Category: माओवादी केन्द्र

काठमाडौं । नेकपा माओवादी केन्द्रले पूर्वउपराष्ट्रपति नन्दबहादुर पुन पासाङलाई पार्टीको उपाध्यक्ष बनाएको छ ।

अध्यक्ष पुष्पकमल दाहाल प्रचण्डले पासाङलाई केन्द्रीय सदस्य, स्थायी कमिटी सदस्य मनोनीतसँगै पार्टी उपाध्यक्ष बनाएका छन्

गत पदाधिकारी बैठकले मनोनीत गरेर त्यहीँ अनुसार सर्कुलर पठाइएको स्रोतले बतायो ।

दुई कार्यकाल उपराष्ट्रतिको जिम्मेवारीमा रहेका पासाङ पछिल्लो पटक पार्टीका बैठकहरूमा निरन्तर सहभागी हुँदै आएका थिए ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले राजावादीहरूको प्रतिवाद गर्नको लागि नेवार समुदायले काठमाडौंमा भेला गर्न लागेको बताएका छन् ।

जागरण अभियान लिएर बर्दिया पुगेका प्रचण्डले गुलरिया नगरपालिकाद्वारा आयोजित खबरदारी सभालाई सम्बोधन गर्दै काठमाडौंको भेलाको तयारी गर्न आजै फर्किन लागेको बताए ।

उनले भने, ‘आजै हामी काठमाडौं जानुपर्नेछ । काठमाडौंमा पनि हामीले लगातार प्रतिवाद गरिराख्नुपर्ने अवस्था छ। काठमाडौंमा पनि लगातार हामीले हस्तक्षेप गरिराख्नुपर्ने छ। नत्र प्रतिगामीहरूले अझै बढी आगजनी, हत्या हिंसा गर्न सक्ने भएकाले हामीले पर्सी नेवार बुद्धिजीवी र नेताहरूले भेलाद्वारा हामीले ठूलो नेवार समुदायको सम्मेलन गर्ने र हजारौँ उपस्थित गराएर खबरदारी गर्ने सोचेका छौँ। त्यसको तयारी गर्न आजै फर्किँदैछौं।’

उनले आफू नेतृत्वको सरकार ढालेर कांग्रेस एमाले मिलेर बनेको सरकारलाई जनताले नरुचाएको पनि दाबी गरे।

उनले भने, ‘अपारदर्शी तरिकाले सरकार ढाल्ने र अर्को गठबन्धन बनाउने काम भयो। त्यो असंवैधानिक र असंवैधानिक छ भनेर मैले भन्दै आइरहेको छु, यो जनताको भावना, आकांक्षा र आवश्यकताको पनि विपरीत छ गलत भएको छ। हामी जनताको साथ जुटाएर भ्रष्टाचारको रक्षा गर्ने, कुशासन कायम गर्ने प्रयासलाई विफल पार्ने संकल्प गरेर हामीले अभियान चलाएको छौँ।’

काठमाडौं । चैत १५ मा तीनकुनेमा भएको राजावादीको प्रदर्शनको घटनाबारे अनुसन्धान गर्नका लागि छानबिन आयोग नै गठन गर्नुपर्ने प्रमुख प्रतिपक्ष दलले माग गरेको छ ।

प्रतिनिधिसभा अन्तरगत रहेको राज्य व्यवस्था तथा सुशासन समितिको शुक्रवारको बैठकमा नेकपा ९माओवादी केन्द्र०का प्रमुख सचेतक हितराज पाण्डे र माओवादी सांसद दुर्गा राईले यस्तो माग गरेका हुन् ।

प्रमुख सचेतक पाण्डेले भने, बालकुमारीमा पनि यस्तै घटना भएको थियो, आयोग नै बनेको थियो, गृहमन्त्रीले यो समितिको बैठकमा बोल्दा छानबिन आयोग गठनको कुरा त उठाउनुभएन के हो ?

सांसद दुर्गा राईले प्रहरीको अनुसन्धानबाट मात्रै सबै विषय नआउने भन्दै छानबिन आयोग नै गठन गर्न माग गरिन् । उनले भनिन्, यो १५ गतेको घटनाका लागि छानबिन आयोग बन्नुपर्छ । हाम्रो पार्टी र मेरो व्यक्तिगत माग छ । सुरक्षाकर्मीबाट आएको प्रतिवेदनले मात्रै यो विषय सम्बोधन हुन सक्दैन ।

सांसद राईले सरकाले एकै दिन दुई वटा कार्यक्रमका लागि अनुमति दिएर लापरबाही गरेको बताइन् । उनले भनिन्, कार्यक्रम स्थल संवेदनशील ठाउँमा थियो, यसमा सरकारको लापरबाही गर्‍यो । संविधानको रक्षाका लागि समाजवादी मोर्चाको आन्दोलन थियो ।

१४ गते निर्मल निवासमा कमाण्डर परिवर्तन गरेर फोटो सार्वजनिक गर्दा सरकार किन मौन भएर बस्यो ? सरकारको तयारी पुगेन । सशस्त्र प्रहरी बलको क्षति जवानमा भएको छ, सरकारले निर्देशन दिए अनुसार गर्ने हो । एकै दिन दुई वटा कार्यक्रमका लागि अनुमति किन दिइयो ? सदनमा प्रधानमन्त्रीको जवाफ माग्दा १५ गते किन समय दिइएन ?

सांसद राईले सरकारले अध्यादेश पारित गर्नमा मात्रै ध्यान दिएको तर, राजावादीको प्रदर्शन र सदनमा जवाफ दिनमा ध्यान नदिएको बताइन । उनले भनिन्, सरकारको ध्यान अध्यादेशमार्फत ल्याएको विधेयक पारित गर्नमा मात्रै थियो, १८ गते ६० दिन पुग्छ भनेर सरकार आत्तिएको थियो । अबदेखि यस्ता घटनामा सरकार सचेत रहोस् ।

काठमाडौं । हुलाकी राजमार्ग केन्द्रित जनतासँग माओवादी तराई-मधेस जागरण अभियान पुनः सुरू भएको छ ।

सोही अभियानअन्तर्गत माओवादी केन्द्रका अध्यक्ष पुष्पकमल दाहाल ‘प्रचण्ड’ सहितका नेता नेपालगञ्ज पुगेका छन् । समाजवादी मोर्चाले गणतन्त्र रक्षार्थ १५ गते आयोजना गरेको सभाको तयारीका लागि माओवादीले अभियान स्थगित गरेको थियो ।

आज प्रचण्डसहितका नेताहरू अनेमसंघ क्रान्तिकारी लुम्बिनी प्रदेशको दोस्रो सम्मेलनमा सहभागी हुनेछन् ।

भोलि बाँके र पर्सी बर्दियामा अभियान चल्नेछ । अभियानले पार्टीसँग जनतालाई जोड्न प्रभावकारी काम गरिरहेको माओवादीको निष्कर्ष छ ।

कोशी प्रदेशको झापाबाट सुरू भएको अभियान सुदूरपश्चिमको कञ्चनपुरमा पुगेर टुंग्याउने माओवादीको तयारी छ ।

सुर्खेत। मध्यपश्चिम विश्वविद्यालयको स्वतन्त्र विद्यार्थी युनियन (स्ववियु) चुनावमा नेपाली कांग्रेसनिकट नेपाल विद्यार्थी संघ (नेविसंघ) ले विजय हासिल गरेको छ।

विवेक खड्का नेतृत्वको प्यानलले नेकपा एमालेनिकट अखिल (अनेरास्ववियु) का उम्मेदवारहरूलाई पराजित गर्दै स्ववियुको नेतृत्व हात पारेको हो।

चुनावमा अध्यक्ष पदका लागि भएको प्रतिस्पर्धामा खड्काले १ हजार १८८ मत प्राप्त गर्दै अनेरास्ववियुका जगतजंग शाहीलाई पराजित गरे।

शाहीले ९०७ मत प्राप्त गरेका थिए। अन्य प्रत्याशी प्रकाश विकले २७५ मत र मिलन बिसीले २३१ मत पाए। कुल ४ हजार ३८३ मतदातामध्ये २ हजार ८६४ जनाले मतदान गरेका थिए।

यो परिणामले मध्यपश्चिम विश्वविद्यालयमा नेविसंघको पकड अझै बलियो रहेको देखाएको छ।

विशेष गरी हालैका राजनीतिक घटनाक्रमका कारण विद्यार्थी राजनीतिमा असन्तुष्टि बढिरहेको बेला यो जित नेविसंघका लागि महत्त्वपूर्ण मानिएको छ।

सचिव र कोषाध्यक्षमा पनि नेविसंघकै उम्मेदवार निर्वाचित भएका छन्, जसले संगठनलाई पूर्ण बहुमतसहितको नेतृत्व प्रदान गरेको छ।

काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले राजावादी आपराधिक मानसिकता भएका मान्छे पुष्टि भएको बताएका छन् ।नवनिर्वाचित प्रेस सेन्टर नेपालका पदाधिकारीलाई बधाई दिँदै मङ्गलवार बिहान निजी निवास खुमलटारमा उनले यस्तो बताएका हुन् ।

अध्यक्ष प्रचण्डले माओवादी केन्द्रले अभियान चलाइरहेका बेला प्रतिगमनकारीले टाउको उठाउने र वितण्डामा मच्चाउन खोजेपछि आफूहरुले गणतन्त्रको पक्षमा काठमाडौंमा विशाल जनप्रदर्शन गरेको बताए । तर, आफूहरूको जनप्रदर्शनलाई लक्षित गरेर राजवादीले जनप्रदर्शनका नाममा वितण्डा मच्चाएर आफूहरूलाई अपराधी पुष्टि गरेको बताए ।

उनले भने, ‘हाम्रो पार्टी अभियानमा हुँदा प्रतिगमनले टाउको उठाउने र वितण्डा मच्चाउने समस्या देखियो । त्यसपछि हामीले तुरुन्तै केहि पहल कदमी नलिने हो भने दुर्घटनामा जाने अवस्था देखेपछि अभियानलाई थाती राखेर काठमाडौं केन्द्रित विशाल जनसभा काठमाडौंमा गर्‍यौ । प्रतिगामीले वितण्डा मच्चाएपछि एक जना श्रमजीवी पत्रकार र एक जना श्रमजीवी नागरिक गरेर २ जनाको हत्या गरे । यसले माओवादी केन्द्र गणतन्त्रको पक्षमा दृढतापूर्वक उभिने र नेतृत्व गर्ने शक्ति भएको र राजावादी आपराधिक मानसिकतामा मान्छे हुन भन्ने पुष्टि भएको छ ।’

अध्यक्ष प्रचण्डले नेपालको इतिहासमा पहिलो पटक आफूहरूले हुलाकी मार्ग केन्द्रित तराई मधेश जागरण अभियान सञ्चालन गरेको र उक्त अभियानमा हजारौँ र लाखौँ नागरिकसँग भेटघाट संवाद हुनुका साथै पार्टी प्रवेशको लहर नै चलेको बताएका छन् ।

यसैबिच नेकपा (माओवादी केन्द्र)ले काठमाडौं उपत्यकामा नेवार समुदायको विशाल प्रदर्शन गर्ने तयारी गरेको पनि अध्यक्ष प्रचण्डले जानकारी गराएका छन् । भर्खरै मात्रै माओवादीकै नेतृत्वमा समाजवादी मोर्चाले गणतन्त्रको पक्षमा विशाल जनप्रदर्शन गरे लगत्तै नेवार समुदायको विशाल जनप्रदर्शन गर्ने तयारी भइरहेको भन्दै त्यसको महत्वलाई पनि राम्रोसँग सञ्चार माध्यमबाट स्थापित गर्न अनुरोध गरेका छन् ।

उनले भने, ‘अब हामी सोच्दै छौ कि छिट्टै अर्को एउटा कार्यक्रम काडमाडौंमा यहाँका सबै आदिवासी जनजाति, मुख्य त नेवार समुदायको विशाल प्रदर्शन जरुरी छ भन्ने ठानेका छौ र त्यसको तयारी हामीले सुरु गरिसकेका छौ । तपाइहरूले त्यसको महत्वलाई पनि राम्रोसँग सञ्चारका माध्यमबाट स्थापित गर्नुपर्नेछ ।’

अध्यक्ष प्रचण्डले आदिवासी जनजाति र सांस्कृतिक पहिचानको परम्परा बोकेको समुदाय भएकाले उक्त प्रदर्शनले दिने सन्देश एकदमै शक्तिशाली हुने अपेक्षा गरिएको बताए । उनले भने, ‘उपत्यकाका आदिवासी जनजाति र एउटा लामो सांस्कृतिक र ऐतिहासिक पहिचानको परम्परा बोकेको समुदाय सडकमा आउँदा त्यसले दिने सन्देश अर्को शक्तिशाली बन्छ भन्ने हामीले ठानेका छौ ।’

काठमाडौं । नेकपा माओवादी केन्द्र निकट पत्रकारको संगठन प्रेस सेन्टरको एक उपाध्यक्षसहित १७ जना पदाधिकारी निर्विरोध निर्वाचित भएका छन् । निर्वाचन समितिले सार्वजनिक गरेको अन्तिम नामावली अनुसार एक एक जनाको मात्र उम्मेदवारी परेका पदमा निर्विरोध भएको हो ।

नेपाल प्रेसका वरिष्ठ संवाददाता केशव भुल प्रतिष्ठान प्रदेशतर्फबाट सचिवमा निर्विरोध भएका छन् । संगठनमा ५ जना उपाध्यक्ष निर्विरोध हुनेमा खुलामा रामसिंह ठगुन्ना लक्ष्मण खड्का र विवेक गौतम, महिलामा शान्ता अधिकारी र समावेशीमा दिपक श्रेष्ठ रहेका छन् । यस्तै उपमहासचिव महिलामा लक्ष्मी आचार्य, दलितमा हरिश बिक, मधेशीमा अनिल मिश्र, आदिवासी जनजातीमा बुद्ध लोप्चन निर्विरोध निर्वाचित भएका छन् ।

यस्तै प्रदेशबाट निर्वाचित हुने सचिवमा प्रदेश एकबाट दिपेन्द्रकुमार राई, मधेश प्रदेशबाट सुनिता बराल, बागमती प्रदेशबाट मिनकुमार दाहाल, गण्डकी प्रदेशबाट दीपक भट्टराई, लुम्बिनी प्रदेशबाट मानसिंह बिक र सुदूरपश्चिम प्रदेशबाट राजेन्द्र अवस्थी निर्विरोध निर्वाचित भएका छन् भने भूगोल बाहेक उपत्यका प्रदेशबाट नवराज दाहाल, प्रतिष्ठान प्रदेशबाट केशव भुल र एसोसियट प्रदेशबाट नन्दलाल तिवारी निर्विरोध निर्वाचित भएका छन् ।

यस्तै लेखा समितिको संयोजकमा अमृतराज तिवारी र सचिवमा भिम राई, अनुशासन समिति संयोजकमा गुनाराम घिमिरे र सचिवमा कृष्ण लेकाली निर्विरोध निर्वाचित भएका  छन् ।

दोहोरो उम्मेदवारी परेको अध्यक्ष, बरिष्ठ उपाध्यक्ष एवम महासचिव सहित विभिन्न पदाधिकारीका लागि निर्वाचन हुने निर्वाचन समितिका संयोजक गोविन्द आचार्यले जानकारी दिए ।

काठमाडौं । नेकपा माओवादी केन्द्रनिकट पत्रकारहरूको संगठन प्रेस सेन्टर नेपालको अध्यक्षमा दुईजनाको उम्मेदवारी परेको छ । शनिबार अध्यक्ष प्रचण्डले उद्घाटन गरेको महाधिवेशनको दोस्रो दिन निर्वाचन प्रक्रिया अघि बढेको हो ।

निर्वाचन समितिका अनुसार मनोनयन दर्ताको समय सकिएको छ । अध्यक्ष पदमा कमल गिरी र दीपेन्द्र रावलको उम्मेदवारी परेको छ । गिरी पार्टी हेडक्वार्टरका उम्मेदवार हुन् भने रावल जनार्दन शर्मानिकटका हुन् ।

अध्यक्षमा दाबी गरेका लक्ष्मण खड्का, निर्मल ज्ञवाली, आस्था केसीलगायत हेडक्वार्टरको निर्देशनमा पछि हटेका छन् । मिलाएर टीम बनाउने भनेकाले क-कसले कुनमा उम्मेदवारी दिने भन्ने नै गन्जागोल भएको महाधिवेशनस्थलमा रहेका नेताहरूले बताए ।

निर्वाचन समितिका संयोजक गोविन्द आचार्यले मनोनयनको समय सकिएको र केहीको फारम आउन बाँकी रहेकाले कसको कुन पदमा उम्मेदवारी परेको भन्ने आधिकारिक विवरण आइनसकेको नेपाल प्रेसलाई बताए ।

अध्यक्ष उम्मेदवार आस्था केसीले भने आफूलाई नेताहरूले सहमतिका लागि पछि हट्न र भविष्यमा न्याय गर्ने आश्वासन दिएकाले उम्मेदवारी नदिएको बताइन् । अहिले अध्यक्ष प्रचण्ड घेराबन्दीमा रहेकाले हेडक्वार्टरलाई सघाउनका लागि आफू ब्याक भएको उनको भनाइ छ ।

अध्यक्षका अर्का आकांक्षी लक्ष्मण खड्काले पनि सहमतिका लागि आफूले उम्मेदवारी नदिएर ब्याक भएको बताए । कमल गिरीलाई सर्वसम्मत अध्यक्ष बनाएर आधिकारिक टीम घोषणाको प्रयास पनि जारी रहेको छ ।

हाल बरिष्ठ उपाध्यक्ष रहेका गिरीलाई अध्यक्ष बनाएर सर्वसम्मत केन्द्रीय समिति चयन गर्ने हेडक्वार्टरको संकेतपछि अध्यक्ष प्रचण्ड र वर्षमान पुनलगायतका नेताहरुसँग निकट मानिएका दाबेदारहरु ब्याक भएका हुन् । दिपेन्द्र रावलले भने आफू जनयुद्धको घाइते भएकाले न्याय हुनुपर्ने भन्दै अध्यक्षमा उम्मेदवारी दिएका छन् ।

उनको नेतृत्वमा जनार्दन शर्मा पक्षले प्यानल बनाउने प्रयास गरेको छ ।

काठमाडौं । सामाजिक सञ्जालमा राजावादीको १५ गतेको आन्दोलनको पक्ष र विपक्षमा अभियान चलाइएको छ ।

१५ गते भएको उग्र राजावादी आन्दोलनमा दुई जनाको ज्यान र करोडौँको भौतिक सम्पत्ति नष्ट भएकोमा गणतन्त्रवादीहरूले एरेस्ट ज्ञानेन्द्र अर्थात् ज्ञानेन्द्रलाई पक्राउ गर भनेर आन्दोलन चर्काएका छन् ।

अर्को कित्तामा राजावादीहरूले एरेस्ट प्रचण्ड अभियान चलाएका छन्।

उनीहरूले प्रचण्डले ‘धेरैको हत्याको जिम्मेवार लिन्छु’ भनेको उदाहरण दिएर यस्तो अभियान चलाएका हुन । यी दुवै अभियान अहिले सामाजिक सञ्जाल खास गरी एक्समा भाइरल छन्।

एरेस्ट ज्ञानेन्द्र र एरेस्ट प्रचण्ड दुवै ह्यासट्याग प्रयोग गरेर अभियान चलाइएको छ ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले सरकारमा भएका कांग्रेस र एमाले गणतन्त्रवादी जस्तो नभएकाले गणतन्त्रवादीहरुको एकता हुने आधार नदेखिएको बताएका छन् ।

प्रेस सेन्टर नेपालको महाधिवेशनलाई सम्बोधन गर्दै उनले गणतन्त्रवादी गणतन्त्रको विरोध जस्तो भयो भने गणतन्त्रवादीको एकता कसरी हुनसक्छ भन्दै प्रश्न गरे।

प्रचण्डले गणतन्त्रको मूल्य र मान्यतालाई आत्मसात गरेर हिजो गरिएको कमजोरी, भ्रष्टाचारी र दलालहरुको पक्षमा उभिने, बिचौलियाको इच्छाअनुसार चल्ने काम बन्द गरे गणतन्त्रवादीहरुको एकता सम्भव हुने बताए ।

उनले सरकारमा बसेकाहरुलाई आफ्नो व्यवहारमा समीक्षा गर्न अपिल गरेको बताए ।

उनले भने, ‘शान्ति सम्झौताको जीवित हस्ताक्षरकर्ताको नाताले गणतन्त्रको हितप्रति गहिरो जिम्मेवारीबोधको साथ मैले भनेको छु, आउनुस् सबै बसेर आत्मसमीक्षा गरौं, संविधान कार्यान्वयनमा कहाँ त्रृटि भयो हेरौं र सच्चिने संकल्प गरौं । जनतातिर फर्किन तयार भए फेरि पनि सहकार्य हुनसक्छ ।’

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले हिजो समाजवादी मोर्चाले करिब एक लाख जनता गणतन्त्रको पक्षमा उतारेकै कारणले राजावादी अराजकता कम भएको बताएका छन् ।

प्रेस सेन्टर नेपालको महाधिवेशनलाई सम्बोधन गर्दै उनले राजावादीहरु हिजो ठूलो अराजकता र आपराधिक क्रियाकलाप गर्ने षड्यन्त्रको साथ आएको दाबी गरे ।

हिजो मोर्चाको कार्यक्रम राखेकोप्रति धेरैले बधाई र धन्यवाद दिएको सुनाउँदै प्रचण्डले भने, ‘समाजवादी मोर्चाले पचासौं हजारौं जनता हिजो सडकमा नउतारेको भए, हिजो धेरै ठूल्ठूला दुर्घटना हुने खतरा थियो । त्यहाँ हिजो झन्डै एक लाख जनता नउत्रिएको भए, यतिमात्रै होइन, अझै ठूलो घटना हुन्थ्यो । हामीले हिजो कार्यक्रम राखेकै कारणले धेरै धनजनको क्षति हुनबाट बच्यो ।’

उनले राजावादीहरुको अराजक समूहले दुई जनाको ज्यान लिनुका साथै थुप्रै घर, गाडी, पार्टी कार्यालयहरु जलाएको बताए ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले राष्ट्र बैंकको गभर्नर नियुक्ति गर्न सत्ता गठबन्धनमा तानातान चलिरहेको बताएका छन् ।

प्रेस सेन्टर नेपालको महाधिवेशनलाई शनिबार सम्बोधन गर्दै उनले देशको अर्थतन्त्र अप्ठेरो अवस्थामा रहेको बेलामा योग्य मान्छे ल्याउनुपर्ने बेलामा गठबन्धनभित्र तानातान चलिरहेको बताए ।

प्रचण्डले भने, ‘को मेरो मान्छे, को तेरो मान्छे, कसलाई ल्याउँदा कति फाइदा हुन्छ, राष्ट्रलाई फाइदा होइन, आफूलाई भन्ने सोचियो भने त्यसले अर्थतन्त्र सुधार गर्न सहयोग गर्दैन ।’

काठमाडौं । नेकपा माओवादी केन्द्रले हिजो तीनकुनेमा भएको घटना पूर्वराजा ज्ञानेन्द्र शाहको योजनामा भएको आरोप लगाएको छ।

प्रवक्ता अग्निप्रसाद सापकोटाले एक विज्ञप्ति जारी गर्दै पूर्वराजा र उनका मतियारहरूले शुक्रबार गरेको प्रदर्शन विध्वंशको पराकाष्ट भएको बताए।

विज्ञप्तिमा भनिएको छ, ‘यस्ता हिंसात्मक एवं आपराधिक कार्य गर्न÷गराउन उक्साउने योजनाकार तथा प्रदर्शनका आयोजकलाई सम्पूर्ण घटनाप्रति जवाफदेही बनाउन र अझ गम्भीर अनुसन्धान गरी दोषीलाई कडाभन्दा कडा कारवाही गर्न सरकारसँग जोडदार माग गर्दछौँ। यस प्रकारका सबै आपराधिक कार्यलाई कानुनको दायरामा ल्याई विधिको शासन कायम गर्न सरकारको गम्भीर ध्यानाकर्षण गरिन्छ।’

यस्तै, हिजोको समाजवादी मोर्चाले गरेको जनसभाले बहुआयामिक सन्देश दिएको भन्दै तत्कालिक रुपमा सरकारप्रति खबरदारी र ज्ञानेन्द्र शाहको योजनाबद्ध उक्साहटमा उदण्ड जत्थालाई एकैसाथ मुखतोड जवाफ दिएको बताए।

काठमाडौं । समाजवादी मोचाले भोलि काठमाडौंमा जनप्रदर्शन गर्दैछ। नेकपा माओवादी केन्द्रसहित ४ दल सम्मिलित मोर्चाले विरोधसभा गर्न लागेको हो ।

राजावादीहरुको सक्रियता बढेपछि त्यसलाई प्रतिवाद गर्न मोर्चाले प्रदर्शन राखेको छ। साथै, यही सभाबाट सरकारलाई पनि दबाब दिने मोर्चाको रणनीति छ। सभामा लगभग डेढ लाख मान्छे उपस्थित हुने अपेक्षा मोर्चाले राखेको छ। भोलि नै राजवादीहरुले पनि शक्ति प्रदर्शन गर्दैछन् ।

सरकारले विद्युत प्राधिकरणबाट कुलमान घिसिङलाई हटाएपछि माओवादीसहित विपक्षी दल सरकारविरुद्ध आक्रोशित छ । यो प्रदर्शनले सरकारमाथि पनि दबाब दिने मोर्चामा आबद्ध दलहरुको बुझाइ छ ।

भोलि मोर्चाले गर्न लागेको प्रदर्शन राजवादी कि सरकारविरुद्ध ? भन्नेबारे माओवादी केन्द्रका उपाध्यक्ष तथा प्रवक्ता अग्नि सापकोटोले त्यसको जवाफ दिएका छन् ।

उनले भोलिको मोर्चाको प्रदर्शनमा सहभागी हुने आह्वान गर्दै एमाले अध्यक्ष केपी शर्मा ओली नेतृत्वको सरकारले गरेको कुशासनकै कारणले अहिले राजावादीहरुले टाउको उठाउन खोजेको आरोप लगाए ।

त्यसबारे उनको भनाइ जस्ताको तस्तै

वर्तमान सरकारले सुशासनको विपरित, भ्रष्टाचार नियन्त्रण गर्नुको सट्टा भ्रष्टाचारीहरुको संरक्षण गर्ने, यो सरकारको सेवा प्रवाहमा पनि पहलकदमी छैन ।

सरकार नै संवैधानिक मर्म र भावना विपरित बनेको हुनाले सुरुका दिनदेखि नै जनताप्रतिको जवाफदेहिता प्रस्तुत गर्न सकेको छैन । सबैतिर यो सरकार असफल भइरहेको छ ।

सरकारको कुशासन र नालायकिको कारणले अहिले अराजकता फैलाउने दुष्प्रयत्न भइरहेको छ । तर नेपाली जनता पछाडि फर्कने कल्पना पनि गर्न सक्दैनन्, इतिहासमा थन्काइसकेको त्यो राजतन्त्र फर्किने कुरा नेपाली जनताले सोच्न पनि सक्दैनन् ।

जनता लोकतान्त्रिक मूल्य र मान्यता आदर्शमा स्पष्ट छन् र हामीले रगत बगाएर बनाएइको संविधानमा प्रष्टसँग सार्वभौम सम्पन्न नेपाली जनता, सबै अधिकारहरु नेपाली जनतामा अन्र्तनिहित छ भन्ने मान्यतामा प्रष्ट छन् ।

तर यो सरकारले विचौलिया र दलालहरुको इसारामा देश र जनताको हित विपरित काम गरिरहेको छ। यही मौकामा पानीलाई धमिलो पारेर माछा मार्न सकिन्छ कि भनेर दुष्प्रयत्न गरेका छन् । त्यो सफल हुनेछैन ।

त्यसैले हामीले जनतालाई राष्ट्रिय परिस्थिती र सरकारको नालायकिको बारेमा पनि, इतिहासमा थन्किसकेको प्रतिगमनकारीहरुको बारेमा पनि अब जनतालाई सूसुचित गर्ने बेला आयो, शक्तिको स्रोत भनेकै जनता हो ।

जनताले लडेर ल्याएको यो व्यवस्था उल्ट्याउने दुष्प्रयास भइरहेको बेलामा जनतामै जानुपर्छ भनेर हामीले चैत १५ गते बृहत्त जनप्रदर्शन गर्दैर्छौँ ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले टिआरसीमा पीडितहरूलाई सम्बोधन गर्ने कुरा उच्च प्राथमिकतामा राख्नुपर्छ भन्ने कुरामा राजनीतिक नेतृत्व तहमा कहिले विवाद नभएको बताएका छन् ।

बिहीबार काठमाडौंमा आयोजित संक्रमणकालीन न्याय सम्बन्धी राष्ट्रिय सम्मेलनमा उनले सबै विवाद र विमतिको बीचमा पनि शान्ति प्रक्रिया टुङ्गाउनुपर्छ भन्ने कुरामा सैद्धान्तिक रूपमा कहिले विवाद नभएको भन्दै त्यही भएर राजनीतिक द्वन्द्व जस्तो समयमा पनि विधेयक संशोधनको कुरा टुङ्गाउन सफल भएको बताए ।

उनले भने, ‘टिआरसीमा पीडितहरूलाई सम्बोधन गर्ने कुरा उच्च प्राथमिकतामा राख्न पर्छ भन्ने कुरामा राजनीतिक नेतृत्व तहमा कहिले पनि विवाद भएन । मानिसलाई कहिलेकाहीँ लाग्छ यस्तो होइन होला भनेर तर राजनीतिक नेतृत्वहरू मूलतः पीडितहरूलाई न्याय दिने कुरालाई प्राथमिकता दिएर मात्र शान्ति प्रक्रियालाई दिगो बनाउन सकिन्छ भन्ने कुरामा पनि हामी कहिले पनि अन्योलमा परेनौ । अहिले पनि राजनीतिक दलहरूको बीचमा विवादहरू छन् । प्रमुख दलहरू नै कोही सत्ता पक्षमा छौ कोही प्रतिपक्षमा छौ, विवाद चलिरहेको छ । सदनमा बहस भइरहेको छ, यी सबै विवाद र विमतिको बीचमा पनि शान्ति प्रक्रिया टुङ्गाउनुपर्छ भन्ने कुरामा सैद्धान्तिक रूपमा कहिले पनि विवादमा भएनौ । ढिला त भयो र विवादले गर्दा भएको होइन त्यो भन्न मिल्दैन ।’

उनले शान्ति प्रक्रियालाई सफलतापूर्वक अगाडि बढाउँदा पार्टी नै विभाजन भएको उनले स्मरण गरे । शान्ति प्रक्रिया टुंगोमा पुर्‍याउन आफू पार्टी विभाजनका लागि समेत तयार भएको उनको भनाई छ ।

उनले भने, ‘शान्ति प्रक्रियालाई सफलतापूर्वक अगाडि बढाउनको लागि आफ्नो पार्टी विभाजन गर्नुपर्छ भने पनि ठिक छ । तर शान्ति प्रक्रिया दुर्घटनामा नजाओस् भनेर धेरै जोखिम उठाएर हामीले सेना समायोजनसँग सम्बन्धित विषय वा संविधान निर्माण प्रक्रियासँग सम्बन्धित विषयमा राजनीतिक तहमा समझदारी गर्ने प्रयास गरिराख्यौँ ।’

आफू शान्ति सम्झौताको हस्ताक्षरकर्ता र हिजो विद्रोहको नेतृत्व गरेको नाताले पनि शान्ति प्रक्रियाका अत्यन्तै जटिल र संवेदनशील विषयहरूलाई टुङ्गोमा पुर्‍याउन आफ्नो ठाउँबाट धेरै जोखिम उठाएको पनि उनको भनाई छ ।

काठमाडौं । प्रतिनिधि सभाको बैठक बस्नुअघि नेकपा माओवादी केन्द्रका अध्यक्ष पुष्पकमल दाहाल प्रचण्डले प्रतिपक्षी दलहरुको बैठक राखे ।

बैठकमा प्रचण्डसहित नेकपा एसका अध्यक्ष माधव कुमार नेपाल, राष्ट्रिय स्वतन्त्र पार्टीका कार्यवाहक सभापति डीपी अर्याल लगायतका नेताहरु सहभागी भए ।

माओवादी केन्द्रको संसदीय दलको कार्यालयमा बैठक बसेको बैठकमा आज सदनको पाँचौ ठूलो दल राप्रपा देखिएन । यसअघि विपक्षी दलको बैठकमा प्रचण्डले राप्रपालाई पनि मिसाउँदै आएका थिए ।

यद्यपि, आजको बैठकलाई संविधान र गणतन्त्र पक्षधर विपक्षी दलहरूको बैठक भनियो । यही विषयमा संसद भवनबाहिर सञ्चारकर्मीहरुले विपक्षी दलको बैठकमा राप्रपालाई किन नबोलाएको ? भन्दै प्रश्न सोधे ।

उनले भने, ‘उहाँहरुको एजेण्डा र हाम्रो एजेण्डा फरक भएकाले हो । तर, अहिले उहाँ पनि विरोधमा हुनुहुन्छ । हामी अहिले मिलेकै छौं । कुरा गरेकै छौं ।’

कुलमान घिसिङलाई प्राधिकरणबाट हटाउने निर्णयको विरोधमा सदनमा राप्रपाले आजको बैठकमा नबोलाइएको भएपनि उठेर साथ दिएको थियो ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले विद्युत प्राधिकरणबाट कुलमान घिसिङलाई हटाएको विषयमा प्रधानमन्त्री केपी शर्मा ओलीले सदनमा आएर जवाफ नदिएसम्म बैठक चल्न नदिने बताएका छन् ।

संसद भवन परिसरमा सञ्चारकर्मीहरुसँग कुरा गर्दै प्रधानमन्त्रीले सदनमा आएर चित्तबुझ्दो जवाफ दिएमात्रै सदन खुल्ने बताए ।

प्रचण्डले भने, ‘हामीले प्रधानमन्त्रीले संसदको रोष्ट्रममा आएर जवाफ नदिएसम्म हाउस चल्न सक्दैन भनेका छौं । प्रधानमन्त्रीले यसलाई सहज ढंगले लिनुपर्ने हुन्छ । उहाँले स्पष्टीकरण दिनुपर्ने हुन्छ । स्पष्टीकरण चित्तबुझ्दो भए तुरुन्तै हाउस चल्छ । स्पष्टीकरण पनि जालझेलको भयो भने आन्दोलन अगाडि बढ्छ ।’

उनले प्रधानमन्त्री ओलीले शान्ति प्रक्रियाको बाँकी कामको विषयमा छलफल गर्न बोलाएको र त्यो बैठकमा कुलमानबारे कुनै चर्चा नभएको प्रस्ट पारे ।

प्रचण्डले थपे, ‘म निस्कनेबित्तिकै मन्त्रिपरिषद्को बैठक बसेर निर्णय गरियो । मलाई फेरि एक पटक निकै ठूलो जालझेल भएको महसुस भयो । म सिंहदबारमा गएर टीआरसीबारे टुंग्याएलगत्तै कुलमानबारे निर्णय गर्नुपर्ने बाध्यता त थिएन, त्यसले फेरि मलाई स्वर्ग र नर्क सम्झायो ।’

उनले राप्रपाका सांसद ज्ञानेन्द्र शाहीले टीआरसीसँग प्रचण्डले कुलमान साट्यो भनेर गरेको प्रचारको आपत्ति जनाए ।