विधि कसरी कार्यान्वयन होला ? यो गम्भीर विषय हो । तर, तत्कालीन स्वार्थहरुले हामीलाई कति निरङ्कुश बनाउँदै लगेको छ भन्ने सन्दर्भमा यो ज्वलन्त उदाहरण हो ।

मैले आफ्नो यो दृष्टिकोण राष्ट्रियसभाको बैठकमा बोल्दा पहिले नै प्रस्तुत गरेको थिएँ र सम्बन्धित सबैलाई अपील पनि गरेको थिएँ । तर, त्यसो हुन सकेन ।

हाम्रो पार्टीले एमसीसीलाई राष्ट्रिय हितअनुरुप ठान्दैन । तर, गठबन्धन सरकारको कारणले पार्टीभित्र मतभेदको बीचमा बाध्यात्मक रुपमा १२ बुँदे ब्याख्यात्मक घोषणासहित अनुमोदन गर्यो । अहिले फेरि नागरिकताको विषयमा समितिको धारणा नै हाम्रो धारणा हुँदाहुँदै पनि सरकारको विधेयकलाई पारित गर्ने निर्णय भयो । एसपीपीको बारेमा अस्वीकारको पत्र सरकारले पठाएको छैन । के हामी गठबन्धनको नाममा पत्र नपठाउने कार्य सरकारले गरिरह्यो भने त्यसलाई पनि बाध्यात्मक समर्थन गर्न सक्छौं त ?

नेपाली कांग्रेसले गठबन्धनको नाममा निरन्तरको बलजफ्ती हामीलाई सधैं स्वीकार्य हुनसक्दैन भन्ने कुरा समयमै बुझोस् । हाम्रो पार्टीले गठबन्धन र सरकारको नाममा सबै राष्ट्रिय मुद्दाहरुमा सम्झौता हुन सक्तैन भनेर गम्भीरतापूर्वक सोच्नैपर्ने भएको छ । गठबन्धन सरकार र भोट हाम्रो साध्य होइन ।

जनकपुर। नेकपा माओवादी केन्द्रका अध्यक्ष पुष्पकमल दाहाल प्रचण्डले शुक्रबार सदनबाट नागरिकता विधेयक पास हुँदा तराई मधेशका करिब सात लाख नागरिकले नागरिकता पाउने पक्का भएपछि पार्टीको तर्फबाट जनकपुर आएको बताएका छन् ।

जनकपुर विमानस्थलमा पत्रकारसँग कुराकानी गर्दै अध्यक्ष प्रचण्डले खुसीको खबर सुनाउन पहिलो पटक जनकपुर आएको बताए ।

उनले भने, ‘हिजोमात्रै सदनबाट झण्डै ६ सात लाख नेपालीहरु नागरिकताको अभावका कारणले धेरै कामबाट बञ्चित हुनुपर्ने जो अवस्था थियो त्यसको अन्त्य भएको छ अब त्यो तुरुन्तै कार्यान्वयन हुन्छ । आज यो कुरा फेरि जनकपुरमा पहिलो पटक आएर सुनाउन पाउँदा मलाई गर्वको महसुस भएको छ ।’

उनले समाजवादी केन्द्र निर्माण बारेमा डा. बाबुराम भट्टराई, माधव नेपाल, उपेन्द्र यादव, वामदेव गौतमसँग कुरा भइरहेको बताए ।

‘उहाँहरु कोही पनि गठबन्धनबाट बाहिर जानु हँदैन । गठबन्धन भित्र रहेका सबै वाम दलहरुसँग र वामदेव जीसँग राम्रो समझदारी बनाउनुपर्छ ।’ उनले भने, ‘ र चुनावी खालको मोर्चा पनि हुनसक्छ । पार्टी एकताका लागि संयोजन समिति पनि हुनसक्छ । केहि दिनभित्र हामी निष्कर्षमा पुग्छौं ।’

काठमाडौं । नेकपा माओवादी केन्द्रले २१ जनालाई पार्टीमा भित्र्याएको छ । पेरिसडाँडामा आयोजित एक कार्यक्रमका बीच अध्यक्ष पुष्पकमल दाहाल ‘प्रचण्ड’ उनीहरूलाई स्वागत गरे ।

पार्टी प्रवेश गर्नेमा जनता समाजवादी पार्टीका केन्द्रीय सदस्य टेकबहादुर शाक्यसहितका नेता-कार्यकर्ता छन् । अधिकांश जसपाका कार्यकर्ता रहेको माओवादी जनाएको छ ।

काठमाडौं । राष्ट्रियसभाको आजको बैठकमा नेकपा माओवादी केन्द्रका सांसद सुरेशकुमार आलेमगरले एमालेको अर्थ विभागमा रहेका एम अधिकारीको खोजी गरेका छन् ।

अहिले एम अधिकारी र खोटाङ एकदमै चर्चाको विषय र सबैको घरघरको कहानी भएको भन्दै ती व्यक्तिलाई चिनाउन उनले एमाले सांसदलाई आग्रह गरे ।

उनले एम अधिकारी गभर्नर महाप्रसाद अधिकारी नै भएको दाबी गर्दै एउटै व्यक्ति कुनै पार्टीको अर्थ विभागको सदस्य र गर्भनर हुन नसक्ने बताए ।

मगरले भने, ‘एमालेमा कुनै मान्छे लाग्न पाउँछ कि पाउँदैन ? बिल्कुल पाउँछ । कुनै व्यक्ति गभर्नर हुन पाउँछ कि पाउँदैन ? योग्यता र क्षमताका आधारमा हुन पाउँछ । तर, एउटै व्यक्ति दुवैतिर हुन पाउँदैन । त्यसैले यो व्यक्ति को हो भन्ने हामी जान्न चाहन्छौ । नेपाली जनता जान्छ चाहन्छन् । एमालेका साथीहरूले स्पष्ट पारिदिनुभयो भने राम्रो हुने थियो भन्ने सानो अनुरोध हो ।’

काठमाडौं । नेकपा माओवादी केन्द्रका सांसद गजेन्द्रबहादुर महतले एमालेको अर्थ विभागका सदस्य एम अधिकारीको खोजी गर्न सदनमार्फत सरकारको ध्यानाकर्षण गराएका छन् ।

प्रतिनिधिसभा बैठकको विशेष समयमा बोल्दै सरकार र प्रतिपक्ष कसैले पनि हराएका एम अधिकारी खोज्न पहल नगरेको भन्दै उनले सरकारको ध्यानाकर्षण गराएका हुन् ।

उनले भने, ‘कुखुराको चल्ला हराएपछि पनि खोजी हुन्थ्यो हाम्रो गाउँतिर । अब यहाँ सबैभन्दा ठूलो पार्टीको एउटा महत्वपूर्ण विभागको एउटा केन्द्रीय सदस्य हराउनुभएको छ । उहाँको खोजी न अहिले सरकार गर्छ, न प्रतिपक्ष गर्छ, मैले अनौठो मानिरहेको छु । अब सरकारले खोजीका लागि विद्यार्थीको जिम्मा लगाएको छ । प्रतिपक्ष आफ्नो महत्वपूर्ण सदस्य खोज्नुको साटो सीसी क्यामेरा खोज्दै हिँडेको छ । सीसी क्यामेरा खोज्ने एउटा समिति बनिसकेको छ तर, तेत्रो एउटा महत्वपूर्ण मान्छे हराएको छ त्यो मान्छे खोज्ने अहिलेसम्म कुनै समिति नै बनेको छैन । अब म कसलाई भन्नु ?’

‘हाम्रो गाउँघरतिर कस्तो हुन्छ भने कुनै थरको मान्छे, मानौं महत थरको मान्छे हरायो भने त्यो अरुको जिम्मा हुँदैन महत थरकै मान्छेले खोज्छन् । भोटमा हराए पनि, मधेसमा हराए पनि, काला पहाडमा हराए पनि, कहि बिरामी भए पनि, त्यसको अपुताली खाने जिम्मा पनि उनीहरूकै हुन्छ । हरायो भने त्यो खोज्ने जिम्मा महत थरकै हुन्छ । यहाँ एम अधिकारी हराएको हुनाले त्यो थरका मान्छेहरूले यो सरकारले नखाजे पनि, प्रतिपक्षले नखोजे पनि अब त्यो थर भएका मान्छेले एम अधिकारी खोज्नुपर्‍यो । महत थरको मान्छे हराएको भए म आफैँ खोज्ने थिए ।’

काठमाडौं । तीन दिने भारत भ्रमणबाट फर्केपश्चात त्रिभुवन अन्तर्राष्ट्रिय विमानस्थलमा पत्रकारसँग कुरा गर्दै गर्दा माओवादी केन्द्रका अध्यक्ष प्रचण्ड आवश्यकताभन्दा बढी प्रफुल्लित देखिन्थे । उनी भ्रमणबाट साँच्चै अति उत्साहित भएका हुन् वा तीन दिनको बसाइमा पनि भारतका प्रधानमन्त्री नरेन्द्र मोदीले भेट नदिएको लज्जा लुकाउन बनावटी खुशी देखाएका हुन् भन्ने चाहिँ स्पष्ट भएकाे छैन।

२० मिनेटभन्दा बढी पत्रकारसँग गफिएका प्रचण्डले यहाँ जहाज चढेदेखि फर्किएर जहाजबाट ओर्लिसम्मका एक–एक प्रसंग रिठ्ठो नबिराइ सुनाउने प्रयास गरे । कुन होटलमा खाएँ, कुन होटलमा सुतेँ भन्नेसम्म बताउन भ्याएका प्रचण्ड भ्रमण आफैंले सोचेभन्दा पनि फलदायी भएको बताए । तर, के फल प्राप्त गरे भन्ने चाहिँ खुलाएनन् ।

प्रचण्डले आफूलाई भारतले दिएको सम्मानको बयानमा लामो समय खर्चिएका थिए ।

‘एयरपोर्टबाट होटलमा जाने बेलामा भाजपा र सरकारको तर्फबाट जुन सम्मान र सुरक्षाको व्यवस्था गरियो, पहिले प्रधानमन्त्री भएर जाँदाभन्दा अहिल फरक लागेन । उस्तै उस्तै पाइयो,’ प्रचण्डले भने ।

भारतीय जनता पार्टीको कार्यालयमा जाँदा अझ भव्य सम्मान पाएको उनले बताए ।

केटाकेटीजसरी फुर्किँदै प्रचण्डले भने, ‘बडो भव्य स्वागत थियो त्यो । त्यहाँको सजावट हामीले सामान्य सोच्नेभन्दा बढी नै थियो । प्रधानमन्त्री मोदी, भाजपा अध्यक्ष जेपी नड्डा र मेरो फोटो राखिएका थिए । चारैतिर व्यानरहरु सजाइएको थियो ।’

प्रचण्डले भारतीय विदेशमन्त्री एस जयशंकरले आफूसँग भएको भेटबारे ट्विट गरेको विषयलाई ठूलै उपलब्धीजसरी चर्चा गरे ।

‘उहाँले मेरो भ्रमणबारे एकपल्ट होइन दुईपल्ट ट्विट गर्नुभएको छ,’ प्रचण्डले गर्व गर्दै सुनाए ।

भारतीय सुरक्षा सल्लाहकार अजित डोभलसँग डेढ–दुई घन्टा वान टु वान कुराकानी भएको उनले जानकारी दिए । डोभलसँगको भेटमा आफूले नेपाललाई भारतले बेच्ने तेल अलिकति सस्तो गरिदिन आग्रह गरेको प्रचण्डले बताए ।

‘मेरो भ्रमणका उपलब्धीहरु बिस्तारै देखिँदै जानेछन्, आजै तेलको मूल्य अलिकति सस्तो भएर आएको छ,’ प्रचण्डले डोभलसँग गरेको आग्रहकै कारण भारतले तेलको मूल्य घटाएर पठाएको घुमाउरो दावी गर्दै भने ।

प्रचण्डले सुनाएको अर्को रोचक सन्दर्भ थियो आरएएसको । उनले भाजपा र आरएसएसबीचको सम्वन्ध र अन्तर आफूले बुझ्ने अवसर पाएको भन्दै खुशी व्यक्त गरे । साथै, चिनिया कम्युनिष्ट पार्टीलाई उछिन्दै भाजपा विश्वकै सबैभन्दा ठूलो राजनीतिक दल बनेको आफूले यसै भ्रमणबाट थाहा पाएको उनले बताए ।

प्रचण्डले भने, ‘हामीले त ९ करोड सदस्य रहेको चिनीया कम्युनिष्ट पार्टीलाई विश्वको ठूलो मान्दै आएका थियौं । तर भाजपाले त १७ करोड सदस्य बनाइसकेको रहेछ,’ प्रचण्डले भने ।

प्रचण्डले यसपाली भारतीय मिडियाले पनि आफ्नो भ्रमणलाई उत्साहबर्द्धक तरिकाले कभर गरेको दावी गरे । तर, नेपालमा चाहिँ एउटा भारतीय अखबारले ‘गिडगिडाए प्रचण्ड’ भन्ने हेडलाइनमा प्रकाशित गरेको समाचार भाइरल भइरहेको छ ।

प्रचण्डले भारतीय प्रधानमन्त्री नरेन्द्र मोदीलाई भेट्न नपाएको प्रसंग निकै लाचार तरिकाले सुनाएका थिए । प्रचण्डका अनुसार मोदीलाई भेट्न भनेर होटलबाट हिँडिसकेपछि भेट्न सम्भव नरहेको खबर उनलाई आएको थियो ।

‘किन सम्भव भएन भन्ने मलाई जानकारी छैन,’ प्रचण्डले दयनीय हाँसो हास्दै भने, ‘तपाईंहरु जस्तो म पनि त्यस्तै ।’

उपलब्धी के ?

भारतीय प्रधानमन्त्रीलाई भेट्न नपाउँदा पनि प्रचण्डले आफ्नो भ्रमण सोचेभन्दा फलदायी र उपलब्धीपूर्ण बनेको दावी गरेका छन् । के हिसाबले फलदायी भयो त उनको भ्रमण ? त्यो फल उनले मात्रै पाउने हुन् ? उनको पार्टीले पाउने हो वा सिंगो देशले पाउने हो ?

देशले फल पाउने गरी प्रचण्डले यो भ्रमणबाट कुनै उपलब्धी हासिल गरेको जस्तो देखिँदैन । पार्टी र व्यक्तिगतरुपमा फल पाउने हुन् भने चाहिँ आगामी दिनहरुमा देखिन सक्छ ।

प्रचण्डको भारत भ्रमण नेपालको आगामी राजनीतिक दिशाबारे सेटिङ मिलाउनका लागि तय भएको चर्चा नेपालमा भइरहेको छ । केही मिडियामा प्रकाशित गसिप न्यूज अनुसार आगामी चुनावपछि प्रचण्ड र आरजु राणा आधा आधा कार्यकाल प्रधानमन्त्री र शेरबहादुर देउवा राष्ट्रपति बन्ने गरी भारतले सेटिङ मिलाउन खोज्दै छ रे । यद्यपि, यो अपुष्ट गसिप हो । आरजु पनि भारतमै भएको बेला प्रचण्ड त्यहाँ पुग्नु एउटा संयोग मात्रै हुन सक्छ । प्रचण्डले आरजु उपचारका लागि त्यहाँ बसेको बेला आफूले ‘कर्टसी’ का लागि मात्रै उनसँग भेटेको प्रष्टीकरण दिएका छन् ।

भ्रमणबाट प्रचण्डले के उपलब्धी हासिल गरे वा गरेनन् भन्नेमा देशको ठूलो चिन्ता होइन । तर, नेपालको एउटा भुतपूर्व प्रधानमन्त्री र सत्तारुढ दलको अध्यक्षले छिमेकी देश जाँदा त्यहाँको प्रधानमन्त्री भेट्नसमेत नपाउनु चाहिँ राष्ट्रिय लज्जा हो । यसले देशकाे हैसियत उदांगाे बनाइदिएकाे छ । भारतबाट एउटा सहसचिव नेपाल आउँदा पनि शीतलनिवसदेखि बालुवाटारसम्मका सबै द्वार एकैपटक खुल्ने गरेका छन् । नेताहरु लाइन लागेर उसलाई भेट्न होटल पुग्छन् । तर, नेपालको एउटा शीर्ष नेताले तीन दिन भारतमा बसेर पनि प्रधानमन्त्री भेट्न नपाइ फर्किएका छन् । र भन्दैछन्, गज्जबको सम्मान पाएँ ।

काठमाडौं । सत्तारुढ भारतीय जनता पार्टीको निम्तोमा दिल्ली पुगेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री नरेन्द्र मोदीलाई नभेटी स्वदेश फर्किने भएका छन् ।

भ्रमणका अन्तिम दिन आज आइतबार प्रचण्डले भारतीय जनता पार्टीका अध्यक्ष जेपी नड्डासँग भेटवार्ता गरेका थिए । मोदीसँग भेट हुने भनिए पनि अन्तिममा समय नमिलेको जानकारी आएपछि प्रचण्ड स्वदेश फर्किन लागेका हुन् ।

दिल्लीस्थित नेपाली दूतावास स्रोतले भन्यो, ‘यसअघि एकजना पूर्वप्रधानमन्त्री (झलनाथ खनाल) मोदीजीसँग भेट नहुने भएपछि विमानस्थलतर्फ जाँदै गर्दा बाटोमै खबर आएर फर्किएर भेट्नुभएको थियो । त्यस्तै कुनै आकस्मिक खबर आयो भने अलग कुरा हो नत्र प्रचण्डको भेट मोदीसँग नहुने भयो ।’

प्रचण्डले दिल्ली जाने क्रममा विमानस्थलमा पत्रकारहरूसँग कुरा गर्दा मोदीसँग पनि आफ्नो भेट हुने बताएका थिए । यसपटक उनले भारतीय सरकारको तर्फबाट विदेशमन्त्री एस जयशंकरसँगमात्र भेट पाएका छन् ।

मोदीका सुरक्षा सल्लाहकार अजित डोबालसँग पनि प्रचण्डको भेटवार्ता भएको छ । मोदीले प्रचण्डलाई किन भेट दिएनन् ? यसबारेमा केही जानकारी दिइएको छैन । आफ्नै पार्टीका अध्यक्षको निम्तोमा आएका पाहुनालाई उनले नभेट्दा बिजेपी नेताहरूले असहज महसुस गरेको बताइन्छ ।

काठमाडौं । भारत भ्रमणमा रहेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र भारतीय जनता पार्टी (भाजपा) का अध्यक्ष जेपी नाड्डाबीच भेटघाट भएको छ ।

दुई नेताबीच बीजेपी मुख्यालयमा भेट भएको हो । भेटमा भारतीय विदेशमन्त्री एस जयशंकर पनि सहभागी रहेको भारतीय सञ्चारमाध्यमले जनाएको छ ।

दाहाल-नाड्डाबीच दुई देशीय सम्बन्धबारे छलफल भएको छ ।

शुक्रबार दिल्ली पुगेका प्रचण्डले भाजपा विदेश विभाग प्रमुख विजय चौथाईवालेसँग भेटवार्ता गरेका थिए भने शनिबार विदेश मन्त्री एस जयशंकर र राष्ट्रिय सुरक्षा सल्लाहकार अजित डोभालसँग भेटवार्ता गरेका थिए ।

काठमाडौं । भारत भ्रमणमा रहेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आज भारतीय जनता पार्टीका अध्यक्ष जेपी नाडडासँग भेटवार्ता गर्ने छन् ।

भाजपा अध्यक्ष नाडडाको निमन्त्रणामा दिल्ली पुगेका प्रचण्डले सो अवसरमा भाजपा मुख्यालयको अवलोकनसमेत गर्नेछन् ।

गत शुक्रबार दिल्ली पुगेका प्रचण्डले भाजपा विदेश विभाग प्रमुख विजय चौथाईवालेसँग भेटवार्ता गरेका थिए भने शनिबार बिदेश मन्त्री एस जयशंकर र राष्ट्रिय सुरक्षा सल्लाहकार अजित डोभालसँग भेटवार्ता गरेका थिए । प्रचण्ड आजै स्वदेश फर्कने पूर्वनिर्धारित कार्यक्रम छ ।