Category: माओवादी केन्द्र

काठमाडौं । माओवादी विद्यार्थी संगठन अनेरास्ववियु क्रान्तिकारीले त्रिभुवन विश्वविद्यालयमा हुबहु दोहोरिएको प्रश्नपत्र छानबिनका लागि गठित समितिले आफ्नो प्रतिवेदन नबुझाएकोमा आपत्ति जनाएको छ ।

अनेरास्ववियु क्रान्तिकारी अध्यक्ष पञ्चा सिंहले विज्ञप्ति जारी गर्दै छानविनको नाममा दोषीलाई उन्मुक्ति दिन खोजिएको आरोप लगाएकी छन् ।

’एक महिना बितिसक्दा पनि हुबहु दोहोरिएको प्रश्नपत्र छानबिन गर्न गठित समितीले आफ्नो प्रतिवेदन सार्वजनिक गरेको छैन । कतै छानबिनको नाममा प्राविधिक त्रुटी भन्दै दोषीलाई भित्रभित्रै उन्मुक्ति दिने षड्यन्त्र भैरहेको त छैन ?’ अखिल क्रान्तिकारीले विज्ञप्तिमा भनेको छ, ’सत्य तथ्य बाहिर ल्याउन गठित समिति स्वयं कतै घटनालाई लुकाउने काम गरिरहेको त छैन ? आज छानबिन समितिमाथि नै छानबिन गर्नु पर्ने डरलाग्दो अवस्था निर्माण हुन थालेको देखिन्छ ।’

व्यवस्थापन संकायको प्रश्नपत्र दोहोरिएको घटना छानबिनका लागि बनाइएको छानबिन समितिको प्रतिवेदन सत्य तथ्यसहित तत्काल सार्वजनिक गर्न समेत अखिल क्रान्तिकारीले माग गरेको छ । ट्रान्स्कृप्ट, प्रोभिजनल, माईग्रेसनको लागि देशका विभिन्न क्याम्पसबाट फेरि पनि त्रिभुवन विश्वविधालय धाउन पर्ने अवस्था रहिरहे विश्वविद्यालयका विरुद्ध आन्दोलन गर्ने समेत उसले चेतावनी दिएको छ ।

यसअघि आफुहरुले बुझाएको १८ बुदे मागबारेपनि अखिल क्रान्तिकारीले ध्यानाकर्षण गराएको छ ।

यस्तो छ विज्ञप्तिः

काठमाडौं । माओवादी पार्टीबाट बाहिरिएको ७ वर्षपछि अन्ततः डा. बाबुराम भट्टराई माओवादीकै चुनाव चिन्हबाट आउने प्रतिनिधिसभा र प्रदेशसभाको चुनावमा भाग लिने निश्चित भएको छ ।

माओवादी अध्यक्ष प्रचण्डसँगको चरणबद्ध वार्तापछि एउटै चुनाव चिन्ह र घोषणापत्रबाट प्रतिनिधिसभा र प्रदेशसभाको निर्वाचनमा भाग लिने सहमति भएको छ । यसको औपचारिक घोषणा हुन बाँकी छ ।

बाबुराम नेतृत्वको नेपाल समाजवादी पार्टीले आँखा चिन्ह होल्ड गर्दै माओवादीकै गोलाकारभित्रको हसिया हथौडाबाट चुनाव लड्ने सहमति भएको छ । दुवै पार्टीको घोषणापत्र पनि एउटै हुनेछ ।

दुई पार्टी एक चुनाव चिन्हको मान्यताबाट अघि बढिने र निर्वाचन आयोगमा पनि सोही बमोजिम जानकारी गराइने भएको छ । योबाहेक सीट बाँडफाँटका बारेमा भने छलफल हुन बाँकी छ । नेसपा दल अलग्गै रहे पनि चुनाव चिन्ह भने माओवादीको कायम हुनेछ ।

यो सहमतिसँगै अब नेसपा सत्ता गठबन्धनको छैटौं घटक हुने निश्चित भएको छ ।

काठमाडौं । नेकपा माओवादी स्थायी कमिटी बैठक जारी छ । बैठक बिहान ९ बजेबाट पार्टी कार्यालय पेरिसडाँडामा सुरु भएको हो ।

बैठकमा पदाधिकारी चयन, स्थायी कमिटीलाई पूर्णता दिनेबारे विषयमा छलफल हुनेछ ।

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ आफ्नो पहिलो जापान भ्रमण सम्पन्न गरेर आज स्वदेश फर्किए । पार्टीनिकट जनप्रगतिशील मञ्चको निमन्त्रणमा गएका उनको यो भ्रमण अनौपचारिक थियो ।

प्रचण्डले जापानमा अधिकांश समय नेपाली समुदायसँगै बिताएका थिए । जनप्रगतिशील मञ्चले आयोजना गरेका विभिन्न अन्तरक्रियाहरूमा उनले भाग लिए । गैर आवासीय नेपालीले आयोजना गरेको नेपाल फेस्टिबलमा अतिथिका रूपमा सहभागी भए । दोस्रो विश्वयुद्धले ध्वस्त पारेर पुन निर्मित सहर हिरोसिमा पुगेर शान्ति संग्रहालय अवलोकन गरे । जापानी संसद्को भ्रमण गरे । उनकै शब्दमा जापानका चल्तापूर्जा सांसदसँग भेटघाट गरे ।

प्रचण्ड फर्किए लगत्तै उनको सचिवालयले एक विज्ञप्ति जारी गरी भ्रमणका विस्तृत जानकारी दिएको छ । जसअनुसार प्रचण्डले साइतमा एउटा नर्सरीको समेत अवलोकन गर्न भ्याएका थिए । विज्ञप्ति अनुसार उनको ‘उच्च तहको’ राजनीतिक भेटघाट चाहिँ त्यहाँको लिबरल डेमोक्रेटिक पार्टीका प्रभावशाली नेता तथा सांसद सदस्य मासाकी तायरासँग भएको थियो । तायराले जापानको संसद् भवन ‘डायट’ मा प्रचण्डलाई स्वागत गरेको विज्ञप्तिमा उल्लेख छ ।

प्रचण्डले सांसदभन्दा माथिको राजनीतिक नेतृत्वसँग भने भेटवार्ता गर्न पाएनन् । जापानको सरकार वा त्यहाँका कुनै संघ–संस्थाको आमन्त्रणमा नभएर त्यहाँ रहेका नेपालीहरूकै आमन्त्रणमा गएको हुँदा प्रचण्डको भ्रमणलाई जापानको सरकारले खासै नोटिसमा लिएको देखिएन । त्यहाँका सञ्चारमाध्यमले नेपालका पूर्व प्रधानमन्त्री आफ्नो देशमा आएको र गएको थाहै पाएनन् । नेपाल फर्केर प्रचण्डले जापानी सांसदसितको भेटलाई नै उपलब्धिका रूपमा प्रस्तुत गरेका छन् । ती सांसदसँग आफूले नेपालको फोहोर व्यवस्थापनदेखि विभिन्न विषयमा सहयोगका लागि आग्रह गरेको उनको भनाइ थियो ।

आफ्नो भ्रमणलाई नेपालको दूतावासले अत्यधिक महत्त्व दिएको भन्दै प्रचण्डले खुशी व्यक्त गरे । दूतावासले आफ्नो सम्मानमा हिजो राति दिएको रात्रीभोजलाई उनले भ्रमणको क्लाइमेक्स बताए । उक्त रात्रि भोजमा ३० जनजाति जापानीहरू पनि आएको प्रचण्डको भनाइ छ ।

नेपालभन्दा बाहिर विभिन्न देशमा नेपालका प्रमुख राजनीतिक पार्टीका प्रवासी संगठन छन् । उनीहरूले आफ्नो खर्चमा पार्टीका शीर्ष नेताहरूलाई सम्बन्धित देशमा भ्रमण गराउने नयाँ प्रचलन होइन । तर, देशको प्रधानमन्त्री भइसकेका नेताहरू पनि ‘फ्रि भिसा र टिकट’ पाएपछि रमाउँदै घुम्न जाने प्रवृत्ति चाहिँ गलत भएको कूटनीतिका जानकारहरू बताउँछन् । आफ्नो ओहदाको मर्यादा बिर्सेर हल्काफुल्का तवरबाट विदेश भ्रमण गर्दा देशकै प्रतिष्ठामा आँच आउन सक्ने उनीहरूको टिप्पणी छ ।

यसअघि प्रचण्ड छिमेकी देश भारत भ्रमणमा त्यहाँको सत्तारुढ दल भाजपाकै निमन्त्रणमा गएका थिए । तर, त्यहाँ तीन दिन बस्दा पनि भारतीय प्रधानमन्त्री नरेन्द्र मोदीलाई भेट्न समय पाउन सकेका थिएनन् । तर, पनि उनले आफूलाई भारतले बहालवाला प्रधानमन्त्रीजस्तै सम्मान गरेको भन्दै खुशी व्यक्त गरेका थिए । जापान भ्रमणमा त झन् उनले मन्त्री पनि भेट्न पाएनन् । विमानस्थलमा पनि प्रचण्डको स्वागतमा जापानी सरकारका कोही पनि प्रतिनिधि उपस्थित थिएनन् । कुनै उद्देश्य र एजेन्डाबिना घुम्नकै लागि आएका नेतालाई त्यहाँको सरकारले पुरै नजरअन्दाज गरेको देखियो ।

जापानमा रहेका माओवादी कार्यकर्ताले प्रचण्डलाई निम्त्याउनुको ठोस उद्देश्य पनि थिएन । मञ्चमा व्यक्तिहरूले भने प्रचण्डलाई रिझाउन विभिन्न कसरत गरेको देखियो । प्रचण्ड जापानमा घुम्दै गर्दा उनको एउटा फोटो सामाजिक सञ्जालमा भाइरल भयो । जसमा जनप्रगतिशील मञ्चका अध्यक्षले प्रचण्डको कोट हातमा बोकेर हिँडिरहेका थिए । नेताको चाकडी गर्ने झोले कार्यकर्ताको शैली नेपालीहरूले जापानमा पनि पुर्‍याएको भनेर सामाजिक सञ्जालमा टिप्पणी भयो ।

प्रचण्ड जापान पुगे लगत्तै उनले दिएको अभिव्यक्ति पनि उनको यो भ्रमणको अर्को हाइलाइट्स बन्यो । प्रचण्डले विमानस्थलमा बोल्दै हालै हत्या भएका जापानी पूर्व प्रधानमन्त्री सिञ्जो आवे नेपालमा आउँदा आफूले दुई–तीन पटक कुरा गरेको बताएका थिए । जबकि आवे नेपाल कहिल्यै आएका थिएनन् ।

प्रचण्डको जापान भ्रमणका सन्दर्भमा सचिवालयले जारी गरेको विज्ञप्ति यस्तो छ :

हाम्रो पार्टी नेपाल कम्युनिष्ट पार्टी (माओवादी केन्द्र)का अध्यक्ष तथा नेपाल सरकारका पूर्व प्रधानमन्त्री पुष्पकमल दाहाल प्रचण्डले यही २०७९ साउन २१ गतेदेखि २५ गतेसम्म जापानको भ्रमण सफलतापूर्वक सम्पन्न गर्नुभएको छ । उहाँ नेपाली जनप्रगतिशील मञ्च, जापानको निमन्त्रणामा जापानमा आयोजित विभिन्न कार्यक्रमहरूमा सहभागी बन्नुभएको थियो । अध्यक्ष कमरेड प्रचण्ड आफ्नो भ्रमण टोलीसहित राष्ट्रिय ध्वजावाहक नेपाल एयरलाइन्सको विमानमार्फत श्रावण २० गते राति जापान प्रस्थान गर्नुभएको थियो भने नेपाल एयरलाइन्सकै विमानमार्फत स्वदेश फर्किनु भएको छ ।

अध्यक्ष कमरेड प्रचण्डले जापान भ्रमणका क्रममा विभिन्न राजनीतिक तथा सामाजिक कार्यक्रममा सरिक हुनुका साथै कृषि, विज्ञान प्रविधि, पर्यटन प्रवर्द्धन, पुनर्निर्माण र पूर्वाधार विकासमा क्षेत्रमा जापानले गरेका प्रगति र विकासको अभिरुचिपूर्वक अवलोकन गर्नुभयो ।

१. २०७९ श्रावण २१ गते (अगष्ट ६, २०२२) को बिहान जापानको टोकियोस्थित नारिता विमानस्थलमा पत्रकारसँग संक्षिप्त कुरा गर्दै अध्यक्ष प्रचण्डले आफू नेपाली जनप्रगतिशील मञ्च जापानको निमन्त्रणा र कार्यक्रममा जापान आएको र जापान बसाइँको क्रममा जापानको विकास र समृद्धिलाई नजिकबाट अनुभूत गर्ने र केही राजनैतिक भेटघाटमा समेत सहभागी बन्ने बताउनु भयो । सोही दिन विमानमार्फत फुकुओका पुगेको अध्यक्ष कमरेडले पहिलो कार्यक्रमको रूपमा जापानको फुकुओकामा गैह्र आवासीय नेपालीद्वारा आयोजना भएको नेपाल फेष्टिबल सेरेमोनीमा सहभागी बन्नु भयो र प्रमुख अतिथिका रूपमा समारोहको समुद्घाटन गर्नुभयो । सोही दिन अध्यक्ष कमरेडले जापानको एक प्रमुख व्यापारिक शहर ओशाका पुगी नेपाली समुदायका अगुवाहरूसँग भेटवार्ता एवं कार्यक्रमलाई सम्बोधन गर्नुभएको थियो ।

२. २०७९ श्रावण २२ गते (अगष्ट ७, २०२२) का दिन बिहान अध्यक्ष कमरेडले दोस्रो विश्व युद्धमा आणविक बमले ध्वस्त पारिएको हिरोसिमा शहरमा अवस्थित शान्ति स्मृति संग्रहालयको अवलोकन गर्नुका साथै युद्ध पछिको पुनर्निर्माणका बारेमा जानकारी लिनुभयो । सोही दिन साँझ नेपाली जनप्रगतिशील मञ्च, जापानले टोकियोमा आयोजना गरिएको ‘समृद्ध नेपालको आधार, आर्थिक क्रान्तिमा प्रवासी नेपालीको सरोकार’ विषयक अन्तर्क्रिया कार्यक्रमलाई प्रमुख अतिथिको रूपमा सम्बोधन गर्नुभयो ।

३. २०७९ श्रावण २३ गते (अगष्ट ८, २०२२) का दिन बिहान अध्यक्ष कमरेड प्रचण्डले साइतमा प्रान्तीय सरकारको कृषि व्यवसाय प्रवर्द्धन विभाग अन्तर्गतको कुरौसु अर्किड लिमिटेडको अर्किड नर्सरी अवलोकन गर्नुभयो । सो अवसरमा उहाँले कृषिलाई आधुनिकीकरण, वैज्ञानिकीकरण, यान्त्रिकीकरण र व्यवसायीकरण गर्दै नेपाली अर्थतन्त्रलाई सबल बनाउन आवश्यक भएको बताउनुभयो । अध्यक्षले त्यसका लागि कृषिमा आधारित उद्योगहरूको प्रवर्द्धन र विकास गर्न जापानको वैज्ञानिक र आधुनिक प्रविधिको अनुशरण गर्न चाहेको बताउनुभयो । उक्त अवलोकन भ्रमणमा जापानका लागि नवनियुक्त नेपाली राजदूत दुर्गाबहादुर सुबेदीको पनि उपस्थिति रहेको थियो ।

सोही दिन दिउँसो जापान भ्रमणमा रहनुभएका अध्यक्ष प्रचण्डले जापानी संसद् ‘डायट’ को अवलोकन गर्नुका साथै जापानी संसदीय प्रणालीको विशेषता र राजनीतिक दलहरूको स्थितिको जानकारी लिनुभयो । ‘डायट’ मा सत्तारुढ दल लिबरल डेमोक्रेटिक पार्टीका प्रभावशाली नेता तथा सांसद सदस्य मासाकी तायराले अध्यक्ष कमरेडको स्वागत गर्नुको साथै संसद्को अवलोकन गराउनुभयो ।

सोही दिन बेलुका अध्यक्ष कमरेडले नेपाली जनप्रगतिशील मञ्च, जापानका अगुवा कार्यकर्ताहरूसँग छलफल तथा अन्तर्संवाद गर्नुभयो । अध्यक्ष प्रचण्डले प्रवासी नेपालीहरूको श्रम, सीप र पूँजीलाई देश निर्माणमा खर्चिन सरकार एवं पार्टीको तर्फबाट आवश्यक वातावरण निर्माण गरिने बताउँदै त्यसको लागि तयार रहन आव्हान गर्नुभयो ।

४. २०७९ श्रावण २४ गते (अगष्ट ९, २०२२) का दिन बिहान अध्यक्ष कमरेड प्रचण्डले नेशनल इन्स्टिच्यूट अफ इम्फरमेशन एण्ड कम्युनिकेशन टेक्नोलोजी को अवलोकन भ्रमण गर्नुभयो । जापान सरकारको पूर्ण स्वामित्वमा रहेको उक्त अनुसन्धान केन्द्रको भ्रमणको क्रममा अध्यक्ष कमरेडले विभिन्न विद्याका विषय विज्ञ, डाक्टरहरू तथा अनुसन्धानकर्ताहरूको टिमबाट जापान सरकारले विज्ञान प्रविधि र सूचना प्रविधिका क्षेत्रमा गरेको अत्याधुनिक विकासको बारेमा जानकारी लिनुका साथै दुई देशका बीचमा विकसित प्रविधिको आदानप्रदानका विषयमा छलफल पनि गर्नुभयो । सोही दिन दिउँसो नेपाली समुदायद्वारा राजधानी टोकियोमा सञ्चालित नेपाली विद्यालयहरू एभरेष्ट इन्टरनेशनल स्कूल र हिमालय इन्टरनेशनल स्कूलका कार्यक्रममा सहभागी हुनुभयो । नेपाली समुदायले विदेशमा रहेर पनि शिक्षाको माध्यमबाट नेपाली भाषा र संस्कृतिको जगेर्ना गर्नुको साथै नयाँ पुस्तालाई नेपालको राष्ट्रिय भावना जागृत गर्न योगदान गरेको भन्दै प्रशंसा गर्नुभयो ।

सोही दिन अपराह्न ४ बजे अध्यक्ष कमरेड प्रचण्ड र लिबरल डेमोक्रेटिक पार्टी जापानका पूर्व महासचिव, वरिष्ठ नेता, पूर्व अर्थ, व्यापार र उद्योग मन्त्री संसद् सदस्य एवं नेपाल(जापान संसदीय समितिका सभापति तोसिहिरो निकाइ बीच एलडिपि हेडक्वाटर टोकियोमा भेटवार्ता भयो । प्रतिनिधि मण्डल स्तरीय भेटवार्ताका क्रममा दुई देशबीचको आपसी सम्बन्धलाई अझ सुदृढ गर्न उच्च तहका भ्रमणहरूको आदानप्रदान गर्ने, जनस्तरको सम्बन्धलाई विस्तार गर्ने, स्थानीय सरकार र नगरहरूको बीचमा भगिनी सम्बन्ध स्थापना गर्ने, नेपालको कृषि, पर्यटन, जलविद्युत, पूर्वाधार निर्माण लगायतका क्षेत्रमा जापान सरकारको सहयोगलाई अझ विस्तार गर्दै जाने लगायतका विषयमा छलफल भएको थियो । उक्त भेटवार्ताले नेपाल(जापान सम्बन्धलाई थप मजबुत बनाउन र दुई देश बीचको राजनीतिक तथा कूटनैतिक तहमा हुने संवादलाई विकसित गर्न मद्दत पुर्‍याएको छ । उक्त भेटवार्तामा नेता निकाईले अरू थप ३ जना सांसद सदस्यहरूको प्रतिनिधिमण्डलको नेतृत्व गर्नुभएको थियो भने अध्यक्ष कमरेड प्रचण्डको प्रतिनिधिमण्डलमा जापानका लागि नवनियुक्ति नेपाली राजदूत दुर्गाबहादुर सुवेदी पनि सहभागी बन्नुभएको थियो ।

साँझ टोकियोस्थित नेपाली दूतावासले उहाँको सम्मानमा आयोजित रात्रीभोजमा सरिक भई जापानका राजनीतिक नेताहरू, कूटनीतिज्ञ, प्रशासकहरू र समाजका विभिन्न क्षेत्रका अगुवाहरु, नेपाली समुदायका अगुवा प्रतिनिधिहरू सम्मिलित कार्यक्रमलाई सम्बोधन गर्नुभयो । नेपाल र जापान बीचको ऐतिहासिक एवं सांस्कृतिक सम्बन्धको चर्चा गर्दै भूकम्प पछिको पुनर्निर्माण, कोभिड नियन्त्रण लगायत नेपालको विकासमा जापानले गरेको सहयोग प्रति आभार प्रकट गर्नुभयो । र, आगामी दिनमा नेपालका प्राथमिकतामा जापान सरकारको सहयोगका लागि आव्हान गर्नुभयो ।

सोही दिन राती नेपाली समुदायका र जापानी पत्रकार समेतको आयोजनामा भएको पत्रकार भेटघाट कार्यक्रममा अध्यक्ष कमरेड सहभागी हुनुभयो । पत्रकारहरूको प्रश्नको जवाफ दिदैं अध्यक्ष कमरेडले आफ्नो जापान भ्रमणबाट सन्तुष्ट भएको, भ्रमण सफल रहेको र आफूले जापानबाट केही सिकाई र ऊर्जा लिएर फर्किन थालेको बताउनु भयो ।

५. २०७९ श्रावण २५ गते (अगष्ट १०, २०२२) का दिन बिहान अध्यक्ष कमरेड प्रचण्डले टोकियोस्थित नेपाली दूतावासको अवलोकन गर्नुभयो । सो क्रममा राजदूत दुर्गाबहादुर सुवेदीले दूतावासले गरिरहेका कामको चर्चा गर्दै जनसेवाका लागि स्थान तथा जनशक्ति अभाव जस्ता दूतावासले भोगिरहेका समस्याहरू बारे जानकारी गराउनुभयो । पूर्व प्रधानमन्त्री तथा सत्तारुढ दलको प्रमुख नेता हुनुको नाताले समस्या समाधानको लागि आशावादी रहेको निवेदन गर्नुभयो भने अध्यक्ष कमरेडले जापानमा बस्ने नेपालीहरूको समस्या समाधानमा तदारुकताका साथ लागिपर्न निर्देशन गर्दै आफू काठमाडौं फर्किएपछि प्रधानमन्त्री तथा सम्बन्धित विभागीय मन्त्रीसँग समस्या समाधानका निम्ति छलफल गर्ने बताउनुभयो ।

अध्यक्ष कमरेड प्रचण्ड आफ्नो पाँच दिने जापान भ्रमण सफलतापूर्वक पुरा गरी स्वदेश फर्किनुभएको छ । भ्रमण सफलताका लागि सहयोग पुर्‍याउनु हुने हाम्रो पार्टीका नेता, कार्यकर्ता तथा शुभेच्छुकहरु, लिबरल डेमोक्रेटिक पार्टी जापान तथा जापानका राजनैतिक दलका माननीय ज्यूहरू, नेपाल सरकारको राजनैतिक तथा प्रशासनिक नेतृत्व, परराष्ट्र मन्त्रालय, जापानका लागि नेपाली राजदूत तथा दूतावास परिवार, नेपाली जनप्रगतिशील मञ्च जापानका सम्पुर्ण नेता कार्यकर्ता साथीहरू, जापानमा रहनुहुने सम्पुर्ण नेपाली समुदायका अगुवा तथा शुभेच्छुकहरु, नेपाल, जापान तथा विश्वभर रहेर खबर सम्प्रेषण गर्ने पत्रकार मित्रहरू, नेपाल र नेपालीको भलाई चाहने मित्रहरू तथा सम्पुर्ण देशभक्त नेपाली दिदीबहिनी तथा दाजुभाईहरुमा हार्दिक आभार तथा धन्यवाद व्यक्त गर्दछौँ ।

-प्रचण्डको सचिवालय

हेटौँडा । शिक्षा विज्ञान तथा प्रविधि मन्त्री देबेन्द्र पौडेलले नेकपा माओवादी केन्द्र वामपन्थीमध्येको पहिलो पार्टी बन्ने दाबी गरेका छन् ।

पार्टीको स्थायी कमिटी सदस्यसमेत रहेका मन्त्री पौडेलले आगामी मंसिर ४ गते हुने संघ तथा प्रदेशको निर्वाचनपछि माओवादीले देशको वामपन्थी पार्टीहरुको लिड गर्ने दाबी गरे ।

प्रेस सेन्ट मकवानपुर समन्वय समितिले आज हेटौँडामा गरेको पत्रकार सम्मेलनमा बोल्दै मन्त्री पौडेलले यो पटक माओवादी वर्तमान गठबन्धनबाटै निर्वाचनमा होमिने बताए ।

एमालेसँगको गठबन्धनबारे अहिलेसम्म औपचारिक कुराकानी नभएको भन्दै उनले निर्वाचन मिति घोषणा भइसकेको सन्र्दभमा नयाँ गठवन्धन बनाउने काम तिर नलाग्ने, वर्तमान गठबन्धनमा नै समावेश भएर निर्वाचन लड्ने उनको भनाई छ ।

यो गठबन्धन “सिस्टम” निर्माणको लागि बनेको भन्दै उनले भने ‘हामीलाई सत्ताको लागि गठवन्धन बनायो भन्ने आरोप छ, तर यो गठबन्धन सिस्टम निर्माणको लागि हो, तसर्थ तीन तहको नयाँ सरकार स्थापना नभै टुट्ने कुरै भएन् ।’

मन्त्री पौडेलले अहिलेको सरकारलाई परमादेश भन्ने एमालेको धारणा गलत रहेको बताए । उनले भने ‘उसो भए त नेकपा एमाले र माओवादी केन्द्र पनि त अदालतको आदेशबाट पुनःस्थापित भएका हुन् नि, एमाले र माओवादी पनि परमादेशबाट बनेको पार्टी हो ।’

अहिले समाजवादी केन्द्र बन्ने सम्भावना धेरै नरहेको भन्दै पौडेलले समाजवादी केन्द्र बन्ने कुरा सोच राम्रो भएपनि व्यवहारमा उतार्न समस्या रहेको उल्लेख गरे । विचार नमिलेसम्म एकता हुँदा नेकपाको हालत हुने भएकोले हतार गरिहाल्ने पक्षमा माओवादी केन्द्र नरहेको उनले बताए ।

आगामी मंसिर ४ गते हुने निर्वाचनलाई भयरहित तथा शान्तिपूर्ण ढंगबाट सञ्चालन गर्न सरकार लागिपरेको भन्दै उनले निर्वाचनका कामहरु अघि बढिसकेको दाबी गरे । निर्वाचनलाई केन्द्रमा राखेर सरकारले गतिविधिहरु अघि बढाईसकेको भन्दै मन्त्री पौडेलले सरकारको यो महत्वपूर्ण जिम्मेवारीलाई विवादरहित गहन ढंगबाट पुरा गर्ने बताए ।

त्यस्तै, उनले फरक प्रसंगमा नेपालको शिक्षा क्षेत्रको क्रान्तिकारी परिवर्तनको लागि सरकारले आवश्यक काम गरिरहेको भन्दै मन्त्री पौडेलले शिक्षालाई सिप र रोजगारसँग जोडने गरि काम भैरहेको जानकारी दिए । उच्च शिक्षा हाँसिल गर्न भर्ना हुनपूर्व कम्तीमा ३ महिनाको इन्र्टन कक्षाको व्यवस्था गर्ने काम सुरुवात गरिने उनको भनाई थियो ।

काठमाडौं । नेकपा माओवादी केन्द्रका प्रमुख सचेतक देव गुरुङले प्रतिनिधिसभाको कार्यकाल पाँचवर्ष पुग्नुअगावै हुन लागेको निर्वाचन कार्यतालिकाका लागि ऐन आवश्यक रहेको टिप्पणी गरेका छन् ।

प्रतिनिधिसभाको आजको बैठकअन्तर्गत शून्य समयमा बोल्दै उनले यस्तो बताएका हुन् ।

‘निर्वाचन घोषणा गर्ने अधिकार सरकारलाई छ । तर, प्रतिनिधिसभाको कार्यकाल पाँच वर्ष धारा ८५ (१) ले भनेको छ । सर्वोच्च अदालतको पाँच वर्ष घटाउन नहुने भनेको छ,’ उनले भने, ‘यो मध्यावधि निर्वाचन पनि होइन । ७६ (५) को सरकार विफल भएको पनि होइन । त्यसकारण निर्वाचन कार्यतालिकासम्बन्धी बिषयमा एउटा ऐन जरुरी पर्छ ।’

यस्तै प्रतिनिधिसभाको कार्यावधिको विषयमा पनि अर्को ऐन जरुरी रहेको उनले बताए ।

उनले भने, ‘प्रतिनिधिसभा परिवर्तनको परिकल्पना गरेको छ, रिक्तताको परिकल्पना गरेको छैन । रिक्तताको अवस्थामा मुलुकमा गम्भिर स्थिति पैदा गर्नसक्छ । त्यसकारण सरकारले तत्काल ऐन ल्याओस् ।’

लमही । नेकपा माओवादी केन्द्रका उपाध्यक्ष एवं प्रवक्ता कृष्णबहादुर महराले समाजवादी केन्द्रको नेतृत्व र विचार माओवादी नै भएकाले आगामी चुनावमा जनमत सुधारका लागि लाग्न कार्यकर्तालाई निर्देशन दिएका छन् ।

लुम्बिनी प्रदेश कमिटीको बैठकमा अगुवा कार्यकर्तालाई निर्देशन दिँदै महराले भने, ‘यदि हामी पार्टी बनाउन चाहन्छौं भने जनतामाझ जाऔँ, जनतालाई सधैँ प्राथमिकता दिएर अगाडि बढौँ, जनताको बीचमा गएर पार्टीलाई सुधार गरौँ ।’

जनतलाई सरकार कसको भन्ने विषय नभई कुन पार्टीले के कार्यक्रम ल्यायो भन्ने अर्थ महत्वपूर्ण हुने बताए ।

अध्यक्ष प्रचण्ड जापानबाट फर्केपछि स्थायी समितिको बैठक बसेर छिट्टै पदाधीकारीको टुंगो लगाउने पनि उनले जानकारी दिए ।

काठमाडौं । नेकपा माओवादी केन्द्रकी सांसद अन्जना विशंखेले हरुवाचरुवा र कमलरीको समस्या तत्काल समाधान गर्न सरकारसँग माग गरेकी छन् ।

मंगलबार प्रतिनिधिसभा बैठकको शून्य समयमा बोल्दै सांसद विशंखेले संविधानले उनीहरूको जमिनको सुनिश्चितता गरे पनि त्यसअनुसारको व्यवस्था सरकारले अझै नगरेकोमा बताइन् ।

सांसद विशंखेले उनीहरूको पुनःस्थापनाको व्यवस्था गर्न ढिलाइ नगर्नसमेत सरकारको ध्यानाकर्षण गराएकी छन् ।

उनले भनिन्, ‘नेपालको संविधानको धारा ४० अन्तर्गत भूमि र जमिनको व्यवस्था सुनिश्चित गर्ने भन्दाभन्दै पनि तराईमा हरुवाचरुवा र मधेसमा हलियाको समस्या अझै समाधान भएको छैन । समस्या समाधानका लागि गठित समितिले अझै काम गर्न सकेको छैन, समस्या समाधान होस् ।’

रुपन्देही । नेकपा माओवादी केन्द्र लुम्बिनी प्रदेश कमिटीको तेसो पूर्ण बैठक दाङको लमहीमा सुरू भएको छ ।

नयाँ केन्द्रीय कमिटीको जिम्मेवारीपछि बसेको पहिलो बैठकमा आगामी चुनावी रणनीतिका बारेमा छलफल हुने नेताहरूले बताएका छन् । बैठकमा प्रदेश कमिटीका सदस्य, लुम्बिनीबा केन्द्रमा प्रतिनिधित्व गरेका प्रभावशाली नेतासहित पाँच सयभन्दा बढी सहभागी छन् ।

प्रदेश कमिटी सचिव कृष्ण घिमिरे ‘प्रकाश’ स्थानीय निर्वाचनको समीक्षा, मंसिर ४ को चुनावको रणनीति र कार्ययोजनामा केन्द्रित हुने बताउँछन् ।

बैठकमा नेता कृष्णबहादुर महरा, स्थायी कमिटी सदस्य तथा पूर्वमन्त्री चन्द्रप्रकाश खनाल ‘बलदेव’ आइसकेका छन् । वर्षमान पुन र ओनसरी घर्तीलगायत सहभागी हुने आयोजकले बताएको छ ।

काठमाडौं । नेकपा माओवादी केन्द्रका पुष्पकमल दाहाल प्रचण्डले रोजगारीका लागि विदेशमा रहेका नेपालीहरु अझै स्वदेश फर्कने बेला नभएको बताएका छन् ।

जनप्रगतिशिल जापानले टोकियोमा आयोजना गरेको अन्तरक्रिया कार्यक्रममा बोल्दै प्रचण्डले देशमा अझै राजनीतिक स्थायित्व कायम नभएकाले विदेशमा रहेका नेपालीहरु अझै स्वदेश फर्कने बेला नभएको बताएका हुन् ।

‘म तपाइहरु समक्ष म इमान्दारपूर्वक भन्न चाहन्न्छु, तपाइहरु अझै स्वदेश फर्कने बेला भएको छैन’, प्रचण्डले भने, ’केही समय पर्खिनुहोस्, हामी राजनीतिक स्थायित्व कायम गर्नेतर्फ अग्रसर भएका छौँ, तपाइहरुलाइ स्वदेश फर्कने वातावरण मिलाउदैछौँ ।’

काठमाडौं । जापान भ्रमणमा रहेका पूर्वप्रधानमन्त्री पुष्पकमल दाहाल प्रचण्डले आज एक कार्यक्रमममा आफ्नो भ्रमणका रोचक अनुभवहरु सेयर गरेका छन् । जापानमा बस्ने प्रवासी नेपालीहरुसँगको अन्तरक्रियालाई सम्बाेधन गर्दै उनले बुलेट ट्रेन चढेदेखि हिरोसिमा भ्रमणसम्मका अनुभव सुनाएका हुन् ।

आफूले जापानलाई एकदमै सिस्टममा चल्ने देशका रुपमा चिनेको प्रचण्डले बताए ।

उनले भने, ‘यहाँ मैले धेरैपटक बुलेट ट्रेन चढ्ने अवसर पनि पाएँ । ट्रेन १० बजेर ९ मिनेटमा आउँछ भन्थे ठ्याक्कै १० बजेर ९ मिनेटमा नै आयो । १२ बजेर कति मिनेटमा पुग्छ भनेकोमा ठ्याक्कै त्यतिमै पुग्यो ।’

प्रचण्डले ट्रेनमा बस्दाको अनुभव पनि सुनाए ।

‘ट्रेनमा बस्दा जापानी नागरिक, बुद्धिजिवी कोही बोल्दैनन् । बडो शान्तसँग बसिराख्या हुन्छन् । हामी नेपाली बोलिराख्या हुन्छम् । अलि चर्कोचर्कै बोल्छौं ।’
त्यसपछि प्रचण्डले दोस्रो विश्वयुद्धमा ध्वस्त भएको शहर हिरोसिमा भ्रमणको अनुभव यसरी सुनाए ।

‘मैले आज हिरोसिमा गएर सबै म्युजियमदेखि बम हानेपछिको भग्नावशेष हेरेँ । मेरो मनमा थियो, त्यो कुरा मैले साथीहरुलाई सोधेँ । यत्रो दुर्घटना, यत्रो हत्या, यत्रो विध्वस्त हुँदा त विध्वंस गर्नेहरुप्रति जापानीको मनमा के होला मनोभावना भनेर मैले धेरैलाई सोधेँ । धेरैले एउटै उत्तर दिनुभयो, जापानीहरुमा कुनै विद्वैष छैन । त्यो बेलाको परिस्थिति त्यस्तै थियो । तर, अब हामीले मिहिनेत गरेर विकासमा केन्द्रीत हुनुपर्छ भन्ने खालको सोच छ भनेर बताइयो । तपाईंहरु त्यस्तो देशका त्यस्ता जनतासँगको संसर्गमा हुनुहुन्छ ।’

काठमाडौं । नेकपा माओवादी केन्द्रका पुष्पकमल दाहाल प्रचण्डले चुनावमा जसले जति सिट जिते पनि त्यो माओवादी आन्दोलनको जित हुने बताएका छन् ।

जनप्रगतिशील जापानले जापानको टोकियोमा आयोजना गरेको अन्तरक्रिया कार्यक्रममा बोल्दै प्रचण्डले कांग्रेस एमाले जसले जति सिट जिते पनि माओवादी आन्दोलनले जितेको महसुस हुने बताएका हुन् ।

‘जसले जति सिट जिते पनि हामीले ल्याएको गणतन्त्रले जित्ने हो, माओवादी आन्दोलनले जित्ने हो’ उनले भने ‘त्यसैले कसले कति सिट जित्यो त्यो ठुलो कुरा होइन ।’

काठमाडौं । नेकपा माओवादी केन्द्रका अध्यक्ष प्रचण्डले जापान सबैको प्रेरणाको स्रोत भएको बताएका छन् ।

आज बिहान जापानको टोकियोस्थित नारिता अन्तर्राष्ट्रिय विमानस्थलमा अवतरण गरेका उनले पत्रकारसँग कुराकानी गर्दै यस्तो बताएका हुन् ।

उनले जापानको आइटीको स्थिति के  छ भन्नेमा रुची रहेको बताए ।

‘जापान हामी सबैको प्रेरणाको स्रोत हो । जसरी युद्धबाट प्रभावित भएको देश आफनै मेहेनतले यति माथि आउन सक्दो रहेछ भन्ने उदाहरण जापान भएको हुनाले यो प्रेरणा लिनु पनि हो जापान आउनुको कारण हौ । उ

नले पूर्वप्रधानमन्त्री शिन्जो आवेलाई भेट्ने इच्छा पुरा नभएको भन्दै दुखी भए । उनले भने,‘ म जापान आउने निर्णय भइसकेपछि मेरो इच्छा के थियो जापानका पूर्व प्रधानमन्त्री शिन्जो आवेलाई भेट्ने भनेर मिलाउने कोशिस गर्दै थिए । उहाँलाई भेटेर नेपाल र जापानको सम्बन्धलाई अर्को उचाइमा कसरी लाने भन्ने थियो । त्यो पूरा भएन । ‘

उनले विकासमा जापानको आइटीको स्थिति के भन्नेमा रुची रहेको बताए । नेतृत्वले इमानदार प्रयास गर्यो भने विकास सम्भव हुने बताए ।

पोखरा । अखिल(क्रान्तिकारी) अध्यक्ष पञ्चा सि‌ंहले मंसिरको निर्वाचनपछि माओवादी मुलुकको पहिलो शक्ति बन्ने दाबी गरेकी छन् ।

अखिल (क्रान्तिकारी) गण्डकी प्रदेश समितिको शपथ ग्रहण तथा ३ महिने अभियान उद्घाटन कार्यक्रमलाई सम्बोधन गर्ने क्रममा माओवादी (केन्द्र)को केन्द्रिय कमिटी सदस्य समेत रहेकी नेतृ सिंहले यस्तो दाबी गरेकी हुन् ।

मंसिरको निर्वाचनपछि गठबन्धन बाहिरका शक्ति मुलुकभर टर्च बालेर खोज्नुपर्ने अवस्था आउन सक्ने र गठबन्धनको दोस्रो ठूलो शक्तिको रुपमा माओवादी नै मुलुकको पहिलो कम्युनिष्ट शक्ति हुने अध्यक्ष सिंहको जिकिर थियो ।

तीन महिने अभियान सञ्चालन गरेको अखिल(क्रान्तिकारी)ले सुदुरपश्चिम, लुम्बिनि, कर्णाली, सहित एक नम्बर प्रदेशमा भेला सकिसकेको र बागमति प्रदेश र मधेश प्रदेकका भेला र कार्यक्रमहरु साउनमहिना भित्र सम्पन्न हुने अखिल(क्रान्तिकारी)का महासचिव दिपेश पुनले जानकारी दिए ।

काठमाडौं । अर्थमन्त्रालयमा जनार्दन शर्माको कमब्याक उनको इगोको लागि हो कि, वित्तीय गठबन्धनको रूपमा परिणत भइरहेको सत्ता साझेदार दलका शीर्ष नेताहरूको ‘आर्थिक स्वार्थको बिगो’ का लागि हो ? माओवादीकै नेताहरूसमेत रनभुल्लमा परेका छन् ।

शर्मामाथि छानबिन गर्न गठित संसदीय विशेष समितिका सदस्यसमेत रहेका माओवादी नेता शक्ति बस्नेतले अध्यक्ष प्रचण्डलाई भेटेरै जनार्दनलाई पुनः अर्थमन्त्रीको जिम्मेवारीमा फर्काइनु कुनै पनि बेला आत्मघाती हुने भन्दै त्यस्तो गल्ती नगर्न सुझाव दिएका थिए ।

माओवादीका एक शीर्षस्थ नेताका अनुसार बस्नेतले संसदीय छानबिन समितिले पाउन नसकेको जेठ १४ गते मध्यरातको सीसीटीभी फुटेज कतिपय दूतावास र शक्तिकेन्द्रमा पुगेको आशंका गर्दै चुनावको मुखमा वा माओवादीलाई अप्ठेरो पार्नका लागि कुनै पनि बेला सार्वजनिक गरिन सक्ने आशंकासमेत प्रचण्डसमक्ष व्यक्त गरेका थिए ।

ती नेताले भने, ‘शक्तिजीले प्रचण्डसँग जनार्दनजीलाई अर्थमन्त्रीमा नफर्काउन सुझाव दिने क्रममा कतिपय महत्वपूर्ण सूचनासमेत दिनुभएको थियो । चुनावको मुखमा वा कुनै पनि बेला त्यसरातको सीसीटीभी फुटेज सार्वजनिक हुँदा प्रधानमन्त्रीले समेत पद त्याग्नुपर्ने अवस्था आउन सक्ने भने पनि प्रचण्डसमेत अदृष्य शक्तिको दबाबमा परेको बुझियो । कतिपय महत्वपूर्ण नीतिगत निर्णय जनार्दनबाटै गराउन बालुवाटारलगायत शक्तिहरू लागे ।

संसदीय समितिले नपाएको फुटेज र कतिपय ‘एभिडेन्स’ हरू शक्तिकेन्द्रमा पुगेको र कुनै पनि बेला ती सार्वजनिक हुने सम्भावना रहेको संसदीय समितिमा रहेका माओवादीकै सदस्यहरूको ठम्याइ छ । समितिले जनार्दनलाई क्लिन चिट दिएको नभई बाहिरी व्यक्तिको बजेट निर्माणमा संलग्नताको फुटेज नभेटिएको मात्र भनेको उनीहरूको भनाइ छ ।

पुनः अर्थमन्त्री बनेपछि बधाई दिन फोन गर्ने र भेट्ने कतिपय व्यापारिक घरानाका व्यक्तिहरूसँग उनले आफू बढीमा एक सातामात्र अर्थमन्त्रालययमा रहने बताएका छन् ।

‘अध्यक्षले शक्तिको कुरा पनि सुन्नुभयो तर जनार्दनलाई फर्काउनै पर्ने बाध्यतामा देखिनुभयो । माओवादीविरुद्ध कुनै पनि बेला प्रयोग गर्नका लागि शक्ति केन्द्रहरुले प्रमाण राखेको आशंका छ’ माओवादीका एक स्थायी कमिटी सदस्यले नेपाल प्रेससँग भने ‘सायद चुनावकै अगाडि गर्नैपर्ने कतिपय नीतिगत निर्णय होलान्, आर्थिक लाभको विषयमा बालुवाटार र खुमलटारबीच गहिरो सम्बन्ध देखियो ।

अर्थमन्त्री शर्मा दलाल पुँजिवादको चक्रव्यूहमा फसेको र बजेट निर्माणमा नीतिगत तहबाटै ठूलो कैफियत भएकाले संसदीय समितिको राजनीतिक प्रतिवेदनकै आधारमा जोखिम नलिन शक्तिले प्रचण्डलाई सुझाव दिएको माओवादी नेताहरू बताउँछन् । जनार्दन कुनै पनि बेला यो प्रकरणमा फस्न सक्ने र अरु धेरै प्रमाण सार्वजनिक हुन सक्ने आशंका समितिमा सदस्य बसेका माओवादी नेताहरूको छ ।

एक सातामा राजीनामा ?

अर्थमन्त्रीका रूपमा दोस्रोपटक सपथ लिएर आइतबार मन्त्रालयमा पुग्दा उनको स्वागतमा सचिव मधु मरासिनी थिएनन् । शर्मा स्वयं पनि खुसी देखिएका थिएनन् भने उनले जुन अभियोग लागेर आफूले राजीनामा दिएका थिए त्यसबारेमा केही बोलेनन् । उनले औपचारिकताका लागि मन्त्रालयका कर्मचारीले तयार पारेको एउटा फाइल सदर गरेका थिए ।

पुनः अर्थमन्त्री बनेपछि बधाई दिन फोन गर्ने र भेट्ने कतिपय व्यापारिक घरानाका व्यक्तिहरूसँग उनले आफू बढीमा एक सातामात्र अर्थमन्त्रालययमा रहने बताएका छन् । शर्मासँग व्यवसायिक कामले भेट्न खोजेका एक व्यवसायिक घरानाका सदस्यसँग फोनमा कुरा गर्दा उनले आफूले कुनै निर्णय नगर्ने बताएका थिए ।

स्रोतले भन्यो, ‘मन्त्रीज्यूसँग भेटेर कुरा गरौं भन्दा उहाँले म एक सातापछि राजीनामा दिन्छु भन्नुभयो । पदवहाली गर्दा औपचारिकताका लागि फाइलमा सदर गरे पनि कुनै नीतिगत निर्णय आफूले नगर्ने बताउँनुभयो । उहाँले स्केप हुन खोज्नुभएको हो कि साँच्चै इगोका लागिमात्र मन्त्रालयमा केही दिनलाई फर्किनुभएको हो भन्ने बुझ्न सकिएन ।’

अर्थमन्त्रालयमा जनार्दन र मधु मरासिनीमध्ये एकजनामात्र रहने अब लगभग निश्चित भइसकेको छ । उनी यसअघि बिदा बस्दा पनि बालुवाटार र खुमलटारलाई जानकारी दिएरै बसेका थिए । यसपटक जनार्दनको कमब्याक र उनी गयल हुनुमा संयोगमात्र छ कि ? शीर्ष तहसँगको समझदारीमै हो भन्ने सम्भवतः एक-दुई दिनमा प्रष्ट हुनेछ ।

चितवन । नेकपा माओवादी केन्द्र निकट अखिल(क्रान्तिकारी) की अध्यक्ष पञ्चा सिंहले ३ महिने अभियानपछि माओवादीमा ५ लाख नयाँ मतदाता थपिने दाबी गरेकी छन् ।

अखिल(क्रान्तिकारी) विश्वविद्यालय कमाण्डले आज चितवनमा आयोजना गरेको कार्यक्रमलाई सम्बोधन गर्दै अध्यक्ष सिंहले यस्तो दाबी गरेकी हुन् ।

यस्तै, सिंहले आउँदो संघ र प्रदेशको निर्वाचनमा पार्टीलाई मुलुकको पहिलो कम्युनिष्ट पार्टी बनाउने गरी लाग्न समेत कार्यकर्ताहरुलाई निर्देशन दिइन् ।

क्रान्तिकारीका महासचिव दिपेश पुन, उपाध्यक्ष मदन भट्टराईले प्रशिक्षण दिएका थिए । कार्यक्रममा, कृषि तथा वन, मध्यपश्चिम र संस्कृत विश्वविद्यालयसहित सीटीइभिटीका नेता कार्यकर्ताको सहभागिता रहेको अखिल(क्रान्तिकारी)का सचिव उपेन्द्र शाहीले जानकारी दिए ।

काठमाडौं । नेकपा माओवादी केन्द्रका प्रवक्ता कृष्णबहादुर महराले पार्टीको पदाधिकारी चयन गर्न धौ धौ परेको बताएका छन् ।

प्रेस सेन्टरका नवनिर्वाचित पदाधिकारीलाई प्रमाणपत्र वितरण गर्ने कार्यक्रममा बोल्दै महराले माओवादी पार्टीले जनता बिर्सँदै गएका कारण पार्टी व्यवस्थापनमा समस्या परेको बताए ।

‘हामीले जनता बिर्सियौं । सहर ताक्न थाल्यौं । पैसा कहाँबाट आउँछ भन्नेमा मात्रै लाग्यौं । हामीलाई अहिले पदमात्रै चाहिएको छ । त्यसैले पदाधिकारी छान्न हामीलाई धौ धौ भइरहेको छ’, महराले भने ।

उनले पार्टी बिग्रिएको जिम्मेवारी सबैले लिनुपर्ने भन्दै पार्टी सुधारका लागि सबैले पहल गर्नुपर्ने बताए ।

नेत्रविक्रम चन्द ‘विप्लव’ प्रति लक्षित गर्दै उनले भने, ‘विद्रोहका नाममा बन्दुक बोक्ने बेला यो होइन । अहिले कलम चलाउने बेला हो ।’

काठमाडौं । नेकपा माओवादी केन्द्रको आज बस्ने भनिएको स्थायी कमिटीको बैठक स्थगित भएको छ । पार्टी कार्यालय पेरिसडाँडामा दिउँसो ३ बजे बस्ने भनिएको बैठक स्थगित भएको हो ।

पदाधिकारी चयन र पोलिट ब्युरोबारे छलफल गर्ने गरी स्थायी समितिको बैठक बोलाइएको थियो । आज स्थगित बैठक साउन २५ गते बस्ने तय गरिएको पार्टी प्रवक्ता कृष्णबहादुर महराले नेपालप्रेसलाई जानकारी दिए ।

यसअघि शुक्रबार बसेको स्थायी कमिटी बैठकले प्रदेश बैठकका सेड्यूल हेरफेर गरेको थियो । पार्टी अध्यक्ष पुष्पकमल दाहाल प्रचण्ड जापान जाने भएपछि माओवादीका पूर्वनिर्धारित प्रदेश बैठक प्रभावित भएको हो ।

काठमाडौं । नेकपा माओवादी केन्द्रको स्थायी कमिटी बैठक आज पनि बस्दैछ । पार्टी कार्यालय पेरिसडाँडा दिउँसो ३ बजे बस्ने बैठकमा पदाधिकारी चयन र पोलिट ब्युरोबारे छलफल हुने प्रवक्ता  कृष्णबहादुर महराले बताए ।

यसअघि शुक्रबार बसेको स्थायी कमिटि बैठकले प्रदेश बैठकका सेड्यूल हेरफेर गरेको थियो ।

पार्टी अध्यक्ष पुष्पकमल दाहाल प्रचण्ड जापान जाने भएपछि माओवादीका पूर्वनिर्धारित प्रदेश बैठकहरु सारिएको थियो ।

काठमाडौं । नेकपा माओवादी निकट विद्यार्थी संगठन अखिल क्रान्तिकारीले त्रिभुवन विश्वविद्यालयका विकृतिहरु समाधानका लागि १५ बुँदे मागपत्र बुझाएको छ ।

आज अध्यक्ष पञ्चा सिंहसहित क्रान्तिकारीका पदाधिकारीहरुले त्रिवि उपकूलपति डा. धर्मकान्त कास्कोटासमक्ष मागपत्र बुझाएका हुन् ।

मागपत्रमा देशकै ठूलो र पुरानो प्राज्ञिक थलोको रुपमा रहेको विश्वविद्यालयलाई शैक्षिक ठेकेदारहरुबाट हमला भएको आरोप लगाउँदै आम विद्यार्थीमाथिको भिवष्यमा खेलबाड भइरहेको उल्लेख गरिएको छ ।

‘विश्वविद्यालय प्रशासनको प्रमुख उपकुलपतिको कार्यालयमै १४१ दिनको तालाबन्दी, शिक्षाध्यक्ष, रजिष्टारको कार्यकक्षका महिनौ देखिका तालाबन्दी, त्रिवि सेवा आयोगको आंशिक प्राध्यापकहरुको तालावन्दी, विभिन्न विभागहरुमा भई राखेका तालाबन्दीले विश्वविद्यालय कुन अवस्थाबाट गुज्रिएको छ र यसका संचालकहरुबाट विश्वविद्यालय कसरी चलिरहेको छ भन्ने सजिलै अन्दाज लगाउन सकिन्छ’, पत्रमा भनिएको छ ।

क्रान्तिकारीले आजको दिनमा विश्वविद्यालयलाई समयानुकूल रूपान्तरणको माग राख्दै विद्यार्थीहरूलाई सर्वसुलभ ,विश्वसनीय र गुणस्तरीय शिक्षा प्राप्त गर्ने वातावरणको सुनिश्चितता गर्न १५ बुँदे माग प्रस्तुत गरेको हो । आफ्ना मागहरु तत्काल पूरा नगरी बेवास्ता गरी गैरजिम्मेवार बनेमा संगठनले जस्तोसुकै कदम चाल्न पनि तयार रहेको चेतावनी समेत दिएको छ ।

संगठनले प्राध्यापकहरुलाई खुल्ला प्रतिस्पर्धाको बाटोमार्फत दक्ष जनशक्ति परिपूर्तिको माग गरेको छ । त्यस्तै, प्रश्नपत्र निर्माणमा देखिएको विकृति र लापरवाहीलाई रोक्न स्पष्ट कानुनी ब्यवस्था गरि यस्तो प्राज्ञिक बेथितिको पुर्णतया अन्त्य गर्न आग्रह गरेको छ ।

यस्ता छन् क्रान्तिकारीका १५ बुँदे मागहरुः

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड साउन २१ मा जापान जाने भएका छन् । नेपाली जनप्रगतिशील मञ्चको निम्तामा उनी जापान जान लागेका हुन् ।

प्रचण्ड विदेशिने भएपछि माओवादीका पूर्वनिर्धारित प्रदेश बैठकहरु सारिएको छ । आज बसेको स्थायी कमिटी बैठकले प्रदेश बैठकका सेड्यूल हेरफेर गरेको हो । जसअनुसार १ नम्बर प्रदेशको २६ गते बैठक बस्ने भएको छ ।

मधेसको बैठक २ गतेलाई सारिएको छ भने लुम्बिनीको २९ गते र सुदूरपश्चिमको वैठक ४ गते बस्ने छ । यस्तै, प्रवासको बैठक ६ गतेलाई, विशेष प्रदेशको ४ गते र सम्पर्क मञ्चको बैठक ८ गते हुने भएको छ ।

पार्टीको अर्को स्थायी कमिटी वैठक १५ गते बस्ने माओवादीका प्रवक्ता कृष्णबहादुर महराले सञ्चारकर्मीलाई जानकारी दिए । सोही बैठकमा पदाधिकारी चयनको विषयमा छलफल हुने उनको भनाइ छ ।