Category: माओवादी केन्द्र

काठमाडौं । माओवादी केन्द्रका उपमहासचिव वर्षमान पुन अनन्तले गणतन्त्र, संघीयता र धर्मनिरपेक्षतामाथि कुनै खतरा नरहेको बताएका छन् । उनले इतिहास भइसकेको वंश परम्परा आधारित राजतन्त्र कुनै हालतमा फर्कन नसक्ने उल्लेख गरे ।

निरंकुशताको आडमा व्यक्तिगत फाइदा लिएका केही व्यक्ति र शक्तिले विगतमा पनि गणतन्त्रप्रति विमति राखेको भन्दै उनले तिनै व्यक्तिले राजतन्त्रको वकालत गरेको पुनले चर्चा गरे ।

‘सानो समूहमा रहेका केही पश्चगामी र निरंकुशतन्त्रका पक्षपातीहरुले हिजोका दिनमा पनि गणतन्त्रप्रति विमति राखेका थिए । तिनीहरु स्वभाविक रुपले राजतन्त्रकै निरन्तरता चाहन्थे’, पार्टी सम्वद्ध मजदुर संगठन अखिल नेपाल ट्रेड युनियन महासंघले बिहीबार ललितपुरको लगनखेलमा गरेको कार्यक्रममा पुनले भने, ‘वंशानुगत राजतन्त्रबाट लाभ प्राप्त गरेका तत्कालीन दरकारका आसेपासे, ढोके, हुक्के र तिनका चम्चेहरुले राजतन्त्र चाहिन्छ भन्नुलाई विकल्कुल अस्वभाविक मान्नुपर्दैन ।’

पुनले राजतन्त्रमा जनताले राज्यका लाभ नपाएको स्पष्ट रहेको भन्दै आमजनता गणतन्त्रको पक्ष र राजतन्त्रको विपक्षमा रहेको दाबी गरे । ‘सधैं राजतन्त्रबाट लाभ लिएकको वर्ग र समुदायले गणतन्त्र भत्काउन पाए फेरि गुमेको स्वर्ग फर्कन्थ्यो कि भन्ने ठान्नु अन्यथा होइन’, उनले भने, ‘त्यो वर्ग र शक्ति आज असान्दर्भिक भइसकेको छ ।’

गणतन्त्र, संविधान, संघीयता र धर्मनिरपेक्षताजस्ता परिवर्तनका राजनीतिक उपलब्धी बचाउनु माओवादीसहित १२ बुँदे समझदारी, ०६२/०६३ को जनआन्दोलन शान्ति प्रक्रिया र संविधान निर्माणको प्रक्रियामा सहभागी मुलधारका राजनीतिक दलहरुको दायित्व भएको पुनले बताए ।

आधुनिक नेपालको राजनीति १२ बुँदे समझदारीको जगबाट अघि बढेकाले त्यस पक्षधर शत्तिहरुबीच दैनन्दिनका राजनीतिक एजेण्डामा विमति भए पनि उपलब्धी बचाउने सवालमा समानता रहेको उनको भनाइ थियो ।

‘आजको राजनीति गणतन्त्र, संघीयता, धर्मनिरपेक्षता, समावेशीताको र सामाजिक न्यायको राजनीति हो । यसलाई समर्थन गर्ने मुलधारका राजनीतिक शक्तिहरुले यी परिवर्तनका आधार स्तम्भहरुलाई थप विकास, सुदृढ र परिस्कृत गर्दै जाँदा जनताको म्याण्डेटबाट गलहत्याइएको राजतन्त्र फर्कने कुनै गुञ्जायास छैन’, पुनले भने ।

३० वर्षे पञ्चायतभन्दा बहुदलका समयमा र बहुदलभन्दा गणतन्त्रको १६ वर्षमा स्वास्थ्य, शिक्षा, सडक, भौतिक पूर्वाधारसहित विकासका सबै सूचकांकमा चार गुणभन्दा बढी प्रगति भएको आँकडाले नै पुष्टि गरेको भन्दै उनले ‘केही पनि भएको छैन भन्ने’ पश्चगामीहरुले फैल्याउन खोजेको भ्रम मात्र भएको टिप्पणी गरे ।

पछिल्लो समय सामाजिक सञ्जालको दुरुपयोगमार्फत समाजमा नकारात्ममकता फैलाउने प्रवृत्ति देखिएको उनले औंल्याए । यद्यपि जनताले छिटो विकासको आकांक्षाका आधारमा भएका गरेका सकारात्मक आलोचानलाई सरकार र दलहरुले आत्मसात गर्नुपर्नेमा भने पुनले जोड दिए ।

 

सिन्धुली । नेकपा (माओवादी केन्द्र) मरिण गाउँ समितिले पूर्वनिर्धारित कार्यक्रमअनुसार नै आयोजना गरेको वृहत जनसांस्कृतिक कार्यक्रममा सो पार्टीको आन्तरिक कलह तल्लो तहका कार्यकर्ताले देखिने गरी छताछुल्ल भएको छ ।

बाहुबली सांसद राजन दाहालकै कारण सिन्धुलीमा पार्टी कमजोर बनेको, व्यक्तिवादी प्रवृति हाबी भएको, आर्थिक स्रोत केन्द्रिकृत गरेको र पार्टीलाई सामुहिक पद्धतिमा भन्दा व्यक्ति केन्द्रित ढंगले अगाडि बढाएको जस्ता विषय हेर्डक्वार्टरमा रिपोर्टिङ भएपछि त्यसको असर जिल्लामा सार्वजनिक कार्यक्रममै देखिएको हो ।

गत शनिबार आयोजित साँस्कृतिक कार्यक्रमलाई रोक्न सांसद तथा जिल्ला इन्चार्ज राजन दाहालले उपाध्यक्ष अग्नी सापकोटाको सहयोग माग्दै फोन गरेका थिए । उनको यो प्रयास सिन्धुलीमा इन्चार्जका रूपमा खटिएका उनीभन्दा सिनियर नेता महेश्वर दाहाललाई प्रमुख अतिथि बन्नबाट रोक्नका लागि थियो ।

सांसद दाहालको आग्रहपछि सापकोटाले अभियानका सिन्धुली जिल्ला इन्चार्ज महेश्वर दाहाललाई फोन गरेर कार्यक्रम स्थगन गर्न निर्देशन पनि दिए ।

इन्चार्जले महेश्वरले कार्यक्रम रोक्नु पर्ने अवस्था आयो भनेर जिल्ला पार्टी कमिटीका संयोजक र आयोजक मरिण गाउँ कमिटीलाई जानकारी दिएपछि मरिणमा अभियानका क्रममा खटिएकी इन्चार्ज उर्मिला लामाले बागमती प्रदेश कमिटी अध्यक्ष सरल सहयात्रीलाई सम्पर्क गरेकी थिइन् ।

प्रदेश अध्यक्षले स्थानीयस्तरका पूर्वनिर्धारित कार्यक्रम अन्य जिल्लामा पनि रोकिएका छैनन् भनेपछि निर्धारित समयमै जनसाँस्कृतिक कार्यक्रम गर्ने टुंगो लाग्यो ।

कार्यक्रम नरोकिने भएपछि सांसद दाहालले जिल्ला इन्चार्ज महेश्वर दाहाललाई होइन जनकलाकार जीवन शर्मालाई प्रमुख अतिथि बनाउन भन्दै मरिण पालिका कमिटी अध्यक्ष काजीमान थिङलगायतका नेताहरूलाई फोन गरेका थिए ।

तर, मरिणको साहान रंगशाला मैदानमा भएको कार्यक्रम महेश्वर दाहाललाई प्रमुख अतिथि बनाएर सुरू भयो । कार्यक्रममा माओवादीका केन्द्रीय सदस्य गंगा तामाङ, सिन्धुलीका संयोजक पानीराज बम्जन, मरिण गाउँपालिका अध्यक्ष विमर्श मोक्तान, सुनकोशी गाउँपालिकाकी अध्यक्ष दीपा बोहरा दाहाल, गोलन्जोर गाउँपालिका उपाध्यक्ष ज्वालाप्रसाद न्यौपाने पुकार, ध्याङलेख गाउँपालिका उपाध्यक्ष शंकरमान घलान उपस्थित थिए ।

कार्यक्रममा आतिथ्यता ग्रहणसँगै फूलको गुच्छा दिने क्रममा अतिथि बनेकी सांसद राजन दाहाल पत्नी एवं सुनकोशी गाउँपालिका अध्यक्ष दीपा बोहरा दाहालले कार्यकर्ताले दिएको फुलको गुच्छा मञ्चमै फालिदिएपछि उपस्थित नेता कार्यकर्ताहरू चकित बनेका थिए ।

सामाजिक सञ्जालमा चर्का चर्का आदर्शका पाठ लेख्ने नेता पत्नीले कार्यक्रमस्थलमा नेता कार्यकर्ताकाबीच गरेको उक्त हर्कतपछि माओवादी सिन्धुलीको आन्तरिक किचलो सतहमा आएको हो ।

महेश्वरलाई कालोमोसो दल्ने योजना फेल

कार्यक्रम रोक्न दलबलसहित पुगेकी उनलाई कार्यक्रममा कुनै पनि गलत कदम नचाल्न पत्रकार मिनकुमार दाहालले सुझाएपछि अध्यक्ष बोहरा, उपाध्यक्ष न्यौपानेलगायतको समूह कार्यक्रम छोडेर हिंडेका थिए । उनीहरू मञ्च छोडेर हिँडेपछि भने कार्यक्रम निर्वाधरूपमा सुचारु भएको थियो ।

कार्यक्रमको प्रमुख अतिथि लेखनाथ दाहाल राजनलाई वनाउनै पर्ने दवाव आयोजकलाई राजन पक्षवाट आयो । आयोजकले जिल्ला सहजकर्ता महेश्वर दाहाललाई वनाउनु पर्छ भन्ने अडान लिए । त्यसपछि राजन पक्ष कार्यक्रम भाँड्ने तयारीमा लाग्यो ।

कार्यक्रम भाँड्न राजनपक्षले गाउँगाउँ गएर कार्यक्रममा नजान उर्दी नै लायो । कार्यक्रम हुने नै भए पछी कार्यक्रमका प्रमुख अतिथि बनेका महेश्वर दाहाललाई कुट्ने,कालो मोसो दल्ने तयारी सहित राजनकी श्रीमती दिपा वोहोरा र जिल्ला सचिव ज्वालान्यौपाने पुकारको समूह त्यहाँ पुगेको थियो ।

त्यहाँ तैनाथ रहेका स्वयंसेवकले धम्क्याए पछी राजन समुह त्यहाँवाट पछी हटेको बताइएको छ ।

माओवादी केन्द्रको सिन्धुलीमा जारी अभियानलाई असफल बनाउनेदेखि मरिणको जनसाँस्कृतिक कार्यक्रम बिथोल्नेसम्मको राजन दाहाल समूहको विवरण पार्टी हेर्डक्वार्टरमा पुगेको छ । उता सांसद दाहालले महेश्वरलाई काउन्टर दिन मरिणमै कात्तिक २६ गते आफ्नो तर्फबाट सांस्कृतिक कार्यक्रम आयोजना गरेका छन् ।

माओवादी केन्द्र सिन्धुलीमा पार्टी उपमहासचिव हरिबोल गजुरेल र तत्कालीन सिन्धुली जिल्ला इन्चार्ज राजन दाहालकाबीचको टकराबले यो अबस्थासम्म ल्याइपुर्‍याएको चर्चा चल्न थालेको छ ।

गजुरेललाई जिल्लाबाट टिकटको सिफारिससमेत गर्न नदिएर अपमानित ढंगले लखेटेका राजनले महेश्वरलाई पनि इन्चार्जका रूपमा असफल पार्न आफ्ना उद्दण्ड कार्यकर्ता परिचालन गरेको आरोप छ ।

विगतमा राजमार्गमा ढाट राखेर फिरौती उठाउने गरेको आरोपसमेत लागेका राजनले पछिल्लो समय क्रसर उद्योगमा लगानी गरेका छन् । उनले इस्काभेटरहरू भाडामा लगाएका छन् । सोही काममा परिचालित केटाहरू उनको उक्साहटमा हिँड्ने गरेका छन् ।

राजननिकट कार्यकर्ताहरूले अचेल दिनहुँ फेसबुकमा महेश्वर दाहालको विरोधमा स्टाटस लेख्ने जिम्मेवारी पाएका छन् । जिल्ला सचिवसमेत रहेका गोलञ्जोर गाउँपालिका उपाध्यक्ष पुकार न्यौपानेले महेश्वरलाई लिन प्याओको संज्ञा दिएका छन् ।

माओवादी किचलोको पृष्ठभूमि !

गएको स्थानीय निर्वाचनका क्रममा पालिका अध्यक्ष र उपाध्यक्षको उम्मेदवारीको विषयबाट सुरू भएको गजुरेल र राजन दाहालबीचको मनमुटाव संघीय र प्रदेश निर्वाचनसम्म आइपुग्दा बोलचाल नैं बन्द हुने अबस्थामा पुग्यो ।

सिन्धुली माओवादीलाई एक हाते गाईजस्तै बनाएका दाहालले ९ वटा पालिकाबाटै हरिवोलको नाम सिफारिस हुनबाट रोक्ने प्रयास गरे । मरिण गाउँपालिकाले मात्रै गजुरेलको नाम संघीय उमेदवारका रूपमा पठाए पनि बाँकी ७ पालिका कमिटीले दाहालको एकल नाम निर्णय गरेर गजुरेललाई निषेध गरे ।

त्यही किचलोबीच हरिवोललाई टिकट नदिएर छोरी रेणुको दबाबमा प्रचण्डले राजनलाई दिलाएका थिए । अहिले गजुरेललाई राजनैतिक सल्लाहकार नियुक्त गरेर शक्ति सन्तुलन मिलाउने प्रयत्न गरेका छन् । अहिले उनको इन्चार्जको जिम्मेवारी खोसिएको छ ।

राजनको विगत जोडिएको यो सामग्री पनि पढ्नुस् : अमरेश सिंहले माओवादी सांसद राजन दाहाललाई ‘गुण्डागर्दी’ स्मरण गराउनुको यस्तो रहेछ रहस्य (भिडिओ)

सिन्धुली माओवादीमा विधि पद्धति स्थापित हुनेभन्दा व्यक्तिवादी प्रवृत्ति हाबी भएको र माओवादी कार्यकर्ताहरू एमालेमा प्रवेश गर्न थालेको पृष्ठभूमिकाबीच माओवादी अभियान महेश्वर दाहालले आक्रामकरूपमा चलाइरहेका थिए ।

पार्टी हेर्डक्वार्टरले राजन दाहालबाट सिन्धुलीमा पार्टी बलियो बन्न नसक्ने निष्कर्षसहित सिन्धुलीबाट काठमाडौंको तारकेश्वर नगरपालिकाको इन्चार्ज बनाएर पठायो । सिन्धुलीबाट आफूलाई निकाल्ने काम गजुरेलकै भएको निष्कर्षमा पुगेका दाहालको ठाउँमा पत्रकार एवम् माओवादी आन्दोलनका नेता महेश्वर दाहाललाई इन्चार्ज बनाएर खटाएको थियो ।

कमलामाई नगरको अभियान असफल बनाएपछि हरिवोल असफल हुने भन्दै सांसद दाहालले ‘महेश्वर असफल भए, सिन्धुलीमा म मात्रै सफल हो, अरुले पार्टी सञ्चालन गर्न सक्तैनन’ भन्ने सन्देश दिने उद्देश्यले चलखेल गरे ।

आफूनिकट निकट नगरकमिटीका पदाधिकारीलाई बैठक र भेला नबोलाउन र आलटाल गर्न निर्देशन दिए । त्यो निर्देशनले काम पनि गर्‍यो । सांसद दाहालले कार्यक्रम अवरोध गर्न दिएका तथ्यहरू सार्वजनिक भएपछि सोही तथ्यका आधारमा बागमती प्रदेश कमिटी र हेर्डक्वार्टरमा रिपोर्टिङ भयो ।

सबैतिरबाट आफ्नो गलत कुराको रिपोर्टिङ भएपछि आक्रोशित बनेका दाहालले सिन्धुली माओवादीमा आफ्नो पकड गुम्ने देखेपछि तल्लो तहका कार्यकर्तालाई फोन गरेर धम्क्याउने र आफ्ना आलोचकविरुद्ध फेसबुकमा लेख्न लगाउनेसम्मका कामहरू गर्न थालेको मरिणको जनसाँस्कृतिक कार्यक्रमसम्म आइपुग्दा देखिएको छ ।

महेश्वरविरुद्ध अभियान नै चलाइयो

केही दिनअघि पेरिसडाँडामा गाउँ जागरण अभियानको समीक्षा को क्रममा जिल्ला सहजकर्ता महेश्वर दाहालले सिन्धुलीमा माओवादी छैन माओवादी छन् त एमालेमा कि त बाबुराम भट्टराईको पार्टीमा भन्दै प्रतिवेदन पेश गरेका थिए ।

यसको प्रतिकृयामा महेश्वर दाहाललाई माओवादी जिल्ला सचिव ज्वाला प्रसाद न्यौपाने पुकारले दाहालमाथि आक्रोश पोखे । यो संगै आईएम विथ राजन दाहाल भन्दै सोसियल मिडियामा ह्यासट्याग अभियान चलाइएको छ । यो अभियान पछाडि राजन नै भएको यहाँका कार्यकर्ता बताउंँछन् ।

माओवादी आन्दोलन चरम रुपमा उठ्दै गर्दा जिल्ला नेता गंगा नाराण श्रेष्ठ २०५३ वैशाख २४ गते अमलेवाट गिरफ्तार भए । उनको गिरफ्तारी संगै रहेका लेखनाथ दाहाल राजन पनि आसपासकै गाउँमा थिएँ । उनि त्यहाँवाट घर जान्छु भन्दै हिंडे । त्यही वाट वेपत्ता भए । सिन्धुलीबाट गंगानाराण श्रेष्ठ र मोहन घिमिरेलाई विरगञ्ज कारागार सरुवा गरियो । गंगानाराण गएको केही समयपछि मानव बेचविखनमा संलग्नताको आरोपमा राजन वीरगञ्ज कारागारमा आइपुगे ।

कारागारवाट निष्कने समयमा गंगानारायणले पार्टीलाई पत्र लेख्दै लेखनाथ दाहाललाई पार्टीमा जिम्मेवारी दिन अनुरोध गर्दै पत्र लेखे । पत्र बोकेर लेखनाथ दाहाल सिन्धुली आए, प्रशासन समक्ष आत्मसर्मपण गरे र पार्टी सम्पर्कमा जानुको साटो उनी भारत पश्चिम वंगालको कलकत्ता गएर चौकिदारी गर्न थाले ।

संयोग के भने त्यही समयमा यौन काण्डमा कारबाही परेका हरिवोल गजुरेल पनि मद्रासमा पुगेका थिए त्यहाँ पढ्दै पार्टी काम समेत गर्ने मनोज जंग थापाले हरिवोल गजुरेललाई पनि एउटा जुत्ता कारखानामा चौकिदारको जागिर लगाइदिए ।

प्रवासमै बसेर माओवादी युद्धलाई सहयोग हुने पत्रकारिता गर्दै पार्टी राजनीतिमा संल्गन महेश्वर दाहाल अहिले जिल्ला सहजकर्ता बनेर सिन्धुली आएका छन् । मुम्बईमा रहेका महेश्वरले नै माओवादी प्रवास इन्चार्ज झक्कु सुवेदीलाई एक दिन राजनलाई यसो पत्र बोक्ने काम लगाउन भने । उनले नै झक्कुलाई उनीमाथि ठूलो विश्वास चैँ गरी नहाल्नु उनी आत्मसर्मपण गरेर आएका हुन् भन्दा झक्कुले पश्चिम नेपालमा हो भने आत्मसर्मपण गर्नेलाई भाटे कारबाही गर्थ्यौं तर्पाँइ काम लाउनु भन्नु हुन्छ भन्दै सुरूमा हच्किए ।

प्रवासमै हुँदा हरिवोल र राजनको पनि भेट भयो । पहिलो संविधानसभाको निर्वाचनमै हरिवोल सिन्धुलीको क्षेत्र नं. २ वाट चुनाव उठ्न चाहान्थे त्यतीवेला सिपी गजुरेलले टिकट पाए । दोश्रो पटक गंगानाराण श्रेष्ठले टिकट लिए पछि भने हरिवोल चिडिए र राजनलाई उनैले सिन्धुली ल्याए र गंगानारायण श्रेष्ठलाई विस्थापित बनाउने योजना वनाए । लेखनाथ र हरिवोलको घेराबन्दीका कारण गंगानारायण श्रेष्ठले पार्टी नै छाड्नु पर्‍यो ।

माओवादी आन्दोलको अप्ठ्यारो समयमा नेतृत्व लिई योगदान गरेका गंगानारायण श्रेष्ठ, हरिबहादुर श्रेष्ठ, विजय स्याङतान, एकवहादुर मगर, सुरथ वहादुर स्याङतान, वन्दना सुवेदी, उर्मिला देवकोटा जस्ता होनाहार नेताहरु पार्टी नै छाडेर वावुराम भट्टराईको पार्टीमा जान बाध्य भएका छन ।

मनोज जंग थापा, निरुकुमारी दर्लामी, शान्तिमान कार्की, डम्वर कार्कीलगायतका नेता नेकपाको निरन्तरताको रूपमै रहेको एमालेमा छन् ।

समस्या सुप्रिमोलाई !

पार्टीको तीन महिने अभियानमा काठमाण्डौको तार्केश्वर नगरपालिका खटाइएका राजन दाहाल आफ्नो कार्यक्षेत्र नबसेर पुरै शक्ति सिन्धुली केन्द्रित गरेका छन। पार्टी अभियानमा सिन्धुली आएका नेताहरुलाई असफल सावित तुल्याउन लागि परेको नेताहरु बताउँछन् ।

उनको यस किसिमको अराजक र अराजनितिक हर्कतले आजित भएपछि स्थानीय मरिण गाउँपालिका कमिटीले दाहाललाई कारबाहीको माइन्युट नै गरेर माथिल्लो कमिटीमा सिफारिस गरेको एक माओवादी नेताले बताए।

माओवादीको जिल्ला संयोजक हरिवोल निकट पानीराज बम्जनलाई बनाएको भएपनि, हरेक गतिबिधीमा उनी आफै हाबी हुने गरेका छन।यति सम्म कि राजनले आफु सहभागि नहुने अबस्था भएमा भातृ संगठन देखि वडा कमिटी सम्मको नियमित बैठक समेत रोक्न वा सार्न दबाब दिने गरेका छन।

अध्यक्ष प्रचण्डकी छोरी रेणुको दबाबका कारणले केन्द्रीय सदस्य बन्न सफल भएका राजन दाहाल हरिवोल गजुरेलकै कारण पोलिटब्युरो सदस्यसम्म बने । रामेछापबाट दाहाललाई सिन्धुली ल्याएर जिल्ला अध्यक्ष र इन्चार्जसम्म बनाएका गजुरेललाई नै निरन्तर जिल्लामा रोकावट गर्न थालियो ।

कस्ले कस्लाई पछार्नेबाट प्रारम्भ भएको लडाइँ पछिल्लो समय सुप्रिमो प्रचण्डले सिन्धुली जिल्लाको तथ्य बुझ्न र पार्टी संगठनलाई विधिसम्मत ढंगले सञ्चालन गर्न खटाइएका महेश्वर दाहालसँग जोडिन पुगेको छ ।

अब प्रचण्डका अगाडि पार्टीलाई सामूहिकरूपमा विधिसम्मत ढंगले सञ्चालन गर्ने र जिल्लामा गुमेको माओवादीको जनाधार फिर्ता गराउन सक्ने नयाँ नेतृत्व स्थापित गर्ने वा एक हाते पार्टी सञ्चालन गर्ने राजन दाहाल जस्ता स्टण्टबाज रोज्ने भन्ने गंभीर प्रश्न खडा भएको माओवादी नेताहरू बताउँछन् ।

सुप्रिमो प्रचण्डको यही निर्णयले सिन्धुलीमा माओवादी बलियो बनाउने वा सिध्याउने भन्ने कुराको निर्धारण गर्ने चर्चा माओवादी वृत्तमा चल्न थालेको छ ।

काठमाडौं । नेकपा माओवादी केन्द्रको उपत्यका विशेष प्रदेशले जाजरकोट र रुकुमपश्चिमका भूकम्प प्रभावितका लागि राहत पठाएको छ । प्रदेश इन्चार्ज वर्षमान पुन अनन्तले गोंगबु नयाँबसपार्क पुगेर सोमबार भूकम्प प्रभावित क्षेत्रका लागि राहत पठाएका हुन् ।

४ सय थान कम्बलसहित चाउचाउ र खाद्यान्न पठाइएको सो माओवादी सम्वद्ध मजदुर संगठन अखिल नेपाल ट्रेड युनियन महासंघका अध्यक्षसमेत रहेका प्रदेश अध्यक्ष जगत सिंखडाले बताए ।

यस्तै, सिरक, त्रिपाल र म्याट ४/४ सय थान तथा ४ सय क्विन्टल चामल समेत पठाउन लागिएको पुनले जानकारी दिए । बुधबार वा बिहीबारसम्म राहत सामग्री प्रभावितका जिल्ला दैवी प्रकोप उद्धार समिति समक्षा पुग्ने गरी व्यवस्था मिलाइएको उनको भनाइ थियो ।

उनले प्रभावितहरु नियमित जीवनमा नफर्किंदासम्म पार्टी र सरकारका तर्फबाट राहत संकलन र वितरण जारी राखिने जानकारी दिए ।

जाजरकोटको बारेकोट गाउँपालिका–१ रामीडाँडा केन्द्रबिन्दु भएर शुक्रबार राति गएको ६.४ रेक्टर स्केलको भूकम्पका कारण जाजरकोटमा १०४ र रुकुमपश्चिममा ५३ गरी १ सय ७५ जनाले ज्यान गुमाएका छन् । दुई सयभन्दा बढी घाइतेको जाजरकोट, रुकुमपश्चिम, सुर्खेत, बाँके र काठमाण्डुका विभिन्न अस्पतालमा उपचार जारी छ । भूकम्पका कारण झण्डै ८ हजार घर बस्नै नमिल्ने गरी भत्किएका छन् ।

 

काठमाडौं । नेकपा माओवादी केन्द्रले पनि भूकम्पपीडितहरूको राहतका लागि रकम प्रदान गरेको छ ।

उपाध्यक्ष पम्फा भुसालसहितको टोलीले प्रधानमन्त्री पुष्पकमल दाहाल ‘प्रचण्ड’ लाई भेटेर प्रधानमन्त्री दैवी प्रकोप उद्धार कोषमा जम्मा गर्ने गरी ५० लाखको चेक हस्तान्तरण गरेको छ ।

जाजरकोट र रुकुम पश्चिमका भूकम्पपीडितका लागि आजै नेपाली कांग्रेसले ५० लाख र नेकपा एसले २५ लाखको चेक हस्तान्तरण गरिसकेको छ ।

रूपन्देही । नेकपा माओवादी केन्द्र रूपन्देहीले अनैतिक क्रियाकलाप गरेर चर्चामा आउने शान्ति बराललाई कारबाही गरेको छ ।

टिकटकमा गोप्य अंग देखाएर भाइरल बनेकी बराललाई माओवादीले साधारण सदस्यबाट समेत हटाएको हो । उनी सो पार्टीको सैनामैना नगर कमिटीमा थिइन् ।

माओवादी सैनामैनाका अध्यक्ष नारायण महतले सांस्कृतिक रूपान्तरणमा लागेको पार्टीमा यस्ता अनैतिक काम गर्ने छुट कसैलाई नभएको भन्दै बराललाई कारबाही गरेको जनाएका छन् ।

पार्टीका नेताहरूसँगै सेल्फी खिच्ने, विभिन्न व्यक्तिसँग जोडेर टिकटक बनाउने र चर्चामा आउने बराल यसअघि पनि पटक पटक विवादमा पर्दै आएकी थिइन् ।

पछिल्लोपटक उनले टिकटक लाइभका क्रममा वक्षस्थल देखाएको भिडिओ क्लिप भाइरल भएपछि पार्टीले उनलाई कारवाही गरेको हो ।

काठमाडौं । नेकपा माओवादी केन्द्रले गणतन्त्र र संघीयताविरोधीहरूको विरुद्ध २२ मंसिरका लागि घोषणा गरेको काठमाडौंको जनप्रदर्शन स्थगित गरेको छ । भूकम्पका कारण काठमाडौंमा हुने भनिएको जन प्रदर्शन स्थगित भएको माओवादी केन्द्रले जनाएको छ ।

सरकारको नेतृत्व गरेर सडक आन्दोलन घोषणा गरेकोमा आलोचना भइरहेका बेला माओवादीले भूकम्पलगायत कारण तत्कालका लागि सो कार्यक्रम स्थगित गरेको हो ।

काठमाडौंबाहेक अन्य स्थानमा भने प्रदर्शन यथावत रहेको माओवादी प्रवक्ता अग्नि सापकोटाले बताएका छन् । सापकोटाले वडा र स्थानीय तहका कार्यक्रम भने यथावत रहने बताए ।

काठमाडौं । नेकपा माओवादी केन्द्रनिकट अनेरास्ववियू क्रान्तिकारीले भूकम्प प्रभावित क्षेत्रको पुनर्निमाणमा सहयोगका लागि उपाध्यक्षको नेतृत्वमा तीनवटा टोली परिचालन गर्ने निर्णय गरेको छ । बागबजारस्थित कार्यालयमा आइतबार बिहान बसेको केन्द्रीय समिति बैठकले जाजरकोट, रुकुम पश्चिमलगायत भूकम्प प्रभावित क्षेत्रमा संगठनको टोली परिचालन गर्ने निर्णय गरेको हो ।

उपाध्यक्ष मदन भुल नेतृत्वको टोली रुकुम पश्चिममा खटिने, पवन कार्कीको नेतृत्वको टोलीले उपत्यकामा राहत संकलन गर्ने र अम्मरराज शाहीको नेतृत्वको टोली जाजरकोट खटिने संगठनका अध्यक्ष पञ्चा सिंहले जानकारी दिइन् । उनका अनुसार तीन वटै टोलीमा १००-१०० जना रहनेछन् ।

कार्यक्षेत्रमा टोली सोमबारबाट खटिने र जाजरकोट भूकम्पबाट बढी प्रभावित क्षेत्र भएकाले थप जनशक्ति खटाउने अध्यक्ष सिंहको भनाइ छ । यस्तै प्रभावित क्षेत्रका पीडितमा रगतको अभाव नहोस् भनेर संगठनले आइतबारदेखि नै रक्तदान कार्यक्रम सञ्चालन गरेको उनले बताइन् । क्रान्तिकारीले काठमाडौंको महाराजगञ्ज, बाँकेको नेपालगञ्ज र सुर्खेतमा रक्तदान कार्यक्रम गरिसकेको छ ।

काठमाडौं । नेकपा (माओवादी केन्द्र) ले तीनै तहका सरकार, सुरक्षा निकाय, सामाजिक संघ संस्था लगायत आम जनसमुदायलाई सक्रियतापूर्वक उद्धार तथा राहत कार्यमा लाग्न अपिल गरेको छ ।

शनिवार एक प्रेस विज्ञप्ति जारी गर्दै प्राकृतिक विपद्को यस क्षणमा कर्णाली प्रदेश लगायत सिंगो पार्टीपक्ति, जनवर्गीय संगठन तथा मोर्चा र विभागलाई तत्काल उद्धार र राहतमा द्रुतगतिमा जुट्न निर्देशन पनि दिएको छ ।

‘विपद्को यस घडीमा घाइतेको खोज तथा उद्धार गरी अविलम्ब उपचारको व्यवस्था मिलाउन, विस्थापितलाई पुनर्स्थापनाको व्यवस्था गर्न, खाद्यान्न लगायतका आवश्यक बन्दोवस्तीको सामग्रीको यथाशीघ्र व्यवस्था गर्न हाम्रो पार्टी सरकारसँग माग गर्दछ,’ पार्टी महासचिव देव गुरुङले जारी गरेको विज्ञप्तिमा भनिएको छ ।

माओवादीले गएरातिको भूकम्पमा परेर ज्यान गुमाउनेप्रति श्रद्धाञ्जली व्यक्त गर्दै परिवारजनमा गहिरो समवेदना व्यक्त गरेको छ भने घाइतेको शीघ्र स्वास्थ्य लाभको कामना पनि गरेको छ ।

जाजरकोटको रामीडाँडा केन्द्रबिन्दु भएर गएराति पौने १२ बजे ६.४ रेक्टर स्केलको भूकम्पबाट जाजरकोट र रुकुम पश्चिम लगायतका जिल्लामा सयौँको संख्यामा मानवीय क्षति भएको छ भने हजारौँ घाइते तथा अंगभंग भएका छन् ।

यस्तै करोडौंको भौतिक क्षेत्र भएको प्रारम्भिक विवरण आइरहेका छन् । भूकम्पबाट भएको क्षतिको पूर्ण विवरण आउन बाँकी नै रहेकाले क्षति अझ बढ्न सक्ने आँकलन गरिएको छ ।

काठमाडौं । प्रधानमन्त्री पुष्पकमल दाहाल ‘प्रचण्ड’ ले जलवायु परिवर्तनका कारण नेपालले भोग्नुपरेको समस्याबाट समाधानका लागि यसपटक स्पष्टरुपमा दाबी पेश गर्नुपर्ने बताएका छन् ।

कोप–२८ मा नेपाल कसरी प्रस्तुत हुने भन्नेबारेमा प्रधानमन्त्री निवास बालुवाटारमा परराष्ट्र मन्त्रालय, वन तथा वातावरण मन्त्रालयलगायतका सचिवसँगको छलफलमा उनले नेपालले यसपटक प्रभावकारी र सशक्तरुपमा दाबी पेश गर्नुपर्ने बताए ।

उनले भने, ‘जलवायुको मुद्दामा नेपालले महत्वपूर्ण पहल लिन सक्छ । यो मुद्दामा विश्वलाई नै हामीले नेतृत्व गर्ने गरी हामी प्रस्तुत हुनुपर्छ । यो मुद्दाको ‘लिडर’ हामी हो । हाम्रा कागजपत्र हामी लिडर भएर प्रस्तुत हुने खालका हुनुपर्छ । जलवायुमा असर गर्ने तपाईंहरु सजाय भोग्ने हामी ? तपाईंहरुले गरेको प्रतिबद्धता किन पूरा नगरेको भनेर विश्वसामू प्रस्तुत होऔँ । यसपटक निवेदक होइन, दाबी प्रस्तुत गर्ने गरी प्रस्तुति रहन्छ ।’

आगामी मङ्सिर ५ गते नेपालमा यसबारे सम्मेलनको आयोजना गरिने बताए । उक्त सम्मेलनको निष्कर्षका साथ कोप–२८ मा प्रस्तुत हुने सरकारको तयारी छ । जलवायुका क्षेत्रमा आउने सहयोग सरकारमार्फत हुने कुरा दृढतापूर्वक राख्नुपर्ने बताए ।

जलवायु परिवर्तनको असर न्यूनीकरणका लागि प्राप्त हुने विदेशी सहयोग र क्षतिपूर्ति सरकारी प्रणालीमा आउनुपर्ने बताए ।

 

काठमाडौं । नेकपा माओवादी केन्द्रले चलाइरहेको जनतासँग माओवादी विशेष रुपान्तरण अभियानको एक महिना समय थप गरेको छ। तीन महिनाको लागि थालिएको अभियानको प्रभाकारिकता बढेको निष्कर्ष निकाल्दै आतबार बसेको पदाधिकारी बैठकले एक महिनाको लागि समय थप गरेको हो।

बैठकको ६ बुँदे निर्णय पार्टीपक्तिमा सर्कुलर गर्दै अध्यक्ष प्रचण्ड र महासचिव देव गुरुङ भनेका छन्, ‘अभियानलाई अझ प्रभावकारी र परिणाममुखी बनाउन जोड दिने । संघीय सांसदहरु संसद नचलेको बेलामा आ-आफ्नै क्षेत्रमा खटिने । आ-आफ्नो कार्यक्षेत्रको जिम्मा अनुसार सबैलाई निरन्तर रुपमा खट्ने र खटाउने कुरामा जोड दिने । खटेको वा नखटेको विषयमा सम्बन्धित तहगत इञ्चार्जहरुबाट नियमित रुपमा आफुभन्दा माथिल्लो कमिटीमा रिपोर्टिङ्को व्यवस्था गर्ने । रिपोर्टिङ् प्रणाली तल्लो वडा तहबाट नै त्यहाँको राजनीतिक पार्टीहरुको स्थिति, हाम्रो पार्टी र हाम्रो पार्टी सम्बद्ध जवस/मोर्चाहरुको संगठनात्मक स्थिति, सामाजिक संघ संस्थाहरुको स्थिति, संगठनात्मक गतिविधिहरु र समग्र वडाको जनमतको स्थिति आदि सबै पक्ष समेटेर आवधिक रुपमा रिपोर्ट गर्ने अभ्यास बसाल्ने ।’

यस्तै, बैठकले अभियानको रिपोर्ट नियमति रुपमा केन्द्रीय कार्यालयमा पठाउन निर्देशन दिएको छ। जवस/मोर्चाका सम्पुर्ण सदस्यहरुलाई अभियानमा जोड्ने । ती मोर्चाहरुको सम्मेलन तथा भेलाहरु अभियानलाई प्रभावित नहुने गरी अभियान सकिएपछि गर्ने व्यवस्था मिलाउने । तर प्राविधिक तथा पेशागत संगठनहरुको हकमा अभियान अवधिमा पनि सम्मेलन तथा भेलाहरु गर्न सकिने छ । सर्कुलनमा भनिएको छ।

संघीय लोकतान्त्रिक गणतन्त्रको रक्षा, मुलुकको स्वाधीनताको रक्षा, भ्रष्टाचार विरुद्ध सुशासनको अभियान, अर्थतन्त्रको क्षेत्रमा सुधार लगायतका कार्यहरु सरकारको नेतृत्वमा भइरहेको बैठकमा प्रचण्डले ब्रिफिङ गरे।

उनले भने, ‘देशी विदेशी प्रतिगामी शक्तिहरु षड्यन्त्रमुलक ढंगले विद्यमान उपलब्धिहरुलाई उल्ट्याउन खोज्ने, अस्थिरता र अराजकता पैदा गराई मुलुकमा संकट निम्त्याउन खोज्ने प्रवृत्तिहरु पनि छिटपुट रुपमा देखिएको आदि उल्लेखित रहेका छन् ।’

संगठनात्मक अभियानको सन्दर्भमा देशभरीनै मूलरुपमा प्रभावकारी ढंगले संचालन भइरहेको, अधिकांश नेता कार्यकर्ता फिल्डमा खटिएको तर अझै पनि सबैलाई फिल्डमा खटाउने र अभियानलाई प्रभावकारी तथा परिणाममुखी बनाउनु पर्ने कुरामा केन्द्रित नेता कार्यकर्तालाई निर्देशन समेत दिएका छन्।

काठमाडौं । सत्तारुढ दल नेकपा माओवादी केन्द्रले काठमाडौंमा जनप्रदर्शन गर्ने भएको छ । माओवादी अध्यक्ष तथा प्रधानमन्त्री पुष्पकमल दाहाल ‘प्रचण्ड’ को अध्यक्षतामा आइतबार बसेको बैठकले सडक आन्दोलन गर्ने निर्णय गरेको हो ।

अध्यक्ष प्रचण्ड र महासचिव देव गुरुङको हस्ताक्षरमा पठाइएको ६ बुँदे सर्कुलरमा संघीय लोकतान्त्रिक गणतन्त्रको रक्षा तथा सुदृढीकरण, राष्ट्रिय स्वाधीनताको रक्षा र प्रतिगमनको विरोध आदि विषयलाई लिएर जनप्रदर्शन गर्ने निर्णय भएको उल्लेख छ ।

सर्कुलरमा भनिएको छ, ‘अभियानकै क्रममा पार्टीको बागमती प्रदेश, जबस सम्बद्ध उपत्यका विशेष प्रदेश र उपत्यका सम्पर्क समन्वय प्रदेशको संयुक्त आयोजनामा यही मंसिर २२ गते काठमाडौंमा संघीय लोकतान्त्रिक गणतन्त्रको रक्षा तथा सुदृढीकरण, राष्ट्रिय स्वाधीनताको रक्षा र प्रतिगमनको विरोध आदि विषयलाई लिएर जनप्रदर्शन गर्न र गराउन पहल गर्ने निश्चित गरिएको छ ।’

पछिल्लो सयम प्रधानमन्त्री प्रचण्डले आफैं सरकारको नेतृत्व गरेर पनि व्यवस्थामाथि खतरा बढेको भन्दै लाखौं जनता सडकमा उतार्ने बताउँदै आएका थिए । समाजवादी मोर्चाका सन्देश सभामा प्रधानमन्त्री प्रचण्डले घोषणा गरेअनुसार नै माओवादीले नै सडक संघर्षको कार्यक्रम तय गरेको हो ।

यद्यपि, प्रधानमन्त्रीले नै सडकमा जनता उतार्छु भन्ने अभिव्यक्ति दिएपछि सत्तारुढ घटक नेपाली कांग्रेसमा नेताहरूले भने असन्तुष्टि पोख्दै आइरहेका छन् ।

काठमाडौं । नेकपा माओवादी केन्द्र निकट विद्यार्थी संगठन अनेरास्ववियु क्रान्तिकारीको समानान्तर कमिटी विघटन भएर एउटै कमिटी पुनर्गठन भएको छ । पञ्चा सिंह अध्यक्ष रहेको कमिटीको उपाध्यक्षमा समानान्तर कमिटीका अध्यक्ष पवन कार्की समेटिएका छन् ।

महासचिवमा दीपेश पुन कायमै रहँदा उपाध्यक्ष, उपमहासचिव र सचिवसहित ९९ जनाको पदाधिकारीसहित २३औं राष्ट्रिय सम्मेलन आयोजक समिति गठन भएको इन्चार्ज हिमाल शर्माले जनाएका छन् ।

आयोजक समिति ९९९ सदस्यीय बनेको छ ।

सूची

काठमाडौं । प्रधानमन्त्री पुष्पकमल दाहाल ‘प्रचण्ड’ले उपप्रधानमन्त्री एवं गृहमन्त्री नारायणकाजी श्रेष्ठको स्वास्थ्यवस्थाबारे जानकारी लिएका छन् ।

हात्तिवनस्थित उपप्रधानमन्त्री श्रेष्ठकाे निवासमा पुगेर प्रधानमन्त्री दाहालले आज उपप्रधानमन्त्री श्रेष्ठको स्वास्थ्य लाभको कामना गरेका हुन् । सो अवसरमा उहाँहरुबीच समसामयिक विषयमा कुराकानी भएको उपप्रधानमन्त्री श्रेष्ठको निजी सचिवालयले जनाएको छ ।

जनवादी गणतन्त्र चीनका भ्रमणमा रहेका बेला यही कात्तिक १ गते उपप्रधानमन्त्री श्रेष्ठलाई हृदयाघात भएको थियो । उन बेइजिङस्थित पेकिङ युनियन मेडिकल कलेज अस्पतालमा पाँच दिन उपचार गरेर आज स्वदेश फर्किएका  थिए ।

काठमाडौं । उपप्रधानमन्त्री एवम् गृहमन्त्री नारायणकाजी श्रेष्ठ स्वदेश फर्केका छन् । जनवादी गणतन्त्र चीनको भ्रमणमा रहेका उनलाई त्यहीँ हृदयाघात भएपछि चीनको राजधानी बेइजिङमा उपचार गराएर आज स्वदेश फर्किएका छन् ।

यही १७ र १८ अक्टोबरमा बेइजिङमा आयोजित तेस्रो बेल्ट एण्ड रोड फोरम फर इन्टरनेशनल कोअपरेसन (बीआरएफ)मा सहभागी भएपछि उपप्रधानमन्त्री श्रेष्ठलाई हृदयाघात भएको थियो ।

उनको बेइजिङस्थित पेकिङ युनियन मेडिकल कलेज हस्पिटलमा पाँच दिनसम्म उपचार भएको थियो ।

काठमाडौं । चीन भ्रमणका क्रममा हृदयघात भएपछि उपचाररत उपप्रधानमन्त्री एवम् गृहमन्त्री नारायणकाजी श्रेष्ठ ‘डिस्चार्ज’ भएका छन् ।

उनी बेइजिङस्थित पेकिङ युनियन मेडिकल कलेज हस्पिटलमा पाँच दिनको उपचारपश्चात डिस्चार्ज भएका हुन् ।

तेस्रो बेल्ट एण्ड रोड फोरम फर इन्टरनेशनल कोअपरेसन (बीएफआर) मा सहभागी हुन बेइजिङ पुगेका बेला उपप्रधानमन्त्री श्रेष्ठलाई यही कात्तिक १ गते हृदयघात भएको थियो । उहाँको छातीमा ‘स्टेन्ट’ राखिएको छ ।

अस्पतालबाट डिस्चार्ज हुने क्रममा उपप्रधानमन्त्री श्रेष्ठले आफ्नो उपचारमा संलग्न चिकित्सक, अस्पताल परिवार र बेइजिङस्थित नेपाली दूतावासप्रति आभार जनाएका छन् । आफ्नो स्वास्थ्यवस्थाप्रति चासो, चिन्ता र शुभेच्छा राख्ने सबैप्रति उनले आभार व्यक्त गरे ।

उपप्रधानमन्त्री श्रेष्ठ बुधबार बिहान स्वदेश फर्कने कार्यक्रम रहेको सचिवालयले जनाएको छ ।

काठमाडौं । प्रधानमन्त्री पुष्पकमल दाहाल ‘प्रचण्ड’ ले दसैँको अवसरमा शुभकामना दिँदै आफूहरूलाई पछाडि फर्कने वा यथास्थितिमा रुमलिने छुट नभएको बताएका छन् ।

शनिबार बिहान एक भिडिओ सन्देशमार्फत् शुभकामना व्यक्त गर्दै उनले मुलुक अहिले अवसर र चुनौतीको कठिन परिस्थितिबाट गुज्रिरहेको बताएका छन् ।

‘लामो संघर्ष र बलिदानपछि प्राप्त उपलब्धिको रक्षा, लोकतान्त्रिक गणतन्त्रको संस्थागत विकास र जनताका अपेक्षाहरू पूरा गर्नुपर्ने ठूलो चुनौती मुलुकका सामु रहेको छ’, प्रचण्डले भनेका छन् ।

प्रधानमन्त्रीले भने, ‘हामीले नेपाली विशेषता र मौलिकताको सम्बर्द्धन एवं विकास गरेर ज्ञान, विज्ञान, सभ्यता र संस्कृतिको क्षेत्रमा नयाँ पहल लिन सक्छौं । यस दृष्टिले विविधतासहितको एकतामा आधारित हाम्रो समाज र संस्कृति संसारकै निम्ति अनुकरणीय र प्रेरणादायी रहेको छ । यसको जगेर्ना गर्दै बहुजातीय, बहुभाषिक, बहुसांस्कृतिक एवं बहुधार्मिक विशेषतामा आधारित देश समाज र संस्कृतिलाई थप समुन्नत तुल्याइ राष्ट्रिय एकता र सद्भावलाई सुदृढ गर्नु हामी सबैको साझा दायित्व हो ।’

जस्तोसुकै कठिनाइ आए पनि देशलाई समृद्धितर्फ लैजान सकारात्मक र सृजनात्मक सोचको विकास हुनुपर्ने उनको जोड छ ।

‘जात, वर्ग, धर्म, लिंग, वर्ण, भूगोल, आस्था र साम्प्रदायिक सोचबाट माथि उठेर गरे हुन्छ, परिवर्तन सम्भव छ भन्ने सामुहिक र सकारात्मक चिन्तन अहिलेको आवश्यकता हो,’ उनले शुभकामना सन्देशमा भनेका छन् ।

प्रधानमन्त्रीले अर्थतन्त्रमा परेको दबाब, विकासका परम्परागत शैली, संरचना र प्रणालीको अवरोध राष्ट्र निर्माणमा राष्ट्रिय एकताको भावनालगायतका चुनौती देशका सामु रहेको औंल्याएका छन् ।

उनले थपे, ‘तर, हामीले दृढ अठोटका साथ राष्ट्र, राष्ट्रियता र जनताको हितलाई केन्द्रमा राखेर अघि बढ्न सक्यौं भने हामी हरेक अवरोधलाई छिचोल्न सक्छौं । यही तथ्यलाई आत्मसात् गर्न सके सुशासन र सामाजिक न्यायको प्रत्याभूतिसहित समृद्धिको दिशामा देशलाई अघि बढाउन, जनताको जीवनमा सकारात्मक परिवर्तन ल्याउन सरकार क्रियाशील छ ।

भक्तपुर । बागमती प्रदेशका मुख्यमन्त्री शालिकराम जम्मकट्टेलले बागमती प्रदेशको नाम र राजधानी परिवर्तन गर्नुपर्ने बताएका छन् । मध्यपुरथिमिमा नेकपा (माओवादी केन्द्र) मध्यपुर नगर समितिले आज आयोजना गरेको शुभकामना आदानप्रदान कार्यक्रममा उनले बागमती प्रदेशको नाम र राजधानी दुबै अनुपयुक्त रहेको बताए ।

बागमती प्रदेश नामाकरणमा धेरै जनता खुसी नभएको दाबी गर्दै मुख्यमन्त्री जम्मकट्टेलले त्यतिबेला प्रदेशसभामा आफूले अन्तिम समयसम्म  प्रदेशको नाम नेवा–ताम्सालिङ नै हुनुपर्छ भनेर अडान लिए पनि त्यतिबेला सम्भव हुन नसकेको बताए ।

मुख्यमन्त्री जम्मकट्टेलले भने “प्रदेशको नाम बागमती परिवर्तन गरेर नेवा–ताम्सालिङ नै राखिनुपर्छ, प्रदेश राजधानी हेटौँडामा अपायक छ, प्रदेशको एउटा कुनामा छ, चितवन र मकवानपुरबाहेक अरु ११ जिल्लालाई पायक पर्दैन, सबैलाई पायकपर्ने गरी प्रदेश राजधानी धुलिखेलनै राखिनुपर्छ, उपयुक्त समय आएपछि राजनीतिक सहमतिबाटै राजधानी र नाम दुबै परिवर्तन हुन्छ र त्यो प्रदेशसभाको अधिकार पनि हो ।”

अहिलेको व्यवस्था मन नपराउनेबाट असन्तुष्टिका स्वर आउन सक्ने मुख्यमन्त्री जम्मकट्टेलको भनाइ छ । बागमती प्रदेशले नेवार र तामाङ समुदायको भाषालाई सरकारी कामकाजीको भाषाको रुपमा प्रयोग गर्ने गरी ऐन पारित गरेको र यसलाई आगामी ६ महिनाभित्र सबै निकायमा कार्यान्वयनमा ल्याउने उनले बताए ।

अहिलेनै सरकारी निकाय र स्थानीय तहलाई कुनै पनि सूचना जारी गर्दा, साइनबोर्ड राख्दा नेपालीसहित नेपाल भाषा र तामाङ भाषामा समेतको प्रयोग गर्न निर्देशन दिइसकेको, सरकारी कार्यालयमा यी तीन वटै भाषाको निवेदन लिन पनि निर्देशन दिइसकेको मुख्यमन्त्री जम्मकट्टेललको भनाइ थियो । प्रदेशसभाले स्वास्थ्य ऐन पारित नुहँदा धेरै स्वास्थ्य संस्था नवीकरण हुन नसकेको भन्दै हिउँदे अधिवेशनले ऐन पारित गर्ने उनले बताए ।

 

काठमाडौं । प्रधानमन्त्री पुष्पकमल दाहाल प्रचण्डको परराष्ट्र सल्लाहकारमा परराष्ट्र मामिलाका जानकार डा. रुपक सापकोटा नियुक्त भएका छन् । बिहीबार बसेको मन्त्रिपरिषद्को बैठकले सापकोटालाई सल्लाहकारमा नियुक्त गरेको हो ।

डा. सापकोटा हाल त्रिभुवन विश्वविद्यालयमा अन्तर्राष्ट्रिय सम्बन्ध तथा कूटनीति विषयमा प्राध्यापनरत छन् । यसअघि उनले परराष्ट्र मामिला अध्ययन प्रतिष्ठानको उप-कार्यकारी निर्देशकको जिम्मेवारी निर्वाह गरिसकेका छन् ।

डा. सापकोटा विश्व राजनीति, अन्तर्राष्ट्रिय सम्बन्ध, भू-राजनीति, विदेश नीति, राष्ट्रिय सुरक्षा एवं रणनीतिक मामिलाका जानकार छन् । उनले सन् २०१८ मा चीनको राजधानी बेइजिङस्थित रेनमिन विश्वविद्यालयबाट अन्तर्राष्ट्रिय सम्बन्ध विषयमा विद्यावारिधि हासिल गरेका थिए ।

हालै प्रधानमन्त्री प्रचण्डको चीनको औपचारिक भ्रमणको उच्चस्तरीय प्रतिनिधिमण्डलमा डा. सापकोटालाई परराष्ट्रविद्का रुपमा सामेल गराइएको थियो ।

काठमाडौं । उपप्रधान एवम् गृहमन्त्री नारायणकाजी श्रेष्ठको स्वास्थ्य अवस्थाबारे उनी उपचाररत् पेकिङ्ग युनियन मेडिकल कलेज अस्पताल, बेइजिङले जानकारी गराएको छ ।

बिहीबार दिउँसो ‘मेडिकल सर्टिफिकेट’ मार्फत् श्रेष्ठलाई ‘एक्युट मायोकार्डियल इन्फेक्शन’ भएको र आकस्मिक कोरोनरी एन्जियोग्राफी गर्दा ‘ओब्टस मार्जिनल शाखा (OM)’ मा अवरोध देखिएको अस्पतालले जनाएको छ ।

उनको मुटुको बायाँ धमनीमा महत्त्वपूर्ण ‘स्टेनोसिसु देखिएको र त्यसलाई कम गर्न तुरुन्तै ‘स्टेन्ट’ राखिएकोसमेत अस्पतालले जनाएको छ । श्रेष्ठ अहिले निरन्तर निगरानी र उपचारका लागि मेडिकल आईसीयूमा रहेका र उनी स्थिर अत्यावश्यक संकेतका साथ पूर्णरूपमा सचेत रहेको पनि अस्पतालले जनाएको छ।

बीआरआई शिखर सम्मेलनमा सहभागी हुन चीनको बेइजिङ पुगेका उपप्रधान एवम् गृहमन्त्री श्रेष्ठलाई गएराति एक बजे ‘माइल्ड’ हृदयघात भएको थियो । चिनियाँ सरकार र पार्टीका उच्च अधिकारीले उच्चतम प्रविधि अपनाउन र उनको उपचारमा विशेष ध्यान दिन अस्पताल प्रशासनलाई निर्देशन दिएका छन् ।

काठमाडौं । बीआरआई शिखर मञ्चमा भाग लिन चीन पुगेका उपप्रधान तथा गृहमन्त्री नारायणकाजी श्रेष्ठ बिरामी परेका छन् ।

उनी हाल बेइजिङको एक अस्पतालमा भर्ना भएका छन् । छातीमा समस्या देखिएपछि राति साढे १ बजेतिर उनलाई अस्पताल भर्ना गरिएको प्रेस सल्लाहकार कमल गिरीले नेपाल प्रेसलाई जानकारी दिए ।

मन्त्री श्रेष्ठको अवस्था हाल सामान्य रहेको उनले बताए ।

राति नै तुरुन्तै उनको मुटुको एन्जीओप्लास्टी गरिएपछि उनको अवस्था अहिले स्थिर रहेको श्रेष्ठको सचिवालयले जनाएको छ । उनलाई २४ घण्टासम्म अस्पतालमै अब्जर्भेसनमा राख्नुपर्ने उपचारमा संलग्न चिकित्सकले बताएका छन् ।