Category: स्थानीय निर्वाचन–२०७९

रुपन्देही । रुपन्देहीमा निर्वाचन लक्षित एकीकृत सुरक्षा योजना तयार भएकाे छ ।

रुपन्देहीमा बिहीबार मुख्य निर्वाचन अधिकृत तथा निर्वाचन अधिकृतको कार्यालय स्थापना गर्ने क्रममा प्रमुख जिल्ला अधिकारी ऋषिराम तिवारीले उक्त जानकारी दिएका हुन् ।

भैरहवास्थित बालमन्दिरमा स्थापना गरिएको मुख्य निर्वाचन कार्यालयको उद्घाटन प्रमुख जिल्ला अधिकारी तिवारी र मुख्य निर्वाचन अधिकृत धनसिंह महराले गरेका छन् ।

उक्त अवसरमा प्रजिअ तिवारीले गृह मन्त्रालयले निर्वाचनसम्बन्धी एकीकृत सुरक्षा तयार गरिसकेको र जिल्ला सुरक्षा समितिले पनि जिल्लाको एकीकृत सुरक्षा योजना तयार गरिसकेको बताए ।

उनले निर्वाचन आयोगले मुख्य निर्वाचन अधिकृत र निर्वाचन अधिकृत नियुक्त गरेर प्रादेशिक रुपमा तालिम सम्पन्न गरिसकेको र सोहीअनुसार सबै स्थानीय तहमा निर्वाचन अधिकृत पुगिसकेको बताए ।

‘हामी निर्वाचनको सघन चरणमा प्रवेश गरेका छौं’, उनले भने, ‘निर्वाचन आयोगले तोकेको निर्वाचन कार्यक्रमबमोजिम गतिविधिलाई नियमित रुपमा सञ्चालन गरेर वैशाख ३० गते निर्वाचन सम्पन्न गर्छौं ।’

सुरक्षाको व्यवस्थापन पूर्ण रुपमा सम्पन्न भइसकेको प्रजिअ तिवारीले जानकारी दिए । ‘सुरक्षा योजनाले प्रत्येक मतदाता, उम्मेदवार र कर्मचारी जो निर्वाचनमा संलग्न हुन्छन्, उनीहरुको सुरक्षालाई प्रत्याभूति गर्छ’, प्रजिअ तिवारीले भने, ‘हामी सुरक्षित, निष्पक्ष र स्वतन्त्र निर्वाचन सम्पन्न गर्ने तयारीमा लागेका छौं ।’

मुख्य निर्वाचन अधिकृत महराले निर्वाचनमा आचारसंहिता पालना गर्नुपर्ने बताए । उनले आचारसंहिता पालना गरेमात्रै निर्वाचन सफल गर्न सकिने औंल्याए ।

‘आचारसंहिता पालनामा कडाइ हुन्छ । सबैलाई समान व्यवहार हुन्छ’, प्रमुख निर्वाचन अधिकृत महराले भने, ‘सबैबाट सहयोगको अपेक्षा गरेका छौं । हामी उत्साहित छौं ।’

कार्यक्रम जिल्ला निर्वाचन कार्यालय रुपन्देहीका निर्वाचन अधिकारी अयोध्याप्रसाद भण्डारीले सञ्चालन गरेका थिए ।

काठमाडौं – निर्वाचन आयोगले स्थानीय तह निर्वाचनका लागि बिहीबार देशभरका स्थानीय तहमा मुख्य निर्वाचन अधिकृत तथा निर्वाचन अधिकृतको कार्यालय स्थापना गरेको छ ।

देशभरका ७५३ स्थानीय तहमा निर्वाचन अधिकृतको कार्यालय स्थापना गरिएको आयोगले जनाएको हो ।

काठमाडौं महानगरको मुख्य निर्वाचन अधिकृतको कार्यालय राष्ट्रिय सभागृहमा स्थापना गरिएको छ । काठमाडौंका मुख्य निर्वाचन अधिकृत राजु खतिवडाले अब निर्वाचन अयोगले तयार गरेको कार्यतालिका निर्वाचन अधिकृतको कार्यालयबाट अघि बढ्ने बताए ।

उनले निर्वाचन आचारसंहिता पालना भए नभएकोसमेत जाँचबुझ गर्ने जानकारी दिए ।

आयोगले प्रत्येक निर्वाचन अधिकृतको कार्यालयमा करिब १० जना कर्मचारी रहने व्यवस्था गरेको छ । निर्वाचन आयोगले बैशाख ३० गते हुने स्थानीय तह निर्वाचनका लागि ११ र १२ गते उम्मेदवारी मनोनयन दर्ताको कार्यक्रम राखेको छ ।

रुपन्देही । कांग्रेस माओवादी तानातानमा परेको दाङको घोराही उपमहानगरपालिकाको मेयरमा सत्ता गठबन्धनबाट नेकपा माओवादी केन्द्रका केन्द्रीय सदस्य हेमराज शर्मा ‘डायमण्ड’ उम्मेदवार बन्ने भएका छन् ।

गठबन्धनबाट घोराही उपमहानगरपालिका माओवादीको भागमा परेपछि शर्मा उम्मेदवार बन्ने पक्का भएको हो । गठबन्धनबाट देशभरका ११ उपमहानगरपालिकामध्ये दाङको घोराही उपमहानगरपालिका माओवादीको भागमा परेपछि ‘डायमण्ड’ लाई पार्टीले एकल रुपमा उम्मेदवार भएको घोषणा गरेको छ ।

गठबन्धनबाट घोराही मेयरमा शर्मालाई उठाउने निर्णय गर्ने माओवादी केन्द्रका केन्द्रीय सदस्य निर्मल आचार्यले जानकारी दिए । घोराही–१५ निवासी शर्माको जन्म देउखुरी हालको गढवा–३ धैरेनीमा २०३१ साउन ५ गते भएको थियो ।

२०४३ सालमा गाउँको स्कूलमा कक्षा ७ मा पढ्दै गर्दा सहिद कृष्ण सेनले विद्यार्थी संगठनमा आबद्धता गराएपछि राजनीतिको सुभारम्भ गरेका हेमराजले २०४७ सालमा एसएलसी पास गरेर घोराहीको महेन्द्र बहुमुखी क्याम्पसमा अध्ययन गर्न थालेपछि विद्यार्थी राजनीतिलाई पनि फराकिलो बनाउँदैं लगे ।

घोराहीबाटै बीकम सम्मको अध्ययन सकाएर २०५३ सालमा माओवादीले संंचालन गरेको जनयुद्धमा पूर्णकालिन कार्यकर्ता भएर होमिएका थिए । यहाँ नेपाली कांग्रेसले दाबी गरेपनि नपाएपछि ठूलो असन्तुष्टि रहेको छ ।

उपमेयर कांग्रेसको भागमा परेपनि कसलाई पठाउने टुंगो लागेको छैन । नेकपा एमालेले अहिलेका मेयर नरुलाल चौधरीलाई नै उठाउने तयारी गरेको छ । यद्यपि यसको औपचारिक टुंगो लागेको छैन ।

कैलाली । आगामी स्थानीय तहको निर्वाचनको लागि पाँच दलीय गठबन्धनमा रहेका नेपाली कांग्रेस र माओवादी केन्द्रले छुट्टै छलफल गरेका छन् ।

धनगढी स्थित जलसा होटेलमा भएको छलफलमा उनीहरू सहमति नजिक पुगेको बताइएको छ ।

मुलुकमा पाँच दलीय गठबन्धन भए पनि सुदूरपश्चिम प्रदेशमा तीन दलीय गठबन्धन हुने भएको छ । तर, तीन दल बिच पनि भागबन्डामा कुरा नमिले पनि आज नेपाली कांग्रेस र माओवादीले छुट्टै छलफल गरेका हुन् । उक्त छलफलमा एकीकृत समाजवादीका कुनै पनि प्रतिनिधि उपस्थित भएका थिएनन् ।

नेपाली कांग्रेसका सुदूरपश्चिम सभापति वीर बहादुर बलायरले तीनै दलले धेरै स्थानीय तहमा दाबी गरेपछि छुट्टा छुट्टै छलफल गर्नु परेको बताए।‘ सबैको दाबी धेरै छ । त्यसैले एक्ला एक्लै बस्नु परेको हो’ उनले नेपाल प्रेसलाई भने, ‘यस पछि हामी फेरी नेकपा एकीकृत समाजवादीसँग छलफल गर्छौ ।’

दार्चुला जिल्लामा कांग्रेस र माओवादी तालमेल गरेर एकीकृत समाजवादीलाई कुनै पनि पालिका नदिएको भन्दै उनीहरू रुष्ट भएका छन् ।

यस्तो अवस्थामा धनगढीमा प्रदेश स्तरीय छलफलमा समेत एकीकृत समाजवादी नआउँदा आशङ्का पैदा भएको छ । तर, कांग्रेस प्रदेश सभापति बलायरले भने सहमतिको प्रयास को लागि यस्तो गरिएको बताए ।

‘उहाँहरूलाई सँगै लिएर जाने कुरा मात्रै होइन उहाँहरूलाई विजयी गराउने कुरा पनि छ’ उनले भने , ‘अहिले यसरी छलफल गरे पनि अब उहाँहरू सहित पाँचै दलसँग छलफल सुरु गर्छौ । ’

प्रदेश सभापति बलायरले यस पछि पाँच दलसँग छलफल गर्ने बताए पनि सुदूरपश्चिम प्रदेशमा चार दलीय तालमेल मात्रै हुने छ ।

पाँच दल भित्रै रहेको जनता समाजवादी पार्टीले यस अघि नै सम्मानजनक भूमिका नभएको भन्दै गठबन्धन तोडिसकेको छ ।

नेपाली कांग्रेस र माओवादी केन्द्र मात्रै बसेको बुधवारकै बैठकमा पनि ठोस सहमति भने भएको छैन । छलफल सकारात्मक भए पनि सहमति नभएको माओवादी केन्द्रका सुदूरपश्चिम इन्चार्ज खगराज भट्टले जानकारी दिए ।

‘सहमति हामी सबै बसेर गर्छौ अहिले दुई पक्ष मात्रै बस्दा सहमति गर्ने कुरा भएन’ उनले भने ‘आज हामीले विवाद घटाउँदै लैजाने र दाबी घटाउँदै जाने विषयमा कुरा भएको छ’ ।

उनका अनुसार काँग्रेससँगको बैठकमा सुदूरपश्चिम प्रदेशमा एकीकृत समाजवादीलाई पनि व्यवस्थापन गर्ने विषयमा छलफल भएको हो ।

अझै लचक हुनु पर्नेमा कांग्रेसलाई माओवादीले आग्रह गरेको थियो ।

सुदूरपश्चिम प्रदेशमा नेपाली कांग्रेसले ५० स्थानीय तहमा दाबी गरेको छ । माओवादीले ३० स्थानीय तहमा दाबी गरेको छ । एकीकृत समाजवादीले सुदूरपश्चिम प्रदेशमा २० पालिका दाबी गरेको छ ।

समाजवादीले सुदूरपश्चिम प्रदेशमा धेरै अपेक्षा गरेका कारण सहमति हुन नसकेको हो ।

आज कांग्रेस र माओवादी बिच पनि एकीकृत समाजवादीलाई कसरी र कति स्थानीय तह दिएर व्यवस्थापन गर्ने भन्ने विषयमा छलफल भएको थियो ।

सुर्खेत । नेकपा एमालेले चौरजहारी नगरमा प्रमुख र उपप्रमुखको उम्मेदवार चयन गरेका छ ।

चौरजहारी नगर कमिटी रुकुम पश्चिमले आगामी स्थानीय तहको निर्वाचनका लागि प्रमुखमा टंक प्रसाद ओलीलाई उम्मेदवार चयन गरेको हो ।

यस्तै उपप्रमुखमा डन्डी कार्कीलाई चयन गरेको प्रेस चौतारी प्रदेश कमिटी सदस्य ओम प्रकाश आचार्यले बताए ।

काठमाडौं । आगामी स्थानीय तह निर्वाचनमा नेकपा माओवादी केन्द्र र एकीकृत समाजवादीले लगभग बराबर सिट पाएका छन् ।

सत्ता गठबन्धनको आजको बैठकले महानगर र उपमहानगरपालिकामा तालमेलबारे निर्णय गरेको छ ।

उक्त निर्णय अनुसार नेकपा माओवादी केन्द्र र एकीकृत समाजवादीले महानगरमा समान एक/एक महानगर प्रमुख पाएका छन् ।

माओवादीले भरतपुरमा मेयर पाउँदा एकीकृत समाजवादीले पोखराको मेयरको उम्मेदवारी हात पारेको छ ।

त्यस्तै दुवै दलले महानगरमा उपप्रमुख एक/एक स्थानमा पाउने सहमति गठबन्धनमा भएको छ ।

काठमाडौंमा एकीकृत समाजवादीले उपप्रमुख पाउँदा ललितपुरमा माओवादी केन्द्रले उपप्रमुख पाएको छ ।

त्यस्तै उपमहानगरपालिकामा माओवादीले दुई स्थानमा मेयर हात पारेको छ । घोराही र जितपुर सिमरामा माओवादीले मेयर पाउँदा एकीकृत समाजवादीले हेटौँडा उपमहानगरको प्रमुख पाएको छ । उपमहानगरमा माओवादीले एक स्थान बढी पाएको छ ।

त्यस्तै उपमहानगरको उपप्रमुखमा माओवादीले दुई सिट हात पार्दा एकीकृत समाजवादीले तीन स्थान हात पारेको छ ।

माओवादीले धरान र घोराहीमा उपप्रमुख पाएको छ भने इटहरी, बुटवल र तुलसीपुरमा एकीकृत समाजवादीले उपप्रमुख हात पारेको छ ।

प्रतिनिधि सभामा माओवादी केन्द्रका ५३ सांसद रहँदा एमालेबाट फुटेर बनेको नेकपा (एकीकृत समाजवादीमा) २३ जना सांसद रहेका छन् ।

कैलाली । आगामी स्थानीय तहको निर्वाचनका लागि बझाङमा गठबन्धनका दलहरू सहमति जुटेको छ ।

१२ स्थानीय तह रहेको बझाङमा नेपाली कांग्रेसले सात स्थानीय तह, एकीकृत समाजवादीले तीन र माओवादी केन्द्रले दुई स्थानीय तह पाउने सहमति भएको छ ।

दुई नगरपालिका रहेको बझाङमा दुवै नगरपालिका नेपाली कांग्रेसलाई दिने सहमति भएको छ ।

१२ स्थानीय तहमा रहेका ९४ वडामै गठबन्धन गर्ने सहमति भएको हो ।

नेपाली कांग्रेसले जितेका ३६, माओवादी केन्द्रले जितेका ९ र समाजवादी  रहेका ६ वडा उनीहरूलाई नै दिने सहमति भएको छ ।

बाँकी रहेको ४३ वडा मध्ये ५० प्रतिशत नेपाली कांग्रेसले पाउने र त्यसपछि बाँकी रहेको वडाहरू माओवादी केन्द्र र एकीकृत समाजवादीले आधा आधा बाँड्ने समेत सहमति भएको छ ।

यस्तो छ १२ स्थानीय तहमा गरिएको भागबन्डा

जनकपुरधाम । चुनावी तालमेलबारे सत्ता गठबन्धनले गरेको सम्झौता अनुसार जनकपुरधाम उपमहानगरपालिका जनता समाजवादी पार्टी (जसपा) को भागमा परेपछि नेपाली कांग्रेसका स्थानीय नेताहरू असन्तुष्ट बनेका छन् ।

सत्ता गठबन्धनले गरेको सम्झौता सार्वजनिक भए लगत्तै नेपाली कांग्रेस जनकपुरधाम उपमहानगरपालिका कमिटीको बैठक बसेको छ ।

जसपालाई मेयर दिएको विषयमा आवश्यक निर्णय लिन अहिले बैठक राखेको र अहिले छलफल चलिरहेको कांग्रेस नगर उपसभापति राकेश विक्रम साहले जानकारी दिए ।

उनले भने, ‘विगतको मत परिणाम हिसाबले पनि कांग्रेस मेयर पाउनुपर्थ्यो । तर जसपालाई दिइएको छ । यो निर्णयमा हाम्रो असन्तुष्टि छ । तर निर्णय मान्ने कि नमान्ने त्यो निर्णय अहिले बसेको बैठकले गर्छ । अहिले ठ्याक्कै केही भन्न सक्दिनँ ।’

सत्ता गठबन्धनले गरेको महानगरपालिका र उपमहानगरपालिका बाँडफाँडको सम्झौता पत्रमा जनकपुरधामको उपमेयर कुन दलले पाएको कुरा उल्लेख छैन ।

काठमाडौं । सत्तारुढ गठबन्धनले सहमति बन्न नसकेका स्थानीय तहमा मित्रवत् प्रतिस्पर्धा गर्न सकिने निर्णय गरेको छ ।

गठबन्धनको आजको बैठकले महानगर र उपमहानगरको बाँडफाँट टुंग्याउँदै देशभरका अन्य पालिकाहरुमा पनि सीट बाँडफाँट र उम्मेदवार टुंगो लगाउन मातहतका समितिलाई निर्देशन समेत दिएको छ ।

‘पाँच दलीय गठबन्धनले यसअघि जारी गरेको मापदण्ड, सहमतिको मर्म र भावना अनुरुप सम्बन्धित समितिहरुको बैठक बसी अविलम्ब सिट बाँडफाँट तथा उम्मेदवारहरूको चयन गर्न निर्देशन गरिन्छ । साथै, सहमति बन्न नसकेको अवस्थामा पाँच दलीय गठबन्धनभित्रै मित्रवत् प्रतिस्पर्धा गर्न सकिने समेत समझदारी भयो’, गठबन्धनका शीर्ष नेताहरूद्वारा जारी विज्ञप्तिमा उल्लेख छ ।

काठमाडौं । हेटौँडा उपमहानगरपालिकाको मेयर नेकपा एकीकृत समाजवादीलाई दिए एक्लै चुनाव लड्ने चेतावनी स्थानीय कांग्रेसले दिएको छ ।

हेटौँडाको मेयर नेकपा एसलाई दिने केन्द्रीय नेतृत्वमा सहमति भएपछि कांग्रेस हेटौँडा उपमहानगर समितिले विरोध जनाएको हो ।

बुधवार पार्टी कार्यालयमा हेटौँडा उपमहानगर समितिले पत्रकार सम्मेलन गर्दै केन्द्रीय नेतृत्वले सहमतिबारे पुनरावलोकन नगरे एकल उम्मेदवार खडा गरेर निर्वाचनमा होमिने चेतावनी दिएको हो ।

नगर सभापति उत्सव इटेनीले सत्तारुढ गठबन्धनले गरेको निर्णय स्वीकार्य नभएको र आफुहरुसँग केन्द्रले छलफल नै नगरेको बताए ।

‘केन्द्रको निर्णय परिवर्तन नभए नगर समितिका पदाधिकारी तथा नगरका सबै वडा सभापतिहरूको निर्णयअनुसार सत्ता साझेदार गठबन्धनका दलहरूसँग मित्रवत् प्रतिस्पर्धाको आधारमा कांग्रेस एकल नेतृत्वमा चुनावी प्रतिस्पर्धामा सहभागी हुनेछ,’ उनले भने, ‘गठबन्धन दलहरूबिच भागबण्डाको विषयमा छलफल चलिरहँदा पार्टीको केन्द्रीय कार्यसमितिले हेटौँडाको बस्तुगत अवस्थाबारे जानकारी नलिई कार्यकर्ताको मर्म र भावनालाई बेवास्ता गर्दै सहमतिप्रति हाम्रो पूर्ण असमर्थ छ ।

कांग्रेस कार्यकर्ताले हेटौँडा अन्य दललाई दिइए स्वीकार नहुने भन्दै पार्टी कार्यालय घेराउ समेत गरेका छन् ।

चरिकोट । नेकपा एमालेले दोलखाका ९ वटै स्थानीय तहका प्रमुख र उपप्रमुखका उम्मेदवारहरूको नाम टुंगो लगाएको छ ।

स्थानीय तहबाट आएका सिफारिसहरूलाई जिल्ला कमिटीले टुंगो लगाएर प्रदेशमा पठाएको छ ।

एमाले जिल्ला कमिटीको बुधवार बसेको बैठकले सचिव हिरा थोकरलाई मेलुङ गाउँपालिकाको अध्यक्ष उम्मेदवार बनाएको छ । अन्य पालिकामा भने जिल्ला कमिटीका पदाधिकारी परेनन् ।

भीमेश्वरका मेयर बाहेक यसअघिका गाउँपालिका अध्यक्ष कोही पनि दोहोरिएनन् । जिरी नगरपालिकाकी उपमेयर कृष्णमाया बुढाथोकी र भीमेश्वरकी उपमेयर कमला बस्ने समेत दोहोरिएका छन् ।

दोलखाका ९ स्थानीय तहमध्ये २०७४ मा एमालेले ७ वटा जितेको थियो भने कांग्रेस–माओवादी गठबन्धनले दुई पालिका जितेको थियो ।

भीमेश्वरको हकमा भने जिल्ला कमिटी उपाध्यक्ष राजेन्द्र मानन्धरले असहमति जनाउँदै प्रदेशमा आफ्नो दाबेदारी पेस गर्ने भएका छन् ।

यी हुन् जिल्ला कमिटी बैठकले टुंगो लगाएका उम्मेदवार

-शैलुङ

प्रमुख- धन बहादुर तामाङ
उपप्रमुख- पार्वती कार्की थापा

-मेलुङ

प्रमुख- हिरा कुमार थोकर
उपप्रमुख- गायत्री आचार्य

-भिमेश्वर

प्रमुख- भरत केसि
उपप्रमुख- कमला बस्नेत

-कालिन्चोक

प्रमुख- गणेश शिवाकोटी
उपप्रमुख- कविता थामि

-विगु

प्रमुख- अछुतम केसि
उपप्रमुख- देविका थामि

-गौरीशंकर

प्रमुख- जंग गुरुङ
उपप्रमुख- मुना शिवाकोटी

-बैतेश्वर

प्रमुख- माधव प्रसाद घिमिरे
उपप्रमुख- नविना लामा

-जिरी

प्रमुख- मित्र जिरेल
उपप्रमुख- कृष्ण माया बुढाथोकी

-तामाकोसी

प्रमुख- अभिषेक सुवेदी
उपप्रमुख- अम्बिका पोखरेल

रुपन्देही । २०७४ सालको निर्वाचनमा नेकपा माओवादी केन्द्रले जित हात पारेको गुल्मीको घुर्कोटमा नेपाली कांग्रेसले आफ्नो उम्मेदवार सिफारिस गरेको छ ।

अध्यक्षमा कांग्रेसले महेन्द्रप्रसाद भण्डारीलाई सर्वसम्मत रूपमा सिफारिस गरेको छ । सिफारिसपछि माओवादी र कांग्रेसको विवाद बढेको छ ।

नेपाली कांग्रेस गाउँ समितिको मङ्गलवार बसेको बैठकले भण्डारीलाई सर्वसम्मत रूपमा सिफारिस गरेको सभापति हरिबहादुर थापाले जानकारी दिएका छन् । उनी नेपाल विद्यार्थी संघका पूर्वकेन्द्रीय उपाध्यक्ष एवं महाधिवेशन प्रतिनिधि हुन् ।

कांग्रेस नेताहरूले यसअघिको चुनावमा गठबन्धन गर्दा अर्को पटक कांग्रेसलाई प्रमुख दिने सहमति गरे पनि माओवादी केन्द्रले पालना नगरेकाले यस पटक धुर्कोटमा प्रमुख पद कांग्रेसले नछाड्ने बताएका छन् भने माओवादीले पार्टीले जितेको पालिकामा सोही पार्टीले नै पाउने केन्द्रीय सहमतिअनुसार माओवादीले नै पाउनुपर्ने भन्दै उम्मेदवार घोषणा गरेका छन् ।

१२ पालिका रहेको गुल्मीमा माओवादी धुर्कोट, मालिका, चन्द्रकोट, रुरु, मदानेको प्रमुख पद पाउनुपर्ने दाबी गठबन्धनमा राखेको छ । तर कांग्रेसले धुर्कोट नछोड्ने गरी उम्मेदवार नै घोषणा गरेपछि माओवादी दबाबमा परेको छ । नेकपा माओवादीले जिल्लामा आफूले पाउने र जित्ने पालिकाको पहिलो सूचिमा राखेको धुर्कोटमा अहिलेका अध्यक्ष भूपाल पोखरेललाई आगामी अध्यक्ष भनेर घोषणा गरिसकेको थियो ।

मालिका गाउँपालिकामा भने गठबन्धनको तर्फबाट अध्यक्षको उम्मेदवार सर्वसम्मत रूपमा टुंग्याएको छ । यहाँको अध्यक्षमा माओवादी केन्द्रका देवीराम अर्याल र उपाध्यक्षमा नेपाली कांग्रेसका पालिका सभापति उपेन्द्र अर्याललाई उठाउने निर्णय गरेको थियो । तर नेकपा एस र जनमोर्चाले यहाँ पनि असहमति जनाएका छन् ।

काठमाडौं । स्थानीय तह निर्वाचनका लागि तालमेलको भागबण्डा मिलाउन प्रधानमन्त्री निवास बालुवाटारमा जारी सत्ता गठबन्धनको बैठक अब उम्मेदवार केन्द्रित भएको छ ।

शीर्ष नेताहरुबीच केहीबेर छलफलपछि अहिले सबै दलका नेताहरु आ आफ्नो आन्तरिक छलफलमा अलग अलग जुटेका छन् । कुन पालिका कसले लिने ? कसलाई उम्मेवारका रुपमा अघि सार्ने जस्ता विषय समेत छलफलमा उठेको बताइएको छ ।

सबै दलले आ आफ्नो प्रस्ताव तयार पारेपछि औपचारिक बैठक पुनः बस्ने भएको छ । बैठकमा सहभागी एक नेताका अनुसार महानगर र उपमहानगरमात्र नभएर अन्य नगरपालिकाहरुको हकमा समेत माथिबाटै गठबन्धनको निर्णय पठाउने गरि छलफल भएको छ ।

उम्मेदवारको विषय समेत आजै टुंगो लगाउने सम्भावना रहेको ती नेताले बताए ।