Category: माओवादी केन्द्र

रुपन्देही । नेकपा माओवादी केन्द्रबाट रुकुमपश्चिममा प्रतिनिधिसभा निर्वाचनका लागि अर्थमन्त्री जनार्दन शर्माको एकल नाम सिफारिस भएको छ ।

माओवादी केन्द्र रुकुमपश्चिमको बैठकले उनको नाम एकलरूपमा सिफारिस गरेको हो ।

बैठकले प्रदेश १(१) मा महेन्द्र केसी (पारसमणी) र प्रदेश १(२) मा राजकुमार शर्मा (आर्ट)को नाम सर्वसम्मतिबाट एकल सिफारिस गर्ने निर्णय गरिएको जिल्ला संयोजक गोविन्द रोकाले जानकारी दिए ।

काठमाडौं । अध्यक्ष प्रचण्डकै उपस्थितिमा माओवादी केन्द्रको उपमहासचिव पद अश्वीकार गरेका अर्थमन्त्री जनार्दन शर्माले आफूलाई संगठन विभागको प्रमुख घोषणा गरेपछि पार्टी पंक्तिमा खैलाबैला मच्चिएको छ ।

महासचिव चयनमा असन्तुष्टि जनाउँदै नोट अफ डिसेन्ट व्यक्त गरेका शर्माले अखिल क्रान्तिकारीको कार्यक्रममा आफू संगठन विभागको प्रमुखको हैसियतमा बोलिरहेको बताएका थिए । सो मञ्चमा प्रचण्ड र जनार्दनबीच दोहोरीसमेत चलेको थियो ।

यता माओवादी नेताहरूले भने पार्टीको महाधिवेशनपछि विभागहरू गठन नै नभएकाले संगठन विभाग नै अस्तित्वमा नरहेको बताएका छन् । महाधिवेशनपछि केन्द्रीय समिति, पोलिटब्युरो, स्थायी समिति र पदाधिकारीमात्र चयन भएका छन् ।

त्यस्तै अनुशासन आयोग र लेखा आयोग महधिवेशनपछि बनेका छन् । तर, संगठनलगायत अहिले कुनै पनि विभाग अस्तित्वमा नरहेको र कृष्णबहादुर महराले प्रवक्ताको भूमिका निर्वाह गरिरहेको माओवादीले जनाएको छ ।

माओवादी पार्टीका उपमहासचिव गिरिराजमणि पोखरेलले महाधिवेशनपछि पार्टीमा कुनै पनि विभाग गठन नभएको बताए । उनले पुरानै जिम्मेवारी सम्झेर जनार्दनले आफूलाई संगठन विभाग प्रमुख दाबी गरेको हुनसक्ने टिप्पणी गरे ।

महाधिवेशनअघि माओवादीले कार्य विभाजन गर्दा वर्षमान पुनलाई महासचिवले गर्ने कामसहित केन्द्रीय कार्यालय कमाण्डको जिम्मा दिएको थियो भने जनार्दन शर्माले संगठन विभाग पाएका थिए । शर्माले अखिल क्रान्तिकारीको कार्यक्रममा महाधिवेशनपछि पनि आफूलाई नै संगठन विभाग प्रमुख घोषणा गरेको टिप्पणी नेताहरूको छ । त्यसबाट समेत प्रचण्ड आक्रोशित बनेको बताइएको छ ।

यो पनि पढ्नुस् :

१. प्रचण्ड-जनार्दन मनमुटाब मञ्चमै पोखियो, कसको रक्षक को ? भिडिओमा हेर्नुहोस् दोहोरी

२. महासचिव चयनमा ‘नोट अफ डिसेन्ट’ जनाएका जनार्दनले गरे उपमहासचिव पद अश्वीकार (भिडिओ)

काठमाडौं । नेकपा माओवादी केन्द्रले सल्यानबाट अध्यक्ष पुष्पकमल दाहाल ‘प्रचण्ड’ का स्वकीय सचिव रमेश मल्ललाई प्रतिनिधिसभाका लागि उम्मेदवार सिफारिस गरेको छ ।

पार्टी जिल्ला समन्वय समितिको बुधबारको बैठकले प्रतिनिधिसभा तथा प्रदेशसभाका प्रत्यक्ष र समानुपातिक उम्मेदवारको नाम सिफारिस गरी प्रदेश समितिमा पठाएको हो ।

मल्ल अखिल क्रान्तिकारीका पूर्वअध्यक्ष पनि हुन् । उनीसँगै टेकबहादुर बस्नेत पनि सिफारिसमा परेका छन् । संघको समानुपातिकमा कमल विक, दिलमाया बुढामगर र रत्नबहादुर वलीलाई सिफारिस गरिएको छ ।

प्रदेशसभा ‘क’ को प्रत्यक्षमा भीमप्रकाश शर्मा र ‘ख’ मा चित्रबहादुर केसीलाई सिफारिस गरिएको छ । प्रदेशसभाको दुवै क्षेत्रबाट समानुपातिकमा ९ जनाको नाम पठाइएको छ ।

रुपन्देही । नेकपा माओवादी केन्द्रका केन्द्रीय सदस्य तथा कपिलवस्तु जिल्ला इन्चार्ज कमल चुँँदालीले अहिलेको निर्वाचन प्रणालीबाट वास्तविक रुपमा राजनीति गर्नेहरु लड्नै नसक्ने जनाउँदै चुनावमा उठ्ने आर्थिक स्थिति नभएकाले भागै लिन नसक्ने जनाएका छन् । उनले आफ्नो नाम कुनै पनि ठाउँमा सिफारिस नगर्न आग्रहसमेत गरेका छन् ।

माओवादीले बुधबारमात्र चुँँदालीको नाम प्रतिनिधिसभा क्षेत्र नं १ को प्रत्यक्षतर्फ सिफारिस गरेको छ । अहिलेको निर्वाचन प्रणाली आफ्नो क्षमताभन्दा बाहिर गएको भन्दै चुँदालीले समानुपातिकतर्फ पनि नाम सिफारिस नगर्न आग्रह गरेका छन् । उनले यो प्रणालीमा सुधार नआएसम्म चुनावमा भागै नलिने जनाएका छन् ।

बिहीबार सामाजिक सञ्जालमा स्टाटस लेख्दै अध्यक्ष चुँदालीले यो निर्वाचन प्रणालीमा आफ्ना लागि चुनावमा उठ्नु असम्भव कुरा भएको तर्क दिएका छन् ।

‘दसौंला जोडेर मेरो भनाइ दोहोर्‍याएर राख्दछु । चुनावमा उठ्ने आर्थिक सामर्थ्य म राख्दैन । यो महँगो निर्वाचन प्रणाली ठेगानमा नआउन्जेल चुनाव मेरो लागि असम्भव छ’, उनले लेखेका छन्, ‘सरी भन्दछु मेरो नाम प्रत्यक्ष वा समानुपातिक उम्मेदवारीमा सिफारिस नगरिदिनुहुन पार्टी पङ्क्तिमा हार्दिक अनुरोध गर्दछु । सद्भावनामा कृतज्ञता जनाउँछु ।’

वसन्तपुर । नेकपा माओवादी केन्द्र तेह्रथुमले आसन्न प्रतिनिधिसभा र प्रदेशसभा निर्वाचनका लागि उम्मेदवार सिफारिस गरेको छ ।
माओवादी केन्द्रको जिल्ला समिति बैठकले प्रतिनिधिसभा र प्रदेशसभा दुवैतर्फका उम्मेदवार सिफारिस गरेको हो । तेह्रथुममा प्रतिनिधिसभामा एक मात्र निर्वाचन क्षेत्र छ ।

प्रतिनिधिसभामा जिल्ला संयोजक इन्द्रबहादुर इम्सङ लिम्बू सिफारिस भएका छन् । प्रतिनिधिसभाको समानुपातिकतर्फ होमकुमारी लिम्बू खापुङ र नन्दलाल दर्नालको नाम सिफारिस भएको जिल्ला संयोजक लिम्बूले जानकारी दिए ।

प्रदेश सभा (क) मा प्रत्यक्षतर्फ तेजबहादुर कटुवाल र समानुपातिकतर्फ दिलकुमारी लिम्बू, जेतेन्द्र लिम्बू कुरुम्वाङ र सूर्यबहादुर विक सिफारिस भएका छन् ।

प्रदेश (ख) को प्रत्यक्ष तर्फ पोलिटव्युरो सदस्य दुर्गाप्रसाद चापागाईं सर्वसम्मत सिफारिस भएका छन् । चापागाईं माओवादी केन्द्रका अध्यक्ष पुष्पकमल दाहाल प्रचण्ड र उपमहासचिव वर्षमान पुन अनन्तका विश्वासपात्र हुन् । यस्तै प्रदेश (ख) को समानुपातिकमा चुडामणि बराल, तेजमान कन्दङवा र टीकाराम लिम्बूको नाम सिफारिस भएको छ ।

काठमाडौं । महासचिव चयनदेखि नै असन्तुष्ट रहेका अर्थमन्त्री तथा माओवादी पार्टीका उपमहासचिव जनार्दन शर्माले अध्यक्ष प्रचण्डको उपस्थितिमै आलोचना गरेपछि दुवै नेताबीच घोचपेच र सवाल जवाफ चलेको छ ।

अनेरास्ववियु क्रान्तिकारीको फोर्स घोषणा कार्यक्रमका प्रमुख अतिथि प्रचण्ड र विशिष्ट अतिथि जनार्दन शर्माबीच घोचपेच चलेको हो । प्रचण्ड कार्यक्रमको सुरुमै बोल्न चाहन्थे । तर जनार्दनले आफू पहिले बोल्ने जिद्दि गरेपछि आफूले छाडेको प्रचण्डले बताए ।

प्रचण्डलाई रोकेर भाषण गर्न मञ्चमा पुगेका शर्मालाई विद्यार्थीले ताली बजाएर हुटिङ गर्दा उनले ‘नबजाऊ ताली, मलाई तालीदेखि डर लाग्छ, नगर गाली मलाई गालीदेखि रिस उठ्छ’ भन्दै मन्तव्य सुरु गरेका थिए ।

शर्माले आफू उपमहासचिव नभई संगठन विभाग प्रमुखको हैसियतमा बोल्न उभिएको भन्दै सुरुदेखि नै प्रचण्डसँगको असन्तुष्टि पोखेका थिए । आफू निकट अखिल क्रान्तिकारी अध्यक्ष पञ्चा सिंहविरुद्ध समानान्तर कमिटी बनाएको पवन कार्की समूहलाई पार्टीले नरम नीति लिएकोमा समेत उनले असन्तुष्टि पोख्दै नीति र नेतृत्व सही हुनुपर्ने बताए ।

जनार्दनले यसो भने

हामीले लाइनको कुरा सुनेर संगठनमा निर्णय गर्ने होइन । स्वार्थ पूर्ति गर्न नेतृत्वलाई बहकाउन सक्छन् कसैले । म नीति र नेतृत्वलाई सधैँभरि रक्षा गर्ने मान्छे हुँ । सही नीति र नेतृत्वको अहिले पनि रक्षा गर्ने मेरो दायित्व हो । नीति र नेतृत्व पनि सही ढंगले बढ्नुपर्छ भन्ने मेरो मान्यता हो । म त अध्यक्षको कडा आलोचक पनि मै हुँ र सबैभन्दा बढी संरक्षक र रक्षा गर्ने मान्छे पनि मै हो । अध्यक्षले यही मञ्चमा उभिएर अहिले यसको जवाफ दिनुहोला । पार्टीको नीति र नेतृत्वको रक्षा गर्न सकिएन भने आन्दोलन अघि बढ्न सक्दैन । नेतृत्वको कमजोरीको आलोचना गर्नुपर्छ । म त प्रचण्ड कमरेडको कडा आलोचक हुँ,आलोचना गर्छु । आलोचनाले नेतृत्वको रक्षा गर्छ,चाकडीले होइन । आलोचनाले नेतृत्वको रक्षा गर्छ चाकडीले होइन

जनार्दनपछि बोल्न उभिएका प्रचण्डले आफ्नो भनाइ सक्ने क्रममा हल्का आक्रोशित मुद्रामा जवाफ दिँदै जनार्दनलाई हुर्काउन र रक्षा गर्न आफ्नो मुख्य भूमिका रहेको बताए ।

प्रचण्डको जवाफ यस्तो थियो

जनार्दनजीले जाँदा जाँदै भन्नुभयो, यो पार्टीको नीति र नेतृत्वको रक्षाको कुरा । म म तपाईँहरूलाई के भन्न चाहन्छु भने जनार्दनलाई रक्षा र हुर्काउन पनि प्रचण्डको मुख्य भूमिका हो भन्ने कुरा बुझ्न जरुरी छ । उनको रक्षा र विकास गर्न पनि प्रचण्डले मुख्य भूमिका खेलेको छ । म त जनयुद्धको तयारीको पनि नेतृत्व गरेँ, जनयुद्धको पनि नेतृत्व गरेँ । शान्ति प्रक्रिया र संविधानसभाको पनि नेतृत्व गरेँ । संघीय लोकतान्त्रिक गणतन्त्रको पनि नेतृत्व गरेँ । मेरो लागि त धेरै चीज भएकै छ । मेरो चाहना राम्रा उत्तराधिकारीहरू आउन्,नेतृत्व गरुन्,हाम्रो विरासत र हाम्रो परम्परालाई अगाडि बढाउन ठूलो छातीका साथ अगाडि बढुन् भन्ने हो । …

जनकपुरधाम । संघ सरकारकी शिक्षा, विज्ञान तथा प्रविधि राज्यमन्त्री बोधमाया यादव धनुषाबाट प्रदेशसभा सदस्यका लागि उम्मेदवार सिफारिस भएकी छन् ।

नेकपा माओवादी केन्द्र धनुषाले राज्यमन्त्री यादवको नाम प्रदेशसभा क्षेत्र नम्बर १ (क) बाट उम्मेदवार सिफारिस गरेको हो । उनीसँगै माओवादी जिल्ला अध्यक्ष देवेन्द्र यादव ‘दीपक’ र रोशन यादवको नाम पनि सिफारिस भएको बुझिएको छ । राज्यमन्त्री यादव यसअघि समानुपातिकको तर्फबाट प्रतिनिधिसभा सदस्य भएकी थिइन् ।

गत निर्वाचनमा प्रदेश १ (क) बाट नेकपा माओवादी केन्द्रसँग गठबन्धन गरेको नेकपा एमालेका किशोरी साह ‘कमल’ निर्वाचित भएका थिए । एमालेले उम्मेदवारको टुङ्गो लगाएको छैन । तर, साह पुनः उम्मेदवारको आकांक्षी छन् ।

यस्तै प्रदेशसभा निर्वाचन क्षेत्र नम्बर १ (ख) बाट सरोज यादव, प्रदीप साह, गुलाव यादव, सूर्यनारायण मण्डल र वीरेन्द्र महतोको नाम सिफारिस भएको माओवादी जिल्ला अध्यक्ष दीपकले जानकारी दिए ।

प्रतिनिधिसभा क्षेत्र नम्बर १ मा माओवादीबाट प्रभावशाली नेता मातृका यादव उम्मेदवार बन्ने निश्चित छ । माओवादी जिल्ला कमिटीले उनको एकल नाम सिफारिस गरेको छ ।

माओवादीले धनुषा क्षेत्र नम्बर २ बाट योगकुमार बरबरियाको एकल नाम सिफारिस गरेको छ । क्षेत्र ३ बाट सौखीलाल पासवान र युगेश्वर यादव तथा क्षेत्र ४ बाट देवसागर दासको एकल नाम सिफारिस गरेको छ ।

कैलाली । नेकपा माओवादी केन्द्रका अध्यक्ष पुष्पकमल दाहाल प्रचण्डले सुदूरपश्चिम प्रदेशमा पार्टीको रिपोर्ट उत्साहजनक नरहेको बताएका छन् । मंगलबार भएको प्रदेशस्तरीय राजनैतिक तथा वैचारिक प्रशिक्षण कार्यक्रमलाई सम्बोधन गर्दै उनले विगतको जस्तो उत्साह नरहेको बताएका हुन् ।

‘रिपोर्ट उत्सजनक छैन । जनयुद्धमा, संविधानसभाको पहिलो वा दोस्रो निर्वाचनमा संविधान निर्माण गर्दैगर्दाको जस्तो उत्साहजनक रिपोर्ट मलाई लागेन’, उनले भने ।

जनयुद्धको समय स्मरण गर्दै उनले पार्टीमा पहिलेको जस्तो आत्मविश्वास नरहेको पनि बताए । ‘हामी पहिले थोरै थियौं । संख्यामा कम थियौं । आत्मविश्वास भरपूर थियो । कुनै पनि वेला मृत्युवरण गर्ने गरी लडाइँमा थियौं’, प्रचण्डले थपे, ‘तर, हामीमा उत्साह थियो । आत्मविश्वास थियो । संसार जित्छौं भन्ने लागेको थियो । पहिले ५०/१०० हुँदा पूरै आगो बाल्ने रिपोर्ट आउँथ्यो । अहिले यति धेरै छौं । ऊर्जा त्यस्तो छैन ।’

उनले सुदूरपश्चिम प्रदेशमा माओवादी केन्द्रबीच एकरुपता नभएको समेत बताए । प्रदेशमा माओवादीको एकता भए अरू दलको भविष्य नभएको उनको भनाइ थियो ।

‘सुदूरपश्चिममा राम्रो एकता हुने हो भने, एकरूपता आउने हो भने अरू कुनै राजनैतिक दलको भविष्य हुनेछैन । पूरै माओवादीको कब्जा हुने थियो’, प्रचण्डले भने, ‘तर, विडम्बना त्यस्तो छैन । बुझाइमा एकरूपता छैन । संगठनमा पनि एेक्यबद्धता छैन । जनताको लागि जनताको बीचमा गएर काम गर्ने सोच पनि पहिलेको जस्तो छैन ।’

उनले माओवादीकै कारण संविधानसभाबाट संंघीय लोकतान्त्रिक गणतन्त्र स्थापना भएको समावेशी समानुपातिक प्रतिनिधित्व कायम भएको र देशलाई समाजवादको यात्रा अघि बढेको दोहोर्‍याए । माओवादीले निरन्तरतामा क्रम भंगता गर्दै आएको उनको भनाइ छ ।

केन्द्रीय सदस्य तथा प्रदेश पदाधिकारीहरूको संयुक्त बैठक र प्रदेशस्तरीय राजनैतिक तथा वैचारिक प्रशिक्षण कार्यक्रममा सहभागी हुन मंगलबार कैलाली आएका माओवादी अध्यक्ष प्रचण्ड आजै काठमाडौं फर्किने बताइएको छ । उनीसँगै माओवादी केन्द्रका वरिष्ठ उपाध्यक्ष नारायणकाजी श्रेष्ठ पनि धनगढी आएका छन् ।

काठमाडौं । नेकपा माओवादी केन्द्रका स्थायी समिति सदस्य एवं प्रतिनिधिसभा सदस्य अञ्जना विशंखेले समावेशी आयोगका पदाधिकारीलाई कारबाही गर्न माग गरेकी छन् ।

बुधबार भएको प्रतिनिधिसभा बैठकको शून्य समयमा बोल्दै उनले संविधानविपरीत समावेशी आयोगले पूर्वाग्रह राखी जातीय, लैंगिक आरक्षण आवश्यक नरहेको प्रतिवेदन तयार गरेकाले आयोग पदाधिकारीहरुलाई कारबाही गर्नुपर्ने माग गरेकी हुन् ।

उनले समावेशी आयोगले तयार पारेको ‘विद्यमान सरकारी सेवामा आरक्षणको प्रभाव अध्ययन प्रतिवेदन २०७९’ तुरुन्त खारेज गर्नसमेत जोड दिइन् ।

उनले भनिन्, ‘संविधानविपरीत संवैधानिक आयोगले पूर्वाग्रह राखी जातीय, लैंगिक आरक्षण आवश्यक नरहेको प्रतिवेदन तयार गरेको छ । सरकारले यसलाई तुरुन्त खारेज गर्दै आयोगका पदाधिकारीलाई कारबाहीको दायरामा ल्याउन सभामुखमार्फत सरकारसँग माग गर्दछु ।’

काठमाडौं । नेकपा माओवादी केन्द्र निकट विद्यार्थी संगठन अखिल क्रान्तिकारीले चुनाव लक्षित संरचना ‘क्रान्तिकारी फोर्स’ गठन गर्ने भएको छ ।

भदौ २२ गते बिहान १० बजे राष्ट्रिय सभागृहमा पार्टी अध्यक्ष पुष्पकमल दाहाल प्रचण्डको उपस्थितिमा उद्घाटन हुने कार्यक्रमको सम्पूर्ण तयारी पूरा भएको अखिल क्रान्तिकारीका उपाध्यक्ष अमरजंग शाहीले जानकारी दिए ।

मंसिर ४ मा हुने संघ र प्रदेशको निर्वाचनका दौरान संगठनको परिचालनलाई देशव्यापी व्यवस्थित र प्रभावकारी बनाउन अखिल क्रान्तिकारीले विशेष संरचना निर्माण गर्न लागेको हो ।

‘क्रान्तिकारी फोर्स’ अखिल क्रान्तिकारी केन्द्रीय समिति मातहत रहने नयाँ संरचना हुने उपाध्यक्ष शाहीले जानकारी दिए ।

कार्यक्रममा अखिल क्रान्तिकारीकी अध्यक्ष पञ्चा सिंहसहित केन्द्रीय पदाधिकारी, प्रदेश पदाधिकारीहरुसहित मुलुकभरका सबै तहका नेता कार्यकर्ताहरुको प्रतिनिधिमूलक सहभागिता रहने उपाध्यक्ष शाहीले जनाकारी दिए ।

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले संसदको आयु नलम्ब्याउने बारे गठबन्धन दलमा सहमति भइसकेको बताएका छन् । मंगलबार बिहान धनगढी पुगेका दाहालले आजै यो प्रस्ताव फिर्ता हुने जानकारी गराए ।

सरकारले केही नेपाल ऐन संशोधन गर्ने विधेयक, २०७९ मार्फत प्रतिनिधिसभाको आयु थप्न खोजेपछि चौतर्फी आलोचना भएको थियो । सरकारको यो कदममा निर्वाचन आयोगले समेत असहमत जनाइसकेको छ ।

‘आयु लम्ब्याउन हुँदैन भनेर गठबन्धनमा बसेर छलफल भएको छ । एकदिन पनि यताउता गर्नु हुँदैन । मंसिर ४ गते चुनाव हुन्छ । मनोनयनपछि संसद रहँदैन । एकदम क्लियर छ त्यहाँ द्वविधा हुनै पर्दैन ‘, प्रचण्डले भने ।

प्रचण्डले केही टेक्निकल कारणले प्रतिनिधिसभाको म्याद थप्न खोजिएपनि चुनावअघि कन्फ्यूजन पार्न नहुनेमा सहमत भएको बताए ।

प्रचण्डले भने, ‘बीचमा केही टेक्निकल कारणले संसद लम्ब्याउने कि भनेर प्रमुख सचेतकहरूले सोच्नुभएको रहेछ । गठबन्धन बसेर यसरी सोच्नु हुँदैन । कहिँ इफ बट हुन दिन हुँदैन । ४ गते निर्वाचन हुन्छ त्यहाँ भन्दा अगाडि केही काम कन्फ्यूजन पैदा गर्ने गरी गर्नुहुँदैन भन्ने भइसकेको छ । सायद आजै प्रस्ताव फिर्ता हुन्छ ।’

प्रचण्डले स्थानीय चुनाव र अब हुने प्रदेश तथा प्रतिनिधिसभाको निर्वाचनले संविधान डिरेलको खतरा टरेको र गणतन्त्रको विजय भएकव दाबी गरे ।

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले गठबन्धनमा सीट बाँडफाँट टुंगिने चरणमा पुगेको बताएका छन् ।

बिहान धनगढी पुगेका प्रचण्डले पत्रकारसँग कुरा गर्दै संघ र प्रदेशका सबै क्षेत्र एकै पटक टुंगिने बताए । उनले दाबी आ-आफ्नो भएपनि सहमतिमै निष्कर्षमा पुगिने बताए ।

‘सीट संख्या सबै एकैचोटि टुंग्याउने गरी सबै पार्टीका प्रतिनिधि लागिराख्नुभएको छ । आज बेलुकासम्मको समय दिइएको छ । भोलि हामी शीर्ष तहमा बसेर त्यसलाई अन्तिम रूप दिने कुरा छ’, प्रचण्डले भने ।

सीट दाबीबारे पत्रकारको प्रश्नमा प्रचण्डले नेपाली कांग्रेस ८० सीटमा मान्ने सम्भावना बढेको बताए । उनले माओवादी ६० वरपर र नेकपा एस २५ सीटलाई आधार बनाएर मिलाउन लागिएको बताए ।

प्रचण्डले भने, ‘कांग्रेस १०० सीट दाबी गरेको थियो ८० को वरिपरि आउने सम्भावना बढ्दो छ । हामीले ६० भनेका छौं केही तलमाथि होला ।
समाजवादीको २५ वरिपरि होला’, प्रचण्डले भने, ‘यसैलाई आधार बनाएर अहिले सबैजना बसेर टुंग्याउने छौं । मिल्न बाँकी भयो भने शीर्ष नेता बसेर टुंग्याउँछौं ।’

बागलुङ । नेकपा (माओवादी केन्द्र) ले बागलुङ क्षेत्र नम्बर २ बाट प्रतिनिधिसभा सदस्यका लागि अध्यक्ष पुष्पकमल दाहाल ‘प्रचण्ड’लाई सिफारिस गरेको छ । बागलुङ क्षेत्र नम्बर २ (ख) समितिले दाहाललाई अनुरोध गर्दै प्रतिनिधिसभा सदस्यका लागि सर्वसम्मतरूपमा सिफारिस गरेको माओवादी केन्द्र बागलुङका संयोजक राजीव घिमिरेले जानकारी दिए ।

दुई दिन अगाडिमात्रै नेपाली कांग्रेस बागलुङ क्षेत्र नम्बर २ ले प्रधानमन्त्री तथा पार्टी सभापति शेरबहादुर देउवा पत्नी डा आरजु राणा देउवालाई प्रतिनिधिसभाका लागि सिफारिस गरेको थियो । त्यसलगत्तै माआवादी केन्द्रले पार्टी अध्यक्ष प्रचण्डलाई प्रतिनिधिसभाका लागि सिफारिस गरेको हो ।

यस क्षेत्रमा अघिल्लो पटक वाम गठबन्धनबाट शिक्षामन्त्री तथा माओवादी केन्द्रका सचिव देवेन्द्र पौडेलले जितेका थिए । रासस

कैलाली । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ भोलि कैलाली आउने भएका छन् ।

सुदूरपश्चिम प्रदेश कमिटीले कैलालीको धनगढीमा आयोजना गरेको बैठक तथा प्रशिक्षण कार्यक्रममा सहभागी हुन प्रचण्ड धनगढी आउन लागेको माओवादी केन्द्रका प्रदेश इन्चार्ज तथा स्थायी कमिटी सदस्य खगराज भट्टले जानकारी दिए । प्रचण्डसँगै वरिष्ठ उपाध्यक्ष नारायणकाजी श्रेष्ठ र महासचिव देव गुरुङ पनि आउने कार्यक्रम तय भएको थियो ।

भोलि बिहान ८ बजे धनगढी पुगेर भोली नै काठमाडौँ फर्किने जनाइएको छ ।

काठमाडौं । नेकपा माओवादी केन्द्र भक्तपुरले आगामी मंसिर ४ गते हुने प्रदेश तथा प्रतनिधिसभा सदस्य निर्वाचनका लागि एकल नाम सिफारिस गरेको छ ।

भक्तपुरका दुई वटा क्षेत्र नम्बरहरु १ र २ मा क्रमशः सुरेश न्यौपाने र रामप्रसाद सापकोटा दीपशिखा सिफारिस भएका छन् । त्यस्तै, प्रदेशसभा सदस्यका लागि क्षेत्र नम्बर १ ख मा सुनिल गोथे सिफारिस भएका छन् भने क्षेत्र नम्बर १ क मा भोलि टुंगिने जिल्ला संयोजक सुनिल गोथेले जानकारी दिए ।

त्यस्तै, क्षेत्र नम्बर २ ख मा दिलीपकुमार प्रजापति भीष्म सिफारिस भएका छन् भने क्षेत्र नं. २ क मा भोलि टुंग्याइने गोथेले जनाए ।

ति क्षेत्रमा आकांक्षी धेरै भएकाले आज नटुंगिएको बताइएको छ ।

जनकपुरधाम । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले अबको दुई/तीन दिनभित्रै गठबन्धन दलबीच सीट बाँडफाँट टुंगिने बताएका छन् । पार्टीको कार्यक्रमका लागि जनकपुरधाम आएका उनले गठबन्धन दल भागबण्डाको अन्तिम तयारीमा रहेको बताए ।

‘कार्यदलले अध्ययन गरिरहेको छ’, प्रचण्डले भने, ‘कार्यदलले आज वा भोलिसम्ममा प्रतिवेदन दिन्छ, त्यसलगत्तै कार्यदलको प्रतिवेदनका आधारमा सीट बाँडफाँटको टुंगो लगाउँछ ।’

उनले अघिल्लो निर्वाचनमा जुन क्षेत्रमा जुन दलले जितेको थियो, त्यही दललाई दिने सैद्धान्तिक सहमति भएको बताए ।

‘त्यसबाहेक थप कति वटा सीट कुन दललाई दिने भन्नेमा टुंगो लगाउन मात्र बाँकी छ । हामीले छिटोभन्दा छिटो सीट टुंगो लगाएर चुनावी तयारीमा जुट्न चाहन्छौँ’, उनले भने ।

७४ को चुनावभन्दा आगामी मंसिर ४ मा माओवादीले बढी सीट जित्ने प्रचण्डको दाबी छ ।

यसैबीच नेकपा माओवादी केन्द्रको मधेस प्रदेशमा रहेका केन्द्रीय सदस्यको बैठक आज जनकपुरधाममा सुरू भएको छ । जनकपुरधामस्थित होटल राजदरबारमा दिउँसो २ बजेदेखि सुरु बैठकलाई अध्यक्ष दाहाल, वरिष्ठ उपाध्यक्ष नारायणकाजी श्रेष्ठ), नेताहरू मात्रिकाप्रसाद यादव, गिरीराजमणि पोखरेललगायतका नेताहले सम्बोधन गर्ने माओवादी केन्द्र मधेस प्रदेशका इञ्चार्ज गणेश साहले बताए ।

जनकपुरधाम । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले राष्ट्रपति विद्यादेवी भण्डारीले नागरिकता विधेयक प्रमाणिकरण नगरे अदालत जाने चेतावनी दिएका छन् ।

जनकपुरधाममा सोमबार सञ्चारर्मीहरुसँग कुराकानी गर्दै प्रचण्डले राष्ट्रपतिलाई एक पटक मात्र विधेयक फिर्ता गर्ने अधिकार रहेको बताए । उनले भने, ‘राष्ट्रपतिले अब पुनः नागरिकता विधेयक फिर्ता गर्न मिल्दैन । उहाँ फिर्ता गर्नुहुन्न भन्ने विश्वास छ । तर प्रमाणिकरण नगरे अदालत जान्छौं ।’

अध्यक्ष प्रचण्डले आसन्न निर्वाचनका लागि दुई/तीन दिनभित्र सत्ता गठबन्धनमा सिट बाँडफाँड टुंगो लाग्ने विश्वास व्यक्त गरे ।

‘अघिल्लो निर्वाचनमा जुन क्षेत्रमा जुन दलले जितेको थियो, त्यही दललाई दिने सैद्धान्तिक सहमति भएको छ’, उनले भने, ‘थप कति वटा सिट कुन दललाई दिने भन्नेमा टुंगो लगाउन मात्र बाँकी छ । त्यो पनि छिट्टै टुंगो लाग्छ ।

लमजुङ । नेकपा माओवादी केन्द्रका महासचिव देवप्रसाद गुरुङ प्रतिनिधि सभा सदस्यको उम्मेदवारका लागि सिफारिस भएका छन् । मंसिर ४ गते हुने प्रतिनिधि सभा र प्रदेश सभा निर्वाचन अन्तर्गत प्रतिनिधि सभा निर्वाचनमा सदस्यको उम्मेदवारका लागि प्रत्यक्षतर्फ सिफारिस भएका हुन् ।

नेकपा माओवादी केन्द्र जिल्ला समन्वय समिति लमजुङको आइतबार बसेको दोस्रो पूर्ण बैठकले महासचिव गुरुङको नाम सिफारिस गरेको हो ।

उनीसँगै प्रत्यक्षतर्फ केन्द्रीय सदस्य देवेन्द्र पराजुलीको नाम पनि सिफारिस भएको छ । समानुपातिकमा मधु अधिकारी गुरुङ, उर्मिला माझी र ऋषिराम पौडेलको नाम सिफारिस भएको छ ।

प्रदेश क को प्रत्यक्षतर्फ मधु अधिकारी गुरुङ, हरिजङ तामाङ, मेखबहादुर भण्डारी, र होमबहादुर विकको नाम सिफारिस भएको छ । प्रदेश ख मा विमल अधिकारी र रामचन्द्र पौडेलको नाम सिफारिस भएको छ ।

प्रदेश सभामा समानुपातिकमा जनजाति महिलामा सतीमाया तामाङ, दलित पुरुषमा सुनिल सुनार, देवबहादुर गहतराज, खसआर्य महिलामा शोभा थापा, खसआर्य पुरुषमा नीराजन कुँवर र दयासागर घिमिरे, अल्पसंख्यकमा नन्दबहादुर कुमाल, दलित महिला जुना विक, आदिवासी जनजाति पुरुषमा टकराज गुरुङ र अजय तामाङ र मुस्लिमतर्फ मोहमद जलालदिन मियाको नाम सिफारिस भएको छ ।

भरतपुर । माओवादी केन्द्रले चितवन निर्वाचन क्षेत्र नम्बर–२ बाट युवा नेता रामचन्द्र अधिकारी (आरसी) को नाम सिफारिस गरेको छ ।

माओवादी प्रदेश समिति बैठकले आइतबार अधिकारीको एकल नाम सिफारिस गरेको हो । अधिकारी चितवन जिल्ला संयोजक हुन् ।

यस्तै, चितवन– २ को प्रदेशसभा (क) मा घनश्याम दाहाल र रामध्वज डल्लाकोटी तथा प्रदेश (ख) मा निशा न्यौपाने र यदुमणि कँडेलको नाम सिफारिस गरिएको छ ।

सिन्धुपाल्चोक । सभामुख अग्निप्रसाद सापकोटा सिन्धुपाल्चोक १ बाट प्रतिनिधिसभाका लागि नेकपा माओवादी केन्द्रबाट उमेदवार सिफारिस भएका छन् ।

प्रदेश १ को कमिटी बैठकले सापकोटासहित प्रत्यक्षतर्फ तीनजनाको नाम सिफारिस गरेको हो । माओवादी पोलिट्ब्युरो सदस्य माधव सापकोटा सुवोध र फुलम तामाङ पनि सिफारिस भएका छन् ।

१ को प्रदेश सभा (क) मा प्रत्यक्षतर्फ वागमती कमिटीका अध्यक्ष सरल सहयात्रीको एकल नाम सिफारिस गरिएको छ ।

त्यस्तै सोही क्षेत्र को प्रदेशसभा (ख) मा प्रत्यक्षतर्फ अम्बिका नेपाल, टीएन सापकोटा ,चन्द्र सापकोटा र प्रताप सि लामा सिफारिस भएको माओवादी केन्द्रले जानकारी दिएको छ ।

प्रतिनिधिसभा तर्फ समानुपातिकमा पुण्यप्रसाद पराजुली, विष्णुकुमार श्रेष्ठ, पूर्णबहादुर तामाङ, गणेश विक र पर्वती थामी सिफारिस भएका छन् ।

त्यस्तै प्रदेशसभा ‘क’ मा समानुपातिकमा राजकुमार पौडेल, लालकान्छा तामाङ, ज्ञानेन्द्रबहादुर गुरुङ, राजु खाती, आशा गुरुङ शेर्पा र सुन्दर पहरी सिफारिस भएका छन् ।

प्रदेश सभा ‘ख’ मा समानुपातिकतर्फ अमृता नेपाल, गोकर्णदास श्रेष्ठ, पदम श्रेष्ठ, सागर परियार, सुवास सुन्दास र टीकाराम पराजुली सिफारिस भएका छन् ।

चितवन । माओवादी केन्द्रका अध्यक्ष पुष्पकमल दाहाल प्रचण्ड चितवन निर्वाचन क्षेत्र नम्बर- ३ बाट प्रतिनिधिसभा सदस्य उम्मेदवार सिफारिस भएका छन् ।

आइतबार बसेको सो पार्टीको ३ नम्बर क्षेत्रीय निर्वाचन परिचालन समिति बैठकले प्रचण्डलाई एकमतद्वारा उम्मेदवार सिफारिस गरिएको नेता गोपाल न्यौपानेले जानकारी दिए ।

प्रचण्ड यसअघि २०७४ सालको निर्वाचनमा सोही क्षेत्रबाट प्रतिनिधिसभा सदस्य निर्वाचित भएका थिए । उनको नाम यसअघि गोरखा- १ बाट पनि सिफारिस भएको छ । यद्यपि प्रचण्डले आफू चितवन- ३ बाटै चुनाव लड्ने स्पष्ट गरिसकेका छन् ।

बैठकले चितवन- ३ अन्तर्गतका दुवै प्रदेशसभाका लागि समेत प्रत्यक्षतर्फका उम्मेदवार सिफारिस गरेको छ । प्रदेश ३ (क) मा प्रकाश कँडेलसहित तीन जना र ३ (ख) मा गोपाल न्यौपानेसहित ८ जनाको नाम सिफारिस भएको छ ।

न्यौपाने नेकपा माओवादीका तत्कालीन बेपत्ता केन्द्रीय सदस्य दण्डपाणि न्यौपानेका छोरा हुन् । उनी राज्यद्वारा बेपत्ता पारिएका सबैभन्दा उच्च तहका माओवादी नेता हुन् ।

सिन्धुली । नेकपा (माओवादी केन्द्र)का बाहुबली नेता राजन दाहालले सिन्धुलीमा आफ्नो शक्ति प्रदर्शन गर्दा पार्टीका उपमहासचिव तथा अध्यक्ष प्रचण्डका निकटस्थ मानिने प्रभावशाली नेता हरिबोल गजुरेल भने निरीह बनेका छन् ।

जिल्ला इन्चार्ज समेत रहेका प्रदेश सभा सदस्य दाहालले सिन्धुलीका ९ वटै पालिका कमिटी बैठक राखेर दुवै क्षेत्रबाट प्रतिनिधिसभा सदस्यका लागि आफ्नो एकल नाम सिफारिस गराएका छन् ।

सिन्धुलीका सबै पालिका कमिटीहरुको शनिवारको बैठकले जिल्ला इन्चार्ज लेखनाथ दाहाल (राजन)लाई प्रतिनिधिसभा सदस्यका लागि दुवै क्षेत्रमा सिफारिस गरेको गोलञ्जोर गाउँपालिका उपाध्यक्ष समेत रहेका प्रदेश कमिटी सदस्य ज्वाला प्रसाद न्यौपानेले जानकारी दिए ।

सिन्धुलीमा दुई निर्वाचन क्षेत्र छन् । दुवैबाट राजन दाहाल सिफारिस भए पनि १ नम्बर क्षेत्र कांग्रेसले पाउने निश्चित छ । माओवादी नेता हरिबोल गजुरेलले २ पटक जितेको र माओवादीको बलियो पकड मानिएको क्षेत्र नम्बर २ बाट राजन दाहाल चुनाव लड्न खोजेका छन् ।

दाहाल पनि सोही क्षेत्रका हुन् तर अघिल्लो पटक उनी क्षेत्र नम्बर १ मा गएर प्रदेशसभा सदस्य जितेका थिए । यसपटक सिन्धुलीका ९ वटै पालिका कमिटीबाट एकल नाम सिफारिस गराएका दाहालले हरिबोल गजुरेलको नाम भने समानुपातिक उम्मेवारका लागि सिफारिस गराएका छन् ।

पालिका कमिटीहरुबाट आएको सिफारिसका आधारमा क्षेत्रीय कमिटी र जिल्ला कमिटीले केन्द्रमा सिफारिस गर्ने जिल्ला संयोजक पानीराज बम्जनले जानकारी दिए । जिल्लामा एकछत्र कब्जा जमाएका राजन दाहालले यसपटक हरिबोललाई अप्ठेरो पारेका छन् ।

रामेछाप जिल्ला इन्चार्ज हुँदा तत्कालीन एमाले महासचिव ईश्वर पोखरेल, नेताहरु पशुपति चौलागाई,देवशंकर पौडेल लगायतको हत्या प्रयास गरेपछि पार्टीले उनलाई सिन्धुली सरुवा गरेको थियो ।

काठमाडौं । मोरङका एमाले जिल्ला सचिवालय सदस्य बलभद्र सरदार थारु नेकपा माओवादी केन्द्र पार्टी प्रवेश गरेका छन् । आज विहान प्रचण्डनिवास खुमलटारमा अध्यक्ष पुष्पकमल दाहाल प्रचण्डले खादा लगाएर पार्टी प्रवेश गराएका हुन् ।

थारु यसअघि स्थानीय तहको चुनावमा एमालेबाट बुढिगङ्गा गाउपालिका अध्यक्षका उम्मेदवार बनेको थिए ।उनलाई कांग्रेसका जितनारायण थापामगरले पराजित गरेका थिए ।

उनीसँगै एमालेका बुढिगङ्गा ३ का वडा अध्यक्षका उमेदवार अमिर भगत,साबिक शिशबनि गाबिसका निर्वाचित उपाध्यक्ष अनिल गच्छदार, बुढिगङ्गा वडा-७ पार्टी अध्यक्ष किरण सरदार र आशाराम सरदार माओवादी प्रवेश गरेका हुन् ।

विचार स्वतन्त्र हुन्छ , एमालेबाट समाज विकास सम्भव छैन भन्दै माओवादी रोजेको थारुले बताए ।