काठमाडौं । अभिनेता राजेश हमालले आफ्नो नयाँ चलचित्र `नरसिंहा´ सँग फागु पुर्णिमा मनाएका छन् । नरसिंहाकाे टिम बुढानिलकण्ठस्थित हमालकाे घर नजिकै हाेली खेल्न पुगेकाे थियाे ।
चलचित्रका निर्माता ध्रुव न्याैपाने, निर्देशक दिवाकर भट्टराई, कलाकार राज कटवाल लगायतले हमालसित हाेली खेलेर रमाइलाे गरे ।
तस्बिरहरूः श्रीधर पाैडेल
काठमाडौं । फागु पर्व होलीको अवसरमा गायिका लक्ष्मी आचार्यको ‘होरीका राम’ गीत सार्वजनिक भएको छ । गायिका आचार्यसँगै राजेन्द्र बाजुराली र नवराज रिमालको स्वर रहेको गीतमा गायिका आचार्यको शब्द र संगीत रहेको छ ।
मालश्री रेकडिङ स्टुडियोमा रेकर्ड भएको गीतको संगित संयोजन बिनोद बाजुरालीले गरेका हुन् भने गीतको मिक्सिङ गडक बाजुरालीको रहेको छ ।
गीतमा रेकर्डिस्ट सागर बाजुराली र राजेन्द्र बाजुराली रहेका उक्त गीत गायिका आचार्यकै आधिकारिक युट्युव च्यानलबाट सार्वजनिक भएको हो । भिम थापाले म्यूजिक भिडियोको निर्देशन गरेको गीतमा अभिनय गायिका लक्ष्मी आचार्य र गायक नवराज रिमालको रहेको छ । गीतमा साली र भेनाबिचको होली खेल प्रस्तुत गरिएको छ ।
गायिका आचार्य र चक्र बमको स्वरमा रहेको ‘ओ मेरी भाउजु’ र ‘भन साली तेरी दिदी का छ’ गीत एकदर्म चलेका गीत हुन् । जस मध्ये ‘ओ मेरी भाउजु’ एक करोड भन्दा बढी पटक युट्युवमा हेरिएको गीत हो । आचार्यको स्वरसँगै प्रकाश थापासँगको देउडा गीत ‘जोइ प्यारी जारीकी’, प्रकाश सपतुसँगको ‘लाइहेल कालो टिको’, सुरेन भण्डारीसँगको ‘रतन चणी इजु’, एकल स्वरमा रहेको ‘लैजा मेरी चरी’, जनक कार्कीसँगको ‘कुरा हर्दा चिल्ला’ र राजेशपायल राइसँगको ‘मन पराउछौ’ चर्चित गीत हुन् ।
काठमाडौं । नयाँ वर्ष २०८२ को छेको पारेर आगामी चैत २९ गतेबाट रिलिज हुने चलचित्र ‘पिताम्बर’को टिमले बिहीबार राजधानीमा होली खेल्दै फागु पूर्णिमा मनाएको छ ।
चलचित्रका निर्देशक कृषा चौलागाईं, निर्माता विशाल चौलागाईं, कलाकारहरू प्रदीप खड्का, दिव्य देव, सुपुष्पा भट्टलगायतले एकापसमा रंग दल्दै होली मनाएका हुन् । होली कार्यक्रममा नायिका दिव्या रायमाझी भने उपस्थित थिइनन्। केही समय अघि मात्र उनका पिता अभिनेता दिलीप रायमाझीलाई पितृ शोक परेको थियो।
चलचित्रको टिमले पत्रकारको समूहसँग पनि होली खेलेका थिए । केपी फिल्मस् र पुरुषोत्तम प्रधान फिल्मस्को ब्यानरमा निर्माण भएको चलचित्रमा प्रदीप खड्का, दयाहाङ राई, सौगात मल्ल, आर्यन सिग्देल, अनुपविक्रम शाही, सुरक्षा पन्त, गौरी मल्ल, रवीन्द्र झा, प्रमोद अग्रहरि, कामेश्वर चौरासिया, टिका पहाडी, सुलभ पहाडी, सुरवीर पण्डित, विशाल पहाडी, दिव्यदेव पन्त, सुपुष्पा भट्ट, दिव्या रायमाझी, गौरव विष्ट, आशिष पुरुष, ललित विष्ट, किशोर भट्ट, विनोदकुमार पौडेल, नारायण काफ्ले र रवीन्द्र भट्टराईको अभिनय छ ।
चलचित्रमा बाल कलाकारका रूपमा आर्नव घिमिरे, प्रयुस दत्त सुवेदी, आध्य लामिछाने, आरोह चौलागाईं र सुप्रोल बुढाथोकी (अनमोल)ले समेत अभिनय गरेका छन् ।
कृषा चौलागाईको निर्देशन रहेको चलचित्रमा विशाल चौलागाईं निर्माता, पुरुषोत्तम प्रधान, आध्य लामिछाने र आरोह चौलागाईं सह–निर्माता, सुमन गौतम कार्यकारी निर्माता छन् ।
चलचित्रमा प्रदीप भारद्वाज र अभिमन्यु निरवीको पटकथा र संवाद, पुरुषोत्तम प्रधानको डीओपी, शेरबहादुर लामा र मानकृष्ण महर्जनको छायांकन, बन्दे प्रसादको सम्पादन, आशीष अविरल र बाबुल गिरीको संगीत र हिमाल केसीको द्वन्द्व छ । चलचित्रलाई आरआर फिल्मस्ले वितरण गर्दैछ ।
काठमाडौं । फागु पूर्णिमाको अवसर पारेर आजबाट दुई नेपाली चलचित्रहरू ‘अञ्जिला’ र ‘आउटलः दफा २१९’ प्रदर्शनमा आएको छ । दुई भिन्न जनरा र कथामा निर्माण भएका यी दुवै चलचित्रलाई हलबाट सुखद शो प्राप्त भएको छ।
‘अन्जिला’ नेपाली महिला राष्ट्रिय फुटबल टिमकी कप्तान तथा गोलरक्षक एन्जिला तुम्बापो सुब्बाको जीवनीमा आधारित चलचित्र हो। चलचित्रमा एन्जिला आफैँले प्रमुख भूमिकामा अभिनय गरेकी छन् ।
चलचित्रको छायाङ्कन एन्जिलाको जन्मथलो इलामको आइतबारे, झापा र काठमाडौंमा गरिएको हो । चलचित्रमा उनको बाल्यकालदेखि खेल जीवनसम्मको सङ्घर्ष र सफलताको भावुक कथा प्रस्तुत गरिएको छ ।
गत सोमवार काठमाडौंमा चलचित्रको भव्य प्रिमियरको आयोजना गरिएको थियो । चलचित्रमा एन्जिलाको साथमा सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, बुद्धि तामाङ लगायतका कलाकार छन् । चलचित्रलाई निर्देशक मिलन चाम्सले निर्देशन गरेका हुन।
त्यस्तै, आजैबाट प्रदर्शनमा अर्को चलचित्र ‘आउटलः दफा २१९’ एक्सन जनरामा निर्माण भएको चलचित्र हो। एक गम्भीर मुद्दालाई उठान गरेको चलचित्रमा नायक सुशील श्रेष्ठ मुख्य भूमिकामा छन्। विक्की महर्जनको लेखन तथा निर्देशनमा तयार भएको यो चलचित्रलाई अमित अग्रहरिले निर्माण गरेका हुन् ।
चलचित्रमा चुल्ठे काजीको एक्सन र साहिल खानको सम्पादन छ। चलचित्रमा नायक सुशील श्रेष्ठसँगै शिक्षा संग्रौला, नरेश पौडेल लगायतका कलाकारहरूको अभिनय छ । यो चलचित्रले पनि हलमा सुखद शो प्राप्त गरेको छ।
आज होलीको सार्वजनिक बिदा भएकाले दुवै चलचित्रले आज बिदाको फाइदा उठाउन सक्छन्। दुई भिन्न जनरामा बनेका चलचित्र भएकाले दर्शकले रुचाएको खण्डमा दुवै चलचित्रले बक्स अफिसमा राम्रो गर्न सक्छन्।
अनलाइन बुकिङ दुवै चलचित्रको मध्यम छ। दुवै चलचित्रलाई बलियो वर्ड अफ माउथको जरुरी छ। दर्शकले चलचित्रको कथा रुचाए, वर्ड अफ माउथ पनि बलियो हुनेछ। यी दुई चलचित्रले कस्तो व्यापार गर्छ, त्यो हेर्न भने केही दिन कुर्नुपर्नेछ।
काठमाडौं । कथाकार गुरुप्रसाद मैनालीको कृति ‘परालको आगो’मा आधारित रहेर निर्माण हुने चलचित्र ‘परालको आगो’मा कलाकार प्रकाश सपुत अनुबन्धित भएका छन् । चलचित्र निर्माण कम्पनी हरिओम सिने मेकर्सुका तर्फबाट निर्माता सुशील पोखरेलले प्रकाशलाई चलचित्रमा अनुबन्ध गरेका हुन् । मैनाली कथा पुरस्कार ट्रस्टले हरिओम सिने मेकर्स निर्माता कम्पनीलाई चलचित्र निर्माणको मञ्जुरी दिइसकेको छ ।
‘परालको आगो’ मैनालीको कथा संग्रह ‘नासो’मा संग्रहित छ । निर्माता पोखरेलका अनुसार प्रकाश चलचित्रका प्रमुख दुई पात्रमध्ये एक हुन् । यसअघि प्रमुख कलाकारका रुपमा जितु नेपाल र सुहाना थापा अनुबन्धित भइसकेका छन् । निर्माता पोखरेलले चामे,गौंथली र जुठे दमाईको वरिपरि घुम्ने कथामा जितु र प्रकाशको क्यारेक्टर चामे र जुठे दमाईमध्ये कुन भन्ने चाहिँ भएको भन्ने बारे भने अहिले खुलाउन चाहेनन।
चलचित्रमा सुशील देवकोटाको लेखन, संकल्प भुजेलको छायांकन, रामजी लामिछानेको कोरियोग्राफी र सत्य–स्वरुपराज आचार्यको संगीत हुनेछ । चलचित्रका निर्माण नियन्त्रण नगेन्द्र घिमिरे हुन् । चलचित्र २०८२ मा प्रदर्शन हुनेछ ।
यो नाममा ४५ वर्षअघि निर्देशक प्रताप सुब्बाले चलचित्र निर्माण गरेका थिए । अब बन्ने चलचित्रमा निर्देशक लक्ष्मण सुनारको निर्देशन रहने छ भने चलचित्रमा दुई पात्र चामे र गौँथलीको झैँझगडालाई प्रस्तुत गरिएको छ ।
काठमाडौं । रिलिज मिति नजिकिएसंगै यतिबेला चलचित्र ‘कर्मा’बाट धमाधम कलाकारहरुको क्यारेक्टर लुक्स सार्वजनिक भइरहेको छ। यसैबीच, निर्माण टिमले कलाकार मुकुन भुसालको क्यारेक्टर लुक्स सार्वजनिक गरेको छ । निर्माणपक्षले होलीको अवसर पारेर मुकुनको क्यारेक्टर लुक्स सार्वजनिक गरेको हो ।
कपाल, दारीजुंगामा, कोट र टाइमा ठाँटिएका मुकुन पोस्टरमा एंग्री लुक्समा देखिएका छन् । भुसालको अनुहारमा रंग लगाईएको छ। होलीको अवसरमा क्यारेक्टर लुक्स आएकाले शुभकामनाका लागी मात्र हो वा चलचित्रमा नै होलीको सिन छ, त्यो निर्माणपक्षले प्रष्ट पारेको छैन । पोस्टरमार्फत लुक्सबाहेक थप जानकारी निर्माणपक्षले केही दिएको छैन।
यसअघि, निर्माणक्षले उपासना सिंह ठकुरी र विपिन कार्कीको लुक्स सार्वजनिक गरेको थियो। ‘कर्मा’लाई ‘अगस्त्य’ फेम्ड निर्देशक सौरभ चौधरीले निर्देशन गरेका छन् । ‘कर्मा’को छायांकन दाङ र काठमाडौंमा गरिएको छ।
‘कर्मा’ यहीँ चैत २९ गतेबाट देश भित्र र बाहिर एकसाथ प्रदर्शन हुनेछ । एक्सन जनरामा निर्माण भएको ‘कर्मा’मा अभिनेता विपीन कार्की, उपासना सिंह ठकुरी, मुकुन भुसाल, दिव्यदेवलगायत कलाकारको अभिनय छ ।
चलचित्रको कथा निर्देशक चौधरी स्वयंले लेखेका हुन। चलचित्रको अन्तर्राष्ट्रिय प्रदर्शन अधिकार बिक्रीको अधिकार सेभेन सिज सिनेमाले लिएको छ भने आर्टिस्टिक इनटरटेनमेन्टको प्रस्तुति रहने ‘कर्मा’मा वसन्त लम्सालको लगानी छ ।
काठमाडौं । सेन्सर बोर्डले दीपक रौनियार निर्देशित चलचित्र ‘राजागञ्ज’ काँटछाँटसहित सेन्सर पास भएको छ । साम्प्रदायिकता झल्किने तथा प्रधानमन्त्री केपी शर्मा ओलीको नाम जोडिएका दृष्य र संवादहरु हटाएर चलचित्रलाई प्रदर्शन अनुमति दिइएको हो ।
चलचित्रका निर्देशक रौनियारले चलचित्र अब निर्धारित मितिमै प्रदर्शन हुने निश्चित भएको बताए । तर, थुप्रै दृष्य तथा संवादहरुमा कैंची चलाइएको उनले गुनासो गरे ।
‘प्रधानमन्त्रीको नाम लिइएका सबै संवादहरु हटाइयो’, उनले भने, ‘यो अभिव्यक्ति स्वतन्त्रताको हनन हो ।’
यो चलचित्रले मधेसको राजनीतिक मुद्दालाई बोकेको छ । मधेस आन्दोलनका दृष्यहरु समेत चलचित्रमा समेटिएका छन् । मधेसी-पहाडी जनताबीच दुर्भावना फैलाउन सक्ने तथा प्रधानमन्त्री केपी शर्मा ओलीलाई समेत लान्छित गरिएका दृष्य-संवादहरु सेन्सर बोर्डले काँटछाँट गर्न लगाएको हो ।
चलचित्रको ट्रेलरमै एउटा विवादित संवाद थियो, जसमा प्रधानमन्त्री केपी शर्मा ओलीको पुरानो अभिव्यक्तिलाई तोडमोड गरिएको छ ।
इन्स्पेक्टरको भूमिकामा रहेकी निकिता चण्डक भन्छिन्, ‘भर्खरैको एउटा भाषणमा प्रधानमन्त्रीजीले मधेसीलाई आँप भनेर सम्बोधन गरेका थिए । अपहरणकारीले यसलाई पर्सनल्ली लिएको जस्तो छ ।’
ओलीले पहिलोपटक प्रधानमन्त्री हुँदा संविधानसभा बहिष्कार गरेर निस्किएका केही मधेसी दललाई कटाक्ष गर्दै ‘झरेको आँप’ को टुक्का प्रयोग गरेका थिए । तर, चलचित्रमा मधेसी जनतालाई नै आँप भनेको सन्देश दिइएपछि सेन्सर बोर्डले आपत्ति जनाएको हो ।
प्रधानमन्त्रीको भाषण चलचित्रमा प्रयोग गर्न उनीसँग अनुमति लिनुपर्ने बोर्डले निर्देशन दिएको थियो । तर, निर्माण पक्षले अनुमति लिन नसकिने बताएका थिए ।
चलचित्रका काटिएका दृष्य र संवादहरुलाई रिप्लेस नगरी खाली नै छोड्ने निर्माण पक्षको भनाइ छ । स्मरणीय रहोस् यो चलचित्रलाई सेन्सर पासबिनै यस वर्षको भेनिस फिल्म फेस्टिबलमा लगेर वर्ल्ड प्रिमियर गरिएको थियो । निर्देशक रौनियारले बाहिर महोत्सवमा प्रदर्शन गर्न सेन्सर पास हुनु नपर्ने बताए ।
यो पनि हेर्नुस्:
‘राजागञ्ज’ को ट्रेलरमा प्रधानमन्त्रीलाई लान्छित गर्ने संवाद, कार्यकारी निर्मातामा अनुराग कश्यप
काठमाडौं । चैत १ गतेबाट प्रदर्शनमा आउन लागेको चलचित्र ‘राजागंज’ सेन्सर पास नभएपछि निर्देशक निश्चल बस्नेतले सेन्सर बोर्डको सदस्यको योग्यतामाथि नै प्रश्न उठाएका छन् ।
बस्नेतले सामाजिक सञ्जालमा लेखेका छन्, ‘राजागंजलाई सेन्सरले रोकेछ । सेन्सर बोर्डको सदस्य हुने योग्यता के हो ? डिस्क्लेमर नबुझ्ने, फिल्ममा देखाएको सबै कुरा वास्तविक हो भनेर बुझ्ने, फिक्सनको अर्थ नबुझ्ने । यस्तै चाहिने हो योग्यता ?’
कला नबुझ्नेहरू सेन्सर बोर्डमा बसेको भन्दै बस्नेतले आक्रोश पोखेका छन् । चलचित्रभित्र समावेश शब्द र सामाग्रीमा आपत्ति जनाउँदै सेन्सर बोर्डले सेन्सर रोकेको थियो ।
सार्वजनिक कार्यक्रममा प्रधानमन्त्री ओलीले बोलेको भाषणको दृश्य समेटेकोमा आपत्ति जनाउँदै बोर्डले प्रदर्शन अनुमति दिन नमानेको हो ।
काठमाडौं। बिहीबारबाट रिलिजमा आउन लागेको चलचित्र ‘आउटलः दफा २१९’ले पीजी सर्टिफिकेट पाएको छ। चलचित्र जाँच पास समितिले यो चलचित्रलाई ‘पीजी सर्टिफिकेट’ दिएको हो ।
पीजी सर्टिफिकेट पाएसँगै अब यो चलचित्र, १६ वर्ष मुनिका बालबालिकाले पनि आफ्नो बाबुआमाको साथमा गएर हेर्न सक्नेछन्।
यसैबिच, चलचित्रको देशभरका हलमा बुकिङ समेत खुलेको छ । चलचित्रलाई क्युएफएक्स, बीग मुभिज, आई एन आई, वान सिनेमाज्, एफक्यूब लगायतका मल्टिप्लेक्सहरुले सुखद शोज दिएका छन् । भोलि फाग पूर्णिमा भएकाले गर्दा बिहानी शोज उपलब्ध छैन । मध्यान्नबाट भने दर्शकले देशभरका हलमा फिल्म हेर्न पाउनेछन् ।
एक्सन जनरामा निर्माण भएको यो चलचित्रमा विक्की महर्जनको लेखन तथा निर्देशन रहेको छ। चलचित्रलाई अमित अग्रहरिले निर्माण गरेका हुन् ।
चुल्ठे काजीको एक्सन र साहिल खानको सम्पादन रहेको यो चलचित्रमा नायक सुशील श्रेष्ठ, शिक्षा संग्रौला, नरेश पौडेल लगायतका कलाकारहरूको अभिनय छ । जापान र कतारबाट पनि सकारात्मक प्रतिक्रिया आएपछि निर्माण पक्षले अहिले यो चलचित्रको फाइल सेन्सरका लागि जापान र कतार पठाएको छ ।
काठमाडौं । काठमाडौं महानगरपालिकाका मेयर बालेन्द्र साह अस्ति राति चलचित्र ‘लाज शरणम्’ हेर्न सुटुक्क सिनेमा हलमा पुगे । सञ्चारकर्मीहरूले सुइँको नपाए पनि त्यहाँ उपस्थित अन्यले मोबाइलमा खिचेको भिडिओ क्लिप सामाजिक सञ्जालमा भाइरल भइरहेको छ ।
भिडिओमा बालेनले चलचित्रका प्रमुख कलाकार सिताराम कट्टेल धुर्मुसको खुलेर प्रशंसा गरिरहेको देखिन्छ । तर, यो भिडिओ हेरेर कतिपयले बालेनको आलोचना समेत गरेका छन् । आलोचनाको कारण चाहिँ अर्कै छ ।
बालेन धुर्मुससँग गफिइरहँदा पछाडिबाट एक युवती आइन् । उनले बालेनतिर हेरेर मुस्कुराउँदै नमस्कार गरिन् । बालेन उनीतिर फर्किए पनि नमस्कार नफर्काइ अर्कोतिर मुन्टो बटारेर कालो चस्मा लगाएको भिडिओमा देखिन्छ । आफूलाई सम्मानसाथ अभिवादन गर्ने युवतीलाई बालेनले ‘इग्नोर’ गरेर अहम्ता देखाएको भन्दै आलोचना गरिएको हो । तर, वास्तविकता अलि भिन्न थियो ।
खासमा दीपिका खनाल नामकी ती युवती ‘लाज शरणम्’ का निर्माता नवीन श्रेष्ठकाे निम्ताेमा श्रीमान सन्ताेष खनालसहित चलचित्र हेर्न आएकी थिइन् । सन्ताेष र नविन निकट मित्र हुन् । बालेनलाई देखेपछि दीपिकाले नमस्कार गर्दै तस्बिरका लागि आग्रह गरिन् ।
त्यहाँ उपस्थित कलाकार धुर्मुसका अनुसार बालेनले हात जोडेर नमस्कार नफर्काए पनि मुखले ‘नमस्कार’ भनेका थिए ।
‘मेयर साबले नमस्कार फर्काउनु भएको हो, तर भिडिओमा आवाज नसुनिँदा कतिपयलाई भ्रम पर्न गयो,’ उनले भने ।
बालेनले चस्मा लगाइवरी ती सन्ताेष र दीपिकासँग फोटो खिचे । उनीहरू खुशी भएर हिँडेका थिए ।
पछाडिको यस्तो दृश्य भने भिडिओमा कैद भएन । यद्यपि, बालेनले उनीहरुसँग खिचेको तस्बिर नेपाल प्रेसलाई प्राप्त भएको छ ।
काठमाडाैं । अष्ट्रेलियामा रहेकी अभिनेत्री सुष्मा कार्कीको एक नेपाली युवतीसँग रडाको मच्चिएको छ । नेहा श्रेष्ठ नाम गरेकी युवतीलाई सुस्माले अपशब्दसहित गालीगलौज गरेकी छन् ।
नेहाले भाडामा लिएको फ्ल्याटको एउटा युनिट सुष्माले निश्चित रकम तिरेर सेयरिङमा बसिरहेकी रहिछन् । सुष्माको युनिटमा बाथरुम, किचेन र बार्दली अलग्गै थियो ।
सुष्माले आफ्नो युनिट सफा नराखेको आरोप नेहाले लगाएपछि झगडा सुरु भएको हो । सानो विषयलाई लिएर नेहाले आफूलाई ह्यारेसमेन्ट गरेको सुष्माको आरोप छ ।
दशैंमा नेपाल आएकी सुष्मा फर्किएपछि सो फ्ल्याटमा बस्न थालेकी थिइन् । फेब्रुअरीको पहिलो साता उनीहरुबीच म्यासेजमै झगडा पर्यो । नेहाले सुष्माको बाथरुम, किचेन र बार्दलीका तस्विरहरु खिचेर उनलाई पठाइदिइन् ।
बाथरुमको कमोड, किचेन सिंक राम्ररी सफा नगरेको, बेसारको दाग नपखालेको, बार्दलीमा चुरोट खाएर जथाभावी ठूटा फ्याँकेको भन्दै उनले सुष्मालाई आरोपित गरिन् । त्यसपछि सुष्माले आफू अब सफा गरेर बस्ने वचन दिएको उनीहरुले सार्वजनिक गरेका स्क्रिनसटमा देखिन्छ ।
तर, झगडा सामान्य नभएपछि अन्ततः सुष्माले सो फ्ल्याट छोडेर अन्तै सरिन् । अहिले उनी आफैं एउटा फ्ल्याट लिएर बस्न थालेकी छन् र युनिट सेयर गर्ने मान्छे खोजिरहेकी छन् ।
फ्ल्याट छोडेपछि सुष्माले पाँच दिनअघि एउटा भिडिओ बनाएर टिकटकमा हालिन् । उक्त भिडिओमा सुष्माले नेहाको नाम नलिइकन उनीमाथि विभिन्न आरोप लगाएकी छन् ।
नेहाले आफ्नो गोपनीयता हनन गरेको र आफूलाई अनाहकमा टर्चर दिएको सुष्माको आरोप छ । जहिले पनि ठुस्स परेर बस्ने गरेको, घरमा आउँदा घर जस्तो भाइब्स नआएको पनि सुष्माको गुनासो थियो ।
त्यसको जवाफ नेहाले टिकटकबाटै दिइन् । त्यसमा उनले सुष्मालाई मेन्सन नै गरेकी थिइन् ।
नेहाले टिकटकमा टेक्स्टमार्फत दिएको जवाफ यस्तो:
‘घरमा घर जस्तो फिल हुन सकेन रे ? घरको केटी जहिले ठुस्स पर्यो रे ? घरलाई घर नसोची भट्टी सोचेर रुममा, बाथरुममा जतासुकै स्मोक गरेपछि घर जस्तो भाइब्स कसलाई आउँछ ? भन्दाभन्दा वाक्क भएर म्यासेज पनि गरेको सफा गरौँ है दिदी भनेर… म त बेसार पानी मात्र खान्छु रे । बेसार पानी कसले फ्राइबिनमा बनाउँछ ? बनाए पनि बेसारको बाहिर आएको छिटा सफा गर भन्दा टर्चर भयो रे । ह्यारेसमेन्ट भयो रे । अस्ति मैले सफा गरेको बाल्कोनीमा स्मोक गरेर यत्तिकै छोडिदिने ?
सुष्माले आफूलाई पठाएको एउटा अडियो म्यासेज पनि नेहाले सार्वजनिक गरेकी छन् । उक्त अडियोमा सुष्माले छाडा शब्दहरुसहित गालीगलौज गरेको सुनिन्छ ।
यस्तो छ सुष्माले बोलेका केही शब्दः
‘काम छैन तेरो बहुलाइनी केटी ? सालको पात डस्टबिनमा नराखे …. राख्छ त डस्टबिनमा ? फोहोर नराखे तेरो … राख्छ जाँ… । पख न तेरो म के गर्छु… हेर्दै जा नसाला बेइजती आइमाइ…. साइको…. बेसी नबोल बिनमा फोहोर नफाले तेरो … फाल्छ त ? साला बढी कुरा गर्छस् ? के ह्यरेसमेन्ट गर्न खोजेको हो ? मा.. साला तेरो युनिट भन्दैमा जे पनि भन्न पाउँछेस् ? … खान सेयरिङमा राखेको ? मेरो हिराको औठी वाथरुमबाट हराएको छ । तेरो बाउले तिर्छ ? मैले कति आची गरेको छ भनेर हेर्न मेरो बाथरुममा गएकी होस् ? आचीकोको डल्लोजस्तो छ फेस पनि ।
मैले तीन-चार महिनामा दुईपटक मात्रै लुगा धोएँ भनिस् ? म एउटा लुगा एकपटक मात्र लगाउँछु तँलाई थाहा छ कि छैन ? मेरो कट्टु र ब्राको ५५ हजार पर्छ भनेर सुनेकी थिइस कि थिइनस् ?
काठमाडौं । ‘कर्मा’मा नायक विपीन कार्कीको अपोजिटमा रहेकी नायिका उपासना सिंह ठकुरीको क्यारेक्टर लुक्स सार्वजनिक भएको छ। दर्शकको कौतुहलता मेटाउँदै निर्माणपक्षले मंगलबार उपासनाको क्यारेक्टर लुक्स सार्वजनिक गरेको हो ।
सार्वजनिक लुक्समा उनी सामान्य कुर्थासुरुवालमा देखिएकी छन् । मोर्डन युवतीभन्दा केही फरक उनी गाउँबाट सहर आएकी युवतीजस्तो देखिएकी छन् । पोस्टरमा उपासनाको क्यारेक्टर लुक्सबाहेक अन्य खासै केही देखाइएको छैन ।
‘कर्मा’लाई ‘अगस्त्य’ फेम्ड निर्देशक सौरभ चौधरीले निर्देशन गरेका हुम । दाङ र काठमाडौंमा छायांकन गरिएको ‘कर्मा’ यहीँ चैत २९ गतेबाट रिलिज हुँदैछ । नेपालसङै विदेशमा पनि यो चलचित्र एकसाथ प्रदर्शन हुनेछ ।
‘कर्मा’मा विपीनसँगै उपासना सिंह ठकुरी, मुकुन भुसाल, दिव्यदेवलगायत कलाकारको अभिनय रहेको छ ।मुकुन यो चलचित्रमा नेगेटिभ क्यारेक्टरमा छन् । एक्सन ड्रामा जनरामा निर्माण भएको चलचित्रको कथा निर्देशक चौधरी स्वयंले लेखेका हुन् ।
आर्टिस्टिक इनटरटेनमेन्टको प्रस्तुति रहने ‘कर्मा’मा वसन्त लम्सालको लगानी रहनेछ । चलचित्रले अन्तर्राष्ट्रिय प्रदर्शन अधिकार बिक्री गरिसकेको छ । चलचित्रको अन्तर्राष्ट्रिय वितरण अधिकार सेभेन सिज सिनेमाले लिएको छ ।
काठमाडौं । पहिलो पोस्टर सार्वजनिक गर्दै चलचित्र ‘महाभोज’को प्रदर्शन मिति घोषणा गरिएको छ। निर्माण टिमले मंगलबार चलचित्रको पोस्टरसँगै रिलिज मिति घोषणा गरेको हो।
यो चलचित्र आगामी जेठ १५ गते बिहीबार गणतन्त्र दिवसको अवसर पार्दै प्रदर्शनमा आउने भएको छ। सो मितिमा ‘महाभोज’ नेपालसहित नेपालीहरू बसोबास गर्ने सबै देशहरूमा एकसाथ रिलिज हुने जनाइएको छ ।
रोयल भीमसेनले डिजाइन गरेको पोस्टरमा प्रमुख कलाकारहरूको गम्भीर र चुनौतीपूर्ण हाउभाउ छ । पोस्टरको पृष्ठभूमिमा नेपाली मुद्रा झल्किने डिजाइन गरिएको छ, जसले आर्थिक असमानता र सत्ताको प्रभावलाई सङ्केत गर्छ ।
पोस्टरको केन्द्रमा टोपी लगाएका पुरुषलाई देख्न सकिन्छ, जो अभिनेता आर्यन सिग्देल हुन्। उनका वरिपरि अन्य कलाकारहरू दयाहाङ राई, खगेन्द्र लामिछाने, अञ्जना बराइली, गौमाया गुरुङ र मलिका महत छन्। उनीहरूको अनुहारमा आक्रोश, पीडा, अन्याय र सङ्घर्षका भाव देखिन्छ ।
सामाजिक तथा यथार्थपरक विषयमाथि बनेको ‘महाभोज’लाई दिनेश राउतले निर्देशन गरेका हुन। यो उनको आठौँ चलचित्र हो । यसमा आर्यन, दयाहाङ, खगेन्द्र, अञ्जना, गौमाया, मलिका सहित वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, वीरेन्द्र सिंह कुशवाह लगायतका कलाकारहरूको अभिनय रहेको छ ।
क्लक वर्क क्रियशन र पिक्चर फ्रेमको संयुक्त निर्माणमा तयार भएको यस चलचित्रका निर्माता हिमाल कडरिया हुन् । चलचित्रको स्क्रिप्ट विकास सुवेदीले लेखेका छ्न । छायाकार राजेश श्रेष्ठ हुन् भने सम्पादन निमेष श्रेष्ठको, ध्वनि डिजाइन उत्तम न्यौपानेको र मुख्य सहायक निर्देशन दिनेश बहादुर रावतको रहेको छ ।
मनोज जोशी निर्माण नियन्त्रक र सहायक निर्माण नियन्त्रक विदुर मानन्धर हुन् । चलचित्रमा साजन बस्ताकोटीको कला निर्देशन, रोयल भीमसेन र ट्राइडेन्ट कन्सेप्टको पब्लिसिटी डिजाइन, समरा जोशीको मेकअप तथा सरस्वती श्रेष्ठको केश स्टाइलिङ तथा आशिष पौडेलको कस्ट्युम डिजाइन रहेको छ । काफिया फिल्म्स् र कुबेर सिने डिस्ट्रिब्युसनले नेपालमा चलचित्रको वितरण गर्नेछन् ।
काठमाडौं । चलचित्र ‘१२ गाउँ २’ बनाउन लागेको चर्चाबिच नायक विराज भट्टले अर्को एक फिल्म साइन गरेका छन् । विराजले चलचित्र ‘१२ गाउँ २’को काम तत्कालका लागि पछि सार्दै नयाँ चलचित्र ‘राम नाम सत्य’ साइन गरेका हुन् ।
चलचित्रका निर्देशक माइकल चन्द र नायक विराज भट्टबीच सोमबार कागजी सम्झौता भएको हो । १२ गाउँ’ रिलिज भएपछि विराजको चर्चा र क्रेज फेरि एक पटक चुलिएको छ । उनलाई अन्य ब्रान्डका चलचित्रबाट अफर आउन थालेको छ । यसै बिच, विराजले होम प्रोडक्सनको काम समेत रोकेर ‘राम नाम सत्य’ साइन गरेका हुन।
म्युजिक भिडियो निर्देशन गर्दै आएका माइकल चन्दले यो चलचित्रको निर्देशन गर्न लागेका हुन् । चलचित्रमा कथा पनि उनको नै छ । चलचित्रको छायांकन आउँदो वर्षबाट सुरु गर्ने योजना माइकलको छ ।
चलचित्रमा अर्जुन पोखरेल र बाबुल गिरीको संगीत, र उत्तम गुरुङ, उपेन्द्र शाही र स्वेता विमलीको लगानी रहनेछ । नरेन्द्र शाह र सन्तोष अर्याल चलचित्रका कार्यकारी निर्माता हुन् ।
चलचित्रलाई एक्सन, लभ स्टोरी र कमेडीको जनरामा निर्माण गरिनेछ । चलचित्रका लागि अन्य कलाकार एकपछि अर्को रूपमा जानकारी दिँदै जाने योजना निर्माण पक्षको छ ।
काठमाडौं । नेपाली महिला राष्ट्रिय फुटबल टिमकी कप्तान तथा गोलरक्षक एन्जिला तुम्बापो सुब्बाको जीवनमा आधारित चलचित्र ‘अन्जिला’को सोमबार राजधानीमा भव्य प्रिमियरको आयोजना गरियो।
सशस्त्र प्रहरी बलका महानिरीक्षक (आइजिपी) राजु अर्यालको प्रमुख आतिथ्यमा आयोजित प्रिमियरमा सशस्त्र प्रहरी बलका अतिरिक्त महानिरीक्षकहरू, पूर्व आइजिपी दुर्जकुमार राई, पूर्व पुरुष राष्ट्रिय फुटबल टिमका कप्तान तथा अखिल नेपाल फुटबल सङ्घ (एन्फा)का पूर्व अध्यक्ष गणेश थापा, एन्फा महासचिव किरण राई, अभिनेत्रीद्वय केकी अधिकारी, अलिशा राई, अभिनेता दयाहाङ राई, निर्माता तथा कलाकार प्रेम कुमार श्रेष्ठलगायत पत्रकारहरु, चलचित्रकर्मी, राष्ट्रिय खेलाडीहरू र शुभचिन्तकहरूको बाक्लो उपस्थिति थियो ।
फुटबलप्रतिको चाहना, क्षमता, घरभित्रबाट बाहिर निस्कन गरेको सङ्घर्ष र काठमाडौंको सडकमै बस्नुपरेको अवस्थादेखि कप्तान बन्दासम्मको कथामा बनेको चलचित्र ‘अञ्जिला’को भव्य रेड कार्पेट प्रिमियरमा चलचित्र हेरेपछि उपस्थित अधिकाशं भावुक देखिए। भव्य सजावट र रेड कार्पेटले सजिएको प्रिमियरमा चलचित्रकी प्रमुख अभिनेत्री एन्जिला तुम्बापो सुब्बा र अन्य प्रमुख कलाकारहरू भने कार्य व्यस्तताका कारण उपस्थित रहेनन् ।
फागुन २९ गतेबाट देशभर प्रदर्शनमा आउन लागेको यो चलचित्रले एन्जिलाको सङ्घर्षको कथा बोकेको छ। चलचित्र हलबाट निस्किँदै गर्दा प्रायस् दर्शकहरू रोएका थिए।
चलचित्र हेरिसकेपछी आइजिपी अर्यालले आफूले एन्जिला र उनको क्याप्टेनशिप मात्र देखेको तर यो चलचित्रले एन्जिला हुनुको वास्तविकता देखाएको बताए । उनले भने, ‘हामीले सधैँ एन्जिलाको खेल देख्यौँ, उनको क्याप्टेनशिप देख्यौ तर एन्जिला हुनुमा उनले कति सङ्घर्ष गरेको रहेछ, कति पसिना र आँसु बगेको रहेछ भन्ने यो चलचित्रले देखायो । एपिएफ क्लबले एन्जिलालाई चिनायौँ, एन्जिलाले देशलाई चिनाइन् । यो चलचित्र नयाँ पिँढीको लागि प्रेरणा हुन्छ ।’
त्यस्तै, पूर्व कप्तान गणेश थापाले चलचित्र हेर्दा आफू ३-४ पटक रोएको बताए । ‘एन्जिलाले यति धेरै सङ्घर्ष गरेर आएको रहेछ । एन्जिलालगायत हामीले ती खेलाडीहरूलाई ध्यान दिन सकेनौँ भन्ने कुराको आत्मग्लानि भएको छ,’एन्फाका पूर्व अध्यक्ष समेत रहेका थापाले भने, ‘हाम्रो पालामा नै नेपाल प्रहरी, सशस्त्र प्रहरी र नेपाली सेनामा खेल्ने खेलाडीहरूलाई रोजगारीको ग्यारेन्टीको सुरुवात भएको हो । त्यसैको प्रतिफल आज महिला फुटबल खेलाडीको प्रगति भइरहेको छ ।’
त्यस्तै, चलचित्र हेरेका पत्रकार प्रकाश सुवेदीले बायोपिकमा चलचित्र बनाउन जति चुनौतीपूर्ण छ, त्यो चलचित्रलाई कमर्शियल बनाउन त्यति नै गाह्रो रहेको र ‘अञ्जिला’मा त्यो दुवै रहेको प्रतिक्रिया दिए । ‘यो चलचित्रमा जीवन त छँदैछ, चलचित्रलाई व्यावसायिक बनाउन निर्देशकले भरपुर मेहनत गर्नुभएको छ । मैले यो भन्दा पहिले भारतीय कलाकार आमिर खानको लगान हेरेको थिएँ । त्यो चलचित्रले मलाई एकाग्र भएर हेर्न बाध्य तुल्याएको थियो र आज अञ्जिला हेर्दा त्यही झझल्को आयो,’सुवेदीले सुनाए।
चलचित्र हेरेपछि भावुक हुँदै हलबाट निस्किएकी अभिनेत्री केकी अधिकारीले यो चलचित्रले आफ्नो मन छेडेर गएको जनाइन् । ‘हाम्रो समाजमा महिलाहरू जुनसुकै क्षेत्रमा छन् भने पनि सङ्घर्षपूर्ण यात्रा पार गरेर आएको हुन्छ । त्यसमाथि पनि महिलाले खेलकुदमा यो किसिमको एउटा सफलता पाउनुको पछाडिको सङ्घर्ष के कस्तो थियो भन्ने विषय चलचित्र मार्फत आएको छ,’ उनले भनिन्,‘एन्जिलाको सङ्घर्षको कथा नपढेको नसुनेको होइन तर, चलचित्र मार्फत आउँदा यसरी मन छेडेर गएको छ की निर्देशकले सुन्दर रूपमा एन्जिलाको वास्तविक जीवनलाई सामाजिक मूल्यमान्यता अनुसार पर्दामा उतार्नुभएको छ।’
चलचित्र निर्देशक नवल नेपालले छोराछोरीहरूले आफ्ना मातापितालाई सम्बोधन गर्ने चलचित्र रहेको प्रतिक्रिया दिए । अर्का निर्देशक ज्ञानेन्द्र देउजाले पनि नेपालमा नेपाली खेलाडीहरूले यति धेरै दुख गर्दा पनि राज्यको चेतना र लगानी किन छैन? भन्दै प्रश्न उठाए । उनले एन्जिलाको कथासँगै राज्यको दृष्टिकोणले पनि भावुक बनाएको बताए । अभिनेत्री अलिशा राईले यो चलचित्रले जीवन जिउन पनि सिकाउने बताइन् ।
त्यस्तै, अभिनेता प्रशान्त ताम्राकारले गाउँ ठाउँका सबै नेपाली चेलीहरूको कथा पनि एन्जिलाको जस्तै सङ्घर्षशील रहेको बताए । ‘म धेरै पटक भक्कानिएँ । एन्जिलाले गरेका ती सङ्घर्षहरू हेर्दा निकै गाह्रो महसुस भयो । एन्जिलाले आफैले अभिनय गरेको कारणले पनि होला त्यो अभिनय जस्तो नभएर वास्तविक नै देखिएको छ,’ ताम्राकारले भने ।
निर्देशक मिलन चाम्सले प्रिमियरबाट प्राप्त प्रतिक्रियाले आफू उत्साहित भएको बताउँदै अब चलचित्र हेर्ने पालो दर्शकको रहेको जनाए । ‘मैले एन्जिलालाई तिमीले अभिनय नगर, जीवनमा जे भोगेको छौ त्यति नै देखाउ भनेको थिएँ । म आफैले पनि हरेक पटक चलचित्र हेर्दा भावुक हुने गरेको छु । धेरै ठाउँमा प्रिमियर भयो, सबै ठाउँमा प्रशंसा भएको छ । अब दर्शकको पालो आएको छ,’चाम्सले सुनाए । चाम्सको यो तेस्रो बायोपिक चलचित्र हो । उनले यसअघि बायोपिकहरू ‘ब्लाइन्ड रक्स’ र ‘बोबी निर्देशन गरेका थिए ।
यसअघि यस चलचित्रको हङकङ, कोरिया, बेलायत र नेपालको धरानमा समेत प्रिमियर भएको थियो । चलचित्रमा एन्जिलाको साथमा, प्रेम कुमार श्रेष्ठ, दयाहाङ राई, सुनिल थापा, विजय बराल, सिर्जना सुब्बा, माओत्से गुरुङ, र बुद्धि तामाङको प्रमुख अभिनय छ ।
चलचित्रको छायाङ्कन एन्जिलाको जन्मथलो इलामको आइतबारे, झापा र काठमाडौँमा गरिएको छ । चलचित्रको छायाङ्कन सुदीप बरालले गरेका हुन भने सम्पादन मिलन श्रेष्ठले गरेका छन् । मुन लभ इन्टरटेन्मेन्टको ब्यानरमा निर्मित यस चलचित्रका निर्माता प्रेम कुमार श्रेष्ठ हुन् । कार्यकारी निर्माता विनोद अग्रवाल हुन् भने टुबेन्द्र लिम्बु र राजेश बगडिया चलचित्रका सह-निर्माता हुन् ।
काठमाडौं । काठमाडौं महानगरपालिकाका मेयर बालेन्द्र साह हिजो आफूले गीतसमेत गाएको नयाँ चलचित्र ‘लाज शरणम्’ हेर्न हलसम्म पुगे । चलचित्र रिलिज भएको दोस्रो हप्तामा उनी मिडियालाई सुइँको नदिईकन आफ्ना केही साथीभाइ लिएर गएका थिए ।
निर्माण टिमलाई कहिले बालेन चलचित्र हेर्न आउँछन् भन्ने व्यग्र प्रतीक्षा थियो । अचानक बालेन दरबारमार्गको क्युएफएक्स हलमा आउन लागेको खबर पाउँदा निर्माण पक्ष पनि सरप्राइज्ड भएको थियो । त्यसपछि हतार हतार चलचित्रका कलाकारहरू पनि दौडिए ।
चलचित्र हेरिसकेपछि बालेनले सबैभन्दा बढी धुर्मुसको प्रंशसा गरे । मोहम्मद आफताब आलमको हुलिया र हाउभाउलाई धुर्मुसले दुरुस्तै उतारेको उनको प्रतिक्रिया थियो ।
धुर्मुसलाई अँगाल्दै बालेनले भने ‘यस्तो डिटेलमा दिनुभएको छ नि । लास्टै दामी लाग्यो यार । एकदम मजा आयो हेर्दा । म पनि एउटा कलाकार हो नि । तपाईँको कलाप्रति उच्च सम्मान छ ।’
बालेनले चलचित्रको विषयवस्तुको पनि तारिफ गरेका थिए । कर्णालीको कथालाई निकै मार्मिक तवरबाट चित्रण गरिएको उनले बताएका छन् ।
बालेन पछिल्लो समय चलचित्र हेर्न विरलै हल पुगेका छन् । मेयर भएपछि एकाध चलचित्र हेरे पनि उनी पुरै समय हलमा बसेका थिएनन् । लाजशरणम् भने उनले पुरै हेरे ।
बालेनले गाएको र्याप ‘म नेपाल हाँसेको हेर्न चाहन्छु’ पनि यो चलचित्रमा समावेश छ, जसले गर्दा चलचित्रको हाइप बढाएको थियो ।
काठमाडौं । फागु पूर्णिमाको अवसर पारेर यही बिहीबार नयाँ चलचित्र ‘आउटलः दफा २१९’ रिलिज हुँदैछ । यस चलचित्रलाई बिक्की महर्जनले निर्देशन गरेका हुन् । अमित अग्रहरि चलचित्रका निर्माता हुन् ।
निर्देशक महर्जनका अनुसार २ वर्ष लगाएर यो चलचित्र निर्माण गरिएको हो । लामो समय लागे पनि सबै टीमले निकै मेहनत गरेको महर्जन बताउँछन् ।
उनी भन्छन्, ‘यो चलचित्रमा एक्सनमात्र छैन । एक्सनसँगै चलचित्रले नेपालको महत्वपूर्ण विषयलाई उठान गरेको छ । चलचित्रमा एक्सन, ड्रामा, कमेडी, थ्रिलर सबै छ । हेर्न धेरै कुरा छ । दर्शकलाई यस पटक धेरै सरप्राइज हुनेवाला छ ।’
निर्देशक महर्जनले चलचित्रको कथा कसैको जीवनसँग नमिल्ने दाबी गरे । ‘यो एउटा काल्पनिक कथा हो । क्यारेक्टर ग्याङस्टारकै हो भने यो बदला र न्यायको कथा हो । यसको कथावस्तु निकै गह्रुँगो छ’, उनले थपे ।
फिल्मका निर्माता अग्रहरि पनि सबैको सोच मिलेका कारण ‘आउटलः दफा २१९’ निर्माण भएको बताउँछन् । उनी भन्छन्, ‘यस्तो एउटा विषयवस्तु हामीले ल्याएका छौं, जुन भन्न आवश्यक थियो । मलाई यो फिल्मले एक्सनमा नयाँ बेन्चमार्क नै खडा गर्छ जस्तो लाग्छ । मैले पैसा सोचेर फिल्म बनाएको होइन । नयाँ भिजन, नयाँ विषयवस्तु भएका कारण नै लगानी गरेको हुँ ।’
उनले नेपालमा पछिल्लो समय बनिरहेका चलचित्रभन्दा ‘आउटलः दफा २१९’ फरक बनेको दाबी गरे ।
‘हामीले एक्सन फिल्म त हेरेका छौं, तर त्यसमा फिल नै आउन सकेको छैन । आउटलले त्यो महसुस गराउँछ । यो फिल्मले अर्को फिल्म बनाउने पैसा उठायो भने पनि म खुशी हुन्छु’, उनी सुनाउँछन् ।
चलचित्रमा सुशील श्रेष्ठ, नरेश पौडेल, शिक्षा संग्रौला, सुमन भण्डारी, हेममान गुरुङ, सोनी लागुन, विशाल पहारी, महेश त्रिपाठी, आयन परियारलगायतका कलाकारको अभिनय छ । निर्देशक विक्कीकै लेखन रहेको अग्रहरि र निशा गुइडेको लगानी, दीर्घ धामीको पटकथा र विनोद कठायत कार्यकारी निर्माता रहेका छन् ।
काठमाडौं । हङकङमा बसोबास गर्दै आएकी लेखक बालिका बान्तावाको उपन्यास ‘प्याउली’ लोकार्पण भएको छ ।
कलरव धरान प्रकाशक रहेको उक्त कृतिको शनिबार काठमाडौंमा साहित्यकार उषा शेरचन, समालोचक बिन्दु शर्मा, सञ्चारिका समूहकी अध्यक्ष विमला तुम्खेवा र लेखक बान्तावाले लोकार्पण गरेका छन् ।
उपन्यासकार बान्तावाले आफूभित्र रहेका उकुसमुकुस पोख्ने माध्यम खोज्दा यो किताबको जन्म भएको सुनाइन् । पुस्तकमा आफैं प्रमुख पात्र भएर आएको उनको भनाइ थियो ।
आख्यानकार शेरचनले ‘प्याउली’ सफल रहेको बताइन् ।
कवि तथा समीक्षक शर्माले यो उपन्यास लेखकको जीवन-कथामा आधारित रहेको सुनाइन् ।
जीवन-कथात्मक उपन्यासमा आत्मकथा र आख्यानको भेद अति मसिनो हुने उनको भनाइ थियो ।
कवि तथा पत्रकार तुम्खेवाले यो किताब आफ्नो सिद्धान्तलाई एक ठाउँमा थन्क्याएर हृदयबाट पढ्नुपर्ने बताइन् । कमै लेखकले मात्र आफूले बाँची ल्याएको जीवनलाई जस्ताको तस्तै रूपमा राख्ने हिम्मत गर्ने उनको भनाइ थियो ।
प्रकाशकका अनुसार एक निडर, स्वाभिमानी र आत्मनिर्भर महिलाको जीवन संघर्षको कथा हो ‘प्याउली’। ‘यस उपन्यासमा एक महिलाले भोग्नुपरेको जीवनका उकाली-ओरालीहरू छन् । सम्बन्धहरूले दिएका सास्ती, हैरानी र ऐंठनहरू छन् । प्रेम, वियोग र सुस्केराहरू छन् । अनि छन् पुरुष अहम्प्रतिका अचुक एवं निर्दयी प्रहार’, प्रकाशकको ठम्याइ छ ।
काठमाडौं । आगामी वैशाख १२ गतेबाट प्रदर्शनमा आउन लागेको चलचित्र ‘खेल’को शीर्ष गीत सार्वजनिक गरिएको छ ।
सार्वजनिक गीतमा रचना तथा स्वर ‘स्याम्मी डी रियल जी’को रहेको छ भने सङ्गीत सुरज ब्लुजको रहेको छ। उनी गीतको संगीत निर्माता पनि हुन। गीतको मिक्सिङ तथा मास्टरिङ भारतका अभिनव अग्निहोत्रीले गरेका छन् ।
गीतको भिडियोमा चलचित्रको प्रमुख अभिनेत्री सुरक्षा पन्तका साथै मोनिका थापा, हेना नगरकोटी, समापिका गौतम, निकिता आचार्यसँगै मिथिला शर्मा, भोला राज सापकोटा, सरिता गिरी, किरण श्रेष्ठ, भावना घिमिरे, सुहानी खड्का क्षेत्री लगायतका कलाकारको अभिनय रहेको छ। साथै, गायिका स्याम्मी डी रियल जी र बक्सर रश्मिला श्रेष्ठ विशेष रूपमा फिचर्ड छन् ।
‘खेल’ लाई बलिउडका अनुभवी सह-निर्देशक अनुराग प्रधान र नेपालमा लामो समयदेखि सह-निर्देशन गर्दै आएका आस्था श्रेष्ठले संयुक्त रूपमा निर्देशन गरेका हुन। चलचित्रको कथा नेपाली लोककथा, परम्परा, अध्यात्म, थ्रिलर र सस्पेन्सको मिश्रणमा आधारित रहेको छ ।
अध्ययनका लागि काठमाडौंको होस्टेलमा बसेका चार साथीहरूको कथा चलचित्रले देखाउनेछ, जसलाई आफ्नै विगतको भयानक घटनाले पछ्याइरहेको हुन्छ ।
यो चलचित्र सिरुपाते कट्स प्रालिको ब्यानरमा निर्माण गरेको हो । चलचित्रमा निर्माता आशिषराज महर्जन, कार्यकारी निर्माता लुइसराज महर्जन, सह-निर्माता कुनालराज गुरुङ र रहिशराज महर्जन रहेका छन् ।
चलचित्रको कथा आशिषराज महर्जनले लेखेका हुन् भने पटकथा अभितेन्द्र र अनुराग प्रधानले तयार पारेका छन् । संवाद विष्णु गैरेले लेखेका छन् ।
चलचित्रको छायाङ्कन रोशन राई र सञ्जय लामाले गरेका छन् भने सम्पादन आशिषराज महर्जनले गरेका छन् । त्यस्तै, ध्वनि डिजाइन विकल प्रधान, रङ्ग संयोजन राजेन्द्र मोक्तान, प्रोडक्सन डिजाइन किशोर नेपाल, कस्ट्युम डिजाइन एलेक्स बसुकला, मेकअप दिपु पौडेलले गरेका छन् ।
प्रोडक्सन म्यानेजरको जिम्मेवारी यमप्रसाद ओलीले सम्हालेका छन् । चलचित्रको वितरण डिसिएनले गर्नेछ भने पब्लिसिटी डिजाइन ट्राइडेन्ट कन्सेप्टले गरेको छ ।
काठमाडौं । प्रदर्शनरत चलचित्र ‘होस्टेल ३’ को क्लब गीत ‘राजारानी’ सार्वजनिक गरिएको छ । रिलिजको दोस्रो दिन चलचित्रको क्लब गीत सार्वजनिक गरिएको हो । चलचित्र अहिले देशभर प्रदर्शनमा छ । दर्शकसँग साक्षात्कार गर्न कलाकारहरु हल भिजिटमा छन् ।
किरण माइकलको सङ्गीत रहेको गीतमा सुजाता पाण्डे, सशान कँडेल र किरण माइकलको स्वर छ । वेला बोम्जन र सुधा मरहट्ठाको शब्द रचना रहेको गीतको भिडियोमा आश्मा विश्वकर्मासँगै ‘होस्टेल ३’का कलाकारहरू रिहान गिरी, आशिष घिमिरे, पदम तामाङलगायतको अभिनय छ ।
गीतका कोरियोग्राफर रोशन विश्वकर्मा हुन् । सशान कँडेलले निर्देशन गरेको चलचित्रको पटकथा तथा संवाद माधव शर्माले लेखेका हुन् ।
चलचित्रमा पारस बम ठकुरी, सिम्रन पन्त, आशिष घिमिरे, पदम तामाङ, हेना नगरकोटी, रिहान गिरी, समा पराजुलीलगायतको मुख्य भूमिका रहेको छ । चलचित्रमा प्रवीण खतिवडाले वार्डेनको भूमिका निभाएका छन् । आशिष पुरुष, रोहन श्रेष्ठ, उमर खान र सन्तोष बानियाँ पनि चलचित्रमा रहेका छन् ।
चलचित्रका निर्माता सुरेश कँडेल, कर्ण कार्की र गोविन्द अधिकारी हुन् । सहनिर्मातामा शिशिर ज्ञवाली, अनिश सिग्देल, कुन्दन गुप्ता र गणेश मगर रहेका छन् ।
शङ्कर कोइराला कार्यकारी निर्माता रहेको चलचित्रमा कोसिसराज क्षेत्री लाइन प्रोड्युसर छन् । अर्जुन तिवारीले छायाङ्कन निर्देशन गरेको चलचित्रको सम्पादन विकास दाहालले गरेका हुन् ।