प्रोसेस पाण्डे द भ्वाइस अफ नेपाल सिजन ६ का विजेता बनेका छन्।
शुक्रबार भएको ग्राण्ड फिनालेमा उनले तीन प्रतिस्पर्धीलाई पछि पार्दै नगद २० लाख रूपैयाँसहित द भ्वाइस अफ नेपाल सिजन ६ को उपाधि जितेका हुन्।
प्रोसेसले टिम खेम सेञ्चुरीबाट प्रतिस्पर्धा गरेका थिए।
यस्तै टिम मेलिना राईबाट रोशन राई फस्ट रनरअप भएका छन् । यस्तै सेकेन्ड रनरअप टिम राजु लामाबाट प्रमेश राई बनेका छन् । अर्पना आचार्य थर्ड रनरअप बनेकी छन् । उनले टिम उदय सोताङबाट प्रतिनित्व गरेकी थिइन् ।
काठमाडौं । अहिलेका चर्चित गायकको लिस्टमा पर्ने नाम हो, सुजन चापागाईं । उनले गाएका प्राय गीत दर्शकले रुचाउँछन् । अहिले उनले गाएको ‘काफ्ले’ गीत सामाजिक संजालमा भाइरल छ। कार्यक्रममा कमै हिंड्ने चापागाईं अहिले भने ‘ऊनको स्वीटर साँझ विथ सुजन चापागाईं’ नामक लाईभ कन्सर्टमा व्यस्त छन् ।
बिहीबार सोही कार्यक्रमका लागी उनी धरान पुगेका थिए। आगामी शुक्रवारबाट रिलिजमा आउन लागेको चलचित्र ‘ऊनको स्वीटर’ को प्रचारप्रसार स्वरूप बिहिवार धरान रङ्गशालामा साङ्गीतिक कार्यक्रमको आयोजना गरिएको थियो। उनी शो कार्यक्रममा ६ हजारभन्दा बढी दर्शक माँझ गुन्जिए। उनलाई हेर्न दर्शकको उत्साहजनक उपस्थिति रहेको थियो ।
सुजन चापागाईंको कार्यक्रमको लागि पाँचथरको फिदिम देखि धरान सम्मको २०० कि.मि. बाटोमा मोटरसाइकल र्यालीमार्फत दर्शकहरू आएका थिए भने अन्य केहि ठाँउदेखि समेत उनलाई हेर्न दर्शकहरू कार्यक्रममा आएका थिए ।
कार्यक्रममा धरान उप-महानगरपालिकाका मेयर हर्क साम्पाङ, उपमेयर आइन्द्र विक्रम बेघा लगायत विशिष्ट व्यक्तित्वहरूको समेत उपस्थिति रहेको थियो। कार्यक्रममा नगरप्रमुख साम्पाङले चलचित्रका प्रमुख कलाकारहरू विपिन कार्की, मिरुना मगर, विल्सन विक्रम राई, परीक्षा लिम्बू, एलेक्स पारस, निर्देशक नवीन चौहान, गायक सुजन चापागाईँ, गायिका तथा सङ्गीतकार झुमा लिम्बू र गीतकार युवराज काफ्लेलाई स्वागत अनि सम्मान गरे।
नगरप्रमुख हर्क साम्पाङ उपस्थित कार्यक्रममा सुजन चापागाईँ र उनको ‘द इन्फिनिटी ब्यान्ड’ले ‘लजाएर एक्लै किन’, ‘तिमी बिना तिमी हुनु’, ‘फूलथुङ्गे रानी’, ‘आँसुको भारी’, ‘तीनपाते’, ‘मखमली’, ‘काफ्ले’ लगायतका चर्चित गीतहरू प्रस्तुत गरेका थिए । यस कार्यक्रममा सङ्कलित फाइदा धरान उपमहानगरपालिकाको श्रम संस्कृति अभियानलाई आर्थिक सहयोग स्वरूप हस्तान्तरण गरिने चलचित्रका निर्देशक नवीन चौहानको भनाई छ ।
काठमाडौं । दीपेन्द्र के खनाल निर्देशित चलचित्र ‘के घर के डेरा : घर नं २’को ट्रेलर सार्वजनिक भएको छ । शुक्रबार राजधानीमा एक कार्यक्रमको बीच ‘के घर के डेरा : घर नं २’को ट्रेलर सार्वजनिक गरिएको हो ।
ट्रेलरमा घर र डेराबीचको अन्तर देखाईएको छ। घर मोहले निम्त्याएको समस्या प्रष्ट देखाइएको सार्वजनिक ट्रेलरमा घर नै सबथोक र प्रतिष्ठाको प्रतीक हो भन्ने देखाउन खोजिएको छ। घर जोगाउन र जोड्न युवा पुस्ताले गरेको संघर्ष र त्यसले सिर्जना गरेको नकारात्मक पक्षलाई ट्रेलरले देखाएको छ ।
‘पशुपतिप्रसाद’, ‘आमा’, ‘चिसो मान्छे’जस्ता सामाजिक चलचित्र बनाइसकेका निर्देशक खनालको चलचित्र ‘के घर के डेरा : घर नं २’ यहीँ जेठ २ गतेदेखि प्रदर्शनमा आउँदै छ । चलचित्रले घर र डेराबीचको अन्तरको कथा भन्नेछ ।
यो चलचित्रको कथा साहित्यकार बुद्धिसागरले लेखेका हुन । उनको यो पहिलो चलचित्र हो । यो चलचित्र एप्पल इन्टरटेन्मेन्ट, ए प्लस इन्टरटेन्मेन्ट तथा नटराज क्रिएसनको प्रस्तुतिमा निर्माण भएको हो । कृष्णबहादुर थापाको छायांकन रहेको चलचित्रको निर्मातामा नकिमउद्दिन, शरद श्रेष्ठ र किरण महर्जन छन् । कार्यकारी निर्माताको रूपमा भने युवराज कार्की रहेका छन् ।
काठमाडौं । यहीँ वैशाख २६ गते बाट रिलिजमा आउन लागेको चलचित्र हो, ‘जार’। सामाजिक विषयवस्तुमा आधारित रहेर बनेको यो चलचित्रमा अभिनेताद्वय सौगात मल्ल, अनुपविक्रम शाही र अभिनेत्री गीताञ्जली थापाको मुख्य भूमिका छ।
अभिनेताद्वय सौगात मल्ल र अनुप विक्रम शाही दर्शकको लागी परिचित अनुहार हुन। तर चलचित्रकी मुख्य अभिनेत्री गिताञ्जली थापा भने नेपाली दर्शकको लागी नयाँ नाम हुन सक्छ। गीताञ्जली नेपाली चलचित्रको लागि नयाँ नाम भएपनि उनी उम्दा कलाकार हुन् । विश्वका थुप्रै फिल्म फेस्टिभलमा आफ्नो कामले दर्शकको मन जितिसकेकी गीताञ्जलीले भारतको सबैभन्दा प्रतिष्ठित मानिने ‘राष्ट्रिय फिल्म पुरस्कार’ जितिसकेकी छिन्। उनी भारतकी राष्ट्रिय अवार्ड विनर आर्टिस्ट हुन्।
सिक्किममा जन्मेकी गीताञ्जलीले सन् २०१३ मा रिलिज भएको चलचित्र ‘लायर्स डायस’ बाट यो अवार्ड जितेकी हुन। यो चलचित्र भारतको तर्फबाट ८७औं एकेडेमी अवार्ड्मा समेत पठाइएको थियो। गिताञ्जलीको परिचय यतिमा मात्र सिमित छैन। उनी नेटफ्लिक्सका प्रयोगकर्ताका लागि पनि परिचित अनुहार हुन। उनले नेटफ्लिक्सको चर्चित वेब सिरिज ‘सेक्रेड गेम्स’मा पनि अभिनय गरिसकेकी छिन्।
उनका चलचित्रले नेपाल र भारतमा मात्रै होइन, विश्वमा फन्को मारिसकेका छन् । विश्वका ठूला र प्रतिष्ठित फिल्म फेस्टिभलमा उनका चलचित्रहरु स्क्रिनिङ भइसकेका छन् । गीताञ्जली अभिनित चलचित्र टोरन्टो, बुसान, लस एन्जलस, न्युयोर्कलगायत विश्वचर्चित चलचित्रहरु फेस्टिभलमा स्क्रिनिङ भइसकेका छन् ।
अहिले रिलिजको तयारीमा रहेको उनी अभिनित चलचित्र ‘जार’ पनि सन् १८ सयको दशकमा नेपाली समाजमा घटेको यथार्थ घटनामा आधारित चलचित्र हो । ‘जार’ साहित्यकार इन्द्रबहादुर राईको ऐतिहासिक कथामा आधारित चलचित्र हो । इन्द्रबहादुर राईले सन् १८ सयको दशकको विषयलाई आफ्नो कथाको विषय बनाएका थिए । यो चलचित्रको केहि दिन अघि सिक्किममा ग्राण्ड वर्ल्ड प्रिमियर गरिएको थियो। चलचित्र हेरेका दर्शकले गीताञ्जलीको अभिनयको खुलेर प्रशंसा गरेका थिए। त्यहाँ पनि गीताञ्जली थापा एउटा सशक्त उपस्थिति बनिन्।
‘जार’लाई निर्देशक फुर्वा छिरिङ लामाले निर्देशन गरेका हुन। यो चलचित्रले एक प्रेमकथामार्फत तत्कालीन समाजको संरचना र मानव भावनाको जटिलतालाई देखाउनेछ । फेरि टेल पिक्चर्स, होप रिल्स, एलए सेभेन सर्टस, बराल स्टुडियो र किवा प्रोडक्सनको सहकार्यमा निर्माण भएको चलचित्रको छायांकन सिक्किममा गरिएको छ।
चलचित्रको कार्यकारी निर्मातामा त्रिलोचन पाण्डे, नीरज राई, नुर्साङ भुटिया, ज्योती क्षेत्री र पेमा रिन्जिङ लेप्चा छन् । सरवानन इलावार्सुको छायांकन रहेको चलचित्रमा अखिलेश राईको सम्पादन छ । झुमा लिम्बू र गंगा थापाको संगीत रहेको ‘जार’ नेपाल र भारतसहित अन्तर्राष्ट्रिय बजारमा एकसाथ प्रदर्शनमा आउँदैछ।
काठमाडौं । अहिले चलचित्र ‘भूठान : घर हराएको कथा’ दोस्रो सातामा हलहरूमा चलिरहेको छ । यस चलचित्रले भुटानी शरणार्थीहरुको कथा भन्छ । जो आफ्नै देशबाट सन् १९९० को दशकमा भुटानबाट लखेटिएर नेपाल आए । नेपालबाट अमेरिका, युरोप, अष्ट्रेलियाजस्ता मुलुकमा पुनर्बासका लागि गए, सन् २००७ बाट ।
आफ्नो घरबाट राम्रोसँग सरसामान नै उठाउन नपाई, आफ्नै घरलाई एक झलक फर्केर समेत हेर्न नपाई ज्यान जोगाउन भागेका भुटानिजहरू संसारको जुन कुनामा पुगे पनि उनीहरु भावनात्मक रूपमा भने भुटानबाट अलग भएका छैनन् । उनीहरूको शरीर जहाँ पुगे पनि मन भने भुटानमै छ । निर्देशक विनोद पौडेलले ‘भूठान : घर हराएको कथा’मार्फत् यही कुरालाई उप्काउने कोसिस गरेका छन् ।
यति मात्रै होइन, घर छाडेर भाग्न विवश शरणार्थीहरू कस्तो प्रकारको रिक्तता, निराशा र एक्लोपनसँग गुज्रिरहेका हुन्छन् ? पहिचानविहीनता सहित बाँच्नुका सकसहरू के के हुन् ? एउटा मानिसलाई आफ्नो देश, भूगोल, समाज, संस्कृति र घर किन चाहिन्छ ? यी प्रश्नको जवाफ निर्देशक पौडेलले सुन्दर र कलात्मक दृश्यभाषामार्फत् ‘भूठान : घर हराएको कथा’मा प्रस्तुत गरेका छन् । शक्तिशाली दृश्यभाषाको प्रयोग यस चलचित्रको तागत हो ।
प्रस्तुत भिडियोमा उनै निर्देशक पौडेलसँग ‘भूठान : घर हराएको कथा’को समीक्षा गरिएको छ । चलचित्रमा प्रयोग भएका सटहरू, कलर ग्रेडिङ, सम्पादन, ब्याकग्राउण्ड स्कोरिङ, सिनेम्याटोग्राफी र ननलिनियर शैलीमा भनिएको चलचित्रको कथामाथि छलफल गरिएको छ ।
काठमाडौं । फुटबलर अन्जिला तुम्बापोको जीवनीमा आधरित चलचित्र ‘अञ्जिला’ले प्रदर्शनको ५१ औँ दिन मनाएको छ । गत वर्ष फागुन २९ गतेदेखि प्रदर्शनमा आएको यो चलचित्र अहिले देशभरमा ४५ शोहरूसहित प्रदर्शन भइरहेको छ ।
साथै चलचित्रले १० करोड रुपैयाँभन्दा बढीको ग्रस कमाइ गर्दै बायोपिक चलचित्रमा ऐतिहासिक कीर्तिमान बनाएको निर्देशक मिलन चाम्सको दाबी छ । यद्यपि चलचित्र विकास बोर्डको बक्स अफिस रिपोर्ट सार्वजनिक भएपछि मात्रै चलचित्रले कति कमाएको हो भन्ने स्पष्ट रुपले खुल्नेछ ।
चलचित्रले ५१ औं दिन मनाएपछि चाम्सले भने, ‘हामी सफलताका साथ ५१ दिनमा पुगेका छौँ । अञ्जिला नेपाली चलचित्रको इतिहासमा १० करोड माथिको व्यापार र ५१ दिन पुग्ने पहिलो नेपाली वायोपिक चलचित्र बनेको छ ।’
चलचित्र युनिटले यो उपलब्धिको अवसरमा शुक्रवार विशेष समारोहको आयोजना गरेको छ । निर्माता प्रेमकुमार श्रेष्ठले दर्शकको माया र साथले यो सफलता दिलाएको बताए ।
‘अञ्जिला’ नेपाली महिला राष्ट्रिय फुटबल टोलीकी कप्तान एन्जिला तुम्बापो सुब्बाको जीवनमा आधारित चलचित्र हो, जसमा एन्जिलाले आफैँ प्रमुख भूमिका निर्वाह गरेकी छन् । चलचित्रमा उनीसँगै प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतको अभिनय रहेको छ ।
काठमाडौं । मजदुर दिवसको अवसर पारेर लेखक श्याम सिंघकको उपन्यास ‘कोइलाखाँद’ विमोचन भएको छ । सम्भव समूहको आयोजनामा नेपाल प्रज्ञा प्रतिष्ठानको भवनमा विमोचित उपन्यासमाथि लेखक नयनराज पाण्डे र अध्येता कैलाश राईले आफ्नो धारणा व्यक्त गरेका थिए ।
लेखक पाण्डेले उपन्यासकार सिंघकको लेखनीको प्रशंसा गर्दै अनुसन्धान गरेर लेखिएका उपन्यासहरुमा समाजको यथार्थ चित्रण गरिने हुँदा यस्ता उपन्यासहरू धेरैभन्दा धेरै मात्रामा लेखिनुपर्ने धारणा व्यक्त गरे । उनले भने, ‘श्रमिकहरूको कथा वैश्विक विषय हो । यस्तो विषयवस्तुमा पाठकहरूको सहानुभूति हुन्छ। तसर्थ यो उपन्यास अङ्ग्रेजी साहित्यमा पनि अनुवाद हुनुपर्ने उपन्यास हो ।’
अर्का वक्ता राईले उपन्यासमा कोइलाखाद सम्बन्धी धेरै दस्ताबेजहरू रहेकोले यसलाई अनुसन्धानको पाटोबाट हेर्नुपर्ने तर्क व्यक्त गरिन्।
‘सानो छँदा बोजुहरुले कुरा गरेको कोइलाखादबारे उपन्यासमा पढ्न पाउनु खुसीको कुरा हो मेरा लागि,’ उनले भनिन्, ‘यसले कोइलाखादमा काम गर्ने श्रमिक वर्ग र त्यहाँ बसोबास गर्ने समुदायको अर्थ सामाजिक र अर्थ राजनैतिक पक्षलाई पनि साह्रै मिहीन ढङ्गबाट प्रस्तुत गरेको छ ।’
लेखक सिंघकले भने व्यवसायीकरण र बजारीकरणको हिसाबले भन्दा पनि दस्तावेजिकरण होस् भनेर उपन्यास लेखेको बताए । पहिलेको उपन्यासभन्दा पनि अझै मिहिनेत गरेर लेखेको हुँदा यस उपन्यासबाट पाठकहरूको मन जित्ने कुरामा ढुक्क रहेको पनि उनको तर्क थियो । लगभग पाँच वर्षको अध्ययन र अनुसन्धानबाट तयार पारिएको ‘कोइलाखाद’ सक्दो मिहिनेत गरेकोले आफू सन्तुष्ट रहेको बताए ।
यसअघि सिंघकको ‘रेमिटल्याण्ड’ उपन्यास प्रकाशित भएको थियो ।
सिक्किम । वैशाख २६ गतेबाट सार्वजनिक प्रदर्शनमा आउन लागेको चलचित्र ‘जार’को सिक्किममा ग्राण्ड वर्ल्ड प्रिमियर सम्पन्न भएको छ। सिक्किम गान्तोकस्थित वाज्रा वर्ल्डमा आयोजित प्रिमियरमा विभिन्न क्षेत्रबाट प्रतिनिधित्व गर्दै विशिष्ट व्यक्तित्वहरू तथा सिक्किमबाट नेपाली चलचित्र उद्योगमा प्रतिनिधित्व गर्ने चलचित्रकर्मीहरूको उपस्थिति थियो ।
प्रिमियरमा सहभागी हुन निर्देशक फुर्वा छिरिङ लामाको नेतृत्वमा अभिनेता द्वय सौगात मल्ल र अनुपविक्रम शाहीसहितको टिम नेपालबाट सिक्किम पुगेका थिए। आफ्नो चलचित्रको पहिलो प्रीमियरमा अभिनेत्री गीताञ्जली थापा भने कार्य व्यस्तताका कारण सहभागी हुन सकिनन् ।
चलचित्र हेरेपछि स्थानीय दर्शकले सकारात्मक प्रतिक्रिया दिएका थिए। चलचित्रको कलाकार, निर्देशक, सिनेमाटोग्राफी, विजिएम र भिएफएक्सको दर्शकले तारिफ गरे। गायिका तथा संगीतकार झुमा लिम्बुको संगीतको पनि दर्शकले खुलेर प्रशंसा गरे।
कार्यक्रममा बोल्दै निर्देशक साम्तेन भुटियाले वरिष्ठ साहित्यकार इन्द्र बहादुर राईको कथामा आधारित चलचित्रले कृतिलाई पूर्णतः न्याय दिएको बताए । नेपाली मौलिकता पस्केको जार अभिनय, निर्देशक र प्राविधिक सबै पक्षमा अब्बल बनेको उनले सुनाए ।
चलचित्र हेरेर निस्किएका अभिनेता उत्तम प्रधानले जार उत्कृष्ट बनेको बताउँदै सम्पूर्ण टिमलाई बधाई दिए । कलाकारको अभिनय र निर्देशकीय पक्षको तारिफ गर्न समय खर्चेका प्रधानले नेपाली दर्शकले आफ्नो समाजको विगत थाहा पाउन ‘जार’ एक पटक हेर्नै पर्ने चलचित्र रहेको बताए ।
चलचित्रका निर्देशक फुर्वा छिरिङ लामाले आफूले सोचेको भन्दा राम्रो प्रतिक्रिया पाएको भन्दै कतिपय ठाउँमा गरिएका नयाँ प्रयोग र जोखिमलाई दर्शकले अनुमोदन गरेको बताए । दर्शकको प्रतिक्रियाले निकै उत्साहित रहेको बताउँदै उनले वर्षौँको मेहनतले सम्मान पाउँदा खुशी लागेको बताए ।
त्यस्तै, अभिनेताद्वय सौगात मल्ल र अनुप विक्रम शाहीले सिक्किमेली दर्शकसँगै बसेर चलचित्र हेर्दा राम्रो प्रतिक्रिया पाएको भन्दै चलचित्र पारखीलाई जारले तृप्त बनाउने दाबी गरे। आइवी राईको अमर कृतिमा आधारित चलचित्रलाई पनि दर्शकले अमर बनाउने विश्वास सौगात र अनुपले कार्यक्रममा राखे ।
सिक्किम लोकसभा डेपुटी स्पिकर राजकुमारी थापा प्रमुख अतिथि रहेको कार्यक्रममा सिक्किम प्रहरी प्रमुख अक्षय सच्देवा, लोकसथा सदस्य इन्द्रहाङ सुब्बा, मुखमन्त्रीका राजनीतिक सल्लाहकार ज्याकव खालिम, सिक्किम सरकारका प्रवक्ता कर्मा सुब्बा, मुख्यमन्त्री कार्यालय सचिव एसडी ढकाल लगायतका विशिष्ट राजनीतिक व्यक्तित्वहरूसहित नेपाली चलचित्र निर्माता सुस्मा गुरुङ, निर्देशक साम्तेन भुटिया, प्रशान्त रसाइली र अभिनेता उत्तम प्रधान अतिथिको रूपमा थिए।
सरवानन इलावार्सुको छायांकन रहेको चलचित्रमा अखिलेश राईको सम्पादन छ । चलचित्रको कार्यकारी निर्मातामा त्रिलोचन पाण्डे, नीरज राई, नुर्साङ भुटिया, ज्योति क्षेत्री र पेमा रिन्जिङ लेप्चा छन् । होप रिल्स, एलए सेभेन सर्ट्स, बराल स्टुडियो र किवा प्रोडक्सनको सहकार्यमा यो चलचित्र निर्माण भएको हो ।
काठमाडौं । बलिउड अभिनेत्री तथा डान्सर नोरा फतेही नेपाल आउने भएकी छन् । उनी जेठ ३ मा बौद्ध टुसालस्थित हायात ग्राउन्डमा हुने ‘नोरा फतेही लाइभ इन नेपाल’ का लागि नेपाल आउन लागेकी हुन् ।
वर्ल्डवाइइ फिल्मस् नेटवर्क प्रालिको प्रस्तुतिमा आयोजना हुन लागेको यो कार्यक्रममा नोरालाई ल्याउन आयोजकले झन्डै ३ करोड खर्च गरेका छन् । इभेन्ट म्यानेजर मनिष कार्कीको अनुसार नोरासंगै १६ कोरस डान्सर आउन लागेकाले यत्रो खर्च भएको हो।
कार्यक्रममा नोरासंगै केही नेपाली कलाकार र गायक-गायिकाले पनि प्रस्तुति दिने भएका छन् । कार्यक्रममा दुर्गेश थापा, तेरिया मगर, द भ्वाईस अफ नेपालको चन्द्रकला राई लगायत ५ जनाले आफ्नो प्रस्तुति दिनेछन् । आयोजकका अनुसार नोरासंग गायक दुर्गेश थापाले विशेष प्रस्तुति दिनेछन् ।
यो कार्यक्रम शिक्षाबाट वञ्चित बालबालिकाको क्षेत्रमा काम गर्दै आएको ‘ह्युमन रेस्पेक्ट नेपाल’को सहयोगार्थ हुनेछ । कार्यक्रममा टिकटको मूल्य २ हजार, ४ हजार, ७ हजार र १६ हजार तय गरिएको छ । कार्यक्रममा इन्टरनेशनल कोर्डिनेटरका रूपमा युद्ध बानियाँ र डिजिटल मार्केटिङ मनिष बखतीले हेरिरहेका छन् ।
नोराको बलिउडमा ‘दिलबर दिलबर’, ‘कुसु कुसु’, ‘ओ साकी साकी’, ‘नाच मेरी रानी’ जस्ता गीतहरू सुपर हिट छन् ।
काठमाडौं । नायकद्वय केदार प्रसाद घिमिरे(माग्नेबुढा), प्रकाश सपूत र धिरज मगर अभिनित चलचित्र ‘माइतीघर’को शुभसाइत गरिएको छ। चलचित्रको आज शुभसाइतसंगै म्याग्दीको ताकम गाउँको गणेश मन्दिरमा पुजा गरी छायांकन सुरु गरिएको हो ।
शुभसाइत समारोहमा धौलागिरी गाउँपालिकाका अध्यक्ष प्रेमप्रसाद पुन प्रमुख अतिथीको रुपमा उपस्थित थिए। उनले पहिलो पटक गाउँमा चलचित्रको छायांकन हुन लागेको भन्दै खुशी व्यक्त गरे । यो चलचित्रले गाउँको पर्यटन प्रवद्र्धनमा समेर महत्वपुर्ण भूमिका खेल्ने विश्वास अध्यक्ष पुनले राखे ।
त्यस्तै, समारोहमा वडा नम्बर ७ का अध्यक्ष अशोक खत्रीले नरिवल फोडेका थिए । उनले पनि चलचित्रको उचित प्रसारप्रसार हुन सकेको खण्डमा गाउँको विकास हुने बताए । शुभसाइत समारोह अघि चलचित्रको टिमलाई गाउँमा बाजा बजाएर स्वागत गरिएको थियो ।
निर्माता रोहित अधिकारीका अनुसार चलचित्रको २० दिन ताकम र धारपानी गाउँमा छायांकन हुनेछ भने बाँकीको २० दिन दरबाङको तातोपानी क्षेत्रमा बाँकी सुटिङ हुनेछ । यो चलचित्रमा केदार प्रसाद घिमिरे, धिरज मगर, प्रकाश सपुत, उपासना सिंह ठकुरी, श्यामाश्री शेर्पा, वुद्दि तामाङ, शिशिर वाङ्देल लगायतका कलाकारहरुको अभिनय रहनेछ।
मिलन तामाङको निर्देशनमा बन्ने चलचित्रमा सुसन प्रजापतिको छायांकन रहनेछ । चलचित्रलाई दशैंको फूलपातिबाट रिलिज गर्ने तयारी निर्माणपक्षको छ। रोहित अधिकारी फिल्मस्को व्यानरमा निर्माण हुन लागेको यो चलचित्रमा रविन शेरचन र धीरज तामाङको पनि लगानी छ । चलचित्रको कार्यकारी निर्मातामा इश्वर श्रेष्ठ र नीरज कटुवाल रहेका छन्।
काठमाडौं । लोकप्रिय ओटीटी प्लेटफर्म एमएसएममा नयाँ फिल्म ‘ज्वाइँ साब’ रिलिज भएको छ । आजबाट यो फिल्मलाई ओटीटीमा रिलिज गरिएको हो । वसन्त निरौलाको निर्देशनमा तयार भएको यो फिल्ममा जितु नेपाल र नीति शाह मुख्य भूमिकामा छन् ।
आजबाट यो फिल्म ओटीटी प्लेटफर्ममा रिलिज भएको । हलमा दर्शकले राम्रै साथ दिएको यो फिल्मलाई दर्शकले ओटीटीमा पनि मन पराउने विश्वास गरिएको छ ।
कमेडी जनरामा तयार भएको यो फिल्मले एक जना युवतीका लागि युवक छान्नका लागि गरिएको प्रतिस्पर्धाको कथा भन्छ ।
एमएसएम एपमा वैशाख १ गते फिल्म ‘छक्का पन्जा ५’ पनि रिलिज भइसकेको छ । यो फिल्म पनि दशैंमा ‘ज्वाइँ साब’सँग नै रिलिज भएको थियो ।
यता, यही दिनमा नै हलमा लागेको अर्को फिल्म ‘१२ गाउँ’ पनि एमएसएम एपमा रिलिज हुँदैछ । यो फिल्म पनि केही सातामै सार्वजनिक हुने बताइएको छ । गतबर्षको सर्वाधिक धेरै कमाई गर्ने दोस्रो फिल्म हो ‘१२ गाउँ’ ।
विराज भट्टको निर्देशनमा तयार भएको यो फिल्ममा विराज र उनका छोरा समीर भट्टको मुख्य भूमिका छ ।
काठमाडौं । यहीँ शुक्रवारबाट रिलिज हुने चलचित्र ‘झिल्को’को अग्रिम बुकिङ खुला भएको छ। डिजिटल युगमा प्रविधिको अनियन्त्रित प्रयोगले बालबालिकाको जीवन, पारिवारिक सम्बन्ध र सामाजिक स्वास्थ्यमा पार्ने गम्भीर असरको संवेदनशील कथामा बनेको यस चलचित्रको लागि देशभरका हलहरूले अग्रिम टिकट बिक्री सुरु गरेको हो ।
चलचित्रमा बालकलाकार आयुषी ढकालले स्मार्टफोनको कुलतमा फसेकी बालिकाको भूमिका निभाएकी छिन् । साथै, चलचित्रमा सुनिल पोखरेल, वर्षा सिवाकोटी, विशाल पोखरेल, भोलाराज सापकोटा, जान्वी बस्नेत, जेनीश श्रेष्ठ र जेभीश श्रेष्ठको अभिनय रहेको छ ।
यसअघि ऐतिहासिक र सामाजिक सन्देशमूलक चलचित्र ‘झोला’ निर्देशन गरेका यादवकुमार भट्टराईले यो चलचित्रको निर्देशन गरेका हुन् ।
मिडिया फर कल्चर प्रा.लि. को ब्यानरमा निर्माण गरिएको चलचित्रको छायाङ्कन दीपक बज्राचार्य, सम्पादन निमेष श्रेष्ठ, कलर तथा साउन्ड मिक्सिङ श्याम कुँवर र साउन्ड डिजाइन उत्तम न्यौपानेले गरेका छन् ।
चलचित्रको कथा तथा पटकथा यादवकुमार भट्टराईले अरुणदेव जोशी र देव व्रतसँग मिलेर तयार पारेका हुन् । ‘झिल्को’का कार्यकारी निर्माता उमेश पौडेल हुन् भने निर्माता सुशीला आचार्य, रामगोपाल थापा र किरण कुमार आचार्य रहेका छन् ।
काठमाडौं । दुई वर्षपछि गायक सुजन चापागाईं लाइभ कन्सर्टमा फर्किएका छन् । यहीँ वैशाख २६ गतेबाट विश्वव्यापी रिलिजको तयारीमा रहेको आर्टमान्डूको पहिलो चलचित्र ‘ऊनको स्वीटर’को प्रचारप्रसारको रूपमा सुजनको लाइभ कन्सर्ट आयोजना गरिएको हो ।
सुजन चापागाईँ एन्ड इन्फिनिटी टिमको प्रस्तुति हेर्न नेपाल प्रज्ञा प्रतिष्ठानमा सहभागीहरूको बाक्लो उपस्थिति रहेको थियो। कार्यक्रममा उपसभामुख इन्दिरा रानामगरको साथमा सांसदहरू सुहान नेम्वाङ, अशोक कुमार चौधरी, सोविता गौतमहरूसँगै विभिन्न अतिथिहरू पनि उपस्थित थिए। साङ्गीतिक टिममा भने सुजनसँगै सञ्जीव बराइली, नकुल सिंह गुरुङ, प्रिन्स नेपाली, जगन्नाथ धौगोडा, दीपेन्द्र काफ्ले, सन्देश महर्जन थिए ।
दर्शकलाई पहिलो कोसेली स्वरुप सुजनले कार्यक्रममा ‘लजाएर एक्लै किन बसेकी मायालु’ गीत गाएका थिए। कार्यक्रममा ‘ऊनको स्वीटर’ को ट्रेलर पनि प्रस्तुत गरिएको थियो भने सुजनले ‘उनको स्वीटर’ को ‘काफ्ले’ गीत पनि गाएका थिए। उनले गाएको गीतमा चलचित्रकै कलाकार एलेक्स पारस र परीक्षा लिम्बुले नृत्य प्रस्तुत गरेका थिए । गायनमा भने सुजनलाई गायिका सलिना विकले साथ दिएकी थिइन् ।
सुजनले कार्यक्रममा प्रेम जोडी विवेक पङ्गेनी र सिर्जना सुवेदीलाई ट्रिब्यूट दिँदै ‘एक्लै भएँ नि’ गीत पनि गाए। उक्त ट्रिब्यूट दिएर गाएको गीतमा भने अधिकांश दर्शक भावुक भएका थिए।
‘ऊनको स्वीटर’मा विपिन, मिरुना, एलेक्स, परीक्षा, सुरज, भावनासँगै विल्सन विक्रम राई, सुनिल पोखरेल, माओत्से गुरुङ, प्रेम सुब्बालगायतका कलाकारको अभिनय रहेको छ । सुजन चापागाईँ र झुमा लिम्बुको सङ्गीत र नवीन चौहानको लेखन तथा निर्देशनमा बनेको यो चलचित्रले सांस्कृतिक विविधता, सामाजिक अन्तर्विरोध र नेपाली समाजका जीवन्त रङ्गहरूलाई एउटै कथामा गाँस्ने प्रयास गरेको छ ।
काठमाडौं । निर्देशक कृषा चौलागाईं निर्देशित चलचित्र ‘पीताम्बर’ ले विशेष शो आयोजना गरेको छ। मङ्गलवार सिटी सेन्टरको बिग मुभिजमा निर्माण टिमले चलचित्रको विशेष शो आयोजना गरेको हो। चलचित्र हेर्न अधिकांश फिल्मकर्मी हल पुगेका थिए ।
चलचित्र हेरेपछि उपस्थित सबैले निर्देशक कृषा चौलागाईँको कामको तारिफ गरे। चलचित्र हेरेर निस्किएका अभिनेता केदार प्रसाद घिमिरे (माग्नेबुढा) ले ‘पीताम्बर’ राम्रो बनेको प्रतिक्रिया दिए।
उनले भने, ‘एकदम राम्रो लाग्यो। सबै जनाको अभिनय एकदम जोडदार छ। एक्सन त्यस्तै राम्रो छ। निर्देशकिय पक्ष झनै राम्रो। चलचित्रमा एक ट्रक कलाकार रहेछन् तर सबैको काम एकदम राम्रो लाग्यो।’
कार्यक्रममा बोल्दै केदारकी श्रीमती तथा कलाकार सीतादेवी तिमिल्सेनाले पनि चलचित्रको सबै पक्ष राम्रो लागेको बताइन्। चलचित्र हेर्न निर्देशक तथा कलाकार शोभित बस्नेत पनि पुगेका थिए।
चलचित्रको तारिफ गर्दै उनले अष्ट्रेलियामा हुँदा पनि हेरेको र आज पनि फिल्म दोहोर्याएर हेरेको बताए। उनले भने, ‘यो फिल्ममा सबै पक्षको काम राम्रो छ। कलाकारहरूले एकदमै राम्रो काम गरेका छन् । सौगात मल्ल र प्रमोद अग्रहरीलाई त स्यालुट नै गर्न मन लागेको छ।’
हालै आफ्नो चलचित्र ‘परान’को छायांकन र निर्देशन सकेर काठमाडौँ फर्किएका दीपक आचार्य (काकु) ले पनि चलचित्रको तारिफ गरे। उनले भने, ‘कृषाजीको हिम्मत र आँटलाई मैले माने। उहाँको कामलाई हामीले सलाम गर्नेपर्छ। यो लेबलको एक्सन मुभी सायदै नेपालमा पहिलो पटक बनेको जस्तो लाग्यो।’
त्यस्तै, चलचित्र हेर्न पुगेका अर्का हास्य कलाकार राजाराम पौडेलले पनि निर्देशक कृषा चौलागाईँको तारिफ गरे।
‘पिताम्बर’ मा सौगात मल्ल, सुरक्षा, प्रदीप खड्का, दयाहाङ राई, सौगात मल्ल, आर्यन सिग्देल, अनुपविक्रम शाही, सुरक्षा पन्त, गौरी मल्ल, रविन्द्र झा, प्रमोद अग्रहरि, कामेश्वर चौरासिया, टिका पहाडी, सुलभ पहाडी, सुरवीर पण्डित, विशाल पहाडी, दिव्यदेव पन्त, सुपुष्पा भट्ट, दिव्या रायमाझी, गौरव विष्ट, आशिष पुरुष, ललित विष्ट, किशोर भट्ट, विनोदकुमार पौडेल, नारायण काफ्ले र रविन्द्र भट्टराईको अभिनय छ।
केपी फिल्मस् र पुरुषोत्तम प्रधान फिल्मस्को ब्यानरमा निर्माण भएको चलचित्रमा कृषा चौलागाईंको निर्देशन छ । चलचित्रमा बाल कलाकारका रूपमा आर्नव घिमिरे, प्रयुस दत्त सुवेदी, आध्या लामिछाने, आरोह चौलागाईं र सुप्रोल बुढाथोकी ९अनमोल०ले समेत अभिनय गरेका छन् ।
विशाल चौलागाईं निर्माता रहेको चलचित्रमा पुरुषोत्तम प्रधान, आध्य लामिछाने र आरोह चौलागाईं सह–निर्माता, सुमन गौतम कार्यकारी निर्माता, प्रदीप भारद्वाज र अभिमन्यु निरवीको पटकथा र संवाद, पुरुषोत्तम प्रधानको डीओपी, शेरबहादुर लामा र मानकृष्ण महर्जनको छायांकन, बन्दे प्रसादको सम्पादन र, काला चरनको पाश्र्व संगीत, रेनिस फागोको कलर ग्रेडिङ, आशीष अविरल र बाबुल गिरीको संगीत र हिमाल केसीको द्वन्द्व छ।
काठमाडौं । आगामी जेठ २३ मा प्रदर्शन हुने फिल्म ‘जन्ते बाख्रो’ पोस्टर सार्वजनिक गरिएको छ । हास्य, रहस्य, ग्रामीण परिवेश र समसामयिक विषयलाई संयोजन गर्दै तयार गरिएको यो पोस्टरमा फिल्मका सम्पूर्ण मुख्य कलाकार फिचर्ड छन् ।
पोस्टरमा धेरै कलाकारहरू देखिन्छन्, सबैभन्दा अगाडि एउटा बाख्राको छ, जसले गुलाबी रङको चस्मा लगाएको छ । सार्वजनिक पोस्टरलाई रोयल भीमसेन र ट्राइडेन्ट कन्सेप्ट टिमले तयार पारेको हो ।
पोस्टरमा देखिएका पात्रहरूकै हाउभाउले सिनेमामा रोमाञ्चक कथा र हास्यपूर्ण ट्विस्ट हुने संकेत गर्छ ।
सार्वजनिक पोस्टरमा अभिनेता सौगात मल्ल, गरिमा शर्मा, आशिफ शाह , लोकेन्द्र लेखक, विशाल पहारी, कमल देवकोटा, रुषा न्यौपाने लगायतका कलाकारहरू देखिएका छन् ।
पोस्टरमा बाख्रोलाई पोस्टरको केन्द्रीय पात्र बनाइनुले कथावस्तुमा केही रहस्यात्मक र हास्यपूर्ण मोड हुने संकेत गर्छ ।
सिमोश सुनुवारको निर्देशन तयार भएको सिनेमा‘जन्ते बाख्रो’ मा रमा थपलिया, कुसुम शर्मा, स्नेहा जोशी, समापिका गौतम, कुशल गजमेर लगायतका कलाकारहरूको पनि अभिनय रहेको छ ।
मुईन इन्टरटेनमेन्टको प्रस्तुतिमा तयार भएको सिनेमा‘जन्ते बाख्रो’ सामाजिक कमेडी कथावस्तुमा आधारित छ । सन्तोष गौतमको निर्माणमा तयार भएको सिनेमा लाई प्रदीप भारद्वाजले लेखेका हुन् ।
नेपाली समाजमा बेहुली भित्र्याउने दिन जन्तीलाई खुवाइने भोजलाई जन्ते बाख्रो भन्ने गरिन्छ, सिनेमाको कथा यसै प्रचलनमा आधारित छ ।
सिनेमामा हरि हुमागाईँको छायांकन निर्देशन, उत्तम हुमागाईँको छायांकन, सुनिल शिवभक्तिको सम्पादन रहेको टिफल्क फिल्मसले वितरण गर्ने फिल्मको डिजिटल राइट्स जी टु वान डिजिटलले खरिद गरेको छ ।
काठमाडौं । यही जेठ ११ गते हुन लागेको जिन्सेओ एरिगाटो इन्टरनेशनल फिल्म फेस्टिभल २०२५ का लागि नेपालबाट मनोनयनमा परेकाहरुको सूची सार्वजनिक गरिएको छ ।
फेस्टिभलमा एक्सन विधामा फिल्म ‘पिताम्बर’बाट ३ जना मनोनयनमा परेका छन् । यसै फिल्मबाट बेस्ट एक्टरमा सौगात मल्ल, ब्रेक थ्रु पर्फमेन्समा अनुपविक्रम शाही र बेस्ट निर्देशकमा कृषा चौलागाईं मनोनयनमा परेका हुन् ।
त्यस्तै ड्रामा विधामार्फत फिल्म ‘तेल भिसा’बाट अभिनेता विपीन कार्की छनोट भएका छन् । अभिनेत्री वर्षा राउत बेस्ट एक्ट्रेसमा मनोनयनमा परेकी छन् ।
‘रंगी’बाट सलोन बस्नेत बेस्ट एक्टर र ड्रामा विधामा उत्कृष्ट फिल्मको मनोनयनमा ‘रंगी’ परेको छ ।
जापानमा नेपाली फिल्म वितरण गर्दै आएको युना इन्टरटेन्मेन्टले ‘जिन्सेओ एरिगाटो इन्टरनेशनल फिल्म फेस्टिभल २०२५’ आयोजना गर्न लागेको हो । यस फेस्टिभलमा विभिन्न देशका फिल्महरू समावेश हुनेछन् ।
आयोजक युना इन्टरटेन्टमेन्टका प्रमुख उज्ज्वल गुरागाईंका अनुसार यस फेस्टिभल नेपाली फिल्महरूको ऐतिहासिक सफलता हुनेछ ।
यस फेस्टिभलको पुरस्कार वितरण समारोह आगामी मे २५ अर्थात जेठ ११ गते साँझ ५ बजे जापानको मेनिकन कला र संस्कृति मेमोरियल फाउन्डेसन (मुख्य थिएटर आओइ) नागोयामा गरिनेछ ।
काठमाडौं । साउनको २३ गतेबाट रिलिजमा आउन लागेको चलचित्र ‘मोहर’को फर्स्टलुक पोस्टर सार्वजनिक भएको छ । निर्माण पक्षले बुधबार चलचित्रको फर्स्टलुक सार्वजनिक गरेको हो।
सार्वजनिक फर्स्टलुकमा चलचित्रका मुख्य नायक पल शाह र नायिकाद्वय बेनिशा हमाल र नीति शाहलाई स्थान दिइएको छ । त्यस्तै अर्का कलाकार अर्जुनजंग शाहीलाई पनि पोस्टरमा देख्न सकिन्छ ।
चलचित्रमा पल, नीति र बेनिशासँगै मिथिला शर्मा, रवीन्द्र झा, लक्ष्मी गिरी र बाल कलाकार सारा शर्माको पनि अभिनय छ । ओम प्रतीकको लेखन तथा निर्देशनमा तयार भएको यस चलचित्रका निर्माता चुम्बनजंग शाही हुन् ।
फिल्म मेकर्स प्रालिको व्यानरमा निर्माण भएको यस चलचित्रमा दीपेन बस्न्यातको डीओपी, कुमार महर्जनको एक्सन, भूपेन्द्र अधिकारीको सम्पादन, सुरेश अधिकारी र एसडी योगीको संगीत, प्रमोद ढुंगाना र हर्क साउदको शब्द छ ।
गिरिराज घिमिरे मुख्य सहायक निर्देशक रहेको चलचित्रमा कविराज गहतराज र रामजी लामिछानेको नृत्य निर्देशन छ ।
लक्ष्मणराज पौडेल निर्माण नियन्त्रक रहेको यस चलचित्रको छायांकन दाङ, अर्घाखाँची, रोल्पा, प्यूठान र काठमाडौंमा गरिएको छ ।
काठमाडौं । यही वैशाख २६ गते रिलिजको तयारीमा रहेको चलचित्र ‘ऊनको स्वीटर’को ट्रेलर सार्वजनिक गरिएको छ । मङ्गलबार काठमाडौंको प्रज्ञा प्रतिष्ठानमा आयोजित एक विशेष कार्यक्रममा चलचित्रको ट्रेलर सार्वजनिक गरिएको हो ।
ट्रेलर रिलिज कार्यक्रममा चलचित्रका निर्देशकदेखि मुख्य कलाकारहरु सबै उपस्थित थिए। कार्यक्रममा बोल्दै चलचित्रका निर्देशक नवीन चौहानले ‘ऊनको स्वीटर’ को कथा पाँचथरदेखि भारतको वेस्ट बङ्गालको सीमासम्म फैलिएको बताए । उनले भने, ‘चलचित्र बनाउने सपना बोकेदेखि ट्रेलर सार्वजनिक गर्नेसम्मको यात्रा निकै चुनौतीपूर्ण भयो। चलचित्रमार्फत मैले एउटा संसार बनाउने प्रयास गरेको छु। सुरुमा म एक्लैले देखेको सपना, अब सयौँ जनाको भएको छ।’
आर्टमाण्डू प्रालिको पहिलो फिचर चलचित्र ‘ऊनको स्वीटर’ पूर्वी नेपालको पाँचथर जिल्लामा छायाङ्कन गरिएको यथार्थवादी सामाजिक कथानक चलचित्र हो । चलचित्रमा अभिनेता विपिन कार्कीले मुख्य भुमिका निभाएका छन् । विपिनले कार्यक्रममा पाँचथरको यात्रालाई स्मरण गर्दै र सबै पाँचथरे सहयोगीलाई धन्यवाद दिदै भने,’गीतजस्तै यो चलचित्र पनि उत्कृष्ट बनेको छ। चलचित्रले दर्शकको मन जित्नेमा म विश्वस्त छु।’
चलचित्रकी मुख्य अभिनेत्री मिरुना मगरले आफूले निभाएको फुलु गुरुङको पात्रबाट ‘ऊनको स्वीटर’जस्तै न्यानोपन दर्शकसम्म पुर्याउने प्रयास गरेको बताइन् । उनले यो चलचित्र हेरेपछि आर्टमान्डूले सुरुवात गरेको चलचित्रको बेग्लै संसारमा पुगिने जनाइन् । त्यस्तै, चलचित्रकी अर्की नायिका परीक्षा लिम्बूले पनि एक वर्षपछि फेरि चलचित्रको प्रचारमा सहभागी हुन पाएकोमा खुसी व्यक्त गर्दै निर्देशक चौहानको क्यानभासमा काम गर्न पाउनु आफ्नो लागि भाग्यको कुरा भएको बताइन् ।
‘ऊनको स्वीटर’मा विपीन, मिरुना, एलेक्स, परीक्षा, सुरज, भावनासँगै विल्सन विक्रम राई, सुनिल पोखरेल, माओत्से गुरुङ, प्रेम सुब्बालगायतका कलाकारको अभिनय रहेको छ । सुजन चापागाईं र झुमा लिम्बूको सङ्गीत र नवीन चौहानको लेखन तथा निर्देशनमा बनेको यो चलचित्रले सांस्कृतिक विविधता, सामाजिक अन्तर्विरोध र नेपाली समाजका जीवन्त रङ्गहरूलाई एउटै कथामा गाँस्ने प्रयास गरेको छ ।
काठमाडौं । अभिनेता समीर भट्टको जन्म दिनको अवसर पारेर चलचित्र ‘बलिदान’को प्रि-टिजर सार्वजनिक गरिएको छ । यस वर्षको दशैंको फूलपातीमा प्रदर्शनमा आउने तयारीमा रहेको चलचित्रको टिजर अभिनेता भट्टको जन्मदिनको अवसर पारेर शुभकामना स्वरूप सार्वजनिक गरिएको हो ।
प्रि-टिजरमा अभिनेता समीरका दमदार एक्सन दृश्यहरू प्रस्तुत गरिएको छ । भिडियोको अन्त्यमा समीरको आक्रोशपूर्ण चिच्याहटले दृश्यलाई अझ प्रभावशाली बनाएको छ ।
चलचित्रका निर्देशक सन्तोष सेनका अनुसार समीरमा कलाकारिता र अभिनयका सबै गुण भरिएका छन् र ‘बलिदान’ले ती सबै पक्ष उजागर गरेको छ । सेनले प्रि-टिजरलाई समीरको प्रस्तुतिको झलक भन्दै यो सिरिजमा थप झिल्काहरू क्रमशः सार्वजनिक गरिने जानकारी दिए ।
चलचित्रमा समीर भट्टसँगै सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी, प्रेम पुरीलगायतको अभिनय रहेको छ । आसुसेन फिल्म्स् प्रालिको प्रस्तुति रहेको यस चलचित्रका निर्माता पवन ब्राडफोर्ड बिस्ट हुन् भने प्रेम पुरी कार्यकारी निर्माता हुन् ।
गत वर्ष दशैंमै प्रदर्शनमा आएको समीरको डेब्यु चलचित्र ‘१२ गाउँ’ले बक्स अफिसमा १९ करोडमाथिको ग्रस कलेक्सन गरेको थियो । साथै समीरको एक्सन अवतार र सुगठित शरीरको समेत चर्चा भएको थियो ।
मानौँ, कोही व्यक्ति आफ्नै घरबाट लखेटियो । यसरी लखेटियो कि उसले घरभित्र भएका सरसामान पनि राम्रोसँग उठाउन पाएन । आफू जन्मिएको, हुर्किएको घरलाई अन्तिम पटक राम्रोसँग हेर्न पनि पाएन । एक सेकेण्ड मात्रै ढिला भएको थियो भने उसको छाती गोलीले वारपार पार्न सक्ने थियो ।
यसरी भाग्ने क्रममा उसको घर, आँगन, बारी र भूगोलसँग मात्रै छुटेन । ज्यान जोगाउने ध्याउन्नमा आमा, बा, दिदी, बहिनी, दाजु, भाइ, छोरा, छोरी, आफन्त वा इष्टमित्रमध्ये कोही न कोहीसँग ऊ छुटिन बाध्य भयो । पल भरमै हुरीले हाँगाहरू तछारिसकेपछि जरै उखेलेर उडाएको सिमलको रुखजस्तो भयो ऊ ।
दुई मुठी सासमा अल्झिएको ज्यान बचाउन हेर्दाहेर्दै उसले देशकै सीमाना काट्यो । र होसहवासमा आएर हेर्द ऊ केही घण्टामै शरणार्थी भइसकेको थियो । फेरि आफ्नो घरमा कहिल्यै फर्कन नसक्ने भइसकेको थियो । यस्तो वेला त्यो व्यक्तिको मनस्थिति कस्तो होला ? दिमागमा कस्ता कस्ता कुराहरू खेल्लान् ? उसले आफूलाई कसरी सम्हालेर जीवन चलाउला ? अहिले हलमा चलिरहेका ‘भुठान ः घर हराएको कथा’ले शरणार्थीको यही मनोदशालाई उप्काउने कोसिस गरेको छ ।
विनोद पौडेल निर्देशित यो चलचित्रले विष्णुबहादुर केसी (हरिवंश आचार्य) नामक पात्रमार्फत् शरणार्थी भएर आफू जन्मिएको, हुर्किएको थातथलोमा जति कोसिस गरे पनि जान नपाउँदाको मनोदशालाई पत्र–पत्रमा केलाउने कोसिस गरेको छ । कुनै समय भुटानको राष्ट्रिय टिमबाट गोलकिपरको रूपमा फुटबल खेलेका विष्णुबहादुरले एक झलक भुटानको घर हेर्न अमेरिकाबाट हजार कोसिस गर्छ, तर भुटान सरकारले उसलाई अनुमति दिँदैन । चाहेर पनि आफू जन्मिएको माटोमा टेक्न नपाएको घिडघिडोसहित बाँचिरहेको छ ऊ ।
विष्णुबहादुरको ज्यान अमेरिकामा छ, उसको मन भुटानमा । अमेरिका बसिरहे पनि ऊ भुटानको नोस्टालजियासितै बाँचिरहेको छ । कहिले आमाको काखमा निदाएको कल्पनामा बाँच्छ । कहिले भुटानको सिमलको रुखसँग बाँच्छ । विष्णुबहादुर कति धेरै रिक्ततासँग बाँचिरहेको छ भन्नका लागि निर्देशक पौडेलले एक संवादको प्रयोग गरेका छन् ।
विष्णुबहादुर एक नर्सरीमा गुनगुन गुनगुन गुनगुनाउँछ । यहीबेला गीतकै सन्दर्भमा अर्का पात्रसँगको कुराकानीमा विष्णुबहादुरले भन्छ, ‘भुटान छाड्दा स्वर पनि उतै छाडेर आएँछु ।’
विष्णु बहादुरहरुले स्वर मात्रै होइन, धेरैथोक भुटानमै छाडेका छन् । र हाडछालाको शरीर मात्र लिएर अमेरिका पुगेका छन् । त्यसैले उनीहरू रित्ता छन् । रिक्ततामा बाँचिरहेका छन् ।
बाहिर हेर्दा धपक्कजस्तो देखिए पनि भित्रभित्रै उनीहरू निभेका छन् । विष्णुबहादुर मार्फत् पहिलो पुस्ताका भुटानी शरणार्थीहरूको मनोदशा देखाउन निर्देशक पौडेलले प्रकाशको संयोजनदेखि ब्याकग्राउण्ड स्कोर, उत्कृष्ट सम्पादनदेखि सिनेम्याटोग्राफीसम्ममा मिहेनत गरेको देखिन्छ ।
चलचित्रको ओपनिङ दृश्यमै विष्णुबहादुर कोठामा फोनमा कुरा गरिरहेको छ । झ्यालमा सेतो पर्दा छ । पर्दा बाहिर उज्यालो छ । उक्त उज्यालोलाई पर्दाले छेकेको छ । विष्णुबहादुर चाहिँ झ्यालभित्र छायामा उभिएको छ । निर्देशक पौडेलले विष्णुबहादुरभित्रको रिक्तता र निराशालाई पहिलो दृश्यमै स्थापित गरिदिएका छन् ।
अर्को दृश्य छ,– जहाँ सेताम्मे हिउँ परेको छ, पात झरेको एक्लो रुख टिङ्ग्रिङ्ग छ । अनि बिस्तारै विष्णुबहादुरलाई देखाइन्छ । यस्ता धेरै दृश्यले विष्णुबहादुरभित्रको रिक्ततालाई देखाउने कोसिस गरेको छ ।
विष्णुबहादुर बिरामी छ, औषधि पनि खाइरहेको छ । उसलाई पोस्ट ट्रमाटिक स्ट्रेस डिसअर्डर छ । डरलाग्दो र तनावपूर्ण घटना कुनै व्यक्तिमा घटेपछि यस्तो मानसिक समस्या देखिन्छ । विष्णुले झेलिरहेको यो मानसिक समस्या र ऊभित्रको रिक्तताको निराकरण मेडिकल औषधि वा आध्यात्मिक चिन्तन, मननबाट सम्भव छैन । यसका लागि विष्णुबहादुर भुटान पुग्नुपर्छ । उसको पैतालाले भुटानको माटो टेक्नुपर्छ । यसैको आशामा विष्णुबहादुरले बिरामी शरीरलाई अमेरिकामा लतारिरहेको छ ।
भुटान सम्झनसाथ, भिसा सम्झनसाथ, माटो सम्झनसाथ उत्साहित हुने विष्णुबहादुर अन्य समय निराशामा मात्रै गुज्रिरहन्छ । दुई श्रीमती छन्, छोराहरू छन्, बुहारी छे, नातिनी छे । र पनि विष्णुबहादुर रित्तो छ । त्यो रित्तोपन भर्ने चिज एउटै छ, भुटानको भिसा ।
चलचित्रमा एउटा दृश्य छ, विष्णुबहादुरले पुरानो बाकस खोल्छ । बाकसबाट मेडल झिक्छ । घाँटीमा लगाउँछ । फुटबल झिक्छ, हातले समाउँछ । चक्कु निकाल्छ । चक्कुले छेडेर फुटबलमा बाँकी रहेको अलिअलि हावा पनि फालिदिन्छ । यो दृश्यमा चक्कुले फुटबल छेडिरहँदा निर्देशक पौडेलले फुटबल देखाएका छैनन्, विष्णुबहादुरको अनुहार देखाएका छन् । यसबेला दर्शकको मन निचोरिन्छ । सम्भवतः भुटानको राष्ट्रिय फुटबल खेलाडी विष्णुबहादुरले घर फिर्ने सपनालाई तिलाञ्जलि दिएको देखाउन निर्देशक पौडेलले यो दृश्य प्रयोग गरेका हुन सक्छन् । अनि यही दृश्यमा हरिवंशको शानदार अभिनयको स्वाद समेत चाख्न पाइन्छ ।
सन् ९० को दशकमा लखेटिएका भुटानीहरू पूर्वी नेपाल आए । शिविर बनाएर बसे । सन् २००७ बाट अमेरिका, युरोप, अष्ट्रेलियातिर पुनर्वासका लागि जान थाले । पुनर्वासमा गएका पहिलो पुस्ताका भुटानी शरणार्थीको कथा हो, ‘भुठान ः घर हराएको कथा’ । जहाँ विष्णुबहादुरहरू आजका दिनसम्म पनि भावनात्मक रूपमा भुटानमै छन् । चलचित्रका विष्णुबहादुर त पलपलमा आमासँगको नोस्टालजियाबाट गुज्रिन्छन् । उसको आमा भुटानमै छुटेकी थिइन्, केही वर्ष पहिला संसार छाडेर गएकी थिइन् ।
तर, यो चलचित्र विष्णुबहादुरको कथामा मात्रै केन्द्रित छैन । यहाँ तीन पुस्ताको भुटानी शरणार्थीको कथा भनिएको छ । विष्णुबहादुरको छोरा बुहारी पुस्ताको कथा पनि छ यहाँ । उनीहरू न पूर्णरुपमा पश्चिमा जीवनशैलीसँग अभ्यस्त भएका छन्, न त पूर्णरुपमा भुटानबाट अलग भएका छन् । अनि तेस्रो पुस्ता छ, गुनगुनको पुस्ता । अर्थात् विष्णुबहादुरको नातिनीको पुस्ता । जो पूर्ण रूपमा पश्चिमा जीवनशैलीमा बाँचिरहेका छन्, तर परिवार, समुदायको माध्यमबाट संस्कार, संस्कृतिसँग जोडिइरहेका छन् ।
गुनगुनको पुस्ताको मनोविज्ञान केलाउन निर्देशक पौडेलले निरन्तरजसो मोबाइल चलाउने, अभिभावकको कुरै नसुन्ने र अमेरिकन लवजसहित अंग्रेजी बोल्ने मात्रै नभएर नेपाली बोल्दा पनि अंग्रेजी शब्द घुसाउने दृश्य, संवादहरू राखेका छन् । सँगै एलजीबीटीआइक्युको मुद्दालाई गुनगुन र उसको बाआमा पुस्ताले हेर्ने नजरियालाई पनि मीठोसँगले देखाइएको छ । गुनगुन बाआमासँगभन्दा हजुरबासँग नजिक छिन् । यो नजिकपनाले ज्ञान, अनुभव र संस्कृतिको पुस्तान्तरणको पक्षपोषण गरेको छ ।
चलचित्रमा समयको गतिलाई देखाउन एउटा दृश्य प्रयोग गरिएको छ, जहाँ खोला किनारमा विष्णुबहादुर र गुनगुन उभिएर कुरा गर्छन् । उनीहरूको संवादका क्रममा समय फर्कँदैन भन्नलाई बगिरहेको खोलाका सटहरूलाई निकै पटक देखाइएको छ । समय देखाउने सन्दर्भमा विष्णुबहादुरको किसिङ र बेड सिनपछि एकदमै द्रूत गतिमा कुदेको रेललाई देखाइएको छ । समय कति चाँडो बित्छ, पत्तै हुन्न भन्नलाई देखाइएको यो दृश्य गज्जबको छ ।
अर्को दृश्य छ, जहाँ विष्णुबहादुरको लासलाई जलाउने कि गाड्ने भनेर दाजुभाइबीच झगडा परिरहेको हुन्छ । गुनगुनले उक्त झगडा सुनिरहेकी हुन्छे । यहाँ गुनगुनलाई फ्रेमको बीचमा राखेर पछाडिको फलामको बार देखाइएको छ । बारभन्दा बाहिर उज्यालो देखाइएको छ । सायद, गुनगुनको निर्णयले परिवारमा कुनै महत्त्व राख्दैन भन्ने देखाउन पौडेलले यस्तो सटको छनोट गरेका हुन सक्छन् । किनभने यो दृश्यको केही समयपछि अर्को दृश्यमा पनि गुनगुनको पछाडि बार नै देखाइएको छ ।
विष्णुबहादुरको आफ्नो घर त हुन्न हुन्न, घाट पनि हुन्न । उसको लासलाई जलाउने कि गाड्ने भनेरै छोराहरुबीच लफडा हुन्छ । समग्रमा पश्चिमी पूँजीवादी समाजको वैभवभित्र बाँचिरहेका रित्ता–रित्ता भुटानी शरणार्थीहरूको प्रतिनिधि कथा हो यो चलचित्र । भिएफएक्समा अझै मज्जाले मिहेनत गरेको भए झनै गज्जब हुने थियो । जलिरहेको घरको आगोमाथि कागहरू नउडाएको भए पनि हुन्थ्यो । हरिवंशको किस सिन र बेड सिन नराखेको भए पनि हुन्थ्यो । बेडसिनले त केही पुष्टि नै गर्दैन, विष्णुबहादुरको नांगो शरीर मात्रै देखाउँछ । किस सिनमा पनि पात्रहरुबीच कुनै आत्मीयता देखिँदैन । सिर्फ किस गर्नका लागि गरेजस्तो मात्रै देखिन्छ ।
धेरै दृश्यहरू घरभित्रका छन् । कोठाभित्र छन् । गाडीभित्रका छन् । यस्ता दृश्यहरुमार्फत् पौडेलले सायद भुटानी शरणार्थीहरूको थुनिएको, बाँधिएको मनोदशालाई देखाउने कोसिस गरेका हुन् कि ? उनीहरूको उकुसमुकुसलाई देखाउन यसरी चलचित्रलाई खिचेका हुन् कि ?
केही समयअघि मात्रै डोनाल्ड ट्रम्प सरकारले देश निकाला गर्दै भुटान लगेर छाडेका र लगत्तै भुटान सरकारले देश निकाला गरेपछि नेपाल आइपुगेका छन् केही भुटानी शरणार्थीहरू । उनीहरूको मनोदशा कस्तो होला ! अनुमान मात्रै गर्दा पनि हामीलाई उकुसमुकस हुन्छ । एउटा मान्छे कति पटक शरणार्थी हुनसक्छ ? एउटा मान्छे कुनै देशको नागरिक बन्नलाई कति पटक आफ्नो थातथलो र देश छाड्न बाध्य हुनुपर्छ ? पटकपटक शरणार्थी हुँदा उसले झेल्ने भावनात्मक चोट र उसले बाँच्ने रिक्तताको क्षतिपूर्ति कसैले दिन सक्छ ? यिनै प्रश्नहरूको जवाफ खोज्ने कोसिस गरेको छ ‘भुठान ः घर हराएको कथा’ले ।