Category: स्थानीय निर्वाचन–२०७९

हेटौँडा । मकवानपुरको थाहा नगरपालिकाका मेयर लवशेर विष्टले राजीनामा दिएका छन् ।

‘दल छोडी पद, पद छोडी दल’ भन्ने रूपचन्द्र विष्टको भनाइलाई आत्मासाथ गर्दै गठबन्धनको चुनावी कार्यक्रममा सहभागिता जनाउनको लागि आफूले राजीनामा दिएको विष्टले बताए ।

नेकपा माओवादी केन्द्रको तर्फबाट २०७४ सालमा मेयर पदमा विजयी भएका विष्टले बिहीबार नगरका उपप्रमुख खड्ग बहादुर गोपालीसमक्ष राजीनामा दिएका दिएका हुन् ।

पदमा रहेर चुनाव प्रचारमा जाँदा स्वर्गीय आदर्श व्यक्तित्व विष्टको नीति विरुद्ध हुने र आचारसंहिताको उलङ्घन पनि हुने भन्दै उनले राजीनामा दिएका हुन् ।

पदमै रहेर चुनाव प्रचारमा हिँड्न आफूलाई नैतिकताले नदिने र आदर्श व्यक्तित्व विष्टको सच्चा अनुयायीले पदमा रहँदा दलको प्रचारमा हिड्ने कामलाई उचित नहुने भन्दै राजीनामा दिएको उनले बताए ।

आउँदो वैशाख ३० गते हुने स्थानीय तहको निर्वाचनमा पाँच दलीय गठबन्धले माओवादीको तर्फबाट विष्णु विष्ट ‘आदर्श’लाई मेयरको उम्मेदवार बनाएको छ ।

उत्तरी मकवानपुरको थाहा नगरपालिकामा स्वर्गीय रूपचन्द्र विष्टलाई निकै आदरपूर्ण सम्मान गरिन्छ ।

उनै विष्टले प्रतिपादन गरेको ‘थाहा’ सिद्धान्तलाई सम्मान गर्दै नगरपालिकाको नाम नै थाहा नगरपालिका राखिएको थियो ।

काठमाडौँ । नेकपा एमालेका महासचिव शंकर पोखरेलले एमालेसँग एक्लै चुनाव लड्न नसकेर गठबन्धन बनाउँदा पनि सत्ताधारी दलहरूले देशका १३५ भन्दा बढी स्थानमा उम्मेदवार उठाउन नसकेको टिप्पणी गरेका छन् ।

विभिन्न मिडियाका सम्पादकहरूसँग बुधवार काठमाडौंको अल्फा हाउसमा अन्तरक्रिया गर्दै महासचिव पोखरेलले पाँच वटा दलमध्ये कसैले पनि उम्मेदवार नपाउनुले पनि उनीहरूको हैसियत प्रस्ट हुने बताए ।

पोखरेलले भने– निर्विरोध भएका ठाउँमा पनि एमाले पहिलो छ । उनीहरूले ती ठाउँमा उम्मेदवार समेत पाएनन् । एउटा दलको उम्मेदवार नहुनु स्वाभाविक हो तर पाँच वटाले समेत नपाउनुले पनि गठबन्धनको हबिगत प्रस्ट हुन्छ ।

महासचिव पोखरेलले यस पटकको स्थानीय चुनाव सरकार र सत्तारुढ दलले नचाहेको तर कानून संविधान र प्रतिपक्षी दलका कारण मात्र भइरहेको भन्दै जसले चुनाव नै चाहेका थिएनन् उनीहरूले जित्ने सम्भावना नरहेको दाबी गरे ।

पोखरेलले भने–यो चुनाव उनीहरूले चाहेका होइनन् । चुनाव हाम्रो दबाबमा भएको हो । त्यसैले हामी अफेन्सिभ छौँ,सत्ता गठबन्धन डिफेन्सिभ छ । एमाले एउटा शक्ति हो,गठबन्धन अर्को शक्ति । प्रचण्ड माधव भनेका कांग्रेसका सहयोगी मात्र हुन् अब उनीहरू राष्ट्रिय राजनीतिमा फरक अस्तित्वमा रहन सक्दैनन् ।

महासचिव पोखरेलले यस पटक ६ वटा महानगरपालिकामा एमालेले चमत्कार गर्ने भन्दै चुनावी परिणामबारे आफ्नो आँकलन सफल हुने गरेको दाबी गरे । उनले प्रचण्ड माधवसँग आउने तीनै तहका चुनावमा कुनै पनि प्रकारको सहकार्य हुन नसक्ने समेत प्रस्ट पारे ।

अर्को एक प्रसङ्गमा काठमाडौंमा बालेन शाहको उम्मेदवारीलाई एमालेले सहज रूपमा लिएको र उनको उम्मेदवारीले एमालेलाई फाइदा नै पुग्ने बताए ।

काठमाडौं । निर्वाचन आयोग आगामी स्थानीय तह निर्वाचनलाई लक्षित गर्दै वैशाख २७ गतेबाट सीमा नाका बन्द गर्ने भएको छ ।

वैशाख २७ गते मतदानसम्म नभएसम्मका लागि नेपाल भारत सीमा नाका बन्द हुने भएका हुन् ।

यस्तै, वैशाख २७ गते राति १२ बजेदेखि नै मतदान सम्पन्न नहुँदासम्म तोकिएको क्षेत्रमा मादक पदार्थको बिक्री वितरण र सेवन पूर्ण रूपमा निषेध गर्न आयोगले गृह मन्त्रालयलाई भनेको छ ।

आयोगका प्रवक्ता शालिग्राम शर्माले यो निर्णय स्थानीय तह निर्वाचन निर्देशिका, २०७८ को दफा ७१ (मादक पदार्थ निषेध गर्ने) मा भएको व्यवस्थाको कार्यान्वयनका लागि गरिएको बताए ।

काठमाडौं । निर्वाचन आयोगले स्थानीय तह निर्वाचनका लागि आवश्यक मतपत्र छपाईको काम सकिएको जनाएको छ ।

मतपत्र छपाईको काम सकिएपनि ढुवानीको काम भने बाँकी छ । सबै जिल्लाहरुमा शुक्रबारसम्म मतपत्र पुग्ने आयोगले जनाएको छ ।

यस्तै आयोगले निर्वाचनमा खटाइएको कुनै पनि कर्मचारीले निर्वाचनको काममा खटिन इन्कार गरेमा कानून बमोजिम कडा कारवाही गर्न निर्देशन दिएको छ ।

कारबाहीको अधिकार मूख्य निर्वाचन अधिकृत र निर्वाचन अधिकृतलाई दिइएको छ ।

आयोगले निर्वाचनका खटिएका कर्मचारीलाई अति जरुरी, मानवीय र संवेदशील कारणसहित उपर्युक्त कारण परेको अवस्थामा बाहेक अब कार्यक्षेत्र फेरबदल नगर्न नगराउन पनि निर्देशन दिएको छ ।

भरतपुर । वैशाख ३० मा हुने स्थानीय निर्वाचनको ‘इपिसेन्टर’ बनेको भरतपुर महानगरपालिकामा सत्तारुढ गठबन्धनले बिहीबार संयुक्त चुनावी सभा गर्‍यो ।

रातभरको झरीले ‘ताल’ बनेको भरतपुरको केन्द्रीय बसपार्क चौरमा हतारहतार पानी झिकेर, माटो भरेर तयार पारिएको कार्यक्रमस्थलमा गठबन्धनले सोचेजति उपस्थिति देखिएन ।

प्रधानमन्त्री एवं कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल, नेकपा एकीकृत समाजवादीका अध्यक्ष माधवकुमार नेपाल, गठबन्धनका संयोजक रामचन्द्र पौडेल लगायतका नेताले चुनावी सभालाई सम्बोधन गरे ।

सामान्यतया चुनावी सभामा कार्यकर्ताभन्दा जनतासँग बढी अपिल गर्ने गरिन्छ । तर, भरतपुरमा त्यस्तो देखिएन । गठबन्धनका नेताहरूले भरतपुरका जनतालाई कुनै आह्वान गरेनन् । चुनावीसभाको मञ्चबाट गठबन्धन दलमै रहेका असन्तुष्टि सम्बोधनको प्रयत्नमा देउवा, प्रचण्ड, नेपाल र पौडेल व्यस्त रहे ।

सभामा कांग्रेस सभापति देउवाले गठबन्धनविरुद्ध नजान आफ्ना कार्यकर्ताहरूलाई निर्देशन दिए । गठबन्धन र चुनावी तालमेल गर्ने आफ्नो निर्णयलाई पुष्टी गर्न पार्टीको आन्तरिक प्रतिस्पर्धाको प्रसंग झिके । गत पुसमा कांग्रेसको १४ औं महाधिवेशनमा ५९ प्रतिशत मत ल्याएर देउवा सभापतिमा निर्वाचित भएका थिए । भरतपुरको सभामा भने आफू र आफ्नो नीति ८२ प्रतिशतले अनुमोदन भएको दाबी देउवाले गरे । जबकी कांग्रेस महाधिवेशनको बन्दसत्रमा कुनै नीतिगत बहस वा राजनीतिक प्रस्तुति गरिएकै थिएन ।

‘पार्टी भनेकै जनताको हो । कांग्रेस पार्टीको चुनावमा ८२ प्रतिशतले मलाई जिताए । त्यो भनेकै गठबन्धन गर्नु ठीक छ भनेको हो नि । गठबन्धन नचाहेको भए त मलाई हराइहाल्थे नि’, देउवाले भने । उनले उम्मेदवार रेनु दाहालको नाममा ‘बखेडा नगर्न’ आफ्नै पार्टीका नेता कार्यकर्तालाई निर्देशन समेत दिए ।

‘रेनु दाहाललाई जिताउनु हाम्रो कर्तव्य हो । उहाँको नाममा बखेडा नगर्नुहोला’, देउवाले भने । देउवाले आफ्नो मन्तव्यमा गठबन्धनको औचित्य र स्थानीय निर्वाचनमा गठबन्धनका एजेण्डाबारे खासै बोलेनन् । जनतालाई आह्वान गरेनन् । एकोहोरो गठबन्धन र तालमेलप्रति असन्तुष्ट कार्यकर्तालाई धम्क्याइरहे । ‘रेनुलाई जिताउनुपर्छ । गठबन्धन टुट्न दिनुहुन्न । गठबन्धन टुटे कांग्रेस खत्तम हुन्छ’, देउवाले भने ।

अर्का वक्ता नेकपा माओवादी केन्द्रका अध्यक्ष प्रचण्डले पनि आफ्नो मन्तव्यमा अधिकांश समय कांग्रेसका असन्तुष्ट कार्यकर्ताहरूलाई घुर्क्याउनमै खर्च गरे । पूर्ववक्ता कांग्रेस नेताहरूले ‘स्थानीय निर्वाचनपछि विगतमा जस्तै धोका दिने त होइन ?’ भनी सोधेको प्रश्नमा प्रचण्ड प्रसन्न देखिएनन् ।

कांग्रेस कार्यकर्ताले हँसिया हथौडामा भोट दिन नमाने देशै दुर्घटनामा पर्ने चेतावनी प्रचण्डले दिए । आफूले सबैको साथ पाए १५ वर्ष गठबन्धन जोगाएर लैजान उत्साही हुने तर ‘टेन्सन’ दिए जेपनि हुनसक्ने आशयको प्रचण्डवाणी ‘कांग्रेस कार्यकर्ता’ माथिकै प्रहार थियो ।

वक्ताका रूपमा नेकपा एकीकृत समाजवादीका अध्यक्ष माधवकुमार नेपालले कांग्रेस कार्यकर्तालाई धम्की नै त दिएनन् तर अधिकांश समय एमाले र केपी ओलीको आलोचनामै खर्चिए । ‘एमाले कुहिएको फर्सी हो, छोएपनि रोग लाग्छ’, नेपालको भनाइ थियो । जसपा नेपालका वरिष्ठ नेता राजेन्द्र श्रेष्ठको भाषणमा पनि गठबन्धनले जनतालाई गर्ने कुनै आह्वान भेटिएन ।

गठबन्धनको संयोजकसमेत रहेका कांग्रेस वरिष्ठ नेता रामचन्द्र पौडेलले आफ्नो समय गठबन्धनको औचित्य पुष्टी गर्नमै खर्चिए । स्वतन्त्र उम्मेदवारी दिएका कांग्रेस नेताहरूलाई ‘धैर्यहीन, इमोस्नल र भावावेशमा चलेको’ आरोप लगाए । गठबन्धनको सैद्धान्तिक व्याख्या गर्दै पौडेलले वीपीले भनेको प्रजातान्त्रिक समाजवाद पूरा गर्नेदेखि बहुलवादमा आधारित बहुदलीय व्यवस्थाको रक्षापनि गठबन्धनबाटै हुने बताए । गठबन्धनले कांग्रेसलाई अवसर दिएको भन्दै उनले पनि असन्तुष्ट कांग्रेस कार्यकर्तालाई थुम्थुम्याउने प्रयास गरे ।

‘गठबन्धन नभएको भए गैडाकोटको कृष्ण नेपाली कसरी मुख्यमन्त्री हुन्थे ? यही चितवनको जिउँदो शहिद बलराम पौडेल कसरी मन्त्री भएर झण्डा हल्लाएर हिँड्थे ?’, चुनावी सभाबाट कांग्रेस कार्यकर्तालाई पौडेलको प्रश्न थियो ।

कांग्रेसभित्रको आन्तरिक असन्तुष्टिका कारण परिणाममा असर नपुगोस् भनेर गठबन्धनले सचेतता पूर्वक भरपुरमा चुनावी सभा राखेको थियो । चुनावी सभामा चौर खाली देखिएपछि स्थानीय नेताहरूले ‘सभामा मान्छे थोरै भएपनि चुनाव जिताउने’ वाचा गर्नुपरेको थियो । चुनावी सभामार्फत उम्मेदवार, पार्टी र गठबन्धनले गर्नुपर्ने राजनीतिक र विकासको खाका भरतपुरको मञ्चबाट प्रस्तुत हुन सकेन ।

तुलनात्मकरूपमा मेयरकी प्रत्याशी रेनु दाहालले आफूले विगतमा गरेका काम र भावी योजनाबारे सभामा स्पष्ट धारणा राखिन् । समग्रतामा सत्ता गठबन्धनको भरतपुर सभा ‘गठबन्धन टुट्ने वा चुनाव हार्ने भयबाट ग्रस्त र असन्तुष्ट कांग्रेसजनलाई घुर्क्याउने अस्त्र’ मात्रै बन्न पुग्यो ।

काठमाडौं । आसन्न स्थानीय चुनावमा काठमाडौं महानगरपालिकाको मेयर पदको लागि सबै भन्दा पहिला उम्मेदवारी घोषणा गरेका व्यक्ती हुन् बालेन्द्र शाह उर्फ बालेन शाह ।

उम्मेदवारी घोषणा गरेसँगै सामाजिक सञ्जालमा उनले युवा पुस्ता माझ राम्रै चर्चा हासिल गरे । चर्चासँग सँगै उनका समर्थकहरू सामाजिक सञ्जालमा मात्र सीमित छन् ।

उनले फगत चर्चाका लागि मात्र उम्मेदवारी घोषणा गरेका हुन् उनी सँग चुनावी एजेण्डा छैनन भनेर आलोचना  हुँदै गयाे । यद्दपि जति मिति नजिकिँदै गयो त्यति उनको चर्चा चुलिँदै गयो ।

राम्रै गृहकार्य गरेर चुनावी मैदानमा उत्रिएका बालेनले डिजिटल सरकार देखी आइडिया हबसम्मका घोषणा अघि सार्दै हाल स्थानीय चुनावको मैदानमा उत्रिएका छन् ।

सामाजिक सञ्जाल र मिडियाको चरम सदुपयोग गर्न खप्पिस बालेनले आफ्ना एजेण्डाहरुको फेहरिस्त यसरी सुनाए कि अहिले उनको उम्मेदवारी मूलधारका राजनैतिक पार्टीका उम्मेदवारहरूको लागि पनि चिन्ताको विषय बनेको छ ।

नेपाल प्रेसको चुनाव केन्द्रित कार्यक्रम के छ माहोलमा आज हामी तिनै स्वतन्त्र उम्मेदवार बालेन शाहको चुनाव घरदैलो अभियानलाई नियाल्दै छौ र देखाउँदै छौ बालेन शाहको पक्षमा ‘के छ माहोल ?

भिडिओ : उमेश कार्की

भरतपुर । नेपाली कांग्रेसका सभापति शेरबहादुर देउवाले भरतपुरमा रेनु दाहाललाई जिताउनु कांग्रेसको कर्तव्य रहेको बताएका छन् ।

गठबन्धनको चुनावी सभालाई सम्बोधन गर्दै देउवाले गठबन्धनकै कारण आफू प्रधानमन्त्री भएको भन्दै गठबन्धनलाई अप्ठ्यारो पर्ने काम कांग्रेसले गर्न नहुने बताए ।

भरतपुर महानगरको मेयरका रूपमा रेनुले गरेका कामहरू प्रशंसनीय रहेको भन्दै देउवाले रेनुले हारे चितवनका जनता रिसाउने बताए ।

‘रेनुलाई जिताउनु हाम्रो कर्तव्य हो । यति राम्रो काम गर्ने मेयर नजिताए चितवनका जनताले के भन्लान् ? गठबन्धन टुटाउने षड्यन्त्रमा हामी लाग्नुहुँदैन । गठबन्धन टुट्यो भने कांग्रेसपनि खत्तम हुन्छ’, देउवाले भने ।

उनले रेनु एक्लै जित्न सक्ने उम्मेदवार समेत भएको दाबी गरे ।

भरतपुरको विकासका लागि रेनुले अघि सारेका योजना हेर्दा जनतामा पपुलर देखिएको देउवाको दाबी छ ।

रुपन्देही । गुल्मीमा दुईवटा नगरपालिका र १० वटा गाउँपालिका छन् ।

५ दलीय गठबन्धन रहेपनि यहाँको नेतृत्व कांग्रेस र माओवादीले मात्रै राखेपछि नेकपा एस र जसपा असन्तुष्ट छन् । तर पनि अधिकांशमा गठबन्धनको सहमति अनुसार नै उम्मेदारी परेको छ ।

कांग्रेसले ८ र माओवादी केन्द्रले ४ वटा स्थानीय तहमा प्रमुखका उम्मेदवार दिने सहमति गरिएपनि धुर्कोट र कालीगण्डकीमा माओवादीले एमालेसँग गठबन्धन गरेपछि अन्य पालिकामा पनि विश्वसनियतामा समस्या आएको हो ।

एमालेले रेसुङ्गा नगरपालिकाको प्रमुखमा गठबन्धनले कांग्रेसका जिल्ला सभापति खिलध्वज पन्थीलाई प्रमुख र अमृता कुँवरलाई उपप्रमुखमा अघि सारेको छ । नेकपा एमालेले राजेन्द्र पाण्डे प्रमुख र उपप्रमुखमा रीता पाण्डेलाई अघि सारेको छ । यहाँ माओवादी केन्द्रले वडा सदस्यमै चित्त बुझाएको छ भने नेकपा एसलाई ४ वटा वडा सदस्यमा मात्रै भागवण्डा परेको छ ।

मुसिकोट नगरपालिकामा एमालेले जीवन खरेललाई प्रमुख र गंगा श्रेष्ठलाई उपप्रमुखमा अघि सारेको छ । यहाँ गठबन्धनबाट कांग्रेसका हरिनारायण सापकोटा मेयर तथा नेकपा एसका श्रीराम महत उपमेयरमा उम्मेदार दिएका छन् । नेकपा एसको भागमा उपमेयर उम्मेदवार परेको छ भने माओवादीलाई पनि वडा छुट्याइएको छ ।

त्यस्तै कालीगण्डकी गाउँपालिका अध्यक्षका लागि रामजी ढकालले उम्मेदवारी दिएका छन् । यहाँ एमालेले उपाध्यक्ष माओवादीलाई दिएर गठबन्धन गरेको छ । माओवादीका मन्जुकुमारी दर्लामी सूर्य चिन्ह लिएर उम्मेदार बनेकी छन् ।

सत्यवती गाउँपालिकामा पनि अध्यक्षमा एमालेबाट टीकाराम पाण्डे र उपाध्यक्षमा निरमाया राहादी उम्मेदवार छन् ।

चन्द्रकोट गाउँपालिकाको अध्यक्षमा चेतन बस्नेत र उपाध्यक्षमा यस अगाडिकै राधिका अर्याल पुनः प्रतिस्पर्धामा छन् ।

रुरु क्षेत्र गाउँपालिकामा अध्यक्षका लागि हिमाल श्रेष्ठ र उपाध्यक्षका लागि मिना गौतमको उम्मेदवारी छ । गुल्मी दरबार गाउँपालिकामा पनि अध्यक्षमा कृष्ण भुसाल र उपाध्यक्षमा सुशीला पुन उम्मेदवार हुन् । इश्मा गाउँपालिका अध्यक्षमा हिरा एसीको उम्मेदवारी छ । मालिका गाउँपालिकामा यस अगाडिकै अध्यक्ष रितबहादुर थापा छन् भने उपाध्यक्षमा रनमाया पुनको उम्मेदवारी छ ।

मदाने गाउँपालिकामा एमालेबाट अध्यक्षका लागि प्रेम केसी र उपाध्यक्षमा यस अगाडिकै सरिता खड्काले उम्मेदवारी दर्ता गराएका छन् । मुसिकोटमा गठबन्धनबाट कांग्रेसका हरिनारायण सापकोटा र उपप्रमुखमा समाजवादीका नेता श्रीराम महत चुनावी मैदानमा छन् ।

मालिका गाउँपालिकामा गठबन्धनको तर्फबाट माओवादीबाट देवीराम अर्याल अध्यक्ष र उपाध्यक्षमा काग्रेसका उपेन्द्र अर्यालको उम्मेदवारी छ । कालिगण्डकी र छत्रकोट गाउँपालिकामा कांग्रेस र राष्ट्रिय जनमोर्चाबीच गठबन्धन छ । दुवै पालिकामा कांग्रेसले प्रमुख र जनमोर्चाले उपप्रमुख पाएका छन् ।

सत्यवती, चन्द्रकोट र रुरु क्षेत्र गाउँपालिका कांग्रेस र माओवादी केन्द्रबीच गठबन्धन भएको छ । सत्यवतीमा कांग्रेसले प्रमुख र माओवादीले उपप्रमुख पाएको हो । चन्द्रकोट र रुरु क्षेत्र गाउँपालिकामा माओवादीले प्रमुख र कांग्रेसले उपप्रमुख पाएको छ । चन्द्रकोटको अध्यक्षमा माओवादीका युवराज केसी र उपाध्यक्षमा कांग्रेसबाट विष्णुप्रसाद भण्डारीले उम्मेदवारी दर्ता गराएका हुन् ।

धुर्कोट गाउँपालिकामा कांग्रेस र एकीकृत समाजवादीबीच गठबन्धन भएको छ । कांग्रेसले प्रमुख र समाजवादीले उपप्रमुखमा उम्मेदवारी दिएका हुन् । यहाँ एमाले र माओवादीले गठबन्धन गरेका छन् । माओवादीले अध्यक्षमा भूपाल पोखरेल तथा एमालेले उपाध्यक्षमा सिता गिरीलाई उम्मेदार बनाएको छ ।

मदाने गाउँपालिकामा पनि कांग्रेस र माओवादी केन्द्रबीच गठबन्धन छ । कांग्रेसका महेन्द्रबहादुर कुँवर अध्यक्ष र माओवादीका बेगमबहादुर चन्द बोहरा उपाध्यक्षमा उम्मेदारी दिएका छन् । यहाँ जनमोर्चाका चन्द्रप्रसाद भट्टराईले पनि उपाध्यक्षमा उम्मेदारी दिएका छन् भने जसपाबाट दिनेशकुमार घर्तीले अध्यक्षमा उम्मेदारी दिएका छन् । नेकपा एस वडाध्यक्षसहित ४ वडा सदस्यमा खुम्चिएको छ ।

२०७४ को स्थानीय निर्वाचनमा १२ तहमध्ये ७ वटामा एमालेले नेतृत्व हात पारेको थियो । ५ स्थानीय तहमा नेपाली कांग्रेस र १ स्थानीय तहमा माओवादीले जितेको थियो । अधिकांश पालिकामा कांग्रेस माओवादीको गठबन्धन रहेको थियो ।

काठमाडौं । नेपाली कांग्रेसबाट काठमाडौं महानगरपालिकाको मेयर पदकी उम्मेदवार सिर्जना सिंहले काठमाडौंको व्यवस्थित विकास जरुरी रहेको बताएकी छन् ।

आज सामाजिक क्षेत्रमा सक्रिय महिलाहरूसँगको अन्तरक्रिया कार्यक्रम उनले भनिन् ‘काठमाडौं २५ वर्षअघि जस्तो थियो, अहिले पनि त्यस्तै छ । झन्‌झन् दयनीय अवस्था हुँदैछ । सबै अस्तव्यस्त छ, एकदमै धुलो धुँवा, नदीनाला सबै अस्तव्यस्त छ । सबै चिज बनाउँनुपर्ने छ । केही पनि बनेको छैन ।’

यसमा सबैको साथ चाहिने उनले बताइन् । ‘यसमा सबैको साथ चाहिन्छ । म एक्लो केही पनि होइन्, सबै सरोकारवालाहरूसँग सम्पर्क समन्वय गरेर काम गर्छु,’ उनले भनिन् ।

विकासे कामका लागि काठमाडौंमा बजेट अभाव पनि नरहेको उम्मेदवार सिंहले बताइन् । ठूलो बजेट भएको काठमाडौंका लागि योजनाबद्ध रूपमा काम गरे काम गर्नु ठूलो कुरा नभएको पनि उनले बताइन् ।

अन्तरक्रियाका क्रममा महिला सामाजिक अभियान्ताहरूले बालबालिकामैत्री संरचना, महिलामैत्री र सुरक्षित सहर निर्माण, सामाजिक कल्याणकारी राज्यसंरचना निर्माण लगायतका सवालमा महानगरबाट काम गर्नुपर्ने औल्याएका थिए ।

त्यसका लागि आफू सदैव छलफल गरेर काम गर्न तयार रहेको र आफैं सामाजिक अभियानमा सक्रिय व्यक्ति भएकाले जानकार रहेको उम्मेदवार सिंहले बताएकी थिइन् ।