Category: स्थानीय निर्वाचन–२०७९

काठमाडौं । काठमाडौं- २० मा नेपाली कांग्रेस विजयी भएको छ ।

कांग्रेस उम्मेदवार राजेन्द्र मानन्धर १४४५ मतका साथ विजयी भए ।

यस्तै एमाले उम्मेदवार हितकर वीर सिं ताम्राकारले ६६३ मत पाए ।

मेयरतर्फ भने एमाले उम्मेदवार केशव स्थापितले ७५३ मत पाए । कांग्रेस उम्मेदवार सिर्जना सिंहले ६६१ मत पाउदा बालेन साहले ५१६ मत, सुमन सायमीले ५२७ मत पाए ।

 

काठमाडौं । काठमाडौं महानगरपालिका अन्तरगत वडा नम्बर १७ को गणना जारी रहेको छ ।

अहिले सुरुवाती १०० मत गणना हुँदा स्वतन्त्र उम्मेदवार बालेन साह अगाडि रहेका छन् । उनले २७ मत पाएका छन् ।

अर्का स्वतन्त्र उम्मेदवार सुमन सायमीले १९ मत पाउँदा कांग्रेस उम्मेदवार सिर्जना सिंहले १५ मत पाएकी छन् । एमाले उम्मेदवार केशव स्थापितले १६ मत पाएका छन् ।

राप्रपालाई ४ र तराजुलाई १ मत परेको छ भने, ९ मत बदर भएको छ ।

अहिले वडा नम्बर १३ देखि २० सम्म नै गणना सुरु भएको छ । २१ को गणना सकिएको छ । वडा नम्बर १७ मा जारी छ । सबैभन्दा बढी मत खसेको वडा नम्बर १६ को २ ठाउँबाट गणना हुँदै छ । त्यहाँ १२३३६ मत खसेको थियो ।

काठमाडौं । काठमाडौं महानगरको वडा नम्बर १३ को जारी मतगणनामा स्वतन्त्र उम्मेदवार सबैभन्दा अगाडि छन्, तर बालेन होइन ।

आँखिझ्याल चुनावचिन्ह लिएर लडेका सुमन सायमीले यस वडामा अग्रता लिएका हुन् । यो सायमीको घर भएको वडा हो ।

हालसम्म ४ हजार ६ सय ९० मतको गणना भइसक्दा आँखिझ्यालले सर्वाधिक ११३२ भोट पाएको छ । दोस्रोमा अर्का स्वतन्त्र उम्मेदवार बालेन साह छन् । उनको लौरोमा १०६३ भोट आएको छ ।

एमाले र कांग्रेस यस वडामा क्रमशः तेस्रो र चौंथो स्थानमा छन् । एमालेका केशव स्थापितले ९०४ भोट ल्याएँदा कांग्रेसकी सिर्जना सिंहको ६८० भोट आएको छ ।

काठमाडौं । काठमाडौं महानगरको वडा नम्बर २१ मा नेकपा एमालेको प्यानल विजयी भएको छ ।

पूर्व मेयर विद्यासुन्दर शाक्य र हालकी उपमेयर उम्मेदवार सुनिता डंगोलले भोट हालेको वडा हो ।

यस वडामा ४४१४ मत खसेकोमा एमालेका वडाध्यक्ष उम्मेदवार चूडामणि बज्राचार्यले २००१ मत ल्याएर विजयी भएका छन् । कांग्रेसका मधुसूदन प्रधानले १५१३ मत प्राप्त गरे ।

मेयरमा सबैभन्दा बढी भोट एमालेलाई परेको छ ।

एमालेका केशव स्थापितले १६७२ मत प्राप्त गर्दा दोस्रो स्थानमा कांग्रेसकी सिर्जना श्रेष्ठले ११८५ भोट ल्याइन् ।

स्वतन्त्र उम्मेदवार बालेन साहलाई ६९५ भोट परेको छ ।

काठमाडौं । ललितपुर महानगरपालिकाको मेयरमा नेपाली कांग्रेस र उपमेयरमा नेकपा एमालेका उम्मेदवार विजयी भएका छन् ।

मतगणना अन्तिम चरणमा पुग्दा दुवै उम्मेदवारले विपक्षीभन्दा १० हजार बढीको अग्रता लिएर विजय सुनिश्चित गरेका हुन् ।

अन्तिम परिणाम आउनुअघि नै एमालेका मेयर उम्मेदवार हरिकृष्ण व्यञ्जनकारले गठबन्धनका उम्मेदवार चिरिबाबु महर्जनलाई बधाई दिएका छन् ।

त्यस्तै उपमेयरमा एमालेकी मञ्जली शाक्यको विजय औपचारिक घोषणा हुन बाँकी रहेको छ ।

काठमाडौं । वैशाख ३० गते स्थानीय तह निर्वाचन अन्तर्गत सुदूरपश्चिम प्रदेशमा कुल ३ हजार ८३६ पदका लागि निर्वाचन भएको थियो । जसमा ८८ तह र त्यसका ७३२ वडाका जनप्रतिनिधिहरूका लागि निर्वाचन भएको हो ।

जसमध्ये अहिलेसम्म बाजुराको बुढीगंगा नगरपालिकाबाहेक सबैको मतगणना सम्पन्न भएको छ । बुढीगंगामा १० वटा वडा छन्, त्यसैले त्यहाँका ५२ पदबाहेक ३ हजार ७८४ पदको अन्तिम नतिजा आइसकेको छ ।

नतिजा आएकामा प्रदेशका ८७ स्थानीय तहमध्ये ३३ नगरपालिकाका मेयर/उपमेयर र ५४ गाउँपालिकाका अध्यक्ष उपाध्यक्ष र ७२२ वडाका वडाध्यक्ष सहितका वडा सदस्यहरू रहेका छन् ।

जसअनुसार कांग्रेसले ४६ प्रतिशत पदसंख्या जित्दै प्रदेशको पहिलो दल बनेको छ । कांग्रेसले कुल १ हजार ७४३ मत जितेको छ । जसमा नगरपालिका मेयर १८ जना, गाउँपालिका अध्यक्ष २२ जना, नगर उपमेयर १६, गाउँपालिका उपाध्यक्ष ३० जना, वडाध्यक्ष ३१० जना, महिला सदस्य ३३१ जना, दलित महिला सदस्य ३२५ र खुला सदस्य ६९१ जना जितेका छन् । जसमध्ये दलित महिला सदस्य ४ जना निर्विरोध निर्वाचित भएका छन् ।

यस्तै नेकपा एमाले ३२.१८ प्रतिशत सहित प्रदेशको दोस्रो दल बनेको छ । एमालेबाट कुल १ हजार २१८ जना जनप्रतिनिधि निर्वाचित भएका छन् । जसमा गाउँपालिका अध्यक्ष १७ जना, नगरपालिकाका मेयर ८ जना, गाउँपालिका उपाध्यक्ष १४ जना, नगर उपमेयर ९ जना, वडाध्यक्ष २३९ जना, महिला सदस्य २३९ जना, दलित महिला सदस्य २३१ जना र खुला सदस्य ४६१ जना रहेका छन् । जसमध्ये महिला सदस्य २ र दलित महिला सदस्य ५ जना निर्विरोध निर्वाचित भएका हुन् ।

यस्तै नेकपा माओवादी केन्द्रबाट ४५९ जना जनप्रतिनिधि निर्वाचित भएर तेस्रो ठूलो दल भएको छ । जुन निर्वाचित १२ प्रतिशत हो । माओवादी केन्द्रबाट गाउँपालिका अध्यक्षमा ११ जना, नगरपालिकाको मेयरमा ३ जना, उपमेयर ४ जना, गाउँपालिका उपाध्यक्षमा ७ जना, वडाध्यक्षमा १०१ जना, महिला सदस्य ८४ जना, दलित महिला सदस्य ९० र खुला सदस्य १५९ जना निर्वाचित भएका छन् । दलित महिला सदस्यमा २ जना निर्विरोध निर्वाचित भएका हुन् ।

यस्तै निर्वाचित पदसंख्याका आधारमा नेकपा एकीकृत समाजवादी चौथो दल बनेको छ । तर नेतृत्व जितका आधारमा भने रेशम चौधरीको नागरिक उन्मुक्ति पार्टी चौथो बनेको छ ।

नेकपा एसका तर्फबाट कुल १५१ जना निर्वाचित भएका छन् । जुन कुल निर्वाचित पदसंख्याको ४ प्रतिशत हो । नेकपा एसबाट नगरपालिकाको मेयर १ जना, उपमेयरमा २ जना, गाउँपालिका अध्यक्षमा १ जना, उपाध्यक्ष १ जना, वडाध्यक्ष २८ जना, महिला सदस्य ३१(निर्विरोध १), दलित महिला सदस्य २८ जना र खुला सदस्य ५९ जना निर्वाचित भएका छन् ।

नागरिक उन्मुक्ति पार्टीबाट कुल निर्वाचित ९९ जना जनप्रतिनिधि निर्वाचित भए । जुन कुल निर्वाचित संख्याको ३ प्रतिशत हुन आउँछ । जसमा सो पार्टीबाट नगरपालिकाको मेयर २ जना, उपमेयरमा १ जना, गाउँपालिकाको अध्यक्षमा २ जना, उपाध्यक्ष २ जना, वडाध्यक्ष १४ जना, महिला सदस्य १९ जना, दलित महिला सदस्य १८ जना र खुला सदस्य ४१ जना निर्वाचित भएका छन् ।

यस्तै राष्ट्रिय प्रजातन्त्र पार्टीबाट २२ जना जनप्रतिनिधि निर्वाचित भएका छन् । जसमा वडाध्यक्ष ५ जना, महिला सदस्य ४ जना, दलित महिला सदस्य ४ जना र खुला सदस्य ९ जना रहेका छन् । राप्रपाले जितेको हिस्सा कुल निर्वाचित संख्याको ०.५८ प्रतिशत हुन आउँछ ।

सुदूरपश्चिम प्रदेशमा जनता समाजवादी पार्टीले ९ जना जनप्रतिनिधि जितेको छ । जसमा वडाध्यक्ष २ जना, महिला सदस्य ३, दलित महिला सदस्य २ र खुला सदस्य २ जना निर्वाचित भएका छन् । जसपाको हिस्सा ०.२ प्रतिशत मात्रै हो ।

यस्तै प्रदेशमा स्वतन्त्रबाट २ प्रतिशत जनप्रतिनिधि निर्वाचित भएका छन् । जसको संख्या ७१ जना रहेको छ । यसमा नगरपालिकाको मेयरमा १ जना, उपमेयरमा १ जना, गाउँपालिका अध्यक्ष १ जना, वडाध्यक्ष २३ जना, महिला सदस्य १२ जना, दलित महिला सदस्य १२ र खुला सदस्य २१ जना निर्वाचित भएका छन् ।

विस्तृत विवरण

कुल निर्वाचित हुने जनप्रतिनिधि: ३८३६ (५२ जनाको नतिजा आउन बाँकी)

स्थानीय तह ८८ (३४ नगरपालिका, ५४ गाउँपालिका)

गणना सम्पन्न ८७ तह (एक नगर बाँकी)

कुल वडा संख्या(वडाध्यक्ष) ७३२ (७२२ को गणना सम्पन्न, १० मा बाँकी)

कुल निर्वाचित हुने वडा सदस्य संख्या २९२८ जना (४० जनाको नतिजा आउन बाँकी)

कांग्रेसबाट कुल निर्वाचित: १७४३ जना

मेयर १८ जना, अध्यक्ष २२

उपमेयर १६, उपाध्यक्ष ३०

वडाध्यक्ष ३१०

महिला सदस्य ३३१

दलित महिला सदस्य ३२१(निर्विरोध ४)

खुला सदस्य ६९१

नेकपा एमालेबाट कुल निर्वाचित: १२१८ जना

अध्यक्ष १७ जना, मेयर ८ जना

उपाध्यक्ष १४, उपमेयर ९

वडाध्यक्ष २३९

महिला सदस्य २३७ (निर्विरोध २)

दलित महिला सदस्य २२६(निर्विरोध ५)

खुला सदस्य ४६१

माओवादी केन्द्र कुल निर्वाचित संख्याः ४५९ जना

अध्यक्ष ११ जना, मेयर ३ जना

उपमेयर ४ जना, उपाध्यक्ष ७ जना

वडाध्यक्ष १०१ जना

महिला सदस्य ८४

दलित महिला सदस्य ८८ (निर्विरोध २)

खुला सदस्य १५९

नागरिक उन्मुक्ति पार्टीबाट कुल निर्वाचित: ९९ जना

मेयर २ जना, अध्यक्ष २ जना

उपमेयर १ जना, उपाध्यक्ष २ जना

वडाध्यक्ष १४ जना

महिला सदस्य १९

दलित महिला सदस्य १८

खुला सदस्य ४१

नेकपा एकीकृतबाट कुल निर्वाचित: १५१ जना

मेयर १ जना, अध्यक्ष १ जना

उपमेयर २ जना, उपाध्यक्ष १ जना

वडाध्यक्ष २८ जना

महिला सदस्य ३० (निर्विरोध १)

दलित महिला सदस्य २८

खुला सदस्य ५९

राष्ट्रिय प्रजातन्त्र पार्टीबाट निर्वाचित: २२ जना

वडाध्यक्ष ५ जना

महिला सदस्य ४, दलित महिला सदस्य ४, सदस्य ९

जनता समाजवादीबाट निर्वाचित: ९ जना

वडाध्यक्ष २ जना

महिला सदस्य ३, दलित महिला सदस्य २, खुला सदस्य २

स्वतन्त्रबाट निर्वाचित: ७१ जना

मेयर १ जना, अध्यक्ष १ जना

उपमेयर १ जना

वडाध्यक्ष २३ जना

महिला सदस्य १२ जना

दलित महिला सदस्य १२

खुला सदस्य २१

काठमाडौं । नेकपा एमालेले यसअघि २० हजारको मतान्तरमा मेयर जितेको काठमाडौं महानगरपालिकामा यसपटक उपमेयरमा त्योभन्दा बढी मतान्तरले जित्ने निश्चित भएको छ ।

तर मेयरमा भने एमालेका उम्मेदवार केशव स्थापितले एमालेकै उपमेयर उम्मेदवारभन्दा २० हजार मत कम पाएका छन् ।

एमालेको उपमेयरले अग्रता लिएको र एमालेले वडाध्यक्षका जितेका अधिकांश वडामा मेयरमा भने लौरोमा मत गएपछि स्थापित एमालेका करीव आधा मतमात्र पाएर पराजयको नजिक छन् । उपमेयरमा एमालेकी सुनिता डंगोलले मंगलवार साँझ ५ बजेसम्म गठबन्धनका उम्मेदवार रामेश्वर श्रेष्ठलाई करीव ३७ हजार मतान्तरले पछि पारेकी छन् ।

पछिल्लो गणना अनुसार एमाले उम्मेदवार डंगोलले ५४ हजार ९८१ मत पाउँदा गठबन्धनबाट नेकपा एकीकृत समाजवादीका रामेश्वर श्रेष्ठले १८ हजार ६५५ मत पाएका छन् । यो भनेको तीन दोब्बरले सुनिताको अग्रता हो ।

त्यस्तै उपमेयरमा चौथो मत आँखी झ्यालले पाएको छ । आँखी झ्यालको स्वतन्त्र उम्मेदवार विद्या महर्जन श्रेष्ठले ९ हजार ३८२ मत पाउँदा राप्रपाकी बिनिता मगैयाले ९ हजार ७५२ मत पाएर तेस्रो स्थानमा छिन् ।

त्यस्तै लौरो चिन्ह लिएका बेन्जिसिंह महर्जनले ५ हजार २३० र विवेकशील साझीकी कृति कंसाकारले २१५८ मत पाएकी छन् । उपमेयरमा ३० जना उम्मेदवार रहेकोमा एक सय मत कटाउने १० जनामात्र छन् ।

एमाले काठमाडौं जिल्ला अध्यक्ष दिपक निरौलाले मेयरमा एमालेको मत स्वतन्त्र उम्मेदवार बालेन शाहले आधाभन्दा बढी लगेकाले आफूहरुले सोचेजस्तो नतिजा नआएको बताए । तर उपमेयरमा सुनिता डंगोलले पाएको मत नै एमालेको रहेको र वडाध्यक्ष तथा उपमेयरको मत हेर्दा त्यो पुृष्टि हुने उनको दावी छ ।

यस्तो छ काठमाडौंको उपमेयरमा पछिल्लो अपडेट

नेकपा एमाले–५४९८१

गठबन्धन–१८६५५

आँखी झ्याल–९३८२

राप्रपा–९७६२

लौरो–५२३०

विवेकशील साझा–२१५८

नेमकिपा–१४७

विपी कांग्रेस–११८

काठमाडौं । निर्वाचन आयोगले बाजुराको बुढीगंगा नगरपालिकाको निर्वाचन अधिकृत हेरफेर गरेको छ ।

नगरपालिकाका विभिन्न ६ वटा मतदान केन्द्रमा मृतकको नाममा समेत मतदान भएको र ९९ दशमलव ५ प्रतिशतसम्म भोट खसेको देखिएपछि पुरानोलाई हटाएर नयाँ अधिकृत तोकिएको प्रमुख निर्वाचन आयुक्त दिनेश थपलियाले बताए ।

आयोगको लगातार दुई दिन बसेको बैठकले बुढीगंगाका ती मतदान केन्द्रमा पुनः मतदान गर्ने वा गणना गर्ने भन्ने टुंगो लगाउन सकेको छैन ।

आयोगले बुढीगंगा नगरपालिकाका निर्वाचन अधिकृत निरञ्जन स्थापितलाई हटाएर उनको ठाउँमा जिल्ला अदालतका श्रेष्तेदार पुष्पराज पाण्डेलाई खटाएको छ ।

पाण्डेले ती मतदान केन्द्रमा खसेको मतको बारेमा मौखिक प्रतिवेदन दिएपछि आयोग निर्णयमा पुग्ने थपलियाले बताए । उनका अनुसार एउटा मतदान केन्द्रमा १७०९ मतदाता रहेकामा १६९९ मत खसेको छ । कांग्रेस र एमालेले एक अर्कामाथि बुथ कब्जाको आरोप लगाएका छन् ।

आयोगले बुढीगंगाको सन्दर्भमा कानूनी र प्राविधिक कुरा मात्र नहेरेर निर्वाचनको सैद्धान्तिक पक्षबाट निर्णय लिनुपर्ने अवस्था आएको थपलियाले बताए । उनले ९९ प्रतिशतसम्म मत खसेको ठाउँमा मतगणना गरेर भोलिका निर्वाचनमा यस्तै अभ्यासलाई स्थापित गर्न नहुनेमा आफूहरू सचेत रहेको बताए ।

थपलियाले भने–निर्वाचनमा खटिएका सुरक्षाकर्मी र कर्मचारीलाई पनि एउटा सबक सिकाउनुपर्छ । यसलाई नजिरका रूपमा स्थापित गर्ने कि नगर्ने भन्ने पनि छ । मरेका मान्छ पुष्पक विमान चढेर आए,भोट हालेर फेरि स्वर्गमै फर्किए भनेर भोलि तपाईँहरूले मिडियामा समाचार लेख्ने ठाउँ पनि दिनु भएन ।

त्यसैले पुनः मतदान वा गणना जे गर्ने हो विवादित सबै मतदान केन्द्रको सन्दर्भमा एउटै निर्णय गर्छौँ ।

कांग्रेसले पुनः मतदानको माग गर्दै आएको छ भने एमालेले गणनाको माग गरेको छ ।

काठमाडौं । स्थानीय तह निर्वाचनका लागि लागू भएको निर्वाचन आचारसंहिता आजदेखि अन्त्य भएको छ । गत चैत २५ गतेदेखि मुलुकभर लागू भएको आचारसंहिता आजदेखि लागू नहुने निर्वाचन आयोगले विज्ञप्तिमार्फत जानकारी गराएको हो ।

आयोगको परामर्शमा गत माघ १० गते बसेको मन्त्रिपरिषद बैठकले स्थानीय तह सदस्य निर्वाचन वैशाख ३० गते शुक्रबार गर्ने गरी मिति तोकेकोमा निर्वाचन सम्पन्न भएर अन्तिम परिणाम आउने क्रम रहेको निर्वाचन आयोगका प्रवक्ता सहसचिव शालिग्राम शर्माले जानकारी दिए ।

उनका अनुसार निर्वाचन आयोग ऐन, २०७३ को दफा २२ ले दिएको अधिकार प्रयोग गर्दै निर्वाचन आयोगले निर्वाचन आचारसंहिता, २०७८ को दफा १ को उपदफा २ बमोजिम निर्वाचन आचारसंहिता लागू गरेको थियो ।

जनकपुरधाम । मधेस प्रदेशको एक मात्र महानगरपालिका वीरगञ्जका नवनिर्वाचित मेयर राजेशमान सिंहलाई चाँदीको मुकुटले स्वागत गरिएको छ ।

जनता समाजवादी पार्टी (जसपा) का नेता तथा संघीय सांसद प्रदीप यादवले नवनिर्वाचित मेयर सिंहलाई चाँदीको मुकुट लगाएर जितको शुभकामना दिएका हुन् ।

चाँदीको मुकुट लगाएको तस्बिर सामाजिक सञ्जालमा सार्वजनिक गर्दै सांसद यादवले लेखेका छन्- हम साथ लडे थे, साथ जिते है । हम साथ रगेंगे, साथ चलेंगे ।

जसपाका सिंह सत्ता गठबन्धनको उम्मेदवार बनेर मेयरमा विजयी प्राप्त गरेका छन् ।

उनले निवर्तमान मेयर तथा नेकपा एमालेका उम्मेदवार विजय सरावगीलाई २२ हजार ५४४ मतले पराजित गरेका हुन् ।

रुपन्देही । नेकपा एमालेका महासचिव तथा लुम्बिनीमा प्रमुख प्रतिपक्ष दलका नेता शंकर पोखरेलले सरकारमै सहभागी दलका कार्यकर्ताले स्थानीय तहको निर्वाचनमा अशान्ति मच्चाएको बताएका छन् ।

लुम्बिनी प्रदेश सभाको दसौँ बैठकको दोस्रो बैठकमा विशेष समयमा बोल्दै प्रमुख प्रतिपक्ष दलका नेता तथा निवर्तमान मुख्यमन्त्री शंकर पोखरेलले सरकारमै रहेका दलले गरेको यस्तो गलत राजनीतिक चरित्रले निर्वाचन पद्धतिमै शंका उत्पन्न गराएको बताएका छन् ।

‘यस्तो अवाञ्छित क्रियाकलापले लोकतान्त्रिक संस्कारलाई संकटमा पार्दछ, यो विधि कसैका लागि हित हुनेछैन’ उनले भने, ‘राज्यविरुद्धका शक्ति विरुद्ध पो एकजुट हुने हो, बलियो राज्यशक्ति निर्माणका लागि पो एकजुट हुने हो यहाँ त सत्तामा जानका लागि गठबन्धन भएको छ, यसले हामीलाई कहाँ पुराउँछ ?’

पोखरेलले स्थानीय तहको निर्वाचनको परिणामलाई जनमतको हिसाबले पार्टीले स्विकार्नुको कुनै विकल्प नभएको तर निर्वाचनका लागि सत्तारुढ दल तथा सरकारबाट भएका गतिविधि लज्जास्पद भएको बताएका थिए ।

‘कतिपय स्थानमा त शान्तिपूर्ण भयो तर कतिपय स्थानमा नागरिकले त्रासमा मत दिनुपर्‍यो, अनाहकमा ज्यान गुमाउनुपर्‍यो, अंगभंग हुनुपर्‍यो, यो सबै सत्तारुढ दलकै कार्यकर्ताबाट भएको छ’, पोखरेलले भने ।

स्थानीय तहको निर्वाचनका लागि एमाले विरुद्ध बनेको गठबन्धनलाई अपवित्र भन्दै एमाले नेता पोखरेलले नीति, विचार र सिद्धान्त नमिल्ने दलहरू एमालेलाई हराउनकै लागि गरेको र सत्ता स्वार्थका लागि मात्रै भएकाले दिगो नहुने बताए ।

पोखरेलले नीति तथा कार्यक्रम र बजेट तयारीको छलफल तथा प्रदेश सभाको समीक्षाकै समय आएकाले सदन सुचारु गर्ने निर्णय गरेको बताए ।

एमालेले उठाएका मागप्रति सत्ता पक्षले कुनै ध्यान नदिएको र गतिरोध खोल्न जिम्मेवार नभएको आरोप लगाउँदै पोखरेलले जनताप्रति उत्तरदायी बनेर प्रदेश र देशमा आएको आर्थिक संकट समाधानका लागि सदन खोलेको बताएका थिए ।

नेता पोखरेलले गठबन्धन सरकारले अघिल्लो सरकारले सदनबाट पास गरेको नीति तथा कार्यक्रम र त्यही आधारमा बनाएको बजेटलाई प्रतिस्थापन गरेर चोर बाटोबाट बजेट ल्याएको आरोप लगाएका थिए ।

‘कुनै विधिबाट ल्याएको नीति तथा कार्यक्रम र बजेट केबल स्वार्थमा भरमा हटाइयो, यसले कसैलाई फाइदा गरेको छैन, अहिले प्रदेशका विकासमा कस्तो प्रभाव परेको छ सबैलाई प्रस्ट हुन्छ, यस्तो गलत राजनीतिक संस्कारले सिंगो व्यवस्थामाथि नै प्रश्न उठाएको छ’, पोखरेलले भने ।

‘सत्ता पक्षले कुनै जिम्मेवारी नै लिन खोजेन, प्रदेशवासीका समस्या झन् थपिए, राजनीतिक संस्कारका कुनै काम भएनन्, तर आर्थिक संकट चुलिँदै गयो यस्तो अवस्थामा हामीले पनि वास्ता नगरी बस्न भएन भन्ने निष्कर्षका साथ सदन सुचारु गरेका हौँ’, पोखरेलले भने ।

आफ्नो दलले कारबाही सिफारिस गरेका दुई सांसदलाई कारबाही नगरी सभामुखले गलत गरेको उल्लेख गर्दै पोखरेलले निष्पक्ष भूमिकाका लागि प्रदेश सभा र सभामुखलाई आग्रह गरेका थिए ।

११ महिनादेखिको अवरोध हट्यो

साउन १ गतेदेखि अवरुद्ध लुम्बिनी प्रदेशसभाको अवरोध हटेको छ । प्रमुख प्रतिपक्ष दल नेकपा एमालेले गरेको अवरोध हटाएपछि लामो समयदेखि अवरुद्ध सदनका काम सुचारु भएका छन् ।

साउन २८ गते एमाले नेता शंकर पोखरेल नेतृत्वको सरकारलाई विस्थापन गर्दै लुम्बिनीमा पाँच दलको सरकार बनेको थियो । त्यो गठबन्धनमा एमालेको चुनाव चिन्हबाट निर्वाचन जितेका सांसद विमला वली र अजय शाहीसमेत सहभागी भएपछि उनीहरूलाई हटाउन माग गर्दै एमालेले सदन बहिस्कार गर्दै आएको थियो ।

मङ्गलवारदेखि संसद्को नियमित प्रक्रिया सुरु भएको प्रमुख प्रतिपक्ष दल एमालेका प्रमुख सचेतक भूमिश्वर ढकालले जानकारी दिए ।

ढकालले बजेट, नीति तथा कार्यक्रमको तयारीलगायतका महत्त्वपूर्ण विषयमा सदनमा छलफल गर्नुपर्ने भएकाले सदनमा सुचारु गरेको बताए ।

प्रदेशसभाको १० औँ अधिवेशनको दोस्रो बैठकमा आन्तरिक मामिला तथा सञ्चारमन्त्री तिलकराम शर्माले प्रदेश प्रहरी सेवा सम्बन्धमा व्यवस्था गर्न बनेको विधेयक र सञ्चारमाध्यम व्यवस्था गर्न बनेको सदनमा विधेयक पेस गरेका छन् । सदन बुधवार बस्ने गरी स्थगित भएको छ ।