Category: कलाप्रेस

काठमाडौं । दस महिनादेखि बन्द भएका नेपाली नाटक घर आजदेखि खुलेका छन् । नेपाली थिएटरको छाता संस्था थिएटर हबले ९ गतेसम्म ८ वटा नाटक र कार्यक्रम लाइनअप घोषणा गरेको छ । कोरोनाले थलिएको नेपाली रंगमंचलाई लयमा ल्याउन यो लाइनअप सहायक हुने हबले जनाएको छ ।

विहिबार आज बत्तीसपुतलीस्थित शिल्पी थिएटरमा ‘६ पात्रको एकालाप’ मंचन हुँदैछ । शुक्रबार कौसी थिएटरमा नाटक ‘हराउँदै भेटाउँदै’ नाटक मंचन हुनेछन् । बिराटनगरको झोराहाट थिएटरमा आइतबार नाटक ‘कोरोना टाइम्स’ मंचन हुनेछ ।

बिराटनगरकै आरोहण गुरुकुलमा सोमबार नयाँ नाटकको नमुना मंचन तथा छलफल हुनेछ । मंगलबार पोखरा थिएटरमा नाटक महोत्सवको घोषणा हुनेछ । बुधबार काठमाडौंको मण्डला थिएटरमा ‘कोरोना अघि र पछिको रंगमंच एवं अबको बाटो’ संचालन हुनेछ । शैली थिएटरमा विहिबार शैली संवाद संचालन हुनेछन् । अर्को शुक्रबार कीर्तिपुरस्थित थिएटर रंगमंचमा पोएट्री पटरी र रंगकर्मीको कविता संचालन हुनेछन् ।

गायन रियालिटी शो ‘दि भ्वाइस अफ नेपाल’को सिजन ३ मा एकजना कोच परिवर्तन गरिएको छ । सिजन–२ मा कोचको रुपमा रहेकी गायिका आस्था राउतले यो बर्ष समय दिन नभ्याएपछि उनको स्थानमा गायिका तृष्णा गुरुङलाई अनुवन्धित गरिएको हो । आयोजित पत्रकार सम्मेलनमा यो कुराको जानकारी दिइएको हो ।

‘दि भ्वाइस अफ नेपाल’को तेस्रो संकरणमा कोचको रुपमा जोडिन पाउँदा आफू निकै उत्साहित भएको र आफ्नो तर्फबाट बेष्ट दिन आफूले कुनै कसर बाँकी नराख्ने तिर्सनाले बताइन् ।

‘दि भ्वाइस अफ नेपाल’का निर्देशक लक्ष्मण पौडेलले आस्थाले समय दिन नसक्ने भएपछि उनले सहमतीमै सो छाडेको बताए । यसमा अन्य कुनै कारण नभएको पौडेलको भनाई छ ।

अहिले ‘दि भ्वाइस अफ नेपाल ३’को डिजिटल अडिसन चलिरहेको छ । एक महिनापछि हिमालय टेलिभिजन एचडीबाट यो सो प्रशारण हुने बताइएको छ ।

सोमा कोचको रुपमा गायकत्रय दिप श्रेष्ठ, प्रमोद खरेल र राजु लामा भने यथावत् नै छन् । ‘दि भ्वाइस अफ नेपाल’को रोमाञ्चक यात्रामा यसपटक झनै उत्कृष्ट रुपमा आफूलाई प्रस्तुत गर्ने दिप, प्रमोद र राजुले बताए ।

यसअघि टिम दीप र टिम प्रमोदका प्रतिस्पर्धीले यो सोको टाइटल जितिसकेका छन् । यसपटक के राजु लामा आफ्नो टिमले सोको टाइटल जित्छ भन्ने अपेक्षा गरिरहेका छन् त ? राजु भन्छन्–‘जित्नु नै सबै कुरा होइन । म सधै नै आफ्नो टिममा आउने प्रतिस्पर्धीले उत्कृष्ट काम गरेको हेर्न चाहन्छु । यसैले मलाई जित्नैपर्छ भन्ने दबाब छैन ।’

पत्रकार सम्मेलनमा हिमालय टेलिभिजन र विज्ञापनदाताहरुविच हस्ताक्षर कार्यक्रम सम्पन्न भएको छ । ‘दि भ्वाइस अफ नेपाल’लाई ओप्पोले प्रस्तुत गर्नेछ । हिमालय टेलिभिजनका प्रमुख धर्मराज भुषाल र कार्यकारी निर्देशक श्याम कँडेलले ‘दि भ्वाइस अफ नेपाल’का स्पोन्सरसँग संझौता साझेदारी गरेका थिए ।

कार्यक्रममा बोल्दै हिमालय टीभीका प्रमुख भुषालले टेलिभिजनले दर्शकहरुलाई मनोरञ्जन दिन विश्वकै नम्बर १ रियालिटी शोका फ्रेन्चाइज ल्याइरहेको बताए । उनले, यो सिजनको ‘दि भ्वाइस अफ नेपाल’लाई गतबर्षको भन्दा झनै उत्कृष्ट बनाएर प्रस्तुत गर्ने बताए ।

मुम्बई –दिवगंत बलिउड अभिनेता सुशान्तसिंह राजपुतकी बहिनी श्वेता सिंहले आफ्ना दाजुले लेखेको हस्तलिखित पत्रलाई सामाजिक संजालमा सेयर गरेकी छन् । जसमा सुशान्तले आफ्नो ३० वर्षको अनुभव र जिन्दगीको वास्तविक खेलको बारेमा चर्चा गरेका छन् ।

श्वेता क्याप्सनमा लेख्छिन् –भाइले लेखेको पत्र । सोच एकदमै गहिरो छ ।’ सुशान्तको पत्रको नेपाली अनुवाद –मलाई लाग्छ कि मैले जिन्दगीका ३० वर्ष बिताएँ । सुरुआती ३० वर्ष केही बन्ने प्रयासमा । म हरेक चीजमा असल बन्न चाहन्थेँ । म टेनिस, स्कुल र ग्रेड्समा राम्रो बन्न चाहन्थेँ । यही कारण मैले ती सबै चीजलाई त्यही नजरबाट हेरेँ । म जस्तो छु, वास्तविकरुपमा ठीक छैन । मलाई पछि लाग्यो कि जिन्दगीको पुरै खेल नै गलत छ । किनभने पुरा खेल त त्यही कुरालाई पाउनु थियो, जुन म पहिले थिएँ ।’

 

View this post on Instagram

 

A post shared by Shweta Singh kirti (SSK) (@shwetasinghkirti)

१४ जुन २०२० मा सुशान्तलाई मुम्बइस्थित फ्ल्याटमा मृत अवस्थामा भेटिएको थियो । उनको मृत्युपछि प्रहरीले छानविन अगाडि बढायो तर कुनै निष्कर्ष भेटिएन । यस मामिलामा उनकी प्रेमिका रिया चक्रवर्तीलाई एक महिना जेलमा बस्नुपर्‍यो । सुशान्तको मृत्यु अहिले पनि रहस्यमै छ र प्रहरीले अहिले पनि अनुसन्धान अगाडि बढाइरहेको छ ।

काठमाडौं । नेपालको चर्चित पप ब्यान्ड ‘आस्था’बारे दुई नयाँ खबर छ – ब्यान्डका दुई ठूला नाम नरेन लिम्बु र सुदीप गुरुङ झन्डै बीसवर्षपछि टीमअप गर्दैछन् नयाँ एल्बमका लागि । दोस्रो –नरेनको निर्माण एवं निर्देशन रहेको फिल्म ‘आस्था’को छायांकन ८० प्रतिशत सकिएपछि अनिश्चित बनेको छ ।

पहिलो कुरा बीसवर्षपछि हुने सम्भावित सहकार्यबारे चर्चा गरौं । नेपाल प्रेससँग कुरा गर्दै नरेनले आफ्ना प्रिय ब्यान्ड मेम्बर सुदीपसँग एक नयाँ एल्बमका लागि सहकार्य गर्ने बताएका छन् । ‘लकडाउनअघि नै मिलेर नयाँ एल्बम निकाल्ने तयारी थियो’ उनले भने, ‘तर, लकडाउनपछि त्यो योजना रोकियो ।’ उनका अनुसार यो चर्चित सहकार्यलाई उनी निरन्तरता दिन चाहन्छन् ।

सन् २००२ मा रिलिज भएको आस्था एल्बममा समेटिएको ‘हरपल’ गीत नेपाली चार्टबस्टरमा हिट भएको थियो । यसले नेपाली पप जनरामा एउटा रेकर्ड नै राख्यो । धरानबाट काठमाडौं आइपुगेका यी दुई ठिटाले नेपाली पप संगीतमा बेग्लै खालको स्वाद बसाले । अब भने बेलायतमा बस्दै आएका गुरुङ र काठमाडौंमा बसेका लिम्बुबीच नयाँ एल्बमका लागि टीमअप हुनेछ ।

यसैबीच, ८० प्रतिशत छायांकन सकिएको फिल्म आस्थाको भविष्य अनिश्चित बनेको छ । नरेनका अनुसार यो सांगीतिक ड्रामा अब कहिले बन्छ भन्नेबारे यकिन छैन । ‘केही समस्याले गर्दा रोकिएको छ, यसको भविष्यबारे सोच बनाउँदैछु । अहिलेलाई रोकिएको मान्नूस’ नरेनले नेपाल प्रेससँग भने । नरेन हिजोआज केही म्युजिक भिडियोमा व्यस्त छन् ।

काठमाडौं । नेपाली फिल्म क्यालेन्डरमा १३ जनवरी ऐतिहासिक तिथिको रुपमा मार्क हुनेछ । ठीक ९ वर्ष अगाडि आजकै दिनमा फिल्म ‘लुट’ रिलिज भएको थियो र एकैसाथ नेपाली फिल्मको ब्याकरणलाई पुनः परिभाषित गरिदिएको थियो । ‘लुट’ले के मात्र गरेन ? ५० वर्षे नेपाली फिल्मको इतिहासमा कथ्य, संरचना र बजारमा मानक स्थापित गरिदयो । धन्यवाद –माधव वाग्ले, नरेन्द्र महर्जन, निश्चल बस्नेत, दयाहाङ राई र सौगात मल्लको टीमअपलाई ।

जतिबेला लुट रिलिज भएको थियो । उतिबेला समीक्षक मनोज पण्डितले दुई सिरिजमा लुटको समीक्षा गरेका थिए । उनी लिखित ‘लुट’ समीक्षाको हेडलाइन थियो –लुटले लुट्छ । पण्डितको तर्क थियो –लुटले नेपाली फिल्मको परम्परागत न्यारेसन शैलीलाई परिवर्तन मात्र गरेन विषयवस्तु र कथ्य संरचनामा नयाँपन ल्यायो । रिलिजको ठीक नौ वर्षपछि पुनः ‘लुट’को उपलब्धीलाई एकपटक सिंहावलोकन गर्नु सान्दर्भिक हुन आउँछ ।

मल्टिप्लेक्स कल्चरको सुरुवात

सन् २०१२ मा लुट रिलिज हुने समय नेपालमा मल्टिप्लेक्स हलमा सिभिल र बिग मूभिज मात्र थिए । त्यसअघि सिंगल थिएटरकै जगजगी थियो । जसै, लुट रिलिज भयो, मल्टिप्लेक्समा यसको ब्यापारमा उछाल आयो ।

सिंगल पर्दामा समेत लुट हिट भयो । वास्तवमा भन्नुपर्दा लुटले दर्शकलाई यसरी हलमा तान्यो कि जो प्रायः हलमा जान आनकानी गर्थे या नेपाली फिल्मप्रति रुचि राख्ने थिएनन् । लुट कालखण्डपछि नै नेपालमा मल्टिप्लेक्स हलहरु धमाधम खुल्न थाले । फिल्म संस्कृति र मल्टिप्लेक्स कल्चर स्थापना गर्न लुटको योगदान छ ।

फिल्म ब्याकरणमा परिवर्तन
लुटअघि फिल्म समीक्षकको एउटै आलोचना हुने गथ्र्यो –फिल्मले समाजलाई कहिल्यै पनि स्वीकार गरेन । फिल्मलाई कहिल्यै साहित्यिक उत्पादनको रुपमा लिइएन ।

फिल्मलाई कहिल्यै बौद्धिक उत्पादन ठानिएन र नेपाली फिल्मले दृश्यभाषालाई पूर्णतः बेवास्ता गर्‍यो । तर, लुटले यी सबै कुरालाई आत्मसात गरेको भन्दै समीक्षकले स्वागत गरे । वास्तवमा लुट द्धन्द्ध, कथ्य संरचना, संवाद, चरित्र चित्रण र सन्देशको हिसाबले निकै अब्बल फिल्म हो ।

नेपाली सौन्दर्यको परिभाषामा नपर्ने चिम्सा आँखाहरु फिल्ममा नायक बने । हाकु काले बनेका सौगात मल्ल, दयाहाङ राईको पेट तथा काठमाडौंको गल्ली निकै हिट रहे । लुट फिल्मकै बिन्दुबाट काठमाडौंको चोभारले आकर्षण गुमाएको हो । लुट फिल्मबाटै पुरुषोत्तम प्रधान एकाएक ‘टेक्निकल हिरो’ बने । नेपाली नाट्य जगतले यही विन्दुबाट नेपाली सिनेम्याटिक परम्परामा जगजगी बसालेको हो ।

विदेशी बजारको खोजी

लुट यस्तो फिल्म थियो जसले विदेशी बजारमा नेपाली फिल्मको खोजी थाल्यो । सम्भवतः विदेशी बजारमा सर्वाधिक कमाउनेमध्येको एउटा फिल्म भएको थियो यो । स्वदेशमा ४ करोड ग्रस कमाएको ठानिएको फिल्मलाई निर्माताले निश्चित देशहरुमा ओभरसिज राइट विक्री गरेका थिए ।

अष्ट्रेलिया, युरोप र अमेरिकी बजारमा लुटले तहल्का मच्चायो । त्यसपछि मात्र चपली हाइट लगायतका अन्य फिल्मले ओभरसिज राइटको खोजी थाले । नेपाली फिल्मको इतिहासमा लुटको जस्तो विदेश डिमान्ड अरु फिल्मको भएको थिएन ।

तर, लुटको दोस्रो सिक्वेलको भने उतिसारो चर्चा भएन । समीक्षकले अघिल्लो भागजस्तो उतिसारो सौन्दर्य यसमा निहित नभएको भन्दै आलोचना गरे ।

ओपनिङ भव्य भएपनि दोस्रो सिक्वेल लामो समयसम्म हलमा चलेन । यही फिल्मदेखि माधव वाग्ले र नरेन्द्र महर्जन निर्माताको रुपमा स्थापित भए भने निश्चल बस्नेत ब्रान्डको रुपमा दरिए । तर, पछिल्लो समय कतिपयले पछिल्लो कामप्रति असन्तुष्टि जनाइरहेका छन् । ‘लुट’ फिल्म रिलिजको नौ वर्षपछि पनि अहिले सान्दर्भिक हुनसक्छ ।

कोरोनाभाइरस महामारीको बीचमा पनि दक्षिण भारतको बहुप्रतीक्षित फिल्म ‘मास्टर’ विहिबारदेखि नेपालमा पनि रिलिज हुँदैछ । भाइरस लकडाउनपछि निकै हाइपका साथ रिलिज हुन लागेको यो फिल्म दर्शकमाझ कति प्रतिक्षित रहेछ भन्ने दृश्य मंगलबार दक्षिण भारतका कतिपय सिनेमा घरमा देखियो ।

थालापाथी नामले चिनिने साउथका सुपरस्टार विजय अभिनित यो फिल्म हेर्नको लागि उनका फ्यान सामाजिक दूरीको साथ पालना नगरि टिकट लिन घुँइचो गरिरहेका थिए । भारतले कोभिड प्रोटोकल पालना गर्दै फिल्म गतिविधि खुलाएसँगै त्यहाँको फिल्म हलमा यो भीड देखिएको हो । मास्टरको यो ठूलो रिलिजले कोरोनाले थलिएको भारतीय फिल्म बजार लयमा फर्कने अनुमान गरिएको छ ।

People in queue at Miraj multiplex in Coimbatore to buy tickets for tomorrow’s show of ‘Master’!!!! @amitsharma51082 @MirajCinemas pic.twitter.com/ZwNqwTBtkX

— Komal Nahta (@KomalNahta) January 12, 2021

यो तामिल एक्सन ड्रामा हेर्नको लागि टिकटको झ्यालमा देखिएको दर्शकीय घुइँचाको तस्विर ट्वीटरमा भाइरल भएको छ । बलिउड फिल्म ट्रेड एनालिस्ट कोमल नाहटाले मिराज मल्टिप्लेक्समा यस्तो दृश्य देखिएको र भीड नियन्त्रण गर्न प्रहरी बोलाउनुपरेको ट्वीट गरेका छन् । केही ट्वीटर प्रयोगकर्ताले सयप्रतिशत अकुपेन्सी हुने भन्दै लेखेका छन् ।

मेगा फ्यान फलोइङको कारण विजयको यो फिल्म छायांकन अगाडिदेखि नै हाइपमा थियो । लोकेश कांगाराज निर्देशित यो फिल्ममा माल्भिका मोहन, अर्जुन दास, एन्ड्री जेरेमी र सान्त्वना भाग्यराजले अभिनय गरेका छन् । उत्तर भारतसहित नेपालमा भने हिन्दीमा स्वरांकन गरिएको फिल्म रिलिज हुँदैछ । ब्यांकटेस इन्टरटेनमेन्टले फिल्मलाई नेपालमा रिलिज गर्दैछ ।

नेपालमा पनि विजय र दक्षिण भारतीय फिल्मको ठूलो फ्यानको हिस्सा भएकाले यो फिल्मले राम्रै दर्शकलाई तान्न सक्ने अनुमान गरिएको छ । कोरोनाले थलिएको नेपाली फिल्मलाई उकास्न यो फिल्म महत्वपूर्ण हुनसक्ने आशा वितरक मनोज राठीले लिएका छन् ।

टाइम्स अफ इन्डियाले फिल्मलाई साढे तीन रेटिङ दिएको छ । एउटा कलेजको प्राध्यापक कक्षामा आफ्ना गुन्डाहरुसँग गएर विद्यार्थीलाई पढाउँछ । उसको उद्देश्य आफ्नो साम्राज्य खडा गर्नु हो । समीक्षामा विजयको अभिनय र फिल्मको निर्देशनलाई प्रशंसा गरिएको छ ।

काठमाडौं । सरकारले कोभिड–१९ संक्रमण रोकथामका लागि सिनेमा हल संचालन तथा अनुगमन मापदण्ड २०७७ ल्याएको छ । संचार तथा सूचना प्रविधि मन्त्रालयले १९ बुँदे संचालन तथा अनुगमन मापदण्ड मंगलबार सार्वजनिक गरेको हो ।

पुस २६ गतेको मन्त्रिपरिषद् बैठकले स्वास्थ्य मापदण्ड पालना गरेर फिल्म हल संचालनको अनुमति दिएको थियो । क्याबिनेटको अनुमतिपछि संचार मन्त्रालयले फिल्म हलमा कोभिड प्रोटोकल ल्याएको हो ।

मन्त्रालयले सिनेमा घरमा मापदण्ड पालना भए नभएको अनुगमन गर्न मन्त्रालयका सहिसचिवको संयोजकत्वमा चलचित्र विकास बोर्डका अध्यक्ष सदस्य रहने गरि अनुगमन समिति पनि गठन गरेको छ ।

काठमाडौं उपत्यकाबाहिरका फिल्म हलले जिल्ला कोभिड संकट व्यवस्थापन केन्द्र (डीसीसीएमसी)सँग समन्वय गरेर हल चलाउनुपर्ने उल्लेख छ । मापदण्डमा सामाजिक दूरी, सरसफाइ, मास्क र स्वास्थ्यकर्मीको उपलब्धताको अनिवार्य व्यवस्था गर्नुपर्ने उल्लेख छ ।

पहिलो अमेरिकी उपराष्ट्रपतिमा निर्वाचित कमला ह्यारिसलाई फिल्म र फेसन उद्योगबाट स्वागत हुन थालेको छ । प्रतिष्ठित फेसन म्यागजिन भगले कभरस्टोरीको लागि फोटोसुट नै गर्‍यो । भग लेख्छ –ह्यारिसको विजयले अमेरिकी राजनीतिमा नयाँ विहानीको संकेत गर्छ ।

भगको जनवरी संस्करणमा ह्यारिसको फोटोसुटले चर्चा बटुल्यो । जहाँ उनलाई कन्भर्स स्निकर्स र डोनाल्ड डिल ब्लेजरमा देख्न सकिन्छ । यो फेसन स्टेटमेन्टको छनौट चाहिँ ह्यारिसको आफ्नै हो । यो पहिरनमा ह्यारिसको मुस्कानले अझै फोटोसुटलाई ताजा तुल्याउँछ ।

हावर्ड विश्वविद्यालयमा अध्ययनरत छँदाको गेटअपमा ह्यारिसलाई प्रस्तुत गरिएको छ । ‘यो फोटोसुट ह्यारिसको युनिभर्सिटी बेलाप्रति समर्पित छ’ भगका फेसन सम्पादक जेनेली ओकोडु लेख्छन्, ‘यो डिजाइन त्यतिबेलाको चर्चित अल्फा कप्पा अल्फाको पहिरनमा आधारित छ ।’ हावर्डको अल्फा च्याप्टर नामक विद्यार्थी संगठनमा हुने डिजाइनमा ह्यारिसलाई भगले उतारेको छ ।

राष्ट्रपतिमा निर्वाचित जो बाइडेन र ह्यारिसको पहिलो सय दिनको प्राथमिकता चाहिँ अमेरिकामा फैलिएको कोरोनाभाइरस महामारीको नियन्त्रण हो । महामारीले स्कुल जान नपाएका बालबालिका र उचित स्वास्थ्य प्रबन्ध नपाएका फ्रन्टलाइन वकर्स र उनीहरुको दुःखलाई लिएर ह्यारिस चिन्तित देखिन्छिन् । साथै, कोरोनाले थलिएका साना व्यापारलाई उकास्ने उनको योजना रहेको भगले लेखेको छ ।

विश्व फेसनसँगै अमेरिकी र भारतीय फिल्म उद्योगले पनि ह्यारिसलाई स्वागत गरेको छ । ह्यारिस दक्षिण एसियाली मूलकी पनि हुन् । उनको विजयमा हलिउड र संगीतकर्मीले पनि स्वागत गरेका छन् ।

काठमाडौं । पहिलो सगरमाथा आरोही तेन्जिङ नोर्गे शेर्पाका नाती अब अमेरिकी फिल्म उद्योग हलिउडसँग जोडिएका छन् । अग्रणी हलिउड स्टुडियो ड्रीमवक्र्स एनिमेसनले निर्माण गरेको ‘एबोमाइनेबल’मा नाती तेन्जिङ नोर्गे ट्रेनरले एक मुख्य पात्रमा स्वर भरेका छन् । फिल्मको कथा पनि मुख्य पात्रले सगरमाथा क्षेत्रमा यतिको खोजीको गर्ने कुरामा छ ।

हलिउड म्यागजिनसँग कुरा गर्दै यी तन्नेरी अभिनेताले आफ्ना हजुरबुबाको सम्मान र स्मरणका लागि हलिउड फिल्ममा सहभागिता जनाएको बताएका छन् । उनका हजुरबुवा तेन्जिङ नोर्गे शेर्पा र सर एडमन्ड हिलारीले सन् १९५३ मा सगरमाथाको पहिलो आरोहण गरेका थिए । डिज्नेको चर्चित टेलिभिजन सो ‘लिभ एन्ड म्याडी’मा तेन्जिङ ‘पार्कर रुनी’को रुपमा दर्शकमाझ चर्चित छन् ।

एबोमाइनेबल गतवर्ष अन्तराष्ट्रिय बजारमा प्रदर्शन भैसकेको छ । यो फिल्मबाट उनले बेस्ट भ्वाइस एक्टरको रुपमा एनी अवार्ड पनि जितेका छन् । फिल्ममा तेन्जिङसहित एसियन अमेरिकन कलाकारद्धय कोल बेनेट र अल्बर्ट साइ पनि मुख्य भूमिकामा छन् । एनिमेसन फिल्मबाहेक तेन्जिङ द मोर्डन फ्यामिली, क्लुलेस एन्ड गुड लक चार्लीमा अभिनय गरेका छन् ।

काठमाडौं । सरकारले फिल्म प्रदर्शनलाई फुकुवा गरेपनि अझै केही समय नेपाली फिल्मको लाइनअप रित्तो हुने परिस्थिती देखिएको छ । माघ १ गतेदेखि रिलिज हुने शिव श्रेष्ठको ‘एउटा यस्तो प्रेम कहानी’ र फागुन २७ गते ‘लप्पन छप्पन २’ बाहेक नयाँ फिल्मको प्रदर्शन मिति घोषणा भएको छैन ।

झन्डै तीसवटा फिल्म निर्माण सम्पन्न भएर पनि रिलिजको तयारीमा छन् तर कसैले पनि रिलिज डेट घोषणा गरेका छैनन् । तत्काल हल खुलेपनि दर्शक आउने सम्भावना कम भएकाले निर्माता रिलिजको मनस्थितीमा नदेखिएका हुन् । अधिकांश निर्माता अझै पनि बलिउड र हलिउडका ठूला फिल्मलाई प्रतिक्षा गरेर बसिरहेका छन् । लकडाउनअघि २८ वटा फिल्मको रिलिज स्थगित भएको थियो ।

सरकारलाई हल खुलाउन माग गर्ने कतिपय निर्माताहरु अहिले भने ‘गायब’ छन् । हल खुलाएपनि प्रदर्शकसँग कुन फिल्म चलाउने भन्ने कन्टेन्ट नै छैन । विहिबार ब्यांकटेस इन्टरटेनमेन्टले दक्षिण भारतीय फिल्म ‘मास्टर’ प्रदर्शनको तयारी थालेको छ । गोपिकृष्ण मूभिजले भने ओटीटी प्लेटफर्ममा ज्याकी च्यानको भ्यानगड र सलमान खानको ‘कागज’ रिलिज गर्दैछ ।

यो पनि पढ्नूस : भाइरसले बदलेको भाष्य (फिल्म समीक्षा)

सरकारले हल खुलाएपनि झन्डै जिरो अकुपेन्सीमै फिल्म प्रदर्शन भैरहेका छन् । फिल्म हल पनि ५० प्रतिशत अकुपेन्सीमा खुलाउन अनुमति छ । जसले गर्दा निर्माताहरु कम अकुपेन्सीमा ठूलो लगानीका फिल्म तत्काल रिलिज गर्नबाट पछि हटेका हुन् ।

वितरक कम्पनीहरुले लाइनअप तयार गर्न सकिरहेका छैनन् । अझै केही वितरक र निर्माता ‘पर्ख र हेर’को मुडमा छन् । बलिउडको ठूलै फिल्म रिलिज भएमात्र नेपाली फिल्म लयमा फर्कन सक्ने उनीहरुको भनाइ छ । बलिउडमा अक्षयकुमारको ‘बेलबटम’ अप्रिल २ र सलमान खान स्टारर ‘राधे : योर मस्ट वान्टेड भाइ’ मे बैशाखमा रिलिज हुनेछन् ।

रिलिजको लागि तयार भएका फिल्मको संख्या २८ छ । जसमा प्रेमगीत ३, म यस्तो गीत गाउँछु २, नीरफूल, चपली हाइट ३, लक्का जवान, माइकल अधिकारी, षट्कोण, पूर्वपश्चिम, दोख, गोर्खे, हिरो रिटन्र्स, आकाशे खेती, हिजो आजका कुरा, चिसो एस्ट्रे, जारी, पानीफोटो, दयारानी, सम्हालिन्छ कहिले मन, सुस्केरा, मन्त्र, एक, लप्पन छप्पन २ र झिँगेदाउ छन् ।

१० प्रतिशत हल सँधैको लागि बन्द हुने
हलहरुको छाता संस्था चलचित्र संघले करिब १० प्रतिशतभन्दा बढी फिल्म हल सँधैको लागि बन्द हुने जनाएको छ । नेपाल प्रेससँग कुरा गर्दै संघका कोषाध्यक्ष देवेन्द्र खड्गीले तत्काल सरकारले राहत उपलब्ध नगराए ३० वटा जति हल बन्द हुने जनाए । बन्द हुनसक्ने हलहरुमा अधिकांश मोफसलका छन् र केही उपत्यकाभित्रकै हुनेछन् ।

मल्टिप्लेक्स हल चाहिँ कमर्सियल व्यापारिक भवनकै एउटा हिस्सा भएकाले सिंगल हललाई जस्तो समस्या चाहिँ हुनेछैन । महामारीपछि भारत र चीनमा समेत हजारौं हलहरु सँधैका लागि बन्द हुँदैछन् । तरपनि, मुख्य मल्टिप्लेक्स क्यूएफएक्सले बीरगंज लगायतका मोफसलका सहरमा मल्टिप्लेक्स विस्तार गर्दैछ ।

काठमाडौं । प्रहरीले प्रतिलिपि अधिकार उल्लंघनको आरोपमा विन्दवासिनी म्युजिक प्रालिकी अध्यक्ष लिना शर्मा रेग्मीलाई पक्राउ गरेको छ ।

गायक प्रमोद खरेल लगायतको उजुरीमा महानगरीय प्रहरी परिसर काठमाडौंले लिनालाई पक्राउ गरेको एसएसपी अशोक सिंहले पुष्टि गरे । उनलाई सोमवारै धुम्बाराहीबाट पक्राउ गरिएको प्रहरीले जनाएको छ । अदालतको अनुमति लिएर उनलाई पक्राउ गरिएको सिंहले बताए ।

आजै उनलाई म्याद थपका लागि जिल्ला अदालत पेश गर्न लागिएको छ । खरेलले लिनाका पति सुवास रेग्मीविरुद्ध पनि प्रतिलिपि अधिकार उल्लंघनको उजुरी दिएका छन् । लेनदेनको विषयमा सामान्य विवाद हुँदा गायक खरेल प्रहरीमा पुगेको दावी रेग्मी निकट स्रोतले गरेको छ ।

यो पनि पढ्नूस :
प्रमोद खरेलको गीतमा रोयल्टी विवाद चर्कियो, ७५ जना गायकले प्रहरीमा दिए उजुरी

काठमाडौं । राष्ट्रिय एकता दिवस एवं पृथ्वी जयन्तीको अवसरमा सोमबार ३० जना कलाकारले एकैसाथ राष्ट्रिय गीतलाई इन्टरनेट रिलिज गरेका छन् । त्यही सच्चा नेपाली बोलको गीतमा सत्यमोहन जोशीदेखि नीर शाहसम्मले अभिनय गरेका छन् । देविका बन्दना र राजन इशानको स्वर छ ।

आनन्द अधिकारीको शब्द रहेको गीतमा इशानकै संगीत समावेश छ । रोशन केसीले निर्माण एवं निर्देशन गरेकी हुन् । पशुपति क्षेत्र, पाटन, लोकतन्त्र पार्क लगायतमा फिल्मांकन गरिएको गीतमा राष्ट्रियताको भाव समावेश गरिएको छ । ‘गीतले नेता एवं कार्यकर्तालाई पनि राष्ट्रियताप्रति इमान्दार बन्न दबाब दिने आशा राखेकी छु’ उनले भनिन् ।

जोशी र शाहसहित गीतमा गौरी मल्ल, करिश्मा मानन्धर, निर्मल शर्मा, राजाराम पौडेल, दीपाश्री निरौला, दिनेश डीसी, नम्रता सापकोटा, नीराजन प्रधान, प्रशान्त ताम्राकार, आकाश श्रेष्ठ, उषा खड्गी, दिलिप रायमाझी, अनु शाह, छुल्ठिम गुरुङ, धिरेन शाक्य, सम्राट सापकोटा लगायत ३० भन्दा बढी कलाकारले अभिनय गरेका छन् । रामशरण उप्रेतीद्धारा छायांकन गरिएको भिडियोमा विक्रम स्वाँरको नृत्य निर्देशन छ ।

हेर्नूस गीत :

हलिउड अभिनेता एवं क्यालिफोर्नियाका पूर्वगर्भनर आर्नोल्ड स्वार्जनेगरले डोनाल्ड ट्रम्प इतिहासकै खराब राष्ट्रपति भएको टिप्पणी गरेका छन् । एक भिडियो सन्देश जारी गर्दै उनले सबै अमेरिकीले जो बाइडेनलाई नयाँ अमेरिका निर्माणका लागि सहयोग गर्नुपर्ने बताए ।

‘हालै भएको एउटा नाटकबाट हामी सबैले आफूलाई मुक्त गर्नुपर्छ’ अमेरिकी संसद भवन क्यापिटल हिलमा डोनाल्ड ट्रम्प समर्थकले हालै गरेको तोडफोडको घटनाप्रति संकेत गर्दै हलिउड अभिनेताले भने, ‘हामी अब एकताबद्ध हुनुपर्छ । कुनै डेमोक्र्याट वा रिपब्लिकनको रुपमा हैन ।’ दोस्रो विश्वयुद्धपछि अष्ट्रियामा मौलाएको झूठ र असहिष्णुतामा आफ्नो बाल्यकाल बितेको स्मरण पनि उनले गरे ।

My message to my fellow Americans and friends around the world following this week’s attack on the Capitol. pic.twitter.com/blOy35LWJ5

— Arnold (@Schwarzenegger) January 10, 2021

उनले क्यापिटल हिल आक्रमणलाई हिटलरको नाजी सेनाले यहुदी समुदायमाथि गरेको आक्रमणको रुपमा व्याख्या गरे । उक्त आक्रमण अमेरिकी आधारभूत मूल्य र मान्यताविरुद्ध भएको समेत आर्नोल्डको भनाइ छ । दोस्रो विश्वयुद्धको दौरान नाजी पार्टीको सदस्यको रुपमा आफ्ना पिता रहेको र उनको भूमिकालाई आफूले नजिकबाट नियालेको आर्नोल्डले उल्लेख गरेका छन् ।

कुनैबेला रिपब्लिकन सांसद समेत रहेका आर्नोल्ड भन्छन् –राष्ट्रपति ट्रम्पले चुनावी नतिजालाई उल्ट्याउन खोजेका छन् । उनले आफ्ना झूठको सहाराद्धारा नागरिकलाई गलतरुपमले निर्देशित गरिरहेका छन् । राष्ट्रपति ट्रम्प असफल नेता हुन् । मेरा पिता र म समेत झूठले गाइडेड थियौं । मलाई थाहा छ सत्य कहाँ लुकेको हुन्छ ।’

आर्नोल्डसहित हलिउड सेलेना गोमेज, मार्क रफेलोसहितका हलिउडका अन्य कलाकार समेत ट्रम्पविरुद्ध उत्रिएका छन् । फेसबुक, ट्वीटर र इन्स्टाग्रामले त अनिश्चितकालसम्म ट्रम्पलाई आफ्नो प्लेटफर्मबाट निलम्बित गरिसकेका छन् ।

सरकारले हल खोल्ने अनुमति नदिएपछि निर्माता एवं अभिनेता शिव श्रेष्ठलाई माघ १ गते घोषित फिल्म ‘एउटा यस्तो प्रेम कहानी’ रिलिज गर्ने वा नगर्ने दोधार थियो । यसका लागि उनले आइतबार प्रधानमन्त्री केपी शर्मा ओलीलाई पनि भेटे । तर, सोही दिन बसेको मन्त्रिपरिषद् बैठकले हल संचालनलाई सर्तसहित फुकुवा गर्ने निर्णय गरेको छ । यो निर्णयपछि श्रेष्ठ ढुक्कको साथ फिल्म रिलिज गर्न पाइने कुराले खुशि छन् ।

प्रधानमन्त्रीसँगको भेटमा श्रेष्ठले हल फुकुवा गर्नुपर्ने र थलिएको फिल्म क्षेत्रलाई उकास्न सरकारी भूमिकाको अपेक्षा गरिएको बताएको थिए । नेपाल प्रेससँग कुरा गर्दै श्रेष्ठले प्रधानमन्त्री ओली फिल्म क्षेत्रलाई लिएर गम्भिर भएको आफूले महसुस गरेको बताए । सोही भेटमा श्रेष्ठले आफ्नो फिल्म हेर्न आउन ओलीलाई निम्तो समेत दिएका छन् । जवाफमा प्रधानमन्त्रीले समय मिलाएर आउने वचन दिए ।

प्रधानमन्त्री र मन्त्रीलाई फिल्म देखाउन शिवले प्रिमियर समेत आयोजना गरेका छन् । सरकारले बाटो खुला गरिदिएपछि अब भने शिवलाई दर्शक आउने हुन् वा होइनन् भन्ने चुनौति थपिएको छ । किनभने, फिल्म हल बन्द भएको १० महिना बितिसक्यो र ५० प्रतिशत अकुपेन्सीमा मात्र फिल्म देखाउन पाइने सरकारी निर्देशन छ । व्यवसायीले पुस १० गतेदेखि एकपक्षीय रुपमा हल खोलेपनि दर्शकीय अकुपेन्सी करिब जिरो नै थियो ।

मन्त्रिपरिषद्ले नै निर्णय गरेपछि भने अब निर्मातालाई ढुक्कसाथ फिल्म छायांकन गर्न र प्रदर्शकलाई फिल्म देखाउन सजिलो भएको छ । नेपाल प्रेससँग कुरा गर्दै वितरक गोपाल कायस्थले सरकारी निर्णयपछि अब फिल्मले रिलिज डेट घोषणा गर्ने बताए ।

केही समयदेखि बलिउडमा एउटा हल्ला थियो –ऋतिक रोशन र दीपिका पादुकोण एक नयाँ फिल्मका लागि टीमअप गर्दैछन् । यो हल्ला अहिले यथार्थमा परिणत भएको छ । आइतबार बर्थडे मनाएका अभिनेताले दीपिकासँग नयाँ फिल्म ‘फाइटर’मा सहकार्य गर्न लागेको पुष्टि गरेका छन् ।

निर्देशक सिद्धार्थ आनन्दले समेत प्रोजेक्टबारे खुलासा गरे । अभिनेता रोशनले सामाजिक संजालमा फाइटरबारे जानकारी दिँदै मोसन पोस्टर र एउटा मीठो सन्देश दिएका छन् । लकडाउनअघि ऋतिकको फिल्म ‘वार’ले नेपाली बक्सअफिसमा समेत राम्रो प्रदर्शन गरेको थियो ।

निर्देशक सिद्धार्थ आनन्दको कम्पनी मारफिल्क्सले फिल्म निर्माण गर्ने भएको छ । यो एक्सन ड्रामामा दीपिका ऋतिककी लभलेडी बन्नेछिन् । निर्देशक आनन्दसँग काम गर्न पाउँदा ऋतिकले उत्साह व्यक्त गरेका छन् ।

भारतीय क्रिकेट कप्तान विराट कोहली र अभिनेत्री अनुष्का शर्माले पुत्रीलाभ गरेका छन् । यी दुईले एक विज्ञप्ती जारी गर्दै पुत्री लाभ गरेकोमा खुशि बाँडेका छन् । उनीहरुले आफूहरुको लागि प्रार्थना गर्ने सबैलाई धन्यवाद दिएका छन् ।

सरकारले १० महिनादेखि बन्द रहेका फिल्म हललाई खुलाउने निर्णय गरेको छ । कोभिड संकट व्यवस्थापन केन्द्र (सीसीएमसी)को सिफारिसमा आइतबार बसेको मन्त्रिपरिषद् बैठकले स्वास्थ्य मापदण्ड अपनाएर हल खुलाउन दिने निर्णय गरेको हो ।

नेपाल प्रेससँग कुरा गर्दै एक मन्त्रीले फिल्म हल खुलाउने निर्णय भएको जानकारी दिए । सरकारले अनुमति नदिएपनि व्यवसायीले पुस १० गतेदेखि एकपक्षीय रुपमा हल खुलाएर फिल्म प्रदर्शन गर्दै आएका थिए । ‘अर्को निर्णय नहुँदासम्म अहिलेलाई स्वास्थ्य मापदण्ड पुरा गरेर हल खुलाउने निर्णय भएको छ’ ती मन्त्रीले भने ।

यसैगरि, बन्द भएका नाटक घर माघ १ गतेदेखि खुल्ने भएका छन् । सिल्पी थिएटरले उक्त दिनमा ‘६ पात्रको एकलाप’ नामक नाटक मंचन गर्दैछ ।

बरिष्ठ गीतकार भैरवनाथ रिमाल ‘कदम’को शनिबार बेलुका निधन भएको छ । ८६ वर्षिय मुर्धन्य गीतकारको चावहिलस्थित घरमा निधन भएको पारिवारिक स्रोतले जनाएको छ । उनी लामो समयदेखि अल्जाइमर रोगले पीडित थिए ।

उनको चर्चित गीत ‘जुन फूल मैले चाहेको थिएँ, कसैले टिपेछ’ नेपाली संगीतको कालजयी गीतमध्ये एउटा हो ।

अभिनेत्री करिश्मा मानन्धरले ‘यात्रा आफ्नै गाउँ ठाउँको’ कार्यक्रम लन्च गर्दै समाजसेवामा पाइला चालेकी छन् । यो कार्यक्रमअन्तर्गत यसैसाता उनले आफूले तीन कक्षासम्म पढेको सिन्धुपाल्चोकस्थित एक स्कुलमा छात्रवृत्ति सहयोग प्रदान गरिन् ।

सिन्धुपाल्चोक उनको मामाघर पनि हो । दुईजना विपन्न बालबालिकाले करिश्माले प्रदान गरेको छात्रवृत्तिमा अध्ययनको अवसर पनि पाएका छन् । शनिबार नेपाल प्रेससँग कुरा गर्दै उनले आफूले यात्राको क्रममा देखेका र आवश्यक ठानेका व्यक्ति र समुदायलाई सामाजिक सहयोग प्रदान गर्ने बताइन् । ‘सिन्धुपाल्चोकबाट अभियान थालेकी हुँ’ उनले भनिन्, ‘नेपालभर जहाँ पुग्छु, जरुरी भएको ठाउँमा सहयोग गर्नेछु ।’

अभिनयबाहेक पनि करिश्मा समाजसेवामा पहिल्यैदेखि सक्रिय छिन् । उनले चाँडै यो कार्यक्रमबारेको ब्लग पनि सार्वजनिक गर्ने तयारी गरेकी छन् ।

सरकारी आदेशलाई अवज्ञा गर्दै नेपाली सिनेमा घरहरुले हलिउड फिल्म ‘मन्स्टर हन्टर’ रिलिज गरेका छन् । संचार मन्त्रालयले मन्त्रिपरिषद्को निर्णयविना नयाँ फिल्म रिलिज नगर्न विहिबार चलचित्र विकास बोर्डलाई निर्देशन दिएको थियो । मन्त्रालयको आदेश आएपछि फिल्म हलहरुले बक्सअफिसको सेन्ट्रल सर्भर कोड प्रयोग विनै फिल्म चलाएका हुन् । यो कोड नहुँदा कर प्रणालीमा फिल्मको सूचना जाँदैन ।

क्यूएफएक्स, मिटडाउन, बिग मूभिज लगायतका ठूला मल्टिप्लेक्सले शुक्रबार बिहानैदेखि फिल्म चलाएका हुन् । नेपाल प्रेससँग कुरा गर्दै ती हलका प्रतिनिधिले चलचित्र संघको निर्णयअनुसार फिल्म रिलिज गरेको बताए । सरकारले फिल्म रिलिज नगर्न भनेपनि व्यवसायीले एकपक्षीय रुपमा हल खोलिरहेका छन् । चलचित्र विकास बोर्डका अध्यक्ष दयाराम दाहालले आफूहरुको आदेशलाई अटेर गर्दै हलले फिल्म चलाएको सूचना पाएको बताए ।

‘यसबारेमा आइतबार सीसीमएसीको निर्णय लिएर मुख्य सचिवसँग छलफल हुनेछ’ दाहालले भने, ‘त्यसपछि के हुन्छ, त्यही अनुसार अघि बढ्नेछौं ।’ कोभिड संकट व्यवस्थापन केन्द्र (सीसीएमसी)ले चाहिँ हल र विद्यालय खुलाउनेबारे कुनै निर्णय नभएको जनाउँदै छलफलको प्रक्रियामा रहेको बताएको छ । सरकारले हल खोल्ने अनुमति नदिँदा ढुक्करुपमा फिल्मको गतिविधि संचालन हुन सकेको छैन ।