Category: स्वास्थ्य-जीवनशैली

काठमाडौं । सरकारले कोभिड-१९ विरुद्ध थप ३ करोड मात्रा खोप प्राप्त हुने क्रममा रहेको जनाएको छ ।

अर्थमन्त्री जनाद्र्धन शर्माले आज प्रतिस्थापन विधेयक सार्वजनिक गर्दै १ करोड ३३ लाख ५९ हजार मात्रा खोप नेपाल आइपुगेको र थप ३ करोड प्राप्त हुने क्रममा रहेको जनाएका हुन् ।

मुलुकको कूल जनसंख्याको १७ प्रतिशतले खोप लगाइसकेको बताउँदै उनले खोप लगाउन योग्य सबै नेपालीलाई जतिसक्दो चाँडो खोपको सुनिश्चितता गर्न खोपको प्रबन्ध गर्ने व्यवस्था गर्न स्रोतको व्यवस्था मिलाएको बताए ।

कोभिड–१९ संक्रमण रोकथाम, नियन्त्रण र उपचारका लागि स्रोतको कमी हुन नदिन सरकार प्रतिबद्ध रहेको उनले जनाए । खोप व्यवस्थापनका लागि वैदेशिक स्रोतका अतिरिक्त आन्तरिक स्रोत समेत परिचालन गर्ने पनि अर्थमन्त्रीले जनाए ।

काठमाडौं । विश्व स्वास्थ्य सङ्गठनले दक्षिणपूर्वी एसिया क्षेत्रका आफ्ना सदस्य राष्ट्रहरूलाई नसर्ने रोगहरूको रोकथाम तथा नियन्त्रणका लागि भइरहेका प्रयासहरूलाई अझ तीव्र बनाउन अपिल गरेको छ । यस क्षेत्रमा हुने मृत्युहरू मध्ये दुई–तिहाइ मृत्युहरू नसर्ने रोगका कारणले हुने गरेको र तिनले गम्भीर कोभिड-१९ को जोखिम पनि बढाएको डब्लुएचओले जनाएको छ ।

“कोभिड–१९ महामारीले नसर्ने रोगसहित बाँचिरहेका व्यक्तिहरूको संवेदनशीलतालाई थप उजागर गरिदिएको छ । गम्भीर रोग तथा मृत्युको जोखिम बढ्नुको अलावा, अत्यावश्यक सेवाहरू अवरुद्ध हुनाले नसर्ने रोगहरूको नियन्त्रणमा हासिल गरिएको प्रगति सुस्त हुने र उल्टिने नै पनि डर छ,” डब्लुएचओ क्षेत्रीय निर्देशक डा. पूनम खेत्रपाल सिंहले क्षेत्रीय बैठकको अन्तिम दिन भनिन् ।

मुटु सम्बन्धी रोग, क्यान्सर, श्वासप्रश्वास सम्बन्धी दीर्घ रोग, मधुमेह, उच्च रक्तचाप आदि जस्ता नसर्ने रोगहरूको रोकथाम तथा नियन्त्रण डा. खेत्रपाल सिंहका प्रमुख प्राथमिकताहरूमध्येमा रहेको छ ।

सन् २०१४ देखि सदस्य राष्ट्रहरूले नसर्ने रोगहरू सम्बन्धी सेवाहरू प्रदान गर्ने वा सेवाको परिमाण अभिवृद्धि गर्ने, शारीरिक क्रियाकलापहरू प्रवद्र्धन गर्ने, चिनीयुक्त तथा गुलिया पेयपदार्थमा कर लगाउने, खैनी तथा सुर्तीको प्रयोगको नियन्त्रणका लागि विभिन्न उपायहरू अवलम्बन गर्ने, मानसिक स्वास्थ्य प्रवद्र्धन गर्ने लगायतका कार्यहरू गरिरहेको जनाइएको छ ।

“हामीले नसर्ने रोगहरूलाई सम्बोधन गर्न र तिनलाई महामारीको तयारी तथा प्रतिकार्यको अभिन्न अङ्ग बनाउन जरुरी छ । यसो भएमा आपतकालीन अवस्थामा नसर्ने रोगहरू सम्बन्धी सेवाहरूको निर्वाध पहुँचका लागि संयन्त्रहरू स्थापना गर्न र स्वास्थ्य सम्बन्धी गम्भीर जटिलताहरूको जोखिम न्यूनीकरण गर्न मद्दत पुग्छ,” क्षेत्रीय निर्देशकले भनिन् ।

हाल जारी चुनौतीहरूको परिप्रेक्ष्यमा, सदस्य राष्ट्रहरूले दिगो विकास लक्ष्य २०३० का लक्ष्यहरू हासिल गर्नका लागि नसर्ने रोगहरूको रोकथाम तथा नियन्त्रणका लागि क्षेत्रीय कार्ययोजना विस्तार गर्ने सम्बन्धमा छलफल गरेका छन् ।

सदस्य राष्ट्रहरूले आँखा तथा मुखको एकीकृत स्वास्थ्य स्याहार र त्यसका लागि क्षेत्रीय कार्य योजना विकास गर्ने सम्बन्धमा पनि छलफल गरेका छन् । मुखको क्यान्सर सबैभन्दा व्याप्त पाँच क्यान्सरहरूमध्येमा रहेको छ र मुख सम्बन्धी स्वास्थ्य समस्या प्रमुख जनस्वास्थ्य चासोको रूपमा रहेको छ । यस क्षेत्रमा व्याप्त दृष्टि दोष तथा अन्धोपनको दर विश्वव्यापी रूपमा नै अत्यधिक मध्येमा रहेको छ ।

यस क्षेत्रमा सन् १९९० र २०१५ को बीचमा अन्धोपन तथा मध्यमदेखि गम्भीर दृष्टदोषको दर घटेको केही प्रमाण छन् । तथापि, विश्वको औसतभन्दा यस क्षेत्रको दर उच्च रहँदै आएको छ र मोतिबिन्दुको प्रभावकारी शल्यक्रियाको दर लक्ष्यभन्दा कम रहेको छ ।

सन् २०२० मा गरिएको मुख सम्बन्धी स्वास्थ्य नीतिहरूको अवस्था विश्लेषणले केही प्रगति भएको देखाएको भएता पनि सन् २०२५ का लक्ष्यहरू भेट्नका लागि अझ धेरै अन्तर विद्यमान रहेको देखाएको छ ।

नसर्ने रोगहरूका कारणले हुने मृत्युको करिब आधा ३० देखि ६९ वर्ष बीचको उमेरमा असामयिक रूपमा हुने गरेको छ । यस क्षेत्रको एक चौथाइ वयस्क जनसङ्ख्या उच्च रक्तचापबाट पीडित छ भने प्रत्येक १२ जना वयस्कमध्ये एकजनालाई मधुमेह छ ।

दिगो विकास लक्ष्यको लक्ष्य ३.४ हासिल गर्नका लागि भएका उपलब्धिहरूलाई कसरी कायम राख्ने, प्राथमिकता दिनुपर्ने क्षेत्रहरूमा कार्यलाई कसरी तीव्रता दिने र यस क्षेत्रमा नवीनतम उपाय तथा पद्धतिहरूको परीक्षण गर्नका लागि सञ्चालन मार्गनिर्देशन दिने नसर्ने रोगहरूको क्षेत्रीय कार्यान्वयन मार्गचित्र २०२२–२०३० विकास गर्ने सम्बन्धमा पनि सदस्य राष्ट्रहरूले छलफल गरेका छन् ।

काठमाडौं । सरकारले खोप, अक्सिजन र स्यानिटरी प्याड उत्पादन गर्ने उद्योगलाई पाँच वर्षसम्म कर छुट दिने भएको छ।

शुक्रबार प्रतिनिधि सभा बैठकमा बजेट अध्यादेशको प्रतिस्थापन विधेयक प्रस्तुत गर्दै अर्थमन्त्री जनार्दन शर्माले उक्त व्यवस्था गरेको जानकारी दिएका हुन्।

स्वास्थ्य खोप, अक्सिजन ग्यास र स्यानिटरी प्याड उत्पादन गर्ने उद्योगलाई उत्पादन शुरु भएको तीन वर्षसम्म लाग्ने करमा शतप्रतिशत र त्यसपछिका दुई वर्षसम्म पचास प्रतिशत छुट हुने व्यवस्था गरिएको छ ।

साथै शिक्षकहरुको स्वास्थ्य उपचारको लागि छुट्टै अस्पताल निर्माण गर्न अध्ययन गरिने भएको छ ।

मिर्गौला, क्यान्सर र मेरुदण्ड पक्षघात भएका बिरामीले मासिक ५ हजार भत्ता पाउने

क्यान्सर, मिर्गौला तथा मेरुदण्डको गम्भीर पक्षघात भएका बिरामीले मासिक ५ हजार रुपैयाँ भत्ता पाउने भएका छन्।

यसअघि २०७४ मा तत्कालिन प्रधानमन्त्री शेरबहादुर देउवाको कार्यकालमा मा पनि क्यान्सर एवम् मिर्गौलाका गम्भीर रोग भएका र स्पाइनल इन्जुरी भएर प्यारालाइसिस भएकाहरुलाई मासिक ५ हजार रुपैयाँ भत्ता दिने निर्णय गरिएको थियो । तर, ओली नेतृत्वको सरकारले त्यसलाई खारेज गरेको थियो ।

काठमाडौं । विश्व स्वास्थ्य संगठन दक्षिणपूर्वी एसियाली क्षेत्रको ७४ औं बैठक ८ बुँदे निर्णय गर्दै आज सकिएको छ । पाँच दिनसम्म भर्चुअल माध्यममार्फत काठमाडौंमा बसेको बैठकको अध्यक्षता नेपालले गरेको थियो ।

नेपालले यस सत्रदेखि अर्को सत्रसम्म नयाँ अध्यक्ष चयन नहुञ्जेल समितिको अध्यक्षता गर्ने निर्णय भएको छ । कोभिड-१९ महामारीको सन्दर्भमा अत्यावश्यक स्वास्थ्य सेवाहरुलाई थप प्रभावकारी बनाउन मन्त्रीस्तरीय घोषणापत्र जारी गर्ने निर्णय पनि भएको छ ।

विश्व स्वास्थ्य संगठनको २०२२ देखि २०२३ सम्मको कार्यक्रम तथा बजेट पारित गर्ने, विद्यालय स्वास्थ्य र विद्यालयहरुमा स्वास्थ्य प्रवद्र्धन गर्ने कार्यलाई थप प्रभावकारी बनाउने निर्णय पनि भएको छ ।

नसर्ने रोग, मुख स्वास्थ्य र आँखा स्वास्थ्यको रोकथाम तथा नियन्त्रणमा भए गरेका प्रयासलाई सुद्धढ बनाउने निर्णय गरिएको छ । साथै दक्षिणपूर्वी एसियाली मुलुकमा स्वास्थ्य प्रवद्र्धन बैठक गर्ने, भाइरल हेपाटाइटिस, एचआइभी तथा यौन रोग नियन्त्रणका लागि कार्य दशक मनाउने निर्णय पनि बैठकले गरेको छ ।

७५ औं बैठकको सत्र २०२२ सेप्टेम्बर ५ देखि ९ मा भुटानमा हुने पनि निर्णय भएको छ । काठमाडौंमा पाँचदिन सम्म चलेको बैठकलाई प्रधानमन्त्री शेरबहादुर देउवा र डब्लुएचओ निर्देशक डा. टेड्रोस लगायतले सम्बोधन गरेका थिए ।

काठमाडौं । पछिल्लो २४ घण्टामा काठमाडौं उपत्यकामा शुक्रबार ३५४ जना कोरोनाभाइरस संक्रमित थपिएका छन् । जसमा काठमाडौंमा २५७ जना, भक्तपुरमा ४१ र ललितपुरमा ५६ छन् ।

स्वास्थ्य तथा जनसंख्या मन्त्रालयका अनुसार उपत्यकामा ६ हजार ५५४ जना सक्रिय संक्रमित छन् । जसमध्ये काठमाडौंमा ३,४२९ जना, भक्तपुरमा १,१९१ जना र लललितपुरमा १,९३४ जना छन् ।

कोरोनाभाइरस सुरु भएयता काठमाडौं उपत्यकामा ३१ सय ८६ जनाको मृत्यु भइसकेको छ ।

१५ जिल्लामा ५०० भन्दा बढी संक्रमित छन् भने २१ वटा जिल्लमा २०० भन्दा बढी संक्रमित रहेको मन्त्रालयले जनाएको छ ।

काठमाडौं । पछिल्लो पटक गरिएको जिन सिक्वेन्सिङमा कोरोनाभाइरसको संक्रामक प्रजाति डेल्टा संक्रमण पुष्टि भएको स्वास्थ्य मन्त्रालयले जनाएको छ । असार २३ देखि भदौ ४ सम्म मुलुकका विभिन्न स्थानबाट लिइएका ४८ वटा नमुना परीक्षण गर्दा सबैमा डेल्टा पुष्टि भएको हो ।

जिनोमिक सिक्वेन्सिङ गर्दा डेल्टा भेरियन्ट देखिएको मन्त्रालयका प्रवक्ता कृष्णप्रसाद पौडेलले बताए । उक्त नमुना भारतको नयाँ दिल्लीस्थित ‘द इन्स्टिच्युट अफ जिनोमिक एन्ड इन्टेग्रेटिभ बायोलोजी (आईजीआईबी)मा जिनोमिक सिक्वेन्सिङका लागि पठाइएको थियो ।

डेल्टा भेरिएन्ट सबै उमेर समूहका मानिसहरुमा संक्रमण हुने भएकाले सतर्कता अपनाउन मन्त्रालयले आग्रह छ । नेपालमा अल्फा र डेल्टा भेरियन्ट तथा भेरिएन्ट अफ इन्ट्रेस्टका रूपमा कप्पा भेरिएन्ट भेटिएको छ ।

नेपालको दोस्रो लहर संक्रामक हुनुमा डेल्टालाई कारण मानिएको छ । विज्ञहरुले डेल्टाकै कारण पुनः तेस्रो लहर आउन सक्ने चेतावनी दिएका छन् । पछिल्लो समय परीक्षण कम भएसँगै संक्रमण संख्या पनि घटेको छ भने मृत्युदर स्थिर छ ।

चितवन । मौसम परिवर्तन भएसँगै यहाँका अस्पतालमा भाइरल ज्वरोका बिरामीको संख्या बढेको छ । भाइरल ज्वरो र मौसमी रुघाखोकीका बिरामीहरु बढेका छन् ।

भरतपुर अस्पतालका सूचना अधिकारी लीलाधर पौडेलका अनुसार अहिले अस्पतालमा उपचार गराउन आउनेमध्ये जनरल मेडिसिन विभागमा आउने बिरामीको सङ्ख्या १०० भन्दा बढी छ । पहिलेको तुलनामा यो संख्या बढी हो । लक्षण कारोनासँग मिल्दोजुल्दो भएको तर कोरोना नभई भाइरल ज्वरो रहेको उनले जानकारी दिए ।

भरतपुर अस्पतालको जनरल मेडिसिनमा अहिले दैनिक २०० को हाराहारीमा बिरामी उपचारका लागि आउने गरेका छन् । तीमध्ये ६० प्रतिशत ज्वरो र मौसमी रुघाखोकीका बिरामी आउने गरेका उनले बताए।

मौसममा परिवर्तन हुने समय र नियमित वर्षाका कारण पानी दूषित हुँदा बिरामीको चाप बढेको भरतपुर अस्पतालका वरिष्ठ फिजिसियन डा कालिदास अधिकारीले बताए । अहिले ज्वरो र मौसमी रुघाखोकीका बिरामी पहिलेको तुलनामा बढ्दै गएको उनको भनाइ छ । गत एक सातायतादेखि बिरामीकोे चाप बढ्दै गएको हो ।

अस्पतालमा आएका बिरामीमध्ये अधिकांश दुई–तीन दिनदेखि उच्च ज्वरो आएका रहेका छन् । यस्तै भाइरल ज्वरोका बिरामी बालबालिकाको सख्या पनि अहिले उच्च छ । अस्पतालमा आउने बालबालिकामध्ये ७० देखि ८० प्रतिशत भाइरल ज्वरोका बिरामी छन् । बालबालिकामा पनि अहिले उच्च ज्वरो, निमोनिया र रुघाखोकीको समस्या देखिएको अस्पतालले जनाएको छ ।

पाँच वर्षमुनिका बच्चामा ज्वरो र मौसमी रुघाखोकीको समस्या बढी देखिएको अस्पतालका बालरोग विशेषज्ञ डा युवानिधि बशौलाले जानकारी दिए। कोभिडका कारण बालबालिकालाई पूर्णखोप लगाउन नपाउँदा यस्तो समस्या देखिएको उनको भनाइ छ । अहिलेको समयमा झोलिलो पदार्थ, सागपात, फलफूलजस्ता पोषणयुक्त खानेकुरामा बढी जोड दिन चिकित्सकले सुझाएका छन् ।

काठमाडौं । पछिल्लो २४ घण्टामा मुलुकमा १२७१ जना कोभिड संक्रमित थपिएका छन् । स्वास्थ्य तथा जनसंख्या मन्त्रालयका अनुसार ११ हजार ९४४ नमुना परीक्षण गर्दा ती संक्रमित भेटिएका हुन् ।

बिहीवार कोभिड संक्रमणबाट थप १४ जनाको मृत्यु भएको छ । १८४५ जना निको भएका छन् । मुलुकभर सक्रिय संक्रमित संख्या २८ हजार ६७८ छ ।

काठमाडौंमा ३२९, ललितपुरमा ६७ र भक्तपुरमा ३७ जना कोभिड संक्रमित थपिएका छन् । उपत्यकामा बिहीबार ४३३ जनामा नयाँ संक्रमण पुष्टि भएको छ ।

१६ जिल्लामा सक्रिय संक्रमित संख्या ५०० भन्दा माथि छ भने २१ जिल्लामा सक्रिय संक्रमण २०० भन्दा माथि छ ।

कूल संक्रमित संख्या ७ लाख ७४ हजार छ । कूल मृत्यु हुने संख्या १० हजार ९०३ छ ।

काठमाडौं । विश्व स्वास्थ्य सङ्गठन र दक्षिणपूर्वी एसिया क्षेत्रका सदस्य राष्ट्रहरूले कोभिड–१९ महामारीविरुद्ध लड्न र भविष्यमा आउनसक्ने स्वास्थ्य आपतकालका लागि तयारी गर्न सुरक्षा प्रणालीलाई बलियो बनाउनेबारे छलफल गरेका छन् । काठमाडौंमा जारी डब्लुएचओ दक्षिणपूर्वी एसियाली सदस्य मुलुकहरुको ७४ औं बैठकको तेस्रो दिन बिहीबार महामारीविरुद्ध मिलेर लड्नेबारे छलफल भएको हो ।

“कोभिड-१९ महामारीले अभूतपूर्व चुनौतीहरू ल्याएको छ । कुनै पनि देश यस स्तरको आपतकालको सामना गर्नका लागि पर्याप्त मात्रामा तयार थिएनन् । स्वास्थ्य सुरक्षा प्रणाली सबलीकरण गर्ने हाम्रा प्रयत्नहरूमा हाल जारी महामारीबाट सिकेका पाठहरूको उपयोग गर्नु अत्यन्त महत्वपूर्ण छ,” विश्व स्वास्थ्य सङ्गठन दक्षिणपूर्वी एसियाकी क्षेत्रीय निर्देशक डा. पूनम खेत्रपाल सिंहले भनिन् ।

आपतकालीन जोखिम व्यवस्थापनलाई बलियो तुल्याउनेबारे सन् २०१४ देखि विश्व स्वास्थ्य सङ्गठनले कार्य गर्दै जनाउँदै उनले सन् २००४ मा हिन्द महासागरमा आएको सुनामीपछि पश्चात यस क्षेत्रले प्रतिकार्यको क्षमता निरन्तर रूपमा वृद्धि गर्दै आएको स्मरण समेत गरिन् ।

कोभिड महामारी शुरु हुनुभन्दा केही महिना पहिले मात्र, यस क्षेत्रका सदस्य राष्ट्रहरूले ‘दिल्ली घोषणापत्र’ अनुमोदन गरेका थिए जसको उद्देश्य जोखिमको लेखाजोखालाई विस्तार गरेर, लगानी अभिवृद्धि गरेर र बहुक्षेत्रीय योजनाहरूको कार्यान्वयनलाई थप प्रभावकारी बनाएर आपतकालीन तयारी क्षमतालाई थप सुदृढ बनाउने थियो ।

विगतका वर्षहरूमा सदस्य राष्ट्रहरूले स्वास्थ्य आपतकाल तयारी तथा प्रतिकार्यका लागि अन्तर्राष्ट्रिय स्वास्थ्य नियमावली (२००५) को कार्यान्वयनमा पनि उल्लेखनीय प्रगति गरेका थिए ।

“राष्ट्रहरूले संक्रमणको फैलावट रोक्न र जीवन बचाउनका लागि विद्यमान प्रमुख क्षमताहरूको पूर्ण उपयोग गरेका छन् र साथै महामारीले निम्त्याएका अभूतपूर्व चुनौतीहरूको सामना गर्ने प्रयास पनि गरेका छन्”, क्षेत्रीय निर्देशकले भनिन्, ‘हाम्रा स्वास्थ्य सुरक्षा प्रणाली र प्रबन्धमा भएका गम्भीर कमीकमजोरी तथा अन्तरहरूलाई सम्बोधन गर्न जरुरी रहेको छ ।’

सदस्य राष्ट्रहरूले आजको बैठकमा आपतकालीन शासन संरचना तथा जनशक्ति, निगरानी तथा चेतावनी संयन्त्र, प्रयोगशाला, आपूर्ति व्यवस्थापन प्रणाली, स्वास्थ्य स्याहार प्रणालीको तत्परता तथा जोखिम सञ्चार तथा सामुदायिक संलग्नता लगायतका तयारी प्रक्रियाका विभिन्न पक्षहरूको समीक्षा तथा सुधारका बारेमा पनि छलफल गरेका छन् ।

कोभिड महामारीबाट आफूहरुले निगरानी तथा सम्पर्कमा आएका व्यक्तिको खोजी कार्यदेखि लिएर क्लिनिकल व्यवस्थापन, प्रयोगशाला परीक्षण, खोप कार्यक्रम, तथा सामुदायिक संलग्नता लगायतका प्रतिकार्यका विभिन्न पक्षहरूको आकस्मिक रूपमा असामान्य स्तरमा क्षमता विस्तार गर्नुपर्ने आवश्यकताका लागि पनि योजना बनाउन जरुरी छ रहेको पाठ सिकेको सदस्य मुलुकहरुले बताएका छन् ।

डा. खेत्रपाल सिंहले स्वास्थ्य सुरक्षाका लागि राष्ट्रिय कार्ययोजनाहरू तर्जुमा र कार्यान्वयन गरेर र तिनलाई स्वास्थ्य प्रणाली सबलीकरणका प्रयासहरूसँग जोडेर राष्ट्रहरूले अन्तर्राष्ट्रिय स्वास्थ्य नियमावली (२००५) अन्तर्गत आवश्यक पर्ने मुख्य क्षमताहरू निर्माण गर्ने, तिनलाई सुदृढ बनाउने र कायम राख्ने कार्य गर्नु जरुरी रहेको बताइन् ।

“हालको महामारीको प्रतिकार्य गर्न र भविष्यमा आउनसक्ने महामारी, आपतकाल तथा प्रकोपहरूका लागि अझ राम्रो तयारी गर्नका लागि स्वास्थ्य आपतकाल तयारी तथा प्रतिकार्य क्षमतालाई थप सबलीकरण गर्नका लागि आवश्यक पर्ने प्राथमिकता तथा कायहरू हामीले पहिचान गर्न हामीले काम गर्नुपर्छ,” क्षेत्रीय निर्देशकले भनिन् ।

काठमाडौं । विश्व स्वास्थ्य सङ्गठन (डब्लुएचओ)ले दक्षिणपूर्वी एसियाली मुलुकहरुलाई कोभिड-१९ खोप अभियानमा तीव्रता दिन र खोप कार्यक्रमको परिमाण विस्तार गर्नका लागि आग्रह गरेको छ ।

क्षेत्रीय समितिको ७४ औं बैठकको क्रममा आज बोल्दै क्षेत्रीय निर्देशक डा. पूनम खेत्रपाल सिंहले भनिन्, ‘महामारीको कारण खोपद्वारा रोकथाम गर्न सकिने रोगहरू सम्बन्धित खोप सेवाहरू तथा निगरानी प्रक्रिया अवरुद्ध भएको हुनाले पुनः फैलने जोखिम बढिरहेको छ । यस सम्बन्धमा विभिन्न प्रयासहरू गरिराखिएको भएता पनि अझ धेरै गर्नुपर्ने आवश्यकता छ ।’

महामारीको सुरुआतसम्म हासिल भएका उल्लेखनीय प्रगतिको स्मरण गराउँदै क्षेत्रीय निर्देशकले डीटीपी-३ खोपको कभरेज ९१ प्रतिशत पु¥याइसकेको हुनाले खोपद्वारा रोकथाम गर्न सकिने रोगको हकमा उक्त समयसम्मकै उत्कृष्ट अवस्थामा पुगिसकेको बताइन् ।

११ मध्ये १० देशहरूले डिटिपि-३ खोपको कभरेज ९० प्रतिशतभन्दा बढी हासिल गरिसकेका थिए ।

डब्लुएचओका अनुसार यस क्षेत्रका देशहरूले महामारीको दौरानमा अत्यावश्यक सेवाहरू पुनःसुचारु गर्दा नियमित खोप कार्यक्रमहरूलाई प्राथमिकता दिएका भएता पनि यस क्षेत्रको डीटीपी कभरेज ८५ प्रतिशतमा झरेको छ । सन् २०१९ मा खोप नै नलगाएका वा पूर्ण रूपमा खोप नलगाएका बालबालिकाको सङ्ख्या ३० लाख रहेकोमा हाल सो सङ्ख्या बढेर ४९ लाख पुगेको छ । खोपद्वारा रोकथाम गर्न सकिने रोगहरूको निगरानी प्रक्रिया पनि प्रभावित भएको छ ।

कोभिड-१९ महामारीले यस क्षेत्रको प्रमुख प्राथमिकताको रूपमा रहेको दादुरा तथा रुबेला उन्मूलनका रणनीतिहरूको कार्यान्वयनमा पनि असर पारेको डब्लुएचओले जनाएको छ। दादुराविरुद्धको खोपको पहिलो मात्राको अनुमानित कभरेज यस क्षेत्रमा सन् २०१९ मा ९४ प्रतिशत रहेकोमा सन् २०२० मा घटेर ८८ प्रतिशतमा खुम्चिएको छ । दादुराविरुद्धको खोपको दोस्रो मात्राको कभरेज पनि सन् २०१९ मा ८३ प्रतिशत रहेकोमा सन् २०२० मा घटेर ७८ प्रतिशत पुगेको छ ।

“कोभिड-१९ ले पुर्‍याएको क्षतिलाई तुरुन्त पूर्ति गर्नुपर्ने, गएको दशकमा हासिल भएको प्रगतिको दरलाई पुनः प्राप्त गर्नुपर्ने, र शिशु, बालबालिका तथा वयस्कहरूलाई जीवन रक्षक खोपहरूद्वारा संरक्षण दिनुपर्ने आवश्यकता छ,” डा. खेत्रपाल सिंहले भनिन् ।

हाल जारी क्षेत्रीय समिति बैठकले दक्षिणपूर्वी एसिया क्षेत्रीय खोप कार्ययोजना २०२२–२०३० को रणनीतिक खाकामा पनि छलफल गरेको छ । उक्त कार्ययोजना कोभिड–१९ विरुद्धको खोप तथा कोभिड–१९ महामारीबाट प्रभावित खोप प्रणाली तथा खोपद्वारा रोकथाम गर्न सकिने रोगहरूको निगरानीको पुनःस्थापनामा केन्द्रित छ ।

“यस खाकाको कार्यान्वयनका लागि उच्चस्तरीय राजनीतिक तथा कार्यक्रमिक प्रतिबद्धता र साझेदारहरूको सहकार्य आवश्यक पर्नेछ जसका लागि विश्व स्वास्थ्य सङ्गठन प्रतिबद्ध छ,” क्षेत्रीय निर्देशकले भनिन् । अहिलेसम्म दक्षिणपूर्वी एसियाली क्षेत्रमा ९१ करोड ५० लाख मात्रा खोप लगाइसकिएको छ । हालैका हप्ताहरूमा भएको थप खोपको उपलब्धताले खोपको विस्तारमा सहयोग पुगेको जनाइएको छ ।

महामारीले दिएको चुनौतीका बावजुद यो क्षेत्रले पोलियो उन्मूलन तथा मातृ तथा शिशु टिटानस मुक्त अवस्थालाई कायम राखिराखेको छ । पाँचवटा देशहरू दादुरा मुक्त भएका छन् भने ती मध्ये दुई देशहरू रुबेला मुक्त पनि हुन सफल भएका छन् । चारवटा देशहरूले खोपको माध्यमबाट हेपाटाइटिस बी नियन्त्रण गर्न सफल भएको पनि प्रमाणित भएको छ ।

क्षेत्रीय समिति बैठक विश्व स्वास्थ्य सङ्गठनको दक्षिणपूर्वी क्षेत्रको शासन गर्ने निकायको वार्षिक बैठक हो । यसपालीको आयोजक राष्ट्र नेपाल रहेको यो बैठक महामारीको कारणले गर्दा गत वर्षदेखि भर्चुअल्ली गरिँदै आइएको छ ।

काठमाडौं । पछिल्लो २४ घण्टामा मुलुकमा १६४० जना कोभिड बिरामी थपिएका छन् । १३ हजार ४५५ नमुना परीक्षण गर्दा ती संक्रमित थपिएको स्वास्थ्य मन्त्रालयले जनाएको छ ।

परीक्षण गरिएका नमुनामध्ये ९७६७ पीसीआर र ३६८८ एन्टीजेन नमुना परीक्षण थिए । बुधबार थप २१६१ जना कोभिड बिरामी निको भएका छन् ।

पछिल्लो २४ घण्टामा थप १० जनाको कोभिड संक्रमणको कारण मृत्यु भएको जनाइएको छ । अहिले देशभर सक्रिय संक्रमित संख्या २९ हजार ४७९ जना रहेका छन् ।

बुधबारको संक्रमण दर १२.१८ प्रतिशत छ ।

काठमाडौंं जिल्लामा ३४९, ललितपुरमा १५० र भक्तपुरमा ६९ गरि ५६८ जना संक्रमित उपत्यकामा थपिएका छन् । उपत्यकापछि कास्कीमा १३२ र मोरङमा १३८ जना संक्रमित थपिएका छन् ।

कूल संक्रमित संख्या ७ लाख ७३ हजार (पीसीआर) र ८६ हजार (एन्टीजेन) संक्रमण पुष्टि भएको छ । कूल मृत्यु संख्या १० हजार ८८९ पुगेको छ ।

काठमाडौं । कोभिड-१९ को जोखिमको विश्लेषणका आधारमा काठमाडौँ र अन्य जिल्लाका स्थानीय तहमा आगामी असोज १ गतेदेखि विद्यालय सञ्चालन गर्न सकिने गरी तयारी गरिएको छ । काठमाडौँका प्रमुख जिल्ला अधिकारीले मङ्गलबार बोलाउनुभएको बैठकमा स्वास्थ्य जोखिमको स्थिति विश्लेषण गरी जिल्ला सङ्कट व्यवस्थापन केन्द्रसँगको समन्वयमा कुन समूह वा सिफ्टमा विद्यालय खोल्ने भन्ने एकरूप कार्ययोजना पेश गर्न आग्रह गर्ने निर्णय भएको थियो ।

विद्यालय खोल्न सकिने स्थानका शिक्षक र कर्मचारीले कोभिडविरुद्धको खोप लगाएको हुनुपर्नेलगायतका आधार बनाइएको छ । सहायक प्रमुख जिल्ला अधिकारी कल्पना घिमिरे नेपालले स्मार्ट लकडाउनअन्तर्गत विद्यालयलगायतका क्षेत्र खोल्न सकिने निर्णय यसअघि भइसकेकामा सम्बन्धित पालिकाले त्यसको ढाँचाबारे आवश्यक परामर्श गरी कार्ययोजना पेश गर्न भनिएको जानकारी दिइन् । उनले जोखिम भएका स्थानमा अनिवार्यरूपमा विद्यालय खोल्नुपर्ने भन्ने नरहेको स्पष्ट गरिन् ।

हतार नगर्न अभिभावकको आग्रह

राष्ट्रिय अभिभावक महासङ्घले भने जोखिम कायमै रहेकाले विद्यालय खोल्न हतारो नगर्न आग्रह गरेको छ । महासङ्घका अध्यक्ष सुप्रभात भण्डारीले शहरी क्षेत्रमा जोखिम कायम रहेको, महत्वपूर्ण चाडपर्व आउन लागेको, सबैले खोप नलगाएको र बालबालिका प्रभावित हुने गरी तेस्रो लहर आउन सक्ने भएकाले तत्काल विद्यालय खोल्न नहुने सुझाव सरोकार भएकाहरुको बैठकमा दिइएको बताए । भौतिकरूपमा विद्यालय बन्द हुँदा हाल सञ्चार तथा सूचना प्रविधिको सहयोगमा वैकल्पिक माध्यमबाट सिकाइ निरन्तरता दिइएको छ ।

काठमाडौं । काठमाडौंमा जारी विश्व स्वास्थ्य संगठनको ७४ औं दक्षिणपूर्वी एसियाली बैठकको दोस्रो दिन ११ वटा सदस्य मुलुकका स्वास्थ्य मन्त्रीहरुले १२ बुँदे सहमति गरेका छन् ।

१२ बुँदे घोषणापत्रमा कोभिड महामारीले अर्थतन्त्र, समाज र स्वास्थ्यमा पारेको चुनौतिविरुद्ध एक भएर लड्ने, स्वास्थ्यमा सबैको पहुँच तुल्याउन स्वास्थ्य प्रणालीमा व्यापक पुनर्संरचना गर्ने तथा राजनीतिक नेतृत्व एवं सरकारलाई उत्तरदायी तुल्याउने सहमति छन् ।

दिगो विकास लक्ष्य हासिल गर्न प्राथमिक स्वास्थ्य केन्द्रमा स्थानीय लगानी बढाउने, आधारभूत तथा अत्यावश्यक स्वास्थ्य संरचना समुदायस्तरमै निर्माण गर्ने छन् । आधारभूत स्वास्थ्य स्याहारको तहमा मानसिक स्वास्थ्यसहितका अन्य नसर्ने रोगहरुविरुद्ध एकभएर लड्ने सहमति पनि छन् ।

दक्षिणपूर्वी एसियामा कोभिडविरुद्धको खोप र सामाग्रीको समानुपातिक वितरणमा जोड दिने तथा विगतमा भएका सम्झौताको कार्यान्वयन गर्ने लगायतका सहमति छन् । आइतबारदेखि सुरु बैठकको दोस्रो दिन ११ वटै मुलुकका स्वास्थ्यमन्त्रीहरुले भर्चुअलरुपमा छलफल गरेका थिए ।

सम्मेलन पाँचदिन चल्नेछ ।

काठमाडौं । सरकारले राष्ट्रिय एम्बुलेन्स निर्देशिका २०७८ सार्वजनिक गरेको छ । नयाँ निर्देशिका स्वीकृत भएसँगै एकीकृत एम्बुलेन्स तथा पूर्व अस्पताल सेवा सञ्चालन निर्देशिका २०७७ खारेज भएको छ। स्वास्थ्य मन्त्रीसमेत रहेका प्रधानमन्त्री शेरबहादुर देउवाले निर्देशिका कार्यन्वयनका लागि यसअघि नै स्वीकृति दिइसकेका छन् ।

नयाँ जारी राष्ट्रिय एम्बुलेन्स निर्देशिका २०७८ अनुसार अब एम्बुलेन्स सञ्चालन गर्दा क र ख कुन वर्गको खरिद वा प्राप्ति गर्ने हो सो स्पष्ट उल्लेख गरि निवेदन दिनुपर्ने भएको छ ।

यसअघि एम्बुलेन्सलाई क, ख र ग गरी तीन वर्गमा विभाजन गरिएको थियो । नयाँ निर्देशिकामा क र ख वर्गको मात्र एम्बुलेन्स सञ्चालन गर्न पाउने र ग वर्गका एम्बुलेन्सले अब नवीकरण गरेर ख वर्गमा लैजानुपर्ने व्यवस्था गरिएको छ ।

अब क र ख वर्गका एम्बुलेन्स खरिद गर्दा राजस्व छुट दिइने सरकारले जनाएको छ । सबै एम्बुलेन्समा अनिवार्य रुपमा फेर व्हील ड्राइभ, पावर स्टेरिङ, सस्पेन्स चेन प्रणाली जडान गरिएको हुनुपर्ने जनाइएको छ ।

एम्बुलेन्स सेवा सञ्चालन गर्न जनस्वास्थ्य सेवा ऐन र नियमावालीको प्रावधानअनुसार स्वास्थ्य संस्थाले सञ्चालन गर्ने व्यवस्था गरिएको छ। चालकले स्वास्थ्य तालिम केन्द्रबाट तालिम लिएको हुनुपर्ने, जीपिएस अनिवार्य जडान हुनुपर्ने लगायतका व्यवस्था निर्देशिकामा व्यवस्था गरिएको छ ।

काठमाडौं । आज काठमाडौंका विभिन्न आठवटा खोप केन्द्रमा कोभिड-१९ विरुद्धको खोप लगाइँदैछ । जिल्ला स्वास्थ्य कार्यालय काठमाडौंका अनुसार आज भेरोसेल, अस्ट्राजेनेका र जोन्सन एन्ड जोन्सनको पहिलो र दोस्रो डोज लगाउन लागिएको हो ।

प्रहरी अस्पताल र नेपाली सेनाको अस्पतालमा आज पहिलो र दोस्रो डोजको खोप लगाइने जिल्ला स्वास्थ्य कार्यालय काठमाडौंका प्रमुख बद्रीबहादुर खड्काले जानकारी दिए । भेरोसेल र एस्ट्राजेनेका खोप प्रहरी अस्पताल खोप केन्द्र तथा र सैनिक अस्पतालमा भेरोसेल र जोन्सन एन्ड जोन्सन खोपको पहिलो र दोस्रो मात्रा लगाइने भएको छ ।

राजधानीको सामाखुसीस्थित राधास्वामी आइसोलेसन सेन्टर, वीर अस्पताल, प्रसूति गृह, त्रिवि शिक्षण अस्पताल, सशस्त्र प्रहरी अस्पताल र निजामती अस्पतालमा अस्ट्राजेनेका खोपको पहिलो मात्रा दिइने छ।

काठमाडौं । विश्व स्वास्थ्य संगठनको ७४ औं दक्षिणपूर्वी एसियाली बैठक नेपाली राजधानीमा जारी छ । बैठकको दोस्रो दिन आज संगठनको ११ वटा क्षेत्रीय सदस्य मुलुकका स्वास्थ्यमन्त्रीबीच आज राउन्डटेबल भैरहेको छ ।

राउन्ड-टेबुलमा स्वास्थ्यमन्त्रीहरुले आ-आफ्नो मुलुकका स्वास्थ्य एजेन्डाहरु प्रस्तुत गरिरहेका छन् । साथै, स्वास्थ्य रणनीति र चुनौतिहरु पनि पेश गरेका छन् । नेपाली स्वास्थ्य राज्यमन्त्री उमेश श्रेष्ठले नेपालको तर्फबाट एजेन्डाहरु प्रस्तुत गरे ।

सार्वजनिक स्वास्थ्यका चुनौतिहरुसँग जुधेर सेवालाई प्रभावकारी बनाउनेबारे स्वास्थ्य सेवाकै पुनर्संरचना गर्नेबारे मन्त्री श्रेष्ठले योजना प्रस्तुत गरेका छन् ।

नेपालले रोग नियन्त्रण केन्द्र स्थापना गर्ने, खाद्य सुरक्षा, एन्टी-माइक्रोबायल रेसिस्टेन्स र जुनोटिक स्वास्थ्यलाई सम्बोधन गर्नेबारे एउटै स्वास्थ्य नीति बनाउने घोषणा नेपालले गरेको छ । थाइल्यान्ड, माल्दिभ्स, श्रीलंकासहितका मुलुकका स्वास्थ्य मन्त्रीले आज बिहानै सम्बोधन गरिसकेका छन् ।

काठमाडौं । विश्व स्वास्थ्य संगठन (डब्लुएचओ) दक्षिणपूर्वी एसियाको ७४ औं बैठक आजदेखि काठमाडौंमा सुरु भएको छ । भर्चुअलरुपमा सुरु भएको बैठकलाई प्रधानमन्त्री शेरबहादुर देउवादेखि डब्लुएचओ महानिर्देशक डा. टेड्रोस आधानोम घेब्रेससले सम्बोधन गरे ।

सम्बोधनमा स्वास्थ्य नेताहरुले बलियो स्वास्थ्य प्रणाली निर्माण र विश्व्यापी स्वास्थ्यमा पहुँचका लागि बृहत प्रतिबद्धताको आह्वान गरे । बैठक शुभारम्भ गर्दै प्रधानमन्त्री देउवाले मानवताको लागि खोप, औषधीय सामाग्री र प्रविधिमा समान पहँुचको लागि आग्रह गरे ।

सबैको लागि स्वास्थ्यमा पहुँच जरुरी भएको उनले बताए । नागरिकलाई अत्यावश्यक स्वास्थ्य सेवाको पहुँच वृद्धि गर्न समग्र क्षेत्रकै स्वास्थ्य प्रणालीमा सुधार गर्ने लगायतका महत्वपूर्ण निर्णय बैठकले गर्नुपर्ने देउवाको भनाई थियो ।

डब्लुएचओ निर्देशक डा. टेड्रोसले कोभिड-१९ महामारीले मानिसहरुको जीवन, जीवनशैली, समाज र अर्थतन्त्रमा असर पारेको बताउँदै यसवर्षको मे महीनामा विनाशकारी कोरोनाको लहरपछि अहिले सिंगो क्षेत्रमै कोभिड संक्रमणमा देखिएको गिरावटप्रति खुशि जनाए ।

महामारीलाई व्यापकरुपमा फैलने अवस्था आउन नदिनको लागि खोप वितरण लगायतका कार्य न्यायपूर्ण हुने बताए । अहिले पनि विभिन्न ठाउँ र त्यहाँका अस्पतालमा पनि बिरामी बढ्नु दुःखद भएको उनको भनाई छ ।

डब्लुएचओकी क्षेत्रीय निर्देशक पुनम खेत्रपाल सिंहले कोभिडले समग्र स्वास्थ्य प्रणालीमा चुनौति दिइरहेको बताउँदै उनले कोभिड बहुआयामिक चुनौति थपेको बताइन् । ‘महामारीको कारण मुलुकहरुको अर्थतन्त्रमा निकै दबाब परिरहेको छ र, हामीले स्वास्थ्यमा पहुँच, स्वास्थ्य प्रणालीको पुननिर्माणमा केन्द्रित हुनुपर्छ ।’

पाँच दिन चल्ने बैठकमा संगठनका क्षेत्रीय सदस्य मुलुकहरुका स्वास्थ्य मन्त्रीहरु, बरिष्ठ स्वास्थ्य अधिकारीहरु, राष्ट्रिय नियोग, विकास साझेदार, नागरिक समाजका प्रतिनिधि सहभागि हुने जनाइएको छ । अत्यावश्यक स्वास्थ्य सेवा, तयारी, प्रतिकार्य, नसर्ने रोगहरुविरुद्ध लड्ने योजना साथै अन्य स्वास्थ्य मुद्दाबारे छलफल हुने जनाइएको छ ।

भोलि बस्ने मन्त्रीहरुको अर्को राउन्डटेबलमा कोभिड महामारीले असर पारेको अत्यावश्यक स्वास्थ्य सेवाहरुको पुननिर्माण गर्दै स्वास्थ्यमा सर्वव्यापी पहुँच तुल्याउनेबारे छलफल हुनेछ । क्षेत्रीय रुपरेखा अन्तर्गत खोप वितरण योजना, विद्यालय स्वास्थ्य तथा हेपाटाइटिस, एचआइभीजस्ता सरुवा रोगबारे पनि छलफल हुने जनाइएको छ । सन् २०२३ भित्र रुबेलालाई दक्षिणपूर्वी एसियाबाटै हटाउनेबारे पनि छलफल हुने जनाइएको छ ।

काठमाडौं । स्वास्थ्य मन्त्रालयले बीपी कोइराला स्वास्थ्य विज्ञान प्रतिष्ठानका आन्दोलनरत स्वास्थ्यकर्मीबीच यसअघि भएको ६ बुँदे सहमतिको कार्यान्वयन भैरहेको जनाएको छ । मन्त्रालयले आज विज्ञप्ति जारी गर्दै आन्दोलनरत चिकित्साकर्मीको माग पुरा गर्न सरकार गम्भीर भएको भन्दै ९ बुँदै कार्यान्वयन योजना पनि सार्वजनिक गरेको छ ।

प्रतिष्ठानको समस्या पहिचान तथा छानविन कार्यदल गठन भई प्रतिवेदन पेश भएको समेत मन्त्रालयले जनाएको छ । आन्दोलनरत समितिबीच विगतमा भएका सहमति कार्यान्वयन गर्न ९ बुँदे योजना कार्यान्वयन भैरहेको जानकारी गराउँदै मन्त्रालयले स्वास्थ्य सेवालाई नरोक्न समेत आग्रह गरेको छ ।

मन्त्रालयले कोभिड–१९ महामारीको यस्तो विषम परिस्थितीमा स्वास्थ्य क्षेत्रलाई ठप्प नराखी सेवालाई सुचारु गर्न समेत आग्रह गरेको छ । हेर्नूस मन्त्रालयद्वारा सार्वजनिक योजना कार्यान्वयनबारेको विज्ञप्ति :

काठमाडौं । स्वास्थ्य राज्यमन्त्री उमेश श्रेष्ठले दशैं अघि नै कोभिड-१९ विरुद्ध २ करोड ५ लाख डोज खोप ल्याइने बताएका छन् ।

आइतबार स्वास्थ्य मन्त्रालयमा आयोजित पत्रकार सम्मेलनमा राज्यमन्त्री श्रेष्ठले खरिद, लागत साझेदारी र कोभ्यासमार्फत खोप ल्याउन लागिएको जानकारी गराए ।

चीनबाट ४४ लाख डोज भेरोसेल खोप १० दिनभित्र ल्याइने उनले जनाए । बालबालिकाको लागि ४० लाख मोर्डना र ६० लाख डोज फाइजर खोप ल्याउने तयारी भएको छ ।

मोर्डनालाई पैसासमेत भुक्तानी गरिएको राज्यमन्त्री श्रेष्ठले जानकारी दिए । कोभ्याक्सबाट १ करोड १३ लाख डोज खोप निःशुल्क आउन लागेको जानकारी दिँदै उनले बाँकी डोज लागत साझेदारीबाट ल्याउन लागिएको समेत जानकारी गराए ।

लागत साझेदारीबाट ६० लाख डोज सुनिश्चित भएको उनको भनाई छ । ‘चैतसम्म शतप्रतिशत नेपालीलाई खोप लगाउने प्रधानमन्त्रीको प्रतिबद्धताअनुसार अगाडि बढेका छौं’ राज्यमन्त्री श्रेष्ठले भने ।

काठमाडौं । नेपालको अध्यक्षतामा भोलि बिहान पौने दश बजेदेखि विश्व स्वास्थ्य संगठन दक्षिणपूर्वी एसियाको ७४ औं बैठक भर्चुअलरुपमा बस्ने भएको छ ।

आइतबार स्वास्थ्य मन्त्रालयद्वारा आयोजित पत्रकार सम्मेलनमा स्वास्थ्य राज्यमन्त्री उमेश श्रेष्ठले उक्त सत्रमा हुने छलफल र नेपालले पेश गर्ने एजेन्डाबारे जानकारी गराए ।

११ वर्षपछि नेपालले अध्यक्षता गर्ने बैठकमा कोभिड-१९ महामारी नियन्त्रण तथा रोकथाम, खोपको आपूर्ति, गैरकोभिड रोगहरुविरुद्ध जुध्ने रणनीति तथा योजना, सन् २०२३ सम्म दादुरा र रुबेला हटाउने प्रतिबद्धता लगायतबारे छलफल हुने जानकारी गराए ।

यसअघि पारित भएका एजेन्डाको कार्यान्वयन र चुनौतिविरुद्ध लड्ने साझा लक्ष्यबारे पनि छलफल हुने भएको छ । स्वास्थ्य सचिव डा. रोशन पोखरेलले कोभिडसहित नसर्ने र मानसिक रोगबारे समेत छलफल हुने बताए ।

दक्षिणपूर्वी एसियाका ११ देशमा कोभिडको खोपको आपूर्तिको अवस्थाबारे पनि छलफल हुने जानकारी उनले गराए ।

विश्व स्वास्थ्य संगठन नेपालका प्रमुख डा. राजेश पाण्डवले वार्षिक बेठकमा महामारीको अवस्थामा स्वास्थ्यमा सर्वव्यापी पहुँच हासिल गर्न अत्यावश्यक योजनाबारे छलफल हुने जनाए ।

भदौ २१ देखि २५ सम्म हुने छलफललाई विश्व स्वास्थ्य संगठनका महानिर्देशक डा. टेड्रोस लगायतका पदाधिकारीले सम्बोधन गर्ने भएका छन् । सत्र चल्ने चारैदिनमा दक्षिणपूर्वी एसियाका स्वास्थ्यमन्त्री समेत सहभागि हुने सो अवसरमा जानकारी दिइयो ।

काठमाडौं । पछिल्लो २४ घण्टामा काठमाडौं उपत्यकामा आइतबार ४५३ जना कोरोनाभाइरस संक्रमित थपिएका छन् । जसमा काठमाडौंमा २८८ जना, भक्तपुरमा ६७ र ललितपुरमा ९८ छन् ।

स्वास्थ्य तथा जनसंख्या मन्त्रालयका अनुसार उपत्यकामा ७ हजार ५८९ जना सक्रिय संक्रमित रहेका छन् । जसमध्ये काठमाडौंमा ४,१९८ जना, भक्तपुरमा १,३१६ जना र लललितपुरमा २०७५ जना छन् ।

१९ जिल्लामा ५०० भन्दा बढी संक्रमित छन् भने २० वटा जिल्लमा २०० भन्दा बढी संक्रमित रहेको मन्त्रालयले जनाएको छ ।