Category: स्थानीय निर्वाचन–२०७९

काठमाडौं । स्थानीय तह निर्वाचनको चुनाव नजिकिँदै गर्दा नेपाली कांग्रेसका वरिष्ठ नेता रामचन्द्र पौडेलको गृह जिल्लामा नेताहरूले राजीनामा दिएका छन् ।

पार्टीभित्र असन्तुष्टि व्यक्त गर्दै पौडेल निकट आधा दर्जन बढी नेताहरूले राजीनामा दिएका छन् । राजीनामा दिनेहरूमा तनहुँ कांग्रेस पूर्व जिल्ला सचिव विश्व बास्तोला, कांग्रेस पूर्वा क्षेत्रीय सभापति महेश्वर भट्टराई रहेका छन् । यस्तै पार्टीका विभिन्न समितिमा रहेका चूडामणि दाहाल, दीपेन्द्र पौडेल, दीर्घ थापा, ऋषिराम महत, बाबुराम बगाले समेतले राजीनामा दिएका छन् ।

पार्टीले योगदानअनुसार स्थानीय तहको टिकट वितरण नगरेको भन्दै उनीहरूले असन्तुष्टि जनाएका हुन् ।

उनीहरूमध्ये महेश्वर भट्टराईले शुक्लागन्डकीको मेयरमा, दाहालले व्यास १ को वडा अध्यक्षमा, थापाले व्यास २ को वडा अध्यक्षमा, पौडेलले शुक्लागन्डकी नपा—३ को वडा अध्यक्ष र महतले शुक्लागन्डकी नपा—८ को वडा अध्यक्षमा स्वतन्त्र उम्मेदवारी दिएका छन् ।

रुपन्देही । बुटवल उपमहानगरपालिकाको वडा सदस्यमा डाक्टर बालकृष्ण चापागाईँले उम्मेदवारी दिएका छन् ।

नेकपा एकीकृत समाजवादीका केन्द्रीय सदस्य तथा रुपन्देही इन्चार्जसमेत रहेका डाक्टर चापागाईँ नेकपा एमालेमा रहँदा ०५४ तथा ०७४ सालमा बुटवलको मेयरका लागि दावेदारी गरेका थिए ।

अहिले एमाले छाडेर नेकपा एसमा लागेका चापागाईँ गठबन्धन दलहरूबाट बुटवलको मेयरका दाबी लबिङ गरे पनि पार्टीलाई भागवण्डा नपरेपछि खुम्चिएका थिए ।

सोमबार मनोनयन दर्ताको अन्तिम समयमा साँझ साढे ५ बजे उनले बुटवलस्थित निर्वाचन कार्यालयमा बुटवल वडा नं ४ को वडा सदस्यमा उम्मेदवारी दिएका थिए ।

गोप्य रूपमा दिइएको उनको उम्मेदवारीबारे धेरैलाई जानकारी नभए पनि पार्टीका जिल्ला अध्यक्ष राजु गुरुङलगायतका केही नेतालाई मात्र जानकारी थियो ।

पिएचडी अध्ययन गरेका र दसकौँ पत्रकारितामा बिताएका मान्छे किन वडा सदस्यमा उम्मेदवारी दिएको भन्ने नेपाल प्रेसको जिज्ञासामा उनले नयाँ अनुभवका लागि यसो गरिएको बताए ।

राजकीय जिम्मेवारीमा मेरो नयाँ अनुभव हो, धेरै पढेका अनुभव भएका व्यक्तिहरू आफ्नो वडाको, टोलको विकासमा ध्यान नदिने परम्परा तोड्न र पार्टीका उपस्थितिलाई समेत जोड्न मेरो उम्मेदवारी हो- डा. चापागाईँले भने ।

पार्टीको जिम्मेवारीमा रहेपछि यसरी टिममा रहेर काम गर्न सजिलो होला, वार्ता, छलफलमा बस्न सजिलो होला भनेर उम्मेदवारी दिएको हुँ – उनले भने । लुम्बिनी बौद्ध विश्वविद्यालयबाट विद्यावारिधि गरेका चापागाईँ प्रेस चौतारीको पूर्वकेन्द्रीय अध्यक्ष तथा राससको पूर्व कार्यकारी अध्यक्ष हुन् ।

नेपाली र पत्रकारितामा एमए गरेका उनले वडा सदस्यमा उम्मेदवारी दिएपछि गठबन्धनभित्रै र बाहिर थप चर्चामा आएका छन् ।

नेकपा एसलाई बुटवलको भागबन्डामा उपमेयर परेको थियो त्यो पदमा पार्टीले चीनबहादुर गुरुङलाई उम्मेदवार बनाएको छ ।

सुर्खेत । चुनाव बहिष्कार गर्ने निर्णय गरेको नेत्रविक्रम चन्द ‘विप्लव’ नेतृत्वको नेकपाले कालीकोटका ९ वटै पालिकामा स्वतन्त्र उम्मेदवारी दिएको छ । विप्लवका केन्द्रीय सदस्यदेखि संविधानसभा सदस्यहरूसमेतले उम्मेदवारी दर्ता गराएका हुन् ।

कालीकोटको नरहरिनाथ गाउँपालिकामा अध्यक्षमा एटम विसी र उपाध्यक्षमा कलशा विकले उम्मेदवारी दर्ता गराएका छन् । विसी सो पार्टीका केन्द्रीय सदस्य हुन् भने विक सो पार्टीका प्रवक्ता खड्कबहादुर विश्वकर्माकी भाइबुहारी हुन् ।

रास्कोट नगरपालिका मेयरमा संविधानसभा सदस्य धिरान्दा उपाध्याय र उपप्रमुखमा फुलटौरा विकले उम्मेदवारी दर्ता गराएका छन् । उपाध्याय २०६४ सालको संविधानसभाको सदस्य हुन् ।

खाँडाचक्र नगरपालिका प्रमुखमा हस्त विक, तिलागुफा नगरपालिकामा रमेश चदारा प्रमुखमा र उपप्रमुखमा धनराज शाहीले उम्मेदवारी दर्ता गराएका छन् ।

पचालझरना गाउँपालिका अध्यक्षमा नेकपा जिल्ला सचिव मनिलाल ऐडीले, विनीत सिंह तिरुवाले उपाध्यक्ष, पलाता गाउँपालिकामा पदम विक अध्यक्ष, महावै गाउँपालिकामा धनबहादुर सिंह, शुभकालिका गाउँपालिकामा मनिश विक र सान्नी त्रिवेणी गाउँपालिमामा रुपसिंह बोहोरा उम्मेदवारी दिएका छन्नु ।

चुनावलाई उपयोग गरेर जाने नीतिअनुसार नै उम्मेदवारी दिएको जिल्ला सचिव मनिलाल ऐडीले बताए । कालीकोट प्रवक्ता खड्कबहादुर विश्वकर्माको गृहजिल्ला हो ।

काठमाडौं । सोलुखुम्बुमा पति-पत्नी र बाबु-छोरा फरक दलबाट उम्मेदवार बनेका छन् । थुलुङदुधकोशी गाउँपालिका- ६ मा निरकुमारी राईले एमालेबाट महिला सदस्यमा मनोनयन दर्ता गरेकी छन् । उनका पति ध्रुवदेव राई कांग्रेसको वडा सदस्यका उम्मेदवार छन् ।

मुख्य निर्वाचन अधिकृत अन्चन भट्टराईका अनुसार सोही गाउँपालिकाको ७ नम्बर वडा सदस्यमा बाबुछोरा कांग्रेसबाट जसबहादुर राई र माओवादीबाट छोरा रोशन राई उम्मेदवार बनेका छन् ।

ओखलढुंगाको सिद्धिचरण नगरपालिकामा राष्ट्रिय जनमोर्चाबाट मेयरमा शेरबहादुर खत्री र उपप्रमुखमा छोरी शारदा खत्री कटवालले उम्मेदवारी दर्ता गराएका छन् ।

पोखरा । मनाङको नार्पाभूमि गाउँपालिका उपाध्यक्षमा नेकपा एमालेका मिङमर फुन्चो लामाको मात्र उम्मेदवारी परेपछि उनी निर्विरोध निर्वाचित भएका छन् ।

निर्वाचन अधिकृत पुनाराम खनालले उपाध्यक्षमा उनकोमात्र उम्मेदवारी परेको बताए । लामा यसअघि वडा नम्बर २ को वडाध्यक्ष थिए ।

सो गाउँपालिकाको अध्यक्षमा एमालेबाट मिङमर सोनाम लामा र कांग्रेसबाट हालका अध्यक्ष कोन्जो लामा उम्मेदवार छन् ।

कांग्रेसका कृष्णवहादुर लामाले अध्यक्षमा बागी उम्मेदवारी दिएका छन् ।

त्यस्तै सोही गाउँपालिकाको वडा नम्बर १ मा कांग्रेसका फुर्वा ठेले लामा र वडा नम्बर ४ मा स्वतन्त्र उम्मेदवार कर्मा लामा निर्विरोध निर्वाचित भएका छन् ।

चितवन । स्थानीय तह निर्वाचनमा सधैँ चर्चाको केन्द्रमा रहने भरतपुर महानगरपालिकामा पाँच दलीय महागठबन्धनविरुद्ध एक्लै भिडिरहेको नेकपा एमालेलाई राप्रपाले साथ दिएको छ ।

अघिल्लो निर्वाचनमा ६ हजार मत कटाएको राप्रपाले यसपटक एमालेको मेयर उम्मेदवार विजय सुवेदीलाई समर्थन गर्दै उपमेयरमा मात्र उम्मेदवारी दिएको छ । उपमेयरमा राप्रपाबाट जिल्ला उपाध्यक्ष हिमला गुरुङले उम्मेदारी दिएकी छन् ।

भरतपुर महानगरपालिका शारदानगरकी हिमला राप्रपाको पुरानो नेता हुन् । विक्रम पाण्डेको निर्वाचन क्षेत्र रहेको भरतपुर र माडी दुवैमा एमालेलाई मेयरमा सघाएर राप्रपाले उपमेयर लिएको छ । माडीको उपमेयरमा राप्रपाबाट मदन पौडेल उम्मेदवार बनेका छन् । त्यहाँ एमालेबाट यसअघिकी उपमेयर ताराजकाजी महतो मेयरको उम्मेदवार छिन् ।

भरतपुरको मेयरमा कांग्रेका नेता पूर्वसांसद जगन्नाथ पौडेलले स्वतन्त्र उम्मेदवारी दिएका छन् । अघिल्लोपटक राप्रपालाई उपमेयर नदिँदा ३ सय मतको अन्तरमा पराजित भएकाले यसपटक राप्रपालाई समेत समेटेर एमाले ढुक्क हुन खोजेको छ ।

एमालेका जिल्ला अध्यक्ष रामप्रसाद न्यौपाने भन्छन्, ‘मतपत्र नच्यातिएको भए एमालेले अघिल्लो चुनावमै पनि जितिसकेको थियो । त्यो चुनाव हामीलाई हराइएको हो । यसपटक हामी कुनै कमजोरी हुन नदिने प्रयासमा छौं । एमालेको भोट त बढेकै छ, राप्रपाको समेत मत थपिँदा सहज जित हुने भएकाले तालमेल गरिएको हो ।’

राप्रपाले भरतपुर महानगरमा आफ्नो पक्षमा ८ हजार मत रहेको दाबी गरिरहेको छ । हालैमात्र अध्यक्ष राजेन्द्र लिङ्देनसहितको उपस्थितिमा राप्रपाले वृहत् आमसभा गरेको थियो ।

विक्रम पाण्डे आउने चुनावमा एमालेको सहयोगमा प्रचण्डविरुद्ध सांसदको उम्मेदवार बन्न चाहन्छन् । त्यसका लागि भरतपुर र माडीमा एमालेलाई सहयोग गर्न उनी तयार भएका हुन् ।

भक्तपुर । नेपाल मजदुर किसान पार्टीले पार्टी अध्यक्ष नारायणमान बिजुक्छेका कान्छा भाइ योगेन्द्रमान बिजुक्छेलाई वडा अध्यक्ष उम्मेदवार बनाएको छ ।

नेमकिपाले योगेन्द्रमान बिजुक्छेलाई भक्तपुर नगरपालिका वडा नं ५ को अध्यक्षको उम्मेदवार बनाएको हो । नेमकिपाको कुनै पनि संगठनमा नरहेका योगेन्द्रमानको वडा अध्यक्षमा उम्मेदवारीसँगै नेमकिपाको राजनीतिमा इन्ट्री भएको छ ।

कम्युनिष्टहरु वंश परम्परामा विश्वास राख्दैनन् तर यसलाई उत्तर कोरिया तथा क्युबाको कम्युनिष्ट पार्टीहरुले मिथ्या सावित गर्दै आएका छन् । नेमकिपाले सधैं उत्तर काेरिया र क्युवाकाे पक्षमा वकालत गर्दै आएकाे छ । अहिले भक्तपुर नगरमा नेमकिपाले उत्तर कोरियाली शैलीमा एकछत्र शासन गर्दै आएको टिप्पणी हुँदै आएको छ । त्यसैलाई सत्य साबित गर्दै नेमकिपाले भक्तपुर नगरमा वंश परम्परालाई अघि बढाएको राजनीतिक वृत्तमा चर्चा सुरु भएको छ ।

त्यस्तै पार्टी नेतृत्वको लागि नारायणमान बिजुक्छेपछि योगेन्द्रमानलाई नै अघि सार्ने धेरैको आँकलनलाई सही साबित गर्दै नेमकिपाले यसपटक वडा अध्यक्षमा उनलाई अघि सारेको छ ।

उनी भक्तपुर नगरपालिका– १० देकोचास्थित जेन्युइन सेकेन्डरी स्कुलका लगानीकर्ता एवं प्रिन्सिपल हुन् । योगेन्द्रमानले भक्तपुर नगरपालिकाको स्थानीय पाठ्यक्रम ख्वप पहिचान निर्माणमा महत्वपूर्ण योगदानसमेत दिएका थिए ।

भक्तपुर नगरपालिका– ५ स्थित सुकुलढोका बिजुक्छे दाजुभाइको पुर्ख्याैली वडा हो । हाल पार्टी अध्यक्ष नारायणमान भक्तपुर नपा – १० कमलविनायक र वडा अध्यक्ष उम्मेदवार योगेन्द्रमान भक्तपुर नपा– ८ लिवालीमा घर बनाएर बस्दै आएका छन् ।

भक्तपुर नपा– ५ मा किसानहरुको भन्दा मध्यमवर्गीयहरुको बसोबास बाक्लो छ । त्यसैले यस वडामा नेमकिपाले हरेक स्थानीय निर्वाचनमा मध्यम वर्गीय उम्मेदवार खडा गर्दै आएको छ । अघिल्लो पटक नारायणमान बिजुक्छे भाडामा बसेको घरका धनी प्रेमगोपाल कर्माचार्यलाई नेमकिपाले वडा अध्यक्षको उम्मेदवार बनाएको थियो ।

यसपटक भक्तपुर नगरमा मेयर, उपमेयरसहित ७ जना वडा अध्यक्षले फेरि टिकट पाउँदा कर्माचार्य दोहोरिएनन् ।

त्यस्तै नेमकिपाले पार्टी सचिव एवं संघीय सांसद प्रेम सुवालका बहिनी ज्वाइँलाई पनि वडा अध्यक्ष उम्मेदवार बनाएको छ ।

सुवालका बहिनी ज्वाइँ कृष्णप्रसाद कोजूलाई नेमकिपाले भक्तपुर नपा वडा नं ८ को वडा अध्यक्ष उम्मेदवार बनाएको हो । यस वडाका अध्यक्ष महेन्द्र खायमलीले दोहोर्‍याउन नपाएपछि कोजूलाई मौका दिइएको हो ।

कोजू इँटा उद्योग व्यवसायी हुन् । यसअघि वडा अध्यक्षमा निर्वाचित खायमली पनि इँटा उद्योग व्यवसायी नै हुन् ।

काठमाडौं । नेपालको सन्दर्भमा नेपाली सेलिब्रेटीहरु र पछिल्लो पुस्ताका कलाकारहरू खुलेर राजनीतिक विषयमा आफ्नो धारणा व्यक्त गरेको विरलै पाइन्छ ।

विवादमा फस्न नरुचाउने भएकाले पनि सकेसम्म कलाकारहरू राजनीतिक विषयवस्तुमा चुपचाप नै बस्ने गर्छन् । तर केही नेपाली सेलिब्रेटीहरुको हकमा उनीहरू खुलेर यो विषयमा आफ्नो कुराहरू पनि राखिरहेका हुन्छ । केही त राजनीतिक पार्टीमा नै आबद्ध भएका पनि छन् ।

कुनै पार्टीमा आबद्ध नभए पनि कलाकारहरू स्वस्तिमा खड्का , इन्दिरा जोशी, निश्चल बस्नेत, प्रियङ्का कार्की, निर्मल शर्मा लगायतका कलाकारहरू हाल महानगरको मेयरमा स्वतन्त्र उम्मेदवारी दिएका र्‍यापर बालेन्द्र शाह उर्फ बालेन शाहको पक्षमा खुलेरै लागेका छन् ।

बालेनको उम्मेदवारी घोषणासँगै उनको पक्षमा लागेका निश्चल बस्नेत उनको घोषणापत्र सार्वजनिक कार्यक्रममा नै सहभागी भए । बस्नेतले बालेनलाई निर्वाचित भएपछि पार्टीका जनप्रतिनिधिसँग कसरी समन्वय गर्नु हुन्छ भनेर प्रश्न समेत गरेका थिए ।

बालेनको घोषणा पत्र सार्वजनिक गर्ने कार्यक्रमै सहभागी भएर बालेनलाई समर्थन जनाइरहेका अर्का कलाकार हुन निर्मल शर्मा र इन्दिरा जोशी ।

यस्तै अभिनेत्रीद्वय स्वस्तिमा खड्का र प्रियङ्का कार्की पनि हाल भोट फर बालेन भनेर प्रचारमा जुटेका छन् ।

स्वस्तिमा र प्रियंकाले आज मात्रै आफ्नो सामाजिक सञ्जालमा बालेनको घोषणा पत्रको सारांश सार्वजनिक गर्दै बालेनको पक्षमा भोट हाल्न अपिल गरेको देख्न सकिन्छ ।

काठमाडौं । नेपाली कांग्रेसले खोटाङको दिक्तेल रुपाको मझुवागढी नगरपालिकाको प्रमुखमा तीर्थराज भट्टराई आधिकारीक उम्मेदवार भएको स्पष्ट पारेको छ ।

कांग्रेस केन्द्रीय सभापति शेरबहादुर देउवाले खोटाङका निर्वाचन अधिकृतलाई पत्र पठाउँदै सो नगरपालिकाको प्रमुखमा कांग्रेसका तर्फबाट २ जनाको उम्मेदवारी दर्ता भएकोमा भट्टराई आधिकारिक भएको जानकारी दिएका हुन् ।

सो नगरपालिकामा धर्मराज पोखरेलले पनि कांग्रेसबाटै प्रमुखमा उम्मेदवारी दिएका थिए ।

कांग्रेसको प्रदेश १ समितिले पोखरेललाई उम्मेदवार बनाउने निर्णय गरेको थियो ।

प्रदेशको निर्णयमा कांग्रेस केन्द्रीय समितिले हस्तक्षेप गरेको हो ।

काठमाडौं । स्थानीय तह निर्वाचनमा ७५३ वटै स्थानीय तहका लागि एक लाख ४४ हजार ४१६ उम्मेदवारले मनोनयन दर्ता गराएका छन् ।

निर्वाचन आयोगले मंगलबार मध्यान्ह साढे १२ बजे सार्वजनिक गरेको विवरणअनुसार आइतबार र सोमबार गरी यो संख्यामा उम्मेदवारी दर्ता भएको हो । यो राजनीतिक दल र स्वतन्त्र उम्मेदवारको संख्या हो ।

स्थानीय तहमा ३० वैशाखमा ३५ हजार २ सय २१ जनप्रतिनिधिका लागि निर्वाचन हुँदैछ । २०७४ को स्थानीय तहको निर्वाचनमा एक लाख ४४ हजार ४१६ जनाले उम्मेदवारी दिएका छन् ।

कुन पदमा कति उम्मेदवार ?

प्रमुखः ३ हजार ३७५

उपप्रमुखः २ हजार ६९
अध्यक्षः ३ हजार ३३४

उपाध्यक्षः २ हजार ३६४

वडाध्यक्षः ३३ हजार ७९७

महिला सदस्यः २३ हजार ७९२

दलित महिला सदस्यः २२ हजार ४४०

खुला सदस्यः ५२ हजार २४५

आज उम्मेदवारको विरोधमा उजुरी दिन आयोगले भनेको छ । र, १४ र १५ वैशाखमा मनोनयनपत्र जाँच गर्ने तथा उजुरीउपर जाँचबुझ गरी निर्णय गरी उम्मेदवारको नामावली प्रकाशन गर्ने कार्यतालिका छ ।

वैशाख १६ गते उम्मेदवारले नाम फिर्ता लिने र उम्मेदवारको अन्तिम नामावली प्रकाशन गर्ने तथा वैशाख १७ गते उम्मेदवारलाई निर्वाचन चिह्न प्रदान गर्ने आयोगको कार्यतालिका छ ।

विराटनगर । मोरङका कुल १७ स्थानीय तहमा अध्यक्ष/प्रमुख पदका लागि १४९ जनाले उम्मेदवारी दर्ता गराएका छन् । यस्तै उपाध्यक्ष/उपप्रमुखमा १२९ जनाले उम्मेदवारी दिएका छन् ।

प्रदेश निर्वाचन कार्यालयका अनुसार एक महानगर, ८ नगर ८ गाउँपालिका रहेको मोरङमा वडाध्यक्षमा मात्रै १ हजार १३ जनाको उम्मेदवारी परेको छ ।

ती वडाहरूको खुल्ला सदस्यमा १ हजार ६६, महिला सदस्यमा ७६१, दलित महिला सदस्यका लागि ७१० जनाले मनोनयन दर्ता गराएका छन् ।

दल र स्वतन्त्र गरी विराटनगर महानगरपालिकाको प्रमुखमा १४ जनाको उम्मेदवारी परेको छ । त्यसैगरी उपप्रमुखमा १५ जनाको उम्मेदवारी परेको छ ।

उर्लाबारी नगरपालिकाको प्रमुखमा ९ जना र उपप्रमुखमा पनि ९ जनाको उम्मेदवारी परेको छ । पथरी शनिश्चरे नगरपालिकाको प्रमुखमा ८ जना र उपप्रमुखमा ७ जनाको उम्मेदवारी परेको छ । सुन्दरहरैँचा नगरपालिकाको प्रमुखमा ११ जना र उपप्रमुखमा ८ जनाको उम्मेदवारी परेको छ । रंगेली नगरपालिकाको प्रमुखमा ९ र उपप्रमुखमा १० जनाको उम्मेदवारी परेको छ भने लेटाङ नगरपालिकाको प्रमुखमा ९ जना र उपप्रमुखको पदमा ५ जानको उम्मेदवारी परेको छ ।बेलबारी नगरपालिकाको प्रमुखमा ११ जनाको उम्मेदवारी पर्दा उपप्रमुखमा ९ जनाको उम्मेदवारी परेको छ ।त्यसै गरी रतुवा माई नगरपालिकाको प्रमुख र उपप्रमुखमा पाँच/पाँचजनाको उम्मेदवारी परेको छ ।

मिक्लाजुङ गाउँपालिकाको अध्यक्षमा ८ जना र उपाध्यक्षमा ७ जनाको उम्मेदवारी परेको छ । यसैगरी केराबारी गाउँपालिकाको अध्यक्षमा ७ जना र उपाध्यक्षमा ५ जनाको उम्मेदवारी परेको प्रदेश निर्वाचन कार्यालयले जनाएको छ ।

यता कटहरी गाउँपालिकाको अध्यक्षमा ९ जना र उपाध्यक्षमा ६ जनाको उम्मेदवारी परेको छ । कानेपोखरी गाउँपालिकाको अध्यक्षमा ७ जना र उपाध्यक्षमा ५ जनाको उम्मेदवारी परेको छ ।ग्रामथान गाउँपालिको अध्यक्षमा ७ जना र उपाध्यक्षमा ५ जनाको उम्मेदवारी परेको छ ।
जदहा गाउँपालिकाको अध्यक्षमा ७ जना र उपाध्यक्षमा ९ जानको उम्मेदवारी परेको छ ।धनपालथान गाउँपालिकाको अध्यक्षमा ८ जना र उपाध्यक्षमा ७ जनाको उम्मेदवारी पर्दा बुढीगंगा गाउँपालिकाको अध्यक्षमा १० जना र उपाध्यक्षमा ७ जानको उम्मेदवारी परेको छ ।

प्रदेश निर्वाचन कार्यालयका अनुसार विराटनगर महानगरको मेयरमा नेपाली काङ्ग्रेसबाट नागेश कोइराला, नेकपा एमालेबाट सागर थापा, राप्रपाबाट प्रल्लाह साह, लोकतान्त्रिक समाजवादी पार्टीबाट मृत्युजन्य मिश्र, नेपाली काँग्रेस बिपी पार्टीबाट रामचन्द्र गौतम, जनमत पार्टीबाट अशोककुमार मण्डल, विवेकशील साझा पार्टीबाट अमलेश कर्ण, संघीय लोकतान्त्रिक राष्ट्रिय मञ्चबाट डा. नागेश्वरीप्रसाद सिंहलगायत छन् ।

आइतबार मात्रै स्वतन्त्र तर्फबाट उमेश यादव, सक्रिय गौतमले उम्मेदवारी दर्ता गराएका थिए । उपप्रमुखमा भने जसपा बाट उपेन्द्र यादवको छोरा अरमेन्द्र यादव, एमालेबाट शिल्पा कार्की, राप्रपाबाट बिन्दा लुइँटेल आचार्य, लोसपाबाट सहनाज खातुन, माओवादी केन्द्रबाट नमिता न्यौपाने लगायतले उम्मेदवारी दर्ता गराएका छन् ।

काठमाडौं । पोखरामा अझै मनोनयन प्रक्रिया सकिएको छैन । निर्वाचन आयोगले व्यवस्थापन राम्रो नगर्दा उम्मेद्वार मात्र होइन कर्मचारीसमेत समस्यामा छन् । उनीहरूले रातभर लगाएर मनोनयनको बाँकी काम गरिरहेका छन् । अझै केही घण्टा लाग्ने मुख्य निर्वाचन अधिकृत श्रीकृष्ण भट्टराईले बताए ।

‘आयोगले लजिष्टिक उपलब्ध गराएन । स्थानीय तहसँग माग्ने भन्यो । तर, पोखरा महानगरले पनि सहयोग गरेन,’ उनले भने, ‘कम्प्युटर र ल्यापटप छैन । काठमाडौंमा महानगरले १० वटा दियो, पोखराले एउटा पनि दिएन । हामीले व्यक्तिगत ल्यापटपबाट काम गरिरहेका छौं । जेनेरेटर नहुँदा केही समय कामै रोकियो ।’

राजनीतिक दलहरू पनि एकै पटक मनोनयनमा आउँदा समस्या परेको उनले बताए । ‘धेरै गाह्रो भो । पार्टीहरूले कोअपरेट गरेनन् । ३ बजेपछि सबै हुल बाँधेर आइदिए,’ उनी भन्छन्, ‘सल्लाह गरेरै फरक दिन आउनु भन्नुपर्ने हो । तर, त्यसो हुन सकेन । रातभर िकाम गर्दा पनि काम सकिएको छैन ।’

आयोगले तोकेको भन्दा बढी कर्मचारी राख्न नपाएका कारण पनि समस्या भइरहेको भट्टराई सुनाउँछन् । उम्मेद्वारहरूबाट विवरण संकलन गरे पनि दस्तावेजीकरण अहिलेसम्म नसकिएको हो । निर्वाचन आयोगको असहयोग गरेका कारण मनोनयन प्रक्रियामा समस्या भएको कर्मचारीहरु बताउँछन् ।

पोखराको मेयरका लागि २५ र उपमेयरका लागि नौ जनाले उम्मेद्वारी दर्ता गराएका छन् । गण्डकी प्रदेशभरि हालसम्म १२ हजार एक सय ४६ जनाले मनोनयन दर्ता गराइसकेका छन् । अझै केही तथ्यांक बाँकी भएकाले बढ्न सक्ने बताइएको छ । आयोगले दुई दिन मनोनयनको समय तोके पनि सबैजसो दलहरू भोलिपल्ट अन्तिम समयमा मात्रै पुगेका थिए ।

मकवानपुर । मकवानपुरको मकवानपुरगढी गाउँपालिकामा पनि नेकपा एमालेबाट एकजना वडा सदस्य निर्विरोध निर्वाचित भएका छन् ।

एमालेबाट दलित महिला सदस्य पदमा मनोनयन दर्ता गरेकी वडा नंबर ७ की तिर्थ कुमारी ल्वाहगुन निर्विरोध निर्वाचित भएको निर्वाचन अधिकृतको कार्यालयले जनाएको छ ।

७ नम्बर वडाको दलित महिला सदस्य ल्वाहगुनको मात्र एकल उम्मेदवार परेसँगै उनी निर्विरोध निर्वाचित भएकी हुन् । योसँगै मकवानपुरमा एमालेबाट निर्विरोध हुने वडा सदस्यको संख्या ३ पुगेको छ ।

यसअघि, जिल्लाको इन्द्रसरोवरमा २ जना वडा सदस्य निर्विरोध भएका थिए । एमालेबाट दलित महिला सदस्य पदमा मनोनयन दर्ता गरेकी वडा नम्बर १ की लक्ष्मी दमाई र वडा नम्बर ४ की सावित्री सुनार निर्विरोध निर्वाचित भएकी हुन् ।

एमालेबाट दलित महिला सदस्य पदमा मनोनयन दर्ता गरेकी इन्द्रसरोवर वडा नम्बर १ की लक्ष्मी दमाई र वडा नम्बर ४ की सावित्री सुनार निर्विरोध निर्वाचित भएकी हुन् । उक्त वडाहरूमा दमाई र सुनारको एकल उम्मेदवार परेको थियो ।

विराटनगर । विराटनगर महानगरपालिकामा प्रमुख र उपप्रमुखमा गठबन्धन गरेकाले दलहरुले वडामा छुट्टाछुट्टै उम्मेदवारी दर्ता गराएका छन् । यसले गठबन्धन भत्कने सम्भावना बढेको छ ।

केन्द्रको निर्णयअनुसार महानगरको मेयर कांग्रेसलाई र उपमेयर जनता समाजवादी पार्टीको भागमा परेको छ । जसअनुसार कांग्रेसका नागेश कोइराला र उपमेयरमा जनता समाजवादी पार्टीका अमरेन्द्र यादवले उम्मेदवारी दिएका छन्। यसबाहेक कुल १९ वडा रहेको विराटनगरमा गठबन्धनभित्रका दलले वडामा छुट्टाछुट्टै उम्मेदवारी दर्ता गराएका हुन् ।

कांग्रेसले १९ वटै वडामा सेटसहित उम्मेदवारी दर्ता गराएको छ । एकीकृत समाजवादीले १६ वटा वडामा, माओवादी केन्द्रले १५ वटा वडामा सेटसहितको उम्मेदवारी दिएका छन् । त्यसैगरी जनता समाजवादी पार्टीले १६ वटै वडामा सेटसहित उम्मेदवारी दिएको छ ।

कांग्रेसले वडा नं १ मा राजन न्यौपाने, २ मा ज्ञानेश्वर नेपाल, ३ मा कमल पुडाशौनी, ४ मा सञ्जय मण्डल, ५ मा सन्तोष न्यौपाने, ६ मा अक्षय सनही, ७ मधुबाबु तिवारी, ८ मा शन्तनु रेग्मी, ९ मा विश्वनाथ भगत, १० मा सन्तोष ढुंगाना, ११ मा रामसुन्दर राजवंशी, १२ मा हरि भट्टराई, १३ मा आमोद झा, १४ मा रमेश राजवंशी, १५ मा प्रकाश शाह, १६ मा उद्धव भुजेल, १७ मा अस्लम आलम, १८ मा तुलाचन यादव र १९ नं वडामा उदय राजवंशीले अध्यक्षमा मनोनयन गरेका छन्।

एकीकृत समाजवादी पार्टीले पनि महानगरको वडा नं ८, १६ र १८ बाहेकका सबै वडामा उम्मेदवारी दिएको छ ।

समाजवादीबाट वडा नं १ मा  शम्भु कार्की, २ मा कमल भट्ट, ३ मा सुवास घिमिरे, ४ मा राम लिम्बू, ५ मा रमण गौतम, ६ मा उदय मण्डल, ७ मा चन्द्रशेखर धाडेवाल, ९ मा किशन भगत, १० मा चिराग ढुंगाना, ११ मा घनेन्द्र थापा, १२ मा भीम केसी, १३ मा शम्भु शाह, १४ मा सुरेश यादव, १५ मा पदम सुब्बा, १७ मा तवरेज आलम र १९ मा प्रेम खवासको उम्मेदवारी परेको छ ।

माओवादी केन्द्रले २, ७, ११ र १२ बाहेक सबै वडामा उम्मेदवारी दिएको छ । माओवादीबाट महानगरको १ नं वडामा चन्द्रबहादुर वन, ३ मा कृष्णप्रसाद निरौला, ४ मा जिसस न्यौपाने, ५ मा भरत गोसाई, ६ मा विजय कामत, ८ मा डम्वरु भट्टराई, ९ मा नवीन हुसेन, १० मा सरिताकुमारी राय, १३ मा राज कर्ण, १४ मा विनोद यादव, १५ मा रामेश्वर शाह, १६ मा सीताराम पण्डित, १७ मा जावेद अलाम, १८ मा सोनु केवट र १९ मा शिवराम ठडारले उम्मेदवारी दिएका छन् ।

जसपाले २, ३ र ९ वडाबाहेक सबैमा वडामा अध्यक्षमा आफ्नो उम्मेदवार उठाएको छ । जसअनुसार १ नं वडामा राजेश यादव, ४ मा उपेन्द्र यादव, ५ मा सन्तोष राय, ६ मा मतमत अन्सारी, ७ मा सत्यप्रकाश रोनियार, ८ मा हरेराम राय, १० मा रामचन्द्र यादव, ११ मा गणेश शाह, १२ मा हीरा कामत, १३ मा हीरालाल महतो, १४ मा बलदेव यादव, १५ मा सुसत्व आली, १६ मा किशोर मण्डल, १७ मा समिन कमर, १८ मा दिनेश यादव र १९ मा प्रशान्त चौधरीले उम्मेदवारी दिएका छन् ।

स्थानीय तहको निर्वाचनमा केन्द्रदेखि वडा तहसम्म सकेसम्म तालमेल गरेर जाने बताएका दलहरूले वडा तहमा छुटाछुटै उम्मेदवारी दिएकाले वडामा कुनै खालको गठबन्धन नहुने कांग्रेसले जनाएको छ ।

कांग्रेस विराटनगरका सचिव तेजेन्द्र भट्टराईले प्रमुख र उपप्रमुखमा पनि केन्द्रले गरेको कारण गठबन्धन गरेपछि मानेको भए पनि वडामा स्वस्थ मित्रवत प्रतिस्पर्धा गर्ने बताए ।

माओवादी केन्द्र विराटनगरका अध्यक्ष नवीन पौडेलले अझै पनि १६ गतेसम्म वडामा सहमति गर्ने समय रहेको भन्दै त्यसो नभए प्रमुख र उपप्रमुखमा भोट नहाल्ने बताए । ‘हामीले वडामा सहमति गर्ने भनेपछि माथिल्ला दुई पदमा उम्मेदवारी नदिएका हौं’, पौडेलले भने, ‘हामीले सबै वडामा उम्मेदवारी पनि दिएका छौं, वडा नमिलाए हामी प्रमुख उपप्रमुखमा भोट हाल्दैनौं ।’

जसपाका प्रदेश उपाध्यक्ष राजकुमार यादवले वडा तहमा सबै दलबाट उम्मेदवारी परेकाले तत्कालको अवस्थामा तालमेलको सम्भावना कम भए पनि एमाले बलियो भएको वडामा भने गठबन्धन दलहरू तालमेल गरेर जाने र अन्यत्र मित्रवत प्रतिस्पर्धा हुने बताए ।

स्थानीय तहको निर्वाचनमा एक्लै होमिएका एमालेले विराटनगरको मेयरमा सागर थापा र उपमेयरमा शिल्पा कार्कीले उम्मेदवारी दिएकाे छ ।महानगरको १९ वडामध्ये १ नं वडा काजी बस्नेत, २ कुमार पोख्रेल, ३ मा बासुबहादुर बस्नेत, ४ मा जितन थापा, ५ मा मीनकुमार आचार्य, ६ मा अनिश आलम, ७ मा दामोदर तिवारी, ८ मा राम पोखरेल, ९ मा श्री प्रकाश तोत्ला, १० मा अर्जुन गिरी, ११ मा तीर्थेन्द्र न्यौपाने, १२ मा भोला बराल, १३ मा किशोर पोखरेल, १४ मा सूर्यनारायण महतो, १५ मा धर्मनन्द सन्जेल, १६ मा कुमार महर्जन, १७ मा मो हमिद आजाद, १८ मा भुवनेश्वर यादव र १९ नं वडामा श्याम घिमिरेले एमालेबाट अध्यक्षमा उम्मेदवारी दिएका छन् ।

मोरङमा कहाँ कहाँ भयो गठबन्धन ?

मोरङका कूल १९ स्थानीय तहमध्ये धेरैजसोमा दलहरू एक्लाएक्लै चुनावी प्रतिस्पर्धामा उत्रिएका छन् । कतिपयमा गठबन्धनभित्रकै दलहरूमा उपगठबन्धन भएको छ ।

मिक्लाजुङ गाउँपालिकामा कांग्रेस र माओवादीबीच गठबन्धन भएको छ । त्यहाँ कांग्रेसले अध्यक्ष लिएर उपाध्यक्ष माओवादीलाई दिएको छ।

यस्तै पथरी शनिश्चरे नगरपालिकामा माओवादी, नेकपा एस र जनता समाजवादी पार्टीबीच गठबन्धन भएको छ । त्यहाँ माओवादीले प्रमुख  लिएको छ । नेकपा एसलाई उपप्रमुख दिइएको छ ।

सुनवर्षी नगरपालिकामा जनता समाजवादी पार्टी र माओवादी केन्द्रबीच गठबन्धन भएको छ ।

लेटाङ नगरपालिकामा कांग्रेस र माओवादीबीच गठबन्धन भएको छ । यस्तै कांग्रेस र माओवादीबीच रतुवामाई नगरपालिकामा गठबन्धन भएको छ । त्यहाँ कांग्रेसले प्रमुख लिँदा माओवादी केन्द्रले उपप्रमुख पाएको छ ।

धनपालथानमा यसअघि माओवादी केन्द्र र जनता समाजवादी पार्टीबीच भएको सहमति भाँडिएको छ । त्यहाँ एक्लाएक्लै उम्मेदवारी दर्ता भएको छ ।

यस्तै उर्लाबारी, बेलबारी र सुन्दरहरैंचा नगरपालिका, कानेपोखरी, केराबारी, कटहरी, बुढीगंगा, ग्रामथान र जहदा गाउँपालिकामा एक्लाएक्लै लड्ने गरी दलहरूले उम्मेदवारी दर्ता गराएका छन् । वडामा अब कुनै पनि खालको गठबन्धन नहुने कांग्रेसले जनाएको छ ।