Category: कलाप्रेस

काठमाडौं । सुटुक्क विवाह गरेर अमेरिका उडिसकेपछि चर्चित मोडल रश्मी तामाङले विवाह गरेको खुलासा भएको छ । बैशाख १२ गते गोरखाका अनिल राना मगरसँग विवाह गरे पनि उनले विवाह गरेको कुरा उनि अमेरिका पुगिसकेपछि मात्रै खुलासा भएको हो ।

रश्मीले आफुभन्दा ५ वर्ष कान्छा अनिलसँग विवाह गरेकी हुन् । सबैजसोले विवाह गर्दा आफु भन्दा बढी उमेरको व्यक्तिसँग विवाह गर्न खोज्दा उनले भने कम उमेरका व्यक्ति राेजेकी छन् । किन भन्ने नेपाल प्रेसकाे प्नश्नमा उनले भनिन्, ‘यस्तो सोच भनेको नेपालमा मात्रै हो । यतातिर त्यस्तो केही पनि सोच हुदैन । मलाई पनि त्यस्तो केहि पनि लागेन । मलाई धेरै माया गर्ने मान्छे पाए, योग्य मान्छे पाए, यसैमा खुसी छु । उमेरले केहि पनि फरक पार्दैन ।’

अमेरिकाको क्लोराडोमा बस्दै आएकी रश्मी करिव ३ महिना अघि मात्र नेपाल आएकी थिइन् । उनले भनिन्, ‘नेपाल आउदाँ त्यस्तो विवाह नै गर्ने याेजना थिएन् । तर एकाएक विवाह गर्ने निर्णयमा पुगियो ।’ आफुले सामान्य तरिकाले हल्ला नगरेर विवाह गर्ने सोचेर गरेपनि अहिले भने जताततै हल्ला फैलिएको उनले बताइन् ।

उनले भनिन्, ‘मैले विवाह गरेको एक साता मात्र वितेको थियो । अन्तरािष्ट्रय उडान बन्द गर्ने सरकारले निर्णय गर्यो । धेरै लम्बिएला भनेर काम पनि भएकाले चाडै फर्किए ।’ आफुले आफ्नो विवाह भएको कुरा सार्वजनिक नगर्ने सोच राखेपनि एक जना साथीले गर्दा सार्वजनिक भएको उनले बताइन । ‘एक जना साथीले खै तिम्रो विहेको फोटो भनेर माग्नुभयो । अनि फेसबुकमा हालेर बधाइ दिनुभएछ । त्यसपछि त जताततै फैलिहाल्यो ।’ उनले भनिन् ।

उनले विवाह गरेको सार्वजनिक भएपछि सामाजिक सञ्जालमा बधाइको ओइरो नै लागेको छ । किन विवाह सुटुक्क गर्नुभएको भन्ने प्रश्नमा उनको जवाफ छ, ‘कोरोनाको महामारी भएकाले हामीले मगर परिवारको सस्कृति अनुसार नै विवाह गर्यौ । अवस्था त्यस्तै भएकाले सुटुक्क गरेको हो । अब अवस्था सामान्य भयो भने नेपाल फर्किएर साथीभाइलाई पार्टी दिनेछु ।’

केहि समय अघि लोकदोहोरी गितको म्यूजिक भिडियोमा उनले राज गर्दै आएकी थिइन् । तर, पछिल्लो समय अमेरिकमा रहेकाले उनका म्यूजिक भिडियो बजारमा आउन बन्द हुन थालेको छ । आफु पछिल्लो समय बाहिर पनि बसेको र बिस्तारै मोडलिङ क्षेत्रबाट बाहिरिने सोचमा रहेको उनले बताइन ।

किन भन्ने प्रश्नमा उनले भनिन्, ‘यो मोडलिङ गर्ने समय भनेको धेरै होइन, १५–१६ वर्षदेखि त्यहि बढीमा ३० वर्षसम्म हो । मैले त्यो उमेर पुरा गरीसके । अब मेरो त्यसमा भविष्य छैन । त्यसैले त्यता झुण्डिएर मैले समय बर्वाद गर्नुहुदैन भन्ने लागेको छ ।

लोक तथा दाेहाेरी गीतका म्युजिक भिडियोको लोकप्रिय मोडल रश्मीले ६ सय बढी गीतमा मोडलिङ गरेकी छन् भने  र तामाङ भाषाका गित र चलचित्रमा समेत अभिनय गरिसकेकी छन् ।

काठमाडौं । फुलबुट्टे सारी, टाढा भएपनिजस्ता हिट ट्रयाकपछि पल शाह र मलिका महत फिचर्ड नयाँ गीत ‘आँखामा आउने सपनी’ शनिबार इन्टरनेट रिलिज भएको छ ।

केन्द्र मोसन पिक्चर्सले यी दुई जोडीलाई आफ्नो नयाँ गीतमा प्रस्तुत गरेको हो । एकदेव लिम्बुद्वारा संगीतबद्ध फिमेल भर्सनमा सुनिता थेगिमको स्वर छ । शान थापाले भिडियो निर्देशन गरेका हुन् ।

पल र मलिकाले अभिनय गरेका पछिल्ला म्युजिक भिडियोलाई दर्शकले रुचाएका छन् । निर्माता कम्पनी केन्द्र मोसन पिक्चर्सले पनि आगामी ६ महिनासम्म अन्य कम्पनीको उत्पादनमा संलग्न हुन नपाउने गरी पल र मलिकालाई अनुबन्धित गरेको थियो ।

हेर्नूस भिडियो :

मुम्बई । बलिउड अभिनेत्री कंगना रनावतलाई कोरोनाभाइरस संक्रमण पुष्टि भएको छ ।

हिमाञ्चल प्रदेशको भ्रमणमा निस्कनुअघि आफूलाई भाइरस पुष्टि भएको उनले जनाएकी छिन् ।

पजेटिभ पुष्टि भएपछि आफूलाई क्वारेन्टिनमा राखेको जानकारी उनले दिएकी छिन् । क्वारेन्टिनमा आफूले भाइरसलाई नष्ट गर्ने प्रतिबद्धता पनि उनले व्यक्त गरेकी छिन् ।

काठमाडौं । पछिल्लो समय सामाजिक संजालमा टिप्पणी गरेकै भरमा सेलेव्रिटी विवादमा तानिने गरेका छन् । कतिपय सेलेव्रिटीले आफूतिर ध्यान तान्ने टाइपका स्टेटस र तस्विर पोस्ट गर्ने गरेपनि केही सेलेव्रिटीले चाहिँ सरकारी भूमिकालाई लिएर टिप्पणी गर्ने गरेका छन् ।

अभिनेता दीपकराज गिरी सामाजिक संजालमा सक्रिय हुनेमध्येका एक कलाकार हुन् । उनी समसामयिक विषयवस्तुमा आफ्नो धारणा राख्नेमध्ये पर्छन् । उनी पछिल्लो समय राजनीतिक अस्थिरता र कोभिड महामारीबारे वाचाल लाग्छन् ।

शुक्रबार फिल्म निर्माता एवं अभिनेता गिरीले एउटा लामो स्टेटस फेसबुकमा पोस्ट गरे । जहाँ उनले कोभिड कालभर आफ्नै सामाजिक संजालमा घोचपेच र व्यंग्य नगर्ने प्रतिबद्धता समेत व्यक्त गरेका छन् ।

उनी लेख्छन्- अतः जबसम्म कोभिड महामारीसँगको हाम्रो लडाइ जारी रहनेछ । तबसम्म म व्यक्तिगतरुपमा फेसबुकमा यो वा त्यो समूहलाई घोचपेच, व्यंग्य र नकारात्मक कुराहरुलाई बन्द गरेर सकारात्मक कुराहरु मात्रै पोस्ट गर्ने प्रण गर्छु ।’

दीपकले यसवर्ष व्यक्तिगत सुधारमा समय दिने समेत बताएका थिए । उनले आफ्नो गाउँ चन्द्रागिरीको दहचोकमा फिल्म स्टुडियो निर्माणको तयारी पनि थालेका छन् ।

काठमाडौं । आउँदो साता अमेरिकामा हुन लागेको मिस युनिभर्स प्रतियोगितामा नेपालले हिमाल आरोहीको स्वरुप झल्कने पोशाक प्रस्तुत गर्ने भएको छ ।

६९ औं मिस युनिभर्समा नेपालले ‘ओडी टु माउन्टेन’ थिममा बनेको आरोही पोशाक प्रस्तुत गर्ने भनेको हो । मिस युनिभर्सकी नेपाल निर्देशक नग्मा श्रेष्ठले शुक्रबार नेपालले प्रस्तुत गर्ने अफिसियल पोशाक सार्वजनिक गरिन् ।

हिमाल आरोहीबाट प्रभावित भएर शेर्पा बख्खुले बनाइएको उक्त पोशाको डिजाइन महावीर पुनले राष्ट्रिय आविष्कार केन्द्रमा गरेका थिए । मिस युनिभर्सकी प्रतियोगिता अनिष्का शर्माको थीम र बिना घलेको कन्सेप्टमा महावीरले पोशाक तयार पारेका हुन् ।

धातु र ढुंगाको मिश्रण गरिएको हेडगियर, अक्सिजन मास्क, कलर, ग्लोब्स र बुट्हरु पोशाकमा समावेश गरिएका छन् । उक्त धातु २४ क्यारेट सुनले बनेको नग्माले जनाएकी छिन् ।

पोशाको पछिल्तिर राखिएका बौद्ध प्रार्थनाको झण्डालाई चाहिँ खुला र बन्द गर्न मिल्ने गरी मोटराइज जडान गरिएको छ । थ्रीडी बटन थिचेपछि हातले पोतिएको क्यानभाष र सगरमाथाको डिजाइन हेर्न सकिने समेत जनाइएको छ ।

मे १७ तारिखमा अमेरिकाको फ्लोरिडामा हुने प्रतियोगितामा भाग लिन अनिष्का त्यसतर्फ प्रस्थान गरिसकेकी छिन् ।

काठमाडौं । भारतीय फिल्म निर्देशक अनुराग कश्यपले कोरोनाभाइरस महामारीको अवस्था सामान्य भए आफू फिल्म छायांकनलाई नेपाल आउने बताएका छन् ।

नेपाल अन्तर्राष्ट्रिय चलचित्र महोत्सव (नीफ)को भर्चुअल सत्रमा विहिबार बोल्दै उनले नेपाल आउने चाहना व्यक्त गरेका हुन् । आफूसँग हिमालमा खिच्नुपर्ने एउटा फिल्मको स्क्रिप्ट भएको र सगरमाथा आधार शिविरमा जाने चाहना भएको उनले बताए ।

आफूले अहिलेसम्म दीपक रौनियार निर्देशित फिल्म सेतो सूर्य र मीनबहादुर भामको कालोपोथी हेरेको कश्यपले बताए । संवादमा उनले दीपक र मीनको नाम समेत उल्लेख गरे ।

आफ्नो कथामाथि फिल्म बनाउन सके, आम्दानीका ढोका खुल्ने बताउँदै कश्यपले नेपाली फिल्म निर्मातालाई आफ्नो कथामा फिल्म सुझाए । धेरै मुलुकमा फिल्म क्षेत्र नै नभएको अवस्थामा नेपाली फिल्म क्षेत्र सन्तोषजनक भएको टिप्पणी उनले गरे ।

नेपाली फिल्मका लागि लगानी जुटाउन कठिन नहुने अनुरागको भनाई छ । ‘तपाईं राम्रो स्क्रिप्ट लेख्नूस, फन्डिङ जुटाउन कठिन छैन । विश्वभरिबाटै तपाईंको स्क्रिप्टमा लगानी गर्न मान्छेहरु इच्छुक हुन्छन्’ उनले भने ।

नीफका अध्यक्ष केपी पाठकको अध्यक्षतामा उद्घाटन सत्र सम्पन्न भएको थियो । चलचित्र विकास बोर्डका अध्यक्ष दयाराम दाहालले नेपाली फिल्मलाई विश्व बजारमा लैजान स्टोरी बैंक खडा गरिएको बताएका थिए ।

सो सत्रमा राष्ट्रिय योजना आयोगका सदस्य डाक्टर रामकुमार फुयाँल, निर्देशक नीर शाह, पोर्चुगलका फिल्म निर्देशक ज्वाओ पाउलो मसेदो र नेपाली फिल्म निर्देशक तुलसी घिमिरे लगायतले मन्तव्य व्यक्त गरेका थिए ।

घुम्तीमा नआऊ है
आँखा तिमी जुधाउन
बाँधिए माया फेरी
गाह्रो हुन्छ फुकाउन…

काठमाडौं । रत्नशमशेर थापाका शब्द र प्रेमध्वज प्रधानको आवाजमा बुनिएको यो सिर्जना नेपाली सांगीतिक आकाशमा गुञ्जिरहनेछ । यो ‘ब्लकबस्टर’ गीतले सन् ७० को नेपाली समाजलाई ‘रोमान्टिसाइज’ तुल्याएको मात्र थिएन, संगीत र प्रेमका दुई आयामलाई जोडिदिएको थियो ।

सोही कालजयी गीतका गायक प्रेमध्वज प्रधान अब घुम्तीमा भेटिनेछैनन् । आउने असारमा ८४ औं बर्थडे मनाउने तयारीमा रहेका प्रेमध्वजले विहिबार काठमाडौंको एउटा अस्पतालमा अन्तिम सास लिए । जीवनका ८३ बसन्त बाँचेका प्रेमध्वजले नामजस्तै जीवनमा प्रेमका ध्वजाहरु फैलाए र आफ्ना लाखौं प्रशंसकको मनमा बाँचिरहनेछन् ।

प्रेमलाई जीवन गहिराइमा अनुभूति गराउने खालका सशक्त सांगीतिक सिर्जना पस्किएका प्रेमध्वजको निधनसँगै नेपाली संगीतमा एउटा युगको अन्त्य भएको छ । सफ्ट मेलोडी अर्थात मखमली स्वरका लागि चिनिएका प्रेमध्वजको तुलना नेपाली सुगम संगीतमा तलत महमुद, मेहदी हसनसँग हुनेगर्छ ।

सिन्धुपाल्चोकको चौतारामा सन् १९३८ को जुन ६ मा जन्मिएका प्रेमध्वजको सांगीतिक यात्रा अनुकरणीय छ । मणिकरत्नसँग उनले काठमाडौंमा गरेको संघर्ष, बलिउड नगरी बम्बैको यात्रा, त्यसपछि फर्किएर नेपाली फिल्म उद्योगमा गरेको संघर्ष र हासिल गरेको सफलताका किस्सा निकै रोचक छन् ।

काठमाडौंमा घर नभएकालाई छोरी नदिने भएकाले उनका जमिनदार बाजे उत्तरध्वजले बांगेमुढाको नघलः टोलमा घर किनेका थिए राणाकालमा । जिजुबाजे नारायणकृष्ण र बाजे शाष्त्रीय संगीतका सौखिन थिए । उनका बाबु र आमा दुबै कलाकार थिए । असनमै हुर्किएकी उनकी आमा १० वर्षको उमेरमै नारायणहिटी दरबार छिरेकी थिइन् । राजा त्रिभुवनकी प्रियपात्र रहेकी उनकी आमाले दरबारमै तबला र गायनको शिक्षा पाएकी थिइन् । रेडियो नेपालमै उनले गीत गाएकी थिइन् ।

दरबारमै उनका बाबु रत्नध्वज प्रधान र उनकी आमा प्राणदेवी तुलाधरबीच भेट भयो र सोही क्रममै दुबै मायामा बाँधिए । बाजेको इच्छाविपरित ती दुबैले प्रेमविवाह गरेकाले पे्रमध्वजको बाल्यकाल सुखद हुनसकेन । किनभने प्रधान र तुलाधरबीच त छोएको नखाने सम्मको जातिय छुवाछुतको अवस्था त्यतिबेला थियो । राजा जुद्धशमशेरले उनका बुवा रत्नध्वजलाई हनुमानढोकामा बोलएर सम्बन्ध विच्छेद गर्न लगाएको सम्झन्छन् प्रेमध्वज । त्यसपछि उनी आमासँग डेरामा बस्न थाले ।

आशा भोषलेकी बहिनी उषा मंगेशकरसँग मिलेर प्रेमध्वजले फिल्म माइतीघरका लागि ‘नमान लाज यस्तरी…’ गीत गाए । यो उनको पहिलो पाश्र्वगायन थियो । पोखरामा भएको सुटिङमा माला सिन्हाले प्रेमध्वजलाई त्यतै लगेकी थिइन् । फेवातालमा बसेर मालाले प्रेमध्वजसँगै गीत गाइन् । त्यसपछि प्रेमध्वज मुम्बई हानिए ।

आमासँगै उनले त्रिताल, दादरा, कहरवा तालमा तबला बजाउन सिके । सात आठवर्षको उमेरमा उनले अक्षर चिन्न थाले । नाचगान सिकेका प्रेमध्वजले २००९ सालमै रेडियो नेपालमा स्वर परिक्षा दिए । ‘याद कसैको आइरहन्छ यो अँधेरी रातमा’ उनको पहिलो रेडियो नेपालमा रेकर्ड भएको गीत थियो । दुईवर्ष भारतमा हराएका प्रेमध्वज काठमाडौं फर्किएर पद्मोदय स्कुलमा भर्ना भए र एसएलसी पास गरे । इन्जिनियर बनाउने बाबुको इच्छा भएपनि उनले त्रिचन्द्रमा विज्ञान पढे । हैजाका कारण परीक्षा छुटेपछि उनले सरस्वती कलेजबाट आइए र बीए गरे ।

सन् २०१८मा उनले गोरेट त्यो गाउँको, माया नमार मायालु गीत रेकर्ड गरे । रत्न रेकर्डिङ स्थानले त्यतिबेला प्रेमध्वजका १२ गीत निःशुल्क रेकर्ड गरिदिएको थियो । रेडियो नेपालमा ३४० आधुनिक गीत रेकर्ड गराए उनले । राष्ट्रिय गीत, नेवारी गीत र भजन विधामा उनले गीत गाए । नेवारी भाषाको ‘बाला बाला चिगु मिखाः’ रक एन्ड रोलमा गाए उनले । उनले गाएको ‘राजमती कुमती’ हिट गीत हो । बच्चुकैलाश, नारायणगोपल र प्रेमध्वज मात्रै त्यतिबेला हिट गायक थिए । २०२३ मा माइतीघर फिल्मको छायांकनका लागि माला सिन्हा र संगीतकार जयदेव काठमाडौं आएका थिए । सोही बेला उनले टीमसँग भेटेर माइतीघर फिल्ममा गीत गाउन नाम लेखाए । अफिसबाट एक महिने बिदा लिएर उनी गीत गाउन मुम्बई हानिए ।

आशा भोषलेकी बहिनी उषा मंगेशकरसँग मिलेर प्रेमध्वजले फिल्म माइतीघरका लागि ‘नमान लाज यस्तरी…’ गीत गाए । यो उनको पहिलो पाश्र्वगायन थियो । पोखरामा भएको सुटिङमा माला सिन्हाले प्रेमध्वजलाई त्यतै लगेकी थिइन् । फेवातालमा बसेर मालाले प्रेमध्वजसँगै गीत गाइन् । त्यसपछि प्रेमध्वज मुम्बई हानिए । मालाको अनुरोधमा सत्यकामना फिल्म अवार्डमा गीत पनि गाए र चर्चा बटुले । मुम्बइमा रहँदा संगीतकार मनोहरीले प्रेमध्वजका १० गीत रेकर्ड गराए ।

सोही बेला रेकर्ड भएको हो ‘घुम्तीमा नआऊ है, टाढा टाढा, भैगयो फेरी, तारा मात्र होइन तिमीलाई । माइतीघरपछि प्रेमध्वजले अन्याय, मायालु, बदलिँदो आकाश, फेरी भेटौंला, जीवनरेखासहितका १२ फिल्ममा पाश्र्वगायन गाए । फागुन २०२८ मा उनले महावीर फुटबल क्लबकी किरणकुमारी श्रेष्ठलाई विहे गरे । ३३ वर्षे प्रेमध्वजले १६ वर्ष कान्छी किरणकुमारीसँग घरजम गरेका थिए ।

प्रेमध्वजका दुई सन्तान छन् । दुबै छोरा अमेरिकामा । जेठा छोरा प्रसन्नध्वज अमेरिकामा सफ्टवेयर इन्जिनियर हुन् भने गायक पनि । अर्का छोरा इनर्जी अमेरिकी लिगमा फुटबल खेल्ने खेलाडी हुन् ।

नेपालमा पहिलोपटक गीतार बजाउने गायकको रुपमा पनि प्रेमध्वज चर्चित छन् । उनले आफ्नोकालका स्टाइलिस र संगीतमा नयाँ प्रयोग गर्ने जमर्को गर्थे । प्रेमध्वजलाई जान्नेहरु रोमान्टिक किङ र गोल्डेन भ्वाइसको रुपमा उपमा दिन्छन् । उनले नेपालमा पहिलोपटक गीटार बजाए । अमेरिकबाट आएका चारजना फोक सिंगरहरुले नेपालमा गीटार बजाएको देखेर उनलाई पनि बजाउन मन लाग्यो । इश्वर नाम गरेका आफ्ना दाईलाई २ सय रुपैयाँ दिएर उनले गिटार मगाए । रेडियो नेपालमा रहेका रामशरण दर्नालले ४ महिना गिटार सिकाए प्रेमध्वजलाई । २०२० सालमा राष्ट्रिय नाचघरमा भएको आधुनिक गीत प्रतिस्पर्धामा उनले पहिलोपटक गिटार बजाएर गीत गाए । उनको गायकी सुनेपछि राजा महेन्द्रले सानो मेडल लगाइदिएका थिए ।

पछिल्लो छिमलको संगीतको गुणस्तरप्रति प्रेमध्वज असन्तुष्ट थिए । मान्छेको जीवनसँग नजिक हुने संगीत सिर्जनामा उनी नयाँपुस्तालाई पटक-पटक सुझाव दिइरहन्थे । उनी स्थापित गायकलाई जस्तै बाथरुम सिंगरहरुलाई पनि राम्रा गायक मान्थे । उल्टै पैसा तिरेर संचारमाध्यममा गीत बजाउनुपर्ने बाध्यताप्रति प्रेमध्वज अन्तुष्ट थिए ।

प्रेमध्वज भर्सटाइल अवधारणा राख्ने मान्छे थिए । पछिल्लो छिमलका कलाकारहरु भर्सटाइल हुनुपर्छ भन्ने उनको सोच थियो । हुनसक्छ यही कारण उनले भजन गाए । नेवारी गीत गाए र आधुनिक गीत गाए । जग्गा जमिनलाई लिएर उनको लामै समय मुद्दा चल्यो । मुद्दाको कारण उनले लामो समय संगीतमा समय दिन सकेनन् । जीवनको यो दुःखजिलो क्षणमा उनलाई अमेरिका पसूँ कि भन्ने सोच आयो । तर, उनले हरेश खाएनन् । जेजस्तो दुःख आइपरे पनि उनले नेपालमै रहेर संगीत बाँच । पछिल्लो समय अमेरिकी सपना देख्ने आधुनिक पुस्ताका लागि यो एउटा ठूलो नैतिक र प्रेरणादायी शिक्षा हो ।

संगीतको बदलिँदो आयामप्रति प्रेमध्वजको आफ्नै दृष्टिकोण थियो । उनी भन्थे- पहिले हामी लाइभ गाउँथ्यौं । पहिला सीमित कलाकार थियौं । अहिले लाखौंको संख्यामा पुगिसके । अहिले एक किसिमले राम्रो पनि छ र नराम्रो पनि छ । आजकलका गीतसंगीत राम्रो त छन् तर धेरैजसो मनभित्र पस्दैनन् । अहिले लाइफ फास्ट छ । सबैकुरा फास्ट छ ।’ पछिल्लो छिमलको संगीतको गुणस्तरप्रति प्रेमध्वज असन्तुष्ट थिए । मान्छेको जीवनसँग नजिक हुने संगीत सिर्जनामा उनी नयाँपुस्तालाई पटक-पटक सुझाव दिइरहन्थे । उनी स्थापित गायकलाई जस्तै बाथरुम सिंगरहरुलाई पनि राम्रा गायक मान्थे । उल्टै पैसा तिरेर संचारमाध्यममा गीत बजाउनुपर्ने बाध्यताप्रति प्रेमध्वज अन्तुष्ट थिए ।

प्रेमध्वज निधन लगत्तै उनीप्रति श्रद्धासुमनका शब्दहरु वर्षिए । लकडाउनको यो मझेरीमा उनी कुनै रकस्टारजस्तै महाप्रस्थानमा निस्किएका छन् । उनको निधनमा पत्रकार विजयकुमार ट्वीट गर्छन् :

तार चुँडियो
झंकार बाँकी छ

शरीर गयो
आवाज अमर छ

सत सत नमन्
प्रेमध्वज दाई !

काठमाडौं । फिल्म निर्माता एवं उद्यमी नरेन्द्र महर्जनलाई कोरोनाभाइरस संक्रमण भएको छ । श्वासप्रश्वासमा समस्या भएपछि उनलाई हेटौंडास्थित मदन भण्डारी स्वास्थ्य विज्ञान प्रतिष्ठानको आइसीयूमा भर्ना गरिएको छ ।

अहिले स्वास्थ्य अवस्थामा सुधार भएको जानकारी महर्जनले नेपाल प्रेसलाई दिए । उनी चर्चित नेपाली फिल्म ‘लुट’का निर्माता समेत हुन् ।

चलचित्र विकास बोर्डका पूर्वसदस्य समेत रहेका महर्जन चलचित्र व्यवसायी समेत हुन् । उनले पछिल्लो समय काठमाडौंको कीर्तिपुरमा फिल्म हल निर्माण गरिरहेका छन् ।

काठमाडौं । नेपालमा कोरोनाभाइरसको दोस्रो लहर भयावहतर्फ उन्मुख भइरहेको छ । यस्तो परिस्थितीमा नेपाली फिल्मको गतिविधि पनि अहिले पूर्णरुपमा ठप्प छ ।

फिल्म निर्माता र कलाकार अहिले घरमै फुर्सदमा छन् । कतिपय कलाकार अक्सिजन सिलिन्डर वितरणमा लागिरहेका छन् । कतिपय कलाकार कोरोनालाई छल्न विदेशतर्फ लागिरहेका छन् ।

अभिनेत्री एवं निर्देशक झरना थापा, छोरी सुहाना र उनका पति एवं निर्माता सुनिलकुमार थापाल बुधबार राती अमेरिकातर्फ प्रस्थान गरेका छन् । ‘ए मेरो हजुर ४’ छायांकनपछि उनीहरु अमेरिका लागेका हुन् ।

सरकारले विहिबार मध्यरातदेखि अन्तर्राष्ट्रिय उडान बन्द गर्ने निर्णय गरेपछि उनीहरु हतारमा त्यसतर्फ लागेका हुन् । झरनाकी छोरी अमेरिका रहेरै अध्ययन गर्छिन । थापा परिवार कोरोना साम्य भएपछि मात्र नेपाल आउने तयारीमा छ ।

काठमाडौं । बरिष्ठ गायक एवं संगीतकार प्रेमध्वज प्रधानलाई स्वास्थ्यमा समस्या भएपछि विहिबार अस्पताल भर्ना गरिएको छ ।

गायक योगेश वैद्यका अनुसार प्रधानलाई न्यूरो अस्पतालमा भर्ना गरिएको हो । छातीमा समस्या देखिएपछि उनलाई भर्ना गरिएको गायक वैद्यले जानकारी दिए ।

काठमाडौं । नेपाल अन्तर्राष्ट्रिय चलचित्र महोत्सव (निफ)को चौथो संस्करण आजदेखि शुरु हुँदैछ । भर्चुअल संस्करणमा यस वर्ष भारतीय फिल्म लेखक, निर्माता, अभिनेता र सम्पादक अनुराग कश्यपले आफ्नो अनुभव सुनाउने भएका छन् ।

‘विश्वका कथाहरुको उत्सव’ भन्ने नाराका साथ नेपालमा चलचित्र संस्कृतिको विकास गर्ने उद्देश्यसहित शुरु भएको निफ यस वर्ष भर्चुअल रुपमा सञ्चालन गर्न लागिएको नेपाल चलचित्र तथा सांस्कृतिक प्रतिष्ठानका अध्यक्ष केपी पाठकले जानकारी दिए ।

उनले भने, “नेपाली चलचित्र र चलचित्रकर्मीलाई विश्वका चलचित्र र चलचित्रकर्मीमाझ परिचित गराउने तथा चलचित्रमार्फत नेपाली कला, संस्कृति र पर्यटनलाई विश्वभरि फैलाउने गरी नेपालमा हुँदै आइरहेको अन्तर्राष्ट्रिय चलचित्र महोत्सव हो । विश्वभरि फैलिएको कोभिड-१९ का कारण हाल देश निषेधाज्ञामा रहेकाले हामीले भौतिक रुपमा महोत्सव आयोजना गर्न नसकी भर्चुअल रुपमा आयोजना गर्ने लागेका हौंँ ।”

पाँच दिनसम्म चल्ने फेस्टिभलको पहिलो दिन कश्यपले अनुभव सुनाइसकेपछि शुक्रबारदेखि अन्य गतिविधि सञ्चालन गरिने जनाइएको छ । महोत्सव यही वैशाख २७ गतेसम्म सञ्चालन हुनेछ ।

काठमाडौं । विपिन किरणको शब्द तथा रगुन रगुङ र मेलिना राईको स्वरमा नयाँ गीत ‘आफ्नोपन’ सार्वजनिक भएको छ ।

नारायण सुवेदीको कम्पोज र फणिन्द्र राईको एरेन्जमा तयार भएको गीतको भिडियोमा नवीनराज शिवभक्ति र सविता अधिकारीले मुख्य अभिनय गरेका छन् ।

भिडियोको निर्देशन नवीनराज शिवभक्तिले नै गरेका हुन् । गायक समेत रहेका नवीनराजले म्यूजिक भिडियोको निर्देशनमा आफ्नो कौशल देखाएका छन् ।

रोशन कार्कीको सिनेम्याटोग्राफीको उक्त भिडियोलाई प्रेम बलामपाकीले एडिट गरेका हुन् ।

गितको रेकर्डिङमा राजेश र साजनको भूमिका छ भने मिक्सिङमा किशोर थापाले काम गरेका छन् ।

https://www.youtube.com/watch?v=iNxFeRmOEU4

काठमाडौं । मिस युनिभर्स २०२१ मा भाग लिन मिस युनिभर्स नेपाल अनिष्का शर्मा मंगलबार अमेरिका प्रस्थान गरेकी छिन् ।

६९ औं मिस युनिभर्स टाइटलमा भाग लिन उनी त्रिभुवन विमानस्थलबाट त्यसतर्फ प्रस्थान गरेकी हुन् ।

मिस युनिभर्सको आउँदो संस्करण मे १७ तारिखमा अमेरिकाको फ्लोरिडामा आयोजना हुँदैछ ।

दिल्ली । बलिउड अभिनेत्री कंगना रनावतको ट्वीटर एकाउन्ट निलम्बित भएको छ । मंगलबार दिउँसो ट्वीटरले विवादास्पद अभिनेत्रीको ट्वीटर खातालाई हटाइदिएको हो ।

आफ्ना अभिव्यक्तिको कारण चर्चामा आइरहने कंगनाको ट्वीटर एकाउन्ट यतिबेला ससपेन्ड भएको जतिबेला पश्चिम बंगालको चुनावपछि सो क्षेत्रमा हिंसा भड्किएको छ ।

ट्वीटरमा कंगनालाई ३० लाखले पछ्याएका थिए ।

ट्वीटरले एक नोटिस जारी गर्दै कंगनाको ट्वीटर एकाउन्ट सँधैका लागि बन्द गरेको जनाएको छ ।