Category: विश्व प्रेस

काठमाडौं । दक्षिण भारतीय राज्य तमिल नाडीमा रहेको कोरियाली कम्पनी सामसुङमा कार्यरत कामदारहरूले हडताल गरेका छन् ।

उनीहरूले विगत ११ दिनबाट हडताल गरिरहेका छन् । बेलायती विश्व च्यानल बीबीसीका अनुसार मजदुरहरूको हडतालको कारण उत्पादन तथा वितरणमा सकस भइरहेको छ ।

तमिल नाडीमा झण्डै २ हजार भारतीय कामदारहरू कार्यरत भएको बताइन्छ । जुन भारतको कुल आयको एक तिहाइ हुने बताइन्छ ।

सामसुङमा राखिएको मजदुरको संस्थालाई मान्यता दिनुपर्ने, ट्रेड युनियन अधिकार हुनुपर्ने, मजदुरको तलब तथा सेवा सुविधामा मजदुर संगठनको समन्वय हुनुपर्ने लगायतका माग उनीहरूले राखिरहेका छन् ।

कम्पनीले कामदारहरूको हित कम्पनीको प्राथमिकतामा भएको भनाई सार्वजनिक गरेको छ । तर, मजदुरको मागमा भने सकारात्मक देखिएको छैन ।

मासिक २५ हजार तलब खाँदै आएका मजदुरहरूले पचास प्रतिशत तलब वृद्धिको माग राखेका छन् । त्यसमा पनि कम्पनी सकारात्मक देखिएको छैन ।

काठमाडौं । भारतको जम्मु र काश्मीर क्षेत्रमा एक दशकपछि चुनाव भएको छ । सन् २०१९ मा भारतीय संविधानको धारा ३७० खारेज गरेपछि जम्मु र काश्मीर अनि लद्दाक फरकफरक बनाइएपछि भएको चुनाव भएकोले यसले विश्व चर्चा पाएको छ ।

साँझ ६ बजेसम्म हुने मतदानमा ३ बजेभित्र ५० प्रतिशतले मतदान गरेको भारतीय मिडियाहरुले उल्लेख गरेका छन् । २३ लाख योग्य मतदाताबाट २१९ उम्मेदवार चयन गर्न चुनाव हुने भएको छ । जसमा ९० जना स्वतन्त्र उम्मेदवार छन् ।

तीन चरणमा हुने चुनावको दोस्रो र तेस्रो चरण सेप्टेम्बर २५ र अक्टोबर १ मा हुने भएको छ । नतिजा अक्टोबर ८ मा आउनेछ । आज ९० क्षेत्रमध्ये २४ वटामा चुनाव भएको हो ।

भारतीय मिडियाहरुका अनुसार अहिलेसम्मको चुनावमा कुनै हिंसात्मक घटना भएको छैन । काश्मीरको अर्धस्वायत्तताको खारेजी गरेकोले भारतीय सत्ताधारी पार्टी बीजेपीले चुनावमा राम्रो प्रदर्शन नगर्ने बताइएको छ । उसो त जम्मु र काश्मीर तथा लद्दाक क्षेत्र परम्परागत रुपमा पनि बीजेपीको आधार क्षेत्र होइन ।

काठमाडौं । रुसी फौजमा पुगेका भारतीयहरुले उद्धारको लागि याचना गरेका छन् । बेलायती विश्व च्यानल बीबीसीका अनुसार आफूलाई ठगेर रुसी फौजमा लगिएको भन्दै उनीहरुले उद्धारको लागि हारगुहार गरेका छन् ।

बीबीसीमा प्रकाशित सामग्रीअनुसार यसरी याचना गर्नेहरुमा नेपाली भाषी भारतीयहरु पनि रहेका छन् । नेपाली भाषी भारतीय उर्गेन तामाङ पहिले भारतीय सैनिक थिए । अहिले उनी रुसी फौजमा छन् । उद्धारको याचना गर्नेमा उनी पनि एक हुन् ।

बीबीसीसँग कुरा गरेका एक भारतीयले भनेका छन्, ‘म ज्यादै चिन्तामा छु । म सुरक्षित आउँछु वा बाकसमा आउँछु, कुनै टुंगो छैन । कृपया मलाई बचाउनुहोस् ।’

तामाङले आफूहरुलाई सेनाको सहयोगी भनेर लगिएको, तर रुस पुगेपछि युद्धको अग्रमोर्चामा पठाइएको बताए । तामाङले आफू अरु ९१ जना भारतीयसँगै रुसी फौजमा पुगेको बताएका छन् ।

भारतीय अधिकारीहरुले रुसी फौजमा गएका नौ जना भारतीयको मृत्यु भएको सार्वजनिक गरेका छन्, तर वास्तविक तथ्य त्योभन्दा बढी भएको धेरैको अनुमान छ ।

भारतीय प्रधानमन्त्री नरेन्द्र मोदीको मस्को भ्रमणपछि गत जुलाईमा ४५ जना भारतीयलाई रुसी फौजबाट फिर्ता गरिएको बीबीसीले उल्लेख गरेको छ ।

काठमाडौं । चक्रवात यागीले निम्त्याएको बाढी र पहिरोका कारण दक्षिणपूर्वी एसियामा करिब ६० लाख बालबालिका प्रभावित भएको युनिसेफले बुधबार जनाएको छ ।

यागीले दुई हप्ता अघि भियतनाम, थाइल्यान्ड, लाओस र म्यानमारमा शक्तिशाली हावा र भारी वर्षा निम्त्याएको थियो ।

थाइल्यान्डले बुधबार थप तीन जनाको मृत्यु भएको जनाएसँगै यस क्षेत्रमा कुल ५३७ जनाको मृत्यु भएको पुष्टि भएको छ ।

राष्ट्रसङ्घीय बाल एजेन्सी युनिसेफले स्वच्छ पानी, शिक्षा, स्वास्थ्य सेवा, खाना र आश्रयको पहुँच सम्झौताको आधारमा यागीबाट प्रभावित बालबालिकाको सङ्ख्या उल्लेख गरेको हो ।

कमजोर बालबालिका तथा परिवारहरूले यागीले निम्त्याएको विनाशकारी परिस्थिति सामना गर्न बाध्य भएको युनिसेफका पूर्वी एसिया प्रशान्तका क्षेत्रीय निर्देशक जुन कुनुगीले बताउनुभएको छ ।

यसै गरी भियतनाममा पिउने पानी र सरसफाइको अभावका कारण करिब ३० लाख मानिसहरु रोगको जोखिममा रहेको युनिसेफले जनाएको छ ।

म्यानमामा बाढीका कारण करिब चार लाख मानिसहरू विस्तापित भएका छन् ।

युनिसेफले यागीले म्यानमामा गम्भीर मानवीय अवस्था निम्त्याइ सीमान्तकृत समुदायलाई सङ्कटमा धकेलेको उल्लेख गरिएको छ ।

विश्व खाद्य कार्यक्रमले बुधबार म्यानमारमा यसै हप्ता आपतकालीन प्रतिक्रिया सुरु गरी पाँच लाख मानिसहरूलाई एक महिनाको आपतकालीन खाद्यान्न वितरण गर्ने जनाएको छ ।

युनिसेफका अनुसार जलवायु परिवर्तन र मानवीय खतराले पूर्वी एसिया र प्रशान्त क्षेत्रका बालबालिकालाई व्यापक असर गर्ने जनाएको छ ।

काठमाडौं । मंगलबार लेबनाममा रहेको लडाकु समूह हेजबुल्ल्लाका पेजरहरु एकाएक सबैतिर पड्किन थाले । गोजीमा बोकेका पेजरहरु पड्किन थालेपछिको समस्याका धेरै भिडियो फुटेजहरू सामाजिक सञ्जालमा भाइरल पनि भए ।

पेजर पड्केर ९ जनाको मृत्यु र २७५० जना घाइते भएको बताइएको छ । मृत्यु हुनेहरूमा बालबालिका र सर्वसाधारणहरू पनि भएको बताइएको छ ।

ताइवानबाट बन्ने पेजरहरु खरिद गर्ने हेजबुल्लाले पछिल्लो समयमा नयाँ प्रविधिको पेजर किन्ने भन्दै युरोपबाट खरिद गरेको बताइएको छ । त्यही खरिदमा इजरायली घुसपैठ भएर विस्फोटक पदार्थ भरेर पठाइएको चर्चा चल्न सुरु भएको छ ।

हेजबुल्लाको सुरक्षा संयन्त्रमा इजरायली घुसपैठ भएको र त्यसले धेरै मानवीय क्षति नगरे पनि हेजबुल्ल्लामा मनोवैज्ञानिक डर पैदा गने कतारी विश्व च्यानल अलजजिराले उल्लेख गरेको छ ।

बीबीसीले भने विभिन्न रिपोर्टको हवाला दिएर पेजरमा इजरायलले विस्फोटक पदार्थ राखेको खुलासा भएको बताएको छ ।

गाजाको तनावलाई लिएर इजरायल र हेजबुल्ल्लाको गोलाबारी आदानप्रदान हुँदै आएको छ ।

कोलकाता । कोलकातामा भारतीय अधिकारीहरूले चिकित्सकको क्रूर बलात्कार र हत्याको विरोधमा उग्र प्रदर्शनपछि शहरका प्रहरी प्रमुख र स्वास्थ्य मन्त्रालयका शीर्ष अधिकारीलाई बर्खास्त गरेका छन् ।

अगस्त ९ मा कोलकाताको एक सरकारी अस्पतालमा ३१ वर्षीया चिकित्सकको रगतले लतपतिएको शव फेला परेपछि महिलाविरुद्ध हिंसाको दीर्घकालीन मुद्दालाई लिएर देशव्यापी आक्रोश सिर्जना भएको छ ।

उक्त हत्यापछि सम्पूर्ण भारतमा विरोध प्रदर्शन सुरु भयो र महिलाका लागि सुरक्षित स्थितिको माग गर्दै चिकित्सकहरूले बारम्बार हड्ताल गरेका छन् । बाँकी भारतमा धेरै विरोध प्रदर्शन र हड्ताल शान्त भए पनि पश्चिम बङ्गाल राज्यको राजधानी कोलकातामा नियमित प्रदर्शन जारी छ ।

पश्चिम बङ्गालकी मुख्यमन्त्री ममता बनर्जीले सोमबार राति चिकित्सकहरूसँगको बैठकपछि कोलकाता प्रहरी आयुक्त र स्वास्थ्य विभागका दुई अधिकारीलाई हटाउने घोषणा गरिन् ।

बैठकपछि उनले पत्रकारहरूसँग भनिन्, ‘हामी स्वास्थ्य सेवाका निर्देशक र मेडिकल कलेजका निर्देशकलाई हटाउन सहमत भयौं ।’

जुनियर चिकित्सकहरूको मागअनुसार कोलकाताका प्रहरी आयुक्त विनीत गोयललाई पनि हटाइनेछ ।

मुख्यमन्त्री बनर्जीले चिकित्सकहरूलाई काममा फर्कन आग्रह गर्दै उनीहरूको हड्तालले आपत्‌कालीन सञ्चालन प्रभावित भएको बताइन् ।

तथापि पश्चिम बङ्गाल जुनियर डाक्टर्स फ्रन्ट विरोध समूहका प्रवक्ता अनिकेत महतोले घटनाको अनुसन्धान पूरा नभएसम्म आन्दोलन नरोकिने बताए ।

हत्याको आरोपमा एक व्यक्तिलाई हिरासतमा लिइएको छ, तर अनुसन्धानको तरिकालाई लिएर पश्चिम बङ्गाल राज्यको सरकारले सार्वजनिक आलोचनाको सामना गर्नुपरेको छ ।

‘हामी केही विन्दुमा सहमत भएका छौं, तर असहमति कायमै छ’, महतोले भने । पीडितलाई न्यायको माग गर्दै सोमबार हजारौं प्रदर्शनकारीले शहरका सडकहरूमा नारा लगाउँदै जुलुस निकालेका थिए ।

हत्याको क्रूरताले ‘मुलुकको अन्तरात्मालाई आघात’ पुर्‍याएको भन्दै भारतको सर्वोच्च अदालतले गत महिना स्वास्थ्यकर्मीहरूको सुरक्षा कसरी सुदृढ गर्ने भनेर जाँच गर्न एक राष्ट्रिय कार्यदललाई आदेश दिएको थियो ।

आक्रमणको विभत्स प्रकृतिको तुलना सन् २०१२ मा दिल्ली बसमा एक युवतीमाथि भएको सामूहिक बलात्कार र हत्यासँग गर्न थालिएको छ ।

दिल्ली घटना प्रमुख राजनीतिक मुद्दा बन्यो र निर्वाचनहरूमा प्रधानमन्त्री नरेन्द्र मोदीको भारतीय जनता पार्टी (भाजपा)को सफलतामा एक कारकका रूपमा हेरियो ।

भाजपा मुलुकभरमा सत्तारूढ पार्टी हो, तर पश्चिम बङ्गाल राज्य सरकारको नेतृत्व अखिल भारतीय तृणमूल काङ्ग्रेससँग छ । -रासस/एएफपी

काठमाडौं । भारतीय संघीय राजधानी क्षेत्र दिल्लीले महिला मुख्यमन्त्री पाएको छ । सन् २०१५ बाट निरन्तर मुख्यमन्त्री हुँदै आएका आम आदमी पार्टी (आप)का नेता अरविन्द केजरिवालले राजीनामा दिएपछि नयाँ मुख्यमन्त्रीको चर्चा सुरु भएको थियो । नयाँ मुख्यमन्त्री ४३ वर्षकी अतिशी हुने भएकी छन् । भारतीय तथा विश्व मिडियाहरुका अनुसार मंगलबार भारतीय समयअनुसार साढे चार बजे उनको शपथ हुने भएको हाे ।

अतिशीले शपथ खाएसँगै उनी दिल्लीको मुख्यमन्त्रीका साथै भारतको बहालवाला दोस्रो महिला मुख्यमन्त्री हुनेछिन् । २८ राज्य र ८ केन्द्र शासित इकाइ भएको भारतमा मंगलबारबाट पश्चिम बंगालकी ममता बेनर्जी र दिल्लीकी अतिशी दुई महिला मुख्यमन्त्री हुनेछन् ।

दिल्लीमा महिला मुख्यमन्त्री : बीजेपीकी सुषमा, कंग्रेसकी शिलापछि आपकी अतिशी

दिल्लीको मुख्यमन्त्री रेस रोचक छ । भारतका प्रमुख दलहरुले मुख्यमन्त्रीमा महिला उभ्याइसकेका छन् । सुरुमा भारतीय जनता पार्टी (बीजेपी) र त्यसपछि भारतीय राष्ट्रिय कंग्रेसले मुख्यमन्त्रीमा महिला ल्याएका थिए । आपले पनि अतिशीलाई मुख्यमन्त्रीमा ल्याएको छ । अतिशी दिल्लीकी तेस्रो मुख्यमन्त्री हुनेछिन् । उनीभन्दा अगाडि बीजेपीकी नेतृ तथा पूर्वविदेशमन्त्री सुषमा स्वराज सन् १९९८ मा दिल्लीको प्रथम महिला मुख्यमन्त्री भएकी थिइन् ।

कंग्रेसकी शिला दीक्षित दिल्लीको दोस्रो महिला मुख्यमन्त्री बन्न सफल भएकी थिइन् । उनको कार्यकाल लगातार १५ वर्ष रहेको थियो । उनले सन् २०१३ मा मुख्यमन्त्रीबाट बिदा लिएकी थिइन् ।

अतिशी : अक्सफोर्डकी स्नातकोत्तर

भारतीय मिडियाहरुका अनुसार उनको राजनीतिक यात्रा दशकअगाडि मात्रै स्थापना भएको आम आदमी पार्टीबाट सुरु भएको थियो । उनले बेलायतको अक्सफोर्ड विश्वविद्यालयबाट सन् २००३ मा इतिहासमा स्नातकोत्तर गरेकी थिइन् ।

उनी शैक्षिक परिवारमै जन्मेकी थिइन् । भारतीय अखबार टाइम्स अफ इण्डियाका अनुसार उनकी माता त्रिप्तावाही र पिता विजय सिंह दुवै दिल्ली विश्वविद्यालयका प्राध्यापक थिए । उनीहरुको सन्तानको रुपमा अतिशीको जन्म सन् १९८१ जुन ८ मा भएको थियो । पढाइ र राजनीति दुवै मोर्चामा सफल अतिशी वातावरण क्षेत्रमा पनि उत्तिकै सक्रिय छन् । उनी दिगो विकास र नवीकरणीय ऊर्जाकी पक्षपाती हुन् ।

अन्ना हजारेदेखि आम आदमीसम्मको यात्रा

आम आदमी पार्टीको स्थापनामा जरो मानिने अन्ना हजारेको भ्रष्टाचारविरोधी अभियानमा डेढ दशक अगाडि जोडिएकी अतिशी आम आदमी पार्टीकी संस्थापकमध्ये एक हुन् । टाइम्स अफ इण्डियाका अनुसार सन् २०१३ मा आम आदमी पार्टीको चुनावी घोषणापत्र बनाउनेमा एक अनुहार उनी पनि थिइन् ।

केजरिवाल क्याबिनेटकी एक्ली महिला अनुहार उनलाई मुख्यमन्त्री केजरिवाल निकट मान्ने गरिन्छ । केजरिवाल पक्राउ हुँदा उनैले दिल्ली सत्ता चलाएको इण्डिया टुडेले लेखेको छ । सत्तामा भने उनी सन् २०१८ बाटै सीधा जोडिएकी थिइन् । भारतीय अखबार दि हिन्दूका अनुसार उनी सन् २०१८ मा अप्रिलसम्म दिल्लीका शिक्षामन्त्री मनिष सिसोडियाकी सल्लाहकार थिइन् । दिल्लीले शिक्षा क्षेत्रमा गरेको शैक्षिक सुधारको जसमा पर्ने एक पात्र उनी पनि हुन् ।

अहिले पनि अतिशीले दिल्लीको मन्त्रीको रुपमा १४ वटा महत्वपूर्ण विभागको जिम्मा लिइरहेकी थिइन् । उनले मुख्यमन्त्री बन्नुभन्दा अगाडिसम्म शिक्षा, संस्कृति, पर्यटन, ऊर्जालगायतका क्षेत्रको जिम्मा लिइरहेकी थिइन् । केजरिवालको राजीनामापछि मुख्यमन्त्री हुने पक्कापक्की भएपछि पत्रकारहरुसँग अतिशीले भनेकी थिइन्, ‘मलाई यो जिम्मेवारी आएको छ । म अरविन्द केजरिवालको अभिभावकत्वमा दिल्ली सरकार चलाउनेछु र दिल्लीका जनताको सुरक्षा गर्नेछु ।’

मातापिताले मार्क्स र लेनिन जोडेर राखेको नाम छोडेकी अतिशी

अतिशीको पूरा नाम अतिशी मार्लेना सिंह हो, तर आजभोलि उनी मार्लेना प्रयोग गर्दिनन् । उनका अभिभावकले कार्ल मार्क्स र लेनिनको नामलाई छोट्याएर अतिशीको नाममा ‘मार्लेना’ पनि थपेका थिए । अहिले अतिशी आफ्नो नाममा ‘मार्लेना’ लेख्न छोडेकी छन्, तर धेरै लामो समय भएको छैन । यो सन् २०१८ बाट सुरु भएको हो ।

बीजेपीका उम्मेदवार गौतम गम्भीरसँग लोकसभामा दिल्लीपूर्वबाट चुनाव लड्दा उनको दुवै नाम अतिशी मार्लेना प्रयोग भएको थियो, तर पछि मार्लेना उनका अभिभावकले मार्क्स र लेनिनको नामलाई मिसाएर बनाएको पत्ता लागेपछि धेरै विवाद भएको थियो । विवादको मियो बीजेपीमा थियो । उनले गौतम गम्भीरसँग सन् २०१९ को चुनाव हारिन् । धेरै विवाद भएपछि अतिशीले आफ्नो नामको बीचमा रहेको मार्लेना र थर सिंह प्रयोग गर्न छोडिन् ।

पहिले ट्विटरमा अतिशी मार्लेना हुनेमा अहिले अतिशीमात्रै प्रयोग गरिरहेकी छन् । पन्जाबी राजपूतकी सन्तान अतिशीलाई बीजेपी पक्षधरहरुले सन् २०१९ को चुनावमा ईसाई भनेर पनि हैरान गरेका थिए ।

काठमाडौं । मध्य म्यानमारको नेपी ताव केन्द्र शासित प्रदेशमा आएको बाढीमा ४७ हजार एकडभन्दा बढी मनसुन बाली डुबानमा परेको छ ।

प्रतिवेदनका अनुसार यस सिजनमा केन्द्र शासित प्रदेशमा कुल ३ लाख ४५ हजार एकडमा मनसुन बाली खेती गरिएको थियो । तीमध्ये ४७ हजार एकडभन्दा बढी बाढीले डुबानमा परेको छ ।

बाढीले १७ हजार एकडभन्दा बढी बालीमा क्षति पु¥याएको र तीमध्ये ३ हजार ९ सय एकड पूर्ण रूपमा नष्ट भएको प्रतिवेदनले जनाएको छ ।

कृषि, पशुपंक्षी तथा सिंचाई मन्त्रालयले क्षतिग्रस्त बाली पुनः खेती गर्न र क्षतिग्रस्त र बाढीले बालीमा परेको नकारात्मक असरलाई न्यूनीकरण गर्न लगायतका राहत कार्यहरू गरिरहेको प्रतिवेदनमा उल्लेख छ ।

यागी आँधी र बंगालको खाडीको मनसुनी प्रभावका कारण म्यानमारका धेरैजसो भूभाग, नेपी ताव केन्द्र शासित क्षेत्र लगायतका क्षेत्रमा ठूलो बाढी आएको छ ।

सेप्टेम्बर १४ सम्म बाढीले ११० भन्दा बढी व्यक्तिको मृत्यु र ६० भन्दा बढी बेपत्ता भएका छन् ।

काठमाडौं । क्यानडाको सदनमा बङ्गलादेशका हिन्दूमाथि भएको दमनविरुद्ध आवाज उठेको छ ।

सांसद चन्द्र अर्याले सन १९७१ मा बङ्गलादेश स्वतन्त्र हुँदा भएको २० प्रतिशत हिन्दू जनसङ्ख्या घटेर ९ प्रतिशत आएको भन्दै यो दमनकै दमनकै कारण भएको अर्थ्याउँदै सांसद अर्याले क्यानडाका हिन्दूहरुको आफन्त र परिवार बङ्गलादेशमा भएको भन्दै आवाज उठाएका छन्।

उनले इसाई र बौद्धमार्गीहरुले भोगेको दमनको पनि कुरा उठाएका छन्। तर, हिन्दू दमन ज्यादा भएको उनले बताएका छन्।

सेप्टेम्बर २३ अर्थात् असोज ७ गते क्यानडाको ‘पार्लियामेन्ट हिल’मा एक जुलुस निस्कने सांसद अर्याले सदनमा जानकारी दिएका छन्।

काठमाडौं । रुसका राष्ट्रपति भ्लादिमिर पुटिनले रुसी सैनिक जनशक्तिको आकार २३ लाख बढी पुर्याउने भएका छन् । सोमबार पुटिनले दिएको आदेशअनुसार रुसको सैन्य जनशक्ति २३ लाख ८९ हजार १३० पुग्ने भएको छ ।

युक्रेनसँग युद्ध गरिरहेको रुसले सैन्य जनशक्ति बढाउनुमा पश्चिमा देशहरुले रुससँग लादेको प्रोक्सी युद्ध भएको रुस सरकारका प्रवक्ता दिमित्रि पेस्कोभले बताएको रुसी विश्व च्यानल आरटीले उल्लेख गरेको छ ।

आरटीका अनुसार पुटिनले रक्षा मन्त्रालयलाई आवस्यक बजेट दिन पनि आग्रह गरेका छन् । आरटीले हाल रुसको सैन्य जनशक्ति कति भन्नेमा कुनै खुलाएको छैन । तर, विभिन्न विश्व मिडियाहरुमा आएका तथ्यांकहरुका अनुसार सन २०२२ सम्म रुसका १५ लाख बढी सैनिक जनशक्तिहरु थिए ।

काठमाडौं । अमेरिकाको ओरिगन राज्यमा गैर नागरिकहरूलाई पनि नागरिक सरह मतदाता नामावलीमा राखिएको पाइएको छ ।

अमेरिकी च्यानल फक्सन्यूजका अनुसार शुक्रवार ओरिगन राज्यका अधिकारीहरूले नै यसबारेमा स्वीकार गरेका हुन् ।

समाचार अनुसार ३०६ जना गैर नागरिकहरूको नाम मतदाता नामावलीमा पुगेको पाइएको छ ।

सन २०१९ मा ओरिगन राज्यले गैर नागरिकहरूलाई पनि सवारी चालक अनुमति पत्र प्रदान गरेको थियो । ओरिगनमा सूचीकृत भएका २०६ जना गैर नागरिकहरुमा मतदानमा भने दुई जनाले मात्रै भाग लिएको बताइएको छ ।

रिपब्लिकन पार्टीले गैर नागरिकहरूलाई नागरिकलाई मात्रै दिइने मताधिकार दिएर डेमोक्रेटिक पार्टीले चुनाव जित्न खोजेको आरोप लाउँदै आएको थियो ।

त्यही आरोपलाई पुष्टि गर्ने समाचार ओरिगनबाट सार्वजनिक भएको हो ।

ओरिगनका सरकारी अधिकारीहरूले यो कामले सन २०२४ को चुनावमा कुनै असर नगर्ने दाबी गरेका छन् ।

काठमाडौं । युक्रेन तथा अरू अमेरिकी जनताको हितमा नहुने युद्धको विपक्षमा भएको चुनावी मुद्दा बोकेका पूर्वअमेरिकी राष्ट्रपति डोनाल्ड ट्रम्पलाई हिजो भएको हत्या प्रयासका अनुहार युक्रेन युद्ध पक्षधर भएको खुलेको छ ।

रुसी विश्व च्यानल आरटीको समाचार अनुसार रायन बेस्ली रुथ नामका ती पुरुषले युक्रेनको पक्षमा युद्ध गर्न चाहेको, युक्रेनमा सैनिकहरू लान चाहेको लगायतका तथ्यहरू सार्वजनिक भएको छ । गत जुलाई १३ मा ट्रम्पलाई हत्या प्रयास भएको थियो ।

पेन्सिलभियाको बट्लर क्षेत्रमा भएको गोली प्रहारबाट उनको कानको टुप्पोमा गोलीले छोएर उनी बचेका थिए । त्यसको ठीक दुई महिनापछि फ्लोरिडाको गल्फ कोर्समा गल्फ खेल्दा ट्रम्पलाई एके-४७ बाट गोली प्रहार प्रयास भएको थियो । यो पटक पनि ट्रम्पलाई गोली भने लागेन ।

गोली प्रहार गर्ने पुरुष पक्राउ परेका छन् । उनको पक्राउ पछि सार्वजनिक भएको तस्बिर र उनका सामाजिक सञ्जाल तथा पुराना तथ्यहरू हेर्दा उनी युद्ध पक्षधर भएको पाइएको छ ।

अमेरिकामा पहिले पहिले रिपब्लिकन पार्टीलाई युद्ध पक्षधर तथा डेमोक्रेटिक पार्टीलाई विपक्षको दल भनिन्थ्यो । तर, जो बाइडेन र कमला ह्यारिस भने युद्ध पक्षधर देखिन्छन् भने ट्रम्प विपक्षी ।

युद्ध पक्षधर रिपब्लिकन पार्टीका जर्ज डब्लू बुस राष्ट्रपति हुँदाका पूर्वराष्ट्रपति डिक चेनीले कमलालाई नै समर्थन गरेको सार्वजनिक घोषणा गरेका छन् ।

काठमाडौं । अमेरिकाले भारतलाई पनि आफूले जस्तै रुसी विश्व च्यानल आरटी बन्द गर्न आग्रह गरेको छ । भारतीय अखबार दि हिन्दूलाई साभार गरेर आरटीले उल्लेख गरे अनुसार भारतीय अधिकारीले अमेरिकी आग्रहलाई अस्वीकार गरेका छन् ।

शुक्रबार अमेरिकी विदेशमन्त्री एन्थोनि ब्लिन्कनले आरटीलाई प्रतिबन्ध गरेको घोषणा गरेका थिए । अमेरिकी लोकतन्त्रमा समस्या गर्ने तथा चुनावमा समस्या पार्नेदेखि गुप्तचरीको काम पनि गर्ने जस्ता विभिन्न आरोप लगाउँदै यस्तो प्रतिबन्ध लगाइएको हो । हिन्दू अखबारका अनुसार अमेरिकाले एकतर्फी गरेका प्रतिबन्धमा भारतले साथ दिने छैन । उसो त भारतले रुसलाई अमेरिकी तथा यूरोप लगायतका देशले प्रतिबन्ध लगाउँदा पनि साथ दिएको थिएन ।

भारतले आफ्नो परराष्ट्र नीति स्वतन्त्र हुने भन्दै आएको छ । केही समयअगाडि अमेरिकी विदेशमन्त्री एस. जयशंकरले ब्लिन्कनसँगै मञ्चमा बस्दा एक कार्यक्रममा किन भारतले सबैसँग सहकार्य गर्छ भन्ने प्रश्नमा जयशंकरले सबैले सहकार्य गर्ने हुनुमा ‘स्मार्ट’ हुनु भएको बताएका थिए ।

काठमाडौं । अमेरिकी पूर्वराष्ट्रपति तथा आगामी नोभेम्बर ५ को चुनावका रिपब्लिकन पार्टीका राष्ट्रपति उम्मेदवार डोनाल्ड ट्रम्पको स्थानमा फेरि गोली चलेको छ ।

फ्लोरिडाको गल्फ कोर्सबाट ट्रम्प निस्किँदा गोली चलेको बताइएको छ ।

ट्रम्पको चुनावी अभियानका प्रवक्ता स्टेभेन चेयुङका अनुसार ट्रम्प सुरक्षित छन्। उनको नजिकै गोली चलेको बताइएको अमेरिकी विश्व च्यानल सीएनएनले उल्लेख गरेको छ ।

वेस्ट पाल्म बिच क्षेत्रमा गल्फ खेल्दा ट्रम्प छेउ गोली चलेको हो ।

गत जुलाई १३ मा अमेरिकाको पेल्सिल्भेनियाको बट्लर क्षेत्रमा भएको चुनावी सभामा ट्रम्पलाई गोली हानिएको थियो। कानको टुप्पोमा गोली लागेका उनी बाच्न सफल भएका थिए ।

काठमाडौं । रुसी विश्व च्यानल आरटीलाई अमेरिकाले प्रतिबन्ध लगाएपछि आरटीकी उपप्रधानसम्पादक एन्ना बेल्किनाले अमेरिका फरक विचार र समाचारसँग डराएको बताएकी छन् ।

आरटीमा प्रकाशन भएको समाचार अनुसार एन्नाले अमेरिकामा मात्रै होइन विश्वभर आरटीको विचार र समाचार पुगेकोमा अमेरिकालाई तनाव भएको भन्दै त्यसकै प्रतिक्रियामा आरटी प्रतिबन्ध गरेर अमेरिकाले फरक विचार र समाचारलाई स्थान नदिएर आफ्नो भाष्य मात्रै बोक्नेलाई स्थान दिने बताएकी छन् ।

तर, आरटीले विश्वभरका दर्शकहरूसँग पुग्नलाई विभिन्न माध्यमबाट पुग्ने भन्दै एन्नाले यो अमेरिकाको लागि दुःखद खबर भएको बताइन् ।

अमेरिकाले आरटीलाई बन्द गर्दा रुसी गुप्तचरको विभागको रूपमा आरटी आएको आरोप लाएको छ । त्यसको प्रतिक्रियामा आरटीकी प्रधानसम्पादक मार्गरिता सिमोन्यानले अमेरिकी मिडिया र गुप्तचरी मिसमास भएको लामो इतिहास भएको भन्दै अमेरिकालाई नै प्रश्न गरेको आरटीले उल्लेख गरेको छ ।

पछिल्लो सयमा यूरोप तथा अमेरिकाबाहेकका देशहरूमा आरटीको प्रभाव बढेको छ । खासगरी ल्याटिन अमेरिका, अफ्रिका र एसियामा आरटीको प्रभाव बलियो छ ।

दक्षिण एसियामा आरटीको देखिने उपस्थिति भारतमा धेरै छ । भारतका सडकहरूमा आरटीका धेरै बोर्डहरु पनि देखिने गरेका छन् ।

काठमाडौं । जर्मनीका युद्ध पानीजहाज ताइवान टापु क्षेत्रमा आएका छन् । ताइवान टापु हुँदै जर्मनीका युद्ध पानीजहाजले फन्को लाएपछि चीनले जर्मनीलाई चेतावनी दिएको जर्मनीको विश्व च्यानल डिडब्लूले उल्लेख गरेको छ ।

डिडब्लूका अुनसार चिनियाँ जनमुक्ति सेनाका प्रबक्ता लि सीले भनेका छन्, ‘जर्मनी पक्षको व्यवहारले सुरक्षा खतरा बढाएको छ र यसले गलत सिग्नल दिएको छ ।’ लि सीले चीनले जल तथा हवाई शक्ति पठाएर चीनले उक्त क्षेत्रका सबै उत्तेजना तथा जोखिमहरुलाई चिर्ने चेतावनी दिएको बताइएको छ ।

जर्मनीका रक्षामन्त्री बोरिस पिस्तोरियसले दुई वटा जर्मनीका युद्ध पानीजहाजहरु ताइवान पुगेको स्विकारेका छन् । शुक्रबार जर्मनीले पठाएको युद्ध पानी जहाज विगत दुई दशकमा पठाइएको पहिलो हो ।

काठमाडौं । अमेरिकी राष्ट्रपति जो बाइडेन र बेलायती प्रधानमन्त्री केइर स्मार्टरको अमेरिकाको ह्वाइट हाउसमा भेट भएको छ । स्थानीय समयअनुसार शुक्रबार भएको भेटमा दुई नेताले युक्रेनले माग गरेअनुसार रुसी भित्री क्षेत्रहरुमा युक्रेनलाई दिइएका मिसाइलहरु हान्न दिनेमा सहमति भएन ।

बेलायती विश्व च्यानल बीबीसीका अनुसार बाइडेनलाई स्टार्मरले नदिने कुरामा मनाएको हो भन्ने प्रश्न गरिएको थियो । जवाफमा स्टार्मरले भने, ‘युक्रेन, मध्यपूर्व, हिन्त प्रशान्त क्षेत्रका विभिन्न विषयमा लामो र उत्पादनमुलक छलफल भएको’ बताएका थिए ।

बाइडेन र स्टार्मरको भेट भन्दा अगाडी पुटिनले रुसी भूमिमा लामो दूरिका मिसाइल प्रहार गर्न युक्रेनले गरेको आग्रह अस्विकार गर्न पश्चिमा देशहरुलाई आग्रह गरेका थिए । शुक्रबारै रुसी विश्व च्यानल आरटीलाई प्रतिबन्द गरेको अमेरिकाले रुसभित्र युक्रेनबाट लामो दूरिका मिसाइल प्रहार गर्ने प्रस्ताव भने पारित गरेन ।

काठमाडौं । पूर्वअमेरिकी राष्ट्रपति डोनाल्ड ट्रम्पले बर्तमान उपराष्ट्रपति कमला ह्यारिसलाई कमरेड भन्छन् । कम्युनिष्ट भन्छन् । मार्क्सवादी भन्छन् । यो भन्ने क्रम कमला डेमोक्रेटिक पार्टीको राष्ट्रपति उम्मेदवार भएपछि झनै बढेको छ । ह्यारिससँग भएको राष्ट्रपतीय चुनावी बहसमा पनि ट्रम्पले यही कुरा भने । उनले भने, ‘उनी मार्क्सवादी हुन् । सबैलाई जानकारी छ उनी मार्क्सवादी हुन् । कमलाका पिता मार्क्सवादी अर्थशास्त्र पढाउँथे । उनले छोरीलाई पनि राम्रो पढाए ।’ तर, कमलाले सार्वजनिकरुपमा आफू पूँजीवादमा विश्वास हुने पटकपटक बताएकी छन् ।

कमलाले त्यसको प्रतिवाद गरिनन् । उसो त कमलाले आफ्नी आमाको ज्यादा चर्चा गर्छिन् । सन् २००९ मा ७० वर्षको उमेरमा बितेकी आमा श्यामला गोपालनको चर्चा गर्ने कमलाले जीवित पिता डोनाल्ड जे. ह्यारिसको भने खासै चर्चा गर्दिनन् । जमाइका जरो भएका डोनाल्ड जे. ह्यारिस अहिले ८६ वर्षका भए ।

सन् १९६० को दशकमा अमेरिका आएका उनले अमरेकिाको क्यालिफोर्नियामा बर्कले विश्वविद्यालयबाट विद्यावारिधि गरे । सन् १९६२ मा सोही विश्वविद्यालयमा उनले दिएको मन्तव्यपछि उनको भेट कमलाकी आमा श्यामलासँग भएको बेलायती अखबार टेलिग्राफले उल्लेख गरेको छ । उनले श्यामलासँग सन् १९६३ मा विवाह गरे ।

कमला सात वर्ष हुँदा सन् १९७१ मा पारापाचुके गरेर अलग भए । उनका दुई सन्तान भन्नु नै कमला र उनकी बहिनी माया हुन् । उनले दोस्रो विवाह गरे क्यालोर किर्लेसँग । उनी वासिङटन डिसीमा कमलाको कार्यालय ह्वाइट हाउस नजिकै बस्ने भारतीय अखबार टाइम्स अफ इण्डियाले उल्लेख गरेको छ ।

सन् २०२० को चुनावी अभियानमा पनि गयल थिए पिता, के भनेका थिए अन्तरवार्तामा ?

केही समय अगाडि कमलाले डेमोक्रेटिक पार्टीको सम्मेलनमा बोल्दा परिवारका सबैजसो बोलाइन् । बहिनी माया बोलाइन् । पति डगलस एनहफलाई त स्टेटमा बोल्न पनि लगाइयो । तर, उनका पिता डोनाल्ड जे. ह्यारिस भने आएनन् । वा बोलाइएनन् । तर, उनले पिताबारेमा बोल्दै भनेकी थिइन्, ‘उहाँले मलाई निडर हुन सिकाउनु भयो ।’

सन् २०२४ को चुनावमा मात्रै होइन, सन् २०२० मा पनि कमलाका पिता चुनावमा जोडिएका थिएनन् । उनले एक अन्तरवार्तामा भनेका थिए, ‘सेलिब्रेटी खोज्ने काम मेरो काम होइन । मैले यो भन्दा पर हुने जोडदार प्रयत्न गरेको छु ।’ कमलाले पनि सन् २००३ को अन्तरवार्तामा आफूले पितासँग नजिक हुन नपाएको बताएकी थिइन् । सन् २०२० को शपथ ग्रहण समारोहमा पनि कमालका पिता गयल थिए ।

गाजामा जोडेपछि सन् २०१९ मा विज्ञप्ति निकोलेर कमलाको कुरा खण्डन गरेका थिए पिताले

सन् २०१९ मा त कमला र उनका पिता डोनाल्डको समस्या नै देखिएको सार्वजनिक भएको थियो । कमलाले आफ्नो जमाइकल पितातर्फको कुरा आलोचनात्मक रुपमा राखेकी थिइन् । जमाइकालाई गाँजासँग जोडेर उनले आफूले युवा कालमा गाजा खाएको बताएकी थिइन् । किन युवा कालमा गाजा खानु भयो त भन्ने प्रश्नमा उनले अन्तरवार्तामा भनेकी थिइन्, ‘मेरो परिवारका आधा मान्छे जमाइकाबाट छन् । के तपाइँले ठट्टा गर्नु भएको ?’

कमलाको कुरालाई लिएर पिता डोनाल्डले विज्ञप्ति नै जारी गरेका थिए । उनले भनेका थिए, ‘स्वर्गे हुनु भएका मेरा हजुरआमाहरु तथा मेरा आमाबाबुहरुले पक्कै पनि चिहानमा आफ्नो नाम, इज्जत र जमाइकन पहिचानमा ठट्टा गरेर होस् वा धोकाधडी गरेर पहिचानको राजनीति गर्ने नाममा गाजा खाने जस्तो कुराको सामान्यीकरण गरेकोमा हेर्दै हुनुहुन्छ होला ।’

पिता डोनाल्डले आफू र आफ्नो निकट परिवारका कसैले पनि गाजा नखाएको भन्दै कमलाको कुराको प्रतिवाद गरेका थिए । सन् १९९८ मा सक्रिय प्राध्यापनबाट अवकाश लिएका उनले पछि जमाइकन सरकारको सल्लाहकार पनि भएका थिए ।

कसरी जोडियो कमलाका पितासँग मार्क्सवादी लाइन ?

न्यू योर्क टाइम्सले मंगलबार कमलाका पिताबारेमा एक सामग्री प्रकाशन गर्यो । त्यसमा कमलाका पितालाई ट्रम्पले मार्क्सवादी किन भने भन्ने कुरामा जोड दिइएको छ । समाचारअनुसार कमलाका पिता डोनाल्ड अमेरिकाको प्रतिष्ठित विश्वविद्यालय स्ट्याण्डफोर्डमा मार्क्सवाद पढाउँथे । विश्वविद्यालयको अर्थशास्त्र विभागमा पढाउने प्रथम अस्वेत अनुहार कमलाका पिता भएको न्यू योर्क टाइम्सले उल्लेख गरेको छ ।

सन् १९७६ मा प्रकाशन भएको विश्वविद्यालयका विद्यार्थीहरुले प्रकाशन गरेको अखबार स्ट्याण्डफोर्ड डेलीमा उनको चर्चा गरिएको थियो । त्यसमा लेखिएको थियो, ‘उनी धेरै ओजश्वी छन् । उनले एक पाइप पाइपरले जस्तो विद्यार्थीहरुलाई निओलिबरल अर्थशास्त्रबाट बहकाउँछन् । त्यसैले उनको कार्यकाल नथप्नेबारेमा विरोधी आवाजहरु पनि थिए ।’ उनै आफैं पनि प्रोफेसर इमिरिटसको रुपमा विश्वविद्यालयमा जोडिएका छन् ।

न्यू योर्क टाइम्सले कमलाका पिताले मार्क्सवाद पढाएको मात्रै कुरा गरेको छ । तर, बेलायती आर्थिक विश्व अखबार दी इकोनोमिस्टले भने उनी मार्क्सवादी भएको खुलाएको छ । जुलाईमा प्रकाशन भएको लेखमा भनिएको छ, ‘उनी मार्क्सवादी हुन् । उनको लेखनहरु अस्पष्टतावादी सिद्धान्त निर्माणमा छरपस्ट छन् ।’

दी इकोनोमिस्टका अनुसार सन् १९७८ मा उनले प्रकाशन गरेको पुस्तक ‘पूँजी संकलन र आय वितरण’मा उनले यस्तै कुरा लेखेका छन् । उक्त किताब उनले कमला र उनकी बहिनी मायाको नाममा समर्पण गरेका छन् ।

उनले आफ्नो लेखमा अमेरिकाका अस्वेतहरुलाई उपनिवेशमा जस्तो भएको कुरालाई पनि पूँजीसँग जोडेका थिए । त्यसमा उनले अमेरिकामा अस्वेत मालिक भएको क्षेत्रमा पनि अस्वेत कामदारको शोषणै हुने लेखेर मार्क्सवादी लाइन देखाएका थिए । यो कुरालाई दी इकोनोमिस्टले प्राथामिकतासाथ प्रकाशन गरेको छ ।

कमलाका पिताले आफ्नो देश जमाइकाबारेमा पनि किताब लेखेका छन् । उनले जमाइकाको निर्यातबारेमा सन् १९९७ मा किताब लेखेका छन् । किताबको नाम हो ‘जमाइकाको निर्यात अर्थतन्त्रः निर्याप्तजन्य अर्थतन्त्रतर्फको रणनीति’ ।

काठमाडौं । अमेरिकी विदेशमन्त्री एन्थोनी ब्लिन्कले युक्रेनले युद्ध जितेपछि नेटो सदस्य हुने बताएका छन् ।

बेलायती समकक्षी डेभिड ल्यामीसँगै युक्रेनको राजधानी किभ पुगेका ब्लिन्कनले यस्तो बताएका हुन् । युक्रेनले भने रुससँगको युद्ध जित्नु भन्दा अगाडी नेटोमा जोडिन तथा यूरोपेली संघको सदस्यता पाउन आग्रह गरिरहेको छ ।

रुसी विश्व च्यानल आरटीका अनुसार युक्रेनको सदस्यताको लागि आवश्यक हुने कमाण्ड सेन्टर पनि स्थापना गरिने ब्लिन्कनले बताएका छन् । हंगेरी र स्लोभाकियाले युक्रेनलाई नेटोमा युद्ध भएको समयमा ल्याउन नसकिने बताइरहेका छन् ।

नेटो अमेरिका नेतृत्वको ३२ देशको सैन्य संगठन हो । यो संगठनले रुस सीमासम्म पुग्ने कसरत युक्रेनबाट गर्ने क्रममा रुस र युक्रेन समस्या चुलिएको हो । यहि कारण रुसले युक्रेनमा हमला गरेको बताउँदै आएको छ ।

अहिले सदस्यता नदिएपनि नेटो देशहरुले युक्रेनलाई रुससँग लड्न आवस्यक हातहतियारहरु भने दिँदै आएका छन् ।

काठमाडौं । पूर्वअमेरिकी राष्ट्रपति बिल क्लिन्टन पत्नी, पूर्वअमेरिकी विदेश सचिव तथा डोनाल्ड ट्रम्पसँग चुनावमा पराजित भएकी राष्ट्रपति उम्मेदवार हिलरी क्लिन्टनले हंगेरीका प्रधानमन्त्रीलाई तानाशाह भनेकी छन् ।

अमेरिकाको राष्ट्रपतीय चुनावी बहसमा कमलाले विश्वभरका नेताहरूले नमान्ने भन्दा प्रतिवाद गर्दै ट्रम्पले आफूलाई हंगेरीका प्रधानमन्त्री भिक्टर ओर्बानले समर्थन गरेको बताएका थिए ।

यसबारेमा प्रतिक्रिया दिँदै हिलरीले सामाजिक सञ्जालमा अमेरिकी मिडिया भक्सको समाचार साभार गरेर भिक्टर ओर्बानलाई ‘लोकतन्त्र मास्ने हंगेरीका तानाशाह’ उपमा दिएकी थिइन् । यसबारेमा हंगेरीले कडा प्रतिवाद गरेको छ ।

ओर्बानको कार्यालयका राजनीतिक निर्देशक बालाज ओर्बानले राजनीतिक विपक्षीलाई थुन्न खोज्नु, निराज जनताले भोट नदिने भनेपछि आप्रवासीलाई मताधिकार दिएर चुनाव जित्नु, चुनावी पारदर्शिता नदेखाउनु चैँ लोकतन्त्र मास्ने तानाशाह हुने बताएका छन् ।

काठमाडौं । हालसालै अमेरिकाको जर्जटाउन विश्वविद्यालय पुगेर भारतीय कंग्रेसका नेता तथा भारतीय सदनका प्रमुख प्रतिपक्षी दलका नेता राहुल गान्धीले बहसमा भाग लिए । एक घण्टा हाराहारी बोलेका उनको बोलीलाई लिएर भारतीय मिडियामा बहस भएको छ । भारतीय जनता पार्टी (बीजेपी) ले राहुलको बहसलाई चर्को आलोचना गरेको छ ।

विदेशमा पुगेर भारत र बीजेपीको विपक्षमा बोलेको र चीनको पक्षमा बोलेको भन्दै उनको चर्को आलोचना गरिरहेका छन् । तर, भारतीय अवार्ड बिजेता पत्रकार रविश कुमारले भने राहुलको तारिफ गरेका छन् । भारतका जेएनयू, बीएचयू जस्ता विश्वविद्यालयहरूका बहस तथा ‘गोदी मिडिया’ का कन्क्लेभहरूमा निम्तो नगरिएका राहुललाई विदेशीले निम्तो गर्नुपर्ने बाध्यता भएको बताएका छन् ।

उनले आफ्नो भिडिओमा बोल्दै राहुललाई विश्वविद्यालयमा निषेध गरिएको तर मोदीले सन २०१४ को चुनाव अगाडि भारतका विभिन्न क्याम्पसहरूमा बोल्दा कुनै विश्वविद्यालयका अधिकारीहरू कारवाहीमा नपरेको बताएका छन् । जर्जटाउवन विश्वविद्यालयको स्कुल अफ फरेन सर्विसमा बोल्दा मुलतः राहुलले आरएसएस, आरक्षण, आदिवासी, अडानी, अम्बानी, निर्वाचन, गठबन्धन आदिबारेमा बोलेका छन् ।

बीजेपी जातप्रथाको पक्षमा, कंग्रेस विपक्षमाः पछिल्लो चुनावपछि मोदीसँग मान्छे डराउन छोडे

राहुलले अहिले देखिएको बीजेपी र कंग्रेसको समस्या अहिलेको मात्रै नभएर लामो भएको बताएका छन् । हजार वर्षभन्दा धेरै अगाडिबाट भारतमा जातप्रथाको समस्या भएको र बीजेपी पक्ष तर कंग्रेस विपक्षीमा भएको उनले बताए । उनले बीजेपीसँगै राष्ट्रिय स्वयंसेवक संघ (आरएसएस) को पनि आलोचना गरे । भारतको शिक्षामा आरएसएसले खराबी गरेको बताए । बीजेपीले भन्ने भारत विगतको भारत भएको तर आफूहरूले भन्ने भारत भविष्यको भन्दै उनले पटकपटक बीजेपी र आरएसएसको आलोचना गरे ।

बीजेपीले सन २०२४ को चुनावमा भने खराब प्रदर्शन गरेर मोदीको नुर गिरेको उनले बताए । मोदी गुजरातमा मुख्यमन्त्री हुँदा र भारतमा दश वर्ष प्रधानमन्त्री हुँदा सरकार र सदन एकछत्र चलाएकोमा अहिले त्यस्तो नभएको भन्दै राहुलले भने, ‘अब मोदीसँग कोहि डराउँदैनन् ।’

मोदीले आफूले भगवानसँग कुरा गर्छु भन्दा आफूहरुले चुनावमा त्यो कुरालाई ध्वस्त बनाएको राहुलले बताए । तर, मोदीसँग विचार फरक भएपनि आफू उनले भने, ‘तर, म मोदीलाई घृणा चैँ गर्दिनँ ।’

भारतका अनुसन्धान निकाय बीजेपीको कब्जामा, बैंक रोक्का हुँदा चुनावमा कंग्रेस

भारतका सबै अनुसन्धान निकाय बीजेपीको कब्जामा भएको राहुलले बताए । पछिल्ल्लो चुनावमा कंग्रेसले आफ्नो बैंक खाता रोक्का हुँदाहुँदै चुनाव लडेको बताए ।

उनले भने, ‘हाम्रा कोषाध्यक्षले बैंक खाता रोक्का भएको छ भने । मैले केहि चुनावमा जाउ भने ।’

भारतमा कंग्रेस राहुलका हजुरबा देखि अहिले ज्यादै कमजोर भएको भन्दा राहुलले कंग्रेस खराब समयबाट जुधेर आएको र आफूलाई पुनःनिर्माण गर्न सफल भएको बताए । भारतका बैंकहरुको सरकारीकरण र पछि नीजिकरण दुवैमा कंग्रेस भएको भन्दै उनले कंग्रेस बदलिन समस्या नहुने बताए ।

९० प्रतिशत भारतीय जनतामा स्वतन्त्रताको लाभ आएको छैन

राहुलले भारतका २०० शीर्ष व्यापारिक घरानामा भारतका ९० प्रतिशत जाति नभएको, भारतीय मूलधारका मिडियामा उनीहरू गयल भएको र सरकारले उनीहरूलाई नहेरेको बताए । त्यही भएर आफूले जाति गणनाको कुरा गरेको बताए । सबैजातिको राज्यमा ‘भागिदारी’ बढाउन आफूले यस्तो ल्याएको उनले बताए ।

उनले भने, ‘९० प्रतिशत जनतालाई अवसर हुँदै नहुने देशमा मलाई बस्नु छैन । यो हो मेरो अडान ।’

आफूले भारतका आदिवासी, दलित, तल्ल्लो तप्कालाई हेर्ने काम चाहेको र बीजेपी सरकारबाट त्यो नभएको उनले बताए । सरकारले धनीहरूको ऋण मिनाहा गरेको र साना तथा मझौला व्यवसायीहरूको नगरेको भन्दै उनले आलोचना गरे । भारतमा पास अंकमात्रै ल्याउनेले डाक्टर बन्न पाउने तर ९० प्रतिशत कटाउनेसँग पैसा नहुँदा डाक्टर बन्न नपाउने राहुलले बताएर आफू यस्तो पक्षमा नभएको बताए ।

बीजेपी र मिडियाले खेल्ने भएकोले चुनाव जितेरमात्रै विपक्षी दलको नेता चयन गर्ने

प्रश्नकर्ताले भारतमा इण्डिया गठबन्धनको एक नेता कहिले बन्छ ? को हो नेता भन्ने प्रश्नमा राहुले आफूले त्यो नभन्ने बताए । किन नभन्ने भन्ने सवालमा उनले अहिले नै त्यसो गर्दा को नेता बन्ने कस्तो नेता बन्ने भनेर बीजेपी र मिडियाले गिजोल्ने भएर घोषणा नगरेको भन्दै उनले भने, ‘चुनाव जितेपछि मात्रै हामी यसबारेमा काम गर्छौ ।’

कंग्रेसले धेरै गठबन्धन सरकारको नेतृत्व गरेको अनुभव भएकोले गठबन्धन टिकाउन कुनै समस्या नहुने पनि उनले बताए । चुनाव जित्ने भन्नुको अर्थ उनले बहुमत ल्याउने भनेका हुन् । प्रश्नकर्ताले शिवसेना जस्ता हिन्दूवादीेदेखि धर्मनिरपेक्ष दलहरु सबैको गठबन्धन भएको भन्दै मोदीलाई सत्ता बाहिर लाने बाहेक अरु के कुरा मिल्छ भन्ने प्रश्नमा राहुलले भने, ‘हाम्रा धेरै कुरामा समान मत छ ।’

अडानी अम्बानीले उत्पादन गदैैनन्, चीनबाट किनेको समान बेच्छन्

मोदीले जनताको लागि होइन दुई-तीन थान व्यापारिक समुहको लागि काम गर्ने उनले बताए ।

राहुलले भारतीय सत्तासँग निकट भएका मानिने व्यापारिक घरानाका दुई ठूला अनुहार अम्बानी र अडानकोको नामै लिए । उनले उनीहरुले कुनै उत्पादनमा काम नगरेको तर सामान किनेर बेचेर नाफा लिने काम मात्रै गरेको उनले बताए । उनीहरुले चीनबाट किनेको सामान बिक्रि गर्ने गरेको राहुले बताए ।

सन् १९४०, ५० र ६० को दशकमा गाडीदेखि विद्युतीय सामानहरू अमेरिका तथा यूरोपमा बनेको मात्रै पाइनेमा अहिले त्यस्तो नभएर चीनमा बन्ने बताए । चीनले उत्पादनमा ध्यान दिएको तर भारतले खपतमा ध्यान दिएको भन्दै उनले भने, ‘जीएसटी लाउनु खपतमा जोड गर्नु हो । जीएसटी उत्पादनमा खराब हो ।’

काठमाडौं । अमेरिकी राष्ट्रपति चुनावको गर्मी चलिरहेका बेला डोनाल्ड ट्रम्पले आफ्नी प्रतिस्पर्धीलाई कमरेड कमला ह्यारिस भनिरहेका छन् ।

पछिल्लो टेलिभिजन बहसका क्रममा कमला ह्यारिस कम्युनिस्ट भएको दावी दोहोर्याउँदै ट्रम्पले उनी माक्र्सवादी भएको बताएका छन् ।
‘कमला ह्यारिस माक्र्सवादी हुन् र उनका पिता मार्क्सवादी प्राध्यापक थिए,उनले अर्थशास्त्रमा मार्क्सवाद पढाउँथे र उनलाई तिनका पिताले राम्रोसँगमार्क्सवाद पढएका छन’ ट्रम्पले भने ।

ट्रम्पले आफूलाई मार्क्सवादी भनेर चिनाइरहँदा कमला भनेर हाँसेर सुनिरहेकी थिइन् ।

हाल अमेरिकी उपराष्ट्रपति रहेकी कमला ह्यारिसलाई राष्ट्रपति जो बाइडेनले आफ्नो उम्मेवारी फिर्ता लिँदै डेमोक्रेट पार्टीबाट उम्मेदवारका रुपमा अघि सारेका थिए । कमला ह्यारिसका पिता डोनाल्ड जे ह्यारिस जमैकामा जन्मिएका अमेरिकन प्राध्यापक हुन्,जसले स्टानफोर्ड विश्वविद्यालयमा अर्थशास्त्र पढाउँथे ।

कमलाकी आमा भने भारतीय मूलकी श्यामला गोपालन हुन्,त्यसैलेको उनको नाम पनि हिन्दुबाट राखिएको हो । उनकी एक बहिनी माया ह्यारिस छिन् भने कमलाका माता पिताको सन् १९७१ मै डिभोर्स भएपछि उनी आमा श्यामला गोपालनसँग हुर्किएकी थिइन् । उनको १५ वर्षअघि निधन भइसकेको छ । कमलाका हजुरबुबा पिवी गोपालन भने भारत सरकारका प्रशासक थिए ।

काठमाडौं । उत्तर कोरियाली सर्वोच्च नेता किम जोङ उनले अमेरिका तथा उसका साझेदार देशहरुसँग भिड्नको लागि आणविक शक्ति तयार गर्न निर्देशक दिएका छन् ।

उत्तर कोरियाली आधिकारिक समाचार एजेन्सी केसीएनएको समाचार साभार गरेर जर्मनीले विश्व च्यानल डिडब्लूले उल्लेख गरे अनुसार किमले सोमबार यस्तो निर्देशक दिएका हुन् ।

अमेरिका र उसका पिछलग्गु देशहरु भन्दै जापान तथा दक्षिण कोरियालाई संकेत गर्दै किमले उनीहरुबाट आउने जोखिम सामना गर्न यस्तो निर्देशन दिएको बताइएको छ । यहि नोभेम्बरमा अमेरिकामा हुन लागेको राष्ट्रपतिय चुनाव लक्षित गरेर उत्तर कोरियाले केहि थप उत्तेजक हतियारहरु प्रक्षेपण गर्ने डिडब्लूले उल्लेख गरेको छ ।

सन २०२२ पछि उत्तर कोरियाले आफ्नो आणविक शक्ति तारकातार मिसाइल परिक्षण गरेर बलियो बनाएको बताइएको छ । अमेरिकाको भूमिसम्म आणविक हतियार प्रहार गर्ने प्रविधी उत्तर कोरियाले विकास गर्न बाँकी भएपनि जापान र दक्षिण कोरियासम्म पुग्ने हतियार भने बनाएको पश्चिमा विष्लेशकहरुले बताउँदै आएका छन् ।

रुसलाई पश्चिमा देशहरुले घेराबन्दी गरेपछि उसले उत्तर कोरियालाई केहि प्रविधि दिने खासगरि रकेट क्षेत्रमा दिने बताइने गरेको छ । गत जुनमा पुटिन उत्तर कोरिया पुगेर दुई देशको विकासदेखि ककेट क्षेत्रसम्म सहकार्य गर्ने बताएका थिए ।

पछिल्ल्ला समयमा रुसी विज्ञहरु उत्तर कोरियाको भ्रमणमा किस्ता किस्तामा पुगेका समाचार पनि सार्वजनिक भएका छन् । रुसी युद्धमा उत्तर कोरियाले हातहतियार सहयोग गर्ने तथा उत्तर कोरियालाई अन्न तथा अन्तरिक्ष कार्यक्रममा रुसले साथ दिने कुरा बताउइदै आएको छ ।

काठमाडौं । भियतनाममा आएको सामुद्रिक आँधी ‘यागी’ आउँदा नदीको पुलमा गुडिरहेका कारहरु खसेका छन् ।

यसरी खसेको भिडिओ बेलायती विश्व च्यानल बीबीसीले सार्वजनिक गरेको छ । बीबीसीका अनुसार उत्तरी भियतनाममा शनिबार आएको आँधी यागीका कारण ६० जनाको ज्यान गएको र २४० भन्दा धेरै घाइते भएको औपचारिक पुष्टि भएको छ ।

भियतनामको फू थो प्रान्तको फोङ चाउ पुल भत्किएर कार नदीमा खसेको भिडिओ सार्वजनिक भएको छ । गुड्दै गएको अर्को गाडीले खिचेको फूटेज बीबीसीले प्रशारण गरेको छ ।

यो आँधीलाई पछिल्लो तीस वर्षमा आएको सबैभन्दा विशाल आँधी मानिएको छ जसका कारणले १५ लाख जनताको घरमा बिजुली बत्ति बन्द भएको छ ।