Category: नेपाली कांग्रेस

काठमाडौं । काठमाडौं महानगरपालिकामा एक्लै निर्वाचन जित्ने अवस्था रहेको भन्दै नेपाली कांग्रेसको महानगर समितिका नेताहरूले चुनावी तालमेल गर्न नहुनेमा जोड दिएका छन् ।

कांग्रेसको काठमाडौं महानगर समितिको आज बसेको बैठकमा ३२ वटै वडाबाट प्रतिनिधित्व गर्ने सदस्यहरूले चुनावी तालमेल गर्न जरुरी नरहेको बताएका हुन् । पार्टीले नै स्थानीय आवश्यकता अनुसार गर्न भनेको उल्लेख गर्दै सबैजसो नेताहरूले काठमाडौंमा कांग्रेस एक्लै लड्नुपर्ने बताएका हुने । उनीहरूले कुनैपनि वडामा अध्यक्ष छाड्नसक्ने अवस्था नरहेको भन्दै तालमेलका कारण पार्टी संगठनमा समस्या पैदा हुने बताए ।

महानगर समितिको बैठकमा सभापति नीलकाजी शाक्यले केन्द्रबाट चुनावी तालमेल गर्ने निर्णय भइसकेको भन्दै कसरी अगाडि बढ्ने ? भनी सुझाव मागेका थिए ।

शाक्यको भनाइमा असन्तुष्टि जनाउँदै महानगरका बहुमत सदस्य एवं पदाधिकारीहरुले केन्द्रले भन्दैमा काठमाडौं महानगर तालमेल गर्न नहुने बताए । अधिकांशको मत तालमेलको विपक्षमा आएपछि पदाधिकारीलाई थप निर्णय गर्ने जिम्मा दिँदै बैठक सकिएको छ ।

महानगर समितिका सचिव सुसन वैद्यका अनुसार स्थानीय आवश्यकता अनुसार चुनावी तालमेल आवश्यक नरहेकोबारे केन्द्रलाई सुझाव दिनुपर्ने बताए ।

‘बैठकमा व्यक्त विचार हेर्दा काठमाडौंमा तालमेल आवश्यक देखिएन । महानगर समितिले यही व्यहोरा केन्द्रलाई पठाउनुपर्छ । म स्वयं पनि कांग्रेस एक्लै चुनाव लड्नुपर्छ भन्नेमा छु’, वैद्यले नेपाल प्रेससँग भने ।

बैठकमा सभापति शाक्यले आफू काठमाडौं महानगरको प्रमुखका लागि दाबेदार रहेको बताएका थिए । उनी हाल वडा नम्बर २० को अध्यक्षसमेत छन् । त्यस्तै महानगर उपसभापति सुशिला ढकालले आफू उपमेयरको दाबेदार रहेको बैठकमा अवगत गराएकी छिन् ।

ललितपुर । ललितपुर महानगरपालिकासहित ललितपुरको गोदावरी नगरपालिका र वागमती गाउँपालिकाको प्रमुखको उम्मेदवारी नेपाली कांग्रेसलाई दिने पाँच दलीय गठबन्धनमा सहमति जुटेको छ ।

कांग्रेसका ललितपुर सभापति जितेन्द्र श्रेष्ठका अनुसार महालक्ष्मी र माहाँकालको प्रमुखमा कांग्रेस, माओवादी र समाजवादी तीन वटाकै दाबी छ ।

उनले भने, ‘ललितपुर महानगर, गोदावरी नगर र वागमती गाउँपालिकामा भने नेपाली कांग्रेसलाई नै दिने सहमति बनेको छ ।’

निरन्तरको बैठकपछि ललितपुरको ५ दलीय गठबन्धनमा अन्य ठाउँको उम्मेदवारीमा सहमति नजुटेपछि निर्णय गर्न प्रदेशलाई जिम्मा लगाइएको छ ।

नेकपा एकीकृत समाजवादीका ललितपुर सहसंयोजक अमृतनाथ तिमल्सिनाका अनुसार शनिबार साँझको बैठकले सहमतिको जिम्मा प्रदेशलाई लगाउने निर्णय गरेको छ ।

‘हामी आन्तरिक तयारी गरिरहेका छौं । परिआए एक्लाएक्लै लड्नुपर्ने अवस्था आउन सक्छ,’ उनले भने ।

उनका अनुसार महालक्ष्मी र माहाँकाल गाँउपालिकामा एकीकृत समाजवादीले दाबी गरे पनि सहमति भएको छैन ।

काठमाडौं । नेपाली कांग्रेसका प्रवक्ता एवं निर्वाचन प्रचार समितिका संयोजक डा. प्रकाशशरण महतले चुनावी तालमेलबाट सबैलाई फाइदा हुने बताएका छन् ।

प्रचार समितिले आयोजना गरेको भर्चुअल बैठकमा बोल्दै प्रवक्ता महतले राष्ट्रिय आवश्यकताकै आधारमा सत्तारुढ दलहरुबीच चुनावी तालमेल हुन लागेको भन्दै तालमेल गर्दा लेनदेन हुनु स्वभाविक भएको बताए ।

‘सबै ठाउँमा हामीले पाउनेगरी त गठबन्धन हुँदैन नि । गठबन्धन भनेकै लेनदेन हो । कतै हामीले नेतृत्व लिनुपर्छ, कतै छाड्नुपर्छ’, महतले भने । उनले गठबन्धनका कारण कांग्रेसलाई घाटा नहुनेपनि दाबी गरे ।

‘गठबन्धनले कसैलाई घाटा हुँदैन । गठबन्धन गर्ने दुवै पक्षलाई फाइदा हुन्छ । कांग्रेसले पनि अघिल्लो निर्वाचनभन्दा शक्ति बढाउने अवसर पाउँछ’,महतले भने ।

उनले कांग्रेस नेतृत्वको सरकारले गरेका राम्रा कामहरुको प्रचार आवश्यक भएको बताए ।

‘कांग्रेस एमालेजस्तो गफ मात्रै गर्ने पार्टी होइन, काम गर्ने पार्टी हो । हामीले गरेका काम जनताले थाहा पाउने गर्न निर्वाचन प्रचार अगाडि बढाउनुपर्छ’, महतको भनाइ थियो ।

पोखरा । नेपाली कांग्रेसले केही दिनअघि आकांक्षीसँग शुल्क नलिइ नाम सिफारिस गर्न सर्कुलर पठायो । यसअघि पार्टीको चुनावमा मनपरी शुल्क असुलेपछि विवादमा परेको कांग्रेसले अहिले बेलैमा सचेत भएर आकांक्षीको नाम विना शुल्क सिफारिस गर्न निर्देशन दिएको हो ।

तर, पोखरा महानगर कमिटीले भने पार्टीको केन्द्रीय सर्कुलरविपरीत शुल्क उठाएको छ । मेयरलाई २५ हजार र उपमेयरलाई २० हजार दर्ता शुल्क तोकिएको छ । सचिव गणेशबहादुर थापाले यो शुल्क नभइ पार्टीलाई सहयोगका रूपमा लिएको बताए ।

‘यो शुल्क होइन । फर्मको शुल्क जम्मा पाँच सय रूपैयाँ तोकेका छौं । त्यसबाहेक उम्मेद्वारले पार्टीलाई सहयोग गरोस् भनेर लिएका हौं,’ उनले भने, ‘तिर्नैपर्छ भन्ने छैन । फार्म शुल्कबाहेक अरु नदिए पनि केही रोकतोक छैन ।’

उनले पार्टी सन्चालनका लागि कोष नभएकोले आन्तरिक स्रोत खोजी गरेको बताए । मेयरका लागि १० जनाभन्दा बढी आकांक्षी छन् भने उपमेयरमा झन् धेरैको चर्चा छ । कांग्रेसले पोखराको मेयर र उपमेयरका लागि आइतबार अपरान्ह ४ बजेसम्म नाम टिपाउन भनेको छ । अहिले मनोनयन दर्ता धमाधम भइरहेको छ ।

कैलाली । आगामी वैशाख ३० गते हुने स्थानीय तहको निर्वाचनका लागि कैलालीमा तालमेल गर्ने सकस भइरहेको छ ।

सत्ता गठबन्धनका दलहरू बिच भागबन्डामा कुरा नमिले पछि समस्या सृजना भइरहेको हो । यस विषयमा कांग्रेसले भोलि आन्तरिक छलफलका लागि बैठक बोलाएको छ ।

‘अहिले सम्म गठबन्धनका दलहरू बिच पटक पटक छलफल गर्दा पनि कुरा मिलेन । उहाँहरू धेरै भाग चाहियो भन्नुहुन्छ’कांग्रेसका एक नेताले भने ‘हाम्रा नेता कार्यकर्ता माओवादी र कांग्रेसलाई त्यति धेरै दिन सकिन्न भन्नुहुन्छ । यस विषयमा अब भोलि बृहत् छलफल हुन्छ ।

उनले कैलालीमा गठबन्धन गर्ने वा नगर्ने भन्ने विषयमा भोलि छलफल हुने बताए ।

‘भोलि १२ बजे पार्टी कार्यालयमा बैठक बोलाइएको छ’ उनले भने ‘कैलालीमा गठबन्धन गर्ने वा नगर्ने भन्ने विषयमा भोलि नै निर्णय पनि हुन सक्छ ।’

केन्द्रमा पाँच दलीय गठबन्धन भए पनि कैलालीमा मूलतः तीन दलीय गठबन्धन हुने देखिएको छ । तर, उनीहरू बिच पनि भागबन्डामा कुरा मिलेको छैन ।

नेपाली कांग्रेस र माओवादी केन्द्रसँग एकीकृत समाजवादी दलले समान हैसियतका आधारमा भागबन्डा हुनुपर्ने बताएको छ । नेपाली कांग्रेसले कैलालीका १३ स्थानीय तह मध्ये १० स्थानीय तहमा दाबी गरेको छ ।

अहिले नेपाली कांग्रेसले धनगढी उपमहानगरपालिका, गोदावरी नगरपालिका, गौरीगङ्गा नगरपालिका, घोडाघोडी नगरपालिका, कैलारी गाउँपालिका,चुरे गाउँपालिका, लम्की चुहा नगरपालिका, टीकापुर नगरपालिका र भजनी नगरपालिकामा दाबी गरेको छ ।

अहिले कांग्रेसले दाबी गरेको मध्ये कैलारी गाउँपालिका र भजनी नगरपालिका अघिल्लो स्थानीय तहको निर्वाचनमा माओवादी केन्द्र विजयी भएको थियो ।

अहिले उक्त क्षेत्रमा नेपाली कांग्रेसको नगर कमिटीले गठबन्धन गर्न नहुने भन्दै निर्णय नै गरिसकेका छन् ।

घोडाघोडी नगरपालिका, भजनी नगरपालिका, कैलाली गाउँपालिका, लम्की चुहा नगरपालिका र मोहन्याल गाउँपालिकाले आफ्नो स्थानीय तहमा पाँच दलीय गठबन्धन नगर्ने भन्दै निर्णय गरेका हुन् ।

१३ वटा स्थानीय तह रहेको कैलालीमा अहिले एकीकृत समाजवादी र माओवादी केन्द्रले करिब आधा दर्जन बढी स्थानीय तहमा दाबी गरिरहेका छन् । स्थानीय तहमा धेरै दाबी गरेपछि गठबन्धनमा कुरा मिलाउन सकस भइरहेको नेपाली कांग्रेस कैलालीका सचिव नृप सुनारले जानकारी दिए ।

२०७४ सालको स्थानीय तह निर्वाचनमा १३ स्थानीय तह मध्ये एमालेले सात, नेपाली कांग्रेसले तीन, माओवादी केन्द्रले दुई स्थानीय तहमा विजयी भएको थियो । एक तहको प्रमुखमा विजयी भएका तत्कालीन मधेसी जनअधिकार फोरमा लोकतान्त्रिक कांग्रेसमा समाहित भइसकेको छ ।

एमाले विभाजन भइसकेपछि अहिले १३ स्थानीय तह मध्ये कैलालीको घोडाघोडी र गोदावरीका उपप्रमुखले नेकपा एकीकृत समाजवादीमा सनाखत गरेका थिए ।

दुई स्थानीय तहका उपप्रमुख मात्रै रहेको एकीकृत समाजवादीले अहिले छ वटा स्थानीय तहमा दाबी गरेको छ । अन्तिममा चार स्थानीय तहको प्रमुख सम्ममा सहमति गर्न सकिने एकीकृत समाजवादीका नेताहरू बताउँछन् ।

‘यी क्षेत्रमा साङ्गठनिक रूपमा हाम्रो उपस्थिति राम्रो छ । अर्को कुरा ती क्षेत्रमा पहिले एमालेले जितेको हो ।’ एकीकृत समाजवादी कैलालीका सचिव खडक रावतले भने, हामी एमालेबाट विद्रोह गरेको आएको हुँदा पनि हामीले ती क्षेत्र पाउनु पर्छ भन्ने मान्यता राखेका छौँ ।’

एकीकृत समाजवादीकै हैसियतमा माओवादीले स्थानीय तह माग गरेको बताइएको छ । गठबन्धनको बैठक भन्दा बाहिर जे भने पनि बैठकमा धनगढी उपमहानगरपालिका कांग्रेसलाई दिएर अन्य १२ स्थानीय तहले तीन भाग माग गरेको कांग्रेस स्रोतले बताए ।

गठबन्धन गर्ने वा नगर्ने भन्ने विषयमा भोलि ठोस निर्णय हुन सक्ने कांग्रेस जिल्ला सचिव सुनारले जानकारी दिए ।

चितवन । भरतपुर महानगरपालिका फेरि पनि माओवादीलाई जिम्मा लगाउन लागेको विरोधमा वडा नम्बर १७ का ५० जना कांग्रेस कार्यकर्ताले सामूहिक राजीनामा दिँदै स्वतन्त्र अभियान घोषणा गरेका छन् ।

बेलुवा टोलमा शनिवार भेला गरेर पूर्व वडाध्यक्ष देवनारायण महतो, पूर्व वडा सभापति प्रकाश कँडेलसहित ५० जना क्रियाशील कार्यकर्ताले सामूहिक राजीनामा दिएका हुन् ।

प्रकाश कँडेलको संयोजकत्वमा भएको भेलाले कांग्रेसबाट राजीनामा दिए पनि देश र जनहितको कामका लागि सधैँ उपस्थित रहने निर्णय गरेको छ । राजीनामा दिएका सबैले हस्ताक्षर समेत गरेका छन् ।

राजीनामा दिएकाहरूले कांग्रेस नेतृत्वमाथि विभिन्न आरोपहरू समेत लगाएका छन् । केही दिनअघि मात्र भरतपुरका सबै वडा सभापतिहरूको भेलाले महानगरका नेतृत्व माओवादीलाई दिइए मान्य नहुने निर्णय गरेका थिए ।

भरतपुरको मेयर रेणु दाहाललाई छाडिए कांग्रेसबाटै स्वतन्त्र उम्मेदवारी दिने तयारी समेत भइरहेका बेला वडाबाट थालिएको सामूहिक राजीनामालाई अर्थपूर्ण रूपमा लिइएको छ ।

काठमाडौं । नेपाली कांग्रेसले स्थानीय तह निर्वाचन प्रचार प्रसार समिति अन्तरगत प्रदेश समन्वय तथा प्रचार प्रसार उपसमिति गठन गरेको छ ।

उपसमिति अन्तरगत वरिष्ठ पत्रकार विष्णु निष्ठुरी, किरण पोखरेल, अनिता बिन्दु र गोपाल झाको संयोजकत्वमा गठित उपसमितिहरु गरिएको हो ।

उनीहरुलाई क्रमशः अनलाईन मिडिया समन्वय तथा प्रचार–प्रसार उपसमिति, छापा माध्यम समन्वय तथा प्रचार–प्रसार उपसमिति, टेलिभिजन समन्वय तथा प्रचार–प्रसार उपसमिति र रेडियो एफएम समन्वय तथा प्रचार–प्रसार उपसमिति संयोजकको जिम्मेवारी दिइएको छ ।

यस्तै टेलिभिजन समन्वय तथा प्रचार प्रसार उपसमिति अन्तरगत प्रदेश २ को समिति सदस्यमा माओवादीमा प्रवेश गरेका कमलेश मण्डल पनि रहेका छन् । उनी पत्रकार महासंघ महोत्तरीका अध्यक्ष हुन् । उनलाई केही दिनअघि मात्रै प्रचण्डले माओवादीमा स्वागत गरेका थिए ।

मण्डल महोत्तरीको मटिहानी नगरपालिकामा माओवादीबाट मेयरको उम्मेदवार बन्दैछन् । उनी एभिन्युज टेलिभिजनमा कार्यरत रही आएका थिए ।

उपसमितिमा निम्नअनुसार सदस्य रहेका छन् ।

रुपन्देही । नेपाली कांग्रेसका नेता तथा गृहमन्त्री बालकृष्ण खाँणको गृहनगर रुपन्देहीको तिलोत्तमा नगरपालिकामा नेपाली कांग्रेसले एकल रुपमा वडाअध्यक्षको उम्मेदवार सार्वजनिक गरेपछि सत्तागठन्धनमा रहेको दलहरुबीच आशंका थपिएको छ ।

१७ वटा वडा रहेको तिलोत्तमा नगरपालिकामा १७ वटै वडा समितिले सर्वसम्मत निर्णय गरी उम्मेदवारको नाम नगर समितिमा सिफारिस गरिसकेका छन् । वडाअध्यक्षको नाम सिफारिस गरेपनि वडा सदस्यहरुको भने उम्मेदवार टुङ्गिएको छैन । गत स्थानीय तहको निर्वाचनमा माओवादी केन्द्रसँग अन्तिम चरणमा गठबन्धन भत्केको थियो । कांग्रेसले पेलेर लैजाने गरेको भन्दै जिल्लाका अन्य पालिमा गठबन्धन भएपनि तिलोत्तमामा भत्किएको थियो ।

आसन्न स्थानीय तहको निर्वाचनमा नेपाली कांग्रेससहित सत्ता गठबन्धनमा रहेका दलहरु माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चा समेतको चुनावी तालमेल भएकाले वडा सदस्यको उम्मेदवारपछि टुङ्ग्याउने गरी वडा अध्यक्षको उम्मेदवार मात्रै नगर समितिमा सिफारिस गरिएको हो ।

जसअनुसार तिलोत्तमा नगरपालिका वडा नं. १ मा जवानसिंह ठकुरी, २ मा दिलबहादुर भट्टराई, ३ मा कल्याण पौडेल, ४ मा गोविन्द भुसाल र वडा नं. ५ मा रमेश डुम्रेलाई वडा अध्यक्षमा सिफारिस गरिएको छ । त्यस्तैगरी वडा नं. ६ मा गणेश पाठक, वडा नं. ७ मा दिनमणी पंगेनी, ८ मा केशव अर्याल, वडा नं. ९ मा ध्रुव न्यौपाने, १० मा मानबहादुर गुरुङ र वडा नं. ११ मा तेजबहादुर कुवँरलाई सिफारिस गरिएको छ ।

त्यस्तै वडा अध्यक्षको लागि वडा नं. १२ मा छविलाल खरेल, वडा नं. १३ मा नारायण ढकाल, १४ मा अस्विन पौडेल, १५ मा शेरबहादुर थापा, १६ मा झवी भुसाल र वडा नं. १७ मा दानबहादुर चौधरीको नाम सिफारिस गरिएको हो ।

नेकपा माओवादी केन्द्रका नगर अध्यक्ष बेलप्रसाद शर्माले पार्टीको अस्तित्व स्वीकार नगरी गठबन्धनमा नजाने बताएका छन् । उनले एकातिर गठबन्धनमा सहमति गर्ने भनेर भन्ने एकातिर सबै वडाध्यक्ष सार्वजनिक गरेर के गर्न खोजिएको हो प्रष्ट नभएको बताए ।

काठमाडौं । नेपाली कांग्रेस केन्द्रीय कार्य सम्पादन समितिको बैठकले पार्टीका सात जना सह-महामन्त्रीलाई उम्मेदवारको टुंगो लगाउन सात प्रदेशमा पठाउने निर्णय गरेको छ ।

आज बसेको बैठकले नगरपालिका र गाउँपालिकाका उम्मेदवारको टुंगो लगाउन वैशाख ३ गते सह महामन्त्रीलाई सात प्रदेशमा पठाउने निर्णय गरेको हो ।

उनीहरूलाई प्रदेशमा उम्मेदवार टुंगो लगाउने जिम्मेवारी दिइएको छ ।

प्रदेशमा उम्मेदवारको टुंगो लगाउन नसके वैशाख ९ गते साँझसम्म केन्द्रमा नामावली पठाउने र केन्द्रले वैशाख १० गते बिहानसम्म टुंगो लगाउने निर्णय गरेको छ ।

वैशाख २ गते केन्द्रीय निर्वाचन परिचालन समितिको बैठक बोलाइएको छ ।

काठमाडौं । नेपाली कांग्रेस रोल्पाले आफूले मागेको जति सिट नपाए एक्लै चुनाव लड्ने भएको छ ।

एक महिने ‘घरघर जाऔं कांग्रेस जिताऔं’ अभियानका क्रममा प्राप्त सुझाव र उक्त सुझावमाथि भएको छलफलले आफूले मागे जति सिट नपाए एक्लै चुनाव लड्ने निर्णयमा पुगेको कांग्रेस रोल्पा सभापति किशोरकुमार आचार्यद्वारा जारी विज्ञप्तिमा उल्लेख छ ।

३० वैशाखमा हुने स्थानीय तहको निर्वाचनका लागि कांग्रेस, माओवादी, एकीकृत समाजवादीसहितका दलहरूबीच तालमेल गर्ने भनिएका बेला कांग्रेस रोल्पाले तालमेलका लागि सर्त अघि सारेको हो ।

कांग्रेस रोल्पाले १० वटा पालिकाहरुमध्ये ५ वटा पालिकामा प्रमुख, ५ वटा पालिकामा उपप्रमुख, ३६ वटा वडाहरूमा अध्यक्षसहित १ जना सदस्य र ३६ वटा वडाहरूमा ३ जना सदस्यको उमेदवारी हुने गरी गठबन्धनमार्फत निर्वाचनमा भाग लिने गरी सर्त अघि सारेको छ ।

यदि उक्त सर्त मान्य नहुने हो भने एकल ढंगले मित्रवत रुपमा सौहार्दतापूर्वक निर्वाचनको प्रतिस्पर्धामा भाग लिन तयारी गर्न पार्टी पंक्तिलाई निर्देशन दिइएको छ ।

काठमाडौं । चितवनको भरतपुर महानगरपालिको मेयर पुनः नेकपा माओवादी केन्द्रकै भागमा पर्ने सम्भावना बढेसँगै सत्तारुढ गठबन्धनको मुख्य घटक नेपाली कांग्रेसभित्र असन्तुष्टि बढेको छ ।

मुख्यतः चितवनका कांग्रेस नेता कार्यकर्ताहरूले सामाजिक सञ्जालमार्फत चर्को असन्तुष्टि जनाएका छन् । चितवनको भरतपुर महानगरपालिकाबाट मात्रै कांग्रेस केन्द्रीय समितिमा ६ जनाको प्रतिनिधित्व रहेको छ ।

गठबन्धनभित्र भरतपुर महानगरपालिकामा पुनः माओवादीले नै नेतृत्व पाउने सम्भावना बढेको सार्वजनिक भएसँगै कांग्रेस कार्यकर्ताहरूले गठबन्धनको विरुद्धमा कडा अभिव्यक्ति दिन थालेका छन् ।

यसअघि पनि चितवन कांग्रेसका नेताहरूले सभापति शेरबहादुर देउवा, वरिष्ठ नेता रामचन्द्र पौडेल, उपसभापतिद्वय पूर्णबहादुर खड्का र धनराज गुरुङ, महामन्त्रीद्वय गगन थापा र विश्वप्रकाश शर्मालाई भेटेरै भरतपुरको मेयर कांग्रेसले पाउनुपर्ने माग राखेका थिए । यद्यपि प्रधानमन्त्री एवं सभापति देउवाले गठबन्धन जोगाउने सर्तमा भरतपुरको मेयर पुनः माओवादीलाई नै दिन लचिलो देखिएका छन् ।

भरतपुरको मेयर कांग्रेसको भागमा नपर्ने चर्चासँगै पूर्व महाधिवेशन प्रतिनिधि एवं चितवन कांग्रेसका नेता सुबोध प्रधानले सार्वजनिक रूपमै एमाले उम्मेदवारलाई बधाई दिएका छन् । ‘मेयरको टिकट पाउनुहुने एमाले दाजुभाइलाई अग्रिम शुभकामना तथा बधाई’, प्रधानले फेसबुकमा लेखेका छन् । भरतपुरमा कांग्रेसले मेयर नपाउने अवस्थामा एमाले उम्मेदवारले जित्ने सम्भावना रहेकोतर्फ उनको स्टाटस लक्षित छ ।

चितवन कांग्रेसको क्षेत्र नम्बर २ का महाधिवेशन प्रतिनिधि रामकुमार श्रेष्ठले पनि आफू कांग्रेसको कार्यकर्ता भए पनि कसैको दास नभएको बताएका छन् । ‘म कांग्रेसको कार्यकर्ता हुँ, दास कदापि होइन । कसैको छोरी खुसी पार्न हाम्रो घर जलाउन कदापि दिने छैनौ’, श्रेष्ठले लेखेका छन् ।

कांग्रेस कार्यकर्ता रामचन्द्र पौडेलले पनि फेसबुक मार्फत विद्रोहको चेतावनी दिएका छन् । ‘चितवन कांग्रेसको भावनालाई नजरअन्दाज गरी महानगरको मेयर माओवादीलाई दिइयो भने चुनाव हार्ने त निश्चित नै छ त्यसले चितवन कांग्रेसमा विद्रोह ल्याउने र त्यसको असर देशभर पर्नेछ र त्यो कांग्रेसको लागि दुर्भाग्यपूर्ण हुनेछ’, पौडेलले लेखेका छन् ।

चितवनका धेरैजसो कांग्रेस कार्यकर्ताहरूले सामाजिक सञ्जालबाट भरतपुर महानगरमा कांग्रेसबाहेकको नेतृत्व नस्विकार्ने चेतावनी दिइरहेका छन् । केही समयअघि माओवादी अध्यक्ष पुष्पकमल दाहाल प्रचण्डले ‘चितवनका कांग्रेस नेताले भन्दैमा केही फरक नपर्ने, निर्णय केन्द्रबाट हुने’ अभिव्यक्ति दिएका थिए ।

गठबन्धनको शीर्ष बैठकमा भरतपुरसहित देशका प्रमुख महानगर र उपमहानगरबारे केन्द्रबाटै निर्णय लिने सहमति बनिसकेको छ ।

यस्तो अवस्थामा चितवनका कांग्रेसजनले जति नै विद्रोहको चेतावनी दिए पनि गठबन्धनबाट भरतपुरको मेयरमा प्रचण्ड पुत्री रेणुकै सम्भावना बढी देखिन्छ ।

काठमाडौं । नेपाली कांग्रेसका नेता डा. शेखर कोइरालाले तल्ला तहको अधिकार मिचेर माथिबाटै गठबन्धन लाद्न नहुने बताएका छन् ।

कांग्रेसले आवश्यकता र औचित्यका आधारमा स्थानीय स्तरमै चुनावी तालमेल गर्ने विषयमा निर्णय गरेको बताउँदै त्यसलाई बेवास्ता गर्न नहुने उनले बताए ।

केन्द्रबाटै भागबन्डा गरेर गठबन्धन लाद्न खोजे त्यसले सबैलाई अप्ठेरो पार्ने उनले बताए ।

उनले भने, ‘त्यसले कांग्रेसलाई त अप्ठेरो पार्छ, पार्छ, सत्ता गठबन्धनका अन्य दललाई पनि अफ्ठ्यारो पार्छ ।’

यद्यपि आफू गठबन्धन दलहरूबिचमा तालमेलकै पक्षमा रहेको बताए ।

‘तालमेल पनि हुन्छ । तर जिल्लामै, स्थानीय तहमै, क्षेत्रमै । स्थानीय आवश्यकता र औचित्यताका आधारमा,’ उनले भने । त्यसरी गर्दा मात्रै तालमेलले मूर्त रूप लिन सक्ने उनले बताए ।

निर्वाचनका विषयमा आशंका उठिरहेको भए पनि त्यसमा पनि शङ्का नगर्न पनि उनले आग्रह गरे ।

‘गठबन्धनका शीर्ष नेताहरूले नै बोल्दिएका कुराले तपाईँहरूलाई लागेको हुनसक्छ,’ उनले भने, ‘तर निर्वाचन हुन्छ, हुन्छ, हुन्छ ।

उनले सरकार सञ्चालनका लागि गठबन्धन हुनु र निर्वाचन भिन्न प्रयोजन रहेको पनि बताए । कांग्रेस विगतदेखि नै एक्लै निर्वाचन लडिरहेको पनि उनले स्मरण गरे ।

२०४६ को जनआन्दोलनपछि कृष्णप्रसाद भट्टराई प्रधानमन्त्री हुँदा त्यति बेला एमाले पनि सरकारमा रहेको स्मरण गर्दै उनले चुनाव भने एक्लै एक्लै लडेको बताए ।

दोस्रो जनआन्दोलन २०६२÷०६३ मा गिरिजाप्रसाद कोइरालाले एमाले, माओवादीसहितका दललाई साथमा लिएर संघर्ष गरेको र पछि सरकार चलाउँदा गरिएको निर्वाचन पनि एक्लै एक्लै लडेको उनले स्मरण गराए ।

‘गिरिजाबाबुले त्यति बेला चुनाव गर्दा कांग्रेस हार्छ तर देश र लोकतन्त्रले जित्छ भन्दै चुनाव गराउनुभएको थियो,’ उनले भने ।

कांग्रेसको विधानअनुसार पनि महानगरबाहेकको टिकट बाँड्ने अधिकार केन्द्रलाई नभएको बताउँदै उनले तल्ला तहका अधिकारहरू प्रयोग गर्न पनि तल्लै तहमा छलफल हुनुपर्ने बताए ।

काठमाडौं । आसन्न स्थानीय निर्वाचनमा सत्तारुढ दलहरूसँग चुनावी तालमेल गर्ने तयारीमा रहेको नेपाली कांग्रेसभित्र ‘परालको आगो’ दन्किरहेको छ ।

केन्द्रीय समितिको बैठकले ‘स्थानीय अवस्था र आवश्यकताअनुरूप गठबन्धनमा रहेका अन्य दलसँग तालमेल गर्नसक्ने’ निर्णय गरेको भएपनि सबैजसो स्थानीय तहमा केन्द्रको निर्णय ‘लाद्ने’ प्रयास सुरू भएको छ । कांग्रेसको आन्तरिक संरचनाभन्दा ५ दलीय गठबन्धनको संयन्त्रले गर्ने निर्णय हाबी हुने देखिएपछि कांग्रेसमा असन्तुष्टि चुलिदो छ ।

सत्तारुढ गठबन्धनमा चुनावी तालमेलको मापदण्ड बनिसकेको छैन । यद्यपि शीर्ष तहको छलफलमा केही महानगरको भागबण्डा टुंगिसकेको बताइन्छ । सर्वाधिक चासोका हेरिएको चितवनको भरतपुर महानगरपालिकाको नेतृत्व फेरि पनि माओवादीले नै पाउने देखिन्छ ।

कांग्रेस सभापतिसमेत रहेका प्रधानमन्त्री शेरबहादुर देउवानिकट नेताहरू ‘प्रधानमन्त्रीभन्दा मेयर ठूलो नहुने’ भन्दै गठबन्धनको पक्षमा दृढ देखिएका छन् । सभापति देउवा चुनाव अघि र पछिसम्म गठबन्धन जोगाएर सरकारको नेतृत्व सुरक्षित गर्न चाहन्छन् । त्यसका लागि स्थानीय निर्वाचनमा गठबन्धनका साझेदारहरूलाई आधा हिस्सा छोड्ने तयारी देउवाले गरेका छन् ।

६ वटा महानगरमध्ये कांग्रेसले ३ र बाँकी दलहरूले ३ मा नेतृत्व पाउने सम्भावना बढेको छ । गठबन्धनका कारण कांग्रेसले नेतृत्व नपाउने निश्चित देखिएका स्थानीय तहहरूमा असन्तुष्टीसँगै विद्रोहको क्रम पनि सुरू भएको छ ।

हालै नुवाकोट कांग्रेसका पूर्वउपसभापति यामबहादुर थापा र नेता भगवान पौडेल एमालेमा प्रवेश गरे । पूर्वगाविस अध्यक्षसमेत रहेका थापासहितका नेताहरूले चुनावी तालमेलकै विषयमा असन्तुष्ट रहेर विद्रोह गरेका हुन् । महोत्तरीमा प्रेस युनियन र पत्रकार महासंघको नेतृत्व गरिसकेका पत्रकार कमलेश मण्डल माओवादीमा प्रवेश गरेका छन् । गठबन्धन हुँदा माओवादीको भागमा पर्ने देखिएको मठिहानी नगरपालिकाको मेयरमा मण्डललाई उम्मेदवार बनाउने सहमति भएको छ ।

माओवादीसँगको तालमेलबाट असन्तुष्ट चितवनको माडी नगरपालिकामा कांग्रेसबाट निर्वाचित एकमात्रै वडा अध्यक्ष कृष्णप्रसाद पौडेलले पनि पार्टी त्यागेको घोषणा गरेका छन् । रौतहटको राजपुर नगरपालिकामा निर्वाचित मेयर मोहम्मद साकिल अख्तर नै कांग्रेस त्यागेर एमालेमा प्रवेश गरे । अन्य जिल्लाहरूमा पनि कांग्रेसका असन्तुष्ट नेताहरू पार्टीबाट बाहिरिने क्रम बढेको छ ।

कांग्रेसवृत्तमा पार्टीभित्रको आन्तरिक उतारचढावलाई सामान्य मानिए पनि पार्टी नै छाड्ने विषयलाई गम्भीर रूपमा लिने गरिन्छ । स्थानीय निर्वाचन नजिकिदै जाँदा कतिपयले माओवादीसँगको गठबन्धनलाई कारण बनाएर त कतिपयले आफ्नो राजनीतिक भविष्य सुनिश्चित गर्न कांग्रेस छाडेका छन् । यो क्रम बढ्ने हो भने गठबन्धन गर्दापनि कांग्रेसको शक्ति बढोत्तरी हुन समस्या पर्ने देखिन्छ ।

‘जति नै असन्तुष्ट भएपनि अपमान सहेपनि पार्टी छाडिहाल्ने कल्चर कांग्रेसको थिएन । तर हिजोआज यो वा त्यो बाहनामा सम्भावना बोकेका नेताहरूले पनि विद्रोह गर्ने क्रम देखिन्छ । यसप्रति पार्टीले गम्भीर समिक्षा गर्नुपर्छ’, कांग्रेसका एक केन्द्रीय सदस्य भन्छन् ।

संस्थापनइतर समूहका ती केन्द्रीय सदस्यका अनुसार स्थानीय आवश्यकता नभइ केन्द्रबाट तालमेल लादेको अवस्थामा कांग्रेसमा विद्रोहको लहर अझ बढ्नेछ ।

भरतपुरमा संगठित विद्रोहको तयारी

नेपाली कांग्रेसबाट भरतपुर महानगरपालिकाको मेयरका लागि २५ जनाले आकांक्षा देखाएका छन् । चितवन कांग्रेसका सबैजसो नेताहरूले यसपटक भरतपुरको मेयर कांग्रेसले पाउनुपर्ने बताउँदै आएका छन् । अघिल्लो स्थानीय निर्वाचनमा पनि हसियाँ हथौडामा भोट हालेका भरतपुर महानगरका कांग्रेसीहरू यसपटक रुखबाहेक अन्यत्र भोट नहाल्ने बताउन थालेका छन् । सामाजिक सञ्जालमार्फत अधिकांश कांग्रेस कार्यकर्ताहरूले भरतपुरको मेयरमा कांग्रेसले उम्मेदवारी नदिए विद्रोह गर्ने चेतावनी दिएका छन् ।

चितवन कांग्रेसका पुराना नेता, पूर्वजिल्ला सभापति कृष्णलाल सापकोटाले त भरतपुरको मेयर माओवादीले पाए आफू स्वतन्त्र उम्मेदवार बन्न घोषणा गरेका छन् । अर्कोतिर भरतपुरको मेयरमा कांग्रेसले उम्मेदवारी नदिए पूर्वजिल्लासभापति विकास कोइराला स्वतन्त्र उम्मेदवार बन्ने सम्भावना पनि छ ।

विगतमा टिकट खोसिएकै कारण सुशिल कोइरालाविरुद्ध दोस्रो संविधानसभामा बागी बनेका विकासमाथिको कारबाही अझै फुकुवा भएको छैन । यस्तो अवस्थामा कोइराला स्वतन्त्र उम्मेदवार बने असन्तुष्ट कांग्रेस नेता कार्यकर्ताको मत तान्नसक्ने देखिन्छ । चितवन कांग्रेसका जिम्मेवार नेताहरूले नै भरतपुरमा माओवादीले मेयर पाए जिताउन गार्हो पर्ने बताउँदै आएका छन् ।

‘भरतपुरमा रुखमा भोट दिन नपाउने हो भने हसिँया हथौडामा पनि दिइँदैन । जसले विद्रोह गर्छ उसैलाई मत दिन्छौं’, भरतपुरका एक कांग्रेस कार्यकर्ताले भने ।

पार्टीको जिम्मेवार पदमा रहेकाहरूले संगठित विद्रोह गर्न सम्भव नभएपनि आम कार्यकर्ताबीच विद्रोहको मनोविज्ञान बढेको तथ्य भने कांग्रेस नेताहरूले अनौपचारिक संवादका दौरान स्वीकार्ने गरेका छन् ।