Category: कलाप्रेस

काठमाडौं । कलाकार दीपक मैथाने मगरले नयाँ सांगीतिक कोसेली ‘बैगुनी’ सार्वजनिक गरेका छन् । साउथ ह्यारोमा आयोजित समारोहमा तमु समाज युकेका संस्थापक अध्यक्ष चित्र बहादुर गुरुङले भिडिओ सार्वजनिक गरेका हुन् ।

बेलायतमा छायांकन गरिएको भिडिओमा कलाकार मनिष श्रेष्ठ, पूर्व मिसेस युके नेपाल आस्था जोशी, सन्तोष राई, समिर भट्टराई र अर्जुन लिम्बूको अभिनय छ । गायक प्रमोद खरेलको स्वर रहेको गीतमा मैथानेकै शब्द श्रृजना छ भने म्यूजिक र अरेन्ज बिलन थापा मगरले गरेका छन् । गुल्मीमा जन्मिएर बेलायतलाई कर्मथलो बनाएका मैथाने संगीतमा सक्रिय छन् ।

गीतको भिडिओ निर्देशन संचारकर्मी कुशल श्रेष्ठले गरेका हुन् । बेलायतका रमणीय र प्रसिद्ध स्थानहरुमा छायांकन गरिएको भिडिओमा प्रेम विछोडमा हुने भावनालाई चित्रण गरिएको छ । भिडिओलाई कलाकार मैथानेकै अफिसियल च्यानल मैथाने इन्टरटेनमेन्ट मार्फत युट्युवबाट रिलिज गरिएको हो ।

काठमाडौं । ब्रेकअपपछि आकाश श्रेष्ठ अहिले सिंगल छन् । पूजा शर्मासँग अलग भएपछि आकाश एक्लो छन् । तर, आकाशलाई प्रिज्मा खतिवडाले साथ दिने वचन दिएकी छिन् ।

स्वरुपराज आचार्य र अस्मिता अधिकारीको नयाँ गीत ‘तिम्रै नगमा गुनगुनाइरहेको…’मा यही भाव समावेश छ । आकाश, प्रिज्मा र प्रिन्सी गीतमा फिचर्ड छन् । गीत र संगीत दीपक सिलवालको छ । सोमबार यो गीतको छायांकन काठमाडौं सम्पन्न भएको छ ।

माइकल चन्दले निर्देशन गरेको यो भिडिओलाई इन्टरनेटमा रिलिज तयारी भएको छ । गीत छायांकन गर्दै यी तीनैजना कलाकारले नेपाल प्रेससँग भलाकुसारी गरेका छन् ।

हिजोआज इमोसनल गीतहरु बढी सुन्ने गरेको अनुभव सुनाउँदै आकाशले पूजासँगको ब्रेकअपबारे भने केही बोलेनन् । इमोसनल गीत कहिलेदेखि सुन्न थाल्नुभयो भन्दै पत्रकारले आकाशलाई जिस्काएका थिए । गीतलाई चाँडै युट्युवमा रिलिज तयारी छ ।

काठमाडौं । म्युजिक भिडिओ छायांकन सकेर पोखरादेखि काठमाडौंतर्फ फर्किरहेको गाडीलाई विपरित दिशाबाट आइरहेको भारतीय नम्बर प्लेटको गाडीले ठक्कर दिएको छ ।

धादिङको गजुरीमा राती साढे १ बजे भएको उक्त दुर्घटनामा एकजनाको घटनास्थलमै मृत्यु भएको छ भने ८ जना फिल्म प्राविधिक गम्भीर घाइते भएका छन् । १४ जना फिल्म प्राविधिक चढेको बा ३ ख ४०१४ नम्बरको उक्त ह्याचरलाई ठक्कर दिएको हो ।

चलचित्र प्राविधिक संघका अध्यक्ष पुष्कर लामाका अनुसार दुर्घटनामा २६ वर्षिया रेनु कुलुङ राईको घटनास्थलमै मृत्यु भएको छ । मृतक युवती म्युजिक भिडिओ निर्देशक परी कुलुङ राईकी बहिनी समेत हुन् ।

अन्य घाइतेहरुमा फिल्म प्राविधिकहरु दीर्घ गुरुङ, रमेश सुनुवार, श्याम तामाङ, विनोद लामा, नारायण गुरुङ, दीपेन्द्र थपलिया, चालक विजय र सोनी कुलुङ राई गम्भीर छन् ।

घाइते सबैको वीर अस्पतालको ट्रमा सेन्टरमा उपचार भैरहेको छ । प्राविधिक संघ नेफ्टाले उपचारमा आर्थिक सहयोग गरेको छ । ठक्कर दिने गाडीलाई प्रहरीले नियन्त्रणमा लिएको छ ।

लन्डन । अभिनेत्री जोआना लुम्लेले ब्रिटिस गोर्खाको समस्या तत्काल समाधान गर्न बेलायती प्रधानमन्त्री बोरिस जोन्सनलाई आग्रह गरेकी छिन् । बेलायती गोर्खाको अफिसियल वेबसाइटका अनुसार लुम्लेले असमान पेन्सनको नीति अन्त्य गर्न समेत भनेकी छिन् ।

७५ वर्षिया हलिउड अभिनेत्रीले दश दिनदेखि बेलायती प्रधानमन्त्रीको कार्यालय टेन डाउनिङ स्ट्रिट अघि आमरण अनसन बसेका गोर्खाहरुलाई समेत भेटेकी छिन् ।

लुम्लेले भनिन्, ‘बहादुर र इमान्दार गोर्खाहरु यसरी भोक हड्तालमा बस्नु निकै दुःखद कुरा हो । सबै गोर्खा भेट्रानहरु हाम्रो मन र मस्तिष्कमा छन् । सरकारले तत्काल माग सुन्नुपर्छ ।’

‘अन्यायलाई महसुस गर्ने यो गहिरो अनुभूतिले पक्कै पनि सम्मानित र बहादुरी आत्माहरुलाई यस्तो निर्णय गर्न बाध्य तुल्याएको हुनुपर्छ’ उनले भनिन् । सरकारले तत्काल आन्दोलनकारी गोर्खालाई भेटेर माग पुरा गर्नुपर्ने उनको भनाई छ ।

लुम्ले लामो समयदेखि गोर्खाली हकाधिकारप्रति क्रियाशिल छिन् । उनका बाबुले गोर्खा रेजिमेन्टमा रहेर लामो समय बेलायती सेनामा सेवा दिएका थिए ।

एजेन्सी । सवैको अनुमानअनुसार भारतको नेपाली सीमावर्ती क्षेत्र उत्तराखण्डको चम्पावतका पवनदीप राजन इण्डियन आइडल बनेका छन् ।

हिजो १२ घण्टासम्म चलेको सिजन १२ को फाइनल एपिसोडपछि ६ अन्तिम प्रतिस्पर्धीबीच राजनलाई विजेता घोषणा गरिएको हो ।

सुरुआतदेखि नै परिपक्व गायनका कारण पवनदीप जजहरुको मात्रै होइन देशभर लोकप्रिय भइसकेका थिए ।

चम्पावतका २५ वर्षीय राजत गायनका साथसाथै सबै प्रकारका बाजाहरु प्नि बजाउने क्षमता राख्छन् । उनको युट्युव च्यालन हेर्दा उनले नेपालमा आएर समेत प्रस्तुति दिएका छन् ।

कोरोना महामारीका कारण इण्डियन आईडलको यो सिजन पूरा १ वर्षको रह्यो । एक वर्षअघि स्वतत्रता दिवसका दिन सुरु भएको थियो ।

यसबीचमा आइडलका प्रतिस्पर्धीहरुसमेत कोरोना संक्रमित भएका थिए । पवनदीप आफैं पनि कोरोनाका कारण दुई सातासम्म आइसोलेसनमा बस्नुपरेको थियो ।

 

काठमाडौँ । ग्लोबल एनआरएन सिंगिङ आइडल–२०२१ को पहिलो संस्करणमा विश्वका विभिन्न देशबाट भाग लिएका प्रतिभामध्ये उत्कृष्ट २० जना छानिएका छन् ।

‘नेपाली कला संस्कृति संरक्षण र पहिचान, एनआरएनए दोस्रो पुस्ताको अभियान’ भन्ने नाराका साथ आयोजित ग्लोबल एनआरएन सिंगिङ आइडल सेकेन्ड जेनेरेसन सिजन–१ को गाला राउन्डको दोस्रो चरणबाट ती उत्कृष्ट २० जना छनौट भएका हुन् ।

गैरआवासीय नेपाली संघ, अन्तर्राष्ट्रिय समन्वय परिषद्, मध्यपूर्व क्षेत्रीय यूवा समितिले आयोजना गरेको प्रतिस्पर्धाको डिजिटल अडिसन अन्तर्गत ओपनिङ राउन्डको अन्तरा, सारेगमा र पियानो राउन्ड पार गर्दै छनोट भएका २५ जनामध्येबाट उनीहरु छानिएका हुन् ।

२० जना उत्कृष्ट प्रतिस्पर्धाहरूमा युवराज गुरुङ (क्यानडा), बीबी मल्ल ठकुरी (कुवेत), नरेन्द्र मल्ल (कतार) सन्देश गुरुङ (अमेरिका), गोविन्द गुरुङ (कतार), आकाश न्यौपाने ९जापान०, कविता आरबिएम (युएई), वामदेव भाट (बहराइन), सुरेन घताङ ‘शिव’ (कोरिया), किशोर लम्साल (कतार) रहेका छन् ।

त्यसैगरी, कपिल पाइजा पुन मगर (आयरल्याण्ड), सागर विश्व सेञ्चुरी (कुवेत), दीपेश सिग्देल (नर्वे), राधिका कुमारी गोले (कोरिया), रामचन्द्र राई (कतार), अमित बिष्ट (युएई), कृष्ण खबास (युएई), प्रतिक सिडब्ल्यूए परियार (बहराइन), सतिश थापा (कतार) र रेशु स्याङतान (बहराइन) उत्कृष्ट २० मा परेका छन् ।

एनआरएनए मध्यपूर्व युवा विभागका संयोजक राज रेग्मीले निर्णायकको मत र भोटिङमार्फत प्रतिस्पर्धाहरूलाई अघिल्लो चरणका लागि अघि बढाइएको बताए । एनआरएनए मध्यपूर्व युवा संयोजक राज रेग्मीको अध्यक्षतामा शुक्रबार सम्पन्न गाला राउन्डको दोस्रो चरणमा २५ जना प्रतिस्पर्धीहरुले प्रस्तुति दिएका थिए ।

गैरआवासीय नेपाली संघको काठमाडौंस्थित मुख्यालयमा औपचारिक कार्यक्रम गरेरै डिजिटल अडिसनका लागि छानिएका प्रतिस्पर्धीको घोषणा गर्ने तय भए पनि कोरोना महामारीलाई दृष्टिगत गरी भर्चुअलमार्फत गरिएको रेग्मीले बताए । रेग्मीका अनुसार ग्लोबल एनआरएन सिंगिङ आइडलमा निर्णायकको मत ६० प्रतिशत र भोटिङमार्फत ४० प्रतिशत अंक प्राप्त गर्नेछन् । सोही आधारमा प्रतिस्पर्धी अघिल्लो चरणमा प्रवेश गर्नेछन् ।

‘नेपाली कला र संस्कृतिलाई विश्वमा चिनाउनुपर्छ र गैरआवासीय नेपालीहरूलाई नेपालसँग जोड्नुपर्छ भन्ने अभिप्रायले नै हामीले ग्लोबल एनआरए सिंगिङ आइडलको आयोजना गरेका हौं,’ रेग्मीले भने । ग्लोबल एनआरएन सिंगिङ आइडलका विजेताले ७ लाख रुपैयाँ प्राप्त गर्ने छन् ।

त्यसैगरी, दोस्रो पुरस्कार चार लाख रुपैयाँ, तेस्रो पुरस्कार दुई लाख रुपैयाँ, चौथो पुरस्कार एक लाख रुपैयाँ र पाँचौं पुरस्कार ५० हजार रुपैयाँ तोकिएको छ । ग्राण्ड फिनालेमा प्रवेश पाउने ५ जना प्रतियोगीहरूलाई गीति एल्बममा गीत गाउने अवसर प्रदान गरिने छ ।

ग्लोबल एनआरएन सिंगिङ आइडलका निर्णायकहरू गायक उदय सोताङ, विजय लामा, गायिका प्रश्ना शाक्य र सुनिता दुलाल छन् ।

‘गैरआवासीय नेपालीहरू कला र संगीतप्रति प्रतिबद्ध’

गैरआवासीय नेपाली संघ एनआरएनए आइसिसीका अध्यक्ष कुमार पन्तले नेपाली भाषा, कला र संस्कृति असाध्यै धनी रहेको बताउँदै यसलाई विश्वभरि फैलाउनका लागि दोस्रो पुस्ताका गैरआवासीय नेपालीहरूको भूमिका महत्त्वपूर्ण रहने बताए । ग्लोबल एनआरएन सिंगिङको विजेता जो भए पनि कार्यक्रम सफल हुँदा सबै गैरआवासीय नेपालीहरूले जित्ने धारणा राख्दै अध्यक्ष पन्तले नेपाली संगीतको विश्वव्यापीकरणका लागि दोस्रो पुस्ताले अझै रचनात्मक कार्यहरू गर्न सक्ने धारणा व्यक्त गरे ।

त्यसैगरी गैरआवासीय नेपाली संघका उपाध्यक्ष सोनाम लामाले कला र संस्कृति देशको पहिचानसँग जोडिने भएकाले जो–जहाँ पुगे पनि यसको श्रीवृद्धिमा लाग्नु पर्ने सुझाव दिए । उपाध्यक्ष लामाले देशभन्दा बाहिर रहे पनि नेपालीहरू आफ्नो देशको कला र संगीतलाई अघि बढाउन प्रतिबद्ध छन् भन्ने पुष्टि ग्लोबल एनआरएन सिंगिङ आइडलको उपस्थितिले पुष्टि गरेको बताए ।

काठमाडौं । प्रकाश सपूतद्वारा संगीतबद्ध तीज गीत ‘कुरा बुझ्न पर्च’ यो साता युट्युवमा सबैभन्दा बढी हेरिने नेपाली गीत बनेको छ । आँचल शर्मा र स्वस्तिमा खड्का फिचर्ड गीतले महिला सशक्तीकरणको सन्देश दिन्छ । पछिल्लो सात दिनमा मात्र यसलाई युट्युवमा ५३ लाख ७० हजार ४२६ पटक हेरीएको छ भने अहिलेसम्म ५७ लाख ३१ हजार ४०९ पटक हेरिएको छ ।

सम्राट चौलागाईको स्वरमा रहेको गीत ‘सम्झिनी पानी छम्किनी’ दोस्रो सर्वाधिक हेरिने गीत बनेको छ । यो गीतलाई एक सातामा ४५ लाख ५३ हजार १९३ पटक हेरिएको छ भने कूल भ्यूज १ करोड २९ लाख ८ हजार ७३६ छ ।

मेलीना राईको स्वरमा रहेको ‘आयो तीजको लहर’ यो सातामा १८ लाख ३ हजार ४४ पटक हेरिएको छ भने कूल भ्यूज संख्या १८ लाख ३ हजार ४४ रहेको छ । रुटिन अफ नेपाल बन्दले तयार पारेको पछिल्लो सूचीमा यो साता नयाँ गीतहरु समावेश भएका छन् ।

हेर्नूस् साताको भ्यूज सूची :

१. ‘कुरा बुझ्न पर्च’ (प्रकाश सपूत)  : ५३ लाख ७० हजार ४२६

२. ‘सम्झिनी पानी छम्किनी’ (समराट चौलागाई) : ४५ लाख ५३ हजार १९३

३. ‘आयो तीजको लहर’ (मेलीना राई) : १८ लाख ३ हजार ४४

४. ‘जोखौं माया’ (मेलीना राई – विष्णु घिमिरे) : १७ लाख ४६ हजार ६४६

५. ‘बिच्च बिच्चमा–५’ ( दुर्गेश थापा) : १३ लाख ७४ हजार ७७८

https://www.youtube.com/watch?v=FKhAWKUk-xI

६. ‘तिम्रो मनमा ए कान्छा’ (निकीता थापा) : १० लाख ६४ हजार ७०७

७. ‘माया बिरानी –२’ (महेश काफ्ले) : ९ लाख ५९ हजार २९७

८. ‘सोल्टी राजाको टुम्लेट’ (प्रीति आले) : ९ लाख ४१ हजार ६२

९. ‘नाँची देउ पुतली’ (खुमन अधिकारी–सुनिता दुलाल) : ७ लाख ६३ हजार ७७६

१०. ‘कुरा काटन’ (खुमन अधिकारी)  :  ७ लाख ५ हजार १४२

काठमाडौं । गायक दुर्गा पराजुली र गायिका सुनिता थेगिमको स्वरमा रहेको पुर्वेली लोक भाका ‘मार्सी चामल’ म्युजिक भिडियो सार्वजनिक भएको छ । दुर्गा पराजुलीको शब्द तथा संगीत रहेको गीत पुर्बेली भाकामा बनेको छ ।

सुरेन्द्र बसेलले निर्देशन तथा कोरियोग्राफी गरेको ‘मार्सी चामल’ गीतको भिडियोमा स्वयम सुरेन्द्र बसेल, हरिश निरौला (कक्रोच), अञ्जली अधिकारी र जुना सुन्दासको अभिनय रहेको छ । दिनेश पराजुलीले छायाँकन गरेको भिडियोको सम्पादन विकाश धमलाले गरेका छन्।

भिडियो द डिभाइन म्युजिकको अफिसियल युट्युब च्यानलबाट सार्वजनिक भएको हो ।

रूपन्देही । पत्रकारिता र साङ्गीतिक क्षेत्रलाई मुख्य पेशा बनाएका गायक श्रीनिवास थारुले एकपछि अर्को धमाकेदार गीत ल्याएका छन्।

‘चोरी चोरी से’ बोलको गीत एक हप्ताअघि भिडिओ सार्वजनिक गरेका उनले नागपञ्चमीको दिन पारेर अर्को ‘लेहेंगावाली के चक्करमे’ गीत सावर्जनिक गरेका छन्।

उनको पहिलो गीतमा थारु सुपर स्टार नरेश चौधरी र छोटो समयमै निकै नै चर्चा बटुल्न सफल मोडल मधु चौधरीको युगल जोडीले नृत्य गरेका छन्। स्वरमा भने श्रीनिवासलाई चर्चित गायिका अन्नु चौधरीले साथ दिएकी थिइन्।

सेबिल ईन्टरटेन्मेन्ट च्यानलले निर्माण गरेको सो गीत रिलिज भएको एकसातामा २ लाख बढी पटक हेरिएको छ। गीतका निर्माता अमेरिका निवासी कलाकार तथा समाजसेवी लोकेन्द्रराज चौधरी रहेका छन्।

नागपञ्चमीसंगै थारु समुदायको गुरही पर्वको अवसर पारेर ‘लेहेंगावाली के चक्करमे’ बोलको गीत सार्वजनिक गरेको चौधरीले बताए। यो गीतमा पनि चर्चित गायिका अन्नु चौधरीले साथ दिएकी छन् । एक बर्षअघि ‘लेहेंगावाली ओए छैली’ गीतको भाग २ को रुपमा यो गीतलाई प्रस्तुत गरिएको उनले बताए।

उमेश मुस्कानको शब्द सङ्गित, केशव बडुको संगीत संयोजन रहेको गीतलाई विक्रम चौहानले निर्देशन गरेका छन्। कपिलवस्तुका विष्णु चौधरी र दाङ्ग देउखुरीकी सिरु चौधरीले यो गीतमा डेब्यु गरेका छन्। टीकटकमा निक्कै भाइरल भैरहेको यो गीत पनि सेबिल ईन्टरटेन्मेन्ट च्यानलमार्फत युट्युबमा रिलिज गरिएको छ।