Category: स्थानीय निर्वाचन–२०७९

चितवन । भरतपुर महानगरपालिकाको उपमेयरमा गठबन्धनका तर्फबाट नेपाली कांग्रेसका उम्मेदवार चित्रसेन अधिकारी निर्वाचित हुने पक्का भएको छ ।

गन्न बाँकी मतभन्दा धेरैको अग्रता लिएका कारण अधिकारीको जित पक्का भएको हो । हालसम्म भरतपुरको १ लाख १२ हजार ३ सय ७६ मत गणना भएको छ । अब १५ हजार १ सय ६३ मत मात्रै गन्न बाँकी छ ।

उपमेयरमा अधिकारीले ४६ हजार ४ सय ७१ मत ल्याएर १९ हजार ६७ मतको अग्रता लिइसकेका छन् । उपमेयरमा राप्रपाकी हिमला गुरुङले २७ हजार ४ सय ४ मत प्राप्त गरेकी छिन् ।

मेयरमा गठबन्धनकै रेणु दाहाल जितनजिक पुगेकी छिन् । उनले नेकपा एमालेका विजय सुवेदीसँग १० हजार ६ सय ५१ मतको अग्रता लिएकी छिन् । दाहालले ४५ हजार ३८९ मत ल्याउँदा सुवेदीले ३४ हजार ७३८ मत ल्याएकी छिन् ।

अहिले वडा नम्बर २५ र २६ को मतगणना अन्तिम चरणमा पुगेको छ । भरतपुरमा अहिलेसम्म कांग्रेसले १४, एमालेले ५ , नेकपा एसले ३ र माओवादीले २ वडा जितेका छन् ।

कैलाली । धनगढी उपमहानगरपालिकाका नवनिर्वाचित मेयर गोपाल हमालले प्राथमिकताको आधारमा विकासलाई अगाडि बढाउने बताएका छन् । सोमबार पदभार ग्रहण गर्दै उनले यस्तो प्रतिबद्धता जनाएका हुन् ।

‘पञ्चवर्षीय योजना लागू भएको थिएन । अब लागू हुन्छ’, उनले भने, ‘प्राथमिकताको आधारमा विकासलाई अगाडि लग्छौं ।’

दिगो विकासको अवधारणाअनुसर अघि बढ्ने हमालले बताए ।

यसैबीच हमालले उद्घाटन तथा स्वागत सम्मान जस्ता काममा आफूलाई नअल्झाउन धनगढीवासीलाई आग्रह गरेका छन् ।

धनगढीवासीले चुनावबाटै सम्मानजनक मत दिइसकेकाले अब काम गर्ने वातावरण सिर्जना गरिदिन उनले फेसबुकमार्फत आग्रह गरेका हुन् ।

उनले लेखेका छन्, ‘यहाँहरुको अमूल्य मतबाट धनगढीको अभिभावकको जिम्मेवारीमा पुगाइसकेपछि अब मैले निर्वाह गर्नुपर्ने जिम्मेवारी पूरा गर्न मेरो सम्पूर्ण समय आजैदेखि लगाउने भएको हुँदा कृपया धनगढीवासी र यहाँका संघसंस्थाहरुलाई अति आवश्यक कामबाहेक उद्घाटन, सभा–सेमिनार, स्वागत, सम्मान कार्यक्रम आदिमा नअल्झाई मलाई जनताको काम गर्ने वातावरण बनाइ सहयोग गरिदिनहुन हार्दिक अनुरोध गर्दछु ।’

झापा । एमाले अध्यक्ष केपी शर्मा ओलीको गृहजिल्ला झापामा नेपाली कांग्रेस र सत्ता गठबन्धनलाई चारवटा पालिकामा प्रमुख जिताउन सहयोगी बनेको नेकपा माओवादी केन्द्र आफू भने कतै पनि जित्न असफल भएको छ ।

झापाका १४ वटा स्थानीय तहमध्ये ओलीको निर्वाचन क्षेत्रमा सत्ता गठबन्धन र राप्रपा समेतको तालमेल भएको थियो भने अन्यत्र कांग्रेस र माओवादीलेमात्र तालमेल गरेर नेकपा एकीकृत समाजवादी र जसपालाई बाहिर राखेका थिए ।

नतिजा आउँदा कांग्रेसले माओवादीको सहयोगमा कम्तीमा तीनवटा पालिकाको प्रमुख जित्यो तर उपप्रमुख पाएको माओवादीले कतै पनि जित निकाल्न सकेन । भद्रपुर नगरपालिकामा गठबन्धनबाट कांग्रेसका गणेश पोखरेल मेयर बन्दा माओवादीका उपमेयर उम्मेदवार शिवकुमार राजभण्डारी पराजित भए । त्यहाँ राप्रपाकी राधा कार्कीले जितिन् ।

त्यस्तै कमल गाउँपालिकामा कांग्रेसका हुकुमसिंह राई ३ हजार मतान्तरमा अध्यक्षमा बिजयी हुँदा माओवादीका उपाध्यक्ष उम्मेदवार पर्शुराम सुवेदी २५ सय मतान्तरले एमालेकी प्रमिला सुवेदीसँग पराजित भए ।

बुद्धशान्ति गाउँपालिकामा गठबन्धनबाट कांग्रेसका मनोज प्रसाई ३ हजार मतान्तरले अध्यक्ष जित्दा उपाध्यक्षमा भने माओवादीका खड्ग तिम्सिना ३ हजार मतान्तरले नै पराजित भए ।

कांग्रेस र माओवादीले गठबन्धन गरेकामध्ये बिर्तामोड, अर्जुनधारा, शिवसताक्षी, कनकाइ, गौरादह, बाह्रदशी नगरपालिकामा दुवै पद एमालेले जितेको छ भने मेचीनगर नगरपालिकामा गणना जारी रहँदा गठबन्धन पराजित हुने लगभग निश्चित छ ।

दमकमा भने राप्रपालाई मेयर र कांग्रेसलाई उपमेयर बनाएर माओवादी केन्द्र तथा नेकपा एस मतदातामात्र बनेका छन् ।

जिल्लाभरीको मतगणना मेचीनगरबाहेक अन्त्रय सकिँदा एमालेले बहुमत पालिका जितेर जिल्ला समन्वय समिति एक्लै गठन गर्ने हैसियत बनाएको छ ।

गणना सकिएकामध्ये कांग्रेसले बुद्धशान्ति, झापा, कचनकवल, कमल, गौरीगञ्ज गाउँपालिका र भद्रपुर नगरपालिकाको मेयर जितेको छ । तीमध्ये झापा र भद्रपुरबाहेक अन्य पालिकाको उपप्रमुख एमालेले जितेको छ । राप्रपाले दमकको मेयर र हल्दिबारी गाउँपालिकाको अध्यक्ष-उपाध्यक्ष जितेको छ ।

एमालेले मेची नगर नगरपालिका जित्दै गर्दा बिर्तामोड, अर्जुनधारा, कनकाई, बाह्रदशी, शिवसताक्षी र गौरादह नगरपालिका जितेको छ ।

काठमाडौं । माझी समुदायको बाहुल्य रहेको खोटाङमा एकजनामात्रै माझी जनप्रतिनिध निर्वाचित भएका छन् । जिल्लाका १० स्थानीय तहमध्ये रावाबेंसी गाउँपालिका– ३ मा सोमबहादुर माझी वडा सदस्य निर्वाचित भएका हुन् ।

२०७४ सालको स्थानीय तह निर्वाचनमा पनि दुईजनामात्रै माझी जनप्रतिनिधि चुनिएका थिए । लामीडाँडामा कांग्रेसबाट सोमबहादुर माझी वडा सदस्यमा विजयी भएका थिए । त्यस्तै दिप्रुङ चुईचुम्मा गाउँपालिका–४ का ज्ञानबहादुर माझी कार्यपालिका सदस्यसम्म भएका थिए ।

योपटक सोमबहादुर एक्लो माझी जनप्रतिनिधि बनेका छन् । ३७ वर्षीय माझीले कांग्रेसका तर्फबाट ७०२ मत ल्याएर वडा सदस्य जितेका हुन् ।

खोटाङको लामीडाँडा रभुँवा, घोपाटार, जयराम, भँडारेघाट, सानोभँडारे, रसुवाघाट, गोडुलीघाटलगायतका सुनकोसी र दूधकोसी किनारमा डुंगा चलाउने र माछा मार्ने पुर्ख्यौली पेशा भएका माझी समुदायले राज्यबाट अवसर नपाएको गुनासो गर्दै आएको छ ।

काठमाडौं । स्थानीय तह निर्वाचनको नतिजा आइरहँदा तीन पालिकामा प्रमुख र उपप्रमुखसहित २४ महिला नेतृत्वमा निर्वाचित भएका छन् । ७५३ मध्ये ७२७ स्थानीय तहको नतिजा सार्वजनिक हुँदा तीन पालिकामा प्रमुख र उपप्रमुख दुइटै पदमा महिला निर्वाचित भएका हुन् ।

अन्तिम नतिजा आउन बाँकी पालिकामध्ये चितवनको भरतपुर महानगरपालिकामा मात्रै महिला प्रमुख रहेका छन ।

प्रदेश १ मा झापाको गौरीगञ्ज गाउँपालिका, कर्णालीमा दैलेखको भैरवी गाउँपालिका र सुदूरपश्चिममा कैलालीको लम्कीचुहा नगरपालिकामा प्रमुख र उपप्रमुख दुवै महिला निर्वाचित भएका हुन् ।

झापाको गौरीगन्ज गाउँपालिकाको अध्यक्षमा कांग्रेसकी फूलवती राजवंशी विजयी हुँदा उपाध्यक्षमा एमालेकी पूजन न्यौपाने कुँवर विजयी भएकी छन् । फूलवतीले ५ हजार ६८९ मत पाउँदा उनका निकटतम प्रतिद्वन्द्वी एमालेका विजयकुमार अग्रवालले ३ हजार ३३० मत पाए ।
उपाध्यक्षमा एमालेकी पूजन न्यौपानेले ४ हजार ७५५ मत पाउँदा उनका निकटतम प्रतिद्वन्द्वी कांग्रेसका मखना महतोले ३ हजार ७९५ मत पाएको निर्वाचन आयोगले जनाएको छ ।

यस्तै दैलेखको भैरवी गाउँपालिकाको अध्यक्ष र उपाध्यक्ष दुवैमा नेपाली कांग्रेसका महिला उम्मेदवार विजयी भएका छन् । गाउँपालिका अध्यक्षमा विजयी रीताकुमारी शाहीले तीन हजार ९७६ मत ल्याए । उनका प्रतिद्वन्द्वी एमालेका सर्वराज महताराले तीन हजार ९६० मत ल्याएका छन् । उपाध्यक्षमा कांग्रेसकै देवी भण्डारीले तीन हजार ३७४ मत पाउँदा उनका प्रतिद्वन्द्वी एमालेकै पदमकुमारी विष्टले तीन हजार २२७ मत ल्याइन् ।

यसैगरी कैलालीको लम्कीचुहा नगरपालिकाको प्रमुखमा कांग्रेसकी सुशीला शाही र उपप्रमुखमा एमालेकी जुना चौधरी विजयी भएका छन् । शाहीले १२ हजार ७१३ मत ल्याएर विजयी हुँदा उनका प्रतिद्वन्द्वी निवर्तमान मेयर एमालेका उम्मेदवार महादेव बजगाईंले १० हजार ४३५ मत प्राप्त गरेका छन् ।

उपप्रमुखमा चौधरीले ११ हजार ७०८ मत प्राप्त गर्दै विजयी भइन् । उनकी प्रतिस्पर्धी माओवादी केन्द्रकी जानकीकुमारी शाहीले ८ हजार ३०८ मत प्राप्त गरेकी छन् ।

तीन स्थानीय तहमा प्रमुख र उपप्रमुख दुइटै पदमा महिला विजयी भएसँगै देशभर २४ स्थानीय तहमा आगामी पाँच वर्ष महिला नेतृत्वले स्थानीय तह सञ्चालन गर्दैछन् । हालसम्म प्रमुखमा एमालेबाट झापाको विर्तामोड नगरपालिकामा पवित्रादेवी महतारा, मोरङको कानेपोखरी गाउँपालिकामा राजमती इङ्गनाम, रौतहटको मौलापुर नगरपालिकामा रीनाकुमारी साह, चितवनको माडी नगरपालिकामा ताराकुमारी काजी महतो, सिन्धुलीको फिक्कल गाउँपालिकामा पार्वती सुनुवार, पर्वतको मोदी गाउँपालिकामा हीरादेवी शर्मा, नवलपरासी (बर्दघाट सुस्ता पश्चिम)को सुनवल नगरपालिकामा विमला अर्याल, पाल्पाको बगनासकाली गाउँपालिकामा सरस्वती दर्लामी (चिदी) र सुर्खेतको वीरेन्द्रनगर नगरपालिकामा मोहनमाया भण्डारी विजयी भएका छन् ।

कांग्रेसबाट सोलुखुम्बुको लिखु पिके गाउँपालिकामा मीनादेवी कार्की, खोटाङको हलेसी तुवाचुङ नगरपालिकामा विमला राई, सप्तरीको सुरुङ्गा नगरपालिकामा गीता चौधरी, नवलपरासी (बर्दघाट सुस्ता पूर्व) हुप्सेकोट गाउँपालिकामा लक्ष्मीदेवी पाण्डे, बागलुङको बडिगाड गाउँपालिकामा गण्डकी थापा अधिकारी, दैलेखको भैरवी गाउँपालिकामा रीताकुमारी शाही, अछामको पञ्चदेवल विनायक नगरपालिकामा अम्बिकाकुमारी चलाउने, कैलालीको लम्कीचुहा नगरपालिकामा सुशीला शाही, झापाको गौरीगन्जमा गाउँपालिकामा फूलवती राजवंशी विजयी पालिका प्रमुख तथा अध्यक्ष निर्वाचित भएका छन् ।

यस्तै माओवादी केन्द्रबाट खोटाङको जन्तेढुंगा गाउँपालिकामा अरुणादेवी राई, सिन्धुलीको सुनकोशी गाउँपालिकामा दीपा बोहोरा दाहाल, काभ्रेपलाञ्चोकको चौरीदेउराली गाउँपालिकामा रेणुका चौलागाईै विजयी भएका छन् । लोकतान्त्रिक समाजवादी पार्टी नेपालबाट रौतहटको ईशनाथ नगरपालिकामा कौशल्यादेवी प्रमुख पदमा विजयी भएकी छन् ।

नेकपा एकीकृत समाजवादीबाट बागमती प्रदेश राजधानी हेटौंडा उपमहानगरपालिकाको प्रमुखमा मीनाकुमारी लामा विजयी भएकी छन् ।
चितवनको भरतपुरमा माओवादीले अग्रता कायमै राखिरहेको छ । भरतपुरमा माओवादी केन्द्रकी रेनु दाहाल जित नजिक छ । उनी विजयी भए देशभरबाट २५ जना महिला स्थानीय तहको नेतृत्वमा पुग्नेछन् ।

हालसम्मको परिणामअनुसार ३.१८७ प्रतिशत महिला स्थानीय तहको नेतृत्वमा पुगेका छन् ।

रुपन्देही । दाङमा मतगणना भइरहेको तुलसीपुर उपमहानगरपालिकामा नेकपा एमालेले निरन्तर अग्रता लिएको छ ।

एमाले महासचिव शंकर पोखरेलको गृहपालिका रहेको यहाँ ४७ हजार ७ सय ४४ मत गणना हुँदा नेकपा एमालेका मेयर पदका उम्मेदवार टीकाराम खड्का १८१३ मतान्तरले अग्रता लिएका हुन् ।

खड्काले २० हजार ३१९ मत प्राप्त गरेका छन्। उनका निकटतम् प्रतिष्पर्धी गठबन्धनबाट नेपाली कांग्रेसका उम्मेदवार गेहेन्द्र गिरीले १८ हजार ५०६ मत प्राप्त गरेका छन् ।

तर उपमेयरमा एमालेकी श्यानी चौधरीले धेरै मतान्तरले अग्रता लिएकी छन् । चौधरीले १९ हजार ७ सय ८० मत प्राप्त गरेकी छन्। चौधरी निकटतम प्रतिष्पर्धीभन्दा ६०४५ मतले अगाडि छन् ।

उपमेयरमा गठबन्धनबाट नेकपा एकीकृत समाजवादीका जोगबहादुर रानामगरले १३ हजार ७३५ मत प्राप्त गरेका छन्।

काठमाडौं । कञ्चनपुरको भीमदत्त नगरपालिकामा नेपाली कांग्रेस विजयी भएको छ । मेयरमा पदम बोगटी र उपमेयरमा निलम जोशी विजयी भएका हुन् ।

बोगटी १५ हजार ८ सय ८२ मतसहित मेयरमा विजयी हुँदा उनका निकटतम प्रतिस्पर्धी एमालेका महेश पन्तले ८ हजार १ सय ७९ मत प्राप्त गरे । राप्रपाका गजेन्द्रबहादुर चन्दले ७ हजार १ सय ५ मत पाएका छन् ।

त्यस्तै, उपमेयरमा १२ हजार २ सय १६ मतसहित जोशी निर्वाचित भएकी हुन् । उनका निकटतम प्रतिस्पर्धी माओवादी केन्द्रका कृष्णदत्त जोशीले १० हजार ५ सय ९६ मत प्राप्त गरे ।

भीमदत्त कन्चनपुर जिल्लाको सदरमुकाम पनि हो ।

रुपन्देही । रुपन्देहीको तिलोत्तमा नगरपालिकामा गठबन्धनबाट नेपाली कांग्रेसका रामकृष्ण खाँँणको अग्रता बढ्दै गएको छ । बिहानसम्म गणना भएको ३४ हजार २ सय मतको परिणाम सार्वजनिक गर्दा खाँँणले नेकपा एमालेका उम्मेदवार मोहन चापागाईंले भन्दा ५५४ मत बढी ल्याएका हुन्।

चापागाईले १२ हजार ७ सय ६९ मत पाउदा खाँणले १३ हजार ३ सय २३ मत पाएका छन् ।

उपप्रमुख पदमा भने एमालेको तर्फबाट उम्मेदवार बनेकी जगेश्वरी चौधरी दोब्बर मतले अगाडि छन् । चौधरीले १२ हजार ७ सय १५ मत पाउँदा गठबन्धनबाट उपप्रमुखका उम्मेदवार बनेका माओवादी केन्द्रका हेमन्त पाण्डेले ६ हजार ३ सय ६२ मत प्राप्त गगरेका छन् ।

कूल १७ वटा वडा रहेको तिलोत्तमा नगरपालिकामा हालसम्म वडा नं १, २, ३,१४ १५,१६ र १७ को अन्तिम परिणाम आइसकेको छ। जसअनुसार वडा नं १ र १५ मा नेकपा एमालेले विजय हासिल गरेको छ भने वडा नं २,३,१४, १६ र १७ मा नेपाली कांग्रेसले विजय हासिल गरेको छ। कुल ८५ हजार ७४७ मतदाता रहेको तिलोत्तमामा ६४ हजार ७०२ मत खसेको थियो।

यसअघिको निर्वाचनमा एमालेका बासुदेव घिमिरे मेयर रहेको तिलोत्तमामा राम्रो काम गरेको भन्दै दुईवर्ष नगरपालिका उत्कृष्ट घोषणा भएको थियो।

काठमाडौं । ७५३ स्थानीय तहमध्ये अहिलेसम्म ७१४ पालिकाको अन्तिम मतपरिणाम सार्वजनकि भएको छ । सार्वजनिक परिणामअनुसार दलित समुदालयको प्रतिनिधि एकदमै न्यून देखिएको छ । निर्वाचन आयोगको परिणामअनुसार देशभरी परिणाम सार्वजथनिक भउका तहमा एक प्रतिशतमात्रै दलित प्रतिनिधि निर्वाचित भएका छन् ।

९ जना पालिका प्रमुख र गाउँपालिका अध्यक्ष निर्वाीचत हुँदा ११ जना उपप्रमुख र ६ जना पालिका उपाध्यक्षमा निर्वाचित भएका छन् ।

निर्वाचित हुनेमा नेकपा एमालेबाट बागलुङको डोरपाटन नगरपालिका प्रमुखमा देवकुमार नेपाली, धनुषाको विदेह नगरपालिकाको प्रमुखमा बेचेन दास रहेका छन् । यस्तै नेकपा माओवादी केन्द्रबाट रुकुमको चौरजहारी नगरपालिकाको प्रमुखमा पुष्प बादी प्रमुखमा निर्वाचित भएका छन्

यस्तै ७ वटा पालिका अध्यक्षपनि निर्वाचित भएका छन् । माओवादी केन्द्रबाट बागलुङको ताराखोलामा धनबहादुर विक, डडेल्धुराको आलिताल गाउँपालिकामा शेरसिंह पार्की, उदयपुरको ताप्ली गाउँपालिमा ढुङ्गराज विश्वकर्मा, सुर्खेतको चौकुने गाँउपालिका अध्यक्षमा खड्क विक, बाँकेको खजुरा गाउँपालिकामा डम्बरबहादुर विक निर्वाचित भएका छन् ।

यस्तै नेकपा एमालेबाट प्युठानको सरुमारानी गाउँपालिकाको अध्यक्षमा झगबहादुर विश्वकर्मा निर्वाचित भएका छन् ।

नेपाली कांग्रेस लगायत अन्य राजनीतिक दलबाट पालिका अध्यक्षमा एकजना दलित प्रतिनिधिपनि निर्वाचित हुन सकेनन ।

५ नगरपालिकाको उपप्रमुखमा र ६ गाउँपालिकाको उपाध्यक्ष गरेर देशभरबाट ११ जना दलित समुदायबाट निर्वाचित भएका छन् ।

नेकपा (माओवादी केन्द्र) बाट तनहुँको शुक्लागण्डकी नगरपालिकामा खुमबहादुर विक र धादिङ्गको निलकण्ठ नगरपालिकामा दिपक विश्वकर्मा, सुर्खेतको गुर्भाकोट नगरपालिकामा कांग्रेसबाट मैना बिक, रुपन्देहीको लुम्बिनी सास्कृतिक नगरपालिकामा एमालेबाट कल्पना हरिजन र कैलालीको भजनी नगरपालिकाको उपप्रमुखमा नागरिक उन्मुक्ति पार्टीबाट राजु तिरुवा निर्वाचित भएका छन् ।

६ गाउँपालिकाको उपाध्यक्षमा दलित समुदायबाट निर्वाचित भएका छन् । कांग्रेसबाट सर्लाहीको धनकौल गाउँपालिकामा अकली सहनी र गोरखाको आरूघाट गाउँपालिकामा कल्पना नेपाली निर्वाचित भएका छन् ।

एमालेबाट पर्वतको महाशिला गाउँपालिकामा धनसुवा बिक र नवलपरासी (बर्दघाट सुस्ता पश्चिम) को सरावल गाउँपालिकामा वासमति चमार निर्वाचित भएका छन् ।

यस्तै महोत्तरीको महोत्तरी गाउँपालिकामा जनता समाजवादी पार्टीबाट दिपोदेवी पासवान र राष्ट्रिय प्रजातन्त्र पार्टीबाट रुपन्देहीको रोहिणी गाउँपालिकामा शिवकान्ती चमार निर्वाचित भएका छन् ।

विराटनगर । मोरङको रंगेली नगरपालिकाको मेयर उपमेयरसहित ९ वटै वडा एमालेले जित निकालेको छ।

नेकपा एमालेका उम्मेदवार दिलीप बगडियाले १२ हजार ६८१मत प्राप्त गर्दै मेयरमा निर्वाचित भएका छन् ।

उनका निकटतम प्रतिस्पर्धी नेपाली काँग्रेसका मोदराज घिमिरेले ९०६१ मत प्राप्त गरे ।

यसै गरी उपमेयरमा पनि एमालेकै ११७९० मत प्राप्त गरी विजयी भएकी छन् । उनका निकटतम प्रतिस्पर्धी जसपाका पन्नालाल मण्डलले ५१७५ मत प्राप्त गरे ।

रंगेलीको मेयरमा निर्वाचित बगडिया अघिल्लो कार्यकालमा नेकपा माओवादी केन्द्रबाट निर्वाचित भएका थिए ।

उनी मेयर छँदै नेकपा एमालेमा प्रवेश गरेर उम्मेदवार बनेका थिए ।