काठमाडौं । टीकटकबाट ख्याति कमाएकी मोडल रेश्मा घिमिरे विवाह वन्धनमा बाँधएिकी छन् । प्रेमी प्रभाव बाबुसँग आज उनको लगनगाँठो कसिएको हो ।
रेश्मा र प्रभातबीच गत वर्षको मंसिर १८ गते टीकाटालो भएको थियो । टीकाटालो भएको १ वर्षपछि उनीहरुले विवाह गरेका हुन् । उनीहरुको विवाह विराटनगरमा भएको हो ।
प्रभाव अमेरिकामा बसेर चिकित्साशास्त्र पढिरहेका छन् । रेस्मा म्युजिक भिडिओमा मोडलिङ तथा प्रोग्राम होस्टिङमा व्यस्त छिन् । उनी ‘टीकटक क्वीन’ भनेर पनि चिनिन्छिन् ।
काठमाडौं । नेटफिल्क्सले पहिलोपटक नेपाली पात्र र कथामाथि निर्माण गरेको फिल्म ‘फोर्टिन पिक्स : नथिङ इज इम्पोसिबल’ आज विश्व प्रिमियर हुँदैछ ।
नेटफिल्क्सले आजदेखि ११९ मुलुकका आफ्ना २१ करोड पेड मेम्बरमाझ फिल्म स्ट्रिमिङ गर्दैछ । दर्शकले ३१ भाषाबाट यो फिल्म हेर्न सक्नेछन् ।
गतसाता काठमाडौंमा प्रिमियर गरिएको उक्त फिल्म नेपाली कीर्तिमानी आरोही निर्मल पूर्जाको जीवनमाथि आधारित छ । कसरी उनले ६ महिनाभित्रै संसारका अग्ला ८ हजार मिटरमाथिका १४ हिमाल चढे भन्ने चित्रण यसमा छ ।
नेपाल प्रिमियरमा फिल्मले राम्रो प्रतिक्रिया बटुलेको छ । पर्यटनमन्त्री प्रेमबहादुर आलेले यो फिल्मले नेपालको पर्यटनलाई अन्तर्राष्ट्रिय स्तरमै प्रवद्र्धन गर्ने बताइसकेका छन् । ३८ वर्षअघि धौलागिरी हिमालको फेदीमा जन्मिएका म्याग्दीका पूर्जाले २०७६ बैशाख १० मा अन्नपूर्ण हिमालबाट आरोहण थालेका थिए । उनको प्रोजेक्ट पोसिबल अभियान ०७६ कात्तिक १२ गते चीनको सिसापांगा हिमाल आरोहण सँगै सकिएको थियो ।
मुम्बई । कोरोना महामारीपछि ठूला बलिउड फिल्महरुले धमाधम प्रदर्शनको तयारी थालेका छन् । ठूला बलिउड फिल्म निर्माताहरु दुईवर्षदेखि हल खुल्ने प्रतिक्षामा छन् । कोरोनाभाइरसको परिस्थिती सामान्य भए सन् २०२२ फिल्म प्रेमीको लागि एकदमै रोचक हुने छ । केही ठूला फिल्मले प्रदर्शन मिति घोषणा गरिसकेका छन् । सन् २०२२ को बलिउड फिल्म रिलिज क्यालेन्डर सार्वजनिक गरिएको छ ।
हेर्नूस् सूची :
भारतको गणतन्त्र दिवसमा रिलिज हुनेछ जोनको फिल्म ‘अट्याक’
२०२२ को सुरुआतमा एसएस राजामौलीको फिल्म आरआरआर प्रदर्शन हुँदैछ । यसबाहेक पान इन्डियाका फिल्म ‘राधे–श्याम’ र ‘पृथ्वीराज’ पनि जनवरीमा रिलिज हुँदैछन्। जोनको फिल्म ‘अट्याक र कश्मीर फाइल्स’ जनवरीमा गणतन्त्र दिवसको अवसरमा सँगै थिएटरमा आउनेछन् ।
फेब्रुअरीमा रिलिज हुँदैछ ‘गंगूबाई काठियावाडी’
‘आरआरआर’सँग बक्स अफिसको टक्करबाट बच्न आलिया भट्टद्धारा अभिनित फिल्म ‘गंगुबाई काठियावाडी’ अब फेब्रुअरी १८ मा रिलिज हुनेछ । यसको साथै ‘बिफोर यू डाइर्’ ‘मैजर’ र रणवीर सिंहको फिल्म ‘जयेशभाई जोरदार’ पनि यसै महिना सिनेमाघरमा रिलिज हुनेछ ।
मार्चमा रिलिज हुँदैछ चार ठूला फिल्म
रणविर कपूरको मोस्ट वान्टेड फिल्म ‘शमशेर’ मार्च १८ मा रिलिज हुँदैछ भने कार्तिकको ‘भुल भुलैया २’ र आयुष्मान खुरानाको ‘अनेक भी’ पनि यसै महिना रिलिज हुनेछन् । अक्षयको ‘बच्चन पाण्डे’ पनि मार्च ४ मा रिलिज हुँदैछ ।
अप्रिलमा ठूलो भीडन्त हुनेछ
कंगना रनावतको धक्कड अप्रिल ८ मा रिलिज हुनेछ, त्यसपछि लालसिंह चड्डा र केजीएफ च्याप्टर २ अप्रिल १४ मा सँगै रिलिज हुनेछ । दुवै फिल्म ठूला स्टारका भएकाले फिल्मको सङ्कलनमा फरक पर्न सक्छ । यी बाहेक अमिताभ बच्चन, अजय देवगनको मेडे, रकेटरी र हिरोपन्ती २ पनि यसै महिना आउनेछन् ।
मुम्बइ । बलिउड जोडी कट्रिना क्याफ र विक्की कौशल बिहे तयारीमा छन् । तर, यी दुईको बिहेमा कोरोनाभाइरसको नयाँ भेरिएन्ट ओमिक्रोन बाधक बन्ने संकेत देखिएको छ ।
बिहे नजिक हुँदै जाँदा निम्तो गर्ने अतिथिको नाम पनि सार्वजनिक हुन थालेको छ । अनुष्का शर्मा र बिराट कोहलीलाई विशेष अतिथिको रुपमा निम्तो गर्ने तयारी भएको छ ।
डिसेम्बर ९ मा सवाई माधोपुरको पास फोर्ट बरवाडामा विक्की र कट्रिनाले हुने बिहे समारोहलाई लिएर नयाँ योजना बनाएका छन् । यो प्लानअनुसार अब उनीहरुले बिहेमा निम्तो दिइने अतिथिको सूची छोट्याउन थालेका छन् ।
गेस्टको सूची छोट्याउनुपछाडि विश्वभर फैलिएको कोभिडको नयाँ ओमिक्रोन भेरिएन्टलाई कारण मानिएको छ । बेलायती मूलकी कट्रिनाको बिहेमा अन्तर्राष्ट्रिय पाहुनालाई पनि निम्तो दिइएको थियो ।
ओमिक्रोन संक्रमण पुष्टि भएसँगै भारत सरकारले अन्तर्राष्ट्रिय यात्रुका लागि नयाँ मापदण्ड लागू गरेको छ । अन्तर्राष्ट्रिय गेस्टको सूचीमा कट्रिनाको परिवारसहित पेरुका फोटोग्राफर मारियो टेस्टिनाको नाम पनि सहभागी छ ।
विक्की र कट्रिनाको बिहेमा भारतीय क्रिकेट कप्तान बिराट कोहली र अभिनेत्री पत्नी अनुष्का शर्मा छोरी वकिकासहित राजस्थानमा हुने बिहे समारोहमा जाने तयारीमा छन् ।
करन जोहर, फराह खान, जोया अख्तरसहित निर्देशक सशांक खेतान पनि बिहेमा सहभागी हुँदैछन् । विक्की र कट्रिनाले बिहेको लागि जयपुरमा जानुअघि मुम्बईमा कोर्ट म्यारिज गर्नेछन् ।
काठमाडौं । नायक तथा मोडल आकाश श्रेष्ठ र नायिका तथा मोडल पूजा शर्माकोे जोेडीलाई दर्शकले पर्दामा खुबै रुचाउँछन् । म्युजिक भिडिओमा पनि यो जोेडी जमेको छ । यही जोडीले अभिनय गरेको नयाँ गीत ‘कहाँ जाने हो कहाँ’कोे भिडिओ सार्वजनिक भएको छ ।
मेलिना राई र प्रविण वेदवालको स्वर रहेको गीतमा अर्जुन पोेखरेलको शब्द तथा संगीत छ ।
यो गीतलाई अर्जुनले फिल्मी शैैलीमा तयार पारेका छन् । अर्जुनको गीतकोे भाव अनुसार निर्देशक माइकल चन्दले पनि भिडिओ तयार पारेका छन् । भिडिओमा माइकलले आकाश र पुजाविचको अन्तर्जातिय प्रेम देखाउन खोेजेका छन् । साथै, भिडिओको पहिलोे दृश्यलाई ३६० डिग्रीमा खिचिएको माइकल बताउँछन् ।
भिडिओेमा शिलन लम्सालकोे सम्पादन, उत्सव दाहालकोे छायांकन, स्टेप अप एन्ड आर्टस् एकेडेमीको कोेरियोेग्राफी छ ।
काठमाडौं । मिस युनिभर्सको विश्व प्रतिस्पर्धामा भाग लिन मिस युनिभर्स नेपाल’ सुजिता बस्नेत इजरायल प्रस्थान गरेकी छिन् । मिस युनिभर्सको ७०औँ संस्करणमा भाग लिन युनिभर्स’ उनी शनिबार राती त्यसतर्फ प्रस्थान गरेकी हुन् । काठमाडौं विमानस्थलमा उनलाई आयोजक संस्थाकी निर्देशक नग्मा श्रेष्ठ लगायतले बिदाइ गरिन् ।
इजरायलतर्फ प्रस्थान गर्नुअघि नेपाल प्रेससँग कुरा गर्दै उनले ताज जित्न अधिकतम प्रयत्न गर्ने बताइन् । उत्कृष्ट प्रस्तुति दिने उद्देश्यसहित आफूले भाग लिन लागेको उनको भनाई छ ।
गत महिना राजधानीमा आयोजित ‘मिस युनिभर्स नेपाल’ को ग्रान्ड फिनालीमा उनले उपाधि जितेकी थिइन् । अन्तर्राष्ट्रिय स्पर्धाका लागि सुजिताले नेपालको चिनारी झल्कने कस्ट्युम प्रस्तुत गर्ने भएकी छिन् । ‘मिस युनिभर्स’ १२ डिसेम्बरमा आयोजना हुँदैछ । प्रतियोगितामा ७० बढी देशमा सुन्दरीहरूको सहभागिता रहनेछ ।
काठमाडौं । भ्लगर सिसन बानियाँ र पूर्वमिस नेपाल श्रृंखला खतिवडाको प्रेम सम्बन्ध लुकेको छैन । तर, माया लुकाएर लुक्ने चीज होइन ।
यी दुईजनाले रिलेसनसिपलाई सार्वजनिकरुपमा स्वीकार नगरेपनि कतिपय ठाउँमा चाहिँ खुलारुपमै उनले प्रेमलाई प्रदर्शन गरेका छन् ।
यस्तोमा, श्रृंखला अहिले उच्च शिक्षा अध्ययनका लागि अमेरिकामा छिन् । सिसन नेपालमै रहेर कामलाई निरन्तरता दिइरहेका छन् । सिसन अहिले भने नयाँ कारणले चर्चामा छन् ।
कीर्तिमानी आरोही निर्मल पूर्जामाथि नेटफिल्क्सले निर्माण गरेको फिल्म ‘फोर्टिन पिक्स’को प्रिमियरमा सिसन चर्चाका कारण बने । उनी गायिका त्रिशला गुरुङसँग स्पट भएका थिए ।
रेडकार्पेटदेखि २ घण्टा लामो फिल्म पनि उनीहरुले सँगै हेरे । चिकित्साकी विद्यार्थी समेत रहेकी २६ वर्षिया त्रिशला र भ्लगर सिसनको मूभी डेट उक्त समारोहमा चर्चायोग्य बन्यो ।
त्रिशलाले सामाजिक संजालबाट समेत सिसनको तस्बिरलाई सेयर गरेकी छिन् । तस्बिरमा यी दुईजना प्रफुल्ल मुद्रामा देखिन्छन् । जेहोस्, सिसन र त्रिशलाको यो मूभी–डेट अहिले निकै चर्चामा छ ।
काठमाडौँ । यस वर्ष ‘आइसी डिजाइनर रनवे १०’ फेसन शो आयोजना हुने भएको छ । आइसी डिजाइनर रनवे १० आगामी २४ डिसेम्बर (९ पुस) मा आयोजना हुने भएको हो । यो सोको आयोजना नेक्स्ट मोडल्स नेपालले म्यानेजमेन्ट गर्न लागेको हो ।
फेसन सोका लागि ३६ मोडल छानिएका छन् । नेक्स्ट मोडल्सले हालै अडिसन मार्फत २८ फिमेल र ८ मेल मोडल गरेर फेसन शोका उत्कृष्ट ३६ मोडल छनौट गरेको छ ।
होटल हायात रिजेन्सीमा आयोजना हुने फेसन शोमा ७३ जना डिजाइनरले तयार पारेका बिभिन्न आकर्षक पहिरन २१ सिक्वेलमा मोडलहरुले र्याम्पमा प्रस्तुत गर्नेछन् । ७३ जना फेसन डिजाइनर नै आइसी कलेजका १८ औं ब्याजका पास आउट बिद्यार्थी हुन् ।
‘आइसी डिजाइनर रनवे’ धेरै बर्षदेखि नियमित आयोजना हुँदै आएको सो हो । यस वर्ष उत्कृष्ट तरिकाबाट प्रस्तुत गर्ने तयारी भइरहेको नेक्स्ट मोडल्स नेपालका सीइओे रवि धमलाले बताए ।
सो को मुख्य उदेश्य नेपाली फेसन डिजाइनरको प्रचारप्रसार गर्दै उनीहरुले डिजाइन गरेका नेपाली फेसनका आकर्षक डिजाइन अन्तराष्ट्रिय स्तरमा पुर्याउनु रहेको आयोजक आइसी कलेजकी प्रबन्ध निर्देशक शैलजा अधिकारीले जानकारी दिइन् ।
काठमाडौं । रेवत राईको स्वरमा रहेको गीत ‘तिमी तारे भीर’ यो साता युट्युवमा सर्वाधिक हेरिने नेपाली गीत बनेको छ । यो सातामा मात्र यो गीत १५ लाख ४७ हजार ४३८ पटक हेरिएको छ भने कूल १५ लाख ६० हजार ६६२ पटक हेरिएको छ ।
यस्तै अस्मिता अधिकारी र खेम सेञ्चुरीको स्वरमा रहेको गीत ‘रमरम मरौटी’ दोस्रो शीर्ष स्थानमा परेको छ । यो गीतलाई एक सातामा मात्र १३ लाख ६६ हजार ३४२ पटक हेरिएको छ भने कूल १ करोड ३७ लाख ३२ हजार ८२५ पटक हेरिएको छ ।
समिक्षा अधिकारीको स्वरमा रहेको गीत ‘धनगढीको बसमा’ लाई एक सातामा ११ लाख ८ हजार ४८८ पटक हेरिएको छ । यो गीतको कुल भ्यूज संख्या ८५ लाख ९ हजार ९५३ रहेको छ । रुटिन अफ नेपाल बन्दको सहयोगमा यो सूची तयार पारिएको हो ।
हेर्नूस् सूची :
१. रेवत राई ‘तिमी तारे भीर’ : १५४७४३८
२. अस्मिता अधिकारी र खेम सेञ्चुरी ‘रम रम मरौटी’ : १३६६३४२
३. समिक्षा अधिकारी ‘धनगढीको बसमा’ : ११८४८८
४. खेम सेञ्चुरी ‘मन परेको मान्छे’ : ७८७१६६
५. भिटेन ‘गल्ली सडक’ : ७७३३७९
६. प्रकाश दूतराज ‘जाम भो माइली’ : ७२५६५९
७. दिनेश ढकाल ‘कालो केशमा रेलिमई’ : ७१३८०९
८. मोहित वंश आचार्य ‘हाम्रो माया’ : ७०९९३५
९. रमेश राज भट्टराई र रचना रिमाल ‘भन साईला’ : ६७८०४०
१०. साहिमा श्रेष्ठ र सन्दिप न्यौपाने ‘ओकल दोकल-२’ : ६७२०६७
काठमाडौं । कीर्तिमानी नेपाली आरोही निर्मल पूर्जामाथि नेटफिल्क्सले निर्माण गरेको फिल्म ‘फोर्टिन पिक्स : नथिङ इज इम्पोसिबल’लाई शुक्रबार बेलुका काठमाडौंमा प्रिमियर गरिएको छ ।
२ घण्टा लामो यो फिल्मलाई अमेरिका र बेलायतपछि नेपालमा प्रिमियर गरिएको हो । क्यूएफएक्सको लाबिम हलमा आयोजित प्रथम प्रदर्शनीमा पर्यटनमन्त्री प्रेमबहादुर आले, कूटनीतिज्ञ, व्यवसायी र सेलेव्रिटी सहभागी थिए ।
मन्त्री आलेसहितका अतिथिले फिल्म हेरिसकेपछि पूर्जालाई ‘स्ट्यान्डिङ ओभेसन’ दिएका थिए । ‘निकै इन्जोय गरेँ, धेरै राम्रो फिल्म बनेको रहेछ’ फिल्म हेरेपछि नेपाल प्रेसलाई प्रतिक्रिया दिँदै मन्त्री आलेले भने, ‘पक्कै पनि यो फिल्मले नेपाल र नेपाली पर्यटनलाई अन्तर्राष्ट्रियरुपमा राम्रो सन्देश जानेछ ।’
बेलायती राजदूत निकोला पोलिटले पनि फिल्म असाध्यै राम्रो बनेको बताउँदै यसले नेपाली पर्यटनलाई अझै प्रचारप्रसार गर्ने बताइन् । आठ हजारमाथिका अग्ला १४ हिमाललाई पूर्जाले ६ महिनामै कसरी सफलतापूर्वक आरोहण गर्न सफल रहे भन्ने कथा यसले भन्छ ।
अभिनेता राजेश हमालले नेटफिल्क्सजस्तो विश्व चर्चित ओटीटीले नेपाली कथा र पात्रमाथि फिल्म बनाउँदा यसले नेपाली फिल्म र पर्यटनलाई फाइदा पुग्ने बताए । ‘मधु र मैले निकै इन्जोय गर्यौं । धेरैपटक म भावुक पनि भएँ’ हमालले नेपाल प्रेसलाई भने ।
यो फिल्म विश्वका ३१ भाषासहित नेटफिल्क्सबाट सोमबारदेखि विश्वभर रिलिज हुँदैछ । नेटफिल्क्सले ११९ मुलुकका आफ्ना २१ करोड पेड मेम्बरमाझ फिल्म स्ट्रिमिङ गर्दैछ ।
३८ वर्षअघि धौलागिरी हिमालको फेदीमा जन्मिएका म्याग्दीका पूर्जाले २०७६ बैशाख १० मा अन्नपूर्ण हिमालबाट आरोहण थालेका थिए । उनको प्रोजेक्ट पोसिबल अभियान ०७६ कात्तिक १२ गते चीनको सिसापांगा हिमाल आरोहण सँगै सकिएको थियो ।
निर्मल पूर्जा आगामी साता अन्टार्कटिकातर्फ जाँदैछन् । उनी त्यसतर्फ जानुअघि मिडियाकर्मीको लागि फिल्मको प्रिमियर गर्ने योजना छ ।
काठमाडौं । नायिका तथा रियालिटी सो होस्ट रेश्मा घिमिरेले गतवर्ष प्रेमी प्रभात बाबुसँग टीकाटालो गरेकी थिइन् । गएको मंसिर १८ गते यी दुईबीच इन्गेजमेन्ट भएको थियो ।
इन्गेजमेन्ट एनिभर्सरीकै छेकेमा मंसिर १४ गते रेश्मा र प्रभातबीच बिहे हुने भएको छ । प्रभात अमेरिकामा रहेर डाक्टर पढिरहेका छन् भने रेश्मा अहिले नेपाल आइडलको नयाँ सिजनको होस्ट गरिरहेकी छिन् ।
रेश्मा निकट स्रोतका अनुसार उनीहरु १४ गते वैवाहिक जीवनमा बाँधिदैछन् । बिराटनगरमा बिहे कार्यक्रम हुने र काठमाडौंमा बिहे रिसेप्सन आयोजना गर्ने उनीहरुको तयारी रहेको बुझिएको छ ।
रेश्मा सामाजिक संजाल टीकटकमा समेत उत्तिकै चर्चित छिन् ।
काठमाडौं । विश्व सुन्दरी प्रतियोगिता (मिस वर्ल्ड)को हेड-टु-हेड च्यालेन्ज गएरातिदेखि प्रारम्भ भएको छ । अमेरिकी राज्य पुएर्तो रिकोमा सुरु भएको प्रतिस्पर्धाको ग्रुप-१ मा मिस नेपाल वर्ल्ड नम्रता श्रेष्ठसहितका सुन्दरीले प्रश्नोत्तरमा भाग लिएका छन् ।
मिस वर्ल्डले सार्वजनिक गरेको हेड-टु-हेडको ग्रुप–१ च्यालेन्जमा सोधिएको प्रश्नमा नम्रताले आत्मविश्वासपूर्वक उत्तर दिएकी छिन् । प्रश्नकर्ताले नम्रतालाई सोधेकी छिन् : तपाईंले यसअघि नै सफलता हासिल गर्नुभएको छ, अब चाहिँ के ?’
नम्रताले भनेकी छिन्, ‘अब मिस वर्ल्डको माध्यममार्फत विश्वसामु आफ्नो प्रभाव छाड्दै जीवन बाँच्न चाहन्छु ।’
अन्य प्रश्नकर्ता भन्छिन् : मिस वर्ल्ड टाइटलसहित के गर्न चाहनुहुन्छ ?’ नम्रता भन्छिन् : म जहाँ जान्छु, जुन काम गर्छु र जसलाई म भेट्छु उसको जीवनमा प्रभाव पार्ने मेरो लक्ष्य छ । मिस वर्ल्डमा भाग लिन पाउँदा निकै खुशि छु । म धेरै मानिस र जीवनसँग जोडिएकी छु र उनीहरुको जीवनमा गाँसिन चाहन्छु अनि सकारात्मक छाप छोड्न चाहन्छु ।’
डिसेम्बर १६ मा ग्रान्ड फिनाली हुँदैछ ।
काठमाडौं । शुक्रबार नेपाली हलहरुमा दुई नयाँ फिल्म रिलिज भएका छन् । यी दुबै फिल्ममा बलिउडका दुई ठूला स्टारकास्ट छन् र दुबैको जनरा एक्सन ड्रामा हो ।
सलमान खान फिल्मसको ‘अन्तिम : द फाइनल ट्रुथ’ र जोन अब्राहमको ‘सत्यमेव जयते २’ छन् । जोनको फिल्म बिहीबार नै नेपाल र भारतमा प्रदर्शनमा आएको हो ।
मराठी फिल्म ‘मुल्सी पार्टन’को रिमेक रहेको सलमानको फिल्म ‘अन्तिम’मा सलमानसहित आयुश शर्मा र महिमा मकवानाको मुख्य भूमिका छ ।
शिख प्रहरी अधिकृत (सलमान) र ग्याङस्टर (आयुश)को कथा वरपर घुम्ने यो फिल्मले अपराधको कारण किसानहरुले भोग्नुपरेको दारुण अवस्थालाई चित्रण गर्छ । महेश मञ्जेरकरले यसलाई निर्देशन गरेका हुन् ।
टी सिरिज र एमे इन्टरटेनमेन्टले निर्माण गरेको फिल्म सत्यमेव जयतेको दोस्रो सिक्वेलमा जोनसहित दिव्या खोसला कुमारको मूख्य भूमिका छ । अन्याय र शक्तिको दुरुपयोगविरुद्धको कथा यसमा छ । जोनले यस फिल्ममा तेहेरो भूमिका निर्वाह गरेका छन् ।
नेपालमा सलमान र जोनका प्रशंसक भएकाले ती वर्गका दर्शकले रुचाउने अनुमान गरिएको छ ।
काठमाडौं । अभिनेता राजेश हमाल गाडीका सौखिन हुन् । उनले बिहीबार नक्सालस्थित जिप सोरुमबाट लिजेन्डरी कम्पासको जिप खरिद गरे ।
बाल्यकालदेखि नै जिपबारे सुनेको र केही फिल्म छायांकनमा विलिस जीप चलाएको अनुभव रहेको उनले सुनाए । ‘म जीपको अफरोड क्षमताबाट प्रभावित थिएँ’ उनले भने ।
गाडी खरिद गर्न हमाल पत्नी मधुलाई लिएर जिपको नक्साल आउटलेटमा पुगेका थिए ।
केही महीनादेखि नेपाली बजारमा जिपको विक्री सुरु भएको थियो भने यो ब्रान्डको जिपका ग्राहक बढिरहेका छन् ।
एमएडडब्लु लाइफका प्रमुख अनिश लामिछानेका अनुसार पछिल्लो समय जीपले नेपाली अटो मार्केटमा सफलता हासिल गरिरहेको छ । अटो ब्रान्डहरुले पनि पछिल्लो समय सेलेव्रिटी ग्राहकलाई प्राथमिकता दिइरहेका छन् ।
नेपालमा जिपको नयाँ मोडेल कम्पास स्पोर्ट, लंगिच्युड, लिमिटेड र एस मोडेलमा उपलब्ध रहेको जनाइएको छ । यसको मूल्य ८४ लाख ९० हजारदेखि एक करोड ३६ लाख रुपैयाँसम्म रहेको कम्पनीले जनाएको छ ।
काठमाडौं । पछिल्लो समय सागर लम्साल बले र प्रिज्मा खतिवडा पुनः चर्चामा छन् । टीकटकबाट उदाएकी प्रिज्मा र भद्रगोल टिभी सिरियलबाट उदाएका बले केही वर्षदेखि प्रेममा रहेको चर्चा थियो ।
उनीहरुले म्युजिक भिडिओ पनि सँगै गरेका छन् । फागुनमा बिहे गर्ने चर्चा पनि थियो । प्रेममा रहेको चर्चा चलेपनि यी दुईले आफूहरु प्रेममा रहेको खबरलाई स्वीकार गरेनन् । यतिबेला भने यी दुई अलग भएको चर्चा चलेको छ ।
प्रायः सामाजिक संजालमा सँगै देखिने उनीहरु पछिल्लो समय भने एकअर्कासँगको भिडिओ पोस्ट गरेका छैनन् । उनीहरु म्युजिक भिडिओमा पनि सँगै देखिन छाडेका छन् ।
उनीहरु अहिले अलग भएको जनाइएको छ । स्रोतले बिहेको कुरा नमिल्दा सम्बन्धमा दरार आएको दावी गरेको छ । तर, यी दुईजना अहिले पनि आफूहरुको सम्बन्धलाई स्वीकार्न तयार छैनन् ।
ब्रेकअपको हल्लाबारे सोधिएको जिज्ञासामा प्रिज्माले नेपाल प्रेसलाई भनिन्, ‘ब्रेकअप हुन त पहिले रिलेसनमा बसेको हुनुपर्यो नि । उहाँसँग को-आर्टिस्टको सम्बन्ध मात्र हो । उहाँ (बले)लाई सँधै सर भनेर बोलाएकी छु । नभएको सम्बन्ध कसरी ब्रेकअप भयो ? म्युजिक भिडिओ आयो भनेर भविष्यमा नगर्ने कुरै छैन ।’
काठमाडौं । ग्रामी अवार्ड मनोनित र्यापर राजा कुमारीका प्रशंसकलाई खुशिको खबर । विश्वचर्चित यी अमेरिकन-इन्डियन गायिकाले आफ्ना र्याप तथा हिपहप गीतमार्फत चिसिएको काठमाडौंलाई तताउने भएकी छिन् । मंसिर १८ गते काठमाडौंको फरेनहाइट क्लबमा उनले प्रस्तुति दिने भएकी हुन् ।
विश्व संगीतका चर्चित नामहरु गिवेन स्टेफानी, फिफ्थ हार्मोनी, फलआउट ब्वाय, डिभाइनसँग सहकार्य गरेकी राजा कुमारीले पछिल्लोपटक बलिउड फिल्म ‘गल्ली ब्वाय’मा केमियो भूमिका पनि निर्वाह गरेकी थिइन् । रणवीर कपुर र आलिया भाट स्टारर यो फिल्मले नेपाली बक्सअफिसमा समेत राम्रो कमाइ गरेको थियो ।
वास्तविक नाम स्भेता यल्लाप्रगढा राओ रहेकी उनको स्टेज नाम चाहिँ राजा कुमारी हो । उनलाई ल्याउँदा नेपाल कोरोनाभाइरस महामारीबाट सामान्य अवस्थामा फर्किएको र नेपाली पर्यटनलाई टेवा पुग्ने आशा समेत क्लब फरेनहाइटले लिएको छ । राजा कुमारी डिसेम्बर ३ मा दिल्ली हुँदै नेपाल आउनेछिन् । उनलाई त्रिभुवन विमानस्थलमा समेत भव्य स्वागत गरिने आयोेजकले जनाएको छ ।
यो कन्सर्ट हेर्नका लागि दर्शकले १ हजार र २ हजारका टिकट खरिद गर्न सक्नेछन् । क्लब फरेनहाइटका संचालक मिलन श्रेष्ठका अनुसार, नेपालमा समेत राजा कुमारीका युवा फ्यान धेरै भएकाले उनलाई नेपाल ल्याउन लागिएको हो ।
केही वर्षअघि राजा कुमारीसँग र्याप गायनमा सहकार्य गरेका चर्चित भारतीय र्यापर डिभाइनले पनि काठमाडौंमा प्रस्तुति दिएका थिए । क्लब फरेनहाइटले यसअगाडि पनि भारतका चर्चित कलाकार ल्याएर कन्सर्टको आयोेजना गरिसकेको छ । यसअघि फरेनहाइटमा आदित्य नारायण झा, टोेनी कक्कड जस्ता गायकहरुले प्रस्तुति दिइसकेका छन् ।
काठमाडौं । ‘नेपाल मानव अधिकार अन्तर्राष्ट्रिय चलचित्र महोत्सव’को नवौं संस्करण बिहीबार सम्पन्न भएको छ । मानव अधिकार चलचित्र केन्द्रले आयोजना गरेको महोत्सव चार दिनसम्म भर्चुअल रुपमा सञ्चालन भएको थियो ।
महोत्सवमा नेपाललगायत २४ देशका ४२ चलचित्र प्रदर्शन गरिएको थियो । महोत्सवमा प्रदर्शन भएका तीन विधाका तीन चलचित्रले पुरस्कार जितेका छन् । महोत्सवमा राजेशप्रसाद खत्रीको ‘जुलुङ्गो’, मीरा खड्का र ज्योति बेलबासेको ‘नो स्कुल टुडे’ र एन्जिला चौधरी र पुष्पा जोशीको ‘ललित’ ले उत्कृष्ट बन्दै पाँच सय अमेरिकी डलर पुरस्कार पाएका छन् ।
जुलुङ्गो’ले फिक्सन तर्फबाट उकृष्ट, ‘नो स्कुल टुडे’ले उत्कृष्ट वृत्तचित्र र महिला फिल्मेकरतर्फको उत्कृष्ट चलचित्रका रुपमा ‘ललिता’ लाई पुरस्कृत गरिएको हो । महोत्सवमा आशा मगराती, मनोजबाबु पन्त र लिना रञ्जितले निर्णायक मण्डलको भूमिका निर्वाह गरेका थिए ।
महोत्सवको पहिलो गत सोमबार बिहान ७ बजेदेखि छनोट भएका चलचित्रहरू ‘मुभी डटकम’ वेबसाइटमा प्रदर्शन भएका थिए । महोत्सवमा लघु चलचित्र, वृत्तचित्र, फिचरलगायत सबै विधाका चलचित्रहरु प्रर्दशन गरिएका थिए ।
महोत्सवको सहआयोजक राष्ट्रिय मानव अधिकार आयोग र नेपालका लागि क्यानाडाको राजदूतावास रहेको थियो । यस्तै महोत्सवका लागि युरोपियन युनियन, आईओएम, आइसिजे, प्लान इन्टरनेसनल, मोबाइल आर्ट फर पिसले सहयोग गरेका थिए । चलचित्र विकास बोर्ड र मानव अधिकार चलचित्र सन्जालले महोत्सवलाई प्रवद्र्धन गरेका थिए ।
काठमाडौं । नेपाल र इजरायलबीचको जनस्तरको सम्बन्धलाई कला-संस्कृतिको माध्यमबाट समेत प्रवद्र्धन गर्ने उद्देश्यले राजधानीमा तीनदिने इजरायली फिल्म महोत्सव नयाँ ढाँचामा शुरु भएको छ ।
कोभिड महामारी मत्थर नभइसकेकाले आफ्नै सवारीसाधनमा बसेर चलचित्रको आनन्द लिन पारखीहरूलाई इजरायली दूतावासले १३ औँ संस्करणको महोत्सव ‘ड्राइभ इन फिल्म सोज्’ ढाँचामा प्रस्तुत गरेको हो । एफएम रेडियो जडित सवारीसाधनमा बसेर सोल्टी होटलको सवारी बिसौनीमा ९०.६ मेगाहर्जमा ‘ट्युन’ गरेपछि विशाल पटाङ्गिनीको ठूलो पर्दामा दृश्य हेर्दै आवाज सुन्दै महोत्सवको मजा लिन सकिनेछ ।
संस्कृति, पर्यटन तथा नागरिक उड्डयनमन्त्री प्रेमबहादुर आलेले महोत्सवको बिहीबार साँझ उद्घाटन गर्दै इजरायली फिल्म निर्माता तथा लगानीकर्तालाई नेपालको मनोहर दृश्य र सौन्दर्यको छायाङ्कन गर्न आह्वान गरे ।
विदेशी फिल्म निर्माताहरूलाई छायाङ्कनका लागि नेपालमा आकर्षित गर्न आफ्नो मन्त्रालयले सूचना तथा सञ्चार प्रविधि र अर्थ मन्त्रालयसँग सिनेमा बनाउनेहरूलाई सहुलियत दिन आग्रह गरेको जानकारी उनले दिए । मुलुकको पर्यटन प्रवद्र्धनमा छायाङ्कनबाट सकारात्मक प्रभाव पर्ने वास्तविकतालाई दृष्टिगत गरी त्यस निम्ति अन्तरसरकारी निकायसँग समन्वय गरिएको उनले बताए ।
नेपालका लागि इजरायली राजदूत हनान गोडेरले इजरायली संस्कृति, कला र परम्पराको प्रवद्र्धनका साथै दुई देशबीचको जनस्तरको सम्बन्धलाई थप सुदृढ एवं सुमधुर तुल्याउन महोत्सव आयोजना गरिएको बताए । अभिनेता राजेश हमालले फिल्महरु सिमानारहित र तिनको सन्देश सार्वभौमिक हुने भएकाले गुणस्तरीय फिल्मप्रति आफ्नो लगाव र आकर्षण सधै रहेकाले कलाक्षेत्रमा नै आफू रमाइरहेको बताए ।
महोत्सवमा काठमाडौंस्थित कूटनीतिक नियोगका प्रमुख तथा पदाधिकारी, पूर्वराजदूत, परराष्ट्र मन्त्रालयका उच्च अधिकारी, वरिष्ठ सञ्चारकर्मीका साथै इजरायलमा उच्च शिक्षा हासिल गरेका नेपालीहरूको संस्था सलोम क्लबका पदाधिकारीहरूको उपस्थिति थियो । शनिबारसम्म जारी रहने महोत्सवमा सवारीसाधन भएका चलचित्र पारखीलाई निःशुल्क सिनेमा हेर्ने व्यवस्था मिलाइएको छ ।
काठमाडौं । कोरोनाभाइरस महामारीको दोस्रो लहरले रोकिएका फिल्मको छायांकन अहिले धमाधम सुचारु हुँदैछन् । मिलन चाम्सको निर्माण एवं निर्देशन रहेको ‘गोर्खा वारियर २’ सुटिङ बिहीबारदेखि सिन्धुलीमा सुरु भएको छ ।
त्यहाँको माडीस्थित कालीगाउँमा पूजाआजासहित दोस्रो सेड्युलको छायांकन सुरु भएको जानकारी निर्देशन चाम्सले दिए । कोरोनाको दोस्रो लहरअघि फिल्मको ४० प्रतिशत छायांकन सकिएको छ ।
सिन्धुलीसहित दमौली, मलेसिया र बेलायतमा बाँकी भाग खिचिने जानकारी चाम्सले दिए । ब्रिटिस गोर्खा सैनिकको वीरता र संघर्षको गाथा चित्रण गर्ने फिल्मको मुख्य भूमिकामा रितेश चाम्सले अभिनय गरिरहेका छन् ।
११७ जनाको क्रिउसहित सुचारु भएको बाँकी छायांकन अझै एक महिना निरन्तर हुने जनाइएको छ ।
सिन्धुलीमा रितेश र विजय लामाले मुख्य दृश्यहरुको लागि फिल्म खिचिरहेका छन् । सन् २०२२ को अन्त्यमा रिलिज लक्ष्य राखिएको फिल्ममा रेविका गुरुङ, रियर राई, शिशिर वाङ्देल, भुवनसिंह राई, बुद्धि तामाङ, कविता आले, विरुद्ध घले, सारा राईको समेत अभिनय छ ।
‘गोर्खा वारियर-२’ रिलिजपछि मात्र फिल्म हलमा प्रिक्वेल प्रदर्शन गर्ने निर्देशक चाम्सको तयारी छ । फिल्मको छायांकनलाई २ वटा क्यामेरा प्रयोगमा आएको छ । यसले दृश्यको आयामलाई फराकिलो तुल्याउने र समयको बचत हुने आशा पनि निर्देशकले लिएका छन् ।
काठमाडौं। कोरोना संक्रमणदर कम भएसँगै निर्माताहरुले फिल्मको प्रदर्शन मिति घोषणा गर्न थालेका छन् । यसबीच नेपाली हरर फिल्म ‘कठपुतली’ अंग्रेजी नयाँ बर्षको दिन आउँदो पुष १५ गते (डिसेम्बर ३०) मा प्रदर्शन हुने भएको छ ।
निर्माण टिमले तमु ल्होसारको सार्वजनिक विदा भएकाले फिल्म बिहीवारबाटै प्रदर्शन गर्न लागेको हो । कठपुतली फिल्मका निर्माता एवम् निर्देशक भीमसेन लामाले रिलिज मिति घोषणा गरेका हुन् ।
‘कठपुतली’ ले हालै अमेरिकाको प्रतिष्ठित इन्टरनेसनल फिल्म फेस्टिभल ‘विन्टर फिल्म अवार्ड’ मा दुईवटा अवार्ड जितेको छ । फिल्ममा गौरी मल्ल, मिथिला शर्मा, कर्मा, शिल्पा माष्के, उषा रजक, सुवर्ण थापा लगायतको अभिनय छ ।
पृथ्वी राना मगर निर्माता रहेको फिल्मको कार्यकारी निर्माता सम्पदा मल्ल, सह–निर्मातामा विशाल गुरुङ, धर्म श्रेष्ठ र हेम थापा छन् । पोस्ट-प्रोडक्सनको सम्पूर्ण काम लन्डन स्टूडियोमा भएको हो । पृथ्वी राना प्रोडक्सनको ब्यानरमा निर्मित ‘कठपुतली’ नेपालमा बनेका अन्य हरर फिल्मभन्दा एकदमै भिन्न रहेको निर्देशक लामाले दाबी गरेका छन् । उनी यो फिल्मलाई आफ्नो ड्रिम प्रोजेक्ट बताउँछन् ।