Category: स्थानीय निर्वाचन–२०७९

चितवन । भरतपुर महानगरपालिकाको वडा नम्बर ३ मा जारी मतगणनामा स्वतन्त्र उम्मेदवार जगन्नाथ पौडेलले मत अनुपात बढाएपछि मेयरमा गठबन्धन उम्मेदवार रेणु दाहाल पछि परेकी छिन् ।

१ र २ को गणनामा ३ मतले अग्रता लिएकी रेणु वडा नम्बर ३ को गणना जारी रहँदा ३३ मतले पछि परेकी छिन् । एमालेका विजय सुवेदीले ३ हजार ८ सय ३८ मतसहित अग्रता लिएका छन् । रेणुले ३ हजार ८ सय ५ मत पाएकी छिन् ।

स्वतन्त्र उम्मेदवार पौडेलले अहिलेसम्म १ हजार ५ सय ११ मत ल्याएका छन् । वडा नम्बर ३ मा मात्रै उनले ५ सय ८७ मत ल्याइसकेका छन् । सो वडा पौडेलका प्रस्तावक कृष्णलाल सापकोटाको समेत वडा हो ।

नेपाली कांग्रेसको गढ मानिने सो वडाको अध्यक्षमा भने एमालेले फराकिलो अग्रता लिएको छ । एमालेका विकास थापाले वडा अध्यक्षमा १ हजार ४ सय ९५ मत ल्याउँदा कांग्रेसका भरत लामिछानेले ९ सय ५२ मत पाएका छन् ।

उपमेयरमा भने कांग्रेस उम्मेदवार चित्रसेन अधिकारीको अग्रता कायमै छ । उनले ४ हजार ३ सय ५२ मत ल्याउँदा राप्रपाकी हिमला गुरुङले २ हजार ९ सय ९८ मत ल्याएकी छिन् ।

सर्लाही । सर्लाहीको धनकौल गाउँपालिकाको अध्यक्षमा नेपाली कांग्रेसका रामआश्रय साह विजयी भएका छन् । उनले ४ हजार ४ सय ७७ मत प्राप्त गरे । निकटतम प्रतिस्पर्धी नेकपा माओवादी केन्द्रका फकिरा महतोले ३ हजार ३ सय ७८ मत ल्याए ।

उपाध्यक्षमा कांग्रेसकै अकली सहनी विजयी भएकी छिन् । उनले ४ हजार ५ सय ४ मत ल्याउँदा माओवादीकी निलम कुमारीदेवी सहनीले ३ हजार २ सय २५ मत प्राप्त गरिन् ।

दिक्तेल । खोटाङको बराहपोखरी गाउँपालिका अध्यक्ष-उपाध्यक्षमा गठबन्धनको जित भएको छ ।

गठबन्धनबाट उम्मेदवार बनेका नेपाली कांग्रेसका शालिकराम बन्जरा ८५१ मतान्तरका साथ विजयी भएका छन् । उनले ३१८१ मत ल्याउँदा प्रतिद्वन्द्वी नेकपा एमालेकी गोमा मगरले २३३० ल्याइन् ।

उपाध्यक्षमा गठबन्धनबाटै उम्मेदवार बनेका नेकपा एसका भुवलराज राई २६९४ मत ल्याएर विजयी भए । प्रतिद्वन्द्वी नेकपा एमालेका जिवनकुमार राईले २२९५ मत ल्याए ।

दिक्तेल । खोटाङको ऐसेलुखर्क गाउँपालिका अध्यक्षमा नेकपा एमालेका गिरेन्द्रबहादुर राई विजयी भएका छन् । उनले गठबन्धनतर्फका माओवादी उम्मेदवार श्रीबहादुर राईलाई १२६ मतले पराजित गरे ।

गिरेन्द्रले २६०६ मत ल्याउँदा माओवादीका श्रीबहादुरले २४८० मत प्राप्त गरेको निर्वाचन अधिकृत रमाकान्त यादवले जानकारी दिए ।

कांग्रेसका ‘बागी’ उम्मेदवार सन्तवीर तामाङले १००७ मत प्राप्त गरेका छन् । गाउँपालिका सभापतिसमेत रहेका तामाङ बागी उठ्दा एमालेलाई सहज भएको हो ।

उपाध्यक्षमा गठबन्धनका उम्मेदवार नेपाली कांग्रेसका राजेश राजभण्डारी विजयी भए । उनले ३१४६ मत ल्याउँदा प्रतिद्वन्द्वी एमालेकी पुष्पकला भुजेलले २५९५ मत प्राप्त गरेकी छन् । भुजेल निवर्तमान उपाध्यक्ष हुन् ।

भक्तपुर । भक्तपुरका चार नगरपालिकाका ३८ वडामध्ये सोमबार बिहानसम्म १६ वटा वडाको अन्तिम नतिजा सार्वजनिक भएको छ । जसमा नेपाल मजदुर किसान पार्टीले ८ वटा वडामा जित दर्ता गर्दा कांग्रेसले ६ र एमालेले २ वडा आफ्नो पक्षमा पारेका छन् ।

नेमकिपाले भक्तपुर नपा वडा नं १, २, ३, ४, ५, ६, ७ र ८ वडा जितेको हो । नेमकिपाबाट यी वडाहरुमा क्रमशः श्यामकृष्ण खत्री, हरिप्रसाद बासुकला, राजकृष्ण गोरा, उपेन्द्र सुवाल, योगेन्द्रमान बिजुक्छे, हरिराम सुवाल, उकेश कवां र कृष्णप्रसाद कोजू वडा अध्यक्षमा विजयी भएका हुन् ।

त्यस्तै नेपाली कांग्रेसले मध्यपुर थिमि नपाको १, २ र ३, चाँगुनारायण नपाको १ र २ तथा सूर्यविनायक नपाको २ नम्बर वडामा अध्यक्ष जितेको हो ।

मध्यपुर थिमि १ मा बाबुकाजी डंगोल, २ मा श्रीकृष्ण श्रेष्ठ र ३ वडामा कृष्णहरि आचार्य वडा अध्यक्ष निर्वाचित भए । चाँगुनारायण नपा १ मा सिजन कार्की र २ मा सोम प्रधान वडा अध्यक्ष विजयी भए । सूर्यविनायक नपा २ मा प्रदीप कार्की वडा अध्यक्षमा निर्वाचित भए ।

एमालेले सूर्यविनायक १ र चाँगुनारायण ३ मा वडा अध्यक्ष जितेको हो । सूर्यविनायक १ मा सानुकाजी कायस्थ र चाँगुनारायण ३ मा श्यामसुन्दर धिमाल वडा अध्यक्षमा निर्वाचित भएका हुन् ।

भक्तपुरमा भक्तपुर र सूर्यविनायक नपामा १०–१० तथा मध्यपुर र चाँगुनारायणमा ९–९ वडा गरी ३८ वडा रहेका छन् ।

काठमाडौं । काठमाडौं महानगरपालिकाको मेयरमा स्वतन्त्र उम्मेदवार बालेन शाहले करिब तीन हजार मतान्तरले एमालेका उम्मेदवार केशव स्थापितलाई पछि पारेका छन् । पछिल्लो परिणाम अनुसार बानेन शाहले ६२०७ मत पाएका छन् भने स्थापितले ३२४३ मत पाए ।

त्यस्तै नेपाली कांग्रेसकी उम्मेदवार सिर्जना सिंहले २८८५ मत पाइन् ।

अहिलेसम्म काठमाडौंको वडा नम्बर १, २, ३, ४, ५, ३१ र ३२ नम्बर वडाको मत गणना भयो ।

काठमाडौं । ललितपुर महानगरपालिकामा करिब ५ हजार मत गणना हुँदा मेयरका प्रत्यासी चिरीबाबु महर्जन २ हजार ७ सय ५१ मत प्राप्त गरेका छन्।

४ हजार ९ सय २६ मत गणना हुँदा गठबन्धनका उम्मेदवार महर्जनले निकटतम् प्रतिद्वन्द्वीभन्दा करिब दोब्बर मत ल्याएका हुन् । प्रतिस्पर्धी नेकपा एमालेका हरिकृष्ण ब्यन्जनकारले एक हजार ८६ मत प्राप्त गरेका छन्।

महानगरको उपमेयरमा एमालेकी मन्जली शाक्य बज्राचार्यले एक हजार २ सय ५५ र नेकपा माओवादी केन्द्रका बाबुराज बज्राचार्यले ८ सय ९२ मत ल्याएका छन् । अहिले २, ३ र ४ नम्बर वडाको मतगणना भइरहेको छ ।

काठमाडौं । निर्वाचन आयोगले बिहान ६ बजेसम्म अपडेट गरेको तथ्यांकअनुसार नेकपा एमाले ३१ स्थानमा प्रमुख एवम् अध्यक्ष जितेर पहिलो स्थानमा छ भने २६ स्थान जितेर कांग्रेस दोस्रो स्थानमा छ ।

माओवादी केन्द्रले २० ठाउँमा प्रमुख जितेको छ भने नेकपा एसले दुई ठाउँमा जितेको छ ।

कुन दलले कहाँ कहाँ जिते ? हेर्नुहोस् सूची :