Category: स्थानीय निर्वाचन–२०७९

काठमाडौं । भागबण्डा नमिल्दा ओखलढुंगामा पनि चुनावी भठबन्धन भत्केको छ । ८ वटा स्थानीय तहमध्ये नेपाली कांग्रेसले ६ वटामा प्रमुख दाबी गरेपछि माओवादीलगायत गठबन्धनमा आबद्ध दल बिच्किएका हुन् ।

२०७४ सालको चुनावमा ओखलढुंगाका चारवटा स्थानीय तहमा कांग्रेसले जितेको थियो भने तीनवटा नेकपा एमाले र एकवटामा माओवादीवादी केन्द्रले जितेको थियो । यहाँ माओवादीले पनि तीनवटा स्थानीय तहमा दाबी गरेको छ ।

गठबन्धनमा आबद्ध दलबीच पटक–पटक सहमतिको प्रयास भए पनि भागबण्डामा कुरा नमिलेपछि गठबन्धन नै भत्केको माओवादी केन्द्र ओखलढुंगाका अध्यक्ष निशान्त शर्माले बताए । ‘हामीले कम्तिमा तीनवटा स्थानीय तहमा प्रमुख पदको उम्मेदवार मागेका हौं’, उनले भने, ‘तर नेपाली कांग्रेसले जसरी पनि ६ वटा आफूले नै राख्ने अडान नछाडेपछि गठबन्धन गर्नुको अर्थ नै भएन ।’

गठबन्धनमा कुरा नमिलेपछि चार दलबीच आपसमा स्वच्छ प्रतिस्पर्धा गर्ने गर्ने सहमतिसमेत भएको छ । ‘माओवादी केन्द्रको आधार क्षेत्रमा समेत कांग्रेसले दाबी गरेका कारण चुनावी गठबन्धन तोडियो, अब हामी मैत्रीपूर्ण प्रतिस्पर्धा गर्छौं’, निशान्तले भने ।

आफूहरूलाई माओवादीदेखि जिल्लामा रहेका साना दलहरूलाई पनि मिलाउनु पर्ने दायित्व भएका कारण समस्या भएको नेपाली कांग्रेस ओखलढुङ्गाका सचिव अजय लुइँटेलले बताए । उनले भने, ‘हामीले पहिला जितेको ४ सहित ६ वटा र माओवादीलाई एक स्थानीय तह दिने भन्दा पनि उहाँहरू पछि हट्नु भयो । अब जिल्लामा स्वच्छ प्रतिस्पर्धा हुन्छ, चुनावी तालमेल हुँदैन ।’

ओखलढुङ्गामा कांग्रेसले २०७४ सालमा जितेका चार सहित ६ वटा स्थानीय तहमा दाबी गरेको थियो भने लिखु, चम्पादेवी र चिशंखुगढी गाउँपालिकामा माओवादी केन्द्रले दाबी गरेको थियो । यस्तै जसपाले मानेभञ्ज्याङ र खिजीदेम्बामा दाबी गरेको थियो भने समाजवादीले सिद्धिचरण नगरपालिकामा दाबी गरेको थियो ।

माओवादीले चिशंखुगढीमा निशान्त शर्मा र लिखुमा बाबुराम गौतमलाई उम्मेदवार बनाउने निर्णय पनि गरेको छ ।

जिल्लामा दुई गाउँपालिका चिशंखुगढीमा जीवनकुमार थापा र मानेभञ्ज्याङमा रूपलाल तामाङलाई एमालेले पनि उम्मेदवार घोषणा गरिसकेको छ ।

 

जनकपुरधाम । लोकतान्त्रिक समाजवादी पार्टी (लोसपा)बाट जनकपुरधामको मेयरका लागि सिफारिस भएका जानकीराम साह नेकपा एमालेमा प्रवेश गरेका छन् ।
तत्कालीन राजपाबाट जनकपुरधाम– ७ को वडाध्यक्षमा निर्वाचित साह काठमाडौं पुगेर एमालेमा प्रवेश गरेका हुन् । उनलाई एमाले अध्यक्ष केपीशर्मा ओली पार्टीमा स्वागत गरेका छन् ।

मेयरको उम्मेदवारको रुपमा साहले जनकपुरधाममा सम्पर्क कार्यालयसमेत सञ्चालन गरिरहेका छन् । केही दिन अघिदेखि घरदैलोमा व्यस्त साह लोसपाबाट मेयरमा टिकट नपाउने अवस्था देखेपछि अचानक एमालेमा प्रवेश गरे ।

एमालेबाट जनकपुरधामको मेयरका लागि शिवशंकर साह ‘हिरा’को एकल नाम सिफारिस भएको छ । लोसपाबाट प्रदेश सांसद परमेश्वर साहले टिकट पाउने चर्चा चलिरहेको छ ।

सिन्धुपाल्चोक । सिन्धुपाल्चोकमा सत्ताघटक दलहरुबीच स्थानीय तहमा भागभण्डा नमिल्दा गठबन्धनमा समस्या देखिएको छ । प्रमुख तीन दल नेपाली कांग्रेस, माओवादी केन्द्र र समाजवादीले अडान नछाड्दा गठबन्धनमा समस्या देखिएको हो ।

गठबन्धनमा मुख्यतः कुन दलले कुन स्थानीय तह लिने भन्नेमा नै समस्या देखिएको नेपाली कांग्रेसका एक नेताले जानकारी दिए । माओवादी केन्द्रले यसअघि जितेका दुईसहित दोस्रो स्थान भएको दुई र अर्काे एक स्थानीय तह गरी पाँचवटामा दाबी गरेको छ ।

एकीकृत समाजवादीले मेलम्ची नगरपालिकामा दाबी कायम राखेको छ । माओवादीले यसअघि जितेको चौतारा साँगचोकगढी नगरपालिका, भोटेकोशी गाउँपालिकासहित बलेफी, जुगल र लिसंखुपाखर गाउँपालिकामा आफूहरुले प्रमुख पाउनु पर्ने दाबी गरेको छ ।

तर नेपाली कांग्रेसले भने माओवादीले भनेअनुसारका दिन नसकिने प्रष्ट पारेको छ । ‘भोटेकोशी माओवादीले मागेको छ, तर भोटेकोशी हामी दिनसक्ने अवस्थामा छैनौं’, कांग्रेसका ती नेताले भने, ‘भोटेकोशीको पाँचै वडा हामी जित्ने अवस्थामा छौ, जित्ने अवस्था हुँदाहुँदै हामी छाड्न सक्दैनौं ।’

तीन दलबीच गठबन्धन भंग भए भोटेकोशी गाउँपालिकाकै कारण हुने कांग्रेसका ती नेताले बताए ।

माओवादी केन्द्रले भने केन्द्रको सहमति अनुसार २०७४ को स्थानीय निर्वाचनमा जितेको चौतारा साँगाचोकगढी र भोटेकोशी कुनै हालतमा पनि छाड्न नसकिने अडानबाट ब्याक भएको छैन । ‘हामीले यसअघि जितेका स्थानीय तह छाड्ने सवाल नै हुँदैन’, माओवादीका एक नेताले भने’, त्योबाहेक अघिल्लो निर्वाचनमा दोस्रो भएको बलेफी र लिसंखु पनि हामी छाड्दैनौं ।’

गठबन्धनका दलहरुबीच आज पुन काडमाडौंमा बैठक बस्ने र ठोस निर्णय हुनसक्ने गठबन्धनका नेताहरुले जानकारी दिएका छन् । गठबन्धनका दलबीच छलफल हुँदै गर्दा प्रमुख दुई पार्टी नेपाली कांग्रेस र माओवादीले अर्काे दल राप्रपासँग पनि निरन्तर संवाद गरिरहेको छ ।

भोलि गठबन्धन भएन भने माओवादी, समाजवादी र राप्रपा मिलेर जानका लागि माओवादीले तयारी गरेको छ । कांग्रेसले पनि केही स्थानीय तहमा एमालेसँग मिलेर जानसक्ने सम्भवना देखेको छ । गठबन्धन भएन भने एमाले र कांग्रेस चौतारा साँगाचोकगढी नगरपालिकामा मिल्नसक्ने कांग्रेसका एक नेताले जानकारी दिए ।

राप्रपाले भने अहिलसम्म कुन दलसँग मिलेर जाने निर्णय गरिसकेको छैन । प्रमुख तीनै दलसँग छलफल भइरहेको राप्रपाले जानकारी दिएको छ । राप्रपाको मजबुत रहेको पाँचपोखरी थाङपाल, मेलम्ची नगरपालिका र चौतारा सँगाचोकगढी नगरपालिकामा उपमेयर पाउनु पर्ने गरी छलफलमा बसेको छ भने पाँचपोखरी थाङपाल गाउँपालिकामा भने अध्यक्ष नै पाउनुपर्ने राप्रपाको अडान छ । सिन्धुपाल्चोकमा राप्रपा नेपालको खासै भूमिका देखिएको छैन ।

काठमाडौं । निर्वाचन आयोगमा प्रमुख आयुक्त दिनेश थपलियाले निर्वाचनको मौन अवधि सुरु भएदेखि नसकिँदासम्म मदिराजन्य पदार्थको बिक्री वितरणमा बन्देज लगाउन प्रस्ताव गरेको बताएका छन् । पत्रकारहरुका लागि आयोजित अभिमुखीकरणा कार्यक्रममा बोल्दै प्रमुख आयुक्त थपलियाले राजनीतिक दलबीच उक्त प्रस्ताव गरिएको जानकारी दिएका हुन् ।

‘मौन अवधि भनेको सबैजना चुप लागौं भन्ने हो तर हामीकहाँ मौन अवधिमै सबैभन्दा धेरै चलखेल भएको पाइन्छ’, प्रमुख आयुक्त थपलियाले भने, ‘त्यस्तो चलखेलमा मदिरा मुख्य कारक हो भन्ने लागेर मौन अवधिका बेला देशभर मदिरा बिक्री वितरण नगर्न–नगराउन हामीले प्रस्ताव गरेका छौं ।’

निर्वाचनमा मौन अवधि मतदान सकिनुपूर्वको ४८ घण्टा हुन्छ । थपलियाले घण्टामा मदिराभन्दा लोकतन्त्रको स्वाद मीठो हुने भन्दै भने– ४८ घण्टाको मदिराको स्वादभन्दा लोकतन्त्र र जनमतको स्वाद महत्त्वपूर्ण हो, त्यसैले उक्त अवधिमा मदिरा बिक्री वितरणमा बन्देज लागाउनुपर्छ ।

कैलाली । स्थानीय तह निर्वाचनको लागि उम्मेदवारी मनोनयन दर्ता गर्ने समय एक साता पनि बाँकि छैन । कैलालीमा भने गठबन्धनकै दलहरूबीच भागबण्डाको कुरा नमिल्दा उम्मेदवार छनोटमा ढिलाइ भइरहेको छ । भागबन्डा नमिल्दा पटक–पटक भइरहेको छलफलमा पनि सहमति हुन नसकेको हो ।

केन्द्रमा पाँच दलीय गठबन्धन भए पनि कैलालीमा मूलतः तीन दलीय हुने देखिएको छ । गठबन्धनमा कुरा नमिलेको भन्दै जनता समाजवादी पार्टीले यसअघि नै छुट्टै तालमेल गर्ने निर्णय गरिसकेको छ ।

नेपाली कांग्रेस र माओवादी केन्द्रसँग एकीकृत समाजवादी दलले समान हैसियतका आधारमा भागबन्डा हुनुपर्ने बताएको छ । नेपाली कांग्रेसले कैलालीका १३ स्थानीय तहमध्ये १० स्थानीय तहमा दाबी गरेको छ । तर, अन्तमा आठ स्थानीय तहसम्म भए पनि सहमति गर्ने मनसायमा कांग्रेस देखिएको छ । तर, अन्य दुई दल कांग्रेसलाई आठ पालिका पनि दिन तयार छैनन् ।

उनीहरूले कांग्रेसलाई धनगढी उपमहानगरपालिका सहित पाँच पालिकाका सीमित पार्न खोजेपछि सहमति नजुटेको हो । ‘हामीलाई उहाँहरू पाँच पालिका तपाईंहरूलाई उपयुक्त हुन्छ भन्ने ढंगबाट प्रस्तुत हुनुभएको छ’ बैठकमा सहभागी कांग्रेस नेताले भने, ‘हामीले दश दाबी गरेका छौँ । ८ सम्ममा सहमति हुन सक्छ । त्योभन्दा कमको कुरा गरे गठबन्धनमा सहमति हुँदैन ।’

पटक–पटक भएका बैठकहरूमा भागबण्डामै कुरा नमिलेपछि गठबन्धनमा रहेका दलहरू पनि अब आफ्नै ढङ्गबाट निर्वाचन जान खोजिरहेको बताए ।

अहिले नेपाली कांग्रेसले धनगढी उपमहानगरपालिका, गोदावरी नगरपालिका, गौरीगङ्गा नगरपालिका, घोडाघोडी नगरपालिका, कैलाली गाउँपालिका,चुरे गाउँपालिका, लम्की चुहा नगरपालिका, टीकापुर नगरपालिका र भजनी नगरपालिकामा दाबी गरेको छ ।

अहिले कांग्रेसले दाबी गरेको मध्ये कैलारी गाउँपालिका र भजनी नगरपालिका अघिल्लो स्थानीय तहको निर्वाचनमा माओवादी केन्द्र विजयी भएको थियो ।

अहिले उक्त क्षेत्रमा नेपाली कांग्रेसको नगर कमिटीले गठबन्धन गर्न नहुने भन्दै निर्णय नै गरिसकेका छन् । यसरी निर्णय गर्नेमा यस अघि माओवादी विजयी भएको कैलारी गाउँपालिका र भजनी नगरपालिका, एमाले विजयी भएको मोहन्याल गाउँपालिका, घोडाघोडी नगरपालिका र लम्की चुहा नगरपालिका रहेको छ । ती क्षेत्रमा कांग्रेस बलियो रहेको र एक्लै निर्वाचन लड्दा पनि जित सुनिश्चित भएको भन्दै गठबन्धन नगर्न दबाब आइरहेको कांग्रेस नेताहरू बताउँछन् ।

‘हामीले दाबी गरेका क्षेत्रहरूमा त हामी एकल निर्वाचनमा होमिए पनि जित्ने अवस्था छ’, कांग्रेस कैलालीका उपसभापति भीम बडूवालले भने , ‘केन्द्रको नीति अनुसार गठबन्धन गर्ने कुरामा हामी सहमत छौँ । तर अधिकांश नेता कार्यकर्ताहरुले कैलालीमा कांग्रेसले गठबन्धन गर्न हुँदैन भन्दै दबाब दिइरहनु भएको छ ।’

कांग्रेसबाहेक माओवादी केन्द्र र एकीकृत साजवादीले पनि कैलालीका १३ स्थानीय तह मध्ये करिब आधा दर्जन स्थानीय तहमा दाबी गरेका छन् । एकीकृत समाजवादीको तर्फबाट घोडाघोडी नगरपालिका, गोदावरी नगरपालिका लम्की चुहा नगरपालिका गौरीगङ्गा नगरपालिका र चुरे गाउँपालिकामा दाबी गरेको छ ।

कैलालीमा २०७४ सालको स्थानीय निर्वाचनमा कैलालीमा एमाले सात पालिकामा विजयी भएको थियो । ती मध्ये आफूहरुले पाँच पालिका दाबी गरेको एकीकृत समाजवादी कैलालीका सचिव खडक रावतले बताए । ‘हामीले पाँच पालिकाको दाबी गरिरहेका छौँ । सहमति भए चार पालिका सम्म हामी समझदारी गर्र्छौ’ उनले भने, ‘त्यो भन्दा कम भए हामीलाई मान्य हुने छैन ।’

अहिले कैलालीका १३ स्थानीय तहमध्ये कुनै पनि स्थानीय तहका प्रमुखहरू एकीकृत समाजवादीमा छैनन् ।

गोदावरी र घोडाघोडीका उपप्रमुखले मात्रै एकीकृत समाजवादीमा सनाखत गरेका छन् । तर, एकीकृत समाजवादीका नेता भने अहिले कैलालीका आधाभन्दा धेरै ठाउँमा आफ्नो पार्टी बलियो रहेको दाबी गर्छन् ।

‘यी क्षेत्रमा साङ्गठनिक रूपमा हाम्रो उपस्थिति राम्रो छ । अर्को कुरा ती क्षेत्रमा पहिले एमालेले जितेको हो । रावतले भने, हामी एमालेबाट विद्रोह गरेको आएको हुँदा पनि हामीले ती क्षेत्र पाउनु पर्छ भन्ने मान्यता राखेका छौँ ।’

माओवादी केन्द्रले भने कैलालीमा गठबन्धनका दलहरूबीच सहमतिको आधार बन्न कठिन रहेको जनाएको छ । कांग्रेसले ८ स्थानीय तह, एकीकृत समाजवादीले अन्तिममा ३ स्थानीय तहमा दाबी गरे पनि आफूहरूको भागमा २ स्थानीय तह मात्रै पर्ने भएको हुँदा सहमति कठिन रहेको माओवादीका कैलाली इन्चार्ज हरि ज्ञवालीले बताए ।

‘उहाँहरूले आफ्नै पार्टीलाई मात्रै धेरै भागबण्डा चाहिन्छ भन्ने ढङ्गबाट मात्रै कुरा राख्नुहुन्छ’ उनले भने ‘उहाँहरूको कुरा अनुसार त हामी कैलालीका २ स्थानीय तहमा मात्रै सीमित हुने भयौँ । यसरी तालमेल हुँदैन । ’

कैलालीमा अन्तिममा दुई दलित तालमेल पनि हुन सक्ने उनले बताए । ‘पाँच दलीय गठबन्धनमध्ये जोसँग जसरी मिल्छ त्यसरी तालमेल हुन सक्छ’ उनले भने ‘कैलालीमा दुई दलीय तालमेल पनि नहोला भन्न सकिन्न ।’

माओवादी केन्द्रले पनि आधाभन्दा धेरै क्षेत्रमा दाबी गर्दै आइरहेको छ । तर, अन्य दुई दलको दाबीले माओवादीलाई दुई पालिकामा सीमित गर्न खोजिएको उनको बुझाइ छ । माओवादी केन्द्रले २०७४ सालको स्थानीय तहमा पनि कैलारी र भजनी गरी दुई पलिका विजयी भएको थियो ।

कैलालीमा माओवादीले यस अघि निर्वाचनमा विजयी भएको क्षेत्र र दोस्रो भएको क्षेत्रमा दाबी गरेको हो । .

घोडाघोडी नगरपालिका, गौरीगङ्गा नगरपालिका, मोहन्याल गाउँपालिका, बर्दगोरीगा गाउँपालिका र जानकी गाउँपालिका माओवादी केन्द्र उपविजेता भएको थियो ।

काठमाडौं । आगामी स्थानीय तह चुनावमा महानगरपालिका र उपमहानगरपालिकाको सिट बाँडफाँटका लागि सत्तागठबन्धनको बैठक आज फेरि बस्दैछ । सोमबार दुईपटक बसेको बैठक निष्कर्षविहीन भएपछि आज फेरि बैठक बस्न लागेको हो । बैठक बिहान प्रधानमन्त्रीनिवास बालुवाटारमा बस्ने बताइएको छ ।

सोमबार साँझ बालुवाटारमा बसेको बैठकमा प्रस्तावित सिट बाँडफाँटको मस्यौदामाथि छलफल भए पनि कतिपय पालिकाको विषयमा दलहरुको आ–आफ्नै दाबी रहेको कारण सहमति नभएको हो ।

आइतबार ६ महानगर र ११ उपमहानगरमा हुने सम्भावित शक्ति बाँडफाँटको खाका बनेको थियो ।

कांग्रेसले पोखरा महानगरसहित इटहरी र कलैया उपमहानगरमा अझै दाबी यथावत राखेको छ । एकीकृत समाजवादीले ६ मध्ये १ महानगर आफूले पाउनैपर्ने र पोखरा उपयुक्त हुने बताउँदै आएको छ ।

पोखरामा समाजवादीले दाबी यथावत राखेपछि तत्कालै पोखराबारे निर्णय नलिने विषयमा पनि गठबन्धनमा छलफल भएको छ । त्यस्तै माओवादीले भरतपुर महानगरमा आफ्नो दाबी गरिरहेको छ । भरतपुरमा मेयर माओवादीले लिएर उपमेयरसहित सबै वडाध्यक्ष कांग्रेसलाई दिने सहमति भएको भनिएको छ । तर यसबारे पनि टुंगो लागिसकेको छैन ।