Category: स्थानीय निर्वाचन–२०७९

सल्लेरी । नेपाली कांग्रेसका महाधिवेशन प्रतिनिधि तथा सोलु दुघकुण्ड नगरपालिकाका मेयरका दाबेदार आङकाजी शेर्पा सोमबार एमालेमा प्रवेश गरेका छन् ।

नगरपालिकाको वडा नम्बर २ बाट निर्वाचित कांग्रेसका वडाध्यक्ष मिङ्मार दोर्जी शेर्पा, पूर्व महाधिवेशन प्रतिनिधि कुसाङ शेर्पा, सम्पर्क समितिका उपाध्यक्ष ज्ञानुराज भण्डारीसहितको समूह लिएर उनी एमालेमा प्रवेश गरेका हुन् ।

कांग्रेस नेता शेर्पाको समूहलाई एमाले प्रवेश गराउन अध्यक्ष केपी शर्मा ओली, बरिष्ठ उपाध्यक्ष ईश्वर पोखरेल, पूर्व मुख्यमन्त्री शेरधन राई, प्रदेश १ का पूर्व भौतिक पुर्वाधारमन्त्री अम्बिरबाबु गुरुङसहितका नेता सोलुखुम्बु गएका थिए ।

सोही कार्यक्रममा माप्य दूधकोशी गाउँपालिकामा कांग्रेस र माओवादीबाट निर्वाचित वडा नम्बर ६ र ७ का वडाध्यक्षहरु दिनेश कुमार राई र सगुजीत राई पनि एमालेमा प्रवेश गरेका छन् ।

सोलु दूधकुण्ड नगरपालिकाको मेयरमा अघिल्लो चुनावमा एमालेका आङ इगेले शेर्पा १५० मतले पराजित भएका थिए । कांग्रेसका नाम्गेल शेर्पाले २७५१ मत पाएर मेयर जित्दा एमालेका शेर्पा २६०१ मतमा रोकिएका थिए ।

उपमेयर भने एमालेकी कल्पना राईले जितेकी थिइन् । योहो टेलिभिजनका अध्यक्ष समेत रहेका काजी शेर्पा कांग्रेसबाट मेयरको प्रमुख दाबेदार थिए । तर जिल्लामा उनी बलवहादुर केसी पक्ष रहेको र देउवा पक्षले उनलाई अघि सार्न नमानेपछि एमाले प्रवेश गरेको बताइएको छ ।

शेर्पालाई एमालेले नगरपालिकाको मेयरमा उम्मेदवार बनाउने भएको छ ।

रुपन्देही । नेकपा एमालेका उपमहासचिव एवम प्रचार विभाग प्रमुख पृथ्वीसुब्बा गुरुङले एमाले विरुद्धका गलत र भ्रामक प्रचारहरुलाई मेटाउन प्रेस चौतारीका कार्यकर्ताहरुलाई आग्रह गरेका छन् ।

आगामी स्थानीय तहको निर्वाचनमा एमाले नेतृत्वको सरकारले गरेका राम्रा प्रेस चौतारी नेपाल लुम्बिनी प्रदेशले कपिलवस्तुको जितपुरमा सोमबार आयोजित प्रचार भेलालाई सम्बोधन गर्दै उनले सो बताएका हुन् ।

उनले कामहरुको व्यापक प्रचारप्रसार गर्न प्रचार कार्यकर्ताहरुलाई आग्रह गरेका छन् । एमाले र मतदाताहरुको पुलको रुपमा प्रचार क्षेत्रमा खटिएकाले भूमिका निर्वाह गर्न उनले आग्रह गरे ।

उपमहासचिव गुरुङले नेकपा एमालेविरुद्ध गलत प्रचार र घेराबन्दी भइरहँदा प्रचार कार्यकर्ताहरुले त्यसको खण्डन गर्दै जनतालाई सहि सूचना दिनुपर्ने अहिलेको समय रहेको बताएका थिए ।

एमालेको संगठन र कार्यशैलीप्रति अरु राजनीतिक दल र संघसंगठनहरुले समेत इश्र्या गर्ने गरेको उल्लेख गर्दै एमालेको सुदृढ संगठन र कार्यशैलीलाई कमजोर हुन दिन नहुने गुरुङले बताए । समृद्ध नेपाल सुखी नेपालीको नारा एमालेको गन्तव्य रहेको भन्दै नारामा भएजस्तो काम गरेको छ छैन भनेर खबरदारी गर्ने दायित्व पनि प्रचार कार्यकर्ताहरुको रहेको उनको भनाइ थियो ।

कार्यक्रममा एमाले पोलिटब्यूरो सदस्य तथा प्रचार विभाग उपप्रमुख विष्णु रिजालले एमालेको देशव्यापी लहरले सत्तागठबन्धन अत्तालिएको बताए ।
उनले प्रविधिको युगमा एमाले र प्रचार कार्यकर्ताहरु प्रविधिबारे जानकार हुनुपर्ने रवास्तविक तथ्यांक जनतासमक्ष पुराउनुपर्ने बताएका थिए ।

प्रेस चौतारी लुम्बिनी प्रदेशका अध्यक्ष शोभाखर पन्थीको अध्यक्षता, महासचिव निरु गौतमको संचालन तथा कपिलवस्तु अध्यक्ष जानु पाण्डेको स्वागतमा सम्पन्न भएको कार्यक्रममा पोलिटव्यूरो सदस्य एवं राष्ट्रियसभा सदस्य विमला घिमिरे, प्रेस चौतारी नेपालका केन्द्रिय अध्यक्ष गणेश बस्नेत, नेकपा एमाले लुम्बिनी प्रदेशका प्रचार विभाग प्रमुख डिआर घिमिरे, एमाले प्रदेश सदस्य शेरबहादुर केसी, प्रेस चौतारी नेपालका पूर्व केन्द्रीय सदस्य इन्दिरा अर्याल र केन्द्रिय सदस्य पार्वती पाण्डेले प्रचारको कामलाई कसरी व्यवस्थीत बनाउन सकिन्छ भन्ने विषयमा धारणा राखेका थिए ।

लुम्बिनी प्रदेशका १२ जिल्लाका प्रेस चौतारीका सदस्यहरुको सहभागिता रहेको प्रचार भेलाले ९ बुंदे घोषणापत्रसमेत जारी गरेको छ ।

काठमाडौं । नेपाली कांग्रेस सुनसरीका नेता रोहित प्रसाईले गठबन्धनका नाममा जनमत नभएको पार्टीलाई इटहरी उपमहानगरपालिकाको मेयरमा सहयोग गर्न नसकिने बताएका छन् ।

अघिल्लो स्थानीय निर्वाचनमा इटहरीमा कांग्रेसको तर्फबाट मेयरको प्रत्याशी रहेका प्रसाईले झण्डै ४० हजार प्रतिबद्ध मतदाता भएको पार्टीले कमजोर जनमत भएको पार्टीलाई प्रमुख छाड्न नसक्ने बताएका हुन् । इटहरी उपमहानगरपालिकामा नेकपा एकीकृत समाजवादीलाई मेयर दिनेगरी गठबन्धनमा सहमति हुन लागेपछि सुनसरी कांग्रेसका नेताहरुले असन्तुष्टी जनाउने क्रम जारी छ ।

‘झण्डैं ४० हजार मत भएको कांग्रेसले १५ सय मत भएको एकीकृत समाजवादीलाई सघाउन सक्दैन । कांग्रेसले मेयर नपाउँदा गठबन्धन जिताउन गार्हो पर्छ’, प्रसाईको भनाई छ । तालमेलका क्रममा सुनसरीको इटहरी उपमहानगरको नेतृत्व दावी गर्दै कांग्रेस जिल्ला सभापति केदार भण्डारीसहितको टोली काठमाडौंमा छ । कांग्रेसले इटहरीमा बहुमत वडासहित मेयर जित्ने दावी गर्दै आएको छ । सुनसरीमा गत निर्वाचनमा कांग्रेसले ९ पालिका जितेको थियो ।

रुपन्देही । राष्ट्रिय जनमोर्चाको आधार इलाका मानिएको प्युठान जिल्लाको झिमरुक गाउँपालिकामा राष्ट्रिय जनमोर्चालाई गठबन्धनबाट एक्लाउँदै नेपाली कांग्रेस र नेकपा माओवादी केन्द्रको चुनावी तालमेल भएको छ।

अध्यक्ष माओवादीले र उपाध्यक्ष कांग्रेसले पाउने गरी झिमरुकमा सहमति भएको छ ।

वडा तहमा सहमतिको आधारमा पद बाँडफाँड गर्ने पनि निर्णय भएको छ । जुन वडामा जुन दलको अध्यक्ष उम्मेदवार बनेमा सोही चुनाव चिन्हमा अरु सदस्यले उम्मेदवारी दिने गरी सहमति गरिएको विज्ञप्तीमा उल्लेख छ ।

गत २०७४ सालको निर्वाचनमा यो गाउँपालिका राष्ट्रिय जनमोर्चा जितेको थियो। उता नौबहिनी गाउँपालिकामा पनि सत्ताधारी दल कांग्रेस, माओवादी केन्द्र र एकीकृत समाजवादीबीच चुनावी तालमेल गरेर राष्ट्रिय जनमोर्चा एक्लाएका छन् ।

काँग्रेस अध्यक्षमा र माओवादीलाई उपाध्यक्ष दिने गरि नौबहिनीमा पद बाँडिएको छ। नौबहिनीको वडा नम्बर १ स्याउलीवाङ समाजवादीलाई तीन र तीनवटा वडा कांग्रेस माओवादीलाई दिने गरी सहमति गरिएको पाइएको छ ।

यसैबीच, माण्डवी गाउँपालिकामा माओवादीको भागमा अध्यक्ष र काँग्रेसलाई उपाध्यक्ष दिने गठबन्धनबीच सहमति भएको छ । यद्यपि सहमतिबारे आधिकारिक जानकारी आएको छैन ।

यसअघि स्वर्गद्धारी नगरपालिकामा कांग्रेसलाई मेयर र राष्ट्रीय जनमोर्चालाई उपमेयर दिने गरि चुनावी तालमेल भएको छ। सरुमारानी गाउँपालिकामा पनि कांग्रेसलाई अध्यक्ष र माओवादीलाई उपाध्यक्ष दिने गरि गठबन्धनबीच भागबण्डा टुङ्गिएको छ । अन्य पालिकामा भने तालमेलबारे छलफल जारी रहेको नेताहरुले बताएका हुन् ।

काठमाडौं । नेकपा एकीकृत समाजवादीले अस्वाभाविक माग राखेको भन्दै कांग्रेस कास्कीका दुई सचिवले विज्ञप्ति निकालेर गठबन्धन तोडेको घोषणा गरेका छन् । तर, सभापति किशोरदत्त बराल भने गठबन्धन कायम रहेको बताउँछन् ।

उनी अहिले पनि गठबन्धनकै बैठकमा छन् । ‘म बैठकमै छु । गठबन्धन टुटेको कुरा साँचो होइन’, उनले भने, ‘सचिवहरूले किन त्यसो गर्नुभयो, मैले बुझ्न पाएको छैन । विज्ञप्ति निकाल्न मसँग सल्लाह लिनुभएको होइन ।’

अहिले जिल्लाका पालिकामा बाँडफाँट टुंग्याउन गठबन्धनको बैठक होटल दीपसागरमा बसिरहेको छ । एकीकृत समाजवादीका अध्यक्ष धनराज आचार्यले विज्ञप्ति गलत भएको बताए । कांग्रेसकै सभापतिको नेतृत्वमा बैठक बसिरहेको बेला बाहिरिएको विज्ञप्तिले खासै असर नगर्ने उनको भनाइ छ ।

‘गठबन्धनको बैठक चलिरहेको छ । सभापतिज्यू यहीँ हामीसँगै हुनुहुन्छ’, उनले भने, ‘गठबन्धन टुटेको भए बैठक किन चलिरहन्थ्यो, टुटेको छैन । यो कायम रहन्छ ।’

एकीकृत समाजवादीले पोखराको मेयरमा दाबी गरेको छ । तर, कांग्रेसले भने जनमत नै नभएको पार्टीले मेयर माग्दा हारिने भन्दै कांग्रेसले नै मेयर पाउनुपर्ने अडान राखेको छ । दुई सचिवले एकीकृत समाजवादीको माग अस्वाभाविक भएकोले उसँग गठबन्धन नहुने विज्ञप्तिसहित जिल्लाका नेता-कार्यकर्तालाई सोहीअनुसार काम अघि बढाउन निर्देशन दिएका छन् ।

काठमाडौं । स्थानीय तह निर्वाचनका लागि मनोनयन दर्ता गर्न ६ दिन बाँकी छ । तर, साझा उम्मेदवार उठाउने सहमति गरेका गठबन्धनले कहिँ पनि संयुक्त चुनावी सभा गर्न सकेका छैनन् ।

गठबन्धनले संयुक्त अपिल भने २०७८ चैत २९ मा जारी गरे । तर, तालमेलको खाका तयार हुन नसक्दा चुनावी सभा अनिश्चित भएको हो ।

मतदातामाझ पुग्न सभा अनिवार्य मानिन्छ । चुनावी माहौलका लागि गरिने सभा अहिले दलहरू एक्लाएक्लै गरिरहेका छन् ।

तालमेलको व्यावहारिक निर्णय गर्न बाँकी रहेकाले गठबन्धन दलहरूले संयुक्त चुनावी सभा गर्न नसकेको नेकपा (एकीकृत समाजवादी) का उप महासचिव डा. बेदुराम भुसालले बताए ।

‘तालमेलबारे नीतिगत निर्णय मात्र भएको तर, व्यावहारिक निर्णयपछि भने संयुक्त चुनावी सभा गरेर जनताकहाँ पुगिने छ ’, उनले भने ।

१७ चैतमा नेपाली कांग्रेस, नेकपा (माओवादी केन्द्र), एकीकृत समाजवादी, जनता समाजवादी पार्टी (जसपा) र राष्ट्रिय जनमोर्चाले चुनावी तालमेल गरेर जाने सहमति गरेका थिए । तालमेलको प्रक्रिया अघि बढाउन भनेर कांग्रेस वरिष्ठ नेता रामचन्द्र पौडेलको संयोजकत्वमा निर्वाचन तयारी तथा अनुगमन समितिसमेत गठन भएको छ ।

गठबन्धन दलहरूले तालमेल टुङ्ग्याएर छिट्टै संयुक्त चुनावी सभा गर्ने कांग्रेस सह महामन्त्री भीष्मराज आङ्देम्बेले बताए ।

पेचिलो बन्दै गठबन्धन

अर्कोतिर, गठबन्धन दलहरूबिच चुनावी तालमेल पेचिलो बन्दै गएको छ । मधेस प्रदेशमा तालमेलको सम्भावना कम हुँदै गएको माओवादी केन्द्रका मधेस इन्चार्ज गणेश साहले बताए ।

प्रदेश १ का केही जिल्लाबाहेकमा तालमेल हुने सम्भावना कम हुँदै गएको छ । नेपाली कांग्रेस प्रदेश १ का सभापति उद्धब थापाले साङ्गठनिक हैसियतभन्दा बढी स्थानीय तहमा गठबन्धनका अन्य दलहरूले दाबी गर्दा समस्या पैदा भएको बताए ।

थापाले भने, ‘अन्य दलहरूले आफ्नो सांगठानिक हैसियत भन्दा माथि गएर अन्य दलहरूले दाबी गरिरहेका कारणले पनि समस्या भएको छ ।’

संखुवासभामा कांग्रेस आफैंले गठबन्धन नहुने घोषणा गरेको थियो । कांग्रेसले ७४ को स्थानीय तह निर्वाचनमा जितेको स्थानको डेढगुणा बढी स्थानमा दाबी गरिरहेको कारणले पनि गठबन्धनको सम्भावना न्यून रहेको नेकपा माओवादी केन्द्र प्रदेश १ कार्यालय सचिव मुक्ति बरालले बताए ।

वागमती प्रदेशका पनि कतिपय स्थानका कांग्रेस एक्लै चुनावी प्रतिस्पर्धामा जाने निर्णय गरी रहेको कारण अधिकांश स्थानमा चुनावी गठबन्धन धरमराएको छ ।

गण्डकी, लुम्बिनी, कर्णाली र सुदूरपश्चिम प्रदेशमा पनि गठबन्धन दलहरूबीच तालमेलको विषयलाई लिएर मतभेद चुलिँदो छ ।

कतिपय स्थानमा दलहरूले आफ्नै उम्मेदवार घोषण गरेका छन् । ठाउँठाउँमा गठबन्धन दलहरूबीच नै चुनावी प्रतिस्पर्धा हुने भएको छ ।

निर्वाचन कार्य तालिकाअनुसार मनोनयन दर्ता ११ र १२ वैशाखमा हुने भएको छ । ३० वैशाखमा भने मतदान नै हुनेछ ।

म्याग्दी । सत्ता साझेदार पाँच दलीय गठबन्धनमा सकस भएपछि दलहरुले जिल्लामा एकल उम्मेदवार छनोट, सिफारिस र घोषणा गर्न थालेका छन् ।

गत चैत २४ गते नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी र राष्ट्रिय जनमोर्चाको पाँच दलीय संयन्त्रले आसन्न स्थानीय तह चुनावमा साझा उम्मेदवार बनाउने सैद्धान्तिक सहमति गरेका थिए ।

सहमतिपछि दुईपटक बसेको बैठकमा वडा र पालिका बाँडफाँटमा विवाद उत्पन्न भएपछि ती दलहरुले एकल उम्मेदवारी घोषणा गरेका हुन् । कांग्रेसले दुई र माओवादी केन्द्रले एक स्थानीय तहमा एकल उम्मेदवारी घोषणा गरिसकेका छन् ।

बेनी नगरप्रमुखमा कांग्रेसले चिरञ्जीवी शर्मालाई मेयरको उम्मेदवार बनाउने निर्णय शुक्रबार गरेको थियो । माओवादी केन्द्रले आइतबार नै नगरप्रमुखमा शेरबहादुर केसी र धनलाल जैशी तथा उपमेयरमा ज्योति लामिछाने पौडेललाई उम्मेदवार बनाउन सिफारिस गरेको छ ।

माओवादीका बेनी नगर इञ्चार्ज विनोद केसीले गठबन्धनभित्र समय घर्किदासम्म पनि सहमति नभएपछि एकल उम्मेदवार छनोट गर्नुपर्ने अवस्था आएको बताए । ‘सहमतिको अन्तिम प्रयत्न अझै पनि छ’, उनले भने, ‘समय घर्किसकेकाले आफ्नै तयारी गर्नुपर्छ भनेर उम्मेदवार घोषणा गरिएको हो ।’

कांग्रेसले मालिका गाउँपालिकाको अध्यक्षको उम्मेदवारमा वर्तमान गाउँपालिका अध्यक्ष श्रीप्रसाद रोकालाई दोहो¥याउने घोषणा गरेको छ ।

कांग्रेस म्याग्दीका सचिव हीराबहादुर पुनले कसले कति र कुन पालिका, वडाको नेतृत्वमा उम्मेदवार बनाउने भन्ने विषयमा छलफल अड्किएको बताए । कांग्रेसले अघिल्लो चुनावमा आफूले जितेका पालिका आफूसँगै राखेर एमालेले जितेको थप ५० प्रतिशत वडा र पालिका छोडेर बाँडफाँट गर्ने प्रस्ताव गरेका थिए ।

माओवादी केन्द्रले कम्तीमा दुई स्थानीय तह र १८ वडाध्यक्षमा दाबी गरेका थिए । नेकपा एकीकृत समाजवादी र जसपाले पनि एक÷एक पालिकाको नेतृत्व दाबी गरेका थिए ।

अन्नपूर्ण, रघुगङ्गा, मङ्गला र धौलागिरी गाउँपालिकामा सिफारिस भएका उम्मेदवार छनोट र सार्वजनिक गर्ने चरणमा कांग्रेस छ । माओवादी केन्द्रका नेताहरुले बेनीसँगै अन्य पालिकामा एकल उम्मेदवार सार्वजनिक गर्ने तयारी भएको जनाएको छ ।

गठबन्धनका प्रमुख दलले संवाद अन्त्य र सहमति भङ्ग भएको घोषणा गरिनसकेकाले एकले अर्कालाई गलाउन खोजेको देखिन्छ । पछिल्लो तीन दिनयता छलफल नगरेका उनीहरु केन्द्रको निर्णयको प्रतीक्षामा छन् ।

एमालेका चार पालिकाको नेतृत्व सर्वसम्मत

एमालेले म्याग्दीका चार गाउँपालिकाको अध्यक्ष र दुई पालिकाका उपाध्यक्षका उम्मेदवार सर्वसम्मत छनोट गरेको छ । मालिकाको अध्यक्षमा बेगप्रसाद गर्बुजा, मङ्गलाको अध्यक्षमा सतप्रसाद रोका, रघुगङ्गाको अध्यक्षमा प्रेमबहादुर कार्की र अन्नपूर्णको अध्यक्षमा भरत पुनलाई उम्मेदवार बनाउने सर्वसम्मत निर्णय भएको एमाले जिल्ला अध्यक्ष देवेन्द्र केसीले जानकारी दिए ।

अन्नपूर्णको उपाध्यक्षमा दिवा पुन र रघुगङ्गाको उपाध्यक्षको उम्मेदवारमा यामकुमारी गर्बुजाको नाम सर्वसम्मत सिफारिस भएको छ । बेनी नगरप्रमुख मेयरको उम्मेदवारमा एमालेबाट प्रमोद श्रेष्ठ, सुरत केसी, सन्तोष रावल र नारायण जिसीको नाम सिफारिस भएको छ । उपमेयरमा पशुपति शाही, गौरी थापामगर, विष्णु गुरुङ र भावना पौडेलको नाम सिफारिस भएको छ ।

धौलागिरीको अध्यक्षको उम्मेदवारमा वर्तमान अध्यक्ष थमसरा पुन, प्रदेश कमिटी सदस्य रेशम भण्डारी, गाउँपालिका कमिटीका अध्यक्ष होमबहादुर थापा र गाउँपालिका उपाध्यक्ष रेशम छन्त्यालले दाबी गरेका छन् । मङ्गलाको उपाध्यक्षमा वर्तमान उपाध्यक्ष सिर्जना केसी र पेमा अधिकारीले दाबी गरेका छन् ।