काठमाडौं । फिल्मी पर्दामा पछिल्लो समय रुचाइएका जोडी हुन् पूजा शर्मा र आकाश श्रेष्ठ । यी दुईको केमेस्ट्री र सम्बन्ध पर्दाबाहिर पनि उत्तिकै चर्चित छ । यी दुईले विहे गर्न लागेको गाइँगुइँ पनि चलेको थियो ।
सम्हालिन्छ कहिले मन, पोइ पर्यो काले, सम्झना बिर्सजाजस्ता फिल्ममा सँगै काम गरेपछि उनीहरुको निकटता रियल लाइफमा पनि उत्तिकै हुन थाल्यो । तर, यी दुईले प्रेम सम्बन्धलाई सार्वजनिकरुपमा कहिल्यै खुलाएनन् ।
झगडा परेमा उनीहरु केही हप्ता बोलचाल बन्द गर्थे । मन शान्त भएपछि पुनः बोलचाल सुरु हुन्थ्यो । ‘यो मित्रताको कहिल्यै अन्त्य हुँदैन’ उनीहरुले धेरैपटक मिडियासँग भनेका छन् ।
तर, बोली खस्न नपाउँदै यो जोडीको सम्बन्धमा दरार सिर्जना भएको छ । सम्बन्धमा पूर्णविराम भन्न त नमिल्ला तर, पछिल्लो परिस्थिती हेर्दा यी दुईजनाको सम्बन्धमा पक्कै खाडल सिर्जना भएको छ ।
कारण हुन् भिजे प्रकाश सुवेदी । टेलिभिजनमा फिल्मी कार्यक्रम होस्ट गर्ने सुवेदी र पूजाबीच यसअघि एक अन्तर्वार्तालाई लिएर मनमुटाव छ । गतसाता राजधानीको एक बाल आश्रममा सुवेदीले संचालन गरेको अभियानमा खाना लिएर आकाश सहभागि भएका थिए ।
अभिनेता सुलेमान शंकर इकुले संचालन गरेको बाल आश्रममा गतसाता आकाशले खाद्यान्न सहयोग वितरण गरे । उक्त कुरा मिडियामा आएपछि पूजालाई झसंग भइन् । पत्रकार ऋषि धमलासँगको हालैको एक अन्तर्वार्तामा पूजाले भनेकी छिन्, ‘फोटो देखेपछि जसरी म विवादको बेला तर्सिएको थिएँ, त्यसैगरि तर्सिएको थिएँ । मलाई त्यो घटनाले नै टर्चर भएको थियो । एकसाथ धेरै फिल्म र म्युजिक भिडियोमा काम गरेकाले म उसँग नजिक छु । तर, हामीबीच कहिल्यै प्रेम सम्बन्ध थिएन । तर आकाशले त्यो पनि नसोचेको देखेपछि मेरो मित्रता एकतर्फी रहेछ भन्ने महसुस भयो । उसँग व्यवसायिक सम्बन्ध मात्र रहेछ । दर्शकले हाम्रो जोडी चाहिँ मनपराउनुभएको हो । तर, आकाशसँग लभ गर्छु र विहे गर्छु भनेर कहिल्यै सोचिन ।’
यो घटनापछि के आकाश र पूजाबीच व्यक्तिगत सम्बन्धमा पूर्णविराम लागेको हो ? यसबारे अहिल्यै भन्नु हतारो हुनेछ किनभने यसअघि पटक-पटक झगडा भएपनि उनीहरु पुनः मिलेका छन् ।
