कैलाली । सुदूरपश्चिम प्रदेशमा नेकपा एकीकृत समाजवादी सबैभन्दा ठूलो दल हो । ५१ जना प्रदेशसभा सदस्य रहेको सुदूरपश्चिम प्रदेशसभामा नेकपा एकीकृत समाजवादीका १४ जना सांसद छन् ।
नेकपा एस प्रदेशसभामा मात्रै होइन प्रदेश सरकारमा पनि सबैभन्दा धेरै मन्त्री पाउने पार्टीमध्ये एक हो । माओवादी केन्द्रले नेतृत्व गरेको सुदूरपश्चिम प्रदेश सरकारमा माओवादी र एकीकृत समाजवादीको मन्त्री बराबर छन् ।
प्रदेश सरकारमा दुई मन्त्री र दुई राज्यमन्त्री रहेकाे नेकपा एसले मन्त्रीकाे संख्या जति पनि पालिका प्रमुख जित्न सकेन ।
अहिलेसम्म अन्तिम परिणाम आएका ८८ वटा स्थानीय तहमध्ये एकीकृत समाजवादीले दुई पालिका प्रमुखमात्रै जितेको छ । उसले कैलालीको घोडाघोडी नगरपालिका र बझाङको केदारस्युँ गाउँपालिका जितेको छ ।
घोडाघोडी नगरपालिकाको मेयरमा एकीकृत समाजवादीका खडकबहादुर रावतले एमालेका ममताप्रसाद चौधरीलाई हराएका थिए । रावतले १३ हजार १२८ मत ल्याउँदा चौधरीले ८२४१ मत पाएका थिए ।
बझाङकाे केदारस्युँमा पनि एमालेका लोकेशबहादुर भण्डारीलाई १ हजार ९१३ मतले पछि पार्दै एकीकृत समाजवादीका गणेश बोहरा विजयी भए ।
सुदूरपश्चिमका अधिकांश जिल्लामा नेकपा एकीकृत समाजवादीले गठबन्धन गरेको छ । कतै तीनदलीय गठबन्धन भएको छ भने कतै माओवादी र एकीकृत समाजवादीको मात्रै पनि गठबन्धन भएको छ । तर, गठबन्धन हुँदा पनि नेकपा एकीकृतले अपेक्षित नतिजा निकाल्न सकेको छैन ।
कैलालीको दुई पालिकामा तीनदलीय गठबन्धन गरेर एकीकृत समाजवादीले तीन पालिका प्रमुख र एउटा उपप्रमुख पाएको थियो । तर, घोडाघोडीबाहेक अन्य पालिकामा एमाले विजयी भयो ।
एकीकृत समाजवादीले उपप्रमुख पाएकाे गोदावरी नगरपालिकामा कांग्रेसका प्रमुख उम्मेदवार विजयी भए । तर, उपप्रमुखमा उसकाे उम्मेदवार विजयी भएन ।
कञ्चनपुरमा माओवादी र एकीकृत समाजवादीले तालमेल गरेका थिए । त्यहाँ पनि अहिलेसम्म कुनै पनि पालिका प्रमुखमा एकीकृत समाजवादीले जित्न सकेको छैन । यसअघि नै कञ्चनपुरको वेदकोट नगरपालिका प्रमुख र पुनर्वासको नगर प्रमुख एकीकृत समाजवादीमा लागेका थिए । अहिले ती दुवै पालिका जित्न पनि सकस भइरहेको छ ।
गठबन्धनमा रहेका दलहरूले इमानदारिता नदेखाएका कारण अनपेक्षित नतिजा आइरहेको एकीकृत समाजवादीका नेताहरूको ठहर छ । ‘हामीले इमानदारिता देखाएको जस्तो गरी अन्य दलले इमानदारिता देखाएनन्’, एकीकृत समाजवादीका सुदूरपश्चिम प्रदेश सचिव दिनेश सुवेदीले भने, ‘गठबन्धनमै रहेका दलहरूबाट केही समस्या भयाे ।’
