Category: विश्व प्रेस

काठमाडौं । युक्रेनसग युद्धमा भएको तथा अमेरिकी नेतृत्वका गुटमा रहेका देशहरूको नाकाबन्दी खेपिरहेको रुसको यो बर्स जीडीपी बढ्ने भएको छ ।

रुसी अर्थमन्त्री एन्तोन सिलुआनोभका अनुसार यो वर्ष ४ प्रतिशत जीडीपी बढ्ने भएको हो।

रुसी विश्व च्यानल आरटीका अनुसार रुस-२४ च्यानलसँगको एक अन्तर्वार्तामा अर्थमन्त्री सिलुआनोभले यस्तो बताएका हुन्।

उनले अन्तर्वार्तामा थपेका छन्, ‘हाम्रो ८ प्रतिशत लगानी बढेको छ भने जनताको आय पनि वृद्धि भइरहेको छ ।’

विश्व बैङ्कले पनि रुसको अर्थतन्त्र बढ्ने देखाएको छ । सन २०२४ मा २।९ प्रतिशत तथा सन २०२५ मा १।४ प्रतिशत बढ्ने उल्लेख गरेको छ ।

सुरुमा क्रमशः २।२ र १।१ प्रतिशत वृद्धि हुने तथ्याङ्क संशोधन गर्दै यो ताजा तथ्याङ्क सार्वजनिक गरिएको हो।

काठमाडौं । युरोपेली देश ग्रिसले खोलाका हजारौं माछा मरेर बग्न थालेपछि एक महिनाको लागि संकटकाल लागू गरेको छ । संकटकाल सेप्टेम्बर महिनाको अन्तसम्म हुनेछ ।

जर्मनीको विश्व च्यानल डीडब्लूका अनुसार तटीय शहर भोलोसमा संकटकाल लागू गरिएको हो । ग्रिसको मध्य भागमा रहेको थेसाली क्षेत्रमा विशाल बाढी आएकोले सङ्लो पानीमा हुने माछाहरु मरेको बताइएको छ ।

मंगलबारमात्रै ग्रिसमा ५७ टन मरेका माछा संकलन गरिएको थियो । बिहीबारसम्म त्यस्तो परिमाण १०० टन पुगेको बताइएको छ ।

काठमाडौं । अमेरिकी दल रिपब्लिकन पार्टीका राष्ट्रपतीय उम्मेदवार तथा पूर्वराष्ट्रपति डोनाल्ड ट्रम्पको चुनावीसभामा फेरि अर्को लफडा भएको छ ।

गत जुलाई १४ मा हत्या प्रयास गरिएको राज्य पेन्सिलभेनिया राज्यमै यस्तो लफडा भएको हो । ट्रम्पले बोलिरहेको बेला पत्रकार दीर्घामा एक युवा जबरजस्त चढ्न खोजेका थिए । अरु ट्रम्प समर्थकहरुले तान्न खोज्दा उनी ओर्लेनन् ।

पछि प्रहरीले ‘टेजर’ प्रयोग गरेर उनलाई लडाएर नियन्त्रणमा लिएको थियो । रुसी विश्व च्यानल आरटीको समाचारमा देखाइएको भिडिओअनुसार यस्तो उपद्रो हुँदा ट्रम्पका समर्थकहरु शान्त देखिएका छन् । उनीहरुले उपद्रो गर्ने युवालाई कुनै यातना दिएका छैनन् ।

गत जुलाई १४ मा ट्रम्पलाई गोली हान्दा पनि उनका समर्थकहरुले भागदौड गरेनन् । आफ्ना समर्थकहरुले भागदौड नगरेर धेरै राम्रो धैर्य देखाएको भन्दै ट्रम्पले पटकपटक भन्दै आएका छन् । गोली लागेको दिन कार्यक्रममा उपस्थित हजारौंले भागदौड गरेको भए धेरैको ज्यान जाने जोखिम हुनेमा त्यसो नभएको ट्रम्पले बताउँदै आएका छन् ।

आगामी नोभेम्बरमा हुने अमेरिकी चुनावमा वर्तमान उपराष्ट्रपति कमला ह्यारिससँग चुनावी भिडन्त गर्दैछन् ट्रम्प । युद्धविरोधी, अवैध आप्रवासनका विपक्षी तथा युक्रेन युद्धका विरोधी ट्रम्पलाई अमेरिकाभित्र मात्रै होइन, अमेरिकी आडका पश्चिमा देशका धेरै नेताले पनि चुनाव हराउन चाहिरहेको उनका समर्थकहरुले बताउँदै आएका छन् ।

काठमाडौं । नेपालको सीसासँग जोडिएको भारतीय राज्य बिहारको राजधानी पटनामा विद्यालयले सञ्चालन गर्ने डिजेल गाडी बन्द गरिएको छ । पटनाका विद्यालय बसहरुमा यो नियम कडाइका साथ लागू गरिएको छ । यो नियम आइतबार अर्थात सेप्टेम्बर १ बाट कडाइका साथ लागू हुनेछ ।

भारतीय वातावरण क्षेत्रको मिडिया डाउन टू अर्थका अनुसार वायु प्रदूषणको मार कम गर्न यो नियम लागू गरिएको हो । डिजेलको सट्टाका विद्यालयहरुले सीएनजी अर्थात् कम्प्रेस्ड नेचुरल ग्याँस प्रयोग हुने सवारी सञ्चालन गर्नुपर्नेछ ।

पटनाबाहेक दानापुर, खागौल, फूलबारी सरिफ नगर आदि क्षेत्रहरुमा पनि यो नियम लागू गरिएको छ । पटनामा यस अगाडि नै डिजेल बस तथा अटोहरु बन्द गरिएका थिए । डिजेल निरुत्साहित गरेको पटनाले प्राकृतिक ग्याँसलाई प्रयोग गर्न प्रोत्साहन गरेको छ ।

डाउन टू अर्थको समाचार अनुसार बिहारका १० प्रतिशत विद्यालयमा मात्रै अहिले प्राकृतिक ग्याँसलाई इन्धन बनाएर सञ्चालन भएका बसहरु छन् ।

काठमाडौं । ल्याटिन अमेरिकी देश ब्राजिलले साबिकको ट्विटर तथा हाल एक्स भनेर चिनिने सामाजिक सन्जाल प्रतिबन्ध गरेको छ । ब्राजिलको सर्वोच्च अदालतले शुक्रवार यस्तो फैसला गरेको हो ।

न्यायधप्श आलेसान्द्रे दे मोराएसले फैसलामा भीपीएनबाट पनि प्रयोग गर्न निसेध गरेका छन । कसैले प्रयोग गरेको पाइएमा दैनिक ८८७४ अमेरिकी डलर जरिवाना तिर्नुपर्ने छ । यो भनेको ११ लाख नेपाली रुपैयाँ भन्दा धेरै हो । न्यायधीशले मिथ्या सूचना फैलाउने अकाउन्टहरु बन्द गर्न आग्रह गरेका छन्। तर एक्सका मालिक एलन मस्कले अस्वीकार गरेका छन्।

यस्तै उनले एपल र गुगललाई ब्राजिलमा एक्सलाई नराख्न पाचँ दिने समयसीमासहित निर्देशन दिएका छन्। यस्तै एक्सलाई लाग्ने जरिवानाको रकम उठाउन मक्स नै मालिक भएको स्टारलिन्कको ब्राजिलको खाता रोक्का गरिएको छ ।

एक्समा धेरै मिथ्या सूचना भएको र त्यो रोक्न एक कानुनी प्रतिनिधि राख्न ब्राजिलको अदालतले गरेको फैसला एक्सले नमानेपछि यस्तो फैसला आएको रुसी विश्व च्यानल आरटीले उल्लेख गरेको छ ।

काठमाडौं । अमेरिकी राष्ट्रपतीय चुनावका लागि रिपब्लिकन पार्टीका उम्मेदवार तथा पूर्वराष्ट्रपति डोनाल्ड ट्रम्पले फेसबुकका मालिक मार्क जुकरबर्गलाई जेल हाल्ने धम्की दिएका छन् ।

सन् २०२० को चुनावमा आफूलाई हराएर जो बाइडेनलाई जिताउन लागेको आरोप लगाउँदै ट्रम्पले यो पटक त्यस्तै गरे जेल हाल्ने धम्की दिएका हुन् । आगामी हप्ता बजारमा आउन लागेको ट्रम्पको किताबको एक सार्वजनिक खण्डमा यस्तो उल्लेख गरिएको हो ।

रुसी विश्व च्यानल आरटीका अनुसार ट्रम्पको किताबको नाम ‘सेभ अमेरिका’ रहेको छ । किताबमा ट्रम्पले जुकरबर्ग आफ्नी श्रीमतीसँग आफ्नो कार्यालय आएर आफू जस्तो राम्रो अरु नभएको भन्ने तर भित्रभित्रै सक्न लागेको आरोप लाएका छन् । जुकरबर्गसँगको तस्बिर सार्वजनिक गर्दै उनले यस्तो लेखेका हुन् ।

काठमाडौं । युरोपेली सङ्घ (ईयू) ले युक्रेनी सैनिकलाई थप तालिम दिन चाहेको तर युक्रेनमा नै सहयोग गर्ने वा नगर्ने भन्ने विषयमा सदस्य राष्ट्रहरू विभाजित रहेको युरोपेली सङ्घका विदेश नीति प्रमुखले शुक्रबार बताएका छन् ।

ईयूले यस वर्ष करिब ६० हजार युक्रेनी सैनिकलाई तालिम दिने लक्ष्य राखेको हो ।

युरोपेली सङ्घका उच्च कूटनीतिज्ञ जोसेप बोरेलले ब्रसेल्समा आयोजित पत्रकार सम्मेलनमा भने“हामी युक्रेनी सैनिकको प्रशिक्षण अभियान कसरी बढाउने भन्ने विषयमा छलफल गर्नेछौँ ।”

“हामी युक्रेनमा समन्वय केन्द्र बनाउनेबारे सोचिरहेका छौँ, तर युक्रेनी भूमिमा युक्रेनी सैनिकहरूलाई युरोपेली प्रशिक्षकहरूसँग प्रशिक्षित गर्ने कुनै सम्झौता भएको छैन,” बोरेलले भने

यो मुद्दाले इयूका २७ सदस्य राष्ट्रलाई विभाजित गरेको छ । इस्टोनिया, फ्रान्स र स्वीडेनलगायत धेरै देशहरूले युक्रेनमा प्रशिक्षण सैनिकहरूलाई समर्थन गर्छन् । तर, हङ्गेरीलगायत अन्य देशहरूले यस्तो कदमले द्वन्द्व बढाउन सक्ने डर व्यक्त गरेका छन्।

फ्रान्सका राष्ट्रपति इमानुएल म्याक्रोँले युक्रेनमा पश्चिमी सेना पठाउने सम्भावनालाई अस्वीकार नगरे पनि त्यस्तो कदम चाल्ने विषयमा कुनै सहमति नभएको बताएपछि अन्य मित्रराष्ट्रहरूले फ्रान्सको भूमिकाप्रति आशङ्का व्यक्त गरेका छन् ।

मन्त्रीहरूले युक्रेनी सैनिकहरूलाई प्रशिक्षण दिनका लागि युरोपेली मिसनको नवीकरणबारे छलफल गर्नेछन् तर हालको योजनामा युक्रेनी भूमिमा यसलाई सञ्चालन गर्ने उल्लेख गरिएको छैन, ईयूका एक कूटनीतिज्ञले नाम उल्लेख नगर्ने शर्तमा भने ।

युक्रेनका विदेशमन्त्री दिमित्रो कुलेबाले बिहीबार गरेको अपिलपछि बोरेलले युरोपेली सङ्घका राष्ट्रहरुलाई युक्रेनमा हतियार आपूर्तिको गति बढाउन आग्रह गरेका थिए ।

“युक्रेन र युक्रेनी शहरहरूमा विशेष गरी ठूला हवाई आक्रमण भइरहेको र जुनदेखि धेरै प्रतिज्ञाहरू गरिएको बताउँदै बोरेलले भने, “हामीले प्रतिक्रिया जनाउनुपर्छ भन्ने स्पस्ट छ।”

उनले किएभले हतियार आपूर्ति कसरी प्रयोग गर्छन् भन्ने विषयमा युक्रेनमाथि लगाइएको प्रतिबन्धको पनि आलोचना गरे ।

उनले भने, “रूसी भूमिभित्र निशाना बनाउन दिनुको अर्थ मस्कोविरुद्धको युद्धमा हुनु हो भन्नु हास्यास्पद हो। हामी युक्रेनलाई समर्थन गरिरहेका छौँ।”

युक्रेनले आफ्ना मित्रराष्ट्रहरूलाई हतियार प्रयोगमा रहेको प्रतिबन्ध फुकुवा गर्न पटक–पटक आग्रह गर्दै आएको छ तर बर्लिन र वासिङ्टनले मस्कोसँग मुठभेड हुने डरले यस्तो कदमको विरोध गरेका छन् ।

काठमाडौं । पश्चिमा देशहरूले युक्रेनलाई दिएको एक एफ-१६ युद्ध जहाज र त्यसका पाइलट दुवै बेपत्ता भएका छन् । अमेरिकी तथा युक्रेनी मिडियाहरूले यसको औपचारिक पुष्टि गरेका छन् ।

पाइलट एलेक्सी मेसका साथीले समवेदना दिएको तस्बिर सार्वजनिक भएसँगै एफ-१६ जहाज र पाइलट दुवै हराएको सार्वजनिक भएको रुसी विश्व च्यानल आरटीले उल्लेख गरेको छ ।

अमेरिकाले हत्तपत्त धेरै देशले किन्छु भन्दा पनि विभिन्न सर्त राखेर नदिने एफ-१६ युद्ध जहाज आक्रामक जहाज हो ।

युक्रेनसँग अहिले यस्ता ६ जहाज भएको र यो जहाज चलाउन तालिम लिएका पाइलटहरू पनि तयार भएको बताइन्छ । तर, हालसालै एक जहाज र पाइलट बेपत्ता भएपछि पाँच वटा मात्रै जहाज बाँकी भएका छन् ।

जहाज बेपत्ता हुनुमा रुसी हमला हो वा युक्रेनी कमजोरी त्यो खुलाइएको छैन । तर, कतिपयले युक्रेनी फौजकै गोली लागेर जहाज बेपत्ता भएको हुनसक्ने आङ्कलन गरेका छन् ।

काठमाडौं । अमेरिकाको कोलोराडोको एक अपार्टमेन्टमा हतियारधारी ग्याङ समुह प्रवेश गरेको छ । उनीहरुको प्रवेशको भिडिओ अहिले अमेरिकी समाजिक संजालमा भाइरल भइरहेको छ । भेनेजुएलाको अपराधिक ग्याङ त्रेन दे आरागुआ अपार्टमेन्टमा प्रवेश गरेको पाइएको छ ।

यो अपराधिक ग्याङका पाँच हजार सदस्य भएको बताइन्छ । कोलोराडोको अपार्टमेन्टमा छिमेरा समुहका सदस्यहरु अमेरिका गैरकानूनी रुपमा प्रवेश गरेकाहरु भएको फक्स न्यूजले उल्लेख गरेको छ ।

अमेरिकी अखबार दि न्यू योर्क पोस्टका अनुसरा यो ग्याङ अमेरिकाका १०० भन्दा धेरै अपराधिक गतिविधिमा सक्रिय भएको पाइएको छ ।

कोलोराडोमा बढेको असुरक्षाकोबारेमा एक स्थानीयले फक्स न्यूजसँग भनेका छन्, ‘यहाँ कुनै सुरक्षाको प्रत्याभूति छैन किनभने प्रहरी आउँदैन । उनीहरुले ढोका थुनेर बस भन्छन् । तर मैले काम गर्नुपर्छ । मैले त भाडा तिर्नुपर्छ ।’

काठमाडौं । जापानमा आएको सामुद्रिक विपत् शान्सान टाइफूनमा परी तीन जनाको मृत्यु भएको छ ।

मृत्यु हुनेमा ७० वर्ष उमेर समूहका दम्पती तथा ३० वर्ष उमेर समूहका एक युवक भएको बताइएको छ । मृत्यु हुने तीनै जना पाँच जनाको एकै परिवारका सदस्यहरू थिए ।

यस्तै ३९ जना घाइते भएका छन् । बेलायती विश्व च्यानल बीबीसीका अनुसार दक्षिणी जापानमा आएको टाइफूनको कागोसिमा प्रिफेक्चरमा आएको थियो ।

२५२ किलोमिटर प्रतिघण्टाको दरले आएको टाइफूनले बाढी, पहिरो र आँधी एकै पटक आएको बताइएको छ ।

जापानमा अहिले साढे २५ हजार घरपरिवारमा विद्युत बन्द भएको छ ।

काठमाडौं । विश्वको चर्चित सामाजिक संजाल टेलिग्रामका संस्थापक पाभेल दुरोभ रिहा भएका छन् । गत शनिबार फ्रान्सको राजधानी पेरिसको उत्तरी भागमा रहेको विमानस्थलबाट निजी जहाजमा आउँदा पक्राउ परेका उनलाई पचास लाख यूरो धरौटी लिएर छाडिएको हो ।

रुसी विश्व च्यानल आरटीका अनुसार पक्राउ परेको चार दिनपछि फ्रान्सेली अदालतले उनलाई धरौटीमा छाड्न आदेश दिएको हो । अपराधिक समूहले टेलिग्राम च्यानल प्रयोग गरेको आरोपमा दुरोभलाई पक्राउ गरिएको फ्रान्सेली भनाई छ ।

रुसी नागरिक दुरोभको रुसबाहेक फ्रान्स, संयुक्त अरब इमिरेट्स, सेन्ट किट्स र नेभिस देशका पनि नागरिकता रहेका छन् । उनी विश्वका युवा खर्बपतिमा एक हुन् । उनको सम्पनी साढे १५ अर्ब भएको फोर्ब्सको आँकडा छ ।

काठमाडौं । अमेरिकामा बेपत्ता पारिएकी नेपाली चेली ममता काफ्लेको विषयमा प्रहरीले अनुसन्धानलाई तीव्रता दिएको छ । मंगलबार फेरि एकपटक ममता बस्ने घरमा प्रहरीले सघनरुपमा खानतलास गरेको स्थानीय सञ्चारमाध्यमले जनाएका छन् ।

श्रीमान नरेश भट्टले ममताको हत्या गरेर शव गायब पारेको आशंका गरिँदै आएको छ । नरेश प्रहरी हिरासतमा छन् । उनलाई अदालतले धरौटीमा रिहा गर्न अस्वीकार गर्यो । उनीहरुको घरभित्र शव घिसारिएको संकेतहरु देखिएको प्रहरीले जनाएको छ ।

पछिल्लो खानतलासी शवको खोजीका लागि हुन सक्ने अनुमान गरिए पनि प्रहरीले केही बताएको छैन । प्रत्यक्षदर्शीहरुका अनुसार खानतलासीका क्रममा कुकुरको पनि प्रयोग गरिएको थियो । प्रहरीले भर्याङ पनि साथमा लगेका थिए, जुन छतमा चढ्नका लागि भएको छिमेकीहरुको भनाइ छ । यद्यपि, प्रहरीले यसबारे बताएको छैन ।

मनासस प्रहरीले अहिलेसम्म ममताको मृत्यु भएको पुष्टि गरेको छैन । पछिल्लो ताजा अन्तरवार्तामा मनासस पार्क प्रहरी प्रमुख मारियो लुगोले घटनाको अनुसन्धान तदारुकताका साथ भइरहेको बताए । ममतालाई जीवित भेट्टाउन सकिने विश्वास आफूले नराखेको उनको भनाइ छ ।

‘हामीले दशौंपटक घटनास्थलमा सर्च गरिसकेका छौं । आज पनि सर्च गर्यौं । धेरै प्रमाणहरु फेला परेका छन् । मैले विश्वास गरेको छैन कि उनी जीवित भेटिनेछिन्’, उनले भने । अभियुक्त नरेश भट्टको अर्को सुनवाइ अक्टोबर २४ लाई तोकिएको छ । तर, आगामी बिहीबार उनको ‘मोसन हियरिङ’ हुने अमेरिकी सञ्चारमाध्यमले जनाएका छन् ।

क्यानबेरा । अष्ट्रेलियाली सरकारले सन् २०२५ मा विश्वविद्यालय र व्यवसायिक शिक्षा प्रदायकमाझ नयाँ विदेशी विद्यार्थी भर्ना दुई लाख ७० हजारमा सीमित गर्ने मङ्गलबार घोषणा गरेको छ ।

घोषणाअनुसार अष्ट्रेलियाले आगामी नयाँ वर्षमा सार्वजनिक वित्त पोषित विश्वविद्यालयमा एक लाख ४५ हजार व्यवसायिक शिक्षा र प्रशिक्षण (भीईटी) क्षेत्रमा ९५ हजार तथा अन्य विश्वविद्यालय र गैरविश्वविद्यालय उच्च शिक्षा प्रदायकहरूमा ३० हजार विदेशी विद्यार्थीलाई अनुमति दिनेछ ।

शिक्षामन्त्री जेसन क्लेयरले विश्वविद्यालयलाई सन् २०१९ को तुलनामा १५ प्रतिशत बढी अन्तर्राष्ट्रिय विद्यार्थी भर्ना गर्न अनुमति दिइने तथा भीईटी प्रदायकका लागि २० प्रतिशतले कटौती गरिने जनाए ।

उनले निर्धारित सीमाहरू संसदले पारित गर्ने बताउँदै विदेशी विद्यार्थीको सङ्ख्या सन् २०१९ को भन्दा सात हजारले कम र २०२३ को भन्दा ५३ हजार कम गर्ने जानकारी दिए ।

घोषणाअनुसार विदेशी विद्यार्थीको कोटा पूरा गर्न असफल हुने संस्थाहरूले रिक्त पदहरू अन्य संस्थानहरूमा स्थानान्तरण गर्न सक्छन् ।

घोषणा शिक्षा प्रणालीलाई अझ प्रभावकारी र निष्पक्ष रूपमा स्थापना गर्ने प्रयत्नशील रहेकाले केही विश्वविद्यालयलाई मात्र नभई सम्पूर्ण क्षेत्रलाई लाभान्वित गर्ने क्लेयरले उल्लेख गरे ।

यसअघि सत्तारुढ लेबर पार्टीले सन् २०२२-२३ मा अष्ट्रेलियाको कुल आप्रवासन सङ्ख्या पाँच लाख २८ हजारबाट घटाएर सन् २०२४-२५ सम्ममा दुई लाख ६० हजार बनाउने रणनीतिसहित विदेशी विद्यार्थी सङ्ख्या सीमित गर्ने योजना घोषणा गरेको थियो ।

गत जुलाईमा सरकारले विदेशी विद्यार्थी भिसा आवेदन शुल्क ७१० अष्ट्रेलियन डलरबाट दोब्बर बढाएर एक हजार ६०० बनाएको छ ।

गैरसरकारी संस्था युनिभर्सिटिज अष्ट्रेलियाका प्रमुख कार्यकारी ल्युक सिहीले अगस्तको सिनेट सुनुवाइमा विश्वविद्यालयको अर्बौं डलर राजस्व खर्च गर्ने र १४ हजार रोजगारी जोखिममा पार्ने जनाएका थिए ।

उनले विदेशी विद्यार्थीले गत वर्ष अष्ट्रेलियाको कुल गार्हस्थ उत्पादनको आधाभन्दा बढी हिस्सा ओगटेको बताउँदै लगभग उनीहरुले नै राष्ट्रलाई मन्दीबाट जोगाएको उल्लेख गरे ।

सरकारी तथ्याङ्कका अनुसार सन् २०२३ मा अष्ट्रेलियाको अर्थतन्त्रमा अन्तर्राष्ट्रिय शिक्षाको मूल्य ४७.८ बिलियन अष्ट्रेलियन डलर थियो । -रासस/सिन्ह्वा

काठमाडौं । क्यानडाले चिनियाँ विद्युतीय गाडीमा शत प्रतिशत कर लगाउने भएको छ । क्यानडाका प्रधानमन्त्री जस्टिन ट्रूडोले करको यो दायरा सोमबार सार्वजनिक गरेका हुन् ।

जर्मनीको विश्व च्यानल डीडब्लूका अनुसार यो कर लगाइएसँगै अमेरिका तथा युरोपेली संघपछि धेरै कर लगाउने देशको सूचीमा क्यानडा पनि थपिएको छ ।

विश्वभर चिनियाँ गाडीले अति खपत गरेको कारणले यस्तो कर लगाइएको क्यानडेली सरकारले बताएको छ । अति खपत भन्ने शब्द अमेरिका तथा युरोपेली संघले पनि प्रयोग गरिरहेका छन् ।

काठमाडौं । बेलायतको राजधानी लण्डनको एक अपार्टमेन्टमा आगलागी भएको छ । आगलागीमा परेका १०० जनालाई सुरक्षित स्थानमा सारिएको जर्मनीको विश्व च्यानल डीडब्लूले उल्लेख गरेको छ ।

पूर्वी लण्डनको डागेनहनमा भएको सोमबार आधा रातबाट आगलागीमा परेका १०० जनालाई सुरक्षित स्थानमा सारिएको छ । स्थानीय समयअनुसार बिहान २ः४४ मा लागेको आगलागी ७ः३० सम्म पनि देखिएको प्रत्यक्षदर्शीहरुले बताएका छन् ।

४० दमकल तथा २२५ अग्नि नियन्त्रकले आगो निभाएका थिए । आगलागीको कारण भने अहिलेसम्म सार्वजनिक भएको छैन ।

काठमाडौं । अमेरिकी पूर्व राष्ट्रपति डोनाल्ड ट्रम्पले तेस्रो विश्व युद्धतर्फ जान लागिएको बताएका छन्।

आज सामाजिक सञ्जालमा पोस्ट गर्दै ट्रम्पले तेस्रो विश्व युद्ध रोक्न आग्रह गरेका छन्।

अरब क्षेत्रमा यत्रतत्र बम खसिरहेको भन्दै उनले राष्ट्रपति जो बाइडेन क्यालिफोर्नियाको समुद्र तटमा निदाइरहेको र उपराष्ट्रपति कमला ह्वारिस चुनावी बस यात्रामा हिँडेर बेवास्ता गरेको आरोप लाएका छन्। उनले कमलालाई ‘कमरेड’ उपमा दिएका छन् ।

आजबाट चर्किएको इजरायल र लेबनानका हतियारधारी समूह हेजबुल्ला हानाहानको बारेमा बोल्दै ट्रम्पले यस्तो बताएका हुन्।

अरुबेला आफ्नै सामाजिक सञ्जाल ट्रुथ सोसलमा धेरै लेख्ने उनले यो पोस्ट चैँ एक्समा पनि लेखेका छन्।

काठमाडौं । अहिले एक्स नाममा रुपान्तरण भएको साविकको ट्वीटरका मालिक एलन मस्कले टेलिग्रामका संस्थापक पाभेल दुरोभलाई छुटाउन अपिल गरेका छन् । उनले आफ्नो सामाजिक संजाल एक्समा एक पोस्ट गर्दै लेखेका छन्, ‘पाभेललाई छोड ।’

यस्तै फ्रान्सेली भाषाले छोड, छोड, छोड भनेर मस्कले तीन पटक लेखेका छन् । अझ रोचक कुरा मस्कले पाभेलले उनी र उनले खरिद गरेको एक्सको बारेमा गरेको अन्तरवार्ताको भिडिओ क्लिपलाई राखेर पाभेललाई छोड भएका छन् । अमेरिकी सेलिब्रेटी पत्रकार टकर काल्र्सनसँगको अन्तरवार्ताको क्लिप उनले राखेका छन् ।

एक मिनेट ११ सेकेण्डको क्लिपमा पाभेल दुरोभले भनेका छन्, ‘अहिले ट्वीटर वा एक्स धेरै वाक स्वतन्त्रता पक्षधर बन्दै गएको छ । यो भव्य विकास हो । अहिले कुराहरु परिवर्तन भइरहेका छन् । हामी यो तथ्यलाई माया गर्छौ कि इलनले ट्वीटर किने । हामीले सोच्यौँ कि यो धेरै कुराको कारणले राम्रो विकास थियो । पहिलो कारण नवप्रवर्तन । एक्सले धेरै थोक गर्न खोजिरहेको देखिन्छ । केही गल्तीहरु हुनेछन् । केहिले काम गर्नेछन् । तर, कम्तिमा उनीहरु नवप्रवर्तन गर्न प्रयत्नशील छन् । यो यस्तो कुरा हो जुन कुरा पछिल्लो दशकमा पहिले टेलिग्राम र अरु केही कम्पनीहरु भन्दा बाहिर थिएन । तर एक्सले केही नयाँ गर्न खोजिरहेको छ । उनीहरु फरकफरक कुरा गर्न खोजिरहेका छन् । उनीहरुले सर्जकलाई शक्ति दिइरहेका छन् । अर्थतन्त्रको चक्रलाई राम्रो बनाउन खोजिरहेका छन् । यी सबै उत्साहजनक कुराहरु हुन् । र मलाई लाग्छ हामीलाई यस्ता अरु धेरै कम्पनीहरु चाहिन्छन् । मलाई थाहा छैन यो मानवीयताको लागि कति राम्रो हुन्छ जसरी इलनले धेरै समय ट्वीटरमा अझ राम्रो बनाउन बिताइरहेका छन् । तर, यो पक्कै पनि सामाजिक संजालको उद्योगको लागि राम्रो हो ।’

याे पनि पढ्नुस्: टेलिग्रामका संस्थापक पाभेल फ्रान्समा पक्राउः एलन मस्क पनि पक्राउ पर्न सक्ने विवेक रामास्वामीको आशंका

काठमाडौं । विश्व चर्चित सामाजिक सञ्जाल टेलिग्रामका संस्थापक पाभेल दुरोभ फ्रान्सबाट पक्राउ परेका छन् । उनी रुसी नागरिक हुन् । निजी जहाजबाट फ्रान्स पुगेका पाभेललाई अवतरणलगत्तै पेरिसको उत्तरी भागमा पक्राउ गरिएको बेलायती विश्व सेवा बीबीसीले जनाएको छ ।

३९ वर्षीय दुरोभलाई टेलिग्रामको बारेमा परेको उजुरीको आधारमा पक्राउ गरिएको हो । रुसी सरकारलाई सूचना नदिँदा टेलिग्राम सन् २०१८ मा बन्द गरिएको थियो । पछिल्लो समयमा भने सञ्चालनमा थियो । अहिले टेलिग्रामको मुख्यालय यूएईमा छ । केही महिनाअगाडि अमेरिकी चर्चित पत्रकार टकर कार्ल्सनसँगको अन्तर्वार्तामा दुरोभले आफूलाई रुस तथा अमेरिका दुवैतर्फबाट असुरक्षा भएको बताएका थिए ।

रुसको युक्रेन हमलामा धेरै प्रयोग भएको सामाजिक सञ्जाल टेलिग्राम हो । दुरोको पक्राउपछि अमेरिकी रिपब्लिकन पार्टीका उम्मेदवार भएर अहिले ट्रम्पलाई साथ दिएका विवेक रामास्वामीले सामाजिक सञ्जाल एक्समा एलन मस्कलाई पनि भविष्यमा पक्राउ गर्न सक्ने भन्दै लेखेका छन्, ‘अहिले टेलिग्राम । पछि एक्स ।’ जवाफमा मस्कले भनेका छन्, ‘सत् प्रतिशत ।’

काठमाडौं । अमेरिकाको डेमोक्रेटिल दलको लिगेसी भएका स्वतन्त्र उम्मेदवार रोबर्ट एफ. केनेडी जुनिलयरले राष्ट्रपतीय उमेदवारमा डोनाल्ड ट्रम्पलाई समर्थन गरेका छन् ।

हिजो एरिजोनामा भएको राजनीतिक सभामा बोल्दै केनेडीले समर्थन गरेका हुन् । उनी सन १९६८ मा राष्ट्रपतीय उमेदवारीको दौरानमा हत्या गरिएका रोबर्ट एफ. केनेडीका छोरा हुन् ।

यस्तै सन १९६३ मा उनका बडाबा जोन एफ. केनेडीको पनि हत्या भएको थियो । उनी चैँ राष्ट्रपति भएकै बेला हत्या गरिएका थिए ।

अमेरिकी राजनीतिमा लागेर आफ्ना बुबा र बडाबा गुमाएका केनेडीले यो वर्षको राष्ट्रपतीय चुनावमा स्वतन्त्र लड्दा सुरक्षा मागेका थिए । तर, गत जुलाई १४ मा पेन्सिलभेनियाको बट्लरमा डोनाल्ड ट्रम्पलाई हत्या प्रयास भएपछि मात्रै उनलाई राज्यको सुरक्षा दिइएको थियो ।

पारिवारिक हत्या भएको कथा र उनको राजनीति दुवै कुरामा ट्रम्पले शनिवार बोले । उनले भने, ‘यदि डेमोक्रेटिक दलमा चुनाव लड्न दिएको भए बाइडेन भन्दा धेरै राम्रो जित हुन्थे केनेडीको ।’

उनले केनेडीहरुको हत्याको फाइल खोल्ने पनि बताएका छन् शनिवारको एरिजोनाको भाषणमा । उनले भने, ‘म राष्ट्रपति भएपछि केनेडी हत्याका सबै फाइलहरू गोप्यबाट सार्वजनिक गर्नेछु ।’

काठमाडौँ । इजरायलले लेबनानमा भएको लडाकु समूह हेजबुल्ल्लाको क्षेत्रमा गोलाबारी सुरु गरेको छ ।

बेलायती विश्व च्यानल बीबीसीका अनुसार इजरायलमा रकेट प्रहार गर्ने संकेत थाहा पाएपछि हमला सुरु भएको इजरायली तर्क छ ।

इजरायली रक्षा बलका प्रवक्ता डेनियल हागरीले भनेका छन्, ‘आत्मरक्षाको लागि ती निशानाहरू हटाउन इजरायलले आतंक निशानामा हमला गरिरहेको छ ।’

यस्तै हेजबुल्लाले पनि इजरायलमा हमला सुरु गरेको बताएको छ । ठूलो परिणामका ड्रोन हमला सुरु गरेको हेजबुल्लाले बताएको छ ।

आइतबार इजरायलभरी आपतकालीन घण्टीहरू बजेका थिए । यसले हेजबुल्ला हमलालाई संकेत गरेको बताइएको छ ।

इजरायली प्रधानमन्त्री बेन्जामिन नेतान्याहु र उनका रक्षामन्त्री योआभ गालान्टले इजरायली रक्षा बलको मुख्यालय तेल अभिभमा बसेर अवस्थाको व्यवस्थापन गरिरहेको बीबीसीले बताएको छ ।

अलजजिराका अनुसार हेजबुल्लाले गत जुलाईमा आफ्ना कमान्डर फुआद सुकरलाई हत्या गरेको प्रतिकारमा हमला गरेको बताएको छ । हेजबुल्लाले ११ इजरायली ब्यारेकमा हमला गरेको बताएको छ ।

काठमाडौं । मलेसियाको राजधानी क्वालालाम्पुरमा शुक्रबार फुटपाथ भाँसिएर एक महिला बेपत्ता भएकी छन् । उनलाई खोज्न मलेसियाली सुरक्षाकर्मीहरु खटिएको बेलायती विश्व च्यानल बीबीसीले जनाएको छ ।

बीबीसीका अनुसार फुटपाथमा भासिएर बेपत्ता भएकी महिला भारतीय हुन् । ४८ वर्षकी ती महिलालाई जल इण्डिया मस्जिद क्षेत्रको सडक किनारमा हुँदा फुटपाथले निलेको बताइएको छ ।

मले मेलका अनुसार ती भारतीय महिला मलेसिया पुगेको दुई महिनामात्रै भएको छ । मलेसियामा भएका छोराले बोलाएर उनी पुगेकी थिइन् । आन्ध्र प्रदेशकी उनको नाम विजया लेचमी भएको बताइएको छ ।

उनका छोराले आमा फुटपाथमा बेपत्ता भएको टिकटक भिडिओ हेरेपछि जानकारी पाएर आएको मलेसियाली समाचार पोर्टल मले मेललाई बताएका छन् । अहिलेसम्म उनको उद्धार हुन नसकेको बताइएको छ ।

काबुल । अफगानिस्तानमा तालिबान सरकारको मन्त्रालयले महिलालाई सार्वजनिक रुपमा बोल्न र अनुहार देखाउन प्रतिबन्ध गर्ने नयाँ कानून लागू गरेको ग्लोबल न्यूजले जनाएको छ । यो कानूनले अफगानिस्तानमा महिलाको जीवन अझ सीमित गर्ने भएको छ ।

अफगानिस्तानमा तालिबानको कब्जापछि सन् २०२१ मा स्थापना भएको ‘सद्गुणको प्रचार र दुराचारको रोकथाम’ मन्त्रालयले नयाँ कानून जारी गरेको हो ।

११४ पृष्ठको कानूनी दस्तावेजले अफगानिस्तानको सार्वजनिक जीवनका पक्षहरूलाई समेटेको छ । मन्त्रालयका प्रवक्ता मौलवी अब्दुल गफर फारूकले भने, ‘हामी आश्वासन दिन्छौं कि यो इस्लामिक कानूनले सद्गुणको प्रवर्द्धन र दुराचार उन्मूलनमा ठूलो मद्दत गर्नेछ ।’

दस्तावेजको धारा १३ मा महिलाले सार्वजनिक रूपमा प्रस्तुत हुँदा कसरी लुगा लगाउनुपर्छ र कस्तो व्यवहार गर्नुपर्छ भन्ने कुराको व्याख्या गरिएको छ ।

महिलाले आफू प्रलोभनमा नपर्न र अरूलाई प्रलोभनमा नपार्न सार्वजनिक रूपमा प्रस्तुत हुँदा अनुहारसहित आफ्नो सम्पूर्ण शरीर ढाक्न आवश्यक रहेको नयाँ कानूनले जनाएको छ । महिलाहरुले सामान्यतया लगाउने हिजाब जसले कपाल र घाँटीमात्र ढाक्छ अब नयाँ कानूनअनुसार स्वीकार्य नभएको ग्लोबल न्यूजले जनाएको छ ।

महिलाको आवाज बढी ‘लालाहित’ हुने व्याख्या गर्दै नयाँ कानूनले अब महिलालाई सार्वजनिक रूपमा गाउन वा चर्को स्वरमा बोल्न निषेध गरेको छ । महिलालाई रगत वा विवाहद्वारा सम्बन्धित नभएका पुरुषलाई हेर्ने अनुमति नभएको व्याख्या नयाँ कानूनले गरेको छ ।

यी नियमहरू उल्लङ्घन गर्दा सजायस्वरुप सम्पत्ति जफत वा तीन दिनसम्म हिरासतमा राख्न सकिने चेतावनी दिइएको छ । मन्त्रालयले पहिले नै समान नैतिक मापदण्डहरू लागू गर्दै यसको उल्लङ्घनका लागि हजारौंलाई हिरासतमा लिएको छ ।

ह्युमन राइट्स वाचको महिला अधिकार विभागका सहयोगी निर्देशक हिथर बारले नयाँ नियमको टिप्पणी गर्दै भने, ‘यी नियमहरू पहिले नै थिए, तर औपचारिक थिएनन्, अब औपचारिक बनाइएको छ । मलाई लाग्छ यो हामीले विगत तीन वर्षदेखि देखिरहेका कुराको सङ्केत हो, दमनको क्रमिक वृद्धि हो ।’

तालिबानले अफगानिस्तान कब्जा गरेदेखि महिलाको स्वतन्त्रतामा कडा प्रतिबन्ध लगाउँदै आएको छ । सन् २०२२ मा तालिबानले महिलाहरूलाई छैटौं कक्षाभन्दा माथि विद्यालय जानबाट प्रतिबन्ध लगाएको थियो ।

त्यसैगरी सन् २०२२ मा तालिबानले महिलालाई गैरसरकारी संस्था (एनजीओ)मा काम गर्न प्रतिबन्ध लगाएको थियो । ग्लोबल न्यूजसँग कुरा गर्ने एक महिलाले एनजीओमा जागिर गुमाएपछि आफ्नो परिवार गरिबीमा डुबेको बताइन् ।

‘म मेरो परिवारको आर्थिक भार बोक्ने एकमात्र आधार हुँ । हामी परिवारमा चार जनामात्रै छौं, म, मेरी बहिनी र मेरा आमाबाबु । मेरो बुबा अहिले बिरामी हुनुहुन्छ । हामीलाई बिहानबेलुका खान पनि समस्या छ’, उनले भनिन् ।

महिलामाथि लगाइएको नयाँ प्रतिबन्धका अतिरिक्त बुधबार पारित भएको कानूनले सङ्गीत बजाउन पनि निषेध गरेको छ । यसले पुरुषलाई दाह्री काट्न पनि निषेध गरेको छ । यस कानूनले चालकहरूलाई पुरुष अभिभावकविना महिलालाई ओसारपसार गर्न निषेध गरेको छ ।

गत महिना संयुक्त राष्ट्रसङ्घको एक प्रतिवेदनले मन्त्रालयले आफ्नो आदेश र कार्यान्वयन विधिमार्फत अफगानीबीच डर र धम्कीको वातावरणलाई बढावा दिइरहेको सङ्केत गरेको थियो ।

तालिबानले संयुक्त राष्ट्रसङ्घको प्रतिवेदनलाई अस्वीकार गरेको छ । -रासस/एएनआई

किएभ । रुसको कुर्स्क क्षेत्रमा किएभले अचानक आक्रमण गरेको दुई साता नबित्दै रूस र युक्रेनले शनिबार २३० जना युद्धबन्दीको आदानप्रदान गरेको घोषणा गरेका छन् । आदानप्रदानमा दुबैतर्फका बराबर युद्धबन्दी रिहा भएको मध्यस्थकर्ता संयुक्त अरब इमिरेट्स (यूएई)ले जानकारी गराएको छ ।

कुर्स्कमा युक्रेनले आफ्नो आक्रमण बढाउँदै गर्दा र रूसले पूर्वी युक्रेनी शहर लक्षित आक्रमणको तयारी गरिरहेको समाचार आइरहेको समय यो आदानप्रदान भएको हो । युक्रेनी स्वतन्त्रता दिवसमा पनि यस्तो आदानप्रदान भएको थियो ।

दुवै देशले कैदी अदलाबदली सम्झौतामा मध्यस्थता गरेको यूएईप्रति आभार प्रकट गरेका छन् ।

‘हाम्रा अन्य ११५ देशभक्त सुरक्षाकर्मी आज घर फर्किसकेका छन्’, युक्रेनका राष्ट्रपति भोलोदिमिर जेलेन्स्कीले भने, ‘यी सैनिक नेशनल गार्ड, आर्म्ड फोर्सेज, नेभी, स्टेट बोर्डर गार्ड सर्भिसका सैनिक हुन् ।’

उनले युक्रेनको झन्डा बेरेर बसेका मानिसहरूको फोटोसहित सन्देश जारी गरेका छन् ।

किएभले गत अगस्त ६ मा भएको कुर्स्क आक्रमणमा सयौं रूसी सैनिकलाई बन्धक बनाएको यसअघि बताएको थियो ।

मस्कोले उक्त आदानप्रदानको पुष्टि गर्दै कुस्कमा बन्दी बनाइएका ११५ सैनिकलाई फिर्ता गरिएको जनाएको छ ।

रूसी रक्षा मन्त्रालयले भनेको छ, ‘वार्ता प्रक्रियाको परिणामस्वरुप कुर्स्क क्षेत्रमा बन्दी बनाइएका ११५ जना रूसी सैनिकलाई किएभ शासनको नियन्त्रणमा रहेको इलाकाबाट फिर्ता गरिएको छ । ती सैनिक अहिले छिमेकी बेलारूसमा रहेका छन्, उनीहरूलाई ‘मनोवैज्ञानिक-चिकित्सा सहायता’ प्राप्त भइरहेको छ र चाँडै नै उनीहरूलाई स्वदेश ल्याइनेछ ।’

यूएईले रूसी सङ्घ र गणतन्त्र युक्रेनबीच नयाँ बन्दी आदानप्रदानमा सफलतापूर्वक मध्यस्थता गरेको जनाएको छ ।

किएभ र मस्कोबीच दुई वर्षभन्दा लामो युद्ध जारी रहे पनि युद्धका क्रममा विपक्षीको नियन्त्रणमा गएका कैदीहरूको पटकपटक आदानप्रदान पनि हुँदै आएको छ । -रासस/एएफपी

काठमाडौं । बङ्गलादेशको अन्तरिम सरकारले पूर्वप्रधानमन्त्री शेख हसिनाको कूटनीतिक राहदानीलाई बिहीबार रद्द गरेको छ ।

संयुक्त राष्ट्रसङ्घको एक टोली कथित मानव अधिकार उल्लङ्घनको अनुसन्धान गर्ने कि नगर्ने भनेर मूल्याङ्कन गर्न ढाका पुगेको एक दिनपछि हसिनाका दस्तावेजहरू रद्द गर्ने कदमले उनको भविष्यको योजनालाई अन्योलमा पार्नसक्छ ।

सरकारी जागिरमा व्यवस्था गरिएको आरक्षण दुरूपयोग गरिएको भन्दै यसको विरोधमा सुरू भएको विद्यार्थी आन्दोलनमा सहभागिता बढ्दै जाँदा पूर्व प्रधानमन्त्री हसिना आफ्ना अति निकटस्थ सदस्यसहित हेलिकप्टरमार्फत् नयाँदिल्लीमा शरण लिन पुगेकी थिइन् । आन्दोलनकारी ढाकास्थित उनको सरकारी निवासमा पुगी तोडफोडसमेत गरेका थिए ।

उनको १५ वर्ष लामो शासनको अन्त्यमा भएको आन्दोलनका क्रममा ४५० भन्दा बढी व्यक्तिको मृत्यु भएको थियो ।

गृहमन्त्रालयले एक विज्ञप्ति जारी गर्दै हसिनाको राहदानी र सरकारका पूर्वमन्त्री तथा पूर्वसांसदको राहदानी रद्द गर्नुपर्ने जनाएको छ ।

यसले हसिनालाई शरण दिइरहेको क्षेत्रीय शक्तिराष्ट्र भारतका लागि पनि कूटनीतिक दुविधा खडा गरेको छ । भारतले हसिनालाई शरण दिएपनि प्रधानमन्त्री मोदीले बङ्गलादेशका नयाँ नेता नोबेल पुरस्कार विजेता मोहम्मद युनुसलाई पनि समर्थन गरेका छन् ।

बङ्गलादेशको गृहमन्त्रालयले जारी गरेको विज्ञप्तिमा भनिएको छ, ‘पूर्वप्रधानमन्त्री, उनका सल्लाहकार, पूर्व मन्त्रीमण्डल र विघटित राष्ट्रिय सभाका सबै सदस्य आफ्नो ओहदाका आधारमा कूटनीतिक राहदानीका लागि योग्य थिए ।’

“यदि उनीहरूलाई पदबाट हटाइएको वा अवकाश दिइएको अवस्थामा उनीहरूको र उनीहरूका पति वा पत्नीको कूटनीतिक राहदानी रद्द गर्नुपर्नेछ,” विज्ञप्तिमा भनिएको छ ।

ढाकाका नयाँ अधिकारीहरूले हसिना र उहाँको कार्यकालमा अन्य पूर्व उच्च अधिकारीहरूले विशेष राहदानीका लागि आवेदन दिन सक्ने तर ती कागजातहरू स्वीकृतिमा निर्भर रहेको बताएका छन् ।

‘माथि उल्लेखित व्यक्तिले सामान्य राहदानीका लागि नयाँ आवेदन दिँदा दुई वटा सुरक्षा निकायले राहदानी जारी गर्नका लागि आफ्नो आवेदन स्वीकृत गर्नुपर्नेहुन्छ,’ मन्त्रालयले भनेको छ।

हसिनाको सरकारमाथि विपक्षी नेता तथा कार्यकर्ता र सर्वसाधारणमाथि व्यापक दुव्र्यवहार गरेको आरोप लागेको छ । यसमा राजनीतिक विरोधीहरूको सामूहिक हिरासत र गैरन्यायिक हत्या पनि समावेश छ ।

संयुक्त राष्ट्रसङ्घको मानवअधिकार कार्यालयले गत साता एक प्रारम्भिक प्रतिवेदनमा सुरक्षा बलले अनावश्यक र असमान बल प्रयोग गरेको भन्ने बलियो सङ्केत र थप स्वतन्त्र अनुसन्धानको खाँचो रहेको बताएको थियो ।

युनुसले आफ्नो प्रशासनले संयुक्त राष्ट्रसङ्घका अनुसन्धानकर्तालाई आवश्यक पर्ने सबै सहयोग उपलब्ध गराउने बताएका छन् ।

प्रर्वप्रधानमन्त्री हसिनाले गठन गरेको बङ्गलादेशी युद्ध अपराध न्यायाधिकरणले हालैको अशान्तिलाई लिएर आफ्ना संस्थापकमाथिको ‘सामूहिक हत्या’ सम्बन्धमा तीनवटा मुद्दामा अनुसन्धान अगाडि बढाएको जनाएको छ ।

काठमाडौं । अमेरिकाको सत्ताधारी दल डेमोक्रेटिक पार्टीले इजरायलले गाजामा गरेको नरसंहारको बारेमा बोल्न निषेध गरेको छ ।

दलको राष्ट्रिय सम्मेलनको दौरानमा बोल्न आग्रह व्यापक हुँदा पनि बोल्न नदिइएको हो ।

बेलायती विश्व च्यानल बीबीसीका अनुसार सिकागोमा भएको सम्मेलनमा बोल्ने थोरै समय माग्दा नदिइएको हो । बोल्न नदिएपछि डेमोक्रेटिक दलका प्रतिनिधिहरूले ढाकामा बसेर विरोध जनाएका थिए । भित्र ढोकामा धर्ना कार्यक्रम भएको थियो भने बाहिर जुलुस लागेको थियो ।

एक हप्ता अगाडी सानो कुरा बोल्न माग गरिएको कुरा निषेध गरेर डेमोक्रेटिक दलले ठूलो कमजोरी गरेको आलोचकहरूले बताएका छन् ।

कतिपय इस्लाम समूहरुले डेमोक्रेटिक दलको यो निर्णयको कारणले दललाई मतदान नगर्ने सार्वजनिक रूपमा बताइसकेका छन् ।