Category: फोटो फिचर

काठमाडौं । नेकपा एमालेनिकट युवा-विद्यार्थी र गणतन्त्रविरोधी अभियान्ता दुर्गा प्रसाईंको शक्ति प्रदर्शन सकिएसँगै काठमाडौंको अवस्था सामान्य बनेको छ ।

बिहीबार प्रदर्शनका कारण दिनभरजसो प्रभावित बनेको सार्वजनिक यातायात अपराह्नबाट सुचारु भएको हो ।

युवा संघले कोटेश्वरस्थित तीनकुनेमा शक्ति प्रदर्शन गरेको थियो भने प्रसाईंको नागरिक बचाऊ अभियानले बल्खुमा प्रदर्शन गरेको थियो । युवा संघको आन्दोलन शान्तिपूर्ण भयो भने झडपले बल्खु तनावग्रस्त बन्यो ।

काठमाडौं । गणतन्त्रविरोधी अभियान्ता दुर्गा प्रसाईँको प्रदर्शनस्थल बल्खु वरपर चहलपहल सुरू भएको छ । कार्यक्रमस्थलमा र त्यहाँ पुग्ने रुटमा बाक्लोरूपमा सुरक्षाकर्मी परिचालन गरिएको छ । सडकमा सवारी चाप छैन ।

विभिन्न जिल्लाबाट आएका प्रसाईँका समर्थकहरू कार्यक्रम स्थल जान पूर्वबाट साँगाबाट प्रवेश गरी कोटेश्वर, सातदोबाटो हुँदै बल्खु जाने रुट बनाइएको छ । त्यस्तै, बालाजु क्षेत्रबाट गल्फुपाखा, सोह्रखुट्टे, कालीमाटी हुँदै तोकिएको स्थानमा पुग्ने रुट तय गरिएको छ । बल्खुमा फाट्टफुट्ट प्रदर्शनकारी भेलिन थालेका छन् ।

प्रहरी र सशस्त्रको टुकडी ठाउँठाउँमा परिचालित छन् । कलंकीमा चेकिङ बढाइएको छ । कालिमाटी, कलंकीलगायतका ठाउँमा प्रहरीले शंकास्पद लागेका व्यक्तिलाई सोधपुछ र चेकिङमा कडाइ गरेको छ । सादा पोशाकका सुरक्षाकर्मी पनि खटिएका छन् ।

दुर्गा प्रसाईँले कार्यक्रमका प्रदर्शनमा ५ लाखलाई उतार्ने दाबी गरेका थिए । काठमाडौं आउनका लागि एकै व्यक्तिले १६ सय वटा बस बुकिङ गरिदिएको सार्वजनिक अभिव्यक्ति दिइरहेका छन् । तर, सुरक्षा निकाय स्रोतका अनुसार बुधबार साँझसम्म करिब ४ हजारको संख्यामा प्रसाई समर्थक काठमाडौं भित्रिएका छन् । उनीहरुलाई विभिन्न पार्टी प्यालेस, बैक्वेट र होटलहरुमा राखिएको छ ।

काठमाडौं उपत्यका ट्राफिक प्रहरी कार्यालय प्रमुख पोषराज पोखरेलले अतिरिक्त बसहरु नभित्रिएको बताए ।

प्रसाईको कार्यक्रमलाई काउन्टर दिँदै नेकपा एमालेनिकट युवा र विद्यार्थी संघले कार्यक्रम राखेकाले काठमाडौं उपत्यकामा उच्च सुरक्षा सतर्कता अपनाइएको छ ।

काठमाडौं । संयुक्त राष्ट्रसंघका महासचिव एन्टिनियो गुटेरेसको संघीय संसदलाई सम्बोधन गर्ने तयारी पूरा भएको छ ।

संघीय संसद भवन नयाँ बानेश्वरमा भइरहेको तयारीबारे प्रतिनिधिसभाका सभामुख देवराज घिमिरेले सोमबार अपराह्न संयुक्त सदनको बैठक (प्रतिनिधिसभा) कक्षको व्यवस्थापकीय र प्राविधिक पक्षको निरीक्षण गरेका छन् ।

महासचिव गुटेरेसले मंगलबार अपराह्न ४ बजे संयुक्त सदनको बैठकमा सम्बोधन गर्ने कार्यक्रम छ । सभामुखले संसद सचिवालयका उच्च अधिकारीलाई व्यवस्थापन पक्षलाई त्रुटिरहित सम्पन्न गर्न निर्देशन दिएका छन् ।

सभामुख घिमिरेलाई संसद सचिवालयका महासचिव डा. भरतराज गौतम, प्रतिनिधिसभा सचिव पदमप्रसाद पाण्डेय, राष्ट्रियसभा सचिव डा. सुरेन्द्र अर्याल, प्रवक्ता एकराम गिरी, सुरक्षा अधिकारीलगायतले तयारीबारे जानकारी गराएका छन् ।

काठमाडौं । दसैँ मनाउन उपत्यका छोड्नेहरुको संख्या बढ्न थालेको छ । घटस्थापनादेखि नै अधिकांश विद्यालय, कलेज र संघसंस्था बन्द भएपछि दसैँ मनाउन जन्मघर जानेहरुको लर्को बढेको हो ।

काठमाडौं उपत्यकाबाट बाहिरिने मुख्य नाकाहरु थानकोट, साँगा र दक्षिणकालीको बाटो भएर घर फर्किनेहरुको बिहानैदेखि भीड लागेको छ ।

सरकारले दसैँमा यातायात व्यवस्थापनलाई सहज बनाउन असोज २६ गते देशैभरका सार्वजनिक सवारीसाधनमा रुट परमिटसमेत खुला गरिसकेको छ ।

ट्राफिक ट्राफिक प्रहरीले उपत्यका बाहिरिने यात्रुको सहजताका लागि काठमाडौं उपत्यकाभित्रका १५ स्थानमा यात्रु सहायता कक्ष सञ्चालन गरेको छ ।

यसैक्रममा राजधानी बाहिरिन तम्तयार भएकाहरुको नेपालप्रेसका फोटो पत्रकार गौरव पौडेलको क्यामेरामा आज बिहान कैद भएका कोटेश्वरका केही दृश्य :

ल्हासा (तिब्बत) । चीनको स्वशासित क्षेत्र तिब्बतको राजधानी ल्हासामा कुनै बेला भारतको कार्यालय थियो । भुटानको थियो । बेलायतको थियो । नेपालको नहुने कुरै भएन ।

तर, अहिले नेपालबाहेक कसैको पनि कार्यालय छैन । अर्थात् तिब्बतको राजधानी ल्हासामा अहिले नेपालको मात्रै मिसन छ । नेपाली महावाणिज्य दूतावास ल्हासाको नोर्बुलिङ्का सडकमा छ । यो ल्हासाको डाउनटाउन क्षेत्र हो । यहाँबाट भाकोर सडकदेखि पोताला दरबार नजिकै छ ।

यो महावाणिज्य दूतावास नेपाल चीन कूटनीतिको मात्रै होइन ल्हासाका दुई हजार नेपालीहरुको भावनात्मक मुकाम पनि हो । नेपालको ल्हासामा कार्यालय रहेको धेरै शताब्दी भएको छ ।

नेपाल र जनवादी गणतन्त्र चीनले सन १९५५ अगस्ट १ मा कूटनीतिक सम्बन्ध बनाए । यो सम्बन्धपछि यो मिसनमा सन् १९५६ सेप्टेम्बर २० बाट महावाणिज्य दूतहरु आउन थालेका थिए ।

अहिलेका महावाणिज्य दूत नवराज ढकाल बीसौं हुन् । यहाँका पहिलो महावाणिज्य दूत हुन् उपेन्द्रबहादुर बस्नेत । मुक्ति सेनाका कमाण्डरसमेत भएका जीबी याक्थुम्बा, मानवशास्त्री डोरबहादुर विष्टदेखि पूर्वमुख्यसचिव तथा चीनका लागि नेपालका पूर्वराजदूत लीलामणि पौडेल पनि ल्हासाको महावाणिज्य दूत भएका थिए ।

ल्हासा (तिब्बत) । २९ वर्ष अगाडि युनेस्कोको विश्व सम्पदा सूचीमा अटाएको पोताला दरबारको निर्माण भने सातौँ शताब्दी (सन् ६३७) मा भएको हो । सन १९९४ मा युनेस्कोको सूचीमा अटाएको पोताला दरबारबारेमा युनेस्कोले दरबार बन्नमा तिब्बतीका अतिरिक्त भारतीय, चिनियाँ र नेपाली कलाको प्रयोग भएको उल्लेख गरेको छ ।

तिब्बती धर्मगुरु दलाई लामाको दरबारको रुपमा रहेको पोताला दरबार निर्माण गरेका हुन्, तिब्बती राजा संङचङ गम्पोले । लिच्छवीकालकी नेपाली राजकुमारी भृकुटीसँग विवाह गरेका उनले पोताला दरबार बनाएका थिए ।

ल्हासाको मुख्य बजारबाट दुई किलोमिटर दुरीमा रहेको दरबार समुद्र सतहबाट ३७५० मिटर उचाईमा छ जुन नेपालको नाम्चे बजार भन्दा उचाईमा हुनु हो । यसलाई विश्वको सबैभन्दा उच्च स्थानमा रहेको दरबारको रुपमा पनि चित्रित्र गर्ने गरिएको छ ।

पोताला दरबारमा पाँचौँ, सातौँ, आठौँ, नवौँ, दशौँ, एघारौँ, बाह्रौँ र तेह्रौँ दलाइ लामाका शवहरु राखिएको छ । पाँचौँ दलाई लामाको शव सबैभन्दा महँगोगरी राखिएको छ । १८ हजार भन्दा धेरै प्रकारका गरगहना र ३७२१ किलो सुनले उक्त शव सजाइएको छ ।

दरबारको सेतो भित्ता पोत्न दुध, चिनी, मह, जडिबुटि सेतो चुनामा मिसाएर प्रयोग गरिने गरिएको छ । हरेक साल अक्टोबरमा यस्तो काम हुने बताउँछिन् ल्हासा स्थानीय सरकारकी विदेश विभागकी अधिकारी तेन्जिङ डोगा। डोगाको अनुसार पोतालालाई दुनियाँको सबैभन्दा मिठो दरबार यसै कारण भनिएको हो ।

पहिलेपहिले एक महिना लाग्ने त्यो चलन अहिले १० दिनमा सकिने चाइला हाइलाइट्स डटकमले उल्लेख गरेको छ ।

बढीमा पाँच मिटर चौडाइको गाह्रोले बनेको दरबार होङ पाहाडबाट ११७ मिटर उचाईमा रहेको छ जसका १३ तला छन् । पोताला तिब्बतको राजधानी ल्हासाको मात्रै नभएर समग्र तिब्बत स्वायत्त क्षेत्र तथा चीनकै एक सांस्कृतिक निधीको रुपमा लिने गरिएको छ ।

बेइजिङ । एक हजार ४०० वर्ग मिटरको विशाल क्षेत्रफलमा फैलिएको छ श्वेत चैत्य । चीनको राजधानी बेइजिङको प्रशानिक मुटु तिआनमेन स्क्वायरबाट पश्चिममा पर्ने यो श्वेत चैत्यमा आगन्तुकहरु आइरहन्छन् ।

सोमबार बन्द हुने चैत्यमा साताका अरु दिन आगन्तुकहरुको आउजाउ भइरहन्छ । आगन्तुकलाई प्रवेश शुल्क लाग्छ । तर, नेपालीलाई लाग्दैन । अरुले २० युआन अर्थात् ३६० बढी नेपाली रुपैयाँ तिरेर प्रवेश गर्न पाइने चैत्य जान नेपालीलाई कुनै पैसा लाग्दैन ।

तेह्रौं शताब्दीमा नेपाली कलाकार अरनिकोले यो चैत्य युआन वंशको राजतन्त्रात्मक कालमा बनाएको हो । आजभन्दा ७४४ वर्ष अगाडि सन् १२७९ मा आठ वर्ष लगाएर यो ५०.९ मिटर अग्लो श्वेत चैत्य तयार गरिएको हो ।

चीनको संरक्षित र घुम्नुपर्ने गन्तव्यको सूचीमा रहेको श्वेत चैत्य परिसरमा सन् २००१ मा यसका निर्माता अरनिकोको सालिक पनि राखिएको छ । साथै नेपालका राजा वीरेन्द्र, प्रधानमन्त्रीहरु केपी ओली, पुष्पकमल दाहाल प्रचण्डलगायतका विभिन्न प्रसंगका तस्बिरहरु पनि यहाँ राखिएका छन् ।

चीन सरकारले यो चैत्यलाई नेपाल र चीन जोड्ने ऐतिहासिक मित्रताको विम्ब भनेर आफ्नो पर्यटन वेबसाइटमा उल्लेख गरेको छ ।

काठमाडौंको स्वयम्भूनाथ र बौद्धनाथ जस्तै शिखर शैलीमा श्वेत चैत्य बनेको शताब्दी पुरुष सत्यमोहन जोशीले २०४४ सालमा प्रकाशन गरेको ‘कलाकार अरनिको’ नामक पुस्तकमा तस्बिरसहित उल्लेख गरेका छन् । जोशीले बेइजिङको मुटुमा रहेको श्वेत चैत्यमा धेरै खोजबिन गरेर उक्त ऐतिहासिक पुस्तक लेखेका थिए ।

काठमाडौं । काठमाडौंमा यौनिक अल्पसंख्यक समूहले गाईजात्राको अवसरमा ‘प्राइड परेड’ प्रदर्शन गरेका छन् । उनीहरुले काठमाडौं दरबार क्षेत्रस्थित वसन्तपुरदेखि टुँडिखेलसम्म परेड गरेका हुन् ।

आफ्नो पहिचानमाथि गर्व गर्दै उत्सवको रुपमा सार्वजनिक उद्घोष गर्न, मृत समुदायका व्यक्तिप्रति शोक प्रकट गर्न र समुदायमाथि हुने लाञ्छना, विभेद र घृणाविरुद्ध समुदायको अधिकारका लागि आवाज उठाउन परेड गरिएको अभियन्ता भूमिका श्रेष्ठले बताइन् ।

बेइजिङ । गाँउलेहरु माछा मार्दै ढुङ्गा चलाइरहेका छन् । छाना भएका डुङ्गाहरुमा केही यात्रुहरु जल सफर गरिरहेका छन् । वृद्धहरु पुराना औजार बनाइरहेका छन् । चराहरुको चिरबिर र पानीको छप्ल्याङ् अनि पैदलयात्रीहरुको कलङमलङको आवाजलाई मन्दिरमा बलिरहेको धुपबत्तिले नयाँ स्वाद थपिरहेको छ ।

पहाडको फेदमा बनेको यो ठाँउको शिरमा विशाल पर्खाल शृङ्खला छ । हो चीनको ग्रेट वाल छ । पृष्ठभूमिको पहाडी शिरमा ग्रेट वाल र भित्तामा केवल कार झुन्डाएको यो गाँउको फेदीमा सस्तैमा पाउने आइसक्रिम देखि महँगोमा पाउने खानपान र सुत्ने व्यवस्था पनि छ । हेर्दा गाउँ देखिन्छ । प्राचीन गाउँले कलाकृतिले बनाइएका घरहरुले एक मौलिक गाउँको महसुस हुन्छ ।

तर, यो एक अन्तर्राष्ट्रिय रिसोर्ट हो । बेइजिङ वाटरटाउन इन्टरनेसनल टुरिजम रिसोर्ट हो यो । दुई हजार चिनियाँ मुद्रा तिरेर एक दिन मज्जाले बिताउन सकिने यो रिसोर्ट खासमा पुरानो खण्डहर गाउँलाई पुनः पुरानै तरिकाले बनाएर तयार गरिएको रिसोर्ट हो । सन २०१० बाट संचालनमा आएको रिसोर्टमा जलकृडा अनुभव देखि पूर्वी बेइजिङको ग्रेटवालको एक खण्ड दर्शन प्रमुख आकर्षण हुन् ।

चीनका मिङ वंश, चिङ वंशदेखि गणतन्त्र चीन हुँदै जनवादी गणतन्त्र चीनसम्मका कला बोक्ने कलाकृतिहरुको घरहरु रिसोर्टमा चार लाख तीस हजार वर्ग मिटरमा बनाइएका छन् । रिसोर्टको क्षेत्रफल ९ वर्ग किलोमिटर छ ।

सांस्कृतिक पर्यटन, मनोरन्जन पर्यटनदेखि बिजनेस मिटिङमा समेत रिसार्ट लोकप्रिय बनेको छ । प्रकृति, संस्कृति, इतिहास र आधुनिकतालाई सुन्दर घोलघाल पारेर कसरी पर्यटकिय आम्दानी र पहिचार दुवै बनाउन सकिन्छ भन्ने एक सुन्दर उदाहरण बेइजिङ वाटर टाउनले प्रस्तुत गरेको छ ।

काठमाडौं । सशस्त्र प्रहरी र नेपाल प्रहरीको स्कर्टिङमा  काठमाडाैं उपत्यकाकाे फाेहाेर बञ्चरेडाँडामा  विसर्जन गर्न सुरु गरिएकाे छ ।

फोहोर विसर्जन गर्न स्थानीयले अवरोध गरेपछि प्रहरीको स्कटिङमा फोहोर बोकेर ल्याण्डफिल्ड साइट पुगेकाे १५० वटा गाडीले बञ्चरेडाँडामा फाेहाेर फाल्न सुरु गरेकाे हाे । स्थानीयले फोहोर लैजान अवरोध गरेपछि सय भन्दा बढी प्रहरी खटाइएको थियो ।

सोही क्रममा स्थानीय र प्रहरीबीच केही बेर झडप समेत भएको थियो । साउन १ गते बञ्चरेडाँडा लैजान रोकिएको थियो । स्थानीयहरुले विभिन्न माग राख्दै फोहोर व्यवस्थापनमा अवरोध गरेका थिए ।

काठमाडौं । मिटरव्याज पीडितहरुले उपप्रधान तथा गृहमन्त्री नारायणकाजी श्रेष्ठको राजीनमा मागेका छन् । मिटर व्याज तथा ठगीविरुद्धको किसान–मजदुर संघर्ष समितिले आज नयाँ बानेश्वरमा प्रदर्शन गर्दै गृहमन्त्री श्रेष्ठको राजीनामा मागेका हुन् ।

उनीहरुले सरकारले ल्याएको मिटरव्याज सम्बन्धी नयाँ बिधेयकप्रति असन्तुष्ट जनाएका छन् । संघर्ष समितिले मंगलबार नै काठमाडौंमा प्रदर्शन सहित संसद भवन घेराउ गरेका छन् । उनीहरुले नयाँ विधेयक मिटरव्याज पीडितको पक्षमा नआएसम्म आन्दोलन जारी रहने बताएका छन् ।

यस्तै समितिले मंगलबार काठमाडौंमा पत्रकार सम्मेलन गर्दै सरकारले ल्याएको विधेयकले आर्थिक अपराधमा संलग्न साहु महाजनको सम्पती छानविन गर्न नसक्ने र हालसम्म आर्थिक अपराधबाट पीडित बनाएका किसान मजदुरहरुलाई अपराधीहरुको चंगुलबाट मुक्त घोषणा गर्न नसक्ने जनाएको छ ।

समितिले नयाँ कानूनले मिटरव्याज पीडितहरुको माग सम्बोधन गर्न नसकेको भन्दै आन्दोलन जारी नै रहने बताएकाे छ । संघर्ष समितिका प्रवक्ता निर्ग नविनले अघिल्लो व्यवस्थामा पुराना लिखतहरूलाई साहुमहाजन र ऋणी वडामा गएर प्रमाणित गराउनुपर्ने भन्ने रहेपनि अहिले साहुमहाजन एक पक्ष मात्रै गए पनि हुने बनाएको भन्दै असन्तुष्ट जनाए । उनले साहुमहाजनसंग भएका कागजपत्रको छानविन हुनुपर्ने र अनुचित लेनदेन देखिए कारवाही हुनुपर्ने बताए ।

काठमाडौं । प्रधानमन्त्री पुष्पकमल दाहाल ‘प्रचण्ड’ पत्नी सीता दाहालको राजकीय सम्मानसहित अन्त्येष्टि गरिएको छ । पशुपति आर्यघाटमा आज राजकीय सम्मानसहित अन्त्येष्टि गरिएको हो ।

दाहालको निधनपछि सिंहदरबारमा मन्त्रिपरिषद्को आकस्मिक बैठकले उनको त्याग र योगदानप्रति आत्मसात गर्दै नेपाली सेनाको एक टुकडीद्वारा सलामी दिने व्यवस्था सरकारले मिलाएको थियो।

बिहान नर्भिक हस्पिटलमा निधन भएपछि सीताको पार्थिव शरीर श्रद्धाञ्जलीका लागि माओवादी केन्द्रको पार्टी कार्यालय पेरिसडाँडामा राखिएको थियो । पेरिसडाँडाबाटै अन्तिम संस्कारका लागि पशुपति लगिएको हो ।

हेटौंडा । मकवानपुरको हेटौंडा उपमहानगरपालिका वडा नम्बर १० मा रहेको बागमती प्रदेशसभा भवन परिसरजलमग्न हुँदा सांसदहरु बैठकस्थल छिर्न सकेका छैनन् ।

गत असार १ गते पारित भएको आर्थिक वर्ष २०८०/०८१ को बजेटको सन्दर्भमा आज सुरु हुने भनिएको बैठकमा सहभागी हुन प्रदेश सांसदहरु आएका थिए । तर, केही बेरमात्रै परेको पानीको कारण प्रदेशसभा परिसर जलमग्न हुँदा १ बजे सुरु हुने भनिएको बैठकमा सहभागी हुन सांसदहरुलाई मुस्किल परेको हो ।

प्रदेशसभा छिर्ने ढोकासम्म पानी जमेपछि सांसदहरु अलमलमा परेका थिए । प्रत्येक पटक पानी पर्दा यस्तो समस्या आए पनि समाधानमा चासो दिइएको छैन ।

खप्तड । प्रथम खप्तड अन्तर्राष्ट्रिय आध्यात्मिक सम्मेलनको लागि अहिले नेपाल-भारतका विभिन्न क्षेत्रबाट सहभागीहरु आउने क्रम जारी छ । प्रधानमन्त्री पुष्पकमल दाहाल प्रचण्डले मंगलबार खप्तड अन्तर्राष्ट्रिय आध्यात्मिक सम्मेलनको उद्घाटन गर्नेछन् ।

जेठ २५ गतेसम्म चल्ने खप्तड आध्यात्मिक सम्मेलनको लागि पतञ्जली योगपीठबाट बालकृष्ण आचार्य पुगिसकेका छन् । योगगुरु रामदेव मंगलबार आउँदैछन् ।

प्रदेश सरकारको आयोजनामा हुने खप्तड अन्तर्राष्ट्रिय आध्यात्मिक सम्मेलनमा पूर्वप्रधानमन्त्रीहरु पनि उपस्थित हुने बुझिएको छ ।

डोटी, अछाम, बझाङ र बाजुराको सीमा क्षेत्रमा पर्ने खप्तडलाई स्वर्गको टुक्राको रुपमा पनि व्याख्या गरिन्छ । यहाँ २२ वटा पाटन र ५३ वटा थुम्का तथा त्यसको सौन्दर्यले खप्तड भूस्वर्गझैं लाग्छ ।

खप्तड बाबाले तपस्या गरेको पवित्र ठाउँ भएकाले खप्तड प्राकृतिक दृष्टिले मात्र नभई धार्मिक र पर्यटकीय हिसाबले समेत उत्कृष्ट गन्तव्यका रूपमा परिचित छ ।

समुद्र सतहबाट ३ हजार मिटर उचाइमा रहेको खप्तड २२५ वर्ग किलोमिटर क्षेत्रफलमा फैलिएको छ ।

छाङ्सा (हुनान) । चीनले हुनान प्रान्तमा एक हजार ४०० मेगावाटको पम्प्ड स्टोरेज जलविद्युतगृह बनाइरहेको छ। चिनियाँहरुका अनुसार विश्वको पम्प्ड स्टोरेजको २ प्रतिशत मात्रै चिनियाँ हिस्सा छ।

चीनले अब त्यो मात्रा बढाउन लागिरहेको छ। हुनान प्रान्तको राजधानी छाङ्साबाट दुई घन्टाको सडक दूरीमा रहेको हुनान पिङजिआङ पम्प्ड स्टोरेज कम्पनी लिमिटेडको नाममा उक्त विद्युत गृह बनिरहेको छ।

दुईवटा ताल बनाएर तलको पानी माथिल्लो तालमा पम्प गरेर उकालेर पुनः पानी झारेर टर्बाइन घुमाएर विद्युत उत्पादन गर्ने तरिका हो पम्प्ड स्टोरेज।

यसमा पानी दुई तालमा दौडिएर विद्युत उत्पादन हुन्छ। तर, पम्प्ड स्टोरेजमा तलको पानी माथि लान पनि बिजुली आवश्यक हुन्छ। त्यसैले विद्युतीय उत्पादन धनात्मक हुने देशहरुले मात्रै यस्तो प्रविधि प्रयोग गरेको बताउँछन् हुनान पिङजिआङ पम्प्ड स्टोरेज क्षेत्रमा पुगेका नेपाल सरकारका इन्जिनियर विजय पुरी।

चीन विद्युतीय रूपमा सबल भएकोले यस्तो प्रोजेक्टमा सक्रिय भएको पुरीले बताए। ऊर्जा मन्त्रालयको विद्युत विकास विभागका इन्जिनियर पुरीले नेपालले नेपाल विद्युतीय उत्पादनमा ‘सरप्लस’ तहमा पुगेपछि भने यो क्षेत्रमा काम गर्न सकिने बताए।

उनले भने, ‘कास्कीको बेगनास ताल र रुपा तालमा यस्तो खालको पम्प्ड स्टोरेज जलविद्युतीय उत्पादनको एकखाले अध्ययन पनि भएको छ। नेपालमा पम्प्ड स्टोरेज उत्पादन बेगनाम र रुपा तालमा सम्भावना छ।’

फुजिआन । चीनको दक्षिण पूर्वी प्रान्त फुजिआन स्वशासित क्षेत्र ताइवानको सबैभन्दा नजिकैको प्रान्त हो। ताइवानका बहुसंख्यक नागरिकका पूर्खा पुजिआनकै हुन् ।

यी दुई क्षेत्र जोड्ने इस्ट चाइना सी हुँदै कोभिड-१९ अगाडिसम्म सिधा जलयात्रा संचालन हुँदै आएको स्थानीय बताउँछन् । खासगरी पिङतान टापु र ताइवान बीच जलयातायात संचालन भएको थियो। अहिले उक्त सेवा स्थगित छ।

फुजिआनको टापु पिङतानबाट ताइवानको भूउपस्थिति १२६ किलोमिटरको जलदूरीमा मात्रै छ। पिङतान टापु पुग्ने १६.३४ किलोमिटर लामो छ लेनको रेल तथा रोड पूल सन २०१९ को सेप्टेम्बरमा बनेपछि भने पिङतान चीनको स्थलमार्गमा सजिलोसँग जोडिएको छ।

फुजिआनको त्यही पिङतान टापु क्षेत्र तथा फुजिआन प्रान्तको राजधानी फुजु नजिकैको ज्वालामुखी पत्थरमाथी समुद्र किनारमा निर्मित ‘पिङलिउवेइ भूपार्क’ क्षेत्रबाट देखिएको इस्ट चाइना सि अर्थात पूर्वी चीन सागरलाई हेरौं ।

काठमाडौं । वर्षा र सहकालका देवता मानिने रातो मच्छिन्द्रनाथको रथयात्रा सोमबार सुरु भएको छ ।

जात्राको पहिलो दिन ललितपुरको पुल्चोकस्थित मच्छिन्द्रबहालमा रहेको रथलाई तानेर गाःबहालमा पुर्‍याइएको छ । रथ तान्नुअगाडि गुरुज्यूको पल्टनबाट सलामी दिइएको थियो । मच्छिन्द्रनाथको रथयात्रा वैशाख शुक्ल प्रतिपदामा सुरू भएर आषाढ शुक्ल चतुर्थी (दुई महिना) सम्म चल्छ ।

रातो मच्छिन्द्रनाथ जात्रालाई पाटनको सबैभन्दा महत्वपूर्ण तथा उपत्यकाकै सबैभन्दा लामो जात्राका रूपमा लिइन्छ । हिन्दू धर्मावलम्बी मछिन्द्रनाथलाई ऐतिहासिक करुणामयको रूपमा पुज्छन् भने बौद्ध धर्मावलम्बी ‘पद्मपाणि’ अर्थात् पञ्च बुद्धमध्येका चौथो बुद्धका रूपमा पूजा गर्छन् । मछिन्द्रनाथको रथ यात्राको अन्तिम दिन भोटो देखाउने जात्रा हुन्छ ।

पुल्चोकमा रथारोहण गरी सुरु भएको मच्छिन्द्रनाथको रथयात्रा गाःबहाल, मंगलबजार, सुन्धारा, लगनखेल, इटिटोल हुँदै जावलाखेलमा पुर्‍याएर भोटो देखाइन्छ । यससँगै मछिन्द्रनाथलाई सानो खटमा राखी बुंगमतीमा लगिएपछि जात्रा समापन हुन्छ ।

पौराणिक कथनअनुसार १२ वर्षसम्म अनिकाल लागेपछि भक्तपुरका तत्कालीन राजा नरेन्द्रदेवले यो जात्रा सुरु गराएको किंवदन्ती छ ।

तस्विरहरु : गाैरव पाैडेल