Category: स्थानीय निर्वाचन–२०७९

जनकपुरधाम । डा. सीके राउत नेतृत्वको जनमत पार्टीले सप्तरीको बलान बिहुल गाउँपालिकाको अध्यक्ष र उपाध्यक्ष नै जितेको छ ।

यहाँको अध्यक्षमा जनमतका खेमचन्द्र यादव विजयी भएका छन् । उनले २ हजार ९९४ मत ल्याएर विजयी भएको निर्वाचन अधिकृतको कार्यालयले जनाएको छ । यादव पूर्वमाओवादी हुन् ।

उनका निकटम प्रतिस्पर्धी नविन कुमार झा २ हजार २५७ मतमा समेटिए ।

माओवादी अध्यक्षका उम्मेदवार पविता कुमारी यादवले मात्र २८८ मत ल्याइन् ।

यस्तै उपाध्यक्षमा जनमत पार्टीकै रेणु यादव २ हजार ६९० मत ल्याएर विजयी भएकी छन् । उनका निकटम प्रतिस्पर्धी नेपाली कांग्रेसकी आशा देवी मण्डलले २ हजार ३०४ मत ल्याइन् ।

सुर्खेत । सुर्खेतको भेरिगंगा नगरपालिकामा नेकपा एमालेले गठबन्धनलाई पराजित गरेको छ । गठबन्धनलाई एमालेका यज्ञप्रसाद ढकालले २२५ मतले नेपाली काँग्रेसका रामबहादुर सिंहलाई पराजित गरेका हुन् ।

उपप्रमुखमा पनि एमालेका धनसरा बोहरा विजयी भएकी छिन् भने नेकपा माओवादीका नन्दबहादुर कार्की पराजित भएका छन् ।

काठमाडौं । नेकपा एमाले र नेपाली गोविन्दराज जोशी समूहबीच चुनावी तालमेल भएको तनहुँको व्यास नगरपालिकामा नेपाली कांग्रेसका उम्मेदवार पछाडि परेका छन् ।

पछिल्लो मतपरिणाम अनुसार व्यासमा एमाले र जोशी समूहको प्यानलबाट कैची चिह्नमा चुनाव लडेका मेयर उम्मेदवार दीपकराज जोशीले १०२२ मत ल्याएका छन् भने नेपाली कांग्रेसका बैकुण्ठ न्यौपानेले ६५३ मत पाएका छन् ।

त्यस्तै उपमेयरमा पनि गठबन्धनका तर्फबाट उम्मेदवार बनेकी एमालेकी बशुन्धारा घर्ती अगाडि छन् । धर्तीले ७८९ मत पाएकी छन् भने कांग्रेसकी इन्दिरा दरैले ७६१ मत प्राप्त गरेकी छन् ।

यहाँ अहिलेसम्म १९७५ मत गणना भयो ।

सप्तरी । सप्तरीको विष्णुपुर गाउँपालिकाको अध्यक्षमा जनता समाजवादी पार्टी (जसपा)का उमेशप्रसाद यादव निर्वाचित भएका छन् । उनले ३ हजार १ सय ६४ मत प्राप्त गरी नेपाली कांग्रेसका उम्मेदवार लिलाम्बर यादवलाई पराजित गरेका हुन्।

कांग्रेसका यादवले २ हजार ८ सय ११ मत प्राप्त गरे । उपाध्यक्षमा नेपाली कांग्रेसकी रेणुकुमारी यादव निर्वाचित भएकी छन् । उनले ३ हजार ३ सय ६५ मत प्राप्त गरिन् । उनकी निकटतम् प्रतिस्पर्धी जसपाकी उषाकुमारी साहले ३ हजार ४६ मत प्राप्त गरेकी छिन् ।

खोटाङ । स्थानीय तहको निर्वाचनमा खोटाङमा तीन निवर्तमान प्रमुख र ६ उपप्रमुख पराजित भएका छन् । २०७४ सालको स्थानीय तहको निर्वाचनबाट प्रमुख, उपप्रमुखमा निर्वाचित भएका जनप्रतिनिधि पुनः यथास्थानमा दोहोरिने र कतिपयको माथिल्लो पदमा फड्को मार्ने प्रयास असफल भएको हो ।

यथास्थानमा दोहोरिनका लागि चुनावी मैदानमा उत्रिएका केपिलासगढी गाउँपालिकाका निवर्तमान अध्यक्ष कृष्णकुमार राई, जन्तेढुंगा गाउँपालिकाका निवर्तमान अध्यक्ष शंखरबहादुर राई र साकेला गाउँपालिकाका निवर्तमान अध्यक्ष अर्जुनकुमार खड्का पराजित भएका छन् ।

एमालेका शंखरबहादुर गठबन्धनबाट उठेका माओवादी केन्द्रकी अरुणादेवी राईबाट पराजित भएका छन् । माओवादी केन्द्रका अर्जुनकुमार कांग्रेसका रविप्रकाश राईभन्दा पछि परेका हुन् । एमालेका कृष्णकुमार राई कांग्रेसबाट बिजयी भएका समिर राईका निकटतम प्रतिद्वन्द्वी नेकपा एकीकृत समाजवादीका माइतीराज राईभन्दा पछि परेका छन् ।

एमालेकी विणादेवी राईको दिक्तेल रुपाकोट मझुवागढी नगरपालिकाको उपमेयरमा दोहोरिने प्रयास असफल भएको छ । उनी गठबन्धन (माओवादी केन्द्र) का विसन राईसँग पराजित भएकी हुन् ।

खोटेहाङ गाउँपालिकाका निवर्तमान उपाध्यक्ष कविता राई र बराहपोखरी गाउँपालिकाको निवर्तमान उपाध्यक्ष गोमा मगर अध्यक्षमा पराजित भएकी छन् । कविता गठबन्धन (माओवादी केन्द्र)का उदिमबहादुर राई र गोमा गठबन्धन (कांग्रेस)का शालिकराम बञ्जराभन्दा पछि परेका हुन् ।

साकेला गाउँपालिकाको निवर्तमान उपाध्यक्ष सरिता खड्का र ऐसेलुखर्क गाउँपालिकाका निवर्तमान उपाध्यक्ष पुष्पकला भुजेलको यथास्थानमा दोहोरिने प्रयास विफल भएको छ । सरिता माओवादी केन्द्रकी बिर्सिका राई र पुष्पकला गठबन्धन (कांग्रेस(का राजेश राजभण्डारीभन्दा पछि परेका हुन् ।

काठमाडौं । सप्तरीको शम्भुनाथ नगरपालिकामा नेकपा एमाले छैटौं भएको छ । यहाँको मेयरमा नेकपा एसका उम्मेदवारले जित निकालेका छन् ।

५, ३९२ मत ल्याएर नेकपा एसका जितेन्द्र प्रसाद गुप्ता कलवार मेयरमा निर्वाचित भएका हुन् । उनका प्रतिस्पर्धी कांग्रेसका दिपेन्द्र कुमार चौधरीले ४, १४१ मत पाए भने छैटौं स्थानमा पुगेको एमालेका उम्मेदवार इनरदेव साहले ९७१ मत मात्रै ल्याए ।

यहाँ जसपाका उम्मेदवारले २, ८३५, राप्रपाले १, ६३७ र लोसपाले १, २८२ मत प्राप्त गरेका छन् ।

त्यस्तै उपमेयरमा पनि नेकपा एसकै अनिता कुमारी चौधरी ४, ९९८ मत ल्याएर विजयी भइन् । उनका प्रतिस्पर्धी कांग्रेसकी जलपना कुमारी सरदारले ४, २७१ मत प्राप्त गरिन् ।

कैलाली । कैलालीमा रेशम चौधरीको पार्टी नागरिक उन्मुक्तिले दुई स्थानीय तह जितेको छ । टीकापुर नगरपालिका र जोशिपुर गाउँपालिका जितेको नागरिक उन्मुक्ति पार्टीले अहिलेसम्म भजनी नगरपालिका र जानकी गाउँपालिकामा अग्रता कायम राखेको छ ।।

टीकापुरमा नागरिक उन्मुक्तिका रामलाल डगौरा थारु विजयी भएका छन् । नेपाली कांग्रेसका नवराज रावललाई ३ हजारभन्दा बढी मतान्तरले पछि पार्दै उनी मेयरमा विजयी भएका हुन् । उपाध्यक्षमा नेकपा माओवादी केन्द्रका खड्क शाह विजयी भएका छन् । उनले नागरिक उन्मुक्तिका उल्कादेवी विकलाई १५० मतले पछाडि पारेका थिए ।

मेयरमा विजयी रामलाल यसअघि टीकापुर ७ को वडाध्यक्ष थिए ।

२०७४ सालको स्थानीय तह निर्वाचनमा नेकपा माओवादी केन्द्रबाट टीकापुर-७ को वडाध्यक्षमा निर्वाचित भएका चौधरी अहिले नागरिक उन्मुक्ति पार्टीबाट नगर प्रमुख बने ।

त्यस्तै जोशीपुर गाउँपालिकामा चित्रबहादुर चौधरी विजयी भएका छन् । उनी पनि नागरिक उन्मुक्ति पार्टीबाट विजयी भएका हुन् । चौधरीले ४ हजार ९०३ मत प्राप्त प्राप्त गरेका थिए । नेपाली कांग्रेसका वंशराम बडायकलाई पछि पार्दै उनी विजयी भएका हुन् ।

उपाध्यक्षमा पनि नागरिक उन्मुक्ति पार्टीकै रेखादेवी कठरिया ४ हजार ५८१ मत प्राप्त गरी विजयी भइन् ।

जनकपुरधाम । सिरहाको कर्जन्हा नगरपालिकाको मेयरमा नेकपा एमाले र उपमेयरमा जनता समाजवादी पार्टी (जसपा) विजयी भएको छ ।

मेयरमा एमालेका भोलाप्रसाद पोखरेल विजयी भएका हुन् । उनले ३ हजर ८३९ मत ल्याएको निर्वाचन अधिकृतको कार्यालयले जनाएको छ ।

उनका निकटतम प्रतिस्पर्धी जसपाका केशवप्रसाद साहले ३ हजर २२३ मत ल्याएका छन् । निवर्तमान मेयर समेत रहेका नेकपा माओवादीका उम्मेदवार गंगा पासवानले २ हजार ४८२ मत पाएर तेस्रो स्थानमै सीमित बने ।

यस्तै उपमेयरमा जसपाकी लक्ष्मीकुमारी श्रेष्ठ निर्वाचित भएकी छिन् । उनी ३ हजार ४८७ मत ल्याउदा निकटतम प्रतिस्पर्धि नेकपा एमालेकी निर्मला पासवानले ३ हजार ९५ मत पाएकी छन् ।

काठमाडौं । पूर्वप्रधानमन्त्री डाक्टर बाबुराम भट्टराईको गृहनगर गोरखाको पालुङटारमा माओवादीका उम्मेदवार विजयी भएका छन् । जसपा-एमाले गठबन्धन र कांग्रेसलाई हराउँदै पालुङटारको मेयरमा माओवादीका विवश निन्तन विजयी भएका हुन् ।

चिन्तनले ६,०७२ मत पाए भने प्रतिस्पर्धी जनता समाजवादीका प्रेमबहादुर गुरुङले ५,७१७ मत ल्याए ।

यस्तै, उपमेयरमा पनि माओवादी केन्द्रकी वन्दना पाण्डे निर्वाचित भएकी छन् । उनले ५,५७९ मत ल्याइन् भने प्रतिस्पर्धी नेपाली कांग्रेसकी चेतकुमारी श्रेष्ठले ५,०७७ मत पाएकी छन् ।

लुम्बिनी । रुपन्देहीको ओमसतिया गाउँपालिकामा एमाले उम्मेदवार विजयी भएका छन् । अध्यक्षमा एमालेका मन्जित यादव सोनु ४ हजार ८ सय ३२ मतसहित निर्वाचित भएका हुन् । उनका प्रतिस्पर्धी राप्रपाका तिलकसिंह बोहराले ३ हजार १ सय ३९ मत ल्याएका छन् ।

उपाध्यक्षमा कांग्रेसकी सुनिता चौधरी ६ सय ८४ मतान्तरले विजयी भएकी छन् । चौधरी ४ हजार १ सय ३९ मतसहित विजेता बन्दा प्रतिस्पर्धी राप्रपाकी चित्ररेखा थारुले ३ हजार ४ सय ५५ मत पाइन् ।

२३ हजार ९ सय २९ मतदाता रहेको ओमसतियामा १९ हजार २ सय २५ जनाले मताधिकार प्रयोग गरेका थिए ।

६ वटा वडा रहेको ओमसतियामा १ मा राप्रपाका बेल बराल, २, ३, ४ र ५ बाट क्रमशः कांग्रेसका सितल जिटी, प्रकाश सिंह, अखिलेश्वर कुमार पाण्डे र मदन प्रसाद पोखरेल विजयी बनेका छन् । ६ गठबन्धनबाट उम्मेदवार बनेका माओवादी केन्द्रका शिवकुमार धवल निर्वाचित भएका छन् ।

बुटवल । रुपन्देहीको रोहिणी गाउँपालिका जनता समाजवादी पार्टीले जित हासिल गरेको छ । गाउँपालिका अध्यक्षमा जसपाका विद्याप्रसाद यादव विजयी भएका हुन् । उनी ७ हजार ४९६ मतसहित विजयी हुँदा राष्ट्रिय प्रजातन्त्र पार्टीका ताहिर अलि भाटले ६ हजार ४५८ मत प्राप्त गरे ।

उपाध्यक्षमा राप्रपाकी शिवकान्ती चमार दोहोरिएकी छन् । उनी ६ हजार १५४ मत ल्याउदै उपाध्यक्षमा निर्वाचित भएकी हुन् । जसपाको रिमा मिश्रा ५ हजार ९०२ मत ल्याइ दोश्रो भएकी छन् । नेकपा एमालेकी वसन्ती पाण्डेले तीन हजार ३८ मत प्राप्त गरिन् ।

लमजुङ । नेकपा एमालेका उपमहासचिव पृथ्वीसुब्बा गुरुङको गृहपालिका क्व्होलासोंथर गाउँपालिकामा एमालेको प्यानलै विजयी भएको छ ।

गाउँपालिका अध्यक्षदेखि वडा सदस्यसम्म एमालेका उम्मेदवार निर्वाचित भएका छन् । नेकपा एमालेका उपमहासचिवसमेत रहेका गुरुङको गाउँपालिकाका जनप्रतिनिधिमा एकजना पनि अन्य दल निर्वाचित भएका छैनन् ।

गाउँपालिका अध्यक्षमा सूर्यप्रसाद गुरुङ निर्वाचित भएका छन् । उनले तीन हजार ८५६ मत ल्याएका छन् । उनका प्रतिद्वन्द्वी कांग्रेसका टेकबहादुर गुरुङले दुई हजार ४८९ मत ल्याएका छन् । एक हजार ३ सय ६७ मत अन्तरले सूर्यप्रसाद गुरुङले चुनाव जितेका हुन् ।

मंगोल नेशनल अर्गनाइजेसनका भुवरजङ गुरुङले ५१ मत ल्याएका छन् । उपाध्यक्षमा एमालेकै गमिमाया गुरुङ तीन हजार ९८९ मतका साथ निर्वाचित भएकी छन् । प्रतिद्वन्द्वी नेपाली कांग्रेसकी सिर्जना गुरुङले दुई हजार ३४० मत ल्याएकी छन् ।

एक हजार ६४९ मतान्तरले गमिमायाले चुनाव जितेकी हुन् ।

९ वटा वडा रहेको क्व्होलासोंथर गाउँपालिकामा कुनै पनि वडामा अरु दलले जितेको छैन ।

रुपन्देही । विवादका कारण तीन दिनदेखि रोकिएको रुपन्देहीको तिलोत्तमा नगरपालिकामा नेपाली सेनाको उपस्थितिमा मतगणना सुरु भएको छ । सोमबार रातिदेखि रोकिएको मतगणना बुधबार राति ९ बजेदेखि सुरु गर्ने भनिए पनि पुनः विवाद भएपछि रोकिएको थियो ।

यसअघि वडानम्बर २ र १६ को मतगणना गर्ने क्रममा निर्वाचन कार्यालयका कर्मचारीले गणना भएभन्दा फरक मत टिपोट गरेको भन्दै नेपाली कांग्रेसले मतगणना अगाडि बढाउन दिएको थिएन ।

बुधबार निर्वाचन आयोगले दुईवटै वडाको पुनः मतगणना गर्न निर्देशन दिएपछि सर्वदलीय बैठकले राति ९ बजेदेखि मतगणना सुचारु गर्ने सहमति गरेको थियो । तर शान्ति नमूना माविका प्रधानाध्यापक दलीय प्रतिनिधि बनेर मतगणनास्थलमा गएको भन्दै एमालेका वडा सदस्यका उम्मेदवार मनिष अधिकारिले प्रश्न उठाएपछि झनै विवाद उत्पन्न भएको थियो ।

यसअघि तिलोत्तमा नगरपालिकाका निर्वाचन अधिकृत माधवप्रसाद लोहनीले मतगणना स्थलमा अराजक समुहले फौजदारी कार्य गर्दा पनि सुरक्षा निकायबाट कुनै सहयोग नभएको बताएका थिए ।

नेकपा एमालेले पनि प्रहरीको सुरक्षा भरपर्दो नभएको भन्दै नेपाली सेनाको उपस्थितिमा मात्रै मतगणना अघि बढाउन माग गरेको थियो । सोहीअनुरुप सेनाको उपस्थितिमा निर्वाचन अधिकृतको कार्यालयले रोकिएको मतगणना मध्यरातिदेखि सुचारु गरेको हो ।

निर्वाचन अधिकृत लोहनीले सुरक्षा सहजताका लागि सेनाको उपस्थिति भएपछि गणना सुचारु भएको बताए ।

मतगणनाको पछिल्लो विवरणअनुसार नगर प्रमुख पदमा नेपाली कांग्रेस र माओवादी गठबन्धनका रामकृष्ण खाणले तीन हजार ८२८ मत प्राप्त गरेका छन् भने एमालेका मोहन चापागाईंले तीनहजार ६२१ मतका साथ पछ्याइरहेका छन् ।

काठमाडौं । झापाको भद्रपुर नगरपालिकाको नगरप्रमुखमा नेपाली कांग्रेसका उम्मेदवार गणेश पोखरेल निर्वाचित भएका छन् । १२ हजार ५ सय २५ मतका साथ पोखरेल निर्वाचित भएका हुन् ।

उनका प्रत्यासी नेकपा एमालेका उम्मेदवार असारु राजव‌ंशीले ९ हजार ७ सय ५९ मत पाए भने राष्ट्रिय प्रजातन्त्र पार्टीका उम्मेदवार नवराज पनेरुले ६ हजार ३ साय १० मत प्राप्त गरेका छन् ।

उपप्रमुख पदमा राष्ट्रिय प्रजातन्त्र पार्टीकी राधा कार्कीले ९ हजार २ सय ३० मत प्राप्त गरी विजयी भएकी छन् भने नेपाल कम्युनिष्ट पार्टी ।माओवादी केन्द्र०का उम्मेदवार शिव कुमार राजभण्‍डारीले ८ हजार ५ सय ३३ मत ल्याएका छन्।

कैलाली । कैलालीको कैलारी गाउँपालिकामा गठबन्धनको आधिकारिक उम्मेदवारलाई हराउँदै कांग्रेसका बागी उम्मेदवार विजयी भएका छन्

सत्तासाझेदार गठबन्धनको कारबाहीमा परेका नेपाली कांग्रेसका उम्मेदवार राजसमझ चौधरी कैलारी गाउँपालिकाको अध्यक्षमा निर्वाचित भएका हुन् ।

उनले गठबन्धनका आधिकारिक उम्मेदवार निर्वतमान गाउँपालिका अध्यक्ष माओवादीका लाजुराम चौधरीलाई चार हजारभन्दा बढीको मतान्तरले पराजित गरेका हुन् ।

राजसमझले १० हजार ४ सय ९२ मत प्राप्त गरे भने लाजुरामले ६ हजार ४ सय ३० मत प्राप्त गरेका छन् ।

गठबन्धनकोतर्फबाट उम्मेदवार बनेका माओवादीका चौधरी यसअघिको निर्वाचनमा अध्यक्षमा निर्वाचित भएका थिए । कांग्रेसका बागी उम्मेदवारका कारण दोस्रोपटक अध्यक्ष बन्ने मौका उनले गुमाएका हुन् ।

उपाध्यक्षमा कांग्रेसकी भागवतीकुमारी चौधरी विजयी भएकी छन् । उनले १० हजार ४ सय ८४ मत ल्याएर निर्वतमान उपाध्यक्ष माओवादीकी लक्ष्मी सत्गौवा थारुलाई पराजित गरेकी हुन् । सत्गौवाले ६ हजार ४ सय ७७ मत प्राप्त गरिन् ।

चौधरी गठबन्धनको आधिकारिक उम्मेदवार हुन् । केही समयअघि कैलारी गाउँपालिका पुगेका माओवादी अध्यक्ष पुष्पकमल दाहाल ‘प्रचण्ड’ले भने बागी उम्मेदवारलाई जिताउन अपिल गरेका थिए । उनले अध्यक्ष र उपाध्यक्षमा लाजुराम र लक्ष्मीलाई जिताउन भोट मागेका थिए ।

‘यो परिवर्तनको रक्षाको लागि हाम्रो पार्टीका अध्यक्षका उम्मेदवार लाजुराम चौधरी र उपाध्यक्षका उम्मेदवार लक्ष्मी सत्गौवालगायतको टोलीलाई अत्यधिक बहुमत विजयी गराउन चाहन्छु’, २६ गते उनले भनेका थिए , ‘उहाँहरूको टीमले विगतमा पनि राम्रो काम गरेको थियो, आउने दिनमा पनि राम्रो काम गर्ने विश्वास व्यक्त गर्न चाहन्छु ।’

उनीहरु दुवैजना पराजित भएका छन् । कैलारी गाउँपालिका १ देखि ९ वडासम्म कांग्रेसको प्यानलले नै जितेको छ ।

रुपन्देही । अघिल्लो स्थानीय तहको निर्वाचनमा नेपाली कांग्रेसले जितेको पश्चिमनवलपरासीको रामग्राम नगरपालिकामा एमालेले मेयर र राप्रपाले उपमेयर जितेको छ । नेपाली कांग्रेसबाट उम्मेदवार बनेका निवर्तमान मेयर नरेन्द्रकुमार गुप्तालाई पराजित गर्दै एमालेका धनपद यादव विजयी भएका हुन् ।

निवर्तमान मेयर गुप्ता एमालेका धनपद यादवसँग १ हजार ५३८ मतान्तरले पराजित भएका हुन् । गुप्ताले ६ हजार १९१ मत ल्याउँदा निर्वाचित मेयर पदका उमेदवार यादवले ७ हजार ७२९ मत ल्याएर विजयी भए ।

उपमेयरमा राप्रपाकी सम्झना चौधरी विजयी भएकी छन् । चौधरीले एमालेकी लक्ष्मी क्षेत्रीलाई ८५ मतको झिनो मतान्तरले पराजित गर्दै उपमेयरमा विजयी भएकी हुन् ।

निर्वाचित चौधरीको ६ हजार ४७१ आउँदा र क्षेत्रीले ६ हजार ३८६ मत पाइन्। कांग्रेसकी उपमेयरकी उम्मेदवार आराधना भट्टले ५ हजार ३४१ मत ल्याएर तेस्रो भएकी छन् ।