Category: मल्टिमिडिया

काठमाडौं । निवर्तमान प्रधानमन्त्री केपी शर्मा ओली बालुवाटारबाट बिदावारी भएर निजी निवास बालकोट फर्केका छन् ।

काठमाडौंमा भइरहेको मुसलधारे वर्षाका बीच युवा संघका कार्यकर्ताले उनलाई बालुवाटारबाट स्कर्टिङ गरेर बालकोट लगेका हुन् । ओलीलाई बालुवाटारबाट लैजान सयौंको संख्यामा कार्यकर्ता र सवारीसाधनहरूको लस्कर लगाइएको थियो ।

कार्यकर्ताले ओलीको पक्षमा नारावाजी गरेका थिए ।

काठमाडौं । कोरोना संक्रमणको जोखिम नियन्त्रणका लागि काठमाडौं उपत्यकामा लगाइएको निषेधाज्ञा खुकुलो भएपछि ६६ दिनपछि सबै सवारीसाधन चलेका छन् । सवारी चापले जडिबुटी, कोटेश्वर, बानेश्वर, कलंकी, जमल क्षेत्रमा जाम बढेको छ ।

केही नियम फेरबदल गर्दै असार मसान्तसम्मलाई थपिएको निषेधाज्ञा आजदेखि लागू भएको हो ।

जोरबिजोर हटाएर निजी तथा सबै खालका सार्वजनिक सवारीसाधन खुलेसँगै सवारी चाप बढेको छ । अघिल्लो साता जोरबिजोर प्रणालीमा सवारीसाधन खुला गरिएको थियो । २५ सिटभन्दा कम क्षमताका सार्वजनिक सवारी खुलाइएकोमा यातायात व्यवसायीले सबै सवारी खुला गर्न पाउनुपर्ने माग राखेका थिए ।

कुल स्वीकृत सिट क्षमताभन्दा बढी यात्रु नराख्ने, यात्रुहरूले अनिवार्य मास्क लगाउनुपर्ने, चालक र सहचालकले अनिवार्य मास्क, भाइजर र पन्जा लगाउनुपर्ने, सवारीसाधनको ढोकामा स्यानिटाइजर व्यवस्था हुनुपर्ने र सवारीसाधनलाई अनिवार्य रूपमा दैनिक निसंक्रमित गर्नुपर्ने सर्त छ । तर, उपत्यकाबाट लामो दूरीमा सञ्चालन हुने सवारी संचालनमा भने अहिले अनुमति दिइएको छैन ।

उपत्यकामा छिर्ने मुख्य नाकामा भने सुरक्षा जाँच बढाइएको छ । अतिआवश्यक कामले आउनुपर्ने भए सम्बन्धित जिल्लाको सीडीओको अनुमतिमा प्रवेश गर्न दिइने नियम भने कायमै छ ।

काठमाडौं । सरकारले चिनियाँ खोप ‘भेरोसेल’को पहिलो मात्रा खोप लगाएकालाई मंगलबारदेखि दोस्रो मात्राको खोप लगाउन शुरु गरिएको छ। कोभिड- १९ विरूद्धको दोश्रो चरणको खोप अभियान अन्तर्गत भेरोसेलको दोस्रो मात्रा खोप आज गतेदेखि २४ गतेसम्म लगाइँदैछ ।

भेरोसेल खोपको पहिलो मात्रा लगाएका ६० वर्ष माथिका नागरिकहरुलाई मंगलबारदेखि बिहीबार सम्म दोस्रो मात्राको खोप लगाउन लागेको हो । गत जेठ २५ देखि देशैभरमा ६० वर्ष माथिका नागरिकहरुलाई भेरोसेलको पहिलो डोजको खोप लगाएको थिए ।

भेरोसेल खोपको दोस्रो मात्रा बिहान १० बजे देखि दिउँसो ४ बजेसम्म जनस्वास्थ्यका मापदण्ड पूर्ण पालना हुने गरी लगाईने निर्देशनालय स्वास्थ्य कार्यालयले जनाएको छ । चीनले १० लाख डोज खोप उपलब्ध गराएलगतै प्राथमिकताको आधारमा खोप वितरण गरेको हो ।

खोप लगाउनको लागि काठमाडौं महानगरपालिकामा १३ वटा खोप केन्द्र तोकेको छ ।

काठमाडौं । विश्वव्यापी महामारी बनेको कोरोना भाइरस संक्रमणको जोखिम कम गर्न काठमाडौं उपत्यकामा लागू गरिएको निषेधाज्ञा आजदेखि थप खुकुलो बनाइएको छ ।

संक्रमण दर घट्न थालेपछि केही क्षेत्र खुल्ला गर्दै निषेधाज्ञा सहज बनाइएको छ । सो क्रममा दुई महिनापछि काठमाडौंका सडकमा सार्वजनिक बस चल्न थालेका छन् । आजदेखि २५ सिटभन्दा बढी क्षमताका सार्वजनिक सवारीसाधन जोरबिजोर प्रणालीमा संचालन गरिएको छ ।

हाललाई उपत्यकाका तीन जिल्ला काठमाडौं, भक्तपुर र ललितपुरमा मात्र खुल्ला गरिएको सार्वजनिक सवारीमा स्वास्थ्य मापदण्ड भने पालन गर्नुपर्नेछ । गाडीको ढोकामा स्यानिटाइजर राख्नुपर्ने, मास्क अनिवार्य प्रयोग गर्नुपर्ने, भौतिक दूरी कायम गरेर सिटमा बस्नुपर्ने लगायतका सर्तसहित सवारी संचालन शुरू गरिएको हो । तर, आज पहिलो दिन सडकमा फाट्टफुट्ट मात्र गाडी देखिएका छन् । लामो समय थन्काइएका गाडी सर्भिसिङ गरेर चलाउनुपर्ने तथा कोरोना त्रास कायमै रहेकोले पनि धेरै गाडी संचालनमा नआएको बताइएको छ ।

काठमाडौं । काठमाडौं उपत्यकामा जारी निषेधाज्ञा आजदेखि खुकुलो बनाइएको छ ।

स्थानीय प्रशासनले आर्थिक गतिविधि चलायमान बनाउन बार र समय तोकेर केही व्यवसायिक क्षेत्र खुल्ला गरेको छ । केही सहज गरेर असार १४ सम्म थप गरिएको निषेधाज्ञामा निजी सवारीसाधनमा जोर-बिजोर प्रणाली लागू गरिएको छ ।

डिपार्टमेन्ट स्टोर्स, सपिङ मल, हार्डवेयर्स पसल, खेलकुद सामाग्री पसल, कपडा पसल, विद्युतीयलगायतका पसल खुल्ला गर्न पनि बार र समय तोकिएको छ ।

निषेधाज्ञा खुकुलो भएसँगै बजारमा चहलपहल बढेको छ । सवारी चापले मुख्य सडकमा जाम समेत भएको छ ।

काठमाडौं । मनसुन भित्रिएसँगै खेतबारीमा किसानको व्यस्तता पनि बढेको छ ।

मानो रोपेर मुरी उब्जाउने यो बेला कोरोना संक्रमणको जोखिमकै बीच बिहानदेखि साँझसम्म कृषकलाई चटारो छ । केहीदिन लगातार पानी परेपछि उपत्यका आसपासका क्षेत्रमा कृषकहरूको खटाइको दृष्यले मन्त्रमुग्ध बनाउँछ ।

ललितपुर बुङ्‍मतीका किसानहरू झरीमा रुझ्दै बीउ गोड्ने, काढ्ने, हिलोआली र रोपाइँमा व्यस्त देखिएका छन् ।

काठमाडौं । वृहत नागरिक आन्दोलनमा सहभागी नागरिक अगुवाहरूले आज बालुवाटारमा प्रदर्शन गरेका छन् ।

चिकित्सा शिक्षा आयोगमाथि राजनीतिक हस्तक्षेप भएको लगायतका विषयमा उनीहरूले विरोध जनाएका हुन् । सर्वोच्चको आदेशविपरीत सरकारले मेडिकल कलेजलाई सम्बन्धन दिने तयारी गरेको भन्दै गरिएको प्रदर्शनमा सञ्जिव उप्रेती, नारायण वाग्ले, खगेन्द्र संग्रौलालगायत सहभागी थिए ।

केहीलाई प्रहरीले पक्राउ गरी भृकुटीमण्डपस्थित नेपाल पुलिस क्लबमा राखेको छ ।

प्रदर्शनका क्रममा स्वास्थ्य सेवा हो, व्यापार होइन, जनस्वास्थ्यमा प्रतिगमन भयो जस्ता प्लेकार्डहरू बोकिएको थियो ।

काठमाडौं । सिद्धार्थ गौतमले विश्व शान्ति स्थापनाका लागि पुर्‍याएको योगदानको स्मरण स्वरुप २५६५ औं बुद्धजयन्ती आज देशभर मनाइँदैछ । बुद्धको जन्म , ज्ञान प्राप्ती र मृत्यु महापरिनिर्माण वैशाख शुक्ल पूर्णिमाको दिन भएको मानिन्छ ।

नेपाललगायत विश्वभरी रहेका बौद्धमार्गीहरूले कोरोना संक्रमणको जोखिमका बीच बुद्धजयन्ती अनौपचारिक रूपमै मनाइरहेका छन् ।

महामारी नियन्त्रणका लागि लागू निषेधाज्ञाका कारण स्वयम्भु, बौद्ध क्षेत्र आज सुनसान छन् । यसअघिका बुद्धजयन्तीहरूमा यी क्षेत्रमा बौद्धधर्मावलम्वी र पर्यटकहरू खचाखच हुन्थे ।

काठमाडौंको बौद्धनाथ स्तुपामा आज रंगरोगन गरेर सिंगारिएको छ ।

हेर्नुस् बुद्धजयन्तीमा स्तुपा क्षेत्रको तस्बिरहरू :