Category: कलाप्रेस

काठमाडौं । पूर्वमिस नेपाल तथा मोडल इशानी श्रेष्ठ र व्यापारी तरुणप्रताप शाहबीच आज राजधानीको एक पाँचतारे होटलमा टीकाटालो (इन्गेजमेन्ट) भएको छ ।

दुईतर्फका परिवार र आफन्तको केही उपस्थितीमा यी दुईजनाले औंठी साटेका हुन् । इशानीका अनुसार आगामी पुस ६ गते (डिसेम्बर २१)मा वैवाहिक कार्यक्रम आयोजना हुनेछ ।

सोल्टीमोडस्थित न्यू हायात होटलमा इन्गेजमेन्ट कार्यक्रमको आयोजना गरिएको थियो जहाँ उनीहरु निकट सेलेव्रिटी पनि उपस्थित थिए । सन् २०१३ मा मिस नेपालको उपाधि जितेकी इशानीले मिस वर्ल्डमा पहिलोपटक ब्यूटी विथ पर्पसको विधा जितेकी थिइन् ।

मिस वर्ल्डको उत्कृष्ट १० मा पुग्ने उनी पहिलो नेपाली सहभागी समेत हुन् । मिडिया उद्यमी तथा व्यवसायी तरुणले सेफड कलेज, ट्रिटन कलेज, शुभश्री कलेज संचालन गरेका छन् ।

दालमोठ उत्पादक कम्पनी हल्दिरामलाई तरुणले नै संचालन गरिरहेका छन् । इशानीले गतसाता तरुणसँग तस्बिर सेयर गर्दै पहिलोपटक उनीसँगको सम्बन्धलाई खुलासा गरेकी थिइन् ।

काठमाडौं । कीर्तिमानी नेपाली आरोही निर्मल पूर्जामाथि नेटफिल्क्सले निर्माण गरेको फिल्म ‘फोर्टिन पिक्स : नथिङ इम्पोसिबल’को विश्व प्रिमियर न्यूयोर्कमा भएको छ ।

सबैभन्दा ठूलो अमेरिकी डकुमेन्ट्री फिल्मको फेस्टिभलमा यो डकुमेन्ट्री प्रिमियर गरिएको हो । प्रिमियरमा निर्मल पूर्जासहित अहिले अमेरिकामा रहेकी पूर्वमिस नेपाल श्रृंखला खतिवडा पनि सहभागी रहे ।

सात महीनाभित्र पूर्जाले कसरी संसारका १४ अग्ला हिमालको सफल आरोहण गरे भन्ने चित्रण यसमा गरिएको छ । नेटफिल्क्समा रिलिज हुनुको दुईसाताअघि फिल्मलाई फेस्टिभलमा प्रस्तुत गरिएको हो ।

नोभेम्बर २९ मा यो फिल्म स्ट्रिमिङ हुँदैछ । प्रिमियरमा आफ्नै फिल्म हेरेपछि पूर्जाले आफू भावुक भएको र अन्य दर्शकलाई पनि भावुक भएको पाएको जनाएका छन् ।

लन्डनमा आयोजना हुने केन्ड माउन्टेन फिल्म फेस्टिभलमा समेत फिल्म प्रिमियर गर्ने निर्मलले बताए ।

काठमाडौं । सुदर्शन थापाको निर्देशनमा फिल्म ‘राजा’ बन्ने भएको छ । यो फिल्मलाई परशुराम बस्नेतले निर्माण गर्दैछन् । नेकपा एमालेका यूवा नेता समेत रहेका बस्नेतले पहिलो पटक फिल्ममा लगानी गर्न लागेका हुन् । उनी, नेपाल खेलकुद महासंघका वरिष्ठ उपाध्यक्ष तथा प्रदेश नम्बर १ खेलकुद विकास बोर्डका कार्यकारी प्रमुख सदस्य सचिव समेत हुन् ।

फिल्म ‘राजा’मा एक्सनलाई प्राथमिकताका साथ प्रस्तुत गरिने सुदर्शनले बताए । लभस्टोरी फिल्ममा जमेका सुदर्शनले अब एक्सन जनराको फिल्म पनि निर्देशन गर्नेछन् । यो फिल्ममा राज कटुवालको मुख्य भूमिका रहनेछ । अन्य कलाकारको छनोट कार्य जारी रहेको थापाले बताए । राजले केही नेपाली चलचित्र र म्यूजिक भिडियोमा अभिनय गरिसकेका छन् ।

फिल्म राजाको कथालाई शिवम् अधिकारीले लेखिरहेका छन् । माघको दोस्रो साताबाट फिल्मको छायांकन सुरु गरिने निर्माणपक्षले बताएको छ । सुदर्शनले निर्देशन गरेको फिल्म ‘म यस्तो गीत गाउँछु २’ माघको १९ गतेबाट रिलिज हुँदैछ । सुदर्शनले फिल्म ‘मेरो एउटा साथी छ, मेरो लभ स्टोरी, प्रेमगीत, म यस्तो गीत गाउँछु’ जस्ता सफल प्रेम कहानी निर्देशन गरिसकेका छन् ।

काठमाडौं । अहिले मुस्ताङको नाउरीकोटमा ‘कबड्डी-४’ फिल्मको छायांकन भैरहेको छ । फिल्मको मुख्य सेटिङ पनि यही वरपरको क्षेत्र हो । एक महीनादेखि अहिले टुकुचे, लार्जुङ र नाउरीकोटमा फिल्म सुटिङ भैरहेको छ ।

आइतबार पनि नाउरीकोटको लार्जुङ थकाली होटलमा एक्सन-क्ट भैरहेको थियो । वीके छन्त्याल र रेखा पात्रबीचको दृश्य सुटिङ भैरहेको थियो । दिउँसो साढे १० बजे नाउरीकोटको शिरानमा रहेको मानापाथी हिमालबाट हिमपहिरो खसेपछि माहौल अत्यासलाग्दो भयो ।

ठूलै पहिरो खस्न थालेपछि चल्दै गरेको सुटिङ रोकेर कास्ट एन्ड क्रिउले हिमपहिरो खस्दै गरेको दृश्य खिच्न थाले । आइतबार फिल्म सुटिङ रोकेर अपरान्हमात्र त्रासको मनोविज्ञानमा त्यसलाई निरन्तरता दिइएको थियो ।

‘बिहानैदेखि सानोतिनो हिमपहिरो खसिरहेको थियो । हामीले वास्ता गरिरहेका थिएनौं । तर, साढे १० बजेतिर एक्कासी ठूलो पहिरो खसेपछि भने हामी झसंग भयौं । माहौल अत्यासलाग्दो भयो । केही पर रहेको स्कुलका शिक्षक र विद्यार्थी भाग्न थाले’ त्यहाँको दृश्यको वर्णन गर्दै अभिनेता विजय बरालले नेपाल प्रेसलाई भने ।

‘माहौल अत्यासलाग्दो भएपछि सुटिङ रोकियो । हामी बसेको लार्जुङ थकाली होटलसम्म हिमपहिरोको मुस्लो आइपुगेको थियो । केही दिन पहिलो मात्र हामीले हिमपहिरो खसेको ठाउँमै सुटिङ सकेका थियौ । त्यहाँ सकेर हामी होटलतिर आइपुगेका थियौं । यतिबेला विके छन्त्याल र रेखाको सिन खिच्ने काम भैरहेको थियो’ उनले भने ।

निर्माता मणिराम पोखरेलले पनि त्रासमा फिल्म छायांकन गर्नुपरेको बताए । ‘सो दिन आधा दिनको सुटिङ त्रासको माहौलमा भयो । केही दिनअघि मात्र हामै्र फिल्ममा अभिनय गर्नुभएका स्थानीय स्कुलका विद्यार्थी पनि भागदौडमा घाइते हुनुभएको छ । त्यो देख्दा हामीलाई दुःख लागेको छ’ पोखरेलले नेपाल प्रेसलाई भने, ‘कैंयन घाइते हुनुभयो, धेरै चौंरी पुरिए । निकै दुःख लाग्दो स्थिती रह्यो ।’

फिल्मको सिनेम्याटोग्राफरले हाइ रिजोलुसन क्यामेराबाटै हिमपहिरोको दृश्य खिचेर सुरक्षित राखेको र फिल्मको मेकिङ अथवा फिल्मभित्रै पनि त्यो दृश्य राख्न सकिने जानकारी निर्माता पोखरेलले जनाए ।

अझै १० त्यहाँ रहेर कबड्डी फिल्मको छायांकन हुनेछ । अहिले कास्ट एन्ड क्रिउसहित २ दुईदर्जन भन्दा बढी कबड्डी टोली मुस्ताङमा छ ।

काठमाडौं । पल-समीक्षा विवादको असर फिल्म ‘सत्यम’को कलाकार समीकरणमा देखिएको छ । पल शाहको जोडीको रुपमा कास्ट गरिएकी अभिनेत्री मलिका महत प्रोेजेक्टबाट बाहिरिएकी छिन् ।

फिल्मबाट मलिकाको बहिर्गमनलाई पल शाहको पछिल्लो विवादबाट आफूलाई अलग राख्न खोजेको रुपमा उनी निकट स्रोतहरुले बुझेका छन् ।

तर, फिल्म निर्माण कम्पनीलाई मलिकाले आफूले यस्तो निर्णय लिनु पछाडि सुरु भएको कलेजको पढाइ र समयतालिकालाई कारणको रुपमा पेश गरेकी छिन् । निर्माता रेशम सापकोटाले मलिकाले फिल्म छाड्नुको कारण पढाइ नै रहेको दावी गरे ।

बिग बजेट र स्टारकास्ट भएको फिल्म छाड्ने मलिकाको निर्णय यस्तो समयमा भएको छ जतिबेला पल शाह र गायिका समिक्षा अधिकारीबीचको ‘सम्बन्ध’को विवाद उत्कर्षमा छ ।

मलिकाले फिल्म छाडेपछि उनको ठाउँमा उपासनासिंह ठकुरीलाई निर्माताले अनुबन्धित गरेका छन् । अब पलसँग उपसनाले स्क्रिन रोमान्स गर्नेछिन् । राजेश हमालको जोडीको रुपमा नीलम चन्द यसअघि नै अनुबन्धित भैसकेकी छिन् ।

शनिबार बेलुका उपासना र निर्माताबीच फिल्म सम्झौतामा हस्ताक्षर भएको छ । तर, मलिकाको बहिर्गमनप्रति निर्माण कम्पनी सन्तुष्ट देखिएको छैन ।

के मलिकाले अब पलसँग अन्य फिल्म र म्युजिक भिडिओमा पनि सहकार्य नगर्ने संकेत दिएकी हुन् ? केही स्रोतहरुले नेपाल प्रेसलाई भने, ‘हुनसक्छ, उनको असन्तुष्टि सत्यममा देखियो । पलसँग म्युजिक भिडिओमा खेल्न मानिनन् भने त्यसलाई स्वभाविकरुपमा लिँदा हुन्छ ।’

पल र मलिकाले कैंयन हिट म्युजिक भिडिओमा सहकार्य गरेका छन् । तर, यो सहकार्यको भविष्यमा सत्यम प्रकरणले प्रश्न उब्जाइदिएको छ । पल र समीक्षाको सम्बन्ध अहिले चर्चामा छ । उनीहरुले बिहे गर्न कागजी सम्झौता गरेको समाचार सुरुमा नेपाल प्रेसले लेखेको थियो ।

काठमाडौँ । मुन्द्रेको कमेडी क्लब बन्द भएको एकसाता नबित्दै विज्ञापन एजेन्सी कि एड्भर्टाइजिङले ‘फुलन्दे स्पेसल कमेडी क्लब’ निर्माणको घोषणा गरेको छ । अढाइ वर्षदेखि प्रसारण हुँदै आएको जितु नेपाल संचालित सो सोमबारदेखि बन्द भएको हो ।

जितुले पत्रकार सम्मेलन आयोजना गर्दै सो बन्द हुनुमा फुलन्देको आमा अर्थात उमेश राईलाई दोषारोपण गरेका थिए । साथै, उनले कि एडभर्टाइजिङले पनि आफूलाई धोका दिएको बताएका थिए । अब भने उमेश राई र की एजेन्सी मिलेर नयाँ सो संचालन गर्ने भएका छन् ।

नेपाल प्रेससँग कुरा गर्दै राईले पनि बिहीबारदेखि कान्तिपुर टिभीमा प्रसारण हुने डान्स रियालिटी सोको कारण आफूले समय दिन नपाउने बताएका थिए । तर, उनले बोलेको केही दिनमै की एजेन्सी र राईबीचको नयाँ टिभी सोजको योजना बाहिरिएको हो ।

किले फुलन्दे स्पेसल कमेडी क्लबबारे औपचारिकरुपमा केही उल्लेख नगरेपनि स्रोतहरुका अनुसार मुन्द्रेको कमेडी क्लब प्रसारण हुने समयमै यो नयाँ सो प्रसारण हुने तयारी भएको जनाइएको छ । पत्रिकामा विज्ञापन छाप्दै उसले यो कार्यक्रम केही समयका लागि सञ्चालन हुने पनि जानकारी गराएको छ ।

राईले आफूले जितु नेपाललाई धोका नदिएको भन्दै जानकारी गराएर नै अर्को कार्यक्रम चलाउन गएको केही मिडियालाई बताएका छन् । राई कि एजेन्सीले सञ्चालन गर्ने डान्स रियालिटी सोको उद्घोषणमा अहिले व्यस्त छन् । जितुलाई जानकारी नदिइकनै उनी त्यता लागेपछि जितु र उमेशबीच विवाद बढेको थियो ।

काठमाडौं । नायक पल शाह र गायिका समीक्षा अधिकारीबीचको ‘सम्बन्ध’ अहिले चर्चामा छ । यी दुईबीचको अफेयरलाई लिएर मिडियामा खबर आउन थालेपछि पल पत्रकारसँग चिढिन पनि थालेका छन् ।

शनिबार राजधानीमा आयोजित एक गीत लन्च कार्यक्रममा पलकै इशारामा पत्रकारलाई कार्यक्रममा प्रवेश दिइएन । पलकै निर्देशनमा सुरक्षागार्डले पत्रकारलाई ढोकाबाटै फिर्ता पठाए ।

सोल्टीमोडस्थित न्यू हायात होटलमा पल अभिनित ‘तिमीलाई हेरेर’ बोलको गीत लन्च कार्यक्रम आयोजना भएको थियो । नेपाली फिल्म र म्युजिक भिडिओको कार्यक्रममा यसरी पत्रकारलाई फिर्ता पठाइएको पहिलोपटक हो ।

कार्यक्रमको रिपोर्टिङ गर्न पुगेकी एक पत्रकारले नेपाल प्रेससँग आफूहरुलाई बेइज्जती ढंगले फिर्ता पठाइएको अनुभव सेयर गरिन् । यसअघि एक कार्यक्रममा पनि पलले पत्रकारलाई ५ घण्टासम्म कुराएर पठाएका थिए ।

गायिका अधिकारीसँगको अफेयर सार्वजनिक भएपछि पल पत्रकारबाट भाग्दै आएका छन् । गत महीना अनामनगरमा आयोजित एक कार्यक्रममा पनि गायिका अधिकारी पत्रकार सम्मेलनबाट सुटुक्क बाहिरिएकी थिइन् ।

यो पनि हेर्नूस – गसीपमा पल-समीक्षा : प्रेम, विवाद र समझदारीको अन्तरकथा

काठमाडौं । खेम सेञ्चुरी र अस्मिता अधिकारीको स्वरमा रहेको गीत ‘राम राम मरौटी’ पछिल्लो साता युट्युवमा सर्वाधिक हेरिने नेपाली गीत बनेको छ । सात दिनमा मात्र यो गीतलाई १६ लाख २१ हजार ४३९ पटक हेरिएको छ । यो गीतको कूल भ्यूज १ करोड ९ लाख ३ हजार ९३३ छ ।

भिटेनको स्वरमा रहेको गीत ‘गल्ली सडक’ दोस्रो स्थानमा छ । अघिल्ला दुई साता लगातार शीर्ष स्थानमा रहेको भिटेनको गीतलाई पछिल्लो सातामा १० लाख ८९ हजार ३२ पटक हेरिएको छ भने यसको कूल भ्यूज ३० लाख १६ हजार ४१ छ ।

प्रकाश दूतराजको स्वरमा रहेको ‘जाम भो माइली’ यो सातामा तेस्रो सर्वाधिक हेरिने नेपाली गीत बनेको छ । पछिल्लो सातामा मात्र यो गीतलाई १० लाख ५ हजार ५८४ पटक हेरिएको छ भने यसको कूल भ्यूज संख्या ६५ लाख १९ हजार ४३७ छ । रुटिन अफ नेपाल बन्दले तयार पारेको साताको सूची यस्तो छ :

१) खेम सेञ्चुरी र अस्मिता अधिकारी ‘राम राम मरौटी’ : १६२१४३९

 

२) भिटेन ‘गल्ली सडक’ : १०८९३२

 

३) प्रकाश दूतराज ‘जाम भो माइली’ : १०५५८४

 

४) खेम सेन्चुरी ‘मन परेको मान्छे’ : ९६११३४

 

५) दिनेश ढकाल ‘कालो केशमा रेलिमई’ : ७९६८६०

 

६) प्रितम पोखरेल ‘मुसी’ : ७०१७७९

 

७) महेश काफ्ले ‘माया बिरानी-२’ : ६१३३७०

 

८) सजन राज वैद्य ‘नगण्य माया’ : ४७७८४५

 

९) रचना रिमाल ‘अझै पनि’ : ४५६७६६

 

१०) मिलन नेवार ‘फूलबुट्टे सारी’ : ४१०७५१

 

काठमाडौं । अभिनेता हरिवंश आचार्यको जन्मदिनमा नयाँ बानेश्वरस्थित रेडियो अडियोको बुइँगल वर्षेनी गुल्जार बन्छ । जन्मदिनको शुभकामना दिने र केक चखाउनेको भीड थामिनसक्नु हुन्छ ।

यो दृश्य आजपनि रेडियोको बुइँगलमा देखियो । आजदेखि ६४ वर्ष लागेका कमेडी विधाका अगुवालाई बधाइ दिन हाँस्य कलाकारहरुको उपस्थिती थियो । महजोडीका म अर्थात मदनकृष्ण श्रेष्ठले अमेरिकाबाटै भर्चुअलरुपमा सहयात्रीलाई जन्मदिनको शुभकामना दिए ।

हरिवंशको मोबाइलमा ह्वाट्स एप लाइभमा जोडिएका मदनकृष्णले हरिवंशलाई दीर्घायुको कामना गरे । मनोज गजुरेल, दीपकराज गिरी, किरण केसी, शैलेन्द्र सिंखडा, राजा राजेन्द्रसहितका कमेडियनले पनि हरिवंशलाई शुभकामना दिए ।

रेडियो अडियोका प्रबन्ध निर्देशक दीपेन्द्र खनियाँले वर्षेनी जन्मदिनको कार्यक्रम आयोजना गर्दै आएका छन् । हरिवंशले सन्तोष सेनको निर्माणमा सुरु हुन लागेको फिल्म हुतुतु खेल्ने भएका छन् भने प्रदीप भट्टराईले निर्देशन गर्ने एक अनटाइटल फिल्ममा समेत उनी देखिनेछन् ।

जन्मदिनको सो अवसरमा हरिवंशले नेपाल प्रेससँग कुरा गर्दै आफ्ना आगामी प्रोजेक्टबारे खुलाए । हरिवंशलाई सामाजिक संजालमार्फत पनि प्रशंसकहरुले बधाइ तथा शुभकामना दिइरहेका छन् ।

काठमाडौं । रोहित सेठ्ठी निर्देशित बलिउड फिल्म ‘सूर्यवंशी’को गति रोकिने छाँटकाँट छैन । दोस्रो शनिबार पनि फिल्मको देशव्यापी अकुपेन्सी ८० देखि शतप्रतिशत छ ।

फिल्मको नेपाल वितरक कम्पनी व्यांकटेस इन्टरटेनमेन्टले फिल्मको पहिलो साताको औपचारिक कमाइ सार्वजनिक गरेको छ । फिल्मले पहिलो सात दिनमा ४ करोड रुपैयाँ ग्रसभन्दा बढी कमाइ गरेको कम्पनीले जनाएको छ ।

वितरकले खरिदभन्दा दोब्बर कमाइ गरेका छन् । वितरक मनोज राठीले नेपाल प्रेससँग भने, ‘हाम्रो उद्देश्य विशुद्ध फिल्मको कमाइभन्दा पनि उद्योगलाई चलायमान बनाउनु र दर्शकलाई हलसम्म फर्काउनु नै हो । हामी त्यो प्रयासमा सफल भएका छौं ।’

फिल्मको वर्ड अफ माउथ सुखद भएकाले दोस्रो साता पनि फिल्मको कमाइ स्थिर हुने अपेक्षा गरिएको राठीले बताए । कट्रिना क्याफ र अक्षय कुमारको स्टारडम र हलमा फर्कने दर्शकीय हुटहुटीले फिल्मको कमाइमा योगदान दिएको वितरकले बताए ।

‘सूर्यवंशी’ले भारतीय बक्सअफिसमा शुक्रबारसम्म १२० करोड कमाइसकेको छ ।

‘सूर्यवंशी’पछि हलिउड फिल्म इटर्नल्स र साङ्चीको कमाइ पनि उत्साहजनक रहेको मल्टिप्लेक्स संचालकले जनाएका छन् । केही समयदेखि नेपाली फिल्म रिलिज भएका छैनन् ।

काठमाडौं । गीतकार मधु पौडेलको शब्द तथा संगीतकार प्रहाल्द बोगटीको संगीत समावेश नयाँ गीत सार्वजनिक भएको छ । सार्वजनिक ‘कस्तुरी’ बोलको गीतमा सुमन केसी र प्रविशा अधिकारीले स्वर दिएका छन् ।

सुमन र प्रविशाको सहकार्य रहेको गीत ‘कति माया गर्छौ’ लाई रुचाइएको थियो । ‘कस्तुरी’को भिडिओमा पनि ‘कति माया गर्छौ’मा देखिएका अभिनेता नाजिर हुसेन र मोडल सुशिला थापा फिचर्ड भएका छन् । भिडिओमा नाजिर र सुशिला रोमान्टिक देखिएका छन् ।

शान थापाको निर्देशनमा बनेको भिडिओमा राजिव समर सहायक निर्देशकको रुपमा छन् । बुद्ध थापाले खिचेको भिडिओलाई सुप्रिम पराजुलीले सम्पादन गरेका छन् ।

काठमाडौं । भारतको पूर्वोत्तर राज्य सिक्किमले आगामी मंसिर २४ गतेदेखि औपचारिकरुपमा फिल्म पर्यटन कार्यक्रमको थालनी गर्दैछ । उक्त अवसरमा पाँच दिने ग्लोबल फिल्म फेस्टिभलको समेत आयोजना हुँदैछ ।

फेस्टिभल आयोजना हुन एक महीनाभन्दा कम समय बाँकी रहँदा मुख्यमन्त्री प्रेमसिंह तामाङ गोलेले नेपाली कलाकारसँग भेटघाटलाई तीव्रता दिएका छन् ।

उनकै निम्तोमा सिक्किम पुगेका फिल्म निर्देशक मिलन चाम्स र निर्माता एवं अभिनेता भुवन केसीले शुक्रबार बेलुका मुख्यमन्त्रीलाई भेटेका छन् । भेटमा उनले नेपाल र सिक्किमबीच सांस्कृतिक निकटता भएकाले फेस्टिभललाई सफल बनाउन सहयोग गर्न आग्रह गरेका थिए ।

भेटपछि नेपाल प्रेससँग कुरा गर्दै निर्माता केसी र निर्देशक चाम्सले ग्लोबल फिल्म फेस्टिभल सफल बनाउन मुख्यमन्त्रीले आफूहरुको सहयोग खोजेको बताए । ‘उहाँसँग फेस्टिभलकै बारेमा कुरा भयो र हामीले गर्न सक्ने सहयोगबारे भन्यौं’ निर्माता केसीले भने ।

फिल्म छायांकन गरेबापत सिक्किम राज्यले विदेशी फिल्मलाई दिने अनुदान र निकट भविष्यमा हुनसक्ने फिल्म छायांकनबारे पनि मुख्यमन्त्रीसँग कुरा भएको केसीले जनाए ।

फिल्म निर्देशक चाम्सले फेस्टिभल सफल बनाउन मुख्यमन्त्री गोलेले आफूहरुको सुझाव र सल्लाह मागेको बताए । ‘मुख्य कुरा हामी सांस्कृतिक र भौगोलिकरुपमा निकै निकट छौं’ चाम्सले भने, ‘दुई मुलुकको सम्बन्धलाई दुबै पक्षको हितमा कसरी उपयोग गर्न सकिन्छ भन्नेबारे छलफल भयो ।’

सिक्किमले यसवर्षको अन्त्यदेखि सुरु गर्न लागेको फिल्म पर्यटन कार्यक्रम अन्तर्गत त्यहाँ छायांकन हुने फिल्मलाई भारु १ करोड अनुदान दिने प्याकेज ल्याएको छ । जसअन्तर्गत ७५ प्रतिशत छायांकन सिक्किममै हुनुपर्ने र ६० प्रतिशत स्थानीय कास्ट एन्ड क्रिउ प्रयोग हुनुपर्ने प्रावधान तोकिएको छ ।

सिक्किमले सुरुआती चरणमा नेपाल र भुटानका फिल्मलाई लक्षित गर्दै यस्तो कार्यक्रम ल्याएको जनाएको छ । ‘सुरुमा हाम्रा छिमेकी फिल्म उद्योगबाट यो अभियान थालनी गर्दैछौं’ सिक्किम फिल्म प्रवद्र्धन बोर्डकी अध्यक्ष पूजा शर्माले भनिन्, ‘क्रमशः हामी विश्व फिल्महरुलाई सिक्किममा छायांकनको लागि बोलाउँदै जानेछौं ।’

भारत सरकारले यसवर्ष सिक्किमलाई उत्कृष्ट फिल्ममैत्री राज्यको रुपमा समेत पुरस्कृत गरिसकेको छ ।

काठमाडौं । बक्सअफिस चलायमान हुन थालेसँगै धमाधम नयाँ फिल्महरुले प्रदर्शन मिति घोषणा गर्न थालेका छन् । निर्देशक सुदर्शन थापाले ‘म यस्तो गीत गाउँछु २’को रिलिज मिति तय गरेको एक दिन नबित्दै अर्को फिल्म ‘सम्हालिन्छ कहिले मन’को रिलिज डेट पनि घोषणा गरेका छन् ।

पूजा शर्मा, आकाश श्रेष्ठ र सोनम तोप्देनको मुख्य भूमिका रहेको यो म्युजिकल लभस्टोरी फिल्म फागुन २७ गते (मार्च १)मा देशव्यापी प्रदर्शन हुने भएको छ । फिल्मले शुक्रबार रिलिज डेटसहितको पोस्टर सार्वजनिक गरेको छ ।

अघिल्लोपटक कोरोभाइरस संक्रमण रोकथामका लागि लागू गरिएको लकडाउनले दुईपटक फिल्मको प्रदर्शन मिति पोस्टपोन्ड भैसकेको छ । सुदर्शन र पूजाले आफ्नो सहकार्यमा बनेको अर्को फिल्म ‘म यस्तो गीत गाउँछु २’लाई माघ १९ गते प्रदर्शन गर्ने घोषणा गरिसकेका छन् ।

सम्हालिन्छ कहिले मनको जारी पोस्टरमा यी तीन मुख्य पात्रलाई रोमान्टिक मुडमा देख्न सकिन्छ । बलिउडका चर्चित गीतमा कभर संस्करण रिलिज गरेका गायक तोप्देनले यही फिल्मबाट अभिनयको इनिङ सुरु गर्दैछन् ।

बेलायत र नेपालमा छायांकन गरिएको फिल्मलाई दर्शकले रुचाउने विश्वास निर्देशक थापाले लिएका छन् । रोमान्टिक जनरमा फिल्म बनाउन खप्पिस सुदर्शनले फिल्म हेर्न आतुर दर्शकको मनोविज्ञानलाई लक्षित गरेर प्रदर्शन मिति घोषणा गरिएको बताए ।

एबी इन्टरनेसनलको ब्यानरमा निर्माण भएको यो फिल्मलाई अमित बस्नेतले निर्माण गरेका हुन् । परी राना र अजितकुमार थापा सह–निर्माता छन् । सनिश खकुरेल र अंकित गौतम कार्यकारी निर्माता हुन् ।

 

काठमाडौं । विजय सेतुपाथी र केके मेनन स्टारर अनटाइटल दक्षिण भारतीय फिल्मको छायांकन मंसिर १८ गतेदेखि काठमाडौंमा सुरु हुने भएको छ ।

लोकेसन खोजीको लागि निर्देशक कृष्णदशारा कोथापालीसहितको १६ सदस्यीय फिल्म टोली बिहीबार बेलुका काठमाडौं आइपुगेको छ । इन्डियन एयरवेजको विमानबाट फिल्म युनिट ३ः४५ बजे काठमाडौं एयरपोर्टमा अवतरण गरेको थियो । काठमाडौं आइपुगेको टोलीमा निर्देशक, छायांकार र प्राविधिकहरु सहभागी छन् ।

काठमाडौंको बसन्तपुर र भक्तपुरमा छायांकन सुरु हुने फिल्मको लोकेसन खोजी गरेर टोली तीन दिनपछि भारत फर्कनेछ । फिल्मको नाम र अन्य कलाकार भने पछि खुलाइने भारतबाट नेपाल आइपुगेका युनिटका एक सदस्यले नेपाल प्रेसलाई जानकारी दिए ।

निर्देशक कोथापालीले सन् २०१८ मा रिलिज भएको बलिउडको कमेडी हरर फिल्म ‘स्त्री’को पटकथा लेखेका हुन् ।

फिल्मले संचारमन्त्रालयबाट छायांकन अनुमति लिने प्रक्रिया सुरु गरेको छ । पोखरामा पनि छायांकन हुने भनिएपनि यसबारे विस्तृत बताइएको छैन । यसैमहीना बलिउड फिल्म उचाइ छायांकन नेपालमै भएको थियो ।

काठमाडौं । ओभर दी टप (ओटीटी) प्लेटफर्ममा सःशुल्क हेर्न पाइने गरी रिलिज हुँदै आएको वेब सिरिज ‘सक्किगो नि’ पुनः युट्युवमै फर्किएको छ । ओटीटी प्लेटफर्महरुले समझदारी अनुसार काम नगरेको भन्दै सिरिजलाई युट्युवमै पुनः रिलिज गर्न थालिएको निर्देशक अर्जुन घिमिरे ‘पाँडे’ले बताए ।

यसअघि सिरिजले केही नेपाली ओटीटी प्लेटफर्ममा सःशुल्क रिलिज गर्ने र त्यसको एक सातापछि युट्युवमा लन्च गर्ने सहमती गरेका थिए । प्रतिएपिसोड एउटा दर्शकबाट १९ रुपैयाँ संकलन गर्ने सहमती पनि थियो ।

तर, यसबीचमा अर्को एक युट्युव च्यानलबाट सिरिज रिलिज भएपछि सक्किगो नि टीमले त्यसविरुद्ध प्रहरीको साइवर सेलमा उजुरी दिएको थियो । समझदारीअनुसार ओटीटी प्लेटफर्मले काम नगरेपछि युट्युवमै फर्कनुपरेको पाँडेले बताए ।

ओटीटीको व्यवहारले दर्शकलाई निराश तुल्याउने परिस्थिती आएपछि सुःशुल्क रिलिजपछि हटिएको जानकारी उनले दिए । युट्युवसहित अहिले ओटीटी प्लेटफर्महरुमा निःशुल्क रुपमा सिरिज हेर्न पाइने भएको छ ।

ओहो मूभिज, क्लियर टिभी, भाया टीभी, डिसहोम गो, नेटटिभी लगायतका प्लेटफर्ममा सक्किगो नि निःशुल्क हेर्न पाइने भएको छ ।

 

काठमाडौं । गायन रियालिटी शो ‘द भ्वाइस किड्स’को बिहीबार बेलुकी राजधानीको एफक्यूब हलमा प्रिमियर गरिएको छ । पत्रकार, विज्ञापनदाता र विभिन्न क्षेत्रका व्यक्तिहरुलाई प्रिमियरमा देखाइएको हो । उक्त सो आज बेलुकी ८ बजेबाट हिमालय टीभीमा प्रशारण हुने तयारीमा छ ।

६ बर्षदेखि १४ बर्ष उमेर समुहका बालबालिकाहरुले सहभागीता जनाएको यो कार्यक्रमको ‘ब्लाइन्ड अडिसन’ आजबाट प्रशारण हुनेछ । प्रिमियरमा शो हेरेपछि मिडियाकर्मी तथा विभिन्न क्षेत्रका व्यक्तिहरुले सुखद प्रतिक्रिया दिएका थिए । बालबालिकाहरुको भावनालाई समेत ध्यानमा राखेर उत्कृष्ट तरिकाले शो तयार पारिएको उनीहरुको भनाई छ ।

प्रिमियरमा पाएको प्रतिक्रियाले आफूहरु उत्साहि त भएको निर्देशक लक्ष्मण पौडेलले जानकारी दिए । उनले भने- ‘कार्यक्रम तयार गर्दा नै हामीलाई शोले कस्तो प्रतिक्रिया पाउँछ भन्ने अड्कल लगाएका हुन्छौं । प्रिमियरमा विभिन्न क्षेत्रका मानिसहरुले दिनुभएको प्रतिक्रियाले उत्साह थपेको छ । अब, दर्शकले दिने प्रतिक्रियाबाट अझै हामीलाई थप ऊर्जा मिल्नेछ ।’

सोका निर्माता तथा संचालक सुशिल नेपालले बालबालिकाहरुसँग जोडिएको यो शोको छायांकनका क्रममा आफू कैयौं पटक रोएको बताए । प्रिमियरमा यो शो हेरेपछि अतिथीहरु पनि भावुक बनेका थिए । शुक्रबार र शनिबार बेलुकी ८ बजेबाट प्रशारण हुने यो शोमा राजु लामा, प्रमोद खरेल, प्रविशा अधिकारी, मिलन अमात्य कोचको रुपमा छन् ।

यो सोे २० भाग प्रसारण हुने जनाइएको छ । राजु र प्रमोद यसअघि ‘द भ्वाइस अफ नेपाल’को तीन श्रृङ्खलामा कोचको रुपमा प्रस्तुत भैसकेका छन् । मिलन र प्रविशाका लागि भने यो सो नयाँ हो । प्रिमियरमा शो हेरेका अधिकांशले मिलन र प्रविशाको प्रस्तुतिको खुलेरै प्रशंसा गरे । उनीहरुले भने-‘यसपटक २ नारी भारी पर्ने देखिएको छ ।’

काठमाडौं । सरकारले वरिष्ठ लेखक एवं साहित्यकारलाई परिचयपत्र वितरण गर्ने भएको छ । आगामी आइतबार हुने नेपाल प्रज्ञा प्रतिष्ठानको प्रतिष्ठानको ३६ औँ प्राज्ञसभाको उद्घाटनका अवसरमा प्रधानमन्त्री एवं प्रतिष्ठानका प्रमुख संरक्षक शेरबहादुर देउवाले वरिष्ठ साहित्यकारलाई उक्त परिचयपत्र वितरण गर्ने कार्यक्रम तय भएको छ ।

प्रतिष्ठानका सदस्य–सचिव प्रा जगतप्रसाद उपाध्याका अनुसार प्रधानमन्त्रीबाट पूर्वसदस्य सचिव तथा वाङ्मय शताब्दी पुरुष सत्यमोहन जोशी, कुलपति गङ्गाप्रसाद उप्रेती, पूर्वकुलपति वैरागी काइँला र पूर्वसदस्य सचिव गीता केशरीलाई परिचयपत्र प्रदान गरी लेखक/साहित्यकार परिचयपत्र वितरणको आरम्भ गरिने कार्यक्रम छ ।

त्यसपछि प्राप्त आवेदनका आधारमा क्रमशः परिचयपत्र वितरण कार्यलाई अगाडि बढाइने तयारी रहेको जनाइएको छ ।त्यस अवसरमा प्रतिष्ठानको पुनः डिजाइन गरिएको वेबसाइटलाई औपचारिकता दिइने भएको छ । वेबसाइटमा अनलाइनबाटै बैठक कक्ष बुकिङ तथा पुस्तक/पत्रिका बिक्री वितरणको समेत व्यवस्था गरिएको छ ।

सरकारले यसअघि वरिष्ठ फिल्मकर्मीलाई पनि चलचित्र परिचयपत्र वितरण गरेको छ ।

डोल्पा । अभिनेत्री सुरक्षा पन्त आफ्नो पछिल्लो फिल्म ‘बुलाकी’ छायांकनलाई डोल्पा पुगेकी छिन् । केही सातादेखि डोल्पाका विभिन्न स्थानमा फिल्मको सुटिङ भैरहेको छ ।

सुटिङ सेटबाट उनले आकर्षक तस्बिरहरु सेयर गरेकी छिन् । लक्ष्मण सुनारले निर्देशन गरिरहेको यो फिल्ममा सुरक्षा र नरेन खड्काको मुख्य भूमिका छ ।

डोल्पाका विभिन्न स्थानमा सुट भैरहेको फिल्ममा विराज विष्ट, प्रेमदेव गिरी, सुशिल पोखरेल, लक्ष्मी गिरी, कुलदीप अधिकारी, अप्सना थापा लगायको अभिनय छ ।

कर्णालीको आञ्चलिकतामा खिचिँदै गरेको फिल्मका केही दृश्यलाई मेक्सिकोमा समेत छायांकन गरिने भएको छ । राजबहादुर सानेको कथालाई शिव ढकालले खिचिरहेका छन् ।

निर्देशक सुनारले कला र मनोरञ्जनको सम्मिश्रणको रुपमा फिल्म निर्माण भैरहेका बताएका छन् । सुरक्षा पछिल्लो समय अभिनय र सामाजिक कार्यले पनि चर्चामा छिन् ।

मुम्बइ । कंगना रनावत र विवाद नौला होइनन । यी दुईबीच सुरुआतीदेखि नै एकखाले सम्बन्ध छ । लाग्छ, यी दुई पर्यायवाची नै भैसके । कहिले आफ्ना अभिव्यक्ति र कहिलेकाहिँ पद्मश्री सम्मानजस्ता कामले कंगना बेला–बेलामा मिडिया हेडलाइन बन्ने गर्छिन् ।

कंगना आफ्नो अभिव्यक्तिलाई लिएर पुनः विवादमा आएकी छिन् । ब्रिटिस राज र स्वतन्त्रता संघर्षबारे उनले बोलेका कुरालाई लिएर आम आदमी पार्टीकी नेतृ प्रीति शर्मा मेननले कंगनाविरुद्ध प्रहरीमा उजुरी दायर गरेकी छिन् ।

टाइम्स नाउ समिट २०२१ मा बोल्दै कंगनाले सन् १९४७ मा भारतले प्राप्त गरेको स्वतन्त्रता ‘भीख मागिएको’ किसिमको भएको बताएकी थिइन् । सन् २०१४ मा भने वास्तविक स्वतन्त्रता आएको उनले बताएकी थिइन् । यो अभिव्यक्तिलाई लिएर नेतृ मेननले मुम्बइ पुलिसमा उजुरी दिएकी हुन् । नेतृ शर्माले ट्वीटरमा प्रहरीमा उजुरी दिँदै गर्दाको तस्बिर सेयर गरेकी छिन् । उनले उजुरीमा कंगनाको अभिव्यक्ति देशहित विरोधी भएकाले कानूनअनुसार कार्वाही गर्न भनिएको छ ।

Submitted an application to @MumbaiPolice requesting action on Kangana Ranaut for her seditious and inflammatory statements on @TimesNow, under sections 504, 505 and 124A.
Hope to see some action @CPMumbaiPolice @DGPMaharashtra pic.twitter.com/9WxFXJFnEn

— Preeti Sharma Menon (@PreetiSMenon) November 11, 2021

सन् २०१४ मा भारतीय जनता पार्टी (बीजेपी) सत्तामा आएपछि नरेन्द्र मोदी प्रधानमन्त्री बनेका थिए । कंगना बीजेपी निकट मानिन्छिन् भने मोदीलाई उनले आफ्ना आदर्श नेता मान्ने गरेकी छन् । दिल्लीमा आम आदमी पार्टी र बीजेपीपछि निकै प्रतिस्पर्धा हुने गरेको छ ।

 

 

काठमाडौं । शुक्रबार नेपाली फिल्म हलहरुमा अस्कर विजेता निर्देशक क्ओल झाओ निर्देशित सुपरहिरो फिल्म ‘इटर्नल्स’ रिलिज हुँदैछ । रटन टम्याटोजले ४७ प्रतिशत रेटिङ दिएको यो मार्भल फिल्म मल्टिप्लेक्समा रिलिज हुन लागेको हो ।

जेम्मा च्यान, रिचर्ड माडेन, कुमैल नानिजानी, एन्जोलिना जोली, साल्मा हायक अभिनित फिल्म मार्भल सिनेम्याटिक युनिभर्सको २६ औं फिल्म हो । अहिले नेपाली बक्सअफिसमा यो युनिभर्स अन्तर्गतकै २५ औं फिल्म साङ ची प्रदर्शन भैरहेको छ ।

पृथ्वीको इतिहास र सभ्यतालाई जोगाउन सुपरहिरोहरुले अन्य ग्रहबाट आएको डेभिएन्ट्स नामक दुस्मनसँग गर्ने संघर्ष यसको कथ्य हो । जोलीलाई फिल्ममा थेना नामक पात्रको भूमिकामा देख्न सकिन्छ जसले कुनै अन्तरीक्ष शक्तिबिना हतियार पैदा गर्न सक्छ ।

दसवटा सुपरहिरो : अजक, सेर्सी, इकारिस, किंगो, स्प्राइट, फास्टोस, डुरिइग, गिल्गामेस र थेनालाई संयुक्तरुपमा इटर्नल्स भनिएको छ । उनीहरुलाई सेलेस्टियल आरिसेम नामक काल्पनिक ग्रहबाट पृथ्वी जोगाउने जिम्मा दिएर स्टारसिपमा पठाइन्छ ।

५००० वर्षदेखि उनीहरु पृथ्वीका विभिन्न भागमा अलग रहेर बसेका छन् । इकारिस नामक अन्य ग्रहका केही प्राणीहरु आएर पृथ्वीमा उपनिवेश बनाउन खोज्छन् । यो क्रममा उनीहरुको संघर्ष इटर्नल्स सुपरहिरोहरुसँग हुन्छ । उनीहरु इराकिससँग लड्न एकजुट हुन्छन् ।

फिल्ममा जोलीलाई पूर्णतः एक्सन रोलमा देख्न सकिन्छ । तरबार, खुँडासहितका हतियारहरुको प्रयोग गरेको चरित्र उनको छ । सेर्सी पात्रको भूमिकामा जेम्मा छिन् । कुनै वस्तुलाई छोएपछि उक्त वस्तुलाई परिवर्तन गर्नसक्ने शक्ति उनको पात्रमा देखाइएको छ ।

इटर्नल्स यस्तो बेला रिलिज हुँदैछ जुन बेला मार्भल सिनेम्याटिक युनिभर्सकै अर्को फिल्म साङ ची, बलिउड फिल्म सूर्यवंशी, ड्युन, भेनम र जेम्स बन्ड फिल्म नो टाइम टु प्रदर्शन भैरहेका छन् ।