Category: स्वास्थ्य-जीवनशैली

कैलाली । सुदूरपश्चिममा बुधबार ३० जना कोरोना संक्रमितको मृत्यु भएको छ ।

कैलालीमा सबै भन्दा धेरै १२ जनाको मृत्यु भएको छ । कंचनपुरमा ८ जना, डडेल्धुरामा ३ जना, दार्चुला र अछामका २/२ जना, डोटि र बझाङका १/१ जनाको मृत्यु भएको प्रदेश स्वास्थ निर्देशनालयले जनाएको छ ।

उपचारका क्रममा बाकेका १ जनाको पनि सुदूर पश्चिममा मृत्यु भएको निर्देशनालयले जनाएको छ ।

यो संगै प्रदेशमा ज्यान गुमाउनेको संख्या ३१७ पुगेको छ । प्रदेशमा पछिल्लो २४ घन्टामा ८७५ जनामा संक्रमण पुष्टि भएको छ । मंगलबार २१३ जना कोरोना संक्रमण मुक्त भएका छन् ।

काठमाडौं । शुक्रबार मुलुकमा ८,५२० जना कोरोनाभाइरस संक्रमित थपिएका छन् । पछिल्लो २४ घण्टामा २०३ जनाको मृत्यु पुष्टि भएको छ ।

स्वास्थ्य तथा जनसंख्या मन्त्रालयका अनुसार २१ हजार ४७८ वटा पीसीआर र एन्टीजेन नमुना परीक्षण गर्दा ती संक्रमित थपिएका हुन् । ६ हजार १३५ जना निको भएका छन् ।

कूल संक्रमित संख्या ४ लाख ३९ हजार ६५८ पुगेको छ । मृत्य हुनेको संख्या ४६६९ पुगेको छ । निको हुनेको संख्या ३ लाख २७ हजार पुगेको छ ।

सक्रिय संक्रमित संख्या १ लाख ७३ हजार ३६ पुगेको छ । ५१६ जना क्वारेन्टिनमा छन् ।

परीक्षणमध्ये संक्रमण दर १६ प्रतिशत छ । पजेटिभमध्ये मृत्युदर १.४ प्रतिशत छ । काठमाडौंमा सक्रिय संक्रमित ३० हजार ४५२ छन् ।

काठमाडौं । कोभिड-१९ महामारीको कारण आगामी भदौ १६ गते (अगस्ट १) सम्म नेपालमा ४२ हजार ५३९ जनाको मृत्यु हुने प्रक्षेपण युनिभर्सिटी अफ वासिङ्टन स्कुल अफ मेडिसिनले गरेको छ ।

उक्त विश्वविद्यालयको इस्टिच्युट फर हेल्थ मेट्रिक्स एन्ड इभालुएसन (आइएचएमई)का अनुसार कोभिडको अवस्था खराब भए नेपालमा त्यति संख्यामा मानिसको ज्यान जाने छ ।

दैनिक मृत्यु, अस्पतालको स्रोत साधन, दैनिक संक्रमण र परीक्षण, मास्कको प्रयोग र सामाजिक दूरी पालनाको वर्तमान अवस्थालाई अध्ययन गर्दैै उक्त निकायले सो प्रक्षेपण गरेको हो ।

यदि उपलब्ध जनसंख्याले मास्कको अनिवार्य प्रयोग गर्ने हो भने उक्त कूल मृत्युलाई ४ हजारले घटाउन सकिने पनि जनाइएको छ ।

दैनिक मृत्युलाई आधार मान्दा जेठ १६ गते (मे ३०) मा सर्वाधिक ८७० जनाको मृत्यु हुने प्रक्षेपण पनि उक्त निकायले गरेको छ । अर्थात, जेठ १६ लाई भाइरसको दोस्रो लहरको पिक (उचाइ) मानिएको छ ।

जेठ ११ गतेसम्म १ लाख ७ हजार थप बेड आवश्यक पर्न सक्ने आंकलन पनि गरिएको छ । सोही मितिमा २१ हजार आइसीयू बेड पनि चाहिन सक्ने अध्ययनको निष्कर्ष छ ।

बैशाख ३० गते विहिबारसम्म नेपालमा भाइरसका कारण ४ हजार ४६६ जनाको मृत्यु भएको छ । ४ लाख ३१ हजार जना संक्रमित भएका छन् । सो मितिसम्म सक्रिय संक्रमित संख्या १ लाख ५२ हजार पुगेको छ ।

काठमाडौं । सरकारले अक्सिजन सिलिन्डरको कोटा तोकेसँगै अस्पतालले कोरोनाको नयाँ बिरामी भर्ना नलिने र उपचार गराइरहेकालाई पनि डिस्चार्ज गरिदिने बताउन थालेका छन् ।

नयाँ भेरियन्टसहितको कोरोना संक्रमण तीव्र बढेसँगै अस्पतालमा संक्रमितको चाप बढेको छ । बेड र अक्सिजनको अभाव पनि देखिन थालेपछि उपचार नै नपाइ संक्रमितको मृत्यु भइरहेको समाचार पनि सार्वजनिक भइरहेको छ ।

कोभिड-१९ संकट व्यवस्थापन केन्द्र (सीसीएमसी) ले कोरोना संक्रमितको उपचार गर्न उपत्यकाका अस्पतालहरुका लागि अहिले कोटा निर्धारण गरेको छ । अभाव हुन नदिन सबै अस्पताललाई चाप र आवश्यकताको आधारमा अक्सिजन उपलब्ध होस् भनेर त्यस्तो कोटा प्रणाली लागू गरिएको सीसीसीएमसीको भनाइ छ ।

अस्पतालको क्षमता हेरेर ५ वटादेखि ३ सयसम्म ठूला सिलिन्डरको कोटा तोकिएको छ ।

नर्भिक, ग्राण्डी, मेडिसिटी अस्पतालले अक्सिजन अभाव देखाउँदै बिरामी भर्ना नलिने बताइसकेका छन् । जोरपाटीस्थित नेपाल मेडिकल कलेजले पनि अस्पतालमा अक्सिजन नभएकोले बिरामी डिस्चार्ज गर्न भन्दै आफ्नो व्यवस्था आफैं गर्न बिरामीका आफन्तलाई भनेको थियो ।

उपत्यकाका अस्पताललाई तोकिए बमोजिम दैनिक न्यूनतम अक्सिजन सिलिन्डर भरेर उपलब्ध गराउन अक्सिजन उद्योगलाई सीसीएमसीले अनुरोध गरेको हो ।

अक्सिजन कोटा प्रणाली वैज्ञानिक : सीसीएमसी

सीसीएमसी सचिवालयका सहसचिव नूरहरि खतिवडाले सीसीएमसीले वैज्ञानिक तरिकाले नै काठमाडौं उपत्यकामा अक्सिजनको कोटा तोकेको बताए ।

खतिवडाले भने, ‘अहिले देशैभर अक्सिजनको हाहाकार छ । ठूला अस्पातालले धेरै अक्सिजन लगेर सानाले नपाउने अवस्था भएकोले कोटा तोकिएको हो । अक्सिजन भएमा तोकेको कोटाभन्दा धेरै पनि प्रयोग गर्न सकिने छ । तर, अक्सिजनको अभाव भएकोले सबै अस्पतालले अक्सिजन पाउन भनेर कोटा तोकिएको हो । अक्सिजन बिक्रीमा चलखेल शुरू भएपछि सीसीएमसीले त्यसलाई रोक्न पनि कोटा तोकेको हो ।’

अक्सिजन उद्योगहरूले कालोबजारी गरेर अक्सिजन बिक्री गर्न शुरू गरेकोले सानादेखि ठूला सबै अस्पतालले अक्सिजन पाउन भनेर कोटा तोकिएको उनले बताए ।

अहिले अक्सिजनको कालोबारी गर्न नपाएका उद्योगीहरुले नै अक्सिजनको कोटा तोक्नु तलत हो भनिरहेका छन् । कोरोनाको बिरामी सबैले अक्सिजन प्रयोग गर्न सक्ने अवस्था ल्याउनका लागि कोटा तोकिएको खतिवडाले बताए ।

उनले नेपाल प्रेससँग भने, ‘हामीले तोकेको कोटा न्यूनतम हो । अस्पतालले तोकेको कोटा पाउने अवस्था छ । पहिले ठूला अस्पतालले धेरै लिने गरेको थिए । र अन्यलाई उद्योगले नै धेरै पैसा लिएर बिक्री गरिरहेका थिए । हामीले कोटा तोकेपछि कालोबजारीमा अक्सिजन बेच्न नपाएर उद्योगीले विरोध गरेका हुन् । अहिले साना अस्पतालले पनि कोटा अनुसारको अक्सिजन पाएका छन् ।’

काठमाडौं प्रशासनले भन्यो- मानवीय संवेदनालाई ध्यान दिऊँ

जिल्ला प्रशासन कार्यालय काठमाडौंले संक्रमण तीव्र फैलिरहेको अवस्थामा सबै पक्ष जिम्मेवार भएर अघि बढ्नुपर्ने भन्दै ध्यानाकर्षण गराएको छ ।

विभिन्न अस्पतालले अक्सिजन अभावको कारण देखाई बिरामीलाई अस्पतालमा भर्ना गर्न नसकिने तथा भर्ना भएका बिरामीलाई समेत उपचार गर्न नसकिने भन्दै सार्वजनिक सूचना जारी गरिरहेकोप्रति गम्भीर ध्यानाकर्षण भएको जनाउँदै प्रशासनले विज्ञप्ति निकालेरै मानवीय संवेदनशीलतामा ध्यान दिन भनेको छ ।

वर्तमान परिस्थितिमा संक्रमण नियन्त्रणका लागि अस्पताल, औषधि तथा अक्सिजनको व्यवस्थापनमा सबै पक्ष क्रियाशील भइरहेको जानकारी गराउँदै अक्सिजनको अभावलाई पूर्ति गर्न सबै पक्षबाट भइरहेको प्रयासलाई नजरअन्दाज गर्दै सार्वजनिक सूचनाका नाममा सर्वसाधारण जनतामा त्रास फैलाउने कार्य नगर्न पनि प्रशासनले चेतावनी दिएको छ ।

हेर्नुस् अस्पतालको विज्ञप्ति

विश्वभर महामारीको रुपमा फैलिएको कोरोना भाइरस (कोभिड-१९)मानव जातिकै लागि एउटा विषम परिस्थिति सावित भएको छ । यो संकटको घडीमा संयम र जिम्मेवार भएर सबैले आ–आफ्नो ठाँउबाट रोकथामका लागि भूमिका निर्वाह गर्न जरुरी छ । यस्तो अवस्थामा सरकारलाई सबै दोष थुपारेर जनताचाहिँ लापरबाही गर्दै हिँड्ने गरेकाले पनि संक्रमणको दर भुसमा सल्किएको आगो जस्तै बनेको छ । अनि पिल्सिएका छन् कैयौँ युवा, छट्पटाएका छन् हरेक नेपाली मन ।

जीवन र मरणको दोसाँधमा एक मुठी सासको लागि लडिरहेका छन् हजारौँ संक्रमित । असहाय भएका छन् स्वास्थ्यकर्मीहरू ।

संक्रमण जसलाई पनि लाग्न सक्छ, आफूले गरेको नियमको पालनाले अर्कोको जोखिम कम हुन्छ भने अरुले गरेको नियमको पालनाले आफूलाई जोखिम कम हुने हुँदा सबै मिलेर सबैको रक्षाका लागि अनुशासित हुन जरुरी छ । म मात्र जोगिन्छु मैले रोकथामका सबै उपाय पालना गरेको छु भनेर ढुक्क हुने अवस्था छैन । त्यसैले आफू लगायत सबैलाई सही तरिकाले मास्कको प्रयोग गर्न, हात बारम्बार साबुन पानी वा स्यानीटाइजरले सफा गर्न, सामाजिक दुरी ६ फिट भन्दा बढी कायम, आनावश्यक हिँडडुल नगर्न सबैको प्रमुख दायित्व हो ।

यो अवस्थामा मन बहलाउने बहानामा घुमन्ते बनेर फेरि घर फर्केर सरकारलाई गैरजिम्मेवार घोषणा गर्नु मुर्खता हो । रोकथामको लागि सबैले यस विषम अवस्थाको जटिलतालाई मनन गरेर कडा सेल्फ लकडाउनमा बस्नु नै बुद्धिमानी हो । यो नै अहिलेको परिस्थितिले मागेको अपरिहार्यता हो ।

अवस्था कठिन छ, दर्दनाक छ । कोरोनाको नयाँ प्रजातिलाई कतिपयले मजाकको रुपमा लिएका छन् भने खोप लगाएकाले ‘मलाई लाग्नै सक्दैन’ भनेर ढुक्क भई स्वास्थ्य मापदण्डको पालना नगरेको पाइन्छ । यस्तो भ्रममा पर्ने मुर्खता नगर्नुहोस् । कोभिड–१९को संक्रमण भएर मुक्त भएका र खोपका दुबै डोज पूरा गरेकालाई पनि लाग्छ । खोप रोकथामको एउटा माध्यम मात्र हो ।

यसरी नयाँ प्रजाति थपिँदै जाँदा खोपको असर प्रभावकारी नबन्न सक्छ । उच्च मनोबल संक्रमणसँग लड्ने सबैभन्दा बलियो अस्त्र हो । अवस्था भयावह बन्दै जाने क्रममा सम्पूर्ण नागरिकको मनोबल कमजोर परिरहेको छ । रोगसँग लडने रोग प्रतिरोधात्मक क्षमताका साथै मनोबललाई पनि बलियो बनाउन सक्नु नै यस रोगमाथि विजय प्राप्त गर्नु हो । समय बिताउने सामाजिक सञ्जाल फेसबुक सबैको प्रिय माध्यम हो । यस्तो सञ्जालमा संक्रमणसँग सम्बन्धित नकारात्मक खबर तथा तस्बिर पोष्ट गर्नाले पनि मानिसमा त्रास र अत्यास बढेकोे छ ।

त्यसैले संक्रमित तथा उनीहरूका आफन्त लगायत सम्पूर्ण नागरिकको हौसला बढाउन र रोगसँगको सकारात्मक पक्षसँग पनि परिचित हुन निको भएका बिरामीको संख्या, सरकार वा अरु सामाजिक संघसंस्था तथा व्यक्तिहरूले समस्यालाई सहज बनाउन गरिरहेका प्रयासबारे जानकारी गराइदिन पर्छ ।

कोभिड–१९को कारणले हुने श्वासप्रश्वासमा समस्याको लक्षण र अत्यास, डर र त्रासले हुने छट्पटीको प्रकार उस्तै उस्तै पनि हुने गर्दछ । र सबैको घरमा अक्सिजन नाप्ने उपकरणको उपलब्धता नहुन पनि सक्छ , होमआइसोलेसनमा बसेका बिरामीलाई र संक्रमितको ख्याल राख्ने कसैलाई पनि सास फेर्न गाह्रो भएको महसुस भएकै भरमा अस्पताल जानाले साँच्चिकै अक्सिजन नपुगेका बिरामीको पहिचान र उपचारमा ढिलाइ हुनसक्छ ।

अहिले देशका सबैजसो अस्पतालहरू बेड, अक्सिजन र स्वास्थ्यकर्मीहरूको चरम अभावबाट गुज्रिरहेका छन् । त्यसैले आफ्नो मनोबललाई उच्च राखी लक्षणहरूको सही पहिचान गरी अस्पताल जानुपर्ने जरुरी छ ।

एक्लै होमआइसोलेसनमा बस्न लामो समय बिरामीलाई गाह्रो भएका समाचार देखाइराख्दा आफुलाई पनि गाह्रो भएको हो की भन्ने छटपटी र अत्यास लाग्नु र सास फेर्न ग्राहो भएको जस्तो लाग्नु स्वाभाविक हो । यस्तो अवस्थामा गोलीगाँठो मुनि पारेर एउटा सिरानी, पेटको मुनि पारेर दुईवटा सिराना, घाँटीको मुनि पारेर एउटा सिरानी राखेर सास फेर्न अप्ठयारो नहुने गरी घोप्टो परेर प्रोन पोजिसनमा सुत्नाले केही समयपछि सास फेर्न सहज हुँदै जान्छ ।

होमआइसोलेसनमा बसेका संक्रमितहरूले जथाभावी औषधि प्रयोग गर्नाले अन्य नकारात्मक असर पर्न सक्छ । यो रोगको निश्चित औषधि नभएका कारण स्वास्थ्यकर्मीको पराशर्म लिएर मात्र लक्षण अनुसारको औषधि प्रयोग गर्नुपर्दछ । अहिले संक्रमितहरूको सहयोगका लागि स्वास्थ्यकर्मीहरूले फोन नम्बर सहितको विभिन्न ग्रुप बनाएर परामर्श दिने गरेका छन् । हरेक संक्रमितलाई अस्पताल लैजान जरुरी छैन तर होमआइसोलेसनमै निको हुनका लागि स्वास्थ्य परामर्श हुने जरुरी हुन्छ ।

मानिस अत्यन्त संवेदनशील प्राणी हो । मानिसलाई दुख, पीडा, माया र अत्मीयताको आभास हुने भएकाले आफू र आफ्ना परिवारका लागि आतिनु एकदमै स्वाभाविक कुरा हो तर आफू र आफ्ना परिवारको सुरक्षा मात्र सोचेर अफ्ठ्यारोमा परेका अन्य मानिसको नजिक नपर्नु अमानवीय पक्ष हो । उचित तरिकाले मास्कको प्रयोग गरेर दुरी कायम गरेर पनि संक्रमितलाई सहयोग गर्न सकिन्छ । सबै मानिस परिवारसँगै बसेका या आफ्नै घरमा हुन्छन् भन्ने पनि हुँदैन । उनीहरू यस्तो अवस्थामा एक्लै परेकाले, देख्नेले संक्रमण सर्ने डरले सहयोग नगर्दा कतिपय संक्रमितले होमआइसोलेसनमै दम तोडेको पक्ष अति नै दुखद् हो ।

सरुवा रोग हो, डराउनुपर्छ , दुरी कायम गर्नुपर्छ तर उचित तरिकाले स्वास्थ्य मापदण्ड पालना गरेर सहयोग गर्न सकिन्छ । यो संक्रमण कसलाई कहाँबाट कसरी सर्छ भन्ने अन्दाज लगाउन सकिँदैन त्यसैले सर्तक भएर एक अर्कालाई सहयोग गर्न जरुरी छ । हामी सबै मिलेर अवश्य यसविरुद्ध लडन सक्छौँ । संक्रमितको हिम्मत, मनोबल र हौसला बढाइ राख्न अत्यन्त जरुरी छु । त्यसैले सबैले सबैलाई माया गरौं । मानिस भएर मानवीय व्यवहारको आभाष दिलाउन नभुलौं । संक्रमणको डरले संक्रमितलाई नै वेवास्ता गर्नु संक्रमण भन्दा पनि घातक हुनसक्छ । त्यसैले हरेक मानिस स्वच्छ मानसिक, मनोबल र आत्मीयताले बलियो हुन आवश्यक छ ।

तत्कालीन स्वास्थ्य संकटको घडीमा आफ्नो परिवारबाट टाढा रहेर दिनरात भोक तिर्खा नदुखाई केही नभनी हरेक पल भेन्टिलेटर र अक्सिजनको सहारामा जीन्दगीसँग लडिरहेका बिरामीहरुको सेवामा समर्पित स्वास्थ्यकर्मी महान छन् । स्वास्थ्यकर्मी रुमाल हुन्, सबैका दुःख पीडालाई पुछेर आफू भिज्न जानेका छन । उनीहरू सम्पूर्ण देशमाथि आइपरेको यस चोटमा मह्लम बनेर उभिएका छन् । कृपया उनीहरूको बारेमा विभिन्न ट्रोल बनाएर, सेवा सुविधालाई बढाएर हौसला दिनुपर्नेमा उनीहरूले पाइरहेका सेवा सुविधा समेत घटाएर दुखाइमा नुन छर्किने काम नगरियोस् ।

स्वास्थ्यकर्मीको त्यागमा हरेक जनताको जिन्दगी बाँचेको छ, उनीहरूलाई पनि हाम्रो साथ सहयोग र हौसलाको खाँचो छ भन्ने अनुभूति गरौँ । आज देश कोभिड–१९को महामारीले आक्रान्त छ । स्वास्थ्य क्षेत्र एकदमै अस्तव्यस्त बनेको छ । अवस्था कठिन र जोखिमपूर्ण छ, केही दिन अझै संयमित भई संघर्ष गरौं । सबैको कोसिसले अवश्य यसबाट पार पाउनेछौँ ।

लेखक शिक्षण अस्पताल महाराजगंजमा कार्यरत नर्स हुन् ।

काठमाडौं । देशको स्वास्थ्य संस्थाले थेग्न नस्कने गरी कोडिड-१९ को संक्रमण बढेपछि नेपाल चिकित्सक संघले देश भर ‘रेड अलर्ट’ घोषणा गरेको छ ।

संघले बुधबार एक अपील जारी गर्दै कोभिड-१९ को महामारीको जालोलाई तोड्नका लागि ‘रेड एलर्ट’ घोषणा गरेको हो ।

चिकित्सक संघका अध्यक्ष डा. लोचन कार्की र महासचिव डा. बद्री रिजालले जारी गरेको अपीलमा चिकित्सक, नर्स, स्वास्थ्यकर्मी फिल्डमा अग्रभागमा रहेर काम गरिरहेका छौ, गरिरहेने प्रतिबद्धता व्यक्त गरिएको छ ।

राष्ट्रपति, प्रधानमन्त्री, सम्पूर्ण राजनीतिक दलहरु, नागरिक समाज समेतलाई सम्बोधन गर्दै अपिलमा भनिएको छ ‘नेपालको स्वास्थ्य अवस्थालाई गम्भीर रुपमा मनन गर्दै नेपाल चिकित्सक संघ देशभर “रे८ अलर्ट” घोषणा गर्दै सबैले आ आफ्नो स्थानबाट सहयोग र समन्वयकारी भूमिका निर्वाह गर्न अपील गरेका छौ ।’

यस्तो छ अपील

काठमाडौं । अस्पतालमा अक्सिजन अभाव हुन थालेपछि कोरोना संक्रमितका आफन्तले सोझै अक्सिजन उद्योगलाई फोन गर्न थालेका छन् ।

कोभिड-१९ संकट व्यवस्थापन केन्द्र (सीसीएमसी) ले अक्सिजनको कोटा तोकेपछि केही अस्पतालले बिरामी भर्ना नलिने तथा उपचार गरिरहेका बिरामी डिस्चार्ज गरिदिने बताउन थालेका छन् ।

नेपाल अक्सिजन उत्पादक संघका अध्यक्ष गौरव शारदाले अक्सिजनका लागि आफूहरूलाई बाक्लो फोन आउन थालेको बताउँछन् ।

शारदाले नेपाल प्रेससँग भने, ‘बिरामीको आफन्तले अक्सिजन दिएर आफ्नो बिरामीको ज्यान बचाइदिनुपर्‍यो भन्छन् । हामीले अस्पताललाई नै अक्सिजन दिने गरेका छौं भनेर बुझाउँछौं । अहिले हामीले उत्पादन गरेको अक्सिजन सीधै अस्पतालभन्दा अन्य ठाउँ बिक्री गर्न मिल्दैन । फोन गर्नेहरूले कति पैसा लाग्ने हो त्यती दिन्छौ समेत भन्ने गरेका छन् ।’

सिलिन्डरको अभावले उत्पादन भएको सबै अक्सिजन उपभोग गर्न सक्ने अवस्था नरहेको उनले बताए । नेपाल अक्सिजन उत्पादक सघंका उपाध्यक्ष वसन्त मरठ्ठाले पनि अक्सिजन दिएर बिरामीको ज्यान बचाइदिनुपर्‍यो भनेर दैनिक धेरै फोन आउने गरेको बताए ।

मरठ्ठाले भने, ‘अक्सिजन उद्योगीलाई अक्सिजन दिनु पर्‍यो भनेर धेरै फोन आउने गरेको छ । अक्सिजन उत्पादकले फोन थेग्नै नसक्ने अवस्था छ । अहिले स्वास्थ्य मन्त्रालय र सीसीएमसीको मात्रै फोन उठाउने अवस्था आएको छ । अक्सिजन चाहियो भन्नेहरूको फोन आएर फोन सधै बिजी हुने गरेको छ । यस्तो महामारीको समयमा घरमा भएको सबै अक्सिजन सिलिन्डर प्रयोगमा ल्याउन सके केही सहज हुन्छ कि भन्ने अवस्था आएको छ ।’

उनले भने, ‘साना सिलिन्डर घरमा नै थन्किएर बसेका भए त्यसलाई तत्कालै प्रयोगमा ल्याउनु पर्‍यो । अहिले सिलिन्डरको अभावले गर्दा भएको सबै उत्पादन प्रयोग गर्न सकिएको छैन । त्यसलाई प्रयोग गर्न पनि घरमा लगेर राखेका र अक्सिजन प्रयोग गर्ने उद्योगहरुसँग भएको सबै सिलिन्डर प्रयोगमा ल्याउन सके अवस्था केही सहज हुने थियो ।’

सीसीएमसीले काठमाडौं उपत्यकाका अस्पतालहरूलाई क्षमता हेरेर ५ देखि ३ सय सिलिन्डर दिन अक्सिजन उद्योगहरूलाई आदेश गरेको छ ।

अहिले अक्सिजन बिक्री डिपोबाट नभइ उद्योगबाटै सीधा अस्पताल जाने गरेको छ । चीनबाट हिजो मात्रै ४ सय थान अक्सिजन सिलिन्डर जहाजबाट नेपाल भित्रिएको छ ।

काठमाडौं । सरकारले कोभिड-१९ उपचारमा प्रयोग हुने औषधि रेम्डेसिभिरको मूल्य निर्धारण गरेको छ ।

स्वास्थ्य आपतकालिन कार्य संचालन केन्द्रले बुधबार विज्ञप्ती जारी गर्दै प्रति भायल चार हजार नौसय रुपैयाँमा उपलब्ध हुने जनाएको छ ।

चिकित्सकले रेम्डेसिभिर औषधि सिफारिस गरेमा सम्बन्धित चिकित्सकको प्रेस्क्रिप्सनसहित सम्पर्क गर्न केन्द्रले अनुरोध गरेको छ ।

जसका लागि कुपण्डोल युएन पार्कस्थित आयन हेल्थकेयरमा सम्पर्क गर्न भनिएको छ ।

काठमाडौं । कोरोना महामारी नियन्त्रण गर्न नसके विकराल स्थिति आउन सक्ने भन्दै तत्काल संकटकाल घोषणा गर्न नेपाल नगरपालिका संघले माग गरेको छ । संघका अध्यक्ष अशोककुमार ब्याञ्जुले स्वास्थ्य तथा जनसंख्या मन्त्रीलाई ध्यानाकर्षण पत्र लेख्दै यस्तो माग गरेका हुन् ।

‘हाल फैलदो महामारी नियन्त्रण गर्न नसके विकराल स्थिति आउन सक्ने भएकोले मुलुकमा तत्काल स्वास्थ्य संकटकाल घोषणा गरी नागरिकको जीउ, ज्यान सुरक्षाका लागि निम्न बमोजिमका कार्यलाई अघि बढाउन संघ सरकारलाई ध्यानाकर्षण गराउन चाहान्छौं,’ पत्रमा भनिएको छ ।

हालसम्म नेपालमा ६८ जिल्लामा फैलिएर झन् भयावह भएको, अक्सिजन अभावले अधिक मात्रामा मानवीय क्षति समेत भइरहेको संघको भनाइ छ।

संक्रमण रोकथाम संविधानत: संघको एकल अधिकार भए पनि महामारी नियन्त्रण साझा प्रयासमा मात्र सम्भव हुने भन्दै संघले स्थानीय, प्रदेश र केन्द्र सरकारबीच समन्वयको आवश्यकता औंल्याएको छ ।