Category: स्वास्थ्य-जीवनशैली

काठमाडौं । स्वास्थ्य तथा जनसङ्ख्या मन्त्रालयले कोभिड-१९ संक्रमितको उपचारका लागि शय्या चाहिएमा टोलफ्रि नं ११३३ एवं मोबाइल नम्बर ९८५१२५५८३७ र ९८५१२५५८३९ मा सम्पर्क गर्न आग्रह गरेको छ । मन्त्रालयले सूचना प्रकाशित गरी बिरामीका लागि शय्या चाहिएमा वा अस्पताल जान परेमा ती टोलफ्रि र मोबाइल नम्बरमा सम्र्पक गर्न आग्रह गरेको हो ।

संक्रमणको दोस्रो भेरियन्ट फैलिएर बिरामी बढ्न थालेपछि अहिले देशभरि शय्याको अभाव रहेको छ । बुधबार मात्र ८ हजार ६५९ जना संक्रमित भएका थिए भने ५८ को निधन भएको थियो । ती नम्बरमा फोन गरे शय्या उपलब्ध गराउने मन्त्रालयले जनाएको छ । चौबिसै घण्टा ती नम्बरमा फोन गर्न सकिने व्यवस्था मिलाइएको छ ।

रूपन्देही । बाँकेमा एकैरातमा १० जना कोरोना संक्रमितको मृत्यु भएको छ ।

बुधबार बेलुका ६ बजेदेखि बिहीबार बिहान ७ बजेसम्म १० जनाले ज्यान गुमाएको डीसीसीएमसी बाँकेले जनाएको छ ।

मंगलबार र बुधबार मृत्युदरमा कमी आएको थियो । यो अवधिमा जिल्ला बाहिरका १ र जिल्ला भित्रका ९ जनाको मृत्यु भएको छ ।

बैशाख १७ गते भेरी अस्पताल भर्ना भएका नेपालगन्ज उपमहानगरपालिका १२ का ४५ वर्षिय पुरुषको बुधबार बेलुका ६ः१५ बजे मृत्यु भएको भएको थियो । बैशाख १९ गते भेरीमा भर्ना भएकी नेपालगन्ज १० कि ७६ वर्षिय महिलाको बुधबार बेलुका ७ः३० मा मृत्यु भएको थियो ।

त्यसैगरि बुधबार राती ८ बजे भेरी अस्पतालमै उपचाररत नेपालगन्ज १ का ५८ वर्षिय पुरुषको मृत्यु भएको थियो भने त्यसको २० मिनेट पछि नेपालगन्ज १० का २७ वर्षिय युवाको मृत्यु भएको थियो ।

बुधबार बेलुका ७ बजे नै भेरी अस्पतालमै भेरी नगरपालिका ४ जाजरकोटकी ४३ वर्षिय महिलाको उपचारकै क्रममा मृत्यु भएको थियो भने बेलुका ७ः४० मा कोहलपुर नगरपालिका ५ का ३४ वर्षिय पुरुषको नेपालगन्ज मेडिकल कलेज शिक्षण अस्पताल कोहलपुरमा ज्यान गएको थियो ।

बैशाख १९ गते भेरीमा भर्ना भएका नेपालगन्ज ४ का ५५ वर्षिय पुरुषको मध्यराती १२ बजे मृत्यु भएको थियो । बिहान १ः४० बजे नेपालगन्ज १० का ७८ वर्षिय पुरुष, बिहान ४ः३० बजे नेपालगन्ज १९ का ७७ वर्षिय पुरुष र बिहान ७ बजे नरैनापुर १ का ५६ वर्षिय पुरुषको भेरी अस्पतालमा उपचारकै क्रममा मृत्यु भएको छ ।

यो सँगै बाँकेमा कोरोनाबाट ज्यान गुमाउनेको सँख्या १५७ पुगेको छ भने बाहिरी जिल्लाबाट उपचारकालागि बाँके आएका मध्य १२७ जनाको मृत्यु भएको छ ।

चाैतारा । कोरोनासँग मिल्दोजुल्दो लक्षण देखिएका चौतारा साँगाचोकगढी नगरपालिका-४ कुभिण्डेका ५२ वर्षीया एक पुरुषलाई सोमबार बिहान सदरमुकाम चौतारा अस्पतालमा ल्याइयो ।

चिकित्सकहरुले अवस्था जटिल रहेको भन्दै तुरुन्तै आईसीयू शय्या भएको अस्पतालमा लैजान भने । गम्भीर अवस्थाका विरामीलाई करिव ५० किलोमिटर टाढा धुलिखेल अस्पताल लानुपर्ने भयो । एम्बुलेन्सबाट साँगाचोक नपुग्दै उनको निधन भयो । मृत्युपछि उनमा कोरोना संक्रमण देखियो ।

केही दिनअघि पनि सोही वडाका एक जनाको चौतारा अस्पतालमा उपचार हुन नसकेपछि उपचारको लागि धुलिखेलमा लगिए पनि त्यहाँ आईसीयू शय्या नपाएरै प्राण गयो ।

कोरोना भाइरसको नयाँ भेरियन्टको संक्रमणले अहिले सिन्धुपाल्चोकलाई आक्रान्त बनाउँदै लगेको छ । तर, सदरमुकाम चौतारामा रहेको अस्पतालमा आईसीयू र भेन्टिलेटरको सुविधा छैन । जिल्लाको वाह्रविसे, मेलम्ची र जलवीरेमा डाक्टर सहितको स्वास्थ्य केन्द्रहरु छन् तर त्यहाँ अक्सिजन सिलिण्डरसमेत छैन ।

सदरमुकाममा रहेको चौतारा अस्पताल र जिल्लाका अन्य क्षेत्रमा डाक्टरसहित रहेका अस्पताल अहिले वागमती प्रदेश अन्र्तगत छन् । चौतारा अस्पतालका तत्कालीन प्रमुख डाक्टर सागरकुमार राजभण्डारीले अस्पतालको सेवामा केही सुधारको प्रयास गरे पनि त्यसयता लामो समयदेखि चौतारा अस्पताल स्वयम ‘कोमामा’ नै रहेको सर्वसाधरणले मात्रै होइन जनप्रतिनिधिहरुले समेत आरोप लगाउने गरेको छन् ।

चौतारा साँगाचोकगढी नगरपालिकाका मेयर अमान सिंह तामाङले त केही दिन अघि सार्वजनिक रुपमा नै चौतारा अस्पतालको सेवाप्रति तीव्र आक्रोश पोखेका थिए ।

चौतारा अस्पताल मात्रै होइन डाक्टरहरु नै रहेको मेलम्ची, वाह्रविसे र जलवीरेको स्वास्थ्य संस्थाहरुको अवस्था सदरमुकाम चौताराको अस्पतालभन्दा अझै नाजुक नै छ, सिटामोल र ब्यान्डेजसमेत नभएका यी स्वास्थ्य संस्थाहरुका कोरोनाका बिरामीहरुलाई उपचार गर्न सकिन्छ भन्ने त कल्पना भन्दा बहिरकै विषय भयो ।

एक वर्ष अघि कोरोना महामारी सुरु हुँदा वागमती प्रदेशका सामाजिक विकास मन्त्री युवराज दुलाल थिए । उनी सिन्धुपाल्चोकको चौतारा क्षेत्रकै जनप्रतिनिधि हुन् । उनको कार्यकालमा पनि अस्पतालको अवस्था सुध्रिएन । अहिले उनका क्षेत्रका मतदाता उपचार नपाएर बाटो बाटोमा नै मृत्युवरण गरिरहेका छन् ।

वागमती प्रदेश सरकारले बरु धुलिखेलको अस्पतालालाई मोटो रकम दियो तर चौतारा अस्पताल र जिल्लाका अन्य स्वास्थ्य संस्थाहरु सुधारका लागि केही पनि गरेन ।

सामाजिक विकास मन्त्री मात्रै होइन वागमती प्रदेशमा अर्का शक्तिशाली मन्त्री पनि सिन्धुपाल्चोककै थिए- अरुण नेपाल । उनको क्षेत्रमा रहेको वाह्रविसे प्रथामिक स्वास्थ्य केन्द्रको अवस्था पनि उस्तै छ ।

सभामुख अग्निप्रसाद सापकोटाको गृह गाउँ अहिले कोरोनाको ‘हटस्पट’ बनेको छ । अहिलेसम्म दुई जनाको मृत्यु भइसकेको छ भने तीन दिनको बीचमा संक्रमितको संख्या ३२ पुगेको छ । संक्रमितहरुको संख्या बढ्दै गएपछि नगरपालिकाले कुभिण्डे र कदमबासलाई शिल गरेको छ ।

सामाजिक सञ्जालमा ‘शिघ्र स्वास्थ्य’ लाभको कामना गर्ने र मृत्युपछि ‘हार्दिक श्रदाञ्जली’ दिने भन्दा बाहेक राजनीतिक नेतृत्व र सरकारमा रहेकाहरुले यतिबेलासम्म केही गरेका छैनन् ।

अघिल्ला वर्षको संक्रमणमा स्थानीय सरकारहरुले पनि कोरोना रोकथाम र नियन्त्रणका लागि लिएको सक्रियता लोभलाग्दो थियो, क्वारेन्टाइन निर्माण देखि स्वास्थ्य सामग्री वितरणमा समेत स्थानीय सरकारको सक्रियता थियो तर अहिले स्थानीय सरकार समेत आफै अलमलमा परेको देखिन्छ ।

जिल्लाका सबै स्थानीय सरकारले गत वर्ष कम्तीमा पनि ५० लाख रुपैयाँ कोरोना रोकथाम र नियन्त्रण शीर्षकमा खर्च गरेका थिए त्यो रकम सबै स्वास्थ्य सामग्री वितरणमा नै सकिएको थियो ।

स्थानीय सरकारले पनि आफ्नो क्षेत्रमा रहेका स्वास्थ्य संस्थाहरुमा केही सुविधा राखेर आपत्तमा जनतालाई सेवा दिन सकिन्छ भनेर योजना बनाएर काम गरेका थिए । अहिलेको महामारीमा कम्तिमा अक्सिजन दिन सकिने अवस्था हुने थियो तर त्यो कुनै पनि स्थानीय सरकारले गर्न सकेनन् ।

स्वास्थ्य कार्यालयको तथ्यांक हेर्ने हो भने सिन्धुपाल्चोकमा जम्मा ३० जना क्षमता रहेको केही आइसोलेसन कक्षहरु मात्रै रहेका छन् । स्थानीय सरकार, राजनीतिक दलका नेताहरु मात्रै होइन संघीय सरकारको प्रतिनिधिका रुपमा रहेका कर्मचारीहरुले पनि निषेधज्ञा लगाउने भन्दा बाहेक ठोस कार्यक्रमहरु अघि सारेको देखिँदैन ।

सिन्धुपाल्चोकमा नयाँ भेरियन्ट सहितको कोरोना संक्रमितको संख्या १ सय ५० पुगिसकेको छ । संक्रमितहरु प्राय सबै होम क्वारेन्टाइनमा नै बसिरहेका छन् तर उनीहरुको अवस्था कस्तो छ, कसरी बसिरहेका छन्, गाह्रो भए के गर्ने कुनै पनि निकायसँग यसको जवाफ छैन अहिले । भगवना भरोसा बाहेक सिन्धुवासीसँग अहिले कोरोनासँग जुध्न सक्ने विकल्प छैन ।

 बल्ल जाग्दैछन् स्थानीय तह

कोरोना संक्रमित दिनप्रतिदिन बढ्दै गएपछि स्थानीय सरकारहरु आफूसँग भएको सीमित स्रोत र साधनलाई उपयोग गरेर जनातालाई सेवा दिनका लागि योजना बनाएर कार्यन्वयन सुरु गरेका छन् ।

बलेफी र जुगल गाउँपालिकाले सयुक्त रुपमा जुगल गाउँपालिकाको चनौटेमा रहेको रत्नराज्य मावि भवनमा अक्सिजनसहितकाे आइसोलसन बनाउन सुरु गरेका छन् । त्यस्तै लिसंखुपाखर गाउँपालिका र सुनकोशी गाउँपालिकाले पनि सयुक्त रुपमा आइसोलेसन निर्माणका लागि पहल गरेका छन् ।

वाह्रविसे, चौतारा-साँगाचोकगढी नगरपालिका लगायतका स्थानीय सरकारले आफ्नो क्षेत्रमा अक्सिजन सहितका बेडहरु निर्माण गरेर तयारी हालतमा राख्न सुरु गरेका छन् ।

दाङ । कोरोना अस्पताल बेलझुन्डीले अब संक्रमितलाई भर्ना गर्न नसकिने जनाएको छ । अक्सिजन अभावका कारण भर्ना लिन नसकिएको भन्दै अस्पतालका व्यवस्थापक द्रोण वलीले सामाजिक सञ्जालमार्फत अपील गरेका हुन् ।

‘अक्सिजनको सहज र पर्याप्त नभएको हुँदा कसैले पनि बिरामी भर्नाका लागि सिफारिस र दवाव नदिनुहोला,’ उनले फेसवुकमा लेखेका छन्, ‘थप बिरामी भर्ना गर्नु भनेको उपचाररत बिरामीको ज्यानसमेत जोखिममा पार्नु हो ।’

उनका अनुसार अस्पतालमा हाल बेड संख्या १०० पुर्‍याइएको छ भने ५७ जना संक्रमितको उपचार भइरहेको छ । तर,अक्सिजनको अभाव भएकाले ४५ जनाको ज्यान जोखिममा छ ।

आवश्यकता अनुसार अक्सिजनको व्यवस्था नभएकाले थप संक्रमितलाई भर्ना गर्न नसकिने व्यवस्थापक वलीले बताएका छन् । उनले अक्सिजनको सजह व्यवस्थापनका लागि सम्पुर्ण सरोकारवाला समक्ष अपील पनि गरेका छन् ।

रुपन्देही । रुपन्देहीमा कोरोना संक्रमणबाट एकैदिनमा १३ जनाको मृत्यु भएको छ । आज १३ जना थपिएसँगै रुपन्देहीमा संक्रमणबाट मृत्यु हुनेको संख्या २ सय ३३ पुगेको जिल्ला स्वास्थ्य कार्यालय रुपन्देहीले जनाएको छ ।

रुपन्देहीमा पछिल्लो २४ घण्टामा ५ सय ८७ जना संक्रमित भेटिएका छन् । यस संगै रुपन्देहीमा सक्रिय संक्रमितको संख्या ४ हजार ९ सय ५५ पुगेको छ । २४ घण्टामा सबैभन्दा बढी बुटवल उपमहानगरपालिकामा २ सय ५५ जना कोरोना पोजिटिभ देखिएका छन् ।

तिलोत्तमा नगरपालिकामा १ सय ३६, सिद्धार्थनगर नगरपालिकामा ६७, सैनामैनामा ४३ जना र देवदहमा ३६ जना संक्रमित थपिएको स्वास्थ्य कार्यालय रुपन्देहीले जनाएको छ ।

बढ्दो संक्रमण ग्राफ
बैशाख महिनासँगै रुपन्देहीमा कोरोनाको ग्राफ दैनिकरुपमा बढिहेको छ । बैशाख १ गते ३८ जना संक्रमित देखिएकोमा २ गते १५ जना ३ गते ३६ जना, ४ गते ३५ जना, ५ गते ६६ जना, ५ गते ७९ जना संक्रमित देखिएका थिए ।

यस्तै ७ गते ७३ जना, ८ गते १ सय १८ जना ९ गते ६८ जनामा संक्रमण देखिएकोमा १० गते एक्कासी बढेर यो संख्या २ सय २६ मा पुगेको थियो । त्यस यता संक्रमितहरुको संख्या लगातार बढ्दै गइरहेको छ ।

११ गते ३ सय १, १२ गत २ सय ४, १३ गते २ सय ६३, १४ गते ४ सय १९, १५ गते ३ सय ८०, १६ गते ४ सय ४७, १७ गते ४ सय ५९ जना, १८ गते ४ सय ४ सय ३२ जना, १९ गते ४ सय ४१ जना, २० गते ५ सय ७९ जनामा संक्रमण देखिएको थियो । यस्तै २१ गते ७ सय ९७ जना र २२ गते ५ सय ८७ जनामा संक्रमण देखिएको हो ।

स्वास्थ्य कार्यालयका अनुसार संक्रमितमध्ये ३२ प्रतिशत सक्रिय संक्रमित रहेका छन् भने ६६ प्रतिशत निको भएर घर फर्किसकेका छन् । संक्रमितमध्ये २ प्रतिशतको मात्र मृत्यु भएको छ ।

रुपन्देही । स्थानीयले शव व्यवस्थापनमा अवरोध गरेपछि नवलपरासी पश्चिमको रामग्राम नगरपालिका–४ का ४५ वर्षका महिलाको शव २ दिनदेखि व्यवस्थापन हुन सकेको छैन् । कोरोना संक्रमणबाट ज्यान गुमाएका ती महिलाको व्यवस्थापनमा ढिलाई हुँदा उनको शव अस्पतालको शव गृहमा राखिएको हो ।

मृत्यु हुने वित्तिकै शव व्यवस्थापनका लागि सम्बन्धित स्थानीय तहलाई जानकारी दिने गरिएको र तत्कालै शव लिने गरिएका पृथ्वीचन्द्र जिल्ला अस्पतालका मेडिकल सुपरिटेण्डेण्ट डा.मोहम्मद नुरुल होदाले जानकारी दिए । तर रामग्रामले भने अहिलेसम्म शव नबुझ्दा २ दिनदेखि जिल्ला अस्पतालको शव गृहमा राखिएको उनले बताए ।

शव व्यवस्थापन गर्न खोज्दा स्थानीयले विरोध गरेकाले समस्या आएको र जग्गाको खोजी भइरहेकाले ढिलाई भएको रामग्राम नगरपालिकाका प्रमुख प्रशासकीय अधिकृत राजेश पन्थीले जानकारी दिए । नगरपालिकाले वडा नं.४, ५ र ६ का लागि झरही खोला र वडा नं. १, २ र ३ का लागि वडा नं. १ मा जग्गा व्यवस्थापन गर्ने निर्णय गरेको छ ।

तर १८ वडा रहेको नगरपालिकामा ६ वटा वडाका लागि जग्गा व्यवस्थापन गरे पनि अन्य वडाका लागि भने जग्गाको खोजी गर्न नसकिएको पन्थीको भनाइ छ । जिल्ला स्वास्थ्य कार्यालयका कोरोना सम्पर्क व्यक्ति देविलाल पौडेलका अनुसार बैशाख पहिलो सातादेखि बुधबारसम्म जिल्लामा कोरोना संक्रमणका कारण २४ जनाको मृत्यु भएको छ भने अहिलेसम्म जम्मा मृत्यु हुनेको संख्या ५७ पुगेको छ ।

जनकपुरधाम । धनुषामा प्रहरी हिरासतमा रहेका ४ जनामा कोरोना संक्रमण भएको छ । बुधबार ३ जना थुनुवाको पिसिआर रिपोर्ट पोजेटिभ आएको र यसअघि नै १ जना थुनुवा संक्रमित भइसकेको जिल्ला प्रहरी कार्यालय धनुषाले जनाएकाे हाे ।

४ दिन पहिले संक्रमित भएका थुनुवालाई यदुकोहा प्रहरी कार्यालयमा छुट्टै कोठामा आइसोलेट गरिएको कार्यालयका  प्रवक्ता डिएसपी मकेन्द्र मिश्रले जानकारी दिए । उनका अनुसार बुधबार संक्रमण पुष्टि भएका ३ थुनुवालाई जिल्ला प्रहरी कार्यालयभित्रै आइसोलेशनमा राखिएको छ ।

थुनुवामा कोरोना पुष्टि भएपछि प्रहरीमा त्रास पैदा भएको छ । पछिल्लो समय धनुषामा कोरोना संक्रमण तीब्र गतिले बढिरहेको छ । वैशाख २१ बाट धनुषामा निषेधाज्ञा जारी छ ।

रुपन्देही । कोरोनाको हटस्पट मानीएको बाँकेमा आज बुधबार एकै दिन २ सय ९३ कोरोना संक्रमणमुक्त भएका छन् । ७६ वर्षका जेष्ठ नागरिकसहित १ सय ७० पुरुष र १ सय २३ महिला गरी आज २ सय ९३ जना संक्रमणमुक्त भएर घर फर्किएका हुन् ।

बुधबार मृतकको संख्या घटेपछि र र संक्रमणमुक्त हुनेको संख्या बढेपछि यसको व्यवस्थापनमा खटेका स्वास्थ्यकर्मीले खुसी भएका जिल्ला स्वास्थ्य कार्यालय बाँकेका कोरोना सम्पर्क व्यक्ति तेज वलीले जानकारी दिए । उनका अनुसार हिजो मंगलबार मात्र ३ सय ४२ जना संक्रमणमुक्त भएका थिए । वलीका अनुसार बुधबार ४ जनाको कोरोना संक्रमणपछि मृत्यु भएको छ ।

बुधबार मृत्यु भएका ४ जनासहित बाँकेमा अहिलेसम्म जिल्ला भित्रका १ सय ४६ र जिल्ला बाहिरका १ सय २६ गरी जम्मा २ सय ७२ जनाको मृत्यु भइसकेको छ । जिल्लामा बुधबारसम्म सक्रिय संक्रमितको संख्या ४ हजार ३ सय २२ रहेको छ भने १० जना भेन्टिलेटरमा उपचाररत छन् ।

पछिल्लो २४ घण्टामा ३ सय ८० जना नयाँ कोरोना संक्रमित थपिएका छन् । जिल्लामा रहेका ३ पीसीआर परिक्षण प्रयोगशालामध्ये २ वटा पिसिआर प्रयोगशालाबाट प्राप्त विवरणमा १ सय ८२ महिला र १ सय ९८ पुरुष गरि थप ३ सय ८० जनामा संक्रमण पुष्टि भएको हो । वलीले संक्रमण पुष्टि भएको १० दिन पुगेपछि संक्रमितलाई पीसीआर परीक्षण नगरी डिस्चार्ज गर्न थालेको जानकारी दिए ।

मेडिकल कलेजले थप भर्ना रोक्यो
अस्पतालमा अक्सिजनको अभाव भएकाले थप बिरामीको भर्ना लिन नसकिने भन्दै बाँकेको कोहलपुरस्थित नेपालगञ्ज मेडिकल कलेज शिक्षण अस्पतालले कोरोनाका थप बिरामी भर्ना लिन रोकेको छ । बुधबार कलेजले प्रेस विज्ञप्ति जारी गर्दै अस्पतालका सम्पूर्ण अन्य सेवा बन्द गरी ३ सय शैयासम्मको कोभिड अस्पताल तयार गरिएको भए पनि अक्सिजनको अभावमा १ सय ३५ शैया मात्रै सञ्चालनमा ल्याउने जनाएको हो । अस्पतालमा हाल १ सय ३३ जना कोरोना संक्रमितको उपचार भइरहेको जनाइएको छ ।

अस्पतालका अनुसार लुम्बिनी, कर्णाली र सुदूरपश्चिम प्रदेशकासमेत कोरोना संक्रमित बिरामीको चाप हुने भएकाले कोरोनाका लागि हरेक ५ दिनमा एउटा लिक्विड ट्याङ्क वा दैनिक ८ सय अक्सिजन सिलिन्डरको आवश्यकता पर्छ । कोरोनाका बिरामीको उपचार गर्न यथाशीघ्र उक्त परिमाणको अक्सिजन उपलब्ध गराइदिन अस्पतालले सरकारसँग माग गरेको छ ।

‘अस्पतालमा लिक्विड अक्सिजन ट्याङ्क, पीएसए अक्सिजन प्लान्ट तथा अक्सिजन सिलसन्डिरबाट कोभिडका बिरामीको उपचार भइरहेको थियो । सबैभन्दा भरपर्दो लिक्विड अक्सिजन ट्याङ्क सकिएको र भारतबाट आउन नसकेकाले यस शिक्षण अस्पतालले हाल उपचार गराइरहेका बाहेक थप कोरोनाका बिरामी भर्ना गर्न असमर्थ रहेको कुरा दुःखका साथ सार्वजनिक रुपमा सबैलाई जानकारी गराउन चाहन्छौं,’ अस्पतालले विज्ञप्तिमा भनेको छ ।
महामारीको विषम परिस्थितिमा अक्सिजनको समस्या दर्शाउँदै आपूर्तिका लागि स्वास्थ्य तथा जनसंख्या मन्त्रालयमा लिखित अनुरोध गरी अक्सिजन अभावका कारण अस्पतालमा ठूलो संकट आउनसक्ने जानकारी गराइसकेको पनि अस्पतालले प्रशासनले जनाएको छ ।

पोखरा । गण्डकी प्रदेशमा पछिल्लो २४ घन्टामा अहिलेसम्मकै धेरै संक्रमित फेला परेका छन् । प्रदेश स्वास्थ्य निर्देशनालयका अनुसार बुधबार गण्डकीमा  ५ सय ७४ जना संक्रमित फेला परेका हुन् ।

प्रदेश स्वास्थ्य निर्देशनालय प्रखुम डा. विनोदविन्दु शर्माका अनुसार पछिल्लो २४ घन्टामा गरिएको १ हजार २९० जनाको परीक्षण गर्दा ५ सय बढी संक्रमित थपिएका हुन् । त्यसमध्ये बुधबारमात्रै २ जनाको ज्यान गएको छ । मृत्यु हुनेमा स्याङजा र पर्वतका एक/ एक जना छन् ।

संक्रमण पुष्टि हुनेमा सबैभन्दा बढी कास्कीका छन् । बुधबारमात्रै कास्कीका २ सय ९२ जनामा कोरोना संक्रमण पुष्टि भएको छ । त्यस्तै, कोरोना संक्रमण पुष्टि हुनेमा गोरखा ६०, बागलुङ ५३, नलवलपरासी पूर्व ५२, तनहुँ ४४, म्याग्दी २९, स्याङजा २७, मनाङ ७, पर्वत ८ र लमजुङका २ जना छन् ।

एकैदिन ठूलो मात्रामा कोरोना संक्रमित पुष्टि हुँदा सक्रिय संक्रमितको संख्या पनि हालसम्मकै उच्च भएको छ । डा शर्माका अनुसार प्रदेशमा बुधबार गण्डकीमा सक्रिय संक्रमितको संख्या ३ हजार नाघेको छ ।

प्रदेश स्वास्थ्य निर्देशनालयका अनुसार बुधबार साँझसम्मसम्म सक्रिय संक्रमितको संख्या ३ हजार ३१ पुगेको छ ।

कुल सक्रियमध्ये कास्कीकामात्रै १८ सय १ जना संक्रमित छन् । प्रदेश स्वास्थ्य निर्देशनालयका अनुसार २ हजार ८०४ जना संक्रमित होम आइसोलेसनमा छन् भने बाँकी अस्पतालमा उपचाररत छन् । उनीहरुमध्ये ९५ प्रशितभन्दा बढीको अवस्था गम्भीर रहेको निर्देशनालयले जनाएको छ ।

काठमाडौं । बुधबार नेपालमा कोरोनाभाइरसका अहिलेसम्मकै सर्वाधिक मृतक र संक्रमित थपिएका छन् ।

स्वास्थ्य मन्त्रालयका अनुसार पछिल्लो २४ घण्टामा ५८ जनाको मृत्यु भएको छ ।

अहिलेसम्मकै सर्वाधिक संक्रमित पनि बुधबार थपिएका छन् । पछिल्लो २४ घण्टामा ८ हजार ६५९ जना भाइरस संक्रमण पुष्टि भएको छ ।

काठमाडौं उपत्यकाका तीन जिल्लामा मात्र ३,८३५ जना संक्रमित थपिएका छन् । २० हजार ७५६ पीसीआर र ६१३ एन्टीजेन परीक्षण गर्दा ती संक्रमित थपिएका हुन् ।

रूपन्देही । कोरोना संक्रमणको हटस्पट बनेको बाँकेको नेपालगञ्ज उपमहानगरपालिकाले होम आइसोलेसनमा बसेका कोभिड संक्रमितहरुलाई घरघरमा पुगेर मेडिसिन किट र हाईजिन किट उपलब्ध गराउने निर्णय गरेको छ ।

नगरक्षेत्रभित्र होम आइसोलेसनमा बसेका सबैलाई मेडिसिन र हाईजिन किट उपलब्ध गराउने नगर प्रमुख डा.धवलशम्शेर राणाको अध्यक्षतामा बसेको कोभिड व्यवस्थापन अनूगमन समितिको बैठकले निर्णय गरेको छ ।

स्वास्थ्यकर्मी र जनप्रतिनिधिहरुको टोली घरमै पुगेर हरेक संक्रमितलाई किट उपलब्ध गराउने नगर उपप्रमुख उमा थापा मगरले जानकारी दिइन् ।

पिसिआर परीक्षणको तथ्यांक अनुसार नेपालगञ्जमा हाल दुई हजार ४०० जना होम आईसोलेसनमा बसेका छन् ।

बैठकमा होम आईसोलेसन बसेकाहरुलाई नियमित परामर्श दिने र उनीहरुको समस्यामा कसरी केन्द्रीत हुन सकिन्छ भनेर छलफल भएको थियो । बैठकमा वडास्तरीय फोकल पर्सनहरुले रिपोर्टिङ गरेका थिए ।

स्वास्थ्यकर्मीहरुको समस्या समितिले तत्काल समाधानका लागि पहल गर्ने निर्णय गरेको स्वास्थ्यशाखा प्रमुख रामवहादुर चन्दले जानकारी दिएका छन् ।

स्वास्थ्यकर्मीलाई मनोवल बढाउन आग्रह

उपमहानगरपालिकाले कोभिड –१९ संक्रमण रोकथाम र नियन्त्रणका लागि अग्रभागमा खटिएका स्वास्थ्यकर्मी लगायत अन्य कर्मचारीलाई उच्च मनोवलका साथ काम गर्न आग्रह गरेको छ ।

कोभिड रोकथाम र नियन्त्रणका लागि उपमहानगरपालिकाबाट सञ्चालित कार्यक्रमहरुको अनुगमनका लागि गठित समितिको बैठकमा नगर प्रमुख डा. धवलशम्शेर राणाले कोभिड रोकथाम र नियन्त्रणका लागि यहाँका स्वास्थ्यकर्मी, सरसफाईकर्मी र अन्य कर्मचारीहरुले खेलेको भूमिकाको प्रशंसा गरे।

बैठकमा उपप्रमुख उमा थापा मगरले स्वास्थ्यकर्मी लगायतका अन्य कर्मचारी र जनप्रतिनिधिहरुले उच्च जोखिमका बीचमा पनि कोभिड रोकथाम र नियन्त्रणमा अहिलेसम्म महत्वपूर्ण जिम्मेवारी वहन गरेको भन्दै आगामी दिनमा झन उच्च मनोवलका साथ कार्यक्षेत्रमा खटिन आग्रह गरिन् ।

कार्यक्षेत्रमा कुनै समस्या वा कठिनाई भएमा तत्काल जनप्रतिनिधिहरुको सम्पर्कमा आउनुहोला, उपप्रमुख मगरले भनिन्,– तपाईहरुको कामको उच्च मुल्यांकन भइरहेको छ ।

नेपालगञ्ज उपमहानगरपालिकाले कोभिड रोकथाम र नियन्त्रणका लागि ह्वाईट हाउस र रामलिला मैदानस्थित तालिम केन्द्रमा आईसोलेसन केन्द्र सञ्चालन गरेको छ । सीमानाकामा हेल्थडेस्क सञ्चालन गरिरहेको छ ।

आइसोलेसन र हेल्थडेस्कसँगै होम आईसोलेसनमा बसेका कोभिड संक्रमितको परामर्शका लागि पनि प्रत्येक वडामा स्वास्थ्यकर्मी खटाइएको छ । आईसोलेसनमा बसेकाहरुको खाना र नास्ताको व्यवस्था उपमहानगरपालिकाले गरिरहेको छ ।

यसैबीच नेपालगञ्ज उप–महानगरपालिकाभित्र रहेका संक्रमितहरुलाई निशुल्क औषधी वितरणका सम्बन्धमा मंगलबार वडास्थित स्वास्थ्य संस्थाका प्रमुखहरुको बैठक उपमहानगरपालिकामा बसेको छ ।

 

रूपन्देही । लुम्बिनी प्रदेशको पहाडी जिल्ला अर्घाखाँचीमा सक्रिय संक्रमितको संख्या बढ्न थालेको छ । मंगलबार थप ५२ जनामा कोरोना संक्रमण पुष्टि भएपछि सक्रिय कोरोना संक्रमितको संख्या २ सय २९ पुगेको छ ।

जसअन्तर्गत सन्धीखर्क नगरपालिकामा १ सय २७, भुमिकास्थान नगरपालिकामा ७४, शीतगंगा नगरपालिकामा १४, मालारानी गाउँपालिकामा १७, पाणिनी गाउँपालिकमाा ८ र छत्रदेव गाउँपालिकामा १६ जना सक्रिय संक्रमित रहेको सहायक प्रमुख जिल्ला अधिकारी विक्रम थापाले जानकारी दिए ।

हालसम्म जिल्लामा २६ जना कोरोना संक्रमितको मृत्यु भएको छ । योसँगै जिल्लामा हालसम्म कोरोना संक्रमितको संख्या १ हजार ५६ पुगेको छ । जसमध्ये पछिल्लो २४ घण्टामा ६ जना संक्रमित डिस्चार्ज भएसँगै हालसम्म ८ सय १ जना निको भएका छन् ।

कैलाली । सुदूरपश्चिम प्रदेशमा पछिल्लो २४ घण्टामा ८ संक्रमितको मृत्यु भएको छ । जसमा कञ्चनपुरमा २ जना, कैलालीमा ४ जना, बझाङमा १ जना र बर्दियामा १ जनाको मृत्यु भएको हो ।

८ जना मध्ये ५ जनाको एन्टिजेन पोजेटिभ आएको र ३ जनाको पिसिआर पोजेटिभ आएको प्रदेश स्वास्थ्य निर्देशनालयले जनाएको छ । हाल सम्म प्रदेशमा १ सय ३४ जनाको कोरोना संक्रमणबाट ज्यान गइसकेको छ ।

स्वास्थ्य निर्देशनालयले पछिल्लो २४ घण्टामा सुदूरपश्चिम प्रदेशमा ४ सय ४६ जनामा संक्रमण पुष्टि भएको छ । ती मध्ये सबै भन्दा धेरै कैलालीका रहेका छन् । कैलालीका मात्रै १ सय ३९जनामा संक्रमण पुष्टि भएको छ ।

कञ्चनपुरका १ सय ३१, बैतडीका ५२, डडेल्धुराका ४५, अछामका २८, डोटीका २६, बझाङका २३, दार्चुला र अन्य जिल्लाका १ जनामा संक्रमण पुष्टि भएको हो । पछिल्लो २४ घण्टामा सुदूरपश्चिम प्रदेशमा २७ जना निको भएका छन् ।

काठमाडौं । कोभिड-१९ संक्रमितको संख्या बढ्दै गइ अक्सिजनको अभाव हुन थालेपछि यसको उचित व्यवस्थापनमा सहज गर्न र दुरुपयोग रोक्न प्रहरीले अक्सिजन उद्योगमा निगरानी बढाउने भएको छ ।

गृह मन्त्रालयले ७७ वटै जिल्लाका प्रमुख जिल्ला अधिकारीलाई परिपत्र गर्दै अक्सिजनको दुरुपयोग रोक्न र सही ठाउँमा उपयोग हुने गरी सुरक्षाको प्रबन्ध मिलाउन भन्दै परिपत्र गरेपछि यसको आवश्यक निगरानी प्रहरीले गर्न लागेको हो । गृह मन्त्रालयका सूचना अधिकारी खुमकान्त आचार्यले दुरुपयोग हुन नदिन सबै अक्सिजन उद्योगमा सुरक्षाको प्रबन्ध गर्न प्रमुख जिल्ला अधिकारीलाई निर्देशन दिइसकेको जानकारी दिए ।

उनका अनुसार उद्योग बाणिज्य तथा आपूर्ति मन्त्रालयको लिखित आग्रहपछि मन्त्रालयले प्रमुख जिल्ला अधिकारीलाई निर्देशन दिएको हो । सोही आधारमा सम्बन्धित जिल्ला प्रशासन कार्यालयले प्रहरी परिचालन गर्न थालेको जनाइएको छ ।

नेपाल प्रहरीले पनि गृहको निर्देशन अनुसार आवश्यक सुरक्षा व्यवस्था मिलाउन र दुरुपयोग हुन नदिन सबै जिल्ला प्रहरी कार्यालयलाई निर्देशन दिइसकेका प्रहरीका प्रवक्तासमेत रहनु भएका प्रहरी वरिष्ठ उपरीक्षक बसन्तबहादुर कुँवरले जानकारी दिए।

‘मुख्यतः अक्सिजनको दुरुपयोग हुनु भएन, उद्योग पूर्ण क्षमतामा सञ्चालन हुनुपर्यो, भारतमा जानु भएन, स्वास्थ्य क्षेत्रमा मात्रै प्रयोग गर्नु पर्यो त्यसका लागि स्थानीय प्रशासनसँगको समन्वयमा गरी आवश्यक सुरक्षा व्यवस्था गर्नु भनेर सबै जिल्लामा निर्देशन गइसकेको छ’, उनले नेपाल प्रेसलाई भने ।

यसअघि अक्सिजनको अभाव हुन थालेको भन्दै उद्योगीले सुरक्षाको माग गरेका थिए । अहिले मुलुकमा अक्सिजनको भन्दा सिलिण्डरको अभाव देखिएको व्यवसायीले बताउँदै आएका छन् । हाल देभभर अक्सिजनका २२ उद्योग रहेका छन् ।

रूपन्देही । रुपन्देहीमा अहिले सम्मकै सबैभन्दा बढी संक्रमित थपिएका छन् । स्वास्थ्य कार्यालय रुपन्देहीले दिएको जानकारी अनुसार पछिल्लो २४ घण्टामा जिल्लामा ७ सय ९७ जनामा कोरोना संक्रमण पुष्टि भएको हाे ।

स्थानीय प्रशासनले जारी गरेको निषेधाज्ञाकाे छैठाै दिन संक्रमितको संख्या झन् बढेका हाे । मंगलबार पनि बुटवलमा संक्रमित धेरै थपिएका छन् । बुटवल उप-महानगरपालिकामा मात्र ३ सय ३२ जना नयाँ संक्रमित थपिएका छन् ।

तिलोत्तमामा १ सय  ५८ जना, सिद्धार्थनगरमा १ सय ८ जना, सुद्धोधनमा ५७ जना, देवदहमा ४२ जना र सैनामैनामा ३५ जना नयाँ संक्रमित थपिएका छन् । त्यसैगरि ओमसतियामा २२ जना, रोहिणीमा १९ जना, सियारीमा ८ जना, कञ्चनमा ६ जना, मायादेबीमा ५ जना, गैडहवामा ३ जना र मर्चवारी र लुम्बिनी सांस्कृतिक नगरमा १-१ जनामा संक्रमण पुष्टि भएको स्वास्थ्य कार्यालयले जनाएको हाे ।

पछिल्लो २४ घण्टामा जिल्लामा ४ जनाको मृत्यु भएको छ भने २ सय २२ जना संक्रमित संक्रमणमुक्त भएर घर फर्केका छन् । जिल्लामा १ सय ५७ जना लक्षण सहितको संक्रमितले अस्पताल तथा आइसोलेशनमा उपचार गराईरहेका छन् भने ४ हजार ५ सय १९ जना होम आइसोलेशनमा रहेकाे स्वास्थ्य कार्यालय रुपन्देहीले जनाएको छ ।

काठमाडौं । नेपाल यातायात व्यवसायी राष्ट्रिय महासङ्घले स्वास्थ्य मापदण्ड अपनाएर अत्यावश्यक सवारी साधन चलाउन आग्रह गरेको छ ।

महासङ्घका महासचिव पुण्यप्रसाद (सरोज) सिटौलाले आज विज्ञप्ति जारी गरी विश्वमा फैलिएको नयाँ भेरियन्टसहितको दोस्रो चरणको कोरोनाले नेपालमा ठूलो स्वास्थ्य समस्या निम्त्याएको भन्दै निशेषधाज्ञाको समयमा स्वास्थ्य मापदण्ड अपनाएर अत्यावश्यक सवारी साधन चलाउन आग्रह गर्नुभएको हो ।

‘पछिल्लो समय कोरोना संक्रमणका कारण थुप्रै यातायात व्यवसायी, मजदुर तथा यात्रु संक्रमित हुनुका साथै थुप्रै व्यवसायी, मजदुर तथा यात्रुले अकालमै ज्यान गुमाएका छन् ।

यस्तो अवस्थामा स्वास्थ्य मापदण्डलाई कडाइका साथ लागू गर्न सबैलाई आग्रह गर्दछु’, महासचिव सिटौलाले भने । उनले कोरोना संक्रमणका कारण अकालमा ज्यान गुमाएका यातायात व्यवसायी मजदुर तथा यात्रुको आत्माको चीरशान्तिको कामना गर्दै शोकसन्तप्त परिवारजनप्रति हार्दिक श्रद्धाञ्जली अर्पण गरेका छन् ।

काठमाडौं । कोरोनाभाइरस संक्रमण भइ नर्भिक अस्पतालमा उपचार गराइरहेका एमाले नेता झलनाथ खनाल र पूर्वरानी कोमल शाहको स्वास्थ्यमा सुधार आइरहेको अस्पतालले जनाएको छ ।

नर्भिकले मंगलबार विज्ञप्ती जारी गर्दै खनाललाई अक्सिजनमा राखेर उपचार गराइराखेको उल्लेख गरेको छ । खनालको अवस्था सुधारोन्मुख रहेको समेत जनाइएको छ ।

पूर्वरानीको स्वास्थ्यमा पनि लगातार सुधार आइरहेको अस्पतालले जनाएको छ । ११ दिनअघि नर्भिकमा भर्ना भएकी शाहलाई विहिबारदेखि प्लाज्मा थेरापीबाट उपचार गरिएको थियो ।

पूर्वराजा ज्ञानेन्द्र शाह र पूर्व अधिराजकुमार प्रेरणा शाहको स्वास्थ्य अवस्था भने सामान्य र स्थिर रहेको जनाइएको छ ।

रुपन्देही । बुटवल उपमहानगरपालिकाले उपमहानगरपालिका भित्र आइसोलेसनमा रहेका संक्रमितका लागि निःशुल्क अक्सिजन सेवा सुरुवात गरेको छ ।

उपमहानगरले बनाएको आइसोलेसन, होटल आइसोलेसन तथा आफ्नै घरमा आइसोलेट भएका संक्रमितलाई श्वासप्रश्वासमा समस्या भएमा तत्काल स्वास्थ्यकर्मीसहितको टोलीले अक्सिजन लिएर पुग्नेछ ।

उपमहानगर कार्यालय परिसरमा अक्सिजन सिलिण्ड, सिलिण्डर बोक्ने गाडी, बिरामी बोक्ने एम्बुलेन्स र स्वास्थ्यकर्मीलाई तम्तयारी अवस्थामा राखिएको र आइसोलेशनबाट सूचना आउँदा साथ परिचालन हुनेगरि व्यवस्था मिलाइएको नगर प्रमुख शिवराज सुवेदीले जानकारी दिए ।

कोरोना संक्रमितको मनोबल बढाउन आयुर्वेद औषधि बोकेर जनप्रतिनिधि आफै घर–घरमै पुगिरहेका बेलामा अहिले अक्सिजनको माग बढेपछि स्वास्थ्यकर्मीसहितको टोलीले सिलिन्डर पुर्‍याउने गरि नयाँ व्यवस्था गरिएको छ ।

एम्बुलेन्स, पहिलो चरणमा एक सय थान सिलिण्डर, अक्सिजन बोक्ने गाडी, स्वास्थ्यकर्मी बोक्ने गाडी तयारी अवस्थामा राखिएको छ ।
बुटवलका अस्पतालमा आइसियु बेड अभाव भई संक्रमितको ज्यान गएका खबर निरन्तर आउन थालेपछि उपमहानगरले यस्तो कामको थालनी गरेको जनाएको छ ।

कोरोनाको दोस्रो लहरमा संक्रमितलाई आइसियु बेड चाहिने र अक्सिजन थेरापीको खाँचो परेको छ ।

अक्सिजनसहितको आइसीयू बेड अभावकका कारण बुटवलमा कतिपय संक्रमितको ज्यान गएपछि उपमहानगरले अक्सिजन अभावमा ज्यान जानुपर्ने बाध्यतामा रहेकालाई लक्षित गरेर मुलुकमै नौलो कार्यक्रमको सुरुआत गरेको छ ।

होम आइसोलेसनमा रहेकाहरूको परीक्षण, नियमित स्वास्थ्य निगरानी, योग र आयुर्वेद ओखती वितरण, एम्बुलेन्स तयारी अवस्थामा राखेको र लक्षित समुदायका लागि अक्सिजनको समेत व्यवस्था मिलाइएको छ । नगरका दीर्घ रोगीको विवरण संकलन गरेर घरमै अत्यावश्यक औषधी घरमै पुर्‍याइरहेको छ ।

होम आइसोलेसनमा बसेका संक्रमितलाई तत्कालै अक्सिजन मात्रै भए पनि स्वास्थ्य अवस्था नबिग्रने देखिएपछि अक्सिजनको व्यवस्था गर्न लागिएको नगर प्रमुख सुवेदीको भनाइ छ ।

आवश्यक प्रक्रिया पूरा गरेर अक्सिजन उपलब्ध गराउने र स्वास्थ्यकर्मीलाई समेत घरमै पठाइने छ । उपमहानगरको स्वास्थ्य तथा जनसंख्या महाशाखामार्फत स्वास्थ्यकर्मी, प्राविधिकलाई अक्सिजन उत्पादकसमक्ष छलफल गर्न, अक्सिजन सिलिण्डर संकलन गर्न, रिफिल गर्न उपप्रमुख गुमादेवी आचार्यको संयोजकत्वमा उपसमिति गठन गरेर अक्सिजन बैंक स्थापनाको प्रक्रिया अगाडि बढाएको थियो ।

सोही कार्यदलको सहकार्यमा अक्सिजन बैंक शुभारम्भ गरिएको प्रमुख प्रशासकीय अधिकृत शिवप्रसाद रेग्मीले जानकारी दिए ।

संघसंस्थाको समन्वय

उक्त कार्यदलमा रुपन्देही उद्योग संघका अध्यक्ष बाबुराम बोहोरा, औषधि व्यवसायी संघका सुरज भट्टराई, गौतमबुद्ध सामुदायिक मुटु अस्पतालका अध्यक्ष एजाज आलम, लायन्स क्लब एरिया ४ का सन्दीप कसौधनलगायत छन् ।

अक्सिजन उत्पादक कम्पनी र कोरोना उपचारका लागि स्थापना भएका अस्पतालसँग प्राविधिक विषयमा छलफल भएको र अक्सिजन उपलव्ध गराउने समुदायका लागि मापदण्डसमेत बनाइएको संयोजक एवम् उपप्रमुख आचार्यले बताइन् ।

जनस्वास्थ्यको क्षेत्रमा उपमहानगर जिम्मेवार रहँदै आएको बताउँदै उपलब्ध रहेका साधन स्रोतको अभावमा कसैको पनि अकालमा ज्यान नजाओस् भनेर थप संवेदनशील बनेको उनले बताइन् ।

 

आयुर्वेद बोकेर संक्रमितको घरदैलोमा

कोरोना संक्रमित भएकालाई हौसला बढाउन प्रमुख,उपप्रमुखसहितको टोली यस वर्ष पनि घरदैलोमा पुगेका छन् ।

होम आइसोलेसनमा बसेकाहरुका लागि भिटामिन बी,सी,डी र ई, अमला र गिलोयोको चूर्ण, जीङ्ग ट्याब्लेट, पेन्टाप्राजोल टेबलेट र सिटामोल सहितका औषधीसहितको पोको बोकेर जनप्रतिनिधिहरु यस वर्षपनि संक्रमितको घरघरमा पुगेका छन् ।

उपमहानगरका प्रमुख सुवेदी, उपप्रमुख आचार्य, प्रवक्ता रामप्रसाद रेग्मी तथा सम्बन्धित वडाका अध्यक्ष र प्रमुख प्रशासकीय अधिकृत शिवप्रसाद रेग्मीसहितको टोलीले संक्रमितको घरघरमा पुगेर हौसला बढाउने काम गरेका छन् ।

आयुर्वेद ओखती र जडिबुटी सहित स्वास्थ्यलाभको पत्र बोकेर उनीहरू घरघरमा पुगेको स्वास्थ्य शाखाका प्रमुख उमा थापाले बताइन् ।

बुटवलले मुलुकमै पहिलोपटक कोरोना संक्रमण भएर होम आइसोलेसनमा बसेकालाई घरमै गएर भेट्ने कार्यक्रम सुरु गरेको थियो । महामारी नियन्त्रणमा बुटवलमा भएका नमुना काम मध्येको यो पनि एउटा हो ।

बुटवलले यहाँ डायलासिस गराउने जुनसुकै विरामीका लागि पनि निःशुल्क स्वास्थ्य परीक्षण गर्नुका साथै, सहयोगापेक्षी सडकमानवलाई तत्कालै उद्दार गरेर आश्रममा राख्ने, परीक्षण गर्नेसम्मका उदाहरणीय काम गर्दै आएको छ ।

होम आइसोलेसनमा मापदण्ड पूरा गर्न आग्रह

कोरोना संक्रमित भई होम आइसोलेसनमा बसेकाहरुलाई स्वास्थ्य सुरक्षाका सबै मापदण्ड अपनाउन उपमहानगरले आग्रह गरेको छ ।

होम आइसोलेशनमा बसेकाहरुले सम्बन्धित टोल विकास संस्था वा वडाका जनप्रतिनिधिलाई नाम टिपाउन उपमहानगरले अपील गरेको छ ।

संक्रमितका लागि घरदैलोमा पुग्नेदेखि अक्सिजन सिलिण्डरसहितका एम्बुलेन्स र स्वास्थ्यकर्मी पठाउन सहज हुने भएकाले नाम र अवस्था टिपाउन आग्रह गरिएको प्रमुख प्रशासकीय अधिकृत शिवप्रसाद रेग्मीले बताए ।

कन्ट्रयाक ट्रेसिङ र लक्षण देखिए निःशुल्क परीक्षण

उपमहानगरपालिकाले संक्रमितको परिवार तथा समुदायमा कन्ट्रयाक ट्रेसिङ गर्ने र लक्षण देखिए निशुल्क परीक्षणको समेत व्यवस्था मिलाएको छ ।

१९ वटै वडा, स्वास्थ्य चौकी, सहरी स्वास्थ्य प्रवद्र्धन केन्द्रमा र उपमहानगरको स्वास्थ्य शाखामा सूचना दिएपछि उनीहरुको स्वाब संकलन गरेर परीक्षण गरिने छ ।

संक्रमितहरुका लागि सवारी साधनको आवश्यक परेमा होल्डिङ सेन्टरसम्म र आइसोलेसनदेखि आपतकालिन सेवा प्रदान गर्ने स्थलसम्म पुर्‍याउन सवारी साधनको समेत व्यवस्था मिलाइएको प्रवक्ता रामप्रसाद रेग्मीले बताए । यी सबै कामका लागि फोलक पर्सन तोकिएको छ ।

काठमाडौं । कोरोनाभाइरस संक्रमितको उपचारमा प्रयोग हुने औषधी रेमडेसिभिरको सात हजार डोज औषधी आज बंगलादेशबाट काठमाडौं आइपुगेको छ ।

औषधी व्यवस्था विभागका अनुसार आजैदेखि उक्त औषधीको वितरण सुरु गरिने भएको छ । विभागका प्रवक्ता सन्तोष केसीले थप डोज भोलि नेपाल आइपुग्ने जानकारी दिए ।

कोभिड संक्रमित बढ्दै गएको र उक्त औषधीको माग पनि वृद्धि हुन थालेपछि नेपाल ल्याइएको विभागले जनाएको छ । दिउँसो ३ बजेदेखि औषधीको वितरण सुरु भएको समेत उनले जानकारी दिए ।

उक्त औषधीलाई काठमाडौं र प्रदेशस्थित कोभिड अस्पतालमा पठाउने तयारी भैरहेको उनले जानकारी दिए । नेपालस्थित आधिकारिक आयातकर्ताको पहलमा औषधी ल्याइएको केसीले जानकारी दिए ।

स्वास्थ्यमन्त्री हृदयेश त्रिपाठीले शनिबार केही दिनभित्रै कोभिडका लागि चाहिने अत्यावश्यक औषधी काठमाडौं आइपुग्ने बताएका थिए । प्रधानमन्त्री केपी शर्मा ओलीले पनि सोमबार देशवासीको नाममा सम्बोधन गर्दै चीन र रुसबाट खोप ल्याउन खरिद प्रक्रिया सुरु गरिएको बताएका थिए ।

 

सुर्खेत । सुर्खेतको पश्चिम चौकुने गाउँपालिकाले अक्सिजनसहितको आइसोलेसन सेन्टर स्थापना गरेको छ ।

चौकुने गाउँपालिका-६ मा रहेको जीवन ज्योति माध्यमिक विद्यालयमा पालिकाले उक्त सेन्टरको स्थापना गरेको हो ।

नयाँ भेरियन्टसहितको कोरोना संक्रमण तीव्र बनेपछि उपचारमा सहज होस् भनेर अक्सिजनसहित आइसोलेसन कक्ष निर्माण गरेको गाउँपालिका अध्यक्ष धीरबहादुर शाहीले बताए ।

‘भारतबाट फर्किएका हरेक युवालाई पालिकामा निगरानीमा राख्ने गरेका छौं । संक्रमितलाई आइसालेसनमा बस्न अनुरोध गरिरहेका छौं ’, शाहीले भने ।

आइसोलेसन सेन्टरमा अहिले १२ वटा बेड राखिएको छ । ‘५० बेडको आइसोलेसन सेन्टर बनाउने हाम्रो लक्ष्य हो । अहिले १२ वटा बेड तयारी अवस्थामा छन् । ६ वटा अक्सिजन सिलिण्डर पनि हामीसँग छन् । बाँकी अक्सिजन सिलिण्डर थप गर्दैछौं’, शाहीले भने ।

उनका अनुसार भारतबाट गाउँ फर्किने युवाहरूको संख्या बढ्दै गएको र त्यसले कोरोना संक्रमणको खतरा बढाएकोले सचेतना अभियान पनि थालिएको छ ।

चौकुने गाउँपालिकामा मंगलबार आठ जनाको एन्टिजेन परीक्षण गर्दा ५ जनालाई संक्रमण देखिएको छ । तीमध्ये ३ जना होम आइसोलेसनमा र २ जना गाउँपालिकाको आइसोलेसनमा बसेका छन् ।

कैलाली । सुदूरपश्चिम प्रदेशमा पछिल्लो २४ घण्टाको अवधिमा १४ संक्रमितको मृत्यु भएको छ । कञ्चनपुरमा ६ जना, कैलालीमा ५ जना, बझाङमा २ जना र दार्चुलामा १ जना गरेर १४ जनाको मृत्यु भएको प्रदेश स्वास्थ्य निर्देशनालय दिपायलले जनाएको हो ।

निर्देशनालयका अनुसार १४ जना मध्ये ११ जनाको एन्टिजोन पोजेटिभ आएको र ३ जनाको पिसिआर पोजेटिभ आएको छ । हालसम्म सुदूरपश्चिम प्रदेशमा मात्र १ सय २७ जनाको कोरोना संक्रमणबाट मृत्यु भइसकेको छ । स्वास्थ्य निर्देशनालयले पछिल्लो २४ घण्टामा सुदूरपश्चिम प्रदेशमा २ सय १ जनामा संक्रमण पुष्टि भएको छ ।

सेती प्रादेशिक अस्पताल धनगढी, डडेल्धुरा अस्पताल डडेल्धुरा र जिल्ला अस्पताल डोटीमा ५ सय ७३ जनाको परीक्षण गर्दा २ सय १ जनामा संक्रमण पुष्टि भएको हो । पछिल्लो २४ घण्टामा सुदूरपश्चिम प्रदेशमा ३२ जना कोरोना संक्रमणमुक्त भएर घर फर्किएका छन् ।