Category: फोटो फिचर

काठमाडौं । भुकम्पले क्षति पुगेको धरहराको पुनर्निर्माण सकिएको छ ।

पुनर्निर्माणको काम सकिएको २२ तले धरहरामा गजुर राखिएको छ । राष्ट्रिय पुनर्निर्माणमा प्राधिकरणका सिइिओ सुशील ज्ञवालीले पूजा गरेर धरहराको टुप्पोमा गजुर राखिएको हो ।

वैशाख ११ गते हुन लागेको २२ तले धरहरा उद्घाटनको सम्पुर्ण तयारी पुरा भएको छ । २०७२ साल वैशाख १२ गतेको महाभूकम्पले भत्काएको धरहरा राष्ट्रिय पुर्ननिर्माण प्राधिकरणले पुर्ननिर्माणको काम सकेपछि उद्घाटन गर्ने तयारी भइरहेको जनाएको हो ।

वैशाख ११ गते प्राधिकरणले प्रधानमन्त्री केपी शर्मा ओलीबाट उद्घाटन गर्न लागेको छ ।

कोभिड–१९ को संक्रमण बढीरहेका बेला सरकारले २५ जना भन्दा बढी व्यक्ति जम्मा हुन नपाउने निर्णय गरिसकेकाले अहिलेसम्म उद्घाटन समारोहका लागि कसैलाई पनि निमन्त्रणा नगरिएको प्राधिकरणले ट्विटरमार्फत जानकारी गराएको छ ।

 

काठमाडौं । अमेरिकी अनुदान सहायता मिलेनियम च्यालेन्ज कर्पोरेशन (एमसीसी) विरुद्ध माइतीघर मण्डलमा प्रदर्शन भएको छ।

नेकपा माओवादी केन्द्रलगायतका विभिन्न २२ राजनीतिक दल र संस्थाले सोमबार प्रर्दशन गरेका हुन् । केही समयदेखि एमसिसीविरुद्धको प्रर्दशन कम भएको भए पनि पछिल्लो समय यसविरुद्ध फेरि प्रदर्शन हुन थालेका छन् ।

प्रदर्शनकारीले एमसीसी खारेज हुनुपर्ने, कालापानीबाट भारतीय सेना फिर्ता गनुपर्नेजस्ता नारा लगाएका छन् ।

काठमाडौं । काठमाडौं उपत्यकासहित देशको केही भूभागमा पानी परिरहेको छ । धेरै समयपछि उपत्यकालगायतका क्षेत्रमा वर्षा भएको हो ।
पानी परेपछि प्रदुषण घट्ने भन्दै सर्वसाधरण खुसी भएका छन् ।

काठमाडौंमा दिउँसै अन्धकार भएको थियो भने केही ठाउँमा असिना पानी परिरहेको छ ।

देशमा स्थानीय वायु र पश्चिमी न्यून चापीय रेखाको प्रभावले उपत्यकाको लगायतका क्षेत्रमा चट्याङसहित पानी परिरहेको जल तथा मौसम पूर्वानुमान महाशाखाले जनाएको छ ।

हाल प्रदेश १ र सुदूरपश्चिम प्रदेशलगायत अन्य प्रदेशका पहाडी भूभागहरुको थोरै स्थानमा मेघगर्जन,चट्याङ, हावाहुरीसहित हल्का वर्षा भइरहेको वरिष्ठ मौसमविद् बरुण पौडेलले नेपालप्रेसलाई बताए ।

उनले भने,‘अहिले काठमाडौं उपत्यका लगायतका क्षेत्रमा ठूलो पानी त होइन हल्का पानी परिरहेको छ । तर चट्याङसहित कुनै ठाउँमा असिना परिरहेको छ ।

उनका अनुसार प्रि-मनसुन सक्रिय भएकाले अहिले हावाहुरीसहित पानी परिरहेको हो । प्रि -मनसुनको समयमा बिहान घाम लाग्ने दिउँसो भएपछि हावाहुरी चल्ने, चट्याङ पर्ने र पानी पर्दछ । र विहान रोकिन्छ । प्रि-मनसुनको समयमा लगातार झरी पर्ने भने हुँदैन । जेठर असारदेखि मनसुन सक्रिय हुनुअघि प्रि-मनसुनको प्रकृया चल्ने मौसमविद्ले पौडेलले बताए ।

यो क्रम अझै दुईतीन दिनसम्म रहने भएकाले सचेत रहन उनले आग्रह गरे ।

अहिले विशेष गरी पहाडी भूभागको पोखरा, सुर्खेत, गोरखालगायतका क्षेत्रको आसपासमा मध्यम खालको वर्षा भइरहेको छ । तराईका जिल्लाहरुमा भने सामान्य हावाहुरी चलेपनि र ठूलो हावाहुरीको सम्भावना कमै रहेको उनको भनाइ छ ।

देशैभर लागेको आगलागी पनि निभ्‍न सहयोग पुग्ने देखिन्छ ।

भक्तपुर । मध्यपुरथिमि नगरपालिका बोडेमा हरेक नयाँ वर्षको वैशाख २ गते मनाइने प्रसिद्ध ‘जिब्रो छेड्ने जात्रा’ यस वर्ष पनि धुमधामका साथ सकिएको छ ।

यस वर्ष बोडेका ४८ वर्षीय बुद्धकृष्णवांग श्रेष्ठले आठौँ पटक जिब्रो छेडेका छन् ।

मध्यपुरथिमि नगरपालिकाले सञ्चालन गरेको नेपाल कोरियामैत्री नगरपालिका अस्पतालमा लामो समयदेखि एम्बुलेन्स चालकको रुपमा कार्यरत उनले कोरोना महामारी शुरु भएसँगै गत वर्षदेखि कोभिडका बिरामी मात्रै बोक्ने आइसोलेटेड एम्बुलेन्स चलाएर कोरोना सङ्क्रमितको सेवा गर्दै आएका छन् ।

गत वर्ष विश्व महामारीका रूपमा फैलिएको कोरोना भाइरस संक्रमणका पहिलोपटक जात्रा रोकिएको थियो । कोरोनाको दोस्रो वेभको जोखिम बढिरहेपनि स्थानीय भेला भएर जिब्रो छेड्ने जात्रामा सहभागी भए ।

बुद्धकृष्णले भने, ‘मानवीय सेवा र कला संस्कृतिको संरक्षणमा लाग्दै आएको मैले गत वर्ष कोरोनाका कारण जात्रा रोकिएकाले जिब्रो छेड्न पाइन, यस वर्ष जात्रालाई निरन्तरता दिने निर्णय गरेँ ।’

नेवार समुदायको कला, संस्कृति र इतिहास बोकेको जात्रा/ पर्व कुनै बाहनामा नरोक्ने भन्दै आयोजकले उत्साहपूर्वक सहभागिताको लागि आव्हान गरेको थियो ।

नगरपालिकाले जात्रा नरोक्ने भए पछि बुद्धकृष्णले जिब्रो छेड्न आवश्यक तान्त्रिक विधि पूरा गरेका थिए भने १० इञ्च लामो सुइरो बनाएर कर्मी नाइकेले तेलमा डुबाएर राखेका राखेका थिए ।

हालसम्म १२ जनाले जिब्रो छेडेको यो जात्रा १०६ वर्षदेखि निरन्तर चलिरहेको छ ।

भक्तपुर । भक्तपुरको मध्यपुर थिमी यतिखेर सिन्दूर जात्राको रमझममा भुलेको छ । कोरोना संक्रमणको जोखिमका बावजुद प्रत्येक वर्ष नयाँ वर्षको शुरूआतजस्तै यो वर्ष पनि जात्रामा भीड देखियो ।

बिस्केट (बिस्काः) जात्राको अवसर पारेर ३२ खटसहितको सिन्दूर जात्रा मनाइने गरिएको छ ।

स्थानीयका अनुसार देवता खटमा राखी धिमेबाजाका साथ जात्रा प्रत्येक चोक, चौबाटो र नगरपरिक्रमा गर्दा घरको झ्याल, कौसी र छतबाट अबिर र फूल बर्साएर स्वागत गर्ने प्रचलन छ ।

भुस्याबाजा, कायाबाजा, धिमेबाजा बजाएर देवताका खटलाई हर्षोल्लासका साथ एकापसमा सिन्दुर (अबिर) दलेर परिक्रमा गराइन्छ ।

केही वर्षयता भने खटको संख्यामा कमी हुँदै आएको छ ।

सिद्धिकालीको खट ल्याएर आफ्ना गणहरुसहित बालकुमारी प्रवेश गराएपछि यो जात्रा सुरू हुन्छ ।

मधुमल्ला । नयाँ वर्षको अवसर पारेर मोरङको मिक्लाजुङ गाउँपालिका- ७ र ८ मा पर्ने मावा नुनसरी सामुदायिक वन क्षेत्रभित्र ‘टिकटक रोड’ उद्घाटन गरिएको छ । उद्घाटनकै दिन रोडमा टिकटक बनाउने, तस्बिर खिच्ने र अवलोकन गर्नेको भीड लागेको छ ।

मिक्लाजुङ गाउँपालिका अध्यक्ष देवीप्रसाद आचार्यले रोडको उद्घाटन गरे ।

आन्तरीक पर्यटन प्रवर्द्धन गर्ने उद्देश्यले मधुमल्ला बजारको उत्तरतर्फ मधुमल्ला-मावा तोरीबारी सडक खण्डको करिब २ किलोमिटर जंगल क्षेत्रमा टिकटक रोड निर्माण गरिएको हो ।

आगन्तुकहरूको मन लोभ्याउन विभिन्न तुल र ब्यानर टाँगिएका छन् । ढुङ्गाहरूमा कलात्मक आकृति दिइनुका साथै रंगरोगन गरिएको छ । यात्रुहरुलाई रुखको छहारीसंगै बस्न फलैचाको र राति उज्यालोको लागि सडक बत्ती राखिएको छ ।

घुम्न आउनेहरूलाई इन्टरनेटमा रम्न र टिकटक बनाउनेहरूका लागि फ्रि वाईफाईको समेत व्यवस्था गरिएको मधुम्लला पर्यटकीय मार्ग व्यवस्थापन समितिका अध्यक्ष सुरेन्द्र थापाले बताए ।

 

काठमाडौं । नयाँ वर्ष २०७८ आजबाट प्रारम्भ भएको छ । कोरोनाका कारण यसपाली खुलेर नयाँ वर्ष मनाउन नसके पनि ‘न्यू इयर इभ’मा काठमाडौका केही स्थानमा रातिसम्म चहलपहल देखिएको थियो ।

दरबारमार्ग, न्यूरोड, असन लगायत क्षेत्रहरुमा काठमाडौंवासी ‘न्यू इयर’ मनाउन निस्केका थिए । पसलहरु पनि अबेरसम्म खुलेका थिए । होटल–रेस्टुरेन्टहरुमा पनि रौनक थियो ।

तथापि, पहिलेजस्तो उत्सवको माहोल भने यसपाली नभएको व्यवसायीले बताएका छन् ।

हेर्नुस नयाँ वर्षको अघिल्लो दिन राति खिचिएका केही तस्बिर:

काठमाडौं । काठमाडौंको असन क्षेत्रमा पाहाँ च:ह्रे जात्रा मनाइएको छ ।

कोरोना महामारीका कारण गत वर्ष यहाँ खुलेर जात्रा मनाउन पाएका थिएनन् । कोरोनाको दोस्रो लहरको जोखिम बढिरहँदा बाक्लो संख्यामा भेला भएर स्थानीय जात्रा मनाएका छन् ।

जात्रामा अजिमा दिदीबहिनी लुमधि अजिमा, तेबहाल अजिमा र कङ्ग अजिमालाई असनमा भेट गराइएको छ ।

फरक-फरक टोपी र टिसर्ट लगाएकाहरू चोकमा भेला भएर तीनवटा खट जुधाई एकअर्कामा आदर र सम्मान प्रकट गरिएको छ ।

जात्राका क्रममा घरघरबाट फ्याँकिएको चटामरी पाउनेलाई लाभ हुने जनविश्वास छ ।

काठमाडौं । पेट्रेालियम पदार्थमा गरिएको मूल्यवृद्धिको विरोधमा अनेरास्ववियुको एक समूहले आज आयल निगम घेराउ गरेको छ ।

माधव नेपाल पक्षधर अनेरास्वियूको केन्द्रीय कमिटीद्वारा आयोजित घेराउ कार्यक्रममा विद्यार्थी नेताहरूले आयल निगमविरुद्ध नाराबाजी गरेका थिए ।

प्रदर्शनका क्रममा मूल्यवृद्धि तत्काल फिर्ता लिन माग गरिएको थियो । प्रदर्शनकारीले विभिन्न नारा लेखिएका प्लेकार्ड बोकेका थिए ।

माधव नेपाल पक्षधर अनेरास्ववियुका अध्यक्ष सुदेश पराजुली र महासचिव आरती लामाले घेराउको नेतृत्व गरेका थिए ।

नेपाल आयल निगमले आइतबार राति १२ बजेबाट लागू हुने गरी पेट्रोल, डिजेल र मट्टितेलको मूल्य २ रुपैयाँले बढाएको छ ।

काभ्रेपलाञ्चोक । काभ्रेपलाञ्चोकको नालामा सेतो मछिन्द्रनाथको जात्रा भब्यसँग मनाइएको छ । नेवार समुदायले मनाउने यो जात्रा होलिको भोलिपल्टदेखि ६ दिनसम्म चल्नेछ । यहाँ मेला भर्न भक्तपुर, काठमाडौ र ललितपुरबाट समेत भक्तजन जाने गरेका छन् । विश्व शान्तिको कामनाका साथ हरेक वर्ष चैत्र शुक्ल तृतीयाका दिन मनाइने नाला जात्रा आइतबार साबिक उग्रचण्डी नालामा यो जात्रा मनाउने चलन छ । यो जात्रा नालामा २०१७ सालदेखि मनाउन थालिएको हो ।

काठमाडौं । म्यानमारमा भएको हिंसा तथा दमनविरुद्ध मानव अधिकार तथा शान्ति समाजले काठमाडौंमा प्रदर्शन गरेको छ । म्यानमारमा भइरहेको हिंसा तथा दमन अन्त्यका लागि संयुक्त राष्ट्रसंघलाई दबाव दिन भन्दै समाजले म्यनमार दूताबासअघि प्रदर्शन गरेको हो । समाजले म्यानमारका राजनीतिक बन्दीको बिनाशर्त रिहाइका लागि विश्व एक हुनुपर्ने र मानवताविरुद्धको अपराध रोक्न अन्तर्राष्ट्रिय समुदायले सामुहिक मदम चाल्नुपर्ने आवाज उठाएको छ ।

काठमाडौं । दशरथ रंगशाला नेपाली फुटबल खेलाडीहरुको लागि सबैभन्दा प्यारो मैदान हो । तर, ६ वर्षदेखि नेपाली राष्ट्रिय टिमले यहाँ अन्तर्राष्ट्रिय म्याच खेल्न पाएका थिएन । ७२ सालको भूकम्पले भत्काएको रंगशाला पुनर्निमाण हुन लामो समय लाग्यो ।

गत वर्षबाट पुनर्निमित रंगशालामा खेलहरु हुन थाले पनि कोरोनाका कारण फेरि फुटबल गतिविधि ठप्प भयो । त्यसयता आज पहिलोपटक नेपाली राष्ट्रिय टोलीले रंगशालामा खेलेको हो । किर्गिस्तान–यु २३ विरुद्ध नेपालले राम्रो खेल प्रस्तुत गरे पनि नतिजा आफ्नो पक्षमा पार्न सकेन । स्वदेशी मैदानमा जितको खोजीमा रहेको टोली बराबरीमा रोकियो र दर्शक निराश बने । यद्यपि, दशरथ रंगशालामा फुटबल फर्किएको खुशी भने खेलाडीहरुमा झल्किएको थियो ।

हेर्नुस आजको म्याचका केही तस्वीर:

काठमाडौं । वसन्तपुर हनुमानढोकामा तीन खण्डे चीर ठड्याइएसँगै यस वर्षको फागु पर्व अर्थात होली सुरु भएको छ ।

आज विहान ८ बजेर २६ मिनेटको साइतमा हनुमानढोका दरबारको दक्षिण पटांगिनी, ऐतिहासिक मोहनकाजी चोक तथा दाखचोकमा रंगीविरंगी ध्वजापताकासहितको ३२ फिट अग्लो तीनखण्डे चीर ठड्याइएको हो । योसँगै देशभर औपचारिक रुपमा फागु पर्व सुरु भएको छ ।

भगवान कृष्णले गोपिनीहरु नुहाउन गएका बेला कपडा चोरेर रुखमा झुन्ड्याइदिएको पौराणिक कथाको स्मरणमा चीर ठड्याउने परम्परा रहिआएको छ ।

प्रत्येक वर्षको फागुन शुल्क अष्टमीको दिन चीर ठड्याएसँगै फागु पर्व आरम्भ हुन्छ । यस वर्ष फागु पूर्णिमा चैत १५ गते परेको छ । तराई मधेशका जिल्लामा १६ गते फागू पर्व परेको छ । फागु पूर्णिमाको दिन सरकारले सार्वजनिक विदा दिने गर्छ ।