Category: विश्व प्रेस

काबुल । तालिबानले मोहम्मद हसन अखुण्डको नेतृत्वमा अफगानिस्तानको अन्तरिम सरकार घोषणा गरेको छ । मन्त्रिपरिषद्, सैनिक प्रमुख र अन्य प्रमुख सरकारी निकायहरुका प्रमुख चयन भएका छन् । 

अब्दुल घानी बरदार उपप्रधानमन्त्री, सिराजुद्दिन हक्कानी गृहमन्त्रीमा नियुक्त भएको तालिबान प्रवक्ता जाबिल्लाह मुजाहिदले काबुलमा पत्रकार सम्मेलन आयोजना गरि जानकारी दिएका छन् ।

मुल्लाह ओमारका छोरा मुल्लाह मोहम्मद याकुबलाई रक्षामन्त्री बनाइएको छ । तालिबान बाहेकका अन्य पक्षबाट पनि मन्त्रिपरिषद्मा समावेश गर्न व्यापक माग भैरहेपनि नयाँ क्याबिनेटमा अन्यको नाम समावेश गरिएको छैन । विदेशमन्त्रीमा मुल्लाह आमिर खान मुत्ताकी छन् ।

यो सरकारलाई कामचलाउ अर्थात अन्तरिम सरकार भनिएको छ । अगस्ट १५ मा काबुललाई नियन्त्रणमा लिएपछि पहिलोपटक तालिबानले सरकारको घोषणा गरेको हो ।

कोलम्बो । खाद्यान्न अभाव भएपछि श्रीलंकामा संकटकाल घोषणा भएको छ । खानेकुराको मूल्यवृद्धि र खाद्यान्न अभाव हुन नदिन राष्ट्रपतिले पेश गरेको संकटकाल प्रस्तावलाई सोमबार त्यहाँको संसदले पारित गरेको छ ।

तर, विपक्षी सांसदहरुले भने संकटकाल लगाउनुभन्दा विद्यमान अन्य कानूनमार्फत समस्या समाधानको उपाय खोज्न माग गरेका थिए । साथै, संकटकाल लगाउने सरकारी कदमको विपक्षीले विरोध गरेका छन् ।

संकटकाल कानूनले अधिकारीहरुलाई पूर्जी बिनै पक्राउ गर्न सक्ने, सम्पत्ति जफत गनै सक्ने, कुनै स्थलमा प्रवेश गरेर खोजतलास गर्न सक्ने र अदालतमा उठाइन नपाइने ढंगले कुनै कानूनलाई निलम्बन गर्न सक्ने अधिकार दिएको छ ।

राष्ट्रपति गोताबाय राजापाक्षेले अगस्ट ३० मा संकटकाल लागू गरेका थिए । संकटकाललाई १५ दिनभित्र संसदको २२५ संख्याको आधारमा पारित गर्नुपर्ने संवैधानिक व्यवस्था थियो ।

मतदानमा १३२ भोट संकटकालको पक्षमा थियो भने ५१ विपक्षमा । सत्तारुढ दलसँग १५० सिट थियो ।

काबुल । तालिबानले नयाँ सरकार घोषणाको तयारी अन्तिम चरणमा पुगेको जनाएको छ । सोमबार बेलुकासम्म लगभग सरकार गठनले आकार लिइसकेको जनाइएको छ ।

सरकार बनाउनुअघि तालिबानले आफू निकटका ६ मुलुकका प्रतिनिधिलाई समारोहमा बोलाएको छ । सम्भवतः तालिबानले गठन गर्ने अफगानिस्तानको नयाँ सरकारमा ६ वटा मुलुकका प्रतिनिधि सहभागि हुने जनाइएको छ ।

टर्की, रुस, चीन, इरान, पाकिस्तान र कतारलाई समारोहमा बोलाइएको छ । आफूसँग राम्रो सम्बन्ध भएका मुलुकका प्रतिनिधिलाई तालिबानले निम्तो दिएको हो जसमा रुस र चीन पनि सामेल छन् ।

तालिबानले निम्ता दिएका मुलुकको सम्बन्ध अमेरिका र उसका साझेदार मुलुकसँग हार्दिक छैन । चीन र रुसको सम्बन्ध अहिले न्यून विन्दुमा गुज्रिएको छ । भनिएअनुसार टर्कीका राष्ट्रपति अर्दोगनलाई अमेरिकी राष्ट्रपति बाइडेन रुचाउँदैनन् ।तालिबान मन्त्रीमण्डल चाँडै घोषणा हुने जनाइएको छ ।

टोकियो । जापानको सत्तारुढ दल लिबरल डेमोक्रेटिक पार्टीको नेतृत्वका लागि उम्मेदवारी घोषणा गरेका पूर्वमहासचिव इशिबा शिगेरुलाइ आफ्नो घोषणा फिर्ता लिएर सुगा क्याबिनेटका मंत्री कोउनो तारोउलाइ समर्थन गर्न आफ्नै गुटले दवाब दिएको छ ।

पार्टीको निर्वाचन नजिकिदै गर्दा इशिबाले उम्मेदबारी दिने योजनालाई स्थगित गरी कोउनोलाइ समर्थन गर्नुपर्ने आवाज उठ्न थालेपछि बैठक बसेर निर्णय गर्न लागिएको जापानी संचारमाध्यमले उल्लेख गरेका छन् । पूर्वप्रधानमन्त्री सिन्जो आबेले पूर्वसंचारमन्त्री ताखाइचि सानाएलाइ समर्थन गर्ने घोषणा यस अघिनै गरिसकेका छन् ।

पूर्वमहासचिव इशिबा बलिया दाबेदार मानिन्थे तर इशिबाले कोउनोलाइ समर्थन गरेको खण्डमा आगामी निर्वाचनमा सबैभन्दा बलिया उम्मेदबार कोउनो बन्ने निश्चित प्रायः छ । पूर्वप्रधानमन्त्री आबेले समर्थन गरे पनि ताखाइची नेतृत्वमा आउने सम्भावना अत्यन्तै कमजोर रहेको जापानी संचारमाध्यमले उल्लेख गरेका छन् ।

नयाँ नेतृत्वका लागि दाबेदारी प्रस्तुत गरेका लिबरल पार्टीका महासचिव किशिदा फुमिओले भने आफ्नो घोषणालाइ यथावत राख्दै सबै गुटसँग छलफल गरिरहेका छन् । त्यसैगरी नोदा सेइकोले पनि नेतृत्वमा आफ्नो दावी प्रस्तुत गर्दै उमेद्वारी दर्ताका लागि आबश्यक पर्ने २० जना सांसदहरु जुटाउन छलफल गरिरहेकी छिन ।

जापानमा उम्मेदबारी दर्ता गर्न मात्रै पनि २० जना सांसदहरुको समर्थन आबश्यक पर्दछ । लिबरल डेमोक्रेटिक पार्टी जापानको सबैभन्दा ठूल ो दल भएकाले पार्टी अध्यक्ष नै प्रधानमन्त्री बन्ने प्रावधान छ । अहिले पार्टी नेतृत्वमा निर्वाचित हुने व्यक्तिनै भावी प्रधानमन्त्री भएकाले लिबरल डेमोक्रेटिक पार्टीको निर्वाचनलार्इ विश्वभर चासोका हेरिएको छ ।

वर्तमान प्रधानमन्त्री योशिहिदे सुगाले पार्टीको नेतृत्वका लागि दावी नगर्ने घोषणा गरेपछि जापानको राजनीति एकाएक तातेको छ । लिबरल डेमोक्रेटिक पार्टीको निर्वाचन यहि महिनाको २९ तारिख सम्पन्न हुँदैछ ।

पश्चिम अफ्रिकी मुलुक गुएनाको सेनाले राष्ट्रपतिलाई गिरफ्तार गर्दै मुलुकको सत्ता आफ्नो हातमा नियन्त्रणमा लिएको घोषणा गरेको छ । सेनाका प्रमुखले संविधान भंग भएको घोषणा गर्दै अब सेनाले शासन गर्ने जनाएका छन् ।

अन्तर्राष्ट्रिय संचारमाध्यमले यसलाई सैनिक कूको संज्ञा दिएका छन् । ‘हामी कुनै एक मान्छले गरेको शासनमा अब विश्वास गर्दैनौं । हामी जनतामा विश्वास गर्छौं । हामी देशको रक्षा गर्न आएका हौं जुन सिपाहीको दायित्व पनि हो’ गुएनाका सैनिक अधिकारी मामाडी डोम्बोयाले भिडिओ सन्देश जारी गर्दै भनेका छन् ।

राष्ट्रपति अल्फा कोन्डेका सल्लाहकारले सैनिकले सत्ता कू गरेको र राष्ट्रपतिलाई हिरासतमा लिइएको जनाएका छन् । तर, गतवर्ष चुनाव जितेका ८३ वर्षिय राष्ट्रपतिलाई पक्राउ गरि राखिएको स्थानबारे भने केही खुलाइएको छैन ।

सैनिक पोशाकमा भिडिओमा देखिएका डोम्बोयाले राष्ट्रपति कोन्डेलाई पक्राउ गरिएको र संविधान, सरकार र अन्य संस्थालाई भंग गरिएको जनाएका छन् । साथै, सबै सीमा र जमिनबाट हुने आवागमनमा पनि रोक लगाइएको छ ।

सत्ता हत्याइएको घटनाको महासचिव गुटर्रेसद्वारा निन्दा

संयुक्त राष्ट्रसङ्घीय महासचिव एन्टोनियो गुटर्रेसले गुएनाको राजनीतिक सत्ता हत्याएको घटनाको निन्दा गरेका छन् । गुएनामा भएको राजनीतिक ‘कु’ को महासचिव गुटर्रेसले कडा शब्दमा निन्दा गरेको महासचिवका प्रवक्ता स्टेफान डुजारिकले बताएका छन् ।

गुएनामा राष्ट्रिय सुरक्षा फौजको प्रयोग गरेर गरिएको शक्ति हत्याको निन्दा गर्दै महासचिव गुटर्रेसले त्यहाँका राष्ट्रपतिलाई तुरुन्त रिहा गर्न पनि माग गरेका छन् । महासचिव गुटर्रेसले आइतबार ट्वीट गरेर भनेका छन्, ‘गुएनामा सुरक्षा फौजका माध्यमबाट जबर्जस्ती सत्ता हत्याइएको छ, यस घटनाको म निन्दा गर्दछु र राष्ट्रपतिको तुरुन्त रिहाइको माग पनि गर्दछु । उनले बन्दुकका माध्यमबाट हात पारिएको सत्ता र शक्ति वैधानिक नभएको पनि बताएका छन् ।

काबुल । अफगानिस्तानको पञ्जशिर प्रान्त पनि तलिबान विद्रोहीहरुले कब्जामा लिइएको घोषणा गरेका छन् । देशका कूल ३४ प्रान्तमध्ये ३३ प्रान्त यसअघि नै कब्जा गरिसकेका तालिबान विद्रोहीहरुले पाञ्जशिर प्रान्त पनि कब्जा गरेसँगै सबै प्रान्त कब्जा भएका छन् ।

तालिबान विद्रोही र सरकारी सुरक्षाकर्मीहरुका बीचमा लामो समय भिडन्त भएपछि अन्ततः तालिबान विद्रोहीहरुले नै पञ्जशिरमा जीत हासिल गरेका हुन् ।

तालिबान विद्रोहीका प्रवक्ता जाबिहुल्लाह मुजाहिदले पञ्जशिरमा आफूहरुको जीत भएको र प्रान्त नै आफूहरुको नियन्त्रणमा आइसकेको दाबी गरे । “अफगानिस्तानका सबै भूभाग कब्जा गर्नेक्रममा सबैभन्दा अन्त्यमा पञ्जशिर प्रान्त पनि हामीले नियन्त्रणमा लिन सफल भएका छौँ”, प्रवक्ता मुजाहिदले भने ।

आफूहरुको सत्तालाई तालिबान विद्रोहीहरुले इस्लामिक इमरेट्स अफ अफगानिस्तान भन्ने गरेका छन । पञ्जशिर पनि अब यहीमार्फत सञ्चालिन हुने भएको छ । विद्रोही र तत्कालीन सत्तापक्षका बीचमा भएको भिडन्तका क्रममा कैयौँको मृत्यु भएको छ भने अरु कैयौ घाइते पनि भएको विवरणहरु सार्वजनिक भएका छन् ।

पञ्जशिर प्रान्तलाई नियन्त्रणमा लिइसकेपछि तालिबाले युद्ध सकिएको दावी गरेको छ । तर, तालिबान विरोधी सशष्त्र समूह (एनआरएफ)ले भने युद्ध जारी नै रहेको जनाएको छ ।

पञ्जशिरमा भएको लडाइँमा हजारौँले भाग लिएका जनाइएको छ । भिडन्तका क्रममा अरु कैयौंको मृत्यु भएको हुनसक्ने अनुमान गरिएको छ । तर क्षतिको स्पष्ट विवरण भने प्राप्त भइसकेको छैन । काबुलको उत्तरमा पर्ने पञ्जशिर उपत्यका अफगानिस्तानको सबैभन्दा सानो प्रान्त हो भने यसलाई तालिबान विद्रोहीहरुले अहिलेसम्म नियन्त्रणमा लिन सकेका थिएनन् ।

पहाडहरूले छेकिएको उक्त प्रान्त परम्परागतरूपमा नै तालिबान विरोधी गढ मानिन्छ । डेढ लाखदेखि दुई लाख मानिसको बसोबास पञ्जशिरका अग्ला चट्टान र दुई पहाडका बीचमा रहेका खोँचहरूले उक्त स्थानलाई तालिबान बलियो गढ बनाएको हो ।

बहुमूल्य धातुका खानी, जलविद्युत् बाँधहरू र वायु ऊर्जा केन्द्र रहेको त्यस क्षेत्रमा अमेरिकाले सडक निर्माण र काबुलबाट सङ्केत प्राप्त गर्नसक्ने रेडियो टावरसमेत निर्माण गरेकाले विगतमा तालिवान विद्रोहीहरुले कब्जामा लिन नसकेको बताइन्छ ।

काठमाडौं । भारतीय प्रधानमन्त्री नरेन्द्र मोदी विश्वकै लोकप्रिय नेता बनेका छन् । विश्व नेताहरुको लोकप्रियता मापन गर्ने अमेरिकी अध्ययन एजेन्सी मर्निङ कन्सल्टको नयाँ सूचीमा मोदीले विश्वका अन्य १३ नेताहरुलाई पनि उछिनेका छन् ।

मर्निङ कन्सल्टले सेप्टेम्बर २ मा नयाँ सूची सार्वजनिक गरेको हो । प्रत्येक साता यो एजेन्सीले नयाँ सूची सार्वजनिक गर्छ । ७० प्रतिशत अप्रुभल रेटिङसहित मोदी शीर्ष स्थानमा छन् ।

मेक्सिकोका राष्ट्रपति एंड्रेस म्यानुअल लोपेज, इटालेली प्रधानमन्त्री मारियो ड्रागी, जर्मन चान्सलर एन्जेला मर्केल, अमेरिकी राष्ट्रपति जो बाइडेन, अष्ट्रेलियाली प्रधानमन्त्री स्कट मरिसन, क्यानडेली प्रधानमन्त्री जस्टिन ट्रूडो, बेलायती प्रधानमन्त्री बोरिस जोन्सन र ब्राजिलियन राष्ट्रपति जोइर बोल्सेनारोलाई मोदीले उछिनेका छन् ।

अन्य विश्व नेताभन्दा मोदीलाई अस्वीकार गर्ने रेटिङ पनि न्यून छ । एक अधययनमा भारतका २५ प्रतिशत भारतीय एडल्ट नागरिकले मात्र मोदीलाई रुचाउँदैनन् । गतवर्षको जुनमा मोदीको अप्रुभल रेटिङ ६६ प्रतिशतले गिरावट भएको थियो ।

Global Leader Approval: Among All Adults https://t.co/dQsNxouZWb

Modi: 70%
López Obrador: 64%
Draghi: 63%
Merkel: 52%
Biden: 48%
Morrison: 48%
Trudeau: 45%
Johnson: 41%
Bolsonaro: 39%
Moon: 38%
Sánchez: 35%
Macron: 34%
Suga: 25%

*Updated 9/2/21 pic.twitter.com/oMhOH3GLqY

— Morning Consult (@MorningConsult) September 4, 2021

Global Leader Disapproval: Among All Adults https://t.co/dQsNxouZWb

Suga: 64%
Macron: 57%
Sánchez: 57%
Bolsonaro: 54%
Moon: 53%
Johnson: 52%
Trudeau: 49%
Morrison: 46%
Biden: 44%
Merkel: 41%
Draghi: 31%
López Obrador: 27%
Modi: 25%

*Updated 9/2/21

— Morning Consult (@MorningConsult) September 4, 2021

टोकियो । जापानकी राजकुमारी माकोले आफ्नो राजवंशभन्दा बाहिरको साधारण नागरिकसँग बिहे गर्ने भएकी छिन् ।

यस्तो बिहे गरेबापत ९ करोड रुपैयाँ जरिवाना हुने बताए पनि यसको बाबजुद बिहे गर्ने निर्णय गरेकी छिन् । जापानी सञ्चारमाध्यमका अनुसार २९ वर्षिया माकोले आफ्ना प्रेमी कोमुरोसँग विवाह गर्ने निर्णय गरेकी हुन् । बिहेपछि उनीहरुले राजपरिवार छाडेर अमेरिकामा बस्ने निर्णय पनि गरेका छन् ।

बिहेको लागि राजपरिवारले अनुमति दिएको छ । बिहेको मिति भने निश्चित भैसकेको छैन । राजकुमारी माको वर्तमान राजा आरुहितोका भाई राजकुमार आकिसिनोकी छोरी हुन् । यसअघि पनि उनीहरुको विवाहको खबर सञ्चारमाध्यममा आइरहेको थियो । त्यस समय उनका प्रेमी पढाई पूरा गर्न अमेरिका गएका थिए । विभिन्न सञ्चारमाध्यममा राजकुमारीको प्रेमको चर्चा आईरहे पनि राजपरिवारले अनुमति दिएको थिएन ।

सामाजिक संजालमा बिहेबारे मिश्रित प्रतिक्रिया आइरहेका छन् । यसअघि यो बिहेलाई लिएर केही विवाद सिर्जिएको थियो । केही व्यक्तिले राजकुमारी माकोप्रति सहानुभूति व्यक्त गरेका छन् ।

काबुल । युरोपियन युनियनले अफगानिस्तानका तालिबानलाई सहयोग गर्नका लागि विभिन्न पाँच ओटा शर्त अघि सारेका छन् । युरोपेली युनियनका विदेशमन्त्रीले ती शर्त राखेका हुन् । स्लोभानियामा सम्पन्न भएको युरोपियन युनियनका विदेशमन्त्रीको दुई दिने बैठकपछि सो जानकारी दिएको छ ।

उक्त बैठकपछि उक्त युनियनको विदेश नीति प्रमुख जोसेफ बरेलले सो कुराको जानकारी दिएका हुन् । उनले युरोपियन युनियनका विदेशमन्त्रीले तालिबान सरकारलाई सहयोग गर्नका लागि ती शर्त राखेको बताए ।

उनका अनुसार यसका लागि सबैभन्दा पहिला तालिबानले अफगानिस्तानमा आतङ्ककारीलाई प्रश्रय दिने अथवा यहाँ आतंकवादी उत्पादन केन्द्रजस्तो गरी अरु देशलाई असर गर्ने काम गर्न नहुने बताइएको छ ।

त्यस्तै अर्को शर्तका रुपमा उनीहरुले मानवअधिकारलाई पनि अघि सारेका छन् । अफगानिस्तानमा तालिबान सरकारले मानवअधिकारको सम्मान र रक्षा गर्नुपर्ने, महिला अधिकारकार, प्रेस स्वतन्त्रता हुनुपर्ने र कानुनी शासनको प्रत्याभूति हुनुपर्ने पनि सो शर्तमा अघि सारिएको छ ।

यी शर्त पालना गरेमा मात्र तालिबान सरकारलाई सहयोग गर्न सकिने युरोपियन युनियनका विदेशमन्त्रीले जनाएका छन् ।

काबुल । आगामी सरकारमा महिलाको सहभागिता सुनिश्चित गर्न माग गर्दै महिला र नागरिक समाजका सदस्यहरुले शुक्रबार काबुलस्थित अफगान राष्ट्रपति कार्यालयअघि प्रदर्शन गरेका छन् ।

नयाँ सरकारमा महिलाहरुको भूमिकाबारे तालिबानले केही निर्णय गर्न नसक्दा हेरत र काबुलमा यस्तो प्रदर्शन भएको हो । प्रदर्शनमा सहभागि महिलाहरुले राजनीति र निर्णय अधिकारमा महिलाहरुको सहभागिता गराउन समेत आग्रह गरेका छन् ।

काबुल र्‍यालीमा सहभागि महिलाहरुले दुई दशकमा हासिल भएका उपलब्धीलाई संरक्षण गर्न र राजनीतिक, सामाजिक तथा आर्थिक अधिकार सुनिश्चित गर्न तालिबान र अन्तर्राष्ट्रिय समुदायको ध्यानाकर्षण गराएका छन् ।

‘महिलाको सक्रिय भूमिकाबिना कुनै पनि समाजले प्रगति गर्न सक्दैन’ नागरिक समाजकी अभियन्ता नारानोम सैदीले भनिन्, ‘यसकारण सरकार र मन्त्रिपरिषद्मा महिलाको राजनीतिक सहभागितालाई सुनिश्चित गर्नुपर्छ ।’ साथै, महिला अभियन्ताहरुले दुई दशकमा प्राप्त उपलब्धीलाई जोगाउनेको लागि आफ्नो अडानलाई बलियो तुल्याउन तथा आफ्ना कामहरु सुचारु गर्नको लागि आग्रह गरेका छन् ।

टोकियो/जापानका प्रधानमन्त्री योसिहिदे सुगाले लिबरल डेमोक्र्याटिक पार्टीको अध्यक्ष पदका लागि उम्मेदवारी नदिने घोषणा गरेपछि राजनीति तरंगित भएको छ । पार्टीको अध्यक्ष र प्रधानमन्त्री बनेको १ वर्ष मात्रै भएकाले अझै एक कार्यकाल नेतृत्वका लागि दावी गर्न सक्ने सबैको अपेक्षा बिपरित उनले शुक्रबार मात्रै आफू पार्टी नेतृत्वका लागि चुनावी दौडमा नरहेको घोषणा गरेका थिए ।

अघिल्लो हप्तासम्म नेतृत्वमा दोहोरिने चाहना ब्यक्त गर्दै आएका सुगाले आफू चुनावी दौडमा नरहेको घोषणा गर्नुलाई विभिन्न कोणबाट विश्लेषण गरिएको छ । एकथरीले सुगा जनतामा लोकप्रिय हुन नसकेकाले नेतृत्वबाट बाहिरिन खोजेको भनेका छन् भने अर्काथरीले पार्टीका पूर्वमहासचिव इसिबा सिगेरु र पार्टीभित्र अर्को बलियो गुटको नेतृत्व गरिरहेका किसिदा फुमिओले स्वयं आफै नेतृत्वमा आउने चाहना गरेपछि सुगाले नेतृत्वबाट बाहिरिने निर्णय गरेको तर्क गरेका छन् ।

अघिल्लो पटक सुगा नेतृत्वमा आउँदा पनि उनका प्रतिस्पर्धी उनै इसिबा र किसिदा फुमिओनै थिए । नेतृत्वका लागि उम्मेदवारी दिने समय १७ तारिख भएकाले त्यतिबेला सम्म जापानमा राजनीतिक उतारचढाव त आउला नै तर जति उतारचढाव आएपनि जापान सरकारको भावी नेतृत्व यिनै चारजनामध्ये एकले गर्नसक्ने अन्तर्राष्ट्रिय संचारमाध्यमले जनाएका छन् ।

कसले गर्नेछन् सम्भावित नेतृत्व ?

तारोउ कोउनो
सुगा सरकारका क्याबिनेटका उप प्राधानमन्त्री कोउनो तारोउले पनि लिबरल डेमोक्र्याटिक पार्टीको अध्यक्षमा उम्मेदवारी दिने बताएका छन् । यदि उनले उम्मेदवारी दिएको खण्डमा उनी बलियो सम्भावना भएका व्यक्ति हुन ।

आसो गुटको नेतृत्व गर्ने उनी यस अघि २००९ सालमा नेतृत्वमा आउन उम्मेदवारी दिएका थिए । खानागावा प्रान्तको हिराचुका बासि उनलाई जापानको भावी नेतृत्व रुपमा देख्न सक्ने सम्भावना धेरै देखिन्छ ।

सिगेरु इसिबा
त्यस्तै जापानको सम्भावित प्रधानमन्त्रीको अर्को अनुहार हो इसिबा सिगेरु । २००८, २०१२, २०१८ र २०२० मा गरि नेतृत्वका लागि ४ पटक उमेद्वारी दिएका छन् । अहिले पनि उमेद्वारी दिएको खण्डमा उनि पनि बलिया उमेद्वार रहेको निक्केइ पत्रिकाले लेखेको छ ।

फुमिओ किसिदा
निक्केइ पत्रिकाले अगष्ट महिनाको २७ देखि २९ तारिख सम्म गरेको एक सर्वेक्षणले किसिदा फुमिओ पनि भावी नेतृत्वको सम्भावना बोकेको व्यक्तिको रुपमा देखाएको छ । अघिल्लो वर्ष (२०२० मा) पनि नेतृत्वको दावी गरेका उनलाई अहिले पनि जीतका लागि त्यति सहज भने नभएको विश्लेषण गरिएको छ । उनको जितका लागि कोउनो तारोउ या इसिबा सिगेरुले समर्थन गर्नुपर्ने हुन सक्ने आंकलन गरिएको छ ।

साना ताकाइची
लिबरल डेमोक्रेटिक पार्टीको नेतृत्वमा आउने चाहना ब्यक्त गर्ने एक मात्रै महिला साना ताकाइची हुन् । पूर्वआन्तरिक मामिला तथा सञ्चारमन्त्री रहेकी उनी पहिलो पटक नेतृत्वमा आउने चाहना ब्यक्त गरेकी छिन् । पार्टीमा कुनै पनि गुटमा नरहेकी सानाको नेतृत्वमा आउने सम्भावना भने कम रहेको सर्वेक्षणले देखाएको छ ।

उम्मेदवारी दिनका लागि उनीहरुलाई २० जना सांसदको समर्थन चाहिन्छ । कतिपयले अहिले सम्म २० जना सांसदको समर्थन समेत जुटाउन सकेका छैनन् । तर जे जस्तो भएता पनि यिनै ४ अनुहार मध्ये एकलाई जापानको नेतृत्वमा देख्न पाइने सम्भावना प्रबल देखिन्छ ।

रोयटर्स/काबुल । तालिबान सह-संस्थापक मुल्लाह बरदारले नयाँ अफगानिस्तान सरकारको नेतृत्व गर्ने भएका छन् । रोयटर्सका अनुसार सम्भवतः आजै सरकार गठनको घोषणा हुनसक्छ ।

काबुलको उत्तरमा रहेको प्रान्त पाञ्जसिरलाई कब्जामा लिएपछि तालिबानले सरकारको घोषणा गर्न लागेको हो । नयाँ सरकारको प्राथमिकता २ लाख ४० हजारको ज्यान जाने गरि भएको द्वन्द्वका कारण ध्वस्त अफगानिस्तानको अर्थतन्त्र उकास्नु हुनेछ ।

बरदार नेतृत्वको सरकारमा दिवंगत तालिबान सहसंस्थापक मुल्लाह ओमारका छोरा मुल्लाह मोहम्मद याकुब र सेर मोहम्मद अब्बास स्तानेज्कीले पनि उच्च पद पाउने जनाइएको छ ।

‘सबै तालिबानका उच्च नेताहरु सरकारको घोषणाको अन्तिम तयारीका लागि राजधानी काबुल आइपुगेका छन्’ नाम उल्लेख नगर्ने सर्तमा तालिबान अधिकारीले रोयटर्सलाई भने ।

तालिबान सर्वोच्च नेता हेबितुल्लाह अखुन्जादा चाहिँ इस्लामिक परम्पराअनुसारको धार्मिक र सुशासनको गतिविधिमा सक्रिय हुनेछन् । गत अगस्ट १५ मा काबुललाई कब्जामा लिएको तालिबानले पञ्जिसिरमा भने विरोधी लडाकुसँग चुनौति खेप्नुपरेको जनाइएको छ ।

कास्मिर । दिल्लीप्रति कट्टर मानिएका एकजना पृथकतावादी मुस्मिल नेताको मृत्युपछि हुनसक्ने सम्भावित हिंसालाई रोक्न भारत प्रशासित कस्मिरमा शुक्रबार दोस्रो दिन पनि लकडाउन लागू गरिएको छ ।

९१ वर्षिय सैयद अली गिलानीको मृत्यु गत बुधबार राती भएको थियो । उनको मृत्यु लगत्तै हिंसा चर्कन सक्ने भन्दै सरकारले सबै संचारमाध्यमहरु पूर्णतः बन्द गरेको छ भने सार्वजनिक हिँड्डुलमा समेत प्रतिबन्ध लगाइएको छ ।

त्यहाँको मुख्य सहर श्रीनगरमा शुक्रबार सशष्त्र प्रहरीले गस्ती गरिरहेका छन् भने सर्वसाधारणलाई घरमै बस्न आग्रह गरिएको छ । सडकमा काँडेतार, स्टिल अवरोधकले सडकहरु बन्द गरिएको छ । शुक्रबारको मध्यान्हमा प्रार्थनापछि हिंसा हुन सक्ने भएकाले दोस्रो दिन पनि लकडाउन गरिएको भारतीय अधिकारीले जनाएका छन् ।

गिलानीका छोराले अलजजिरालाई दिएको जानकारी अनुसार गिलानीको मृत्यु लगत्तै उनको पार्थिव शरिरलाई भारतीय सुरक्षाकर्मीले परिवारका सदस्यको उपस्थिती बिनै खाडलमा गाडेका थिए । भारतले केही वर्ष गिलानीलाई पक्राउ गरेर घरमै राखेको थियो ।

तर, प्रहरीले चाहिँ उत्तेजना फैलाउन चाहने केही तत्वले गिलानीको शवलाई जबर्जस्त गाडिएको आरोप लगाएको र उक्त आरोपको खण्डन गरेको छ । बिहीबार बेलुका स्थानीयबासी र सुरक्षाकर्मीबीच झडप भएपछि सुरक्षा व्यवस्था कडा तुल्याइएको थियो । प्रहरीमाथि ढुंगामुढा गरिएपछि प्रहरीले अश्रुग्याँस फ्याँकेको थियो भने झडपमा कोही पनि घाइते नभएको जनाइएको छ । गिलानीको मृत्युमा पाकिस्तानले बिहीवार शोक मनाएको थियो ।

वेलिङ्टन । न्यूजिल्यान्डको अकल्यान्डस्थित एक सुपरमार्केटमा आक्रमण गर्ने इस्लामिक स्टेटका समर्थकलाई प्रहरीले गोली हानी मारेको छ ।

घटनाबारे देशलाई सम्बोधन गर्दै प्रधानमन्त्री ज्याकिन्डा आर्डेनले आक्रमणकारी श्रीलंकाली नागरिक रहेको र इस्लामिक स्टेटका समर्थक भएको पाइएको बताएकी छिन् ।

ती व्यक्तिको आक्रमणबाट ६ जना घाइते भएका छन् । आक्रमणकारीलाई एक मिनेटभित्रै प्रहरीले गोली हानी मारेको थियो । ‘जुन घटना भयो त्यो भत्र्सनायोग्य छ’ शुक्रबार अपरान्ह आयोजित प्रेसमिटमा प्रधामन्त्री आर्डेनले भनिन् ।

गत अक्टोबर २०११ मा न्यूजिल्यान्डमा प्रवेश गरेका ती व्यक्तिबारे विस्तृत जानकारी चाहिँ सरकारले दिएको छैन । प्रहरीले गोली हानेर मार्नु अगाडि आक्रमणकारीले नजिकको बजारबाट चक्कु लिएको प्रहरीले जनाएको छ ।

घाइते भएका ६ जनामध्ये तीनजनाको अवस्था गम्भीर रहेको जनाइएको छ । घटनास्थललाई अहिले हतियारधारी सुरक्षाफौजले नियन्त्रणमा लिएका छन् । आक्रमणकारी यसअघि पनि केही घटनामा संलग्न भएकाले अदालतमा प्रवेश गरेको र रिहा भएको जनाइएको छ ।

न्यूजिल्यान्ड अहिले पनि लेभल चारको लकडाउनमै छ । अत्यावश्यक बाहेकका पसलहरु सबै बन्द छन् । लकडाउनकै समयमा आतंकवादी आक्रमण भएको जनाइएको छ ।

न्यूयोर्क । शक्तिशाली सामुन्द्रिक आँधी आइडापछि आएको भीषण वर्षा र बाढीले अमेरिकामा ज्यान गुमाउनेको संख्या ४६ पुगेको छ । न्यूजर्सी राज्यमा मात्र २३ जनाको मृत्यु भएको छ ।

न्यूयोर्क सहरमा मात्र १३ जनाको मृत्यु भएको छ ।

न्यूयोर्कमा आँधीपछिको बाढीमा परेर एकै नेपाली परिवारका तीन जनाको मृत्यु भएको छ । सोलुखुम्बुको दूधकुण्ड नगरपालिका-२ घर भई अहिले न्यूयोर्कमा बस्दै आएका आङगेलु लामा, पत्नी मिङमार शेर्पा र १९ महीनाका छोरा लोप्साङ लामाको मृत्यु भएको छ ।

न्यूजर्सी गर्भनर फिल मर्सीका अनुसार अधिकांशको मृत्यु गाडीलाई बाढीले बगाउँदा भएको छ । उनका अनुसार थप मानिसको मृत्यु भएको हुनसक्ने अनुमान गरिएको छ ।

पूर्वी अमेरिकी राज्यहरु कनेक्टिकट, मेरिल्यान्ड, न्यूजर्सी, न्यूयोर्क, पेन्सिलभेनिया र भर्जिनियामा मात्र दर्जनौंको मृत्यु भएको छ । न्यूयोर्कमा सन् १९२७ यताकै भीषण वर्षा र बाढी आएको जनाइएको छ । सेप्टेम्बर १ मा मात्रै न्यूयोर्क र न्यूजर्सीमा अहिलेसम्मकै उच्च वर्षा मापन भएको छ ।

काबुल । सत्ता नियन्त्रणमा लिएपछि तालिबानले सरकार गठनको गृहकार्य सम्पन्न गरेको र केही दिनमै नयाँ सरकारको घोषणा हुने जनाएको छ ।

तालिबान सांस्कृतिक आयोगका सदस्य अनामुल्ला सामागानीका अनुसार मुल्लाह हेबातुल्ला अखुनजादाले नै तालिबानको नेतृत्व गर्ने भएका छन् साथै नयाँ सरकारको नेतृत्व पनि ।

‘नयाँ सरकार गठनको परामर्श लगभग सकिएको छ । मन्त्रिपरिषद् बारेको आवश्यक छलफल पनि सकिएको छ । अब घोषणा हुने इस्लाम सरकार जनताको मोडेलमै हुनेछ । हाम्रो कमान्डर (अखुनजादा)ले सरकारको नेतृत्व गर्नुहुनेछ भन्नेमा शंका छैन । उहाँ नै सरकारको नेता हुनुहुनेछ र यसमा कुनै प्रश्न हुँदैन’ सामागानीले भने ।

साथै, केही विवरणका अनुसार आगामी सरकारमा प्रधानमन्त्री पद पनि सिर्जना गरिएको छ ।

‘नयाँ प्रणालीको नाम गणतन्त्र वा एमिरेट हुनुपर्छ भन्ने जरुरी छैन । यो इस्लामिक गणतन्त्र जस्तै हुनुपर्छ । हेबातुल्ला नै सरकारको उच्च पदमा हुनुपर्छ र उहाँ राष्ट्रपति बन्नुहुने छैन । यहाँ अफगानिस्तानको सर्वोच्च नेता हुनुहुनेछ । उहाँको मातहतमा राष्ट्रपति र प्रधानमन्त्रीले काम गर्नेछन्’ राजनीतिक विश्लेषक अब्दुल हनान हाकानीले भने ।

तालिबानले यसअघि नै प्रान्त र जिल्लाहरुमा गभर्नर, प्रहरी प्रमुख र प्रहरी कमान्डरहरु नियुक्त गरिसकेका छन् । बीबीसीका अनुसार सम्भवतः शुक्रबार वा शनिबार नै नयाँ सरकार घोषणा हुने भएको छ । सरकारमा महिलालाई पनि सहभागि गराउने तालिबानले जनाएको छ ।

वासिङ्टन । अमेरिकी सर्वोच्च अदालतले ६ महीनापछिको गर्भपतनमा रोक लगाउने टेक्सस राज्यको एक कानूनमाथि प्रतिबन्ध नलगाउने फैसला सुनाएको छ ।

उक्त कानून खारेजीको माग गर्दै दायर गरिएको याचिकामा मत बाझिएपछि न्यायाधीशहरुबीच बहुमतको आधारमा मतदान भएको थियो । बिहिबार ५ जना न्यायाधीश फैसलाको पक्ष र अन्य चारजना विपक्षमा बाँडिएका थिए ।

यो बहुचर्चित कानून आगामी बुधबारदेखि लागू हुँदैछ र यसले टेक्सस राज्यमा ६ महीना पछाडिको गर्भपतनलाई पूर्णतः वर्जित गर्नेछ । रिपब्लिकन गभर्नर ग्रेग एबर्टले हस्ताक्षर गरेको उक्त कानूनले चिकित्सकले गर्भवती महिलाको परीक्षण गर्दा हुने मुटुको चाल र गर्भवती महिलाले आफू गर्भवती भएको थाहा पाएपछि गर्भपतन गर्न रोक लगाउने उल्लेख छ ।

तर, अधिकारवादी संस्थाहरुले भने सन् १९७३ मा सर्वोच्च अदालतले गरेको फैसलाको नजिरको आधारमा यस्तो प्रतिबन्धलाई अनुमति नदिइएको दावी गरिरहेका छन् ।

तर, फैसलाको पक्षमा रहेका बहुमत न्यायाधीशले चाहिँ टेक्सस राज्यको संविधानअनुसार फैसला नभएको जनाएका छन् । गर्भपतन पक्षका अधिकारवादीहरुले अदालतको फैसलापछि सर्वोच्च अदालतबाहिर प्रदर्शन गर्दै आएका छन् ।

तर, राष्ट्रपति जो बाइडेन प्रशासनले चाहिँ गर्भपतन गर्न पाउने संवैधानिक अधिकारको रक्षामा आफू प्रतिबद्ध रहेको बताएको छ । सन् १९७३ को रोय भी वेडेको नजिरमा अदालतले दिएको गर्भपतन गर्न पाउने आदेशको समेत ह्वाइट हाउसले ध्यानाकर्षण गराएको छ ।

न्यूयोर्क । आइदा आँधीको कारण अहिलेसम्मकै ठूलो वर्षा र बाढी आएपछि अमेरिकी आर्थिक सहर न्यूयोर्कमा संकटकाल घोषणा गरिएको छ ।

बाढीको वितण्ड र खतरनाक परिस्थितीको कारण सिर्जित अहिलेसम्मकै खराब मौसमी अवस्थाको कारण संकटकाल घोषणा गरिएको मेयर बिल डे ब्लासियोले बताएका छन् ।

सामाजिक संजालमा सार्वजनिक भएका भिडिओमा सब–वे स्टेसन, सर्वसाधारणको घर र सडकमा बाढी बगेको देख्न सकिन्छ । न्यूजर्सी राज्यमा पनि संकटकाल घोषणा भएको छ जहाँ एकजनाको मृत्यु भएको छ ।

स्थानीय मेयरका अनुसार न्यू जर्सीमा आँधीले त्यहाँको मुलिसिया हिलमा नौ घर भत्काएको छ । न्यूयोर्कको मौसम विभागका अनुसार त्यहाँको सेन्ट्रल पार्कमा एक घण्टामै ३.१५ इन्चको वर्षा मापन भएको थियो ।

न्यूयोर्कको सबवे बन्द गरिएका छन् भने रेल सेवा पनि ठप्प छ । न्यूयोर्क र न्यूजर्सीबाट बाहिर हुने उडानहरु सबै बन्द भएका छन् । आइदा आँधी अहिले पूर्वी अमेरिकाबाट उत्तरतर्फ अघि बढिरहेको छ ।

लुसियानाका सयौं घरमा रात्रीकालिन कफूर्यु लागू गरिएको छ भने त्यहाँ बिजुली समेत छैन ।

बेइजिङ । चिनियाँ कम्युनिष्ट पार्टीको १९औँ महाधिवेशनअन्तर्गत केन्द्रीय कमिटी (पोलिटब्यूरो)को छैटौँ प्रारम्भिक बैठक आगामी नोभेम्बरमा राजधानी बेइजिङमा हुने भएको छ । आउने वर्ष हुने पार्टीको महाधिवेशनबाट नेतृत्व परिवर्तन हुने अपेक्षा गरिएको छ ।

पार्टीको केन्द्रीय राजनीति विभागको मङ्गलाबारको बैठकले छैटौँ प्रारम्भिक बैठक आगामी नोभेम्बरमा आयोजना गर्ने निर्णय गरेको हो । पार्टीका महासचिव सी चीनफिङले केन्द्रीय राजनीति विभागको बैठकको अध्यक्षता गरेका थिए ।

बैठकमा सार्वजनिक गरिएको कार्यसूचीअनुसार केन्द्रीय राजनीति विभागले छैटौँ प्रारम्भिक बैठकमा आफ्नो प्रतिवेदन प्रस्तुत गर्नेछ । बितेका सय वर्षमा पार्टीले हासिल गरेका प्रमुख उपलब्धिको समीक्षा प्रतिवेदनमा हुनेछ ।

काबुल । अमेरिकाले अफगानिस्तान मामिला कतारको राजधानी दोहाबाट हेर्ने भएको छ । मंगलबारदेखि काबुलस्थित दूतावास बन्द गरिएको र अफगान सम्बन्धी कार्य दोहाबाट गर्ने अमेरिकाले जनाएको छ ।

‘काबुलबाट सबै कर्मचारीलाई फिर्ता गरिएपनि हामीले अमेरिकी नागरिक र तिनका परिवारलाई दोहाबाट सेवा गर्छौं’ अमेरिकी दूतावासको वेबसाइटमा भनिएको छ ।

अगस्ट १५ मा तालिबानले काबुल कब्जामा लिएपछि अमेरिकाले काबुलस्थित दूतावासका कर्मचारी र कूटनीतिज्ञलाई फिर्ता लैजान सुरु गरेको थियो ।

काबुल । अमेरिकाले अफगानिस्तान छाड्ने समयसीमा आज सकिँदैछ । अमेरिकी सेनाको अन्तिम विमान काबुलबाट उडे लगत्तै तालिबान लडाकुले काबुलमा हर्षोल्लास मनाएका छन् ।

तालिबानले अमेरिकी फिर्तीसँगै अफगानिस्तानले वास्तविक अर्थमा स्वतन्त्रता र सार्वभौमसत्ता प्राप्त गरेको टिप्पणी गरेको छ । २० वर्षको युद्धपछि अमेरिका बाहिरिएलगत्तै तालिबानको यस्तो भनाई आएको हो ।

तालिबानले यसलाई ‘ऐतिहासिक क्षण’ भनेको छ ।

गएराति अमेरिकी सेनाले अन्तिम उडान भरेलगत्तै तालिबानी लडाकुहरु हर्षोल्लास मनाउन काबुलमा सडकमा निस्किएका थिए । उनीहरुले रात्री आकाशमा आतसबाजी मनाए भने बन्दुक पड्काएका थिए ।

काबुल एयरपोर्टमा मंगलबार कुरा गर्दै तालिबान प्रवक्ता जाबिहुल्ला मुजाहिदले अफगानिस्तान अब वास्तविक अर्थमा स्वतन्त्र भएकोमा कुनै शंका नरहेको बताए । ‘अमेरिका हारेको थियो । देशवासीको तर्फबाट म अब सबै पक्षसँग राम्रो सम्बन्ध राख्ने बताउन चाहन्छु’ उनले भने ।

साथै प्रवक्ताले अफगानिस्तानको स्वतन्त्रता, स्वायत्तता र इस्लामिक मूल्यलाई जोगाइने बताए ।

प्योङयाङ । उत्तर कोरियाले परमाणु कार्यक्रमलाई पुनः अघि बढाउन सुरु गरेको छ । अन्तर्राष्ट्रिय संचारमाध्यमका अनुसार उत्तर कोरियाले परमाणु हतियार बनाउन आवश्यक पर्ने प्लुटोनियम प्रशोधन सुरु गरेको हो । राष्ट्रसंघीय परमाणु एजेन्सीले उत्तर कोरियाको यो कार्यप्रति चिन्ता जनाएको छ ।

त्यहाँको योङब्यानस्थित प्लान्टमा प्रोसेसिङ सुरु गरिएको उत्तर कोरियाले जनाएको छ । यो ठाउँमा उत्तर कोरियाको सबैभन्दा ठूलो पाँच मेगावाटको परमाणु रियाक्टर छ । सन् २०१८ को डिसेम्बरमा यो रिक्याटरलाई बन्द गरिएको थियो ।

परमाणु कार्यक्रमलाई लिएर उत्तर कोरिया र अमेरिकाबीच कुनै सहमति जुट्न सकेको छैन । यो कार्यक्रमलाई नेता किमजङ उन र अमेरिकी पूर्वराष्ट्र डोनाल्ड ट्रम्पबीच वार्ता भएको थियो । ट्रम्पसँगको छलफलमा किमले कार्यक्रम बन्द गर्ने प्रतिबद्धता जनाएका थिए तर, पछिल्लो पटक उनीहरुबीच यसको कार्यान्वयन भएन ।

नेता उनको नेतृत्वमा उत्तर कोरियामा परमाणु कार्यक्रम तीव्ररुपमा अघि बढिरहेको छ । जसले गर्दा केही अन्तर्राष्ट्रिय निकायले यसमा रोक पनि लगाएका छन् । राष्ट्रसंघको अन्तर्राष्ट्रिय परमाणु एजेन्सीले जुलाईको पहिलो सातादेखि नै उत्तर कोरियाले परमाणु कार्यक्रमको थालनी गरेको जनाएको थियो ।

बेइजिङ । आतंकवाद तथा दोहोरो प्रवृत्तिविरुद्धको लडाइमा अफगानिस्तानलाई सघाउन चीनले अमेरिकालाई आग्रह गरेको छ । अमेरिकी विदेशमन्त्रीसँग सोमबार भएको टेलिफोन संवादमा चिनियाँ समकक्षी वाङ यीले यस्तो आग्रह गरेका हुन् ।

गत अगस्ट १६ मा दुई कूटनीतिज्ञबीच संवाद भएको दुई सातामै अफगान संकटबारे चर्चा भएको हो । अफगानिस्तानको घरेलु अवस्था आधारभूत रुपमै बदलिने क्रममा रहेको र तालिबानलाई निर्देशित गर्न सबै पक्ष एकजुट हुनुपर्ने विदेशमन्त्री वाङले बताएको ग्लोबल टाइम्सले जनाएको छ । खासगरि, यसमा अमेरिकी भूमिका महत्वपूर्ण हुने उनले बताएका थिए ।

‘अफगानिस्तानमा रहेका कट्टरपन्थीको उपस्थितीले अफगानिस्तान युद्धले कुनै उपलब्धी हासिल गर्न नसकेको तथ्यले प्रमाणित गरेका छन् । साथै, अमेरिकी र नेटो सेनाको फिर्तीले आतंकबादीलाई फाइदा पुग्न सक्छ’ वाङ यीले भनेका छन् ।

नयाँ अफगानिस्तान संचालनका लागि तालिबानलाई अन्तर्राष्ट्रिय समुदायसँग मिलेर साथ दिन अमेरिकाले भूमिका खेल्नुपर्ने पनि चिनियाँ विदेशमन्त्रीको भनाई छ ।

अमेरिकी विदेशमन्त्री एन्टोनी ब्लिंकेनले काबुलबाट सर्वसाधारणको उद्दारका लागि तालिबाने सहयोग सुनिश्चितता गर्नुपर्ने सहितको संयुक्त आवाज राष्ट्रसंघीय सुरक्षा समितिले प्रस्तुत गर्नुपर्ने धारणा राखेका थिए ।

अमेरिका । इदा नामक शक्तिशाली सामुन्द्रिक आँधीले अमेरिकी राज्य लुसियानालाई तहसनहस बनाएको छ । तीव्र बेगसहित चलेको हावा र बाढीले न्यू अर्लियन्सका लाखौं मानिसहरु विद्युतबाट बञ्चित भएका छन् ।

आँधीबाट एकजनाको मृत्यु भएको छ ।

आइतबार राती १०५ माइल प्रतिघण्टाको गतिमा आएको उक्त शक्तिशाली आँधी जमिनमा ठोक्किएको थियो । इदा आँधीलाई त्यहाँको मौसम विभागले चौंथो श्रेणीको खतरनाक आँधीको सूचीमा राखेको छ ।

१६ वर्षअघि लुसियानामा आएको कट्रिना नामक सामुन्द्रिक आँधीपछि हजारौंलाई प्रभावित तुल्याउने गरी इदा आँधी आइपुगेको हो । कट्रिना आँधीलाई पनि विभागले चौंथो श्रेणीको आँधीमा राखेको छ ।

विद्युत संरचनामा क्षति पुगेपछि जनघनत्व बढी रहेको लुसियाना सहरका लाखौं मानिसहरु विद्युत सेवाबाट बञ्चित भएका छन् । सरकारले आँधी प्रभावित ठाउँका मानिसलाई तत्काल उद्दार गर्न भनेको छ ।

काबुल । काबुल छाड्ने समयसीमा सकिन एकदिन मात्र बाँकी रहँदा अमेरिकाले सम्भावित आत्मघाती हुनसक्ने कारण देखाउँदै सोमबार बिहान इस्लामिक स्टेटका लडाकु लक्षित रकेट आक्रमण गरेको छ ।

उक्त आक्रमणबाट काबुल एयरपोर्ट अगाडि विस्फोटक पदार्थ भरेर राखिएको एक कार ध्वस्त भएको छ । सीएनएनले अमेरिकी हमलामा एकै परिवारका ९ जना मारिएको जनाएको छ ।

अलजजिराले अमेरिकी रकेट आक्रमणमा सर्वसाधारण र बालबालिका मारिएको जनाएको छ । अमेरिकी सेनाको केन्द्रीय कमान्डले रकेट आक्रमणको मुख्य निशाना पुनः आत्मघाती आक्रमण गराउन सक्ने इस्लामिक स्टेटका लडाकुलाई तुल्याइएको बताएको छ ।

आक्रमणमा एक सामान्य परिवारकी २ वर्षिया बालिका र उनका दाजु मारिएका छन् । सेन्ट्रल कमान्डले ड्रोन आक्रमणपछि केही नागरिक हताहत भएको विवरण प्राप्त गरेको जनाएको छ ।

उसले घटनाबारे छानविन गरिरहेको जनाएको छ । गत बिहीवार इस्लामिक स्टेटका लडाकुले आत्मघाती बम आक्रमण गर्दा काबुलमा १३ जना अमेरिकी सैनिक सहित १७५ जना मारिएका थिए ।

प्रत्यक्षदर्शीका अनुसार पार्किङ राखिएको एक गाडीमा केही व्यक्तिले विस्फोटक पदार्थ राख्न लागेको बेला रकेड आक्रमण भएको थियो । नाम उल्लेख नगर्ने सर्तमा एक अधिकारीले इस्लामिक स्टेटका दुईजना लडाकु सो क्रममा मारिएको जनाए ।

अगस्ट ३१ मा काबुल छाड्ने तयारी गरिरहेको अमेरिकाले आइतबार ३६ घण्टाभित्र पुनः आतंकवादी आक्रमण हुनसक्ने भन्दै चेतावनी जारी गरेको थियो । अगस्ट १५ मा तालिबानले काबुललाई नियन्त्रणमा लिएपछि अमेरिका र उसका साझेदार मुलुकले १ लाख १४ हजार व्यक्तिलाई उद्धार गरेको छ ।

काबुल । चीनले १७० जनाको ज्यान जाने गरी अफगानिस्तानमा भएका श्रृंखलाबद्ध विस्फोटपछि पहिलोपटक औपचारिक प्रतिक्रिया दिएको छ ।

चिनियाँ विदेशमन्त्रालयका प्रवक्ता झाओ लिजानले बेइजिङमा आयोजित पत्रकार सम्मेलनमा इस्ट तुर्किस्तान इस्लामिक मुभमेन्ट (इटीआइएम)को गतिविधिलाई निषेध गर्ने प्रतिबद्धतालाई पुरा गर्न तालिबानलाई आग्रह गरेका छन् ।

इटीआइएम क्षेत्रीय स्थिरता र विकास साभेदारीको अवरोध भएकाले उसका गतिविधिलाई रोक लगाउन चीनले आग्रह गरेको हो । गत महीना बेइजिङमा चिनियाँ विदेशमन्त्री वाङ यीसँगको भेटवार्तामा तालिबान नेता बरदारले इटीआइएमलाई नियन्त्रण गर्ने प्रतिबद्धता जनाएको चर्चा छ ।

बेइजिङले तालिबानको उक्त प्रतिबद्धता पुरा गर्न ध्यानाकर्षण गराएको हो । ‘बितेका २० वर्षमा अफगानिस्तानमा केही आतंकवादी संगठनहरु जम्मा र विकसित भएका छन् । उनीहरुले अन्तर्राष्ट्रिय र क्षेत्रीय सुरक्षालाई खतरा पैदा गरेका छन्’ प्रवक्ता झाओले भने ।

उनले इटीआइएमलाई राष्ट्रसंघीय सुरक्षा परिषद्ले आतंकवादी संगठनको रुपमा सूचीकृत गरेको चीनको भनाई छ । चीनको राष्ट्रिय र नागरिकको सुरक्षाको लागि इटीआइएमले खतरा पैदा गरेको समेत प्रवक्ता झाओले बताए ।

तालिबानले यसअघि चीनलाई अफगानिस्तानको भूमि आफूविरुद्ध प्रयोग गर्न नदिने प्रतिबद्धता जनाएको स्मरण समेत उनले गरे । प्रवक्ता झाओले सबै आतंकवादी संगठनसँगको सम्बन्ध अन्त्य गर्न समेत तालिबानलाई आग्रह गरे ।

१३ जना अमेरिकी सैनिकको ज्यान जाने गरी काबुल एयरपोर्ट बाहिर भएका विस्फोट अफगानिस्तान छाड्ने अमेरिकी अपरिपक्व, गैरजिम्मेवारी र अव्यवस्थित निर्णयको उपज भएको समेत चीनले जनाएको छ । अफगानिस्तान मिसनलाई पूर्णता दिने अमेरिकी योजनामा उक्त घटनाले थप्पड हानेको समेत चीनले जनाएको छ ।

काबुल । परराष्ट्र मन्त्रालयका अनुसार अहिले काबुलमा ४२ जना नेपालीहरु एयरपोर्ट नजिक उद्दारको पर्खाइमा छन् । बिहीबार भएको विस्फोटको घटनामा उनीहरु एयरपोर्टबाट १३ किमी टाढा पर्ने एक गुरुद्धारमा भेला भएर पर्खाइमा बसेको जनाइएको छ ।

परराष्ट्रको उद्दार कार्यदलका एक सदस्यका अनुसार विस्फोट अघि नै उनीहरु गुुरुद्धार पुगिसकेकाले उनीहरु सुरक्षित छन् । दिल्लीस्थित नेपाली दूतावासले ती नेपालीलाई उद्दार गर्न भारत र अमेरिका सरकारसँग समन्वय गरिरहेको छ ।

परराष्ट्रले हिजो साँझ विज्ञप्ति जारी गर्दै सबै नेपाली सुरक्षित अवस्थामा रहेको र सबैसँग नियमित सम्पर्क भैरहेको जनाएको छ । शिख समुदायले संचालन गरेको निशुल्क खाने र बस्ने ठाउँमा नेपाली र भारतीयहरु बसिरहेका छन् ।

कार्यदलका ती सदस्यका अनुसार भारतीय एयरफोर्सको बिमानबाट रोकिएका ती ४२ जना नेपालीलाई उद्दार गर्न कूटनीतिक प्रयास भैरहेको जनाइएको छ । विस्फोटको एकदिन अघि ११ जना नेपाली काबुलबाट दिल्ली पुगेका छन् र उनीहरुलाई कोभिड प्रोटोकल पालना गर्दै काठमाडौं ल्याउने तयारी भएको छ ।

अमेरिकाद्वारा इस्लामिक स्टेटविरुद्ध हवाइ हमला, विस्फोटका योजनाकार मारिएको दावी

१७० जनाको ज्यान जाने गरि बिहीबार अफगानिस्तानमा भएको घटनापछि अमेरिकाले इस्लामिक स्टेट समूहविरुद्ध मानवरहित हवाइ हमला गरेको छ ।

ड्रोनमार्फत गरिएको उक्त हवाइ हमलामा इस्लामिक स्टेटका एक सदस्य तथा काबुल विस्फोटका एक योजनाकारलाई मारिएको पेन्टागनले जनाएको छ । तर, कसको मृत्यु भयो भन्नेबारे पेन्टागनले उल्लेख गरेको छैन ।

नानगहार प्रान्तमा हवाइ हमला भएको न्यूयोर्क टाइम्सले जनाएको छ ।

काबुल विस्फोटको ३६ घण्टापछि अमेरिकाले इस्लामिक स्टेटविरुद्ध जवाफी हमला गरेको हो । राष्ट्रपति जो बाइडेनले शुक्रबार राती देशवासीलाई सम्बोधन गर्दै आइएआइएसविरुद्ध बदला लिने बताएका थिए । शुक्रबार नै इस्लामिक स्टेटले हमलाको जिम्मा लिएको थियो ।

काबुलमा भएका ६ वटा विस्फोटमा १३ जना अमेरिकी सैनिकले ज्यान गुमाएका थिए भने मृत्यु हुने संख्या बढेर १७० पुगेको छ । ह्वाइट हाउस प्रेस सल्लाहकार जोन पास्कीले काबुल छाड्ने समयसीमा सकिनै लाग्दा थप आक्रमण हुनसक्ने बताएका छन् । अमेरिकाले काबुलमा रहेका नागरिकलाई एयरपोर्ट छाड्न भनेको छ ।

काबुलस्थित अमेरिकी दूतावासले विमानस्थलका सबै द्धारमा रहेका नागरिकलाई तत्काल त्यो ठाउँ छाड्न भनेको छ ।

तालिबानले काबुल विमानस्थलका मुख्य भाग सबै कब्जामा लिएको बताउँदै अमेरिकी सेना जाने वित्तिकै नियन्त्रणमा लिने जनाएको छ । अमेरिकाले अन्तिम समयसम्म उद्दारलाई जारी राख्ने र विमानस्थल अहिले पनि आफ्नै कब्जामा रहेको जनाएको छ ।

काबुल । बिहीबार काबुल विमानस्थलमा भएको विस्फोटको जिम्मा मुस्लिम कट्टरपन्थी समूह आइएसआइएसले लिएको छ । अफगानिस्तानमा रहेका आफ्ना समर्थकद्वारा उक्त घटना गराइएको उक्त संगठनको भनाई उध्दृत गर्दै न्यूयोर्क टाइम्सले जनाएको छ ।

बिहीबार भएका श्रृंखलाबद्ध ६ वटा विस्फोटका घटनामा ज्यान गुमाउनेको संख्या ११० पुगेको छ भने डेढसय भन्दा बढी घाइते भएका छन् । तर, उक्त आक्रमणपछि जारी उद्दार कार्यलाई आइएसआइएसले कत्ति प्रभावित तुल्याउन सक्छ भन्ने कुरामा यकिन नभएको समेत उक्त अखबारले लेखेको छ ।

शुक्रबार दिउँसोदेखि उद्दार कार्य पुनः सुचारु भएको छ । अष्ट्रेलिया, न्यूजिल्यान्ड, क्यानडा लगायतका मुलुकले उद्दार कार्य स्थगित गरेका छन् । अमेरिका र बेलायतले भने उद्दार कार्यलाई जारी राखेका छन् ।

वम विस्फोटको घटनापछि अमेरिकी राष्ट्रपति जो बाइडेनले देशवासीका नाममा सम्बोधन गर्दै आइएसआइएसविरुद्ध बदला लिने चेतावनी दिएका छन् । उनले उक्त संगठनलाई निमिट्यान्ने पार्ने चेतावनी दिँदै लुकेर बसेको भए बाहिर निकाल्ने चेतावनी समेत दिएका छन् ।

अमेरिकाले ३१ अगस्टमा काबुल छाड्ने समयसीमा छ ।

काबुल विस्फोटमा ज्यान गुमाउनेको संख्या ११० पुुगेको छ । अलजजिराका अनुसार बिहीवार काबुल बिमानस्थलमा भएको गेटमा भएको विस्फोटमा १३ जना अमेरिकी सैनिक पनि मारिएका थिए ।

थप आक्रमण हुनसक्ने भन्दै एयरपोर्टमा रहेको अमेरिकी फौजले देश छाड्ने तयारीमा रहेका अफगान नागरिकलाई उद्दार गरिरहेको छ । विस्फोटपछि रोकिएको उद्दार कार्य पुनः सुरु भएको छ ।

‘हामीले केही जहाजले उद्दार कार्य थालेको देखेका छौं । एयरपोर्ट बाहिर देश छाड्नेको भीड हिजोको भन्दा बढेको छ । केही जहाज मात्र बाँकी भएकाले एयरपोर्टको पर्खाल हुँदै भित्र छिर्न चाहेनेको भीड निकै उच्च छ’ अलजजिराका चाल्र्स स्टार्टफोर्डले भने ।

बिहीवारको आक्रमण अफगानिस्तानमा रहेका आएसआइएस कट्टरपन्थीले गरेको अनुमान गरिएको छ ।

डेनमार्कको राजधानी कोपनहेगन यसवर्ष संसारकै सुरक्षित सहर घोषित भएको छ । इकोनोमिस्ट इन्जिलिजेन्स युनिटले आज सार्वजनिक गरेको अध्ययनमा कोपनहेगन संसारकै सुरक्षित सहर बनेको हो ।

यसअघि लगातार पहिलो र दोस्रो सुरक्षित सहर बनेका जापानको टोकियो र सिंगापुर सूचीमा तल झरेका छन् । शुक्रबार सार्वजनिक सूचीमा शीर्षस्थानमा कोपहेगन छ ।

पूर्वाधार, सुरक्षा, स्वास्थ्य, सामाजिक जीवन, वातावरणीय सुरक्षाको सूचकको आधारमा द इकोनोमिस्टले वर्षेनी सूची सार्वजनिक गर्ने गर्छ । कोरोनाभाइरस महामारीपछि भाइरस सुरक्षाको सूचक पनि यसमा थपिएको छ ।

सूचीको दोस्रो स्थानमा क्यानडाको टोरन्टो, तेस्रोमा सिंगापुर, चौंथोमा सिड्नी, जापानको टोकियो पाँचौं, नेदरल्यान्डको आम्सटर्डम छैठौं, न्यूजिल्यान्डको वेलिङ्टन सातौं, चीनको हङकङ आठौं, अष्ट्रेलियाको मेलबर्न नवौं र स्वीडेनको स्टकहोम दशौं स्थानमा छन् ।

भारतको राजधानी दिल्ली ४८ र मुम्बई ५० स्थानमा छन् । कूल ६० सहरको अध्ययनमा नेपाली राजधानी काठमाडौं सूचीमै समावेश छैन ।

काबुल बम विस्फोटमा ज्यान गुमाउनेको संख्या ९० पुगेको अफगानिस्तानको स्वास्थ्य मन्त्रालयले जनाएको छ । साथै, विस्फोटमा घाइते हुनेको संख्या डेढसय नाघेको उल्लेख छ ।

ज्यान गुमाउनेमा १३ अमेरिकी सैनिक र अन्य अफगानिस्तानका नागरिक रहेको जनाइएको छ । गएराति काबुल विमानस्थलबाहिर लगातार ६ वटा बम विस्फोट भएको जनाइएको छ ।

न्यूजिल्यान्ड, अष्ट्रेलिया र क्यानडाले बम विस्फोटको घटना लगत्तै उद्दार कार्य स्थगित गरिएको जनाएका छन् । बिम विस्फोटको घटनापछि थप आतंकवादी आक्रमण हुनसक्ने भन्दै अमेरिका लगायतका मुलुकले सतर्कता अपनाउन आग्रह गरेका छन् ।

अमेरिकाले आक्रमणको घटना पछाडि अन्तर्राष्ट्रिय आतंकवादी संगठन आइएसआईको संलग्नता हुनसक्ने दावी गरेको छ ।