काठमाडौँ । आजभन्दा ठ्याक्कै एक वर्ष अगाडि सार्वजनिक भएको गीत थियो, ‘कट्टा हान्दिन्छु’ । गायिका एलिना चौहान र गायक खेम सेन्चुरीको स्वर, खेम सेन्चुरीकै संगीत र नेत्र अर्यालको शब्दमा तयार भएको यो गीतले सांगीतिक क्षेत्र राम्रैसँग ततायो ।
गीत आफैंमा राम्रो त छ नै, तर यो गीत रातारात भाइरल हुनुको अर्को एउटा कारण पनि थियो । त्यो हो, एलिनाको ब्रेकअप । गीत रिलिजकै समयमा एलिना र उनको पूर्वपति विष्णु सापकोटाको ब्रेकअपको खबर फैलियो । गीतको शब्द उनको निजी जीवनसँग मिल्न गएपछि झनै चर्चा भयो । यही गीतले एलिनाको चर्चा दोब्बर बन्यो । मेला–महोत्सवमा उनको यही गीतको डिमान्ड हुन्थ्यो ।
सम्रगमा भन्नुपर्दा यो गीतले सबैलाई फाइदा नै पुग्यो । मोडल आश्मा विश्वकर्मा र ओवि रायमाँझीको करियरमा थप एउटा सिढी थप्ने काम गर्यो । अहिलेसम्म गीतलाई दर्शकले ४ करोड २५ लाख पटकभन्दा धेरै हेरिएको छ । त्यसैले, आर्थिक हिसाबले हेर्ने हो भने पनि निर्माताको हातमा युट्यूवबाटै राम्रो नाफा भयो ।
अहिले आएर यही कट्टा हान्दिन्छु गीतको अर्को भाग सार्वजनिक भएको छ, जसको शीर्षक छ- कट्टा हान्दिन्छु गोरे दाई ।’ यो गीतमा पनि नेत्र अर्यालकै शब्द र खेम सेञ्चुरीको संगीत छ, तर गायिका परिवर्तन गरिएकी छन् ।
एलिनाको स्वरमा यसमा छैन । अस्मिता अधिकारीले खेमलाई गायनमा साथ दिएकी छन् । गीतमा महिला आवाजको अंश पनि थोरै मात्र छ । गीतमा महिला मोडल पनि परिवर्तन गरेर आस्माको ठाउँमा उषा उप्रेती ल्याइएको छ ।
यसरी हिट गीतको सिक्वेलमा एलिना छुटेपछि विभिन्न चर्चा परिचर्चा भइरहेका छन् । खेम र एलिनाबीच सम्वन्ध राम्रो छैन भन्ने गाईंगुईं सुन्न थालिएको छ । मेला महोत्सवमा यो गीत गाउँदा आफ्नो नाम नलिएकाले एलिनासँग खेम असन्तुष्ट रहेको दावी कतिपयले गरेका छन् ।
खेमले यो विषयमा मुख खोलेका छैनन् । हालै मात्र उनको गायिका शान्ती श्रीसँग पानी बाराबार सम्बन्ध मिडियामा छताछुल्ल भएको थियो । एलिनासँग पनि मनमुटाव भएको चर्चाले खेम थप विवादमा आएका छन् ।
यता एलिनाले भने हल्लाको पछि नलाग्न भन्दै अस्मिताले गाएको गीत आफ्नो आधिकारिक पेजबाटै शेयर गरेकी छिन् । ‘कट्टा हान्दिन्छु’ बोलकै गीतमा एलिना र खेमको एउटा टिकटक भिडिओ पनि आएको छ । टिकटकमा दुवैजना प्लेनभित्र देखिन्छन् । यो टिकटकपछि भने दुईजनाको सम्बन्ध ठिकै भएको हुनसक्ने धेरैको अनुमान छ ।
यता आश्मा विश्वकर्माले भने गीतसमेत शेयर गरेकी छैनन् । निर्माण पक्षका अनुसार उनी सम्पर्कमा पनि छैनन् ।
यो गीतको निर्माण भने मोडल ओबि रायमाझीले गरेका हुन् । गीतका दुवै संस्करण उनको युट्युव च्यानलबाट सार्वजनिक भएका छन् । गीतको सिक्वेलमा गरिएको परिवर्तन र संगीतकार–गायिकाबीचको सम्बन्धलाई लिएर हामी रायमाझीसँग कुराकानी गरेका छौं ।
-केही वाक्यबाहेक गीतको शब्द सबै परिवर्तन छ । यो गीतको भाग २ हो या मेल भर्जन ?
यसलाई भाग २ र मेल भर्जन दुवै भन्न सकिन्छ । पहिला गीतमा फिमेल भनाइहरु राखिएको थियो, अहिले मेलको भनाइहरु राखेको हो । त्यही भएर केही शब्दहरु परिवर्तन छ ।
-गायिका र मोडल परिवर्तन भएको विषयमा विभिन्न हल्लाहरु सुनिएका छन् नि, के त्यस्तै हो ?
त्यस्तो केही होइन । बजारमा त जे पनि हल्ला आउँछ । हामी चारजना बिच त्यस्तो केही मनमुटाव छैन । सम्बन्ध पहिला जस्तो थियो, अहिले पनि त्यस्तै छ ।
यसमा चाहिँ खेम दाईले यो पटक केही चेन्ज गरौं भन्नुभयो । मैले पनि ठिकै छ भन्ने सोचेर केही चेन्ज गरेको हो । एक त एलिनाजी आफ्नै कामहरुमा व्यस्त हुनुहुन्थ्यो । उहाँ एकदमै व्यस्त भएका कारण पनि हामीले एलिनाको ठाउँमा अरु राखौं न त भन्ने सोचेर गायिका र मोडल परिवर्तन गरेका हौं ।
-एक्कासी खेम सेन्चुरीले गायिका परिवर्तन गरौँ भन्नासाथ तपाई तयार हुनुभयो ?
त्यस्तो होइन । एलिनाजी अलि धेरै व्यस्त भएकाले पनि अरु गायिका राखेका हौं । अस्मिताजीसँग हाम्रो पहिला ‘रमरम मरौटी’ मा पनि सहकार्य भइसकेको थियो । उहाँसँग काम गर्न सहज हुने भएकाले हामीले उहाँलाई यो गीतमा दोहोर्याएका हौं ।
-तपाइलाईं व्यक्तिगत रुपमा चाहिँ एलिनासँग केही चित्त दुखाइ छ कि छैन ?
मलाई उहाँसँग व्यक्तिगत हिसावले त्यस्तो रिस–राग केही छैन । हामी एउटै क्षेत्रको मान्छे हो, भोलि फेरि सहकार्य गर्नुपर्छ । तर गीतको कुरामा भने मलाई उहाँसँग केही चित्त दुखेको थियो । उहाँले केही समय अघि ‘कट्टासट्टा फ्याल्दिएर पेस्तोल किनेको’ भन्ने एउटा गीत गाउनु भएको थियो। यत्रो चलेको गीत, चौतर्फी नाम दिएको गीतलाई त्यसरी मोडिफाइ गरेर नगाइदिएको भए हुन्थ्यो भन्ने चाहिँ मलाई लागेको थियो । जे भएपनि यो गीतले उहाँलाई पनि राम्रै नाम दिएको थियो । त्यसरी कट्टै फ्याल्दिन्छु भनेर चाहिँ नगाइदिनु भएको भए हुन्थ्यो ।
मैले उहाँले गाउनुभएको त्यो गीत आएपछि खेम सेन्चुरीलाई पनि यसरी पो गाउनुभएछ भनेर देखाएको थिएँ । यसमा फेरि मलाई दुर्गेशजीसँग केही रिस वा चित्त दुखाइ भने हैन है । मात्र एलिनाजीले त्यसरी नगाइदिनु भएको भए हुन्थ्यो भन्ने मात्र हो ।
-आश्मा विश्वकर्मासँग पनि केही दुखेसो छ ?
उहाँसँग झन त्यस्तो केही छैन । उहाँ त सम्पर्कमै हुनुहुन्न ।
-अहिले कस्तो छ उहाँहरुसँगको सम्बन्ध ? गीत आएपछि कुरा भयो ?
आश्माजी सम्पर्कमा हुनुहुन्न । एलिनाजीले भने गीत आएपछि कल गर्नुभएको थियो । कुरा पनि भयो । उहाँले त गीत पनि शेयर गर्नुभएको छ । त्यस्तो नराम्रो केही छैन ।
-गीतको भाग २ निकालिहाल्नु पर्ने जरुरी किन पर्यो ?
खासमा अहिले गीत आएपछि धेरैले मनमुटाव भएर, सम्बन्ध बिग्रेर दोस्रो भाग निकालेको भन्नुभयो । तर मैले यो गीत मेरै लागि निकालेको हो । हुन त पहिला ‘रमरम मरौटी’, ‘कट्टा हान्दिन्छु’ गीत निस्किदा दर्शकहरुले मेरो र पर्दा पछाडीका सर्जकहरुको कामको तारिफ गर्नुभएको हो । तर गीत चलिरहँदा क्रेडिट भने अरुलाई नै गयो ।
‘रमरम मरौटी’ चल्दा सबै क्रेडिट पुजाजी (पूजा शर्मा) ले लानुभयो । ‘कट्टा हान्दिन्छु’ चल्दा त्यसको श्रेय एलिनाजी र आश्माजीले पाउनुभयो । हामीले हाम्रो तर्फबाट सिर्जना त पस्कियौं, तर हामीले जे पाउनु पर्ने हो, त्यो भने पाएनौं । त्यसैले यसपाली हाम्रो र विशेषगरी मेरो लागी मैले या गीत निर्माण गरेको हो ।
-पूजा शर्मासँगको सम्बन्ध चाहिँ कस्तो छ अहिले ?
केही छैन उहाँसँग पनि । त्यत्रो सहकार्य भयो । गीत राम्रो भयो तर अन्तिममा फ्रेन्ड रिक्वेस्ट पठाएको पनि एसेप्ट गर्नुभएन । सम्पर्क पनि छैन ।
-उषा उप्रेतीबाट कति सपोर्ट पाउनुभयो त ?
उसले त पुरै सर्पोट गरेको छ ।
-कति लगानीमा बनाउनुभएको हो यो गीत ?
५ लाखको लगानी हो ।
-लगानी सुरक्षित छ ?
(हाँस्दै) छैन । कहाँ हुन्छ अहिले । गीत नै भर्खर साढे ३ लाख भ्यूज त गएको छ ।
-तपाईंलाई के लाग्छ, पहिलाजस्तो यो गीत चल्छ ?
पहिलेकै जस्तो नचल्ला । त्यतिखेर माहोल नै अर्कै थियो । ठ्याक्कै गीत आउँदा कन्ट्रोभर्सी भइदियो । एलिनाजीलाई यो गीत सुट पनि गरेको थियो ।
